VOA News: ព័ត៌មាន: “កូរ៉េខាងជើងបង្ហាញអ្នកយកព័ត៌មានបរទេសពីកន្លែងបាញ់រ៉ុកែត” plus 2 more |
- កូរ៉េខាងជើងបង្ហាញអ្នកយកព័ត៌មានបរទេសពីកន្លែងបាញ់រ៉ុកែត
- កម្ពុជាសុំឱ្យចិនមកវិនិយោគបន្ថែមទៀត
- មូលដ្ឋានយោធាប៉ាគីស្ថានលើភ្នំហ៊ីម៉ាឡាយត្រូវបានកម្ទេចដោយផ្ទាំងទឹកកក
| កូរ៉េខាងជើងបង្ហាញអ្នកយកព័ត៌មានបរទេសពីកន្លែងបាញ់រ៉ុកែត Posted: 09 Apr 2012 09:06 AM PDT មន្រ្តីអវកាសរបស់ប្រទេសកូរ៉េខាងជើង បានចាត់វិធានការដ៏កម្រមួយកាលពីថ្ងៃអាទិត្យដោយអនុញ្ញាតិឲ្យពួកអ្នកកាសែតបរទេសមើលកាំជ្រួចរ៉ុកែត ដែលប្រុងប្រៀបបាញ់បង្ហោះនៅសប្តាហ៍នេះ ទោះបីមានការជំទាស់ប្រឆាំងពីសហរដ្ឋអាមេរិកនិងប្រទេសកូរ៉េខាងត្បូងក៏ដោយ។ ការមើលកាំជ្រួចរ៉ុកែតបានកើតមានឡើងនៅពេលដែលរូបថតស៊ើបការណ៍សម្ងាត់របស់កូរ៉េខាងត្បូង ដែល VOA ទទួលបាន បង្ហាញពីអ្វីទំនងជាការប្រុងប្រៀបធ្វើតេស្តុសាកល្បងនុយក្លេអ៊ែរទី៣របស់កូរ៉េខាងជើង។ រដ្ឋាភិបាលទីក្រុងព្យូងយ៉ាងនៅតែនិយាយថាកាំជ្រួចរ៉ុកែត ដែលត្រូវបាញ់បង្ហោះនៅចន្លោះថ្ងៃទី១២និង១៦ខែមេសានេះ នឹងដឹកផ្កាយរណបសម្រាប់មើលអាកាសធាតុតែប៉ុណ្ណោះ ប៉ុន្តែសហរដ្ឋអាមេរិកនិងកូរ៉េខាងត្បូងនិយាយថាព្រឹត្តិការណ៍នេះជាការធ្វើតេស្តុកាំជ្រួចផ្លាង Ballistic Missile។ លោក Jang Myong Jin អ្នករៀបចំចាត់ចែងទូទៅនៅទីកន្លែងបាញ់បង្ហោះបានប្រាប់ពួកអ្នកយកព័ត៌មានថា នៅក្រោមសន្ធិសញ្ញាអវកាស ប្រទេសទាំងអស់មានសិទ្ធិអភិវឌ្ឍបច្ចេកវិទ្យាអវកាសដើម្បីគោលបំណងសន្តិភាព។ សេចក្តីសម្រេចចិត្តរបស់ក្រុមប្រឹក្សាសន្តិសុខអង្គការសហប្រជាជាតិដែលតាក់តែងដោយសហរដ្ឋសហរដ្ឋអាមេរិក បាននិយាយអំពីបច្ចេកវិទ្យានៃការបាញ់បង្ហោះកាំជ្រួចមីស៊ីល។ ទោះជាយ៉ាងណាក៏ដោយ មានសន្ធិសញ្ញាមួយដែលសំខាន់ជាងសេចក្តីសម្រេចចិត្តនេះហើយនេះជាសន្ធិសញ្ញាអវកាស។ សន្ធិសញ្ញានេះបានចែងយ៉ាងច្បាស់ថាប្រទេសនិមួយៗមានសិទ្ធិអភិវឌ្ឍបច្ចេកវិទ្យាអវកាសហើយនឹងរុករកអវកាសដោយគោលបំណងសន្តិភាព។ ព័ត៌មានអន្តរជាតិផ្សេងៗទៀត៖ ស៊ីរី៖ ពួកមន្រ្តីតួកគី