VOA News: ព័ត៌មាន: “ក្នុងបទសម្ភាសន៍ដ៏កម្រមួយ ប្រធានាធិបតីស៊ីរីទម្លាក់កំហុសលើពួក«ភេរវជន»ចំពោះអំពើហិង្សា” plus 5 more |
- ក្នុងបទសម្ភាសន៍ដ៏កម្រមួយ ប្រធានាធិបតីស៊ីរីទម្លាក់កំហុសលើពួក«ភេរវជន»ចំពោះអំពើហិង្សា
- ក្រិកនឹងបោះឆ្នោតឡើងវិញបន្ទាប់ពីភាពទាល់ច្រកនយោបាយ
- អ្នកឃ្លាំមើលការបោះឆ្នោតឃុំសង្កាត់រំពឹងថានឹងមានការបំភិតបំភ័យកើនឡើង
- ភាពយន្តឯកសារថ្មីបង្ហាញពីការនាំកូនរត់ភៀសខ្លួនរបស់ស្ត្រីខ្មែរម្នាក់
- ចៅក្រមអន្តរជាតិម្នាក់លាលែងពីសាលាក្តីខ្មែរក្រហម
- កេ្មងស្រីម្នាក់ស្លាប់ក្នុងព្រឹត្តិការណ៍បង្ក្រាបអ្នកតវ៉ាជម្លោះដីធ្លី
| ក្នុងបទសម្ភាសន៍ដ៏កម្រមួយ ប្រធានាធិបតីស៊ីរីទម្លាក់កំហុសលើពួក«ភេរវជន»ចំពោះអំពើហិង្សា Posted: 17 May 2012 07:51 AM PDT លោក បាសា អាល អាសាដ (Bashar al-Assad) ប្រធានាធិបតីនៃប្រទេសស៊ីរីថ្លែងក្នុងបទសម្ភាសន៍តាមទូរទស្សន៍ដ៏កម្រមួយ ដែលថា រដ្ឋាភិបាលរបស់លោកកំពុងតែប្រយុទ្ធទល់នឹងពួកភេរវជនដែលគាំទ្រដោយបរទេស មិនមែនសកម្មជនកាន់លិទ្ធិប្រជាធិបតេយ្យទេ។ នេះជាផ្នែកមួយនៃការបង្រ្កាបរយ:ពេល១៤ខែរបស់លោកទៅលើការបះបោររបស់ក្រុមជំទាស់។ កិច្ចសម្ភាសន៍ជាមួយទូរទស្សន៍រុស្ស៊ីនេះ សឱ្យឃើញថា លោក អាសាដ គ្មានបំណងនឹងបញ្ចប់ការបង្រ្កាបយ៉ាងប្រល័យរបស់លោកទៅលើក្រុមប្រឆាំងទេ ទោះបីជាមានការថ្កោលទោសជាអន្តរជាតិ និងមានផែនការសន្ដិភាពដែលអំពាវនាវឱ្យមានបទឈប់បាញ់ក៏ដោយ។ ព័ត៌មានអន្តរជាតិសំខាន់ៗផ្សេងទៀត៖ <!--IMAGE-RIGHT--> ឧបទ្វីបកូរ៉េ៖ ប្រទេសកូរ៉េខាងត្បូងឲ្យដឹងថា ខ្លួននឹងធ្វើការចរចាផ្លូវការទូតជាន់ខ្ពស់មួយ ជាមួយប្រទេសជប៉ុននិងស.រ.អានៅអាទិត្យក្រោយនេះ ស្ដីអំពីប្រទេសកូរ៉េខាងជើង។ ចិន/កូរ៉េខាងជើង៖ អ្នកនេសាទត្រីជាតិចិន២៩នាក់ត្រូវបានគេចាប់ជម្រិតទារប្រាក់លោះ។ អ្នកនេសាទត្រីទាំងនោះត្រូវពួកជនជាតិកូរ៉េខាងជើងចាប់ជម្រិតនៅដើមខែនេះនៅសមុទ្រលឿង។ ចិន៖ លោក ឆិន កាំងឆេង (Chen Guangcheng)សកម្មជនជាតិចិននិយាយថា លោកនិងគ្រួសារនឹងបានទទួលលិខិតឆ្លងដែនសម្រាប់ចេញពីប្រទេសចិនក្នុងរយ:ពេលពីរអាទិត្យខាងមុខនេះ។ ម៉ុងហ្គោលី៖ នៅថ្ងៃអាទិត្យនេះ លោកអតីតប្រធានាធិបតី ណាំបារ៉ីន អិនបាយ៉ារ (Nambaryn Enkhbayar) នៃប្រទេសម៉ុងហ្គោលី (Mongolia) ត្រូវបានដោះលែងពីពន្ធនាគារហើយ បន្ទាប់ពីបានបង់ប្រាក់ធានា ដើម្បីទៅព្យាបាលជំងឺ ក្រោយពីបានធ្វើកូដកម្មអត់អាហារអស់ពេលដប់ថ្ងៃ។ ការចាប់លោក អិន បាយ៉ាវ ដាក់ពន្ធនាគារពីបទប្រព្រឹត្តអំពើពុករលួយត្រូវអន្ដរជាតិរិះគន់។ សេដ្ឋកិច្ចពិភពលោក៖ សេដ្ឋកិច្ចនៃប្រទេសជប៉ុនបានល្អប្រសើរឡើង១ភាគរយពីខែមករាដល់ខែមីនានៅឆ្នាំនេះ។ នៅប្រទេសសិង្ហបូរី ផលិតផលសរុបបានថយចុះដោយសាររដ្ឋាភិបាលបានព្រមានអំពីវិបត្តិប្រាក់បំណុលរបស់ប្រទេសនៅអឺរ៉ុប។ រីឯនៅស.រ.អា សេដ្ឋកិច្ចមានការរីកចម្រើនតិចតួច ស្របពេលដែលនៅបណ្តាប្រទេសក្នុងទ្វីបអឺរ៉ុបកំពុងមានការរំជើបរំជួល។ ស៊ីរី៖ ក្រុមអ្នកសង្កេតការណ៍ការដាក់ទណ្ឌកម្មរបស់អ.ស.បលើប្រទេសអ៊ីរ៉ង់និយាយថា ប្រទេសស៊ីរីបន្ដធ្វើជាប្រទេសទិសដៅ ដែលគេបញ្ជូនអាវុធរបស់អ៊ីរ៉ង់ទៅកាន់ទីនោះ។ ការបញ្ជូននេះល្មើសនឹងបំរាមរបស់ក្រុមប្រឹក្សាសន្ដិសុខអ.ស.បទៅលើការទិញចូលអាវុធរបស់រដ្ឋាភិបាលអ៊ីរ៉ង់។ អាហ្វហ្គានីស្ថាន៖ ក្រុមមន្ដ្រីអាហ្វហ្គានីស្ថាននិយាយថា ការវាយប្រហារដោយគ្រាប់បែកអត្ដឃាតទៅលើអគាររបស់រដ្ឋាភិបាលនៅក្នុងខេត្ដហ្វារ៉ាហ៍ (Farah) ស្ថិតនៅភាគខាងលិច បានសម្លាប់មនុស្សយ៉ាងតិចប្រាំពីរនាក់ហើយរបួស១២នាក់ផ្សេងទៀត។ តួកគី៖ ពួកមន្ដ្រីតួកគីនិយាយថា ពួកបះបោរខឺរដ៍ (Kurd) បានសម្លាប់យុទ្ធជនតួកគីបីនាក់នៅថ្ងៃព្រហស្បតិ៍ពេលមានការប្រយុទ្ធគ្នានៅតំបន់ភ្នំនាភាគខាងត្បូងប្រទេស។ <!--AV--> This posting includes an audio/video/photo media file: Download Now |
| ក្រិកនឹងបោះឆ្នោតឡើងវិញបន្ទាប់ពីភាពទាល់ច្រកនយោបាយ Posted: 17 May 2012 01:34 AM PDT ប្រទេសក្រិកបានកំណត់ថ្ងៃទី ១៧ ខែមិថុនា សម្រាប់ធ្វើការបោះឆ្នោតម្តងទៀត បន្ទាប់ពីគណបក្សនយោបាយធំៗ មិនអាចបង្កើតរដ្ឋាភិបាលចម្រុះមួយបាន កាលពីថ្ងៃអង្គារនេះ ទោះជាមានការព្យាយាមសម្របសម្រួលជាច្រើនដង ឲ្យមានកិច្ចព្រមព្រៀងគ្នាមួយយ៉ាងណាក្តី។ ការប្រកាសកាលបរិច្ឆេទនេះបានធ្វើឡើងនៅថ្ងៃពុធ បន្ទាប់ពីលោកប្រធានាធិបតី កាឡូស ប៉ាពូលីយ៉ាសKarolos Papoulias នៃប្រទេស ក្រិក បានជួបជាមួយមេដឹកនាំគណបក្ស ដើម្បីបង្កើតរដ្ឋាភិបាលបណ្តោះអាសន្នមួយរួចហើយ។ ទូរទស្សន៍ជាតិប្រកាសថា លោក ប៉ាណាជីអូទីសពីក្រាមេណូសPanagiotis Pikrammenos ចៅក្រមជាន់ខ្ពស់របស់ប្រទេសនេះបានត្រូវតែងតាំងជានាយករដ្ឋមន្រ្តីនៃរដ្ឋាភិបាលបណ្តោះអាសន្ន។ <!--IMAGE-RIGHT--> ស.រ.អ៖ លោកប្រធានាធិបតីបារ៉ាក់ អូបាម៉ា Barack Obamaបានរៃអង្គាសប្រាក់បាន ៤៣ លាន ៦ សែន ដុល្លារ កាលពីខែមុនសម្រាប់យុទ្ធនាការរបស់លោកនិងគណបក្សប្រជាធិបតេយ្យក្នុងខណៈដែលលោកកំពុងឈានទៅរកការឃោសនាដើម្បីឲ្យបានជាប់ឆ្នោតក្នុងអាណត្តិទីពីរ ប្រឆាំងនឹងលោក មិត រមនីMitt Romney ដែលទំនងជានឹងបានទទួលការតែងតាំងជាបេក្ខជនប្រធានាធិបតីនៃគណបក្សសាធារណរដ្ឋ។ ចិន៖ អ្នកប្រឆាំងជាតិចិនងងិតភ្នែកលោកចិន គួងឆេងChen Guangcheng ឲ្យដឹងថា លោកនិងគ្រួសារបានដាក់ពាក្យសុំលិខិតឆ្លងដែន ហើយថាអាជ្ញាធរចិនបានប្រាប់លោកថា ឯកសារធ្វើដំណើរនឹងប្រគល់ឲ្យលោកនៅចុងខែនេះ។ លោកចិន Chen បាននិយាយកាលពីថ្ងៃពុធជាមួយក្រុមផ្សាយជាភាសា កុកងឺ របស់វីអូអេ ពីបន្ទប់លោកក្នុងមន្ទីរពេទ្យនៅក្រុងប៉េកាំង។ លោកនិយាយថា គេបានថតរូបលោក