Koh Santipheap Daily |
- បាតុកម្មនានាបន្តធ្វើទៀតនៅប្រទេសអូម៉ង់
- យុទ្ធនាការផ្សព្វផ្សាយការផាកពិន័យលើការបោះសំរាមពាសវាលពាសកាល
- មនុស្ស១៦នាក់ត្រូវចាប់ជាចំណាប់ខ្មាំងនៅភាគខាងត្បូងហ្វ៊ីលីពីន
- លោកអូបាម៉ាមានបំណងឈរឈ្មោះធ្វើប្រធានាធិបតីមួយអាណត្តិទៀត
- បាតុកម្មហិង្សានៅអាហ្វហ្គានីស្ថានស្លាប់១០នាក់ក្រោយការប្រមាថគម្ពីរកូរអានមួយ
- បង្ក្រាបបទល្មើសឈើខុសច្បាប់២ករណី រឹបអូសបានរថយន្ត២គ្រឿង ម៉ូតូ៣គ្រឿង និងឈើ៤៣៧ដុំ
- ក្រុមក្មេងអន្ធពាលជិះម៉ូតូដេញវាយគេពីក្រោយរបួសរដូករណែល ព្រោះសុំស្រាបៀរមិនបាន
- ពិធីបិទអាងស្តុកទឹកគម្រោងវារីអគ្គិសនីកំចាយ
- សេចក្តីថ្លែងការណ៍ចុងក្រោយរបស់ កាំង ហ្កេកអ៊ាវ ហៅឌុច ថ្ងៃទី៣០ ខែមីនា ឆ្នាំ២០១១
- ទិវាទឹកពិភពលោកត្រូវបានប្រារព្ធធ្វើនៅបរិវេណវត្តវិហារសសរ១០០
- បិទវគ្គបណ្តុះបណ្តាលស្តីពីការស៊ើបអង្កេតបទឧក្រិដ្ឋរយៈពេល២សប្តាហ៍
- ឈ្មួញអណ្តើក កន្ធាយ និងពង្រូលជិះម៉ូតូឌុបបម្រុងឡើងរថយន្តក្រុងជាប់អន្ទាក់
- ស្ថានភាពទឹកភ្លៀង និងការចាប់ផ្តើមនៃរដូវវស្សាឆ្នាំ២០១១
- លោកញឹក ប៊ុនឆៃ ជាប្រធានប្រតិបត្តិលោកលឺ ឡាយស្រេង ជាប្រធានកិត្តិយសលោកកែវ ពុទ្ធរស្មី ជាមគ្គុទ្ទេសក៍គណបក្ស
- គ្រោះថ្នាក់ចរាចរណ៍ក្នុង១ថ្ងៃស្លាប់៥នាក់ និងរងរបួស៥០នាក់
- ការប្រយុទ្ធគ្នាបន្តនៅកូតឌីវ័រស្លាប់៨០០នាក់នៅភាគខាងលិចប្រទេស
- អនិច្ចាស្ពានឈើស្រុតស្ទើរដល់ទឹករកម្ចាស់មិនឃើញ
- បើកលឿនវ៉ារថយន្តពីមុខធ្លាក់ផ្លូវក្រឡាប់ឃើញសុទ្ធតែឈើគ្រញូង
- អូតង់វាយប្រហារច្រឡំសម្លាប់ជនស៊ីវិល និងពួកបះបោរលីប៊ី
- ចូលរួមផ្តល់ព័ត៌មានដើម្បីការអភិវឌ្ឍនិងការអប់រំដោយចីរភាព
| បាតុកម្មនានាបន្តធ្វើទៀតនៅប្រទេសអូម៉ង់ Posted: 03 Apr 2011 12:35 AM PDT  មនុស្សជាច្រើនសិបនាក់បានធ្វើបាតុកម្មកាលពីថ្ងៃទី២ មេសា ក្នុងទីក្រុងម៉ាស្កាត រាជធានីអូម៉ង់ ដោយទាមទារឱ្យបើកការសើុបអង្កេតលើការប្រើកម្លាំងរបស់កងកម្លាំងសន្តិសុខក្នុងឱកាសនៃការប៉ះទង្គិចគ្នាយ៉ាងសាហាវនានាដែលបណ្តាលឱ្យមនុស្សស្លាប់ម្នាក់។ ភាពចលាចលកាលពីយប់ថ្ងៃទី១ មេសា កន្លងមកនេះនៅក្រុងសូហារជាទីក្រុងឧស្សាហកម្មស្ថិតនៅភាគខាងជើងប្រទេសជាកន្លែងដែលចលនាតវ៉ាចាប់ផ្តើមជាង៦សប្តាហ៍មកហើយបង្ហាញថា បណ្តាសម្បទានរបស់រដ្ឋាភិបាលពុំបានឆ្លើយតបចំពោះការទាមទារទាំងឡាយរបស់ពួកបាតុករឡើយ។ យោងតាមបណ្តាអ្នកទទួលខុសត្រូវមន្ទីរពេទ្យថា យុវជនអាយុ២២ឆ្នាំម្នាក់បានស្លាប់កាលពីយប់ថ្ងៃទី១ មេសា បន្ទាប់ពីត្រូវរបួសធ្ងន់ធ្ងរ ហើយបាតុករយ៉ាងតិច៤នាក់ទៀតរបួស។ បំរាមគោចរនាពេលយប់ត្រូវបានដាក់នៅក្រុងសូហារ(២០០គីឡូម៉ែត្រខាងជើងក្រុងម៉ាស្កាត)ដែលនៅទីនោះកងកម្លាំងប៉ូលិសបានតបតដោយប្រើឧស្ម័នបង្ហូរទឹកភ្នែក កាណុងបាញ់ទឹក និងគ្រាប់កៅស៊ូប្រឈមមុខនឹងពួកបាតុករដែលគប់ដុំថ្ម និងប្រើកាំបិត។ ក៏ប៉ុន្តែពួកបាតុករថា ប៉ូលិសបានបាញ់គ្រាប់ពិត។ ការស្លាប់យុវជនរូបនោះធ្វើឱ្យចំនួនអ្នកស្លាប់ឡើងដល់២នាក់ហើយក្នុងបាតុកម្មទាំងឡាយនៅអូម៉ង់ចាប់តាំងពីដំណាច់ខែកុម្ភៈមក ខណៈដែលប្រទេសនោះតាមធម្មតាជាប្រទេសស្ងប់ស្ងាត់ជាងគេបើប្រៀបធៀបទៅនឹងបណ្តាប្រទេសក្នុងតំបន់។ ពួកបាតុករទាមទារថែមទៀតក្រៅពីការបណ្តេញរដ្ឋមន្ត្រីពុករលួយមួយចំនួនចេញឱ្យមានសេរីភាពសារព័ត៌មាន និងលទ្ធិប្រជាធិបតេយ្យទូលំទូលាយ។ ក៏ប៉ុន្តែពួកគេពុំអំពាវនាវឱ្យផ្តួលរំលំព្រះមហាក្សត្រឡើយ។ ដើម្បីរំងាប់បាតុកម្មព្រះមហាក្សត្រអូម៉ង់ព្រះចៅស៊ុលតង់ QABOUS BIN SAID បានដកហូតតំណែងរដ្ឋមន្ត្រីមួយចំនួន និងសន្យាបង្កើតការងារថ្មីៗក្នុងមុខតំំណែងសាធារណៈ ៕  |
| យុទ្ធនាការផ្សព្វផ្សាយការផាកពិន័យលើការបោះសំរាមពាសវាលពាសកាល Posted: 03 Apr 2011 12:26 AM PDT  ខេត្តកំពត ៖ នៅក្នុងបរិវេណរង្វង់មូលក្រុងកំពត កាលពីព្រឹកថ្ងៃទី៣១ មីនា ដំណាច់ខែកន្លងមកនេះ យុទ្ធនាការផ្សព្វផ្សាយការផាកពិន័យលើការបោះសំរាមចោលពាសវាលពាសកាល និងដង្ហែក្បួនសំអាតអនាម័យរួមគ្នានៅទូទាំងក្រុងបានធ្វើឡើងក្រោមអធិបតីភាពលោកខូយ ឃុនហ៊ួរ អភិបាលខេត្ត និងជាទីប្រឹក្សាសម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។ ក្នុងការប្រារព្ធកម្មវិធីផ្សព្វផ្សាយរយៈពេលមួយព្រឹកនេះមានការអញ្ជើញចូលរួមពីថ្នាក់ដឹកនាំមន្ទីរ ស្ថាប័ននានាជុំវិញខេត្ត មន្ត្រីរាជការ និងកំលាំងប្រដាប់អាវុធ ប្រជាពលរដ្ឋ សិស្ស និស្សិត ព្រះសង្ឃ និងក្រុមការងារផងដែរសរុបចំនួនទាំងអស់១.៧៤៥នាក់។ លោកខូយ ឃុនហ៊ួរ បានថ្លែងថា រាជរដ្ឋាភិបាលនៃព្រះរាជាណាចក្រកម្ពុជាក្នុងនីតិកាលទី៤នៃរដ្ឋសភា ក្រោមកិច្ចដឹកនាំប្រកបដោយគតិបណ្ឌិតរបស់សម្តេចអគ្គមហាសេនាបតីតេជោហ៊ុន សែន បានដាក់ចេញយុទ្ធសាស្ត្រចតុកោណដំណាក់កាលទី២ ដែលផ្តោតការយកចិត្តទុកដាក់ទៅលើវិស័យ៤រួមមាន ទឹក ផ្លូវ ភ្លើង និងមនុស្ស។ ជាមួយនឹងការយកចិត្តទុកដាក់វិស័យទាំង៤របស់រាជរដ្ឋាភិបាលនេះ ខេត្តកំពតក៏មានភ័ព្វសំណាងបានទទួលសមិទ្ធផលធំៗដែលទាក់ទងនឹងវិស័យទាំង៤នេះផងដែរ។ លទ្ធផលធ្វើបាននាពេលថ្មីៗនេះ ដូចជាស្តូបអនុស្សាវរីយ៍មិត្តភាពកម្ពុជា-វៀតណាមត្រូវបានជួសជុល និងកែលំអឡើងវិញយ៉ាងស្អាត កសាងផ្លូវចាក់បេតុងទៅសង្កាត់ត្រើយកោះ ព្រមទាំងស្ពានសាងសង់មន្ទីរពេទ្យបង្អែក សាងសង់ផ្លូវក្រាលកៅស៊ូមាត់ព្រែកត្រើយខាងលិច «ផ្លូវ៩ មករា» សាងសង់សាលាខេត្តថ្មី។ លោកបន្តថា ទន្ទឹម នឹងការកសាងគ្រប់ហេដ្ឋារចនាសម្ព័ន្ធនៅក្នុងខេត្តទទួលបានលទ្ធផលយ៉ាងធំធេងនេះសូមប្រជាពលរដ្ឋ និងមន្ត្រីរាជការដែលមានលំនៅឋានក្នុងក្រុងកំពតកុំយកបាវ ឬវត្ថុអ្វីផ្សេងទៀតបិទផ្លូវទឹក ពីព្រោះកន្លងបងប្អូនមួយចំនួនយកវត្ថុទាំងនោះទៅបិទរន្ធទឹកបណ្តាលឱ្យទឹកស្ទះហៀរហូរពេញផ្លូវសាធារណៈនៅពេលមានភ្លៀងធ្លាក់ម្តងៗ។ ក្នុងការកែប្រែសោភ័ណភាពអនាម័យសំអាតទីក្រុងនេះ លោកអភិបាលខេត្តអំពាវនាវដល់ប្រជាពលរដ្ឋគ្រប់មជ្ឈដ្ឋានទាំងអស់នៅក្នុងក្រុងជួយបង់ថវិកាថ្លៃសំរាមផងដើម្បីទីក្រុងស្អាតមានអនាម័យល្អ លើកកម្ពស់គុណភាពជីវិតសំរាប់ទាំងអស់គ្នា ៕  |
