VOA News: ព័ត៌មាន: “ចិនចូលរួមជាមួយមហាអំណាចដទៃក្នុងការថ្កោលទោសកូរ៉េខាងជើង” plus 4 more |
- ចិនចូលរួមជាមួយមហាអំណាចដទៃក្នុងការថ្កោលទោសកូរ៉េខាងជើង
- ហេឡូវីអូអេ ១៦ មេសា ២០១២៖ វិបត្តិហិរញ្ញវត្ថុសកលនិងផលប៉ះពាល់លើសេដ្ឋកិច្ចកម្ពុជា
- Jim Yong Kim ឡើងគ្រប់គ្រងធនាគារពិភពលោក
- ខ្សែភាពយន្តរឿងលោកជា វិជ្ជាទទួលបានរង្វាន់ Peabody ដ៏ល្បីល្បាញ
- សហគមន៍ខ្មែរឡុងប៊ិចនឹងប្រារព្ធធ្វើពិធីរំលឹកខួបថ្ងៃទី១៧ ខែមេសា
| ចិនចូលរួមជាមួយមហាអំណាចដទៃក្នុងការថ្កោលទោសកូរ៉េខាងជើង Posted: 17 Apr 2012 09:40 AM PDT ប្រទេសចិនបានចូលរួមជាមួយមហាអំណាចផ្សេងៗទៀតរបស់ពិភពលោកនៅក្នុងការព្រមានប្រទេសកូរ៉េខាងជើងថា ពួកគេនឹងមិនអត់ទ្រាំដល់សកម្មភាពបង្កហេតុផ្សេងទៀត បន្ទាប់ពីប្រទេសឯកកោនេះបានបាញ់បង្ហោះកាំជ្រួចរ៉ុក្កែតមិនបានទទួលជោគជ័យកាលពីសប្តាហ៍មុន។ លោកស្រីរដ្ឋមន្រ្តីការបរទេសសហរដ្ឋអាមេរិក Hillary Clinton បានមានប្រសាសន៍កាលពីថ្ងៃច័ន្ទម្សិលមិញក្នុងទីក្រុង Brasilia ប្រទេសប្រេស៊ីលថា សមាជិកក្រុមប្រឹក្សាសន្តិសុខអង្គការសហប្រជាជាតិ រួមមានចិនផង បានព្រមព្រៀងគ្នាថានឹងមានផលវិបាកកាន់តែខ្លាំងឡើងថែមទៀតនៅក្នុងសកម្មភាពបង្កហេតុមួយផ្សេងទៀតរបស់កូរ៉េខាងជើង។ រូបថតផ្កាយរណបកាលពីពេលថ្មីៗនេះបង្ហាញថា រដ្ឋាភិបាលទីក្រុងព្យុងយ៉ាងអាចប្រុងប្រៀបរៀបចំការធ្វើតេស្តនុយក្លេអ៊ែរនៅក្រោមដី។ បណ្តាញផ្សាយព័ត៌មានដែលរដ្ឋត្រួតត្រារបស់ចិនក៏កំពុងបង្ហាញការរកាំចិត្តដល់រដ្ឋាភិបាលទីក្រុងព្យុងយ៉ាងដែរ ដោយកត់សម្គាល់ថា ចិនបានប្រកាន់ជំហរថ្កោលទោសយ៉ាងច្បាស់ដល់សម្ព័ន្ធមិត្តដ៏យូរអង្វែងរបស់ខ្លួននៅពេលដែលខ្លួនគាំទ្រសេចក្តីថ្លែងការណ៍របស់ក្រុមប្រឹក្សាសន្តិសុខអង្គការសហប្រជាជាតិដែលបានរិះគន់ការបាញ់បង្ហោះរ៉ុក្កែតនេះ។ ព័ត៌មានថ្មី៖ រូបភាពនៃការដឹកយានអវកាស Discovery ហោះទៅកាន់សារមន្ទីរជាតិនៅរដ្ឋធានីវ៉ាស៊ីនតោន