ហើយមន្រ្តីសន្តិសុខខេត្តសានទុង Shangdong បានយកពាក្យសុំលិខិតឆ្លងដែន ទៅឲ្យលោកដល់មន្ទីរពេទ្យកាលពីថ្ងៃពុធនេះ៕ ឥណ្ឌូនេស៊ី៖ ប្រទេសឥណ្ឌូនេស៊ី និយាយថា គេត្រូវការពេលវេលាដល់ទៅមួយឆ្នាំ ដើម្បីវិភាគសម្ភារៈ និងទិន្នន័យហោះហើរ ដែលគេបានរកឃើញនៅកន្លែងធ្លាក់យន្តហោះមួយគ្រឿងរបស់រុស្ស៊ី ដែលបើកបុកចង្កេះភ្នំភ្លើងមួយកាលពីសប្តាហ៍មុន នៅជិតក្រុង ចាកាតាJakarta បណ្តាលឲ្យស្លាប់មនុស្ស ៤៥ នាក់នៅក្នុងនោះ។ ប៊ូស្នី៖ រដ្ឋអាជ្ញាបានលាតត្រដាងពាក្យចោទប្រឆាំងនឹងមេបញ្ជាការយោធាដ៏ល្បីល្បាញ ដែលគេចោទថាជាអ្នកទទួលខុសត្រូវចំពោះការជួយដឹកនាំអំពើប្រល័យពូជសាស៍ លើជនជាតិ មូស្លីម ប៊ូស្នីMuslim Bosnie កាលពីពីរទសវត្សរ៍មុន។ លីប៊ីរី៖ លោកឆាល ថៃល័រ Charles Taylor អតីតប្រធានាធិបតីប្រទសេលីប៊ីរី Liberia បាននិយាយថា លោកមាន«សមានចិត្តដ៏ជ្រាលជ្រៅបំផុត» ចំពោះជនរងគ្រោះនៅក្នុងសង្គ្រាមស៊ីវិលដ៏សាហាវយង់ឃ្នងរបស់ប្រទេស សេរ៉ា លេអ៊នSierra Leone តែមិនបាននិយាយសុំទោសចំពោះអំពើឃោឃៅរបស់ពួកឧទ្ទាមដែលលោកបានបំពាក់អាវុធ ដើម្បីប្តូរយកពេជ្រនោះទេ។ ស៊ីរី៖ សកម្មជនប្រទេសស៊ីរី និយាយថា ការបាញ់កាំភ្លើងធំនិងកាំភ្លើងតូច បានសម្លាប់មនុស្សយ៉ាងតិច ៩ នាក់ នៅពាសពេញប្រទេស កាលពីថ្ងៃពុធ ដោយពួកគេភាគច្រើនស្ថិតនៅក្នុងតំបន់ដែលក្រុមអ្នកសង្កេតការណ៍យោធា អ.ស.ប. បាននៅគាំងជាប់ ក្នុងការបាញ់តគ្នានិងការបំផ្ទុះគ្រាប់បែកដ៏សាហាវ កាលពីមួយថ្ងៃមុននេះ។ <!--AV--> This posting includes an audio/video/photo media file: Download Now |
| អ្នកឃ្លាំមើលការបោះឆ្នោតឃុំសង្កាត់រំពឹងថានឹងមានការបំភិតបំភ័យកើនឡើង Posted: 16 May 2012 09:03 PM PDT ខណៈដែលយុទ្ធនាការឃោសនាបោះឆ្នោតគ្រោងនឹងមកដល់នៅថ្ងៃសុក្រខាងមុននេះ មន្ត្រីអង្គការសង្គមស៊ីវិលដែលឃ្លាំមើលដំណើរការបោះឆ្នោត បានលើកឡើងថា ការបំភិតបំភ័យ ការគំរាមកំហែងប្រជាពលរដ្ឋដែលជាម្ចាស់ឆ្នោតនៅតែបន្តកើតមាន ជាពិសេសនៅតាមការិយាល័យបោះឆ្នោត។ លោក គល់ បញ្ញា នាយកអង្គការឃ្លាំមើលដំណើរការបោះឆ្នោតមួយដែលមានឈ្មោះថាខុមហ្រ្វែល (Comfrel) បានមានប្រសាសន៍នៅថ្ងៃពុធនេះថា មានអាជ្ញាធរខ្លះបានឃ្លាំមើលប្រជាពលរដ្ឋនៅតាមការរិយាល័យបោះឆ្នោត ដើម្បីចង់ដឹងថាប្រជាពលរដ្ឋបោះឆ្នោតឲ្យគណបក្សខ្លួន។ មានប្រសាសន៍នៅក្នុងវេទិកាតុមូលស្តីអំពីការត្រៀមរៀបចំការបោះឆ្នោត និងការទទួលបានព័ត៌មានដែលរៀបចំឡើងដោយក្លឹបអ្នកកាសែតកម្ពុជា លោកគល់ បញ្ញា បានមានប្រសាសន៍ថាអង្គការខុមហ្រ្វែលបានអ្នកឃ្លាំមើលជាង ៥០០នាក់ ដើម្បីតាមមើលបាតុភាពមិនប្រក្រតីទាំងនេះ។ «ភ្នាក់ងារគណបក្សមួយចំនួនក៏អញ្ចឹងដែរ។ ភ្នែកធំៗ តាមមើលប្រជាជន ព្រោះបាននិយាយគ្នា ឲ្យលុយគ្នាស្រេចអស់ហើយ។ អញ្ចឹងថ្ងៃបោះឆ្នោតមកតាមមើលប្រជាជន