VOA News: ព័ត៌មាន: “ព័ត៌មានអន្តរជាតិសង្ខេប៖ ៣០ កញ្ញា” plus 4 more |
- ព័ត៌មានអន្តរជាតិសង្ខេប៖ ៣០ កញ្ញា
- ប្រេសិតសិទ្ធិមនុស្សអ.ស.បស្នើឱ្យពិចារណាដិតដល់លើច្បាប់គ្រប់គ្រងអង្គការ
- អតីតកម្មាភិបាលខ្មែរក្រហមបដិសេធទទួលខុសត្រូវការសម្លាប់មនុស្សនិងចង់រកមុខអ្នកចោទប្រកាន់
- នាយកពិធីការរបស់លោកជា ស៊ីមត្រូវចាប់ខ្លួននៅព្រំដែនថៃ
- ព័ត៌មានអន្តរជាតិសង្ខេប៖ ២៩ កញ្ញា
| ព័ត៌មានអន្តរជាតិសង្ខេប៖ ៣០ កញ្ញា Posted: 29 Sep 2011 08:58 PM PDT ចិន៖ ចិនបានបាញ់្បង្ហោះយានអាវកាសមួយដែលគ្មានមនុស្សបើកបរ ដែលគេពិព័ណ៌នាថាជាជំហានដំបូងឆ្ពោះទៅរកការស្ថាបនាស្ថានីយអវកាសរបស់ខ្លួន។ យានអាវកាសមានទម្ងន់៨តោនកន្លះនេះមានឈ្មោះហៅថា Tiangong-1 មានន័យថាវិមានដូចឋានសួគ៌ ត្រូវបានបាញ់បង្ហោះពីទីតាំងវាលខ្សាច់ Gobi នៅភាគពាយព្យប្រទេស នៅយប់ថ្ងៃព្រហស្បតិ៍។ យានអាវកាសនោះត្រូវបានបាញ់បង្ហោះដោយកម្លាំងរ៉ុកកែត Long March 2FT1។ លោកនាយករដ្ឋមន្ដ្រី Wen Jiabao បានមើលការបាញ់បង្ហោះនេះ។ ស៊ីរី៖ រដ្ឋបាលលោកអូបាម៉ា បានថ្កោលទោសការវាយប្រហាររបស់ក្រុមគាំទ្ររដ្ឋាភិបាលស៊ីរី ដែលបានគ្រវែងប៉េងប៉ោះនិងដុំថ្មទៅលើលោក Robert Ford ឯកអគ្គរដ្ឋទូតសហរដ្ឋអាមេរិកនៅថ្ងៃព្រហស្បតិ៍។ ប៉ាគីស្ថាន៖ ក្រុមមន្ដ្រីប៉ាគីស្ថានបានបដិសេធការអះអាងរបស់សហរដ្ឋអាមេរិក អំពីទំនាក់ទំនងរវាងសេវាស៊ើបការសម្ងាត់សហរដ្ឋអាមេរិកជាមួយនឹងក្រុមសកម្មប្រយុទ្ធអាហ្វហ្គានីស្ថាន ដែលមានទំនាក់ទំនងជាមួយពួកអាល់កៃដា ហើយបានបដិសេធសម្ពាធពីក្រៅប្រទេសឲ្យធ្វើអ្វីច្រើនថែមទៀតនៅក្នុងសង្គ្រាមប្រឆាំងភេរវកម្ម។ អេហ្ស៊ីប៖ បណ្ដាញទូរទស្សន៍ Al Jazeera ឲ្យដឹងថា កងកម្លាំងសន្ដិសុខអេហ្ស៊ីបបានទៅលុកលុយនៅការិយាល័យរបស់ខ្លួននៅទីក្រុង Le Caire មានពេលពីរដងហើយនៅខែនេះ ហើយបានវាយដំបុគ្គលិកនិងរឹបអូសយកគ្រឿងឧបករណ៍។ វេនេហ្សូអេឡា៖ លោក Hugo Chavez ប្រធានាធិបតីនៃប្រទេសវេនេហ្សូអេឡា កំពុងតែបដិសេធសេចក្ដីរាយការព័ត៌មានថាលោកត្រូវបានដឹកទៅកាន់មន្ទីរពេទ្យជាបន្ទាន់ ដោយមកពីជំងឺតម្រងមូត្រ ដែលឈប់ដំណើរការដែលទាក់ទងនឹងការព្យបាលជំងឺមហារីករបស់លោក ដែលគេមិនបានបញ្ជាក់ថាជាជម្ងឺមហារីកប្រភេទអ្វី។ អ៊ីរ៉ង់៖ មេធាវីការពារក្ដីបព្វជិតអ៊ីរ៉ង់កាន់សាសនាអ៊ីស្លាម ដែលត្រូវបានទទួលសាលក្រមមានទោសប្រហារជីវិតក្នុងបទលះបង់ចោលសាសនានិយាយថាលោកសង្ឃឹមថាសាលាឧទ្ធរណ៍នឹងលែងឲ្យកូនក្ដីរបស់លោកមានសេរីភាព។ យេម៉ែន៖ មនុស្សយ៉ាងតិចពីរនាក់បានស្លាប់នៅរដ្ឋធានី Sana'a ប្រទេស យេម៉ែន ដែលនៅទីនោះមានការពើបប្រយុទ្ធគ្នាយ៉ាងខ្លាំងរវាងកងកម្លាំងស្មោះត្រង់ចំពោះលោកប្រធានាធិបតី Ali Abdullah Saleh និងក្រុមកុលសម្ព័ន្ធប្រដាប់អាវុធដែលបានចូលទៅខាងក្រុមអ្នកជំទាស់។ <!--AV--> This posting includes an audio/video/photo media file: Download Now |
