VOA News: ព័ត៌មាន: “សម្ព័ន្ធភាពសហភាពសហជីពកម្ពុជាបែកបាក់” plus 2 more |
- សម្ព័ន្ធភាពសហភាពសហជីពកម្ពុជាបែកបាក់
- អាជ្ញាធររកឃើញកន្លែងផលិតគ្រឿងញៀននៅកំពង់ស្ពឺ
- ប៉ូលិសកម្ពុជាបំពាក់ឧបករណ៍តាមដានជនល្មើសអន្តរជាតិ
| សម្ព័ន្ធភាពសហភាពសហជីពកម្ពុជាបែកបាក់ Posted: 04 Jul 2012 12:37 AM PDT សហភាពសហជីពកម្ពុជារបស់លោករ៉ុង ឈុន និងលោកជា មុន្នី នៅទីបំផុតបានប្រកាសបញ្ឈប់ការចងសម្ព័ន្ធជាមួយគ្នា នៅក្នុងខណៈពេលដែលដំណើរការបោះឆ្នោតជាសកលនៅឆ្នាំ២០១៣ កំពុងតែខិតជិតមកដល់។ សហភាពសហជីពកម្ពុជាត្រូវបានបង្កើតឡើងកាលពីខែសីហា ឆ្នាំ២០០៦ រវាងសមាគមគ្រូបង្រៀនឯករាជ្យកម្ពុជារបស់លោករ៉ុង ឈុន និងសហជីពសេរីកម្ពុជារបស់លោកជា មុន្នី។ កន្លងមកសហភាពសហជីពកម្ពុជា មាននិន្នាការគាំទ្រប្រជាធិបតេយ្យដែលជាផ្នែកមួយនៃការរកសំឡេងឆ្នោតពីក្រុមកម្មករសម្រាប់គណបក្សជំទាស់។ នៅក្នុងសេចក្តីប្រកាសព័ត៌មានកាលពីថ្ងៃទី២៧ កន្លងទៅនេះលោកជា មុន្នី បានចោទប្រកាន់ថានៅក្នុងរយៈពេលកន្លងទៅថ្មីៗនេះ សកម្មភាពរបស់សហជីបកម្ពុជា CCU ជារឿយៗ បានដើរផ្ទុយពីគោលបំណង និងគោលដៅរបស់សហជីបសេរីកម្មករនៃព្រះរាជាណាចក្រកម្ពុជា ដែលទាមទារឲ្យគិតគូរទៅដល់ឧត្តមប្រយោជន៍របស់កម្មករ។ សេចក្តីប្រកាសព័ត៌មានដដែលបានបញ្ជាក់ថា សហជីពសេរីកម្មករបានបញ្ជាក់ថាចាប់ពីពេលនេះតទៅនឹងបញ្ឈប់ការចងសម្ព័ន្ធភាពជាមួយនឹងសមាគមគ្រូបង្រៀនឯករាជ្យកម្ពុជា និងមិនស្ថិតនៅក្រោមដំបូលនៃស្ថាប័នសហភាពសហជីបកម្ពុជានោះទៀតឡើយ។ លោកជា មុន្នី ប្រធានសហជីបសេរីកម្មករនៃព្រះរាជាណាចក្រកម្ពុជាបានបញ្ជាក់ថាមូលហេតុដែលនាំឲ្យបញ្ឈប់ការចងសម្ព័ន្ធភាព ដោយសារតែការស្នើសុំចុះបញ្ជីការរវាងសម្ព័ន្ធអ្នកទាំងពីរនៅឯក្រសួងការងារត្រូវបានបដិសេធ ដោយសារតែសមាគមគ្រូបង្រៀនឯករាជ្យកម្ពុជាត្រូវការចុះបញ្ជីការនៅឯក្រសួងមហាផ្ទៃ។ សហជីបសេរីកម្មករចុះបញ្ជីការនៅក្រសួងការងារ។ «យើងនៅពេលដែលគេមិនឲ្យបញ្ជីការ យើងធ្វើការបែកគ្នាមែនពិត។ ប៉ុន្តែអ្វីៗ នៅតែជាការសហការគ្នាទៅវិញទៅមកទេ ពាក់ព័ន្ធនឹងប្រយោជន៍ជាតិ»។ លោករ៉ុង ឈុន ប្រធានសមាគមគ្រូបង្រៀនឯករាជ្យកម្ពុជាបានមានប្រសាសន៍នៅក្នុងពេល