| មនុស្ស១៦នាក់ត្រូវចាប់ជាចំណាប់ខ្មាំងនៅភាគខាងត្បូងហ្វ៊ីលីពីន Posted: 03 Apr 2011 12:23 AM PDT ប៉ូលិសរាយការណ៍កាលពីថ្ងៃទី២ មេសា ថា មនុស្ស១៦នាក់ ក្នុងនោះមានគ្រូបង្រៀន១៤នាក់ និងកុមារ២នាក់ត្រូវបានចាប់ពង្រត់ក្នុងឱកាសនៃពិធីមួយប្រារព្ធធ្វើនៅសាលាបឋមសិក្សាមួយលើកោះមីនដាណាវភាគខាងត្បូងហ្វ៊ីលីពីន។ ពួកអ្នកចាប់ពង្រត់ទាមទារឱ្យដោះលែងសមាជិក៤នាក់នៃកុលសម្ព័ន្ធរបស់ពួកគេគឺកុលសម្ព័ន្ធម៉ាណូបូ ដែលត្រូវចាប់ឃុំឃាំង បន្ទាប់ពីការចាប់ចំណាប់ខ្មាំងមួយកាលពីឆ្នាំ២០០៩ ក្នុងទីក្រុងដដែលនេះ គឺទីក្រុង PROSPERIDAD ស្ថិតនៅតំបន់ដាច់ស្រយាលនៃខេត្ត AGUSAN DEL SUR (ភាគខាងកើតកោះមីនដាណាវ) ។ បណ្តាអ្នកទទួលខុសត្រូវប៉ូលិសមូលដ្ឋានបញ្ជាក់ថា ក្នុងចំណោមចំណាប់ខ្មាំងទាំងនេះភាគច្រើនជាគ្រូបង្រៀន និងបណ្តាអ្នកទទួលខុសត្រូវនៃក្រសួងអប់រំ ហើយក៏មានកុមារ២នាក់ ម្នាក់អាយុ១០ឆ្នាំ និងម្នាក់ទៀតអាយុ១៣ឆ្នាំផងដែរ ៕  |
| លោកអូបាម៉ាមានបំណងឈរឈ្មោះធ្វើប្រធានាធិបតីមួយអាណត្តិទៀត Posted: 03 Apr 2011 12:18 AM PDT  ប្រធានាធិបតីអាមេរិកលោកបារ៉ាក់ អូបាម៉ា ត្រៀមលាតត្រដាងរឿងសំងាត់មួយក្នុងចំណោមរឿងសំងាត់ដែលពិបាកបិទបាំងជិតរបស់ក្រុងវ៉ាស៊ីនតោន គឺរឿងដែលលោកត្រៀមឈរឈ្មោះបោះឆ្នោតប្រធានាធិបតីក្នុងឆ្នាំ២០១២ទៀត។ បណ្តាអ្នកទទួលខុសត្រូវរបស់គណបក្សប្រជាធិបតេយ្យដែលជិតដិតនឹងសំណុំរឿងនេះពន្យល់កាលពីថ្ងៃទី២ មេសា ថា ប្រមុខសេតវិមាននឹងផ្តល់ចាប់ពីសប្តាហ៍ខាងមុខនេះទៅនូវឯកសារចាំបាច់ទាំងឡាយដល់គណៈកម្មាធិការបោះឆ្នោតសហព័ន្ធ។ រង់ចាំតាំងពីយូរមកហើយបែបបទរដ្ឋបាលនេះនឹងអាចឱ្យលោកអូបាម៉ាចាប់ផ្តើមដកយកជាផ្លូវការនូវមូលនិធិទាំងឡាយសំរាប់ការឃោសនាបោះឆ្នោតដែលទីតាំងសំរាប់រៀបចំការឃោសនានោះរបស់លោកស្ថិតនៅទីក្រុងសីុកាហ្គោ។ លោកបារ៉ាក់ អូបាម៉ា អាចប្រមូលប្រាក់បានដល់ទៅ៧៥០លានដុល្លារសំរាប់យុទ្ធនាការឃោសនាបោះឆ្នោតដែលទទួលបានជោគជ័យកាលពីឆ្នាំ២០០៨ ៕  |
