VOA News: ព័ត៌មាន: “ឌុចចង្អុលបង្ហាញនួន ជា ក្នុងពេលធ្វើសក្ខីកម្ម” plus 3 more |
- ឌុចចង្អុលបង្ហាញនួន ជា ក្នុងពេលធ្វើសក្ខីកម្ម
- ប្រធានាធិបតីទីម័រខាងកើតទទួលស្គាល់បរាជ័យក្នុងការបោះឆ្នោត
- ឌុច ផ្តល់សក្ខីកម្មប្រឆាំងនឹងអតីតមេខ្លួនឯង
- សាលាក្រុងនិងសហជីពបង្កើតគណៈកម្មការសាងសង់រូបសំណាកវីរជនកម្មករជា វិជ្ជា
| ឌុចចង្អុលបង្ហាញនួន ជា ក្នុងពេលធ្វើសក្ខីកម្ម Posted: 20 Mar 2012 10:47 AM PDT អតីតឆ្មាំគុកបានចង្អុលបង្ហាញអតីតមេដឹកនាំខ្មែរក្រហម នួន ជា មេមនោគមន៍វិជ្ជារបស់ក្រុមខ្មែរក្រហម និងអតីតមេបញ្ជាការផ្ទាល់របស់គាត់ នៃគុកទួលស្លែង ដែលនៅទីនោះមនុស្សជាងមួយម៉ឺននាក់ បានចាត់ទុកថាជាខ្មាំង រួចបានត្រូវធ្វើទារុណកម្ម រួចយកទៅសម្លាប់ចោល។ កាំង ហ្កេកអ៊ាវ ហៅឌុច បានថ្លែងជាកសិណសាក្សី ប្រាប់តុលាការកាលពីថ្ងៃអង្គារ ក្នុងការកាត់ក្ដី នួន ជា អតីតប្រមុខរដ្ឋមានតែឈ្មោះ ខៀវ សំផន និង អតីតរដ្ឋមន្ដ្រីការបរទេស អៀង សារី។ អ្នកទាំងបីជាមេដឹកនាំជាន់ខ្ពស់រស់រានមានជីវិតដែលបានប្រើនយោបាយឃោរឃៅសាហាវយង់ឃ្នងក្នុងរបបគ្រប់គ្រងខ្មែរក្រហមនៅចុងទសវត្សរ៍ឆ្នាំ១៩៧០។ ឌុចបានត្រូវវិនិច្ឆ័យទោសដោយតុលាការឧក្រិដ្ឋកម្មអន្ដរជាតិ ថ្លែងនៅក្នុងសវនាការតុលាការថ្ងៃទីពីរថា នួន ជា ធ្លាប់ជាមេផ្ទាល់របស់គាត់យ៉ាងតិចក៏មួយរយៈដែរក្នុងពេលលោកធ្វើការនៅគុក ស២១។ ឌុច ទទួលស្គាល់ថា បញ្ញវន្ដខ្លះដែលត្រូវចាប់ខ្លួនបញ្ជូនចូលគុក ស២១ មិនមានទោសកំហុសអ្វីសោះ។ ឌុចដែលមិនការពារសកម្មភាពរបស់គាត់បានត្រូវគេរំពឹងថា នឹងផ្ដល់ភស្ដុតាងគន្លឹះឲ្យតុលាការ ដែលដំណើរការរាល់ថ្ងៃក្នុងសប្ដាហ៍នេះ។ ព័ត៌មានអន្តរជាតិសំខាន់ៗដទៃទៀត៖ <!