VOA News: ព័ត៌មាន: “តុលាការត្រៀមរៀបចំកាត់ទោសមេដឹកនាំខ្មែរក្រហមចាស់ៗ” plus 7 more |
- តុលាការត្រៀមរៀបចំកាត់ទោសមេដឹកនាំខ្មែរក្រហមចាស់ៗ
- មេបក្សប្រឆាំងមិនខ្វល់នឹងបណ្តឹងរបស់លោក ហោ ណាំហុងរឿងបរិហាកេរ្តិ៍
- សមាជិកសភាអាស៊ានស្វែងរកវិធីការពារពលករចំណាកស្រុក
- អគ្គីភ័យត្របាក់រោងចក្រមួយនៅភ្នំពេញ
- អ្នកជំនាញបារម្ភនឹងភាពគ្មានការចាប់អារម្មណ៍ចំពោះមុខវិជ្ជាវិទ្យាសាស្ត្រពិត
- អង្គការហ្រ្វ៊ីដឹម ហោស ថាមាត្រាមួយចំនួនក្នុងច្បាប់អង្គការក្រៅរដ្ឋាភិបាលមានបញ្ហា
- អ្នកស្រាវជ្រាវស្នើឱ្យកម្ពុជា និងថៃដកជម្លោះនយោបាយផ្ទៃក្នុងចេញពីរឿងវប្បធម៌
- រដ្ឋាភិបាលកម្ពុជាស៊ើបអង្កេតមជ្ឈមណ្ឌលកុមារកំព្រា
| តុលាការត្រៀមរៀបចំកាត់ទោសមេដឹកនាំខ្មែរក្រហមចាស់ៗ Posted: 05 Apr 2011 02:39 PM PDT បញ្ហាសុខភាពរបស់កូនក្ដីដែលមានវ័យកាន់តែចាស់ជរាបានក្លាយជាកង្វល់របស់ក្រុមមេធាវីការពារក្ដីសម្រាប់ការបើកសវនាការក្នុងសំណុំរឿង០០២ក្នុងរយៈពេលបីខែទៀតនេះ។ ក្រុមមេធាវីបានស្នើនៅក្នុងកិច្ចប្រជុំរៀបចំការកាត់ក្ដីក្នុងសំណុំរឿងនេះនៅថ្ងៃអង្គារនេះឲ្យសាលាក្ដីពិចារណាឲ្យបានជាក់លាក់ពីលទ្ធភាពក្នុងការចូលរួមសវនាការពេញលេញនៃកូនក្ដីរបស់ផងខ្លួន។ យ៉ាងហោចណាស់មានមេធាវីរបស់អតីតមេដឹកនាំខ្មែរក្រហមជាន់ខ្ពស់ខ្មែរក្រហមចំនួនបីក្រុមបានទាមទារឲ្យអង្គជំនុំជម្រះសាលាដំបូងរបស់សាលាក្តីខ្មែរក្រហមផ្តោតការយកចិត្តទុកដាក់ជាចម្បងទៅលើបញ្ហាសុខភាពរបស់កូនក្តីផងខ្លួនមុននឹងកំណត់កម្មវិធីបើកសវនាការនៅក្នុងសំណុំរឿង០០២ដែលគេគ្រោងបើកការជំនុំជម្រះនៅក្នុងអំឡុងខែមិថុនា ឆ្នាំនេះ។ ការទាមទារនេះ ធ្វើឡើងនៅក្នុងកិច្ចប្រជុំបិទទ្វារនៅថ្ងៃអង្គារនេះ នៅសាលាក្តីខ្មែរក្រហម ដើម្បីកំណត់ប្រតិទិនសម្រាប់ការកាត់ទោសជនជាប់ចោទដ៏មានសារៈសំខាន់ចំនួនបួននាក់នៅក្នុងសំណុំរឿងនេះ គឺ នួន ជា ខៀវ សំផន អៀង សារី និងអៀង ធីរិទ្ធ។ លោកសហមេធាវីសុន អារុណ ការពារក្តីឲ្យនួន ជា អតីតប្រធានសភាខ្មែរក្រហមមានប្រសាសន៍ថា ក្រុមមេធាវីការពារក្តីបានស្នើឲ្យអង្គជំនុំជម្រះសាលាដំបូងរកដំណោះស្រាយផ្តោតទៅលើបញ្ហាសុខភាពជនជាប់ចោទនៅពេលដែលមានបញ្ហានៅក្នុងអំឡុងពេលកំពុងដំណើរការសវនាការ។ «អ្នកកាត់ទោសទំាងប៉ុន្មាន សុទ្ធតែមនុស្សចាស់អស់ហើយ។ ហើយគាត់មានជំងឺញឹកញាប់ កាលណា ឡើងសវនាការទៅ ជួនកាលឈាមគាត់ឡើងលើជិត ២០ ទៅ២១ និង២២ អញ្ចឹងទៅ។ មានជំងឺអញ្ចឹងកើតឡើងខ្ញុំត្រូវធ្វើយ៉ាងម៉េច។ ខ្ញុំមេធាវីការពារនួន ជា ខ្ញុំលើករឿងនេះមកដាក់ សួរថាគេគិតយ៉ាងម៉េច។ គេថា ដំណោះស្រាយទីមួយកាត់ធម្មតាអញ្ចឹងទៅ កាលណាគាត់មិនស្រួល គេហៅថា Audio Conference»។ សូមបញ្ជាក់ថា ជនជាប់ចោទនួន ជា អាយុជិត៨៥ឆ្នាំទៅហើយមានបញ្ហាសុខភាពច្រើនផ្នែកសម្ពាធឈាមនិងបញ្ហាភ្នែក។ រីឯអៀង សារី អាយុជិត៨៦ឆ្នាំ មានបញ្ហាបេះដូង និងបញ្ហាឆ្អឹងខ្នង។ ចំណែកឯ ប្រពន្ធរបស់គាត់គឺអៀង ធីរិទ្ធ អាយុ៦៩ឆ្នាំត្រូវសហមេធាវីបញ្ជាក់ថា មានបញ្ហាផ្លូវចិត្ត ដែលធ្វើឲ្យគាត់មានស្មារតីមិននឹងនរពិបាកនៅក្នុងការពិភាក្សា។ចំណែកឯខៀវ សំផន ដែលហាក់បីដូចជានៅរឹងមាំជាងគេ អាយុជិត៨០ឆ្នាំទៅហើយ មានជំងឺម្តងម្កាលដែរ ។ ក្រុមមេធាវីបានស្នើឲ្យសាលាក្តីខ្មែរក្រហមផ្តល់គ្រូពេទ្យជំនាញផ្នែកមនុស្សចាស់ដើម្បីធ្វើការវាយតម្លៃទៅលើសម្បទារបស់ជនជាប់ចោទទាំងផ្នែកផ្លូវចិត្តនិងផ្លូវកាយ។ លោកផាត់ ពៅសៀង សហមេធាវីការពារក្តីឲ្យអៀង ធីរិទ្ធ បញ្ជាក់ថា ការកំណត់កាលបរិច្ឆេទបើកសវនការបានលុះត្រាតែបញ្ហាសុខភាពរបស់ជនជាប់ចោទត្រូវបានដោះស្រាយច្បាស់លាស់។ «ពេទ្យគេវាយតម្លៃហើយបានយើងអាចតវ៉ា តតាំងគ្នាអញ្ចឹងទៅ ហើយយើងដាក់ថ្ងៃសវនាការជាក់លាក់បាន»។ សូមបញ្ជាក់ថា អង្គជំនុំជម្រះសាលាដំបូងរបស់សាលាក្តីខ្មែរក្រហមគ្រោងនឹងបើកកិច្ចប្រជុំរយៈពេល បីថ្ងៃសម្រាប់រៀបចំបើកសវនការសំណុំរឿង០០២។ ក៏ប៉ុន្តែកិច្ចប្រជុំនេះបានចប់សព្វគ្រប់នៅក្នុងរយៈពេល ត្រឹមតែមួយថ្ងៃប៉ុណ្ណោះនៅថ្ងៃនេះ។ តាមគម្រោងដែលចូលរួមពិភាក្សាឲ្យគ្រប់ភាគី បានផ្តោតការជជែកលើមាត្រាចំនួនពីរនៃវិធានផ្ទៃក្នុងការទួលស្គាល់សហមេធាវីបរទេសការជជែកអំពីបណ្តឹងនិងការឆ្លើយតបបណ្តឹង ការផ្តោតទៅលើកម្មវិធីនៃការកាត់ទោសការកាត់បន្ថយចំនួនសាក្សី ការជំទាស់របស់ក្រុមមេធាវីការពារក្តីចំពោះការចោទប្រកាន់ជាដើម។ លោកសហមេធាវី Michela Pestment ការពារក្តីឲ្យអតីតរដ្ឋមន្រ្តីក្រសួងការបរទេសខ្មែរក្រហម អៀង សារី មានប្រសាសន៍ថា ជនជាប់ចោទមានបញ្ហាសុខភាពទាំងផ្លូវកាយ និងផ្លូវចិត្ត ហើយបញ្ហានេះត្រូវបាន ជជែកនៅក្នុងកិច្ចប្រជុំនេះ។ ហើយលោករំពឹងថា អង្គជំនុំជម្រះសាលាដំបូង នឹងផ្តល់ដំណោះស្រាយយ៉ាងត្រឹមត្រូវមួយ។ រីឯសហមេធាវីលោកស សាវ៉ាន ការពារក្តីឲ្យខៀវ សំផន អតីតប្រមុខរដ្ឋខ្មែរក្រហម មិនបានទាមទារឲ្យមានការដោះស្រាយអំពីបញ្ហាសុខភាពរបស់ជនជាប់ចោទនោះទេ។ក៏ប៉ុន្តែលោកស សាវ៉ាន បានសង្កត់ ធ្ងន់ទៅលើការអនុវត្តនៅក្នុងការកាត់ក្តីដោយអនុលោមទៅតាមប្រព័ន្ធ Common Law និង Civil Law ។ លោករាជ សម្បត្តិ ប្រធានផ្នែកទំនាក់ទំនងកិច្ចការសាធារណៈរបស់សាលាក្តីខ្មែរក្រហម មិនបានធ្វើអត្ថាធិប្បាយទៅលើខ្លឹមសារនៃការជជែកនៅក្នុងកិច្ចប្រជុំនៅថ្ងៃនេះទេ។ «កិច្ចប្រជុំបានបញ្ចប់ហើយ ការជជែកទៅលើអង្គហេតុ គឺយើងអត់និយាយទេអាហ្នឹង ពីព្រោះកិច្ចការ របស់ចៅក្រម»។ យ៉ាងណាក៏ដោយសហមេធាវីលោកផាត់ ពៅសៀង មានប្រសាសន៍ថា អង្គជំនុំជម្រះសាលាដំបូងនឹងលើកយកមកជជែកបន្ថែមទៀត នូវបញ្ហាគន្លឹះមួយចំនួនដូចជាបញ្ហាផ្លូវច្បាប់និងការជជែកអំពីបញ្ហាដែលទាក់ទងទៅនឹងការកាត់ទោសអៀង សារី ជាលើកទីពីរ បន្ទាប់ពីលោកអៀង សារី ត្រូវកាត់ទោសម្តងរួចទៅហើយដោយរបបរដ្ឋកម្ពុជានៅឆ្នាំ១៩៧៩៕ This posting includes an audio/video/photo media file: Download Now |
| មេបក្សប្រឆាំងមិនខ្វល់នឹងបណ្តឹងរបស់លោក ហោ ណាំហុងរឿងបរិហាកេរ្តិ៍ Posted: 05 Apr 2011 02:27 PM PDT ខណៈពេលដែលតុលាការក្រុងភ្នំពេញបើកសវនាការកាត់ក្តីលើករណីបរិហារកេរ្តិ៍តាមបណ្តឹងរបស់លោក ហោ ណាំហុងនោះ លោក សម រង្ស៊ី មេដឹកនាំគណបក្សប្រឆាំងបញ្ជាក់ថា លោកមិនអើពើនឹងបណ្តឹងនោះទេ។ លោកសម រង្ស៊ី បានថ្លែងប្រាប់VOA សំឡេងសហរដ្ឋអាមេរិកតាម រយៈទូរស័ព្ទពីប្រទេសបារំាងនៅថ្ងៃអង្គារថាគឺតុលាការកូនកាត់ខ្មែរនិងអង្គការសហប្រជាជាតិនឹងរកឃើញថាប្រវត្តិលោក ហោ ណាំហុងពិតប្រាកដនោះគឺយ៉ាងណា៖ «ខ្ញុំមិនចាប់អារម្មណ៍អ្វីទាល់តែសោះ។ ខ្ញុំជឿថាពេលគេសួរចម្លើយលោកអៀង សារី។ លោកអៀង សារី ច្បាស់ជា នឹងបញ្ជាក់ថា ក្នុងឋានៈគាត់ជាមេដឹកនាំកំពូលនៃរបបប៉ុលពត គាត់មានសហការីប៉ុន្មាននាក់។អញ្ចឹងរឿងលោកហោ ណាំហុងនេះគឺអាស្រ័យលើតុលាការកាត់ទោសមេដឹកនាំខ្មែរក្រហម នៅទីក្រុង ភ្នំពេញ»។ តុលាការក្រុងភ្នំពេញ កាលពីរសៀលថ្ងៃអង្គារ បានបើកសវនាការជំនុំជម្រះរវាងលោកសម រង្ស៊ី និងលោកហោ ណាំហុង ពាក់ព័ន្ធទៅនឹងបណ្តឹងបរិហាកេរ្តិ៍ និងផ្សព្វផ្សាយព័ត៌មានមិនពិត។ លោកហោ ណាំហុង បានដាក់ពាក្យបណ្តឹងមួយទៅតុលាការក្រុងភ្នំពេញ ប្តឹងលោកសម រង្ស៊ី ពីបទបរិហាកេរ្តិ៍និងផ្សព្វផ្សាយព័ត៌មានមិនពិត បន្ទាប់ពីលោកសម រង្ស៊ី បានធ្វើអត្ថាធិប្បាយមួយកាលពីថ្ងៃទី១៧ ខែមេសា ឆ្នាំ២០០៨ នៅវាលពិឃាដបឹងជើងឯក ក្នុងក្រុងភ្នំពេញដោយបានចោទប្រកាន់ថា លោកហោ ណំាហុង ជាប្រធានគុកបឹងត្របែកនៅក្នុងរបបកម្ពុជាប្រជាធិបតេយ្យ ហើយពាក្យសំដីរបស់លោកសម រង្ស៊ី ត្រូវ បានកាសែតក្នុងស្រុកមួយដែលគាំទ្រគណបក្សប្រឆាំងឈ្មោះមនសិការខ្មែរ បានដកស្រង់សំដីយកទៅចុះផ្សាយ។ បន្ទាប់ពីបានបើកសវនាការជំនុំជម្រះអស់រយៈពេលប្រមាណជិត៤០នាទីតែប៉ុណ្ណោះដោយគ្មានវត្តមានមេធាវីការពារក្តីជនជាប់ចោទនិងសាក្សីផងនោះលោកប្រធានចៅក្រមជំនុំជម្រះនៃតុលាការក្រុងភ្នំពេញ គឺលោកសេង នាង បានមានប្រសាសន៍ថា សាលក្រមចំពោះរឿងក្តីនេះនឹងត្រូវប្រកាសនៅថ្ងៃច័ន្ទសប្តាហ៍ក្រោយនេះ។ នៅក្នុងបន្ទប់សវនាការជំនុំជម្រះភាគីដើមបណ្តឹងរបស់លោកហោ ណាំហុង មានមេធាវីការពារក្តី លោកកា សាវុធ។ លោកកា សាវុធ បានមានប្រសាសន៍នៅក្នុងសវនាការថា យោងតាមសាក្សីចំនួនបីរូប បានអះអាងថា កូនក្តីរបស់លោកមិនមែនជាប្រធានគុកបឹងត្របែកទេ។ ហើយលោកហោ ណំាហុង គ្រាន់តែជាអ្នកទោសដូចប្រជាពលរដ្ឋខ្មែរដទៃៗផ្សេងទៀតដែរ។ លោកកា សាវុធ បានទាមទារឲ្យតុលាការផ្តន្ទាទោសលោកសម រង្ស៊ី ឲ្យបានធ្ងន់ធ្ងរបំផុតនិងទាមទារសំណងជម្ងឺចិត្តបន្ថែមទៀតចំនួន១០លានរៀលគឺស្មើនឹងជាង២.៥០០ដុល្លារសហរដ្ឋអាមេរិក។ លោកកា សាវុធ បានថ្លែងប្រាប់ក្រុមអ្នកកាសែតបន្ទាប់ពីបញ្ចប់សវនាការថា លោកមានជំនឿថាកូនក្តីរបស់លោក នឹងឈ្នះក្តី។ «ចំពោះសវនាការនេះ យើងជឿថាចៅក្រមមុខជានិងរកយុត្តិធម៌ត្រឹមត្រូវជូនឯកឧត្តមហោ ណាំ ហុង កុំឲ្យគាត់ចេះតែដើរប្រឌិតរឿងយកទៅផ្សាយការណ៍មិនពិតនោះ។ គាត់ចង់បានតែប៉ុណ្ណឹងទេ ចង់ធ្វើម៉េចឲ្យមនុស្សរាងកុំឲ្យចេះតែដើរនិយាយការណ៍មិនពិតតទៅទៀតតែប៉ុណ្ណឹងទេ»។ លោកជូង ជូងី មេធាវីការពារក្តីរបស់លោកសម រង្ស៊ី មិនបានចូលរួមនៅក្នុងបន្ទប់សវនាការរបស់តុលាការក្រុងភ្នំពេញទេ។ លោកជួង ជូងី បានមានប្រសាសន៍ថាកូនក្តីរបស់លោកមិនចាប់អារម្មណ៍ចំពោះសវនាការនេះទេដូច្នេះគ្មានប្រយោជន៍អ្វីសម្រាប់លោកចូលរួមនៅក្នុងសវនាការនៅថ្ងៃនេះទេ។ «ឯកឧត្តមសម រង្ស៊ី អត់ចាប់អារម្មណ៍លើករណីនេះទេ ពីព្រោះគាត់អត់មានជំនឿទៅលើការដោះស្រាយរបស់តុលាការ។ ហើយទីពីរ ខ្លួនខ្ញុំផ្ទាល់កាលណាកូនក្តីខ្ញុំអត់ចាប់អារម្មណ៍ឬក៏អត់មានជំនឿ ទៅលើតុលាការអញ្ចឹង។ តើខ្ញុំទៅការពារគាត់មានន័យអ្វី? អញ្ចឹងហើយបានជាខ្ញុំមិនទៅការពារ»។ លោកសម រង្ស៊ី ត្រូវបានតុលាការនៃប្រទេសបារាំង កាលពីខែមិថុនា ឆ្នាំ២០០៩ បានកាត់ទោសលោកឲ្យបង់ប្រាក់ពិន័យចំនួន១ អឺរ៉ូ គឺជាង១ដុល្លារសហរដ្ឋអាមេរិក បន្ទាប់ពីតុលាការបានរកឃើញថា លោកសម រង្ស៊ី ពិតជាបានបរិហារកេរ្តិ៍លោកហោ ណាំហុង ពាក់ព័ន្ធទៅ នឹងប្រធានគុកបឹងត្របែក។ លោកសម រង្ស៊ី បានមានប្រសាសន៍ថា ចំពោះរឿងក្តីនេះ លោក នឹងប្តឹងទៅតុលាការកំពូល និង តុលាការរបស់សហគមន៍អឺរ៉ុបបន្តទៀត ។ «រឿងនេះ មានការស្រពិចស្រពិលជាច្រើន ហើយគេក៏ជឿជាក់ថា ពេលណាតុលាការអន្តរជាតិ ដំណើរការ បានត្រឹមត្រូវ គឺពេលនោះយើង នឹងដឹងការណ៍ពិត។ ហើយពេលនោះ យើងនិងសន្និដ្ឋានបានយ៉ាងច្បាស់ថា នណាខ្លះ? ពាក់ព័ន្ធនៅក្រោមរបបខ្មែរក្រហមសម័យប៉ុលពត។ លោកសម រង្ស៊ី បានមានប្រសាសន៍ទៀតថា នៅខែឧសភា ឆ្នាំ២០១១នេះ តុលាការកំពូលរបស់ ប្រទេសបារាំង និងបើកសវនាការជំនុំជម្រះម្តងទៀតរវាងករណីលោកនិងលោកឧបនាយករដ្ឋមន្រ្តីហោ ណាំហុង៕ This posting includes an audio/video/photo media file: Download Now |
