VOA News: ព័ត៌មាន: “ការដកតំណែងលោក ប៉ូ ស៊ីឡៃ ក្លាយជារឿងធំបំផុតក្នុងប្រព័ន្ធផ្សាយរបស់ចិន” plus 1 more |
| ការដកតំណែងលោក ប៉ូ ស៊ីឡៃ ក្លាយជារឿងធំបំផុតក្នុងប្រព័ន្ធផ្សាយរបស់ចិន Posted: 11 Apr 2012 09:36 AM PDT បណ្ដាញព័ត៌មានចិនកាលពីថ្ងៃពុធនេះ បានសរសេរសរសើរសេចក្ដីសម្រេចចិត្ដរបស់គណបក្សកុំម្មុយនីស្ដចិន ដែលដកតំណែងសមាជិកជាន់ខ្ពស់ម្នាក់របស់ខ្លួនគឺ លោក ប៉ូ ស៊ីឡៃ (Bo Xilai) ចេញពីថ្នាក់ដឹកនាំកំពូលដោយសារតែមានរឿងអាស្រូវនយោបាយដ៏ធំបំផុតមិនធ្លាប់មានកាលពីពេលថ្មីៗនេះ។ ទីភ្នាក់ងារព័ត៌មានផ្លូវការចិនស៊ីនហួរសរសេរនៅយប់ថ្ងៃអង្គារថា លោក បូ បានត្រូវដកចេញពីតំណែងនៃគណៈកម្មាធិការអចិន្រៃ្តយ៍ Politburo ដែលមានសមាជិក២៥នាក់និងគណៈកម្មាធិការកណ្ដាលដែលមានសមាជិក៣០០នាក់ ដោយសារតែមានបទរំលោធធ្ងន់ធ្ងរ មកលើវិន័យរបស់គណបក្ស ដែលនៅក្នុងប្រទេសចិន វាមានន័យថា ប្រព្រឹត្ដអំពើពុករលួយ។ លោក Victor Shih សាស្រ្ដាចារ្យរងបង្រៀនវិទ្យាសាស្រ្ដនយោបាយនៅសាកលវិទ្យាល័យ Northwestern ស.រ.អ.ថ្លែងថា រឿងអាស្រូវដ៏កម្រនោះបានលាតត្រដាងបង្ហាញការដើម្បីអំណាចផ្ទៃក្នុងនៅក្នុងគណបក្សកុម្មុយនិស្ដចិននៅពេលមុនការផ្ទេរអំណាច។ លោកនិយាយថា៖ «នេះបង្ហាញថា មានការតស៊ូដ៏ខ្លាំងក្លានៅក្នុងនយោបាយចិនហើយរូបភាពសាមគ្គីគ្នា បង្ហាញពីក្រៅថា ចិនខិតខំបង្ហាញខ្លួនទៅពិភពលោក គ្រាន់តែសម្បកខាងក្រៅបុណ្ណោះ។ ការណ៍ពិតនៅពីក្រោយវាំងនន គេមានការប្រកួតគ្នាដ៏ស្វិតស្វាញរវាងក្រុមនិយមផ្សេងៗក្នុងថ្នាក់ដឹកនាំចិន»។ ជីវប្រវត្តិលោក ប៉ូ ស៊ីឡៃ ការដកលោក ប៉ូ ស៊ីឡៃ ចេញពីតំណែងថ្នាក់ដឹកនាំជាន់ខ្ពស់នៅក្នុងគណបក្សកុម្មុយនីស្ដចិនបានបំផ្លាញជីវិតនយោបាយដ៏ខ្ពង់ខ្ពស់នៅក្នុងសន្ដតិវង្សនយោបាយ។ ឪពុករបស់លោកគឺលោក ប៉ូ យីប៉ូ (Bo Yibo) ជាស្ថាបនិកម្នាក់នៃសាធារណរដ្ឋប្រជាមានិតចិន ហើយជាមេដឹកនាំម្នាក់ក្នុងចំណោម៨នាក់ ដែលត្រូវគេប្រសិទ្ធនាមថា «មេដឹកនាំអមតៈ» ដែលបានដឹកនាំនយោបាយរបស់ប្រទេសចិន ចេញពីកេរ្ដិ៍មត៌ករបស់ម៉ៅ សេទុង ដើម្បីដើរឆ្ពោះទៅរកប្រព័ន្ធទីផ្សារសេរី ដែលបាននាំប្រទេសចិនឲ្យក្លាយទៅជាមហាអំណាចសេដ្ឋកិច្ចមួយដែរ។ លោក ប៉ូ ស៊ីឡៃ បានចូលរួមក្នុងគណបក្សកុម្មុយនីស្តចិននៅឆ្នាំ១៩៨០ រួចឡើងបុណ្យសក្ដិយ៉ាងឆាប់រហ័ស ដោយកាន់មុខនាទីជាអភិបាលក្រុងដៃឡាង (Dailan)អភិបាលខេត្ត លាវនីង(Liaoning) និងរដ្ឋមន្ដ្រីពាណិជ្ជកម្ម។ នៅឆ្នាំ២០០៧ លោកបានត្រូវតែងតាំងជាមេដឹកនាំក្រុងចុងគិញ (Chongqing) នៅតំបន់និរតីប្រទេស រួចឡើងស័ក្កិជាសមាជិកម្នាក់ក្នុងចំណោម២៥នាក់នៃគណៈកម្មាធិការអចិន្រៃ្តយ៍ Politburo។ ចិន៖ ភរិយារបស់ លោក ប៉ូ ស៊ីឡៃ អស់កិត្ដិយស បានត្រូវចាត់ទុកជាជនសង្ស័យនៅក្នុងឃាតកម្មពាណិជ្ជករជាតិអង់គ្លេសម្នាក់។ ទីភ្នាក់ងារព័ត៌មានស៊ីនហួរនិយាយកាលពីយប់ថ្ងៃអង្គារថានាក់ស្រី Gu Kailai បានត្រូវអាជ្ញាធរស៊ើបអង្កេតពីបទឃាតកម្មលើរូបលោក Neil Heywood ដែលគេរកឃើញស្លាប់ក្នុងសណ្ឋាគារក្នុងខេត្ដចុងគិញ កាលពីខែវិច្ឆិកា។ ព័ត៌មានអន្តរជាតិសំខាន់ៗដទៃទៀត៖ <!--IMAGE-RIGHT--> ឥណ្ឌូនេស៊ី៖ ទីភ្នាក់ងារភូគព្ភសាស្រ្ដស.រ.អ. និយាយថាការរញ្ជួយផែនដីកម្រិត៨,៦ កើតមានឡើងនៅក្នុងតំបន់ឦសានប្រទេសឥណ្ឌូនេស៊ី ជំរុញឲ្យមានការប្រកាសភាពអាសន្ដស៊ូណាមីទូទាំងតំបន់មហាសមុទ្រឥណ្ឌា។ កូរ៉េខាងជើង៖ មន្ដ្រីកូរ៉េខាងជើងនិយាយនៅថ្ងៃពុធនេះថា គេបានចាក់ប្រេងឥន្ធនៈចូលទៅក្នុងរ៉ុក្កែត ដើម្បីប្រុងប្រៀបរៀបចំបាញ់បង្ហោះនៅពេលឆាប់ៗនេះ បណ្ដាលឲ្យមានការប្រឈមមុខដាក់គ្នាជាមួយប្រទេសជិតខាងនិងស.រ.អ.។ សមុទ្រចិនខាងត្បូង៖ ការប្រឈមមុខដាក់គ្នាដ៏ធ្ងន់ធ្ងររវាងចិននិងហ្វីលីពីនបង្ហាញឲ្យឃើញថាគ្មានសញ្ញានៃការធូរស្រាលនៅថ្ងៃពុធនេះ ដោយភាគីទាំងសង្ខាងចោទគ្នាទោសវិញទៅមកថាបានរំលោភលើបូរណភាពដែនទឹកនៅលើសមុទ្រចិនខាងត្បូង។ ភូមា៖ ព្រឹទ្ធសមាជិកអាមេរិកាំងម្នាក់ដ៏មានឥទ្ធិពលថ្លែងថា លោកនឹងអំពាវនាវដល់មន្រ្ដីស.រ.អ. ឲ្យរកមធ្យោបាយណា ដើម្បីផ្ដល់រង្វាន់ដល់ប្រទេសភូមាដែលបានបោះជំហានទៅមុខ ទៅរកលទ្ធិប្រជាធិបតេយ្យកាលពីពេលថ្មីៗនេះ។ អាមេរិក៖ បេក្ខជនប្រធានាធិបតី មីត រ៉មនី (Mitt Romney) អាចផ្ដោតអារម្មណ៍របស់លោកមកលើប្រធានាធិបតី បារ៉ាក់ អូបាម៉ា នៅថ្ងៃពុធនេះ មួយថ្ងៃក្រោយពីគូប្រជែងពីគណបក្សសាធារណរដ្ឋ បានបញ្ឈប់ការប្រកួតជាមួយលោក។ កូរ៉េខាងត្បូង៖ គណបក្សធំៗពីរនៃប្រទេសកូរ៉េខាងត្បូងបានប្រកួតគ្នាដ៏កិតៗ ដើម្បីដណ្តើមកាន់កាប់ក្នុងរដ្ឋសភាដោយគេមើលឃើញថា