| បាតុកម្មហិង្សានៅអាហ្វហ្គានីស្ថានស្លាប់១០នាក់ក្រោយការប្រមាថគម្ពីរកូរអានមួយ Posted: 03 Apr 2011 12:15 AM PDT  មនុស្ស១០នាក់បានត្រូវស្លាប់កាលពីថ្ងៃទី២ មេសា នៅទីក្រុងកាន់ដាហារភាគខាងត្បូងអាហ្វហ្គានីស្ថានក្នុងថ្ងៃទី២ នៃបាតុកម្មប្រឆាំងនឹងការប្រមាថគម្ពីរកូរអានមួយដោយគ្រូប្រដៅសាសនាកាតូលិកជ្រុលនិយមម្នាក់របស់អាមេរិក។ អាជ្ញាធរបញ្ជាក់ថា អំពើហិង្សាទាំងឡាយក៏បណ្តាលឱ្យមនុស្ស៨៣នាក់ត្រូវរបួសផងដែរ។ មុននេះនៅក្រុងម៉ាហ្សារអ៊ីសារីហ្វ ភាគខាងជើងប្រទេស និយោជិតបរទេស៣នាក់របស់អ.ស.បបានត្រូវសម្លាប់ដោយពួកបាតុករ។ នៅក្រុងកាន់ដាហារមនុស្សប្រមាណជា១៥០នាក់បាននាំគ្នាធ្វើបាតុកម្មនៅតាមដងវិថីទាំងឡាយដើម្បីបរិហារប្រឆាំងនឹងអ្នកប្រដៅសាសនានៅរដ្ឋផ្លរីដារបស់អាមេរិក លោក TERRY JONES ដែលបានយកគម្ពីរកូរអានមួយទៅដុតចោលជាសាធារណៈកាលពីថ្ងៃទី២០ មីនា កន្លងមកនេះ។ ការដុតគម្ពីរកូរអាននេះដែលមានផ្សាយតាមអ៊ីនធើរណេតទទួលការរិះគន់ពីសំណាក់ប្រធានាធិបតីអាហ្វហ្គានីស្ថាន លោកហាមីដ កាហ្សៃ ដែលអំពាវនាវឱ្យរកយុត្តិធម៌ដែលជំរុញឱ្យមនុស្សជាច្រើនពាន់នាក់ធ្វើបាតុកម្មនៅតាមទីក្រុងជាច្រើន។ ពេលសួរអំពីផលវិបាកនៃអំពើរបស់លោកអ្នកប្រដៅសាសនាអាមេរិករូបនោះថ្លែងប្រាប់ទូរទស្សន៍ BBC ថា លោកពុំទទួលខុសត្រូវចំពោះអំពើហិង្សាទាំងនេះឡើយ។ ពួកបាតុករនៅក្រុងកាន់ដាហារដែលជាច្រើននាក់កាន់ទង់ជាតិរបស់ពួកតាលីបង់ផង ព្រមទាំងស្រែកពាក្យស្លោកនានាគាំទ្រពួកតាលីបង់បាននាំគ្នាដុតកង់រថយន្ត លុកចូលបំផ្លាញហាងទំនិញទាំងឡាយ និងសាលាវិទ្យាល័យមួយសំរាប់សិស្សស្ត្រី។ អំពើហិង្សាមានរយៈពេលជាច្រើនម៉ោង។ ប៉ូលិស២នាក់ស្ថិតក្នុងចំណោមអ្នកស្លាប់៕  |
| Posted: 03 Apr 2011 12:12 AM PDT  ខេត្តកំពត ៖ សមត្ថកិច្ចរដ្ឋបាលព្រៃឈើកំពត សហការជាមួយប៉ូលិសប្រឆាំងបទល្មើសសេដ្ឋកិច្ច និងកម្លាំងកងរាជអាវុធហត្ថខេត្ត បានបង្ក្រាបបទល្មើសឈើខុសច្បាប់ ប្រភេទគ្រញូង ២លើកផ្សេងពីគ្នា គឺចុងខែមីនា និងដើមខែមេសា ២០១១នេះ ។ យោងតាមប្រភពព័ត៌មានពីមន្ត្រីរដ្ឋបាលព្រៃឈើកំពតបានឱ្យដឹងថា បង្ក្រាបលើកទី១គឺកាលពីថ្ងៃទី២៨ មីនា ២០១១ វេលាម៉ោង២និង១៥នាទីរំលងអធ្រាត្រសមត្ថកិច្ចរដ្ឋបាលព្រៃឈើកំពតបានសហការជាមួយកម្លាំងនគរបាលប្រឆាំងបទល្មើសសេដ្ឋកិច្ច និងកងរាជអាវុធហត្ថខេត្ត ពួនស្ទាក់ចាប់បានរថយន្តកាមរី ស៊េរីឆ្នាំ៨៥ ពណ៌ស មួយគ្រឿង ដោយផ្ទុកឈើគ្រញូង២១៣ដុំ និងម៉ូតូម៉ាក CD ៣គ្រឿង ដែលឈ្មួញដឹកឈើបំរុងចេញទៅលក់នៅប្រទេសវៀតណាម នៅចំណុចភូមិថ្កូវ ឃុំឫស្សីស្រុកខាងលិច ស្រុកកំពង់ត្រាច ។ ការចុះបង្ក្រាបដោយកម្លាំងសហការនេះត្រូវបានកងរាជអាវុធហត្ថខេត្តនាំយកវត្ថុតាងទាំងនោះទៅរក្សាទុកនៅអង្គភាពរបស់គេ ពុំបាននាំមករក្សាទុកទៅខណ្ឌរដ្ឋបាលព្រៃឈើកំពតទេ ។ បង្ក្រាបលើកទី២ គឺធ្វើឡើងនៅរសៀលថ្ងៃទី១ មីនា ២០១១ វេលាម៉ោង២និង១៥នាទីរសៀលថ្ងៃទី១ មេសា ២០១១ សមត្ថកិច្ចនគរបាលចរាចរណ៍ស្រុកកំពង់ត្រាច បានឃាត់រថយន្តកាមរីស៊េរី៨៩ ពណ៌ស មួយគ្រឿង ដឹកសម្ភារគួរសង្ស័យ រួចបានរាយការណ៍មកសង្កាត់រដ្ឋបាលព្រៃឈើកំពង់ត្រាច និងបន្ទាប់មកក៏បានរាយការណ៍តាមទូរស័ព្ទទៅនាយផ្នែករដ្ឋបាលព្រៃឈើកំពត ។ ភ្លាមៗនោះ លោកជួន សារ៉ា នាយផ្នែករដ្ឋបាលព្រៃឈើកំពត ក៏បានរាយការណ៍សុំដីកាពីព្រះរាជអាជ្ញាសាលាដំបូងខេត្ត និងសហការជាមួយកម្លាំងកងរាជអាវុធខេត្ត ចុះទៅឃាត់រថយន្ត ប៉ុន្តែវត្ថុតាងមានរថយន្តកាមរីមួយគ្រឿង ពណ៌ស ស៊េរី៨៩ ដូចបានបញ្ជាក់ខាងលើ និងឈើគ្រញូងផ្ទុកពេញរថយន្តនោះ ពុំត្រូវបានកងរាជអាវុធហត្ថ អនុញ្ញាតឱ្យនាំមករក្សាទុកនៅខណ្ឌរដ្ឋបាលព្រៃឈើ ក្នុងពេលនោះទេ គឺខាងកងរាជអាវុធហត្ថសុំយកទៅរក្សាទុកនៅក្នុងអង្គភាពរបស់ខ្លួនមួយរយៈសិន រង់ចាំថ្ងៃចន្ទ ទី៤ មេសា ២០១១ ទើបបញ្ជូនមករក្សាទុកនៅខណ្ឌរដ្ឋបាលព្រៃឈើវិញ ៕  |