ដើម្បីឃ្លាំមើល តើអ្នកឯងបោះ ឬមិនបោះ។ ថាម៉េចបានជាគេអាចដឹង។ មិនអាចដឹងបានទេ ព្រោះការបោះឆ្នោតនេះ ជាការសម្ងាត់»។ លោកគល់ បញ្ញា បានមានប្រសាសន៍ទៀតថា ខុមហ្វ្រែលបានបង្រៀនជាពិសេសអ្នកឃ្លាំមើលភាពមិនប្រក្រតី និងការកត់ត្រាអំពីលទ្ធផលនៃការបោះឆ្នោតឲ្យបានលឿនថា តើលទ្ធផលដែលបានបង្ហាញនៅតាមការិយាល័យបោះឆ្នោត និងលទ្ធផលរបស់ខុមហ្វ្រែលមានភាពខុសប្លែកគ្នា ឬ យ៉ាងណា។ លោក ទេព នីថា អគ្គលេខាធិការនៃគណៈកម្មាធិការជាតិរៀបចំការបោះឆ្នោតបានមានប្រសាសន៍ថា នេះគឺជាការវាយតម្លៃផ្ទាល់ខ្លួនរបស់ខុមហ្រ្វែល។ លោកបានមានប្រសាសន៍ថាមិនមានការបំភិតបំភ័យដល់អ្នកបោះឆ្នោតទេ។ ប្រសិនណាបើមានមន្ត្រីទាំងនោះទៅបំភិតបំភ័យអ្នកបោះឆ្នោត និងទទួលបានពិន័យ និងបណ្តេញចេញពីការរិយាល័យបោះឆ្នោត។ «ក្នុងករណីដែលមានអ្នកមករំខានការបោះឆ្នោត។ គឺទី១ មន្ត្រីនៅខាងក្រៅហ្នឹងរំលឹកគាត់ ថាគាត់ធ្វើអញ្ចឹងមិនត្រឹមត្រូវទេ។ ឧទាហរណ៍មានមន្ត្រីនៅឃុំសង្កាត់ ឬក៏អាជ្ញាធរ ឬក៏អ្នកណាម្នាក់មកឈរនៅក្នុងបរិវេណហាមឃាត់នៅទីនោះដើម្បីមើលអ្នកបោះឆ្នោតទៅត្រួតពិនិត្យអ្នកបោះឆ្នោតអី យើងមិនអនុញ្ញាតឲ្យគាត់ចូលក្នុងបរិវេណដែលយើងហាមឃាត់ទេ»។ មានគណបក្សនយោបាយចំនួន១០ ដែលបានចុះបញ្ជីសម្រាប់ការបោះឆ្នោតក្រុមប្រឹក្សាឃុំសង្កាត់ អណត្តិទី៣នេះ ដែលរួមមានគណបក្សសម រង្ស៊ី គណបក្សហ៊្វុនស៊ិនប៉ិច គណបក្សនរោត្តមរណឫរិទ្ធ គណបក្សសិទ្ធិមនុស្ស គណបក្សសញ្ជាតិកម្ពុជា គណបក្សសម្ព័ន្ធដើម្បីលទ្ធិប្រជាធិបតេយ្យ គណបក្សខ្មែរឈប់ក្រ គណបក្សសាធារណរដ្ឋប្រជាធិបតេយ្យ គណបក្សចលនាប្រជាធិបតេយ្យ និងគណបក្សប្រជាជនកម្ពុជា។ គណបក្សទាំង១០ និងចូលរួមប្រកួតប្រជែង ដើម្បីជ្រើសរើសមុខដំណែងក្រុមប្រឹក្សាឃុំសង្កាត់ចំនួន ១.៦៣៣ឃុំសង្កាត់ ដែលមានអ្នកបោះឆ្នោតប្រមាណជាង៩លាននាក់។ លោកយឹម សុវណ្ណ អ្នកតំណាងរាស្ត្រ និងជាអ្នកនាំពាក្យគណបក្សសម រង្ស៊ី បានទទួលស្គាល់ថា នៅរដូវបោះឆ្នោតចូលមកដល់ការគំរាមកំហែង និងការបំភិតបំភ័យបានមកទន្ទឹមគ្នាផងដែរ។ «ពីព្រោះអ្នកនយោបាយថ្នាក់ខ្ពស់ក៏គំរាម ប្រើប្រព័ន្ធផ្សព្វផ្សាយរបស់រដ្ឋគំរាមប្រជាពលរដ្ឋ ហើយនឹងអាជ្ញាធរមូលដ្ឋាន អ្នកនយោបាយថ្នាក់ជាតិរបស់គណបក្សកាន់អំណាចហ្នឹងក៏គំរាមប្រជាពលរដ្ឋដែរ។ ការគំរាមហ្នឹង គំរាមតាំងពីពេលមុនឃោសនាមកម្លេះ»។ នៅថ្ងៃសុក្រចុងសប្តាហ៍នេះគណបក្សទាំង១០ និងចាប់ផ្តើមយុទ្ធនាការណ៍បោះឆ្នោតរបស់ខ្លួនជាលើកដំបូង ហើយគណបក្សមួយចំនួនត្រូវបានគេមើលឃើញថា បានទិញសារុង ប៊ីចេង និងផ្តល់លុយកាក់បន្តិចបន្តួចជូនប្រជាជន ដើម្បីឲ្យបោះឆ្នោតគាំទ្រគណបក្សរបស់ខ្លួន៕ This posting includes an audio/video/photo media file: Download Now |
