VOA News: ព័ត៌មាន: “ហេឡូវីអូអេ ០៩ មេសា ២០១២៖ ការតំណាងយុវជននៅក្នុងការបោះឆ្នោតឃុំសង្កាត់” plus 3 more |
- ហេឡូវីអូអេ ០៩ មេសា ២០១២៖ ការតំណាងយុវជននៅក្នុងការបោះឆ្នោតឃុំសង្កាត់
- ហ្វីលីពីននិងវៀតណាមនឹងលេងកីឡារួមគ្នាលើកោះស្ព្រែតលី
- ឌុចថាអៀង សារីដឹងពីកាសម្រេចចាប់ខ្លួនកម្មាភិបាលខ្មែរក្រហម
- មន្ត្រីមហាផ្ទៃកម្ពុជាថាមិនទាន់មានភស្តុតាងបញ្ជាក់ថាហ៊ុន តូរត់គ្រឿងញៀន
| ហេឡូវីអូអេ ០៩ មេសា ២០១២៖ ការតំណាងយុវជននៅក្នុងការបោះឆ្នោតឃុំសង្កាត់ Posted: 10 Apr 2012 12:27 PM PDT គណបក្សនយោបាយតែងតែលើកឡើងអំពីគោលនយោបាយគាំទ្រយុវជន ប៉ុន្តែតើគណបក្សនយោបាយណាខ្លះនឹងដាក់បេក្ខជនជាយុវជនក្នុងការចូលរួមប្រកួតប្រជែងនៅក្នុងការបោះឆ្នោតជ្រើសរើសក្រុមប្រឹក្សាឃុំសង្កាត់នាពេលខាងមុខ? តើការធ្វើបែបនេះមានសារៈសំខាន់យ៉ាងដូចម្តេចខ្លះ? វាគ្មិនដែលចូលមកបកស្រាយប្រធានបទនេះគឺ លោក យ៉ង់ គឹមអេង ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍនិងសន្តិភាព។ សូមស្តាប់សំឡេងទាំងស្រុងនៃកម្មវិធីហេឡូវីអូអេថ្ងៃទី០៩ ខែមេសា ឆ្នាំ២០១២៖ <!--AV--> មធ្យោបាយចូលរួមពីប្រិយមិត្ត៖ ទូរស័ព្ទ ០១២ ៥១ ៥១ ៩៤ ហ្វេសប៊ុក facebook.com/voakhmer អ៊ីម៉េល hellovoa@voanews.com This posting includes an audio/video/photo media file: Download Now |
| ហ្វីលីពីននិងវៀតណាមនឹងលេងកីឡារួមគ្នាលើកោះស្ព្រែតលី Posted: 10 Apr 2012 10:16 AM PDT បើយោងទៅតាមមេបញ្ជាការយោធាជើងទឹករបស់ប្រទេសហ្វីលីពីន ទាហានហ្វីលីពីន និងទាហានវៀតណាមបានរួមគ្នាលេងកីឡានៅលើកោះស្ព្រែតលី (Spratlys) ក្នុងគោលបំណងនឹងធ្វើឲ្យធូរស្រាលដល់ស្ថានការណ៍តានតឹងនៅលើជួរកោះស្ព្រែតលីនៃតំបន់សមុទ្រចិនភាគខាងត្បូង។ តាមពាក្យរបស់ឧត្ដមនាវីរងហ្វីលីពីន Alexander Pama ដែលនិយាយថា «យើងនឹងបញ្ជូនទាហានយើងទៅលើកោះ និងភាគីមួយទៀត នឹងបញ្ជូនទាហានរបស់គេដែរ ដើម្បីលេងកីឡាផ្សេងៗ ដូចជាបាល់បោះនិងបាល់ទាត់។ កោះនោះ ដែលទាមទារដោយចិនផងដែរ បានត្រូវគេមើលឃើញថា ជាចំណុចក្ដៅតែមិនឃើញមានអាវុធពាក់ព័ន្ធក្នុងរឿងនេះទេ។ ព័ត៌មានអន្តរជាតិសំខាន់ៗដទៃទៀត៖ ឥណ្ឌូនេស៊ី៖ ជនស្វែងរកទីជម្រកថ្មីដែលប្រាថ្នាធ្វើដំណើរទៅកាន់ប្រទេសអូស្រាលី បានចាកចេញពីនាវាដឹកប្រេងដែលស្រោចស្រង់ជីវិតខ្លួននៅលើសមុទ្រហើយ ក្រោយពីបានប្រឈមមុខនឹងអាជ្ញាធរឥណ្ឌូនេស៊ីមក។ <!--IMAGE-RIGHT-->ស៊ីរី៖ សកម្មជននៅក្នុងប្រទេសស៊ីរីរាយការណ៍ថា ការវាយប្រហារមកលើទីក្រុងពីរនឹង មិនឃើញមានការដកកងទ័ពចេញកាលពីថ្ងៃអង្គារនេះ ទោះបីជារដ្ឋាភិបាលស៊ីរី និយាយអះអាងថា ខ្លួនចាប់ផ្ដើមដកកងទ័ពចេញពីទីក្រុងខ្លះ ដោយអនុវត្ដតាមកិច្ចព្រមព្រៀងឈប់បាញ់គ្នា សម្របសម្រួលដោយអ.ស.ប.។ កូរ៉េខាងជើង៖ នៅថ្ងៃអង្គារនេះ កូរ៉េខាងជើងនិយាយថាបានបញ្ចប់កិច្ចការរៀបចំបាញ់បង្ហោះរ៉ុក្កែតដែលជាវិធានការថ្កោលទោសដោយសហគមន៍អន្ដរជាតិ។ នាយករងនៃកម្មវិធីអវកាសកូរ៉េខាងជើង Ryu Gun Chol និយាយប្រាប់ក្រុមអ្នកកាសែតនៅក្នុងទីក្រុងព្យុងយ៉ាងថា រ៉ុក្កែតនោះរៀបចំហើយស្រេចដើម្បីបាញ់បង្ហោះនៅថ្ងៃព្រហស្បត្តិ៍។ អ្នកកាសែតអន្ដរជាតិរាប់ទាំងពីវីអូអេផង បានត្រូវនាំឲ្យទៅមើលទីកន្លែងបាញ់បង្ហោះកាលពីថ្ងៃអាទិត្យ។ ម៉ាឡេស៊ី៖ នាយករដ្ឋមន្ដ្រីនៃប្រទេសម៉ាឡេស៊ី លោក ណាជិប រាហ្សាក បានចេញសេចក្ដីព្រាងច្បាប់ថ្មីមួយដែលរារាំងប៉ូលីសមិនឲ្យចាប់ចងជនសង្ស័យគ្មានពេលកំណត់ដោយ មិនមានការកាត់ក្ដី ដោយសារតែជំនឿនយោបាយរបស់គេ។ អ.ស.ប.៖ ក្រុមប្រឹក្សាសន្ដិសុខអ.ស.ប. បានសម្ដែងការព្រួយបារម្ភដ៏ជ្រាលជ្រៅមកលើការគំរាមភេរវកម្មនៅតំបន់ភាគខាងជើងប្រទេសម៉ាលី ដោយនិយាយថា សមាជិករបស់ក្រុម អាល់កៃដានៅក្នុងក្រុងមាក្រេប និងក្រុមនិយមជ្រុលស្ថិតនៅក្នុងចំណោមជនបះបោរដែលបានវាយដណ្ដើម តំបន់ភាគខាងជើងប្រទេស។ ចិន៖ ប្រទេសចិនបានកាត់ទោសដាក់គុក២ឆ្នាំ៨ខែ ដល់សកម្មជនពិការអ្នកការពារសិទ្ធិមនុស្សតាមបទចោទប្រកាន់ពីបទបណ្ដាលឲ្យមានភាពវឹកវរនិងប្រព្រឹត្ដការកេងបន្លំជំរុញឲ្យមានការតវ៉ា។ អាហ្វហ្គានីស្ថាន៖ អត្ដឃាតជនបានបំផ្ទុះគ្រាប់បែកបានសម្លាប់មនុស្សយ៉ាងតិច១៥នាក់នៅក្នុងការវាយប្រហារនៅតំបន់ភាគខាងលិច