VOA News: ព័ត៌មាន: “ប្រធានអ.ស.បព្រួយបារម្ភខ្លាំងអំពីគម្រោងបាញ់បង្ហោះម៉ីសីលរបស់កូរ៉េខាងជើង” plus 3 more |
- ប្រធានអ.ស.បព្រួយបារម្ភខ្លាំងអំពីគម្រោងបាញ់បង្ហោះម៉ីសីលរបស់កូរ៉េខាងជើង
- មេធាវីចិនត្រូវបានគេបញ្ជាឲ្យសច្ចាប្រណីធានសម្តែងភក្តីភាពចំពោះគណបក្សកុម្មុយនីស្ត
- ឌុចបញ្ជាក់ថាគឺប៉ុលពតនិងនួនជាមានអំណាចគ្រប់ផ្នែក
- ភូមាស្វែងរកការគាំទ្រពីកម្ពុជាឱ្យលើកលែងទណ្ឌកម្មអន្តរជាតិ
| ប្រធានអ.ស.បព្រួយបារម្ភខ្លាំងអំពីគម្រោងបាញ់បង្ហោះម៉ីសីលរបស់កូរ៉េខាងជើង Posted: 22 Mar 2012 07:33 AM PDT លោកអគ្គលេខាធិការអង្គការសហប្រជាជាតិ បាន គី មូន (Ban Ki-moon) បានសម្តែងនូវការព្រួយកង្វល់ដ៏ជ្រាលជ្រៅអំពីផែនការរបស់កូរ៉េខាងជើងក្នុងការបាញ់បង្ហោះផ្កាយរណបចូលគន្លងជុំវិញផែនដី (earth orbit) ហើយលោកបានសន្យាថានឹងលើកបញ្ហានេះឡើងនៅសន្និសីទសន្តិសុខនុយក្លេអ៊ែរក្នុងទីក្រុងសេអ៊ូលប្រទេសកូរ៉េខាងត្បូងនៅសប្តាហ៍ក្រោយ។ ថ្លែងនៅថ្ងៃព្រហស្បតិ៍នេះក្នុងប្រទេសម៉ាឡេស៊ី លោកបានមានប្រសាសន៍ថាការបាញ់បង្ហោះមីស៊ីលជាការគំរាមកំហែងសន្តិសុខក្នុងតំបន់និងធ្វើឲ្យអន្តរាយដល់ការជឿនលឿននៅពេលថ្មីៗនេះដើម្បីបញ្ចប់ជម្លោះលើកម្មវិធីនុយក្លេអ៊ែរបស់រដ្ឋាភិបាលទីក្រុងព្យុងយ៉ាង។ លោកបានបន្ថែមដូច្នេះថា «ខ្ញុំស្នើសុំឲ្យអាជ្ញាធរសាធារណរដ្ឋប្រជាធិបតេយ្យកូរ៉េ (កូរ៉េខាងជើង) ទប់កុំធ្វើសកម្មភាពណាមួយដែលធ្វើឲ្យមានអស្ថេរភាពដល់សភាពការណ៍និងសន្តិភាពនិងស្ថេរភាពនៅក្នុងឧបទ្វីបកូរ៉េហើយការណ៍នេះជាការប្រឆាំងស្មារតីរបស់សហគមន៍អន្តរជាតិ។» ព័ត៌មានអន្តរជាតិសំខាន់ៗដទៃទៀត៖ <!--IMAGE-RIGHT--> បារាំង៖ មន្រ្តីបារាំងនិយាយថា ជនសង្ស័យសម្លាប់មនុស្ស៧នាក់បានស្លាប់ហើយបន្ទាប់ពីមានភាពមិនចាញ់មិនឈ្នះអស់រយៈពេលជាង២៤ម៉ោងនៅក្នុងទីក្រុង ទូលូស(Touslouse) នាភាគខាងត្បូងប្រទេសមក។ ម៉ាលី៖ ទាហានមិនគោរពមេបញ្ជាការនៅក្នុងប្រទេសម៉ាលីនិយាយថា