| សមាជិកសភាអាស៊ានស្វែងរកវិធីការពារពលករចំណាកស្រុក Posted: 05 Apr 2011 02:08 PM PDT សមាជិកសភាអាស៊ានបានអនុម័តសេចក្តីសម្រេចចិត្តដ៏សំខាន់មួយនៅថ្ងៃអង្គារនេះ សំដៅទប់ស្កាត់រាល់អំពើរំលោភសិទ្ធិផ្សេងៗលើពលករចំណាកស្រុកនៅក្នុងតំបន់ដែលសមាជិកសភាកម្ពុជាបាននិយាយថាពលករកម្ពុជានឹងទទួលបានផលប្រយោជន៍ពីសេចក្តីសម្រេចចិត្តនេះ។ សេចក្តីសម្រេចចិត្តនេះសំដៅបង្កើនការការពារនិងការលើកកម្ពស់សិទ្ធិរបស់ពលករចំណាកស្រុកឬហៅថាទេសន្តរប្រវេសន៍រួមមានការលើកកម្ពស់ការការពារការងារ ប្រាក់ឈ្នួល លក្ខខណ្ឌការងារ និងលក្ខខណ្ឌរស់នៅសមរម្យ និងត្រឹមត្រូវរបស់ពលករទេសន្តរប្រវេសន៍។ សេចក្តីសម្រេចចិត្តនេះបានកើតមានឡើង បន្ទាប់ពីសមាជិកសភាអាស៊ានមានកង្វល់អំពីការធ្វើទុក្ខទោស ការរំលោភ ការរើសអើង ព្រមទាំងការរំលោភសិទ្ធិរបស់ពលករទេសន្តរប្រវេសន៍។ លោកស្រីហូ ណូន ប្រធានគណៈកម្មការការងារនៃរដ្ឋសភា បានថ្លែងប្រាប់ក្រុមអ្នករាយការណ៍ព័ត៌មាន ក្រោយពីបញ្ចប់កិច្ចប្រជុំសភាអាស៊ានរយៈពេលពីរថ្ងៃថាពលករទេសន្តរប្រវេសន៍កម្ពុជាក្នុងប្រទេស ម៉ាឡេស៊ី ប្រទេសថៃ និងប្រទេសកូរ៉េខាងត្បូង ទទួលបានការគោរពសិទ្ធិមនុស្ស ប្រាក់ខែ លក្ខខណ្ឌការងារ និងលក្ខខណ្ឌរស់នៅសមរម្យ។ «យើងសុំឱ្យគេជួយការពារសិទ្ធិ និងកុំឱ្យធ្វើទោសទណ្ឌ។ បើពលករខ្មែរទៅខុសច្បាប់ យើងសុំគេឱ្យជួបជា មួយស្ថានទូតកម្ពុជាប្រចាំនៅប្រទេសនោះ ដើម្បីយកត្រឡប់មកវិញ កុំឱ្យយកទៅដាក់ក្នុងពន្ធនាគារ កុំយក ទៅធ្វើបាប។ យើងសុំឱ្យមានប្រាក់ខែសមរម្យដែលអាចរស់នៅបានពលកម្មការងារសុំឱ្យគោរពសិទ្ធិមនុស្ស កុំឱ្យធ្វើពលកម្មធ្ងន់ធ្ងរនិងគ្រោះថ្នាក់។ នេះជាចំណុចធំដែលយើងលើកកម្ពស់សិទ្ធិពលករទេសន្តរប្រវេសន៍ ទាំងស្របច្បាប់ និងមិនស្របច្បាប់»។ លោក ទេព ងន អនុប្រធានព្រឹទ្ធសភា បានថ្លែងថាសេចក្តីសម្រេចចិត្តនេះក្លាយជាស្ពានក្នុងកិច្ចសហប្រតិបត្តិការទប់ស្កាត់ទេសន្តរប្រវេសន៍ឆ្លងកាត់ព្រំដែនខុសច្បាប់ដែលតែងតែកើតមានតាមរយៈមេខ្យល់ ឬ ក្រុម ជួញដូរខុសច្បាប់ ខណៈដែលមានរបាយការណ៍បង្ហាញពីហានិភ័យ និងគ្រោះថ្នាក់ចំពោះពលករចំណាកស្រុកស្វែងរកការងារនៅក្រៅប្រទេសពុំត្រឹមត្រូវតាមច្បាប់។ តួលេខបានបង្ហាញថាប្រទេសកម្ពុជាបានបញ្ជូនពលករស្របច្បាប់ប្រមាណ៥.៧៧៦នាក់ រួមមាន ស្រី៣.៥៤៣ នាក់ និងប្រុស២.២៣៣នាក់ទៅកាន់ប្រទេសម៉ាឡេស៊ីក្នុងឆ្នាំ២០១០។ ពលករទេសន្តរប្រវេសន៍កម្ពុជាតែងតែទទួលរងនូវការរំលោភផ្លូវភេទ ការវាយធ្វើបាបរូបរាងកាយ ការបង្ខិតបង្ខំឱ្យធ្វើការច្រើនម៉ោង និងការបរិភោគមិនគ្រប់គ្រាន់។ អ្នកស្រី ស្រី សុផល មកពីខេត្តស្វាយរៀង បានថ្លែងប្រាប់សន្និសីទកាសែតកាលពីថ្ងៃច័ន្ទថា កូនស្រីរបស់ អ្នកស្រីបានជួបប្រទះនូវរឿងហេតុទាំងនេះក្នុងប្រទេសម៉ាឡេស៊ី។ «កូនខ្ញុំយំស្រែកហៅទូរស័ព្ទមកនាងខ្ញុំផ្ទាល់ថាម៉ែអើយ គេវាយធ្វើបាបខ្ញុំ រកទម្លាក់ពីលើផ្ទះវីឡា។ ខ្ញុំធ្វើការមិនហើយមួយយប់មួយថ្ងៃ ហើយបានដេកតែមួយម៉ោងទេ។ បើខ្ញុំធ្វើការមិនហើយ គេអត់ឱ្យបាយបរិភោគទេ។ ប្តីប្រពន្ធម្ចាស់ផ្ទះបានវាយកូនខ្ញុំហើយគេទង្គិចក្បាលខ្ញុំហើមអស់ហើយ។ ប្រហែលជាកូននាងខ្ញុំទាស់ ហើយ មើលទៅ ពីព្រោះនាងទៅធ្វើការហ្នឹងទើបតែឆ្លងទន្លេបានប្រាំខែ»។ អ្នកស្រី បានបន្ថែមថា កូនស្រីរបស់អ្នកស្រីអាយុ២៨ឆ្នាំ ត្រូវបានបុរសជាម្ចាស់ផ្ទះដែលនាងបានបម្រើការនោះ បានរំលោភនាងពីរដងកាលពីថ្ងៃទី៣០ ខែមិនា។ «ឪពុកថៅកែម្ចាស់ផ្ទះបានចាប់រំលោភកូនរបស់ខ្ញុំ ចំនួនពីរដងកាលពីថ្ងៃទី៣០ ខែមិនានេះ»។ លោក វ៉ាន់ សាក់រ៉ានី អគ្គនាយកក្រុមហ៊ុន Champa Manpower Group ដែលជាភ្នាក់ងារជ្រើសរើសពលករបានជួលស្រីនេះ បានថ្លែងថាលោកកំពុងតែធ្វើការស៊ើបអង្កេតករណីនេះ៕ This posting includes an audio/video/photo media file: Download Now |
