VOA News: ព័ត៌មាន: “គណបក្សសម រង្ស៊ី និងសិទ្ធិមនុស្សជាប់អន្ទាក់មុនពេលបោះឆ្នោត” plus 4 more |
- គណបក្សសម រង្ស៊ី និងសិទ្ធិមនុស្សជាប់អន្ទាក់មុនពេលបោះឆ្នោត
- ប្រជាពលរដ្ឋកាន់តែច្រើនត្រូវបានចាប់ខ្លួន
- សមកម្មជនគណបក្សសម រង្ស៊ីត្រូវបានសម្លាប់
- សាលាក្តីខ្មែរក្រហមតែងតាំងមន្រ្តីសាធារណៈពីររូប
- រូបថតនៅគុកទួលស្លែងអាចជារូបថតអ្នកទោសពីគុកខ្មែរក្រហមផ្សេងទៀត
| គណបក្សសម រង្ស៊ី និងសិទ្ធិមនុស្សជាប់អន្ទាក់មុនពេលបោះឆ្នោត Posted: 02 Jun 2011 02:54 PM PDT មេដឹកនាំគណបក្សប្រឆាំងដ៏ខ្លាំងពីរក្នុងប្រទេសកម្ពុជាដែលចង់រួបរួមគ្នាដើម្បីតទល់នឹងគណបក្សប្រជាជនដែលកំពុងកាន់អំណាចកំពុងធ្លាក់ចូលអន្ទាក់ផ្លូវច្បាប់ និងការប្រឡាក់កេរ្តិ៍ឈ្មោះអាក្រក់មុនពេលបោះឆ្នោត។ បន្ទាប់ពីមេដឹកនាំគណបក្សសម រង្ស៉ី គឺលោក សម រង្ស៉ីជាប់ទោសពីបទដកបង្គោលព្រំដែនកម្ពុជា វៀតណាម ហើយត្រូវតុលាការកាត់ទោសកំបាំងមុខឲ្យលោកជាប់ពន្ធនាគារចំនួន១២ឆ្នាំមក មេដឹកនាំគណបក្សជំទាស់មួយរូបទៀតគឺលោកកឹម សុខាត្រូវគេធ្វើឲ្យជាប់ក្នុងរឿងពិបាកដោះសា្រយចំពោះអ្នកបោះឆ្នោតដែរគឺការបែកធ្លាយឯកសារ និងខ្សែអាត់សន្ទនាដែលត្រូវបានចោទថាលោកកឹម សុខា ជាមនុស្សដែលលោកនាយករដ្ឋមន្ត្រី ហ៊ុន សែនប្រើប្រាស់ដើម្បីបំបែកសំឡេងអ្នកប្រជាធិបតេយ្យ។ ប៉ុន្តែលោក កឹម សុខាបានបដិសេធការពាក់ព័ន្ធនានា។ គាប់ជួននឹងបរាជ័យក្នុងការបញ្ចូលគ្នារវាងគណបក្ស សម រង្សី និងគណបក្សសិទ្ធិមនុស្ស គណបក្សទាំងពីរនេះបានបង្កើនការវាយប្រហារគ្នា ចោទប្រកាន់គ្នា លាបពណ៌គ្នាទៅវិញទៅមករិតតែខ្លាំងឡើងក្រោយពេលឯកសារ និងខ្សែអាត់សំឡេងនោះត្រូវទម្លាយចេញតាមរយៈប្រព័ន្ធផ្សព្វផ្សាយព័ត៌មានដើមអំពិលរបស់លោក សយ សុភាព។ ចំណែកគណបក្សកាន់អំណាចរបស់លោកនាយករដ្ឋមន្ត្រីហ៊ុន សែនដែលកាន់អំណាចជាង៣០ឆ្នាំនោះវិញ ហាក់ដូចជានៅស្ងៀម ឬបដិសេធការពាក់ព័ន្ធ ហើយចាំទទូលផលពីវិបត្តិរបស់គណបក្សប្រឆាំងទាំងពីរ។ លោក ពុទ្ធា ហង្ស នាយកប្រតិបត្តិនៃអង្គការឃ្លាំមើលការបោះឆ្នោតនៅកម្ពុជាហៅកាត់ថា និកហ្វិច (NICFEC) បានអះអាងថា៖ «ខ្ញុំគិតថា គណបក្សទាំងអស់គឺកំពុងតែប្រកួតប្រជែងគ្នានៅមុនយុទ្ធនាការ។ អញ្ចឹងរូបភាពអីក៏អាចកើតមានឡើងដែរ។ ហើយអ្វីដែលជាការលេចឮប៉ុន្មានថ្ងៃនេះ ពាក់ព័ន្ធនឹងក្រុមគណបក្សកាន់អំណាចហើយនឹងគណបក្សដែលមានអាសនៈតិចក្នុងរដ្ឋសភាក៏កំពុងតែប្រកួតប្រជែងគ្នា។ ហើយខ្ញុំគិតថា យ៉ាងណាក៏ដោយ នេះជាទម្រង់មួយនៃប្រជាធិបតេយ្យ។ ប៉ុន្តែក៏សុំអំពាវនាវឲ្យគណបក្សទាំងអស់ ឲ្យរៀបចំឥរិយាបទទៅតាមអ្វីដែលជាសេចក្តីថ្លៃថ្នូរ ហើយនឹងអ្វីដែលសមជាអនាគត ក៏ដូចជាអ្នកដែលដឹកនាំប្រជាពលរដ្ឋ»។ កម្ពុជាគ្រោងនឹងធ្វើការបោះឆ្នោតជាបន្តបន្ទាប់នៅឆ្នាំ២០១២សម្រាប់ក្រុមប្រឹក្សាឃុំសង្កាត់ ហើយបោះឆ្នោតជាតិនៅឆ្នាំ២០១៣ខាងមុខ។ ក្នុងកិច្ចសន្ទនាតាមទូរស័ព្ទរវាងលោកកឹម សុខា និងលោកនាយករដ្ឋមន្ត្រីហ៊ុន សែន ត្រូវបានសង្កេតឃើញថា មានការសន្ទនាគ្នាយ៉ាងជិតស្និទ្ធ។ លោក កឹម សុខាបានរាយការណ៍រឿងរ៉ាវនានាអំពីផ្ទៃក្នុងគណបក្សរបស់លោក ដូចជាអំពីការចំណាយ អំពីការដែលមានសមាជិកគណបក្សសម