| ប្រេសិតសិទ្ធិមនុស្សអ.ស.បស្នើឱ្យពិចារណាដិតដល់លើច្បាប់គ្រប់គ្រងអង្គការ Posted: 29 Sep 2011 01:02 PM PDT អ្នករាយការណ៍ពិសេសរបស់អង្គការសហប្រជាជាតិទទួលបន្ទុកសិទ្ធិមនុស្សនៅកម្ពុជា លោក សុរិយា ស៊ូបេឌី (Surya Subedi) រួមជាមួយនឹងមន្ដ្រីជាន់ខ្ពស់អង្គការសហប្រជាជាតិចំនួនពីររូបផ្សេងទៀត បានទទូចឲ្យរាជរដ្ឋាភិបាលខ្មែរ ពិនិត្យលើសេចក្ដីព្រាងច្បាប់ស្ដីពីសមាគមនិងអង្គការមិនមែនរដ្ឋាភិបាលឲ្យបានហ្មត់ចត់បំផុត។ ហើយបានផ្ដល់យោបល់ថា កម្ពុជាមិនអាចអនុម័តសេចក្ដីព្រាងច្បាប់នេះ ក្នុងស្ថានភាពយ៉ាងដូច្នេះបានឡើយ។ លោក ស៊ូបេឌី ថ្លែងយ៉ាងដូច្នេះក្នុងរបាយការណ៍ប្រចាំឆ្នាំរបស់ខ្លួនក្នុងកិច្ចប្រជុំរបស់ក្រុមប្រឹក្សាសិទ្ធិមនុស្សរបស់អង្គការសហប្រជាជាតិនៅក្រុងហ្ស៊ឺណែវ ប្រទេសស្វ៊ីស កាលពីថ្ងៃពុធ។ យោងតាមសេចក្ដីប្រកាសព័ត៌មានរបស់ការិយាល័យឧត្តមស្នងការសហប្រជាជាតិ នៅថ្ងៃព្រហស្បតិ៍នេះ អ្នករាយការណ៍ពិសេសបានលើកឡើងថា «សេចក្ដីព្រាងច្បាប់នេះអាចបង្អាក់ការងារស្របច្បាប់» របស់ក្រុមអង្គការមិនមែនរដ្ឋាភិបាល ដែលមានប្រតិបត្តិការក្នុងប្រទេសកម្ពុជា។ លោក សូរិយ៉ា ស៊ូបេឌី បានក្រើនរំលឹកថា ថ្វីត្បិតតែប្រទេសកម្ពុជា«មានអធិបតេយ្យ» គ្រប់គ្រាន់ក្នុងការអនុម័តច្បាប់ដ៏ចម្រូងចម្រាស់នេះ ក៏ប៉ុន្ដែប្រទេសកម្ពុជាក៏ត្រូវតែយកចិត្តទុកដាក់«ឲ្យបានហ្មត់ចត់» ផងដែរដោយសារតែផលវិបាក នៃសេចក្ដីព្រាងច្បាប់នេះ នឹងជះឥទ្ធិពលរយៈពេលវែងលើការអភិវឌ្ឍប្រទេសកម្ពុជា។ សេចក្ដីថ្លែងការណ៍របស់លោក ស៊ូបេឌី ត្រូវបានគាំទ្រដោយមន្ដ្រីអង្គការសហប្រជាជាតិពីររូបផ្សេងទៀត គឺលោក ម៉ៃណា គីអៃ (Maina Kiai) អ្នករាយការណ៍ពិសេសរបស់អង្គការសហប្រជាជាតិស្ដីពីសិទ្ធិជួបប្រជុំដោយសន្ដិវិធី និងការបង្កើតសមាគម និងលោកស្រី ម៉ាហ្គារ៉េត សឺខែជយ៉ា (Margaret Sekaggya) អ្នករាយការណ៍ពិសេសស្ដីពីស្ថានការណ៍អ្នករាយការណ៍សិទ្ធិមនុស្ស។ មានអង្គការជាតិ និងអន្ដរជាតិជិត៣.០០០ កំពុងបំពេញការងារនៅក្នុងប្រទេសកម្ពុជា។ អ្នករាយការណ៍ពិសេសរបស់អង្គការសហប្រជាជាតិដដែល បានគូសបញ្ជាក់ថា អង្គការសង្គមស៊ីវិលទាំងនោះភាគច្រើន កំពុងតែជួយបំពេញបន្ថែមលើកិច្ចអភិវឌ្ឍន៍របស់ប្រទេសកម្ពុជា ដូចជាក្នុងសកម្មភាពអប់រំ សុខាភិបាល អភិវឌ្ឍន៍ជនបទ សុខភាពនិងអនាម័យ ការការពារបរិដ្ឋាននិងធនធានធម្មជាតិជាដើម។ សេចក្ដីព្រាងច្បាប់ស្ដីពីសមាគម និងអង្គការមិនមែនរដ្ឋាភិបាលធ្លាប់ត្រូវបានបញ្ជូនទៅកាន់ទីស្ដីការគណៈរដ្ឋមន្ដ្រី ពិនិត្យរួចម្ដងហើយកាលពីប៉ុន្មានខែមុននេះ ក៏ប៉ុន្ដែទីបំផុតគណៈរដ្ឋមន្ដ្រីកម្ពុជាបានសម្រេចបញ្ជូនសេចក្ដីព្រាងច្បាប់នេះ ត្រឡប់មកកាន់ក្រសួងមហាផ្ទៃ ដើម្បីធ្វើការពិនិត្យឡើងវិញ។ សហរដ្ឋអាមេរិក ក៏ធ្លាប់បានបង្ហាញកង្វល់របស់ខ្លួននៅជុំវិញសេចក្ដីព្រាងច្បាប់នេះផងដែរ កាលពីប៉ុន្មានខែមុននោះ។ ជាមួយគ្នានេះ ក្រុមអង្គការអន្ដរជាតិធំៗក្នុងពិភពលោក ក្នុងនោះមានអង្គការ Human Rights Watch និង អង្គការ Global Witness ជាដើម បានអំពាវនាវឲ្យសហរដ្ឋអាមេរិក ប្រទេសអង់គ្លេស និងអូស្ដ្រាលីដាក់សម្ពាធដល់កម្ពុជា និងធ្វើការកាត់បន្ថយជំនួយរបស់ខ្លួនដល់កម្ពុជាប្រសិនបើ រដ្ឋាភិបាលកម្ពុជានៅតែបន្ដអនុម័តសេចក្ដីព្រាងច្បាប់ដែលធ្វើឲ្យមានប្រតិកម្មជំទាស់នោះ។ លោក ឧត្តមសេនីយ៍ឯក ខៀវ សុភ័គ អ្នកនាំពាក្យក្រសួងមហាផ្ទៃ បានឆ្លើយតបថា សេចក្ដីថ្លែងការណ៍របស់លោក ស៊ូបេឌី កើតឡើងក្រោយពេលរដ្ឋាភិបាលចាត់ការលើសេចក្ដីព្រាងច្បាប់នេះឡើងវិញរួចទៅហើយ។ «សេចក្ដីព្រាងច្បាប់នេះត្រូវបានក្រសួងមហាផ្ទៃដោយមានការអនុញ្ញាតពីរាជរដ្ឋាភិបាល យកមកពិនិត្យកែលម្អឡើងវិញអស់រយៈពេលជាងមួយខែហើយ។ ដូច្នេះ ព័ត៌មានរបស់គាត់នោះ ដើរពីក្រោយរាជរដ្ឋាភិបាលទេ»។ លោក ខៀវ សុភ័គ មានប្រសាសន៍ថា មានលទ្ធភាពមួយចំនួនដែលអាចធ្វើសំយោគការផ្ដល់យោបល់មួយចំនួន ដើម្បីសម្របសម្រួលបន្ថែមមុននឹងសេចក្ដីព្រាងច្បាប់នេះ ត្រូវបញ្ជូនទៅកាន់ទីស្ដីការគណៈរដ្ឋមន្ដ្រីសារជាថ្មី៕ This posting includes an audio/video/photo media file: Download Now |
| អតីតកម្មាភិបាលខ្មែរក្រហមបដិសេធទទួលខុសត្រូវការសម្លាប់មនុស្សនិងចង់រកមុខអ្នកចោទប្រកាន់ Posted: 29 Sep 2011 03:37 PM PDT អតីតកម្មាភិបាលខ្មែរក្រហមគឺលោកស្រី អ៊ឹម ចែម ដែលជាជនសង្ស័យម្នាក់ក្នុងសំណុំរឿងលេខ០០៤ក្នុងតុលាការខ្មែរក្រហមបានបដិសេធថាលោកស្រី មិនបានប្រព្រឹត្តខុសដូចការសង្ស័យទេ។ លោកស្រីក៏សុំស្វែងរកយុត្តិធម៌ចំពោះខ្លួនគាត់ដែលលោកស្រី យល់ថាជារឿងនយោបាយ។ លោក សុខ ខេមរានៃវីអូអេសំឡេងសហរដ្ឋអាមេរិកបានធ្វើដំណើរទៅប្រទេសកម្ពុជាដើម្បីជួបសម្ភាសជាមួយនឹងលោកស្រី អ៊ឹម ចែមក្នុងគេហដ្ឋានរបស់គាត់ក្នុងតំបន់ដាច់ស្រយ៉ាលមួយ។ តទៅនេះជាបទសម្ភាសន៍ទាំងស្រុង៖ ភាគទី១៖ <!--AV--> ស៖ ប៉ុន្តែនៅក្នុងរឿងហ្នឹង បើសិនជាគេ ដូចថាចោទប្រកាន់អញ្ចឹង តើមានប្រតិកម្មទៅវិញយ៉ាងម៉េចជាមួយនឹងសហព្រះរាជអាជ្ញាឬក៏អ្នកចោទអញ្ចឹង បាទ? ឆ៖ ខ្ញុំ ក្នុងចិត្តរបស់ខ្ញុំ ជាក់ស្តែងគឺ ខ្ញុំមិនមានប្រតិកម្មអីប៉ុន្មានទេ ប៉ុន្តែសុំឲ្យព្រះរាជអាជ្ញា ហើយនឹងអ្នកយកព័ត៌មានហ្នឹង សុំឲ្យរកយុត្តិធម៌ឲ្យខ្ញុំ ពីព្រោះចោទអាយុជីវិតខ្ញុំទាំងស្រុង។ ខ្ញុំមិនបានប្រព្រឹត្ត។ អានេះខ្ញុំគ្រាន់តែបញ្ជាក់ហេតុផលប៉ុណ្ណឹង។ ឯចិត្តខ្ញុំក៏ខ្ញុំអត់មានដូចថាកំហឹងនេះ ប្រតិកម្មឲ្យដោះស្រាយជាបន្ទាន់អីក៏អត់ដែរ ប៉ុន្តែឲ្យរកយុត្តិធម៌ឲ្យច្បាស់លាស់។ បើមិនអញ្ចឹងទេ អ្នកចោទខ្ញុំនេះ ខ្ញុំត្រូវអស់ជីវិត នែ៎។ ស៖ អស់ជីវិតហ្នឹងយ៉ាងម៉េចដែរ បាទ? មានន័យយ៉ាងម៉េច បាទ? ឆ៖ អស់ជីវិត ដូចថាចោទខ្ញុំ មានគុកមានអី ហើយខ្ញុំអត់បានដឹងផង បើអញ្ចឹងព្រះរាជអាជ្ញាហ្នឹងគឺថា ខ្ញុំនេះប្រព្រឹត្តអំពើអាក្រក់ យកទៅកាត់ទោសអីអញ្ចឹងទៅនៅតុលាការ ខ្ញុំមិនត្រូវអស់ជីវិតហើយហ្នឹង? ស៖ អ្នកស្រីគិតថា រឿងនេះគេប្រឌិត ឬក៏គេអាចមានការពិតត្រង់ណា មានឯកសារណាដំកល់ទុកអំពីរឿងហ្នឹងទេ? ឆ៖ ខ្ញុំគិតថាអ្នកដែលរាយការណ៍នេះគឺបង្កាច់បង្ខូចតែម្តង។ អាហ្នឹងរាយការណ៍អត់ពិត។ អញ្ចឹងមនុស្សហ្នឹងមិនមែនមនុស្សល្អទេ យកជីវិតគេយកទៅ របៀបថា ទៅលេងសើចឬជាន់ឈ្លី។ ស៖ នៅក្នុងរឿងហ្នឹង តើមើលទៅអាចមានការប្តឹងតវ៉ាឬក៏យ៉ាងណាដែរ បើសិនជាមានការកើតហេតុយ៉ាងដូច្នេះ? ឆ៖ ខ្ញុំមិនសូវចេះធ្វើពាក្យបណ្តឹងអីទេ អញ្ចឹងបានខ្ញុំពឹងលើលោកក្មួយទទួលការស្រាវជ្រាវហ្នឹង ហើយនឹងយកទៅដោះស្រាយជាមួយព្រះរាជអាជ្ញាឲ្យវាច្បាស់លាស់ ដើម្បីឲ្យខ្ញុំអស់ចិត្ត។ បើមិនអញ្ចឹងទេ ខ្ញុំព្រួយបារម្ភពីការចោទប្រកាន់អ្នកដទៃនិងខ្លួនខ្ញុំផ្ទាល់។ មិនដឹងឈ្មោះណា ឬអ្នកណាដែលមកបង្កាច់បង្ខូចខ្ញុំហ្នឹង។ ស៖ សម័យនោះ តើភ្នំត្រយ៉ូង យ៉ាងម៉េចបានជាមានមនុស្សស្លាប់ច្រើនម្លេះ ហើយបានគេលើកឡើងអំពីហេតុផលយ៉ាងដូច្នេះ? ឆ៖ ខ្ញុំមិនបានដឹងដែរ ព្រោះទៅឮគេនិយាយប្រជាជនអីថា ភ្នំត្រយ៉ូង។ គេដាក់អ្នកមានវិបត្តិ ខុសឆ្គងអីអញ្ចឹង ខ្ញុំដឹងតែប៉ុណ្ណឹង ឯអ្វីទៀតខ្ញុំអត់ដឹង ហើយក៏ខ្ញុំមិនដែលបានទៅឃើញមុខអ្នកនៅហ្នឹង(ទីនោះ) សូម្បីតែម្តងក៏អត់ដែរ។ ស៖ ចុះផ្នែកគុកផ្សេងៗទៀតនៅតំបន់នោះ តើអ្នកស្រីមានការគ្រប់គ្រងដែរឬក៏យ៉ាងណា សម័យនោះ បាទ? ឆ៖ អត់ទេ។ ខ្ញុំអត់បានគ្រប់គ្រង អត់បានដឹងឮអីទេ ព្រោះខ្ញុំទៅវាថារយៈចុងក្រោយមួយភ្លែតហ្នឹង ក៏បែកបាក់គ្នាទៅ។ ស៖ នៅពេលដែលមានការធ្វើជា អាងទំពាំងថ្ម ថាមានការបង្អត់អាហារឬក៏បង្ខំមនុស្សឲ្យធ្វើការហួសកម្លាំងនៅសម័យនោះ តើអ្នកស្រីមានការបញ្ជាទៅលើកងទាហានឬក៏កងឈ្លបអី ដើម្បីកុំឲ្យផ្តល់អាហារទៅដល់ប្រជាពលរដ្ឋអញ្ចឹងទេ ឬក៏បង្ខំឲ្យពួកគេធ្វើការបាក់កម្លាំងរហូតដល់ស្លាប់អញ្ចឹងទេឬក៏យ៉ាងម៉េច បាទ? ឆ៖ អត់។ អត់ដឹង។ ខ្ញុំអត់បានទៅបញ្ជាកម្លាំងឲ្យទៅធ្វើនៅទំនប់ទំពាំងថ្មហ្នឹង គឺអត់។ អញ្ចឹង ការនិយាយទាំងបីខនេះ គឺទទេតែម្តង និយាយទទេតែម្តង។ ចោទខ្ញុំនេះ គឺចោទធ្ងន់មែនទែន ចោទឲ្យខ្ញុំឡើងតុលាការ។ អញ្ចឹងហើយបានជាខ្ញុំថា ខ្ញុំគ្មានរឿងអីឡើងតុលាការទេ។ ប៉ុន្តែពេលនេះខ្ញុំអរគុណហើយលោកក្មួយ លោកប្អូនខ្ញុំអរគុណខ្លាំងណាស់ដែលខ្ញុំបានដឹងរឿងនេះ ដែលរឿងចោទប្រកាន់ខ្ញុំទទេ ទទេ នែ៎។ អញ្ចឹងខ្ញុំសុំថាឲ្យជួយដោះស្រាយ ហើយបញ្ចប់(កុំ)មកសួរខ្ញុំតទៅទៀត។ សួររឿងអីសួរបាន បើសួររឿងហ្នឹងខ្ញុំអត់ដឹង ខ្ញុំឈប់និយាយ ព្រោះខ្ញុំអត់ដឹង។ ស៖ បាទ អ្នកស្រី នៅសម័យនោះមានអនុប្រធាននៅស្រុកព្រះនេត្រព្រះនោះត្រូវចាប់ខ្លួននៅពេលពីរថ្ងៃក្រោយពេលដែលអ្នកស្រីទៅកាន់កាប់នៅស្រុកព្រះនេត្រព្រះនោះ តើរឿងហ្នឹងយ៉ាងម៉េចដែរ បាទ? គាត់ត្រូវគេចាប់យកទៅសម្លាប់ឬក៏យ៉ាងណា ឈ្មោះ លោក អាត់ សំ? ឆ៖ ខ្ញុំបានជួបមុខគាត់តែម្តង ហើយបាត់ទៅ ខ្ញុំក៏មិនបានដេញដោលអីដែរ មិនដឹងគេចាប់យកទៅណា ឬក៏ម៉េចបាត់ខ្លួនទៅ។ ស៖ អញ្ចឹង អ្នកស្រីអត់មានជាប់ពាក់ព័ន្ធរឿងការបញ្ជាឲ្យមានការចាប់មនុស្សយកទៅឃុំនៅឃុំត្រយ៉ូង ឬក៏គុកនៅភ្នំត្រយ៉ូងឬក៏មានពាក់ព័ន្ធនិងរឿងឃាតកម្មអីហ្នឹង យ៉ាងម៉េចដែរ បាទ? ឆ៖ អាហ្នឹង ខ្ញុំអត់។ ខ្ញុំអត់ទទួលដឹង ព្រោះខ្ញុំអត់បានធ្វើតែម្តង។ ខ្ញុំអត់បាន(ទេ)។ ស៖ តើពិបាកនឹងឲ្យគេជឿយ៉ាងម៉េចទៅ នៅពេលដែលយើងអ្នកគ្រប់គ្រងនៅតំបន់នោះ ហើយមានមនុស្សស្លាប់ច្រើនអញ្ចឹង ហើយដល់ពេលយើងថាអត់ដឹងអញ្ចឹង តើមានមូលហេតុយ៉ាងម៉េចដែរ? ឆ៖ មូលហេតុដែលខ្ញុំថាខ្ញុំអត់ដឹងគឺអត់ដឹងមែន តែអ្នកដែលទទួលមុនខ្ញុំ គេប្រព្រឹត្តក៏ខ្ញុំអត់ដឹង ព្រោះខ្ញុំទៅពីឆ្ងាយទៅហើយខ្ញុំគិតតែទៅដើម្បីបំផុសផ្សព្វផ្សាយឲ្យប្រជាជនខំដាំដុះ ខំធ្វើ ខំដកខំស្ទូងដើម្បី នែ៎ ចិញ្ចឹមជីវិតកូនចៅតែប៉ុណ្ណឹង។ ភារកិច្ចខ្ញុំមានតែដឹកនាំប្រជាជនធ្វើស្រែធ្វើចំការ ដើម្បីចិញ្ចឹមជីវិតតែប៉ុណ្ណឹងទេ ឯរឿងអីទៀតហ្នឹង គេធ្វើមុនមក ខ្ញុំអត់ដឹង៕ ភាគទី២៖ <!--AV--> ស៖ ចុះបញ្ជីឈ្មោះនៃមនុស្សចំនួន១០ម៉ឺននាក់នៅក្នុងតំបន់នោះ យ៉ាងម៉េច អ្នកណាអ្នកធ្វើ ហើយបានស្រាវជ្រាវយ៉ាងម៉េច? ហេតុអីបានជាមានបញ្ជីឈ្មោះយ៉ាងដូច្នេះ? ឆ៖ បញ្ជីឈ្មោះហ្នឹង ខ្ញុំទៅដល់គេយកមកឲ្យ។ ស៖ មានគ្រប់ចំនួនទាំង ១០ម៉ឺននាក់នោះដែរ ឬក៏មានខ្វះខ្លះដែរ ឬក៏យ៉ាងម៉េច? ហេតុអីបានជាគេយកបញ្ជីឈ្មោះហ្នឹងមកឲ្យ ហើយមានប៉ុន្មាននាក់ដែលអ្នកស្រីទទួលកាលសម័យនោះ? ឆ៖ ខ្ញុំយក គេប្រគល់បញ្ជីឲ្យហ្នឹង ខ្ញុំឃើញមាន ១០ម៉ឺនមែន ប៉ុន្តែដល់តែខ្ញុំដើរពិនិត្យទៅ វាបញ្ជីហ្នឹងក៏ធ្វើខុសដែរ ខុសត្រង់ថាវាអត់គ្រប់ចំនួន ដែលខ្ញុំគិតតាមភូមិនិមួយៗ សរុបទៅបានតែ ៩ម៉ឺនទេ អាបញ្ជី ១០ម៉ឺនវាបាត់មួយម៉ឺន ចា៎។ ស៖ ប៉ុន្តែសម័យនោះដូចជាបញ្ជីហ្នឹងគេធ្វើគ្រាន់តែគ្រប់គ្រងចំនួនមនុស្សឬក៏គេធ្វើដើម្បីអ្វី? ឆ៖ គេធ្វើ មិនដឹងជាផែនការគេពីមុនយ៉ាងម៉េច ប៉ុន្តែដែលគេយកប្រគល់ យកបញ្ជីហ្នឹងមកប្រគល់ឲ្យខ្ញុំ គឺខ្ញុំគ្រប់គ្រងចំនួនប្រជាពលរដ្ឋដែលនៅក្នុងស្រុកហ្នឹងមែន ចា៎។ ស៖ នៅក្នុងពេលថ្មីៗនេះ (អញ្ចឹង) អត់មានខាងតុលាការខ្មែរក្រហមអីមកសួរនាំអំពីរឿងអតីតកាលអី អត់មានការហៅសាកសួរអីពីរឿងអតីតកាលនោះទេ? រឿងភ្នំទ្រយោងអីនោះទេ? ឆ៖ អត់ (តែ)មានលោកស្រីសួរមកពីភ្នំពេញថាគាត់ទៅជួបនារីបីនាក់នៅទំនប់ត្រពាំងថ្មហ្នឹង ស្រុកព្រះនេត្រព្រះ ប៉ុន្តែខ្ញុំថាខ្ញុំអត់បានធ្វើ គេថាខ្ញុំធ្វើទំនប់ទឹកហ្នឹងណា៎។ ខ្ញុំអត់បានធ្វើទេទំនប់ត្រពាំងថ្ម។ អញ្ចឹងការចោទមកលើខ្ញុំទាំងអស់នេះសុទ្ធតែរឿងអត់ពិត ហើយអត់ជាក់ស្តែង អត់មានឯកសារច្បាស់លាស់។ ហេតុម៉េចបានជាទៅដល់ព្រះរាជអាជ្ញាច្បាស់ម្ល៉េះ? ខ្ញុំនៅសង្ស័យអាហ្នឹង នែ៎។ ស៖ ការសង្ស័យនោះមើលទៅមិនដឹងថាមកពីមូលហេតុអី ឬក៏អាចមានការរាយការណ៍យ៉ាងម៉េចពីអ្នកណាឬក៏អី តាមអ្នកស្រីគិតមើលឃើញនោះ? ឆ៖ ចា៎ ខ្ញុំ ការសង្ស័យរបស់ខ្ញុំ ខ្ញុំថាមិនច្បាស់លាស់ដែរ ប៉ុន្តែឲ្យខ្ញុំកំណត់ថា ឥឡូវពីអ្នកនេះក៏ខ្ញុំមិនដឹង ព្រោះមិនដែលដឹងថាឈ្មោះណារាយការណ៍ពីខ្ញុំហ្នឹងណា៎។ អញ្ចឹងហើយបានខ្ញុំផ្តាំផ្ញើទៅតាមរយៈប្អូនឯង ហើយនឹងព្រះរាជអាជ្ញាហ្នឹង ដែលរកយុត្តិធម៌ហ្នឹង ឲ្យវាពិតប្រាកដច្បាស់លាស់ កុំចេះតែចោទគេអញ្ចឹង។ អាអ្នករាយការណ៍ហ្នឹង វាមិនពិតទេ វាចេះតែបង្កាច់បង្ខូចគេ នែ៎។ អាហ្នឹង ខ្ញុំមិនអស់ចិត្តត្រង់ហ្នឹង។ ស៖ បាទ នឹងមានការខ្វល់ខ្វាយយ៉ាងម៉េចនៅពេលដែលគេចោទប្រកាន់យ៉ាងដូច្នេះ បាទ ទោះបីជារឿងហ្នឹងមិនកើតមានទៅដល់តុលាការចាប់ខ្លួនឬក៏អីហ្នឹង ក៏ប៉ុន្តែមានការគិតខ្វល់ខ្វាយអីទេ? ឆ៖ ខ្ញុំងាកមកខ្វល់ខ្វាយពីរឿងអ្នកដែលរាយការណ៍ចោទខ្ញុំវិញ។ មិនដឹងជាឈ្មោះណាមួយដែលចោទប្រកាន់ខ្ញុំហ្នឹង ចោទខ្ញុំហ្នឹង? រឿងសុទ្ធតែរឿងដល់អាយុជីវិត ហើយពាក់ព័ន្ធខាងនយោបាយ ចា៎។ ហើយខុសនឹងការអនុវត្ត ការប្រព្រឹត្តិរបស់ខ្ញុំ ផ្ទុយគ្នាស្រឡះដូចមេឃនិងដី។ ស៖ បាទ ចុះបើខាងព្រះរាជអាជ្ញាគេផ្អែកទៅលើការរាយការណ៍ហ្នឹង ហើយគេសុំឲ្យមានការចាប់ខ្លួនអ្នកស្រី ហើយនិងអ្នកដទៃទៀតអញ្ចឹង