VOA News: ព័ត៌មាន: “ស្រី្តលក់ស្រាបៀរអង្គរដែលធ្វើកូដកម្មអាចបាត់បង់ការងារធ្វើ” plus 3 more |
- ស្រី្តលក់ស្រាបៀរអង្គរដែលធ្វើកូដកម្មអាចបាត់បង់ការងារធ្វើ
- សហចៅក្រមសាលាក្តីខ្មែរក្រហមថាសំណុំរឿង០០៣និង០០៤នឹងមិនត្រូវទាត់ចោលទេ
- ព័ត៌មានអន្តរជាតិសង្ខេប៖ ២៧ កក្កដា
- កម្មករកាត់ដេររត់ចេញពីរោងចក្រពេលឃើញសហការីសន្លប់ជាច្រើន
| ស្រី្តលក់ស្រាបៀរអង្គរដែលធ្វើកូដកម្មអាចបាត់បង់ការងារធ្វើ Posted: 27 Jul 2011 02:56 PM PDT ស្រ្តីបម្រើស្រាបៀរអង្គរចំនួន៣៤នាក់បានសម្តែងការព្រួយបារម្ភថា ពួកគេអាចប្រឈមមុខនឹងការបាត់បង់ការងារធ្វើ បន្ទាប់ពីពួកគេបានធ្វើកូដកម្មតវ៉ាចំនួនបីថ្ងៃដើម្បីទាមទារឲ្យក្រុមហ៊ុនស្រាបៀរអង្គរគោរពសេចក្តីសម្រេចរបស់ក្រុមប្រឹក្សាអាជ្ញាកណ្តាល។ កាលពីថ្ងៃទី៧ខែវិច្ឆិកាកន្លងទៅនេះ ក្រុមប្រឹក្សាអាជ្ញាកណ្តាលបានចេញសេចក្តីសម្រេចឲ្យក្រុមហ៊ុនស្រាបៀរអង្គរផ្តល់ប្រាក់បន្ថែមចំនួនពីរដុល្លារដល់ស្រ្តីផ្សព្វផ្សាយស្រាបៀរអង្គរចំនួន៣៤នាក់ដែលបានធ្វើការងារបន្ថែមម៉ោងនៅថ្ងៃសៅរ៍និងថ្ងៃអាទិត្យចាប់ពីខែវិច្ឆិកាឆ្នាំ២០០៧រហូតដល់ខែធ្នូឆ្នាំ២០១០។ បន្ទាប់ពីក្រុមហ៊ុនស្រាបៀរអង្គរពុំបានគោរពតាមសេចក្តីសម្រេចរបស់ក្រុមប្រឹក្សាអាជ្ញាកណ្តាល ស្រី្តផ្សព្វផ្សាយស្រាបៀរអង្គរចំនួន៣៤នាក់បានប្រមូលផ្តុំគ្នាតវ៉ានៅពីមុខក្រុមហ៊ុនស្រាបៀរអង្គរដែលមានទីតាំងនៅតាមបណ្តោយផ្លូវនរោត្តមអស់ចំនួនបីថ្ងៃមកហើយ។ អ្នកស្រីស៊ីម ផាន អាយុ២៨ឆ្នាំ ស្រ្តីបម្រើស្រាបៀរអង្គរ ដែលបានបម្រើការងារនេះអស់រយៈពេល៨ឆ្នាំមកហើយនោះ បានមានប្រសាសន៍ថា ស្រ្តីបម្រើស្រាបៀរចង់ឲ្យក្រុមហ៊ុនស្រាបៀរអង្គរគោរពទៅតាមសេចក្តីសម្រេចនេះ។ អ្នកស្រីបានមានប្រសាសន៍ទៀតថា ក្រុមហ៊ុនបានផ្តល់ប្រាក់តែពីរដុល្លារតែប៉ុណ្ណោះនៃប្រាក់ចំនួនបួនដុល្លារសម្រាប់ថ្លៃធ្វើការបន្ថែមម៉ោង។ «គោលបំណងពួកខ្ញុំតវ៉ារឿងប្រាក់ចុងសប្តាហ៍ពួកខ្ញុំ តែកន្លងមកក្រុមហ៊ុនអត់ទូទាត់ដល់ពួកខ្ញុំគ្រប់ចំនួនទេ។ គេឲ្យពួកខ្ញុំតែ២ដុល្លារ បើតាមច្បាប់ការងារ ពួកខ្ញុំត្រូវបាន៤ដុល្លារ»។ ចំណែកអ្នកស្រីដាំ ចំរ៉ុង