VOA News: ព័ត៌មាន: “សភាភូមាបដិសេធថវិកាសម្រាប់គណៈកម្មការសិទ្ធិមនុស្ស” plus 4 more |
- សភាភូមាបដិសេធថវិកាសម្រាប់គណៈកម្មការសិទ្ធិមនុស្ស
- ការកាត់ទោសលូបាងហ្គាលើកស្ទួយតម្លៃរបស់តុលាការឧក្រិដ្ឋកម្មអន្តរជាតិតែចំណុចខ្សោយនៅមានដដែល
- មេដឹកនាំពិភពលោកប្រឆាំងការគំរាមកំហែងនៃភេរវកម្មបរមាណូ
- មេគុកទួលស្លែងបញ្ជាក់ថាគាត់ជួបប្រជុំជាប្រចាំជាមួយនួនជា
- តុលាការមិនឃុំខ្លួនលោកចាន់ ចេងទេប៉ុន្តែដាក់ឱ្យស្ថិតក្រោមការឃ្លាំមើល
| សភាភូមាបដិសេធថវិកាសម្រាប់គណៈកម្មការសិទ្ធិមនុស្ស Posted: 28 Mar 2012 09:57 AM PDT អនាគតរបស់គណៈកម្មការការពារសិទ្ធិមនុស្សរបស់ប្រទេសភូមា មិនមានភាពច្បាស់លាស់ទេ ក្រោយពីរដ្ឋសភាបានកាត់ផ្តាច់ថវិកាដែលបានត្រូវបង្កើតឡើងកាលពីឆ្នាំមុន នៅចំពេលដែលមានការកែទម្រង់តាមបែបប្រជាធិបតេយ្យ។ រដ្ឋសភាភូមា បានបដិសេធមិនយល់ព្រមលើថវិកាថ្មីនៅខែនេះ ដល់គណៈកម្មការការពារសិទ្ធិមនុស្សតែងតាំងឡើងដោយរដ្ឋាភិបាល ដោយនិយាយថាការបង្កើតអង្គការនេះតាមរយៈក្រឹត្យប្រធានាធិបតី មិនសមស្របទៅនឹងរដ្ឋធម្មនុញ្ញទេ។ លោក Benjamin Zawacki អ្នកស្រាវជ្រាវឲ្យអង្គការការពារសិទ្ធិមនុស្សអន្ដរជាតិ (Amnesty International) ថ្លែងថាគណៈកម្មការនោះប្រហែលជាមិនអាចរស់រានមានជីវិតតទៅទៀតទេ ដោយគ្មានថវិកាប្រើប្រាស់នោះ។ តែលោកថ្លែងប្រាប់វីអូអេពីទីក្រុងបាងកកថា ភាពទាល់ច្រកហាក់ដូចជាមានមូលហេតុខាងនីតិវិធី ហើយទំនងអាចដោះស្រាយបាន។ «ទោះជាដូចម្ដេចក៏ដោយខ្ញុំរំពឹងថាថវិកានោះនឹងផ្ដល់មកវិញជាមិនខាន។ ខ្ញុំគិតថា គណៈកម្មការអាចបានត្រូវប្រើប្រាស់ជាឧបករណ៍នយោបាយរបស់សាខាប្រតិបត្ដិ និងនីតិបញ្ញាត្តិដែលមិនអាចទុកជាមោឃៈបាន ដោយសារតែគ្មានថវិកានោះ»។ ព័ត៌មានអន្តរជាតិសំខាន់ៗដទៃទៀត៖ <!--IMAGE-RIGHT--> ទីបេតិ៍៖ ប៉ូលីសនៅក្នុងទីក្រុងញូវដេលី បានវាយបង្រ្កាបមកលើជនជាតិទីបេតិ៍ដែលរស់នៅក្នុងទីក្រុង ក្រោយពីមានជនជាតិទីបេតិ៍និរទេសម្នាក់ បានយកភ្លើងទៅដុតខ្លួនឯងក្នុងសប្ដាហ៍នេះ ដើម្បីសម្តែងការតវ៉ាប្រឆាំងទស្សនកិច្ចរបស់ប្រធានាធិបតីចិនលោក ហ៊ូ ជិនតាវ។ ស៊ីរី៖ គេរំពឹងថា ក្រុមមន្ដ្រីនៃក្រសួងការបរទេស របស់សម្ព័ន្ធភាពអារ៉ាប់នឹងគាំទ្រផែនការរបស់ប្រេសិតពិសេស លោក កុហ្វី អាណាន់ ដើម្បីបញ្ចប់វិបត្ដិនៅក្នុងប្រទេសស៊ីរី មួយថ្ងៃក្រោយពីរដ្ឋាភិបាលរបស់ប្រធានាធិបតី Bashar Al Assad ទទួលយកសេចក្ដីស្នើ។ អាហ្វហ្គានីស្ថាន៖ សេចក្ដីរាយការណ៍ថ្មីមួយធ្វើឡើងដោយអង្គការការពារសិទ្ធិមនុស្ស Human right Watch និយាយថា