រង្សីចូលរួមជាមួយគណបក្សសិទ្ធិមនុស្ស ការសម្តែងអំណរគុណដល់លោក ហ៊ុន សែនដែលជួយសម្រួលកិច្ចការនានាពេលលោក កឹម សុខាធ្វើសាមាជបង្កើតគណបក្សលោកជាដើម។ មេដឹកនាំគណបក្សប្រឆាំងលោកសម រង្ស៊ីបានចាត់ទុកថា ការទម្លាយព័ត៌មានចុងក្រោយនេះគឺជាភ័ស្តុតាង នៃចេតនាក្នុងការផ្តួលគណក្សរបស់លោកតាមរយៈរូបភាពផ្សេងៗ និងការឃុបឃិតគ្នាដើម្បីធ្វើឲ្យគណបក្ស សម រង្ស៉ី ចុះខ្សោយ។ លោកបានប្រាប់វីអូអេខ្មែរថា៖ «ព្រឹត្តិការណ៍ចុងក្រោយនេះយើងឃើញថា មានការទម្លាយឯកសារសម្ងាត់។ ហើយឃើញថា គណបក្សប្រជាជនគេបានឧបត្ថម្ភ គេបានគាំទ្រ គេបានប្រើប្រាស់គណបក្សផ្សេងៗដែលអះអាងថាជាគណបក្សប្រជាធិបតេយ្យតែតាមពិត គឺគេរួមកម្លាំងគ្នាដើម្បីធ្វើឲ្យគណបក្សសម រង្ស៊ី មានបញ្ហាឬក៏ចុះខ្សោយ ប៉ុន្តែផ្ទុយទៅវិញយើងឃើញហើយបួនឆ្នាំ ប្រាំឆ្នាំកន្លងមកនេះ ដែលគណបក្ស ប្រជាជនបានជួលគណបក្សមួយចំនួនឲ្យមកវាយប្រហារគណបក្សសម រង្ស៊ីតែបរាជ័យ។ មិនធ្វើឲ្យគណបក្ស សម រង្ស៊ីខ្សោយ ធ្វើឲ្យគណបក្សសម រង្ស៊ីកាន់ តែខ្លាំង»។ លោកសម រង្ស៊ី លើកយកឧទារហរណ៍ថា គណបក្ស សម រង្ស៊ីបានកើនអាសនៈពី២៤ដល់ទៅ២៦ក្នុងការបោះឆ្នោតខែកក្កដាឆ្នាំ២០០៨ គឺក្រោយពេល មានការរៀបចំផែនការសម្ងាត់កាលពីឆ្នាំ២០០៧ខែកក្កដា។ ចំណែកប្រធានគណបក្សសិទ្ធិមនុស្ស លោក កឹម សុខាវិញបានការពារខ្លួនលោកថា ទោះជា មានការចោទប្រកាន់ពីគណបក្សដ៏ទៃយ៉ាងណាក៏ដោយ ប្រជាពលរដ្ឋអ្នកគាំទ្រលោកដើម្បីផ្លាស់ប្តូរអ្នកដឹកនាំប្រទេស បានដឹងច្បាស់ថា នេះជាកលល្បិចរបស់អ្នកណា។ លោកបានថ្លែងថា ប្រសិនបើគណបក្សសិទ្ធិមនុស្សមិនមែនជាគណបក្សខ្លាំងមួយគេមិនមករករឿងនោះទេ។ លោកបានប្រាប់វីអូអេខ្មែរថា៖ «ដូច្នេះគេស្គាល់ជំហរយើងច្បាស់។ ទោះបីអ្នកណានិយាយថា យើងយ៉ាងម៉េចក៏ដោយ ប្រជាពលរដ្ឋមិនអាចរេរាតាមការពង្វក់របស់គណបក្សកាន់អំណាចទេ។ ខ្ញុំជឿថា ទោះបីគណបក្សកាន់អំណាចធ្វើភ្លៀងធ្វើផ្គរយ៉ាងណាក៏ដោយក៏ប្រជាពលរដ្ឋខ្មែរដែលស្រឡាញ់លិទ្ធិប្រជាធិបតេយ្យ ស្រឡាញ់ប្រទេសជាតិនោះគឺគេបានមានជម្រើសរបស់គេច្បាស់លាស់ហើយ គេបានចូលរួមយ៉ាងច្រើនកុះករជាមួយគណបក្សសិទ្ធិមនុស្ស»។ លោក កឹម សុខាបានអះអាងថា ការសង្ស័យនានាបានជ្រះស្រឡះហើយថា គណបក្សសិទ្ធិមនុស្សមិនមែនជាអាយ៉ងរបស់គណបក្សប្រជាជនកម្ពុជា។ មេដឹកនាំក្រុមប្រឆាំងទាំងពីរគឺលោក សម រង្ស៊ី និងលោកកឹម សុខា នៅបន្តអួតអាង ហើយពុំបានទទួលស្គាល់ថា ឯកសារសម្ងាត់ដែលបែកធ្លាយ និងដែលបង្កឲ្យមានការវាយប្រហារគ្នាទៅវិញទៅមកនោះប៉ះពាល់ដល់សំឡេងឆ្នោតរបស់ពួកគេទៅថ្ងៃខាងមុខទេ។ ទោះជាយ៉ាងណាក៏ដោយ ក៏មេដឹកនាំគណបក្សទាំងពីរហាក់ដូចជាពុំបានបិទទ្វារសម្រាប់ការចងសម្ព័នភាពរវាងគ្នា និងគ្នាទៅមុខដែរ។ លោក សម រង្ស៊ីបានប្រើពាក្យថា នៅតែចង់រួបរួមជាមួយអ្នកប្រជាធិបតេយ្យ តែមិនមែនជាមួយអ្នកចរចាសម្ងាត់ជាមួយលោកហ៊ុន សែនទេ។ ចំណែកលោកកឹម សុខា វិញនៅមានជំហររង់ចាំថ្ងៃណាមួយពេលដែលលោក សម រង្ស៊ីប្រែចិត្តក្នុងការចងសម្ព័ន្ធភាព។ លោក ហង្ស ឆាយានាយកប្រតិបត្តិនៃវិទ្យាស្ថានខ្មែរដើម្បីលិទ្ធិប្រជាធិបតេយ្យបានអះអាងថា មេដឹកនាំគណបក្សសម រង្ស៊ីស្ថិតនៅនិរទេសខ្លួនជាការព្រួយបារម្ភ សម្រាប់លិទ្ធិប្រជាធិបតេយ្យក្នុងប្រទេសកម្ពុជា។ លោកបានថ្លែងថាការមានបញ្ហារឿងគណបក្សសិទ្ធិមនុស្សទាក់ទងនិងការបែកធ្លាយខ្សែអាត់សម្ងាត់មុនការបោះឆ្នោតនោះ អាច និងបញ្ចប់ការប៉ុនប៉ងចងសម្ព័ន្ធភាពដែលបរទេសមួយចំនួនចង់ឃើញ។ លោកឆាយា មានប្រសាសន៍ថា៖ «ខ្ញុំជឿថា បញ្ហាហ្នឹងចប់ហើយ។ ពីព្រោះគណបក្សសម រង្ស៊ីអត់មានការលើកទឹកចិត្តទៅលើគណបក្សសិទ្ធិមនុស្សទេ។ ហើយគណបក្សសិទ្ធិមនុស្ស ចេញអាហ្នឹងមកមិនអាចមានអីទប់ស្កាត់ឬក៏ពន្យល់ពីមូលហេតុទាំងនោះដែរ។ហើយសំខាន់ទៅទៀតអ្នកជួយជ្រោមជ្រែងនោះ គណបក្សទាំងពីរនោះគេបែបធុញទ្រាន់។ អានេះគ្មានការទុកចិត្តគ្នាទៅវិញទៅមក។ ម៉្លោះហើយមិនអាចកើតឡើងបានទេ»។ លោក ឆាយាបានថ្លែងថា ការគិតគូរពីបញ្ហាស្ថិរភាព និងភាពក្រីក្ររបស់ប្រជាពលរដ្ឋខ្មែរជាការសំខាន់ដែលត្រូវជជែកគ្នាជាងការយកលេសបំបែកបំបាក់ គណបក្សជំទាស់ទាំងពីរ៕ This posting includes an audio/video/photo media file: Download Now |
| ប្រជាពលរដ្ឋកាន់តែច្រើនត្រូវបានចាប់ខ្លួន Posted: 02 Jun 2011 02:16 PM PDT នៅថ្ងៃព្រហស្បតិ៍នេះសមាគមសិទ្ធិមនុស្សអាដហុកបានសម្តែងការព្រួយបារម្ភយ៉ាងខ្លាំងចំពោះការចោទប្រកាន់ ការចាប់ខ្លួន និងការឃុំខ្លួនប្រជាពលរដ្ឋប្រមាណ១២៤នាក់ក្នុងរឿងជម្លោះដីធ្លីជាមួយមន្ត្រីមានអំណាច និងថៅកែក្រុមហ៊ុននៅដើមឆ្នាំ២០១១នេះ។ លោក នី ចរិយា ប្រធានផ្នែកស៊ើបអង្កេតនៃសមាគមសិទ្ធិមនុស្សបានថ្លែងថា តាមការស៊ើបអង្កេតរបស់សមាគមអាដហុកបានរកឃើញថា ការចោទប្រកាន់ពីបទព្រហ្មទណ្ឌរបស់តុលាការធ្វើឡើងដោយអយុត្តិធម៌ទៅលើអ្នកភូមិក្រីក្រស្លូតត្រង់ ដែលពួកគាត់មិនមានលទ្ធភាពគ្រប់គ្រាន់ក្នុងការការពារខ្លួនតាមផ្លូវច្បាប់។ លោកមានប្រសាសន៍ថា៖ «គិតពីដើមឆ្នាំ២០១១រហូតដល់បច្ចុប្បន្ន សមាគមសិទ្ធិមនុស្សអាដហុកបានរកឃើញថា យ៉ាងហោចណាស់ក៏មានប្រជាពលរដ្ឋក្រីក្រក្នុងទំនាស់ដីធ្លីចំនួន១២៤នាក់ដែរ ដែលត្រូវបានតុលាការចេញដីកាកោះ និងចោទប្រកាន់ពីបទព្រហ្មទណ្ឌ ក្នុងនោះមាន៣៦នាក់ត្រូវបានចាប់ខ្លួន ១៨នាក់កំពុងជាប់ឃុំឃាំងក្នុងពន្ធនាគារ និង៨៨នាក់កំពុងរត់គេចខ្លួនពីការតាមចាប់របស់តុលាការ»។ សមាគមសិទ្ធិមនុស្សអាដហុកបានកត់សម្គាល់ឃើញថា អ្នកភូមិដែលទទួលរងការចោទប្រកាន់ភាគច្រើនជាម្ចាស់ដី។ ពួកគេបានកាន់កាប់ដីផ្ទះសម្បែងស្របច្បាប់ដែលមានការទទួលស្គាល់ពីអាជ្ញាធរមូលដ្ឋានត្រឹមត្រូវ តែអ្នកមានអំណាច និងថៅកែក្រុមហ៊ុនបានចូលទន្ទ្រានយកដីស្រែចម្ការពីអ្នកភូមិ។ នៅពេលដែលអ្នកភូមិទាមទារ និងតវ៉ាការពារដីស្រែចម្ការរបស់ពួកគាត់ៗត្រូវទទួលរងការចោទប្រកាន់ និងចាប់ឃុំខ្លួនពី សំណាក់កងកម្លាំងប្រដាប់អាវុធ និងតុលាការទៅវិញ។ លោក នី ចរិយា បានថ្លែងថា សមាគមអាដហុកបានវិភាគការផ្តល់យុត្តិធម៌ដោយប្រព័ន្ធតុលាការនានា។ ពាក្យបណ្តឹងរបស់អ្នកភូមិដែលទាមទារដីធ្លី ការពារកម្មសិទ្ធិ និងទប់ទល់នឹងការឈូសឆាយទ្រព្យសម្បត្តិពីសំណាក់អ្នកមានអំណាច ឬក្រុមហ៊ុនឯកជន មិនត្រូវបានចាត់ការ ឬចាត់ការដែរ តែមិនទាន់ពេលវេលា។ ជនរងគ្រោះក្នុងរឿងជម្លោះដីធ្លីចំនួនជាង៥០នាក់មកពីខេត្តកណ្តាល កំពង់ចាម កំពង់ឆ្នាំង ពោធិសាត់ កំពង់ធំ ព្រះសីហនុ ព្រៃវែង ព្រះវិហារ កោះកុង បាត់ដំបូង បន្ទាយមានជ័យ ក្រចេះ និងកំពង់ស្ពឺ បានប្រមូលផ្តុំគ្នានៅទីស្នាក់សមាគមសិទ្ធិមនុស្សអាដហុកដើម្បីធ្វើញត្តិជូនលោកស៊ូរីយ៉ា ប្រាសាដ ស៊ុបិឌី (Surya Prasad Subedi) ដែលជាអ្នករាយការណ៍ពិសេសរបស់អង្គការសហប្រជាជាតិស្តីពីស្ថានភាពសិទ្ធិមនុស្សនៅកម្ពុជាដែលនឹងបញ្ចប់ទស្សនកិច្ចជាផ្លូវការលើកទី៥នៅថ្ងៃសុក្រស្អែកនេះ។ លោកហោ ជា អាយុ៣៥ឆ្នាំ នៅឃុំសំរោងធំ ស្រុកកៀនស្វាយ ខេត្តកណ្តាល បាននិយាយថា តុលាការបានចេញដីកាកោះហៅអ្នកភូមិរបស់លោកចំនួន១៩នាក់ និងអ្នកភូមិពីរនាក់ត្រូវបានចាប់ខ្លួន។ លោកបានមានប្រសាសន៍ថា៖ «សព្វថ្ងៃនេះ ខ្ញុំសូមឱ្យប្រព័ន្ធតុលាការសូមឱ្យរកយុត្តិធម៌ឱ្យប្រជាពលរដ្ឋយើងខ្ញុំ កុំឱ្យមានទំនាស់ដីធ្លីនេះចាប់ចងប្រជាពលរដ្ឋយើងខ្ញុំតទៅទៀត។ ខ្ញុំសូមឱ្យប្រព័ន្ធតុលាការជួយរកយុត្តិធម៌ឱ្យប្រជាពលរដ្ឋដែលប្រជាពលរដ្ឋសុំតែការពារដីប្រជាពលរដ្ឋយើងខ្ញុំ»។ អ្នកស្រី ហែម សុខុន អាយុ៣៨ឆ្នាំ ឃុំដូនបា ស្រុកកោះក្រឡ ខេត្តបាត់ដំបង បានថ្លែងថា អ្នកស្រីក្នុងចំណោមអ្នកភូមិ១៤៥គ្រួសារបានទទួលរងនូវភាពអយុត្តិធម៌ក្នុងរឿងជម្លោះដីធ្លីជាមួយអាជ្ញាធរឃុំ ដែលតុលាការកំពុងតាមចាប់អ្នកស្រី និងអ្នកភូមិប្រាំនាក់ទៀត ខណៈដែលអ្នកភូមិពីរនាក់កំពុងជាប់ពន្ធនាគារអំពីបទប៉ះពាល់កម្មសិទ្ធិឯកជន។ លោកស្រីបានថ្លែងថា៖ «យើងឡើងទៅតុលាការដើម្បីកុំឱ្យល្មើសនឹងច្បាប់ពីព្រោះយើងអត់មានបានប៉ះពាល់អ្វីទេ។ ដីកានេះគេដាក់ថាសាកសួរ។ ដល់ពេលឡើងទៅដល់តុលាការមិនទាន់បាននិយាយអ្វីផងស្រាប់តែចៅក្រមដាក់ខ្នោះប្រជាពលរដ្ឋជាមួយខ្ញុំទៅបាត់។ ដល់ពេលរសៀលម៉ោងពីរត្រូវដល់វេនខ្ញុំៗអត់ហ៊ានចូលខ្លួនទៅជួបតុលាការទេ ។ ខ្ញុំឃើញតុលាការអយុត្តិធម៌បែបហ្នឹង។ តុលាការអត់ហៅយើងទៅសាកសួរតាមដីកាទេ។ ហៅយើងទៅដាក់ខ្នោះ។ ត្រង់ហ្នឹងហើយដែលតុលាការអយុត្តិធម៌បំផុត។ អ្នកភូមិបួននាក់ទៀតត្រូវបានតាមចាប់ខ្លួន ហើយខ្ញុំក៏ត្រូវបានតាមចាប់ខ្លួនដែរ»។ លោក អ៊ិន វ៉ានវិបុល ប្រធានតុលាការខេត្តបាត់ដំបងបានថ្លែងថា សាលាដំបូងខេត្តបាត់ដំបងមិនដែលចេញដីកាចាប់ខ្លួនប្រជាពលរដ្ឋអំពីរឿងជម្លោះដីធ្លីទេ។ This posting includes an audio/video/photo media file: Download Now |
| សមកម្មជនគណបក្សសម រង្ស៊ីត្រូវបានសម្លាប់ Posted: 02 Jun 2011 01:47 PM PDT ជំទប់ឃុំម្នាក់ និងជាបេក្ខជនឈរឈ្មោះសម្រាប់ការបោះឆ្នោតក្រុមប្រឹក្សាឃុំសង្កាត់ របស់គណបក្សសម រង្ស៊ី នៅឆ្នាំ២០១២ ក្នុងខេត្តកណ្ដាលត្រូវឃាតករមិនស្គាល់មុខវាយសម្លាប់កាលពីយប់ថ្ងៃពុធនេះ។ ករណីឃាតកម្មដែលបានកើតឡើងស្របពេលដែលបេសកជនសិទ្ធិមនុស្សរបស់អង្គការសហប្រជាជាតិកំពុងបំពេញបេសកម្មនៅកម្ពុជា។ គណបក្សសម រង្ស៊ី បានហៅអំពើហឹង្សានេះថាជាឃាតកម្មនយោបាយ។ លោកអ៊ុក ឆន្ទៈ អាយុ៦៤ឆ្នាំ ជំទប់ទី២ ក្នុងឃុំឈើទាល ស្រុកកៀនស្វាយ ត្រូវបានសម្លាប់នៅខណៈដែលលោកធ្វើដំណើរចេញពីយាមប្រចាំការនៅក្នុងឃុំវេលាម៉ោងប្រមាណជាដប់យប់ម្សិលមិញនេះ ហើយសាកសពត្រូវបានរកឃើញនៅចម្ងាយប្រមាណពីរគីឡូម៉ែត្រពីផ្ទះរបស់គាត់។ លោកចាន់ ចេង តំណាងរាស្ដ្រ និងជាប្រធានក្រុមការងាររបស់គណបក្សសម រង្ស៊ី បានអះអាងថា ជនរងគ្រោះត្រូវបានវាយសម្លាប់នឹងដំបងបណ្ដាលឲ្យមានរបួសធ្ងន់ធ្ងរលើផ្ទៃមុខ និងលើក្បាល។ ដោយ ឡែកមន្ដ្រីសិទ្ធិមនុស្សអះអាងថា សាកសពត្រូវបានឃាតករទម្លាក់ចូលក្នុងទឹកត្រឹមក្បាល។ លោក ចាន់ ចេង ចាត់ទុកថា នេះជាការសម្លាប់ដែលមានចេតនានយោបាយដោយហេតុថា ជនរងគ្រោះគឺជាសកម្មជនដែលមានប្រជាប្រិយភាពមួយរូបដែលរំពឹងថា អាចនឹងនាំជ័យជម្នះក្នុងការបោះឆ្នោតខាងមុខ។ លោកបានប្រាប់វីអូអេខ្មែរថា៖ «ក្នុងនាមថ្នាក់ដឹកនាំគណបក្សសម រង្ស៊ីគឺថា ឃាតកម្មនេះជាឃាតកម្មនយោបាយ។ គាត់មិនមែនជាមនុស្សម្នាក់ដើរហើរ ស៊ីផឹក ឬមានបញ្ហាអ្វីផ្សេងនោះទេ។ ប្រជាប្រិយរបស់គាត់ក្នុងមូលដ្ឋាននោះ គឺគេផ្ដល់ឲ្យគាត់ គឺគេនឹងបោះឆ្នោតឲ្យគាត់ព្រោះគាត់បម្រើប្រជាពលរដ្ឋដោយអត់គិតនឿយហត់ខ្លួនឯងទេ»។ ផ្ទុយទៅវិញ លោកឧត្តមសេនីយ៍ អ៊ាវ សំរើន ស្នងការនគបាលខេត្តកណ្ដាលអះអាងថា ឃាតកម្មនេះកើតចេញពីអំពើប្លន់។ «ជាករណីប្លន់យកទ្រព្យសម្បត្តិ។ កិច្ចការទាំងនេះ ខ្ញុំបានចាត់ចែងកម្លាំង ដើម្បីស៊ើបអង្កេតបន្ទាន់មួយ។ ដូច្នេះ ទាល់តែធ្វើការហ្មត់ចត់បន្ដិច ពីព្រោះពេលយប់នោះគាត់ទៅធ្វើការ គាត់សុំចេញមកមុន គាត់ថាទៅផ្ទះ តែផ្ទុយទៅវិញបែរជាគាត់មិនទៅផ្ទះ គាត់ទៅដល់ គគីឯណោះ ហើយបានជួបហេតុការណ៍នោះឡើង។ យើងនឹងខំស្រាវជ្រាវរកឲ្យឃើញករណីនេះ»។ ម៉ូតូម៉ាកហុងដា ទូរសព្ទ័ដៃ និងម៉ាស៊ីនថតមួយគ្រឿងរបស់ជនរងគ្រោះបានបាត់បង់។ ក៏ប៉ុន្ដែលោកចាន់ ចេង បានច្រានចោលការសន្និដ្ឋានរបស់ប៉ូលីស ហើយលើកឡើងថា មានជំទប់ និងក្រុមប្រឹក្សាឃុំ គណបក្ស សម រង្ស៊ី សរុបចំនួនបីនាក់ក្នុងឃុំបន្ទាយដែក ឃុំសំរោងធំ និងឃុំគគីធំ ត្រូវបានតុលាការកោះហៅទាក់ទងនឹងទំនាស់ដីធ្លី ស្របពេលដែលសកម្មជនគណបក្សជំទាស់ទាំងនោះបានឃ្លាំការតវ៉ារបស់ក្រុមប្រជាពលរដ្ឋអំពីការរំលោភដីធ្លី។ លោកអំ សំអាតប្រធានការិយាល័យគ្រប់គ្រងបច្ចេកទេសស៊ើបអង្កេតរបស់អង្គការការពារសិទ្ធិលីកាដូដែលបានចុះទៅអង្កេតដល់ទីកន្លែងនៅថ្ងៃនេះ មានប្រសាសន៍ថា នៅមានចំណុចសង្ស័យជាច្រើនត្រូវធ្វើការស៊ើបអង្កេតបន្ថែមទៀត។ លោកបានប្រាប់វីអូអេខ្មែរថា៖ «យើងនៅមានចំណុចជាច្រើននៅមានការមន្ទិលសង្ស័យ ពីព្រោះគេថា ចោរប្លន់គាត់ តែតាមពិតយើងឃើញថា គាត់ត្រូវបានគេវាយពីផ្លូវជាតិលេខ១០ ទៅចោលប្រមាណជាជាងមួយគីឡូម៉ែត្រ»។ កម្ពុជាគ្រោងនឹងធ្វើការបោះឆ្នោតជ្រើរើសក្រុមប្រឹក្សាឃុំសង្កាត់នៅខែមិថុនា ឆ្នាំ២០១២។ គណបក្ស សម រង្ស៊ី ស្ថិតក្រោមការដឹកនាំគណបក្ស គឺលោកសម រង្ស៊ី ដែលកំពុងនិរទេសខ្លួននៅក្រៅប្រទេសដោយសារតុលាការក្នុងស្រុកកាត់ទោសលោកឲ្យជាប់ពន្ធនាគារ។ អំពើហឹង្សាលើសកម្មជនគណបក្សសម រង្ស៊ី ធ្វើឡើងមួយថ្ងៃ មុនលោកសុរិយា ប្រាសាដ ស៊ុបិឌីអ្នករាយការណ៍ពិសេសអង្គការសហប្រជាជាតិបញ្ចប់បេសកកម្មរយៈពេលប្រាំថ្ងៃរបស់ខ្លួននៅកម្ពុជា។ លោក ស៊ុបិឌី ត្រូវពិនិត្យមើលឡើងវិញនូវបញ្ហារំលោភសិទ្ធិមនុស្សនៅកម្ពុជា សេរីភាពបញ្ចេញមតិ និងទំនាស់ដីធ្លី៕ This posting includes an audio/video/photo media file: Download Now |