--IMAGE-RIGHT--> អាស៊ាន៖ សមាគមនៃប្រទេសអាស៊ាន ថ្លែងថា រដ្ឋាភិបាលភូមាបានចេញសេចក្ដីអញ្ជើញសុំឲ្យ សមាគមនេះបញ្ជូនក្រុមអ្នកសង្កេតការណ៍ ដើម្បីពិនិត្យមើលការបោះឆ្នោតនៅខែក្រោយ។ អាស៊ី៖ កាលពីថ្ងៃអង្គារនេះ ប្រទេសចិនបានព្រមានអំពីលទ្ធភាពនៃគ្រោះថ្នាក់កើតឡើងដោយសារការប្រកួតប្រជែងខាងសព្វាវុធនៅតំបន់អាស៊ីក្រោយពីមានសេចក្ដីរាយការណ៍មួយដែលរកឃើញថា តំបន់អាស៊ីប៉ាស៊ីហ្វិក បានឈ្នះអឺរុបជាអ្នកទិញចូលអាវុធច្រើនសន្ធឹក ។ ភូមា៖ អង្គការការពារសិទ្ធិមនុស្ស Human Rights Watch និយាយថា កងកម្លាំងយោធាភូមាបានប្រព្រឹត្ដការរំលោភលើសិទ្ធិមនុស្សជាច្រើនសន្ធឹកក្នុងរដ្ឋកាជិន (Kachin) មួយឆ្នាំក្រោយពីរដ្ឋាភិបាលស៊ីវិលបានឡើងកាន់អំណាចបន្ទាប់ពីរបបគ្រប់គ្រងយោធាដ៏យូរអង្វែង។ អ.ស.ប.៖ គណៈកម្មការអ.ស.ប.ខាងការស្ថាបនាសន្ដិភាពនិយាយថាខ្លួនចង់សហការគ្នាដ៏ជ្រាលជ្រៅជាមួយស្ថាប័នអ.ស.ប.ផ្សេងដទៃ ដើម្បីគាំទ្រប្រទេសនៅក្រោយសង្រ្គាម និងប្រទេសទាំងនោះ អាចយកចំណេញពីមេរៀននៃការពិសោធន៍។ កូរ៉េខាងជើង៖ អង្គការតាមឃ្លាំមើលនុយក្លេអ៊ែររបស់អ.ស.ប.និយាយថា បានទទួលសេចក្ដីអញ្ជើញទៅទស្សនាប្រទេសកូរ៉េខាងជើង ពេលបីឆ្នាំក្រោយពីក្រុមអធិការអ.ស.ប. បានត្រូវបណ្ដេញចេញពីប្រទេសកុម្មុយនីស្ដនោះ។ បារាំង៖ ការតាមដានរកជនប្រដាប់អាវុធអ្នកបាញ់សម្លាប់កុមារបីនាក់និងអាចារ្យជ្វីហ្វម្នាក់នៅក្នុងសាលារៀនជ្វីហ្វមួយនៅក្នុងទីក្រុងទូលូស (Toulouse) ប្រទេសបារាំងកាលពីថ្ងៃច័ន្ទកំពុងដំណើរការ។ អ៊ីរ៉ាក់៖ ការផ្ទុះគ្រាប់បែកផ្ទួនៗគ្នាជាជួរនៅក្នុងក្រុងជាច្រើននៃប្រទេសអ៊ីរ៉ាក់បានសម្លាប់មនុស្សយ៉ាងតិច៣៨នាក់ និងធ្វើឲ្យរបួស១៦០នាក់។ អ.ស.ប.-អាស៊ាន៖ អង្គការសហប្រជាជាតិនិយាយថា ការយល់ព្រមឲ្យមានភាពជាដៃគូជាមួយបណ្តាប្រទេសនៃសមាគមអាស៊ាននៅពេលថ្មីៗនេះ ស្ថិតនៅក្នុងរបៀបវារៈខ្ពស់នៃការចរចាគ្នានៅថ្ងៃអង្គាររវាងអគ្គលេខាធិការអ.ស.ប. បាន គីមូន និងមេដឹកនាំសមាគមអាស៊ាន។ អាមេរិក៖ បេក្ខជនប្រធានាធិបតីពីគណបក្សសាធារណរដ្ឋលោក មីត រ៉ូមនី (Mitt Romney) សង្ឃឹមថា លោកនឹងពង្រីកភាពដឹកមុខគេពីគូប្រជែង លោក រីក សេមតូរូម (Rick Santorum) នៅថ្ងៃអង្គារនេះខណៈដែល ការប្រកួតបានឆ្ពោះទៅកាន់រដ្ឋ អ៊ីលីណយ (Illinois) នៅភាគកណ្ដាលស.រ.អ.។ រុស្ស៊ី៖ រុស្ស៊ីនិយាយថាខ្លួននឹងគាំទ្រសេចក្ដីសម្រេចចិត្ដរបស់ក្រុមប្រឹក្សាសន្ដិសុខអ.ស.ប. ដើម្បីគាំទ្រផែនការសន្ដិភាពនៅក្នុងប្រទេសស៊ីរី របស់ប្រេសិត លោក កុហ្វ៊ី អាណាន់។ <!--AV--> This posting includes an audio/video/photo media file: Download Now |
