VOA News: ព័ត៌មាន: “ចិនត្រៀមខ្លួននឹងឆ្លើយតបនឹងជម្លោះដែនសមុទ្រកាន់តែធ្ងន់ឡើងជាមួយហ្វីលីពីន” plus 5 more |
- ចិនត្រៀមខ្លួននឹងឆ្លើយតបនឹងជម្លោះដែនសមុទ្រកាន់តែធ្ងន់ឡើងជាមួយហ្វីលីពីន
- ក្រុមអ្នកបោះឆ្នោតជាតិអេហ្ស៊ីបពិចារណាអំពីជម្រើសប្រធានាធិបតីដ៏តិចតួច
- វ្ល៉ាដឹមៀរ ពូទីនស្បថចូលកាន់ដំណែងជាប្រធានាធិបតីរុស្ស៊ីអណត្តិទីបី
- រដ្ឋាភិបាលផ្អាកផ្តល់ដីសម្បទានដល់ក្រុមហ៊ុនឯកជន
- បងរបស់មន្រ្តីរាជអាវុធហត្ថដែលត្រូវបានបាញ់សម្លាប់មិនទទួលស្គាល់ការស៊ើបអង្កេតរដ្ឋាភិបាល
- ការបោះឆ្នោតនៅកម្ពុជា៖ ការចូលរួមរបស់ពលរដ្ឋក្នុងវិស័យនយោបាយនិងការបោះឆ្នោត
| ចិនត្រៀមខ្លួននឹងឆ្លើយតបនឹងជម្លោះដែនសមុទ្រកាន់តែធ្ងន់ឡើងជាមួយហ្វីលីពីន Posted: 08 May 2012 08:14 AM PDT ប្រទេសចិនប្រាប់ឲ្យដឹងថា ខ្លួនត្រៀមខ្លួនជាស្រេចដើម្បីធ្វើការឆ្លើយតបនឹងការធ្វើឲ្យជម្លោះរីកកាន់តែធំឡើងដោយប្រទេសហ្វីលីពីន នៅពេលដែលភាពតានតឹងនៃភាពមិនចាញ់មិនឈ្នះដែលមានរយៈពេលមួយខែ បានបន្តកើតមានឡើងលើប្រជុំកោះមានជម្លោះក្នុងសមុទ្រចិនខាងត្បូង។ ទីភ្នាក់ងារព័ត៌មាន Xinhua ផ្លូវការនៃប្រទេសចិនបានដកស្រង់សម្តីអនុរដ្ឋមន្រ្តីការបរទេសចិន Fu Ying នៅថ្ងៃអង្គារនេះមកចុះផ្សាយថា រដ្ឋាភិបាលទីក្រុងប៉េកាំងមិនមានសុទិដ្ឋិនិយមអំពីជម្លោះលើតំបន់ Scarborough Shaol ដែលស្ថិតនៅប្រហែល២៣០គីឡូម៉ែត្រនៃផ្ទៃទឹកហ្វីលីពីនភាពពាយ័ព្យ។ កាលពីថ្ងៃច័ន្ទ លោក Fu បានកោះហៅអ្នកការទូតកំពូលហ្វីលីពីនម្នាក់នៅក្នុងទីក្រុងប៉េកាំងឲ្យធ្វើបទបង្ហាញពីស្ថានភាពនេះ។ លោក Fu បានជម្រាមភារៈធារី Alex Chua ថា រដ្ឋាភិបាលទីក្រុងម៉ានីលបានពង្រីកការតានតឹងហើយនឹងធ្វើឲ្យមានការលំបាកកាន់តែខ្លាំងឡើងដើម្បីឈានដល់ដំណោះស្រាយដោយការចរចា។ ភាពមិនចាញ់មិនឈ្នះបានចាប់ផ្តើមនៅថ្ងៃទី១០ខែមេសា នៅពេលដែលនាវាស៊ើបការណ៍របស់ចិនបានរារាំងនាវាចម្បាំងហ្វីលីពីនមិនឲ្យចាប់ពួកអ្នកនេសាទចិននៅជិតប្រជុំកោះថ្មដែលប្រទេសទាំងពីរបានទាមទារថាជាទឹកដីរបស់ខ្លួន។ ព័ត៌មានអន្តរជាតិសំខាន់ៗដទៃទៀត៖ <!--IMAGE-RIGHT-->អាមេរិក៖ ពួកមន្រ្តីសហរដ្ឋអាមេរិកនិយាយថា ពួកគេបានបញ្ឈប់ផែនការដាក់គ្រាប់បែករបស់ al-Qaida ដែលមានគោលបំណងកម្ទេចយន្តហោះដឹកអ្នកដំណើរដែលធ្វើដំណើរឆ្ពោះមកកាន់សហរដ្ឋអាមេរិក។ អ៊ីស្រាអែល៖ ពួកមន្រ្តីអ៊ីស្រាអែលនិយាយថា នាយករដ្ឋមន្រ្តី Benjamin Netanyahu បានធ្វើកិច្ចព្រមព្រៀងដ៏គួរឲ្យភ្ញាក់ផ្អើលមួយជាមួយគណបក្ស Kadima ដែលជាគណបក្សប្រឆាំង ដើម្បីបង្កើតរដ្ឋាភិបាលឯកភាពជាតិមួយ ដោយលុបចោលការបោះឆ្នោតមុនពេលកំណត់ដែលលោកបានអំពាវនាវឲ្យមាន។ ឥណ្ឌា-អាមេរិក៖ លោកស្រីរដ្ឋមន្រ្តីក្រសួងការបរទេសសហរដ្ឋអាមេរិក Hillary Clinton បានមានប្រសាសន៍ថា ប៉ាគីស្ថានគួរតែធ្វើឲ្យកាន់តែច្រើនឡើងថែមទៀតដើម្បីប្រយុទ្ធប្រឆាំងភេរវកម្ម ហើយថា សហរដ្ឋអាមេរិកបានតាំងចិត្តដេញតាមក្រុមភេរវកម្មដែលមានទីតាំងក្នុងប្រទេសប៉ាគីស្ថាន ដែលបានគំរាមកំហែងសហរដ្ឋអាមេរិកអាហ្វហ្គានីស្ថាននិងសម្ព័ន្ធមិត្តផ្សេងៗទៀត។ ចិន៖ បណ្តាញទូរទស្សន៍ Al-Jazeera ប្រាប់ឲ្យដឹងថា ស្ថានីយ៍នេះបានត្រូវបង្ខំឲ្យបិទកិច្ចប្រតិបត្តិការព័ត៌មានផ្សាយជាភាសាអង់គ្លេសរបស់ខ្លួននៅក្នុងប្រទេសចិន បន្ទាប់ពីអាជ្ញាធរបានបដិសេធពុំព្រមបន្តលិខិតអនុញ្ញាតិនិងទិដ្ឋាការសម្រាប់អ្នកយកព័ត៌មានរបស់ខ្លួននៅក្នុងទីក្រុងប៉េកាំង។ ថៃ៖ ជីតាជនជាតិថៃម្នាក់ដែលត្រូវតុលាការកាត់ទោសឲ្យជាប់ពន្ធនាគារ២០ឆ្នាំចំពោះការបញ្ជូនសារដែលត្រូវបានគេចាត់ទុកជាការប្រមាថមើលងាយដល់ក្រុមគ្រួសាររាជវង្សានុវង្ស បានស្លាប់នៅខណៈពេលស្ថិតនៅក្នុងគុក។ ក្រិក៖ គណបក្ស Syriza ដែលជាគណបក្សឆ្វេងជ្រុលនិយមរបស់ក្រិក នឹងព្យាយាមបង្កើតរដ្ឋាភិបាលឯកភាពជាតិមួយ បន្ទាប់ពីពួកអភិរក្សនិយមបានបរាជ័យប្រមូលផ្តុំគណបក្សផ្សេងទៀតដើម្បីបង្កើតរដ្ឋាភិបាលចម្រុះ។ ចិន-អាមេរិក៖ មន្រ្តីជាន់ខ្ពស់ក្រសួងការពារប្រទេសចិននិងសហរដ្ឋអាមេរិកបានព្រមព្រៀងគ្នាធ្វើកិច្ចសហប្រតិបត្តិការលើបញ្ហាការគំរាមកំហែងសន្តិសុខតាមប្រព័ន្ធ អ៊ីនធឺណិត បើទោះបីមានការចោទប្រកាន់កាលពីពេលថ្មីៗនេះថា ចិនបានស្ថិតនៅពីខាងក្រោយនៃការវាយប្រហារតាមប្រព័ន្ធអ៊ីនធឺណិតជាច្រើនប្រឆាំងបណ្តាញអ៊ីនធឺណិតសហរដ្ឋអាមេរិក។ ស៊ីរី៖ ស្ថានបេសកម្មរបស់អង្គការសហប្រជាជាតិនៅក្នុងរដ្ឋធានីនៃប្រទេសស៊ីរី បានប្តូរទីតាំងទៅកាន់ទីក្រុងហូមស៍ដ៏ខ្ទេចខ្ទាំវិញ នៅពេលដែលអ្នកសង្កេតការណ៍បន្តឃ្លាំមើលកិច្ចព្រមព្រៀងឈប់បាញ់គ្នាដ៏ប្រេះស្រួយរវាងរដ្ឋាភិបាលនិងពួកឧទ្ទាម។ សូម៉ាលី៖ ពួកអ្នកឃើញហេតុការណ៍ផ្ទាល់នឹងភ្នែកនិយាយថា ការវាយប្រហារដោយគ្រាប់កាំភ្លើងធំនៅក្នុងរដ្ឋធានី Mogadishu នៃប្រទេសសូម៉ាលីបានសម្លាប់មនុស្ស៧នាក់។ <!--AV--> This posting includes an audio/video/photo media file: Download Now |
| ក្រុមអ្នកបោះឆ្នោតជាតិអេហ្ស៊ីបពិចារណាអំពីជម្រើសប្រធានាធិបតីដ៏តិចតួច Posted: 08 May 2012 02:02 AM PDT រយៈពេលប៉ុន្មានសប្តាហ៍ប៉ុណ្ណោះ មុនពេលដែលប្រជាពលរដ្ឋអេហ្ស៊ីបចេញទៅបោះឆ្នោត ក្រុមអ្នកបោះឆ្នោតជាច្រើននៅមិនទាន់សម្រេចចិត្ត ថាតើបេក្ខជនមួយណា គួរក្លាយជាប្រធានាធិបតីដំបូងបង្អស់ បន្ទាប់ពីការធ្វើបដិវត្តកន្លងមក។ បច្ចុប្បន្ននេះ ឆាកនយោបាយនៅទីក្រុងឡឺគែរ ហាក់មានភាពវីវក់ដូចការធ្វើចរាចរណ៍នៅក្នុងទីក្រុងអីចឹងដែរ។ នៅតាមដងផ្លូវនៃទីប្រជុំជនដ៏មមាញឹក ក្រុមអ្នកបោះឆ្នោតប្រកបដោយសក្តានុពល សម្តែងការបារម្ភអំពីការហាមប្រាមបេក្ខជននាំមុខគេ មិនឲ្យចូលក្នុងទិដ្ឋភាពនយោបាយទាំងអស់។ លោក សាឡោះ អាប៊ូ អ៊ីស្មាអែល (Salah Abu Ismail) ដែលជាអ្នកគាំទ្របេក្ខជនឥស្លាមដែលគ្មានសិទ្ធិឈរឈ្មោះ បាននិយាយថា សេចក្តីសម្រេចនេះមានន័យថា លោកនឹងមិនបោះឆ្នោតឲ្យបេក្ខជនណាមួយឡើយ។ លោក មហាមេឌ សាឡឹម (Mohamed Salem) បាននិយាយថា ដោយសារតែមិនជ្រើសរើសបេក្ខជនរបស់ក្រុមសាឡាហ្វីស លោកគ្មានផែនការទៅបោះឆ្នោតនោះទេ។ លោក និយាយបន្ថែមទៀតថា ប្រសិនបើលោកត្រូវទៅបោះឆ្នោតវិញ សន្លឹកឆ្នោតនោះនឹងបដិសេធបេក្ខជនដទៃទៀតទាំងអស់។ <!