| ភាពយន្តឯកសារថ្មីបង្ហាញពីការនាំកូនរត់ភៀសខ្លួនរបស់ស្ត្រីខ្មែរម្នាក់ Posted: 16 May 2012 08:48 PM PDT មហោស្រពភាពយន្ត«ក្តីសង្ឃឹមនិងសេរីភាព»បានធ្វើឡើងនៅឯសាលមហោ ស្រពសិល្បៈ ដែលស្ថិតនៅក្នុងទីក្រុងឡុងប៊ិចរដ្ឋកាលីហ្វញ៉ានាចុងសប្តាហ៍កន្លង ទៅនេះ។ មានភាពយន្តជាច្រើនដែលទាក់ទងទៅនឹងក្តីសង្ឃឹមនិងសេរីភាពត្រូវ បានដាក់បញ្ចាំងដែលនៅក្នុងនោះមានភាពយន្តឯកសារមួយដែលមានចំណង ជើងថា«The End/ Beginning» ឬ «ទីបញ្ចប់និងការចាប់ផ្តើម»។ នេះគឺជាភាពយន្តឯកសារ ដែលនិយាយពីជីវិតរបស់ អ្នករស់រានមានជីវិតពីរបបប្រល័យពូជសាសន៍ម្នាក់និងខ្សែ ជីវិតរបស់គាត់ក្នុងការរត់គេចពីរបបដ៏ឃោរឃៅនេះមក កាន់សហរដ្ឋអាមេរិកដោយឆ្លងកាត់តាមប្រទេសវៀតណាម។ លោកអៀ សុផល ជាអ្នកសរសេរនិង អ្នកនិទាននៅក្នុងភាពយន្តឯកសារនេះ បានប្រាប់ថាខ្សែភាពយន្តនេះជារឿងរ៉ាវពិតរបស់ម្តាយគាត់ ដែលបានរត់គេចចេញពីសេចក្តីស្លាប់ក្នុងរបបខ្មែរក្រហម។ លោកសុផល បានបញ្ជាក់ថាបើទោះបីជារឿងនេះជារឿងផ្ទាល់ខ្លួនរបស់បុគ្គល ម្នាក់ប៉ុន្តែវាប្រាប់ពីរឿងរ៉ាវស្រដៀងគ្នារបស់មនុស្សជា ច្រើនទៀត។ លោកបានបន្ថែមថា៖ «រឿងនេះផ្តល់នូវការគោរពដឹងគុណដល់ម្តាយរបស់ខ្ញុំដែល គាត់អាចរត់គេចផុតពីរបបខ្មែរក្រហមដោយប្រើភាសាជាលិខិតឆ្លង ដែន។ ហើយទោះបីជារឿងនេះជារឿងផ្ទាល់ខ្លួនមួយប៉ុន្តែខ្ញុំធ្លាប់បាន ជួបអ្នកដែលធ្លាប់បានរត់គេចពីរបបប្រល័យពូជសាសន៍តាមរយៈ ប្រទេសវៀតណាមដូចម្តាយខ្ញុំដែរ។ ដូច្នេះវាជារឿងផ្ទាល់ខ្លួនមួយដែលប្រាប់ពីរឿងរ៉ាវរបស់ មនុស្សជាច្រើនទៀតតាមរយៈតួអង្គមួយគឺម្តាយរបស់ខ្ញុំ»។ ភាពយន្តនេះមានរយៈពេល៤៧នាទីហើយមានប្រើប្រាស់បច្ចេកវិទ្យា ក្រាហ្វិកដើម្បីគូសបង្ហាញពីព្រឹត្តិការណ៍មួយចំនួនជំនួសឱ្យការ ប្រើប្រាស់រូបភាពឯកសារនានា។ លោក Kevin Jonhson ជាដឹកនាំមហោស្រពភាពយន្តនេះបានប្រាប់វីអូអេ ខ្មែរ ថាវាមានសារៈសំខាន់ណាស់ក្នុងការចងក្រងនូវប្រវត្តិសាស្រ្តតាមរយៈ បទពិសោធន៍របស់បុគ្គលម្នាក់ៗ។ លោកបន្តថា៖ «ប្រសិនបើយើងនិយាយរឿងតាមបែបប្រវត្តិសាស្រ្តនោះយើងនឹងបាត់ បង់នូវភាពពិស្តាររបស់រឿងនោះព្រោះម្នាក់ៗមានបទពិសោធន៍និងការ តស៊ូខុសគ្នា»។ មានអ្នកមកចូលរួមទស្សនាជាច្រើនចាប់អារម្មណ៍នឹងខ្សែភាពយន្ត នេះហើយគិតថាវាមានសារៈសំខាន់ណាស់ក្នុងការប្រាប់នូវរឿងរ៉ាវនៃ របបខ្មែរក្រហមទៅកូនចៅជំនាន់ក្រោយ។ ដូចជាលោក Jusin Sok ជាប្រជាពលរដ្ឋមួយរូបរស់នៅទីក្រុងឡុងប៊ិចដែលបានទស្សនាខ្សែ ភាពយន្តនេះបានឱ្យដឹងថា៖ «គឺជារឿងមួយដ៏សំខាន់ដែលយើងចេញមកនិយាយគ្នាជូនជារឿងកត់ សម្គាល់ជាប្រវត្តិសាស្រ្តរបស់យើង។ ឳពុកម្តាយពីមុនៗគាត់ចុកចាប់ខ្លាំងពេកគាត់អត់ចង់និយាយគាត់ចេះ តែទុករឿងក្នុងខ្លួនគាត់ ហើយអ្នកជំនាន់ក្រោយកើតមកគ្នាអត់ដឹង។ចំណែកពួកជំនាន់ខ្ញុំបាន រៀនសូត្រស្គាល់វប្បធម៌អរិយធម៌ទាំងសងខាងគ្រាន់ជួយណែនាំធ្វើជា