VOA News: ព័ត៌មាន: “បុរសទីបេត៍ម្នាក់ដុតខ្លួនឯងដើម្បីតវ៉ានឹងគោលនយោបាយចិន” plus 2 more |
- បុរសទីបេត៍ម្នាក់ដុតខ្លួនឯងដើម្បីតវ៉ានឹងគោលនយោបាយចិន
- អាល់កៃដាអំពាវនាវឲ្យពលរដ្ឋប៉ាគីស្ថានបះបោលដូចអេហ្ស៊ីបនិងទុយនេស៊ី
- មេធាវីការពារបញ្ជាក់ថានួន ជាមិនចូលរួមសវនាការពេលរសៀលទេ
| បុរសទីបេត៍ម្នាក់ដុតខ្លួនឯងដើម្បីតវ៉ានឹងគោលនយោបាយចិន Posted: 18 Mar 2012 08:02 AM PDT បុរសទីបេត៍ម្នាក់ លោក Sonam Dhargyal អាយុ៤៤ឆ្នាំ បានដុតខ្លួនឯងក្នុងតំបន់ Rebkong ផ្នែកខាងកើតនៃដែនដីទីបេត៍ នៅក្នុងកាយវិការថ្មីៗបំផុតនៃការរឹងទទឹងដែលបានត្រូវប្រើប្រាស់ដោយជនជាតិទីបេត៍ដើម្បីតវ៉ាប្រឆាំងនឹងគោលនយោបាយរបស់រដ្ឋាភិបាលចិន។ <!--IMAGE-LEFT--> ភូមា៖ ទីភ្នាក់ងារព័ត៌មានបារាំង AFP បានផ្សាយថាលោកស្រីអោងសានស៊ូជី មេដឹកនាំក្រុមប្រឆាំងភូមាបានឈោងដៃទៅរកក្រុមអ្នកបោះឆ្នោតអំបូរចិននិងជាអំបូរពួកជនភាគតិចកាលពីថ្ងៃសៅរ៍ នៅក្នុងឃោសនាបោះឆ្នោតមួយក្នុងភាគខាងជើងនៃប្រទេសភូមា នៅមុនការបោះឆ្នោតនៅថ្ងៃទីមួយខែមេសា។ ស៊ីរី៖ របាយការណ៍របស់បណ្តាញផ្សាយព័ត៌មានរដ្ឋ បាននិយាយថាការផ្ទុះគ្រាប់បែកក្នុងទ្បានពីរគ្រឿងបន្តបន្ទាប់គ្នា នៅជិតអាគារសន្តិសុខប៉ូលីសមួយនិងមជ្ឈមណ្ឌលស៊ើបការសម្ងាត់មួយ ក្នុងក្រុងដាម៉ាស់កាលពីថ្ងៃសៅរ៍បានបណ្តាលឱ្យមនុស្សយ៉ាងតិចណាស់២៧នាក់ស្លាប់ មនុស្សជិត១០០នាក់បានត្រូវរបួស អាគារត្រូវបានរងការខូចខាតដោយឃើញដែកថែបដែលរមួលនិងកម្ទេចនៅខាងមុខអាគារ ជាមួយនឹងសាកសពជនរងគ្រោះដែលដាច់ដាចផងដែរ។ ប៉ាគីស្ថាន៖ ពួកប្រពន្ធនិងកូនៗរបស់ អុសាម៉ា ប៊ីន ឡាដេន អតីតមេដឹកនាំអង្គការអាល់កៃដា នឹងជាប់ឃុំឃាំងយូរតទៅទៀតក្នុងប្រទេសប៉ាគីស្ថាន រហូតដល់មានសវនាការមួយនៅថ្ងៃទី២៦ខែមីនា ពីបទចូលមករស់នៅក្នុងប្រទេសប៉ាគីស្ថានដោយខុសច្បាប់។ ប៉ាគីស្ថាន៖ ប្រធានាធិបតី អាស៊ីហ្វ អាលី ហ្សាដារី ( Asif Ali Zardari) ដែលមានបញ្ហាបានសរសើរដល់សមិទ្ធិរបស់លោកដោយបានបង្កើតវេទិកាមួយសម្រាប់ការជជែកដេញដោលគ្នាក្នុងសភាអំពីទំនាក់ទំនងមានភាពតានតឹងរបស់ប្រទេសលោកជាមួយសហរដ្ឋអាមេរិក។ ឥណ្ឌា៖ តាមរកចាប់ខ្លួនជនជាតិអ៊ីរ៉ង់ទីបួនដែលមានទាក់ទិនក្នុងការធ្វើអំពើទុច្ចរិតវាយប្រហារលើពួកអ្នកការទូតអ៊ីស្រាអែល។ ស៊ីរី៖ មានការផ្ទុះគ្រាប់បែកធំៗមួយចំនួនក្នុងប្រទេសស៊ីរីកាលពីប៉ុន្មានខែថ្មីៗនេះនៅពេលដែលរដ្ឋាភិបាលបន្តការបង្ក្រាបលើក្រុមប្រឆាំងដែលបានបណ្តាលឱ្យមនុស្សជាង៨ពាន់នាក់ស្លាប់។ ម៉ាសេដ្ឋាន៖ ពួកមនុស្សប្រមាណ២ពាន់នាក់បានដើរដើម្បីសន្តិភាពនៅក្នុងរដ្ឋធានីនៃប្រទេសនេះ កាលពីថ្ងៃសៅរ៍ដោយអំពាវនាវឱ្យមានការបញ្ឈប់ការវាយប្រហារខាងពូជសាសន៍ដែលបានកើតមានទ្បើងកាលពីពេលថ្មីៗនេះ។ This posting includes an audio/video/photo media file: Download Now |
| អាល់កៃដាអំពាវនាវឲ្យពលរដ្ឋប៉ាគីស្ថានបះបោលដូចអេហ្ស៊ីបនិងទុយនេស៊ី Posted: 18 Mar 2012 07:33 AM PDT ប៉ាគីស្ថាន៖ យោងតាមខ្សែវីដេអូបង្ហោះតាមប្រព័ន្ធអ៊ិនធឺណិត មេដឹកនាំ អាល់កៃដា ឈ្មោះ អាយមែន អាល ហ្សាវ៉ាហ៊ីរី (Ayman al-Zawahiri) បានសុំដល់ពលរដ្ឋប៉ាគីស្ថានឱ្យធ្វើតាមឧទាហរណ៍នៃពួកអ្នកកាន់សាសនាអ៊ីស្លាមក្នុងប្រទេសអេហ្ស៊ីបនិងប្រទេសទុយនេស៊ី ហើយធ្វើការបះបោរ «ងើបឈរទ្បើងប្រឈមមុខនឹងរដ្ឋាភិបាលស៊ីសំណូក... និងពួកឧត្តមសេនីយ៍ក្បត់ទាំងនេះ» ដែល «បង្ហូរឈាមរបស់ពួកអ្នកកាន់សាសនាអ៊ីស្លាមនៅក្នុងប្រទេសអាហ្វហ្គានីស្ថាន និងប្រទេសប៉ាគីស្ថានដើម្បីបំពេញហោប៉ៅរបស់ពួកមេដឹកនាំប៉ាគីស្ថាន ហើយនិងមិនប្រយុទ្ធដើម្បីការពារលោកអ្នកទេ។» <!--IMAGE-LEFT--> អាហ្វហ្គានីស្ថាន៖ លោកប្រធានាធិបតីអាហ្វហ្គានីស្ថាន ហាមីត កាហ្សាយ (Hamid Karzai) បានចោទប្រកាន់សហរដ្ឋអាមេរិកថាមិនបានធ្វើកិច្ចសហប្រតិបត្តិការនៅក្នុងការស៊ើបអង្កេតអំពីការសម្លាប់រង្គាលនៃអ្នកស្រុកអាហ្វហ្គានីស្ថាន១៦នាក់ដោយទាហានអាមេរិកម្នាក់ទេ នៅពេលដែលគណៈប្រតិភូដែលលោកបានបញ្ជូនឱ្យទៅស៊ើបអង្កេតអំពីការសម្លាប់ទាំងនេះមិនបានទទួលកិច្ចសហប្រតិបត្តិការដែលពួកគេបានរំពឹងថានឹងមានពួកមន្ត្រីអាមេរិកទេ ហើយនេះជាអាកប្បកិរិយាដែលមិនអាចអត់អោនឲ្យបាន។ តួកគី៖ ពួកយោធាតួកគីបាននិយាយថាឧទ្ធម្ភាគចក្រមួយគ្រឿងធុន Sikorsky របស់ខ្លួនបានធ្លាក់លើផ្ទះមួយខ្នងនៅក្នុងស្រុក បាក្រាមី (Bagrami) រដ្ឋធានីកាប៊ុល