VOA News: ព័ត៌មាន: “កម្ពុជារៀបចំសន្និសីទសន្ធិសញ្ញាអូតាវ៉ា ប្រឆាំងគ្រាប់មីន” plus 7 more |
- កម្ពុជារៀបចំសន្និសីទសន្ធិសញ្ញាអូតាវ៉ា ប្រឆាំងគ្រាប់មីន
- សភាអនុម័តគម្រោងថវិកាឆ្នាំ២០១២ ថ្វីបើគណបក្សប្រឆាំងធ្វើពហិការ
- អ្នកភូមិបឹងកក់របួសនិងត្រូវចាប់ខ្លួន ពេលប៉ះទង្គិចជាមួយប៉ូលិស
- ពលរដ្ឋទាក់ទងនឹងជម្លោះដីធ្លីនៅបឹងកក់លោតទឹកសម្លាប់ខ្លួន
- ជនរងគ្រោះខ្មែរក្រហមក្នុងខេត្តសៀមរាបទន្ទឹងយុត្តិធម៌
- អតីតឯកអគ្គរដ្ឋទូតខ្មែរម្នាក់មិនចូលខ្លួនតាមដីការបស់សាលាក្រុងទេ
- តុលាការក្រុងភ្នំពេញផ្តទ្ទាទោសអតីតឯកអគ្គរាជទូតកម្ពុជា ប្រចាំប្រទេសប្រ៊ុយណេ
- ព័ត៌មានអន្តរជាតិ៖ ២៨ វិច្ឆិកា
| កម្ពុជារៀបចំសន្និសីទសន្ធិសញ្ញាអូតាវ៉ា ប្រឆាំងគ្រាប់មីន Posted: 28 Nov 2011 01:36 PM PST មន្ដ្រីជាន់ខ្ពស់អង្គការសហប្រជាជាតិកត់សម្គាល់ថា គ្រាប់មីនប្រឆាំងមនុស្សនៅតែបន្ដជាឧបសគ្គយ៉ាងសំខាន់សម្រាប់ប្រទេសកំពុងអភិវឌ្ឍន៍ ស្របពេលដែលលោកនាយករដ្ឋមន្ដ្រីខ្មែរ ហ៊ុន សែន ប្រាថ្នាចង់ឲ្យមានប្រទេសកាន់តែច្រើនទៀតក្នុងពិភពលោកចូលរួមក្នុងចលនាលុបបំបាត់គ្រាប់មីនប្រភេទនេះ។ ថ្លែងក្នុងពិធីបើកកិច្ចប្រជុំលើកទី១១នៃរដ្ឋហត្ថលេខីក្នុងសន្ធិសញ្ញាស្ដីពីការហាមឃាត់គ្រាប់មីនប្រឆាំងមនុស្ស ឬសន្ធិសញ្ញាក្រុងអូតាវ៉ាកាលពីយប់ថ្ងៃអាទិត្យក្នុងទីក្រុងភ្នំពេញ លោកស្រីហេឡិន ក្លាក (Helen Clark) ប្រធានអង្គការកម្មវិធីអភិវឌ្ឍន៍របស់អង្គការសហប្រជាជាតិ(UNDP) បានគូសបញ្ជាក់ថា គ្រាប់មីនទាំងនេះគឺជាឧបសគ្គសម្រាប់សេវាសង្គ្រោះនានាសម្រាប់ប្រទេសដែលទើបតែងើបពីជម្លោះប្រដាប់អាវុធ។មីនគឺជាឧបសគ្គចំពោះការប្រើប្រាស់ដីធ្លី និងធនធានធម្មជាតិ និងរាំងស្ទះទៅដល់ការប្រកបមុខរបរ និងការអភិវឌ្ឍរបស់ប្រជាជន។កិច្ចប្រជុំនៃសន្ធិសញ្ញាក្រុងអូតាវ៉ា នឹងបន្តរហូតរហូតដល់ថ្ងៃទី២ ខែធ្នូ ដោយរាប់ចាប់តាំងពីថ្ងៃអាទិត្យ។ មានប្រទេសសរុបចំនួនជាង១០០ចូលរួម។ លោកហ៊ុន សែន នាយករដ្ឋមន្ដ្រីកម្ពុជា ក៏បានបញ្ជាក់ក្នុងពិធីបើកកិច្ចប្រជុំនេះដែរថា គ្រាប់មីនបានក្លាយជាឧបសគ្គយ៉ាងសំខាន់សម្រាប់កម្ពុជាក្នុងការអភិវឌ្ឍ។ <!--AV--> យោងតាមរបាយការណ៍ផ្លូវការបង្ហាញថា គ្រាប់យុទ្ធភ័ណ្ឌមិនទាន់ផ្ទុះបានបណ្ដាលឲ្យប្រជាពលរដ្ឋកម្ពុជារងគ្រោះចំនួន៤៣២០នាក់ នៅឆ្នាំ១៩៩៦ ក៏ប៉ុន្ដែចំនួនជនរងគ្រោះបានធ្លាក់ចុះរហូតមកដល់ក្រោម៣០០នាក់ក្នុងរយៈពេលបីឆ្នាំចុងក្រោយនេះ។ លោកស្រីហេឡិន ក្លាកលើកឡើងថា មានប្រជាជនកម្ពុជាស្លាប់ និងរបួសដោយសារគ្រាប់មីនសរុបចំនួនជាង៦៣៩០០នាក់ ក្នុងរយៈពេលជាងបីទសវត្សកន្លងមក។ ដោយឡែកក្នុងរយៈពេលដូចគ្នានេះមានជនរងគ្រោះស្លាប់និងពិការដោយសារគ្រាប់មីនចំនួនជាងមួយលាននាក់ នៅទូទាំងពិភពលោក។ មានប្រទេសហត្ថលេខីនៃសន្ធិសញ្ញាក្រុងអូតាវ៉ានេះសរុបចំនួន១៥៨ បន្ទាប់ពីសន្ធិសញ្ញានេះបានចូលជាធរមាននៅឆ្នាំ១៩៩៩។ ក្នុងនោះប្រទេសចំនួន១៥៣បានសម្រេចរំលាយស្ដុកគ្រាប់មីនប្រឆាំងមនុស្សចោល។ ប្រទេសកម្ពុជានឹងធ្វើជាប្រធានកិច្ចប្រជុំនេះពេញមួយឆ្នាំ២០១២ ដើម្បីតាមដានពិនិត្យមើលការអនុវត្តសេចក្ដីសម្រេចពីកិច្ចប្រជុំ។ លោកនាយករដ្ឋមន្ដ្រីហ៊ុន សែនប្រាថ្នាចង់ឃើញប្រទេសជាសមាជិកនៃសន្ធិសញ្ញានេះ មានចំនួនកាន់តែច្រើនថែមទៀត។ «ប្រសិនបើយើងមិននាំគ្នាបង្កើនល្បឿននឹងប្រសិទ្ធិភាពនៃការដោះស្រាយបញ្ហា ដែលយើងបានប្រកាន់យកកន្លងមកនោះទេ យើងនឹងមិនងាយទៅដល់គោលដៅចុងក្រោយរបស់យើង ដែលចង់បានពិភពលោកមួយ ដែលគ្មានគ្រាប់មីននោះទេ។ ខ្ញុំសង្ឃឹមថា មិត្តភក្តិផ្សេងទៀត ដែលនៅមិនទាន់បានចូលជាសមាជិកនៃអនុសញ្ញានឹងបន្តរួបរួមជាមួយយើងទាំងអស់គ្នា ដើម្បីសម្រេចនូវគោលដៅនេះ»។ មានប្រទេសដែលមិនមែនជាភាគីហត្ថលេខីនៃសន្ធិសញ្ញាហាមឃាត់គ្រាប់មីនប្រឆាំងមនុស្ស ឬសន្ធិសញ្ញាក្រុងអូតាវ៉ាចំនួនដប់បានចូលរួមជាអ្នកសង្កេតការណ៍ក្នុងកិច្ចប្រជុំលើកនេះ។ ក្នុងនោះមានទាំងប្រទេស ដែលផលិតសព្វាវុធ និងគ្រាប់មីនក្នុងពិភពលោក ដូចជាសហរដ្ឋអាមេរិក និងប្រទេសចិនជាដើម។ តំណាងប្រទេសចិននឹងធ្វើសេចក្តីថ្ងៃងការណ៍ក្នុងកិច្ចប្រជុំនេះនៅថ្ងៃនេះ៕ This posting includes an audio/video/photo media file: Download Now |