និងខាងត្បូងប្រទេសអាហ្វហ្គានីស្ថាន បណ្ដាលឲ្យមានការភ័យខ្លាចអំពីការវាយប្រហារជាថ្មីនៅរដូវស្លឹកឈើលាស់។ ប៉ាគីស្ថាន៖ អ្នកជួយសង្រ្គោះរាប់រយនាក់នៅបន្ដតាមស្វែងរកជនរងគ្រោះពីការរមៀលទឹកកកនៅក្នុងប្រទេសប៉ាគីស្ថាន ដែលបានសម្លាប់មនុស្សជាង១៣៥នាក់ មានទាហាននិងជនស៊ីវិលផង ដែលបានត្រូវកប់ដោយទឹកកកនៅក្នុងបន្ទាយទាហាន នៅ ជិតតំបន់កាស្មៀរភាគខាងជើងប្រទេស។
<!--AV--> This posting includes an audio/video/photo media file: Download Now |
| ឌុចថាអៀង សារីដឹងពីកាសម្រេចចាប់ខ្លួនកម្មាភិបាលខ្មែរក្រហម Posted: 10 Apr 2012 02:11 AM PDT អតីតប្រធានមន្ទីរស-២១ ឌុច បានប្រាប់អង្គជំនុំជម្រះសាលាដំបូង នៅថ្ងៃចន្ទនេះថា អៀង សារី អតីតឧបនាយករដ្ឋមន្ដ្រី និងជារដ្ឋមន្ត្រីការបរទេសខ្មែរក្រហមអាចទទួលបានដំណឹងជាមុនពីការសម្រេចចាប់ខ្លួនជនណាម្នាក់ក្នុងក្រសួងរបស់លោក បើទោះបីជាពុំមានភស្ដុតាងជាក់ស្ដែងថា អៀង សារី បានដាក់បញ្ជាឲ្យចាប់ខ្លួនជនទាំងនោះក៏ដោយ។ ឌុច ដែលត្រូវបានផ្ដន្ទាទោសក្នុងសំណុំរឿង ០០១ កំពុងផ្តល់សក្ខីកម្មប្រឆាំងនឹងអតីតមេដឹកនាំកំពូលរបស់ខ្លួនចំនួនបីនាក់គឺនួន ជា ខៀវ សំផន និង អៀង សារី ជាប់ចោទក្នុងសំណុំរឿង ០០២។ ការផ្ដល់សក្ខីកម្មទាក់ទងនឹងប្រព័ន្ធទំនាក់ទំនងការងារ ការចាត់តាំងរចនាសម្ព័ន្ធរដ្ឋបាល ការបណ្ដេញប្រជាពលរដ្ឋ និងតួនាទីរបស់ជនជាប់ចោទ។ ឌុច បានឆ្លើយសំណួររបស់លោកសហមេធាវីអន្ដរជាតិរបស់អៀង សារី គឺលោកម៉ាយឃើល ខាណាវ៉ាស ( Michael Karnavas) ចំពោះកង្វះខាតភស្ដុតាងរបស់ឌុច ដែលអាចបញ្ជាក់ថា កូនក្ដីរបស់លោកបានចូលរួមពិភាក្សាបញ្ហាចាប់ខ្លួនបុគ្គលិកនៅក្រសួងការបរទេសយកទៅដាក់គុកទួលស្លែង ឬ មន្ទីរស-២១ នោះ។ បន្ទាប់មកបុគ្គលិកទាំងនោះត្រូវសម្លាប់ចោល។ «ឯកសារដែលទាក់ទងនឹងអៀង សារីគឺទាក់ទងមនុស្សនៅក្នុងអង្គភាពរបស់គាត់។ តែឲ្យរកអំណាច អៀង សារី គ្មានទេ។ បើរឿងហ្នឹង អៀង សារី មិនទៅចូលរួមអចិន្ត្រៃយ៍ គេមិនសម្រេចក្នុងអចិន្ត្រៃយ៍ហ្នឹងទេ។ ប៉ុល ពត គាត់សម្រេចក៏គាត់គង់តែឲ្យយោបល់មក អៀង សារី ដែរ។ ជាគោលការណ៍ គាត់ត្រូវតែដឹង»។ ចំពោះសំណួររបស់លោក ខាណាវ៉ាស ដែលថា តើមានបុគ្គលិកក្រសួងការបរទេសត្រូវចាប់ខ្លួន និងសម្លាប់ចោលនៅមន្ទីរស-២១ ដែរឬយ៉ាងណា? ឌុចបានឆ្លើយយ៉ាងលឿនថា «ពិតជាមានបុគ្គលិកទាំងនោះចំនួនច្រើន» ត្រូវចាប់ខ្លួន។ ឌុចបញ្ជាក់ថា អង្គការរបស់ពួកខ្មែរក្រហមចាប់ខ្លួនប្រជាពលរដ្ឋ និងកម្មាភិបាលរបស់ខ្លួនយកទៅឃុំឃាំង និងសម្លាប់ចោលដោយចោទប្រកាន់គេចំនួនបីចំណុច គឺជនត្រូវចាប់ខ្លួនត្រូវជឿថា គឺជាភ្នាក់ងារចារកម្មរបស់អាមេរិក (CIA) ឬ ជាចារកម្មរបស់រុស្ស៊ី (KGB) ឬជាភ្នាក់ងារបង្កប់ស៊ីរូងផ្ទៃក្នុងរបស់វៀតណាម។ ឌុចបានរៀបរាប់ក្នុងសវនាការនៅថ្ងៃនេះទៀតថា ចម្លើយសារភាពដែលបានមកពីការធ្វើទារុណកម្មជម្រិតយកចម្លើយនោះត្រូវបញ្ជូនទៅឲ្យសុន សេន ដែលកាលនោះទទួលបន្ទុកផ្នែកកិច្ចការសន្ដិសុខ និងការពារជាតិ និងនួន ជា បងធំទីពីរបន្ទាប់ពី ប៉ុល ពត និង ក៏ជាមេមនោគមវិជ្ជានៃរបបខ្មែរក្រហមផងដែរ។ ឌុច បន្ថែមថាជួនកាលមេដឹកនាំខ្មែរក្រហមទាំងពីរនាក់បានដាក់បញ្ជាឲ្យសួរចម្លើយឡើងវិញ។ ក្នុងការផ្តល់សក្ខីកម្មកាលពីសប្ដាហ៍មុនៗឌុច បញ្ជាក់ថា ខ្លួនមិនដែលបានជួប អៀង សារី ដោយផ្ទាល់នោះទេ ក្នុងរបបខ្មែរក្រហម។ ប៉ុន្ដែគាត់បានឃើញ អៀង សារី ចំនួនពីរដងមុននឹងរបបនេះត្រូវផ្តួលរំលំ។ មេធាវីរបស់ អៀង សារី បានចោទសួរដេញដោល ឌុច លើឯកសារជាច្រើនក្នុងសវនាការ។ ជួនកាលឌុច បានស្ដីបន្ទោសលោក ម៉ាយឃើល ខាណាវ៉ាស ដោយការខឹងសម្បារវិញថា លោកម៉ាយឃើល ខាណាវ៉ាស បានចោទសួរសំណួរច្រំដែលៗដែលគាត់មិនចង់ឆ្លើយតប។ ទោះជាយ៉ាងណា ឌុច ចាត់ទុកថា អៀង សារី មានវីរភាពមួយ ក្នុងការការពារកូនកម្មាភិបាលខ្មែរក្រហមមួយចំនួនពីការកាប់សម្លាប់ បន្ទាប់ពីឱពុកម្ដាយរបស់ពួកគេត្រូវចាប់ខ្លួន និងសម្លាប់ចោល។ ឌុច បានឲ្យដឹងថាជាមាគ៌ារបស់ពួកខ្មែរក្រហមគឺថា នៅពេលដែលមានការសម្រេចចាប់ខ្លួនប្រជាពលរដ្ឋណាមួយយកមកដាក់គុក កូនៗរបស់ពួកគេក៏នឹងត្រូវនាំខ្លួនយកទៅសម្លាប់ចោល៕ This posting includes an audio/video/photo media file: Download Now |
