VOA News: ព័ត៌មាន: “ស៊ីរីអំពាវនាវឱ្យអ.ស.បជួយ បន្ទាប់ពីមានការវាយប្រហារដ៏ប្រល័យ” plus 4 more |
- ស៊ីរីអំពាវនាវឱ្យអ.ស.បជួយ បន្ទាប់ពីមានការវាយប្រហារដ៏ប្រល័យ
- ដីសម្បទាននៅកម្ពុជាជារឿងព្រួយបារម្ភអំពីសិទ្ធិមនុស្ស៖ លោកសូរីយ៉ា សូប៊ីឌី
- ពលរដ្ឋកម្ពុជាជាង៨០ភាគរយយល់ថាប្រទេសជាតិដើរតាមទិសត្រឹមត្រូវ
- សកម្មជនព្រៃឈើមកគោរពវិញ្ញាណក្ខន្ធលោកឈុតវុទ្ធីនិងដើរល្បាតព្រៃនៅកោះកុង
- ហេឡូវីអូអេ ១០ ឧសភា ២០១២៖ កម្មវិធីហ្វឹកហាត់យុវជនអ្នកដឹកនាំអាស៊ានរបស់សហរដ្ឋអាមេរិក
| ស៊ីរីអំពាវនាវឱ្យអ.ស.បជួយ បន្ទាប់ពីមានការវាយប្រហារដ៏ប្រល័យ Posted: 11 May 2012 12:04 PM PDT នៅថ្ងៃសុក្រនេះ រដ្ឋាភិបាលស៊ីរីបានជំរុញឲ្យក្រុមប្រឹក្សាសន្តិសុខអង្គការសហប្រជាជាតិចាត់វិធានការដើម្បីប្រយុទ្ធប្រឆាំងនឹងភេរវកម្មមួយថ្ងៃ បន្ទាប់ពីការផ្ទុះគ្រាប់បែក២គ្រាប់ដែលបានសម្លាប់មនុស្សយ៉ាងហោចណាស់ក៏៥៥នាក់ដែរនៅក្នុងរដ្ឋធានីដាម៉ាស។ បណ្តាញផ្សាយព័ត៌មានរដ្ឋរាយការណ៍ថារដ្ឋាភិបាលបានធ្វើការអំពាវនាវនៅក្នុងលិខិតមួយផ្ញើរជូនក្រុមប្រឹក្សាសន្តិសុខនិងប្រមុខអង្គការសហប្រជាជាតិ លោក បាន គីមូន (Ban Ki-moon)។ បណ្តាញផ្សាយព័ត៌មាននោះប្រាប់ឲ្យដឹងថាឧក្រិដ្ឋកម្មរីកកាន់តែធំឡើងជាភស្តុតាងថាប្រទេសស៊ីរីកំពុងប្រឈមមុខនឹងការវាយប្រហារភេរវកម្មដែលដឹកនាំដោយក្រុមដែលបានទទួលការឧបត្ថម្ភពីបរទេស។ ការបំផ្ទុះគ្រាប់បែកក្នុងរថយន្តកាលពីថ្ងៃព្រហស្បតិ៍នៅក្នុងរដ្ឋធានីជាការវាយប្រហារដ៏ប្រល័យបំផុតនៅក្នុងប្រទេសស៊ីរីចាប់តាំងពីការងើបបះបោរប្រឆាំងរដ្ឋាភិបាលដែលបានចាប់ផ្តើមកាលពី១៤ខែមុន។ ទោះបីមានអំពើហិង្សាក៏ដោយ ពួកអ្នកសង្កេតការណ៍អង្គការសហប្រជាជាតិលើបទឈប់បាញ់គ្នាដ៏ប្រេះស្រួយរវាងរដ្ឋាភិបាលនិងពួកឧទ្ទាមដែលបានធ្វើដំណើរទៅកាន់រដ្ឋធានីដាម៉ាសនៅថ្ងៃសុក្រនេះ។ ព័ត៌មានអន្តរជាតិសំខាន់ៗផ្សេងទៀត៖ <!