ប្រទេសអាហ្វហ្គានីស្ថាន បណ្តាលឱ្យទាហានតួកគី១២នាក់ដែលជិះក្នុងនោះនិងមនុស្សយ៉ាងតិចណាស់២នាក់នៅឯដីបានស្លាប់។ យោងតាមពួកមន្ត្រីអាហ្វហ្គានីស្ថានបាននិយាយថា កុមារពីរនាក់បានបាត់បង់ជីវិតនៅក្នុងគ្រោះថ្នាក់។ ស៊ីរី៖ កាលពីថ្ងៃសុក្រ លោក កូហ្វី អាណាន់ ប្រេសីតរបស់អង្គការសហប្រជាជាតិនិងសម្ព័ន្ធអារ៉ាប់បានអំពាវនាវដល់ពួកសមាជិកនៃក្រុមប្រឹក្សាសន្តិសុខអ.ស.ប. ឱ្យបំបែកភាពទាល់ច្រករបស់ពួកគេក្នុងការបង្ខិតបង្ខំប្រទេសស៊ីរីអំពីការបង្ក្រាបដ៏ប្រល័យទៅលើក្រុមអ្នកប្រឆាំង។ កូរ៉េខាងជើង៖ កាលពីថ្ងៃសុក្រអាមេរិក ជប៉ុននិងកូរ៉េខាងត្បូងបានថ្កោលទោសគម្រោងការបង្ហោះផ្កាយវិទ្យាសាស្ត្រមួយគ្រឿងដោយប្រើរ៉ុកកែត មួយមានវង់ប្រតិបត្តិការឆ្ងាយ ក្នុងខែមេសា ដោយនិយាយថាវាជាការរំលោភលើការហាមប្រាមមួយ ក្នុងកិច្ចយល់ព្រមជាមួយអាមេរិកថាខ្លួនផ្អាកការបាញ់ពិសោធន៍កាំជ្រួចមានវង់ប្រតិបត្តិការឆ្ងាយជាថ្នូរនឹងជំនួយម្ហូបអាហារគ្រាមានអាសន្ន ចំនួន២សែន៤ម៉ឺនតោន។ ឥណ្ឌា៖ ស្វះស្វែងរកដីកាអន្តរជាតិដើម្បីចាប់ខ្លួនជនជាតិអ៊ីរ៉ង់បីនាក់ដែលជាប់សង្ស័យថាជាផ្នែកមួយនៃការលបធ្វើអំពើអាក្រក់ក្នុងការវាយប្រហារលើពួកអ្នកការទូតអ៊ីស្រាអែល។ សេដ្ឋកិច្ចអ៊ឺរ៉ុប៖ ប្រទេសជាតិទាំង១៧ដែលស្ថិតនៅក្នុងប្លុកប្រើប្រាស់ប្រាក់អឺរ៉ូហាក់ដូចជាប្រុងប្រៀបហើយដើម្បីបង្កើនទំហំនៃមូលនិធីជំនួយសង្គ្រោះហិរញ្ញវត្ថុរបស់ទ្វីបអឺរ៉ុប ដើម្បីដោះស្រាយបញ្ហាហិរញ្ញវត្ថុគ្រាមានអាសន្នក្នុងពេលអនាគតរបស់ប្រទេសពួកគេដែលមានប្រាក់បំណុលច្រើន។ សហរដ្ឋអាមេរិក៖ ក្រសួងការងារអាមេរិកបាននិយាយថាកំណើនតម្លៃសាំងបានបង្កើនតម្លៃគ្រឿងឧបភោគបរិភោគក្នុងប្រទេសក្នុងខែកុម្ភៈដែលជាតម្លែខ្ពស់បំផុតក្នុងរយៈពេល១០ខែ។ សហរដ្ឋអាមេរិក៖ លោកប្រធានាធិបតី បារ៉ាក់ អូបាម៉ា បានកំពុងតែផ្តោតការយកចិត្តទុកដាក់លើយុទ្ធនាការឱ្យបានជាប់ឆ្នោតជាថ្មីជាមួយពួកអ្នកអង្គាសប្រាក់ច្រើនៗ។ ចំណែកឯពួកអ្នកសាធារណរដ្ឋដែលសង្ឃឹមថានឹងយកជ័យជំនះលើលោកប្រធានាធិបតីកំពុងរៀបចំការប្រកួតប្រជែងនៅពេលខាងមុខដើម្បីទទួលការតែងតាំងជាបេក្ខជនរបស់គណបក្ស។ <!--AV--> This posting includes an audio/video/photo media file: Download Now |