នេះជាការបង្ហាញប្រាប់ឲ្យឃើញមុន អំពីការបោះឆ្នោតជ្រើសតាំងប្រធានាធិបតី ដែលនឹងប្រព្រឹត្ដធ្វើនៅឆ្នាំក្រោយ។ ស៊ីរី៖ ប្រេសិតពិសេសអន្ដរជាតិទៅកាន់ប្រទេសស៊ីរី លោក កុហ្វី អាណាន់ ថ្លែងថារដ្ឋាភិបាលស៊ីរីបានធានាប្រាប់លោកថា គេនឹងគោរពទៅតាមបទឈប់បាញ់គ្នាជាមួយក្រុមបះបោរ តិចជាង២៤ម៉ោងមុននឹងកំណត់ពេលចូលមកដល់ដើម្បីបញ្ឈប់ការបាញ់គ្នា។ ម៉ាលី៖ អ្នកនយោបាយថ្នាក់ខ្ពស់នៃប្រទេសម៉ាលីនិយាយថា លោកមានជំនឿថាគណបក្សនយោបាយទាំងអស់នឹងសហការគ្នាជាមួយរដ្ឋាភិបាលបណ្ដោះអាសន្ដនៅពេលដែលប្រទេសនោះរៀបចំខ្លួនដើម្បីធ្វើសម្បថឡើងកាន់តំណែងជាប្រធានាធិបតីបណ្ដោះអាសន្ដ។ រុស្ស៊ី៖ នាយករដ្ឋមន្ដ្រីរុស្ស៊ី លោក Vladimir Putin អំពាវនាវដល់ពលរដ្ឋរុស្ស៊ី សុំឲ្យជៀសវាងការគុំគួនខាងនយោបាយ ដែលបាននាំឲ្យមានបាតុករច្រើនពាន់នាក់ ដើរតវ៉ានៅលើផ្លូវ ក្រោយពីការបោះឆ្នោត ដែលបានធ្វើឲ្យប្រទេសជាតិបែកបាក់។ សេដ្ឋកិច្ចអាស៊ី៖ សេចក្ដីរាយការណ៍ថ្មីមួយ ដោយធនាគារអភិវឌ្ឍអាស៊ីនិយាយថា ការលូតលាស់សេដ្ឋកិច្ចដ៏លឿននៅតំបន់អាស៊ីបានបង្កើតគម្លាតធំធេងនៃប្រាក់ចំណូលដែលគំរាមដល់ការលូតលាស់និងស្ថិរភាព។ <!--AV--> This posting includes an audio/video/photo media file: Download Now |
| Posted: 11 Apr 2012 10:05 AM PDT ជារៀងរាល់ឆ្នាំចាប់ពីឆ្នាំ២០០៥ គឺនៅថ្ងៃអាទិត្យសប្តាហ៍ទីមួយនៃខែមេសាប្រជាពលរដ្ឋខ្មែរ-អាមេរិកាំងតែងតែបានទស្សនាក្បួនដង្ហែរសិល្បៈវប្បធម៌របស់ខ្មែរនៅតាមដងមហាវិថីឈ្មោះថា Anahiem ដែលគេសន្មត់ថាជាក្រុងខ្មែរនៅសហរដ្ឋអាមេរិក។ ដោយឡែកឆ្នាំនេះ ក្បួនដង្ហែរត្រូវបានផ្អាកលើកទៅឆ្នាំក្រោយ ហើយជំនួសមកវិញដោយបុណ្យវប្បធម៌ខ្មែរដែលបានធ្វើឡើង នៅសួនឧទ្យានMacArthur ក្នុងទីក្រុងឡុងប៊ិច។ ប្រជាពលរដ្ឋជាច្រើនឆ្ងល់ពីមូលហេតុដែលធ្វើឱ្យក្បួនដង្ហែរត្រូវបានលើកទៅឆ្នាំក្រោយនិងមានខ្លះបានសម្តែងការខកចិត្តលាយឡំនិងការសោកស្តាយ។ លោក ម៉េង ស្ទីវ (Steve Meng) ជាប្រធាន សភាសង្គមខ្មែរទទួលបន្ទុកខាងរៀបចំក្បួនដង្ហែរប្រចាំឆ្នាំ បានបំភ្លឺថា៖ «ចំពោះខ្ញុំ Parade មានសារៈសំខាន់ណាស់ចំពោះខ្មែរយើង។ ខ្ញុំមានការអន់ចិត្តនិងសោកស្តាយដោយសារសង្គមយើងទាំងមូលមានប្រជាជនខ្មែរច្រើនជាងគេបង្អស់លើពិភពលោកបន្ទាប់ពីប្រទេសកម្ពុជា ដល់ពេលអត់មាន Parade អញ្ចឹងធ្វើឱ្យប្រជាជនខ្មែរយើងមានការអន់ចិត្ត។ គាត់សួរថាហេតុអ្វី? ចម្លើយខ្ញុំឆ្លើយគឺមានតែមួយគត់គឺរឿងថវិកា។ បងប្អូនយើងគាត់ចង់ជួយទៅតាមសណ្តានចិត្តរបស់គាត់មួយរៀលពីររៀលតែនៅតែមានការខ្វះខាត»។ មានប្រជាពលរដ្ឋមិនតិចជាង ១ម៉ឺននាក់ទេមកទស្សនា ក្បួនដង្ហែរនៅតាមដងផ្លូវ Anahiem រាល់ឆ្នាំហើយការចំណាយទៅលើក្បួនដង្ហែរនេះក៏អស់ទឹកប្រាក់យ៉ាងហោចណាស់ ៣ទៅ៤ម៉ឺន ដុល្លារ។ លោក Steve Meng បញ្ជាក់បន្ថែមថាកត្តាសំខាន់គឺអ្នកឧបត្ថម្ភកម្មវិធីមានការថមថយចុះ៖ «បញ្ហាសំខាន់គឺអត់មាន sponsor (អ្នកឧបត្ថម្ភកម្មវិធី)។ ជំនួយលុយចូលមកក៏មានតិចតួច យើងមានតែ១ម៉ឺនពីរម៉ឺនក៏ធ្វើទៅពិបាកដែរ ម្យ៉ាងទៀតលុះត្រាតែសង្គមខ្មែរយើងចូលរួមសាមគ្គីគ្នាបានទៅរួចបើថាយើងមានតែពីរបីនាក់ហើយមានអ្នកខ្លះចាំតែឱបដៃនៅនិយាយពីក្រោយ ថាធ្វើអញ្ចេះ ធ្វើអញ្ចុះ មិនមកជួយក៏មិនអាចទៅបានល្អដែរ»។ ប្រជាពលរដ្ឋនៅទីក្រុងឡុងប៊ិចម្នាក់គឺលោកស្រីធារីក៏បានប្រាប់ឱ្យដឹងពីអារម្មណ៍របស់គាត់នៅពេលដែលដឹងថាមិនមានក្បួនដង្ហែប្រចាំឆ្នាំថា៖ «តាមធម្មតាខ្មែរយើងទើបមាន Parade ប៉ុន្មានឆ្នាំនេះមើលទៅដូចជាមានភាពអ៊ូអររីករាយច្រើនដល់ពេលអត់មានអញ្ចឹងទៅដូចជាមានអារម្មណ៍ស្រងាកចិត្តដែរ។ ធ្លាប់តែឃើញអ៊ូអរដូចសាសន៍ដទៃ ដល់ពេលបាត់ទៅវិញ ធ្វើឱ្យយើងមានការខកចិត្ត។ បើសិនថ្ងៃក្រោយបានសុំគេ Parade បានទៅកាន់តែល្អ»។ ជំនួសមកវិញ មានប្រជាពលរដ្ឋនៅទីក្រុងឡុងប៊ិចជាង ១.០០០នាក់ នៅតែអាចមកជួបជុំគ្នាទស្សនាពិធីបុណ្យវប្បធម៌ដែលរៀបចំឡើងដោយអង្គការក្រុងខ្មែរ កាលពីថ្ងៃទី១ខែមេសាកន្លងទៅនេះ។ នៅក្នុងបុណ្យវប្បធម៌នេះមានការសម្តែងសិល្បៈជាច្រើនបែប ដូចជារបាំបុរាណខ្មែរ របាំប្រជាប្រិយ៍ ភ្លេងបុរាណខ្មែរ ចម្រៀងសម័យ ក្បាច់គុណល្បុកត្តោខ្មែរ ការទាត់សី ម្ហូបអាហារខ្មែរ ដែលមានដូចជា នំបញ្ចុក នំគ្រក់ រួមទាំងការប្រគេនចង្ហាន់ដល់ព្រះសង្ឃផងដែរ។ លោកសំណាង ជាប្រជាពលរដ្ឋម្នាក់ទៀតរស់នៅទីក្រុងឡុងប៊ិចបានប្រាប់ឱ្យដឹងពីអារម្មណ៍របស់គាត់ពេលដែលមកចូលរួមបុណ្យវប្បធម៌នេះថា៖ «បើតាមខ្ញុំគិតទៅក៏មិនមានបញ្ហាអ្វីដែរព្រោះខ្មែរយើងពីដើមឡើងក៏មិនដែលមាន