VOA News: ព័ត៌មាន: “ហេឡូវីអូអេ ១១ មិថុនា ២០១២៖ សកម្មភាពរបស់យុវជនក្នុងការប្រយុទ្ធប្រឆាំងការរំលោភបំពានដីធ្លីនិងការបណ្តេញចេញដោយបង្ខំ” plus 3 more |
- ហេឡូវីអូអេ ១១ មិថុនា ២០១២៖ សកម្មភាពរបស់យុវជនក្នុងការប្រយុទ្ធប្រឆាំងការរំលោភបំពានដីធ្លីនិងការបណ្តេញចេញដោយបង្ខំ
- ខ្លាឃ្មុំនៅប្រទេសកម្ពុជាប្រឈមមុខឧបសគ្គទ្វេនៃការដាច់ពូជ
- នយោបាយថ្នាក់មូលដ្ឋានមានឡូកឡំដោយការរើសអើង
- អ្នកទោសបឹងកក់ធ្វើកូដកម្មអត់អាហារ
| Posted: 12 Jun 2012 06:57 AM PDT យុវជនមានចំនួនភាគច្រើននៅក្នុងប្រទេសកម្ពុជា។ ប៉ុន្តែ ខណៈដែលជម្លោះដីធ្លីនិងបញ្ហារំលោភបំពានសិទ្ធិលំនៅដ្ឋានកំពុងបន្តកើតមាននៅក្នុងប្រទេស តើពួកគេបាននិងកំពុងចូលរួមចំណែកយ៉ាងដូចម្តេចខ្លះ ដើម្បីឈានទៅរកដំណោះស្រាយចំពោះបញ្ហាទាំងនេះ? វាគ្មិននៅក្នុងកម្មវិធីរាត្រីនេះរួមមាន លោក តាន់ ណារ៉ា នៃអង្គការយុវជននៃសហគមន៍បុរីកីឡា និងលោក ឯម ខេមរា អគ្គលេខាធិការនៃបណ្តាញយុវជនកម្ពុជា។ សូមស្តាប់សំឡេងទាំងស្រុងនៃកម្មវិធីហេឡូវីអូអេ ថ្ងៃទី ១១ មិថុនា ២០១២៖ <!--AV--> មធ្យោបាយចូលរួមសម្រាប់ប្រិយមិត្ត៖ ទូរស័ព្ទ ០១២ ៥១ ៥១ ៩៤ ហ្វេសប៊ុក facebook.com/voakhmer អ៊ីម៉េល hellovoa@voanews.com This posting includes an audio/video/photo media file: Download Now |
| ខ្លាឃ្មុំនៅប្រទេសកម្ពុជាប្រឈមមុខឧបសគ្គទ្វេនៃការដាច់ពូជ Posted: 12 Jun 2012 01:58 AM PDT ជីវិតខ្លាឃ្មុំនៅកម្ពុជាប្រឈមនឹងការប្រមាញ់ និងការរុករានព្រៃខុសច្បាប់។ នៅកម្ពុជាមានអង្គការ FreeThe Bears ដែលមានន័យថា សង្គ្រាះខ្លាឃ្មុំ ហើយដែលបានយកខ្លាឃ្មុំរងគ្រោះជាច្រើនក្បាលមករក្សាទុកនៅសួនសត្វភ្នំតាម៉ៅ។ អង្គការ Free The Bears ដែលសង្គ្រោះខ្លាឃ្មុំនៅភ្នំតាម៉ៅនេះកំពុងផ្តល់ជម្រកដល់ខ្លាឃ្មុំរងគ្រោះច្រើនបំផុតក្នុងពិភពលោក។ អង្គការអន្តរជាតិអភិរក្សធម្មជាតិ International Union for Conservation of Nature ចាត់ទុកថា ខ្លាឃ្មុំប្រភេទនេះជាសត្វរងគ្រោះថ្នាក់ដាច់ពូជ។ បច្ចុប្បន្នមានខ្លាឃ្មុំ៨៤ក្បាលរួចជីវិតនៅទីនោះ ដោយសង្គ្រោះពីកន្លែងគេលាក់ទុកសម្រាប់ធ្វើម្ហូប និងកន្លែងធ្វើថ្នាំ។ខ្លាឃ្មុំប្រភេទនេះមានមាឌតូច។ វាមានក្រឡាព៌ណលឿនលើទ្រូង និងមានអណ្តាតវែង ហើយស៊ីឃ្មុំ។ ជនល្មើសប្រមាញ់ខ្លាឃ្មុំយករោម និងប្រម៉ាត់ធ្វើថ្នាំចិនសែ រីឯសាច់ និងប្រអប់ជើង គេយកធ្វើស៊ុប ដែលជនជាតិអាស៊ីជឿថា ជាអាហារប៉ូវ។ ជួនកាលគេចិញ្ចឹមវាជាសត្វសំណប់ ដោយសារវាស្លូត និងមិនសូវធំ។ លោក Matt Hunt នាយកប្រតិបត្តិអង្គការ Free The Bears បានធ្វើការសង្គ្រោះខ្លាឃ្មុំប្រភេទនេះនៅកម្ពុជា១០ឆ្នាំមកហើយ។ គាត់និយាយថា៖ «អនាគតខ្លាឃ្មុំ យូរអង្វែងទៅមុខទៀត មិនល្អទេ ដោយសារវាបាត់បង់ជម្រក ចំនួនមនុស្សកើនឡើង ហើយជាពិសេសនោះគឺការប្រមាញ់ដែលកើនឡើង ដោយសារតែអ្នកមានជាច្រើនមានជំនឿលើថ្នាំបុរាណ ហើយគេចេះតែចង់សាកម្ហូបសត្វព្រៃផ្តេសផ្តាស់ដែលជាម្ហូបកម្រ ហើយដែលគ្មានអ្វីពិសេសនោះ»។ លោកជួន វុទ្ធី ជានាយកគម្រោងនៅអង្គការFree The Bears។ ថ្មីៗនេះលោកទទួលបានរង្វាន់៥ម៉ឺនដុល្លារសម្រាប់កិច្ចប្រឹងប្រែងរបស់លោកក្នុងការអភិរក្សខ្លាឃ្មុំ១៥ឆ្នាំមកនេះ។ គាត់និយាយថា៖ «អង្គការ Free The Bears សហការជាមួយរដ្ឋបាលព្រៃឈើនៃប្រទេសកម្ពុជារួមគ្នាធ្វើការបង្ក្រាបបទល្មើសសត្វព្រៃ ហើយនិងនាំយកខ្លាឃ្មុំមកដាក់ចិញ្ចឹមនៅសួនសត្វភ្នំតាម៉ៅនេះ ធ្វើឲ្យខ្លាឃ្មុំបានទទួលនូវលក្ខខណ្ឌរស់នៅល្អ ដែលបានផ្តល់ទីជម្រកធំទូលាយ មានរបស់លេងច្រើននៅទីនេះ។ អញ្ចឹងធ្វើឲ្យខ្លាឃ្មុំមានភាពសប្បាយរីករាយច្រើនជាងកាលពីមុន»។ ក្នុងឆ្នាំ២០០៩ កូនខ្លាឃ្មុំ២ក្បាលត្រូវសង្គ្រោះ ដែលបង្ហាញពីភាពឃោរឃៅនៃការជួញដូរខ្លាឃ្មុំ។ កូនខ្លាឃ្មុំទាំងពីររបួសជិតស្លាប់ដោយសារអន្ទាក់ មុនពេលមន្ត្រីអង្គភាពសង្គ្រោះសត្វព្រៃនៃអង្គការ Wildlife Alliance សង្គ្រាះវា ក្រោយពីទទួលបានព័ត៌មាន។ កូនខ្លាឃ្មុំទាំងពីរបានរួចជីវិត និងត្រូវបានថែរក្សាដោយអង្គការ Free The Bears។ អង្គការនេះបានខិតខំបង្កើតមណ្ឌលសង្គ្រោះសត្វព្រៃ ដោយបណ្តុះបណ្តាលអង្គភាពពង្រឹងច្បាប់ ធ្វើកម្មវិធីអប់រំអំពីបរិស្ថាន។ ទោះជាយ៉ាងនេះក្តី ចំនួនខ្លាឃ្មុំនៅតែធ្លាក់ចុះ។ អ្នកជំនាញនៅអង្គការអន្តរជាតិអភិរក្សធម្មជាតិ International Union for Conservation of Nature ប៉ាន់ស្មានថា ចំនួនខ្លាឃ្មុំធ្លាក់ចុះ៣០%ក្នុងពេល៣០ឆ្នាំនេះ។ លោក Matt Hunt និយាយថា បើរដ្ឋាភិបាលមិនបង្កើនកម្មវិធីការពារខ្លាឃ្មុំទេ នោះខ្លាឃ្មុំនឹងដាច់ពូជពីក្នុងព្រៃប្រទេសកម្ពុជា។ លោកនិយាយថា៖ «យើងត្រូវមានតំបន់អភិរក្ស និងត្រូវការវិធានការពង្រឹងច្បាប់ច្រើនថែមទៀត។ យើងត្រូវទប់ស្កាត់ការនាំខ្លាឃ្មុំឆ្លងព្រំដែន។ ក្រៅពីនេះ ត្រូវបង្កើនការយល់ដឹងថែមទៀត ដើម្បីធានាថា អតិថិជនឈប់ចង់បរិភោគស៊ុបក្រញាំជើងខ្លាឃ្មុំ នៅភោជនីយដ្ឋាន ឬឈប់ប្រើប្រម៉ាត់ខ្លាឃ្មុំ ពេលគេឈឺ ឬពេលគេទៅពេទ្យបុរាណ»។ ដោយសារការរុករានព្រៃ និងការប្រមាញ់នៅមានសកម្មភាពខ្លាំងក្លានៅឡើយ ដូច្នេះគេមិនដឹងថា តើការសង្គ្រាះខ្លាឃ្មុំនេះអាចឈ្នះសកម្មភាពខុសច្បាប់ឬយ៉ាងណាទេ៕ This posting includes an audio/video/photo media file: Download Now |
| នយោបាយថ្នាក់មូលដ្ឋានមានឡូកឡំដោយការរើសអើង Posted: 11 Jun 2012 08:38 PM PDT អ្នកគាំទ្រគណបក្សប្រឆាំងម្នាក់បានចោទប្រកាន់ មេឃុំមកពីគណបក្សប្រជាជនកម្ពុជាក្នុងខេត្តកណ្ដាលមួយរូបថាបានបដិសេធចុះហត្ថលេខាលើឯកសារកម្ចីប្រាក់ធនាគាររបស់អ្នកស្រី ដោយសារតែគាត់ជាសកម្មជនរបស់គណបក្សសម រង្ស៊ី។ អ្នកស្រីមឿន សាវុន បានយកឯកសារសុំខ្ចីប្រាក់ពីធនាគារអេស៊ីលីដានូវទឹកប្រាក់ចំនួន ៤,០០០ដុល្លារអាមេរិកសម្រាប់ពង្រីកអាជីវកម្មផ្នែកដឹកជញ្ជូនទំនិញ។ ប៉ុន្តែលោកសន សឿន មេឃុំកំពង់ចំលង ស្រុកខ្សាច់កណ្តាល បដិសេធចុះហត្ថលេខាលើឯកសាររបស់អ្នកស្រី។ លោកសន សឿន បានធ្វើជាមេឃុំនេះចំនួនដប់ឆ្នាំមកហើយ។ ហើយគាត់បានជាប់ឆ្នោតជាថ្មី ក្នុងការបោះឆ្នោតជ្រើសរើសក្រុមប្រឹក្សាឃុំសង្កាត់កាលពីថ្ងៃទី៣ ខែមិថុនានេះ។ អ្នកស្រីមឿន សាវុន បានអះអាងថាអ្នកស្រីបានទៅជួបមេឃុំខាងលើចំនួនបួនដង ប៉ុន្តែមេឃុំដដែលនៅតែមិនព្រមផ្តល់ហត្ថលេខា។ «ខ្ញុំខ្វះខាតលុយកាក់ធ្វើដើមទុន ដូច្នេះខ្ញុំខ្ចីលុយធនាគារអេស៊ីលីដា។ គេឲ្យខ្ញុំហើយតែដល់ពេលយកក្រដាសឲ្យគេចុះហត្ថលេខា លោកមេឃុំសន សឿន មិនព្រមចុះហត្ថលេខា គាត់ថា ខ្ញុំហ្នឹងមិនជឿជាក់លើគាត់។ ខ្ញុំសួរថា ម៉េចថា ខ្ញុំមិនជឿជាក់គាត់ថា មិនបាច់សួរទេ គាត់មិនចុះហត្ថលេខាឲ្យទេ។ ខ្ញុំយកឯកសារទៅឲ្យគាត់ចុះហត្ថលេខាចំនួនបួនដង។ ខ្ញុំបានប្រាប់គាត់ថាឲ្យចុះហត្ថលេខាឲ្យខ្ញុំបន្តិចមកខ្ញុំប្រញ៉ាប់រកស៊ី