| អគ្គីភ័យត្របាក់រោងចក្រមួយនៅភ្នំពេញ Posted: 05 Apr 2011 01:41 PM PDT រោងចក្រកាត់ដេរមិថុនា ក្នុងសង្កាត់ទឹកថ្លា ខណ្ឌ័សែនសុខ ស្ទើរតែត្រូវបំផ្លាញទាំងស្រុងរហូតមកទល់នឹងថ្ងៃសុក្រនេះ បន្ទាប់ពីអគ្គីភ័យបានឆាបឆេះអស់រយ:ពេល១៨ម៉ោង។ នៅពេលនេះ គេនៅមិនទាន់ដឹងពីមូលហេតុ ហើយក៏មិនទាន់មានការវាយតម្លៃលើការខូចខាតនៅឡើយ។ សាក្សី និងមន្ដ្រីអគ្គីភ័យបាននិយាយថា អណ្ដាតភ្លើងបានចាប់ផ្ដើមលេបត្របាក់ឃ្លាំងផ្ទុក ទំនិញមួយរបស់រោងចក្រដែលមានកម្មករចំនួន៤០០០ នាក់មួយនេះ នៅវេលាម៉ោងប្រមាណជា ៤ល្ងាចថ្ងៃព្រហស្បតិ៍ ហើយបានរាលដាលយ៉ាងឆាប់រហស័មុននឹងរថយន្ដអគ្គីភ័យបានមកដល់។ រថយន្ដបាញ់ទឹកជាច្រើនរបស់អង្គភាពពន្លត់អគ្គីភ័យក្រុងភ្នំពេញរួមទាំងមានជំនួយពីរថយន្ដពន្លត់អគ្គីភ័យធន់ធំចំនួនពីរគ្រឿងពីអាកាសយានដ្ឋានអន្តជាតិក្រុងភ្នំពេញផងដែរបានចេញចូលបណ្ដាក់គ្នាបាញ់បង្រ្កាបអគ្គីភ័យដ៏ធំនេះ។ ក៏ប៉ុន្ដែទោះជាយ៉ាងណា រហូតមកទល់នឹងរសៀលថ្ងៃនេះ នៅតែមានផ្សែងហុយចេញពីកន្លែងឆេះនៅឡើយ។ លោក ណេត វ៉ាន់ថា ប្រធានការិយាល័យអង្គភាពពន្លត់អគ្គីភ័យរាជធានីភ្នំពេញបានឲ្យដឹងថា ក្រុមសមត្ថកិច្ចកំពង់ស្រាវជ្រាវរកមូលហេតុនៃគ្រោះថ្នាក់នេះ។ លោកបានប្រាប់វីអូអេខ្មែរថា៖ «គណៈកម្មការក្រុមចម្រុះកំពុងតែស្រាវជ្រាវ។ គេយកតាំងពីម៉ាស៊ីនកុំព្យូទ័រអ្វីដែលពាក់ព័ន្ធនិងកាម៉េរ៉ាថតគឺយកទៅឆែកមើលនៅកន្លែងកោសល្យវិច្ច័យ។ អគារនេះវាមិនអាចប្រើប្រាស់ បានទៅមុខទៀតទេ ពីព្រោះវាប្រេះសាំគ្រប់តំបន់គ្រប់ចំណុច ហើយអញ្ចឹងបើប្រើប្រាស់អាចគ្រោះ ថ្នាក់។ គណៈកម្មការចម្រុះរបស់ក្រសួងមហាផ្ទៃដែលបានបង្កើតនោះ គឺចូលលុកលុយចូលថតចូលរុករកជាមួយម្ចាស់ទីតាំងនោះ ហើយគឺអត់មានអ្នករងគ្រោះស្លាប់នោះគឺអត់មានទេ»។ មានប្រជាពលរដ្ឋមួយចំនួនបានរើឥវ៉ាន់ និងភៀសខ្លួនទៅក្រៅផ្ទះកាលពីម្សិលមិញដោយ ការភ័យខ្លាចការរីករាលដាលនៃអគ្គីភ័យ។ លោក ហន វិចិត្រ កម្មករម្នាក់នៃរោងចក្រ មិថុនា បាននិយាយរៀបរាប់ថា ក្រុមកម្មករបាន នាំគ្នាសម្រុករត់ចេញនៅពេលដែលភ្លើងឆេះពេញបន្ទុក ដោយពុំមានក្រុមសង្រ្គោះនាំផ្លូវនោះទេ។ លោក វិចិត្របានប្រាប់វីអូអេខ្មែរថា៖ «ម្សិលមិញគឺមានផ្សែងហុយខ្លាំងមែនទែន បាននាំគ្នាចុះ។ មួយៗអត់ដឹងខ្លួនផងហ្នឹង ថាភ្លើងឆេះពីក្រោម។ និយាយឲ្យចំទៅ ពេលខ្ញុំរត់ ផ្សេងឡើងងងឹតមើលអ្វីលែងចង់ឃើញ បានពួកខ្ញុំ ដឹងរត់ចុះមក»។ រោងចក្រកាត់ដេរមិថុនា បានដំណើរការនៅកម្ពុជាតាំងពីឆ្នាំ១៩៩៣។ រោងចក្រនេះ ជារោងចក្រកាត់ដេរដ៏ធំមួយក្នុងចំណោមរោងចក្រកាត់ដេរសរុបនៅកម្ពុជាចំនួនជាង៣០០រោងចក្រ។ នៅព្រឹកថ្ងៃសុក្រនេះ មានកម្មករជាច្រើនរយនាក់បានមកប្រមូលផ្តុំគ្នានៅមុខរោងចក្រដើម្បីចង់ដឹងពីដំណោះស្រាយសម្រាប់ពួកគេក្នុងការបើកប្រាក់បៀរវត្ស និងការងាររបស់ពួកគេ។ លោក ម៉េងទ្រី ប្រធានរដ្ឋាបាលរោងចក្រមិថុនា បានឲ្យដឹងថា រោងចក្រនឹងធ្វើការទូទាត់បើកប្រាក់បៀរវត្សដល់កម្មករទាំងអស់ដែលសម្រាប់ខែ មីនា។ លោក ថ្លែងដូច្នេះថា៖ «ក្រុមហ៊ុននឹងព្យាយាមបើកប្រាក់ឈ្នួលជូនគាត់។ ប្រាក់ឈ្នួលដែលគាត់ធ្វើបាន គាត់នឹងទទួលបាន។ មិនដឹងជាបើកនៅពេលណា ពីព្រោះឯកសារអត់ទាន់ហើយផង ឆេះអស់ហើយ»៕ This posting includes an audio/video/photo media file: Download Now |
| អ្នកជំនាញបារម្ភនឹងភាពគ្មានការចាប់អារម្មណ៍ចំពោះមុខវិជ្ជាវិទ្យាសាស្ត្រពិត Posted: 05 Apr 2011 01:13 PM PDT ចំណេះដឹងខាងគណិតវិទ្យា និងវិទ្យាសាស្ត្រពិត ត្រូវគេមើលឃើញថា មានសារៈសំខាន់ក្នុងការរុញច្រានប្រទេសមួយឲ្យអភិវឌ្ឍជឿនលឿន។ ប៉ុន្តែ នៅកម្ពុជា អ្នកជំនាញ មើលឃើញថា ប្រជាពលរដ្ឋខ្មែរភាគច្រើន ហាក់មិនសូវចាប់អារម្មណ៍លើមុខវិជ្ជាទាំងនេះទេ។ ក្រុមអ្នកឯកទេសខាងគណិតវិទ្យា បានលើកឡើងថា ការសិក្សាខាងគណិតវិទ្យា និងវិទ្យាសាស្ត្រ ហាក់នៅមិនទាន់មានលក្ខណៈផុលផុសខ្លាំងនៅឡើយនៅកម្ពុជា ដោយសារ សាធារណៈជនខ្មែរជាច្រើនទំនងជាពុំទាន់យល់ច្បាស់អំពីសារៈសំខាន់នៃចំណេះដឹងទាំងនេះ។ លោកបណ្ឌិត ច័ន្ទ រ័ត្ន ប្រធានសហគមន៍អ្នកគណិតវិទ្យាកម្ពុជា មានប្រសាសន៍នៅក្នុងបទសម្ភាសន៍ជាមួយវីអូអេខ្មែរកាលពីថ្ងៃព្រហស្បតិ៍ថា សិស្ស និស្សិតខ្មែរជាច្រើននៅមានការស្ទាក់ស្ទើរក្នុងការសិក្សាមុខវិជ្ជាទាំងនេះ ដោយសារពួកគេមិនប្រាកដក្នុងចិត្តថា តើមុខវិជ្ជាទាំងនេះ នឹងជួយពួកគេបានយ៉ាងដូចម្តេចខ្លះនៅក្នុងពេលអនាគត។ លោកបានបន្តទៀតថា៖ «គេដឹងថា អាហ្នឹងមានសារៈសំខាន់ណាស់ គេឆ្លើយសឹងតែ៩៨% ហើយប៉ុន្តែពេលសួរថាតើប្អូនមានបំណងរៀនមុខវិជ្ជាគណិតវិទ្យាទេ គេថាហ្អេ ដល់អាបញ្ហាហ្នឹងគឺគេហាក់ដូចជាមានការរារែក»។ លោកច័ន្ទ រ័ត្ន បណ្ឌិតផ្នែកគណិតវិទ្យាពីប្រទេសរុស្សី មានប្រសាសន៍បន្ថែមថា បើទោះជាបច្ចុប្បន្ន កម្មវិធីសិក្សាលើមុខវិជ្ជាទាំងនេះត្រូវបានកែលម្អបានច្រើនក៏ដោយ ក៏ការសិក្សាមុខវិជ្ជាទាំងនេះ នៅខ្វះការផ្សារភ្ជាប់ទៅនឹងការងារជាក់ស្តែងនៅក្នុងសង្គមនៅឡើយ ពោលគឺរៀនបានត្រឹមតែទ្រឹស្តីប៉ុណ្ណោះ។ លោកថ្លែងថា៖ «កម្មវិធីសិក្សាយើងពេលខ្លះ វាអត់បានឆ្លើយតបទៅនឹងជីវភាពប្រចាំថ្ងៃ ពីតម្រូវការថាយើងរៀនហ្នឹង ចេះអាហ្នឹងដើម្បីអី ទៅប្រើនៅឯណាអីឯណា»។ ការអប់រំគណិតវិទ្យា និងវិទ្យាសាស្ត្រពិត ត្រូវបានគេទទួលស្គាល់ថា ជាគ្រឺះដ៏សំខាន់សម្រាប់អភិវឌ្ឍខួរក្បាលមនុស្សឲ្យមានសមត្ថភាពខាងការគិត គណនា វិភាគ ដោះស្រាយបញ្ហា និងបង្កើតគំនិតច្នៃប្រឌិតថ្មីៗ។ ការសិក្សាមួយចំនួនបានបង្ហាញថា បណ្តាប្រទេសជឿនលឿនភាគច្រើននៅលើពិភពលោក គឺសុទ្ធសឹងតែជាប្រទេសសម្បូរទៅដោយពលរដ្ឋដែលមានសមត្ថភាព និងចំណេះដឹងខ្ពស់ខាងគណិតវិទ្យានិងវិទ្យាសាស្ត្រ ជាឧទាហរណ៍ សហរដ្ឋអាមេរិក បារាំង អង់គ្លេស និងជប៉ុនជាដើម។ លោក បណ្ឌិត ច័ន្ទ រ័ត្ន មានប្រសាសន៏ថា ការពង្រឹងការអប់រំគណិតវិទ្យា