| មេធាវីការពារបញ្ជាក់ថានួន ជាមិនចូលរួមសវនាការពេលរសៀលទេ Posted: 17 Mar 2012 08:18 PM PDT អង្គជំនុំជម្រះសាលាដំបូងរបស់សាលាក្ដីខ្មែរក្រហម បានសម្រេចធ្វើការកែសម្រួលកាលវិភាគនៃការចូលខ្លួនផ្ដល់សក្ខីកម្មរបស់ ឌុច ភ្លាមៗ នៅថ្ងៃព្រហស្បតិ៍នេះបន្ទាប់ពីមានការព្រមានពីការរំលោភសិទ្ធិកូនក្ដីរបស់ខ្លួន ពីសហមេធាវីអន្ដរជាតិការពារក្តីរបស់ នួន ជា។ អតីតប្រធានគុកទួលស្លែងត្រូវតុលាការគ្រោងកោះហៅឲ្យចូលធ្វើជាសាក្សីនៅរសៀលថ្ងៃច័ន្ទសប្ដាហ៍ក្រោយនេះសម្រាប់សំណុំរឿង ០០២។ ក៏ប៉ុន្ដែនៅក្នុងសវនាការនៅថ្ងៃនេះ លោក ម៉ាយឃើល ផេសម៉េន (Michiel Pestman) សហមេធាវីរបស់អតីតប្រធានសភាខ្មែរក្រហមបានអះអាងថា ប្រសិនបើ ឌុច ចូលផ្ដល់សក្ខីកម្មនៅពេលរសៀលនោះគឺជាពេលដែលកូនក្ដីរបស់ខ្លួនត្រូវបោះបង់សិទ្ធិក្នុងការចូលរួមសវនាការដោយផ្ទាល់ដោយសារបញ្ហាសុខភាព។ ដូច្នេះតុលាការត្រូវតែប្ដូរកាលវិភាគកោះហៅ ឌុចនេះដោយលោកចាត់ទុកថា ឌុច គឺជាសាក្សីយ៉ាងសំខាន់មួយរូប។ «នួន ជា មានសិទ្ធិបង្ហាញវត្តមានក្នុងបន្ទប់សវនាការនៅពេលដែល ឌុច ត្រូវចោទសួរ។ ហើយសិទ្ធិក្នុងការតទល់នឹងសាក្សី ក្នុងការប្រឈម នឹងការផ្ដល់សក្ខីកម្មនេះ នឹងត្រូវរំលោភប្រសិនបើលោកប្រធានអង្គជំនុំជម្រះសម្រេចស្តាប់ការផ្ដល់សក្ខីកម្មរបស់ ឌុច នៅថ្ងៃច័ន្ទសប្ដាហ៍ក្រោយក្នុងពេលដែលកូនក្ដីរបស់យើងខ្ញុំមិនមានលទ្ធភាពចូលរួមសវនាការឬមិនអាចចូលរួមនីតិវិធីតុលាការដោយសកម្មនោះ។ ដើម្បីតម្រូវបំណង នួន ជា ដែលចង់មានវត្តមានក្នុងបន្ទប់សវនាការនោះ គឺធ្វើការផ្លាស់ប្តូរកាលវិភាគ ហើយស្ដាប់សក្ខីកម្ម ឌុច នៅពេលព្រឹកវិញ ដែលជាទូទៅកូនក្ដីរបស់ខ្ញុំអាចចូលរួមយ៉ាងសកម្ម»។ លោកចៅក្រម និល ណុន ប្រធានអង្គជំនុំជម្រះសាលាដំបូងបានប្រកាសភ្លាមៗ ក្រោយពីការសម្រាករយៈពេល ២០ នាទីនៅរសៀលថ្ងៃនេះថាតុលាការបានសម្រេចប្ដូរកាលវិភាគក្នុងការស្ដាប់សក្ខីកម្មរបស់ ឌុច បន្ទាប់ពីមានការពិភាក្សាគ្នាច្បាស់លាស់រួចមក។ «នៅព្រឹកថ្ងៃច័ន្ទ សួរជនជាប់ចោទ នួន ជា។ នៅរសៀលអង្គជំនុំជម្រះ នឹងមិនធ្វើសវនាការទេ។ ថ្ងៃអង្គារ ស្តាប់សក្ខីកម្មសាក្សី