VOA News: ព័ត៌មាន: “សាលារាជធានីភ្នំពេញបដិសេធការសុំច្បាប់ដង្ហែក្បួនទាមទារតម្លើងប្រាក់ខែគ្រូបង្រៀន” plus 1 more |
| សាលារាជធានីភ្នំពេញបដិសេធការសុំច្បាប់ដង្ហែក្បួនទាមទារតម្លើងប្រាក់ខែគ្រូបង្រៀន Posted: 30 Sep 2011 01:22 PM PDT នៅថ្ងៃសុក្រនេះ សាលារាជធានីភ្នំពេញបានបដិសេធសំណើរសុំដើរដង្ហែក្បួនរបស់សមាគមគ្រូបង្រៀនកម្ពុជាឯករាជ្យ ដើម្បីទាមទារឲ្យរដ្ឋាភិបាលតម្លើងប្រាក់ខែដល់គ្រូបង្រៀន ដែលកំពុងប្រឈមនឹងតម្លៃម្ហូបអាហារឡើងថ្លៃ។ សមាគមគ្រូបង្រៀនកម្ពុជាឯករាជ្យគ្រោងនឹងដើរដង្ហែក្បួននៅទិវាគ្រូបង្រៀនពិភពលោកថ្ងៃទី៥ ខែតុលា តាមដងផ្លូវនានាក្នុងទីក្រុងភ្នំពេញ ដើម្បីប្រគល់ញត្តិជូនក្រសួងអប់រំ ខុទ្ទកាល័យនាយករដ្ឋមន្ត្រី និងរដ្ឋសភា ដោយមានអ្នកចូលរួមយ៉ាងតិច៣៥០នាក់។ ញត្តិនេះទាមទារឲ្យរដ្ឋាភិបាលតម្លើងប្រាក់បៀវត្សរ៍របស់គ្រូបង្រៀន ការលុបបំបាត់ភាពមិនប្រក្រតី ឬ អំពើពុករលួយនៅក្នុងវិស័យអប់រំ និងការលើកកម្ពស់គុណភាពអប់រំ។ សេចក្តីថ្លែងការណ៍របស់សាលារាជធានីភ្នំពេញ បានបញ្ជាក់ថាសាលារាជធានីភ្នំពេញមិនអនុញ្ញាតមានការដង្ហែក្បួនឡើយដើម្បីជៀសវាងកុំឲ្យប៉ះពាល់ដល់សន្តិសុខ សុវត្ថិភាព និងសណ្តាប់ធ្នាប់សាធារណៈ ព្រោះអំឡុងពេលនេះ សាលារាជធានីភ្នំពេញកំពុងរងផលប៉ះពាល់ពីទឹកជំនន់។ សេចក្តីថ្លែងការណ៍នេះ បានបន្ថែមថាសាលារាជធានីភ្នំពេញបានអនុញ្ញាតឲ្យសមាគមគ្រូបង្រៀនកម្ពុជាឯករាជ្យធ្វើការជួបប្រជុំ និងសម្តែងមតិនៅទីលានប្រជាធិបតេយ្យនិងអនុញ្ញាតឲ្យចាត់តំណាង១៥នាក់ធ្វើដំណើរចេញពីទីលានប្រជាធិបតេយ្យ ដើម្បីយកញត្តិទៅប្រគល់ជូនក្រសួងអប់រំ ខុទ្ទកាល័យនាយករដ្ឋមន្ត្រី និងរដ្ឋសភា។ លោក រ៉ុង ឈុន ប្រធានសមាគមគ្រូបង្រៀនកម្ពុជាឯករាជ្យ បានថ្លែងយ៉ាងដូច្នេះថា៖ «យើងមានការសោកស្តាយចំពោះការសម្រេចចិត្តរបស់សាលារាជធានីភ្នំពេញ ហើយយើងកត់សម្គាល់ឃើញថាសេរីភាពក្នុងការប្រមូលផ្តុំ និងការដង្ហែក្បួនធ្លាក់លេខសូន្យនៅកម្ពុជាយើង ហើយយើងមើលឃើញថា ការធ្វើបែបនេះប្រាសចាកទៅនឹងអ្វីដែលមានការធានានៅក្នុងរដ្ឋធម្មនុញ្ញស្តីពីសិទ្ធិប្រជាពលរដ្ឋ»។ លោក រ៉ុង ឈុន បានបញ្ជាក់ថា លោកមិនបោះបង់ចោលផែនការដើរដង្ហែក្បួន ដើម្បីទាមទារឲ្យរដ្ឋាភិបាលយកចិត្តទុកដាក់ចំពោះជីវភាពរបស់គ្រូបង្រៀននេះទេ។ «ជំហររបស់ខ្ញុំនៅតែព្យាយាមធ្វើការដង្ហែ បើទោះបីអាជ្ញាធររារាំងយ៉ាងណាក៏ដោយ។ យើងនៅតែធ្វើការតស៊ូមតិ ហើយយើងនឹងមានយុទ្ធសាស្ត្រច្រើន»។ លោក រ៉ុង ឈុន បានបន្តថាញត្តិនេះទាមទារតម្លើងប្រាក់បៀវត្សរ៍របស់គ្រូបង្រៀនឡើងដល់២៥០ដុល្លារអាមេរិក ពីចំនួនប្រាក់បៀវត្សរ៍បច្ចុប្បន្នជាមធម្យ ៥០ដុល្លារអាមេរិកសម្រាប់គ្រូបង្រៀននៅបឋមសិក្សាដើម្បីឲ្យមានតុល្យភាពនឹងតម្លៃទីផ្សារ។ «ទីមួយ យើងអបអរសាទរទិវាគ្រូបង្រៀនពិភពលោក ហើយឆ្លៀតយកឱកាសនេះ យើងធ្វើការទាមទារជូនគ្រូបង្រៀន ដោយសារបច្ចុប្បន្នមានការប្រឈមខ្លាំង ទាក់ទងនឹងបញ្ហាជីវភាពរស់នៅរបស់ពួកគាត់។ យើងនិយាយអំពីទំនិញឡើងថ្លៃ និងបញ្ហាផ្សេងៗជាច្រើន»។ លោក ចាន់ សាវ៉េត ប្រធានផ្នែកឃ្លាំមើលស្ថានភាពសិទ្ធិមនុស្ស នៃសមាគមសិទ្ធិមនុស្ស អាដហុក បានថ្លែងថាសាលារាជធានីភ្នំពេញបានរឹតត្បឹតសិទ្ធិសេរីភាពខាងការបញ្ចោញមតិ ការប្រមូលផ្តុំ និងការដើរដង្ហែក្បួន។ «ការត្បិតត្បៀតមិនឲ្យធ្វើការដង្ហែក្បួន ទៅតាមអ្វីដែលជាសេចក្តីត្រូវការរបស់ប្រជាពលរដ្ឋ។ វា ប៉ះពាល់ដល់ការមិនគោរពសិទ្ធិមនុស្ស ដ៏ទូលំទូលាយនៅក្នុងប្រទេសយើង ដូចមានចែងនៅក្នុងរដ្ឋធម្មនុញ្ញ។ សាលារាជធានីភ្នំពេញមិនអាចយកលេសត្រឹមតែរឿងប៉ះពាល់ សន្តិសុខ និងសណ្តាប់ធ្នាប់សាធារណៈនោះ»។ លោក ចាន់ សាវ៉េត បានបន្តថាសាលារាជធានីភ្នំពេញគួរតែអនុញ្ញាតឲ្យដង្ហែក្បួន ដើម្បីបង្ហាញពីសេរីភាពនៃការសម្តែងមតិ និងការអនុវត្តលទ្ធិប្រជាធិបតេយ្យពេញលេញរបស់រដ្ឋាភិបាលកម្ពុជា៕ This posting includes an audio/video/photo media file: Download Now |