តើរឿងហ្នឹងវាទៅជាយ៉ាងម៉េចទៅដែរ? ឆ៖ ខ្ញុំ គ្រាន់តែមកជួបបាន។ បើឲ្យខ្ញុំទៅឡើងទៅតុលាការ ខ្ញុំអត់ទៅទេ។ បើយកអ្នកហ្នឹងទៅបញ្ជាក់អីយ៉ាងម៉េចទៀត អាហ្នឹងយកទៅ ខ្ញុំមិនដឹងទេ។ ប៉ុន្តែបើថាចំពោះខ្លួនខ្ញុំ បើមកបញ្ជាក់ខ្ញុំនៅផ្ទះទៀត ខ្ញុំនិយាយមានតែប៉ុណ្ណឹង និយាយដូចខ្ញុំមានយោបល់ម៉ិញអញ្ចឹង និងប៉ុណ្ណឹង។ ឲ្យខ្ញុំដឹងរឿង ឬក៏និយាយហួសហ្នឹង គឺអត់មាន។ អញ្ចឹងអ្នកដែលប្តឹងឬក៏រាយការណ៍ហ្នឹង អាហ្នឹងវាយ៉ាងម៉េចទៅវិញ? ចេញពីច្រកណាដែលរាយការណ៍ទទេហ្នឹង? ស៖ នៅក្នុងពេលដែលព្រះរាជអាជ្ញាចេញអញ្ចឹងមក មានការដូចថាច្របូកច្របល់គ្នាត្រង់ សហព្រះរាជអាជ្ញាបរទេសចង់ធ្វើការចោទប្រកាន់ ចាប់ខ្លួនអីអញ្ចឹង ហើយខាងសហព្រះរាជអាជ្ញាជាតិមិនចង់ធ្វើអញ្ចឹង តើអ្នកស្រីបានដឹងអំពីរឿងនេះទេ បាទ កន្លងមក? ឆ៖ អត់ ខ្ញុំអត់ដឹងទាល់តែសោះ ហើយរឿងរបស់ខ្ញុំ ខ្ញុំអត់បានដឹងពាក់ព័ន្ធដល់ព្រះរាជអាជ្ញាទៀត។ ខ្ញុំអត់ដឹងទាល់តែសោះ។ អញ្ចឹង ខ្ញុំអរគុណប្អូនឯង ដែលបានឲ្យខ្ញុំដឹងថ្ងៃនេះ គឺខ្ញុំអរគុណច្រើនណាស់ ហើយជូនពរទៀត ព្រោះអី(គឺ)ផ្តល់ដំណឹងឲ្យខ្ញុំដូចជាភ្ញាក់ ភ្ញាក់ពីដេកអញ្ចឹង ដឹងខ្លួន ហៅថាឲ្យខ្ញុំដឹងខ្លួនថាគេចោទខ្ញុំទទេៗ ចា៎។ ស៖ បាទ សូមអរគុណច្រើនដែលបានឲ្យកិច្ចសម្ភាសន៍ជាមួយវីអូអេសម្លងសហរដ្ឋអាមេរិក។ សូមជម្រាបលា។ ឆ៖ ចា៎ ខ្ញុំអរគុណណាស់៕ This posting includes an audio/video/photo media file: Download Now |
| នាយកពិធីការរបស់លោកជា ស៊ីមត្រូវចាប់ខ្លួននៅព្រំដែនថៃ Posted: 29 Sep 2011 12:15 PM PDT តុលាការក្រុងភ្នំពេញបានចោទប្រកាន់ប្រធានពិធីការផ្ទាល់របស់លោក ជា ស៊ីម ប្រធានព្រឹទ្ធសភា អំពីបទក្លែងបន្លំឯកសារសាធារណៈ និងបទឆបោកដែលកំពុងជាប់ឃុំឃាំងនៅក្នុងពន្ធនាគារព្រៃស ដើម្បីរង់ចាំការជំនុំជម្រះទោស។ លោកស្រី ផេង គន្ធាបូរី អាយុ៥៦ឆ្នាំ ប្រធានពិធីការរបស់លោក ជា ស៊ីម ត្រូវបានចាប់ខ្លួនដោយមន្ត្រីនគរបាល អន្តោប្រវេសន៍នៅច្រកឆ្លងកាត់ព្រំដែនចាំយាមខេត្តកោះកុង កាលពីថ្ងៃពុធ នៅពេលដែលលោកស្រី កំពុងព្យាយាមឆ្លងកាត់ព្រំដែនចូលទៅក្នុងប្រទេសថៃ។ លោក គួយ ធន់ណា មេធាវីការពារក្តីរបស់លោកស្រី ផេង គន្ធាបូរី បានថ្លែងនៅថ្ងៃព្រហស្បតិ៍ថាតុលាការក្រុងភ្នំពេញ បានចោទប្រកាន់កូនក្តីរបស់លោកពីបទក្លែងបន្លំឯកសារ និងឆបោក។ «នៅម៉ោងពីរកន្លះនេះ ខ្ញុំបានទៅជួបកូនក្តីរបស់ខ្ញុំ នៅពន្ធនាគារព្រៃស ដើម្បីឲ្យលោកជំទាវពឹងពាក់ខ្ញុំជាមេធាវី។ រហូតមកដល់ពេលនេះ ខ្ញុំមិនទាន់បានមើលសំណុំរឿងឯកសារ ដែលលោកព្រះរាជអាជ្ញាចោទកូនក្តីខ្ញុំទេ។ ប៉ុន្តែតាមកូនក្តីខ្ញុំប្រាប់ គេចោទពីបទក្លែងឯកសារ និងឆបោក»។ លោក ខេង ទីតូ អ្នកនាំពាក្យកងរាជអាវុធហត្ថលើផ្ទៃប្រទេស បានបញ្ជាក់ថា ការចាប់ខ្លួននេះ បានធ្វើឡើងដោយកងរាជអាវុធហត្ថរាជធានីភ្នំពេញ តាមដីការបស់លោក ជា សុខហៀង ព្រះរាជអាជ្ញាអមតុលាការក្រុងភ្នំពេញ។ «យើងបានចាប់បញ្ជូនលោកជំទាវ មកតុលាការកាលពីម្សិលមិញ ហើយនៅយប់មិញ តុលាការបានចេញដីកាឃុំខ្លួនលោកជំទាវហ្នឹង នៅពន្ធនាគារព្រៃស។ ជាធម្មតា គេចោទហើយ ទើបបានគេឃុំខ្លួន