VOA News: ព័ត៌មាន: “សាលាក្រុងនិងសហគមន៍ខ្មែរគ្រោងបង្កើតកូនទីក្រុងខ្មែរក្នុងក្រុងឡូវែល” plus 3 more |
- សាលាក្រុងនិងសហគមន៍ខ្មែរគ្រោងបង្កើតកូនទីក្រុងខ្មែរក្នុងក្រុងឡូវែល
- លោក ហ៊ុន សែននិយាយថាកម្ពុជានឹងមិនយកមេរៀនតាមទុយនេស៊ីទេ
- ធនាគារអភិវឌ្ឍន៍អាស៊ីបញ្ជាក់ថាសេដ្ឋកិច្ចកម្ពុជាដើរមកដល់ផ្លូវបំបែក
- ប្រតិភូខ្មែរទៅប្រជុំរឿងព្រំដែននៅប្រទេសឥណ្ឌូនេស៊ី
| សាលាក្រុងនិងសហគមន៍ខ្មែរគ្រោងបង្កើតកូនទីក្រុងខ្មែរក្នុងក្រុងឡូវែល Posted: 06 Apr 2011 02:50 PM PDT កាលពីថ្ងៃទី៣១មិនាកន្លងមកនេះ ក្រុមមន្ត្រីសាលាក្រុងឡូវែល មកធ្វើបទបង្ហាញអំពីគម្រោងបង្កើតទីក្រុងខ្មែរ A Little Cambodia នៅមជ្ឈមណ្ឌលគាំពារសុខភាពមនុស្សចាស់ គឺ Lowell Elder Care នៃទីក្រុងឡូវែល។ បទបង្ហាញនេះពន្យល់អំពីម្រោងអភិវឌ្ឍន៍ Little Cambodia ឬ Cambodia Town។ ឈ្មោះជាភាសាខ្មែរមិនទាន់បានកំណត់ច្បាស់លាស់នៅឡើយទេ ប៉ុន្តែអាចមានឈ្មោះថា ភូមិវប្បធម៌ខ្មែរនៃក្រុងឡូវែល ភូមិខ្មែរនៃក្រុងឡូវែល ឬកូនទីក្រុងខ្មែរនៃក្រុងឡូវែល។ លោក Bernard Lynch ដែលជានាយកគ្រប់គ្រងទីក្រុងឡូវែល Lowell City Managerបានដឹកនាំមន្ត្រីសាលាក្រុម៥នាក់មកធ្វើបទបង្ហាញ និងសួរយោបល់ពលរដ្ឋខ្មែរ-អាមេរិកាំង ដែលជាពាណិជ្ជករ តំណាងសហគមន៍ និងសមាគមខ្មែរ។ សាលាក្រុង និងសហគមន៍ខ្មែរគ្រោងបង្កើតកូនទីក្រុងខ្មែរក្នុងក្រុងឡូវែលលោក Lynch មានប្រសាសន៍ប្រាប់អ្នកចូលរួមជិត១០០នាក់យ៉ាងដូច្នេះថា៖ «កន្លងមកសាលាក្រុងបានជួសជុលផ្លូវ កែលម្អឧទ្យានប៉ៃលិន ដែលជាមណ្ឌលកីឡា កន្លែងលេងបាល់ ហើយការខិតខំប្រឹងប្រែងជាបន្តនៅថ្ងៃនេះគឺការបង្កើតតំបន់ពិសេសមួយដែលហៅថា ភូមិខ្មែរ ឬទីក្រុងខ្មែរដើម្បីជាការទទួលស្គាល់នូវការចូលរួមចំណែកទាំងសេដ្ឋកិច្ច វប្បធម៌ នយោបាយរបស់សហគមន៍ខ្មែរនៅក្នុងទីក្រុងឡូវែល»។ លោកបន្ថែមថា កន្លងមកសាលាក្រុងបានចំណាយប្រហែល៣០ម៉ឺនដុល្លារ ហើយសាលាក្រុងវាយតម្លៃថា ក្នុងដំណាក់កាលចាប់ផ្តើមគម្រោង សាលាក្រុងឡូវែលនឹងចំណាយរវាង៦០០០០០ ឬ៧០០០០០ដុល្លារ គួបផ្សំនឹងថវិកាវិភាគទានពីសហគមន៍ពាណិជ្ជករខ្មែរ។ គម្រោងនេះនឹងចាប់ផ្តើមជាផ្លូវការនៅរដូវក្តៅក្នុងពេលយ៉ាងយូរ៣ខែទៀត។ ការអភិវឌ្ឍនិងកែលម្អទីក្រុងខ្មែរនេះនឹងបន្តរហូត ដូច្នេះមិនអាចកំណត់ថាគ្រោងទាំងមូលចំណាយអស់ប៉ុន្មានទេ។ ក្នុងពេលធ្វើបទបង្ហាញអំពីម្រោងអភិវឌ្ឍន៍ Little Cambodia ឬ Cambodia Townនេះ លោក Adam Baccke ជំនួយការរបស់នាយកគ្រប់គ្រងទីក្រុងឡូវែល មានប្រសាសន៍ថា នៅតាមផ្លូវសំខាន់ចំនួន៤ចូលទីក្រុងខ្មែរ ឬភូមិខ្មែរនេះ នឹងមានខ្លោងទ្វារ ឬ រូបចម្លាក់ ឬ ស្លាកសញ្ញា