អាយុ៣៤ឆ្នាំស្រ្តីផ្សព្វផ្សាយស្រាបៀរអង្គរមួយរូបផ្សេងទៀតបាននិយាយថា ក្រុមហ៊ុនស្រាបៀរអង្គរត្រូវផ្តល់លុយឲ្យពួកគេចំនួនជាង៤០០ដុល្លារក្នុងម្នាក់ៗ ដោយគិតចាប់ពីឆ្នាំ២០០៧រហូតដល់ឆ្នាំ២០១០។ អ្នកស្រីបានមានប្រសាសន៍ទៀតថា បន្ទាប់ពីមានការទាមទារប្រាក់ម៉ោងបន្ថែម ក្រុមហ៊ុនស្រាបៀរអង្គរបានព្រមានពួកគេទាំង៣៤នាក់ថា អាចប្រឈមមុខនឹងការបាត់បង់ការងារធ្វើ។ «វាប៉ះពាល់ច្រើន កាលណាខ្ញុំនៅធ្វើកូដកម្ម។ ខ្ញុំអត់បានធ្វើការ។ ទី១ក្រុមហ៊ុនវាយកលេសថា ជូនកាលយើងធ្វើកូដកម្មអត់បានផ្តល់ព័ត៌មាន និងអត់សុំច្បាប់គេ។គេអាចបញ្ឈប់យើងដោយមិនបាច់គិតលុយឲ្យយើង»។ វីអូអេព្យាយាមទាក់ទងអ្នកស្រីសូ យ៉ារី ប្រធានផ្នែកគ្រប់គ្រងស្ត្រីផ្សព្វផ្សាយស្រាបៀរអង្គរដើម្បីសុំការបំភ្លឺ តែពុំអាចទាក់ទងបានទេ។ លោកអ៊ី សំភី ប្រធានផ្នែកបណ្តុះបណ្តាលនិងទំនាក់ទំនងរបស់មូលនិធិក្រុមប្រឹក្សាអាជ្ញាកណ្តាល បានមានប្រសាសន៍ថា ប្រសិនបើភាគីទាំងសងខាងមិនយល់ស្របនឹងសេចក្តីសម្រេចរបស់ក្រុមប្រឹក្សាអាជ្ញាកណ្តាលទេ ពួកគេអាចប្តឹងទៅតុលាការប្រឆាំងជំទាស់ទៅនឹងសេចក្តីសម្រេចនេះ។ «អញ្ចឹងបានន័យថា នីតិវិធីរបស់ក្រុមប្រឹក្សាអាជ្ញាកណ្តាលចប់ ភាគីអាចចាត់វិធានការតាមច្បាប់តទៅទៀត។ ហើយវិធានការតាមច្បាប់តទៅទៀតហ្នឹងគឺទី១អាចថា ប្តឹងទៅតុលាការដើម្បីឲ្យតុលាការគាត់សម្រេចតទៅទៀត»។ លោកអ៊ី សំភីបានមានប្រសាសន៍ទៀតថា ការធ្វើកូដកម្មដើម្បីប្រឆាំងជំទាស់គឺជាការត្រឹមត្រូវទៅតាមនីតិវិធីដែលច្បាប់បានកំណត់ ហើយភាគច្រើននៃការធ្វើកូដកម្មនេះអាចមានការសម្របសម្រួលរវាងនិយោជិកនិងនិយោជក៕ This posting includes an audio/video/photo media file: Download Now |
| សហចៅក្រមសាលាក្តីខ្មែរក្រហមថាសំណុំរឿង០០៣និង០០៤នឹងមិនត្រូវទាត់ចោលទេ Posted: 27 Jul 2011 02:16 PM PDT បន្ទាប់ពីមានការព្រួយបារម្ភ និងការរិះគន់ជាខ្លាំងទៅលើការស៊ើបអង្កេតរបស់ក្រុមចៅក្រមលើសំណុំរឿងពីរចុងក្រោយគឺសំណុំរឿង០០៣ និងសំណុំរឿង០០៤ លោក ស៊ីហ្វ្រ៊ីត ប៊្លុង (Siegfried Blunk) សហចៅក្រមបរទេស បានអះអាងថា សំណុំរឿងទាំងពីរនេះនឹងមិនត្រូវទាត់ចោលនោះទេ។ លោកប៊្លុងបានថ្លែងយ៉ាងដូច្នេះនៅក្នុងបទសម្ភាសន៍ផ្ដាច់មុខជាមួយ វីអូអេសំឡេងសហរដ្ឋអាមេរិកជាខេមរភាសាកាលពីថ្ងៃពុធទី២០ខែកក្កដា នាសប្ដាហ៍កន្លងទៅនេះ។ លោកសហចៅក្រមស៊ើបអង្កេតស៊ីកហ្រ្វ៊ីតប៊្លុងមានសាសន៍ថា ការស៊ើបអង្កេតសំណុំរឿង០០៤ ដែលជាសំណុំរឿងចុងក្រោយ កំពុងតែបន្ដ។ តទៅនេះគឺបទសម្ភាសន៍ទាំងស្រុងរវាងលោក គង់ សុឋានរិទ្ធ ជាមួយលោក Siegfried Blunk៖ វីអូអេ៖ លោកចៅក្រម Siegfried Blunk តើលោកអាចពន្យល់បានដូចម្ដេចអំពីការរីកចម្រើនរបស់សំណុំរឿងបន្ថែម ០០៣ និងសំណុំរឿង០០៤? Blunk៖ «ក្នុងសំណុំរឿង០០៣ ដែលឈ្មោះរបស់ជនសង្ស័យកំពុងស្ថិតក្នុងភាពសម្ងាត់នៅឡើយ សហចៅក្រមស៊ើបអង្កេតក៏បានផ្ដោតការយកចិត្តទុកដាក់លើចំណោទដែលថា តើជនជាប់សង្ស័យស្ថិតក្នុងចំណោមអ្នកទទួលខុសត្រូវជាន់ខ្ពស់បំផុតនៃឧក្រិដ្ឋកម្មក្នុងរបបខ្មែរក្រហមឬយ៉ាងណា ពីព្រោះថា មានតែលក្ខខណ្ឌ«អ្នកទទួលខុសត្រូវខ្ពស់បំផុតទេ»ដែលសាលាក្ដីខ្មែរក្រហមមានយុត្តាធិការគ្របដណ្តប់លើពួកគេ។ ឥឡូវនេះបន្ទាប់ពីសហចៅក្រមស៊ើបអង្កេតអះអាងពីការបិទបញ្ចប់ការស៊ើបអង្កេតក្នុងសំណុំរឿង០០៣ ពួកយើងបានបញ្ចប់ការស៊ើបអង្កេតក្នុងពេលនេះគឺស្របតាមច្បាប់របស់តុលាការ តែមិនមានន័យថា សំណុំរឿងនេះនៅទីបញ្ចប់នឹងត្រូវទាត់ចោលនោះទេ គឺមិនមែនដូច្នេះទេ។ ទាក់ទងទៅនឹងសំណុំរឿង០០៤វិញម្ដង ការិយាល័យសហចៅក្រមស៊ើបអង្កេតកំពុងស៊ើបអង្កេតសំណុំរឿងនេះយ៉ាងស្វាហាប់ ហើយក៏បានផ្តោតទៅលើសំណួរដែលថា តើជនសង្ស័យស្ថិតក្នុងចំណោមអ្នកទទួលខុសត្រូវខ្ពស់បំផុតឬយ៉ាងណា? ខ្លួនខ្ញុំផ្ទាល់បានធ្វើដំណើរទៅកាន់ខេត្តពោធិ៍សាត់ និងខេត្តតាកែវ និងទៅកាន់តំបន់ដាច់ស្រយាលរបស់ខេត្តបាត់ដំបង និងទៅកាន់ខេត្តក្រចេះ ដើម្បីធ្វើការសាកសួរសាក្សីគន្លឹះៗ សំខាន់ៗ។ នៅក្នុងចំណោមសាក្សីទាំងនោះក៏មានសមាជិកសភាផងដែរ។ ពួកគាត់បានថ្លែងអំណរគុណចំពោះការងារដ៏ល្អរបស់សាលាក្ដីខ្មែរក្រហម»។ វីអូអេ៖ តើនៅមានការខ្វែងគំនិតគ្នារវាងសហចៅក្រមស៊ើបអង្កេតអន្ដរជាតិ និងសហចៅក្រមស៊ើបអង្កេតជាតិដែរទេ? Blunk៖ «នៅពេលដែលខ្ញុំមកធ្វើការនៅការិយាល័យសហចៅក្រមស៊ើបអង្កេតកាលពីខែធ្នូ ឆ្នាំមុន ខ្ញុំមានការភ្ញាក់ផ្អើលចំពោះសមត្ថភាពខ្ពស់របស់បុគ្គលិកកម្ពុជាភាគច្រើន។ បុគ្គលិកកម្ពុជាខ្លះមានសញ្ញាប័ត្រច្បាប់មកពីប្រទេសបារាំង និងខ្លះទៀតពីប្រទេសអង់គ្លេស។ ដូច្នេះដើម្បីកុំឲ្យទេពកោសល្យទាំងនេះខាតបង់ ខ្ញុំបានបង្កើតក្រុមការងារចម្រុះមួយដែលមានសមាសភាពខាងអន្ដរជាតិនិងបុគ្គលិកកម្ពុជា។ ហើយការងារនេះទទួលបានជោគជ័យល្អណាស់។ ខ្ញុំក៏បញ្ជាក់ផងដែរថា ខ្ញុំមានទំនាក់ទំនងការងារល្អជាមួយសហចៅក្រមស៊ើបអង្កេតកម្ពុជាលោកយូ ប៊ុនឡេង ហើយយើងបានចាត់ដំណើរការនីតិវិធីដោយឈរលើស្មារតីសហប្រតិបត្តិការ»។ វីអូអេ៖ តើលោកយល់ថា សំណុំរឿង០០៣ និងសំណុំរឿង០០៤នឹងត្រូវបញ្ចប់សព្វគ្រប់នៅពេលណា? Blunk៖ «យោងតាមវិធានរបស់សាលាក្ដីខ្មែរក្រហម មានដំណាក់កាលជាច្រើនត្រូវបំពេញ មុននឹងសហចៅក្រមស៊ើបអង្កេតធ្វើសេចក្ដីសម្រេចជាចុងក្រោយ ដែលហៅថា ដីការដំណោះស្រាយ ឬដីកាបញ្ជូនរឿងទៅជំនុំជម្រះ។ នៅពេលនោះអាចមានលទ្ធភាពធ្វើការចោទប្រកាន់ ឬទាត់ចោលសំណុំរឿងទាំងពីរនេះ។ នៅក្នុងដំណាក់កាលនោះ ព្រះរាជាអាជ្ញាអាចចូលរួមក្នុងដំណើរការក្ដី ហើយវានឹងពឹងផ្អែកច្រើនលើសកម្មភាពរបស់សហព្រះរាជអាជ្ញា និងប្រតិកម្មរបស់សហព្រះរាជអាជ្ញា។ បច្ចុប្បន្ននេះនៅក្នុងសំណុំរឿង ០០៣ គឺគ្រាន់តែឈានដល់ដំណាក់កាលទីមួយនៃដំណាក់កាលនានាដែលត្រូវធ្វើតែប៉ុណ្ណោះ។ ហើយសំណុំរឿង០០៤ ដែលយើងកំពុងធ្វើការស៊ើបអង្កេតនៅឡើយនោះ ពេលវេលានៃការបិទបញ្ចប់ការស៊ើបអង្កេតនឹងពឹងអាស្រ័យលើលទ្ធផលនៃការស៊ើបអង្កេត ដូចដែលខ្ញុំបានលើកឡើងអញ្ចឹង គឺវាកំពុងបន្ដដំណើរការនៅឡើយ៕ This posting includes an audio/video/photo media file: Download Now |
| ព័ត៌មានអន្តរជាតិសង្ខេប៖ ២៧ កក្កដា Posted: 26 Jul 2011 08:34 PM PDT ព័ត៌មានចុងក្រោយបំផុត៖ កម្ពុជា៖ ប្រទេសកម្ពុជាបានឱ្យដឹងថា បណ្តាញទូរទស្សន៍របស់ចិនមួយបានមកដល់ទីក្រុងភ្នំពេញដើម្បីធ្វើការចរចាស្តីពីការផលិតខ្សែភាពយន្តឯកសារមួយស្តីពីជីវិតរបស់លោកនាយករដ្ឋមន្រ្តី ហ៊ុន សែន។ ហ្វីលីពីន៖ យ៉ាងហោចណាស់មានមនុស្ស២០នាក់បានស្លាប់បាត់បង់ជីវិតនិង៩នាក់ផ្សេងទៀតបានបាត់ខ្លួនដោយសារខ្យល់ព្យុះត្រូពិចដ៏ខ្លាំងបោកបក់កាត់កោះ Luzon របស់ប្រទេសហ្វីលីពីនកាលពីថ្ងៃពុធ។ ចិន៖ ក្រសួងការពារជាតិរបស់ប្រទេសចិនបាននិយាយកាលពីថ្ងៃពុធថា នាវាដឹកយន្តហោះរបស់ចិនមួយត្រូវបានគេត្រៀមរៀបចំរួចរាល់ហើយដើម្បីធ្វើការសាកល្បងនៅក្នុងដែនសមុទ្រ ហើយវានឹងត្រូវប្រើសម្រាប់ការស្រាវជ្រាវវិទ្យាសាស្រ្ត ពិសោធន៍ និងហាត់ហ្វឹកហ្វឺន។ វៀតណាម៖ សហរដ្ឋអាមេរិកកំពុងអំពាវនាវឱ្យដោះលែងបព្វជិតដែលប្រឆាំងវៀតណាមមួយអង្គ ជាបន្ទាន់ដោយព្រះអង្គត្រូវបាននាំយកទៅដាក់ឃុំឃាំងវិញបើទោះបីជាមានបញ្ហាសុខភាពក៏ដោយ។ កូរ៉េខាងត្បូង/ជប៉ុន៖ លោក លី ម្យ៉ុងបាក់ ប្រធានាធិបតីកូរ៉េខាងត្បូងបាននិយាយថា សុវត្ថិភាពរបស់សមាជិកសភាជប៉ុនចំនួនបួននាក់នឹងមិនអាចធានាបានទេ ប្រសិនបើពូកគេនៅតែធ្វើដំណើរទស្សនកិច្ចទៅដែនកោះមួយដែលប្រទេសទាំងពីរទាមទារកម្មសិទ្ធិ។ អាហ្វហ្គានីស្ថាន៖ ការវាយប្រហារដោយគ្រាប់បែកអត្តឃាតមួយបានសម្លាប់លោកចៅហ្វាយក្រុងកាន់ដាហារ ដែលនៅភាគខាងជើងប្រទេសអាហ្វហ្គានីស្ថាន។ ន័រវែស៖ អាជ្ញាធរប៉ូលិសប្រទេសន័រវែសបានឱ្យដឹងថា វ៉ាលីសគួរឱ្យសង្ស័យមួយដែលគេរកឃើញនៅលើរថយន្តក្រុងនៅឯស្ថានីយ៍កណ្តាលទីក្រុងអូស្លូមិនបង្កឱ្យមានគ្រោះថ្នាក់អ្វីទេ។ អាហ្វ្រិក៖ អង្គការកម្មវិធីស្បៀងអាហារពិភពលោកគ្រោងនឹងចាប់ផ្តើមដឹកស្បៀងសង្គ្រោះបន្ទាន់នៅថ្ងៃពុធនេះទៅតំបន់អាហ្រ្វិកខាងកើតដែលកំពុងទទួលរងផលប៉ះពាល់ដោយគ្រោះរាំងស្ងួត។ ចិន៖ សារព័ត៌មានផ្លូវការរបស់ប្រទេសចិនបានរាយការណ៍ថា អាជ្ញាធរបានសង្គ្រោះកុមារ៨៩នាក់និងចាប់ខ្លួនជនសង្ស័យ៣៦៩នាក់នៅក្នុងការបង្ក្រាបក្រុមជនសង្ស័យជួញដូរមនុស្ស។ កូរ៉េខាងត្បូង៖ យ៉ាងហោចណាស់មានមនុស្សចំនួន១៨នាក់បានស្លាប់បាត់បង់ជីវិតក្រោយពីមានការបាក់ដីចំនួនពីរដងនៅថ្ងៃពុធនេះ ដែលបណ្តាលមកពីភ្លៀងដ៏ខ្លាំង។ សហរដ្ឋអាមេរិក៖ សេតវិមាននិងក្រុមសាធារណរដ្ឋក្នុងសភាតំណាងរាស្រ្តមានជំហរខុសគ្នាកាលពីថ្ងៃអង្គារ លើផែនការក្នុងការដំឡើងកម្រិតប្រាក់បំណុលរបស់សហរដ្ឋអាមេរិក ដែលនៅសល់ពេលតែមួយសប្តាហ៍មុនកាលកំណត់ចុងក្រោយនៅថ្ងៃទី២ខែសីហា។ ឥណ្ឌា/ប៉ាគីស្ថាន៖ នៅថ្ងៃពុធនេះរដ្ឋមន្រ្តីការបរទេសឥណ្ឌានិងប៉ាគីស្ថានបានអំពាវនាវឱ្យមានទំនាក់ទំនងប្រកបដោយកិច្ចសហប្រតិបត្តិការជាថ្មីឡើងវិញរវាងប្រទេសទាំងពីរ។ ការអំពាវនាវនេះកើតឡើងខណៈពេលដែលពួកគេបានជួបប្រជុំជាលើកដំបូងចាប់តាំងពីការចរចាបានចាប់ផ្តើមឡើងវិញកាលពីដើមឆ្នាំនេះ។ ស៊ីរី៖ ក្រុមសកម្មជនសិទ្ធិមនុស្សក្នុងប្រទេសស៊ីរីនិយាយថា កងកម្លាំងសន្តិសុខបានបាញ់សម្លាប់មនុស្សអស់យ៉ាងហោចណាស់៨នាក់ក្នុងពេលបង្រ្កាបនៅផ្នែកខាងត្បូងទីក្រុងដាម៉ាស។ អេហ្ស៊ីប៖ ក្រុមគ្រូពេទ្យអេហ្ស៊ីបនិយាយថាលោកហ៊ូស្នី មូបារ៉ាក់ អតីតមេដឹកនាំដែលត្រូវគេទម្លាក់ពីអំណាចមានសុខភាពខ្សោយ ហើយបដិសេធមិនព្រមទទួលទានអាហារ។ កូរ៉េខាងជើង៖ ប្រទេសកូរ៉េខាងជើងកំពុងអំពាវនាវឱ្យមានសន្ធិសញ្ញាសន្តិភាពជាផ្លូវការដើម្បីបញ្ចប់សង្គ្រាមកូរ៉េ។ ការអំពាវនាវនេះធ្វើឡើងខណៈពេលដែលក្រុមមន្រ្តីការទូតជាន់ខ្ពស់របស់កូរ៉េខាងជើងទស្សនកិច្ចសហរដ្ឋអាមេរិកដើម្បីពិភាក្សាពីកិច្ចខិតខំប្រឹងប្រែងចាប់ផ្តើមឡើងវិញនូវការចរចា៦ភាគីលើកម្មវិធីអាវុធបរិមាណូរបស់ទីក្រុងព្យុងយ៉ាង។ លីប៊ី៖ នាយករដ្ឋមន្រ្តីប្រទេសលីប៊ីនិយាយថា ការចាកចេញពីអំណាចរបស់លោក Moammar Gadhafi នឹងមិនត្រូវយកមកនិយាយក្នុងការពិភាក្សាទេ។ ចិន៖ មនុស្សជាច្រើនរយនាក់បានលើកបំបាស់រថយន្តនិងវាយដំមន្រ្តីប៉ូលិសក្នុងទីក្រុងនាភាគខាងត្បូងប្រទេសចិនក្រោយពីកងកម្លាំងសន្តិសុខបានវាយអ្នកលក់ដូរតាមចិញ្ចើមថ្នល់ម្នាក់រហូតដល់បាត់បង់ជីវិត។ អង់គ្លេស៖ ប្រទេសអង់គ្លេសបានបណ្តេញអ្នកការទូតទាំងអស់របស់របបលោកមូហាម៉ា ហ្កាដាហ្វីហើយទទួលស្គាល់ក្រុមប្រឹក្សាជាតិបណ្តោះអាសន្នថាជារដ្ឋាភិបាលស្របច្បាប់របស់ប្រទេសលីប៊ី។ <!--AV--> ព័ត៌មាននៅពេលមុននេះ៖ <!--IMAGE-->លីប៊ី៖ នាយករដ្ឋមន្ត្រីនៃប្រទេសលីប៊ីនិយាយថា ការចាកចេញពីតំណែងរបស់លោក Moammar Gadhafi មិនមែនជាបញ្ហាត្រូវលើកយកមកពិភាក្សាគ្នាទេ។ លោក Al-Baghdadi al-Mahmoudi ក៏បាននិយាយកាលពីថ្ងៃអង្គារដែរថានឹងគ្មានការសន្ទនាគ្នាអំពីវិបត្តិនយោបាយនៃប្រទេសលីប៊ីទេរហូតដល់ពេលណាដែលមានអ្វីដែលលោកហៅថាការបញ្ឈប់ «អំពើឈ្លានពាន» របស់អង្គការអូតង់។ បារ៉ែន៖ ប្រជារាស្ត្របារ៉ែនរាប់ពាន់នាក់បានធ្វើការប្រជុំមហាជនទាមទារឱ្យមានការកែទម្រង់ក្នុងប្រទេស