VOA News: ព័ត៌មាន: “លោកអនុប្រធានាធិបតីចិនជួបជាមួយលោកអូបាម៉ានិងលោកបៃដិននៅឯសេតវិមាន” plus 3 more |
- លោកអនុប្រធានាធិបតីចិនជួបជាមួយលោកអូបាម៉ានិងលោកបៃដិននៅឯសេតវិមាន
- បណ្តាញបុរសកម្ពុជាខកចិត្តនឹងចំណាត់ការរបស់រដ្ឋាភិបាលលើជម្លោះដីនៅបុរីកីឡា
- ព្រះរាជអាជ្ញាថាខ្មែរក្រហមបានធ្វើគោលនយោបាយមុនចូលកាន់អំណាច
- តុលាការខេត្តកណ្តាលពន្យារពេល
| លោកអនុប្រធានាធិបតីចិនជួបជាមួយលោកអូបាម៉ានិងលោកបៃដិននៅឯសេតវិមាន Posted: 14 Feb 2012 08:16 AM PST លោក ហ្សី ជិនពីង (Xi Jinping) អនុប្រធានាធិបតីចិន នឹងជួបសន្ទនានៅថ្ងៃអង្គារនេះ ជាមួយលោកប្រធានាធិបតី បារ៉ាក់ អូបាម៉ា នៅឯសេតវិមានដោយគេរំពឹងថាលោកនឹងអំពាវនាវឲ្យមានវិធានការកសាងទំនុកចិត្តរវាងប្រទេសទាំងពីរ។ អនាគតមេដឹកនាំប្រទេសចិនរូបនេះ នឹងចាប់ផ្ដើមបើកការចរចាពីរម៉ោង ជាមួយលោកអនុប្រធានាធិបតី ចូហ បៃឌិន (Joe Biden) រួចនឹងមានកិច្ចប្រជុំមូយនៅក្នុងការិយាល័យឯកជនរបស់ប្រធានាធិបតី បារ៉ាក់ អូបាម៉ា។ ប្រធានបទដែលអាចនឹងលើកឡើងក្នុងកិច្ចពិភាក្សា រួមមានបញ្ហាទំនាស់សេដ្ឋកិច្ច ការពង្រឹងកិច្ចការពារប្រទេសទៅវិញទៅមក និងបញ្ហាសិទ្ធិមនុស្ស រាប់ទាំងរឿងព្រះសង្ឃទីបេដុតខ្លួនឯងជាបន្តបន្តាប់មកនេះផងដែរ។ នៅក្រោយពេលអាហារថ្ងៃត្រង់នៅឯក្រសួងការបរទេស ដែលធ្វើបដិសណ្ឋារកិច្ចដោយលោក ចូបៃឌិន និងលោកស្រីរដ្ឋមន្ដ្រីការបរទេស ហ៊ីល ឡារី គ្លីនតុន លោក ហ្សីកំណត់នឹងទៅជួបជាមួយមន្ត្រីយោធានៅឯមន្ទីរប៉ងតាហ្គោន ហើយបន្ទាប់មកបើកការចរចាជាមួយមេដឹកនាំពាណិជ្ជកម្មចិននិងអាមេរិក។ ព័ត៌មានអន្តរជាតិសំខាន់ៗផ្សេងទៀត៖ ថៃ៖ មានការបំផ្ទុះគ្រាប់បែកយ៉ាងតិចពីរដង បានធ្វើឲ្យភ្ញាក់ផ្អើលដល់តំបន់ជិតខាងទីក្រុងបាងកកដ៏មមាញឹកមួយកាលពីថ្ងៃអង្គារនេះ ។ បណ្ដាញព័ត៌មានថៃនិយាយថាមានមនុស្សម្នាក់រងរបួសធ្ងន់ធ្ងរ។ អាស៊ី ៖ ក្រុមអាជ្ញាធរមកពីប្រទេសអាស៊ីចំនួន១៣ បានព្រមព្រាងគ្នាដើម្បីធ្វើឲ្យប្រសើរឡើងដល់កិច្ចសហប្រតិបត្តិការណ៍ឆ្លងដែនដើម្បីទប់ស្កាត់ការរត់ពន្ធដោយខុសច្បាប់លើសត្វខ្លានិងពពួកសត្វព្រៃដែលហៀបនឹងផុតពូជដទៃទៀត។ ឥណ្ឌា៖ មន្ដ្រីនៃក្រសួងមហាផ្ទៃឥណ្ឌា ថ្លែងថាគ្រាប់បែកបានផ្ទុះបំប៉ើងរថយន្ដរបស់ស្ថានទូតអ៊ីស្រាអែលមួយគ្រឿង កាលពីថ្ងៃច័ន្ទក្នុងកណ្ដាលរដ្ឋធានី ញូវ ដែលី ពោលគឺប៉ុន្មានវិនាទីប៉ុណ្ណោះក្រោយពីគ្រាប់បែកនោះបានត្រូវចង់ភ្ជាប់នឹងរថយន្ដនោះ សបង្ហាញឲ្យឃើញថាការវាយប្រហារនោះប្រព្រឹត្ដឡើងដោយអ្នកដែលត្រូវបានហ្វឺកហ្វឺនយ៉ាងស្ទាត់ជំនាញម្នាក់។ ជប៉ុន៖ ក្រុមអ្នកវិទ្យាសាស្រ្ដជប៉ុននិយាយថាឃើញមានហានិភ័យកាន់តែខ្លាំងឡើងពីការរញ្ជួយដីនៅពេលអនាគត នៅឯរោងចក្រនុយក្លេអ៊ែរ ហ្វូគូហ្សីម៉ា នៅក្រោយពេលការរញ្ជូយផែនដីដ៏ខ្លាំង និងមហារលកយក្សស៊ូណាមី ដែលធ្វើឲ្យខូចខាតធ្ងន់ធ្ងរដល់រោងចក្រនោះកាលពីឆ្នាំមុន។ ស៊ីរី៖ សកម្មជនការពារសិទ្ធិមនុស្សនៅក្នុងប្រទេសស៊ីរី និយាយថាកងកម្លាំងរដ្ឋាភិបាលបានវាយប្រហារមកលើទីក្រុងហូមដែលជាចំណុចផ្ទុះអំពើឃោឃៅ ដោយបាញ់គ្រាប់ផ្លោងយ៉ាងធ្ងន់ធ្ងរ មួយថ្ងៃក្រោយពីនាយករបស់អង្គការការពារសិទ្ធិមនុស្សរបស់អ.ស.បបាននិយាយថាបរាជ័យរបស់ក្រុមប្រឹក្សាសន្ដិសុខអ.ស.បក្នុងការចាត់វិធានការ បានបណ្ដាលឲ្យរដ្ឋាភិបាលរបស់ប្រធានាធិបតី បាស្សា អាល អាសាដ រឹតតែខ្លាំងដៃឡើង។ ចិន៖ សេចក្ដីរាយការណ៍ថ្មីមូយបានទស្សទាយថា ប្រទេសចិននឹងចំណាយលើកិច្ចការការពារប្រទេសត្រឹមឆ្នាំ២០១៥នេះ ច្រើនជាងប្រទេសទាំងអស់នៃតំបន់អាស៊ី ប៉ាស៊ីហ្វីករួមបញ្ចូលគ្នាទៀត។ ចិន៖ អនុប្រធានាធិបតីចិន លោក ហ្សី ជិនពីង ដែលបានត្រូវគេរំពឹងថានឹងឡើងធ្វើជាមេដឹកនាំប្រទេសមហាអំណាចសេដ្ឋកិច្ចពិភពលោកលំដាប់ទីពីរ ជាកូនអតីតមេដឹកនាំចិនមូយរួបដែលបានត្រូវធ្វើទុក្ខបុកម្នេញនៅក្រោមរបបម៉ៅសេទុង។ ក្រិច៖ ប្រទេសក្រិកនិយាយថានឹងបើកការបោះឆ្នោតជាតិនៅខែមេសាខាងមុខនេះ ដើម្បីជំនួសរដ្ឋាភិបាលបណ្ដោះអាសន្នរបស់លោកនាយករដ្ឋមន្ដ្រី លូកាស់ ផាផាឌីមូស (Lucas Papademos) មូយថ្ងៃក្រោយពីក្រុមបាតុករបានបះបោរប្រឆាំងនឹងប្រាក់ចំណាយបន្ថែម និងការកាត់បន្ថយការងារ។ ចិន៖ មានព្រះសង្ឃក្មេងម្នាក់ទៀតហើយដែលបានដុតខ្លួនឯង នៅតំបន់នីរតីនៃប្រទេសចិន ដែលជាអ្វីដែលសកម្មជនទីបេនិយាយថា ជាយុទ្ធនាការកាន់តែខ្លាំងជាធ្លុងមួយប្រឆាំងនឹងរបបគ្រប់គ្រងចិន។បារ៉ែន៖ ប៉ូលីសនៃប្រទេសបារ៉ែន បានបាញ់គ្រាប់បែកចេញទឹកភ្នែក និងគ្រាប់បែកសម្លេងមកលើហ្វូងបាតុករជាច្រើនម៉ឺននាក់ ដែលបានព្យាយាមកាន់កាប់ទីកន្លែងសំខាន់នៅកណ្ដាលក្រុង ម៉ាណាម៉ា នៅពេលមួយថ្ងៃមុនខួបទីមួយនៃការបះបោរតវ៉ាទាមទារលទ្ធិប្រជាធិបតេយ្យ។ <!--AV--> This posting includes an audio/video/photo media file: Download Now |
| បណ្តាញបុរសកម្ពុជាខកចិត្តនឹងចំណាត់ការរបស់រដ្ឋាភិបាលលើជម្លោះដីនៅបុរីកីឡា Posted: 13 Feb 2012 05:35 PM PST សមាជិកបណ្តាញបុរសកម្ពុជា ដែលជាសម្ព័ន្ធបុរសស្ម័គ្រចិត្តចំនួនជាង១.០០០នាក់ ដែលធ្វើសកម្មភាពលើកកម្ពស់ការយល់ដឹង និងអំពើហិង្សាលើស្រ្តី បានសម្តែងការខកចិត្តយ៉ាងខ្លាំងចំពោះរដ្ឋាភិបាលកម្ពុជាដែលមិនបានយកចិត្តទុកដាក់ដោះស្រាយវិបត្តិដីធ្លីរវាងប្រជាពលរដ្ឋនៅសហគមន៍បុរីកីឡា និងក្រុមហ៊ុនផានអ៊ីម៉ិច របស់លោកស្រីស៊ុយ ស៊ីផាន។ កាលពីថ្ងៃទី៣ ខែមករា កន្លងទៅនេះ ក្រុមហ៊ុនផានអ៊ីម៉ិចបានប្រើប្រាស់កម្លាំងប៉ូលិស និងប៉េអ៊ឹម ជាច្រើនរយនាក់ប្រដាប់ដោយអាវុធ ខែល ដំបង់ឆក់ និងរថយន្តបាញ់ទឹក ដើម្បីបណ្តេញប្រជាពលរដ្ឋដោយបង្ខំ ដោយមានការបង្ហូរឈាម។ ការបណ្តេញចេញនៅពេលនោះ មន្ត្រីអាជ្ញាធរបានប្រើប្រាស់ឧស្ម័នបង្ហូរទឹកភ្នែក និងរថយន្តបាញ់ទឹក។ ចំណែកឯក្រុមប្រជាពលរដ្ឋបានតបមកវិញដោយគប់ដំថ្ម នឹងសំបកដបចាស់ៗ។ មានសមត្ថកិច្ច និងប្រជាពលរដ្ឋមួយចំនួនបានទទួលរងរបួសបែកក្បាលហូរឈាម ហើយបន្ទាប់ពីការប៉ះទង្គិចគ្នាបានបញ្ចប់ មានក្រុមប្រជាពលរដ្ឋប្រាំបីនាក់យ៉ាងតិច ត្រូវបានអាជ្ញាធរបានចាប់ខ្លួនភ្លាមៗ រួចបានបញ្ជូនទៅតុលាការក្រុងភ្នំពេញ។ តុលាការក្រុងភ្នំពេញ បានចោទប្រកាន់ក្រុមប្រជាពលរដ្ឋទាំងប្រាំបីនាក់ពីបទប្រើប្រាស់អំពើហិង្សាប្រឆាំងនឹងអ្នករាជការសាធារណៈ រួចបានបញ្ជូនទៅឃុំឃាំងនៅក្នុងពន្ធនាគារព្រៃស។ ក្រុមអ្នកស្រុកបុរីកីឡាដែលបាត់បង់ផ្ទះសម្បែង បានធ្វើបាតុកម្មជាច្រើនលើក រហូតដល់មានការដោះសំលៀកបំពាក់ចេញ ដើម្បីទាមទារឲ្យដោះលែងប្រជាពលរដ្ឋដែលកំពុងជាប់ឃុំឃាំង