ស្រ្ដីជាង៤០០នាក់នៅក្នុងប្រទេសអាហ្វហ្គានីស្ថានកំពុងជាប់គុកដោយសារតែបានព្យាយាមចាកចេញពីអំពើឃោរឃៅរំលោភដោយប្ដីរបស់នាងឬការបង្ខំឲ្យមានប្ដី។ ភូមា៖ រដ្ឋាភិបាលភូមានិយាយថានឹងរៀបចំសើរើឡើងវិញនូវប្រព័ន្ធរូបិយវត្ថុរបស់ខ្លួនដែលជាផ្នែកមួយនៃកម្មវិធីធ្វើឲ្យទំនើបដល់សេដ្ឋកិច្ចដែលកំពុងដេកស្ងៀម។ អ៊ីរ៉ង់៖ រដ្ឋមន្ដ្រីការបរទេសអ៊ីរ៉ង់ថ្លែងថា លោករំពឹងថាកិច្ចចរចាគ្នាទឹកថ្មីជាមួយមេដឹកនាំប្រទេសមហាអំណាចអំពីកម្មវិធីនុយក្លេអ៊ែរនឹងចាប់ផ្ដើមនៅថ្ងៃទី១៣ ខែមេសា តែទីកន្លែងនៅពុំទាន់ដឹងនៅឡើយទេ។ ប៉ាគីស្ថាន៖ មេបញ្ជាការយោធាជាន់ខ្ពស់របស់ប៉ាគីស្ថាន ឧត្ដមសេនីយ៍ Ashfaq Pervez Kayani នឹងបើកឲ្យមានកិច្ចប្រជុំលើកទីមួយជាមួយមេបញ្ជាការយោធាអាមេរិកាំងដែលជាកិច្ចប្រជុំលើកដំបូងចាប់តាំងពីការវាយប្រហារតាមអាកាសរបស់ស.រ.អ.នៅខែវិច្ឆិកាមកលើព្រំដែនដែលបានសម្លាប់ទាហានប៉ាគីស្ថាន២៤នាក់។ អាហ្វហ្គានីស្ថាន៖ អង្គការជនភៀសខ្លួនរបស់អ.ស.ប. (UNHCR) ថ្លែងថា ជនជាតិអាហ្វហ្គានីស្ថាន ស្ថិតនៅក្នុងបញ្ជីខ្ពស់ជាងគេ ក្នុងការតាមស្វែងរក ការជ្រកកោននៅក្នុងប្រទេសមានឧស្សហកម្មជឿនលឿននៅឆ្នាំ២០១១។ អាមេរិក-អាហ្វហ្គានីស្ថាន៖ លោករដ្ឋមន្ដ្រីការពារប្រទេសអាមេរិក ឡេអន បាណេតា ថ្លែងថា ការស្ទង់មតិមិនអាចសម្រេចអំពីសង្គ្រាមនៅក្នុងប្រទេសអាហ្វហ្គានីស្ថានបានទេ។ កូរ៉េខាងជើង៖ មេដឹកនាំបណ្តាប្រទេសអឺរ៉ុបបានអំពាវនាវដល់ប្រទេសកូរ៉េខាងជើងឲ្យបោះបង់ចោលគម្រោងការបាញ់បង្ហោះកាំជ្រួចមីស៊ីល ហើយទម្លាក់ចោលកម្មវិធីនុយក្លេអ៊ែរ។ គុយបា៖ អតីតមេដឹកនាំប្រទេសគុយបា ហ្វីដែល កាស្រូ្ត (Fidel Castro) ថ្លែងថា លោកនឹងទៅជួបសម្ដេចប៉ាប នៅថ្ងៃពុធនេះក្នុងទីក្រុងឡាហាវ៉ាន មុននឹងសម្ដេចប៉ាបបញ្ចប់ដំណើរទស្សនកិច្ច៣ថ្ងៃរបស់ព្រះអង្គនៅលើកោះកុម្មុយនីស្តនោះ។ <!--AV--> This posting includes an audio/video/photo media file: Download Now |
| Posted: 28 Mar 2012 02:24 AM PDT ការកាត់ទោសលោក ថំម៉ាស លូបាងហ្គា(Thomas Lubanga)កាលពីថ្ងៃពុធ នៅឯតុលាការឧក្រិដ្ឋកម្មអន្តរជាតិ (ICC) ស្តីពីបទចោទប្រកាន់ចំពោះការកេណ្ឌទាហានកុមារ នៅសាធារណរដ្ឋប្រជាធិបតេយ្យ កុងហ្គោ (DRC) គឺជាពេលវេលាប្រវត្តិសាស្រ្តមួយសម្រាប់ស្ថាប័ននេះ។ នេះ ជាការកាត់ទោសប្រកបដោយភាពជោគជ័យលើកដំបូងបង្អស់ នៅក្នុងប្រវត្តិសាស្រ្តរយៈពេល១០ឆ្នាំរបស់តុលាការនេះ។ ប៉ុន្តែ ក្រុមអ្នកវិភាគនិយាយថា តុលាការ ICC នៅតែមានចំណុចខ្វះខាតយ៉ាងច្រើន ដើម្បីក្លាយទៅជាតុលាការយុត្តិធម៌អន្តរជាតិពិតប្រាកដមួយ។ ក្នុងនាមជាអគ្គរដ្ឋអាជ្ញា លោក ល្វីស ម៉ូរេណូ អូកាំប៉ូ (Luis Moreno-Ocampo) បានក្លាយជាមុខមាត់នៅលើសកលលោករបស់តុលាការឧក្រិដ្ឋកម្មអន្តរជាតិ នៅទីក្រុង ឡាអេ (Hague)។ ការកាត់សេចក្តីលោក ថំម៉ាស លូបាងហ្គា ដែលជាការកាត់ទោសលើកទីមួយនៅក្នុងប្រវត្តិសាស្រ្តរបស់តុលាការនេះ បានក្លាយជាពេលវេលាដ៏អស្ចារ្យមួយ សម្រាប់មេធាវីជាតិ អាហ្សង់ទីន (Argentine) រូបនេះ។ <!--IMAGE-LEFT--> «តុលាការអន្តរជាតិនេះ បានស៊ើបអង្កេតទៅលើការឈឺចាប់របស់សមាជិកនៃមនុស្សជាតិមួយចំនួន ដែលងាយទទួលរងផលប៉ះពាល់ខ្លាំងបំផុត មានដូចជាកុមារនៅក្នុងតំបន់សង្រ្គាម។ តុលាការបានផ្តល់នូវការកាត់សេចក្តីប្រកបដោយយុត្តិធម៌សម្រាប់ជនសង្ស័យ ហើយបានកាត់ទោសលោក។ ការកាត់សេចក្តីនេះ គឺជាជោគជ័យមួយសម្រាប់មនុស្សជាតិ»។ បទចោទប្រកាន់នៅក្នុងការកាត់សេចក្តី លូបាងហ្គា ផ្អែកទាំងស្រុងទៅលើការប្រើប្រាស់ទាហានកុមារ។ លោក ហ្វីល ក្លាក (Phil Clark) អ្នកវិភាគស្តីពីតុលាការ ICC នៃសាកលវិទ្យាល័យ ឡុងដុង (London University) និយាយថា វិសាលភាពនិងដែនឥទ្ធិពលរបស់តុលាការនេះ នៅមានកម្រិតនៅឡើយ។ «ខ្ញុំគិតថា មានភាពមន្ទិលសង្ស័យកាន់តែខ្លាំងឡើងស្តីពីថាតើតុលាការ ICC អាចផ្លាស់ប្តូរឥទ្ធិពលនៃជម្លោះនៅនឹងកន្លែងដែរឬទេ។ ខ្ញុំគិតថា មានអារម្មណ៍ថា តុលាការនេះ ជាស្ថាប័នដែលស្ថិតនៅដាច់ឆ្ងាយ។ តុលាការនេះ មានមូលដ្ឋាននៅក្នុងទីក្រុង ឡាអេ ហើយគ្មានទំនាក់ទំនងជាមួយនឹងជីវភាពរស់នៅរបស់ប្រជាពលរដ្ឋនៅនឹងកន្លែងទេ។» ក្រៅពីសំណុំរឿងក្តីនៅក្នុងសាធារណរដ្ឋប្រជាធិបតេយ្យ កុងហ្គោ រដ្ឋអាជ្ញារបស់តុលាការ ICC បានបើកការស៊ើបអង្កេតទៅលើហេតុការណ៍ចំនួន៧កន្លែងផ្សេងទៀត នៅទ្វីបអាហ្វ្រិក។ នៅក្នុងចំណោមហេតុការណ៍ទាំងនោះ មានការស៊ើបអង្កេតទៅលើ កងទ័ពតស៊ូព្រះជាម្ចាស់ (Lord's Resistance Army) ដែលមានដើមកំណើតចេញពីប្រទេស អ៊ុយហ្គាន់ដា (Uganda)។ មេដឹកនាំរបស់ក្រុមនេះ ឈ្មោះលោក ចូស្សែប កូនី (Joseph Kony) ក៏ត្រូវបានចោទប្រកាន់ពីបទការកេណ្ឌទាហានកុមាររាប់ម៉ឺននាក់ដោយបង្ខំដែរ។ លោក កូនី ទទួលបានការចាប់អារម្មណ៍ពីសារព័ត៌មាននៅទូទាំងពិភពលោក កាលពីប៉ុន្មានថ្ងៃថ្មីៗនេះ បន្ទាប់ពីខ្សែវីដេអូមួយដែលត្រូវបានផលិតឡើងដោយក្រុមតស៊ូមតិ ឈ្មោះថា កុមារអាថ៌កំបាំង ឬហៅជាភាសាអង់គ្លេសថា Invisible Children ដែលបានគូសបញ្ជាក់ពីបទចោទប្រកាន់ប្រឆាំងទៅនឹងរូបលោក ត្រូវបានផ្សព្វផ្សាយពាសពេញប្រព័ន្ធអ៊ីនធឺណិត។ ប៉ុន្តែ អ្នកវិភាគ ហ្វីល ក្លាក មានប្រសាសន៍ថា តុលាការនេះ មិនស៊ីសង្វាក់ជាមួយនឹងគោលដៅរបស់ខ្លួនសោះ។ «កាលពីពេលថ្មីៗនេះ ឧទាហរណ៍ដ៏ល្អក្នុងរឿងនេះ គឺថាតុលាការ ICC មិនបានជួយអ្វីទាំងអស់ ខណៈដែលរដ្ឋាភិបាល អ៊ុយហ្គាន់ដា បានបាញ់រះលើជនស៊ីវិលរបស់ខ្លួន បន្ទាប់ពីការបោះឆ្នោតកាលពីឆ្នាំមុន។ នេះជាឧទាហរណ៍ស្តីពីប្រទេសមួយ ដែលតុលាការ ICC បានធ្វើការអស់រយៈពេលជាយូរមកហើយ ដែលគ្មានការផ្លាស់ប្តូរអ្វីសោះ នៅក្នុងជម្លោះនេះទេ។» សមាជិកអចិន្រ្តៃយ៍ចំនួនបី របស់ក្រុមប្រឹក្សាសន្តិសុខអង្គការសហប្រជាជាតិ មានដូចជា សហរដ្ឋអាមេរិក(US) រុស្សី (Russia) និងចិន (China) បានបដិសេធមិនព្រមចុះហត្ថលេខាជាមួយតុលាការឧក្រិដ្ឋកម្មអន្តរជាតិ ដោយបានលើកឡើងអំពីការព្រួយបារម្ភពីការចោទប្រកាន់ដោយសារបុព្វហេតុនយោបាយ។ លោក ក្លាក និយាយថា លោក អូកាំប៉ូ រដ្ឋអាជ្ញានៃតុលាការ ICC កំពុងកសាងទំនាក់ទំនងយ៉ាងកក់ក្តៅ ជាមួយលោកប្រធានាធិបតី បារ៉ាក់ អូបាម៉ា (Barack Obama)។ «លោកមានការសប្បាយចិត្តយ៉ាងខ្លាំង ដែលសហរដ្ឋអាមេរិកបានអនុញ្ញាតឱ្យមានការស៊ើបអង្កេត នៅក្នុងតំបន់ ដាហ្វ័រ (Darfur) ហើយនាពេលថ្មីៗនេះនៅក្នុងប្រទេស លីប៊ី (Libya)ទៀត ដែលបង្ហាញថា សហរដ្ឋអាមេរិកប្រហែលជាកំពុងតែចាប់អារម្មណ៍លើតុលាការ ICC។ ប៉ុន្តែ វាលុះណាតែមហាអំណាចធំៗទាំងនោះយល់ព្រមចូលរួម ហើយមានឆន្ទៈក្នុងការដាក់ឱ្យបុគ្គលិករបស់ខ្លួនទទួលការកាត់ទោសដែរ ទើបយើងអាចផ្តល់ទឡ្ហីករណ៍ថា តុលាការនេះបានក្លាយទៅជាស្ថាប័នសកលដ៏ពិតប្រាកដមួយ»។ លោក អូកាំប៉ូ នឹងចេញពីមុខដំណែងនៅខែមិថុនា ដែលនឹងត្រូវជំនួសដោយ លោកស្រី ហ្វាទូ បែនស៊ូដា (Fatou Bensouda) នៃប្រទេស ហ្គាមបៀ (Gambia)។ នេះ ជាលើកទីមួយហើយ ដែលជនជាតិអាហ្រ្វិកមួយរូបនឹងកាន់ការងារជាអគ្គរដ្ឋអាជ្ញា៕ ប្រែសម្រួលដោយ ឌី ខាំបូលី This posting includes an audio/video/photo media file: Download Now |
| មេដឹកនាំពិភពលោកប្រឆាំងការគំរាមកំហែងនៃភេរវកម្មបរមាណូ Posted: 28 Mar 2012 12:31 AM PDT កាលពីថ្ងៃអង្គារ ប្រធានាធិបតីអាមេរិក លោកបារ៉ាក់ អូបាម៉ានិងពួកមេដឹកនាំពិភពលោកឯទៀតបានអំពាវនាវឱ្យមានវិធានការខ្លាំងក្លាសម្រាប់ប្រយុទ្ធប្រឆាំងការគំរាមកំហែងនៃភេរវកម្មបរមាណូ ដោយថ្លែងបិទសន្និសីទកំពូលនៃប្រទេសទាំង៥៣ដែលបានត្រូវគ្របដណ្តប់ដោយគម្រោងបង្ហោះកាំជ្រួចរបស់ប្រទេសកូរ៉េខាងជើង។ <!