ដែលលោកដឹកនាំការតវ៉ារបស់ក្រុមកម្មករនៅរោងចក្រមួយនៃស្រុកអង្គស្នួល ខេត្តកណ្តាល ថា លោក មានការសោកស្តាយចំពោះការបញ្ឈប់ការចងសម្ព័ន្ធភាពគ្នានេះ។ ក៏ប៉ុន្តែលោករ៉ុង ឈុន មិនបានធ្វើអត្ថាធិប្បាយអ្វីបន្ថែមទៀតទេ។ «ខ្ញុំមិនបានដឹងច្បាស់អំពីមូលហេតុអ្វីដែរ ជុំវិលការដែលសុំលាចេញពីសហភាពសហជីបកម្ពុជា។ ពីព្រោះកន្លងមកដែលយើងទិសដៅដើរស្របគ្នា ប៉ុន្តែពេលនេះយើងមិនដឹងពីមូលហេតុ ហើយក៏យើងមិនធ្វើអត្ថាធិប្បាយដែរ»។ លោកយឹម សុវណ្ណ អ្នកនាំពាក្យគណបក្សសម រង្ស៊ី បានមានប្រសាសន៍ថា ការបែកផ្លូវគ្នារវាងគណបក្សនយោបាយ និងអង្គការសង្គមស៊ីវិលមួយចំនួនភាគច្រើនមានការលូកដៃពីគណបក្សនយោបាយ ដោយសារតែសង្គមស៊ីវិលទាំងនោះចង់បានប្រយោជន៍ផ្ទាល់ខ្លួន។ «សុំឲ្យសង្គមស៊ីវិលទាំងអស់ សមាគមទាំងអស់ដែលគោរពគោលការណ៍ប្រជាធិបតេយ្យដែលចង់ជួយប្រជាពលរដ្ឋយើង គឺសមាគមនៅក្នុងសហជីបហ្នឹង គឺយើងត្រូវរួបរួមគ្នានៅក្នុងកាលៈទេសៈនេះ។ បើយើងមិនរួបរួមគ្នាទេ គឺយើងពិបាកនឹងធ្វើការបម្រើឲ្យផលប្រយោជន៍ឲ្យសមាជិករៀងៗខ្លួនណាស់»។ លោកបណ្ឌិតឡៅ ម៉ុងហៃ អ្នកវិភាពឯករាជ្យមួយរូបបានមានប្រសាសន៍ថាលោជា មុន្នី ចង់បានឯករាជ្យរបស់ខ្លួនកុំឲ្យឋិតនៅក្រោមស្លាបរបស់លោករ៉ុង ឈុន។ លោកបានមានប្រសាសន៍ថាប្រសិនណាបើសហជីបមួយៗ កសាងកម្លាំងរៀងៗខ្លួន ដើម្បីការពារឲ្យផលប្រយោជន៍ក្រុមកម្មករ គឺជាការល្អប្រសើរមួយ។ «ខ្ញុំថាសម្រាប់សមាជិកសហជីពរៀងៗខ្លួន ខ្ញុំថាល្អប្រសើរជាង ព្រោះអាចផ្ចង់អារម្មណ៍ទៅរកប្រយោជន៍ និងការពារសិទ្ធរបស់សមាជិករៀងៗខ្លួនគឺរឹតតែប្រសើរជាង»។ លោក រ៉ុង ឈុន និងលោក ជា មុន្នី កន្លងមកធ្លាប់បានដឹកនាំការចូលរួមធ្វើបាតុកម្មរបស់ក្រុមកម្មករ និងធ្វើការតវ៉ាផ្សេងៗជាមួយគ្នា។ ក៏ប៉ុន្តែក្នុងរយៈកាលចុងក្រោយនេះ អ្នកទាំងពីរមិនសូវមានការជួបមុខគ្នាទេនៅក្នុងពេលដែលមានការតវ៉ាផ្សេងៗ៕ This posting includes an audio/video/photo media file: Download Now |