--IMAGE-RIGHT--> ហ្វីលីពីន/ចិន៖ ហ្វូងបាតុកររាប់រយនាក់បានប្រមូលផ្តុំគ្នានៅខាងក្រៅស្ថាតទូតចិនក្នុងរដ្ឋធានីម៉ានីលនៅថ្ងៃសុក្រនេះដើម្បីបង្ហាញការគាំទ្រដល់ប្រទេសហ្វីលីពីននៅក្នុងភាពមិនចាញ់មិនឈ្នះជាមួយចិនលើបញ្ហាប្រជុំកោះក្នុងសមុទ្រចិនខាងត្បូង។ អេហ្ស៊ីប៖ បេក្ខជននាំមុខ២នាក់នៅក្នុងការបោះឆ្នោតប្រធានាធិបតីនៅខែនេះក្នុងប្រទេសអេហ្ស៊ីបបានចូលរួមនៅក្នុងការជជែកដេញដោលជ្រើសរើសប្រធានាធិបតីលើកដំបូង។ ស.រ.អា៖ សហរដ្ឋអាមេរិក បានចេញផ្សាយអតិរេកថវិការបស់ខ្លួនលើកដំបូងនៅក្នុងរយៈពេលជិត៤ឆ្នាំ។ក្រសួងរតនាគារបានប្រាប់ឲ្យដឹងកាលពីថ្ងៃព្រហស្បតិ៍ថាប្រទេសអាមេរិកបានទទួលប្រាក់ចំណូលកាលពីខែមុនច្រើនជាងខ្លួនចំណាយជាលើកទីមួយចាប់តាំងពីខែកញ្ញាឆ្នាំ២០០៨មក ពោលគឺមុនពេលដំណើរធ្លាក់ចុះនៃសេដ្ឋកិច្ចសកលលោក។ ស.រ.អា៖ គណៈកម្មាធិការនៃអ្នកឯកទេសសហរដ្ឋអាមេរិក បានផ្តល់អនុសាសន៍ដល់ការអនុម័តរបស់រដ្ឋាភិបាលសហព័ន្ធលើឱសថជាលើកដំបូងដែលបានបង្ហាញពីការរារាំងមេរោគហ៊ីវ (HIV) ដែលបណ្តាលឲ្យកើតជំងឺអេដស៍ (AIDS)។ ឥណ្ឌូនេស៊ី/រុស្ស៊ី៖ មន្រ្តីឥណ្ឌូនេស៊ីនិងរុស្ស៊ី បានសន្យាធ្វើកិច្ចសហប្រតិបត្តិការគ្នានៅក្នុងការស៊ើបអង្កេតពីបុព្វហេតុ ដែលនាំឲ្យយន្តហោះដឹកអ្នកដំណើររុស្ស៊ីធ្លាក់នៅក្នុងតំបន់ភ្នំភ្លើងដែលមានសភាពធម្មតានាភាគខាងត្បូងនៃរដ្ឋធានីហ្សាកាតា (Jakarta) នៅសប្តាហ៍នេះ។ ក្រិក៖ ពួកមេដឹកនាំនៃគណបក្សសង្គមនិយមនិងគណបក្សអភិរក្សនិយមនៃប្រទេសក្រិក បានជួបគ្នាក្នុងរដ្ឋធានីអាតែន (Athen) នៅថ្ងៃសុក្រនេះដើម្បីធ្វើកិច្ចខិតខំប្រឹងប្រែងចុងក្រោយដើម្បីឈានទៅដល់កិច្ចព្រមព្រៀងមួយដើម្បីបង្កើតរដ្ឋាភិបាលចម្រុះ ប៉ុន្តែមិនទាន់មានសេចក្តីអត្ថាធិប្បាយភា្លមៗអំពីការចរចានោះទេ។ <!--AV--> This posting includes an audio/video/photo media file: Download Now |