ដើម្បីរង់ចាំការជម្រះសេចក្តី»។ លោកព្រះរាជអាជ្ញា ជា សុខហៀង មិនអាចធ្វើទំនាក់ទំនង ដើម្បីសុំសេចក្តីអត្ថាធិប្បាយបានទេនៅថ្ងៃព្រហស្បតិ៍នេះ។ លោកមេធាវី គួយ ធន់ណា បានបញ្ជាក់ថា លោកនឹងដាក់ពាក្យសុំធានាលោកស្រី បូរី នៅក្រៅឃុំនៅថ្ងៃធ្វើការស្អែក។ «ខ្ញុំ នឹងដាក់ពាក្យ សុំឲ្យលោកជំទាវ បូរី នៅក្រៅឃុំនៅថ្ងៃធ្វើការស្អែក ហើយ ខ្ញុំជឿថាការដាក់ពាក្យសុំនៅក្រៅឃុំរបស់ ខ្ញុំបានជោគជ័យ ដោយសារ លោកជំទាវជាមនុស្សមានកិត្តិយស មានឋានៈ មានប្រាក់កាស ហើយភាពសុច្ចរិត»។ <!--IMAGE-LEFT--> ការចាប់ខ្លួន និងការចោទប្រកាន់លោកស្រី ផេង គន្ធាបូរី គឺជាមន្ត្រីជាន់ខ្ពស់ទីប្រាំ របស់លោក ជា ស៊ីម បន្ទាប់អតីតទីប្រឹក្សាពីរនាក់របស់លោកគឺលោកឧត្តមសេនីយ៍ទោ ចាន់ កុសល អាយុ៦០ឆ្នាំ និងលោកឧត្តមសេនីយ៍ទោ ពន្លក ហូ អាយុ៥៨ឆ្នាំ ព្រមទាំងលោក ខៀវ បូរ៉ា អាយុ៥០ឆ្នាំ អតីតសមាជិកខុទ្ទកាល័យរបស់លោក ជា ស៊ីម ត្រូវបានចោទប្រកាន់អំពីបទក្លែងបន្លំ ឯកសារ និងបទឆបោករវាងពីថ្ងៃទី២៣ និងថ្ងៃទី២៥ ខែកញ្ញា កំពុងជាប់ឃុំនៅពន្ធនាគារព្រៃស។ នេះបើយោងតាមគេហទំព័ររបស់កងរាជអាវុធហត្ថលើផ្ទៃប្រទេស។ កាសែត The Cambodian Daily បានរាយការណ៍ថា ជនសង្ស័យទាំងបួននាក់នេះ ត្រូវបានចោទប្រកាន់អំពីការបោកប្រាស់ប្រាក់រាប់លានដុល្លារអាមេរិក ពីក្រុមហ៊ុនម៉ាឡេស៊ីមួយ ដែលចង់មកវិនិយោគក្នុងទឹកប្រាក់ ៥០០លានដុល្លារអាមេរិក នៅកម្ពុជា។ លោកឧត្តមសេនីយ៍ទោ ឈឿន ចាន់ថន ប្រធានអង្គភាពអង្គរក្សរបស់លោក ជា ស៊ីម ត្រូវបាន ចោទប្រកាន់ពីការមានលាក់ទុកអាវុធខុសច្បាប់ និងការក្លែងបន្លំឯកសារសាធារណៈកាលពីខែសីហា និងកំពុងស្ថិតនៅក្នុងពន្ធនាគារយោធា៕ This posting includes an audio/video/photo media file: Download Now |
| ព័ត៌មានអន្តរជាតិសង្ខេប៖ ២៩ កញ្ញា Posted: 29 Sep 2011 08:00 AM PDT ព័ត៌មានចុងក្រោយបំផុត៖ យេម៉ែន៖ ការវាយប្រយុទ្ធគ្នាយ៉ាងខ្លាំងបានផ្ទុះឡើងនៅក្នុងរដ្ឋធានីសាណា Sana'a នៃប្រទេសយេម៉ែន រវាងកងកម្លាំងដែលមានភក្តីភាពជាមួយលោកប្រធានាធិបតី Ali Abdullah Saleh និងពួកកុលសម្ព័ន្ធប្រដាប់អាវុធដែលចូលដៃជាមួយក្រុមបាតុករប្រឆាំងនឹងលោក Saleh។ បារ៉ែន៖ តុលាការពិសេសមួយនៅក្នុងប្រទេសបារ៉ែន បានកាត់សេចក្តីបាតុករម្នាក់ឲ្យមានទោសប្រហារជីវិត និងម្នាក់ទៀតឲ្យជាប់គុកមួយជីវិត អំពីបទសម្លាប់ភា្នក់ងារនគរបាលម្នាក់។ ប៉ាគីស្ថាន៖ មេដឹកនាំនៃគណបក្សនយោបាយជំទាស់នៅក្នុងប្រទេសប៉ាគីស្ថានកំពុងជួបប្រជុំគ្នានៅថ្ងៃព្រហស្បតិ៍នេះ ដើម្បីពិភាក្សាអំពីការចោទប្រកាន់របស់សហរដ្ឋអាមេរិកនៅពេលថ្មីៗនេះអំពីទំនាក់ទំនងរវាងរដ្ឋាភិបាលប៉ាគីស្ថាន និងក្រុមសកម្មប្រយុទ្ធមួយដែលមានទំនាក់ទំនងជាមួយពួកអាល់កៃដា។ ស៊ីរី៖ ក្រុមប្រឹក្សាសន្តិសុខអង្គការសហប្រជាជាតិកំពុងពិចារណាអំពីសេចក្តីសម្រេចចិត្តមួយដែលអាចមានការសម្របសម្រួលគ្នា ស្តីអំពីប្រទេសស៊ីរី ដែលអាចជៀសវាងមិនឲ្យមានការដាក់ទណ្ឌកម្មភា្លមៗ តែនឹងផ្តន្ទាទោសចំពោះអំពើហិង្សាដែលរីកកាន់តែធំឡើង នៅពេលដែលកងកម្លាំងសន្តិសុខរដ្ឋាភិបាល