| អាជ្ញាធររកឃើញកន្លែងផលិតគ្រឿងញៀននៅកំពង់ស្ពឺ Posted: 04 Jul 2012 12:21 AM PDT ក្រុមសមត្ថកិច្ចកងរាជអាវុធហត្ថ និងប៉ូលិសខេត្តកំពង់ស្ពឺបានរកឃើញទីតាំងផលិតថ្នាំញៀនដ៏ធំមួយនៅថ្ងៃអង្គារនេះ ប៉ុន្តែមិនបានចាប់ជនសង្ស័យណាម្នាក់នោះទេ។ ទីតាំងផលិតគ្រឿងញៀននោះស្ថិតនៅក្នុងកសិដ្ឋានចិញ្ចឹមជ្រូកមួយនៃភូមិកូនត្រុំ ឃុំអូរ ស្រុកភ្នំស្រួច ដែលស្ថិតនៅចម្ងាយ៧៨ គីឡូម៉ែត្រខាងលិចរាជធានីភ្នំពេញ។ នៅក្នុងការចុះបង្រ្កាបនៅព្រឹកថ្ងៃអង្គារនេះ ក្រុមសមត្ថកិច្ចមិនបានរកឃើញធាតុផ្សំនៃគ្រឿងញៀនដែលនៅសេសសល់ច្រើននោះទេ ក៏ប៉ុន្តែបានរកឃើញឧបករណ៍ផលិតគ្រឿងញៀនជាច្រើន។ លោកវីរសេនីយ៍ឯក ចាន់ ដា មេបញ្ជាការរងកងរាជអាវុធហត្ថខេត្តកំពង់ស្ពឺ ដែលបានដឹកនាំប្រតិបត្តិការនេះជាមួយក្រុមប៉ូលិសមានប្រសាសន៍ថា ឆ្មាំចាំកសិដ្ឋានម្នាក់បានរាយការណ៍ជូនអាជ្ញាធរបន្ទាប់ពីឆ្មាំកសិដ្ឋានរូបនោះធំក្លិនចម្លែកខ្លាំងក្នុងកសិដ្ឋាននេះ។ «ក្នុងនោះមានទឹកគាត់បានចាក់ចូលនៅក្នុងប្រឡាយ ហើយម្សៅក៏បានចាក់ចូលនៅក្នុងប្រឡាយដែរ ហើយយកដីកប់។ ខ្ញុំឃើញមានតែសម្ភារៈរបៀបផលិតហ្នឹងនៅមាន មានធុង មានអីផ្សេងៗច្រើនដូចជាធុងជ័រចំណុះមួយរយលីត្រចំនួន៧១ធុង និងចំណុះ៥០លីត្រចំនួន១១ធុង និងថង់ដែលហៅថាការ៉ុងជាតិផ្សៅហ្នឹងមានចំនួន១២០ការ៉ុង និងមួយចំនួនទៀតគាត់ធ្វើការចាក់ចោលទឹក ហើយនឹងកប់សារធាតុនេះនៅក្នុងប្រឡាយទាំងអស់»។ លោក ចាន់ ដា មានប្រសាសន៍ថា ក្រុមសមត្ថកិច្ចកំពុងតាមរកចាប់ខ្លួនជនជាប់សង្ស័យនៅឡើយ។ មានក្លិនឆួលយ៉ាងខ្លាំងនៅក្នុងបន្ទប់ផលិតគ្រឿងញៀនដែលស្ថិតក្នុងរោងផ្ទាល់ដីសង់បណ្តោយថ្ងៃ។ ក្នុងរោងនេះមានការសង់ជាបន្ទប់ខណ្ឌមានសណ្ឋានដូចជាទ្រុងចិញ្ចឹមជ្រូក។មានចំហាយធ្វើឲ្យក្រហាយភ្នែកយ៉ាងខ្លាំងនៅទីនេះ។ ក្នុងកសិដ្ឋានដដែលព័ទ្ធជុំវិញដោយរបងថ្ម និងបិទទ្វារជិតដែលអ្នកភូមិមិនអាចមើលឃើញ ពីក្រៅបានទេ។ មានរោងប្រក់សង្កសីដូចៗគ្នានេះជាច្រើនទៀត ហើយរោងមួយចំនួនត្រូវប្រើជាឃ្លាំងសម្រាប់ផ្ទុកសារធាតុផ្សុំរបស់គ្រឿងញៀន។ ក្រុមបច្ចេកទេសត្រួតពិនិត្យគ្រឿងញៀនរបស់ក្រសួងមហាផ្ទៃបានធ្វើការពិសោធន៍បឋមនៅទីកន្លែងដែលរកឃើញនេះ។ ប៉ុន្តែមិនទាន់មានការសន្និដ្ឋានជាផ្លូវការនៅឡើយ។ លោក ម៉ែន សុផល ប្រធានបច្ចេកទេសនៃការិយាល័យប្រឆាំងគ្រឿងញៀនរបស់ក្រសួងមហាផ្ទៃមានប្រសាសន៍ថា គ្រឿងញៀនផលិតនៅទីនេះអាចជាប្រភេទគ្រឿងញៀនម្យ៉ាងដែលមានឈ្មោះថា