ដែលមានរចនាបថវប្បធម៌ខ្មែរដើម្បីបង្ហាញប្រាប់អ្នកដំណើរថា គេបានចូលដល់ភូមិខ្មែរ ឬក្រុងខ្មែរ។ លោកមានប្រសាសន៍ថា៖ «នេះគឺជាគម្រោងបង្កើតក្រុងខ្មែររបស់យើង។ ទីមួយនឹងមានការដាក់ស្លាកសញ្ញាសម្គាល់ ដូចជាខ្លោងទ្វារសម្គាល់ថា ហ្នឹងគឺជាខ្លោងទ្វារចូលក្រុងខ្មែរ ឬក៏អ្វីផ្សេងៗ ដែលមានរចនាបថជាខ្មែរ»។ លោក Bacckeបន្តថា សាលាក្រុងនិងសហគមន៍ខ្មែរគូររៀបចំកម្មវិធីកម្សាន្តផ្សេងៗដើម្បីផ្សព្វផ្សាយ និងទាក់ទាញចំណាប់អារម្មណ៍ចំពោះគម្រោងនេះ។ លោករ៉ាស៊ី អាន នាយកប្រតិបត្តិនៃសមាគមខ្មែរ ក្រុងឡូវែល មានប្រសាសន៍ថា ខ្មែរម្ចាស់ហាងជាច្រើនចាប់អារម្មណ៍នឹងគ្រោងនេះ ហើយចង់កែលម្អកន្លែងរកស៊ីរបស់ខ្លួនឲ្យមានលក្ខណៈជាខ្មែរ។ លោកសង្ឃឹមថា ការអភិវឌ្ឍទីក្រុងខ្មែរនេះនឹងបង្កើនការងារធ្វើ បង្កើនសកម្មភាពរកស៊ី សកម្មភាពទេសចរណ៍ សកម្មភាពវប្បធម៌ ហើយជាលទ្ធផល សាលាក្រុងនឹងកើនចំណូលពន្ធពីការរីកចម្រើននេះ។ លោកមានប្រសាសន៍ថា «សាលាក្រុងបានជម្រាបថា ដើម្បីឲ្យកិច្ចការនេះរីកចម្រើន គេត្រូវការឲ្យអ្នកណាចង់ចូលរួមខាងហ្នឹង ដូចជាយើងមានមុខរបររកស៊ីអ្វីមួយ យើងចង់ធ្វើឲ្យហាងយើងមានរចនាស្អាត យើងត្រូវចំណាយ២០% សាលាក្រុងចំណាយ៨០%»។ លោកពន្យល់ថា ម្ចាស់ហាងត្រូវលើកគម្រោងកែលម្អ ឬគម្រោងអភិវឌ្ឍន៍កន្លែងរកស៊ីរបស់ខ្លួនជូនទៅសាលាក្រុង ហើយបើសាលាក្រុងយល់ថា វាទាក់ទងនឹងគម្រោងអភិឌ្ឍន៍នេះរបស់សាលាក្រុង នោះសាលាក្រុងនឹងជួយចំណាយ៨០%។ អ្នកចូលរួមទាំងអស់អបអរសាទរគម្រោងនេះ។ លោកឈួរ ហេង អាយុជាង៥៤ឆ្នាំ បានសម្តែងការគាំទ្រ ហើយប្តេជ្ញាថា នឹងចូលរួមភាគទានដល់គម្រោងនេះ ជាពិសេសការធ្វើខ្លោងទ្វារ ឬរូបចម្លាក់ជារចនាបថខ្មែរ។ «មានផ្សារខ្មែរ បងប្អូនស្រុះស្រួល។ លុយខ្ញុំសុំស្ម័គ្រចិត្តជួយមុនគេ។ បើច្រើនអត់មានទេ តែបើល្មមរត់រួច ខ្ញុំស្ម័គ្រចិត្តជួយ។ សូមអរគុណ អស់យោបល់»។ អ្នកស្រីហាក់ ស៊ីផន មករស់នៅស.រ.អាក្នុងឆ្នាំ១៩៨៥ជាមួយប្តី និងកូន៤នាក់។ អ្នកស្រីនិយាយថា៖ «ខ្ញុំត្រេកអរណាស់ដែលបានគេធ្វើអញ្ចឹង សប្បាយចិត្ត។ គេចង់បានយោបល់យើង»។ រីឯអ្នកស្រី ដាយ ហាំង ដែលមករស់នៅក្នុងស.រ.អាក្នុងឆ្នាំ១៩៨១ បន្ថែមថា «ខ្ញុំគាំទ្រ១០០%។ ខ្ញុំសប្បាយចិត្តមែនទែន ហើយវាស្រួល សម្រាប់អ្នកមកពីក្រៅ គេដឹងថា ចូលកន្លែងហ្នឹងគឺចូលក្រុងខ្មែរយើងហើយ»។ លោករស់ វង្ស និងលោក Bernard Lynch សម្រេចឲ្យធ្វើបទបង្ហាញនិងពិភាក្សាគម្រោងក្រុងខ្មែរនៅមណ្ឌលគាំពារសុខភាពមនុស្សចាស់ ព្រោះអតីតជនភៀសខ្លួនទាំងនេះជាអ្នកបង្កើតសហគមន៍ខ្មែរនៅទីនេះ។ លោករស់ វង្សពន្យល់ថា «យើងទទួលស្គាល់ថា ចាស់ៗដឹកនាំកូនខ្មែរ។ ដូច្នេះហើយគាត់មកទីក្រុងនេះ៣០ឆ្នាំ។ គាត់រត់ យកក្មេងជំនាន់ខ្ញុំមក