VOA News: ព័ត៌មាន: “ព្រះមហាក្សត្រ​តែង​តាំង​ចៅក្រម​ថ្មី​សម្រាប់​សាលា​ក្តី​ខ្មែរ​ក្រហម” plus 5 more

VOA News: ព័ត៌មាន: “ព្រះមហាក្សត្រ​តែង​តាំង​ចៅក្រម​ថ្មី​សម្រាប់​សាលា​ក្តី​ខ្មែរ​ក្រហម” plus 5 more


ព្រះមហាក្សត្រ​តែង​តាំង​ចៅក្រម​ថ្មី​សម្រាប់​សាលា​ក្តី​ខ្មែរ​ក្រហម

Posted: 28 Jul 2011 02:10 PM PDT

ព្រះមហាក្សត្រ​ខ្មែរ​សម្ដេច​ព្រះបរមនាថ​ នរោត្តម​ សីហមុនី​ បាន​តែងតាំង​ចៅក្រម​សញ្ជាតិ​កូរ៉េ​​ខាងត្បូង​ម្នាក់​ឲ្យ​ធ្វើ​ជា​ចៅក្រម​នៃ​អង្គបុរេ​ជំនុំជម្រះ​នៅ​ថ្ងៃ​ព្រហស្បតិ៍​នេះ ​ដែល​មន្ដ្រី​តុលាការ​និយាយ​​ថា ​នេះ​គឺ​ជា​ការ​តែងតាំង​ដោយ​យោង​តាម​ភាព​ចាំបាច់។

យោងតាម​សេចក្ដី​ប្រកាស​ព័ត៌មាន​របស់​សាលាក្ដី​ខ្មែរក្រហម​នៅ​រសៀល​ថ្ងៃនេះ ​លោក​ ជុង ​ឆាងហូ​ (Chung Chang-ho) ត្រូវ​បាន​តែងតាំង​ជំនួស​លោក​ស្រី​ចៅក្រម​ ខាថឺរីន ម៉ារឈី យូហ៊ែល (Chatherine ​Marchi-Uhel) ​ដែល​ត្រូវ​វិល​ទៅ​បំពេញ​​ការងារ​​នៅ​ឯ​តុលាការ​ព្រហ្មទណ្ឌ​អន្ដរជាតិ​នៃ​អតីត​ប្រទេស​យូហ្គោស្លាវី។

លោក ជុង​ ឆាងហូ ​ត្រូវ​បាន​ជ្រើសរើស​ដោយ​លោក​អគ្គលេខាធិការ​អង្គការ​សហ​ប្រជាជាតិ​ បាន​ គីមូន​ ហើយ​លោក​នឹង​ត្រូវ​ចូលបំពេញ​ការងារ​ជា​ផ្លូវការ​ចាប់ពី​ថ្ងៃ​ចន្ទ័ ទី​១ ខែ​សីហា ​សប្ដាហ៍​ក្រោយ​​​​នេះ​តទៅ។

លោក ​ឡាស​ អលសិន​ មន្ដ្រី​ផ្នែក​ទំនាក់ទំនង​កិច្ចការ​ច្បាប់​របស់​សាលាក្ដី​ខ្មែរ​ក្រហម​ខាង​ភាគី​អង្គការ​​សហ​ប្រជាជាតិ​ មាន​ប្រសាសន៍​ថា ​ការតែងតាំង​ចៅក្រម​ថ្មី​នេះ​គឺ​ជា​ការ​ផ្លាស់ប្ដូរ​ធម្មតា​តែ​ប៉ុណ្ណោះ​ ក៏​ប៉ុន្ដែ​គឺ​ជា​ការ​តែងតាំង​ដែល​មាន​ភាព​ចាំបាច់។ លោក​បាន​ប្រាប់​វីអូអេ​ខ្មែរ​ថា៖

«ការ​តែងតាំង​លោក​ ជុង ​ឆាងហូ ​ជា​ចៅក្រម​ថ្មី​នៅ​អង្គបុរេ​ជំនុំជម្រះ​​មាន​សារៈសំខាន់ ​ពីព្រោះ​​ចៅក្រម​មុន​គឺ​លោក​ស្រី ខាថឺរីន ម៉ារឈី យូហ៊ែល ​ត្រូវ​ត្រឡប់​ទៅ​កាន់​តួនាទី​ចាស់​របស់​គាត់​​វិញ​នៅ​តុលាការ​ព្រហ្មទណ្ឌ​អន្ដរជាតិ​នៃ​អតីត​ប្រទេស​យូហ្គោស្លាវី»។

លោក ជុង​ ឆាងហូ មាន​សញ្ញាប័ត្រ​អនុបណ្ឌិត​ច្បាប់​មក​ពី​សាកលវិទ្យាល័យ​ជាតិ​ក្រុង​សេអ៊ូល​ នៃ​ប្រទេស​កូរ៉េ​ខាងត្បូង។ លោក​ធ្លាប់​បម្រើការ​ជា​ចៅក្រម​នៅ​តុលាការ​ជាន់ខ្ពស់​ តុលាការ​ថ្នាក់​ស្រុក​ និង​បម្រើការ​នៅ​តុលាការ​សឹក។ លោក​ ជុង ​ឆាងហូ ​ក៏​ជា​អ្នក​ស្រាវជ្រាវ​ជាន់​ខ្ពស់​នៃ​សាលា​សេដ្ឋកិច្ច​ និង​វិទ្យាសាស្រ្ដ​នយោបាយ​នៃ​ទីក្រុងឡុងដ៍ ​និង​នៅ​សាកលវិទ្យាល័យ​ហុងកុង។

ស្ថានទូត​នៃ​សាធារណ​រដ្ឋ​កូរ៉េ​មិនទាន់​ផ្ដល់​ចម្លើយ​តប​តាម​សារ​អេឡិចត្រូនិច​ ស្ដីពី​ប្រតិកម្ម​ជុំវិញ​ការ​​តែងតាំង​​លោក​ ជុង ​ឆាងហូ ​ជា​ចៅក្រម​​នៃ​សាលាក្ដី​ខ្មែរ​ក្រហម​នៅ​ឡើយ​ទេ​រហូត​មក​ទល់​នឹង​​ល្ងាច​​នេះ៕

This posting includes an audio/video/photo media file: Download Now

មន្ត្រី​ពន្ធនាគារ​ព្រៃស​ត្រូវ​ក្រសួង​មហាផ្ទៃ​ហៅ​មក​សាកសួរ​ក្រោយ​ពី​ធ្វើ​អធិការកិច្ច​ចប់

Posted: 28 Jul 2011 01:23 PM PDT

មន្ត្រី​ផ្លូវការ​ក្រសួង​មហាផ្ទៃ​បាន​ថ្លែង​នៅថ្ងៃ​ព្រហស្បតិ៍​នេះ​ថា​ក្រសួង​បានកោះហៅ​មន្ត្រី​ពន្ធនាគារ​ព្រៃស​ចំនួន​ប្រាំ​នាក់​មក​សាកសួរ​អំពី​ភាព​មិនប្រក្រតី​មួយ​ចំនួន​ពាក់ព័ន្ធ​នឹង​ការ​គ្រប់គ្រង​អ្នកទោស​នៅ​ក្នុង​ពន្ធនាគារ។

ការកោះហៅ​នេះ​បានធ្វើ​ឡើង​ បន្ទាប់ពី​លោក​ម៉ុង​ គឹមហេង​ អតីត​ប្រធាន​ពន្ធនាគារ​ព្រៃស​ ម១​ ត្រូវ​បាន​ដក​ចេញ​ពី​តំណែង​កាល​ពី​ខែ​មិថុនា​ អំពី​កំហុសឆ្គង​លើ​ការ​គ្រប់គ្រង​ពន្ធនាគារ​និង​បន្ទាប់ពី​គណៈកម្មការ​អធិការកិច្ច​របស់​ក្រសួង​មហាផ្ទៃ​បានបញ្ចប់​អធិការកិច្ច​​របស់​ខ្លួន​នៅ​ពន្ធនាគារ​ព្រៃស​ ម១។

លោក​ឧត្តមសេនីយ៍​ឯក​ ខៀវ​ សុភ័គ​អ្នកនាំពាក្យ​ក្រសួង​មហាផ្ទៃ​ បាន​ថ្លែង​ប្រាប់​វីអូអេ​ ថា​គណៈកម្មការ​អធិការកិច្ច​របស់​ក្រសួង​បាន​កោះហៅ​មន្ត្រី​ពន្ធនាគារ​ព្រៃស​ ម១ ​មក​សាកសួរ​ព័ត៌មាន​ជុំ​វិញ​ការគ្រប់គ្រង​ពន្ធនាគារ​មិន​ប្រក្រតីភាព។

«អធិការកិច្ច​ថា​អាច​មាន​ពាក់ព័ន្ធ​នឹង​មន្ត្រី​មួយ​ចំនួន​ ក្រៅពី​ប្រធាន​ពន្ធនាគារ​ដែល​ក្រសួង​បាន​ផ្លាស់​មក​ហើយ​នេះ។ ដូច្នេះ​ អ្វី​ដែល​ក្រសួង​បានអញ្ជើញ​មក​ហើយ​ គឺ​អាច​ពាក់ព័ន្ធ​ការ​សួរ​ព័ត៌មាន​ទៅ​នឹង​ការ​គ្រប់គ្រង​មិន​ប្រក្រតីភាព​ក្នុង​ការ​ដឹកនាំ​កន្លង​មក​របស់​មន្ត្រី​ទាំងនោះ​ ធ្វើឱ្យ​ការគ្រប់គ្រង​នៅ​មាន​មិន​ប្រក្រតីភាព។ សមត្ថកិច្ច​របស់​មន្ត្រី​គណៈកម្មការ ​(អធិការកិច្ច) ដែល​ក្រសួង​បានបង្កើត​ឡើង​ គឺ​ហៅ​មក​សួរ​នាំ​ព័ត៌មាន។ ​ប៉ុន្តែ​សេចក្តី​សម្រេច​យ៉ាងណា​ យើង​មិន​ទាន់​មាន​នៅ​ឡើយ​ទេ»។

លោក​ឧត្តមសេនីយ៍​ឯក​ ខៀវ​ សុភ័គ​ មិន​បាន​បញ្ជាក់​លម្អិត​ឈ្មោះ​មន្ត្រី​ពន្ធនាគារ​ទាំង​ប្រាំ​នាក់​ដែល​បាន​កោះហៅ​នោះ​ទេ។

លោក​ចាន់​ សូវេត​ ប្រធាន​ផ្នែក​ឃ្លាំ​មើល​ស្ថានភាព​សិទ្ធិ​មនុស្ស​នៃ​សមាគម​សិទ្ធិ​មនុស្ស​អាដហុក​ បានថ្លែង​ថា​មន្ត្រី​ពន្ធនាគារ​មួយ​ចំនួន​ បានយក​ប្រាក់​ពី​អ្នកទោស​ ដើម្បី​ទទួល​បាន​កន្លែង​ទូលាយ​ ការ​ទារ​ប្រាក់​ពី​អ្នក​សួរសុខទុក្ខ​ ការ​កិបកេង​ប្រាក់​របស់​អ្នកទោស​ និង​បក្សពួក​នៅ​ក្នុង​ពន្ធនាគារ​ព្រៃស​ ម១។

«ជុំវិញ​ការ​កោះហៅ​នេះ​ វា​ជា​ចំណុច​មួយ​ដ៏​ល្អ​សម្រាប់​ពន្ធនាគារ​ដទៃ​ផ្សេង​ទៀត​ដែល​ធ្វើ​យ៉ាង​ដូច្នេះ​ យើង​ខ្ញុំ​ខាង​អង្គការ​សង្គម​ស៊ីវិល​ គិត​ថា​នេះ​ជា​ចំណុច​មួយ​ដ៏​សំខាន់​សម្រាប់​ចាប់ផ្តើម​ធ្វើ​ឱ្យ​ពន្ធនាគារ​ក្លាយ​ទៅ​ជា​ពន្ធនាគារ​មួយ​ដែល​ទទួល​ស្គាល់​ដោយ​អន្តរជាតិ។​ យើង​គាំទ្រ​ទាំង​ស្រុង​ទៅ​លើ​សកម្មភាព​អធិការកិច្ច​របស់​ក្រសួង​មហាផ្ទៃ​ ក្នុង​ការ​ធ្វើ​ឱ្យ​ពន្ធនាគារ​នេះ​ អាច​ដំណើរការ​បាន​ល្អ​ និង​ប្រព្រឹត្ត​ទៅ​ដោយ​យុត្តិធម៌»។

លោក​អ៊ំ​ សំអាត​ ប្រធាន​ផ្នែក​ស៊ើបអង្កេត​នៃ​អង្គការ​សិទ្ធិ​មនុស្ស​ បានថ្លែង​ថា​ការ​កោះហៅ​មន្ត្រី​ពន្ធនាគារ​នេះ​ជា​ជំហាន​នៃ​ការ​ចាប់ផ្តើម​ដំបូង​នៃ​ការធ្វើ​កំណែ​ទម្រង់​ប្រព័ន្ធ​គ្រប់គ្រង​ពន្ធនាគារ។ លោក​បានលើក​ទឹកចិត្ត​ដល់​ក្រសួង​មហាផ្ទៃ​ឱ្យ​បន្ត​ការងារ​អធិការកិច្ច​នេះ​នៅ​គ្រប់​ពន្ធនាគារ។

«បើ​មាន​មន្ត្រី​ពន្ធនាគារ​ណា​ពាក់ព័ន្ធ​នឹង​ភាព​មិន​ប្រក្រតី​ ក្រសួង​មហាផ្ទៃ​ត្រូវ​ធ្វើ​ការ​ស៊ើបអង្កេត​ហ្មត់ចត់​ ហើយ​បើ​មន្ត្រី​ពន្ធនាគារ​មាន​ប្រព្រឹត្ត​បទល្មើស​ព្រហ្មទណ្ឌ​នៅ​ក្នុង​ពន្ធនាគារ​ មន្ត្រី​ត្រូវ​បញ្ជូន​ទៅ​តុលាការ​ ដើម្បី​ធ្វើការ​តាម​ច្បាប់។ ​នេះ​ជា​គំរូ​មួយ​ ដើម្បី​ពង្រឹង​ការគ្រប់គ្រង​ពន្ធនាគារ​ហ្នឹង​ឱ្យ​កាន់​តែ​ល្អ​ថែម​ទៀត»។

លោក​ធាន​ ឆវ័ន្ត​ អតីត​ប្រធាន​ពន្ធនាគារ​ខេត្ត​បន្ទាយមានជ័យ​ត្រូវ​បាន​ដក​ចេញ​ពី​តំណែង​កាល​ពី​ថ្ងៃ​ពុធ​ម្សិលមិញ​អំពី​ភាព​មិនប្រក្រតី​នៃ​ការគ្រប់គ្រង​ពន្ធនាគារ៕