និយាយថាកងទ័ពស៊ីរីបានបាញ់ឆ្លងកាត់ព្រំដែនចូលក្នុងជំរុំជនភៀសខ្លួនដោយធ្វើឲ្យអ្នកបកប្រែជាតិតួកគីម្នាក់និងជនភៀសខ្លួនស៊ីរី២នាក់ទៀតបានរងរបួសនៅក្នុងឧបទ្ទវហេតុបែបនេះលើកទី១ចាប់តាំងពីតួកគីបានចាប់ផ្តើមផ្តល់កន្លែងជ្រកពួនដល់ជនភៀសខ្លួនស៊ីរីរាប់ពាន់នាក់កាលពីឆ្នាំទៅមក។ ម៉ាលី៖ សហគមន៍សេដ្ឋកិច្ចនៃរដ្ឋអាហ្វ្រិកខាងលិច (ECOWAS) បានលុបចោលការដាក់ទណ្ឌកម្មសេដ្ឋកិច្ចប្រឆាំងនឹងប្រទេសម៉ាលី ដោយនិយាយថា ខ្លួនបានជំរុញឲ្យមេដឹកនាំរដ្ឋប្រហារយោធាតាំងចិត្តធ្វើឲ្យមានការគ្រប់គ្រងតាមរដ្ឋធម្មនុញ្ញឡើងវិញ។ ធនាគារពិភពលោក៖ សេចក្តីរាយការណ៍ថ្មីរបស់ធនាគារពិភពលោក បានប្រាប់ឲ្យដឹងថា ការរីកធំដ៏ឆាប់រហ័សនៃទីក្រុងដ៏សំខាន់ៗក្នុងប្រទេសវៀតណាម កំពុងធ្វើឲ្យតម្លៃផ្ទះឡើងខ្ពស់ដែលមិនអាចឲ្យអ្នកស្រុកអាចទិញបានហើយនឹងបង្កើនការគំរាមកំហែងធ្វើឲ្យស្ទះការដឹកជញ្ជូន។ <!--IMAGE-RIGHT-->ចិន/តួគី៖ លោក Recep Tayyip Erdogan នាយករដ្ឋមន្រ្តីនៃប្រទេសតួកគី បានស្ថិតនៅក្នុងប្រទេសចិន ដែលជាទីកន្លែងដែលលោកនឹងជួបជាមួយមន្រ្តីចិនកំពូលៗដើម្បីធ្វើឲ្យទំនាក់ទំនងសេដ្ឋកិច្ចនិងនយោបាយមានភាពកាន់តែជិតស្និទ្ធឡើងរវាងប្រទេសទាំង២។ ភូមា៖ មេដឹកនាំនៃចលនាបះបោរដ៏យូរអង្វែងមួយនៃប្រទេសភូមា បានជួបគ្នាកាលពីថ្ងៃអាទិត្យជាមួយលោកស្រី Aung San Suu Kyi មេដឹកនាំនិយមលទ្ធិប្រជាធិបតេយ្យនិងសមាជិកសភាទើបជាប់ឆ្នោតថ្មីនៅគេហដ្ឋានរបស់លោកស្រីក្នុងទីក្រុងរ៉ង់ហ្គូន។ ប៉ាគីស្ថាន៖ ក្រុមជំនាញការយោធារបស់សហរដ្ឋអាមេរិកបានទៅដល់ប្រទេសប៉ាគីស្ថានដើម្បីផ្តល់ជំនួយបច្ចេកទេសក្នុងកិច្ចខិតខំស្វែងរកទាហាននិងជនស៊ីវិល១៣៥នាក់ដែលបានកប់នៅក្នុងការបាក់ផ្ទាំងទឹកកកដ៏ធំមួយនៅតំបន់ភ្នំ Kashmir នៅជិតព្រំដែនជាមួយប្រទេសឥណ្ឌា។ ថាយថានិក៖ កប៉ាល់ទេសចរណ៍មួយគ្រឿងដែលបានចាកចេញពីកំពុងផែ Southampton នៃប្រទេសអង់គ្លេសកាលពីថ្ងៃអាទិត្យបានបើកបរតាមផ្លូវសមុទ្រដែលកប៉ាល់ Titanic បានលិចជាប្រវត្តិសាស្រ្តកាលពី១០០ឆ្នាំមុន។ This posting includes an audio/video/photo media file: Download Now |