ម៉េតំហ្វេតាមីនទឹកកក។ «ដូចជាកែវបាឡុង ទុកយូរណាស់ ពីតុងអាស៊ីត ហើយសាធាតុមួយចំនួន ឈើធុង ពីតុងអាស៊ីតហ្នឹង វាសម្រាប់បម្រើឲ្យផលប្រយោជន៍ដល់គ្រឿងញៀន។ គ្រឿងញៀននេះ បើវាផលិតចេញមកគឺម៉េតំហ្វេតាមីនទឹកក។ អាហ្នឹងវាមានផលប៉ះពាល់ច្រើនណាស់ ប៉ះពាល់ដល់សរសៃប្រសាទ អារម្មណ៍មិននឹងនរពេលដែលយើងប្រើគ្រឿងញៀនហ្នឹងទៅគឺប៉ះពាល់ដល់សុខភាពយើងយ៉ាងខ្លាំងបំផុត»។ កម្ពុជាបានក្លាយជាប្រទេសមានទីតាំងផលិតគ្រឿងញៀនផង និងសម្រាប់ការរត់ពន្ធគ្រឿងញៀនឆ្លងកាត់ផង។ កាលពីប៉ុន្មានខែមុនក្រុមសមត្ថកិច្ចកម្ពុជាបានរកឃើញទីតាំងផលិតគ្រឿងញៀនក្នុងក្រុងភ្នំពេញ។ ដោយឡែកអង្គភាពប្រឆាំងគ្រឿងញៀនរបស់ក្រសួងមហាផ្ទៃខ្មែរបានចាប់បានសារធាតុសម្រាប់ផលិតគ្រឿងញៀនចំនួនប្រមាណប្រាំមួយតោននៅក្នុងស្រុកភ្នំស្រួចនេះដែរ កាលពីប៉ុន្មានឆ្នាំកន្លងទៅ។ ម្សៅគ្រឿងញៀនទាំងនោះត្រូវបានរកឃើញចម្ងាយប្រមាណតែពីរគីឡូម៉ែតប៉ុណ្ណោះ ពីទីតាំងរកឃើញថ្មីនេះ។ ដោយឡែកថ្មីនេះការសែត The Age របស់ប្រទេសអូស្រ្តាលីបានភ្ជាប់ការរត់ពន្ធគ្រឿងញៀនពីកម្ពុជាទៅអូស្រ្តាលីជាមួយនឹងលោកឧញ៉ា ហ៊ុន តូ ក្មួយប្រុសបង្កើតរបស់លោកនាយករដ្ឋមន្ដ្រីហ៊ុន សែន។ ក៏ប៉ុន្តែលោក ហ៊ុន តូ បានច្រានចោលការផ្សព្វផ្សាយនោះ៕ This posting includes an audio/video/photo media file: Download Now |
| ប៉ូលិសកម្ពុជាបំពាក់ឧបករណ៍តាមដានជនល្មើសអន្តរជាតិ Posted: 03 Jul 2012 11:52 PM PDT ប្រទេសកម្ពុជានិងវៀតណាមជាប្រទេសដំបូងក្នុងចំណោមប្រទេសអាស៊ាន១០ ដែលគេដឹងថាបានសាកល្បងបំពាក់គ្រឿងឧបករណ៍ទំនើបគឺប្រព័ន្ធទិន្នន័យពិភពលោករបស់ប៉ូលិសអាំងទែរប៉ូលអន្តរជាតិដើម្បីគ្រប់គ្រងព្រំដែនឬទប់ស្កាត់បទល្មើសនិងឧក្រិដ្ឋកម្មឆ្លងដែនផ្សេងៗ។ នេះបើតាមសេចក្តីថ្លែងការណ៍របស់អាស៊ាននិងការអះអាងរបស់មន្ត្រីកម្ពុជា។ ប្រព័ន្ធបច្ចេកវិទ្យាទំនើបរបស់អាំងទែរប៉ូលមានផ្ទុកទិន្នន័យជាង៣០លានមកពី ប្រទេសចំនួន១៥០ រួមទាំងព័ត៌មានអំពីលិខិតធ្វើដំណើរដែលត្រូវគេលួចនិងបាត់បង់ផងដែរ។ សេចក្តីប្រកាសព័ត៌មានដដែលបានបញ្ជាក់ថាតាមរយៈគម្រោង