This posting includes an audio/video/photo media file: Download Now

កម្ពុជា​និង​កូរ៉េ​ខាងជើង​បាន​ព្រមព្រៀង​គ្នា​ជំរុញ​កិច្ច​សហ​ប្រតិបត្តិការ

Posted: 28 Jul 2011 01:05 PM PDT

ប្រទេស​កម្ពុជា​និង​ប្រទេស​កុម្មុយនិស្ដ​កូរ៉​ខាងជើង​បាន​ព្រមព្រៀង​គ្នា​នៅ​ថ្ងៃពុធ​នេះ​ជំរុញ​កិច្ច​​សហ​ប្រតិបត្តិការ​ទ្វេភាគី​ឲ្យ​កាន់តែ​រឹងមាំ​ថែមទៀត​​ដោយ​សន្យា​ចែក​រំលែក​គ្នា​​ទៅវិញ​ទៅមក​នូវ​​បទពិសោធន៍​លើ​វិស័យ​សំខាន់ៗ​ចំនួន​ប្រាំ។​ វិស័យ​ទាំងនោះ​ដែល​រួមមាន​ផ្នែក​កសិកម្ម​​ ឧស្សាហកម្ម​ ផ្នែក​បច្ចេកវិជ្ជា​ ផ្នែក​សុខាភិបាល​ ការ​ផ្លាស់​ប្ដូរ​ពាណិជ្ជកម្ម ​និង​វិនិយោគទុន។

ការ​ព្រមព្រៀង​នេះ​ធ្វើឡើង​ក្នុង​កិច្ច​ប្រជុំ​នៃ​គណៈកម្មការ​ចម្រុះ​ទ្វេភាគី​ក្នុង​ទីក្រុង​ភ្នំពេញ​ រវាង​គណៈ​ប្រតិភូ​ជាន់ខ្ពស់​​កូរ៉េ​​ខាងជើង​ដែល​មាន​សមាជិក​សរុប​ចំនួន​ប្រាំបួន​រូប ​ដឹកនាំ​ដោយ​លោក​ រី មីយុងសាន​ (Ri Myung San)​ អនុ​រដ្ឋមន្ដ្រី​ក្រសួង​ពាណិជ្ជកម្ម​កូរ៉េ ​និង​ភាគី​កម្ពុជា​ដែល​ដឹកនាំ​ដោយ​លោក​អ៊ុច ​បូរិទ្ធ ​រដ្ឋ​លេខាធិការ​​ក្រសួង​ការ​បរទេស។

លោក​អ៊ុច បូរិទ្ធ ​បាន​ថ្លែង​ប្រាប់​ក្រុម​អ្នក​រាយ​ការណ៍​ព័ត៌មាន​ក្រោយ​ពី​កិច្ច​ប្រជុំ​ថា​ ប្រទេស​កូរ៉េ​ខាង​​ជើង​​នឹង​ជួយ​កម្ពុជា​ក្នុង​កា​របង្កាត់​ពូជ​ស្រូវ ​ពោត​ គោ ​និង​ពូជ​បសុបក្សី​សម្រា​ប់​បង្កើន​ទិន្នផល​ខ្ពស់ ​ រួមទាំង​ការ​ជួយផ្នែក​ការដាំ​និង​បង្កាត់​ព្រៃឈើ​ផងដែរ។ ​ដោយ​ឡែក​កម្ពុជា​​នឹង​ជួយ​ចែក​រំលែក​​បទ​ពិសោធន៍​របស់​ខ្លួន​ទៅ​ដល់​ប្រទេស​កូរ៉េខាងជើង​ផ្នែក​​ការ​ចិញ្ចឹម​ត្រី​ទឹកសាប​​និង​ត្រី​សមុទ្រ។

«ធ្វើ​យ៉ាងណា​ដើម្បី​ឲ្យ​វិស័យ​ខាង​ចិញ្ចឹម​សត្វ ​ក៏ដូចជា​វិស័យ​ខាង​ផលិត​ផល​ស្រូវ​កាន់​តែ​មាន​ការរីក​​ចម្រើន។ ​មិត្ត​កូរ៉េ​និយាយ​ថា​ នឹង​ធ្វើការ​សិក្សា ​និង​ផ្ដល់​បទ​ពិសោធន៍​ជួយ​ដល់​កម្ពុជា​ក្នុង​ការ​ជំរុញ​​ឲ្យ​មាន​ខាង​ឧស្សាហកម្ម​ធនធាន​ធម្មជាតិ។​ ភាគី​ទាំងពីរ​ឯកភាព​គ្នា​ថា​ នឹង​ខិតខំ​ធ្វើ​យ៉ាងណា​ដើម្បី​ជំរុញ​​ឲ្យ​មាន​ការ​ផ្លាស់ប្ដូរ​ខាង​ផ្នែក​ពាណិជ្ជកម្ម​និង​វិនិយោគ​ទុន​នៃ​ប្រទេស​ទាំង​ពីរ»។

ការ​វិនិយោគ​ដែល​សាធារណរដ្ឋ​ប្រជាមានិត​ប្រជាធិបតេយ្យ​កូរ៉េ​គឺ​ប្រទេស​កូរ៉េ​ខាង​ជើង​មិនមាន​ជា​ដុំ​​កំភួន​ទេ​នៅ​ក្នុង​ប្រទេស​កម្ពុជា​ ក្រៅពី​ការ​បើក​ភោជនីយដ្ឋាន​មួយ​ ឬ​ពីរ​តែ​ប៉ុណ្ណោះ។

លោក​អ៊ុច​ បូរិទ្ធ​ក៏បាន​ឲ្យដឹង​ទៀត​ថា​ ប្រទេស​កូរ៉េ​ក៏​សម្លឹង​ឃើញ​ការ​នាំចូល​ផលិតផល​​កសិកម្ម​​ពី​​ប្រទេស​កម្ពុជា​ ជា​ពិសេស​កម្ពុជា​អាច​មាន​លទ្ធភាព​នាំ​អង្ករ​ទៅ​កាន់​ប្រទេស​កុម្មុយនិស្ដ​មួយ​​នេះ​ ហើយ​កម្ពុជា​ក៏អាច​នាំចូល​ពី​ប្រទេស​កូរ៉េ​ខាងជើង​នូវ​គ្រឿងយន្ដ​កសិកម្ម​មកវិញ​ដែរ។

ប្រទេស​កម្ពុជា​ និង​ប្រទេស​កូរ៉េ​ខាង​ជើង​មាន​ចំណង​ការ​ទូត​ជិតស្និទ្ធ​ជា​ប្រវត្តិសាស្ដ្រ​ជាច្រើន​ទសវត្ស​​មក​ហើយ​ ជាពិសេស​តាម​ចំណង​មិត្តភាព​រវាង​អតីត​ព្រះ​មហាក្សត្រ​ខ្មែរ​នរោត្តម​សីហនុ ​និង​​លោក​សេនា​ប្រមុខ​គឹម ​អ៊ីលស៊ុង​របស់​ប្រទេស​កូរ៉េ​ខាងជើង។​ កិច្ច​ព្រមព្រៀង​ទ្វេ​ភាគី​ជាច្រើន​បាន​ធ្វើ​ឡើង​ចាប់​តាំង​ពី​ឆ្នាំ​១៩៩៣​រហូត​ដល់​ឆ្នាំ​២០១១ ​ក៏ប៉ុន្ដែ​លោក​អ៊ុច​ បូរិទ្ធ​បញ្ជាក់​ថា ​មាន​«ការអនុវត្ត​​តិចតួច​ណាស់»​លើ​កិច្ច​ព្រមព្រៀង​ទាំងនេះ។