--IMAGE-LEFT--> នៅក្នុងសេចក្តីថ្លែងការណ៍ចុងក្រោយមួយពីរដ្ឋធានីនៃប្រទេសកូរ៉េខាងត្បូង ពួកមេដឹកនាំទាំងនេះ ដែលរួមមានលោកប្រធានាធិបតីចិនហ៊ូ ជីនតាវ និងលោកនាយករដ្ឋមន្ត្រីប៉ាគីស្ថាន យូស៊ូហ្វ រ៉ាហ្សា ជីឡានី ផងដែរបានអំពាវនាវឱ្យមានវិធានការដើម្បីកាត់បន្ថយការប្រើប្រាស់ខាងផ្នែកស៊ីវិលនៃសារធាតុអ៊ុយរ៉ាញ៉ូមសំរិទ្ធសំរាំងខ្ពស់ ដែលជាធាតុផ្សំសំខាន់មួយសម្រាប់ផលិតអាវុធបរមាណូ។ កាលពីថ្ងៃអង្គារ លោកប្រធានាធិបតីអូបាម៉ាបានមានប្រសាសន៍ថាសហគមន៍អន្តរជាតិត្រូវធ្វើ«ការខិតខំប្រឹងប្រែងដោយម៉ត់ចត់និងមាននិរន្តរភាព»ដើម្បីកាត់បន្ថយឃ្លាំងអាវុធបរមាណូក្នុងពិភពលោក។ អឺរ៉ុប៖ អង្គការសម្រាប់កិច្ចសហប្រតិបត្តិការសេដ្ឋកិច្ចនិងការអភិវឌ្ឍន៍OECDបាននិយាយថា ប្លុកប្រទេសប្រើប្រាស់ប្រាក់អឺរ៉ូត្រូវការបង្កើតមូលនិធិសម្រាប់ជួយសង្គ្រោះធំជាងមុនសម្រាប់គ្រាមានអាសន្នខាងហិរញ្ញវត្ថុក្នុងពេលអនាគត ហើយត្រូវតែធំជាងមូលនិធិដែលប្រទេសអាល្លឺម៉ង់ ដែលជាប្រទេសមានសដ្ឋកិច្ចធំជាងគេក្នុងទ្វីបអឺរ៉ុបព្រមទទួលយក។ គុយបា៖ សម្តេចប៉ាប បេណេឌិក បានសម្តែងការគោរពដល់សន្តីដែលគេជឿបំផុតក្នុងប្រទេសគុយបា ដោយព្រះអង្គបានមានបន្ទូលប្រាប់ពួកអ្នកស្តាប់ព្រះអង្គនិយាយថាព្រះអង្គបានសុំបួងសួងដល់សេចក្តីត្រូវការរបស់ជនដែលរងទុក្ខវេទនានិងជនដែលគ្មានសេរីភាព។ ប៉ាគីស្ថាន៖ ប្រធានាធិបតីអាមេរិក លោក បារ៉ាក់ អូបាម៉ាបានមានប្រសាសន៍ថាការពិនិត្យសើរើជាថ្មីលើទំនាក់ទំនងជាមួយប៉ាគីស្ថានមិនគួរគោរពតែអធិបតេយ្យភាពនៃប្រទេសនេះប៉ុណ្ណោះទេ តែក៏ត្រូវតែគោរពដល់សេចក្តីត្រូវការខាងសន្តិសុខរបស់អាមេរិកផងដែរ។ រុស្ស៊ី៖ កាលពីថ្ងៃអង្គារ លោកប្រធានាធិបតីអាមេរិក បារ៉ាក់អូបាម៉ាបានបំភ្លឺអំពីការកត់សម្គាល់ផ្ទាល់ខ្លួនស្តីពីកិច្ចការពារកាំជ្រួចទៅកាន់លោកប្រធានាធិបតីរុស្សី ឌីមីទ្រី មេឌ្វេដេវ ដែលគេបានឮដោយសារមីក្រូហ្វូនមួយបានបើកដោយអចេតនា។ ស៊ីរី៖ លោក ខួហ្វី អាណាន់ ប្រេសីតសន្តិភាពអន្តរជាតិបានមានប្រសាសន៍ថារដ្ឋាភិបាលស៊ីរីបានទទួលយកផែនការរបស់លោកដើម្បីដោះស្រាយការបះបោររបស់ក្រុមប្រឆាំងក្នុងប្រទេសដែលមានរយៈពេលមួយឆ្នាំមកហើយ។ តែការប្រយុទ្ធគ្នារវាងកងកម្លាំងរដ្ឋាភិបាលនិងពួកឧទ្ទាមនៅតែបន្ត។ ស៊ូដង់ខាងត្បូង៖ បានចោទប្រកាន់ប្រទេសស៊ូដង់ថាបានធ្វើការវាយប្រហារតាមអាកាសក្នុងថ្ងៃទីពីរទៅលើដែនដីសំបូរប្រេងនៅតាមបណ្តោយព្រំដែនមានជម្លោះរបស់ពួកគេ មួយថ្ងៃនៅក្រោយការប្រឈមមុខខាងយោធាដោយផ្ទាល់មួយដែលមិនសូវមានរវាងប្រទេសជាគូប្រជែងគ្នាទាំងពីរនេះ។ <!--AV--> This posting includes an audio/video/photo media file: Download Now |