| សភាអនុម័តគម្រោងថវិកាឆ្នាំ២០១២ ថ្វីបើគណបក្សប្រឆាំងធ្វើពហិការ Posted: 28 Nov 2011 01:16 PM PST ការលាលែង និងការធ្វើពហិការរបស់សមាជិកសភាគណបក្សប្រឆាំង សំដៅរាំងស្ទះដល់ការអនុម័តច្បាប់ថវិកាជាតិឆ្នាំ២០១២ និងច្បាប់ដទៃទៀតនោះ ត្រូវក្រុមអ្នកវិភាគនិយាយនៅថ្ងៃច័ន្ទនេះថា ការណ៍នេះមិនអាចធ្វើឱ្យមានវិបត្តិរដ្ឋធម្មនុញ្ញតាមផ្លូវច្បាប់បានទេ ប៉ុន្តែវាធ្វើឱ្យខ្សោយដល់អានុភាព នៃសេចក្តីសម្រេចរបស់រដ្ឋសភា។ ក្នុងមាត្រា៧៦នៃរដ្ឋធម្មនុញ្ញ រដ្ឋសភាត្រូវមានសមាជិកយ៉ាងតិច១២០រូប។ លោកសម រង្ស៊ី ប្រធានគណបក្សសម រង្ស៊ី បានបកស្រាយថា តំណាងរាស្ត្រគណបក្សសម រង្ស៊ីបីរូបបានលាលែងដើម្បីឱ្យចំនួនសមាជិកសភាក្រោម១២០រូបគឺតិចជាងការកំណត់របស់រដ្ឋធម្មនុញ្ញដែលធ្វើឱ្យរដ្ឋសភាសព្វថ្ងៃបាត់បង់ធម្មនុញ្ញភាព ហើយសេចក្តីសម្រេចរបស់រដ្ឋសភានិងរដ្ឋាភិបាលមិនអាចមានលក្ខណៈពេញលេញតាមផ្លូវច្បាប់បានទេ។ លោកជាម យៀប សមាជិកសភាជាន់ខ្ពស់នៃគណបក្សប្រជាជនកម្ពុជា បានបកស្រាយថា មាត្រា៧៦បានតម្រូវឱ្យរដ្ឋសភាមានសមាជិកយ៉ាងតិច១២០រូបដើម្បីបង្កើតរដ្ឋសភាមួយពេញលក្ខណៈច្បាប់ ហើយរដ្ឋសភាត្រូវបានបង្កើតពេញលក្ខណៈច្បាប់ ហើយ។ លោកឡាវ ម៉ុងហៃ អ្នកវិភាគឯករាជ្យ បានថ្លែងថា មានការបកស្រាយភាន់ច្រឡំលើមាត្រា៧៦នៃរដ្ឋធម្មនុញ្ញដែលចែងថា រដ្ឋសភាត្រូវមានសមាជិកយ៉ាងតិច១២០រូប។ លោកឡាវ ម៉ុងហៃបានបន្តថា បើចំនួនសមាជិកសភាថយចុះក្រោម១២០រូប សមាជិកម្នាក់លំដាប់បន្ទាប់នៅក្នុងមណ្ឌលបោះឆ្នោតដែលនៅមានអាសនៈក្នុងរដ្ឋសភានោះត្រូវឡើងមកជំនួស ហើយអ្វីដែលគណបក្សសម រង្ស៊ីកំពុងធ្វើមិនសមហេតុផលទេ ដោយយោងតាមមាត្រា៨៨ ដែលចែងថា ការប្រជុំសភាតម្រូវឱ្យមានកូរ៉ុម៧ភាគ១០សម្រាប់ការអនុម័តច្បាប់។ លោកឡាវ ម៉ុងហៃបានបញ្ជាក់ថា ការលាលែង និងការធ្វើពហិការរបស់គណបក្សសម រង្ស៊ីគ្រាន់តែធ្វើឱ្យខ្សោយដល់អានុភាពនៃសេចក្តីសម្រេចនានា ជាពិសេសការអនុម័តច្បាប់ដោយគ្មានការពិភាក្សា ហើយកិច្ចព្រមព្រៀងប្រាក់កម្ចីនឹងប្រឈមនឹងការលំបាកនៅពេលអនាគត។ «បើគណបក្សប្រឆាំងឈ្នះឆ្នោត គណបក្សប្រឆាំងអាចនឹងមិនសងបំណុល ដែលខ្លួនមិនបានអនុម័ត។ ការអនុម័តច្បាប់ថវិកាជាតិឆ្នាំ២០១២ និងច្បាប់ត្រួតពិនិត្យគ្រឿងញៀនមានភាពស្របច្បាប់ ប៉ុន្តែវាមានកង្វះធម្មនុញ្ញរូបខាងផ្លូវច្បាប់ផង និងសីលធម៌ផង គឺថា ច្បាប់ហ្នឹងអត់មានទម្ងន់ ដូចច្បាប់មានការចូលរួមអនុម័តឱ្យបានច្រើនគ្នា»។ លោកសុខ សំអឿន នាយកប្រតិបត្តិអង្គការការពារសិទ្ធិកម្ពុជា បានថ្លែងថាការលាលែង និងការធ្វើពហិការនេះមិនធ្វើឱ្យប៉ះពាល់ដល់រដ្ឋធម្មនុញ្ញទេ ប៉ុន្តែវាធ្វើឱ្យប៉ះពាល់ដល់កិត្តិយសរបស់ប្រទេសកម្ពុជានៅលើឆាកអន្តរជាតិ និងការសៅហ្មងផ្នែកការទូត។ «ខ្ញុំថា នេះគ្រាន់តែជារឿងបច្ចេកទេសនយោបាយ និងជាកល់យុទ្ធអ្នកនយោបាយ។ គណបក្សប្រឆាំងគាបសង្កត់ទៅគណបក្សប្រជាជនដើម្បីឲ្យយល់ព្រមនូវចំណុចណាមួយ។ វាជារឿងនយោបាយ និងជារឿងរបស់អ្នកនយោបាយទេ។ វាមិនមែនជារឿងច្បាប់ទេ»។ លោកឈាង វណ្ណារិទ្ធ នាយកប្រតិបត្តិនៃវិទ្យាស្ថានកម្ពុជាដើម្បីកិច្ចសហប្រតិបត្តិការ និងសន្តិភាព បានថ្លែងថា វាជារឿងគួរឱ្យសោកស្តាយ ដែលយើងជាកម្ពុជាមិនអាចសម្របសម្រួល និងសម្រេចដល់កិច្ចព្រមព្រៀងគ្នាស្តីពីច្បាប់ថវិកាជាតិឆ្នាំ២០១២។ យ៉ាងណាក៏ដោយ ប្រទេសកម្ពុជា និងរដ្ឋាភិបាលត្រូវការធ្វើដំណើរទៅមុខដោយដាក់ផលប្រយោជន៍ជាតិលើអ្វីៗទាំងអស់។ «ការអនុម័តច្បាប់ថវិកាជាតិឆ្នាំ២០១២ ខ្ញុំគិតថា ជាការសោកស្តាយមួយ ដោយប្រជាពលរដ្ឋកម្ពុជាយើងមានតំណាងរាស្ត្រនៅក្នុងសភាពុំអាចសម្រេចជាឯកច្ឆន្ធ បានន័យថា ចូលរួមទាំងអស់គ្នា ទៅលើថវិកាជាតិនោះ»។ លោកឡាវ ម៉ុងហៃបានបញ្ជាក់ថា ដើម្បីដោះស្រាយបញ្ហានេះ ការទាមទាររបស់គណបក្សប្រឆាំងត្រូវតែដោះស្រាយជាបណ្តើរៗ ប៉ុន្តែគណបក្សប្រឆាំងក៏គួរតែលើកឱ្យចំបញ្ហាផងដែរ។ «បើសិនជាគណបក្សកាន់អំណាច ឬរដ្ឋាភិបាលមិនយកចិត្តទុកដាក់នឹងមតិទាំងឡាយ ដែលគេលើកឡើងនូវបញ្ហាសមហេតុផល ហើយមិនយកទៅគិតពិចារណា ដូចជាបញ្ហារឿងដីធ្លីអញ្ចេះ តែដេញគេទីណាត់ទីណែង។ យូរៗទៅ យើងធ្វើបាបតែប្រជាពលរដ្ឋខ្លួនឯង និងក្បត់នឹងសច្ចាប្រណិធាន ដែលអ្នកដឹកនាំបានធ្វើ។ ដល់យូរៗទៅ វាទៅជាកាន់អំណាចផ្តាច់ការ»។ លោកឈាង វណ្ណារិទ្ធបានបន្ថែមថា សេចក្តីទុកចិត្ត និងសេចក្តីជឿជាក់ក្នុងចំណោមគណបក្សនយោបាយផ្សេងគ្នា ត្រូវការពង្រឹងឱ្យខ្លាំងឡើងថែមទៀតតាមរយៈការចរចា និងការពិភាក្សាដោយបើកចំហ ត្រង់ទៅត្រង់មក និងតម្លាភាព។ បើមិនដូច្នេះទេ ប្រជាពលរដ្ឋកម្ពុជានឹងក្លាយទៅជាជនរងគ្រោះចំពោះការបង្កើនការប្រេះឆារផ្ទៃក្នុងនៅក្នុងប្រទេសនេះ៕ This posting includes an audio/video/photo media file: Download Now |