លោក​ស្រី​ជា វណ្ណាត​ អ្នក​វិភាគ​ឯករាជ្យ​កម្ពុជា​មាន​ប្រសាសន៍​ថា ​ថ្វីបើ​ប្រទេស​កុម្មុយនិស្ដ​កូរ៉េ​ខាង​​ជើង​ជួប​នូវ​វិបត្តិ​សង្គម​​និង​មាន​ជម្លោះ​ជាមួយ​ប្រទេស​បងប្អូន​បង្កើត​កូរ៉េ​ខាងត្បូង​យ៉ាង​ណាក្ដី​ ក៏​កូរ៉េ​ខាងជើ​ង​អាច​មាន​លទ្ធភាព​ធ្វើ​ការ​វិនិយោគ​លើ​វិស័យ​មួយ​ចំនួន​ដែល​បាន​ព្រម​ព្រៀង​គ្នា​នោះ។​ មួយ​វិញ​ទៀត​ លោក​ស្រី​ជា វណ្ណាត​មាន​ប្រសាសន៍​ថា ​ការ​ពង្រឹង​ទំនាក់​ទំនង​ជាមួយ​ក្រុង​ព្យុងយ៉ាង​​​នៅ​ពេល​នេះ​​នឹង​មិន​ធ្វើ​ឲ្យ​រំខាន​​ដល់​កិច្ចការ​នយោបាយ​អន្ដរជាតិ​របស់​កម្ពុជា​​នោះ​ទេ ​ដោយសារ​​តែ​​កម្ពុជា​មាន​ជំហរ​អធិប​តេយ្យ​ក្នុង​វិស័យ​នយោបាយ​ការ​ទូត​របស់​ខ្លួន។

យ៉ាង​ណា​ក៏​ដោយ​ កាល​ពី​ថ្ងៃ​អង្គារ​ម្សិលមិញ​នេះ ​លោក​សុន ​ឆៃ ​តំណាងរាស្ដ្រ​គណបក្ស​សម រង្ស៊ី ​ដែល​ជា​គណបក្ស​ជំទាស់​ បាន​និយាយ​ថា ​ការ​ប្រឹងប្រែង​របស់​ប្រទេស​កូរ៉េ​ខាងជើង​ក្នុង​ការ​ពង្រឹង​ទំនាក់​ទំនង​ទ្វេភាគី​ជាមួយ​កម្ពុជា​​នៅ​ពេល​នេះ​គឺជា​ការស្វែង​ធ្វើ​ឲ្យ​ទំនាក់​ទំនង​នយោបាយ​រវាង​កម្ពុជា​ជាមួយ​ប្រទេស​កូរ៉េ​ខាងត្បូង​ដែល​​មាន​ការ​រីកលូតលាស់​ជាង​មាន​តុល្យភាព​នឹង​ទំនាក់ទំនង​កម្ពុជា​ជាមួយ​ខ្លួន៕

This posting includes an audio/video/photo media file: Download Now

ព័ត៌មាន​អន្តរជាតិ​សង្ខេប៖ ២៨ កក្កដា

Posted: 27 Jul 2011 08:53 PM PDT

ព័ត៌មានចុងក្រោយ៖

សរអា/កូរ៉េខាងជើង៖អ្នក​ចរចា​សរអា​ និង​កូរ៉េខាងជើង​នឹង​ជួប​គ្នា​នៅ​ព្រឹក​ថ្ងៃ​ព្រហស្បតិ៍​នេះ​នៅ​ទីក្រុង​ ញូងយ៉ក​ ដែល​ជាកិច្ច​ពិភាក្សា​គ្នា​ជាលើក​ដំបូង​ក្នុងពេល​ជាង​១៨​ខែ​នេះ។

សរអា៖ គណបក្ស​សាធារណរដ្ឋ​មានផែនការ​ដោះស្រាយ​វិបត្តិ​បំណុល​ ដែលត្រូវ​បោះឆ្នោត​នៅសភា​នៅថ្ងៃ​ព្រហស្បតិ៍នេះ​ គឺ​ជិត​មួយសប្តាហ៍​មុនពេល​ប្រទេស​នេះ​អស់​ថវិកា​បង់ថ្លៃ​ចំណាយ។

លីប៊ី៖ប្រធាន​ក្រុម​ប្រឹក្សា​នៅ​ប្រទេស​លីប៊ី​និយាយ​ថា ​ក្រុម​បះបោរ​ស្នើឲ្យ​លោក​Mohammar Gadhafi ​បន្តនៅ​ក្នុងប្រទេស​ បើលោក​សុខចិត្ត​ចុះចេញ​ពីតំណែង។

អាស៊ី៖ ធនាគារ​អភិឌ្ឍន៍អាស៊ី​ និយាយ​ថា ​តំបន់​អាស៊ី​ខាងកើត​នឹង​មាន​កំណើន​សេដ្ឋកិច្ច​តិចតួច​នៅឆ្នាំ​នេះ​ និងឆ្នាំ​ក្រោយ ​ដោយសារ​កំណើន​អតិផរណា​ និង​បំណុល​នៅ​សរអា​និង​នៅ​អឺរ៉ុប។

កូរ៉េ​ខាងត្បូង៖ មន្ត្រីកូរ៉េ​ខាងត្បូង​និយាយ​ថា ​មនុស្ស​ច្រើននាក់​បានស្លាប់​ដោយសារ​ការ​បាក់​ដី ​ដែល​បណ្តាល​មកពី​ភ្លៀងធ្លាក់​យ៉ាងខ្លាំង​បំផុត​ ក្នុង​រដ្ឋធានី ​​ក្នុង​មួយ​សតវត្ស​កន្លង​ទៅនេះ។

ចិន៖មន្ត្រីចិន​និយាយ​ថា​ កំហុស​មនុស្ស​និង​បច្ចេកទេស​គឺ​ជាមូលហេតុ​បណ្តាល​ឲ្យ​​រថភ្លើង​ក្រឡាប់​ដ៏គ្រោះថ្នាក់​បំផុត​តាំងពី​ឆ្នាំ​២០០៨​មក។

ស៊ីរ៉៖ មេដឹកនាំថ្មី​របស់​ក្រុម​អាល់​ខៃដា​កំពុង​ប្រកាស​អំពី​សាមគ្គីភាព​ជាមួយ​ចលានា​គាំទ្រ​ប្រជាធិបតេយ្យ​នៅ​ប្រទេស​ស៊ីរី​ ហើយ​ជំរុញ​ឲ្យ​បាតុករ​នៅ​ទីនោះ​តម្រង់​ទិស​ការ​បះបោរ​របស់​គេ​ប្រឆាំង​រដ្ឋាភិបាល​ផង​ប្រឆាំង​អាមេរិក និង​អ៊ិស្រាអែល​ផង។

ណ័រវ៉េ៖ អ្នកជំនាញ​ប្រឆាំង​ភេរវកម្ម​មកពីសហភាព​អឺរ៉ុប ​និង​ណ័រវ៉េ​នឹង​ជួប​ប្រជុំគ្នា​នៅក្រុង​ Brussels ​ថ្ងៃព្រហស្បត៍​នេះ​ ដើម្បីពិភាក្សា​រក​មអធ្យោបាយ​បង្ការ​ការវាយ​ប្រហារ​ស្រដៀង​គ្នា​ ដែលបាន​សម្លាប់​មនុស្ស​៧៦​នាក់​កាលពី​សប្តាហ៍​មុន​ក្នុង​ក្រុង​Olso។