ស្ពានដើម្បីជាទំនាក់ទំនងសន្ទនារវាងឳពុកម្តាយយើងនិងប្អូនៗយើង ជំនាន់ក្រោយ»។ គួរបញ្ជាក់ផងដែរថាភាពយន្តឯកសារនេះធ្លាប់ត្រូវបានបញ្ចាំងនៅ ស្ថានីយ៍ទូរទស្សន៍ Channel NewsAsia នៃប្រទេសសិង្ហបុរីនិងបានទទួលពានរង្វាន់មាសពីមហោស្រព ភាពយន្តនិងទូរទស្សន៍អន្តរជាតិInternational Television and Film Awards នៅទីក្រុង New York៕ This posting includes an audio/video/photo media file: Download Now |
| ចៅក្រមអន្តរជាតិម្នាក់លាលែងពីសាលាក្តីខ្មែរក្រហម Posted: 16 May 2012 09:06 PM PDT ចៅក្រមសាលាក្តីខ្មែរក្រហមជនជាតិជប៉ុនបានដាក់ពាក្យសុំលាឈប់ពីការងារហើយនៅថ្ងៃពុធនេះហើយបាននាំឱ្យអ្នកសង្កេតការណ៍សាលាក្តីស្នើឱ្យអង្គការសហប្រជាជាតិពិចារណារកវិធីសម្រាប់បុគ្គលិករបស់ខ្លួនធ្វើការឱ្យបានស្រួលបួលជាជាងការដែលគ្រាន់តែតែងតាំងអ្នកថ្មីមកជំនួស។ តាមសេចក្តីប្រកាសព័ត៌មានរបស់សាលាក្តីខ្មែរក្រហមបានឱ្យដឹងថាលោកចៅក្រមម៉ូទូ ណូហ្គូជី ដែលជាចៅក្រមមួយរូបក្នុងតុលាការកំពូលនៃសាលាក្តីបានដាក់លិខិតលាលែងទៅលោកអគ្គលេខាធិការអង្គការសហប្រជាជាតិនៅថ្ងៃនេះ ហើយនឹងត្រូវបញ្ចប់ការងារនៅថ្ងៃទី១៥ខែកក្កដាឆ្នាំ២០១២ខាងមុខនេះ។ គេនៅមិនទាន់ដឹងថាតើលោកអគ្គលេខាធិការអង្គការសហប្រជាជាតិបានគីមូននឹងទទួលយកការលាឈប់នោះហើយតែងតាំងអ្នកថ្មីទៀតឬយ៉ាងណាទេ។ ប៉ុន្តែលោកស្រីយូកូ ម៉ៃដា អ្នកនាំពាក្យមួយរូបនៃសាលាក្តីខ្មែរក្រហមខាងភាគីអង្គការសហប្រជាជាតិបានប្រាប់វីអូអេថាលោកចៅក្រមត្រូវត្រឡប់ទៅធ្វើការនៅក្រសួងយុត្តិធម៌របស់ប្រទេសជប៉ុនវិញហើយមិនអាចបន្តនៅបានទៀតទេ។ លោកស្រីបញ្ជាក់ថា៖ «នៅពេលដែលតុលាការនេះត្រូវបានបង្កើតឡើងគឺយើងរំពឹងថានឹងមានរយៈពេលតែបីឆ្នាំទេនឹងបញ្ចប់អាណត្តិហើយ ប៉ុន្តែឥឡូវនេះវាឈានមកដល់ឆ្នាំទី៦ហើយវានឹងត្រូវបន្តពីបីឆ្នាំទៀតដើម្បីបញ្ចប់សំណុំរឿងបច្ចុប្បន្ននិងសំណុំរឿងដែលនៅសេសសល់ដទៃទៀត។ នៅពេលនេះលោកចៅក្រមមិនអាចនៅទ្រាំធ្វើការបានពីរបីឆ្នាំទៀតទេដូច្នេះហើយលោកគិតថាវាពេលវេលាសមស្របសម្រាប់លោកចុះចេញពេលដែលបញ្ចប់សំណុំរឿងលេខ០០១»។ ចៅក្រមណូហ្គូជីបានធ្វើការនៅសាលាក្តីខ្មែរក្រហមចាប់តាំងពីពេលដំណើរការដំបូងក្នុងឆ្នាំ២០០៦ហើយលោកបានធ្វើជាចៅក្រមមួយរូបក្នុងបណ្តឹងឧទ្ទរណ៍នៃសំណុំរឿងលេខ០០១ដែលបានកាត់ទោសអតីតមេគុកទួលស្លែងកាំងហ្កេកអ៊ាវហៅឌុច។ ការលាលែងរបស់លោកចៅក្រមណូហ្គូជីជួនគ្នាជាមួយនឹងការលាឈប់ជាបន្តបន្ទាប់របស់ចៅក្រមស៊ើបអង្កេតដែលបានសម្តែងពីការមិនពេញចិត្តចំពោះការខ្វះការសហការពីភាគីកម្ពុជានិងមានការចូលជ្រៀតជ្រែកផ្នែកនយោបាយពីមន្ត្រីរដ្ឋាភិបាលកម្ពុជា។ លោកឡាត់ គី អ្នកឃ្លាំមើលដំណើរការសាលាក្តី ខ្មែរក្រហមនៃអង្គការសិទ្ធិមនុស្សអាដហុកបានបញ្ជាក់ថានៅសល់ផ្លូវវែងឆ្ងាយទៀតដែលសាលាក្តី