| អ្នកភូមិបឹងកក់របួសនិងត្រូវចាប់ខ្លួន ពេលប៉ះទង្គិចជាមួយប៉ូលិស Posted: 28 Nov 2011 01:02 PM PST ក្រុមមន្ត្រីសិទ្ធិសនុស្ស និងសាក្សីឃើញផ្ទាល់ភ្នែកបាននិយាយនៅថ្ងៃច័ន្ទនេះថា យ៉ាងតិចមានអ្នកភូមិបឹងកក់ប្រមាណបួននាក់ត្រូវបានចាប់ខ្លួន បួននាក់ផ្សេងទៀតត្រូវទទួលរងរបួស បីនាក់ផ្សេងទៀតដួលសន្លប់ ហើយពីរនាក់ទៀតប៉ុនប៉ងសម្លាប់ខ្លួនមិនបានសម្រេច បន្ទាប់ពីមានការប៉ះទង្គិចជាមួយនឹងអាជ្ញាធរមានសមត្ថកិច្ច។ ការប៉ះទង្គិចគ្នានេះបានកើតមានឡើងនៅពេលដែលអ្នកភូមិបឹងកក់ ដែលមានគ្នាប្រមាណជាង៣០០នាក់បានបិទផ្លូវចរាចរណ៍មមាញឹកដ៏សំខាន់មួយនៅពីមុខសាលាក្រុង រួចហើយត្រូវបានសមត្ថកិច្ច និងសន្តិសុខខណ្ឌដូនពេញមកបំបែកនឹងចាប់ខ្លួនប្រជាពលរដ្ឋជាបន្តបន្ទាប់។ ការចាប់ខ្លួលប្រជាពលរដ្ឋនេះបានកើតមានឡើងយ៉ាងតឹងតែងបំផុត ដោយក្រុមសន្តិសុខសាលាក្រុងភ្នំពេញបានចាប់មនុស្សគ្រវែងដាក់លើរថយន្ត ហើយត្រូវបានប្រជាពលរដ្ឋនៅតំបន់បឹងកក់ ដែលពោរពេញទៅដោយកំហឹង បានព្យាយាមរាំងខ្ទប់និងវាយប្រតប់គ្នា ដោយគប់ដបទឹកសុទ្ធ។ បន្ទាប់ពីមានការចាប់ខ្លួន អ្នកតំណាងប្រជាពលរដ្ឋទាំងបួនរូប ដែលរួមមានអ្នកស្រីទេព វណ្ណី អ្នកស្រីហេង មុំ អ្នកស្រីបូ ថាវី និងអ្នកស្រីគង់ ចាន់ថាមក នៅព្រលប់ថ្ងៃច័ន្ទនេះក្រុមប្រជាពលរដ្ឋបានមកប្រមូលផ្តុំគ្នាដើម្បីដាក់ញត្តិ នៅស្ថានទូតបារាំងវិញ។ ក្រុមប្រជាពលរដ្ឋបាននិយាយថា មន្ត្រីសាលាក្រុងភ្នំពេញនៅថ្ងៃច័ន្ទនេះ បានសន្យាថា នឹងចុះវាស់កំណត់ព្រំដីចំនួន១២,៤៤ហិចតា ដែលលោកនាយករដ្ឋមន្ត្រីហ៊ុន សែនបានធ្វើសម្បទានកម្មសិទ្ធិដល់ប្រជាពលរដ្ឋ ក៏ប៉ុន្តែគំរោងនេះត្រូវបានផ្អាកទៅវិញ។ ក្រុមអ្នកស្រុកបឹងកក់បានចោទប្រកាន់ថា ប្រជាពលរដ្ឋចំនួនប្រាំពីរភូមិគឺស្មើនឹងចំនួន៩១គ្រួសារនោះគឺមិនបានទទួលប្លង់នៅក្នុងចំណែកដីទាំងជាង១២ហិចតាដែលលោកនាយករដ្ឋមន្ត្រីបានកាត់ឲ្យនោះទេ។ អ្នកស្រីតុល ស្រីពៅបាននិយាយថា មានតែក្រុមហ៊ុនស៊ូកាកូអ៊ីនទេ ដែលមានសិទ្ធិធ្វើប្លង់កម្មសិទ្ធិនៅក្នុងចំណែកដីទាំងជាង១២ហិចតានេះ ក៏ប៉ុន្តែប្រជាពលរដ្ឋ ដែលរងគ្រោះពិតប្រាកដមិនមានសិទ្ធិធ្វើប្លង់កម្មសិទ្ធិទេ។ «ដី១២ហិចតា ដែលសម្តេចឲ្យប្រជាជនហ្នឹង មានតែក្រុមហ៊ុនស៊ូកាកូអ៊ីនទេ ដែលមានសិទ្ធិធ្វើប្លង់។ ប៉ុន្តែប្រជាពលរដ្ឋជាង១០០គ្រួសារ គឺឥតមានសិទ្ធិធ្វើប្លង់ទេ។ តាមពិតអនុក្រឹត្យរបស់សម្តេចនាយករដ្ឋមន្ត្រីផ្តល់ដី១២ហិចតាឲ្យប្រជាពលរដ្ឋ ដែលនៅសេសសល់នៅតំបន់បឹងកក់»។ ការតវ៉ារបស់ប្រជាពលរដ្ឋនៅថ្ងៃនេះ ហាក់បីដូចជាប្រែក្លាយពីភាពស្លូតបូត ទៅជាកំហឹង និងលែងខ្លាចស្លាប់បាត់បង់ជីវិត ដោយប្រជាពលរដ្ឋមួយចំនួនបានហែកអាវនិងស្រាតខោ និងស្រែកចម្អកដល់អាជ្ញាធរឲ្យបាញ់សម្លាប់ពួកគេចោលតែម្តងទៅ។ «បាញ់សម្លាប់ឲ្យអស់មក។ អាមន្ត្រីពុករលួយ។ អាហ្អែងខ្លាំង អាហ្អែងលោតមក»។ អ្នកស្រីគង់ ចាន់ថាបានថ្លែងប្រាប់អ្នកកាសែតនៅមុនពេញ ដែលអ្នកស្រីចាប់ខ្លួនថា អ្នកស្រីបានលេបថ្នាំជាច្រើនគ្រាប់ដើម្បីប៉ុនប៉ងធ្វើអត្តឃាត ពីព្រោះអ្នកស្រីមិនចង់រស់នៅតទៅទៀតទេ ពីព្រោះអ្នកស្រីមិនមានដី និងផ្ទះសម្បែង។ «ខ្ញុំមានតែធ្វើអត្តឃាតនៅនឹងកន្លែងហ្នឹងដើម្បីបង្ហាញថា ខ្ញុំទល់ច្រក។ ខ្ញុំមិនដឹងរកអស់លោកណាឲ្យដោះស្រាយឲ្យពួកខ្ញុំនោះទេ។ អីញ្ចឹងពួកខ្ញុំមានតែបញ្ចប់ជីវិតបន្តបន្ទាប់ទៅ។ មិនមែនតែអាអូនមួយ ដែលលោតទឹកសម្លាប់ខ្លួននោះទេ មានប្រជាជនទាំងអស់ទៀត ជាស្រ្តីៗដែលគាត់ធ្វើឃាតហ្នឹង ដោយសារដី១២,៤៤មិនបានរស់នៅ»។ លោកអំ សំអាត មន្ត្រីផ្នែកស៊ើបអង្កេតរបស់អង្គការលីកាដូ បាននិយាយថា អាជ្ញាធរមិនត្រូវប្រើអំពើហិង្សាដាក់ប្រជាពលរដ្ឋទេ។ វាគួរតែមានដំណោះស្រាយណាមួយដោយសន្តិវិធី។ «អាជ្ញាធរហ្នឹង គាត់ត្រូវរកវិធីដោះស្រាយយ៉ាងណា ដើម្បីបញ្ចៀស ពីព្រោះគោលបំណងនៃអនុក្រឹត្យនេះគឺចង់បញ្ចប់នូវបញ្ហាហិង្សា ការបង្កបញ្ហាវិវាទដីធ្លីក្នុងតំបន់បឹងកក់ដែលកើតឡើង»។ លោកហូ វ៉ាន់ តំណាងរាស្ត្រគណបក្សសម រង្ស៊ីបានថ្លែងប្រាប់ប្រជាពលរដ្ឋ នៅតំបន់បឹងកក់ថា អាជ្ញាធរគួរតែដោះលែងប្រជាពលរដ្ឋទាំងបួននាក់មកវិញ ដើម្បីជៀសវាងការប៉ះទង្គិះគ្នាទៅថ្ងៃក្រោយ។ «បងប្អូនអាជ្ញាធរអញ្ជើញមកទីនេះហើយ កុំឲ្យប្រើអំពើហិង្សា កុំវាយបងប្អូនប្រជាពលរដ្ឋ ហើយកុំចាប់គាត់យកទៅដាក់ឃុំ ហើយអ្នកដែលចាប់បីនាក់ហ្នឹង ពួកអ្នកហ្នឹងសុំឲ្យដោះលែងជាបន្ទាន់»។ វីអូអេបានព្យាយាមសុំអត្ថាធិប្បាយពីមន្ត្រីសាលាក្រុងភ្នំពេញ ក្រុមហ៊ុនស៊ូកាកូអ៊ីន និងលោកឧត្តមសេនីយ៍ទូច ណារ៉ុថ ស្នងការប៉ូលិសរាជធានីភ្នំពេញ តែមិនអាចសុំទំនាក់ទំនងបានទេនៅថ្ងៃច័ន្ទនេះ ក៏ប៉ុន្តែមន្រ្តីប៉ូលិសមួយរូបបាននិយាយថា ការវាយបំបែបហ្វូងប្រជាពលរដ្ឋនៅតំបន់បឹងកក់នេះគឺដើម្បីរក្សាសណ្តាប់ធ្នាប់ និងដើម្បីសម្រួលដល់ការធ្វើចរាចរណ៍តែប៉ុណ្ណោះ៕ This posting includes an audio/video/photo media file: Download Now |