យ៉េម៉ែន៖ អ្នកស្មោះ​ត្រង់នឹង​រដ្ឋាភិបាល​ និង​បាតុករ​ប្រឆាំង​បាន​ប៉ះ​ទង្គិចគ្នា​នៅ​ប្រទេស​យ៉េម៉ែន​ នៅ​កន្លែងដែល​មាន​ការ​ប្រមូល​ផ្តុំគ្នា​ទូទាំង​ប្រទេស​កាល​ពីថ្ងៃពុធ។

ហ្សាំបៀ៖លោក ​Rupiah Banda ​ប្រធានាធិបតី​ប្រទេស​ហ្សាំបៀ ​បាន​ប្រកាស​រំលាយ​សភា​ និង​បានកំណត់​ថ្ងៃបោះ​ឆ្នោត​ថ្មី​នៅថ្ងៃទី​២០​ ខែកញ្ញា។

ថៃ៖គណៈ​កម្មការ​បោះឆ្នោត​ប្រទេស​ថៃ​បាន​បញ្ជាក់​ជ័យ​ជំនះ​របស់​បេក្ខជន​ជាច្រើន។​ ការប្រកាស​នេះបើក​ផ្លូវ​ឲ្យសភា​ជាតិ​បើកសម័យ​ប្រជុំរបស់​ខ្លួន​នៅ​ថ្ងៃច័ន្ទ។

វៀតណាម៖ វៀតណាម​បាន​បដិសេធ​ការ​ចោទ​ប្រកាន់​របស់​សរអា​ដែល​ថា​ បព្វជិត​ ង្វៀនវ៉ាន់លី ​ត្រូវគេ​ដាក់ពន្ធនាគារ​ ដើម្បី​បង្ក្រាប​ការ​បញ្ចេញ​ទស្សនៈ​របស់​លោក។

<!--AV-->

ព័ត៌មាននៅពេលមុននេះ៖

វៀតណាម៖ សហរដ្ឋ​អាមេរិក ​អំពាវនាវ​ឲ្យ​មាន​ការ​ដោះ​លែង​ សកម្មជន​វៀតណាម​ ម្នាក់​ជា​បន្ទាន់ ដែល​ត្រូវ​បាន​អាជ្ញាធរ​ចាប់​ដាក់​គុក ​ទោះ​ជា​ជន​នោះ​មាន​ជំងឺ​ធ្ងន់ធ្ងរ​ក៏​ដោយ។ ​ស្រ្ដី​អ្នក​នាំពាក្យ​ក្រសួង​ការបរទេស​ សរអ​បាន​ចេញ​សេចក្ដី​ថ្លែងការ​ដូច្នោះ​ កាល​ពី​យប់​ថ្ងៃ​អង្គារ៍ ដោយ​សម្តែង​ការ​ព្រួយបារម្ភ​លើ​ការ​ចាប់​ខ្លួន​ព្រះសង្ឃ​ កាតុលិច​ ងៀង​ វ៉ាន់​ លី ម្ដង​ទៀត។

អង់គ្លេស៖ ប្រទេស​ អង់គ្លេស​បាន​បណ្ដេញ​អ្នក​ការទូត​ទាំង​អស់​របស់​រដ្ឋាភិបាល​ មូម៉ារ ​កាដាហ្វី​ ហើយ​បាន​ទទួល​ស្គាល់​ក្រុម​ប្រឆាំង ​ហៅ​ក្រុម​ប្រឹក្សា​ជាតិ​អន្ដរកាល ​ថា ​ជា​អាជ្ញាធរ​ស្រប​ច្បាប់​របស់​ប្រទេស​លីប៊ី។

យេម៉ែន៖ ក្រុម​និយម​រដ្ឋាភិបាល និង​ក្រុម​ប្រឆាំង​បាន​ប៉ះ​ទង្គិច​គ្នា​ នៅ​ក្នុង​ប្រទេស​យេម៉ិននៅ​ពេល​មាន​បាតុកម្ម​កើត​ឡើង​នៅ​ទូទាំង​ប្រទេស​កាល​ ពី​ថ្ងៃ​ពុធ។​សាក្សី​ឃើញ​ផ្ទាល់​ភ្នែក​និយាយ​ថា មនុស្ស​ច្រើន​នាក់​បាន​រង​របួស​នៅ​ក្រុងភាគ​ខាង​ត្បូង​ ពេល​ដែល​ជន​ប្រដាប់​អាវុធ​និយម​រដ្ឋាភិបាល​បាន​បាញ់​កាំភ្លើង​មក​លើ​ក្រុម​ បាតុករ។

ស៊ីរី៖ សកម្មជន​ការពារ​សិទ្ធិ​មនុស្សប្រទេសស៊ីរី និយាយ​ថា កងកម្លាំង​សន្ដិសុខ​ស៊ីរី​បាន​បាញ់​សម្លាប់​មនុស្ស​យ៉ាង​តិច ១១នាក់​​ក្នុង​អំឡុង​ពេល​បោស​សម្អាត​នៅ​តំបន់​ភាគ​ខាង​ត្បូង​ទីក្រុង ដាម៉ាស។

ន័រវ៉េស៖ នាយក​រដ្ឋមន្ដ្រី​ប្រទេស​ន័រវ៉េស ​លោក ​Jens ​Stoltenberg ​ថ្លែង​ថា រដ្ឋាភិបាល​របស់​លោក ​នឹង​រៀបចំ​ឲ្យ​មាន​គណកម្មការ​អចិន្ដ្រៃយ​មួយ ​ដើម្បី​ធ្វើការ​ស៊ើប​អង្កេត​អំពី​រឿង​បាញ់​សម្លាប់​និង​ការ​វាយ​ប្រហារ​ដោយ ​ដាក់​គ្រាប់​បែក​ផ្ទុះ​ ដែល​បាន​សម្លាប់​មនុស្ស​យ៉ាងតិច​៧៦​នាក់ ​កាល​ពី​សប្ដាហ៍​មុន។

អាហ្វហ្គានីស្ថាន៖ អត្ដឃាតជន​ម្នាក់​បាន​សម្លាប់​អភិបាល​ក្រុង​មួយ​នៅ​ភាគ​ខាង​ត្បូង​ប្រទេស​ អាហ្វហ្គានីស្ថាន ​នៃ​ទី​ក្រុង ​កានដាហារ ​ដែល​ជា​ឃាតកម្ម​ដ៏ចេញ​មុខ​ចុង​ក្រោយ​បង្អស់​មក​លើ​មន្ដ្រី​សំខាន់​ៗ​របស់​ ប្រធានាធិបតី ​ហាមីឌ ​កាសៃ។

អង់គ្លេស៖ ក្រសួង​ការបរទេស​អង់គ្លេស ​បាន​បើក​ពិធី​មូយ​នៅ​ជុំវិញ​ពិភព​លោក​ ដើម្បី​កត់​សំគាល់​ការ​រាប់​ថយ​ក្រោយ​នៃ​ពេល​វេលា​កីឡា​អូឡាំពិក​ឆ្នាំ​ ២០១២ ​ដែល​នឹង​ប្រព្រឹត្ដ​ធ្វើ​នៅក្រុង​ឡុងដ៍។

កូតឌីវ័រ៖ ប្រធានាធិបតិ​ប្រទេស ​កូតឌីវ័រ​ លោក ​Alassane ​Ouattara ​ថ្លែង​ថា​ យុត្ដិធម៌​នឹង​យក​ទៅ​អនុវត្ដ​តាម​សភាព​ស្មើៗ​គ្នា​ ដល់​អ្នក​ទទួល​ខុស​ត្រូវ ​ដែល​ប្រព្រឹត្ដ​អំពើ​ឃោរឃៅ ​នៅ​ពេល​ក្រោយ​ការ​បោះឆ្នោត។