ឌុច ពេញមួយថ្ងៃទាំងព្រឹក ទាំងល្ងាច។ ព្រឹកថ្ងៃពុធ សួរជនជាប់ចោទ នួន ជា។ នៅរសៀលមិនធ្វើសវនាការទេ។ នៅថ្ងៃព្រហស្បតិ៍ ស្តាប់សក្ខីកម្មរបស់សាក្សី កាំង ហ្កេក អ៊ាវ ហៅ ឌុច ពេញមួយថ្ងៃ ទាំងព្រឹក ទាំងល្ងាច»។ សហព្រះរាជអាជ្ញារងសញ្ជាតិអាមេរិកាំង លោក Dale Lysak បកស្រាយនៅមុនការសម្រេចរបស់លោកចៅក្រម និល ណុន ថា ឌុច គឺជាសាក្សីសក្ដានុពលដែលនឹងត្រូវផ្ដល់ព័ត៌មានទាក់ទងនឹងប្រវតិ្តនៃរបបកម្ពុជាប្រជាធិបតេយ្យរបស់ពួកខ្មែរក្រហម។ ព័ត៌មាននៃអំណាចរបស់អង្គការនីមួយៗ ក្នុងសម័យនោះ និងព័ត៌មានស្ដីពីទំនាក់ទំនងនៃការបញ្ជូនរបាយការណ៍ជាដើម។ ក៏ប៉ុន្ដែលោក ម៉ាយឃើល ផេសម៉េន និយាយថា ឌុច យល់ដឹងតិចតួចពីការជម្លៀសប្រជាជនចេញពីទីក្រុងភ្នំពេញ។ ការជម្លៀសប្រជាជនដោយបង្ខំជាប្រធានបទនៃការកាត់ទោសអតីតមេដឹកនាំកំពូលខ្មែរក្រហម នួន ជា ខៀវ សំផន និងអៀង សារី ក្នុងជំហានដំបូងនេះ។ សូមបញ្ជាក់ថា សវនាការនៃអង្គជំនុំជម្រះសាលាដំបូងនៅថ្ងៃនេះ បានផ្ដោតទៅលើការដេញដោលនិងការពារលើឯកសារជាបន្តទៀត។ ក្រុមមេធាវីការពារជនជាប់ចោទនៅប្រកាន់ជំហរឲ្យអង្គជំនុំជម្រះសាលាដំបូង ដកចេញនូវឯកសារមួយចំនួនដែលខ្លួនជឿថា មិនគួរជឿទុកចិត្តបាន និងមិនស្ថិតក្នុងបរិបទនៃការកាត់ទោសដំណាក់កាលដំបូងនេះ។ ក៏ប៉ុន្ដែក្រុមសហព្រះរាជអាជ្ញារងបានការពារឯកសាររបស់ខ្លួន។ នៅរសៀលនេះ សហមេធាវីអន្ដរជាតិរបស់អៀង សារី លោក ម៉ាយឃើល ខាណាវ៉ាស (Michael Karnavas) បានទទូចឲ្យអង្គជំនុំជម្រះសាលាដំបូងអញ្ជើញអ្នកជំនាញអាមេរិកាំង លោក បេន ខេណិន ឲ្យផ្ដល់សក្ខីកម្មដោយផ្ទាល់ ប៉ុន្ដែលោក បេន ខេណិន បានបញ្ជាក់ប្រាប់តុលាការរួចជាស្រេចហើយថា លោកមិនអាចមកចូលរួមផ្ដល់សក្ខីកម្មដោយផ្ទាល់បានទេនៅក្នុងឆ្នាំ ២០១២នេះ ដោយសារតែលោកជាប់រវល់កិច្ចការច្រើន។ ក្រុមមេធាវីការពារក្ដីបានជំទាស់ទៅនឹងការផ្ដល់សក្ខីកម្មរបស់លោកតាមការភ្ជាប់វីដេអូពីសហរដ្ឋអាមេរិក៕ This posting includes an audio/video/photo media file: Download Now |
| You are subscribed to email updates from VOA News: ព័ត៌មាន To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