| ប្រធានាធិបតីទីម័រខាងកើតទទួលស្គាល់បរាជ័យក្នុងការបោះឆ្នោត Posted: 20 Mar 2012 01:24 AM PDT កាលពីថ្ងៃច័ន្ទ លោកប្រធានាធិបតីចីសេ រ៉ាម៉ូស ហរតា បានទទួលស្គាល់បរាជ័យរបស់លោកក្នុងកិច្ចខិតខំប្រឹងប្រែងរបស់លោកឱ្យបានឈ្នះឆ្នោតសម្រាប់អណត្តិទីពីរ។ ដោយជាង៧០ភាគរយនៃសន្លឹកឆ្នោតបានត្រូវរាប់រួចស្រេចហើយ លទ្ធផលបង្ហាញថាលោក ហ្វ្រង់ស៊ីស្កូ ហ្គូតេរ៉េស មកពីគណបក្ស ហ្វ្រេទីលីន ដែលជាគណបក្សប្រឆាំងធំជាងគេ បាននាំមុខគេដោយមានសន្លឹកឆ្នោតគាំទ្រប្រមាណ២៨ភាគរយ។បន្ទាប់មកគឺលោក ចូសេ ម៉ារិយ៉ា ដឹ វ៉ាស្កូសេឡូស អតីតអគ្គមេបញ្ជាការយោធាដែលមានសន្លឹកឆ្នោតគាំទ្រ២៥ភាគរយ។ បេក្ខជនទាងពីរនាក់នេះនឹងប្រកួតគ្នាក្នុងការបោះឆ្នោតជាថ្មីនៅពាក់កណ្តាលខែមេសា។ លោកប្រធានាធិបតី រ៉ាម៉ូស ហរតា ដែលជាជ័យលាភីរង្វាន់ណូបែលសន្តិភាព បានស្ថិតនៅក្រោយគេដោយមានសន្លឹកឆ្នោតគាំទ្រតែ១៨ភាគរយប៉ុណ្ណោះ។ នៅក្នុងសន្និសីទកាសែតមួយកាលពីថ្ងៃច័ន្ទ លោករ៉ាម៉ូស ហរតា បានសរសើរបេក្ខជនពីរនាក់នេះ ហើយលោកបានមានប្រសាសន៍ថាលោកប្រុងប្រៀបនឹងចុះចេញពីតំណែងហើយ។ <!--IMAGE-RIGHT--> គុយបា៖ សេតវិមាននិយាយថាការឃុំឃាំងពួកបាតុករនៅគុយបា នៅមុនទស្សនកិច្ចរបស់សម្តេចប៉ាប គូសបញ្ជាក់ «ការមើលងាយ» ដោយរដ្ឋាភិបាលក្រុង ឡាហាវ៉ាន ដល់សិទ្ធិមនុស្សជាសាកលនៃប្រជារាស្ត្រខ្លួន។ ស៊ីរី៖ កងកម្លាំងសន្តិសុខរបស់រដ្ឋាភិបាលស៊ីរីបានប៉ះទង្គិចជាមួយពួកឧទ្ទាមនៅក្នុងសង្កាត់ជាន់ខ្ពស់មួយនៃក្រុងដាម៉ាស់ ដែលជាកន្លែងមានស្ថានទូតនិងផ្ទះសំបែងរបស់ពួកមន្ត្រីជាន់ខ្ពស់ នៅក្នុងការបាញ់គ្នាដ៏អាក្រក់បំផុតនៅក្នុងក្រុងដែលមានការត្រូតត្រាតឹងរ៉ឹងនេះចាប់តាំងពីការចាប់ផ្តើមការបះបោរដែលមានរយៈពេលមួយឆ្នាំមកហើយក្នុងប្រទេសនេះ។ បារាំង៖ ពួកប៉ូលីសនៅប៉ែកនិរតីបារាំងបាននិយាយថាមនុស្សពេញវ័យម្នាក់និងកុមារបីនាក់បានស្លាប់ ក្រោយពីជនប្រដាប់អាវុធម្នាក់បានបាញ់កាំភ្លើងនៅក្នុងសាលារៀនឯកជន ជនជាតិជ្វីហ្វ មួយនៅក្នុងក្រុងទូលូស្ស ។ សូម៉ាលី៖ មានមនុស្សយ៉ាងតិចណាស់៥នាក់បានត្រូវសម្លាប់នៅក្នុងរដ្ឋធានី ម៉ូហ្កាដេស៊ូ នៅពេលដែលពួកបះបោរបានបាញ់កាំភ្លើងត្បាល់ដាក់វិមានប្រធានាធិបតី តែត្រូវចំជំរុំពួកជនអនាថាឃ្លាតពីផ្ទះសំបែងទៅវិញ។ ហ្គីនី ប៊ីសូ៖ ប្រធាននៃគណៈកម្មការរៀបចំការបោះឆ្នោតនៃប្រទេស ហ្គីនី ប៊ីសូ បានសុំឱ្យមានកិច្ចការពារសន្តិសុខច្រើនជាងមុន នៅក្នុងការិយាល័យបោះឆ្នោតក្រោយពីមន្ត្រីយោធាជាន់ខ្ពស់ម្នាក់បានត្រូវធ្វើឃាតនៅថ្ងៃជាមួយគ្នានឹងការបោះឆ្នោតប្រធានាធិបតី។ <!--AV--> This posting includes an audio/video/photo media file: Download Now |
| ឌុច ផ្តល់សក្ខីកម្មប្រឆាំងនឹងអតីតមេខ្លួនឯង Posted: 19 Mar 2012 09:03 PM PDT អតីតមេគុកទួលស្លែង កាំង ហ្កេកអ៊ាវ ហៅ ឌុច ដែលទើបត្រូវផ្ដន្ទាទោសឲ្យជាប់ពន្ធនាគារអស់មួយជីវិតបាននិយាយនៅថ្ងៃច័ន្ទនេះថាខ្មែរក្រហមបានបង្កើតគោលនយោបាយសម្លាប់មនុស្សមួយរួចជាស្រេចមុននឹងខ្លួនបានឡើងកាន់កាប់អំណាចទាំងស្រុង។ ហើយ ឌុច បានអះអាងថា គោលនយោបាយនេះត្រូវបានអនុវត្តជាប្រព័ន្ធនៅក្នុងមន្ទីរសន្ដិសុខនានាឬដែលគេស្គាល់ថាគុកនោះ។ ឌុច បានគូសបញ្ជាក់យ៉ាងដូច្នេះ ក្នុងការផ្ដល់សក្ខីកម្មជាលើកដំបូងក្នុងការកាត់ទោសក្នុងសំណុំរឿង ០០២ដោយផ្តោតលើអង្គហេតុនៃរចនាសម្ព័ន្ធរដ្ឋបាលប្រព័ន្ធទំនាក់ទំនងការងារនិងតួនាទីមុខងាររបស់ជនជាប់ចោទ នួន ជា ខៀវ សំផន និង អៀង សារី។ ឌុច ពាក់ឯកសណ្ឋានអ្នកទោសបានថ្លែងនៅចំពោះមុខវត្តមានរបស់ជនជាប់ចោទពីរនាក់ក្នុងចំណោមបីនាក់គឺនួន ជា និង ខៀវ សំផន ដោយលើកករណីមន្ទីរសន្ដិសុខ ម១៣ នៅក្នុងដើមទសវត្សរ៍១៩៧០ តបទៅនឹងសំណួររបស់សហព្រះរាជអាជ្ញារងជាតិ។ «ជាគោលការណ៍របស់បក្សជំនាន់ហ្នឹង