ពួកគេបានបញ្ចប់ការគ្រប់គ្រងដែលខ្វះសមត្ថភាពរបស់ប្រធានាធិបតី អាម៉ាឌូ ទូម៉ានី ទួរ៉េ (Amadou Toumani Toure) ហើយបានលុបចោលរដ្ឋធម្មនុញ្ញជាបណ្តោះអាសន្នរបស់ប្រទេសម៉ាលីដើម្បីប្រឆាំងតវ៉ាចំណាត់ការរបស់រដ្ឋាភិបាលចំពោះការងើបបះបោររបស់ពួក ទួរេគ (Tuareg) នៅក្នុងតំបន់ភាគខាងជើងប្រទេស។ ស៊ីរី៖ លោកអគ្គលេខាធិការអង្គការសហប្រជាជាតិ Ban Ki-moon មានប្រសាសន៍ថា ក្រុមប្រឹក្សាសន្តិសុខបានបញ្ជូនសារ«យ៉ាងច្បាស់» នៅក្នុងការណ៍ដែលខ្លួនបានអនុម័តឯកសារមិនមានចំណងផ្លូវច្បាប់មួយ ដែលអំពាវនាវដល់រដ្ឋាភិបាលនិងពួកប្រឆាំងស៊ីរីឲ្យអនុវត្តផែនការបញ្ចប់ជម្លោះបង្ហូរឈាមរបស់ប្រទេសនោះ។ ភូមា៖ នៅក្នុងការសហការជាមួយរដ្ឋាភិបាលភូមា ទីភ្នាក់ងារវប្បធម៌របស់អង្គការសហប្រជាជាតិ បានរៀបចំសិក្ខាសាលាដើម្បីពិនិត្យមើលទំនាក់ទំនងរបស់រដ្ឋាភិបាលជាមួយបណ្តាញផ្សាយព័ត៌មាន។ ស.រ.អា/កូរ៉េ៖ ប្រធានាធិបតី លី ម៉្យុង បាក់ (Lee Myung-bak) នៃប្រទេសកូរ៉េខាងត្បូងនិយាយថារដ្ឋាភិបាលរបស់លោកកំពុងខិតចូលកាន់តែជិតដល់ការព្រមព្រៀងជាមួយសហរដ្ឋអាមេរិកដើម្បីពង្រីកចម្ងាយកាំជ្រួចផ្លោងរបស់ខ្លួនដើម្បីទប់ទល់ជាមួយប្រទេសកូរ៉េខាងជើង។ ជប៉ុន៖ ប្រទេសជប៉ុនបានចុះផ្សាយផលសល់លើសពីពាណិជ្ជកម្មដែលគេមិនរំពឹងទុកមួយសម្រាប់ខែកុម្ភៈ ដែលជាការបញ្ច្រាសគ្នានឹងរយៈពេល៥ខែដែលមានការខាតបង់យ៉ាងខ្លាំង។ ស.រ.អា៖ មនុស្សជាង១.០០០នាក់បានដើរជាក្បួនកាលពីថ្ងៃពុធនៅក្នុងទីក្រុងញូវយ៉កដើម្បីប្រឆាំងតវ៉ាការបាញ់សម្លាប់ក្មេងជំទង់អាមេរិកាំងដើមកំណើតអាហ្វ្រិកម្នាក់កាលពីខែមុននៅក្នុងរដ្ឋ ហ្វ្លរីដា (Florida) ដោយអ្នកឃ្លាំមើលម្នាក់។ <!--AV--> This posting includes an audio/video/photo media file: Download Now |