ព័ត៌មានអន្តរជាតិដទៃសំខាន់ៗដទៃទៀត៖ <!--IMAGE-RIGHT--> អ៊ីរ៉ង់-អាមេរិក៖ លោកស្រីរដ្ឋមន្រ្តីការបរទេសសហរដ្ឋអាមេរិក Hillary Clinton បានច្រានចោលសំណើរបស់អ៊ីរ៉ង់ដើម្បីដោះស្រាយក្តីព្រួយកង្វល់របស់អន្តរជាតិអំពីកម្មវិធីនុយក្លេអ៊ែររបស់ខ្លួនប្រសិនបើប្រទេសលោកខាងលិចលុបចោលការដាក់ទណ្ឌកម្ម ដោយលោកស្រីមានប្រសាសន៍ថា រដ្ឋាភិបាលក្រុងតេហេរ៉ង់ (Tehran) ត្រូវតែបញ្ឈប់សកម្មភាពនុយក្លេអ៊ែរជាមុនសិន។ អាមេរិក៖ ពួកខាងគណបក្សសាធារណរដ្ឋនៅក្នុងព្រឹទ្ធសភាសហរដ្ឋអាមេរិកបានរាំងខ្ទប់សេចក្តីព្រាងច្បាប់មួយដែលនឹងអនុញ្ញាតិឲ្យយកពន្ធថ្មីក្នុងចំនួនអប្បបរមាដល់ពួកមហាសេដ្ឋីជាផែនការមួយដែលលោកប្រធានាធិបតីបារ៉ាក់ អូបាម៉ា បានជំរុញឲ្យមាននៅពេលដែលគណបក្សទាំង២បានបង្ហាញសំណើស្តីពីពន្ធដារនិងសេដ្ឋកិច្ចនៅឆ្នាំបោះឆ្នោត។ ម៉ាឡេស៊ី៖ សភានៃប្រទេសម៉ាឡេស៊ីបានអនុម័តសេចក្តីព្រាងច្បាប់មួយដែលមានបំណងរារាំងមិនឲ្យប៉ូលីសឃុំខ្លួនជនសង្ស័យគ្មានពេលកំណត់ឬក៏ចាប់ខ្លួនពួកគេដោយសារតែជំនឿខាងនយោបាយ។ ទីម័រខាងកើត៖ លោក Taur Matan Ruak អតីតមេដឹកនាំឯករាជ្យបានឈ្នះការបោះឆ្នោតជ្រើសរើសប្រធានាធិបតីនៃប្រទេសទីម័រខាងកើត។ ឥណ្ឌា៖ លោកនាយករដ្ឋមន្រ្តី Manmohan Singh នៃប្រទេសឥណ្ឌា បានមានប្រសាសន៍កាលពីថ្ងៃច័ន្ទថា ពួកឧទ្ទាមម៉ៅនិយមបន្តធ្វើការគំរាមកំហែងយ៉ាងធំដល់សន្តិសុខក្នុងប្រទេស។ ស៊ូដង់៖ សភានៃប្រទេសស៊ូដង់បានប្រកាសថា ស៊ូដង់ខាងត្បូងដែលជាសត្រូវបានពង្រីកអំពើហឹង្សានៅតាមបណ្តាយព្រំដែនរវាងប្រទេសទាំងពីរ។ This posting includes an audio/video/photo media file: Download Now |
| ហេឡូវីអូអេ ១៦ មេសា ២០១២៖ វិបត្តិហិរញ្ញវត្ថុសកលនិងផលប៉ះពាល់លើសេដ្ឋកិច្ចកម្ពុជា Posted: 17 Apr 2012 06:13 AM PDT ក្នុងកម្មវិធីសំឡេងអ្នកជំនាន់ថ្មីទី៨ ថ្ងៃនេះ វីអូអេបានអញ្ជើញលោក យូ សុគន្ធបញ្ញា និស្សិតថ្នាក់អនុបណ្ឌិតផ្នែកគោលនយោបាយសាធារណៈនៃសាកលវិទ្យាល័យ មីឈីហ្គែន (University of Michigan) នៅទីក្រុងអានអាប៊រ (Ann Arbor) សហរដ្ឋអាមេរិកធ្វើជាវាគ្មិន។ និស្សិត យូ សុគន្ធបញ្ញា កើតនៅឆ្នាំ១៩៨៦នៅស្រុកស្អាង ខេត្តកណ្តាល ហើយមានឪពុកម្តាយជាគ្រូបង្រៀន។ មុននឹងមកសិក្សានៅសហរដ្ឋអាមេរិក សុគន្ធបញ្ញា ធ្លាប់បម្រើការនៅធនាគារអន្តរជាតិមួយដែលដំណើរការនៅកម្ពុជា។ យូ សុគន្ធបញ្ញា រៀននៅសាកលវិទ្យាល័យជាតិគ្រប់គ្រងក្រុងភ្នំពេញបានមួយឆ្នាំ រួចទទួលបានអាហារូបករណ៍ទៅរៀននៅសាកលវិទ្យាល័យគ្រប់គ្រងសិង្ហបុរី ថ្នាក់បរិញ្ញាប័ត្រវិទ្យាសាស្ត្រសេដ្ឋកិច្ចនិងហិរញ្ញវត្ថុ ។ លោក យូ សុគន្ធបញ្ញាទទួលបានអាហារូបករណ៍ Fulbright មកសិក្សាយកអនុបណ្ឌិតផ្នែកគោលនយោបាយសាធារណៈនៅសាលាគោលនយោបាយសាធារណៈនៃសាកលវិទ្យាល Michigan សហរដ្ឋអាមេរិក។ មុខជំនាញដែលសុគន្ធបញ្ញាចាប់អារម្មណ៍នាពេលនេះ គឺការអភិវឌ្ឍអន្តរជាតិ គោលនយោបាយសេដ្ឋកិច្ច និងបញ្ញតិ្តហិរញ្ញវត្ថុ។ នៅក្នុងកម្មវិធីសំឡេងជំនាន់ថ្មីទី៨នេះ លោកនឹងនិយាយអំពីវិបត្តិសេដ្ឋកិច្ចសកល និងផលប៉ះពាល់របស់វាលើសេដ្ឋកិច្ចកម្ពុជា។ សូមស្តាប់សំឡេងទាំងស្រុងនៃកម្មវិធី សំឡេងជំនាន់ថ្មីទី៨ (ហេឡូវីអូអេ) ថ្ងៃទី ១៦ ខែមេសា ឆ្នាំ២០១២៖ <!--AV--> មធ្យោបាយចូលរួមពីប្រិយមិត្ត៖ ទូរស័ព្ទ ០១២ ៥១ ៥១ ៩៤ ហ្វេសប៊ុក facebook.com/voakhmer អ៊ីម៉េល hellovoa@voanews.com This posting includes an audio/video/photo media file: Download Now |
| Jim Yong Kim ឡើងគ្រប់គ្រងធនាគារពិភពលោក Posted: 17 Apr 2012 05:19 AM PDT ពួកនាយកនៃធនាគារពិភពលោកបានតែងតាំងពលរដ្ឋអាមេរិកាំងម្នាក់ទៀតគឺលោក Jim Yong Kim ឱ្យកាន់តំណែងជាប្រធាននៃទីភ្នាក់ងារអភិវឌ្ឍន៍សាកលនេះ។ លោក Jim Yong Kim ជាវេជ្ជបណ្ឌិត នរវិទូនិងជាប្រធាននៃសាកលវិទ្យាល័យ Dartmouth។ កាលពីពេលមុនលោកបានចាត់ចែងកិច្ចខិតខំប្រឹងប្រែងរបស់អ.ស.ប.ក្នុងការប្រយុទ្ធនឹងជំងឺអេដស៍ បានបង្កើតអង្គការមិនមែនជារបស់រដ្ឋាភិបាលមួយដើម្បីឧបត្ថម្ភគម្រោងផ្តួចផ្តើមការថែរក្សាសុខភាពក្នុងប្រទេសជាតិក្រីក្រ ហើយលោកបានបង្រៀននៅឯសាកលវិទ្យាល័យ Harvard ផងដែរ។ លោកបណ្ឌិត Kim នឹងបម្រើអណត្តិមួយមានរយៈពេល៥ឆ្នាំដែលចាប់ផ្តើមនៅថ្ងៃទី១ខែកក្កដា។ លោកនឹងបន្តតំណែងពីលោក Robert Zoellick ដែលអណត្តិរបស់លោកនឹងចប់ក្នុងខែមិថុនា។ តាមរយៈកិច្ចព្រមព្រៀងមិនផ្លូវការមួយ ជនជាតិអាមេរិកាំងម្នាក់តែងតែដឹកនាំធនាគារពិភពលោក ចំណែកឯជនជាតិអឺរ៉ុបម្នាក់តែងតែកាន់តំណែងជានាយកនៃអង្គការមូលនិធិរូបិយប័ណ្ណអន្តរជាតិ។ ពួកអ្នករិះគន់បាននិយាយថាកិច្ចព្រមព្រៀងនោះចាស់ហួសសម័យហើយមិនយុត្តិធ៌មទេ។ កូរ៉េខាងជើង៖ ក្រុមប្រឹក្សាសន្តិសុខអង្គការសហប្រជាជាតិ បានថ្កោលទោសយ៉ាងខ្លាំងដល់ប្រទេសកូរ៉េខាងជើងដែលបានប៉ុនប៉ងបង្ហោះកាំជ្រួចផ្លោងមានវង់ប្រតិបត្តិការឆ្ងាយមួយគ្រឿងកាលពីសប្តាហ៍មុន។ ថៃ៖ កាសែត Bangkok Post បានផ្សាយកាលពីថ្ងៃច័ន្ទថាពាណិជ្ជកម្មបែបថ្មីមួយនៃគ្រឿងញៀន crystal methamphetamine ដោយមានពួកអ្នកជួញដូរមកពីផ្នែកខាងលិចនៃទ្វីបអាហ្វ្រិកនិងអ៊ីរ៉ង់ចូលមកច្រើនក្នុងប្រទេសថៃបាននាំឱ្យពួកប៉ូលីសថៃព្រួយបារម្ភ។ អាហ្វហ្គានីស្ថាន៖ ក្រសួងការពារប្រទេសសហរដ្ឋអាមេរិកបាននិយាយថាបណ្តាញពួកជនសកម្មប្រយុទ្ធ Haqqani ដែលមានមូលដ្ឋាននៅប៉ាគីស្ថានទំនងជាស្ថិតនៅពីក្រោយការវាយប្រហារមានការសម្របសម្រួលនៅទូទាំងអាហ្វហ្គានីស្ថាន។ ប៉ាគីស្ថាន៖ អាជ្ញាធរក្នុងប៉ែកពាយ័ព្យនៃប្រទេសកំពុងស្វែងរកពួកអ្នកទោសជាង៣រយនាក់ដែលបានរត់គេចខ្លួនចេញពីគុកមួយកន្លែង ក្រោយពីពួកជនសកម្មប្រយុទ្ធតាលីបាន់បានឆ្មក់វាយប្រហារលើពន្ធនាគារនេះកាលពីថ្ងៃអាទិត្យ។ ស៊ីរី៖ ក្រុមទៅមុនមួយនៃពួកអ្នកសង្កេតការអង្គការសហប្រជាជាតិ៦នាក់បានចាប់ផ្តើមបេសកកម្មរបស់ពួកគេក្នុងការឃ្លាំមើលកិច្ចឈប់បាញ់គ្នាមិនមាំទាំមួយក្នុងប្រទេសស៊ីរី នៅពេលដែលពួកសកម្មជនបាននិយាយថាពួកទាហានរដ្ឋាភិបាលនៅតែបន្តបាញ់ផ្តក់ទៅលើសង្កាត់ពួកបះបោរនៅក្នុងសំបុកសំខាន់មួយនៃពួកប្រឆាំង។ ស៊ីរី៖ អ្នកនាំពាក្យម្នាក់របស់លោកកូហ្វី អាណាន់ ប្រេសីតអន្តរជាតិបាននិយាយថាបេសកកម្មនេះ «នឹងចាប់ផ្តើមតាំងទីបញ្ជាការធំនិងទាក់ទងជាមួយរដ្ឋាភិបាលស៊ីរីនិងកងកម្លាំងប្រឆាំងដើម្បីឱ្យភាគីទាំងពីរយល់ឱ្យបានសព្វគ្រប់អំពីមុខនាទីនៃពួកអ្នកសង្កេតការអង្គការសហប្រជាជាតិ។ អ៊ីរ៉ង់៖ រដ្ឋមន្ត្រីក្រសួងការបរទេសនៃប្រទេសអ៊ីរ៉ង់បាននិយាយថារដ្ឋាភិបាលក្រុង Teheran ប្រុងប្រៀបស្រេចហើយដើម្បីដោះស្រាយកង្វល់អំពីកម្មវិធីបរមាណូរបស់ផងខ្លួនជាថ្នូរនឹងការន្ធូរបន្ថយការដាក់ទ័ណ្ឌកម្ម។ <!--AV--> This posting includes an audio/video/photo media file: Download Now |