គាត់មិនព្រមហើយគាត់ថា ទៅប្តឹងដល់ណាទៅៗ។ គាត់ថាខ្ញុំមិនជឿជាក់ហ្នឹងបានន័យថា ខ្ញុំជាគណបក្សសម រង្ស៊ី។ ប្អូនខ្ញុំគណបក្សសម រង្ស៊ី ហើយគ្រួសារខ្ញុំបោះឆ្នោតឲ្យគណបក្សសម រង្ស៊ី»។ ការខ្ចីបុលពីធនាគារនៅក្នុងប្រទេសកម្ពុជាតម្រូវឲ្យភាគីអ្នកសុំខ្ចីមានអចលនវត្ថុដាក់ដម្កល់ហើយក្រុមអ្នកតាមដានវាយតម្លៃរបស់ធនាគារនោះនឹងចុះសិក្សាផ្ទាល់លើវត្ថុបញ្ចាំនោះមុននឹងសម្រេចផ្តល់កម្ចី។ ឯកសារដម្កល់អចលនទ្រព្យនោះតម្រូវឲ្យមានការទទួលស្គាល់ពីភ្នាក់ងារអាជ្ញាធរមូលដ្ឋានជាចាំបាច់។ ការបដិសេធចុះហត្ថលេខាលើឯកសារនោះ បានធ្វើឲ្យអ្នកស្រីមឿន សាវុន បញ្ឈប់ការខ្ចីសម្រាប់ពង្រីកមុខរបររបស់ខ្លួន។ «ដល់ពេលគេមិនចុះហត្ថលេខា ខ្ញុំឈប់ខ្ចី»។ លោកសន សឿន មេឃុំដែលជាប់ឆ្នោតជាលើកទីបី បានបដិសេធថាលោកមិនមានការរើសអើងផ្នែកនយោបាយណាមួយនោះទេ។ «ខ្ញុំមិននិយាយភាសាថា ខ្ញុំមិនជឿជាក់នោះទេ។ ខ្ញុំបដិសេធនោះដោយសារតែឈ្មោះនោះជំពាក់លុយគេច្រើនក្នុងឃុំអញ្ចឹងខ្ញុំមិនអាចចុះហត្ថលេខាបានទេ។ បើរត់ការឲ្យគេមិនបានពិបាកខ្ញុំដដែលខ្ញុំមិនទៅប្រកាន់នយោបាយអីទេ។ ឈ្មោះនេះខ្ញុំមិនដឹងថា ជាគណបក្សណាផងព្រោះគាត់មិនមែនជាសកម្មជន គាត់ជាប្រជាជនសុទ្ធសាធហ្នឹង»។ កញ្ញាប៊ុត ប៊ុនសីហា មន្ដ្រីផ្នែកការិយាល័យវិវាទរបស់ធនាគារ អេស៊ីលីដា មានប្រសាសន៍ថា ប្រសិនបើអតិថិជនមានបញ្ហាដូចខាងលើនេះ អាចមកជូនដំណឹងដល់ការិយាល័យកណ្តាលរបស់ធនាគារ។ មួយវិញទៀតរាល់បញ្ហាដែលកើតឡើងពាក់ព័ន្ធជាមួយនឹងអតិថិជនអ្នកខ្ចីប្រាក់នឹងត្រូវដោះសា្រយតាមផ្លូវតុលាការ រីឯអាជ្ញាធរនឹងមិនជាប់ពាក់ព័ន្ធក្នុងការដោះស្រាយនោះទេ។ «តាមផ្លូវច្បាប់អាជ្ញាធរមានសិទ្ធិជួយសម្របសម្រួលតែមិនមានសិទ្ធិក្នុងការដោះស្រាយទេ។ ធនាគារយកការដោះស្រាយតាមនីតិវិធីច្បាប់គឺតុលាការ»។ យោងតាមលទ្ធផលឆ្នោតជាបណ្តោះអាសន្នរបស់គណៈកម្មាធិការជាតិរៀបចំការបោះឆ្នោតបានឲ្យដឹងថា ក្នុងឃុំកំពង់ចំលង នៃខេត្តកណ្តាល គណបក្សប្រជាជនកម្ពុជាទទួលបានសំឡេងគាំទ្រចំនួន១,៦៩៤សំឡេងតាមពីក្រោយដោយគណបក្សជំទាស់សម រង្ស៊ី ដែលទទួលបាន ៥១៦សំឡេង។ គណបក្សសិទ្ធិមនុស្សឈរនៅលំដាប់ទី៤ និងគណបក្សសញ្ជាតិកម្ពុជាស្ថិតក្នុងលំដាប់ទី៥៕ This posting includes an audio/video/photo media file: Download Now |