| ដីសម្បទាននៅកម្ពុជាជារឿងព្រួយបារម្ភអំពីសិទ្ធិមនុស្ស៖ លោកសូរីយ៉ា សូប៊ីឌី Posted: 11 May 2012 01:38 AM PDT លោកសូរីយ៉ា សូប៊ីឌី (Surya Subedi) អ្នកតំណាងពិសេសរបស់អ.ស.ប. ខាងសិទ្ធិមនុស្សនៅក្នុងទស្សនកិច្ចមួយដែលផ្តោតទៅលើការធ្វើសម្បទានដីធ្លីទៅឲ្យអ្នកអភិវឌ្ឍន៍ឯកជន នៅក្នុងប្រទេសកម្ពុជាបានថ្លែងថា រដ្ឋាភិបាលត្រូវធ្វើកិច្ចការច្រើនទៀត ដើម្បីធានាថា ជនរងគ្រោះនឹងមិនរងទុក្ខវេទនាដោយសារនយោបាយរបស់រដ្ឋាភិបាលដែលប្រគល់ដីសម្បទានទៅឲ្យអ្នកអភិវឌ្ឍន៍នោះទេ។ លោកបានបន្តថ្លែងថា គេឃើញហាក់ដូចជា គ្មានតម្លាភាព គ្មាននិតិវិធី ហើយសហគមន៍ដែលត្រូវប៉ះពាល់មិនបានទទួលជម្រើស។ពួកគេត្រូវផ្លាស់ទីកន្លែងចេញពីផ្ទះសម្បែងរបស់ខ្លួន ដោយមិនបានទទួល ឬបានទទួលសំណងដ៏តិចតួចនោះទេ។ លោកនិយាយថាលោកនឹងសំដែងសេចក្តីព្រួយបារម្ភរបស់លោកជាមួយមន្រ្តីរដ្ឋាភិបាល។ លោកបញ្ចប់ទស្សនកិច្ចរបស់លោកនៅថ្ងៃសុក្រនេះ។ កម្ពុជា៖ ក្រសួងការងារកម្ពុជាបានអនុញ្ញាតឱ្យនិយោជិត កម្មករ កម្មការិនីបានសម្រាកចំនួនពីមួយថ្ងៃទៅបីថ្ងៃដើម្បីចូលរួមការបោះឆ្នោតជ្រើសរើសក្រុមប្រឹក្សាឃុំសង្កាត់ដែលនឹងប្រព្រឹត្តទៅ នៅថ្ងៃអាទិត្យទី៣ខែមិថុនាខាងមុខនេះ ដោយដោយបញ្ជាក់ថានិយោជកត្រូវរក្សាទុកប្រាក់ឈ្នួល និងប្រាក់រង្វាន់ដែលធ្វើការទៀងទាត់ជូននិយោជិត កម្មករ កម្មការិនីដែលឈប់សម្រាកដោយមិនចាំបាច់តម្រូវឱ្យយកឯកសារផ្សេងៗមកបង្ហាញនិយោជកទេនៅពេលត្រឡប់មកវិញ។ កម្ពុជា៖ ប្រធានអនុសញ្ញាហាមឃាត់គ្រាប់មីនប្រឆាំងមនុស្ស គឺលោក ប្រាក់ សុខុន បានផ្តល់ការសរសើរដល់សាធារណរដ្ឋម៉ាសេឌ័ន (Macedoine) នៃអតីតប្រទេសយូហ្គោស្លាវីចំពោះការកម្ទេចចោលគ្រាប់មីនចំនួន ១.២៤៨ គ្រាប់ប្រឆាំងនឹងមនុស្សដែលពួកគេទើបរកឃើញ ។ ចិន៖ ប្រទេសចិន និយាយថា មានមនុស្សបីនាក់ស្លាប់ និងបួននាក់ទៀតត្រូវរបួសជាទម្ងន់ នៅក្នុងការប៉ុនប៉ងទំនងជាចង់ធ្វើអត្ថឃាត នៅពេលដែលស្រីម្នាក់បានបំផ្ទុះគ្រាប់បែកនៅការិយាល័យផ្ទះសម្បែងក្នុងតំបន់មួយ ក្នុងប្រទេសចិនភាគនិរតី ដើម្បីធ្វើការតវ៉ាប្រឆាំងនឹងការឈូសឆាយផ្ទះគាត់ដោយរដ្ឋាភិបាល។ ការបង្ខំឲ្យផ្លាស់លំនៅដ្ឋានដោយរដ្ឋាភិបាលក្នុងតំបន់ ដែលចង់ដំឡើងការអភិវឌ្ឍន៍ដីធ្លី បានធ្វើឲ្យមានបាតុកម្មធំៗជាច្រើនក្នុងពេលថ្មីៗនេះ រួមទាំងការកាន់កាប់ភូមិមួយនៅក្នុងប្រទេសចិនភាគខាងត្បូង ដោយអ្នកស្រុកដែលក្តៅក្រហាយនឹងការរិបអូសដីដោយអយុត្តិធម៌៕ ឥណ្ឌូនេស៊ី៖ ក្រុមអ្នកជួយសង្គ្រោះឥណ្ឌូនេស៊ី និយាយថា ពួកគេបានរកឃើញសពមនុស្សពីកំទេចយន្តហោះរុស្ស៊ីមួយគ្រឿង នៅក្បែរច្រាំងថ្មចោទនៃភ្នំភ្លើងអសកម្មមួយនៅខាងត្បូងក្រុង ចាកាតា (Jakarta)។ក៏ប៉ុន្តែអាជ្ញាធរនិយាយថា គ្មានសញ្ញាបង្ហាញថាមានមនុស្សនៅរស់ជីវិតទេក្នុងចំណោមអ្នកជិះ ៥០ នាក់ក្នុងនោះ ហើយព្រមានថាកិច្ចប្រឹងប្រែងជួយសង្គ្រោះ មានការលំបាកដោយសារធាតុអាកាសមិនល្អកាលពីថ្ងៃព្រហស្បត៍ និងទីកន្លែងដាច់ស្រយាលនៃកន្លែងធ្លាក់យន្តហោះនេះ។ អាល់ហ្សេរី៖ កំពុងធ្វើការបោះឆ្នោតទីមួយរបស់ខ្លួនក្រោយបដិវត្តន៍និទាឃរដូវអារ៉ាប់ ហៅ Arab Spring ក៏ប៉ុន្តែការមិនទុកចិត្តចំពោះកំណែទម្រង់ដែលរដ្ឋាភិបាលបានសន្យាធ្វើ បាននាំឲ្យមានមនុស្សចេញទៅបោះឆ្នោតចំនួនតិច។ ស៊ីរី៖ អាជ្ញាធរស៊ីរី និយាយថា ការបំផ្ទុះគ្រាប់បែកផ្ទួនគ្នាពីរនៅក្រុងដាម៉ាស(Damasque) បានសម្លាប់មនុស្សយ៉ាងតិច ៥៥ នាក់ និងធ្វើឲ្យរបួស ៣៧០ នាក់ទៀត។ សហរដ្ឋអាមេរិក៖ ការគាំទ្ររបស់លោកប្រធានាធិបតីស.រ.អ.ប៉ារ៉ាក់ អូបាម៉ា (Barack Obama) ចំពោះអាពាហ៍ពិពាហ៍រវាងមនុស្សភេទដូចគ្នា បានទទួលប្រតិកម្មចម្រុះពីជុំវិញពិភពលោក។ <!--AV--> This posting includes an audio/video/photo media file: Download Now |
| ពលរដ្ឋកម្ពុជាជាង៨០ភាគរយយល់ថាប្រទេសជាតិដើរតាមទិសត្រឹមត្រូវ Posted: 10 May 2012 08:11 PM PDT នៅក្នុងខណៈពេលដែលកម្ពុជាជិតឈានចូលទៅដល់ការបោះឆ្នោតវិទ្យាស្ថានសាធារណរដ្ឋរបស់សហរដ្ឋអាមេរិកដែលហៅកាត់ថា IRI បានចេញនូវលទ្ធផលការស៊ើបអង្កេតរបស់ខ្លួនទាក់ទងនឹងការយល់ឃើញរបស់ប្រជាពលរដ្ឋទៅលើអនាគតនៃប្រទេសកម្ពុជា។ ការស្ទាបស្ទង់មតិនេះបានធ្វើទៅលើប្រជាពលរដ្ឋប្រមាណជាង២.