| ខ្សែភាពយន្តរឿងលោកជា វិជ្ជាទទួលបានរង្វាន់ Peabody ដ៏ល្បីល្បាញ Posted: 16 Apr 2012 08:07 PM PDT គ្រាប់កាំភ្លើងដែលបានបាញ់ចេញទាំងព្រឹកឆក់យកជីវិតលោក ជា វិជ្ជានៅក្បែរវត្តលង្កាកាលពី៨ឆ្នាំមុនមិនបានបញ្ចប់ភាពល្បីល្បាញនិងវីរភាពរបស់អតីតមេដឹកនាំសហជីពដ៏ជាទីគោរពរូបនេះទេ។ ខ្សែភាពយន្តឯកសារស្តីពីការសម្លាប់វីរជនកម្មករដ៏ល្បីឈ្មោះរូបនេះបានទទួលពានរង្វាន់ Peabody ដែលជារង្វាន់សម្រាប់អ្នកសារព័ត៌មានដ៏មានកិត្តិយសនៅក្នុងសហរដ្ឋអាមេរិក។ លោក ហូរ៉េស ញូខុម ប្រធាននៃគណកម្មការផ្តល់រង្វាន់ Peabody របស់សាកលវិទ្យាល័យ Georgia បានបញ្ជាក់ប្រាប់វីអូអេថា ក្រុមគណៈកម្មការមើលឃើញថាភាពយន្តនេះមានលក្ខណៈល្អអត់ខ្ចោះដោយសារតែបានព្យាយាមបង្ហាញពីស្ថានភាពនយោបាយនៅកម្ពុជាហើយបានបង្ហាញពីភស្តុតាងខ្លះប៉ុន្តែនៅបន្តរក្សាទុកភាពស្រពិចស្រពិល ហើយទីបំផុតអាចចូលរួមចំណែកបានថាជាស្នាដៃដ៏សំខាន់ក្នុងសាច់រឿងនោះ។ លោក រិច ហ្ការីលឡា ផលិតករមួយរូបនៃខ្សែភាពយន្តរឿង«អ្នកណាសម្លាប់លោកជាវិជ្ជា?»បានបញ្ជាក់ប្រាប់វីអូអេថា៖ «យើងមានការរំភើបនិងសប្បាយណាស់ដែលមានកិត្តិយសទទួលបានរង្វាន់នេះ។ នេះគឺពិតជារង្វាន់កំពូលដែលភាពយន្តអាចទទួលបាន ហើយវាមិនគ្រាន់តែបញ្ជាក់ពីគុណភាពនៃការងាររបស់យើងទេ ក៏ប៉ុន្តែអំពីសារៈសំខាន់នៃបញ្ហាដែលខ្សែភាពយន្តនេះលើកយកមកបង្ហាញផងដែរ»។ ខ្សែភាពយន្តរឿង«អ្នកណាសម្លាប់លោកជា វិជ្ជា?» រៀបរាប់ពីការធ្វើឃាតដែលមានលក្ខណៈនយោបាយហើយមិនត្រូវបានវែកមុខរកឃាតករឃើញនៅឡើយទេ។ មានតែបុរសពីរនាក់ប៉ុណ្ណោះត្រូវបានគេចាប់ដាក់គុកហើយត្រូវដោះលែងចេញវិញឱ្យនៅក្រៅឃុំដោយសារមានការជំទាស់ខ្លាំងៗពីក្រុមអង្គការសិទ្ធិមនុស្សថាពួកគេជាឃាតករសិប្បនិមិ្មតហើយសូម្បីតែគ្រួសារជនរងគ្រោះក៏មិនជឿថាពួកគេជាជនល្មើសទេ។ ខ្សែភាពយន្តនេះត្រូវបានហាមមិនឱ្យបញ្ចាំងក្នុងប្រទេសកម្ពុជាទេហើយក្រុមគ្រួសារនិងផលិតករបានឆ្លៀតយកឱកាសនេះស្នើសុំឱ្យរដ្ឋាភិបាលលើកលែងការហាមឃាត់។ ពិធីប្រគល់រង្វាន់ជាផ្លូវការនឹងធ្វើឡើងនៅថ្ងៃទី២១ ខែឧសភាក្នុងបុរីញ៉ីវយ៉ក សហរដ្ឋអាមេរិក។ ប៉ុន្តែការផ្តល់រង្វាន់នេះជៀសមិនផុតពីការរិះគន់របស់មន្ត្រីរដ្ឋាភិបាលកម្ពុជាទេ។ លោកផៃ ស៊ីផាន រដ្ឋលេខាធិការនិងជាអ្នកនាំពាក្យនៃក្រុមប្រតិកម្មរហ័សបានបញ្ជាក់ថា៖ «ខ្សែភាពយន្តនេះមានការផ្សព្វផ្សាយដែលមានចរិកជានយោបាយដែលមិនមែនជាចរិកឯកសារហើយអ្វីដែលជាផលប៉ះពាល់នៃការផ្តល់អ្វីដែលជាកិត្តិយសដែលជារង្វាន់នោះជារឿងឯកជនទេមិនមែនជារឿងយុត្តិធម៌សម្រាប់កម្ពុជាទេ។ ដូច្នេះនេះជាឯកជននៅក្នុងបំណងរបស់គេអ្វីមួយក៏ប៉ុន្តែកម្ពុជាស្ថិតនៅលើដែនរង្វង់នៃយុត្តិធម៌សុទ្ធសាធដូច្នេះខ្សែភាពយន្តដែលគេហៅថាជាខ្សែភាពយន្តឯកសារគ្រាន់តែជាការនាំមុខប្រាប់រឿងមួយដែលគេមិនចាត់ថារឿងពិតចេញពីតុលាការ»។ ប៉ុន្តែលោក ហូរ៉េស ញូខុម បានបញ្ជាក់ថាគណៈកម្មការផ្តល់រង្វាន់ Peabody គឺធ្វើការដោយផ្អែកលើវិជ្ជាជីវៈពិតប្រាកដ។ «ពានរង្វាន់ Peabody គឺមិនមានហេតុផលជំរុញខាងផ្នែកនយោបាយទេ។ យើងសំឡឹងមើលលើឧត្តមភាពក្នុងការផលិតរបស់បណ្តាញព័ត៌មាន ឧត្តមភាពក្នុងផ្នែកជាច្រើន ឧត្តមភាពឯករាជ្យដោយខ្លួនឯងហើយនោះគឺជាអ្វីដែលយើងរកឃើញនៅក្នុងខ្សែភាពយន្តឯកសារនេះ»។ មុនពេលដែលត្រូវគេបាញ់សម្លាប់នៅថ្ងៃទី២២ ខែមករាឆ្នាំ២០០៤ពេលកំពុងអង្គុយអានកាសែតពេលព្រឹកនៅតូបលក់កាសែតខាងក្រៅរបងវត្តលង្កា លោក ជា វិជ្ជា ដែលមានមាឌស្តើងខ្ពស់ជាមនុស្សម្នាក់ដែលអាចមានលទ្ធភាពប្រមូលកម្មកររាប់ពាន់នាក់ចេញមកតវ៉ាដើម្បីធ្វើឱ្យប្រសើរឡើងដល់លក្ខខណ្ឌការងាររបស់ពួកគេ។ ស្ថានភាពសម្រាប់ក្រុមសហជីពនៅកម្ពុជាបានប្រែប្រួលរូបភាពច្រើនចាប់តាំងពីការបាញ់សម្លាប់លោកជា វិជ្ជាមកដោយផ្លាស់ប្តូរមិនមានការដើរហែរក្បួនតវ៉ាដែលមានកម្មករចូលរួមច្រើនមកជាការតវ៉ាតាមរោងចក្រហើយជារឿយៗក្រុមតំណាងសហជីពតែងតែត្រូវថៅកែរោងចក្រប្តឹងផ្តល់។ នេះបើតាមការបញ្ជាក់របស់លោកជា មុន្នី ប្អូនប្រុសលោកជា វិជ្ជា ដែលបានកាន់តំណែងជាប្រធានសហជីពសេរីកម្មករនៃព្រះរាជាណាចក្រកម្ពុជាបន្តពីបងប្រុសរបស់លោក។ ក្នុងការវិវត្តន៍ចុងក្រោយនេះមានការបាញ់លើកម្មករដែលតវ៉ាដើម្បីសុំដំឡើងប្រាក់កម្រៃការងារនិងស្នើឱ្យស្ថានភាពការងារប្រសើរជាងមុន។ ជនដៃដល់ក្នុងរឿងនេះគឺឈ្មោះឈូក បណ្ឌិតជាអតីតអភិបាលក្រុងបាវិតខេត្តស្វាយរៀងនៅតែបន្តរស់នៅដោយមិនមានការដាក់ទោសទណ្ឌអ្វីឬត្រូវតុលាការចាប់ឃុំឃាំងទេ។ លោក ជា មុន្នីបានបន្ថែមថា៖ «នីតិវិធីខុសគ្នាកាលពីដែលបងប្រុសខ្ញុំដឹកនាំកាលនោះការដឹកនាំរបស់បងប្រុសខ្ញុំគឺថាសេរីភាពមានច្រើនជាងបច្ចុប្បន្ន។ បច្ចុប្បន្នកុំថាឡើយសហជីពសូម្បីតែប្រជាពលរដ្ឋដែលដីធ្លីផ្ទះសម្បែងដែលគេយករបស់គាត់ក៏គាត់មិនអាចធ្វើការទាមទារអ្វីបានធំដុំដែរ។ យើងមើលជាជាក់ស្តែង។ អញ្ចឹងមានការប្រែប្រួលមានការវិវត្តន៍ប៉ុន្តែការប្រែប្រួលវិវត្តន៍វាមិនមែនការប្រែប្រួលវិវត្តន៍ទៅរកលក្ខណៈប្រជាធិបតេយ្យទេការប្រែប្រួលវិវត្តន៍ទៅរកភាពភ័យខ្លាចទៅរកការចូលទៅក្នុងករណីមួយដែលគេហៅថាប្រជាធិបតេយ្យមានតែឈ្មោះប៉ុន្តែសិទ្ធិបញ្ចេញមតិសិទ្ធិបញ្ចេញយោបល់គឺអត់មានតែម្តង»។ យ៉ាងណាក៏ដោយ លោក ខេន លូ អគ្គលេខាធិការនៃសមាគមនិយោជកកាត់ដេរក្នុងប្រទេសកម្ពុជាបានបញ្ជាក់ថាការនាំចេញផលិតផលកាត់ដេសម្លៀកបំពាក់មានការកើនឡើងជាលំដាប់ហើយរង្វាន់ដែលផ្តល់ដល់ភាពយន្តនេះមិនអាចនឹងធ្វើឱ្យប៉ះពាល់ដល់ការកើនឡើងនៃការនាំចេញផលិតផលកាត់ដេរទៅសហរដ្ឋអាមេរិកក៏ដូចជាទៅទីផ្សារបរទេសដទៃទៀតទេប៉ុន្តែលោកក៏លើកសរសើរពីសកម្មភាពការងាររបស់លោកជា វិជ្ជា។ «លោកជា វិជ្ជាគឺជាមេដឹកនាំដ៏គួរឱ្យគោរពម្នាក់។ ការធ្វើឃាតគាត់គឺជារឿងក្រៀមក្រំមួយសម្រាប់យើងនិងសម្រាប់មនុស្សគ្រប់គ្នា។ ប៉ុន្តែខ្ញុំគិតថាវាអាចជាការងាយស្រួលក្នុងការអះអាងថាការធ្វើឃាតនោះដោយមូលហេតុនយោបាយ។ ប៉ុន្តែយើងក៏ត្រូវតែយល់ថា៨ឆ្នាំមុនស្ថានភាពសន្តិសុខក្នុងប្រទេសកម្ពុជាមិនល្អទេហើយមានមនុស្សខ្លះដែលមិនល្បីឈ្មោះដូចលោក ជា វិជ្ជាត្រូវគេបាញ់សម្លាប់តាមផ្លូវដែរ»។ ដូចដែលចំណងជើងនៃខ្សែភាពយន្តបានចោទសួរអញ្ចឹងគេនៅតែមិនទាន់ដឹងថាអ្នកណាជាឃាតករពិតប្រាកដនៅឡើយទេ ប៉ុន្តែអ្វីដែលគេបានដឹងច្បាស់គឺវីរភាពរបស់លោកជាវិជ្ជាមិនស្លាប់ទៅតាមរូបគាត់ឡើយហើយភាពល្បីល្បាញនៃខ្សែភាពយន្តនេះនឹងបន្តបង្ហាញពីអ្វីដែលបានកើតមានឡើងនាពេលនោះ និងការខកខានរបស់អាជ្ញាធរក្នុងការស្វែងរកឃាតករយកមកកាត់ទោស៕ This posting includes an audio/video/photo media file: Download Now |