| មន្ត្រីមហាផ្ទៃកម្ពុជាថាមិនទាន់មានភស្តុតាងបញ្ជាក់ថាហ៊ុន តូរត់គ្រឿងញៀន Posted: 09 Apr 2012 07:13 PM PDT មន្ត្រីជាន់ខ្ពស់នៃក្រសួងមហាផ្ទៃនៅថ្ងៃចន្ទនេះ បានអះអាងថា ក្រសួងមហាផ្ទៃកម្ពុជានៅមិនទាន់បានរកឃើញភស្តុងតាងណាមួយដែលបានបញ្ជាក់ថា លោកឧកញ៉ា ហ៊ុន តូ និងលោកឧកញ៉ា គិត ម៉េង ជាប់ពាក់ព័ន្ធនឹងសកម្មភាពរត់ពន្ធថ្នាំញៀន និងលាងលុយកខ្វក់នៅប្រទេសអូស្ត្រាលី ដែលមានតម្លៃមួយពាន់លានដុល្លារសហរដ្ឋអាមេរិកនោះទេ។ កាលពីចុងខែមិនា កាសែតក្នុងស្រុកមួយចំនួនរបស់អូស្ត្រាលីបានរាយការណ៍នៅក្នុងអត្ថបទរបស់ខ្លួនដែលមានខ្លឹមសារថា អាជ្ញាធរអូស្រ្តាលីមានគម្រោងចាប់ខ្លួនលោកឧកញ៉ា ហ៊ុន តូ។ ក៏ប៉ុន្តែត្រូវបានអាកខានទៅវិញ ដោយសារតែស្ថានទូតអូស្រ្តាលីប្រចាំទីក្រុងភ្នំពេញមិនបានផ្តល់ទិដ្ឋាកាដល់លោក ហ៊ុន តូ ដោយខ្លាចប៉ះពាល់ទំនាក់ទំនងការទូតរវាងកម្ពុជា និងអូស្រ្តាលី។ ការប៉ុនប៉ងចាប់ខ្លួនឧកញ៉ា ហ៊ុន តូ ដោយសារតែអាជ្ញាធរសង្ស័យថា លោកជាប់ពាក់ព័ន្ធនឹងសកម្មភាពរត់ពន្ធថ្នាំញៀន និងលាងលុយកង្វក់ទៅកាន់អូស្ត្រាលី។ កាសែតនោះក៏បានបញ្ជាក់ថាក្នុងពេលនោះលោកគិត ម៉េង ក៏មានទំនាក់ទំនងរកស៊ីជាមួយលោក ហ៊ុន តូដែរប៉ុន្តែមិនបានលើកឡើងថាលោកគិត ម៉េង ពាក់ព័ន្ធក្នុងសកម្មភាពឧក្រិដ្ឋនោះទេ។ លោកឧបនាយករដ្ឋមន្ត្រី ស ខេង រដ្ឋមន្ត្រីមហាផ្ទៃបានថ្លែងប្រាប់ក្រុមអ្នកកាសែតនៅឯសណ្ឋាគារឡឺរ៉ូយាល់ នៅថ្ងៃចន្ទនេះថា រឿងនេះជារឿងបុគ្គល ហើយក្រសួងបានធ្វើការបដិសេធរួចហើយ។ លោកបានមានប្រសាសន៍ថា មិនមានឯកសារជាមូលដ្ឋានណាមួយ ដើម្បីស្រាវជ្រាវចំពោះករណីនេះទេ។ «ខ្ញុំគិតថា មកដល់ពេលនេះ យើងពុំទាន់មានឯកសារណាជាមូលដ្ឋាន ដើម្បីធ្វើការស្រាវជ្រាវនោះទេ។ នេះគ្រាន់តែជាព័ត៌មានកាសែតមួយតែប៉ុណ្ណោះ»។ លោកឧកញ៉ា ហ៊ុន តូ ក្មួយប្រុសលោកនាយករដ្ឋមន្ត្រី ហ៊ុន សែន និងលោកឧកញ៉ា គិត ម៉េង បានបដិសេធការចុះផ្សាយទាំងឡាយនៃបណ្តាញសារព័ត៌មាននៃប្រទេសអូស្រ្តាលី។ លោក ហ៊ុន តូ អះអាងថាលោកបានដាក់ពាក្យបណ្តឹងទៅកាន់ស្ថានទូតអូស្រ្តាលីប្រចាំទីក្រុងភ្នំពេញ ប្រឆាំងជំទាស់ទៅនឹងការចុះផ្សាយនៅក្នុងសារព័ត៌មានទាំងនោះ។ លោក ហ៊ុន តូ នៅថ្ងៃចន្ទនេះមិនបានធ្វើអត្ថាធិប្បាយជាមួយនឹងវីអូអេទេ ដោយលោកបាននិយាយថា លោកគ្មានពេលទំនេរដើម្បីនិយាយជាមួយនឹងអ្នកកាសែតទេ។ «ខ្ញុំឥតមានពេលទេ!»