--IMAGE-RIGHT--> លោក សាឡឹម មានប្រសាសន៍ថា ការបណ្តេញចេញនេះបណ្តាលមកពីបុព្វហេតុនយោបាយ។ ការគិតបែបនេះ មានភាពស្រដៀងគ្នាជាមួយអ្នកសរសេរអត្ថបទដាក់លើនៅលើប្រព័ន្ធអ៊ីនធឺណិតនិងមនុស្សធម្មតា ដែលចោទសួរថាតើហេតុអ្វីបានជា លោក អាប៊ូ អ៊ីស្មាអ៊ែល (Abu Ismail) លោក អូស្មារ ស៊ូឡៃម៉ាន់ (Omar Suleiman) អតីតប្រធានចារកិច្ច និង លោក ខាយរ៉ាត់ អេលស្ហាទឹរ (Khairat el-Shater) បេក្ខជនមកពីគណបក្សភាតរភាពអ៊ីស្លាម (Muslim Brotherhood) មិនត្រូវបានអនុញ្ញាតឲ្យឈរឈ្មោះបោះឆ្នោត។ មានទ្រឹស្តីជាច្រើន រាប់ចាប់តាំងពីក្រុមប្រឹក្សាយោធាដែលគ្រប់គ្រងអំណាច ដែលព្យាយាមបំបែកការបោះឆ្នោតរបស់ក្រុមអ៊ីស្លាម រហូតដល់ការលើកកម្ពស់បេក្ខភាពជើងចាស់ គឺលោក អាម មូសា (Amr Moussa)។ មិនមែនមនុស្សគ្រប់គ្នា មើលឃើញបុព្វហេតុខ្មៅងងឹត នៅក្នុងសេចក្តីសម្រេចរបស់ចៅក្រមបោះឆ្នោតនោះទេ។ លោកស្រី សាឡា ប្រធានការិយាល័យ ដែលប្រាប់តែឈ្មោះខ្លួនឯង និយាយថា លោកស្រី ជឿជាក់លើប្រព័ន្ធតុលាការ ដែលជាស្ថាប័នមួយក្នុងចំណោមស្ថាប័នមួយចំនួនតូច នៅក្រោមអតីតប្រធានាធិបតី ហ៊ូស្នី មូបារ៉ាក់ (Hosni Mubarak) ដែលមានកត្តិយសជាស្ថាប័នឯករាជ្យ។ លោកស្រី បាននិយាយថា ប្រព័ន្ធតុលាការ មានសុចរិតភាព និងគូសបញ្ជាក់អំពីអ្វីដែលលោកស្រីពិនិត្យពិចារណាអំពីការព្រួយបារម្ភខាងផ្លូវច្បាប់ ទាក់ទងនឹងច្បាប់ស្តីពីបេក្ខភាពដែលនឹងឈរឈ្មោះបោះឆ្នោត។ លោក ហ៊ីសាម កាសេម អ្នកវិភាគនយោបាយនិងអ្នកបោះពុម្ពផ្សាយ យល់ស្របអីចឹងដែរ។ <!--IMAGE-LEFT--> «ឥឡូវនេះ ទ្រឹស្តីស្តីពីការផ្សំគំនិតគ្នា ត្រូវបានប្រើប្រាស់នៅគ្រប់រឿងរ៉ាវទាំងអស់នៅប្រទេសអេហ្ស៊ីប( Egypt)? ប៉ុន្តែ នៅពេលដែលអ្នកពិនិត្យមើលការងារនោះ និងរបៀបដែលគណៈកម្មការរៀបចំការបោះឆ្នោត អនុវត្តតាមនីតិវីធី។ វាច្បាស់ណាស់ថា មានកំហុសផ្នែកនីតិវិធី ដែលពួកគេបានផ្សព្វផ្សាយ និងធ្វើឲ្យមានភាពច្បាស់លាស់។» អារម្មណ៍ចំពោះព្យាករណ៍ទុកជាមុន នៅអេហ្ស៊ីប ត្រូវបានរារាំងដោយសារតែការផ្លាស់ប្តូរយ៉ាងខ្លាំងក្លា នៅក្នុងទិដ្ឋភាពនយោបាយស្តីពីថាតើប្រព័ន្ធតុលាការនឹងធ្វើកិច្ចការប្រកបដោយយុត្តិធម៌ដែរឬទេ ឬក៏អ្នកមានអំណាចធំនឹងមិនធ្វើកិច្ចការប្រកបដោយយុត្តិធម៌។ គណបក្សភាតរភាពអ៊ីស្លាម ទទួលបានការកោតសសើរជាយូរមកហើយចំពោះសកម្មភាពសប្បុរសធម៌ជាសម្ងាត់ និងការលះបង់ដើម្បីសាសនាអ៊ីស្លាម ហើយបានប្រែក្លាយសកម្មភាពនោះ ឲ្យទៅជាភាពជោគជ័យ នៅក្នុងការបោះឆ្នោតសភា។ ប៉ុន្តែ ការទទួលខុសត្រូវ ក៏មានការកើនឡើងដែរ។ អ្នកបោះឆ្នោតម្នាក់ឈ្មោះ លោកហ្កាម៉ាល់ អ៊ីប្រាហ៊ីម មហាម៉េត (Gamal Ibrahim Mohamed) មិនសប្បាយចិត្តឡើយ។ លោក មហាម៉េឌ បាននិយាយថា លោក បានគាំទ្រគណបក្សភាតរភាពអ៊ីស្លាម ក្នុងអំឡុងការបោះឆ្នោតសភា។ ប៉ុន្តែឥឡូវនេះ «ភាពលោភលន់របស់ពួកគេ បានក្លាយជាការពិតហើយ»។ លោក បានថ្លែងថា ពួកគេចង់បានក្តោបក្តាប់អំណាចដើម្បីប្រយោជន៍ផ្ទាល់ខ្លូន ដោយនិយាយបន្ថែមទៀតថា លោក នឹងបោះឆ្នោតគណបក្សអ្នកផ្សេងទៀត ដែលមិនមែនគណបក្សនេះទៀតទេ។ ដោយលោក អាល់ស្ហាទឹរ (al-Shater) ចាកចេញទៅ ឥឡូវនេះ គណបក្សភាតរភាព កំពុងដាក់ជំនួសបេក្ខជនបម្រុង