ឲ្យតែចូលតំបន់រំដោះអ្នកក្រក៏ដោយ អ្នកមានក៏ដោយ អ្នកមកទិញមាន់ក៏ដោយ ក៏គេរុញមកឲ្យថាជាគិញ។ ហើយឲ្យមកដើម្បីសួរចម្លើយ ហើយកម្ទេច។ នេះជារឿងច្បាស់លាស់។ សូមអរគុណ ដែលបានអនុញ្ញាតឲ្យខ្ញុំបានបញ្ជាក់ច្បាស់»។ ឌុច ត្រូវអង្គជំនុំជម្រះតុលាការកំពូលផ្តន្ទាទោសឲ្យជាប់ពន្ធនាគារអស់មួយជីវិតកាលពីថ្ងៃទី៣ ខែកុម្ភៈ ពីបទទាក់ទងទៅនឹងការសម្លាប់អ្នកទោសជាង ១២.៣៨០ នាក់ នៅក្នុងគុកទួលស្លែង។ នេះគឺជាលើកទីមួយហើយដែលអតីតអ្នកទទួលខុសត្រូវខ្មែរក្រហមខ្ពស់បំផុតរូបនេះ បានបង្ហាញសក្ខីកម្មប្រឈមនឹងអតីតមេដឹកនាំរបស់ខ្លួន។ ឌុចក៏បានលើកឡើងថាបច្ចេកទេសសួរចម្លើយនិងធ្វើទារុណកម្មនៅមន្ទីរស ២១ ដែលខ្លួនឡើងកាន់កាប់ក្រោយពួកខ្មែរក្រហមឡើងដឹកនាំប្រទេសថ្ងៃទី ១៧ ខែមេសា ឆ្នាំ១៩៧៥ គឺដូចគ្នាទៅនឹងការធ្វើទារុណកម្មនៅតាមគុកផ្សេងៗដទៃទៀត ក្នុងរបបខ្មែរក្រហម ដែលមានចំនួនសរុប ១៩៦ គុក។ ចូលធ្វើបដិវត្តន៍ក្នុងជួរខ្មែរក្រហមនៅខែតុលា ឆ្នាំ១៩៦៤ ឌុច ត្រូវបានចោទសួរពីសំណួរទូទៅជាច្រើននៅល្ងាចនេះ។ គាត់បានបញ្ជាក់ថា បក្សកុម្មុយនិស្ដកម្ពុជា បានបង្កើតកងឈ្លបនៅតាមជនបទនៅឆ្នាំ ១៩៦៧។ រីឯរូបគាត់ផ្ទាល់ ខ្លួនចូលចិត្តអានសៀវភៅស្ដីពីទ្រឹស្ដីម៉ៅ សេទុង អតីតប្រមុខដឹកនាំបក្សកុម្មុយនិស្ដចិន និងជាអតីតប្រមុខរដ្ឋប្រទេសចិននៃចុងទសវត្សរ៍១៩៤០ និង១៩៥០។ សំណើទាំងនោះរួមមានសុំឲ្យតុលាការបន្ដការពិភាក្សាផ្នែកប្រវត្តិសាស្ដ្រនៃរបបកម្ពុជាប្រជាធិបតេយ្យឲ្យបានឲ្យទូលំទូលាយដែលលោកចាត់ នួន ជា ទុកថា មានជាប់ពាក់ព័ន្ធនិងមូលហេតុនៃការទម្លាក់គ្រាប់បែករបស់សហរដ្ឋអាមេរិកនៅកម្ពុជានិងចេតនារបស់ប្រទេសវៀតណាមមកលើកម្ពុជាសំណើសុំស្ដាប់សាក្សីស្នើដោយមេធាវីរបស់ខ្លួន។ ការស្នើសុំដាក់ឯកសារភស្ដុតាងថ្មី រហូតចប់ដំណើរការក្ដីក្នុងសំណុំរឿង ០០២ និងសុំឲ្យអង្គជំនុំជម្រះផ្ដល់ចម្លើយផ្ទាល់មាត់ពីសំណើរបស់ខ្លួនកាលពីខែកុម្ភៈ៕ This posting includes an audio/video/photo media file: Download Now |