| អ្នកទោសបឹងកក់ធ្វើកូដកម្មអត់អាហារ Posted: 11 Jun 2012 08:04 PM PDT ក្រុមមន្ត្រីឃ្លាំមើលការរំលោភសិទ្ធិមនុស្សបាននិយាយនៅថ្ងៃច័ន្ទនេះថា មានតំណាងប្រជាពលរដ្ឋបឹងកក់ចំនួនបួននាក់នៅក្នុងចំណោម ១៥នាក់ដែលកំពុងជាប់ឃុំឃាំងនៅពន្ធនាគារព្រៃស បានចាប់ផ្តើមធ្វើកូដកម្មអត់អាហារដើម្បីទាមទារឲ្យដោះលែងពួកគេចេញពីពន្ធនាគារនិងចូលរួមធ្វើកូដកម្មជាមួយប្រជាពលរដ្ឋ ដែលកំពុងតវ៉ានៅខាងក្រៅពន្ធនាគារ។ ការធ្វើកូដកម្មអត់អាហាររបស់អ្នកភូមិបឹងកក់ចំនួនបួននាក់ជាលើកដំបូងនេះ បានចាប់ផ្តើមពីល្ងាចថ្ងៃអាទិត្យ។ បើតាមមន្ត្រីសិទ្ធិមនុស្សបាននិយាយថាអ្នកទាំងបួន ដែលបានចាប់ផ្តើមអត់អាហារជាលើកដំបូងមានអ្នកស្រីទេព វន្នី តំណាងអ្នកភូមិបឹងកក់ដែលហ៊ានចេញមុខតវ៉ាដ៏លេចធ្លោជាងគេ អ្នកស្រីគង់ ចន្ថា អ្នកស្រីឆេង លាភ និងអ្នកស្រីសុង ស្រីលាភ។ លោកចាន់ សាវ៉េត មន្ត្រីឃ្លាំមើលការរំលោភសិទ្ធិមនុស្សរបស់អង្គការសិទ្ធិមនុស្សអាដហុកបាននិយាយថា លោកបានទទួលដំណឹងអំពីការធ្វើកូដកម្មអត់អាហាររបស់អ្នកភូមិបឹងកក់នេះដែរ។ ហើយលោកបានមានប្រសាសន៍ថា ពួកគេនឹងប៉ះពាល់ដល់សុខភាព ប្រសិនណាបើរដ្ឋាភិបាលមិនបានដោះស្រាយ។ «បើសិនជាគាត់ធ្វើអីញ្ចឹង។ នេះជាចំណុចមួយដែលធ្វើឲ្យរដ្ឋាភិបាលមានការភ្ញាក់អារម្មណ៍ដែរ។ ព្រោះគាត់នៅក្នុងពន្ធនាគារ គាត់នៅតែមានសិទ្ធិទាមទារតវ៉ាឲ្យដោះស្រាយលើបញ្ហាដីគាត់ដដែល»។ នៅក្នុងខណៈពេលដែលអ្នកភូមិបឹងកក់បានចាប់ផ្តើមធ្វើកូដកម្មអត់អាហារ ដើម្បីដាក់សម្ពាធដល់រដ្ឋាភិបាល ក្រុមអ្នកភូមិបឹងកក់នឹងសហគមន៍បុរីកីឡា ដោយមានការចូលរួមពីកុមារតូចៗបានយកញត្តិមកដាក់នៅពីមុខព្រះបរមរាជវាំងជាលើកទី២និងក្រសួងយុត្តិធម៌ឲ្យដោះលែងតំណាងពួកគេដែលកំពុងជាប់ឃុំឃាំង។ ការដាក់ញត្តិជាលើកទី២ របស់ប្រជាពលរដ្ឋត្រូវបានក្រុមមន្ត្រីព្រះបរមរាជវាំងឈ្មោះឡាំ ចំនាប់ បានអនុញ្ញាតឲ្យប្រជាពលរដ្ឋដាក់ញត្តិដោយផ្ទាល់ និងបានសន្យាថានឹងដោះស្រាយជូនពួកគេនៅក្នុងរយៈពេលពីរ ទៅបីថ្ងៃខាងមុខទៀត។ អ្នកស្រីយោម បុប្ផា អាយុ៣២ឆ្នាំ បានថ្លែងប្រាប់ក្រុមអ្នកកាសែតនៅមុខព្រះបរមរាជវាំង បន្ទាប់ពីអ្នកស្រីបានដាក់ញត្តិនៅក្នុងព្រះបរមរាជវាំងថា