គេចគ្រាប់ គេចអម្បែង ទម្រាំមកដល់ស្រុកនេះ។ ហើយគាត់អត់ចេះភាសា ខំធ្វើការឲ្យក្មេងជំនាន់ក្រោយទៅរៀន មានការងារល្អ គ្រួសារល្អ។ គាត់ធ្វើការច្រើន ដើម្បីជួយសង្គមខ្មែរឲ្យលូតលាស់ សង្គមខ្មែរលូតលាស់ ជួយថែទាំវប្បធម៌ខ្មែរ។ ដូច្នេះហើយ បើគេបង្កើត Little Cambodiaក្នុងទីក្រុងឡូវែល គេគួរមកទីនេះ ព្រោះចាស់ៗយើងនេះជាអ្នកមេដឹកនាំ»។ ម្ចាស់ហាងដែលរវល់ មិនមានពេលមកចូលរួមស្តាប់គម្រោងអភិវឌ្ឍន៍នេះក៏បានសម្តែងការគាំទ្រដែរ។ លោកយុទ្ធគឺជាម្ចាស់ហាង7 Video ស្ថិតក្នុងតំបន់គម្រោងអភិវឌ្ឍន៍នេះ។ ហាងលោកមានលក់ឌីវីឌី ខារ៉ាអូខេ កុនខ្មែរ និងបរទេស ហើយនឹងផលិតផលសិប្បកម្មខ្មែរជាដើម។ លោកនិយាយថា «វាជាមោទនភាពសម្រាប់ប្រជាជនខ្មែររស់នៅទីក្រុងឡូវែលផងដែរ ដែលមានទីក្រុងខ្មែរ។ រកចំណូលកាន់តែច្រើន ហាង ដូចជាហាងខ្ញុំ បង់ពន្ធកាន់តែច្រើន។ ហើយសាលាក្រុងយកចិត្តទុកដាក់នឹងសមាគម សហគមន៍ខ្មែរ ឲ្យមានមុខមានមាត់»។ អ្នកស្រីម៉ាលី ម្ចាស់ហាងលក់ទំនិញ និងភោជនីយដ្ឋានប៉ៃលិន មានប្រសាសន៍ថា អ្នកស្រីមានគំនិតរៀបចំហាងទំនិញរបស់អ្នកស្រីមានរចនាបថលក្ខណៈខ្មែរតាំងពីមុនគម្រោងអភិវឌ្ឍន៍របស់សាលាក្រុងម៉្លេះ ពីព្រោះហាងរបស់អ្នកស្រីបានរៀបចំកម្មវិធីសិល្បៈវប្បធម៌ខ្មែរជាច្រើន ដូចជាការសម្តែងរបស់តារាចម្រៀង សិល្បៈករមកពីប្រទេសកម្ពុជា។ អ្នកស្រីមានប្រសាសន៍ថា «ខ្ញុំពេញចិត្តណាស់ក្មួយ។ ខ្ញុំគិតថា បើគេអត់ជួយចេញ ក៏ខ្ញុំនៅតែធ្វើ។ គិតអញ្ចឹងរួចហើយ។ យើងចង់បានកន្លែងហ្នឹងស្អាត ចង់បានកន្លែងហ្នឹងជាខ្មែរ។ ប៉ុន្តែដល់ឥឡូវសាលាក្រុងគេចាប់ផ្តើមធ្វើអញ្ចឹង ដូចថា ការស្រម៉ៃរបស់យើងបានសម្រេច»។ លោកអ៊ូ សុវណ្ណ មន្ត្រីកុងស៊ូខ្មែរប្រចាំក្រុងឡូវែល និយាយថា ការបង្កើតក្រុងខ្មែរនេះនឹងជួយពង្រីកទំនាក់ទំនងជំនួញរវាងជនជាតិខ្មែរនៅឡូវែល និងពាណិជ្ជករខ្មែរនៅស្រុកខ្មែរ។ «ការបង្កើតក្រុងខ្មែរហ្នឹងមានសារៈប្រយោជន៍ក្នុងការបង្កើនមុខរបរ អ្នកបើកហាងលក់ម្ហូប ជាពិសេស ថ្មីៗនេះអាជីវករយើងទើបចាប់ផ្តើមនាំអង្ករខ្មែរចូលទីក្រុងដែលមានខ្មែររស់នៅ ដូចជាក្រុងឡូវែលនេះតែម្តង។ កាលណាយើងមានហាងលក់ទំនិញ និងសិប្បកម្មច្រើន វានឹងបង្កើតការងារធ្វើសម្រាប់ខ្មែរយើងនៅទីនេះ»៕ This posting includes an audio/video/photo media file: Download Now |