។ ក៏ប៉ុន្តែបន្តិចក្រោយមកមានទូរស័ព្ទមកកាន់ការិយាល័យវីអូអេក្រុងភ្នំពេញដោយបុគ្គលនោះ បានអះអាងថា ជាជំនួយការហើយបាននិយាយថា បើចង់សម្ភាសសូមមកសម្ភាសនៅផ្ទះរបស់លោក ហ៊ុន តូ។ លោក អ៊ូ វីរៈ ប្រធានមជ្ឈមណ្ឌលសិទ្ធិមនុស្សកម្ពុជា បាននិយាយថា រាល់ការចុះផ្សាយព័ត៌មានអំពីបុគ្គលណាមួយ ក្រសួងមហាផ្ទៃត្រូវតែមានការស៊ើបអង្គេតថា បុគ្គលណាជាប់ពាក់ព័ន្ធ ឬមិនជាប់ពាក់ព័ន្ធ។ «ការដែលស៊ើបអង្គេតដោយហ្មត់ចត់ណាមួយ ហើយអព្យាក្រឹត្យណាមួយ ដោយនីតីរដ្ឋ ដោយការស៊ើបអង្គេតត្រឹមត្រូវ ខ្ញុំថាប្រជាពលរដ្ឋខ្មែរយើង នឹងមានទំនុកចិត្តបន្ថែមទៅលើអាជ្ញាធរ ទៅលើរដ្ឋាភិបាល។ ប៉ុន្តែប្រសិនជាអត់ទេ ខ្ញុំមើលទៅប្រជាពលរដ្ឋទម្លាក់កំហុសនេះលើគណបក្សកាន់អំណាច»។ លោក រីឈត បេឃ័រ (Richard Beker) អ្នកនិពន្ធអត្ថបទមួយរូបរបស់កាសែតឌឹអេច នៃប្រទេសអូស្ត្រាលី បានថ្លែងប្រាប់វីអូអេតាមរយៈសារអ៊ីម៉ែលដោយការពារសេចក្តីរាយការណ៍របស់ខ្លួនថាត្រឹមត្រូវ។ សារព័ត៌មានរបស់អូស្ត្រាលីបាននិយាយថា អាជ្ញាធរអូស្ត្រាលីបានបើកការស៊ើបអង្កេតសំដៅលើលោក ហ៊ុន តូដោយពិនិត្យមើលឈើហ៊ុបនាំចូលពីកម្ពុជាដែលមានបង្កប់គ្រឿងញៀន។ ចំណែកឯការលាងលុយកង្វក់ត្រូវបានសង្ស័យថាធ្វើឡើងតាមរយៈបនល្បែងកាស៊ីណូមួយឈ្មោះក្រោនកាស៊ីណូនៅក្នុងទីក្រុងម៉ែលប៊ន នៅអូស្ត្រាលី។ លោក ដេវ ចច (Dave Gorge) នាយករងបេសកម្មស្ថានទូតអូស្ត្រាលីប្រចាំទីក្រុងភ្នំពេញ មិនបានឆ្លើយនឹងសំណូរតាមសារអេឡិចត្រូនិករបស់វីអូអេទេ ដោយសារអេឡិចត្រូនិករបស់លោកបានភ្ជាប់ប្រព័ន្ធឆ្លើយតបដោយស្វ័យប្រវត្តិ ថា លោកកំពុងឈប់សម្រាក ហើយលោកនឹងមកបំពេញការងារវិញ នៅពីរសប្តាហ៍ទៀត៕ This posting includes an audio/video/photo media file: Download Now |
| You are subscribed to email updates from VOA News: ព័ត៌មាន To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