| មេធាវីចិនត្រូវបានគេបញ្ជាឲ្យសច្ចាប្រណីធានសម្តែងភក្តីភាពចំពោះគណបក្សកុម្មុយនីស្ត Posted: 22 Mar 2012 01:18 AM PDT ចិន៖ ជាលើកដំបូងបង្អស់ ក្រសួងយុត្តិធម៌ចិនបានបញ្ជាឲ្យមេធាវីធ្វើសច្ចាប្រណីធានសំដែងភក្តីភាពចំពោះគណបក្សកុម្មុយនីស្ត។ ចំណាត់ការនេះបានធ្វើឲ្យមេធាវីសិទ្ធិមនុស្សដែលការពារក្តីពួកអ្នករិះគន់រដ្ឋាភិបាលផ្តាច់ការនៅក្រុងប៉េកាំងមានកំហឹងជាខ្លាំង។ សច្ចាប្រណិធាននេះតម្រូវឲ្យមេធាវី «ធ្វើសេចក្តីប្តេជ្ញាថានឹងបំពេញបេសកកម្មពិសិដ្ឋជាអ្នកតំណាងច្បាប់ដោយស្មោះស្ម័គ្រចំពោះប្រព័ន្ធសង្គមនិយមតាមលក្ខណៈជាចិន» ឲ្យស្មោះត្រង់នឹងមាតុប្រទេស និងប្រជារាស្រ្ត លើកស្ទួយក្រុមមេដឹកនាំនៃគណបក្សកុម្មុយនិស្តចិន និងប្រព័ន្ធសង្គមនិយម។ មេធាវីពី ហ្ស៊ីជាង បានប្រាប់ក្រុមផ្សាយជាភាសាចិនកុកងឺរបស់វីអូអេថា ពាក្យបញ្ជារបស់គណកម្មាធិការគោលនយោបាយនិងច្បាប់របស់គណបក្សកុម្មុយនីស្តមានភាពច្របូកច្របល់តាំងពីយូរមកហើយ។ <!--IMAGE-RIGHT--> ភូមា៖ មន្រ្តីអាមេរិកាំងនិងអឺរ៉ុបនិយាយថា អស់លោកបានទទួលសេចក្តីអញ្ជើញឲ្យបញ្ជូនក្រុមអ្នកសង្កេតការណ៍ទៅមើលការបោះឆ្នោតកណ្តាលអាណត្តិនៅថ្ងៃទី១ខែមេសា។ ស្រីអ្នកនាំពាក្យស្ថានទូតអាមេរិក នៅក្រុងរ៉ង់ហ្គូន បានបញ្ជាក់ប្រាប់ វីអូអេ និងអង្គការផ្សាយព័ត៌មានដទៃទៀត អំពីសេចក្តីអញ្ជើញនេះ កាលពីថ្ងៃពុធ។ នៅពេលលោកស្រីអង់ឌ្រែន នុតស្មាន ថ្លែងថាសហរដ្ឋអាមេរិក មានការលើកទឹកចិត្តចំពោះសេចក្តីអញ្ជើញនេះ អាមេរិកក៏មានសេចក្តីព្រួយបារម្ភផងដែរចំពោះសេចក្តីរាយការណ៍ដែលថា មានភាពមិនប្រក្រតីជាច្រើននៅក្នុងការរៀបចំការបោះឆ្នោតនេះ។ ស៊ីរី៖ ក្រុមប្រឹក្សាសន្តិសុខអង្គការសហប្រជាជាតិបានអនុម័តតាមសេចក្តីថ្លែងការណ៍មួយ ដើម្បីគាំទ្រផែនការរបស់លោក ខួហ្វី អាណាន់ ប្រេសិតរបស់អង្គការនេះ និងសមាគមប្រទេសអារ៉ាប់ ដែលមានគោលបំណងចង់បញ្ចប់ការបះបោរមួយឆ្នាំរបស់ប្រទេសស៊ីរី។ បារាំង៖ កងនគរបាលបារាំងកំពុងចរចាជាមួយបុរសជាប់សង្ស័យក្នុងការបាញ់សម្លាប់មនុស្ស៧នាក់ រួមមានកុមារជាតិជ្វីហ្វ៣នាក់ នៅក្នុងសាលារៀនមួយក្នុងទីក្រុងទូលូ នាភាគនិរតី។ សហរដ្ឋអាមេរិក៖ បេក្ខជនប្រធានាធិបតីគណបក្សសាធារណរដ្ឋ លោក មីតរ៉មនី បានពង្រីកការនាំមុខរបស់លោក ក្នុងការប្រកួតឲ្យបានការតែងតាំងរបស់គណបក្ស នៅពេលដែលគូប្រជែងកៀកបំផុតរបស់លោក កំពុងផ្តោតទៅលើការប្រកួតលើកក្រោយនៅភាគខាងត្បូង ដែលលោករ៉មនី មានការលំបាកក្នុងការប្រជែងយកអ្នកគាំទ្រ។ ម៉ាលី៖ បណ្តាញវិទ្យុនិងទូរទស្សន៍រដ្ឋបានបញ្ឈប់កម្មវិធីផ្សាយក្នុងរដ្ឋធានី នៅកន្លែងដែលក្រុមទាហានបានធ្វើបាតុកម្មមួយកាលពីថ្ងៃពុធ ដើម្បីតវ៉ាប្រឆាំងនឹងការដោះស្រាយរបស់រដ្ឋាភិបាលអំពីការបះបោរ។ ហ្គីណេប៊ីសូ៖ នឹងត្រូវធ្វើការបោះឆ្នោតផ្តាច់ព្រាត់មួយដើម្បីជ្រើសរើសប្រធានាធិបតី បន្ទាប់ពីគ្មានបេក្ខជនណាម្នាក់បានឈ្នះសម្លេងភាគច្រើន នៅក្នុងការបោះឆ្នោតលើកទីមួយ កាលពីថ្ងៃអាទិត្យ។ <!--AV--> This posting includes an audio/video/photo media file: Download Now |
| ឌុចបញ្ជាក់ថាគឺប៉ុលពតនិងនួនជាមានអំណាចគ្រប់ផ្នែក Posted: 21 Mar 2012 09:20 PM PDT អតីតអ្នកទទួលខុសត្រូវខ្ពស់បំផុតនៃរបបខ្មែរក្រហមមួយរូបបានបញ្ជាក់នៅថ្ងៃពុធនេះថានួន ជានិងប៉ុល ពត គឺជាមេដឹកនាំតែពីរនាក់គត់ដែលក្ដោបក្តាប់អំណាចផ្តាច់មុខនៃរបបកម្ពុជាប្រជាធិបតេយ្យ។ កាំង ហ្កេកអ៊ាវហៅឌុចអតីតប្រធានមន្ទីរស២១ ឬ គុកទួលស្លែងបានផ្ដល់សក្ខីកម្មក្នុងសវនាការរបស់អង្គជំនុំជម្រះសាលាដំបូងថាអតីតមេដឹកនាំកំពូលខ្មែរក្រហមទាំងពីរបានគ្រប់គ្រងកិច្ចការរដ្ឋបាលគ្រប់បែបយ៉ាង។ «គឺបក្សកុម្មុយនិស្ដកម្ពុជាដែលដឹកនាំដោយប៉ុល ពតនួន ជា។ គឺពីរនាក់ហ្នឹងដឹកនាំដាច់ខាតមិនរាថយទៅមុខជានិច្ចគ្រប់ផ្នែក។ នគបាលក៏ដឹកនាំដោយប៉ុល ពត នួន ជា សេដ្ឋកិច្ច ពាណិជ្ជកម្ម យោធា ក៏ប៉ុល ពត នួន ជា»។ ការផ្ដល់សក្ខីកម្មរបស់ឌុច បែបនេះ បន្ទាប់ពីលោក វីលាម ស៊្មីត សហព្រះរាជអាជ្ញារងបរទេសចោទសួរ ឌុច ទាក់ទងនឹងរចនាសម្ព័ន្ធនៃបក្សកុម្មុយនិស្ដកម្ពុជា។ យ៉ាងណាក៏ដោយ នួន ជា