ខ្មែរក្រហមត្រូវធ្វើដំណើរក្នុងការស្វែងរកយុត្តិធម៌សម្រាប់ជនរងគ្រោះពី របបខ្មែរក្រហមហើយលោកស្នើសុំឱ្យអង្គការសហប្រជាជាតិត្រូវហ៊ានវះកាត់ដើម្បីបង្កឱ្យចៅក្រមរបស់ខ្លួនអាចធ្វើការបានត្រឹមត្រូវ។ លោកបានបន្ថែមថា៖ «ខ្ញុំយល់ឃើញថាការលាឈប់របស់ចៅក្រមម្នាក់ទៅចៅក្រមម្នាក់ហើយការតែងតាំងថ្មីម្នាក់មកម្នាក់ ដែលមានការតែងតាំងការលាឈប់ ការតែងតាំងការលាឈប់អញ្ចឹងមានន័យថាការតែងតាំងមិនមែនជាដំណោះស្រាយទេ។ ដំណោះស្រាយគួរតែអង្គុយចរចាហើយសម្រេចឱ្យជាក់លាក់ហើយបើសិនណាជាសាលាក្តី នេះឆ្ពោះទៅមុខប៉ុន្មានទៀតឱ្យបានច្បាស់លាស់គឺគួរតែបង្ហាញព័ត៌មានហ្នឹងជូនសាធារណជនជាពិសេសគឺប្រជាពលរដ្ឋខ្មែរដែលជាសាច់ញាតិនៃអ្នកដែលបានបាត់បង់ជីវិតនៅក្នុងអំឡុងពី១លាន៧សែនទៅ ពីរលាននាក់ឱ្យបានដឹងជាក់លាក់ផង»។ សាលាក្តីខ្មែរក្រហមកំពុងធ្វើការកាត់ទោសសំណុំរឿងលេខ០០២ដែលមានមេដឹកនាំជាន់ខ្ពស់ខ្មែរក្រហមបីរូបគឺនួន ជា ខៀវ សំផន និងអៀង សារី៕ This posting includes an audio/video/photo media file: Download Now |
| កេ្មងស្រីម្នាក់ស្លាប់ក្នុងព្រឹត្តិការណ៍បង្ក្រាបអ្នកតវ៉ាជម្លោះដីធ្លី Posted: 16 May 2012 06:02 PM PDT យ៉ាងហោចណាស់មានកុមារីអាយុ១៤ឆ្នាំម្នាក់បានស្លាប់បាត់បង់ជីវិតក្នុងការបង្រ្កាបក្នុងជម្លោះដីធ្លីយ៉ាងហិង្សាមួយនៅថ្ងៃពុធនេះ ក្នុងស្រុកឆ្លូង ខេត្តក្រចេះ។ នេះបើយោងតាមមន្ដ្រីជាន់ខ្ពស់ក្រសួងមហាផ្ទៃ និងក្រុមមន្ដ្រីឃ្លាំមើលការរំលោភសិទ្ធិមនុស្ស។ អំពើហិង្សាបានកើតឡើងនៅវេលាម៉ោង ៨ និង៣០នាទី ព្រឹកមិញនេះ ខណៈដែលក្រុមប្រដាប់អាវុធរបស់រដ្ឋាភិបាលបានចុះទៅបណ្ដេញប្រជាពលរដ្ឋនៅក្នុងភូមិប្រមា ឃុំកំពង់ដំរី ដើម្បីយកដីប្រគល់ឲ្យក្រុមហ៊ុនមួយដែលមានឈ្មោះថា ក្រុមហ៊ុនការស្ទីម ដើម្បីអភិវឌ្ឍដំណាំកៅស៊ូ។ ប្រជាពលរដ្ឋរងគ្រោះមានចំនួនប្រមាណពី៤០០ ទៅ ១.០០០គ្រួសារ។ នេះបើយោងតាមប្រភពផ្សេងៗគ្នា។ នៅមិនទាន់មានការបង្ហាញពីមូលហេតុពីប្រភពផ្លូវការស្ដីពីអំពើហិង្សានេះនៅឡើយ។ ក៏ប៉ុន្ដែបើយោងតាមប្រភពពីក្រុមមន្ដ្រីឃ្លាំមើលការរំលោភសិទ្ធិមនុស្សបានបញ្ជាក់ថា មានការប៉ះទង្គិចគ្នាបានចាប់ផ្តើមរវាងក្រុមសមត្ថកិច្ចដែលមានកម្លាំងទាហាន កងរាជអាវុធហត្ថ និងកងប៉ូលិសជាមួយនឹងប្រជាពលរដ្ឋ។ កុមារី ហេង ចន្ថា ត្រូវក្រុមសមត្ថកិច្ចបាញ់ត្រូវភ្លាមៗ ចំត្រង់ពោះ និងភ្លៅនៅក្នុងពេលនោះ។ លោក ស្រ៊ាង គឹមស្រ៊ីន អាយុ២៨ឆ្នាំ ត្រូវជាបងជីដូនមួយរបស់កុមារីរងគ្រោះ។ «ដល់ពេល ឮកាំភ្លើង ឮអញ្ចឹងទៅ ក៏នាំបងប្អូនទៅពួននៅផ្ទះខ្ទមនៅចម្ការហ្នឹង។ កាំភ្លើងហ្នឹង បាញ់ច្រើនគ្រាប់ ហើយត្រូវប្អូនខ្ញុំហ្នឹងពីរគ្រាប់។ បាញ់ហ្នឹង បាញ់ពីក្រោយផ្ទះទៅ។ គេឥតមានស្រែកគំរាមឲ្យចេញ ឲ្យអីទេ។ គេប្រាប់ថាបាញ់ពីក្រោយមកតែម្តង។ ពេលហ្នឹងប្រជាជនរត់ នាំគ្នារត់ទៅរៀងៗខ្លួន។ មានខ្លះរត់ទៅវត្តទៅអីទៅ ហើយគេឡើងទៅព័ទ្ធ នៅវត្តហ្នឹងទៀត។ យន្តហោះឆ្វែលមកទម្លាក់ត្រាច់ ទម្លាក់ច្រើនណាស់ក្រដាសបោះត្រាហ្នឹង»។ លោក ម៉ា សុង អាយុ៤២ឆ្នាំ អ្នកភូមិច្រកដំបងដែលស្ថិតនៅចម្ងាយប្រមាណជាប្រាំពីរគីឡូម៉ែត្រពីកន្លែងកើតហេតុ។ លោកមានប្រសាសន៍ថា អាជ្ញាធរខេត្តបានបាចត្រាក់រាប់ពាន់សន្លឹកពីលើយន្ដហោះ ដើម្បីឲ្យប្រជាពលរដ្ឋចាកចេញពីកន្លែងដែលពួកគេរស់នៅនោះ និងដើម្បីយកដីទៅអភិវឌ្ឍ។ ក្នុងត្រាក់នោះបានចោទប្រកាន់បុគ្គលចំនួនបីនាក់ថា ជាមេខ្លោងក្នុងការបំបះបំបោរប្រជាពលរដ្ឋឲ្យប្រឆាំងនឹងអាជ្ញាធរយកដីនេះទៅអភិវឌ្ឍន៍។ នៅមិនទាន់មានរបាយការណ៍ជាផ្លូវការពីក្រុមអាជ្ញាធរពីអ្នករងរបួសនៅឡើយទេ។ លោក ជួង សៀងហាក់ ស្នងការនគរបាលខេត្តក្រចេះមិនផ្តល់សេចក្ដីអត្ថាធិប្បាយណាមួយទេដោយលោកមានប្រសាសន៍ថា លោកកំពុងជាប់រវល់។ លោកឧត្តមសេនីយ៍ឯកខៀវ សុភ័គ អ្នកនាំពាក្យក្រសួងមហាផ្ទៃមានប្រសាសន៍ថា អ្នកភូមិចំនួនប្រាំនាក់ត្រូវសង្ស័យថា ជាអ្នកបង្ក និងញុះញង់ក្រុមប្រជាពលរដ្ឋឲ្យបង្កើតតំបន់អប្បគមមួយប្រឆាំងនឹងអាជ្ញាធរមូលដ្ឋាន និងបានប្រព្រឹត្តិអំពើខុសច្បាប់មួយចំនួន ក្នុងនោះមានបុគ្គលម្នាក់ឈ្មោះ ប៊ុន រដ្ឋា ដែលអាជ្ញាធរចង្អុលថា ជាសមាជិកសមាគមអ្នកប្រជាធិបតេយ្យរបស់លោក ម៉ម សុណង់ដូ នាយកវិទ្យុសំបុកឃ្មុំ។ «វាជាអំពើល្មើសដែលក្រុមអណាធិបតេយ្យបានធ្វើនៅកន្លែងហ្នឹង។ សមាគមរបស់គាត់មាន គឺសមាគមប្រជាធិបតេយ្យ ដែលមានលោកម៉ម សុណង់ដូ ជាប្រធាន។ ជាសាខារបស់គាត់នៅតាមស្រុក មានបួន ទៅប្រាំនាក់ ហើយមេខ្លោងដែលយើងរកចាប់ខ្លួននោះ»។ លោកឧត្តមសេនីយ៍ឯក ខៀវ សុភ័គ បានទទួលស្គាល់ថាមានជនរងគ្រោះដល់ស្លាប់ក្នុងប្រតិបត្តិការខាងលើនោះ។ ទោះជាយ៉ាងណាលោក ចាន់ សាវ៉េត អនុប្រធានផ្នែកស៊ើបអង្កេតរបស់អង្គការការពារសិទ្ធិមនុស្សអាដហុកបានលើកឡើងថា ក្រុមអាជ្ញាធរបានប្រើប្រាស់លេសថា ប្រជាពលរដ្ឋមាននិន្នាការបង្កើតតំបន់អប្បគមដើម្បីប្រើប្រាស់កម្លាំងប្រដាប់អាវុធធ្វើការបង្រ្កាប។ ប៉ុន្ដែលោកបញ្ជាក់ថា ក្រុមមន្ដ្រីស៊ើបអង្កេតរបស់អង្គការការពារសិទ្ធិមនុស្សនឹងធ្វើការអង្កេតទៀតនៅឡើយ មុននឹងធ្វើសេចក្ដីសន្និដ្ឋានជាក់លាក់បន្ថែមទៀត។ កាលពីថ្ងៃទី២៦ ខែមេសា សកម្មជនការពារព្រៃឈើយ៉ាងក្លាហានម្នាក់ លោក ឈុត វុទ្ធី ត្រូវបានបាញ់សម្លាប់នៅតំបន់ដាច់ស្រយាលមួយនៅលើជួរភ្នំក្រវាញក្នុងខេត្តកោះកុង បន្ទាប់ពីលោកបានតាមឃ្លាំមើលការកាប់បំផ្លាញព្រៃឈើ។ ហើយក្រុមអាជ្ញាធរបានលើកហេតុផលខុសៗគ្នាជាច្រើនពីបរិបទនៃការស្លាប់នេះ៕ This posting includes an audio/video/photo media file: Download Now |
| You are subscribed to email updates from VOA News: ព័ត៌មាន To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