គឺលោក មហាម៉េឌ មឹរស៊ី (Mohammed Mursi)វិញ។ លោក កាសេម ដែលជាអ្នកវិភាគនយោបាយ ជឿជាក់ថា ក្រុមអ្នកបោះឆ្នោតនឹងត្រូវបែកខ្ញែកក្នុងចំណោមបេក្ខជនបីរូប គឺលោក មឹរស៊ី ដែលលំដាប់ក្នុងជម្រើសទីពីរ អាចប៉ះប៉ូវដោយសារក្រុមអ្នកដើរតាម ប្រកបដោយការលះបង់ខ្ពស់ មានដូចជា លោក អាប់ឌែល ម៉ូណេម អាប៊ុល ហ្វាទូ (Abdel Moneim Aboul Fattouh) អតីតសមាជិកគណបក្សភារតភាពអ៊ីស្លាមដែរ ដែលទទួលបានការគោរពយ៉ាងទូលំទូលាយចំពោះការប្រឆាំងអស់រយៈពេល១ទសវត្សរ៍ទៅនឹងរដ្ឋាភិបាល និងលោក មូសា ដែលធ្លាប់ក្រោកឈរក្នុងព្រឹត្តការដើម្បីគាំទ្រឯករាជ្យភាព ទោះបីជាស្ថិតនៅក្នុងផ្នែកមួយរបស់ក្រុមលោកមូបារ៉ាក់ក៏ដោយ។ លោក កាសេម បានបន្ថែមថា ដោយមានដំណើរការថ្មីៗនៅឡើយ នេះជាការបោះឆ្នោតប្រកួតប្រជែងតំណែងប្រធានាធិបតីលើកទីពីរបស់អេហ្ស៊ីប ហើយក៏ជាលើកដំបូងដែរ ដែលសន្យាថានឹងផ្តល់ភាពស្របច្បាប់។ ដូច្នេះចំណាប់អារម្មណ៍ជាទូទៅ នឹងមានសារសំខាន់ខ្លាំងណាស់។ «ក្រុមអ្នកបោះឆ្នោតធម្មតា មិនមែនជាអ្នកដែលអាចត្រួតពិនិត្យកម្មវិធី ឬរបៀបវារៈរបស់បេក្ខជន ដែលមានន័យថា នៅទីបញ្ចប់ វានឹងស្ថិតនៅត្រង់បុគ្គលិកលក្ខណៈ។ ក្នុងករណីខ្លះ ប្រសិនបើអ្នកធ្វើសន្និសីទ ឬការជួបជុំគ្នាប្រកបដោយជោគជ័យ។ ពេលនោះ សម្លេងឆ្នោតរបស់អ្នក ក៏នឹងកើនឡើងភ្លាមៗដែរ។ ហើយបើសន្និសីទបន្ទាប់ ដែលមិនសូវល្អទេ។ សន្និសីទនោះនឹងធ្វើឲ្យធ្លាក់ចុះសម្លេងឆ្នោតជាមិនខាន»។ លោក កាសេម បានព្យាករណ៍ស្តីពីសប្តាហ៍ប្រកបដោយភាពអស្ថិរភាព និងលទ្ធផល ដែលមិនអាចព្យាការណ៍ទុកមុនបានទេ៕ ប្រែសម្រួលដោយ គឹង ភិរុណ This posting includes an audio/video/photo media file: Download Now |
| វ្ល៉ាដឹមៀរ ពូទីនស្បថចូលកាន់ដំណែងជាប្រធានាធិបតីរុស្ស៊ីអណត្តិទីបី Posted: 08 May 2012 01:11 AM PDT កាលពីថ្ងៃច័ន្ទលោក វ្ល៉ាដឹមៀរ ពូទីន នៃប្រទេសរុស្ស៊ីបានស្បថសច្ចាប្រណិធានចូលកាន់តំណែងជាប្រធានាធិបតីសម្រាប់អណត្តិទីបីជាប្រវត្តិសាស្ត្រ។ នៅក្នុងពិធីដ៏អធិកអធមមួយក្នុងវិមានក្រឹមទ្បាំងដែលមានការចូលរួមពីពួកឥស្សរជនប្រមាណ២ពាន់នាក់ លោកពូទីនបានដាក់ដៃលើសៀវភៅរដ្ឋធម្មនុញ្ញមួយហើយលោកបានស្បថថានឹង«គោរពនិងការពារសិទ្ធិនិងសេរីភាពរបស់ប្រជាពលរដ្ឋ។ ពួកប៉ូលីសបានបន្តឹងកិច្ចការពារសន្តិសុខនៅក្នុងរដ្ឋធានីម៉ូស្គូនៅមុនពេលសម្ពោធតំណែងនេះ។ពួកប៉ូលីសបានចាប់ខ្លួនបាតុករ១២០នាក់ដែលជាច្រើននាក់បានពាក់បូពណ៌សដែលបានក្លាយទៅជានិមិត្តរូបនៃចលនាប្រឆាំងនឹងលោក ពូទីនPutin។ លោកពូទីនPutin បានកាន់តំណែងនាយករដ្ឋមន្ត្រីនៃប្រទេសរុស្ស៊ីចាប់តាំងពីលោកបានលះបង់តំណែងប្រធានាធិបតីកាលពីឆ្នាំ២០០៨។លោកបានឈ្នះឆ្នោតនៅក្នុងការបោះឆ្នោតប្រធានាធិបតីកាលពីថ្ងៃទី៤ខែមីនាដោយមានការគាំទ្រយ៉ាងច្រើនលើសលប់។ក្រុមប្រឆាំងខាងនយោបាយបានជំទាស់នឹងជ័យជំនះនេះដោយហៅវាថាជាការបោះឆ្នោតគៃបន្លំ។ បារាំង៖ លោកហ្វ្រង់ស្វ័រ ហូឡង់ដ៍ Francois Hollande ប្រធានាធិបតីជាប់ឆ្នោតថ្មីនៃប្រទេសបារាំងបានចាប់ផ្តើមការងារបង្កើតរដ្ឋាភិបាលថ្មីមួយនៅក្រោយលោកបានទទួលជ័យជំនះនៅក្នុងការបោះឆ្នោតជាថ្មីកាលពីថ្ងៃអាទិត្យ។ លទ្ធផលចុងក្រោយបង្អស់កាលពីថ្ងៃច័ន្ទបង្ហាញថាលោកហូឡង់ដ៍បានទទួលសន្លឹកឆ្នោតគាំទ្រ៥១,៦ភាគរយ ចំណែកឯលោក នីកូឡាស សាកូហ្ស៊ី Nicolas Sarkozy បានទទួលសម្លេងឆ្នោតគាំទ្រ៤៨,៤ភាគរយ។ អតីតមេដឹកនាំគណបក្សសង្គមនិយមបារាំងដែលមានអាយុ៥៧ឆ្នាំរូបនេះនឹងចូលកាន់តំណែងប្រធានាធិបតីនៅថ្ងៃទី១៥ខែឧសភា។ ការបោះឆ្នោតនេះបានឆ្លុះបញ្ចាំងឱ្យឃើញការមិនយល់ព្រមរបស់ក្រុមពលរដ្ឋដល់ការកាត់បន្ថយចំណាយរបស់ប្រទេសនិងការដែលមានមនុស្សគ្មានការងារធ្វើច្រើននាក់។ លោក Hollande បានប្រឆាំងយ៉ាងខ្លាំងនឹងវិធានការចំណាយត្បិតត្បៀតយ៉ាងតឹងរ៉ឹងខាងសេដ្ឋកិច្ចជាច្រើននៅក្នុងប្រទេសបារាំង។នៅក្នុងការចេញបង្ហាញខ្លួនមួយនៅចំពោះមុខក្រុមអ្នកគាំទ្រលោកកាលពីថ្ងៃច័ន្ទ លោកHollande បានសន្យាថានឹងបើកធ្វើការចរចាជាថ្មីអំពីវិធានការចំណាយត្បិតត្បៀតដាក់កំហិតដោយសហភាពអឺរ៉ុប ហើយដែលបានគាំទ្រយ៉ាងខ្លាំងដោយលោកស្រីអធិការបតីអាល្លឺម៉ង់ អេនជេឡា ម៉ាគេល Angela Merkel និងលោក សាកូហ្ស៊ី។ ក្រិក៖ លោកអានតូនី សាម៉ារាស Antonis Samaras ប្រធានគណបក្សអភិរក្សនិយមនៃប្រទេសក្រិកបានចាប់ផ្តើមធ្វើការចរចាដើម្បីបង្កើតរដ្ឋាភិបាលចម្រុះមួយក្នុងពេលឆាប់នេះនៅពេលដែលពួកមេដឹកនាំអឺរុបបានសុំដល់រដ្ឋាភិបាលក្រុងអាតែនAthens ឱ្យបន្តគោរពតាមល័ក្ខខ័ណ្ឌនៃការផ្តល់ជំនួយសង្គ្រោះខាងហិរញ្ញវត្ថុ។ ពិភពលោក៖ មានភាពមិនទៀងទាត់នៅក្នុងទីផ្សារហិរញ្ញវត្ថុពិភពលោកក្រោយការបោះឆ្នោតក្នុងប្រទេសក្រិកនិងប្រទេសបារាំងបានបង្កើនកង្វល់អំពីអនាគតនៃវិធានការចំណាយត្បិតត្បៀតដើម្បីជួយសង្គ្រោះរដ្ឋាភិបាលអឺរ៉ុបដែលជំពាក់បំណុលច្រើននិងសេដ្ឋកិច្ចប្រទេសទាំងនេះដែលមានបញ្ហាធ្ងន់ធ្ងរ។ ឥណ្ឌា៖ លោកស្រីរដ្ឋមន្ត្រីការបរទេសស.រ.អ. ហ៊ីឡារី គ្លីនតុនHillary Clinton បានមានប្រសាសន៍ថាប្រទេសប៉ាគិស្ថានត្រូវការធ្វើសកម្មភាពប្រឆាំងនឹងអ្នកបង្កើតក្រុមភេរវជនមួយដែលបានត្រូវចោទប្រកាន់លើការវាយប្រហារនៅក្នុងប្រទេសឥណ្ឌា។ ស.រ.អ៖ ពួកមន្ត្រីស.រ.អ.បាននិយាយថាពួកគេបានបញ្ឈប់គម្រោងការដាក់គ្រាប់បែកដោយពួកអាល់ កៃដា al-Qaida ដើម្បីបំផ្លាញយន្តហោះមួយគ្រឿងដែលធ្វើដំណើរមកកាន់ប្រទេសអាមេរិក។ ស៊ីរី៖ ពួកសកម្មជនស៊ីរីនិយាយថាមនុស្សនៅក្នុងក្រុងនិងភូមិបះបោរនៅទូទាំងប្រទេសបានធ្វើពហិការដោយភាគច្រើនមិនចូលរួមក្នុងការបោះឆ្នោតសភាចាត់ចែងដោយរដ្ឋាភិបាលដែលក្រុមប្រឆាំងធំៗបានបដិសេធដោយថាជាការបោកបញ្ឆោត។ ប៉ាគីស្ថាន៖ ពួកមន្ត្រីស.រ.អ.បាននិយាយថាពួកគេនឹងមិនធ្វើការចរចាជាមួយពួកអាល់ កៃដា al-Qaida ទេអំពីជោគវាសនារបស់អ្នកធ្វើការអាមេរិកាំងផ្នែកផ្តល់ជំនួយអាយុ៧០ឆ្នាំដែលបានត្រូវចាប់ជាចំណាប់ខ្មាំងក្នុងប្រទេសប៉ាគិស្ថានទេទោះណាជាមានការអង្វរកតាមវីដេអូរបស់បុរសនេះសុំឱ្យលោកប្រធានាធិបតីបារ៉ាក់អូបាម៉ាជួយលោកក៏ដោយ។ <!--AV--> This posting includes an audio/video/photo media file: Download Now |