ធ្លាប់បានឆ្លើយប្រាប់អង្គជំនុំជម្រះសាលាដំបូងថាគាត់ទទួលបន្ទុកផ្នែកអប់រំនិងមិនពាក់ព័ន្ធនឹងអំណាចយោធាឬការចាត់ចែងរបស់ ប៉ុល ពត ទេ។ ឌុច ត្រូវបានផ្តន្ទាទោសដោយអង្គជំនុំជម្រះតុលាការកំពូលឲ្យជាប់ពន្ធនាគារអស់មួយជីវិតកាលពីខែមុន។ កាលពីថ្ងៃអង្គារ ម្សិលម៉ិញនេះ នួន ជា បានខឹងសម្បានឹងឌុច ហើយចាត់ទុក ឌុច ថាជាសាក្សីមិនបានការ។ ឆ្លើយតបទៅនឹងសំណួររបស់សហព្រះរាជអាជ្ញារងកម្ពុជា លោក សេង ប៊ុនឃាង អតីតមេគុកទួលស្លែងរូបនេះបានបញ្ជាក់បន្ថែមពីតួនាទីរបស់ នួន ជា ក្នុងការបញ្ជាឲ្យចាប់ប្រជាជនឬកម្មាភិបាលខ្មែរក្រហមដែលត្រូវសង្ស័យជាខ្មាំងឬគិញយកមកដាក់គុក។ ឌុច ក៏បានរៀបរាប់ផងដែរថា ខ្មែរក្រហមបានកំណត់សត្រូវរបស់ខ្លួនតាមកាលៈទេសៈ។ «សមាសភាពដែលកំណត់ថាជាខ្មាំង ក្រោយឆ្នាំ១៩៧០ កំណត់គិញជាធំ។ ក្រោយឆ្នាំ១៩៧៥ កំណត់អតីតមន្ត្រីរាជការនិងអតីតទាហានប៉ូលិសរបស់ លន់ ណល់ ជាធំ។ ហើយដល់ឆ្នាំ ១៩៧៦ ជាពិសេស និយាយពីខែ១ ឆ្នាំ១៩៧៧ ដែលបោសសម្អាត សម្រិតសម្រាំងកម្លាំងខាងដក»។ <!--AV--> របបកម្ពុជាប្រជាធិបតេយ្យ ពួកខ្មែរក្រហម បានបង្កឲ្យប្រជាពលរដ្ឋកម្ពុជាស្លាប់យ៉ាងតិច ១,៧ លាននាក់ចន្លោះឆ្នាំ ១៩៧៥ និងឆ្នាំ១៩៧៩។ នួន ជា ខៀវ សំផន អៀង សារី និង អៀង ធីរិទ្ធ ប្រពន្ធរបស់គាត់ ដែលសុទ្ធសឹងជាមេដឹកនាំកំពូលខ្មែរក្រហម ដែលនៅរស់រានមានជីវិតប្រកបដោយភាពចាស់ជរា ត្រូវបាននាំខ្លួនយកមកកាត់ទោស ក្នុងសំណុំរឿង ០០២។ ប៉ុន្ដែអៀង ធីរិទ្ធ ដែលត្រូវបានរកឃើញថា មានបញ្ហាសុខភាពធ្ងន់ធ្ងរ ត្រូវដាក់ឲ្យស្ថិតក្រោមការតាមដានរបស់ក្រុមគ្រូពេទ្យសិន។ ដោយឡែក ប៉ុល ពត ដែលជាមេស្ថាបនិកនៃរបបខ្មែរក្រហមបានស្លាប់នៅក្នុងព្រៃ កាលពីឆ្នាំ ១៩៩៨ ក្រោយពេលដែលក្រុមខ្មែរក្រហម ខ្លួនឯងធ្វើការកាត់ទោសលើរូបគាត់ក្នុងតំបន់ជាប់ព្រំដែនប្រទេសថៃ។ ឌុច នៅថ្ងៃនេះ បានបញ្ជាក់ថា ប៉ុល ពត គឺជាអ្នកទទួលយកមនោគមវិជ្ជាបែបកុម្មុយនិស្ដទ្រឹស្ដីម៉ាកឡេនីន នៃអតីតសហភាពសូវៀតមកអនុវត្តតាមយ៉ាងខ្ជាប់ខ្ជួនបំផុត៕ This posting includes an audio/video/photo media file: Download Now |