អាហ្វ្រិក៖ អង្គការ​កម្មវិធី​ស្បៀង​អាហារ​ពិភ​លោក នៃ​អង្គការ​សហប្រជាជាតិ ​បាន​ ផ្ដើម​ដឹក​ជញ្ជូន​តាម​យន្ដហោះ​ជា​បន្ទាន់​នូវ​ជំនួយ​អាហារ​ទៅ​កាន់​តំបន់​ រងគ្រោះ​ដោយសារ ​ការ​រាំងស្ងួត​ក្នង​តំបន់​អាហ្វ្រិក​ រាង​ដូច​ស្នែង​ក្របី។

សហរដ្ឋ​អាមេរិក៖ ប្រធានាធិបតី បារ៉ាក់ អូបាម៉ា និង​សម្ព័ន្ធមិត្ដ​នៃ​គណបក្ស​ប្រជាធិបតេយ្យ​ ក្នុង​រដ្ឋសភា ព្រម​ទាំង​ក្រុម​ប្រឆាំង​គណបក្ស​សាធារណរដ្ឋ នៅ​តែ​បន្ដ​ប្រកែក​គ្នា​អំពី​ផែនការ​នៃ​ការ​តម្លើង​កម្រិត​ប្រាក់​ខ្ចី​របស់ ​រដ្ឋាភិបាល​សហព័ន្ធ ខណៈ​ដែល​កាល​កំណត់នៃថ្ងៃទី ២ ខែ សីហា បានខិត​ជិតមក​ដល់។ បើ​មិន​មាន​កិច្ច​ព្រមព្រៀង​គ្នា​ទេ រដ្ឋាភិបាល​វ៉ាស៊ីនតោន​នឹង​ខកខាន​មិន​អាច​បំពេញ​កាតព្វកិច្ច​របស់​ខ្លួន​បាន​ឡើយ។

ប៉ាឡេស្ទីន៖ ប្រធានាធិបតី​ប៉ាឡេស្ទីន​លោក មាហមូដ អាបាស​បាន​អំពាវនាវ​ឲ្យ​មាន​បាតុកម្ម​គាំទ្រ​សេចក្ដី​ស្នើ​មួយ​ដែល​តាម​ ស្វែង​រក​សមាជិកភាព​របស់រដ្ឋ​ប៉ាឡេស្ទីន នៅ​អង្គការ​សហប្រជាជាតិ ពេល​មាន​សម័យ​ប្រជុំ អសប នៅ​ក្រុង​ញូយ៉ក។

This posting includes an audio/video/photo media file: Download Now

តុលាការ​​ថៃ​បើក​សវនាការ​កាត់ទោស​ជនជាតិ​ខ្មែរ​ ថៃ​ វៀតណាម

Posted: 27 Jul 2011 03:09 PM PDT

នៅ​ថ្ងៃ​អង្គារ​នេះ​ តុលាការ​ខេត្ត​ស៊ីសាកេត​ ប្រទេស​ថៃ​បាន​បើក​សវនាការ​ជំនុំ​ជម្រះ​ជន​ជាប់​ចោទ​ចំនួន​បី​រូប​ដែល​រួម​មាន​ពលរដ្ឋ​កម្ពុជា​មួយ​រូប​ ជន​ជាតិ​ថៃ​មួយ​រូប​និង​ជន​ជាតិ​វៀតណាម​មួយរូប​ ក្រោម​បទ​ចោទ​ប្រកាន់​ថា​ បាន​ប្រើ​ប្រាស់​គ្រឿង​ញៀន​ និង​ធ្វើ​ចារកម្ម​ក្នុង​ប្រទេស​ថៃ។

លោក​នេត សេរី ​អគ្គកុងស៊ុល​កម្ពុជា​ប្រចាំ​ខេត្ត​ស្រះ​កែវ​ប្រទេស​ថៃ​បាន​ប្រាប់​វីអូអេ តាម​ទូរស័ព្ទ​ពី​ប្រទេស​ថៃ​មក​ថា ​បន្ទាប់​ពី​បាន​បើក​សវនាការ​អស់​រយៈ​ពេល​ជាង​ពីរ​ម៉ោង ​តុលាការ​ខេត្ត​ស៊ី​សាកេត​បាន​ប្រកាស​ថា​ សំណុំ​រឿង​នេះ​នឹង​យក​មក​ជំនុំ​ជម្រះ​សារ​ជាថ្មី​ម្តង​ទៀត​នៅ​ថ្ងៃ​ទី​១៥​ខែ​សីហា​ខាង​មុខ​នេះ​ដោយ​សារ​តែ​គ្មាន​ភស្តុតាង​គ្រប់​គ្រាន់​ក្នុង​ការ​ចោទ​ប្រកាន់​ទៅលើ​ជន​ជាប់​ចោទ។

«ខាង​លោក​អ៊ីង គឹម​ថៃ​បាន​​បដិសេធ។ ​ហើយ​ខាង​លោក​មេធាវី​យើង​គាត់​បាន​បដិសេធ​ដែរ​ ព្រោះ​រាល់​ការ​ចោទ​ប្រកាន់​គ្រាន់​តែ​វាមាន​ជា​ឯកសារ​ ក៏ប៉ុន្តែ​រូប​ទិដ្ឋ​ភាព​និង​ភស្តុតាង​ជាក់​ស្តែង​វា​អត់​មាន»។

លោកអ៊ីង គឹមថៃ​អាយុ​៤៦​ឆ្នាំ​ត្រូវ​បាន​អាជ្ញាធរ​ថៃ​ចាប់​ខ្លួន​កាល​ពី​ថ្ងៃ​ទី​៧​ខែ​មិថុនា​កន្លង​ទៅ​នេះ​នៅ​ស្រុក​ត្រពាំង​ប្រាសាទ​ ខេត្ត​ស៊ីសាកេត​ ប្រទេស​ថៃ​ជាមួយ​និង​ពលរដ្ឋ​ថៃ​មួយ​រូប​និង​ជន​ជាតិ​វៀតណាម​មួយ​រូប​ទៀត។

អាជ្ញាធរ​ថៃ​បាន​ចោទ​ប្រកាន់​ថា​ ពួក​គេ​មាន​បំណង​ចូល​ទី​តាំង​បន្ទាយ​យោធា​ថៃ​​ដោយ​ខុស​ច្បាប់​និង​ធ្វើ​ចារកម្ម។

នៅ​ក្នុង​បន្ទប់​សវនាការ ​លោកអ៊ីង គឹមថៃ​ត្រូវ​បាន​លោក​នេត សេរី​ដកស្រង់​សម្តី​មក​អះអាង​ថា​ លោក​មិន​បាន​ធ្វើ​សកម្មភាព​ចារកម្ម​ទេ​ ហើយ​លោក​មក​ប្រទេស​ថៃ​ក្នុង​នាម​ជា​អ្នក​ទេសចរណ៍​តែ​ប៉ុណ្ណោះ។

លោក​នេត សេរី​បាន​បញ្ជាក់​ទៀត​ថា​ នៅ​ពេល​បើក​សវនាការ ​តុលាការ​គ្មាន​ភស្តុតាង​ណាមួយ​ដាក់​បន្ទុក​ទៅ​លើ​ជន​ជាប់​ចោទ​ទេ។