និងវិទ្យាសាស្ត្រនេះ គឺជាកត្តាចម្បងក្នុងការជួយរុញច្រានប្រទេសកំពុងអភិវឌ្ឍ ដូចជាកម្ពុជានេះ ឲ្យក្លាយជាប្រទេសជឿនលឿនដូចបណ្តាប្រទេសអភិវឌ្ឍដទៃទៀតដែរ។ ទាក់ទិននឹងរឿងនេះ លោកបណ្ឌិតច័ន រ័ត្ន ថ្លែងប្រាប់វីអូអេខ្មែរថា៖ «អញ្ចឹងហើយ បានជាជំរុញឲ្យបុគ្គលិកគេ ឬពលរដ្ឋគេឲ្យមានសមត្ថភាពខាងគណិតវិទ្យា ពីព្រោះគេគិតថា ចំណេះដឹងផ្នែកគណិតវិទ្យា វាជាគុណសម្បត្តិមួយ ជាទ្រព្យសម្បត្តិមហាសាលមួយខាងផ្នែកស្មារតីរបស់មនុស្សម្នាក់ៗ»។ កញ្ញា លី ចន្ធីតា និស្សិតថ្នាក់បរិញ្ញាបត្រជាន់ខ្ពស់ ឬអនុបណ្ឌិតផ្នែកគណិតវិទ្យានៃសាកលវិទ្យាល័យខេមរៈក្នុងទីក្រុងភ្នំពេញ មានប្រសាសន៍នៅក្នុងបទសម្ភាសន៍នៅថ្ងៃសុក្រនេះថា ការសិក្សាគណិតវិទ្យាបានធ្វើឲ្យកញ្ញាផ្លាស់ប្តូរពីមនុស្សចិត្តចង្អៀតម្នាក់មកជាមនុស្សដែលមានចិត្តទូលាយ ចេះចែករំលែកចំណេះដឹងដល់អ្នកដទៃ។ សម្រាប់ កញ្ញា លី ចន្ធីតា ការសិក្សាគណិតវិទ្យាគឺប្រៀបដូចជាការមានពន្លឺបំភ្លឺផ្លូវជានិច្ចដូច្នោះដែរ។ កញ្ញាប្រាប់វីអូអេខ្មែរថា៖ «សម្រាប់ខ្ញុំ គណិតវិទ្យាគឺជាផ្លូវនាំទៅរកភាពរីកចម្រើន។» បច្ចុប្បន្ន នៅកម្ពុជា មានបណ្ឌិតផ្នែកគណិតវិទ្យាចំនួន៤នាក់ អនុបណ្ឌិតគណិតវិទ្យាប្រមាណ៨០នាក់ និងគ្រូបង្រៀនដែលទទួលបានបរិញ្ញាបត្រផ្នែកគណិតវិទ្យាសរុបប្រមាណ១៥០០នាក់។ នេះបើផ្អែកតាមលោកបណ្ឌិត ច័ន្ទ រ័ត្ន ប្រធានសហគមន៍អ្នកគណិតវិទ្យាកម្ពុជា និងជាប្រធាននាយកដ្ឋានស្រាវជ្រាវវិទ្យាសាស្ត្រនៃក្រសួងអប់រំយុវជន និងកីឡាផងដែរ។ លោកបណ្ឌិត អ៊ាប បុណ្ណា ប្រធានវិទ្យាស្ថានវិទ្យាសាស្ត្រ និងបច្ចេកវិទ្យានៃរាជបណ្ឌិតសភាកម្ពុជា បានថ្លែងថា វិទ្យាស្ថានរបស់លោកបានជួយបណ្តុះបណ្តាលអ្នកគណិតវិទ្យាថ្នាក់អនុបណ្ឌិតបាន៨នាក់ដែរកន្លងមក ប៉ុន្តែលោកបណ្ឌិតបន្តថា រដ្ឋត្រូវគិតគូរយកចិត្តទុកដាក់អភិវឌ្ឍធនធានមនុស្សឲ្យមានសមត្ថភាពខាងគណិតវិទ្យា និងវិទ្យាសាស្ត្រពិត បន្ថែមទៀតតាមរយៈការវិនិយោគលើឧបករណ៍ពិសោធន៍ឲ្យបានច្រើន ដើម្បីអភិវឌ្ឍប្រទេសឲ្យរីកចម្រើនឆាប់រហ័ស។ លោកថ្លែងថា៖ «ក្នុងការរៀនហ្នឹង ប្រសិនណាបើយើងរៀនតែទ្រឹស្តីទេ អាហ្នឹងបានន័យថា ជាចំណេះវិជ្ជាមួយស្រមើស្រមៃ។ ជាចំណេះស្រមើស្រមៃរហូតគឺថា គ្មានឃើញការពិតជាក់ស្តែងទេ។ អញ្ចឹងបានភាគច្រើន គេរៀនទ្រឹស្តីហើយ គេមានពិសោធន៍ទៀត»។ លោក បណ្ឌិត អ៊ាប បុណ្ណា មានប្រសាសន៍បន្ថែមទៀតថា ដោយសារកង្វះការអនុវត្តជាក់ស្តែងក្នុងចំណោមអ្នកសិក្សាខាងគណិតវិទ្យា និងវិទ្យាសាស្ត្រ ក្នុងស្រុកនេះហើយ ទើបបានជាក្រុមហ៊ុនភាគច្រើនបានយកតែអ្នកជំនាញពីក្រៅប្រទេសមកធ្វើការនៅក្នុងគម្រោងអភិវឌ្ឍនានាដូចជាការសាងសង់ ផ្លូវ ស្ពាន ឬអាគារទំនើបៗជាដើមនោះ។ លោកបណ្ឌិត បុណ្ណាបន្តទៀតថា៖ «គាត់នៅមានកម្រិត ព្រោះគាត់អត់ទាន់បានapplyទៅនឹងស្អីមួយ។ ការងាររបស់គាត់ គាត់អត់បានអនុវត្តជាក់ស្តែង អញ្ចឹងគាត់នៅមានកម្រិតនៅឡើយ»។ នៅក្នុងកិច្ចខិតខំប្រឹងប្រែងពង្រឹងវិស័យគណិតវិទ្យា និងវិទ្យាសាស្ត្រនេះ កម្ពុជាបានរៀបចំសន្និសីទអន្តរជាតិមួយរយៈពេលបីថ្ងៃស្តីពីការអប់រំមុខវិជ្ជាទាំងនេះនៅក្នុងទីក្រុងភ្នំពេញ កាលពីថ្ងៃទី២៣ ដល់២៥ ខែកុម្ភៈកន្លងទៅនេះ ដោយប្រមូលផ្តុំសាស្ត្រាចារ្យគណិតវិទ្យាល្បីៗចំនួន៣០នាក់មកពីបណ្តាប្រទេសចំនួន១៤មកចូលរួម ដើម្បីចែករំលែកចំណេះដឹង និងបទពិសោធន៍ថ្មីៗ សម្រាប់អភិវឌ្ឍវិស័យទាំងនេះនៅក្នុងប្រទេសកំពុងអភិវឌ្ឍដូចជាកម្ពុជាជាដើមនេះ។ លោកបណ្ឌិត ច័ន្ទ រ័ត្ន ដែលជាប្រធានគណៈកម្មាធិការរៀបចំសន្និសីទអន្តរជាតិនោះ មានប្រសាសន៍ថា ការប្រមូលផ្តុំអ្នកឯកទេសខាងគណិតវិទ្យាពីបរទេសនេះ បានផ្តល់វិធីសាស្ត្របង្រៀនថ្មីៗដល់លោកគ្រូអ្នកគ្រូបង្រៀនមុខវិជ្ជាគណិតវិទ្យាចំនួន២០០នាក់នៅទូទាំងប្រទេសកម្ពុជា ឲ្យពួកគាត់យកទៅអនុវត្ត ដើម្បីអភិវឌ្ឍមុខវិជ្ជានេះឲ្យកាន់តែគួរចាប់អារម្មណ៍ថែមទៀតក្នុងចំណោមសិស្ស និស្សិតរបស់ខ្លួន។ លោកបណ្ឌិត ច័ន្ទ រ័ត្ន មានប្រសាសន៍បន្ថែមថា កម្ពុជាក៏គ្រោងនឹងរៀបចំសន្និសីទអន្តរជាតិស្តីពីការអប់រំគណិតវិទ្យា និងវិទ្យាសាស្ត្រពិត ឲ្យកាន់តែធំថែមទៀតនៅដើមខែមីនា ឆ្នាំក្រោយ ដើម្បីគៀងគរអ្នកជំនាញខាងមុខវិជ្ជានេះ ឲ្យមកជួយអភិវឌ្ឍវិស័យគណិតវិទ្យានិងវិទ្យាសាស្ត្រថែមទៀត នៅកម្ពុជានេះ៕ This posting includes an audio/video/photo media file: Download Now |