| មេគុកទួលស្លែងបញ្ជាក់ថាគាត់ជួបប្រជុំជាប្រចាំជាមួយនួនជា Posted: 27 Mar 2012 08:48 PM PDT នៅថ្ងៃអង្គារនេះ កាំង ហ្កេកអ៊ាវ ហៅឌុច សាក្សីដ៏សំខាន់មួយរូបក្នុងសំណុំរឿង០០២ បានបង្ហាញជាក់លាក់ថែមទៀតថា នួន ជា មានការទទួលខុសត្រូវក្នុងមន្ទីរ ស ២១ ឬ គុកទួលស្លែង និងការទទួលខុសត្រូវនៅក្នុងការធ្វើសេចក្ដីសម្រេចនយោបាយក្នុងរបបកម្ពុជាប្រជាធិបតេយ្យរបស់ពួកខ្មែរក្រហម។ ឌុច បាននិយាយនៅក្នុងសវនាការដោយអង្គជំនុំជម្រះសាលាដំបូងថាជនជាប់ចោទដែលជាអតីតប្រធានសភាខ្មែរក្រហមរូបនេះបានឡើងត្រួតត្រាគុកទួលស្លែងជំនួសសុន សេន កាលពីខែសីហា ឆ្នាំ ១៩៧៧។ ឌុចបានបញ្ជាក់បន្ថែមថា៖ «ដូច្នេះ ខ្ញុំរាយការណ៍ជូនបង នួន តាំងពីពេលហ្នឹងរហូតមក។ និយាយដោយជាក់លាក់ហ្នឹងគឺចម្លើយសារភាពរបស់មនុស្សដែលជាប់នៅ ស២១។ អ្នកណាដែលខាងលើចាត់ទុកជាសំខាន់។ ជាទូទៅ ខ្ញុំត្រូវរាយការណ៍ជូនគាត់នូវអ្នកទាំងឡាយណាដែលគាត់ចាត់ទុកជាសំខាន់ហើយចម្លើយដល់ណាហើយ។ ដើម្បីសុំមតិកែប្រែ»។ ឌុច បានបន្ថែមទៀតថាគាត់តែងតែជួបដោយផ្ទាល់ជាមួយ នួន ជា ដើម្បីធ្វើសេចក្ដីរាយការណ៍ពីព័ត៌មាននៅគុកទួលស្លែងរាល់បីថ្ងៃ ឬ ប្រាំថ្ងៃម្តង។ ឌុច បានឆ្លើយទៅនឹងសំណួររបស់សហព្រះរាជអាជ្ញារងអន្ដរជាតិ លោក វីលាម ស៊្មីត ថា នួន ជា ឡើងកាន់កាប់កិច្ចការក្នុងគុកទួលស្លែងដោយសារតែ នួន ជា ចង់តាមដានចម្លើយសារភាពរបស់អ្នកទោសសំខាន់ៗ ដែលគាត់ផ្តោតទៅលើ និងដើម្បីក្តាប់សភាពការណ៍នៅក្នុងគុកនេះ។ ឌុច ត្រូវបានផ្តន្ទាទោសដោយអង្គជំនុំជម្រះតុលាការកំពូលឲ្យជាប់ពន្ធនាគារអស់មួយជីវិតចំពោះអំពើឃោរឃៅក្នុងមន្ទីរ ស២១ ដែលនៅទីនោះអ្នកទោសយ៉ាងតិច ១២.៣៨០ នាក់ ត្រូវបានធ្វើទារុណកម្មយ៉ាងព្រៃផ្សៃ និងសម្លាប់ចោល។ ក្នុងការផ្តល់សក្ខីកម្មប៉ុន្មានថ្ងៃមកនេះ ឌុច បាននិយាយថា នួន ជា បានដាក់បញ្ជាឲ្យចាប់ជនដែលត្រូវសង្ស័យថាជាខ្មាំងរបស់អង្គការយកមកឃុំឃាំងនៅមន្ទីរ២១ និងបញ្ជាឲ្យកម្ចេចឬសម្លាប់ចោលបញ្ជាឲ្យដកឈ្មោះជនសង្ស័យពីបញ្ជីចេញ។ ក៏ប៉ុន្ដែជនសង្ស័យនៅតែមិនអាចគេចផុតពីការចាប់ខ្លួនយកមកដាក់គុកទេក្នុងរយៈពេលក្រោយមកទៀត។ នៅរសៀលថ្ងៃនេះ ឌុច បានបញ្ជាក់ឡើងវិញថា ក្នុងសម័យកម្ពុជាប្រជាធិបតេយ្យរបស់ខ្មែរក្រហមអំណាចត្រូវបានប្រមូលផ្តុំផ្តាច់មុខតែលើមេដឹកនាំតែពីរនាក់គត់។ «អំណាចទាំងអស់ ត្រូវប្រមូលក្តោបក្តាប់នៅលើកណ្តាប់ដៃលេខា គឺ ប៉ុល ពត។ ក៏ប៉ុន្តែ នួន ជា នៅជាមួយនឹងគ្នា។ កាលណា ប៉ុល ពត រវល់នួន ជា ជំនួស។ កាលណា ប៉ុល ពត សម្រេច នួន ជា តាមដានការអនុវត្ត។ ដូច្នេះអំណាចមូលនៅលើ ប៉ុល ពត និង នួន ជា»។ ឌុច ក៏បានអះអាងដែរថា ប៉ុល ពត មេស្ថាបនិករបបកុម្មុយនិស្ដខ្មែរក្រហម គឺជាអ្នកដាក់ផែនការឲ្យប្រើរបបហូបរួម។ ម្យ៉ាងទៀតប្រព័ន្ធតុលាការ សភា តួនាទីប្រមុខរដ្ឋ ការបោះឆ្នោតជ្រើសតាំងសមាជិកសភាសិទ្ធិស្មើគ្នារវាងប្រជាពលរដ្ឋសិទ្ធិស្មើគ្នា