លោក​ Panitan Watanayagorn ​អ្នក​នាំពាក្យ​រដ្ឋា​ភិបាល​ចាំផ្ទះ​ក្រុង​បាងកក​ ប្រទេស​ថៃ​មិន​បាន​ធ្វើ​អត្ថាធិប្បាយ​ទេ ​ដោយ​លោក​បាន​អះអាង​ថា​ កំពុង​ជាប់​រវល់​ប្រជុំ។​ ចំណែក​ឯ​មន្ត្រី​ស្ថានទូត​ថៃ​ប្រចាំ​ប្រទេស​កម្ពុជា​មួយ​រូប​ ដែល​​សុំ​មិន​បញ្ចេញ​ឈ្មោះ ​បាន​និយាយ​ថា​ រដ្ឋា​ភិបាល​មិន​អាច​ជ្រៀតជ្រែក​កិច្ចការ​ផ្ទៃ​ក្នុង​របស់​តុលាការ​បាន​ទេ។​ ទោះ​ជា​យ៉ាង​ណា​ក៏​ដោយ​ ក៏​លោក​បាន​មាន​ប្រសាសន៍​ថា​ លោក​មិន​មាន​ព័ត៌មាន​គ្រប់​គ្រាន់​ជុំវិញ​ករណី​កាត់​ទោស​ជន​សង្ស័យ​ទាំង​បី​នាក់​នេះ​ទេ។

លោក​កុយ គួង​ អ្នក​នាំពាក្យ​ក្រសួង​ការ​បរទេស​កម្ពុជា​ បាន​បញ្ជាក់ថា​ ការ​ចោទ​ប្រកាន់​ទាំង​ពីរ​ករណី​របស់​តុលាការ​ថៃ​គ្រាន់​តែ​ជា​លេស​ដើម្បី​ដោះដូរ​ទណ្ឌិត​ថៃ​ពីរ​រូប​ដែល​កំពុង​ស្ថិត​ក្នុង​ពន្ធនាគារ​ព្រៃស​របស់​កម្ពុជា​តែ​ប៉ុណ្ណោះ។

«គេ​រក​ភស្តុតាង​អត់​មិនបាន​សម្រាប់​ការ​ឃុំខ្លួន​បណ្ណោះ​អាសន្ន​ទៅ​លើ​ពលរដ្ឋ​យើង​ចំនួន​ជាង​៤០​ថ្ងៃ​ហើយ​នោះ​ទេ។ ​គេ​រក​មិន​ឃើញ​ បែរ​ជា​គេ​ថា ​លើក​ពេល​ទៅ​ថ្ងៃ​ទី​១៥​ខែ​សីហា​វិញ ​ដើម្បី​បង្ហាញ​ភស្តុតាង។ ​នេះ​គឺ​ជា​រយៈ​ពេល​ដើម្បី​គេ​ខិត​ខំ​ប្រឌិត​ភស្តុតាង​តែ​ប៉ុណ្ណោះ​ បាទ»។

កាល​ពី​ខែ​កុម្ភៈ ​តុលាការ​ក្រុង​ភ្នំពេញ​បាន​កាត់​ទោស​ជនជាតិ​ថៃ​ពីរ​រូប​គឺ​លោក​ Veera Somkhwamkid ​ឲ្យ​ជាប់​ពន្ធនាគា​រចំនួន​៨​ឆ្នាំ​និង​អ្នក​ស្រី​ Ratree Pipatanapaiboon ​ឲ្យ​ជាប់​ពន្ធនាគារ​ចំនួន​៦​ឆ្នាំ ​ពី​បទ​ធ្វើ​ចារកម្ម​ក្នុង​ទឹក​ដី​កម្ពុជា។

លោក ​Abhisit Vejjajiva​ នាយក​រដ្ឋ​មន្ត្រី​ថៃ​ធ្លាប់​បាន​អះអាង​ថា​ ពលរដ្ឋ​កម្ពុជា​ដែល​សង្ស័យ​ពី​បទ​ធ្វើ​ចារកម្ម​ក្នុង​ប្រទេស​ថៃ​ អាច​ជា​ថ្នូរ​នឹង​ពលរដ្ឋ​ថៃ​ពីរ​រូប​ដែល​កំពុង​ជាប់​ពន្ធនាគារ​ក្នុង​ប្រទេស​កម្ពុជា​ពី​បទ​ចារកម្ម។

លោក​កុយ គួង​បាន​បញ្ជាក់​ថា​ ជំហរ​របស់​កម្ពុជា​មិន​អាច​ធ្វើ​ការ​ដោះ​ដូរ​ពលរដ្ឋ​រង​គ្រោះ​កម្ពុជា​ជា​មួយ​នឹង​ទណ្ឌិត​របស់​ថៃ​បាន​ទេ៕

This posting includes an audio/video/photo media file: Download Now

សេដ្ឋកិច្ច​កម្ពុជា​មិនទាន់​បាន​ឡើង​ដល់​កម្រិត​របស់​អាស៊ាន

Posted: 27 Jul 2011 03:31 PM PDT

ក្រុម​មន្ត្រី​សេដ្ឋកិច្ច​កម្ពុជា​បាន​ថ្លែង​នៅ​ថ្ងៃ​ពុធ​នេះ​ថា​ សេដ្ឋកិច្ច​របស់​ប្រទេស​កម្ពុជា​កំពុង​ដើរ​តាម​ពី​ក្រោយ​សេដ្ឋកិច្ច​របស់​បណ្តា​ប្រទេស​អាស៊ាន​ដទៃ​ទៀត​ ដែល​ធ្វើ​ឱ្យ​សេដ្ឋ​កិច្ច​កម្ពុជា​ពិបាក​ធ្វើ​ឱ្យ​ប្រសើរ​ឡើង​ដល់​កម្រិត​របស់​អាស៊ាន។

សមាជិក​រដ្ឋសភា​ ព្រឹទ្ធសភា​ មន្ត្រី​រដ្ឋាភិបាល​ អង្គការ​មិនមែន​រដ្ឋាភិបាល​ និង​តំណាង​ប្រទេស​អាស៊ាន​ប្រមាណ​២០០​នាក់​បាន​ចូលរួម​នៅ​ក្នុង​សិក្ខាសាលា​ស្តីពី​សេដ្ឋកិច្ច​ក្នុង​តំបន់​អាស៊ាន​ ដែល​ជា​កិច្ចប្រជុំ​នៅ​ក្នុង​ទីក្រុង​ភ្នំពេញ​ ដើម្បី​ជំរុញ​សមាហរណ​កម្ម​សេដ្ឋកិច្ច​អាស៊ាន​នៅ​ឆ្នាំ​២០១៥។

លោក​ហង្ស​ ជួនណារ៉ុន​ រដ្ឋលេខាធិការ​ក្រសួង​សេដ្ឋកិច្ច​ និង​ហិរញ្ញវត្ថុ​ បាន​ថ្លែង​នៅ​ក្នុង​សិក្ខាសាលា​ស្តីពី​សេដ្ឋកិច្ច​ក្នុង​តំបន់​អាស៊ាន​នេះ​ថា​ អតិផរណា​របស់​ប្រទេស​កម្ពុជា​មាន​ការកើន​ឡើង​ដល់​៦,៥​ភាគរយ​នៅ​ក្នុង​ខែ​មិថុនា​ ហើយ​ការកើន​ឡើង​នេះ​ជា​មូលហតុ​ដ៏​សំខាន់​ដែល​ធ្វើ​ឱ្យ​កំណើន​សេដ្ឋកិច្ច​មាន​ការធ្លាក់​ចុះ​ ដោយសារ​កត្តា​សេដ្ឋកិច្ច និង​បំណុល​​អាមេរិក។