| សាលាក្រុងនិងសហជីពបង្កើតគណៈកម្មការសាងសង់រូបសំណាកវីរជនកម្មករជា វិជ្ជា Posted: 19 Mar 2012 05:31 PM PDT សាលាក្រុងភ្នំពេញនិងសហជីពសេរីកម្មកររបស់ព្រះរាជាណាចក្រកម្ពុជាបានព្រមព្រៀងគ្នាបង្កើតគណៈកម្មការចម្រុះរួមគ្នាមួយដើម្បីធ្វើការសាងសង់រូបសំណាកលោក ជា វិជ្ជា អតីតប្រធានសហជីពសេរីកម្មករដែលត្រូវបានឃាតករបាញ់សម្លាប់កាលពីឆ្នាំ២០០៤។ ការបង្កើតគណៈកម្មការចម្រុះរួមគ្នានេះបានកើតមានឡើងក្រោយពីកិច្ចប្រជុំមួយនៅល្ងាចថ្ងៃច័ន្ទនេះ រវាងសហជីពសេរីកម្មករកម្ពុជាដែលដឹកនាំដោយលោក ជា មុន្នី និងមន្ត្រីសាលាក្រុងភ្នំពេញ ដឹកនាំដោយលោក កែប ជុតិមា។ លោក ជា មុន្នី ប្រធានសហជីពសេរីកម្មករនៃព្រះរាជាណាចក្រកម្ពុជាបានមានប្រសាសន៍ក្រោយពីកិច្ចប្រជុំថាគណៈកម្មការចម្រុះរួមគ្នានេះនឹងបន្តពិភាក្សាគ្នាតទៅទៀត ដើម្បីសាងសង់រូបសំណាកលោក ជា វិជ្ជា ឲ្យបានសមរម្យ។ លោកបានមានប្រសាសន៍ថា រូបសំណាករបស់លោក ជា វិជ្ជា ខាងសហជីពបានដាក់សំណើស្នើសុំសាងសង់ក្នុងកម្ពស់ ២,៦៨ ម៉ែត្រ បូកទាំងទម្រមួយម៉ែត្រផង និងទំហំមួយម៉ែត្របួនជ្រុង។ លោកបានមានប្រសាសន៍ថា លោកស្វាគមន៍ ប្រសិនណាបើរដ្ឋាភិបាល បានចេញសោយហ៊ុយទាំងស្រុងក្នុងការជួយសាងសង់រូបសំណាកលោក ជា វិជ្ជា។ «ខ្ញុំមិនជំទាស់ទេ។ ខ្ញុំគឺថា ស្វាគមន៍ខាងរដ្ឋាភិបាល ឬសាលាក្រុងហ្នឹង គឺគេចង់ឲ្យរូបសំណាកហ្នឹងបានល្អផងដែរ។ ព្រោះថា វាជាសោភ័ណភាព ហើយក៏ជាប្រវត្តិសាស្រ្តមួយ។ ដូច្នេះ គេចង់ឲ្យរូបសំណាកហ្នឹងវាល្អនៅក្នុងសួនច្បារមើលទៅ វាសក្តិសម»។ លោកនាយករដ្ឋមន្ត្រី ហ៊ុន សែន កាលពីថ្ងៃទី៣១ ខែធ្នូ ឆ្នាំ២០១១ បានយល់ព្រមឲ្យសហជីពសេរីកម្មករសាងសង់រូបសំណាកលោកជា វិជ្ជា និងផ្តល់គោរមងារដល់លោក ជា វិជ្ជា ជាវីរជនការពារសិទ្ធិកម្មករ។ សាលាក្រុងភ្នំពេញបានផ្តល់ទីតាំងនៅលើសួនច្បារមួយកន្លែងទល់មុខ ឈៀងខាងលិចវត្តលង្កា ជាទីកន្លែងដែលលោក ជា វិជ្ជា ត្រូវបានបាញ់សម្លាប់។ លោក កើត ឆែ នាយករងរដ្ឋបាលសាលាក្រុងភ្នំពេញបាននិយាយថាលោកមិនបានចូលរួមប្រជុំទេ នៅល្ងាចថ្ងៃច័ន្ទនេះ ហើយលោកបានបង្វែរសំណួរនេះឲ្យទៅសួរលោក លី សាវ៉េត។ «ខ្ញុំកំពុងជាប់ប្រជុំនៅខាងក្រៅ។ ខ្ញុំឥតបានចូលប្រជុំផង»។ លោក លី សាវ៉េត នាយករដ្ឋបាល សាលាក្រុងភ្នំពេញមិនអាចទំនាក់ទំនងបានទេ។ លោក ជា វិជ្ជា អតីតប្រធានសហជីពសេរីកម្មករដ៏ល្បីល្បាញ ខាងការពារសិទ្ធិកម្មករ ត្រូវបានឃាតករបាញ់សម្លាប់កាលពីថ្ងៃទី២២ ខែមករា ឆ្នាំ២០០៤ នៅក្បែរតូបលក់កាសែតមួយជិតវត្តលង្កា។ ក្រោយពីការបាញ់សម្លាប់ សហជីពសេរីកម្មករបានទាមទារឲ្យព្រះមហាក្សត្រ ផ្តល់គោរមងារ លោក ជា វិជ្ជា ជាវីរជន និងសាងសង់រូបសំណាក ដើម្បីទុកជាប្រវត្តិសាស្ត្រ ដល់ស្នាដៃលោក ជា វិជ្ជា ដែលបានការពារសិទ្ធិកម្មករ។ លោក រ៉ុង ឈុន ប្រធានសមាគមគ្រូបង្រៀនឯករាជ្យកម្ពុជា និងជាមិត្តភក្តិជិតស្និទ្ធរបស់លោក ជា វិជ្ជា បានស្វាគមន៍ចំពោះការបង្កើតគណៈកម្មការសាងសង់រួមគ្នានេះ រវាងសាលាក្រុងភ្នំពេញ និងសហជីពសេរីកម្មករ។ លោកបានមានប្រសាសន៍ថា សាលាក្រុង និងសហជីពគួរតែសាងសង់រូបសំណាកលោក ជា វិជ្ជា ឲ្យបានសមរម្យ។ «ចង់ឲ្យបានថា ទំហំនៃបរិវេណហ្នឹង បានធំជាងហ្នឹង ដើម្បីយើងសាងសង់អីមានរូបនៅជុំវិញខាងហ្នឹង។ យើងដាក់រូបកម្មករអី នៅខឿនតាមជញ្ជាំង។ ពីព្រោះបង្ហាញអំពីការការពារ កម្មករ កម្មការិនី ដើម្បីឲ្យសមជាវីរជននៃកម្មករខ្មែរ»។ បើទោះបីជាសាលាក្រុងភ្នំពេញ និង លោក ជា មុនី្ន បានព្រមព្រៀងបង្កើតគណៈកម្មការចម្រុះរួមគ្នាយ៉ាងណាក៏ដោយ ក៏នៅមិនទាន់ដឹងថា រូបសំណាកលោក ជា វិជ្ជា និងចាប់ផ្តើមធ្វើនៅពេលណា និងធ្វើអំពីថ្មអ្វីនៅឡើយទេ។ លោក ជា មុន្នី គ្រាន់តែបានមានប្រសាសន៍ថា រូបសំណាក់នេះ នឹងសាងសង់កម្ពស់ ១,៦៨ ម៉ែត្រ គឺជាកម្ពស់របស់លោក ជា វិជ្ជា កាលពីនៅរស់រានមានជីវិត៕ This posting includes an audio/video/photo media file: Download Now |
| You are subscribed to email updates from VOA News: ព័ត៌មាន To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