រវាងបុរសនិងស្ដ្រីលទ្ធិប្រជាធិបតេយ្យមានចែងតែក្នុងធម្មនុញ្ញរបស់ពួកខ្មែរក្រហមតែប៉ុណ្ណោះ។ ប៉ុន្ដែមិនមានការអនុវត្តជាក់ស្តែងនោះទេ។ សូមបញ្ជាក់ថាសហមេធាវីការពារក្ដីរបស់នួន ជា លោក ម៉ាយឃើល ផេសម៉េន និង សហមេធាវីការពារក្ដីរបស់ជនជាប់ចោទ អៀង សារី បានធ្វើការជំទាស់ជាច្រើនលើកទៅនឹងការតាំងសំណួរមួយចំនួនរបស់សហព្រះរាជអាជ្ញារង លោក វីលាម ស៊្មីត ទៅ ឌុច ដោយសំអាងថាសំណួរទាំងនោះគឺជាសំណួរនាំមុខសម្រាប់ទាញយកចម្លើយឬជាសំណួរដែលមិនត្រូវនឹងសមត្ថភាពរបស់ ឌុច។ ក៏ប៉ុន្ដែ លោកចៅក្រម និល ណុន ប្រធានអង្គជំនុំជម្រះសាលាដំបូងបានចា្រនចោលប្រសិទ្ធភាពនៃការជំទាស់នោះជាបន្តបន្ទាប់៕ This posting includes an audio/video/photo media file: Download Now |
| តុលាការមិនឃុំខ្លួនលោកចាន់ ចេងទេប៉ុន្តែដាក់ឱ្យស្ថិតក្រោមការឃ្លាំមើល Posted: 27 Mar 2012 06:22 PM PDT លោក ចាន់ ចេង អ្នកតំណាងរាស្ត្រគណបក្សប្រឆាំងត្រូវបានដាក់ឲ្យស្ថិតនៅក្រោមការត្រួតពិនិត្យរបស់តុលាការខេត្តកណ្តាលបន្ទាប់ពីបានចូលបំភ្លឺពាក់ព័ន្ធនឹងរឿងក្តីក្តាំផ្តល់មធ្យោបាយដល់ជនជាប់ចោទ មាស ប៉េង ជំទប់ទី២ ស្រុកកៀនស្វាយ ខេត្តកណ្តាលខាងគណបក្ស សម រង្ស៊ី ឲ្យលួចរត់ចេញពីមន្ទីរឃុំឃាំង។ នេះបើតាមការបញ្ជាក់ពីមន្ត្រីតុលាការ។ លោកស៊ិន វីរៈ ចៅក្រមនៃតុលាការខេត្តកណ្តាលបានមានប្រសាសន៍ប្រាប់ក្រុមអ្នកសារព័ត៌មានថា តុលាការសម្រេចមិនឃុំខ្លួនលោក ចាន់ ចេង ទេ។ ក៏ប៉ុន្តែបានដាក់លក្ខខណ្ឌចំនួនបីចំណុច ដែលរួមមានមិនឲ្យលោក ចាន់ ចេង ធ្វើដំណើរចាកចេញទៅក្រៅប្រទេស ផ្លាស់ប្តូរលំនៅដ្ឋានត្រូវផ្តល់ដំណឹងមកតុលាការ និងត្រូវបង្ហាញវត្តមាននៅពេលដែលតុលាការកោះហៅ។ លោកស៊ិន វីរៈបានបញ្ចាក់ពីមូលហេតុនោះថា៖ «វាមានមូលហេតុអីបើមូលហេតុមាននៅក្នុងនីតិវិធីមាត្រា ២០៥ មូលហេតុនៃការឃុំខ្លួន។ ស្ថានភាពរបស់គាត់ វាឥតចូលនៅក្នុងមាត្រា ២០៥។ អញ្ចឹងបានជាយើង ដាក់ស្ថិតនៅក្រោមការត្រួតពិនិត្យផ្លូវតុលាការ»។ លោក ចាន់ ចេង អ្នកតំណាងរាស្ត្រខាងគណបក្សប្រឆាំងត្រូវបានរដ្ឋសភាដកអភ័យឯកសិទ្ធិកាលពីខែវិច្ឆិកា ឆ្នាំ២០១១ ដើម្បីបើកផ្លូវដល់ការស៊ើបអង្កេតរបស់តុលាការខេត្តកណ្តាលពាក់ព័ន្ធនឹងការផ្តល់មធ្យោបាយដល់ជនជាប់ចោទ មាស ប៉េង លួចរត់។ លោក មាស ប៉េង ជំទប់ទី២ ឃុំបន្ទាយដែក ខាងគណបក្សសម រង្ស៊ី ត្រូវបានតុលាការចោទប្រកាន់ពីបទប្រើប្រាស់អំពើហិង្សាប្រឆាំងទៅនឹងអ្នកកាន់កាប់អចលនវត្ថុដោយសុច្ចរិតនៅក្នុងរឿងទំនាស់ដីធ្លីមួយជាមួយនឹងលោក ប្រាក់ សាវុធ សមាជិកក្រុមប្រឹក្សាខេត្តក្រចេះខាងគណបក្សប្រជាជនកម្ពុជា។ បន្ទាប់ពីបានកោះហៅលោក មាស ប៉េង