| ពលរដ្ឋទាក់ទងនឹងជម្លោះដីធ្លីនៅបឹងកក់លោតទឹកសម្លាប់ខ្លួន Posted: 28 Nov 2011 12:46 PM PST អ្នកស្រីជា តារា ស្រ្តីវ័យ៣៣ឆ្នាំ ដែលជោគជាំក្នុងជម្លោះដីធ្លីក្នុងសហគមន៍បឹងកក់ បានសម្រេចចិត្តលោតទឹកសម្លាប់ខ្លួនពីលើស្ពានជ្រោយចង្វាកាលពីយប់ថ្ងៃអង្គារទី២២ ខែវិច្ឆិកា។ ប៉ុន្ដែមូលហេតុនៃការលោតទឹកសម្លាប់ខ្លួននេះស្ថិតក្នុងភាពចម្រូងចម្រាស់ជាខ្លាំង។ ជា តារាគឺជាអ្នកតវ៉ាក្នុងទំនាស់ដីបឹងកក់យ៉ាងស្វិតស្វាញម្នាក់អស់រយៈពេលជិតប្រាំឆ្នាំមកហើយ ប៉ុន្ដែនៅទីបំផុត គាត់មិនទទួលបានចំណែកដីណាមួយក្រោយពីការបណ្ដេញចេញនោះទេ។ ការស្លាប់របស់គាត់បានធ្វើឲ្យជនរងគ្រោះក្នុងទំនាស់ដីធ្លីនៅទីនេះកើនដល់ចំនួនពីរនាក់ហើយ ខណៈដែលទំនាស់ដីមិនទាន់ដោះស្រាយបានជ្រះស្រឡះនោះ។ លោកឌឿង ភូ អាយុ៥៣ឆ្នាំ ជាប្ដីរបស់ស្ដី្ររងគ្រោះ បានឲ្យដឹងថា រឿងហេតុបានកើតឡើងប៉ុន្មាននាទីតែប៉ុណ្ណោះ បន្ទាប់ពីគាត់និងប្រពន្ធរបស់គាត់បានទៅលេងផ្ទះបងប្អូនក្នុងសង្កាត់ទួលសង្កែ ខ័ណ្ឌដូនពេញ ដែលនៅមិនឆ្ងាយប៉ុន្មានពីផ្ទះរបស់គាត់ក្នុងសហគមន៍បឹងកក់។ នៅពេលដែលពួកគាត់បានត្រឡប់មកផ្ទះវិញ ភរិយារបស់គាត់បានត្រឡប់ចេញទៅក្រៅផ្ទះវិញដោយមិនប្រាប់ពីមូលហេតុ។ ប៉ុន្ដែបន្តិចក្រោយមកប្រពន្ធរបស់គាត់បានទូរសព្ទ័មកថា គាត់នឹងលោតទឹកសម្លាប់ខ្លួន។ នោះគឺជារឿងគួរឲ្យភ្ញាក់ផ្អើល ហើយនិងពិបាកជឿសម្រាប់រូបលោក។ «ពេលគាត់រៀបលោតនោះ គាត់ថា «ពិបាក មិនចូលផ្ទះ» ទីពីរគាត់ថា «ចេះតែទៅសាលាក្រុង ចេះតែតវ៉ារឿងដីធ្លីនេះ តវ៉ាមិនទាន់បាន តវ៉ាអត់បានទេ»។ ខ្ញុំថា «អូនឯងកុំទៅរវល់ រឿងតវ៉ាមិន តវ៉ានោះ។ ឥឡូវអូនឯងចុះមកសិនមក»។ និយាយប៉ុណ្ណោះគាត់ឈប់តែម្តង។ ខ្ញុំក៏មិនជឿថា ប្រពន្ធខ្ញុំទៅលោតទឹកណាអញ្ចឹង។ បើដឹងថា មានឈ្លោះគ្នា មានអីអញ្ចឹង ខ្ញុំហៅអ្នកជិតខាងទៅជួយហើយ។ មុនប៉ុន្មានថ្ងៃ គាត់ចេះតែថា «តូចចិត្តណាស់ៗ មិនចង់ចូលផ្ទះ»។ ខ្ញុំចេះតែសួរថា «មូលហេតុអ្វី?» ហើយប្រពន្ធខ្ញុំមិនប្រាប់ទេ។ គាត់ថា «មូលមិនចង់ចូលផ្ទះ ចូលមកស្មុគស្មាញណាស់ អត់ចង់ចូល ចង់តែស្លាប់»។ វាមិនដឹងមូលហេតុដូចម្តេចបានជាទៅលោតទឹកសម្លាប់ខ្លួន»។ លោកភូគឺជាកម្មករសំណង់។ គាត់និងប្រពន្ធរបស់គាត់រស់នៅជាមួយគ្នាអស់រយៈពេលជាង១៣ឆ្នាំហើយ។ ប្រពន្ធរបស់គាត់បានបន្សល់ទុកកូនពីរនាក់ គឺប្រុសមួយអាយុប្រាំមួយឆ្នាំ ស្រីមួយអាយុប្រាំបួនឆ្នាំ។ សពរបស់អ្នកស្រីជា តារា ទើបតែបានរកឃើញ នៅម្តុំវត្តកោះប្រាក់ ស្រុកកៀនស្វាយ ខេត្តកណ្តាល កាលពីរសៀលថ្ងៃសៅរ៍នេះ។ កាលពីឆ្នាំ២០០៧ រដ្ឋាភិបាលបានសម្រេចដាក់ដីទំហំជាង១៣៣ហិចតាស្ថិតក្រោមការវិនិយោគសម្រាប់រយៈពេល៩៩ឆ្នាំរបស់ក្រុមហ៊ុនស៊ូកាគូអ៊ីនរបស់លោកឧកញ៉ាឡាវ ម៉េងឃីន សមាជិកព្រឹទ្ធសភារបស់គណបក្សប្រជាជនកម្ពុជា។ អ្នកភូមិបឹងកក់ជាង៤០០០គ្រួសារទទួលរងការបណ្ដេញចេញ។ ប៉ុន្ដែអ្នកដែលនៅប្រឹងប្រែងតស៊ូតវ៉ាជិត១០០០គ្រួសារបានទទួលការសម្រេចប្រគល់ចំណែកដីពីរដ្ឋាភិបាលទំហំជាង១២ហិចតា បន្ទាប់ពីមានសម្ពាធពីធនាគារពិភពលោក។ ប៉ុន្ដែគ្រួសាររបស់លោកភូ និងប្រពន្ធរបស់គាត់និងប្រជាពលរដ្ឋចំនួន៩៧គ្រួសារ មិនទទួលបានសំណងនេះទេ។ បើទោះជាប្រពន្ធរបស់គាត់ស្ថិតនៅក្នុងចំណោម អ្នកតវ៉ាចុងក្រោយគេក៏ដោយ។ មូលហេតុដោយសារផ្ទះរបស់ពួកគាត់ពុំស្ថិតនៅក្នុងតំបន់ដែលត្រូវបែងចែកចំណែកដី។ នៅពេលដែលVOA សំឡេងសហរដ្ឋអាមេរិកកំពុងធ្វើការសម្ភាស៍ជាមួយលោក ឌឿង ភូ អ្នកជិតខាងម្នាក់បានដើរចូលទៅផ្ទះបាយរបស់ជា តារា ដើម្បីសុំខ្ចីស្ករ ក៏ស្រាប់តែប្រទះឃើញគ្រាប់ស្លែង ដែលនៅទាំងមូលប្រមាណជា២០គ្រាប់ និងមានគ្រាប់ស្លែងជាង១០គ្រាប់ទៀតបានកាត់ជាបំណែកតូចៗ រួចជាស្រេចហើយ។ នៅពេលនោះគ្មានអ្នកណាម្នាក់នៅក្នុងផ្ទះបានដឹងអំពីរឿងនេះនោះទេ។ យ៉ាងណាក៏ដោយ លោក ឌឿង ភូនៅតែមិនអាចសន្មត់ពីមូលហេតុនៃការស្លាប់របស់ប្រពន្ធគាត់នោះទេ។ អ្នកស្រីខែក ចាន់រស្មី ជាអ្នកតំណាងឱ្យប្រជាពលរដ្ឋរស់នៅតំបន់បឹងកក់ភូមិ២១នេះ។ គាត់បានឱ្យដឹងថា ជា តារាគឺជាស្រ្តីម្នាក់បានធ្វើការតស៊ូតវ៉ាយ៉ាងស្វិតស្វាញនៅក្នុងជម្លោះដីធ្លីជាមួយក្រុមហ៊ុន អស់រយៈពេលជិត៥ឆ្នាំមកហើយរហូតដល់គាត់ត្រូវអាជ្ញាធរចាប់ឃុំឃាំងអស់រយៈពេលមួយយប់ទៀតផង។ អ្នកស្រីបានឱ្យដឹងបន្តថា ជនរងគ្រោះតែងតែត្អូញត្អែរជាញឹកញាប់ថា គាត់ពិបាកចិត្តថា ថ្ងៃណាមួយគាត់ប្រាកដជាត្រូវគេដេញចេញពីទីនេះ។ អ្នកស្រីទេព វណ្ណី តំណាងប្រជាពលរដ្ឋរស់នៅតំបន់បឹងកក់ភូមិ២២ម្នាក់ទៀត បានឱ្យដឹងថា នៅអំឡុងពេលតវ៉ានោះ ពួកគាត់មានការពិបាកចិត្តជាខ្លាំងរហូតនៅពេលខ្លះ មានបំណងចង់ធ្វើអត្តឃាតម្តងៗដែរ។ ជាមួយគ្នានេះអ្នកស្រីជា ថាវីត្រូវជាបងស្រីបង្កើតរបស់ជា តារា ដែលរស់នៅផ្ទះជាមួយគ្នា។ គាត់បានឱ្យដឹងថា ប្តីប្រពន្ធរបស់ប្អូនស្រីគាត់ស្រឡាញ់គ្នាណាស់ ហើយមិនងាយមានទំនាស់ជាមួយគ្នានោះទេ។ ហើយថ្ងៃកើតហេតុក៏មិនឃើញមានទំនាស់អ្វីនោះដែរ។ «ក្នុងក្រុមគ្រួសារមិនដែរឃើញមានឈ្លោះគ្នាបញ្ហាអ្វីធំដុំទេ មានបញ្ហាជាងគេគឺវា តវ៉ា តអីរឿងដីធ្លីនេះណា។ គេបានគ្រប់គ្នាវាអត់។ ខ្ញុំចាប់អារម្មណ៍ជាងគេគឺរឿងនេះ។ វាដើរសួរគេរហូតប៉ុន្មានថ្ងៃនេះ។ ចេះតែឆ្ងល់ ហេតុអ្វីគេកាត់ចេញអញ្ចឹង? ម្តេចបានគេអត់ឱ្យប្លង់កម្មសិទ្ធិ? ដល់អញ្ចឹងវាចេះតែតវ៉ា ឡើងសួរឯគេលិច ឯកើតៗ។ អញ្ចឹងមកវិញវាចេះតែអង្គុយមុខជូរ មុខអីអញ្ចឹង។ ប៉ុន្តែវាមិនដែរពិបាកចិត្តយូរទេ ដល់ម្តងនេះ វាមានបញ្ហាអីញ្ចឹង»។ ក៏ប៉ុន្តែទោះបីជាយ៉ាងណាក៏ដោយ មន្ដ្រីប៉ូលិសយាមស្ពានជ្រោយចង្វាម្នាក់ បានអះអាងផ្ទុយពីនេះទៅវិញ។ មន្ដ្រីប៉ូលិសដដែលដែលថ្លែងក្នុងលក្ខខណ្ឌសុំមិនបញ្ចេញឈ្មោះ បានឱ្យដឹងថា នៅថ្ងៃកើតហេតុ ម៉ោងប្រហែលជាជិត៩យប់ គាត់បានឃើញស្រី្តរងគ្រោះដើរឡើងស្ពានបណ្តើរយំបណ្តើរដោយប្តីរបស់គាត់ជិះម៉ូតូតិចៗពីក្រោយ។ «ឃើញគាត់ដើរមកពីលិចពីរនាក់ប្តីប្រពន្ធ។ ហើយមកដល់នេះគាត់ជជែកគ្នាតិចតូច ហើយប្តីក៏យកទូរស័ព្ទឱ្យប្រពន្ធនិយាយ។ និយាយហើយ ប្រពន្ធក៏បោះទូរស័ព្ទឱ្យប្តី ហើយប្រពន្ធក៏លោតទៅ។ ហើយក៏ប្តីស្រែកឱ្យខាងកម្លាំងខ្ញុំពីរនាក់ នៅអង្គុយយាមនៅទីនេះទៅជួយ ជួយអត់ទាន់ ទាន់អីបើគាត់លោតយូរជើងស្តោកហើយមាឌគាត់ធំ។ ខ្ញុំជួយម្តេចរូច ពីព្រោះ ខ្ញុំដើរពីនេះទៅណោះ វាឆ្ងាយដែរ ដីពីនេះ ទៅជាង១០ម៉ែត្រ ហើយមិនមែនស្រឡះអញ្ចឹងណាឡានឡើងស្ទះកក ទៅមកៗ"។ ក្រុមអង្គការក្រៅរដ្ឋាភិបាលបានចាប់ផ្ដើមធ្វើការស៊ើបអង្កេតលើគ្រោះថ្នាក់ដ៏សោកសៅនេះ។ លោកសៀ ភារម្យ នាយកលេខាធិការដ្ឋានក្រុមការងារពិសេសសិទ្ធិលំនៅដ្ឋាន នៅតែមានជំនឿថា ការសម្រេចចិត្តលោតទឹកបែបនេះ បញ្ហាចម្បងគឺការទទួលបរាជ័យនៅក្នុងការតវ៉ាទំនាស់ដីធ្លីរបស់គាត់ ដែលជាវិបត្តិផ្លូវចិត្តមួយដ៏ធ្ងន់ធ្ងរ។ «បើតាមអ្វីដែលយើងឃ្លាំងមើល យើងគិតថា ចេញពីបញ្ហាទំនាស់ដីធ្លីនេះ ពីព្រោះអានេះ វាធ្វើឱ្យមនុស្សយើងស្មុគស្មាញគំនិតគឺថា បាក់ទឹកចិត្ត រស់នៅដោយអស់សង្ឈឹម។ វាជាចលករមួយដែលធ្វើឱ្យគាត់គិតច្រើន។ ហើយកាលណាបើគាត់មានប៉ះរឿងអ្វីណាមួយទៀត វាធ្វើឱ្យការមួរម៉ៅ ការដែលធុញថប់ក្នុងជីវិតរបស់គាត់នេះ វាកាន់តែពុះកញ្ច្រោលខ្លាំងឡើងថែមទៀត។ អញ្ចឹងមូលហេតុដំបូង ចំបងគឺចេញពីបញ្ហាដីធ្លី»។ ស្របគ្នានេះដែរ លោកចាន់ សាវ៉េត ប្រធានផ្នែកស៊ើបអង្កេតការរំលោភសិទ្ធិមនុស្សនៃសមាគមអាដហុក បានឱ្យដឹងដែរថា ការសន្និដ្ឋានជំហានដំបូងបង្ហាញថា ការស្លាប់របស់អ្នកស្រីជា តារាបណ្តាលមកពីបញ្ហាទំនាស់ដីធ្លី។ «វាមានហេតុផលច្រើនយ៉ាងជាមួយប្រជាពលរដ្ឋម្នាក់ដែលគាត់អាចសម្រេចចិត្តធ្វើបែបនេះ បានដោយសារចំណុចសំខាន់នៅក្នុងទំនាស់ ដែលកើតមាននៅក្នុងភូមិឃុំរបស់គាត់ ជាពិសេសគ្រួសារគាត់ផ្ទាល់។ គាត់ទទួលរងសម្ពាធនោះវាធ្ងន់ធ្ងរពេក។ ការបាត់បង់តាំងពីការរកស៊ី បាត់បង់តាំងពីកូនរៀនសូត្រ បាត់បង់តាំងពីចំណូលប្រចាំថ្ងៃ អញ្ចឹងគ្រួសារមួយគឺអាចមានបញ្ហាកើតឡើង។ ហើយបើសិនជាគ្រួសារនោះ គាត់មិនបានគិតគូរឱ្យបានស៊ីជម្រៅ និងមិនមានភាពអត់ធន់ទេ គាត់អាចមានបញ្ហានៅក្នុងគ្រួសារមែន»។ លោកឆាយ ធីរិទ្ធ ចៅសង្កាត់ស្រះចក បានបញ្ជាក់ថា មុនពេលលោតទឹកសម្លាប់ខ្លូន ជា តារាបានផឹកស្រវឹងជាខ្លាំងនៅផ្ទះបងប្អូន ដែលជាហេតុធ្វើឱ្យមានភាពវង្វេងវង្វាន់រហូតដល់ថ្នាក់ទៅលោតទឹកបែបនេះ។ «គាត់ឈ្លោះប្តីប្រពន្ធគាត់។ គាត់ស្រវឹងស្រា គាត់ទៅបង់កេ (ជប់លឿង) ផ្ទះប្អូនគាត់។ គាត់ហូបស្រាច្រើនពេក។ គាត់វង្វេងវង្វាន់អស់ហើយ ហើយដល់នេះទៅបាត់បង់ស្មារតី»។ ក្នុងសប្តាហ៍នេះ អង្គការAmnesty International បានបញ្ចាំងខែ្សវីដេអូមួយបង្ហាញ ពីផលវិបាកមួយចំនួន ដែលស្រ្តីភាគច្រើននៅតំបន់បឹងកក់បានជាប់រវល់អស់រយៈពេលជាច្រើនឆ្នាំ ក្នុងការតវ៉ារកដំណោះស្រាយក្នុងទំនាស់ដីធ្លីនៅតំបន់របស់ពួកគាត់។ ស្រ្តីទាំងនោះបានទទួលរងផលប៉ះពាល់ជាខ្លាំង ដូចជាធ្វើឱ្យស្រ្តីទាំងនោះ បាត់បង់ឱកាសមើលថែកូន បាត់បង់ការរកចំណូល បាត់បង់ការងារ និងប៉ះពាល់ជាខ្លាំងដល់សុខភាពផ្លូវចិត្តជាដើម។ គួរបញ្ជាក់ដែរថា កាលពីខែឧសភាឆ្នាំ២០១១នេះ មានបុរសម្នាក់រស់នៅតំបន់បឹងកក់នេះ ក៏បានលោតទឹកចូលទៅក្នុងបឹងកក់សម្លាប់ខ្លួនដែរ ដោយត្រូវបានគេសនិ្នដ្ឋានថា បណ្តាលមកពីគាត់ឈឺចាប់ក្នុងការទទួលរងភាពអយុតិ្តធម៌ក្នុងដំណោះស្រាយជំល្លោះដីធ្លីនេះ៕ This posting includes an audio/video/photo media file: Download Now |