ពេលដែលគណៈកម្មាធិការអន្តរជាតិមួយបង្កើតទ្បើងដោយព្រះរាជាបានចាប់ផ្តើមធ្វើការស៊ើបអង្កេតអំពីបាតុកម្មដឹកនាំដោយពួក Shi'ite និងការតបតដោយរដ្ឋាភិបាលដែលបានបណ្តាលឱ្យមនុស្សជាង៣០នាក់ស្លាប់។ ម៉ារ៉ុក៖ ប្រទេសម៉ារ៉ុកនិយាយថា មនុស្ស៧៨នាក់បានស្លាប់នៅពេលដែលយន្តហោះដឹកជញ្ជូនមួយគ្រឿងរបស់ក្រុមយោធាម៉ារ៉ុកបានធ្លាក់ក្នុងតំបន់ភ្នំមួយកាលពីថ្ងៃអង្គារ៍។ ន័រវែស៖ នៅក្នុងសន្និសីទកាសែតមួយក្នុងក្រុងអូស្លូលោក Geir Lippestad មេធាវី ការពារជនជាប់ចោទនិយាយថា Anders Behring Breivik មិនបានដឹងអំពីចំនួនមនុស្សស្លាប់ឬការឆ្លើយតបសាធារណៈដល់ការវាយប្រហារកាលពីថ្ងៃសុក្រ ដែលបាននាំឱ្យមនុស្ស៧៦នាក់ស្លាប់។ លោក Lippestad បាននិយាយប្រាប់ពួកអ្នកកាសែតថា ជាការឆាប់ពេកដែលនិយាយថា កូនក្តីលោកនឹងឆ្លើយតបថាខ្លួនមានជំងឺផ្លូវចិត្ត។ អាហ្វ្រិក៖ អង្គការកម្មវិធីស្បៀងអាហាររបស់អង្គការសហប្រជាជាតិនិយាយថា ការដឹកជញ្ជូនម្ហូបអាហារតាមយន្តហោះទៅកាន់តំបន់ស្នែងនៃទ្វីបអាហ្វ្រិកបានត្រូវលើកទៅថ្ងៃក្រោយ យ៉ាងហោចណាស់ថ្ងៃពុធ។ ការដឹកជញ្ជូនតាមយន្តហោះនេះមានកំណត់ចាប់ផ្តើមធ្វើនៅថ្ងៃអង្គារ៍ តែមន្ត្រីផ្នែកទំនាក់ទំនងម្នាក់របស់អង្គការនេះបាននិយាយប្រាប់វីអូអេថា បញ្ហាភ័ស្តុភាងក្នុងប្រទេសKenya បានបង្អាក់ការដឹកជញ្ជូនទាំងនេះ។ សហរដ្ឋអាមេរិក៖ លោកស្រី Christine Lagarde ប្រធាននៃអង្គការមូលនិធិរូបិយវត្ថុអន្តរជាតិបានមានប្រសាសន៍ថា ស.រ.អ.ត្រូវការដោះស្រាយឱ្យបានឆាប់រហ័សវិបត្តិកម្រិតប្រាក់បំណុលរបស់ផងខ្លួនពីព្រោះនឹងមាន «ផលវិបាកខ្លាំង» បើប្រទេសអាមេរិកមិនធ្វើដូច្នេះទេនោះ។ អ៊ីរ៉ង់៖ ទីភ្នាក់ងារព័ត៌មាន IRNAរបស់រដ្ឋនៃប្រទេសអ៊ីរ៉ង់បានផ្សាយកាលពីថ្ងៃអង្គារ៍ថាពួកជនសកម្មប្រយុទ្ធទាំងនេះបានត្រូវទ្បោមព័ទ្ធដោយកងកម្លាំងស្ម័គ្រចិត្តនៃពួកជនអម្បូរ Kurde ក្នុងប្រទេសអ៊ីរ៉ង់កាលពីយប់ថ្ងៃច័ន្ទនៅក្នុងខេត្ត Azarbaijan ខាងលិច។ This posting includes an audio/video/photo media file: Download Now |