| កម្ពុជាសុំឱ្យចិនមកវិនិយោគបន្ថែមទៀត Posted: 08 Apr 2012 09:06 PM PDT មន្ដ្រីជាន់ខ្ពស់របស់រដ្ឋាភិបាលកម្ពុជាបានបញ្ជាក់នៅថ្ងៃសុក្រនេះថាកម្ពុជាមានជំហរយ៉ាង «រឹងមាំច្បាស់លាស់» សម្រាប់កសាងទំនាក់ទំនងកាន់តែជិតស្និទ្ធបន្ថែមទៀតជាមួយប្រទេសចិន។ លោក ចម ប្រសិទ្ធ ទេសរដ្ឋមន្ដ្រីនិងជារដ្ឋមន្ដ្រីក្រសួងពាណិជ្ជកម្មកម្ពុជាបានបង្ហាញជំហរយ៉ាងដូច្នេះ ក្នុងសិក្ខាសាលាក្នុងទីក្រុងភ្នំពេញស្ដីពីការជំរុញកិច្ចសហប្រតិបត្តិការលើវិស័យសេដុ្ឋកិច្ចនិងពាណិជ្ជកម្មរវាងខេត្តយន់ណាន់និងកម្ពុជា។ លោកបានបញ្ជាក់ថា៖ «កម្ពុជា សូមអះអាងឡើងវិញពីការប្តេជ្ញាចិត្តរបស់ខ្លួនក្នុងការពង្រឹងទំនាក់ទំនងឲ្យកាន់តែជិតស្និទ្ធរវាងកម្ពុជានិងចិនដើម្បីប្រែក្លាយឲ្យទៅជាដៃគូយុទ្ធសាស្ដ្រគ្រប់ជ្រុងជ្រោយពិតប្រាកដមួយ ជាពិសេសខាងផ្នែកសេដ្ឋកិច្ច ពាណិជ្ជកម្ម វិនិយោគទុន នយោបាយ និងសន្ដិសុខ ក្នុងបណ្ដាទសវត្សរ៍ខាងមុខ»។ លោក ចម ប្រសិទ្ធ មានប្រសាសន៍នៅចំពោះមុខគណៈប្រតិភូមកពីខេត្តយន់ណាន ភាគនិរតីប្រទេសចិនដែលមានសមាជិកសរុបជាង ២០០ នាក់ ភាគច្រើនគឺជាក្រុមអ្នកជំនួញ។ សមាជិកទាំងនេះ ដែលដឹកនាំដោយលោក លី ជីហ៊ឹង អភិបាលខេត្តយន់ណាន់ បានធ្វើដំណើរទស្សនកិច្ចនៅកម្ពុជាចំនួនបួនថ្ងៃ តាមយន្ដហោះពិសេសចំនួនបីគ្រឿង។ ទស្សនកិច្ចនេះធ្វើឡើងបួនថ្ងៃប៉ុណ្ណោះបន្ទាប់ពីប្រធានាធិបតីចិន លោក ហ៊ូ ជិនតាវ បញ្ចប់ទស្សនកិច្ចផ្លូវរដ្ឋរបស់ខ្លួននៅកម្ពុជា។ ក្នុងដំណើរទស្សនកិច្ចនោះប្រទេសកម្ពុជានិងចិនបានប្ដេជ្ញារួមគ្នាថានឹងជំរុញការផ្លាស់ប្តូពាណិជ្ជកម្មឲ្យកើនពីជាង ២.៣០០ លានដុល្លារ នៅឆ្នាំ ២០១១ ដល់ចំនួន ៥.០០០ លានដុល្លារអាមេរិកនៅឆ្នាំ ២០១៧។ លោក លី ជីហ៊ឹង បាននិយាយតាមរយៈអ្នកបកប្រែផ្តោតលើទំនាក់ទំនងទ្វេភាគីនេះដែរ។ «ចិន និងកម្ពុជា គឺជាប្រទេសជិតខាងយ៉ាងល្អ ដែលជឿទុកចិត្តគ្នាទៅវិញទៅមក ជាដៃគូដ៏ល្អ ជាមិត្តដ៏ល្អ។ ប្រវត្តិទំនាក់ទំនងដ៏យូរលង់ មិត្តភាពយ៉ាងជ្រាលជ្រៅជាទ្រព្យសម្បត្តិរតនៈរួមគ្នារបស់យើង»។ ក្នុងពេលនោះលោករដ្ឋមន្ដ្រីក្រសួងពាណិជ្ជកម្មកម្ពុជាបានជំរុញឲ្យប្រតិភូពីប្រទេសចិននេះសម្រេចចិត្តបណ្ដាក់ទុនក្នុងប្រទេសកម្ពុជាដោយបានលើកឡើងថាកម្ពុជាមានសក្ដានុពលផ្នែកកសិកម្ម