| សាលាក្តីខ្មែរក្រហមតែងតាំងមន្រ្តីសាធារណៈពីររូប Posted: 02 Jun 2011 08:33 AM PDT សាលាក្តីកាត់ទោសអតីតមេដឹកនាំខ្មែរក្រហម ក្រោមការគាំទ្រ ពីអង្គការសហប្រជាជាតិនៅថ្ងៃពុធ នេះ បានសម្រេចតែងតាំងមន្រ្តីថ្មីចំនួនពីររូបផ្សេងទៀត នៅក្នុងផ្នែកកិច្ចការសាធារណៈ បន្ទាប់ពីលោករាជ សម្បត្តិ អតីតប្រធានផ្នែកកិច្ចការសាធារណៈបានទទួលមរណភាពដោយសារជំងឺដាច់សរសៃឈាមក្នុងខួរក្បាល កាលពីដើមខែឧសភា កន្លងទៅនេះ។ សេចក្តីប្រកាសព័ត៌មានរបស់សាលាក្តីខ្មែរក្រហមបានឲ្យដឹងថា ការផ្លាស់ប្តូរតួនាទីនៅក្នុងផ្នែកកិច្ចការសាធារណៈនេះ គឺលោកឌឹម សុវណ្ណារុំ ដែលបានបម្រើជាអ្នកនាំពាក្យនៅក្នុងសាលាក្តីខ្មែរក្រហមត្រូវបានតែងតាំងជាមន្រ្តីទទួលបន្ទុកផ្នែកកិច្ចការសាធារណៈ។ លោកហ៊ុយ វណ្ណៈ និពន្ឋនាយកនៃបណ្តាញទូរទស្សន៍ CTN ត្រូវបានតែងតាំងនៅក្នុងមុខ តំណែងថ្មីជាមន្រ្តីផ្នែកកិច្ចការសាធារណៈ។ ចំណែកឯលោកនេត្រ ភក្រ្តា នាយកគ្រប់គ្រងការីនិពន្ឋនៃ សារព័ត៌មានភ្នំពេញប៉ុស្តិ៍ផ្នែកភាសាខ្មែរ ត្រូវបានតែងតាំងជាមន្រ្តីអ្នកនាំពាក្យនៅក្នុងសាលាក្តីខ្មែរក្រហម។ លោកឌឹម សុវណ្ណារុំ មន្រ្តីទទួលបន្ទុកផ្នែកកិច្ចការសាធារណៈនៅក្នុងសាលាក្តីខ្មែរក្រហម បាន មានប្រសាសន៍ថា ការតែងតាំងមន្រ្តីថ្មីចំនួនពីររូបបន្ថែមទៀតនេះ គឺបានជ្រើសចេញយ៉ាងសម្រិតសម្រាំងបំផុតពីបេក្ខភាពជាច្រើនរូបផ្សេងទៀត។ លោកបានមានប្រសាសន៍ទៀតថា ផ្នែកកិច្ចការសាធារណៈ និងពង្រឹងការងាររបស់ខ្លួនឲ្យកាន់តែមានលក្ខណៈល្អប្រសើរបន្ថែមទៀត។ លោកបានប្រាប់វីអូអេខ្មែរថា៖ «យើងគិតថា អង្គជំនុំជម្រះវិសាមញ្ញក្នុងតុលាការកម្ពុជា អញ្ចឹងតុលាការពិសេសយើងឃើញ ហើយថា ការតែងតាំងជាមន្រ្តីទទួលបន្ទុកផ្នែកកិច្ចការសាធារណៈហើយឬក៏អាចនិយាយថា អ្នកទទួល ខុសត្រូវផ្នែកកិច្ចការសាធារណៈ។ អញ្ចឹងខ្ញុំគិតថា មិនជាអ្វីដែលត្រូវកង្វល់ទេ។ សំខាន់ធ្វើយ៉ាងម៉េចឲ្យ ការងារដំណើរការទៅវាបានជោគជ័យ»។ សេចក្តីប្រកាសព័ត៌មានរបស់សាលាក្តីខ្មែរក្រហមមិនបានបញ្ជាក់អំពីការតែងតាំងមន្រ្តីណាមួយជាប្រធានផ្នែកកិច្ចការសាធារណៈជំនួសលោករាជ សម្បត្តិ ទេ។ គ្រាន់តែបានបញ្ជាក់ថា លោកឌឹម សុវណ្ណារុំ ជាមន្រ្តីទទួលបន្ទុកផ្នែកកិច្ចការសាធារណៈតែប៉ុណ្ណោះ។ ការតែងតាំងមន្រ្តីថ្មីបន្ថែមពីររូបផ្សេងទៀតបានធ្វើឲ្យផ្នែកកិច្ចការសាធារណៈរបស់សាលាក្តីខ្មែរក្រហម មានមន្រ្ទីសរុបចំនួន៨រូប គឺខាងភាគីជាតិចំនួន០៦រូប និងខាងភាគីអន្តរជាតិចំនួនពីររូប។ លោកហ៊ុយ វណ្ណៈ មានសញ្ញាប័ត្រជាអនុបណ្ឌិត ផ្នែកទំនាក់ទំនងមកពីសាកលវិទ្យាល័យ Rutgers នៃរដ្ឋញូចឺស៊ី (New Jersey) សហរដ្ឋអាមេរិក និងជាអ្នកនិពន្ឋសៀវភៅនៅមជ្ឈមណ្ឌលឯកសារ កម្ពុជា។ បច្ចុប្បន្នលោកជានិពន្ឋនាយកឲ្យទូរទស្សន៍CTN។ លោកបានមានប្រសាសន៍ថា លោកមានការរីករាយ ដែលបានទៅកាន់តួនាទីថ្មីនៅក្នុងសាលា ក្តីខ្មែរក្រហម។ លោកហ៊ុយ វណ្ណៈ បានមានប្រសាសន៍ទៀតថា វាជាការតភ្ជាប់មួយ ដែលលោកធ្លាប់បានបម្រើជនរងគ្រោះក្នុងការស្វែងរកយុត្តិធម៌នៅក្នុងសាលាក្តីខ្មែរក្រហម។ ក៏ប៉ុន្តែទោះជាយ៉ាងណាក៏ដោយក៏លោកហ៊ុយ វណ្ណៈ នៅតែបន្តតួនាទីជាទីប្រឹក្សានៅក្នុងបណ្តាញទូរទស្សន៍CTN ដដែល។ លោកថ្លែងដូច្នេះថា៖ «ទាក់ទងរឿងខ្មែរក្រហម ខ្ញុំចាប់ផ្តើមធ្វើតាំងពីឆ្នាំ១៩៩៩មក ក្នុងនាមជាអ្នកស្រាជ្រាវ ជាអ្នក និពន្ឋសៀវភៅពីរក្បាលលើប្រវត្តសាស្រ្តខ្មែរក្រហម។ ខ្ញុំខ្លួនឯងក៏ជាអ្នកកាសែត វិទ្យុ ដែលបានធ្វើកិច្ចការច្រើនលើរឿងខ្មែរក្រហមរហូតមកដល់ខ្ញុំកាន់ទូរទស្សន៍ ក៏យើងអាចធ្វើកិច្ចការច្រើនលើខ្មែរក្រហម ហើយបានតាមដានដំណើរការតុលាការខ្មែរក្រហមជាប្រចាំ»។ លោកនេត្រ ភក្រ្តា ដែលមានបទពិសោធន៍ខាងផ្នែកសារព័ត៌មានចំនួន៩ឆ្នាំ និងមានបរិញ្ញាប័ត្រផ្នែកសារព័ត៌មាននេះបានបញ្ជាក់ថា មុខតំណែងជាអ្នកនាំពាក្យនៅក្នុងសាលាក្តីខ្មែរក្រហម បានជំរុញឲ្យលោកខិតខំស្រាវជ្រាវដើម្បីបំពេញសមត្ថភាពបន្ថែមទៀត។ លោកបានមានប្រសាសន៍ទៀតថា លោកបានដាក់ពាក្យលាឈប់ពីនាយកគ្រប់គ្រងការីនិពន្ឋសារព័ត៌មានភ្នំពេញប៉ុស្តិ៍ កាលពីថ្ងៃអង្គារមិ្សលមិញនេះ។ លោកនឹងចូលកាន់ការងារថ្មីនៅថ្ងៃទី ១៧ ខែមិថុនា ខាងមុខនេះ។ លោកនេត្រាបានប្រាប់វីអូអេខ្មែរថា៖ «ខ្ញុំគិតថា ដោយសារតែខ្ញុំធ្វើការនៅក្នុងវិស័យសារព័ត៌មាននេះជិត១០ឆ្នាំមកហើយៗខ្ញុំមានទំនាក់ទំនងជាមួយ និងអ្នកកាសែតដទៃទៀតបានល្អ។ ខ្ញុំគិតថា ដំណើការការងាររបស់ខ្ញុំថ្មីនៅ សាលាក្តីខ្មែរក្រហម និងមិនមានជាឧបសគ្គអ្វីនោះទេ។ ហើយបើទោះបីជាមានឧបសគ្គ ឬមួយក៏អ្វី យើងអាចដោះស្រាយបាន» ។ លោកកៃ គឹមសុង និពន្ឋនាយកកាសែតភ្នំពេញប៉ុស្តិ៍ផ្នែកខេមរភាសា បានមានប្រសាសន៍ថា លោកបានទទួលលិខិតលាឈប់ពីមុខតំណែងពីលោកនេត្រ ភក្រ្តា រួចហើយ។ កាសែតភ្នំពេញ ប៉ុស្តិ៍ នឹងធ្វើសេចក្តីប្រកាសព័ត៌មាននៅសប្តាហ៍ក្រោយនេះ ដើម្បីជ្រើសរើសបេក្ខភាពជំនួសលោក នេត្រ ភក្ត្រា៕ This posting includes an audio/video/photo media file: Download Now |
| រូបថតនៅគុកទួលស្លែងអាចជារូបថតអ្នកទោសពីគុកខ្មែរក្រហមផ្សេងទៀត Posted: 02 Jun 2011 09:31 AM PDT ស្ត្រីម្នាក់បានរកឃើញរូបថតរបស់ខ្លួនដ៏គួរឲ្យភ្ញាក់ផ្អើលក្នុងគុកទួលស្លែង ឬរបស់ខ្មែរក្រហម ក្រោយរយៈពេលបីទសវត្សរ៍។ មន្ត្រីផ្លូវការសាលាក្តីខ្មែរក្រហមបានប្រកាសឲ្យដឹងថា អ្នកស្រីមុំ គឹមសេនដែលជាជនរងគ្រោះជាប់គុកខ្មែរក្រហមកាលពីឆ្នាំ១៩៧៧បានប្រទះឃើញរូបថតរបស់អ្នកស្រីដ៏គួរឲ្យភ្នាក់ផ្អើលក្នុងសារមន្ទីរទួលស្លែងឬមន្ទីរស២១ របស់ខ្មែរក្រហមនៅថ្ងៃអង្គារនេះ ខណៈពេលដែលមានទស្សនកិច្ចសិក្សាមួយរៀបចំដោយសាលាក្តីកាត់ទោសខ្មែរក្រហម នេះបើតាមការអះអាងរបស់លោកឌឹម សុវណ្ណារុំ អ្នកនាំពាក្យសាលាក្តីខ្មែរក្រហម។ «តាមពិតគាត់នៅរស់ទេ។ គាត់នៅរស់ អញ្ចឹងគាត់ជាសាក្សីរស់មួយមិនមែនមានន័យថា ឲ្យតែឃើញរូបថតនៅគុកទួលស្លែងសុទ្ធសឹងតែជាអ្នកបានស្លាប់នោះទេ គឺមិនមែនទេ។ គាត់នៅរស់រានមានជីវិតនៅឡើយទេ។ គាត់មិនមែនត្រឹមតែរកឃើញរូបថតរបស់ខ្លួនគាត់តែប៉ុណ្ណឹងទេ គាត់រកឃើញរូបថតម្តាយរបស់គាត់ដែលនៅរស់នៅឡើយ មានអាយុ៨២ឆ្នាំ ហើយរកឃើញរូបថត ប្អូនស្រីរបស់គាត់ដែលមានអាយុប្រហាក់ប្រហែល៥០ឆ្នាំ ហើយរស់នៅខេត្តពោធិសាត់»។ លោកសុវណ្ណារុំបានអះអាងថា នេះជាការណ៍ពិតមួយដែលបានរកឃើញអ្នក ដែលនៅរស់រានមានជីវិតជាង៣០ឆ្នាំ។ «ទើបតែរកឃើញ។ គាត់រកឃើញនៅថ្ងៃនេះ។ មានន័យថា គាត់បានជម្រាបយើងថា រូបថតនេះជារូបថតគាត់ ហើយខ្ញុំបានចូលរួមជាមួយគាត់។ ខ្ញុំឃើញរូបថត គឺពិតជារូបថតរបស់គាត់មួយរយភាគរយតែម្តង។ហើយគាត់នៅចាំព្រោះគាត់ថតពេលដែលគាត់នៅអាយុ២៧ឆ្នាំ»។ អ្នកស្រីមុំ គឹមសេន អាយុ៥៧ឆ្នាំធ្លាប់ជាអ្នកទោសនៃគុកស២៤ ឬហៅថាគុកព្រៃស ដែលមានទីតាំងនៅជាយក្រុងភ្នំពេញ។ អ្នកស្រីបានទទួលរងទារុណកម្ម ការបង្ខិតបង្ខំឲ្យធ្វើការហួសកម្លាំង បង្អត់អាហារ។ ទោះជាយ៉ាងណាក៏ដោយ អ្នកស្រីបានរស់រានមានជីវិតពីការកាប់សម្លាប់សម័យខ្មែរក្រហម។ អ្នកស្រីបានចូលរួមទស្សនាជាមួយពលរដ្ឋខ្មែរប្រមាណ៤០០នាក់មកពីស្រុកភូមិរបស់អ្នកស្រីគឺស្រុកកោះសូទិន ខេត្តកំពង់ចាម តាមកម្មវិធីធម្មតារបស់សាលាក្តីដែលមានរៀងរាល់សប្តាហ៍នៅថ្ងៃអង្គារ។ អ្នកស្រី បានរកឃើញរូបថតអ្នកស្រីដែលគេព្យួរតាំងនៅលើជញ្ជាំង ពេលទស្សនានោះ។ កម្មវិធីនេះត្រូវគេរាយការណ៍មកថា ជាដំណើរការផ្សះផ្សារផ្លូវចិត្តដល់ជនរងគ្រោះ និងធ្វើឡើងដើម្បីជួយឲ្យពលរដ្ឋកម្ពុជាមកពីតំបន់ផ្សេងៗពាសពេញប្រទេសបានចូលរួមទស្សនាសារមន្ទីរទួលស្លែង ដែលមានមនុស្សជាង១២០០០នាក់ត្រូវខ្មែរក្រហមកាប់សំឡាប់តាមរូបភាពដ៏ឃោរឃៅជាច្រើន។ សារមន្ទីរទួលស្លែងមានតាំងរូបភាព ឬគំនូររូបថត ដែលពួកខ្មែរក្រហមបានប្រើទារុណកម្ម សំឡាប់អ្នកទោសក្នុងទសវត្ស១៩៧០។ លោកឆាំង យុគ ប្រធានមជ្ឈមណ្ឌលឯកសារកម្ពុជា បានថ្លែងថា មានការច្រឡំច្រើនចំពោះរូបថតដោយសារថា មិនមានការសិក្សាស្រាវជ្រាវឲ្យបានច្បាស់លាស់តាំងពីដំបូង។ ការយល់ច្រឡំនោះរាប់បញ្ជូលទាំងការសន្និដ្ឋានថា មនុស្សក្នុងរូបថតដែលគេឃើញក្នុងសារមន្ទីរទួលស្លែងសុទ្ធតែជាអ្នកស្លាប់។ ហើយថា អ្នកទោសក្នុងគុកទួលស្លែងក៏សុទ្ធតែត្រូវសម្លាប់ដែរ។ លោកឆាំង យុគបានអះអាងថា ការសន្និដ្ឋាននេះកើតឡើងដោយសារទម្ងន់នៃការឃោសនាជាង៣០ឆ្នាំ ដែលបានគ្របដណ្តប់ ធ្ងន់ហួសកម្រិត។ «ព័ត៌មានទាំងអស់នេះមិនអាចទប់នឹងព័ត៌មានដែលលាបពណ៌ថា មន្ទីរស ២១សុទ្ធសឹងតែជាអ្នកទោស។ មន្ទីរស២១ចូលទៅហើយមិនអាចរស់រានមានជីវិតទេ។ ព័ត៌មានទាំងអស់នេះផ្សព្វផ្សាយអស់រយៈពេល៣០ឆ្នាំមកហើយ។ នៅមន្ទីរស២១ក៏មានអ្នកទោសជាង១០០នាក់ត្រូវបានដោះលែងដែរ»។ លោកឆាំង យុគបានថ្លែងថា រូបថតទាំងអស់ក្នុងគុកស២១គ នៅតាខ្មៅ គុក ស២៤ គឺប្រមូលមកដាក់នៅគុកទួលស្លែងស២១ទាំងអស់ ពេលកងទ័ព វៀតណាមចូលឈ្លានពានទឹកដីកម្ពុជាដើម្បីបណ្តេញកងទ័ពខ្មែរក្រហម។ក្រោយមករូបថតទាំងនោះត្រូវគេផ្តិតចេញដើម្បីផ្សព្វផ្សាយឲ្យដឹងអំពីរបបខ្មែរក្រហម។ លោកចាត់ទុកថា ការរកឃើញរូបថតកាលពីថ្ងៃអង្គារម្នាក់ទៀតមិនមែនជាការភ្ញាក់ផ្អើលនោះទេ ដោយលោកថ្លែងថា មានមនុស្សជាង៦០នាក់ ដែលបានស្គាល់រូបថតរបស់ខ្លួនដូចគ្នានេះ។ លោកទទូចឲ្យសាលាក្តីខ្មែរក្រហមអប់រំអំពីរឿងនេះដើម្បីកុំឲ្យមានការយល់ ច្រឡំ ឬភ្ញាក់ផ្អើល។ លោកបានបន្ថែមថា អ្នកទោសដែលជាប់នៅគុកស២៤ មានចំនួនតិចជាងស២១ ហើយទោសនៅទីនោះក៏មានកម្រិតស្រាលជាងទោសនៅស២១ដែរ៕ This posting includes an audio/video/photo media file: Download Now |
| You are subscribed to email updates from VOA News: ព័ត៌មាន To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