| រដ្ឋាភិបាលផ្អាកផ្តល់ដីសម្បទានដល់ក្រុមហ៊ុនឯកជន Posted: 07 May 2012 06:48 PM PDT រាជរដ្ឋាភិបាលកម្ពុជាបានសម្រេចផ្អាកផ្តល់ដីសម្បទានសេដ្ឋកិច្ចដល់ក្រុមហ៊ុនឯកជនជាបណ្ដោះអាសន្នបន្ទាប់ពីមានរបាយការណ៍ឯករាជ្យមួយបង្ហាញពីគ្រោះថ្នាក់នៃការផ្តល់ដីសម្បទានយ៉ាងរីករាលដាល និងខ្វះតម្លាភាព។ នៅក្នុងបទបញ្ជាមួយនៅថ្ងៃចន្ទនេះ លោក ហ៊ុន សែន នាយករដ្ឋមន្ដ្រីកម្ពុជាបានហៅសេចក្ដីសម្រេចនេះថា ដោយសារតែ «មានតម្រូវការចាំបាច់ និងជាបន្ទាន់» សម្រាប់ការគ្រប់គ្រងដីសម្បទានសេដ្ឋកិច្ច។ ជាមួយគ្នានេះ លោកនាយករដ្ឋមន្ដ្រីខ្មែរបានបញ្ជាឲ្យមានការត្រួតពិនិត្យ និងដកហូតដីសម្បទានពីក្រុមហ៊ុនឯកជនណាដែលប្រើប្រាស់អាជ្ញាបណ្ណរបស់ខ្លួនសម្រាប់ធ្វើការកាប់បំផ្លាញព្រៃឈើ បំពានដីរបស់ប្រជាពលរដ្ឋ និងដីរបស់សហគមន៍។ បន្ថែមពីនោះទៀតលោក ហ៊ុន សែន បានបង្គាប់ឲ្យធ្វើការត្រួតពិនិត្យពីការប៉ះពាល់ដល់ដីសហគមន៍ និងជីវភាពប្រជាពលរដ្ឋដោយសារក្រុមហ៊ុនដីសម្បទានសេដ្ឋកិច្ច។ នៅក្នុងរបាយការណ៍ស្ដីពីសិទ្ធិដីធ្លី និងលំនៅដ្ឋានកាលពីខែមិនា អង្គការការពារសិទ្ធិមនុស្ស អាដហុកបានគូសបញ្ជាក់ថា រហូតមកដល់ឆ្នាំ២០១១ រដ្ឋាភិបាលកម្ពុជាបានពន្លឿនផ្តល់ដីសម្បទានសេដ្ឋកិច្ចរហូតដល់យ៉ាងតិចជិត ២,៣លានហិចតា ដល់ក្រុមហ៊ុនឯកជនចំនួន២២៥ សម្រាប់ធ្វើការវិនិយោគក្នុងវិស័យកសិឧស្សហកម្ម ជាពិសេសដំណាំកៅស៊ូ និងការរុករកធនធានរ៉ែ។ ដីសម្បទានទាំងនោះមានរយៈពេលពី៧០ ទៅ៩៩ឆ្នាំ។ អង្គការដដែលរកឃើញថា ក្នុងចំណោមអនុក្រិតសរុបចំនួន ១២៣ ដែលសម្រេចផ្ដល់សម្បទានដីនោះមានអនុក្រិតចំនួន៥៥ ពុំមានក្រុមហ៊ុនច្បាស់លាស់។ ម្យ៉ាងទៀតការផ្ដល់ដីសម្រាប់ការវិនិយោគលើវិស័យកសិឧស្សាហកម្មនោះបានធ្វើឲ្យប៉ះពាល់យ៉ាងច្រើនដល់ដីក្នុងតំបន់ការពារជម្រកសត្វព្រៃ និងឧទ្យានជាតិ ធ្វើឡើងដោយមិនមានការអនុវត្តត្រឹមត្រូវតាមគោលការណ៍ច្បាប់ និងមានការដោះស្រាយដោយមានលក្ខណៈបំពានជាមួយប្រជាពលរដ្ឋដែលទទួលរងការប៉ះពាល់ដោយគម្រោងវិនិយោគ។ ការផ្ដល់ដីសម្បទានមាននៅក្នុងខេត្តចំនួនពី១៩ ភាគច្រើនក្នុងខេត្តភាគខាងជើង និងភាគឥ្ឍសានប្រទេសដូចជាកំពង់ឆ្នាំង កំពង់ធំ សៀមរាប រតនគិរី មណ្ឌលគិរី ព្រះវិហារ និងខេត្តស្ទឹងត្រែងជាដើម។ នេះបើយោងតាមរបាយការណ៍របស់អង្គការអាដហុក។ «យើងឃើញការអនុវត្តបទបញ្ជាមិនសូវមានប្រសិទ្ធិភាព។ អ្វីដែលជាបទបញ្ជាថ្ងៃនេះ យើងគាំទ្រដែរ ប៉ុន្ដែសំខាន់សុំទី១ ឲ្យមានការអនុវត្តបទបញ្ជាជានិរន្តរភាព និងទី២ បើអាជ្ញាធរមូលដ្ឋានណាមិនអនុវត្តបទបញ្ជាឲ្យបានត្រឹមត្រូវទេ ត្រូវតែហ៊ានដាក់ពិន័យ នោះទើបមានប្រសិទ្ធិភាព»។ លោក កឹម សុខា ដែលជាប្រធានគណបក្សជំទាស់សិទ្ធមនុស្សមានបីអសនៈក្នុងរដ្ឋសភា មានប្រសាសន៍ថា លោកនៅតែមិនមានជំនឿលើបទបញ្ជាខាងលើនោះឡើយ។ «គាត់ធ្វើនេះគ្រាន់តែចំណេញនយោបាយជិតបោះឆ្នោតឃុំសង្កាត់ទេ។ ខ្ញុំគ្មានជំនឿថា រដ្ឋាភិបាលដែលដឹកនាំដោយគណបក្សប្រជាជនអាចធ្វើដូច្នេះបាននោះទេ។ ដូចជានាយករដ្ឋមន្ដ្រីធ្លាប់សន្យាពីរឿងបញ្ឈប់ការកាប់ព្រៃឈើ រហូតដល់គាត់ហ៊ានសន្យាកាត់ក្បាលគាត់បើគាត់បង្រ្កាបមិនបាន តែឈើនៅតែកាប់»។ លោកនាយករដ្ឋមន្ដ្រីហ៊ុន សែន កាលពីថ្ងៃទី១១ ខែមេសា បានបញ្ជាឲ្យក្រសួងកសិកម្ម និងក្រសួងបរិដ្ឋាន ឲ្យពិចារណាឡើងវិញមុននឹងសម្រេចផ្តល់ដីសម្បទានសេដ្ឋកិច្ចដល់ក្រុមហ៊ុនឯកជន ដោយលោកសម្ដែងថា ការផ្តល់ដីសម្បទានសេដ្ឋកិច្ចមិនត្រឹមត្រូវនឹងនាំឲ្យមានការកាប់បំផ្លាញព្រៃឈើក្នុងប្រទេស។ This posting includes an audio/video/photo media file: Download Now |