| ជនរងគ្រោះខ្មែរក្រហមក្នុងខេត្តសៀមរាបទន្ទឹងយុត្តិធម៌ Posted: 28 Nov 2011 12:14 PM PST ជនរងគ្រោះក្នុងរបបខ្មែរក្រហមនៅខេត្តសៀមរាបរំពឹងរង់ចាំយុត្តិធម៌ពិតរយៈពេលជាង៣០ឆ្នាំហើយ តែមិនទាន់បានដឹងការពិតអំពីការកាប់សម្លាប់ដ៏រង្គាលនាសម័យនោះនៅឡើយទេ។ យុត្តិធម៌ក៏នៅមិនទាន់ត្រូវបានគេផ្តល់ឱ្យនៅឡើយ សម្រាប់អ្នកដែលបានបាត់បង់សមាជិកគ្រួសារ និងការឈឺចាប់ផ្ទាល់ខ្លួន។ ប៉ុន្តែឥឡូវនេះអ្វីដែលជាការរង់ចាំ និងចង់ឃើញគឺកំពុងតែលេចចេញជារូបរាងបន្តិចម្តងៗ ហើយសម្រាប់ពួកគេ។ សាលាក្តីកាត់ទោសមេដឹកនាំខ្មែរក្រហមបានចាប់ផ្តើមដំណើរការសវនាការលើសំណុំរឿង០០២ កាលពីថ្ងៃច័ន្ទ ទី២១ ខែវិច្ឆិកានេះ។ មានមេដឹកនាំជាន់ខ្ពស់បីរូបត្រូវបានតុលាការយកមកកាត់ទោស គឺ នួន ជា អតីតបងធំទីពីរ ខៀវ សំផន អតីតប្រមុខរដ្ឋ និងអៀង សារី អតីតរដ្ឋមន្ត្រីការបរទេស ដែលអ្នកទាំងនេះកំពុងជាប់ចោទពីបទឧក្រិដ្ឋជាច្រើន ដែលបានកើតឡើងក្នុងរបបរបស់ពួកគេ ដូចជាឧក្រិដ្ឋកម្មប្រឆាំងមនុស្សជាតិ ឧក្រិដ្ឋកម្មប្រល័យពូជសាសន៍ និងឧក្រិដ្ឋកម្មសង្គ្រាមជាដើម ដែលធ្វើឱ្យពលរដ្ឋជិត២លាននាក់ស្លាប់។ ជនរងគ្រោះជាច្រើនកំពុងតែតាមដានយ៉ាងយកចិត្តទុកដាក់អំពីការជំនុំជម្រះនេះដើម្បីបានដឹងអំពីការពិត និងជោគវាសនារបស់មេដឹកនាំ ដែលគេគិតថា ជាអ្នកទទួលខុសត្រូវខ្ពស់បំផុតនៅក្នុងរបបនោះ។ ពួកគេបានឱ្យដឹងថា អ្វីដែលពួកគេចង់បានគឺយុត្តិធម៌ពិត ប្រាកដ និងសន្តិភាពផ្លូវចិត្ត ផ្លូវអារម្មណ៍។ អ្នកស្រីគីប៉ាវ អាយុ៤២ឆ្នាំ កំពុងរស់នៅក្នុងខេត្តសៀមរាបគឺជាជនរងគ្រោះម្នាក់។ អ្នកស្រីបាននិយាយថា អ្នកស្រីពិតជាចង់ដឹងថា ហេតុអ្វីបានជារបបនោះសម្លាប់មនុស្ស។ អ្នកស្រីគី ប៉ាវមានដើមកំណើតនៅឃុំស្យា ស្រុកកណ្តៀង ខេត្តពោធិសាត់ ជាទីដែលឪពុកម្តាយរបស់អ្នកស្រីត្រូវពួកខ្មែរក្រហមសម្លាប់ បន្សល់ទុកឱ្យអ្នកស្រីក្លាយទៅជាក្មេងកំព្រានៅអាយុត្រឹមតែ៧ឆ្នាំប៉ុណ្ណោះ។ អ្នកស្រីគី ប៉ាវ បានស្រក់ទឹកភ្នែក ពេលរំឭកដល់មរណភាពរបស់ឪពុកម្តាយគាត់ ដោយគាត់បានថ្លែងថា៖«នឹកឃើញអត់ភ្លេចទេ ចងចាំតែរហូតហ្នឹង។ ពេលនឹកឃើញដល់ម៉ែ ដល់ប៉ាខ្ញុំ គឺខ្ញុំក្តៅណាស់ អត់ត្រជាក់ទេ ព្រោះអី ខ្ញុំ មួយជីវិតនេះ ខ្ញុំកំសត់។ ខ្ញុំមិនដែលមានម៉ែឪហៅទេ។ ចង់ឱ្យគេរកយុត្តិធម៌ឱ្យគាត់ថា ហេតុម៉េចបានគេយកមនុស្សស្លូតត្រង់ទៅសម្លាប់ធ្វើបាប គ្មានត្រាប្រណីដូចសត្វធាតុ»។ អ្នកស្រីគី ប៉ាវបានរំឭកថា កាលនោះឪពុកម្តាយរបស់អ្នកស្រីត្រូវបានពួកខ្មែរក្រហមចោទប្រកាន់ថា ជាពួកនាយទុន សក្តិភូមិ មុនពេលត្រូវគេសម្លាប់។ អ្នកស្រីបានបញ្ជាក់ថា អ្នកស្រីបានជួបមុខឪពុកម្តាយតែពីរដងប៉ុណ្ណោះ ចាប់តាំងពីការចាប់ខ្លួនគាត់ទៅ។ «ម៉ាក់ខ្ញុំយកខ្ញុំទៅលេងគាត់។ គេដាក់ច្រវ៉ាក់ដៃជើង ច្រវ៉ាក់ធំ ដូចដាក់ដំរី។ ខ្ញុំយំ នៅពេលឃើញគាត់។ ជួបគាត់ពីរដងគត់។ រួចគេប្រាប់ថា ពួកគាត់គេយកទៅសម្លាប់ហើយ»។ អ្នកស្រីគី ប៉ាវ ដែលជាដើមបណ្តឹងរដ្ឋប្បវេណីមួយរូបផងនោះ កំពុងតែតាមដានដំណើរការសវនាការនេះ ដោយមានក្តីសង្ឃឹមថា អ្នកស្រីអាចទទួលបានយុត្តិធម៌ ដែលអ្នកស្រីទន្ទឹងរង់ចាំអស់ពេលជាយូរមកហើយនោះ។ លោកសំ សែនជាជនរងគ្រោះម្នាក់ទៀត រស់នៅក្នុងខេត្តសៀមរាប ហើយក៏ជាដើមបណ្តឹងរដ្ឋប្បវេណីមួយរូបដែរ។ លោកបានបាត់បង់ឪពុកម្តាយនិងសាច់ញាតិសរុបប្រមាណ២០នាក់ ដោយសាររបបកម្ពុជាប្រជាធិបតេយ្យ។ លោកបានថ្លែងថា អ្វីដែលលោកចង់បានគឺចង់ឱ្យសាលាក្តីហ្នឹងផ្តល់នូវយុត្តិធម៌ពិតប្រាកដជូនអ្នកស្លាប់ និងជនរងគ្រោះដែលនៅរស់។ «តាមពិតទៅគឺយើងគ្រាន់តែចង់ឱ្យសាលាក្តីហ្នឹងផ្តល់យុត្តិធម៌ពិតប្រាកដ ជូនអ្នកដែលស្លាប់ទៅ និងជនរងគ្រោះ ដែលរស់នៅ។ ប៉ុន្តែអ្វីដែលខ្ញុំមើលឃើញគឺដំណើរការ ដូចជាមានសង្ឃឹមតិចណាស់ថា នឹងបានយុត្តិធម៌ព្រោះអីតុលាការមានការជ្រៀតជ្រែក។ អញ្ចឹងពាក្យថា ស្វែងរកយុត្តិធម៌ជូនជនរងគ្រោះ គ្រាន់តែជាពាក្យលួងលោមបោកបញ្ឆោតហ្នឹង។ «បើគិតឱ្យដល់ទៅពាក្យថា ស្វែងរកយុត្តិធម៌ មិនមែនយុត្តិធម៌មានកម្រិតទេ ហើយអ្វីដែលខ្ញុំចាប់អារម្មណ៍ជាងគេគឺអ្នកដែលពាក់ព័ន្ធរបប៣ឆ្នាំ៨ខែ២០ថ្ងៃ គឺមិនមែនតែខ្មែរទេ គឺមានទាំងបរទេស។ បើយើងចង់ស្វែងរកយុត្តិធម៌ទាល់តែយើងកាត់ទោសអ្នកពាក់ព័ន្ធដែរ»។ ទាក់ទងទៅនឹងបណ្តឹងរដ្ឋប្បវេណី លោកបានបញ្ជាក់ថា សំណងនោះវាមិនសំខាន់មែនទែនទេសម្រាប់លោក តែជាយុត្តិធម៌ពិតប្រាកដ និងសន្តិភាពផ្លូវចិត្ត យុត្តិធម៌ ដែលអាចទទួលយកបានក្នុងអារម្មណ៍ និងក្នុងចិត្ត។ ចំណែកលោកកែវ សម្បត្តិ ជាអ្នករស់នៅក្នុងខេត្តសៀមរាបមួយរូបទៀត បានថ្លែងថា ជានិច្ចកាលលោកបានតាមដានដំណើរការកាត់ទោសនេះ ព្រោះលោកចង់ដឹងអំពីជោគវាសនារបស់មេដឹកនាំទាំងអស់នោះដែរ។ លោកបានបន្ថែមយ៉ាងដូច្នេះថា៖«ខ្ញុំមើលព្រោះចង់ដឹងថា តើទោសកំហុសរបស់គាត់ ដែលមានពីមុនមកហ្នឹង មានលើប្រជាជនទូទាំងប្រទេសយើងហ្នឹង តើវាសមល្មមកំហុសរបស់គាត់ដែរឬទេ?» លោកកែវ សម្បត្តិបានបាត់បង់បងថ្លៃម្នាក់កាលសម័យនោះ។ គួរបញ្ជាក់ថា ការជំនុំជម្រះលើសំណុំរឿង០០២ ដែលបានដំណើរការប៉ុន្មាន ថ្ងៃ នៅដើមសប្តាហ៍នេះគឺត្រូវបានផ្អាករហូតដល់ថ្ងៃទី៥ ខែធ្នូ ទើបតុលាការនេះបន្តដំណើរការកាត់ទោសរបស់ខ្លួនទៀត៕ This posting includes an audio/video/photo media file: Download Now |