| លោក ហ៊ុន សែននិយាយថាកម្ពុជានឹងមិនយកមេរៀនតាមទុយនេស៊ីទេ Posted: 06 Apr 2011 02:32 PM PDT លោកនាយករដ្ឋមន្ដ្រី ហ៊ុន សែន បានប្រកាសសាជាថ្មីនៅថ្ងៃពុធនេះថា លោកនឹងមិនចុះចេញពីតំណែងទេ បើទោះជាមានការលើកយកមកវិភាគមួយចំនួនចំពោះព្រឹត្តិការណ៍បះបោរនៅក្នុងបណ្ដាប្រទេសអាហ្រ្វិកនិងអារ៉ាប់ក៏ដោយ។ មេដឹកនាំគណបក្សជំទាស់និងមន្ដ្រីសិទ្ធិមនុស្សចាត់ទុកថាចលនាតវ៉ារបស់ប្រជាពលរដ្ឋក្នុងបណ្ដាប្រទេសទាំងនោះជាមេរៀនសម្រាប់ប្រទេសកម្ពុជា។ បន្ទាប់ពីបានលើកពីការបកស្រាយរបស់អ្នកវិភាគខ្មែរម្នាក់នៅជុំវិញស្ថានភាពងើបបះបោររបស់ក្រុមប្រជាជាតិនៅប្លុកប្រទេសអារ៉ាប់ដូចជាប្រទេសទុយនេស៊ី លោកនាយករដ្ឋមន្រ្ដីខ្មែរ ហ៊ុន សែន បានប្រកាសសាជាថ្មីយ៉ាងដូច្នេះថា៖ «អ្នកណាចុះចេញពីតំណែង អញមិនចុះទេ»។ ការងើបបះបោរទាំងនេះបានក្លាយជាកត្តាជំរុញឱ្យមានការងើបឡើងផ្ដួលរំលំក្រុមមេដឹកនាំកាន់អំណាចដ៏យូរនៅតាមបណ្ដាប្រទេសមួយចំនួនក្នុងពិភពលោកជាបន្តបន្ទាប់ក្នុងរយៈពេលចុងក្រោយនេះ។ ថ្លែងក្នុងពិធីសម្ពោធអាគារកុមារគថ្លង់មួយនៅក្នុងទីក្រុងភ្នំពេញ លោកប្រមុខរដ្ឋាភិបាលខ្មែរបញ្ជាក់ថា លោកនៅតែជានាយករដ្ឋមន្ដ្រី ដរាបណាគណបក្សប្រជាជនកម្ពុជាកំពុងកាន់អំណាចរបស់លោកឈ្នះឆ្នោត។ «ឥឡូវគណបក្សប្រជាជនដាក់បេក្ខភាព(ខ្ញុំ)ទៅទៀតសម្រាប់ឆ្នាំ២០១៣។ បើឈ្នះ (ខ្ញុំ) ធ្វើ(នាយករដ្ឋមន្ដ្រី) ទៀតពីព្រោះយើងត្រូវគោរព (ការសម្រេចចិត្តរបស់ ) ប្រជាជន។ កុំមកបន្ទោសថាយូរថាឆាប់។ អ្នកដែលចាំនោះ គឺយូរណាស់ ប៉ុន្ដែអ្នកដែលមិនចាំគឺឆាប់ពេក»។ លោក ហ៊ុន សែន បានកាន់អំណាចបានរយៈពេល៣២ឆ្នាំហើយ។ ហើយនៅក្នុងនេះលោកនឹងធ្វើជានាយករដ្ឋមន្ដ្រីបាន២៨ឆ្នាំរហូតដល់ចប់អាណត្តិរដ្ឋាភិបាលឆ្នាំ២០១៣ខាងមុខនេះ។ លោកគឺជាមេដឹកនាំប្រទេស ដែលកាន់អំណាចយ៉ាងយូរដែលមានតិចតួចបំផុតក្នុងពិភពលោក។ ចាប់តាំងពីមានចលនាងើបឡើងបះបោររបស់ក្រុមប្រជាជាតិជាបន្តបន្ទាប់ប្រឆាំងនឹង ការដឹកនាំយ៉ាងយូរនិងប្រឆាំងនឹងក្រុមគ្រួសារនិយមរួមទាំងអយុត្តិធម៌សង្គមនិងភាពអត់ការងារធ្វើនៅទ្វីបអាហ្វ្រិកប៉ែកខាងជើងនិងនៅក្នុងពិភពអារ៉ាប់នៃតំបន់មជ្ឈិមបូព៌ាចាប់តាំងពីខែមករា រៀងមកលោកនាយករដ្ឋមន្ដ្រី ហ៊ុន សែន បានព្រមានជាបន្ដបន្ទាប់ចាប់តាំងពីថ្ងៃ២០ខែមករាមកដែរក្នុងការធ្វើការបង្រ្កាបការប៉ុនប៉ងផ្ដួលរំលំរូបលោកតាមរូបភាពរដ្ឋប្រហារណាមួយ។ កាលពីថ្ងៃច័ន្ទទី៤ ខែមេសា លោក ហ៊ុន សែន បានប្រកាសនៅក្នុងខេត្តកណ្ដាលថា លោកនឹងបន្ដកាន់អំណាចដោយលោកថ្លែងដោយមិនចំឈ្មោះសំដៅប្រឆាំងទៅនឹងការចង់ឲ្យមានការផ្លាស់ប្ដូរមេដឹកនាំ ប្រទេសកម្ពុជា។ លោកកឹម សុខា ប្រធានគណបក្សសិទ្ធិមនុស្សដែលជាគណបក្សជំទាស់មានបីអាសនៈក្នុងរដ្ឋសភាចាត់ទុកថាការលើកឡើងពីការចង់ស្ថិតក្នុងអំណាចរបស់លោកនាយករដ្ឋមន្ដ្រីខ្មែរគឺជាការបង្ហាញជំហមួយ។ «ដោយប្រជាពលរដ្ឋឮច្រើនអំពីចរន្ដការផ្លាស់ប្ដូរមេដឹកនាំក្នុងពិភពលោក ជាពិសេសនៅក្នុងប្លុកអារ៉ាប់ច្រើន ដូច្នេះហើយបានជាគាត់លើកឡើងបញ្ជាក់សាជាថ្មី។ ប្រហែលជាគាត់ថា ដឹកនាំយូរល្អសម្រាប់ គាត់ ប៉ុន្ដែសម្រាប់ទស្សនៈប្រជាធិបតេយ្យក្នុងពិភពលោក គេមិនចង់ឲ្យមានអ្នកដឹកនាំណានៅដឹកនាំយូរទេ គឺចង់ឲ្យមានការផ្លាស់ប្ដូរ»។ លោកចាន់ សាវ៉េត ប្រធានផ្នែកឃ្លាំមើលការរំលោភសិទ្ធិមនុស្សរបស់អង្គការការពារសិទ្ធិមនុស្សអាដហុក បានបញ្ជាក់ថា តំណែងរបស់លោកហ៊ុន សែន ជានាយករដ្ឋមន្ដ្រីខ្មែរតទៅទៀតបានឬយ៉ាងណាអាស្រ័យលើការសម្រេចចិត្តរបស់ប្រជាពលរដ្ឋនៅក្នុងពេលបោះឆ្នោតក៏ប៉ុន្ដែលោកបានចាត់ទុកថាស្ថានភាពបះបោររបស់ប្រជាជាតិក្នុងពិភពលោក គឺជាអ្វីមួយដែលរដ្ឋាភិបាលកម្ពុជាត្រូវតែយកចិត្តទុកដាក់។ «សព្វថ្ងៃប្រជាពលរដ្ឋយើងមួយចំនួនក៏គាត់ទទួលរងសម្ពាធនៃការរំលោភសិទ្ធិមួយចំនួនដូចជារឿងដីធ្លី ការបំបិទសិទ្ធិសេរីភាពទាមទារតវ៉ានេះជាដើម ដូច្នេះខ្ញុំមើលឃើញសម្ដេចហ៊ុន សែន ក៏គាត់ពិចារណាដែរសម្រាប់ឲ្យឃើញថា បណ្ដាប្រទេសក្នុងពិភពលោក កាលណាមានការរឹតត្បិត ការជិះជាន់ ការធ្វើបាប ការប៉ុនប៉ងអ្វីផ្សេងៗនោះ ច្បាស់ជាមានការទាមទារនិងធ្វើការតបតប្រឆាំងហើយ»។ ប្រទេសទុយនេស៊ី និងប្រទេសអេហ្ស៊ីបស្ថិតក្នុងទ្វីបអាហ្រិ្វកខាងជើងដូចគ្នា។ ហើយការបះបោររបស់ប្រជាពលរដ្ឋក្នុងប្រទេសទាំងពីរនោះ បានជំរុញឲ្យមានការងើបឡើងតស៊ូរបស់ប្រជាជាតិនៅប្រទេសលីប៊ី ដែលស្ថិតនៅចន្លោះប្រទេសអេហ្ស៊ីប និងប្រទេសទុយនេស៊ី និងជាប្រទេសធំជាងគេទី១៦ ក្នុងពិភពលោក។ បន្ថែមពីនោះចលនាប្រជាជាតិក៏បានងើបឡើងទៀតនៅសាធារណរដ្ឋ យេម៉េន និងប្រទេសស៊ីរី ក្នុងប្លុកអារ៉ាប់នៃតំបន់មជ្ឈិមបូព៌ាដូចគ្នា៕ This posting includes an audio/video/photo media file: Download Now |
| ធនាគារអភិវឌ្ឍន៍អាស៊ីបញ្ជាក់ថាសេដ្ឋកិច្ចកម្ពុជាដើរមកដល់ផ្លូវបំបែក Posted: 06 Apr 2011 02:11 PM PDT កំណើនសេដ្ឋកិច្ចកម្ពុជានឹងកើនឡើងជាបន្តបន្ទាប់នៅក្នុងឆ្នាំ២០១១ និងឆ្នាំ២០១២ បន្ទាប់ពីបានទទួលរងនូវវិបត្តិសេដ្ឋកិច្ចពិភពលោកយ៉ាងធ្ងន់ធ្ងរ។ ធនាគារអភិវឌ្ឍន៍អាស៊ី បាននិយាយថាកំណើនសេដ្ឋកិច្ចកម្ពុជានៅតែពឹងពាក់ទាំងស្រុងទៅលើការនាំចេញសម្លៀកបំពាក់ទៅកាន់ទីផ្សារសហរដ្ឋអាមេរិកនិងអឺរ៉ុប។ ធនាគារអភិវឌ្ឍន៍អាស៊ី បានព្យាករណ៍នៅថ្ងៃពុធនេះថាកំណើនសេដ្ឋកិច្ចរបស់ប្រទេសកម្ពុជាក្នុងឆ្នាំ២០១១នេះនឹងកើនឡើងចំនួន២ភាគរយលើសពីកំណើនសេដ្ឋកិច្ច ៦,៣ភាគរយក្នុងឆ្នាំ២០១០។ លោក Peter Brimble អ្នកសេដ្ឋកិច្ចជាន់ខ្ពស់របស់ធនាគារអភិវឌ្ឍន៍អាស៊ីប្រចាំនៅកម្ពុជា បានថ្លែងប្រាប់សន្និសីទកាសែតនៅទីស្នាក់ការធនាគារក្នុងទីក្រុងភ្នំពេញថាកំណើនសេដ្ឋកិច្ចកម្ពុជានឹងកើនឡើងដល់៦,៥ភាគរយក្នុងឆ្នាំ២០១១និង៦,៨ភាគរយក្នុងឆ្នាំ២០១២ ពី៦,៣ភាគរយក្នុងឆ្នាំ២០១០។ លោក Peter Brimble បានព្រមានថាប្រទេសកម្ពុជាចាំបាច់ត្រូវដោះស្រាយបញ្ហាប្រឈមមួយចំនួនបើប្រទេសកម្ពុជាចង់សម្រេចបាននូវគោលដៅកាត់បន្ថយភាពក្រីក្រនិងកំណើនសេដ្ឋកិច្ចប្រកបដោយចីរភាព។ ធនាគារអភិវឌ្ឍន៍អាស៊ី បានបញ្ជាក់ក្នុងសេចក្តីថ្លែងការណ៍ថាការគិតស្មានលើវិស័យកសិកម្មនឹងកើនឡើង៤,៣ភាគរយក្នុងឆ្នាំ២០១១ដោយសារការបន្តមានការវិនិយោគលើប្រព័ន្ធធារាសាស្ត្រនិងការបង្កើនលទ្ធភាពទទួលបានដីនិងគ្រាប់ពូជដែលផ្តល់ទិន្នផលខ្ពស់។ ធនាគារអភិវឌ្ឍន៍អាស៊ី បានបន្តថាកំណើននៃវិស័យឧស្សាហកម្មត្រូវបានព្យាករណ៍ថានឹងកើនឡើងប្រមាណ១០,៨ភាគរយដោយផ្អែកទៅតាមសញ្ញាវិជ្ជមានអំពីការបញ្ជាទិញនាពេលអនាគតពីសហរដ្ឋអាមេរិក និងសហភាពអឺរ៉ុប។ ធនាគារអភិវឌ្ឍន៍អាស៊ី បានបន្ថែមថា ក្នុងករណីសហភាពអឺរ៉ុបសញ្ញាវិជ្ជមាននេះមួយផ្នែកគឺដោយសារមានការបន្ធូរបន្ថយលក្ខខណ្ឌនៃវិធានប្រភពដើមលើការនាំចូលសម្លៀកបំពាក់ពីប្រទេសកម្ពុជា ហើយវិស័យសេវាកម្មត្រូវបានព្យាករណ៍ថានឹង កើនឡើងប្រមាណ៥ភាគរយ។ លោកដួង ប៉ូឡាង មន្ត្រីសេដ្ឋកិច្ចរបស់ធនាគារអភិវឌ្ឍន៍អាស៊ីប្រចាំនៅកម្ពុជាបានថ្លែងថា ការងើបឡើងវិញនៃសេដ្ឋកិច្ចកម្ពុជាកំពុងតែរឹងមាំឡើង ប៉ុន្តែប្រទេសកម្ពុជានៅតែពឹងពាក់យ៉ាងខ្លាំងទៅលើប្រភពជាច្រើនសម្រាប់ជំរុញកំណើន រួមមានវិស័យកសិកម្ម សម្លៀកបំពាក់ ទេសចរណ៍ សំណង់ និងអចនលទ្រព្យ។ លោកដួង ប៉ូឡាង បានបញ្ជាក់ថាកំណើនសេដ្ឋកិច្ចកម្ពុជានៅតែពឹងពាក់ទាំងស្រុងទៅលើការនាំចូល សម្លៀកបំពាក់ទៅកាន់ទីផ្សារសហរដ្ឋអាមេរិក និងអឺរ៉ុប។ «ការនាំចេញសម្លៀកបំពាក់ទៅកាន់សហរដ្ឋអាមេរិកបានកើនឡើងពីប្រមាណ១.៩០០លានដុល្លារអាមេរិកក្នុងឆ្នាំ២០០៩ ឡើងដល់ជាង២.២០០លានដុល្លារអាមេរិកក្នុងឆ្នាំ២០១០។ ភ្ញៀវទេសចរណ៍មកដល់កម្ពុជាបានកើនឡើងពី ចំនួន២,២លាននាក់ក្នុងឆ្នាំ២០០៩ ឡើងដល់២,៥លាននាក់ក្នុងឆ្នាំ២០១០ ហើយទទួលបានចំណូលកើនឡើងពី១.៥០០លានដុល្លារអាមេរិកក្នុងឆ្នាំ២០០៩ឡើងដល់១.៨០០លាន ដុល្លារអាមេរិកក្នុងឆ្នាំ២០១០។ វិស័យកសិកម្មបានប៉ាន់ស្មានពីការកើនឡើង៤,២ភាគរយ ហើយជាសំខាន់បានឆ្លុះបញ្ចាំងពីការកើនឡើងក្នុងផលិតកម្មស្រូវនិងទិន្នផលស្រូវកើនឡើងប្រមាណ៥,៥ភាគ រយ (ប្រហែល៨លានតោន)ក្នុងឆ្នាំ២០១១»។ លោក Peter Brimble អ្នកសេដ្ឋកិច្ចជាន់ខ្ពស់របស់ធនាគារអភិវឌ្ឍន៍អាស៊ីប្រចាំនៅកម្ពុជា បានថ្លែងថា ការបន្តងើបឡើងវិញនៃការនាំចេញ និងវិស័យទេសចរណ៍ក្នុងឆ្នាំ២០១១ នឹងជួយឱ្យប្រទេសកម្ពុជារក្សានិរន្តរភាពនៃការវិលមករកគន្លងកំណើនរយៈពេលវែង៦ទៅ ៧ភាគរយឡើងវិញ។ «យើងមានសេចក្តីជឿជាក់យ៉ាងមុតមាំថាសេដ្ឋកិច្ចកម្ពុជាបានងើបឡើងនៅលើផ្លូវកំណើនយ៉ាងរឹងមាំពី ៦ទៅ៧ភាគរយ។ កត្កាជំរុញកំណើនសេដ្ឋកិច្ចបង្ហាញពីសក្តានុពលយ៉ាងរឹងមាំនៅឆ្នាំ២០១១ ក្នុងខែទី មួយ ឬ ទីពីរ។ ប៉ុន្តែប្រទេសកម្ពុជាជួបប្រទះនឹងការប្រឈមនិងឱកាសនានានៃភាពចម្រុះផ្នែកសេដ្ឋកិច្ចនិងការកែលម្អបរិយាកាសវិនិយោគជាទូទៅ»។ លោកច័ន្ទ សុផល ប្រធានសមាគមសេដ្ឋកិច្ចកម្ពុជា បានព្យាករណ៍ថាកំណើនសេដ្ឋកិច្ចកម្ពុជាក្នុងឆ្នាំ២០១១ និង២០១២នឹងកើនឡើងដល់៨ភាគរយ ព្រោះវាមានចំណុចខ្លាំងជាច្រើនដែលនាំឱ្យមានកំណើនខ្លាំង ក្នុងវិស័យផ្សេងៗ។ លោកច័ន្ទ សុផល បានបន្ថែមថា លោកយល់ស្របជាមួយធនាគារអភិវឌ្ឍន៍អាស៊ីអំពីការប្រឈមរយៈពេលយូរនៃភាពចម្រុះផ្នែកសេដ្ឋកិច្ច។ លោកច័ន្ទ សុផល បានពន្យល់ថាភាពចម្រុះផ្នែកសេដ្ឋកិច្ចមិនត្រូវអាស្រ័យទៅលើវិស័យកសិកម្មស្រូវ សម្លៀកបំពាក់ ទេសចរណ៍ សំណង់ និងអចលនទ្រព្យប៉ុណ្ណោះទេ។ ប៉ុន្តែប្រទេសកម្ពុជាត្រូវពង្រីកការវិនិយោគលើវិស័យផលិតផលបន្លែ និងផ្លែឈើ ព្រមទាំងការចិញ្ចឹមជ្រូក គោ និងមាន់សម្រាប់ការនាំចេញ ហើយផលិតផលរបស់របរប្រើប្រាស់ផ្សេងៗ ដូចជាស្ករស និងគ្រឿងតុ ទូ ជាដើម៕ This posting includes an audio/video/photo media file: Download Now |
| ប្រតិភូខ្មែរទៅប្រជុំរឿងព្រំដែននៅប្រទេសឥណ្ឌូនេស៊ី Posted: 06 Apr 2011 01:53 PM PDT តាមការកោះអញ្ជើញរបស់រដ្ឋមន្រ្តីការបរទេសនៃប្រទេសឥណ្ឌូនេស៊ី គឺលោក ម៉ាទី ណាតាឡេ ហ្គាវ៉ា និងជាប្រធានសមាគមប្រជាជាតិអាស៊ីអាគ្នេយ៍ហៅអាស៊ាន លោកហោ ណាំហុង រដ្ឋមន្រ្តីក្រសួងការបរទេសខាងភាគីកម្ពុជា បានដឹកនាំគណៈប្រតិភូមួយក្រុមចាកចេញពីប្រទេសកម្ពុជា នៅថ្ងៃពុធនេះដើម្បីទៅចូលរួមកិច្ចប្រជុំមួយនៅទីក្រុងប៊ូហ្ក័រ ប្រទេសឥណ្ឌូនេស៊ី ដែលនឹងប្រព្រឹត្តធ្វើឡើងនៅថ្ងៃទី៧ និងទី៨ ខែមេសាខាងមុខនេះ។ ប្រទេសឥណ្ឌូនេស៊ី បានកោះប្រជុំប្រទេសថៃនិងប្រទេសកម្ពុជា ដើម្បីទៅចូលរួមប្រជុំគណៈកម្មការ ចម្រុះព្រំដែនកម្ពុជា-ថៃ ដែលហៅកាត់ថាJBCនិងកិច្ចប្រជុំគណៈកម្មការព្រំដែនទូទៅកម្ពុជា-ថៃ ដែលហៅកាត់ថា GBC និងកិច្ចប្រជុំរវាងរដ្ឋមន្រ្តីការបរទេសឥណ្ឌូនេស៊ី ថៃ និងកម្ពុជាផងដែរ ដើម្បីដោះស្រាយ បញ្ហាជម្លោះព្រំដែនកម្ពុជា-ថៃនៅតំបន់ប្រាសាទព្រះវិហារ។ លោកហោ ណាំហុង បានថ្លែងប្រាប់អង្គសន្និសីទកាសែតមុនពេលដែលលោកចាកចេញពីព្រលានយន្តហោះភ្នំពេញអន្តរជាតិ ថាកិច្ចប្រជុំពិគ្រោះយោបល់រវាងរដ្ឋមន្រ្តីការបរទេសឥណ្ឌូនេស៊ី កម្ពុជា និងថៃ នឹងអាចឈានទៅរកកិច្ចព្រមព្រៀង មួយក្នុងការដាក់ឲ្យអ្នកអង្កេតការណ៍មកតំបន់មានជម្លោះ។ «ការប្រជុំ ការពិគ្រោះយោបល់រវាងរដ្ឋមន្រ្តីការបរទេសកម្ពុជា ថៃ និងឥណ្ឌូនេស៊ី មិនប្រាកដទេ យើងអាចឈានទៅរកការស្រុះស្រួលគ្នា ដើម្បីដាក់អ្នកសង្កេតការណ៍នៅព្រំដែនកម្ពុជានិងថៃទីមួយ។ ទីពីរទៀត ប្រជុំគណៈកម្មការព្រំដែន នឹងអាចមានការវិវត្តន៍ទៅមុខទៀត