| កម្មករកាត់ដេររត់ចេញពីរោងចក្រពេលឃើញសហការីសន្លប់ជាច្រើន Posted: 26 Jul 2011 04:37 PM PDT កម្មករកាត់ដេរជិត១០០នាក់បានសន្លប់នៅរោងចក្រ Hung Wah នៅភ្នំពេញ កាលពីថ្ងៃច័ន្ទ។ រថយន្តពេទ្យប្រហែល១០គ្រឿងបានព្យាបាលនិងដឹកកម្មករទៅមន្ទីរពេទ្យ។កម្មករដែលរត់ចេញពីរោងចក្រនិយាយថា គេមិនដឹងថា តើកម្មករឈឺ និងដួលសន្លប់មកពីហេតុអ្វីទេ តែពួកគេរហិតរហៃភ្លាមៗ ពេលឃើញសហការីដួលសន្លប់។ កម្មការិនី ឡាយ ណាគ្រី និយាយថា៖ «ឃើញគេអញ្ចឹងមានអារម្មណ៍ថា ភ័យ។ ដល់ពេលភ័យអញ្ចឹងទៅ ខ្ញុំស្រាលដៃ ស្រាលជើងខ្លួនឯង»។ រីឯកម្មការិនីស៊ុន ដាវណ្ណ បន្ថែមថា៖ «អត់អីទេ គ្រាន់តែទន់ដៃ ទន់ជើង។ ពេលគេជ្រួលច្របល់អញ្ចឹងទៅ ខ្ញុំភ័យ»។ <!--AV--> បញ្ហាកម្មករសន្លប់នៅរោងចក្រ Hung Wah ដែលផលិតខោអាវម៉ាក H&M មិនមែនជារឿងថ្មីទេ តែវាបង្ហាញពីករណីធ្វើការហួសកម្លាំង ដែលផ្តល់ប្រាក់ចំណូលដល់ប្រទេសមួយក្នុងចំណោមប្រទេសក្រីក្របំផុតនៅអាស៊ីនេះ។ ក្រុមហ៊ុនធំៗខ្លះបានស៊ើបអង្កេតការអះអាងរបស់អង្គការក្រៅរដ្ឋាភិបាលដែលថា មានកម្មករសន្លប់ជាង១.០០០នាក់នៅឆ្នាំនេះ ដោយសារធ្វើការយ៉ាងលំបាក និងច្រើនម៉ោងដើម្បីបានប្រាក់ខែដ៏ស្តួចស្តើង ចិញ្ចឹមពលរដ្ឋខ្មែរក្រីក្រច្រើនម៉ឺនគ្រួសារនៅជនបទ។ កំណើនកម្មករសន្លប់នៅឆ្នាំនេះបង្ហាញការធ្លាក់ចុះនូវលក្ខខណ្ឌការងារក្នុងវិស័យកាត់ដេរដែលមានកំណើន២៨% និងមានចំណូល៣ពាន់លានដុល្លារលើសឆ្នាំមុន ហើយដែលជាកម្លាំងញើសរបស់កម្មករក្នុងរោងចក្ររបស់ក្រុមហ៊ុនចិនដីគោក និងតៃវ៉ាន់។ វិស័យកាត់ដេរផ្តល់ចំណូលឲ្យកម្ពុជាច្រើនបំផុតទីបី បន្ទាប់ពីកសិកម្ម និងទេសចរណ៍ តែឧស្សាហកម្មនេះប្រឈមនឹងកូដកម្ម បាតុកម្មទាក់ទងនឹងលក្ខខណ្ឌការងារ និងប្រាក់ខែទាប ដែលបណ្តាលឲ្យមានការប៉ះទង្គិចរវាងកម្មករិនី និងប៉ូលិសប្រដាប់ដោយកាំភ្លើងនិងដំបងឆក់។ ក្នុងខែកញ្ញាកាលពីឆ្នាំទៅ មានកម្មករជាង២១០.០០០នាក់ក្នុងរោងចក្រចំនួន៩៥បានធ្វើកូដកម្មទាមទារដំឡើងប្រាក់ខែ និងលក្ខខណ្ឌការងារប្រសើរឡើង៕ ប្រែសម្រួលដោយ ពិន ស៊ីសុវណ្ណ This posting includes an audio/video/photo media file: Download Now |
| You are subscribed to email updates from VOA News: ព័ត៌មាន To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