និងឲ្យក្រុមហ៊ុនសាងសង់អាគារពីរបន្ថែមទៀត ផ្តល់សំណងការខូចខាតបន្ទាប់ពីផ្ទះរបស់ពួកគេត្រូវបានបំផ្លាញ។ លោក ម៉ៅ ស៊ីហៀប លេខាធិការនៃបណ្តាញបុរសកម្ពុជាបានបញ្ជាក់ថា ការបណ្តេញចេញប្រជាពលរដ្ឋពីសហគមន៍បុរីកីឡា ហាក់បីដូចជាធ្ងន់ធ្ងរដោយសារតែស្រ្តីខ្មែរ ហ៊ានរហូតដល់ដោះសំលៀកបំពាក់របស់ពួកគេចេញ ដើម្បីតវ៉ារឿងវិវាទដីធ្លីនេះ។ លោកបានមានប្រសាសន៍ថា រឿងរ៉ាវទាំងនេះមិនដែលធ្លាប់មានទេនៅក្នុងសង្គមខ្មែរ។ លោកបាននិយាយទៀតថា រដ្ឋាភិបាលកម្ពុជាមិនទាន់បានឆ្លើយតប និងរកដំណោះស្រាយសមរម្យណាមួយជូនប្រជាពលរដ្ឋនៅសហគមន៍បុរីកីឡាទេ។ «ពីករណីមួយ ទៅករណីមួយ ជាពិសេសនៅក្នុងប្លុកបុរីកីឡា យើងមិនទាន់ឃើញការឆ្លើយតបណាមួយបែបអហិង្សា និងសមស្របសម្រាប់ពួកគាត់នៅឡើយទេ គឺមិនទាន់បានឃើញយកបញ្ហាហ្នឹងមកជជែកជាមួយពួកគាត់ដោយសន្តវិធីនៅឡើយ ជាជាងដោយពួកគាត់ហ្នឹងឆ្លើយតបដោយហិង្សា»។ លោក កើត ឆែ នាយករងនៃរដ្ឋបាលសាលាក្រុងភ្នំពេញមិនបានឆ្លើយតបទៅនឹងសំណួររបស់វីអូអេទេ ដោយលោកបានតម្រូវឲ្យប្រើប្រាស់ទូរស័ព្ទដៃ ដើម្បីសាកសួរគាត់វិញ ហើយលោកមិនផ្តល់ចម្លើយទេនៅពេលដែលសាកសួរលោកតាមទូរស័ព្ទខ្សែ។ ក្រុមប្រជាពលរដ្ឋនៅសហគមន៍បុរីកីឡាបន្ទាប់ពីបានដាក់ញត្តិទៅស្ថានទូតសំខាន់ៗមួយចំនួន និងសាលាក្រុងភ្នំពេញនៅមិនទាន់បានដំណោះស្រាយ។ ប្រជាពលរដ្ឋបានសរសេរញត្តិមួយច្បាប់ថ្វាយព្រះមហាក្សត្រកាលពីដើមសប្តាហ៍នេះ នៅក្នុងពេលដែលព្រះអង្គកំពុងតែគង់ប្រថាប់នៅក្នុងទីក្រុងប៉េកាំង។ ការដាក់ញត្តិថ្វាយព្រះមហាក្សត្រនេះគឺជាជម្រើសចុងក្រោយ ដើម្បីទាមទារឲ្យព្រះអង្គធ្វើអន្តរាគមន៍ដើម្បីឲ្យដោះលែងប្រជាពលរដ្ឋដែលកំពុងជាប់ឃុំ និងឲ្យក្រុមហ៊ុនសាងសង់អគារពីរបន្ថែមទៀតព្រមទាំងផ្តល់សំណងសម្រាប់ការបាត់បង់ផ្ទះសម្បែងរបស់ពួកគេ៕ This posting includes an audio/video/photo media file: Download Now |