| ភូមាស្វែងរកការគាំទ្រពីកម្ពុជាឱ្យលើកលែងទណ្ឌកម្មអន្តរជាតិ Posted: 21 Mar 2012 07:17 PM PDT ប្រទេសភូមាបានស្វះស្វែងរកការគាំទ្រពីប្រទេសកម្ពុជាស្របពេលដែលប្រទេសដែលធ្លាប់គ្រប់គ្រងដោយរបបយោធាកំពុងធ្វើកំណែទម្រង់ទៅរករបបប្រជាធិបតេយ្យក្រោមការគាបសង្កត់ពីអន្តរជាតិ។ ការស្វះស្វែងរកការគាំទ្រនេះបានធ្វើឡើងស្របពេលដែលប្រធានាធិបតីភូមា យូ ថេនសេន បានមកបំពេញទស្សនកិច្ចក្នុងប្រទេសកម្ពុជា រយៈពេលពីរថ្ងៃ ដោយចាប់ផ្តើមនៅថ្ងៃពុធនេះ។ បន្ទាប់ពីជំនួបគ្នាមួយជាមួយនឹងលោកនាយករដ្ឋមន្ត្រី ហ៊ុន សែន អស់រយៈពេលជាងពីរម៉ោង នៅអគារវិមានសន្តិភាព លោក ខៀវ កាញ៉ារិទ្ធ អ្នកនាំពាក្យខាងរដ្ឋាភិបាលបានថ្លែងប្រាប់ក្រុមអ្នកកាសែតថា លោក យូ ថេនសេន ចង់ឲ្យកម្ពុជាគាំទ្រ ក្នុងការដកទណ្ឌកម្មសេដ្ឋកិច្ចចេញពីប្រទេសភូមា និងគាំទ្របេក្ខភាពប្រទេសកម្ពុជា ឲ្យចូលជាសមាជិកមិនអចិន្ត្រៃយ៍នៃក្រុមប្រឹក្សាសន្តិសុខ អង្គការសហប្រជាជាតិ។ «ឯកឧត្តមក៏បានលើកអំពីការរៀបចំ កំណែទម្រង់ និងការសម្រួលនយោបាយ ដោយសារតែបច្ចុប្បន្ននេះ ប្រទេសមីយ៉ាន់ម៉ា បានធ្វើការដោះលែងលោកស្រី អង់ សានស៊ូជី ដោះលែងអ្នកទោសនយោបាយ។ ដូច្នេះហើយ ប៉ុន្តែទណ្ឌកម្មសេដ្ឋកិច្ចមិនទាន់បាន លើកលែងទាំងស្រុងទេ។ បែបនេះប្រទេសមីយ៉ាន់ម៉ា កំពុងតែខិតខំតទៅទៀត ពីព្រោះគេបានឲ្យថា សំខាន់ គេនឹងរង់ចាំការបោះឆ្នោតនៅពេលខាងមុខនេះ»។ លោក យូ ថេនសេន កំពុងបំពេញទស្សនកិច្ចប្រទេសកម្ពុជារយៈពេលពីរថ្ងៃដោយចាប់ផ្តើមពីថ្ងៃទី២១ ហើយលោកគ្រោងនឹងចាកចេញពីប្រទេសកម្ពុជានៅថ្ងៃទី២២ ស្អែកនេះ។ នៅក្នុងដំណើរទស្សនកិច្ចលោក យូ ថេនសេន លោកបានចូលក្រាបបង្គំគាល់ព្រះមហាក្សត្រនៅឯព្រះបរមរាជវាំង និងជួបជាមួយនឹងលោកនាយករដ្ឋមន្ត្រី ហ៊ុន សែន។ លោក ខៀវ កាញ៉ារិទ្ធ បានមានប្រសាសន៍ទៀតថាប្រទេសភូមា បានស្មើសុំមន្ត្រីជាន់ខ្ពស់ពីប្រទេសកម្ពុជាចំនួនពីររូប