| អង្គការហ្រ្វ៊ីដឹម ហោស ថាមាត្រាមួយចំនួនក្នុងច្បាប់អង្គការក្រៅរដ្ឋាភិបាលមានបញ្ហា Posted: 05 Apr 2011 10:13 AM PDT អង្គការក្រៅរដ្ឋាភិបាលមានការព្រួយបារម្ភអំពីច្បាប់គ្រប់គ្រងអង្គការក្រៅរដ្ឋាភិបាល។ អង្គការ ហ្រ្វ៊ីដឹម ហោស (Freedom House) បានអំពាវនាវដល់រដ្ឋាភិបាលកម្ពុជាឱ្យបោះបង់ចោលសេចក្តីព្រាងច្បាប់អង្គការ ដែលរឹតបន្តឹងប្រតិបត្តិការរបស់អង្គការមិនមែនរដ្ឋាភិបាល ខណៈដែលអង្គការសង្គមស៊ីវិលនៅកម្ពុជាបានសម្តែងការព្រួយបារម្ភអំពីច្បាប់សម្រាប់គ្រប់គ្រងអង្គការមិនមែនរដ្ឋាភិបាលនៅថ្ងៃច័ន្ទនេះ។ សេចក្តីព្រាងច្បាប់អង្គការ និងសមាគមមិនមែនរដ្ឋាភិបាលនេះ មានប្រការមួយចំនួនដែលដាក់ការរឹតបន្តឹងដ៏ខ្វល់ខ្វាយដល់សមត្ថភាពរបស់អង្គការមិនមែនរដ្ឋាភិបាលដើម្បីរៀបចំ និងបំពេញការងារប្រកបដោយប្រសិទ្ធិភាព។ សេចក្តីព្រាងច្បាប់នេះ មានប្រការចុះបញ្ជីការតាមអាណត្តិដែលនឹងហាមប្រាមគ្រប់សកម្មភាពទាំងអស់របស់អង្គការមិនមែនរដ្ឋាភិបាលដែលមិនបានចុះបញ្ជីការផ្លូវការដោយចុះហត្ថលេខាលើអនុស្សារណៈយោគយល់ជាមួយរដ្ឋាភិបាល ហើយក៏មិនច្បាស់ក្នុងព្រំដែន និងមានភាសាដែលមានន័យមិនច្បាស់លាស់ ដែលច្បាប់នេះអាចធ្វើឱ្យងាយស្រួលសម្រាប់រដ្ឋាភិបាលដើម្បីបិទក្រុមអង្គការសង្គមស៊ីវិល ឬបដិសេធការចុះបញ្ជីការដោយបំពានបាន ហើយគ្មានជម្រើសប្តឹងឧទ្ធរណ៍។ លោក ផឡា ស្ស្រ៊ីហ្វ័រ (Paula Schriefer) នាយកអង្គការ ហ្រ្វ៊ីដឹម ហោស ដែលមានទីតាំងនៅរដ្ឋធានី វ៉ាស៊ីនតោន សហរដ្ឋអាមេរិក បានបញ្ជាក់នៅក្នុងសេចក្តីថ្លែងការណ៏ថា សេចក្តីព្រាងច្បាប់ក្នុងទម្រង់បច្ចុប្បន្នធ្វើឱ្យអន្តរាយដល់មូលដ្ឋានគ្រឹះនៃអង្គការសង្គមស៊ីវិលឯករាជ្យ និងរស់រវើក ហើយមានអនុភាពលើការអភិវឌ្ឍប្រជា ធិបតេយ្យនៅក្នុងប្រទេស។ លោក ផឡា ស្ស្រ៊ីហ្វ័រ បានបន្ថែមថា ច្បាប់ទាំងនេះមិនគួរត្រូវបានប្រើជាឧបករណ៍ធ្វើឱ្យអន្តរាយដល់សេរីភាពជាមូលដ្ឋានទាក់ទងនឹងសមាគម ការសម្តែងមតិ និងការប្រមូលផ្តុំទេ។ សិទ្ធិបែបនេះត្រូវបាន ការពារក្រោមរដ្ឋធម្មនុញ្ញកម្ពុជា និងសន្ធិសញ្ញាអន្តរជាតិនានាដែលរាជរដ្ឋាភិបាលកម្ពុជាជាហត្ថលេខី។ កាលពីថ្ងៃអង្គារមុនតំណាងមាគម និងអង្គការមិនមែនរដ្ឋាភិបាលបានជួបជាមួយតំណាងក្រសួងមហាផ្ទៃ និងក្រសួងការបរទេស ដើម្បីលើកឡើងពីកង្វល់អំពីការបកស្រាយច្បាប់ចុងក្រោយដែលមិនបញ្ចូលអនុសាសន៍របស់ពួកគេ ដែលច្បាប់នេះកាន់តែមានតម្លាភាព និងជាក់លាក់ដោយមានការការពាររដ្ឋធម្មនុញ្ញ ។ លោក ស្រ្ស៊ីហ្វ័រ បានបញ្ជាក់ក្នុងសេចក្តីថ្លែងការណ៍ថា ទោះបីអង្គការសង្គមស៊ីវិលមានឆន្ទៈចូលរួមដោយសុទ្ធចិត្តជាមួយរដ្ឋាភិបាលនៅពេលដែលសេចក្តីព្រាងច្បាប់ទី១ត្រូវបានផ្សព្វផ្សាយកាលពីឆ្នាំមុនក៏ដោយ ក៏អនុសាសន៍ពីសហគមន៍អង្គការមិនមែនរដ្ឋាភិបាលមិនបានអើពើ ក្នុងដំណើរការនៃការពិភាក្សាការតាក់តែងច្បាប់នោះដែរ។ លោក ស៊ិន សុមុន្នី នាយកប្រតិបត្តិនៃអង្គការ ម៉េឌីខែម (Medicam) បានថ្លែងថា អង្គការមិនមែនរដ្ឋាភិបាល បានសុំដាក់បញ្ជូនកង្វល់ជាអនុសាសន៍ក្នុងសេចក្តីព្រាងច្បាប់ជូនរដ្ឋាភិបាលកាលពីសប្តាហ៍មុន។ លោកបានប្រាប់វីអូអេខ្មែរយ៉ាងដូច្នេះថា៖ «ជាន័យរួម យើងនៅមានចំណុចកង្វល់មួយចំនួនដែលនៅតែជាកង្វល់របស់អង្គការមិនមែនរដ្ឋាភិបាលនៅឡើយ»។ លោកនុត សាអាន រដ្ឋលេខាធិការក្រសួងមហាផ្ទៃ បានថ្លែងថា លោកបានទទួលស្វាគមន៍អនុសាសន៍បន្ថែមរបស់អង្គការមិនមែនរដ្ឋាភិបាលដែលមានកង្វល់ ដើម្បីដាក់ជូនទៅក្រុមការងាររបស់លោកពិនិត្យ។ លោកនុត សាអាន បានបញ្ជាក់ថា ការពិភាក្សាអំពីសេចក្តីព្រាងច្បាប់នេះនឹងមិនមានទៀតទេ។ ក្រោយពីក្រុមការងារពិនិត្យអនុសាសន៍របស់អង្គការសង្គមស៊ីវិលរួច ហើយសេចក្តីព្រាងច្បាប់នេះនឹងត្រូវដាក់ជូនថ្នាក់ដឹកនាំក្រសួង ហើយបញ្ជូនទៅក្រុមប្រឹក្សាអ្នកច្បាប់នៅទីស្តីការគណៈរដ្ឋមន្ត្រី៕ This posting includes an audio/video/photo media file: Download Now |
| អ្នកស្រាវជ្រាវស្នើឱ្យកម្ពុជា និងថៃដកជម្លោះនយោបាយផ្ទៃក្នុងចេញពីរឿងវប្បធម៌ Posted: 04 Apr 2011 03:14 PM PDT ខណៈដែលកម្ពុជា និងថៃកំពុងធ្លាក់ទៅក្នុងជម្លោះជ្រៅទៅៗ ក្នុងតំបន់ជិតប្រាសាទព្រះវិហារ ក្រុមអ្នកស្រាវជ្រាវយល់ថា ការអភិវឌ្ឍ និងការស្វែងយល់គ្នាឱ្យបានច្រើនជាងមុនរវាងប្រទេសជិតខាងទាំងពីរនេះនឹងជួយទប់ស្កាត់ជម្លោះនានាដែលអាចនឹងកើតឡើងនៅតាមបណ្តោយព្រំដែនក្នុងពេលអនាគត។ អ្នកស្រាវជ្រាវបានលើកឡើងថា គេគួរដកយកជម្លោះនយោបាយ និងយោធាចេញពីទំនាក់ទំនងកម្ពុជា និងថៃដើម្បីឱ្យជីវភាពពលរដ្ឋនៃប្រទេសទាំងពីរវិលមករកជីវភាពធម្មតាវិញ។ ពួកគេក៏បានស្នើឡើងផងដែរថា ការសិក្សាពីប្រវត្តិសាស្រ្តពិតដោយលុបចោលនូវភាពព្រងើយកន្តើយដែលមានក្នុងពេលកន្លងមក នឹងនាំទៅដល់ការរស់នៅដោយសុខស្រួលនៃប្រទេសទាំងពីរ។ ការលើកឡើងនេះស្របពេលដែលកម្ពុជា និងថៃកំពុងធ្លាក់ទៅក្នុងជម្លោះព្រំដែននៅត្រង់តំបន់ក្បែរប្រាសាទព្រះវិហារដែលឈានទៅដល់ការប្រយុទ្ធបង្ហូរឈាមគ្នា និងរំខានដល់ការរស់នៅរបស់ប្រជាពលរដ្ឋកម្ពុជា និងថៃនៅតំបន់នោះ។ លោក ចន ប៊ឺហ្គីស អ្នកនិពន្ធសៀវភៅស្រាវជ្រាវដែលមានចំណងជើងថា «រឿងនិទានឆ្លាក់ក្នុងផ្ទាំងសីលា» បានថ្លែងប្រាប់ដល់ក្រុមអ្នកចូលរួមស្តាប់នៅឯមូលនិធិសង្គមអាស៊ីកាលពីយប់ថ្ងៃពុធក្នុងរដ្ឋធានីវ៉ាស៊ីនតោនថា បើជម្លោះនយោបាយនៅផ្ទៃក្នុងថៃបានស្ងប់ស្ងាត់វិញ ហើយកម្ពុជាមានប្រព័ន្ធដឹកនាំត្រឹមត្រូវនោះការដោះស្រាយបញ្ហានៅតាមព្រំដែនមិនជាការលំបាកពេកទេ។ លោក ប៊ឺហ្គីស បន្តថា៖ «ប្រសិនបើប្រទេសថៃមានរដ្ឋាភិបាលដែលមានស្ថិរភាពមួយដោយមិនមានមនុស្សចេញមកដើរតវ៉ាតាមផ្លូវដោយយកហេតុផលពីការបាត់បង់ទឹកដីទៅឱ្យកម្ពុជាដើម្បីដាក់កំហុសរដ្ឋាភិបាលបច្ចុប្បន្នថា ពួកគេមិនសមដឹកនាំប្រទេស