| ព្រះរាជអាជ្ញាថាខ្មែរក្រហមបានធ្វើគោលនយោបាយមុនចូលកាន់អំណាច Posted: 13 Feb 2012 04:50 PM PST ក្រុមព្រះរាជអាជ្ញារងនៃសាលាក្តីខ្មែរក្រហមបានបង្ហាញថា មេដឹកនាំកំពូលខ្មែរក្រហម មានផែនការនយោបាយជាមុនរួចជាស្រេចមុននឹងច្បាមយកអំណាច ដោយប្រដាប់អាវុធពីរបបលោកសេនាប្រមុខលន់ ណុល។ ការលើកឡើងរបស់ក្រុមសហព្រះរាអាជ្ញាធ្វើឡើងនៅក្នុងការកាត់ទោសសំណុំរឿង០០២ នៅថ្ងៃច័ន្ទនេះ។ ជនជាប់ចោទទាំងបីនាក់ដែលមាននួន ជា អៀង សារី និងខៀវ សំផន ធ្លាប់បានដោះសារជាបន្ដបន្ទាប់នៅក្នុងពេលកំពុងកាត់ទោសជាហូរហែរថា ពួកខ្លួនមានការទទួលខុសត្រូវដាច់ៗពីគ្នា និងមិនដឹងពីកិច្ចការនៃមេដឹកនាំខ្មែរក្រហមដទៃទៀតស៊ីជម្រៅទេ។ ក្រុមសហព្រះរាជអាជ្ញារងបានបង្ហាញឯកសារជាច្រើន ដែលទាក់ទងនឹងសេចក្ដីថ្លែងការណ៍នានារបស់ប៉ុល ពត បងធំទី១ និងជាមេស្ថាបនិករបបខ្មែរក្រហម និងសេចក្ដីថ្លែងការណ៍របស់ខៀវ សំផន ដែលបង្ហាញពីការដឹកនាំការងារ និងការគ្រប់គ្រងអំណាចនៅក្នុងជួរខ្មែរក្រហម។ លោក វ៉ាំងសង់ ឌើ វីលឌ ដេសត្មាអែល (Vincent De Wilde D'Estmael) សហព្រះរាជអាជ្ញារងបានស្រង់សម្តីប៉ុល ពត ដែលថ្លែងក្នុងកិច្ចប្រជុំនៃគណបក្សកុម្មុយនិស្ដមួយដែលបង្ហាញថា គណបក្សកុម្មុយនិស្ដរបស់ខ្មែរក្រហមបានសម្រេចក្នុងអំឡុងទសវត្សរ៍ទី៦០ពីការបង្កើតរចនាសម្ព័ន្ធដឹកនាំ ការលុបបំបាត់របបមូលធន និងសក្ដិភូមិ ការលុបបំបាត់ទីផ្សារ និងការចាយលុយ រួមទាំងការបង្កើតសហករណ៍ជាដើម។ ការដឹកនាំទៀតសោតនឹងត្រូវអនុវត្តតាមខ្សែបន្ទាត់ពីថ្នាក់ក្រោមរហូតដល់ថ្នាក់មជ្ឈឹម។ «ថ្នាក់ក្រោមគោរពថ្នាក់លើ។ បុគ្គលគោរពសមូហភាព។ ឯកជនគោរពអង្គការ។ អង្គការថ្នាក់ផ្សេងៗគ្នាគោរពអង្គការមជ្ឈឹម។ នេះហើយគឺជាគោលការណ៍មួយក្នុងចំណោមគោលការណ៍សំខាន់ៗនៃរបបនោះ»។ សហព្រះរាជអាជ្ញារងសញ្ជាតិបារាំងដដែលបញ្ជាក់ថា ប៉ុល ពត បានពន្យល់ថា ការលុបបំបាត់ទីផ្សារ និងការមិនចាយលុយបន្ទាប់ពីបក្សកុម្មុយនិស្ដរបស់ខ្មែរក្រហមយល់ឃើញថា ក្រុមឈ្មួញនឹងធ្វើជាចៅហ្វាយគ្រប់គ្រងទៅលើការធ្វើបដិវត្តន៍ ការគ្រប់គ្រងកងទ័ព និងគ្រប់គ្រងប្រជាជន។ ហើយការបន្តឲ្យមាននយោបាយពាណិជ្ជកម្មនឹងបង្កឲ្យមានគ្រោះថ្នាក់ដល់ការតស៊ូរំដោះជាតិ។ មួយវិញទៀត វ៉ាំងសង់ ឌើ វីលឌ ដេសត្មាអែល បញ្ជាក់ថា ប៉ុល ពត យល់ថា នៅក្នុងពេលកំពុងធ្វើសង្រ្គាម សហករណ៍គឺជាប្រភពផ្គត់ផ្គង់យ៉ាងសំខាន់ដល់កម្លាំងយោធា