និងទាហានក្រុមអ្នកប្រឆាំងនៅតែបន្តធ្វើការវាយប្រយុទ្ធគ្នាតទៅទៀត។ លីប៊ី៖ ទីភ្នាក់ងារនគរបាលអន្តរជាតិ Interpol បានចេញសេចក្តីប្រកាសអន្តរជាតិឲ្យប្រុងប្រយ័ត្នមួយ ដើម្បីសុំជំនួយក្នុងការស្វែងរក និងចាប់ខ្លួនកូនប្រុសរបស់អតីតមេដឹកនាំប្រទេសលីប៊ី លោក ម៉ូអាម៉ារ ហ្កាដាហ្វី ឈ្មោះ Saadi។ អឺរ៉ុប៖ សមាជិករដ្ឋសភាប្រទេសអាល្លឺម៉ង់ កំពុងធ្វើការបោះឆ្នោតនៅថ្ងៃព្រហស្បតិ៍នេះ ដើម្បីសម្រេចថាតើនឹងតំឡើងថវិកាសម្រាប់ជួយសង្គ្រោះប្រទេសនៅក្នុងទ្វីបអឺរ៉ុប ដែលកំពុងមានវិបត្តិសេដ្ឋកិច្ចត្រដាបត្រដួសឬមិនតំឡើង។ <!--AV--> ព័ត៌មាននៅពេលមុននេះ៖ <!--IMAGE-LEFT--> ជប៉ុន៖ កាលពីថ្ងៃពុធ ប្រទេសជប៉ុនបានទទួលភ្ញៀវគណៈប្រតិភូមកពីសមាគមអាស៊ីអាគ្នេយ៍ ដើម្បីធ្វើការចរចាអំពីស្ថានការតានតឹងរ៉ាំរ៉ៃនៅលើតំបន់សមុទ្រចិនភាគខាងត្បូង។ អង្គការសហប្រជាជាតិ៖ ក្រុមប្រឹក្សាសន្ដិសុខអង្គការសហប្រជាជាតិបានចាប់ផ្ដើមចាត់វិធានការលើកទីមួយដើម្បីពិនិត្យមើលពាក្យសុំធ្វើជាសមាជិករដ្ឋពេញលេញ របស់អង្គការនេះ ដោយបានបញ្ជូនសំណុំរឿងទៅឲ្យគណកម្មាធិការមូយ។ ស៊ីរី៖ គេរំពឹងថាក្រុមប្រឹក្សាសន្ដិសុខអង្គការសហប្រជាជាតិនិងជួបប្រជុំគ្នានៅថ្ងៃពុធនេះ ដើម្បីវែកញែកមកលើសេចក្ដីព្រាងនៃការសម្រេចចិត្ដមួយដែលគំរាមមកលើការដាក់ទណ្ឌកម្មទៅអនាគត បើកាលណាកងកម្លាំងសន្ដិសុខស៊ីរីមិនបញ្ឈប់កិច្ចប្រតិបត្ដិការយោធាប្រឆាំងជនស៊ីវិល។ អង្គការសហប្រជាជាតិ៖ អង្គការសហប្រជាជាតិនិយាយថា ឧបហេតុដ៏ឃោរឃៅ នៅក្នុងប្រទេសអាហ្វហ្គានីស្ថានបានកើនលឿននៅឆ្នាំនេះ។ សូម៉ាលី ៖ គណៈកម្មាធិការអន្ដរជាតិរបស់កាកបាតក្រហមនិយាយថា ខ្លួនសង្ឃឹមថានឹងយកជំនួយទៅឲ្យពលរដ្ឋសូម៉ាលីមូយលាននាក់នៅក្នុងតំបន់រងគ្រោះខ្លាំងពីការឥតអាហារនៅចុងឆ្នាំនេះ។ យេម៉ែន៖ ក្រុមកុលសម្ព័ន្ធអ្នកប្រឆាំងរដ្ឋាភិបាលនៅក្នុងប្រទេសយេម៉ែនបានបាញ់ទម្លាក់យន្ដហោះរបស់រដ្ឋាភិបាល នៅតំបន់ភាគខាងជើងនៃទីក្រុងសាណា ចំពេលដែលបាតុករច្រើនពាន់នាក់កំពុងតវ៉ានៅយប់ថ្ងៃពុធ ប្រឆាំងនឹងប្រធានាធិបតី Ali Abdullah Saleh។ បារ៉ែន៖ តុលាការពិសេសនៅក្នុងប្រទេសបារ៉ែនបានយល់ព្រមឲ្យមានការកាត់ទោសប្រហារជីវិតសកម្មជនប្រឆាំងរដ្ឋាភិបាល៨នាក់ នៃនិកាយហ្សីអ៊ីតតាមបទប៉ុនប៉ងទម្លាក់រដ្ឋាភិបាលរបស់ក្រុមស៊ុនី អំបូរភាគតិចដែលដឹកនាំរដ្ឋាភិបាល នៅមានការតវ៉ាប្រឆំាងរដ្ឋាភិបាល កាលពីដើមឆ្នាំ។ បារាំង៖ តុលាការឧទ្ធរណ៍នៃប្រទេសបារាំងបានបដិសេធសេចក្ដីស្នើរបស់ប្រទេសរវ៉ាន់ដា ដែលទាមទារសុំឲ្យបញ្ជូនភរិយារបស់អតីតប្រធានាធិបតី រវ៉ាន់ដា Juvenal Habyarimana ទៅឲ្យប្រទេស រវ៉ាន់ដាវិញ។ សហរដ្ឋអាមេរិក៖ និយាយថា បានចាប់ខ្លួនជនអន្ដោប្រវេសន៍ខុសច្បាប់ ដែលជនទាំងអស់នោះ ធ្លាប់មានឈ្មោះជាជនប្រព្រឹត្ដបទឧក្រិដ្ឋ។ អ៊ីរ៉ង់៖ និយាយថា បានចាប់ផ្ដើមផលិតកាំជ្រួចម៊ីស៊ីល ដែលអាចបាញ់ដល់ទិសដៅចម្ងាយ ២០០ គីឡូម៉េត្រ។ This posting includes an audio/video/photo media file: Download Now |
| You are subscribed to email updates from VOA News: ព័ត៌មាន To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