លោក​ហង្ស​ ជួនណារ៉ុន​បានបញ្ជាក់​ថា​ សេដ្ឋកិច្ច​កម្ពុជា​បានផ្តល់​ប្រាក់​ចំណូល​ប្រចាំ​ឆ្នាំ​សម្រាប់​មនុស្ស​ម្នាក់ៗ​គឺ​ទាប​ជាង​បណ្តា​ប្រទេស​អាស៊ាន​ លើក​លែង​តែ​ប្រទេស​ភូមា។

លោក​ហង្ស​ ជួនណារ៉ុន​បាន​ថ្លែង​ថា ​ប្រជា​ពលរដ្ឋ​ខ្មែរ​ម្នាក់​មាន​ប្រាក់​ចំណូល​ជា​មធ្យម​៨៣០​ដុល្លារ​អាមេរិក​ក្នុង​មួយ​ឆ្នាំ។​ ប៉ុន្តែ​ប្រទេស​សិង្ហបុរី​ ដែល​មាន​សេដ្ឋកិច្ច​រីក​ចម្រើន​ជាង​គេ​ មាន​ប្រាក់​ចំណូល​ប្រចាំ​ឆ្នាំ​ជា​មធ្យម​ជាង​៣៥.០០០​ដុល្លារ​សម្រាប់​មនុស្ស​ម្នាក់ៗ​ក្នុង​មួយ​ឆ្នាំ​ ប្រទេស​ប៊្រុយណេ​មាន​ប្រហាក់ប្រហែល​នឹង​ប្រទេស​សិង្ហបុរី​ ប្រទេស​ម៉ាឡេស៊ី​ជិត​១០.០០០​ដុល្លារ​​ ប្រទេស​ថៃ​៤.០០០​ដុល្លារ​​ ប្រទេស​វៀតណាម​១.២០០​ដុល្លារ​ និង​ប្រទេស​ភូមា​៤០០​ដុល្លារ។

លោក​ញ៉ែម​ ប៉ុញ្ញឫទ្ធិ​ អគ្គ​លេខាធិការ​គណបក្ស​សិទ្ធិ​មនុស្ស​ដែល​បាន​ចូល​រួម​នៅ​ក្នុង​សិក្ខាសាលា​នេះ​ បានថ្លែង​ថា​ លោក​មាន​ការ​ព្រួយ​បារម្ភ​អំពី​ដំណើរការ​សេដ្ឋកិច្ច​កម្ពុជា​ដែល​ដើរ​ក្រោយ​ប្រទេស​អាស៊ាន​មួយ​ចំនួន។

«ការ​លើក​ទឹកចិត្ត​ក្នុង​ការ​ផលិត​ និង​ការ​ទិញ​ទំនិញ​នៅ​ក្នុង​ផលិតផល​ក្នុង​ស្រុក​មាន​ការ​ខ្វះខាត​ និង​មាន​តិចតួច​មែន​ទែន។​ របស់​របរ​ប្រើប្រាស់​គ្រប់​បែប​យ៉ាង ​ទាំង​អស់​ គឺ​នាំ​ចូល។​ ទាំង​អស់​នេះ​ហើយ​ដែល​ធ្វើ​ឱ្យ​កំណើន​សេដ្ឋកិច្ច​ និង​ការ​រីកចម្រើន​ខាង​ផ្នែក​សេដ្ឋកិច្ច​របស់​ប្រទេស​យើង​មាន​ការយឺតយ៉ាវ​ បើ​ប្រៀប​ធៀប​នឹង​ប្រទេស​ដទៃ​ (ក្នុង​សមាគម​អាស៊ាន)​ គឺ​(សេដ្ឋកិច្ច​កម្ពុជា)​ នៅ​យឺត​ជាង​គេ​មែន​ទែន»។

លោក​ច័ន្ទ​ សុផល​ ប្រធាន​សមាគម​សេដ្ឋកិច្ច​កម្ពុជា​ បានថ្លែង​នៅ​ក្នុង​សិក្ខាសាលា​នេះ​ថា​ សេដ្ឋកិច្ច​កម្ពុជា​ត្រូវ​រត់​ដេញ​តាម​សេដ្ឋកិច្ច​របស់​បណ្តា​ប្រទេស​អាស៊ាន​យ៉ាង​ខ្លាំង​ ហើយ​ប្រាក់​ចំណូល​ប្រចាំ​ឆ្នាំ​សម្រាប់​មនុស្ស​ម្នាក់​នៅ​កម្ពុជា​បាន​ឈ្នះ​ប្រទេស​ភូមា​ ប៉ុន្តែ​បាន​នៅ​ពី​ក្រោយ​បណ្តា​ប្រទេស​អាស៊ាន​ប្រាំ​បី​ទៀត។

«សេដ្ឋកិច្ច​កម្ពុជា​យើង​នៅ​ក្នុង​អាស៊ាន​ទាំង​ដប់​ប្រទេស​នេះ​គ្រាន់​បើ​ជាង​ប្រទេស​ភូមា។​ យើង​ហាក់​ដូច​ជា​ប្រហាក់​ប្រហែល​ជាមួយ​នឹង​ប្រទេស​ឡាវ។​ យើង​នៅ​ក្រោយ​ប្រទេស​វៀតណាម​ និង​ប្រទេស​ដទៃ​ទៀត»។

លោក​ច័ន្ទ​ សុផល​បាន​បន្ថែម​ថា​ បណ្តា​ប្រទេស​អាស៊ាន​មាន​ការ​ខំ​ប្រឹងប្រែង​ទាំង​អស់​គ្នា​ ដើម្បី​ឱ្យ​មាន​ភាព​ប្រហាក់​ប្រហែល​គ្នា​ក្នុង​ការ​អភិវឌ្ឍ​ ប៉ុន្តែ​ប្រទេស​កម្ពុជា​មាន​សង្គ្រាម​ជា​ច្រើន​ឆ្នាំ​ដែល​ធ្វើ​ឱ្យ​កម្ពុជា​ដាច់​ឆ្ងាយ​ពី​ប្រទេស​ជិត​ខាង​ជា​ច្រើន។

«ទាល់​តែ​យើង​​ខិត​ខំ​ប្រឹង​ប្រែង​ជំរុញ​សេដ្ឋកិច្ច​ឱ្យ​បាន​រីក​លូត​លាស់​ក្នុង​អត្រា​ខ្ពស់​គឺ​មិនមែន​អត្រា​ត្រឹម​តែ​៥​ភាគរយ​ ៦​ភាគរយ​ និង​៧​ភាគរយ​ទេ​ ទាល់​តែ​ជុំវិញ​៩​ភាគរយ​ទៅ​១០​ភាគរយ​ ទើប​យើង​អាច​ងាយ​ទៅ​ក្បែរៗ​ប្រទេស​មួយ​ចំនួន​នៅ​ជុំវិញ​យើង»។

វិទ្យាស្ថាន​សេដ្ឋកិច្ច​កម្ពុជា​បាន​ព្យាករ​ថា​​កំណើន​សេដ្ឋកិច្ច​កម្ពុជា​ឆ្នាំ​២០១១​នេះ​នឹង​កើន​ឡើង​ដល់​៨,៧​ភាគរយ​ ប៉ុន្តែ​ធនាគារ​ពិភពលោក​ធ្លាប់​បាន​ព្យាករ​ថា​​ កំណើន​សេដ្ឋកិច្ច​កម្ពុជា​នឹង​កើន​ឡើង​ដល់​៦,៧​ភាគរយ​នៅ​ក្នុង​ឆ្នាំ​២០១១​នេះ៕

This posting includes an audio/video/photo media file: Download Now

Leave a Reply

If you have some guts to join or have any secret to share, you can get it published directly to this blog by using this address meaning once you send your article to this email, it will soon appear in this blog after verifying that it is not just spam!