និងសេដ្ឋកិច្ច និងកម្លាំងដឹកជញ្ជូន។ នេះគឺជាតួនាទីយ៉ាងសំខាន់ក្នុងការបង្កើតសហករណ៍ក្នុងការច្បាមយកអំណាចពីពួកសក្ដិភូមិ និងនាយទន់ដែលពួកខ្មែរក្រហមចាត់ទុកថា ជាសត្រូវរបស់ប្រជាជន។ មួយវិញទៀត បន្ទាប់ពីសង្រ្គាម សហករណ៍មានសមត្ថភាពផ្ដល់ស្បៀងអាហារគ្រប់វិស័យដល់ប្រជាជនថ្មីដែលទើបត្រូវបានរំដោះក្រោយពីថ្ងៃទី១៧ ខែមេសា ឆ្នាំ១៩៧៥។ ជាប់ចោទពីបទឧក្រិដ្ឋកម្មសង្រ្គាម ឧក្រិដ្ឋកម្មប្រឆាំងមនុស្សជាតិ និងបទប្រល័យពូជសាសន៍ ចំពោះការស្លាប់ និងការសម្លាប់ប្រជាពលរដ្ឋកម្ពុជាយ៉ាងតិច១,៧លាននាក់ អតីតប្រធានសភាខ្មែរក្រហម នួន ជា បានច្រានចោលការទទួលខុសត្រូវរបស់ខ្លួន ចំពោះអំពើឃោរឃៅដែលបានកើតឡើង ហើយបានពន្យល់ថា ការមិនចាយលុយ ការលុបបំបាត់ទីផ្សារ គឺធ្វើឡើងសម្រាប់តែមួយរយៈពេលតែប៉ុណ្ណោះ ហើយការបង្កើតសហករណ៍គឺដើម្បីបង្កើនកម្លាំងពលកម្មក្នុងវិស័យកសិកម្ម និងបង្រៀនមនុស្សគ្រប់រូបឲ្យចេះធ្វើការងារ។ ដោយឡែកអៀង សារី អតីតរដ្ឋមន្ដ្រីការបរទេសខ្មែរក្រហម ព្យាយាមមិនឆ្លើយនឹងសំណួរផ្សេងៗ នៅក្នុងពេលកំពុងកាត់ទោសរូបគាត់ទេ។ រីឯ ខៀវ សំផន អតីប្រមុខរដ្ឋខ្មែរក្រហមបានឆ្លើយថា ខ្លួនមិនដឹងពីបញ្ហាជាច្រើន និងបានព្យាយាមមិនធ្វើការឆ្លើយតបនឹងសំណួរក្នុងខណៈនេះ។ លោកព្រះរាជអាជ្ញារងកម្ពុជា ច័ន្ទ តារារស្មី បញ្ជាក់ថា ឆ្លងតាមការបង្ហាញឯកសារបង្ហាញថា ពួកខ្មែរក្រហមបានបង្កើតរចនាសម្ព័ន្ធរដ្ឋបាលមូលដ្ឋាន និងចាប់ផ្ដើមអនុវត្តន៍យ៉ាងមានប្រសិទ្ធិភាពចាប់តាំងពីពួកខ្លួនស្ថិតក្នុងចលនាតស៊ូក្នុងព្រៃមកម្លេះ។ ជាមួយគ្នានេះដែរលោកសហព្រះរាជអាជ្ញារងកម្ពុជាលោក វ៉េង ហួត បានបង្ហាញថា ខៀវ សំផន បានតស៊ូជាមួយចលនាខ្មែរក្រហមជាងពីរទសវត្សរ៍ ហើយបានកាន់ដំណែងកំពូលៗជាច្រើន ហើយគាត់បានដឹងឮយ៉ាងទូលំទូលាយអំពីសភាពការណ៍មុនការឡើងកាន់អំណាច និងការប្រព្រឹត្តក្នុងតំបន់រំដោះ និងសកម្មភាពព្រៃផ្សៃរបស់ពួកខ្មែរក្រហមជាច្រើន៕ This posting includes an audio/video/photo media file: Download Now |