មកសាកសួរលោកចៅក្រម លឹម សុគន្ថា បានសម្រេចឃុំខ្លួនលោក មាស ប៉េង បណ្តោះអាសន្ននៅពន្ធនាគារខេត្តកណ្តាល។ នៅក្នុងអំឡុងពេលយកទៅឃុំខ្លួនពេលនោះ លោក ជួង ជូងី មេធាវីការពារក្តីបានបញ្ជាក់ថាការឃុំខ្លួនកូនក្តីរបស់លោកមិនអាចធ្វើទៅបានទេដោយគ្មានដីកាឃុំខ្លួន។ រួចហើយក៏បានស្នើឲ្យលោកចាន់ ចេង ដឹកលោក មាស ប៉េង ទៅកាន់លំនៅដ្ឋានវិញ។ លោក ចាន់ ចេង សមាជិកតំណាងរាស្ត្រខាងគណបក្សសម រង្ស៊ី និងលោក កើត ឃី មេធាវីការពារក្តី មិនបានឆ្លើយទៅនឹងសំណួរណាមួយជាមួយនឹងអ្នកសារព័ត៌មានទេ។ ដោយលោកបានបង្វែរសំណួរនេះឲ្យទៅសួរអ្នកនាំពាក្យគណបក្សសម រង្ស៊ី។ «សុំឲ្យទៅជួបអ្នកនាំពាក្យគណបក្ស មិនអត្ថាធិប្បាយទេ»។ លោក យឹម សុវណ្ណ អ្នកតំណាងរាស្ត្រ និងជាអ្នកនាំពាក្យគណបក្សសម រង្ស៊ី បានបញ្ជាក់ថារឿងក្តីនេះជារឿងនយោបាយ។ លោកបានមានប្រសាសន៍ទៀតថា តុលាការគួរតែបញ្ចប់ករណីនេះ។ «អ្នកទាំងពីរនាក់ហ្នឹងគឺជាអ្នកមេធាវីនិងតំណាងរាស្ត្រទេមិនមែនជាឧក្រិដ្ឋជនឯណា។ មិនមែនជាចោរប្លន់ឯណា។ ការដែលចុះទៅជួយប្រជាពលរដ្ឋគឺជាកាតព្វកិច្ចតំណាងរាស្រ្តនិងរបស់មេធាវីការពារក្តី។ នៅពេលណាដែលឃើញទង្វើខុសច្បាប់គឺមេធាវីអ្នកតំណាងរាស្ត្រមានសិទ្ធិទៅតាមសង្កេតការណ៍និងតាមផ្តល់យោបល់ដើម្បីដោះស្រាយតាមផ្លូវច្បាប់»។ លោក ជួង ជូងី មេធាវីការពារក្តីឲ្យគណបក្សប្រឆាំងត្រូវបានតុលាការដាក់ឲ្យស្ថិតនៅក្រោមការត្រួតពិនិត្យរបស់តុលាការ ដូចករណីលោក ចាន់ ចេង ដែរ។ លោក ជួង ជូងី បានថ្លែងប្រាប់ក្រុមអ្នកកាសែត នៅឯតុលាការខេត្តកណ្តាលថា តុលាការគួរតែទម្លាក់ចោលពាក្យបណ្តឹងទាំងពីរនេះ។ លោកបានមានប្រសាសន៍ថា បើពុំដូច្នេះទេ អយ្យការតុលាការខេត្តកណ្តាល គួរតែចាត់ការពាក្យបណ្តឹងរបស់លោក ដែលបានប្តឹងចៅក្រម លឹម សុគន្ថា ពីបទបានប្រព្រឹត្តខុសពីនីតិវិធី។ លោក ជួង ជូងីបានបញ្ជាក់ថា៖ «ពីព្រោះកាលពីថ្ងៃទី១៣ ខែកុម្ភៈ ឆ្នាំ២០១២ នេះ ខ្ញុំបានដាក់ពាក្យបណ្តឹងមកអយ្យការអមសាលាដំបូងខេត្តកណ្តាលហ្នឹងចោទប្រកាន់ លឹម សុគន្ថា ពីបទក្លែងឯកសារសាធារណៈ។ គឺខ្ញុំផ្តោតទៅលើដីកា សម្រេចឃុំខ្លួនមួយ និងដីកាបង្គាប់ឲ្យឃុំខ្លួនមួយ ដែលឯកសារទាំងពីរនេះ ជាឯកសារក្លែងសុទ្ធសាធ»។ លោក ស៊ិន វីរៈ ចៅក្រមនៃតុលាការខេត្តកណ្តាលបាននិយាយថា លោកបានទទួលពាក្យបណ្តឹងនេះរួចហើយ។ ហើយលោកកំពុងពិនិត្យមើលតាមផ្លូវច្បាប់៕ This posting includes an audio/video/photo media file: Download Now |
| You are subscribed to email updates from VOA News: ព័ត៌មាន To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
.jpg){kind=link}