នោះគេក៏មិនចាំបាច់មានការចរចាច្រើនហើយសភាពការណ៍ក៏ស្ងប់ស្ងាត់ដែរ។ រីឯកម្ពុជាវិញប្រសិនបើគេអាចឈានទៅដល់ប្រព័ន្ធដឹកនាំរដ្ឋាភិបាលមួយដែលបើកចំហរនោះ ពួកមេដឹកនាំក៏មិនមានលេសណាមកប្រឈមមុខជាមួយប្រទេសថៃដែរ»។ លោក ចន ប៊ឺហ្គីស ក៏ធ្លាប់ធ្វើការជាអ្នកយកព័ត៌មានឱ្យកាសែតវ៉ាស៊ីនតោនប៉ុស្តិ៍ផងដែរ។ លោកបានដក់ចិត្តជាប់នឹងស្នាដៃប្រាសាទបុរាណខ្មែរ និងប្រវត្តិសាស្រ្តខ្មែរខណៈពេលចុះយកព័ត៌មានអំពីជនភៀសខ្លួនខ្មែរក្នុងឆ្នាំ១៩៧៩។ យ៉ាងណាក៏ដោយ លោក ប៊ឺហ្គីសក៏ទទួលស្គាល់ដែរថា ទំនាស់រវាងកម្ពុជា និងថៃមានលក្ខណៈស៊ីជម្រៅជាងបញ្ហាទាំងនេះគឺរហូតទៅដល់កត្តាប្រវត្តិសាស្រ្តរវាងប្រទេសទាំងពីរដែលតម្រូវឱ្យមានការសិក្សាច្បាស់លាស់។ លោកសម្តែងក្តីសង្ឃឹមថា ក្នុងរយៈពេលយូរ គឺការអប់រំពីប្រវត្តិសាស្រ្តពិតដល់ក្មេងជំនាន់ក្រោយក៏ជាការជួយបន្ធូរបន្ថយការយល់ច្រឡំលើគ្នាផងដែរ។ ក្នុងនោះរួមមានការសិក្សាសម្រាប់សិស្សានុសិស្សថៃអំពីប្រវត្តិប្រាសាទអង្គរវត្ត និងសម្រាប់កម្ពុជាគឺពីជំនឿសាសនាដែលខ្លួនបានយកមកពីប្រទេសជិតខាងជាដើម។ លោក បន្តទៀតថា៖ «ខ្ញុំមានការស្លុតចិត្តបន្តិច ដែលឃើញថាភាគីទាំងពីរមិនយល់ដឹងពីគ្នាទៅវិញទៅមកដូចនេះ។ ក្រៅតែពីសង្គ្រាមដែលគេគ្រប់គ្នាបានដឹង គឺការយល់ដឹងពីគ្នាទៅវិញទៅមកស្ទើរតែកម្រិតសូន្យ»។ លោក សាស្រ្តាចារ្យ ធីទីណាន ពុងស៊ុធីរ៉ាក់ (Thitinan Pongsudhirak) នៃសាកលវិទ្យាល័យជូឡាឡុងកន ដែលបានចូលរួមក្នុងកម្មវិធីពិភាក្សានោះបានយល់ស្របហើយបានបញ្ជាក់ថា បញ្ហាប្រឈមរយៈពេលវែងដែលប្រទេសទាំងពីរត្រូវជួបប្រទះនោះគឺរួមមានការរៀបចំឡើងវិញនូវឯកសារសិក្សាប្រវត្តិសាស្រ្តផងដែរ និងការណ៍ដែលលុបចោលនូវការដក់គំនិតអគតិរវាងគ្នាទៅវិញទៅមក។ លោក សាស្រ្តាចារ្យ ពុងស៊ុធីរ៉ាក់ ក៏បានទទួលស្គាល់ថា ប្រជាពលរដ្ឋនៃប្រទេសទាំងពីរជាពិសេសអ្នកនៅសងខាងព្រំដែនមានការរស់នៅតាមធម្មតាក្នុងកម្រិតជីវភាពប្រចាំថ្ងៃប្រសិនបើគ្មានការចូលពាក់ព័ន្ធពីកត្តាខាងក្រៅ និងធ្វើឱ្យវាក្លាយជារឿងនយោបាយ។ លោកបន្តថា៖ «បើយើងយករដ្ឋាភិបាល និងកងទ័ពទាំងនោះចេញ យើងឃើញថាប្រជាពលរដ្ឋក្នុងតំបន់នោះ គឺអត់មានបញ្ហាអ្វីទេ។ ពួកគេដោះដូរទំនិញគ្នាតាំងពីឆ្នាំ១៩៦២ ដល់ឆ្នាំ២០០៨ ដោយគ្មានបញ្ហាអ្វីទាំងអស់ ហើយជាការណ៍ពិតទៅទៀតគឺប្រជាពលរដ្ឋថៃ កម្ពុជា និងទេសចរបរទេសអាចទៅទស្សនាប្រាសាទនោះបាន»។ ជម្លោះកម្ពុជា និងថៃបានរីកធំឡើងបន្តិចម្តងៗក្រោយពីអង្គការយូណេស្កូបានទទួលស្គាល់ប្រាសាទព្រះវិហារកាលពីខែកក្កដាឆ្នាំ២០០៨ថា ជាសម្បត្តិបេតិកភណ្ឌពិភពលោក។ ថៃអះអាងថា ដីនៅជាប់ប្រាសាទជារបស់ខ្លួន ហើយទាមទារដាក់គម្រោងគ្រប់គ្រងអភិវឌ្ឍន៍រួមគ្នាជាមួយកម្ពុជាហើយចលនាជាតិនិយមថៃដឹកនាំដោយក្រុមសម្ព័ន្ធភាពប្រជារាស្រ្តដើម្បីលទ្ធិប្រជាធិបតេយ្យបានបំផុសឱ្យមានការខឹងសម្បារនឹងរដ្ឋាភិបាលហើយបានទម្លាក់ចោលរដ្ឋាភិបាលមុនៗដែលឈានទៅមានការចែកជាក្រុមការពាររដ្ឋាភិបាលនិងក្រុមប្រឆាំង។ លោក ពុងស៊ុធីរ៉ាក់ បានបញ្ជាក់ថា កម្ពុជាគ្រាន់តែជា«កូនអុក»មួយនៃជម្លោះនយោបាយផ្ទៃក្នុងរបស់ថៃប៉ុណ្ណោះហើយវាជា«កម្មពារ»របស់លោកនាយករដ្ឋមន្រ្តី ថៃអាភីស៊ីតវិចាជីវ៉ាដែលបានលេងក្នុងនយោបាយរបស់ក្រុមសម្ព័ន្ធភាពប្រជារាស្រ្តដើម្បីលទ្ធិប្រជាធិបតេយ្យដែលខិតខំបំផុសគោលគំនិតជាតិនិយមជ្រុលព្រោះពេលឥឡូវនេះពួកគេក៏កំពុងរកលេសទម្លាក់លោកនាយករដ្ឋមន្រ្តីរូបនេះដែលពួកគេធ្លាប់គាំទ្រ។ លោក ពុងស៊ុធីរ៉ាក់ បញ្ជាក់ថា៖ «យើងក៏ត្រូវយល់ផងដែរថា វិបត្តិនយោបាយផ្ទៃក្នុងដែលមានដូចជាប្រទេសថៃគឺផ្តល់នូវនិន្នាការមួយដាក់ការស្តីបន្ទោសទៅលើអ្វីមួយផ្សេង ឬក៏ទៅលើអ្នកខាងក្រៅ ហើយគេក៏ឈានទៅរកស្មារតីជាតិនិយម ហើយកេងប្រវ័ញ្ញពីមនោសញ្ចេតនាជាតិនិយមដោយស្តីបន្ទោសអ្នកដទៃ។ ដូច្នេះនេះគឺជាអ្វីដែលយើងអាចយល់បានថាហេតុអ្វី បានជាជម្លោះ នេះកាន់តែធ្ងន់ទៅៗ»។ លោក កឹម សុស អ្នកវិភាគឯករាជ្យមួយ ដែលជាវាគ្មិនមួយរូបក្នុងកម្មវិធីពិភាក្សានោះដែរបានយល់ស្រប ហើយបន្ថែមថា ការណ៍ដែលនាំឱ្យមានផ្ទុះអាវុធកន្លងមក និងការអូសបន្លាយជម្លោះនេះគឺមកពីភាគីទាំងពីរមិនបានអត់ធ្មត់គ្រប់គ្រាន់ ឬក៏ប្រើប្រាស់យន្តការច្បាប់ និងគតិបណ្ឌិតក្នុងការដោះស្រាយជម្លោះនោះទេ។ លោក កឹម សុស បន្តថា៖ «អ្វីដែលខ្ញុំមើលឃើញគឺខ្ញុំអាចសង្ខេបមកត្រឹមពាក្យពីរបីម៉ាត់ នោះគឺមានការប្រើប្រាស់អារម្មណ៍ ការប្រើប្រាស់សាច់ដុំ គឺមិនមែនគំនិតប្រាជ្ញាច្រើនប៉ុន្មានទេ មិនមានយន្តការច្បាប់ច្រើនដើម្បី ដោះស្រាយបញ្ហាទេ»។ ក្រុមអ្នកស្រាវជ្រាវក៏ឯកភាពដែរថាការងាកមកកែប្រែការយល់ខុសឆ្គងពីគ្នាទៅវិញទៅមកនៃប្រជាពលរដ្ឋប្រទេសទាំងពីរនឹងមិនអាចធ្វើបានក្នុងពេលឆាប់ៗនេះទេគឺត្រូវចំណាយពេលយូរទៅទៀត ហើយគេមិនគួរយកប្រាសាទនានាមកធ្វើជាលេសក្នុងការឈ្លោះគ្នាទេតែគួរតែយកវាជាកន្លែងអប់រំពីប្រវត្តិសាស្រ្ត និងអាចឱ្យទេសចរមកទស្សនាដើម្បីស្ងើចសរសើរពីការចេះយោគយល់និងរួមរស់ជាមួយគ្នាដោយភាពសុខសាន្ត៕ This posting includes an audio/video/photo media file: Download Now |