| ឥទ្ធិពលខ្មែរក្រហមតាមលងពលរដ្ឋខ្មែរដល់សហរដ្ឋអាមេរិក Posted: 30 Sep 2011 11:46 AM PDT កត្តាសង្គមដែលកើតមានក្នុងជីវភាពថ្មីលើទឹកដីអាមេរិកនិងប្រវត្តិពីអតីតកាលក្នុងពេលដែលធ្លាប់ឆ្លងកាត់ក្នុងរបបខ្មែរក្រហមជះឥទ្ធិពលខ្លាំងមកលើពលរដ្ឋខ្មែរអាមេរិកាំងមួយចំនួនដែលរស់នៅក្នុងទីក្រុងឡុងប៊ិច ហើយបណ្តាលឱ្យមានផលប៉ះពាល់ទៅលើការអប់រំកូនចៅ និងការជួយទំនុកបម្រុងពួកគេឱ្យមានការងារល្អ។ សហគមន៍នៅទីក្រុងឡុងប៊ិចស្ថិតក្នុងចំណោមសហគមន៍ក្រីក្របំផុតនៅក្នុងសហរដ្ឋអាមេរិក ហើយសហគមន៍ខ្មែរក្នុងទីក្រុងនេះជួបប្រទះបញ្ហាប្រឈមមួយចំនួនដោយសារឥទ្ធិពលផ្សេងៗដែលពួកគេមានមកពីប្រទេសកម្ពុជា។ នេះបើតាមការបញ្ជាក់អះអាងពីអ្នកជំនាញមួយចំនួន។ លោកស្រី ជេននី ឈាង មន្ត្រីកម្មវិធីរបស់មូលនិធិទាយជ្ជៈទានរដ្ឋកាលីហ្វ័រញ៉ា បានបញ្ជាក់ប្រាប់វីអូអេសំឡេងសហរដ្ឋអាមេរិកពីមូលហេតុទាំងនោះថា៖ «សហគមន៍ខ្មែរក្នុងទីក្រុងឡុងប៊ិចប្រឈមមុខនឹងបញ្ហាមួយចំនួនដែលបណ្តាលមកពីការធ្វើដំណើរមកពីប្រទសកម្ពុជា ហើយត្រូវមកនៅក្នុងប្រទេសថ្មីមួយនិងបទពិសោធន៍ដែលពួកគេឆ្លងកាត់ក្នុងរបបខ្មែរក្រហមគឺការណ៍ដែលពួកគេត្រូវចាកចេញពីប្រទេសកម្ពុជាមករស់នៅក្នុងប្រទេសដែលថ្មីមួយ»។ លោកស្រីជេននី ឈាងបានបន្ថែមទៀតថា អ្នកទាំងនោះក៏នាំមកនូវជំងឺប្រចាំកាយមួយចំនួនផងហើយបរិយាកាសនៃសង្គមថ្មីមិនសូវអំណោយផលដល់ពួកគេដែរ ដូចជាការរស់នៅក្នុងតំបន់ក្រីក្រនិងមានអំពើហិង្សាជាដើម៖ «ពលរដ្ឋកម្ពុជាចាស់ៗជាច្រើន ដែលមកទីនេះ នៅមានជំងឺផ្លូវចិត្តដែលតែងតែមានបញ្ហាសុខភាពខាងរាងកាយផងដែរ។ ប៉ុន្តែសហគមន៍ដែលមានប្រជាពលរដ្ឋខ្មែររស់នៅក្នុងទីក្រុងឡុងប៊ិចគឺជាទីកន្លែងដែលមានមនុស្សរស់នៅកកកុញ ដែលតែងតែមានអំពើហិង្សានៅតាមដងផ្លូវ។ មានបញ្ហាហិង្សា ហើយមិនសូវមានឱកាសការងារធ្វើច្រើនទេនៅក្នុងសហគមន៍ទាំងនេះ ហើយយើងដឹងថា សាលារៀននៅទីកន្លែងនោះ ក៏មិនល្អដូចសហគមន៍ដទៃដែរ ដូច្នេះហើយកូនសិស្សដែលទៅសាលារៀននេះមិនមានឱកាសការងារច្រើនដូចគេឯងទេ។ ដូច្នេះប្រព័ន្ធនេះបន្តរហូតមក។ ក៏មានបញ្ហាទាក់ទងនឹងការទទួលបានសេវាថែទាំសុខភាពផងដែរនិងលទ្ធភាពក្នុងការទៅរកជួបគ្រូពេទ្យនៅពេលដែលពួកគេមិនសូវស្រួលខ្លួន»។ <!--IMAGE-RIGHT--> ទន្ទឹមនឹងកត្តាសុខភាពផ្ទាល់ខ្លួន ពលរដ្ឋខ្មែរអាមេរិកាំងក៏ប្រឈមមុខនឹងការលំបាកក្នុងការរស់នៅក្នុងវប្បធម៌និងប្រើប្រាស់ភាសាដែលខុសគ្នារវាងពួកគេផ្ទាល់និងកូនដែលកើតនៅលើទឹកដីថ្មីនេះ។ លោកស្រីក្រាញ់ វាសនា រស់នៅក្នុងទីក្រុងឡុងប៊ិច បានបញ្ជាក់ពីការលំបាកក្នុងការប្រាស្រ័យទាក់ទងគ្នារវាងឪពុកម្តាយជាមួយនឹងកូនៗហើយនិយាយភាសាខុសគ្នា។ «កូនក្មេងស្រុកនេះគេទៅសាលាច្រើន ដល់គេនិយាយតែអង់គ្លេសដល់មកវិញ ម្តាយខ្លះអត់ចេះអង់គ្លេសទេ។ ដូចខ្ញុំជាដើម អត់ចេះអង់គ្លេសច្រើនទេ។ សព្វថ្ងៃ ខ្ញុំបានទៅរៀនខ្លះៗទៅ អាចនិយាយជាមួយចៅ ជាមួយកូន...ជាពិសេសមិនមែនតែរឿងហ្នឹងទេគឺរឿងច្រើនដែលទាក់ទងនឹងចាស់ៗ។គាត់តឹងដើមទ្រូង។ ក្មេងៗវាត្រូវនិយាយអីមកយើង យើងអត់យល់អីទាំងអស់»។ លោកស្រីផ្តល់បទពិសោធន៍ផ្ទាល់ខ្លួនថា ពីពេលមុន គាត់អត់ដឹងថា អ្វីទៅជាសញ្ញាប័ត្រថ្នាក់បរិញ្ញា អ្វីទៅជាសញ្ញាប័ត្របរិញ្ញាប័ត្រជាន់ខ្ពស់ ហើយបើទោះបីជាឥឡូវគាត់ដឹងថា គេត្រូវចំណាយពេលប៉ុន្មានឆ្នាំដើម្បីសិក្សាឱ្យបានសញ្ញាប័ត្រទាំងនោះ ក៏គាត់នៅមិនដឹងថា តើវាមានតម្លៃប៉ុណ្ណានិងរកការងារអ្វីធ្វើបានដែរ។ លោកស្រីបញ្ជាក់ថា ជាលទ្ធផលនាំឱ្យលោកស្រី ក៏ដូចជាឪពុកម្តាយដទៃទៀតពិបាកក្នុងការជួយកូនសិក្សាបន្ថែម ឬតាមដានកិច្ចការសាលារបស់កូន។ «គឺកូនសម្រេចចិត្តដោយខ្លួនឯង គ្នាធ្វើអ្វីដោយខ្លួនឯង។ ដូចកាលពីដើមកូននៅតូចៗ នៅថ្នាក់ទីពីរឬទីបីអី យើងអាចជួយវាបាន។ ដល់ពេលវាឡើងថ្នាក់ខ្ពស់បន្តិចទៅ យើងអត់អាចជួយអីវាបាន ហើយវាខឹង។ វាថា សួរអីក៏អត់ដឹង។ អញ្ចឹងវាត្រូវរកគ្នាដើម្បីជួយវា»។ ការណ៍ត្រូវទៅសេពគប់មិត្តភក្តិដើម្បីរកជំនួយក្នុងការសិក្សា ពេលខ្លះអាចប៉ះជាមួយក្រុមដែលនាំទៅប្រព្រឹត្តអំពើអបាយមុខផ្សេងៗ ដូចជាចូលក្រុមអ្នកលេងជាដើម។ កូនរបស់លោកស្រី ក្រាញ់ វាសនា រួចផុតពីការសេពគប់មិត្តភក្តិមិនល្អ ប៉ុន្តែដោយសារពុំមានលទ្ធភាពនិងចំណូលច្រើន កូនរបស់លោកស្រីទាំងពីរនាក់ពុំបានទៅសិក្សាខ្ពង់ខ្ពស់ទេ ហើយពួកគេត្រូវទៅរកការងារធ្វើនៅទីកន្លែងផ្សេង។ មូលនិធិទាយជ្ជៈទានរដ្ឋកាលីហ្វ័រញ៉ាកំពុងជួយផ្តល់មូលនិធិដល់សហគមន៍ចំនួន១៤ក្នុងរដ្ឋកាលីហ្វ័រញ៉ា ក្នុងនោះមានសហគមន៍ខ្មែរក្នុងទីក្រុងឡុងប៊ិច។ លោកស្រីជេននីបានបន្ថែមថា៖ «អ្នកដឹងហើយថា ទីណាដែលអ្នករស់នៅមានឥទ្ធិពលលើសុខភាពរបស់អ្នក ហើយប្រសិនបើយើងចង់ធ្វើឱ្យសុខភាពប្រជាពលរដ្ឋទីក្រុងឡុងប៊ិចប្រសើរឡើង ជាពិសេសក្នុងសហគមន៍ខ្មែរ គឺយើងត្រូវនៅទីនេះឱ្យបានយូរពេល ហើយយើងត្រូវផ្តោតលើបញ្ហាមួយចំនួនដែលកំពុងប្រឈមមុខនឹងសហគមន៍នោះ»។ លោកស្រី សារ៉ា ប៉ុលលឹម នាយិកាប្រតិបត្តិអង្គការសហគមន៍ខ្មែរយល់ថា ពលរដ្ឋខ្មែរត្រូវតែរួមគំនិតគ្នាដើម្បីចូលរួមដោះស្រាយបញ្ហាប្រឈមដែលពួកគេកំពុងជួបប្រទះ។ «សង្គមខ្មែរយើងនៅស្រុកអាមេរិក ឬក៏នៅស្រុកខ្មែរមានសេចក្តីជឿនលឿនគឺការឧបត្ថម្ភមិនមែនត្រឹមតែអ្នកឱ្យលុយទេ យោបល់យើងបូកចូលគ្នា គំនិតបូកចូលគ្នា ហើយយោបល់ទាំងអស់គ្នាយកមកដោះស្រាយបញ្ហាក្នុងសង្គមឬក្នុងផ្ទះរបស់យើងជាមួយគ្នា»។ មូលនិធិទាយជ្ជៈទានរដ្ឋកាលីហ្វ័រញ៉ានឹងផ្តោតលើគម្រោងមួយចំនួនដែលជួយធ្វើឱ្យប្រសើរឡើងខាងផ្នែកសុខភាព ដែលមានដូចជាធ្វើឱ្យបរិយាកាសល្អ ការទទួលទានអាហារមានជីវជាតិនិងការរស់នៅដែលប្រាសចាកសកម្មភាពហិង្សា ព្រមទាំងលើកកម្ពស់ការងារជាដើម៕ This posting includes an audio/video/photo media file: Download Now |
| You are subscribed to email updates from VOA News: ព័ត៌មាន To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