គណៈកម្មការព្រំដែននេះអាចនឹងឈានទៅមុខទៀតធ្វើការបោះបង្គោលព្រំដែននៅតាមព្រំដែន។ ជាពិសេសនៅតំបន់ព្រះវិហារនេះ ជាអាទិភាព»។ លោកហោ ណាំហុង បានមានប្រសាសន៍ទៀតថា ចំពោះកិច្ចប្រជុំJBC និង GBC ប្រទេសកម្ពុជា នឹងអាចឈានទៅរកការបោះបង្គោលព្រំដែនរវាងប្រទេសទាំងពីរ។ ការអះអាងរបស់ភាគីកម្ពុជាក្នុងការសម្តែងសុទិដ្ឋិនិយមចំពោះកិច្ចប្រជុំនៅក្នុងប្រទេសឥណ្ឌូនេស៊ីនេះ ត្រូវបានភាគីថៃបង្ហាញពីជំហរស្រពេចស្រពិលនៅឡើយ។ លោក ប៉ានីតាន់ វឌ្ឍនាយ៉ាកន (Panitan Watanayagorn) អ្នកនាំពាក្យរដ្ឋាភិបាលថៃ បានថ្លែងប្រាប់VOA ខ្មែរតាមរយៈទូរស័ព្ទពីទីក្រុងបាងកកមកថា រដ្ឋាភិបាលថៃកំពុងតែពិចារណាថានឹងទៅចូលរួមកិច្ចប្រជុំនៅក្នុងប្រទេសឥណ្ឌូនេស៊ីឬ ក៏យ៉ាងណា។ «ខ្ញុំគិតថារដ្ឋមន្រ្តីការពារជាតិរបស់យើង ចង់ឲ្យមានកិច្ចប្រជុំនៅក្នុងក្របខណ្ឌនៃកិច្ចប្រជុំរវាងថៃនិងកម្ពុជាជាជាង ដូចអ្វីដែលយើងធ្លាប់ធ្វើពីអតីតកាល។ ក៏ប៉ុន្តែប្រទេសទាំងពីរកំពុងរកលទ្ធភាពក្នុងការជួបប្រជុំJBCនៅទីកន្លែងផ្សេង ហើយយើងមិនទាន់សម្រេចចិត្តចំពោះទីកន្លែងនៃកិច្ចប្រជុំនេះនៅឡើយ»។ លោកទៀ បាញ់ រដ្ឋមន្រ្តីក្រសួងការពារជាតិ បានថ្លែងប្រាប់អង្គសន្និសីទកាសែត ជាមួយនឹងលោកហោ ណាំហុង ថា ការប្រើពាក្យរបស់ថៃ ថាជួបគ្នាញឹកញាប់ នេះមិនមែនជាការណ៍ពិតទេ។ លោកបានមានប្រសាន៍ទៀតថា លោកមិនដែលទទួលបានជួបដោយផ្ទាល់ជាមួយ នឹងលោក ប្រាវីត វង់ស៊ូវុង រដ្ឋមន្រ្តីក្រសួងការពារជាតិថៃ ដើម្បីពិភាក្សាអំពីបញ្ហាព្រំដែនទេ។ «ទោះជាថៃ យ៉ាងណាក៏ដោយ គឺយើងសម្គាល់ឃើញថា ប្រធានជាអ្នកសម្របសម្រួល គឺបានកំណត់មកអញ្ចឹង។ យើងអនុវត្តទៅតាមហ្នឹង ផលយ៉ាងណា អាហ្នឹងគឺ វាមិនមែនតែលើយើងទេ»។ ប្រទេសថៃ ធ្លាប់បានអះអាងថា ខ្លួនជាអ្នករៀបចំកិច្ចប្រជុំនេះឡើងនៅក្នុងប្រទេសឥណ្ឌូនេស៊ី ក៏ប៉ុន្តែការអះអាងនេះត្រូវបានលោកហោ ណាំហុង និយាយថា កម្ពុជាមិនអើពើទៅ នឹងឥរិយាបទ របស់ប្រទេសថៃទេនិងបានចាត់ទុកថា ការអះអាងរបស់ប្រទេសថៃ គឺជាសំដីក្រឡេចក្រឡុច។ កិច្ចប្រជុំរវាងប្រទេសថៃនិងកម្ពុជា ដោយមានការសម្របសម្រួលពីប្រទេសឥណ្ឌូនេស៊ីនេះ បានកើតមានឡើង ក្រោយពេលលទ្ធផលកិច្ចប្រជុំរដ្ឋមន្រ្តីការបរទេសអាស៊ានកាលពីថ្ងៃទី២២ខែកុម្ភៈ បន្ទាប់ពីប្រទេសថៃ និងកម្ពុជាបានវាយប្រយុទ្ធគ្នាលក្ខណៈទ្រង់ទ្រាយធំ កាលពីថ្ងៃទី៤ រហូតដល់ថ្ងៃទី ៧ ខែកុម្ភៈកន្លងទៅនេះ ដែលធ្វើឲ្យភាគីទាំងសងខាង បានស្លាប់ និងរងរបួស៕ This posting includes an audio/video/photo media file: Download Now |
| You are subscribed to email updates from VOA News: ព័ត៌មាន To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