និងមន្ត្រីសមាជិកបណ្តាប្រទេសអាស៊ានផ្សេងទៀតទៅសង្កេតមើលការបោះឆ្នោតនៅប្រទេសភូមា។ ប្រទេសភូមាគ្រោងនឹងរៀបចំការបោះឆ្នោតពិសេសនៅក្នុងខែមេសាឆ្នាំ២០១៣។ លោក ស៊ុន ឆ័យ ប្រធានក្រុមអ្នកតំណាងរាស្ត្រខាងគណបក្សប្រឆាំងបាននិយាយថា ការកែទម្រង់ក្នុងប្រទេសភូមា គឺជាហេតុការណ៍មួយខុសពីធម្មតាដែលពីមុនប្រទេសនេះ ធ្លាប់ប្រើកម្លាំងយោធារបបផ្តាច់ការមកផ្លាស់ប្តូរនយោបាយតាមបែបលទ្ធិប្រជាធិបតេយ្យ។ លោកបានមានប្រសាសន៍ថា មេដឹកនាំកម្ពុជាអាចនឹងទទួលយកភាពប្រែប្រួលក្នុងប្រទេសភូមាដើម្បីយកមកអនុវត្តក្នុងប្រទេសកម្ពុជាផងដែរ។ «ពីព្រោះប្រទេសកម្ពុជាហាក់បីជាធ្វើចលនាផ្ទុយពីហេតុការណ៍ដែលកើតឡើងក្នុងប្រទេសភូមា ដោយការគ្រប់គ្រងប្រទេសរបស់យើងហ្នឹងកាន់តែមានភាពតឹងតែងទៅ។ មានការគំរាមកំហែងដល់សិទ្ធិនៃការបញ្ចេញមតិហើយតួនាទីគណបក្សប្រឆាំងក៏ត្រូវបានគាបសង្កត់ធ្ងន់ធ្ងរហើយដែលកំពុងទទួលការចោទប្រកាន់និងរិះគន់ពីប្រជាពលរដ្ឋក៏ដូចជាអន្តរជាតិផងដែរ»។ លោក ឈៀង វណ្ណារិទ្ធ នាយកវិទ្យាស្ថានខ្មែរសម្រាប់កិច្ចសហប្រតិបត្តិការនិងសន្តិភាពបាននិយាយថាគ្រប់នយោបាយអន្តរជាតិកម្ពុជាបានគាំទ្រយ៉ាងច្រើនដល់ប្រទេសភូមា។ លោកបាននិយាយថា នៅក្នុងបណ្តាប្រទេសអាស៊ាន ភូមា បានទុកចិត្តប្រទេសកម្ពុជា ជាងបណ្តាប្រទេសណាៗ ទាំងអស់។ «ជាការណ៍ល្អមួយដែរកម្ពុជាយើង និងភូមា មានភាពស្អិតរមួតផ្នែកនយោបាយ និងយុទ្ធសាស្ត្រជាមួយគ្នា។ និយាយចំៗ យើងសំឡឹងទៅមើលអនាគតវែងឆ្ងាយទាំងអស់គ្នា»។ នៅក្នុងដំណើរទស្សនកិច្ចរបស់លោក យូ ថេនសេន នេះ លោកក៏បានសុំយាងព្រះមហាក្សត្រ នៃព្រះរាជាណាចក្រកម្ពុជាឲ្យទៅបំពេញទស្សនកិច្ចជាផ្លូវការក្នុងប្រទេសភូមា នាពេលខាងមុននេះ៕ This posting includes an audio/video/photo media file: Download Now |
| You are subscribed to email updates from VOA News: ព័ត៌មាន To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