កសិឧស្សាហកម្ម ហេដ្ឋារចនាសម្ព័ន្ធ ឧស្សាហកម្មសម្រាប់នាំចេញ ឧស្ម័ន រ៉ែ និងទេសចរណ៍។ លោក ចម ប្រសិទ្ធ បញ្ជាក់ថា ផ្នែកទាំងអស់នេះ មិនទាន់ត្រូវបានធ្វើអាជីវកម្មពេញលេញនៅឡើយទេ។ លោក លី ជីហ៊ឹង អភិបាលខេត្តយន់ណាន់ ក៏បានស្នើផងដែរឲ្យប្រទេសទាំងពីរពង្រឹងកិច្ចសហប្រតិបត្តិការ ផ្នែកសេដ្ឋកិច្ច បច្ចេកទេស វិស័យកសិកម្ម និងទេសចរណ៍«ឲ្យបានស៊ីជម្រៅពិតប្រាកដ» ហើយលោកប្រាថ្នាចង់ជំរុញកិច្ចសហការផ្នែកកែច្នៃដំណាំហូបផ្លែ កៅស៊ូ ការភ្ជាប់ការហោះហើរផ្លូវអាកាសពីខេត្តរបស់លោកមកកាន់ប្រទេសកម្ពុជា។ ប្រទេសកម្ពុជានិងចិនមានការចុះហត្ថលេខាសហប្រតិបត្តិការរវាងក្រុមហ៊ុនចិននិងក្រុមហ៊ុនកម្ពុជាលើវិស័យចំនួនបី ក្នុងសិក្ខាសិលានេះ។ កិច្ចចុះហត្ថលេខានេះផ្តោតលើការសហការវិនិយោគផ្នែកវារីអគ្គិសនី ផ្នែកស៊ីម៉ង់ត៍ជាមួយក្រុមហ៊ុន ស៊ីម៉ង់ត៍កម្ពុជាចក្រីទីង និង កិច្ចសហការវិនិយោគលើម៉ាស៊ីនស្រូវ៕ This posting includes an audio/video/photo media file: Download Now |
| មូលដ្ឋានយោធាប៉ាគីស្ថានលើភ្នំហ៊ីម៉ាឡាយត្រូវបានកម្ទេចដោយផ្ទាំងទឹកកក Posted: 08 Apr 2012 08:56 PM PDT ការបាក់ផ្ទាំងទឹកកកនៅក្នុងតំបន់ផែនទឹកកក Siachen បានកម្ទេចមូលដ្ឋានយោធាប៉ាគីស្ថានមួយនៅលើផែនទឹកកកមួយក្នុងតំបន់ភ្នំហ៊ីម៉ាឡាយ នៅតាមព្រំដែនជាមួយឥណ្ឌា ដោយបានកប់ទាហានយ៉ាងតិច១១៧នាក់ យោងតាមការរាយការណ៍របស់លោកឧត្តមសេនិយទោ អាតា អាបបាស។ លោក វ៉ាជីទ សេមសុល ហាសាន អគ្គស្នងការប៉ាគីស្ថានប្រចាំប្រទេសអង់គ្លេសបាននិយាយថាមានទាហានប្រមាណ១៥០នាក់បានស្ថិតនៅក្នុងមូលដ្ឋានយោធានេះ នៅក្នុងតំបន់មួយដែលមានកម្ពស់៦ពាន់ម៉ែត្រលើសពីកម្រិតទឹកសមុទ្រ ដែលនៅទីនោះសីតុណ្ហភាពអាចចុះដល់៧០អង្សាសេក្រោមសូន្យ។ កងឧទ្ធម្ភាគចក្រ ពួកឆ្កែស្វែងរកមនុស្ស ពួកទាហាននិងពេទ្យ ត្រូវបានបញ្ជូនទៅកាន់តំបន់ដាច់ស្រយាលនោះដើម្បីស្វែងរកពួកអ្នកនៅរស់។ ម៉ាលី៖ មេដឹកនាំរដ្ឋប្រហារយោធាក្នុងប្រទេសម៉ាលីនិយាយថាក្រុមប្រឹក្សាយោធារបស់លោកអាចប្រគល់អំណាចទៅឱ្យរដ្ឋាភិបាលបណ្តោះអាសន្នមួយក្នុងរយៈពេលប៉ុន្មានថ្ងៃខាងមុខនេះដែលជាផ្នែកសំខាន់មួយនៃកិច្ចព្រមព្រៀងរបស់ខ្លួនដែលបានត្រូវរាយការណ៍ កាលពីប៉ុន្មានម៉ោងមុននេះជាមួយក្រុមតំបន់ ECOWAS ដែលបានដាក់កំហិតទៅលើប្រទេសដែលគ្មានជាប់នឹងសមុទ្រនេះ។ ម៉ាទ្បាវី៖ អនុប្រធានាធិបតីម៉ាទ្បាវី លោកស្រីជូស៊ី បានដា បានស្បថសច្ចាប្រណិធានចូលកាន់តំណែងប្រធានាធិបតីស្ត្រីទីមួយកាលពីថ្ងៃសៅរ៍ នៅក្រោយមានការបញ្ជាក់ថាលោកប្រធានាធិបតី ប៊ីនហ្គូ វ៉ា មូដារីកា បានទទួលមរណភាពកាលពីថ្ងៃព្រហស្បតិ៍។ ស៊ីរី៖ កងកម្លាំងរដ្ឋាភិបាលស៊ីរីបានបាញ់ផ្តក់លើសំបុកក្រុមប្រឆាំងនៅមុនថ្ងៃកំណត់ចុងក្រោយបង្អស់នៅថ្ងៃអង្គារ ដែលបានត្រូវយល់ព្រមសម្រាប់ការបញ្ឈប់សកម្មភាពយោធាទាំងអស់ មនុស្សជាង១០០នាក់ បានត្រូវសម្លាប់កាលពីថ្ងៃសៅរ៍។ យ៉េមែន៖ ពួកអ្នកស្មោះត្រង់នឹងមេទាហាន យ៉េមែនម្នាក់ គឺលោក មូហាមេទ សាឡេ អាល អាមារ មេបញ្ជាការកងទ័ពអាកាស ណនិងជាប្អូនប្រុសម្តាយទីទៃរបស់អតីតប្រធានាធិបតីអាលី អាបដូឡាសាលេ បានទ្បោមព័ទ្ធចំណតអាកាសយានក្រុងសាណា ហើយបានបិទជើងហោះនៅក្រោយលោកប្រធានាធិបតិបានដកលោក អាមារ ចេញពីតំណែងដែលបានត្រូវដកចេញពីតំណែងដែលហាក់ដូចជាកិច្ចខិតខំប្រឹងប្រែងមួយដើម្បីដកពួកអ្នកស្មោះត្រង់ជាមួយលោកសាលេខ្លះចេញពីតំណែងសំខាន់ៗ។ ប៉ាទ្បេស្ទីន៖ នៅក្នុងតំបន់កាហ្សា ពួកសមាជិកនៃអង្គការហាម៉ាស និយាយថាពួកគេបានប្រហារជីវិតបុរសប៉ាទ្បេស្ទីនបីនាក់ ហើយបុរសម្នាក់ក្នុងបណ្តាពួកជនទាំងនេះបានត្រូវចោទប្រកាន់ថាបាន «ធ្វើកិច្ចសហប្រតិបត្តិការ» ជាមួយអ៊ីស្រាអែល។ សហរដ្ឋអាមេរិក៖ ពួកមន្ត្រីអាមេរិកខាងការជួយសង្គ្រោះបាននិយាយថាគេបានរកឃើញអ្នករស់នៅទាំងអស់ក្នុងផ្ទះល្វែងមួយក្នុងរដ្ឋ វីជីនៀ នាប៉ែកខាងកើតដែលនៅទីនោះយន្តហោះប្រតិកម្មប្រយុទ្ធមួយគ្រឿងនៃកងទ័ពជើងទឹកអាមេរិកបានធ្លាក់ទៅលើបណ្តាលឱ្យមនុស្ស៧នាក់ត្រូវរបួសដោយមានរួមបញ្ចូលទាំងអ្នកបើកយន្តហោះពីរនាក់ផងដែរ។ This posting includes an audio/video/photo media file: Download Now |
| You are subscribed to email updates from VOA News: ព័ត៌មាន To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