Parade អ្វីដែរ នៅស្រុកខ្មែរក្តី។ បើសិនអត់មានក៏មិនមានបញ្ហាអ្វីដែរឱ្យតែបានមកជួបជុំគ្នាឃើញមុខគ្នាហើយយើងឃើញសិល្បៈអ្វីទាំងអស់ហ្នឹងគឺយើងសប្បាយចិត្តណាស់ទៅហើយ»។ លោក សាន រិចឈើ (Richer San) ជាអនុប្រធានអង្គការក្រុងខ្មែរ បានប្រាប់ឱ្យដឹងពីគោលបំណងនៃបុណ្យវប្បធម៌ខ្មែរនេះថា៖ «យើងចង់ឱ្យកូនខ្មែរកើតនៅទីនេះដឹងពីវប្បធម៌ អរិយធម៌សិល្បៈខ្មែរយើងវាយ៉ាងម៉េច។ ទីពីរ ពេលយើងធ្វើបុណ្យម្តងៗ សាសន៍យើងក៏មកសាសន៍គេក៏មក តែគេមក គេទិញអីអី នេះធ្វើឱ្យមានសកម្មភាពក្នុងសេដ្ឋកិច្ច។ ហើយដោយសារយើងគ្មានParade ឆ្នាំនេះដោយសារគ្មានថវិកា ខាងអង្គការក្រុងខ្មែរក៏រួបរួមគ្នាជាមួយចៅសង្កាត់ទី៦ធ្វើបុណ្យនេះឡើងដើម្បីឱ្យក្រុងខ្មែររបស់យើងមានសកម្មភាព»។ លោក Meng Steve ក៏មានការព្រួយបារម្មណ៍ពីផលប៉ះពាល់នៃការគ្មាន ក្បួនដង្ហែរ ផងដែរថានឹងអាចប៉ះពាល់ដល់មុខជំនួញជួញដូររបស់ប្រជាពលរដ្ឋនៅក្រុងខ្មែរ៖ «ការធ្វើParade គឺមានបងប្អូនខ្មែរយើងមកពីទីក្រុងផ្សេងៗនិងរដ្ឋផ្សេងៗ ច្រើនហើយ Long Beach យើងគឺមានរបស់ខ្មែរច្រើនណាស់ ជាពិសេស ម្ហូបអាហារ សម្លៀកបំពាក់ កាសែត CD DVD។ ពេលគាត់មក គាត់ទិញរបស់ទាំងនេះយកទៅស្រុកគាត់វិញ។ ដូច្នេះ អត់Parade business នឹងអាចអន់ថយ»។ លោក សានរិចឈើ ក៏ជាអ្នកជួយរៀបចំ ក្បួនដង្ហែរដែរហើយលោកបង្ហាញក្តីសង្ឃឹមថា ឆ្នាំក្រោយ នឹងធ្វើយ៉ាងណាឱ្យមាន ក្បួនដង្ហែរឡើងវិញ។ លោកបានមានប្រសាសន៍ថា៖ «ឥឡូវយើងសង្ឃឹមទាំងអស់គ្នា ថានឹងយក Parade យើងមកវិញ។ ប៉ុន្តែខំក៏យើងកំពុងបារម្មណ៍ដែរពីរឿងលុយ។ បងប្អូនខ្មែរយើងជាពិសេសអាជីវករ គាត់ចង់បាន Parade ណាស់ ក៏ប៉ុន្តែ យើងអត់មានថវិកា។ យើងមិនសប្បាយចិត្តប៉ុន្តែយើងត្រូវទទួលស្គាល់ការណ៍ពិត»។ គួរបញ្ជាក់ផងដែរថា សភាសង្គមខ្មែរនឹងប្រារព្ធធ្វើពិធីបុណ្យចូលឆ្នាំមួយទៀតនៅថ្ងៃទី ២១ខែមេសា ខាងមុខនេះ នៅឧទ្យានជាតិ El Dorado ទីក្រុងឡុងប៊ិច រដ្ឋកាលីហ្វញ៉ា៕ This posting includes an audio/video/photo media file: Download Now |
| You are subscribed to email updates from VOA News: ព័ត៌មាន To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