០០០នាក់នៅក្នុង២៤ខេត្តក្រុងក្នុងប្រទេសកម្ពុជាដែលមានអាយុចាប់ពី១៨ឆ្នាំឡើងទៅដោយបានធ្វើបទសម្ភាសទល់មុខគ្នាដោយផ្ទាល់មាត់ចាប់ពីថ្ងៃទី៣០ ខែវិច្ឆិកា រហូតដល់ថ្ងៃទី២៥ ខែធ្នូ ឆ្នាំ២០១១។ លទ្ធផលនៃការស្ទាបស្ទង់មតិនេះបានបង្ហាញឲ្យឃើញថាមានប្រជាពលរដ្ឋប្រមាណជាង៨០% បានយល់ឃើញថាជាទូទៅកម្ពុជាកំពុងតែធ្វើដំណើរឆ្ពោះទៅក្នុងទិសដៅត្រូវហើយមានតែ ១៩% តែប៉ុណ្ណោះដែលបានអះអាងថាកម្ពុជាធ្វើដំណើរក្នុងទិសដៅខុស។ ការស្ទាបស្ទង់មតិនេះដោយផ្អែកទៅលើសំណួរដូចៗគ្នា អំពីការកសាងផ្លូវថ្នល់ សាលារៀន មណ្ឌលសុខភាព កសាងស្ពាន វត្តអារាម ប្រព័ន្ធធារាសាស្ត្រ មានផលិតផល និងបច្ចេកទេសទំនើបៗ ភាពក្រីក្រមានកម្រិតទាប និងប្រទេសមានសន្តិភាព។ លោកម៉ាត់ កាលីន (Math Lakin) ប្រធានស្តីទីនៃវិទ្យាស្ថានសាធារណរដ្ឋIRI បានថ្លែងប្រាប់នៅក្នុងអង្គសន្និសីទកាសែតថា IRI បានទទួលតួលេខនេះពីប្រជាពលរដ្ឋជាអ្នកឆ្លើយតប។ «ហេតុផលដែលថាប្រទេសកម្ពុជាកំពុងតែធ្វើដំណើរឆ្ពោះទៅមុខក្នុងទិសដៅត្រូវហ្នឹងមានដូចក្នុងនេះ គឺថាការកសាងហេដ្ឋារចនាសម្ព័ន្ធផ្សេងៗ»។ លោក ជាម យៀប អ្នកតំណាងរាស្ត្រនិងជាសមាជិកនៃគណៈអចិន្ត្រៃយ៍នៃគណបក្សគ្រប់គ្រងអំណាចបាននិយាយថាលទ្ធផលនៃការស្ទាបស្ទង់នេះ លោកអាចទទួលយកបាន។ លោកបានបញ្ជាក់ថារដ្ឋាភិបាលកម្ពុជាកំពុងតែធ្វើកំណែទម្រង់របស់ខ្លួនដើម្បីឲ្យកម្ពុជាដើរឆ្ពោះទៅមុខ។ «ការខ្វះខាតរបស់រដ្ឋាភិបាលដែលលោកធ្វើទៅមិនអាចមានភាពសុក្រិតមួយរយភាគរយបានទេ វាតែងតែខុសខ្លះហ្នឹង។ អញ្ចឹងហើយ ១៩ភាគរយនេះ គឺជាការខ្វះចន្លោះនិងភាពអសកម្មខ្លះ ដែលយើងកំពុងតែកែលម្អ យើងកំពុងតែរឹតបណ្តឹងតាមច្បាប់»។ លោក យឹម សុវណ្ណ អ្នកតំណាងរាស្ត្រនិងជាអ្នកនាំពាក្យគណបក្សប្រឆាំងបានមានប្រសាសន៍ថា លទ្ធផលនៃការស្ទាបស្ទង់មតិនេះលោកមិនអាចទទួលយកបានទេ។ លោកបានមានប្រសាសន៍ថាប្រជាពលរដ្ឋនៅមានភាពភ័យខ្លាច មិនហ៊ាននិយាយការណ៍ពិតដូចនៅក្នុងប្រទេសអ៊ីរ៉ាក់និងប្រទេសកូរ៉េខាងជើង ក្នុងពេលដែលមេដឹកនាំកំពុងតែកាន់អំណាចមានប្រជាពលរដ្ឋគាំទ្ររហូតដល់ជិត១០០%។ ក៏ប៉ុន្តែធាតុពិតមិនដូច្នេះទេ ដោយសារតែពួកគេភ័យខ្លាចអំពីសុវត្ថិភាពផ្ទាល់ខ្លួន។ «វាស្ថិតនៅក្នុងបរិយាកាសនៃការគាបសង្កត់ ការភ័យខ្លាចបែបនេះ គួបផ្សំមិនទទួលបាននូវព័ត៌មានឲ្យបានគ្រប់ជ្រុងជ្រោយពីប្រព័ន្ធផ្សព្វផ្សាយ ជាពិសេសគឺទូរទស្សន៍របស់ជាតិនេះ គឺធ្វើឲ្យប្រជាពលរដ្ឋផ្តល់ចម្លើយមិនបានត្រឹមត្រូវតាមឆន្ទៈពិតប្រាកដរបស់ពួកគាត់ទេ»។ លោក អ៊ូ វីរៈ ប្រធានមជ្ឈមណ្ឌលសិទ្ធិមនុស្សកម្ពុជាបាននិយាយថាការស្ទាបស្ទង់មតិនេះមិនមានន័យថាប្រជាពលរដ្ឋបច្ចុប្បន្នសប្បាយចិត្តនឹងគណបក្សកាន់អំណាចទេ នេះគឺដោយសារតែការបកស្រាយមិនត្រឹមត្រូវ។ «បើសិនយើងនិយាយថារដ្ឋាភិបាលដឹកនាំ វាមានលក្ខណៈរញ៉េរញ៉ៃ ហាក់បីដូចជាមានភាពអនាធិបតេយ្យច្រើន។ ហើយយើងមើលទៅ វាឥតមានការទទួលខុសត្រូវ ហើយក៏ឥតមាននីតិរដ្ឋដែរ។ ប៉ុន្តែប្រជាពលរដ្ឋខ្មែរយើងនៅពេលបច្ចុប្បន្ន ពួកគាត់ពូកែ ព្រោះអ្នករកស៊ីក៏ពូកែជាងមុន។ អ្នកមានជំនាញផ្សេងៗ ដូចជាជំនាញកុំព្យូទ័រ ជំនាញក្មេងៗ ដែលគាត់ទៅរៀនសូត្រហ្នឹង គឺពូកែៗមែនទែន»។ កាលពីឆ្នាំ២០១០ តាមលទ្ធផលស្ទាបស្ទង់មតិរបស់ IRI បានបង្ហាញឲ្យឃើញថាប្រជាពលរដ្ឋប្រមាណ ៧៦% ដែលបានអះអាងថាកម្ពុជាកំពុងតែធ្វើដំណើរឆ្ពោះទៅមុនក្នុងទិសដៅដ៏ត្រឹមត្រូវ។ ហើយមានតែ ២៣% ដែលបានអះអាងថាកម្ពុជាធ្វើដំណើរក្នុងទិសដៅខុស។ លទ្ធផលនៃការស្ទាបស្ទង់មតិនេះអាចមានកម្រិតលម្អៀងប្រហែល ២,២% នៅក្នុងចំណោមអត្រាអ្នកចូលរួមឆ្លើយប្រមាណ ៩៥%៕ This posting includes an audio/video/photo media file: Download Now |
| សកម្មជនព្រៃឈើមកគោរពវិញ្ញាណក្ខន្ធលោកឈុតវុទ្ធីនិងដើរល្បាតព្រៃនៅកោះកុង Posted: 10 May 2012 06:56 PM PDT ប្រជាពលរដ្ឋមកពីខេត្តចំនួន៨ គឺខេត្តសៀមរាប ស្វាយរៀង កំពង់ធំ កំពង់ស្ពឺ ក្រចេះ ព្រះវិហារកំពង់ឆ្នាំងនិងពោធិ៍សាត់សរុបប្រមាណជាង៣០០នាក់បានមកដល់ខេត្តកោះកុងនៅក្នុងគោលបំណងគោរពវិញ្ញាណក្ខន្ធលោកឈុត វុទ្ធីនិងដើរល្បាតមើលការកាប់បំផ្លាញព្រៃឈើនៅលើជួរភ្នំក្រវ៉ាញ។ លោកឈុត វុទ្ធី ប្រធានអង្គការការពារធនធានធម្មជាតិ ដែលជាសកម្មជនការពារព្រៃឈើយ៉ាងសកម្ម ត្រូវបានជនប្រដាប់អាវុធបានបាញ់សម្លាប់កាលពីថ្ងៃទី២៦ ខែមេសា នៅចំណុចវាល៣ នៃស្រុកមណ្ឌលសីមា ចម្ងាយប្រមាណជាង ៦០គីឡូម៉ែតពីខេត្តកោះកុង។ រដ្ឋាភិបាលបានទទួលស្គាល់ថាកងរាជអាវុធហត្ថម្នាក់ឈ្មោះអ៊ិន រតនា បានបាញ់សម្លាប់លោកឈុត វុទ្ធី រួចបន្ទាប់មកបានរាលកៃកាំភ្លើងបាញ់សម្លាប់ខ្លួនឯង។ ក៏ប៉ុន្តែក្រុមគ្រួសារលោកអ៊ិន រតនា គ្រួសារលោកឈុត វុទ្ធី និងអង្គការសង្គមស៊ីវិលបានច្រានចោលអំណះអំណាងនោះប្រកបទៅដោយការរិះគន់។ ប្រជាពលរដ្ឋទាំង៣០០នាក់ នៅក្នុងនោះមានព្រះសង្ឃចំនួន ៥០អង្គផងមួយចំនួនគឺជាអ្នកដែលរងគ្រោះនៅក្នុងជម្លោះដីធ្លីនិងមួយចំនួនទៀតគឺជាប្រជាពលរដ្ឋមកពីសហគមន៍ការពារព្រៃឡង់ ដែលធ្លាប់ធ្វើការយ៉ាងជិតស្និទ្ធជាមួយនឹងលោកឈុត វុទ្ធី។ លោក អ៊ូ វីរៈ នាយកមជ្ឈមណ្ឌលសិទ្ធិមនុស្សកម្ពុជាដែលបានជួយរៀបចំការប្រមូលផ្តុំរបស់ប្រជាពលរដ្ឋនេះមានប្រសាសន៍ថាក្រៅពីការគោរពវិញ្ញាណក្ខន្ធសពលោកឈុត វុទ្ធី ការប្រមូលផ្តុំប្រជាពលរដ្ឋនេះក៏ជាសារមួយទាមទារឲ្យរដ្ឋាភិបាលយកចិត្តទុកដាក់ទប់ស្កាត់ការបំផ្លាញព្រៃធម្មជាតិផងដែរ។ លោកវីរៈបញ្ជាក់ថា៖ «គឺយើងចង់រំលឹកវិញ្ញាណក្ខន្ធលោកឈុត វុទ្ធី។ ចំណុចទី២ គឺជាការផ្ងើសារមួយទៅដល់អ្នកដែលបំផ្លាញជាតិ អ្នកដែលកំពុងតែបំផ្លាញព្រៃឈើនៅក្នុងប្រទេសកម្ពុជាយើងថាការសម្លាប់លោកឈុត វុទ្ធី នេះមិនអាចបិទមាត់យើងជិតទេ។ មិនអាចបញ្ឈប់សកម្មភាពប្រជាពលរដ្ឋ ហើយនឹងសកម្មជនសិទ្ធិមនុស្សទេ»។ ជាមួយគ្នានេះលោកស្វាយ ភឿន សមាជិកបណ្តាញកសាងសន្តិភាពសហគមន៍ដែលមានសកម្មភាពខ្លាំងក្លានៅក្នុងការទប់ស្កាត់ការកាប់បំផ្លាញព្រៃឡង់បានលើកឡើងថាក្រុមប្រជាពលរដ្ឋនឹងសិក្សាទប់ស្កាត់ការកាប់បំផ្លាញព្រៃឈើខុសច្បាប់នៅកន្លែងដែលលោកឈុត វុទ្ធី ទទួលរងគ្រោះនោះ។ «យើងចង់ឃើញនូវស្ថានភាពមួយទាក់ទងនឹងខាងកោះកុង ដែលកន្លែងគេធ្វើឃាតដល់លោកឈុត វុទ្ធី ហ្នឹង។ ហើយម្យ៉ាងទៀត យើងចង់ឃើញនូវសកម្មភាពព្រៃឈើ វាខុសប្លែកយ៉ាងម៉េច ហើយបទល្មើសវាខុសគ្នានៅខេត្តនានាយ៉ាងម៉េច។ បើសិនជាដើរល្បាតព្រៃនៅក្នុងរយៈពេលពីរថ្ងៃខាងមុខនេះនៅចំណុចភូមិសាស្ត្រកោះកុងនេះ។ បើឃើញសកម្មភាពណាដែលខុសប្លែក ហើយអនាធិបតេយ្យកាន់តែខ្លាំង។ ចិត្តគំនិតរបស់សហគមន៍មានការទប់ស្កាត់ហើយ»។ គេមិនទាន់ឃើញមានក្រុមអាជ្ញាធរខេត្តកោះកុងមករារាំងប្រជាពលរដ្ឋទាំងនេះនៅឡើយទេ។ ក៏ប៉ុន្តែលោកប៊ុន ឡឺត អភិបាលខេត្តកោះកុងបានព្រមានថាអាជ្ញាធរអនុញ្ញាតឲ្យប្រជាពលរដ្ឋទាំងនេះធ្វើសកម្មភាពណាមួយដែលស្របច្បាប់ និងមិនមានអំពើហិង្សាតែប៉ុណ្ណោះ៕ This posting includes an audio/video/photo media file: Download Now |
| ហេឡូវីអូអេ ១០ ឧសភា ២០១២៖ កម្មវិធីហ្វឹកហាត់យុវជនអ្នកដឹកនាំអាស៊ានរបស់សហរដ្ឋអាមេរិក Posted: 10 May 2012 05:03 PM PDT ជារឿងរាល់ឆ្នាំ សិស្សវិទ្យាល័យមួយក្រុមមកពីបណ្តាប្រទេសអាស៊ានចូលរួមក្នុងកម្មវិធីហ្វឹកហាត់យុវជនអ្នកដឹកនាំអាស៊ាន។ នេះជាកម្មវិធីរបស់ក្រសួងការបរទេសសហរដ្ឋអាមេរិកដែលរៀបចំឡើងដើម្បីបណ្តុះបណ្តាលការដឹកនាំ ការទទួលខុសត្រូវ និងការពាក់ព័ន្ធក្នុងសហគមន៍សម្រាប់មេដឹកនាំទៅអនាគត។ <!--IMAGE-RIGHT--> ភ្ញៀវរបស់យើងនៅក្នុងកម្មវិធីហេឡូវីអូអេ នៅយប់ថ្ងៃព្រហស្បតិ៍ទី១០ខែឧសភានេះ គឺលោក ង៉ែត សុខខេង អ្នកដឹកនាំក្រុមសិស្សកម្ពុជា និងកញ្ញា លីម គឹមលួង ដែលជាសិស្សថ្នាក់ទី១២។ អ្នកទាំងពីរពិភាក្សាអំពីផលប្រយោជន៍នៃកម្មវិធីនេះតាមបទពិសោធន៍របស់ខ្លួន ព្រមទាំងបានឆ្លើយនិងសំណួររបស់អ្នកស្តាប់វីអូអេផងដែរ។ សូមស្តាប់សំឡេងទាំងស្រុងនៃកម្មវិធីហេឡូវីអូអេ ថ្ងៃទី១០ ខែឧសភា ឆ្នាំ២០១២៖ <!--AV--> មធ្យោបាយចូលរួមពីប្រិយមិត្ត៖ ទូរស័ព្ទ ០១២ ៥១ ៥១ ៩៤ ហ្វេសប៊ុក facebook.com/voakhmer អ៊ីម៉េល hellovoa@voanews.com បទសម្ភាសន៍ជាមួយលោក ង៉ែត សុខខេង នៅពេលលោកធ្វើទស្សនកិច្ចនៅរដ្ឋធានីវ៉ាស៊ីនតោន៖ <!--AV--> This posting includes an audio/video/photo media file: Download Now |
| You are subscribed to email updates from VOA News: ព័ត៌មាន To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