| តុលាការខេត្តកណ្តាលពន្យារពេល Posted: 13 Feb 2012 09:32 PM PST តុលាការខេត្តកណ្តាលនៅថ្ងៃច័ន្ទនេះ បានសម្រេចពន្យារពេលជាលើកទី២ ក្នុងការសាកសួរមេធាវីការពារក្តីគណបក្សប្រឆាំងពាក់ព័ន្ធនឹងរឿងផ្តល់មធ្យោបាយដល់ជនជាប់ចោទ មាស ប៉េង ដែលជាជំទប់ទី២ ឃុំបន្ទាយដែក ស្រុកកៀនស្វាយ ខេត្តកណ្តាលឲ្យរត់ពីការឃុំឃាំង។ ការពន្យារពេលរបស់តុលាការបានធ្វើឡើង បន្ទាប់ពីពុំមានមេធាវីការពារក្តីទាំងប្រាំពីររូបដែលត្រូវបានតែងតាំងដោយគណៈមេធាវីសម្រាប់ការពារក្តីលោកជួង ជួងី។ នេះបើតាមការបញ្ជាក់របស់លោកមេធាវីជួង ជួងី។ តុលាការខេត្តកណ្តាលបានចេញបញ្ជាឲ្យលោកជួង ជួងី ចូលខ្លួនជាលើកទី២ នៅថ្ងៃច័ន្ទនេះ។ ក៏ប៉ុន្តែមេធាវីទាំងប្រាំពីររូបពុំមានវត្តមានទេ គឺមានតែមេធាវីមួយរូបតែប៉ុណ្ណោះ គឺលោកសុខ សំអឿន ប្រធានក្រុមអ្នកច្បាប់ការពារសិទ្ធិកម្ពុជា ដែលលោកជួង ជួងី ទើបតែជ្រើសរើសថែមម្នាក់ទៀតសម្រាប់ការពារក្តី។ ការកោះហៅលោកជួង ជួងី ដែលជាមេធាវីការពារក្តីគណបក្សប្រឆាំងមកបំភ្លឺពាក់ព័ន្ធនឹងការផ្តល់មធ្យោបាយឲ្យលួចរត់នេះ មិនអនុញ្ញាតឲ្យអ្នកយកព័ត៌មានចូលស្តាប់នៅក្នុងបន្ទប់សវនាការទេ លើកលែងតែតំណាងរាស្ត្រគណបក្សប្រឆាំងតែប៉ុណ្ណោះ។ បន្ទាប់ពីបានបង្ហាញមុខនៅក្នុងតុលាការខេត្តកណ្តាល លោកជួង ជួងី បានថ្លែងប្រាក់អ្នកយកព័ត៌មាននៅខាងក្រៅអគារតុលាការថា ដំណើរការសាកសួរត្រូវបានពន្យារពេលដោយសារតែគ្មានមេធាវីគ្រប់គ្រាន់។ លោក ជួង ជួងី បានបញ្ជាក់ទៀតថា លោកមិនទាន់ដឹងថា ការកោះហៅលើកទី៣នេះនឹងត្រូវប្រព្រឹត្តទៅនៅពេលណាទេ។ «ខ្ញុំមិនអាចផ្តល់ចម្លើយបានទេគឺត្រូវរង់ចាំមេធាវីទាំងប្រាំបីរូប ដែលប្រាំពីររូបគណៈមេធាវីចាត់តាំងឲ្យការពារខ្ញុំ»។ លោក ពុធ ធាវី ប្រធានក្រុមមេធាវីទាំងប្រាំពីររូប ដែលត្រូវបានតែងតាំងដោយសមាជិកគណៈមេធាវីឲ្យការពារក្តីលោកជួង ជួងី បានមានប្រសាសន៍ថា លោកមិនអាចចូលរួមការពារក្តីនេះបានទេដោយសារតែលោកនៅមិនទាន់ទទួលបានដីកាកោះឲ្យចូលការពារក្តីលោកជួង ជួងី នៅឡើយ។ «គាត់ផ្ងើដីកាមកចូលនៅក្នុងប៉ុស្តិ៍បឹងរាំងហើយឲ្យប៉ុស្តិ៍បឹងរាំង យកមកឲ្យគណៈមេធាវីខ្ញុំនៅថ្ងៃសៅរ៍។ គណៈមេធាវីខ្ញុំឥតអាចទទួលយកបានទេ។ អញ្ចឹងខាងប៉ូលីសប៉ុស្តិ៍ ក៏ចារទៅត្រឡប់ទៅខាងតុលាការវិញ។ ហើយខ្ញុំបានឲ្យកូនក្តីខ្ញុំជួង ជួងីនេះគឺយកលិខិតសុំពន្យារពេលព្រឹកមិញនេះ។ ដូច្នេះតុលាការក៏បានសម្រេចតាមការស្នើសុំរបស់កូនក្តីខ្ញុំហើយ ដោយសារតែមិនមានដីកាកោះអញ្ជើញទទួលផ្ទាល់ដៃរបស់គណៈមេធាវីទាំងប្រាំពីររូប»។ លោក ស៊ិន វីរៈ ចៅក្រមស៊ើបសួរនៅតុលាការខេត្តកណ្តាលមិនអាចទំនាក់ទំនងបានទេនៅថ្ងៃច័ន្ទនេះ។ លោក យឹម សុវណ្ណ អ្នកនាំពាក្យគណបក្សប្រឆាំងបានហៅករណីនេះ ជារឿងដែលពាក់ព័ន្ធនឹងរឿងនយោបាយ។ «វាជារឿងនយោបាយពិតប្រាកដ ព្រោះមេធាវី អ្នកដែលហ៊ានចេញមុខការពារក្តីឲ្យគណបក្សសម រង្ស៊ី គឺមានតិចតួចណាស់។ ហើយអ្នកណាក៏ដោយឲ្យតែហ៊ានចេញមុខការពារក្តីជូនគណបក្សសម រង្ស៊ី និងអ្នករងគ្រោះដោយសារដីធ្លី គឺត្រូវតែបានគេចោទប្រកាន់ឥតចេះចប់ រហូតមកទល់ពេលនេះ»។ កាលពីអំឡុងឆ្នាំ២០១១ តុលាការខេត្តកណ្តាលបានចោទប្រកាន់លោកមាស ប៉េង ជំទប់ទី២ ឃុំបន្ទាយដែកពីបទប្រើប្រាស់អំពើហិង្សាប្រឆាំងនឹងអ្នកកាន់កាប់អចលវត្ថុដោយសុច្ចរិត នៅក្នុងរឿងទំនាស់ដីធ្លីមួយ ជាមួយនឹងលោកប្រាក់ សាវុធ សមាជិកក្រុមប្រឹក្សាខេត្តក្រចេះខាងគណបក្សប្រជាជនកម្ពុជា។ តុលាការខេត្តកណ្តាលបានបញ្ជាឲ្យនាំខ្លួនលោកមាស ប៉េង យកទៅឃុំឃាំងនៅក្នុងពន្ធនាគារខេត្ត ក៏ប៉ុន្តែត្រូវបានលោកជួង ជួងី បានចោទប្រកាន់ថាមិនអនុញ្ញាតឲ្យឃុំខ្លួនកូនក្តីរបស់ខ្លួនបានទេ រួចហើយបានបញ្ជាឲ្យលោកចាន់ ចេង នាំកូនក្តីរបស់លោកទៅកាន់លំនៅដ្ឋានវិញ។ លោក ចាន់ ចេង សមាជិកសភាតំណាងរាស្ត្រខាងគណបក្សសម រង្ស៊ី ត្រូវបានរដ្ឋសភាដកអភ័យឯកសិទ្ធិកាលពីខែវិច្ឆិកា ឆ្នាំ២០១១ ដើម្បីបើកផ្លូវស៊ើបអង្គេតរបស់តុលាការខេត្តកណ្តាលពាក់ព័ន្ធនឹងការផ្តល់មធ្យោបាយដល់ជនជាប់ចោទលោក មាស ប៉េង លួចរត់ដូចលោកជួង ជួងី ដែរ។ លោក ចាន់ ចេង បានរត់គេចខ្លួនទៅក្រៅប្រទេស បន្ទាប់ពីបានបាត់បង់ជាសមាជិកសភាតំណាងរាស្ត្រ៕ This posting includes an audio/video/photo media file: Download Now |
| You are subscribed to email updates from VOA News: ព័ត៌មាន To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