ពួកគេសង្ឃឹមថាព្រះមហាក្សត្រនឹងជួយអន្តរាគមដល់រដ្ឋាភិបាល ដើម្បីជួយឲ្យដោះលែងដល់ប្រជាពលរដ្ឋដែលកំពុងជាប់ឃុំឃាំង។ «ពួកខ្ញុំជឿជាក់ថា គាត់នឹងជួយព្រោះមហាក្សត្រជាម្លប់កូនចៅ។ អីចឹងកូនចៅរបស់គាត់កំពុងតែរងវេទនាហើយ កំពុងតែប្រឈមមុខនឹងសេចក្តីស្លាប់ហើយ។ ព្រះមហាក្សត្រគាត់នឹងអាណិត អាសូរដល់កូនចៅរបស់ព្រះអង្គ»។ ក្រុមអ្នកតវ៉ាដោយមានការចូលរួមពីកុមារតូចៗ បានស្រែកច្រៀងបទចម្រៀងដើម្បីឲ្យដោះលែងអ្នកភូមិ១៥នាក់នៅពីមុខព្រះបរមរាជវាំង រួចហើយបានបន្តទៅតវ៉ានៅពីមុខក្រសួងយុត្តិធម៌ទៀត។ អ្នកស្រីបូវ សោភ័ណ អាយុ៣២ឆ្នាំ ត្រូវជាប្អូនស្រីរបស់អ្នកស្រីបូវ សោភា ដែលកំពុងតែជាប់ឃុំឃាំងនៅក្នុងពន្ធនាគារព្រៃស បានអង្គុយបត់ជើងសំពះនៅពីមុខព្រះបរមរាជវាំង ដោយអ្នកស្រីបានមានប្រសាសន៍ថាមានតែព្រះមហាក្សត្រទេ ដែលអាចជួយដោះលែងប្រជាពលរដ្ឋចំនួន១៥នាក់ ឲ្យរួចផុតពីទុក្ខទោស។ «ពួកគាត់ជិតស្លាប់អស់ហើយ អត់អាហារពីរថ្ងៃហើយ។ មានតែព្រះមហាក្សត្រទេ ដែលជួយពួកទូលបង្គំបាន។ ប្រសិនបើមិនដូចច្នោះទេ ពួកគាត់នឹងអត់អាហារស្លាប់អស់ហើយ។ គាត់មានកូនបីនាក់ទៀតត្រូវចិញ្ចឹម ប្រសិនណាបើពួកគាត់ស្លាប់ទៅ តើមាននរណាមើលកូនគាត់»។ កាលពីសប្តាហ៍មុនអ្នកភូមិបឹងកក់និងបុរីកីឡាបានព្យាយាមដាក់ញត្តិរបស់ខ្លួននៅពីមុខព្រះបរមរាជវាំង។ ក៏ប៉ុន្តែគ្មានមន្ត្រីណាម្នាក់មកទទួលញត្តិទេ ទើបតែថ្ងៃច័ន្ទនេះ មានប្រជាពលរដ្ឋត្រូវបានអនុញ្ញាតឲ្យចូលក្នុងព្រះបរមរាជវាំងដើម្បីដាក់ញត្តិ។ នៅក្នុងញត្តិមួយច្បាប់ ដែលមានស្នាមផ្តិតមេដៃតំណាងប្រជាពលរដ្ឋនៅតំបន់បឹងកក់បានរៀបរាប់ពីទុក្ខសោក និងការទាមទារទំហំដី ១២,៤៤ហិកតាមកវិញក្រោយពីលោកនាយករដ្ឋមន្ត្រីហ៊ុន សែន បានធ្វើប្រទានកម្មដល់ពួកគេកាលពីខែសីហា ឆ្នាំ២០១១។ ការទាមទារនេះ មិនត្រឹមតែចង់បានដីមកវិញទេថែមទាំងចង់ឲ្យដោះលែងប្រជាពលរដ្ឋចំនួន ១៥នាក់ ដែលត្រូវបានអាជ្ញាធរចាប់ឃុំដាក់ពន្ធនាគារកាលពីជាកន្លះខែមុន៕ This posting includes an audio/video/photo media file: Download Now |
| You are subscribed to email updates from VOA News: ព័ត៌មាន To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