| រដ្ឋាភិបាលកម្ពុជាស៊ើបអង្កេតមជ្ឈមណ្ឌលកុមារកំព្រា Posted: 04 Apr 2011 05:26 PM PDT រដ្ឋាភិបាលកម្ពុជាបានចាប់ផ្តើមស៊ើបអង្កេតមជ្ឈមណ្ឌលកុមារកំព្រានៅក្នុងប្រទេស ប៉ុន្មានថ្ងៃបន្ទាប់ពីអង្គការមូលនិធិកុមារអង្គការសហប្រជាជាតិ បានសម្តែងការព្រួយកង្វល់របស់ខ្លួនថា កុមារប្រហែលបីនាក់ក្នុងចំណោមបួននាក់នៅក្នុងមជ្ឈមណ្ឌលកុមារកំព្រាយ៉ាងហោចណាស់ម្នាក់ មានឪពុក ឬក៏ម្តាយនៅរស់។ នៅដើមសប្តាហ៍នេះ អង្គការ យូនីសេហ្វ (UNICEF) ប្រាប់ឲ្យដឹងថា កុមារជិត១ម៉ឺន២ពាន់នាក់ក្នុងមជ្ឈមណ្ឌលកុមារកំព្រានៅកម្ពុជា ការពិតមិនមែនជាកុមារកំព្រាទេ។ ជិត៣ភាគ៤នៃកុមារទាំងអស់នោះ មានឪពុកឬក៏ម្តាយនៅរស់ ប៉ុន្តែ ចំនួនកុមារកំព្រាក្នុងមជ្ឈមណ្ឌល បានកើនឡើងជាទ្វេដងក្នុងរយៈពេល៥ឆ្នាំនេះ។ អង្គការ យូនីសេហ្វ ប្រាប់ឲ្យដឹងថា ចំនួនមជ្ឈមណ្ឌលក្មេងកំព្រាបានកើនឡើងជិតទ្វេដងដល់ចំនួន២៦៩ នៅក្នុងរយៈពេលដូចគ្នា។ ក្នុងនោះមជ្ឈមណ្ឌលក្មេងកំព្រាចំនួនតែ២១កន្លែងប៉ុណ្ណោះ ត្រូវបានចាត់ចែងដោយរដ្ឋាភិបាល។ មជ្ឈមណ្ឌលផ្សេងៗទៀត ត្រូវបានផ្តល់ថវិកានិងចាត់ចែងដោយម្ចាស់ជំនួយបរទេស និងបណ្តាអង្គការសាសនា។ លោក រីឈដ ប្រ៊ិដល (Richard Bridle) ប្រធានអង្គការ យូនីសេហ្វ ប្រចាំកម្ពុជាបានប្រាប់ វីអូអេ សំឡេងសហរដ្ឋអាមេរិកថា លោកមានការព្រួយកង្វល់ថា មជ្ឈមណ្ឌលក្មេងកំព្រាជាច្រើនបានក្លាយទៅជាកន្លែងទេសចរណ៍ដើម្បីទាក់ទាញថវិកា ហើយថា ការធ្វើដូច្នេះ ពួកគេបានដាក់កុមារឲ្យស្ថិតក្នុងភាពគ្រោះថ្នាក់។ លោក ប្រ៊ិដល មានប្រសាសន៍បន្តទៀតថា សូម្បីពួកទេសចរ និងអ្នកស្ម័គ្រចិត្តដែលមានបំណងដ៍ល្អបំផុតក៏កំពុងផ្តល់ថវិកាដល់ប្រព័ន្ធមួយដែលកំពុងជួយបំបែកកុមារពីគ្រួសាររបស់ពួកគេដែរ។ ការសិក្សាអន្តរជាតិបានបង្ហាញថា កុមារមានស្ថានភាពប្រសើរជាងនេះបើសិនជាគេនៅជាមួយគ្រួសារឬក្នុងសហគមន៍។ លោក សេបាសធាន ម៉ារ៉ត (Sebastien Marot) អ្នកបង្កើតអង្គការដ៏ល្អបំផុតមួយនៅភ្នំពេញសម្រាប់កុមារដែលរស់នៅតាមផ្លូវ ដែលហៅថា មិត្តអន្តរជាតិ (Friends International) ដែលបានបង្កើតកាលពី១៧ឆ្នាំមុននិយាយថាការថែទាំក្មេងបែបនេះ ក៏មានតម្លៃថោកជាងដែរ។ លោកម៉ារ៉ត មានប្រសាសន៍បន្តទៀតថា តួលេខមកពីអង្គការ យូនីសេហ្វ បង្ហាញពីបញ្ហាដ៏ធ្ងន់ធ្ងរមួយពោលគឺអាចមានការភាន់ច្រឡំអំពីស្ថិរភាពនៅកម្ពុជាក្នុងសតវត្សរ៍ទី២១នេះឬក៏អ្វីដែលលោកហៅថា មនុស្សមិនមានការអៀនខ្មាសកំពុងទាក់ទិនក្នុងពាណិជ្ជកម្មសប្បុរសធម៌ ហើយប្រើប្រាស់កុមារដើម្បីរកប្រាក់។ លោក ថ្លែងថា៖ «យើងបានធ្វើការចំនួន១៧ឆ្នាំ ហើយយើងមិនបានដាក់ក្មេងនៅក្នុងមជ្ឈមណ្ឌលកុមារកំព្រាទេ ។ ហើយ យើងកំពុងធ្វើការជាមួយពួកក្មេងដែលត្រូវបានគេមិនគិតមិនគូដែលមានក្រុមគ្រួសារដ៏លំបាកបំផុត។ យើងមិនបានដាក់ពួកគេក្នុងមជ្ឈមណ្ឌលកុមារកំព្រាណាមួយទេក្នុងរយៈពេល៨ឆ្នាំ លើកលែងតែកុមារដែលមានភាពពិការខ្លាំងឬឈឺខ្លាំងបំផុតពីព្រោះតែគ្រួសារប្រាកដជាគ្មានសមត្ថភាពថែទាំពួកគេ។ ហើយ នេះជាស្ថានភាពដ៏ពិតប្រាកដ»។ លោក ម៉ារ៉ត បានទទួលស្គាល់ថា ទេសចរភាគច្រើន ដែលទៅមជ្ឈមណ្ឌលកុមារកំព្រាបានធ្វើចិត្តបរិសុទ្ធនៅពេលដែលពួកគេទៅទស្សនាពួកក្មេងហើយឲ្យលុយ។ ក៏ប៉ុន្តែ លោកនិយាយទៀតថា មានការសង្ស័យខ្លះដែរថាមជ្ឈមណ្ឌលកុមារកំព្រាបានត្រូវបង្កើតឡើងដើម្បីរកប្រាក់ពីទេសចរបរទេស។ ភ្ញៀវទៅកាន់មជ្ឈមណ្ឌលទេសចរណ៍ក្នុងទីក្រុងភ្នំពេញ ទីក្រុងសៀមរាប និងក្រុងព្រះសីហនុដែលជាកន្លែងលំហែកាយឆ្នេរសមុទ្រនៃប្រទេសកម្ពុជា ជាទូទៅបានត្រូវគេអង្វករសុំឲ្យទៅទស្សនាមជ្ឈមណ្ឌលកុមារកំព្រា។ ការណែនាំរបស់លោក ម៉ារ៉ត គឺថា ទេសចរ គួរធ្វើឬកពារដូចជាពួកគេនៅប្រទេសរបស់ខ្លួន។ លោក មានប្រសាសន៍ថា៖ «សំណួរពិតប្រាកដគឺថា តើអស់លោកអ្នកធ្វើដូច្នេះដែរឬទេនៅក្នុងប្រទេសផ្ទាល់របស់ខ្លួនទេ។ តើអស់លោកអ្នកដែលទៅទស្សនាមជ្ឈមណ្ឌលកុមារកំព្រានៅប្រទេសរបស់អស់លោកផ្ទាល់ឬទេ? ទេ។ ហេតុអ្វី ? ពីព្រោះមជ្ឈមណ្ឌលកុមារកំព្រាជាកន្លែងមានសុវត្ថិភាពសម្រាប់កូនក្មេង ហើយមានប្រព័ន្ធការពារកុមារមជ្ឈមណ្ឌលកុមារកំព្រា ត្រូវការពារកុមារទាំងនោះ។ ពួកគេមានភាពងាយនឹងរងគ្រោះថ្នាក់ទៅហើយ។ ការមានមនុស្សមកពីខាងក្រៅជាការមិនអាចទទួលយកបានទេ» ។ អ្នកនាំពាក្យក្រសួងសង្គមកិច្ច ដែលនឹងធ្វើអធិការកិច្ច បានសារភាពនៅសប្តាហ៍នេះថារដ្ឋាភិបាលមិនបានដឹងថា តើកុមាររាប់ពាន់នាក់ដែលស្ថិតក្នុងមជ្ឈមណ្ឌលកុមារត្រូវគេមើលថែទាំបានល្អឬមិនបានល្អទេ។ អ្នកនាំពាក្យនោះ និយាយទៀតថា គេមិនទាន់ដឹងច្បាស់នៅឡើយថាតើគេនឹងចំណាយរយៈពេលប៉ុន្មានដើម្បីពិនិត្យមជ្ឈមណ្ឌលកុមារកំព្រាទាំងអស់ចំនួន២៦៩នោះទេ ក៏ប៉ុន្តែ លោកបានសន្យាថា មជ្ឈមណ្ឌលកុមារកំព្រាទាំងឡាយណាដែលត្រូវរកឃើញថា មិនគ្រប់បទដ្ឋានឬក៏ល្មើសច្បាប់ នឹងត្រូវបិទ៕ ប្រែសម្រួលដោយជឹង ប៉ូជីន This posting includes an audio/video/photo media file: Download Now |
| You are subscribed to email updates from VOA News: ព័ត៌មាន To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