| អតីតឯកអគ្គរដ្ឋទូតខ្មែរម្នាក់មិនចូលខ្លួនតាមដីការបស់សាលាក្រុងទេ Posted: 28 Nov 2011 11:47 AM PST លោកណាន់ ស៊ី អតីតឯកអគ្គរដ្ឋទូតប្រទេសកម្ពុជាប្រចាំប្រទេសប្រ៊ុយណេ បានមានប្រសាសន៍ នៅថ្ងៃអាទិត្យនេះថា លោកនឹងមិនប្រគល់ខ្លួនតាមដីកាស្វែងរកការចាប់ខ្លួនលោក ចេញដោយតុលាការក្រុងភ្នំពេញទេ ហើយលោកបានមានប្រសាសន៍ថា នឹងស្វែងរកយុត្តិធម៌ចំពោះរឿងក្តីនេះ។ «ខ្ញុំមិនប្រគល់ខ្លួនទេ។ ខ្ញុំចេញមុខដើម្បីតតាំងរកយុត្តិធម៌។ បើរកឃើញថា ខ្ញុំមានកំហុស អាហ្នឹង ខ្ញុំនឹងទទួលទោសទៅតាមសុឆន្ទៈនៃច្បាប់របស់ជាតិ»។ តុលាការក្រុងភ្នំពេញ កាលពីថ្ងៃសុក្រ បានប្រកាសសាលក្រមកំបាំងមុខសម្រេចកាត់ទោសឲ្យលោកណាន់ ស៊ីជាប់ពន្ធនាគាររយៈពេលបួនឆ្នាំ និងចេញដីកាបង្គាប់ឲ្យចាប់ខ្លួន បន្ទាប់ពីតុលាការបានរកឃើញថា លោកណាន់ ស៊ីមានកំហុសជាប់ពាក់ព័ន្ធនឹងការកេងបំបាត់ថវិការបស់ក្រសួងការបរទេសក្នុងការសាងសង់ស្ថានទូតកម្ពុជាប្រចាំប្រទេសប្រ៊ុយណេ មានទឹកប្រាក់ចំនួនជាង៤៣ម៉ឺនដុល្លារសហរដ្ឋអាមេរិក។ លោកណាន់ ស៊ី បានមានប្រសាសន៍ប្រាប់វីអូអេសម្លេងសហរដ្ឋអាមេរិកតាមរយៈទូរស័ព្ទថា ការសម្រេចរបស់តុលាការគឺជារឿងអយុត្តិធម៌ ដែលលោកមិនអាចទទួលយកបាន ហើយលោកនឹងប្តឹងឧទ្ធរណ៍ចំពោះការប្រកាសសាលក្រមរបស់តុលាការក្រុងភ្នំពេញ។ «ការកាត់ក្តីកំបាំងមុខខ្ញុំ មិនអាចឲ្យខ្ញុំចូលដល់នគរ។ នេះគឺជាចេទនាមួយដែលជាប្រការមួយ ដែលកើតឡើងពីគំនិត និងការចងអាឃាតនិងមានបំណងមិនល្អដល់រូបខ្ញុំ»។ លោកគី តិច មេធាវីការពារក្តីរបស់ក្រសួងការបរទេស មិនបានលើកឡើងអំពីនីតិវីធិបន្តរបស់តុលាការទេ ដោយលោកគ្រាន់តែបានបញ្ជាក់ថា តាមផ្លូវច្បាប់អាជ្ញាធរចាប់ផ្តើមអនុវត្តការងាររបស់ខ្លួន បន្ទាប់ពីតុលាការបានចេញដីកាបង្គាប់ឲ្យចាប់ខ្លួនលោកណាន់ ស៊ី។ «អាហ្នឹងខ្ញុំមិនទាន់ហ៊ានសម្រេចទេបង ពីព្រោះនេះជានីតិវិធី»។ វីអូអេព្យាយាមទាក់ទងមន្ត្រីក្រសួងការបរទេសសំខាន់ៗ ដែលរួមបញ្ចូលទាំងលោកគុយ គួង អ្នកនាំពាក្យក្រសួងការបរទេសផងដែរ តែមិនអាចធ្វើទំនាក់ទំនងបាននៅថ្ងៃអាទិត្យនេះ។ ក្រសួងការបរទេសបានប្តឹងលោកណាន់ ស៊ីចំនួនពីរករណីគឺករណីព្រហ្មទណ្ឌ និងសំណងរដ្ឋប្បវេណី ពាក់ព័ន្ធនឹងការធ្វើឲ្យបាត់បង់ថវិកាជាតិមានចំនួនទឹកប្រាក់ចំនួន៤៣ម៉ឺនដុល្លារសហរដ្ឋអាមេរិកក្នុងការសាងសង់ស្ថានទូតកម្ពុជាប្រចាំប្រទេសប្រ៊ុយណេ។ លោកណាន់ ស៊ីបានមានប្រសាសន៍ថា លោកមិនបានកេងបំបាត់ថវិការបស់ក្រសួងការបរទេសទេ ហើយលោកបានអំពាវនាវឲ្យអង្គភាពប្រឆាំងអំពើពុករលួយ ដែលដឹកនាំដោយលោកឱម យ៉ិនទៀងទៅពិនិត្យនិងវាយតម្លៃអគារស្ថានទូតកម្ពុជាប្រចាំប្រទេសប្រ៊ុយណេ ថាតើវាសាកសមនឹងតម្លៃនៃការសាងសង់អស់លុយជាងមួយលានដុល្លារសហរដ្ឋអាមេរិកដែរឬទេ។ លោកណាន់ ស៊ីបានធ្វើជាឯកអគ្គរដ្ឋទូតកម្ពុជាប្រចាំប្រទេសប្រ៊ុយណេ តាំងពីឆ្នាំ២០០៦រហូតដល់ឆ្នាំ២០១១ បន្ទាប់ពីលោកនាយករដ្ឋមន្ត្រីហ៊ុន សែនបានបញ្ជាឲ្យលោកទៅធ្វើជាឯកអគ្គរដ្ឋទូតកម្ពុជាប្រចាំប្រទេសនោះ។ ក៏ប៉ុន្តែលោកបានមានប្រសាសន៍ថា លោកនៅតែជាសមាជិកគណបក្សហ៊្វុនស៊ិនប៉ិច។ លោកញឹក ប៊ុនឆៃ ប្រធានប្រតិបត្តិគណបក្សហ៊្វុនស៊ិនប៉ិច បានមានប្រសាសន៍ថា លោកណាន់ ស៊ីបានចាកចេញពីគណបក្សហ៊្វុនស៊ិនប៉ិចតាំងពីឆ្នាំ២០០៦មកម្ល៉េះ៕ This posting includes an audio/video/photo media file: Download Now |
| តុលាការក្រុងភ្នំពេញផ្តទ្ទាទោសអតីតឯកអគ្គរាជទូតកម្ពុជា ប្រចាំប្រទេសប្រ៊ុយណេ Posted: 28 Nov 2011 08:50 AM PST កាលពីថ្ងៃសុក្រ តុលាការក្រុងភ្នំពេញបានសម្រេចផ្តទ្ទាទោសលោកណាន់ស៊ី អតីតឯកអគ្គរាជទូតកម្ពុជា ប្រចាំប្រទេសប្រ៊ុយនេឲ្យជាប់ពន្ធនាគារអស់រយៈពេលបួនឆ្នាំ និងពិន័យជាប្រាក់ចំនួនប្រាំបីលានរៀលគឺស្មើជាងពីរពាន់ដុល្លារសហរដ្ឋអាមេរិក។ លោកណាន់ ស៊ីត្រូវផ្តន្ទាទោសកំបាំងមុខពីបទថា បានកេងបំបាត់ថវិកាជាតិ នេះបើតាមការបញ្ជាក់របស់មេធាវីការពារក្តីរបស់រដ្ឋាភិបាល។ លោកគី ទិច មេធាវីការពារក្តីឲ្យក្រសួងការបរទេស បាននិយាយថា តុលាការក៏បានចេញបង្គាប់ឲ្យចាប់ខ្លួនលោកណាន់ ស៊ីឲ្យមកទទួលទោសតាមផ្លូវច្បាប់ផងដែរ បន្ទាប់ពីតុលាការបានរកឃើញថា លោកមានទោសកំហុស។ លោកណាន់ ស៊ី អតីតឯកអគ្គរាជទូតកម្ពុជាប្រចាំប្រទេសប្រ៊ុយណេត្រូវបានតុលាការក្រុងភ្នំពេញបើកសវនាការកំបាំងមុខកាត់ទោសរូបលោកលើបណ្តឹងព្រហ្មទណ្ឌមួយកាលពីថ្ងៃទី២ ដើមខែវិច្ឆិកានេះ ពីបទថា