| សហគមន៍ខ្មែរឡុងប៊ិចនឹងប្រារព្ធធ្វើពិធីរំលឹកខួបថ្ងៃទី១៧ ខែមេសា Posted: 16 Apr 2012 05:07 PM PDT របបខ្មែរក្រហមបានផ្លាស់ប្តូរទីក្រុងភ្នំពេញទៅជាទីក្រុងខ្មោចនិងកែប្រែប្រទេសកម្ពុជាទៅជាវាលពិឃាត។ វាមានរយៈពេល ជាង៣០ឆ្នាំហើយបន្ទាប់ពីរបបប្រល័យពូជសាសន៍នេះត្រូវបានបញ្ចប់ប៉ុន្តែស្លាកស្នាមនិងទុក្ខវេទនារបស់សម័យនោះនៅតែមានរហូតនៅជាប់នឹងអារម្មណ៍ជនរងគ្រោះនិងអ្នកដែលបានបាត់បង់ក្រុមគ្រួសាររបស់ខ្លួន។ ប្រជាពលរដ្ឋខ្មែរ បើទោះបីជាគេបានមករស់នៅសហរដ្ឋអាមេរិកហើយក៏ដោយក៏អារម្មណ៍ខ្លោចផ្សាតាមលងពួកគេជានិច្ច។ សម្រាប់សហគមន៍ខ្មែរនៅទីក្រុងឡុងប៊ិចនៅថ្ងៃទី១៧ខែមេសាខាងមុខនេះជាឱកាសមួយដែលពួកគេនឹងមកជួបជុំគ្នាដើម្បីរំលឹកពីការឈឺចាប់ទាំងនោះនិងក៏ដើម្បីសំឡឹងមើលទៅអនាគតបន្តទៀតផងដែរ។ លោក ឆាត សមិទ្ធ (Chad Sammeth)អ្នកសម្របសម្រួលរបស់អង្គការសហគមន៍ខ្មែរដែលជាអ្នករៀបចំកម្មវិធីនេះបានឱ្យដឹងថា៖ «យើងចង់ឱ្យសហគមន៍ដឹងថាថ្ងៃនេះជាថ្ងៃសំខាន់សម្រាប់ប្រវត្តិសាស្រ្តខ្មែរ។ ក៏ប៉ុន្តែយើងក៏មិនចង់ឱ្យសហគមន៍នេះរស់នៅជាមួយការឈឺចាប់នេះរហូតដែរ។យើងមានអ្នកខ្លះដែលគាត់លាក់ទុកនូវការឈឺចាប់របស់គាត់ស្ងៀមស្ងាត់តែម្នាក់ឯង ព្រោះការមករស់នៅលើទឹកដីថ្មីមានការពិបាកខាងភាសានិងរបៀបរបបរស់នៅ។ ដូច្នេះគាត់មានការពិបាកក្នុងការនិយាយស្តីជាមួយកូនចៅគាត់ អញ្ចឹងយើងចង់ឱ្យគាត់មកជួបជុំគ្នាដើម្បីយកឱកាសនេះឱ្យគាត់និយាយពីអារម្មណ៍គំនិតរបស់គាត់។ យើងចង់ឱ្យគាត់ដឹងថានេះមិនមែនជាបញ្ហារបស់គាត់តែម្នាក់ទេតែជាបញ្ហារបស់សហគមន៍ទាំងមូល»។ លោកឆាត សមិទ្ធយល់ថាថ្ងៃ១៧ ខែមេសា ក៏ជាថ្ងៃដែលផ្លាស់ប្តូរនូវខ្សែជីវិតរបស់ពួកគេផងដែរ។«បើគ្មានថ្ងៃ១៧មេសា ខ្ញុំប្រហែលជាមិនមែននៅទីនេះទេ ហើយប្រជាពលរដ្ឋទាំងអស់គ្នាក៏ប្រហែលជាកំពុងនៅស្រុកខ្មែរដែរ។ ថ្ងៃ១៧មេសាប៉ះពាល់ដល់ប្រជាជនខ្មែរគ្រប់រូបនៅលើពិភពលោក។ តែអ្វីដែលយើងសង្កត់ធ្ងន់គឺតើយើងត្រូវដើរទៅមុខទៀតយ៉ាងម៉េច? ពីព្រោះយើងចំណាយពេលច្រើនពេកហើយលើភាពទុក្ខសោកដែលយើងឆ្លងកាត់»។ ការរំលឹកខួបនេះមានឈ្មោះថា «Courage to Remember» ឬ «សេចក្តីក្លាហានក្នុងការចងចាំ»ដែលនឹងធ្វើឡើងនៅ Long Beach City College- Pacific Coast Campus វេលាម៉ោង៥ល្ងាចក្នុងទីក្រុងឡុងប៊ិច។ This posting includes an audio/video/photo media file: Download Now |
| You are subscribed to email updates from VOA News: ព័ត៌មាន To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