សាកល្បងទាំង១៦កន្លែងដែលស្ថិតនៅឆ្ងាយក្នុងប្រទេសកម្ពុជានិងវៀតណាមត្រូវភ្ជាប់បណ្តាញជាមួយប្រព័ន្ធទំនាក់ទំនងពិភពលោកនៃកិច្ចការសន្តិសុខរបស់ប៉ូលិសអាំងទែរប៉ូលដែលគេស្គាល់ថា I-24/7។ «ក្នុងឋានៈជាប្រទេសសាកល្បងនៃគម្រោងនេះកម្ពុជានិងវៀតណាមបានអំពាវនាវឲ្យមានការពង្រីកប្រព័ន្ធផ្លាស់ប្តូរព័ត៌មានប៉ូលិសអាំងទែរប៉ូលដល់ប្រទេសអាស៊ាននានាផងដែរ»។ លោកឧត្តមសេនីយ៍ឯក សុខ ផលអគ្គស្នងការរងនគបាលជាតិទទួលស្គាល់ថា មានការបំពាក់ឧបករណ៍អាំងទែរប៉ូលមែនពេលសុំការបំភ្លឺ។ «បានន័យថាប្រទេសពីរដែលទទួលយកឧបករណ៍របស់អាំងទែរប៉ូលហ្នឹង ឈានមុខគេក្នុងចំណោមប្រទេសអាស៊ានទាំង១០»។ លោកឧត្តមសេនីយ សុខ ផលបដិសេដធ្វើអត្ថាធិប្បាយលម្អិតដោយសារថា នេះជាកិច្ចការសន្តិសុខជាតិ។ ទោះជាយ៉ាងណាក៏ដោយបើតាមព័ត៌មានលើគេហទំព័ររបស់ប៉ូលិសអាំងទែរប៉ូល ប្រព័ន្ធបច្ចេកវិទ្យា I-24/7 អាចផ្តល់ឲ្យអាជ្ញាធរប៉ូលិសនៅលើពិភពលោកផ្លាស់ប្តូរព័ត៌មាននិងផ្តល់ទិន្ន័យឲ្យគ្នាទៅវិញទៅមកនៅពេលវេលាណាក៏បានជារៀងរាល់ថ្ងៃ ប្រកបដោយសុវត្ថិភាពនិងយ៉ាងរហ័សផង។ «ប្រព័ន្ធ I-24/7 គឺជាបណ្តាញដែលអាចឲ្យអ្នកស៊ើបអង្កេតអាចចូលមើលប្រភេទ ទិន្នន័យឧក្រិដ្ឋកម្ម របស់ប៉ូលិសអាំងទែរប៉ូល។ អ្នកប្រើប្រាស់ដែលមានភារកិច្ច អាចរាវរក និងបញ្ជាក់ទិន្នន័យតែក្នុងពេលប៉ុន្មានវិនាទី ដោយចូលឆែកផ្ទាល់ៗក្នុងប្រព័ន្ធ ទិន្នន័យជនសង្ស័យជាឧក្រិដ្ឋជន ឬ ជនត្រូវតាមចាប់ខ្លួន ឯកសារធ្វើដំណើរដែលត្រូវលួច និងបាត់បង់ រថយន្តដែលចោរលួច ក្រយ៉ៅដៃ ទិន្នន័យឌីអែនអេ ឯកសាររដ្ឋបាលដែលត្រូវលួចបាត់និងវត្ថុសិល្បៈដែលចោរលួចផងដែរ»។ ប្រទេសកម្ពុជាត្រូវគេដាក់បំពាក់ឧបករណ៍ទំនើបគឺប្រព័ន្ធបច្ចេកវិទ្យាផ្លាស់ប្តូរ ព័ត៌មានប៉ូលិសអាំងទែរប៉ូលនៅតាមច្រកទ្វារអន្តរជាតិ ព្រលានយន្តហោះ និងប្រើប្រាស់តាំងពីខែមិថុនាម្ល៉េះ ដែលមានឈ្មោះជនល្មើសខ្លះ ត្រូវរកឃើញថាបានឆ្លងកាត់កម្ពុជានិងវៀតណាមហើយនីតិវិធីតុលាការកំពុងដំណើរការរឿងនេះ៕ This posting includes an audio/video/photo media file: Download Now |
| You are subscribed to email updates from VOA News: ព័ត៌មាន To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