បានកេងបំបាត់ថវិការបស់ក្រសួងការបរទេសក្នុងការសាងសង់ស្ថានទូតកម្ពុជាប្រចាំប្រទេសប្រ៊ុយនេ ដែលមានចំនួនទឹកប្រាក់ជាង៤៣ម៉ឺនដុល្លារសហរដ្ឋអាមេរិក។ ក្រសួងការបរទេសបានប្តឹងលោកណាន់ស៊ីចំនួនពីរករណីគឺករណីព្រហ្មទណ្ឌ និងករណីសំណងរដ្ឋប្បវេណី ក៏ប៉ុន្តែតុលាការទើបតែបានបើកសវនាការជំនុំជម្រះរឿងករណីព្រហ្មទណ្ឌតែប៉ុណ្ណោះ ចំណែកឯសំណងរដ្ឋប្បវេណី តុលាការពុំទាន់បានកំណត់កាលបរិច្ឆេទបើកសវនាការជំនុំជម្រះនៅឡើយទេ។ នៅក្នុងករណីសំណងរដ្ឋប្បវេណី ក្រសួងការបរទេសបានទាមទារឲ្យលោកណាន់ស៊ីសងប្រាក់ចំនួនជាង៤៣ម៉ឺនដុលា្លរសហរដ្ឋអាមេរិក ដែលបានបាត់បង់ និងសំណងជម្ងឺចិត្តបន្ថែមទៀតចំនួន២០០លានរៀលគឺស្មើនឹងជាងប្រាំម៉ឺនដុល្លារសហរដ្ឋអាមេរិក។ លោកគី ទិច មេធាវីការពារក្តីរបស់ក្រសួងការបរទេស បានហៅសេចក្តីសម្រេចរបស់តុលាការក្រុងភ្នំពេញថា បានផ្តល់យុត្តិធម៌ ហើយលោកអាចទទួលយកបាន។ «ពីព្រោះទីមួយគឺឯកសារភស្តុតាងទាំងអស់បានបញ្ជាក់អំពើកិបកេងរបស់លោកណាន់ ស៊ី ហើយអំពើហ្នឹង វាផ្ទុយទៅនឹងមាត្រាច្បាប់»។ វីអូអេបានព្យាយាមសុំសេចក្តីបំភ្លឺពីលោកកែវ យ៉ាន តែទាក់ទងមិនបាន។ លោកកែវ យ៉ានគឺជាមេធាវីតែងតាំងដោយគណៈមេធាវីឲ្យការពារក្តីលោកណាន់ ស៊ី។ លោកណាន់ ស៊ី អតីតឯកអគ្គរដ្ឋទូតប្រទេសកម្ពុជា ប្រចាំប្រទេសប្រ៊ុយនេធ្លាប់បានផ្តល់បទសម្ភាសន៍ជាមួយនឹងវីអូអេសម្លេងសហរដ្ឋអាមេរិកថា លោកមិនបានកិបកេងថវិកាក្រសួងការបរទេសដូចការចោទប្រកាន់ទេ។ លោកបានមានប្រសាសន៍ថា ការចំណាយប្រាក់ដើម្បីសាងសង់ស្ថានទូតប្រចាំប្រទេសប្រ៊ុយនេ ដែលមានតម្លៃជាង១លានដុល្លារសហរដ្ឋអាមេរិកនេះមានការចំណាយចំនួនប្រាំដំណាក់កាល ហើយរាល់ការចំណាយនីមួយៗ លោកមានវិក័្កយប័ត្រត្រឹមត្រូវ ហើយលោកបានទូទាត់គ្រប់ចំនួនអស់ហើយ។ លោកបានមានប្រសាសន៍ថា លោកមិនមានឈ្មោះនៅក្នុងគណៈកម្មាធិការសាងសង់ស្ថានទូតទេ។ វីអូអេទូរស័ព្ទទៅមន្ត្រីអ្នកនាំពាក្យក្រសួងការបរទេសកម្ពុជា គឺលោកគុយ គួង តែទូរសព្ទរបស់លោកពុំមានអ្នកទទួល៕ This posting includes an audio/video/photo media file: Download Now |
| ព័ត៌មានអន្តរជាតិ៖ ២៨ វិច្ឆិកា Posted: 27 Nov 2011 08:25 PM PST ឥណ្ឌា៖ មន្ត្រីឥណ្ឌានិយាយថាជំនួបមួយរវាងអ្នកការទូតឥណ្ឌានិងចិនត្រូវបានលុបចោល ក្រោយពីរដ្ឋាភិបាលក្រុងប៉េកាំងបានជំទាស់នឹងគម្រោងថ្លែងសុន្ទរកថាមួយក្នុងក្រុងញូដេលីដោយសម្តេចដាទ្បៃទ្បាម៉ា មេដឹកនាំសាសនាទីបេត៍ដែលនិរទេសនៅក្រៅប្រទេស។ អាហ្វហ្គានីស្ថាន៖ ប្រធានាធិបតីអាហ្វហ្គានីស្ថាន ហាមីដ កាហ្សៃ និយាយថាកងកម្លាំងរបស់ប្រទេសជាតិលោកនឹងទទួលបន្ទុកខាងកិច្ចការពារសន្តិសុខក្នុងពេលឆាប់ៗនេះនៅក្នុងជាងពាក់កណ្តាលនៃប្រទេសអាហ្វហ្គានីស្ថានដែលជាការកំណត់ជំហានទីពីរនៃអន្តរកាលដែលនឹងឃើញកងកម្លាំងប្រយុទ្ធរបស់អង្គការអូតង់ចាកចេញពីប្រទេសនេះមិនឱ្យហួសពីឆ្នាំ២០១៤ទេ។ ស៊ីរី៖ សម្ព័ន្ធអារ៉ាប់បានយល់ព្រមដល់ការដាក់ទ័ណ្ឌកម្មមិនធ្លាប់មានពីពេលមុនប្រឆាំងនឹងស៊ីរី ជាការឆ្លើយតបនឹងការបង្ក្រាបដ៏ប្រល័យរបស់រដ្ឋាភិបាលប្រទេសនេះលើការបះបោររបស់ក្រុមប្រឆាំង។ អេហ្ស៊ីប៖ ក្រុមបាតុករដែលទាមទារឱ្យមានការបង្កើតរដ្ឋាភិបាលស៊ីវិលបណ្តោះអាសន្នមួយបានប្រមូលផ្តុំគ្នានៅកណ្តាលក្រុងឡឺគែរ នៅថ្ងៃអាទិត្យ ពេលដែលអ្នកគ្រប់គ្រងយោធាអេហ្ស៊ីបបានព្រមានអំពីផលវិបាក «ធ្ងន់ធ្ងរខ្លាំងណាស់» បើចលាចលនយោបាយនៅពេលសព្វថ្ងៃនេះរបស់ប្រទេសមិនចប់ឆាប់រហ័សទេនោះ។ ប៉ាគីស្ថាន៖ ពួកបាតុករខឹងសំបាររាប់រយនាក់បានប្រមូលផ្តុំគ្នានៅខាងក្រៅស្ថានកុងស៊ុលអាមេរិកាំងក្នុងក្រុងការ៉ាជី នៅថ្ងៃអាទិត្យ ពេលដែលប៉ាគីស្ថានធ្វើបុណ្យសពទាហាន២៤នាក់ដែលបានត្រូវសម្លាប់ នៅថ្ងៃសៅរ៍នៅក្នុងការវាយប្រហារតាមអាកាសដោយអង្គការអូតង់ឆ្លងកាត់ព្រំដែនក្នុងតំបន់ពាយ័ព្យប្រទេស។ រុស្ស៊ី៖ នៅថ្ងៃអាទិត្យនាយករដ្ឋមន្ត្រីរុស្ស៊ី វ្ល៉ាឌីមៀ ពូទីន បានទទួលយកការតែងតាំងរបស់គណបក្សរុស្ស៊ី បង្រួបបង្រួមដែលជាគណបក្សគ្រប់គ្រងប្រទេសឱ្យលោកឈរឈ្មោះជាបេក្ខជនប្រធានាធិបតីសម្រាប់ការបោះឆ្នោតប្រធានាធិបតីនៅថ្ងៃទី៤ខែមីនាខាងមុខនេះ។ យេម៉ែន៖ ប្រភពសន្តិសុខយេម៉ែននិងប្រភពកុលសម្ព័ន្ធនិយាយថាពួកឧទ្ទាម Shi'ite បានវាយប្រហារសាលារៀនអ៊ីស្លាម Sunni មួយនិងកន្លែងឯទៀតៗក្នុងខេត្ត Saada នាប៉ែកខាងជើងប្រទេស បណ្តាលឱ្យមនុស្សយ៉ាងតិចណាស់២១នាក់ស្លាប់និងធ្វើឱ្យមនុស្ស៥០នាក់ទៀតត្រូវរបួស។ This posting includes an audio/video/photo media file: Download Now |
| You are subscribed to email updates from VOA News: ព័ត៌មាន To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