| បងរបស់មន្រ្តីរាជអាវុធហត្ថដែលត្រូវបានបាញ់សម្លាប់មិនទទួលស្គាល់ការស៊ើបអង្កេតរដ្ឋាភិបាល Posted: 07 May 2012 06:37 PM PDT លោក អ៊ិន ស៊ីថា បងប្រុសបង្កើតរបស់លោកអ៊ិន រតនា មន្ត្រីកងរាជអាវុធហត្ថដែលត្រូវបានបាញ់សម្លាប់ជាមួយនឹងលោកឈុត វុទ្ធី សកម្មជនការពារព្រៃឈើកាលពីថ្ងៃទី២៦ កន្លងទៅនេះ បានអះអាងថា លោកមិនជឿទៅលើការស៊ើបអង្គេតរបស់រដ្ឋាភិបាលទេ ដោយលោកទាមទារឲ្យរកយុត្តិធម៌ឲ្យប្អូនប្រុសរបស់លោកដែលត្រូវបានស្លាប់បាត់បង់ជីវិត។ កាលពីថ្ងៃសៅរ៍សប្តាហ៍មុននេះ បន្ទាប់ពីមានការស៊ើបអង្គេតរយៈពេលតែបីថ្ងៃប៉ុណ្ណោះ រដ្ឋាភិបាលកម្ពុជាបានប្រញាប់ប្រញាល់បិទការស៊ើបអង្កេតរបស់ខ្លួនពាក់ព័ន្ធទៅនឹងករណីឃាតកម្មដ៏លេខធ្លោមួយទៅលើលោកឈុត វុទ្ធី ប្រធានអង្គការការពារធនធានធម្មជាតិ និងលោកអ៊ិន រតនា មន្ត្រីកងរាជអាវុធហត្ថ។ មន្ត្រីរដ្ឋាភិបាលបានអះអាងថា លោកឈុត វុទ្ធី ត្រូវបានលោកអ៊ិន រតនា បាញ់សម្លាប់ ចំណែកឯលោកអ៊ិន រតនា បានស្លាប់នៅពេលដែលរាកៃកាំភ្លើងក្រោយពេលដែលលោក រ៉ាន់ ប៊ូរ័ត្ន មន្ត្រីសន្តិសុខក្រុមហ៊ុនធីមប៊ឺគ្រីន (Timber Green) បានព្យាយាមទៅហាមឃាត់លោកអ៊ិន រតនា មិនឲ្យបាញ់។ លោក រ៉ាន់ ប៊ូរ័ត្ន មន្ត្រីសន្តិសុខក្រុមហ៊ុនធីមប៊ឺគ្រីន ត្រូវបានតុលាការខេត្តកោះកុងកាលពីសប្តាហ៍មុនបានចោទប្រកាន់ពីបទមនុស្សឃាតដោយអចេតនា ហើយកំពុងតែឃុំខ្លួនបណ្តោះអាសន្ននៅពន្ធនាគារខេត្តដើម្បីរង់ចាំជំណុំជម្រះទោស។ លោក អ៊ិន ស៊ីថា អាយុ៤៧ឆ្នាំ បងប្រុសបង្កើតរបស់លោកអ៊ិន រតនា បានថ្លែងប្រាប់វីអូអេសំឡេងសហរដ្ឋអាមេរិកតាមរយៈទូរសព្ទពីស្រុកកណ្តាលស្ទឹង ខេត្តកណ្តាលមកថា ព័ត៌មានជាការអះអាងរបស់រដ្ឋាភិបាលគឺជាការប្រឌិត។ លោកបានបញ្ជាក់ថា បើមានការារាំងមែនគ្រាប់កាំភ្លើងនឹងបាញ់ទៅលើអាកាស ឬបាញ់ពីចំហៀង មិនអាចបាញ់ត្រូវប្អូនប្រុសរបស់លោកចំនួនពីរគ្រាប់ទេ។ លោកបានចោទប្រកាន់ថា ប្អូនប្រុសរបស់លោក នឹងមានជនទី៣ សម្លាប់បំបិទមាត់ ហើយលោកទាមទារឲ្យប្អូនប្រុសរបស់លោកដែលបានស្លាប់ទៅមានកិត្តិយសផង។ «មនុស្សស្លាប់ទៅទាមទារជីវិតមកវិញ ក៏វាមិនបានដែរ! ព្រោះខ្ញុំចង់ឲ្យតែស្លាប់ទៅមានកិត្តិយស កុំឲ្យឈ្មោះគ្នាស្អុយគគ្រុកពេក។ ព្រោះដឹងហើយកងកម្លាំងចូលសាលា កាណាភ្ចុងគេមានទោសប៉ុន្មានឆ្នាំ បាញ់គេហ្នឹងប៉ុន្មានឆ្នាំ។ ហើយបើមានបំណងបាញ់ ព្រៃគគោកអីញ្ចឹង ហើយរត់ចូលព្រៃទៅដោយកាំភ្លើងនៅដៃ ក៏គ្មាននរណាធ្វើអី»។ លោក ទិត្យ សុធា សមាជិកគណៈកម្មាធិការស៊ើបអង្កេតករណីបាញ់សម្លាប់លោកឈុត វុទ្ធី និងលោកអ៊ិន រតនា នៅតែប្រកាន់ជំហរថាអ្វីដែលជាការអះអាងរបស់រដ្ឋាភិបាលគឺជាការពិត។ លោកបានមានប្រសាសន៍ការចោទប្រកាន់ថាលោកអ៊ិន រតនា ត្រូវបានសម្លាប់បំបិទមាត់គឺជាការប្រឌិតព័ត៌មាន។ «ដោយយោងទៅលើសាក្សីផ្ទាល់ភ្នែកដែលបានឆ្លើយ យើងចាត់ទុកថានេះ គឺជាចម្លើយពិតប្រាកដត្រឹមត្រូវ ហើយគឺជាលទ្ធផលមួយដែលយើងជឿជាក់ថាលទ្ធផលច្បាស់លាស់បំផុតនៃការងារស៊ើបអង្គេត បើទោះបីជារយៈពេលខ្លីក៏ដោយ។ ក៏ប៉ុន្តែហេតុផលបានបង្ហាញឲ្យឃើញច្បាស់លាស់នូវជុំវិញនៃការស៊ើបអង្កេតនេះ»។ អ្នកស្រី សម ចាន់ធី ភរិយារបស់លោកឈុត វុទ្ធី បានមានប្រសាសន៍ថាអ្នកស្រីមិនជឿថាលោក រ៉ាន់ ប៊ូរ័ត្ន ទៅទះកាំភ្លើងលោកអ៊ិន រតនា បណ្តាលឲ្យលោកអ៊ិន រតនា ត្រូវគ្រាប់ស្លាប់ទេ។ «បញ្ហាហ្នឹង ខ្ញុំដូចជាមិនសូវជឿច្បាស់ទេ ព្រោះដូចជាមិនដែលហេតុផលមកទះកាំភ្លើងនេះភ្លាម ហើយរាកៃទៅស្លាប់អ៊ិន រតនា នោះទេ។ វាឥតមានហេតុផលណា ដែលនិយាយរាកៃអីញ្ចឹងទេ»។ លោក ចាន់ សាវ៉េត មន្ត្រីផ្នែកស៊ើបអង្កេតរបស់សមាគមសិទ្ធិមនុស្សអាដហុកបាននិយាយថារបាយការណ៍របស់សមត្ថកិច្ចលោកមិនអាចទទួលយកបានទេ។ លោកបានមានប្រសាសន៍ថា គណៈកម្មាធិការស៊ើបអង្កេតនេះ ខ្វះចន្លោះច្រើន និងមិនបានស៊ើបអង្កេតឲ្យបានស៊ីជម្រៅ។ «ការធ្វើការស៊ើបអង្កេតស្ងាត់ៗ ភ្លាមៗ អ្នកឯងរៀបចំធ្វើអីញ្ចឹង ធ្វើយ៉ាងម៉េចនឹងឲ្យពលរដ្ឋគេជឿជាក់។ ព្រោះយើងឃើញថា ការជឿជាក់ល្គឹកណាត្រូវតែមានអំណេះអំណាងច្បាស់លាស់ បើអំណះអំណាងគ្រាន់តែនិយាយ ហើយយកមកនិយាយ ដើម្បីកែតម្រូវសភាពការណ៍អីញ្ចឹងម៉េចត្រូវ។ សភាពការណ៍កែតម្រូវ និងសភាពការណ៍កើតឡើងជាក់ស្តែង វាខុសគ្នា»។ លោក ឈុត វុទ្ធី សកម្មជនការពារព្រៃឈើ និងលោកអ៊ិន រតនា មន្ត្រីកងរាជអាវុធហត្ថត្រូវបានបាញ់សម្លាប់កាលពីថ្ងៃទី២៦ ខែមេសា នៅស្រុកមណ្ឌលសីម៉ា ខេត្តកោះកុង។ ការបាញ់សម្លាប់ដ៏គួរឲ្យសង្ស័យនេះត្រូវបានមន្ត្រីអង្គការសង្គមស៊ីវិល និងក្រុមគ្រួសារជនរងគ្រោះនៅតែសង្ស័យថាលោកឈុត វុទ្ធី ជាការបាញ់សម្លាប់គ្រោងទុក ហើយលោកអ៊ិន រតនា ជាការសម្លាប់បំបិទមាត់នឹងទាមទារឲ្យមានការស៊ើបអង្គេតដោយឯករាជ្យមួយបើទោះបីជារដ្ឋាភិបាលបានបិទបញ្ចប់ការស៊ើបអង្គេតរបស់ខ្លួនក៏ដោយ៕ This posting includes an audio/video/photo media file: Download Now |
| ការបោះឆ្នោតនៅកម្ពុជា៖ ការចូលរួមរបស់ពលរដ្ឋក្នុងវិស័យនយោបាយនិងការបោះឆ្នោត Posted: 07 May 2012 03:32 PM PDT នេះជាកម្មវិធីពិភាក្សាប្រចាំខែជាមួយនឹងលោកអ៊ូ វីរៈប្រធានមជ្ឈមណ្ឌលសិទ្ធិមនុស្សកម្ពុជាលើប្រធានបទទាក់ទងនឹងការបោះឆ្នោត។ លោកអ្នកអាចស្តាប់កម្មវិធីនេះ និងចូលរួមបញ្ចេញយោបល់ឬសួរជាសំណួរបានជារៀងរាល់ថ្ងៃច័ន្ទដើមខែនិមួយៗ។ សម្រាប់ខែឧសភា លោក អ៊ូ វីរៈ នឹងពិភាក្សាលើប្រធានបទ «ការចូលរួមរបស់ពលរដ្ឋក្នុងវិស័យនយោបាយនិងការបោះឆ្នោត»។ សូមស្តាប់សំឡេងទាំងស្រុងនៃកម្មវិធីហេឡូវីអូអេ ថ្ងៃទី០៧ ខែឧសភា ឆ្នាំ២០១២៖ <!--AV--> មធ្យោបាយចូលរួមពីប្រិយមិត្ត៖ ទូរស័ព្ទ ០១២ ៥១ ៥១ ៩៤ ហ្វេសប៊ុក facebook.com/voakhmer អ៊ីម៉េល hellovoa@voanews.com This posting includes an audio/video/photo media file: Download Now |
| You are subscribed to email updates from VOA News: ព័ត៌មាន To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