| ក្រុមក្មេងអន្ធពាលជិះម៉ូតូដេញវាយគេពីក្រោយរបួសរដូករណែល ព្រោះសុំស្រាបៀរមិនបាន Posted: 02 Apr 2011 11:52 PM PDT  ខេត្តស្ទឹងត្រែង ៖ យ៉ាងហោចណាស់មានមនុស្ស៤នាក់បានរងរបួសធ្ងន់ ខ្លះបញ្ជូនចូលមន្ទីរពេទ្យបង្អែកខេត្ត និងខ្លះបញ្ជូនទៅកាន់រាជធានីភ្នំពេញ ដើម្បីសង្គ្រោះបន្ទាន់ បន្ទាប់ពីពួកអន្ធពាលមួយក្រុមតាមសុំស្រាបៀរ ដែលសេសសល់ពីអ្នករត់តុក្នុងពិធីមង្គលការមិនបាន ព្រោះគេត្រូវប្រមូលស្រាបៀរទាំងនេះត្រឡប់ទៅផ្ទះវិញ ដើម្បីទូទាត់ថ្លៃខាត ឬចំណេញ គឺដោយសារសុំពុំបាននេះហើយទើបកើតមានចិត្តភ្លើងដេញវាយអ្នកគ្រប់គ្រងស្រាបៀរ បណ្តាលឱ្យខ្លះសន្លប់ស្តូកស្តឹង ខ្លះដកដង្ហើមចង្រិតសង្គ្រោះស្ទើរមិនទាន់ ។ ហេតុការណ៍នេះបានកើតឡើងនៅក្រោយស្ថានីយប្រេងឥន្ធនៈដែងភារម្យ ចម្ងាយពីរង្វង់មូលថ្មីប្រហែលជា១០០ម៉ែត្រ ចំកណ្តាលក្រុងស្ទឹងត្រែង កាលពីវេលាម៉ោង១២និង១៥នាទីរំលងអធ្រាត្រឈានចូលថ្ងៃទី២ មេសា ២០១១។ តាមប្រភពព័ត៌មាននៅកន្លែងកើតហេតុបានឱ្យដឹងថា ក្រុមជនរងគ្រោះជិះម៉ូតូកង់បីមានគ្នា៨ទៅ៩នាក់ និងមានផ្ទុកស្រាបៀរលើនោះផងដែរ ដែលសល់ពីពិធីមង្គលការ បន្ទាប់មកស្រាប់តែមានម៉ូតូមួយគ្រឿងម៉ាកវីវ៉ា ស៊េរី២០០៦ ពាក់ស្លាកលេខ ស្ទឹងត្រែង 1A-0341 ពណ៌ខ្មៅ មកពីក្រោយក្នុងល្បឿនលឿន អ្នកជិះប្រដាប់ដោយដំបង និងបំពង់ទីប វាយទៅលើក្រុមជនរងគ្រោះជិះលើម៉ូតូកង់បីនោះ ធ្លាក់ពីលើម៉ូតូពីរនាក់ បណ្តាលឱ្យរងរបួសធ្ងន់។ ចំណែកអ្នកបើកម៉ូតូវីវ៉ាក៏បានដួលធ្លាក់ពីលើម៉ូតូបណ្តាលឱ្យរបួសធ្ងន់ផងដែរ ដោយឡែកគ្នារបស់គេដែលមិនរងរបួសបានដេញវាយគេបន្តទៀត បណ្តាលឱ្យបែកក្បាលហូរឈាមដាបពេញថ្នល់ ។ អ្នកជិះលើម៉ូតូកង់បីម្នាក់បានសន្លប់ ឃើញដូច្នេះក្រុមជនរងគ្រោះបានចុះពីលើម៉ូតូកង់បីបម្រុងជួយគ្នា ស្រាប់តែមានរថយន្តកាមរី ជាបក្សពួកក្រុមបង្កបានបើកដេញបុកក្រុមជនរងគ្រោះយ៉ាងប៉ផាប់ពភីង បណ្តាលឱ្យខ្លះរត់គេចខ្លួនទាន់ ខ្លះត្រូវរថយន្តបុកស្ទើរស្លាប់ស្ទើររស់ រួចរថយន្តបង្ក និងម្នាក់ទៀតជាបក្សពួកបានរត់គេចខ្លួនបាត់បន្សល់ទុកអ្នករងរបួសជិះកង់បីដួលត្រូវគេវាយសន្លប់ និងអ្នកបើកម៉ូតូវីវ៉ា ដេញតាមវាយគេដួលខ្លួនឯងនោះរងរបួសធ្ងន់ត្រូវបញ្ជូនចូលមន្ទីរពេទ្យ ។ មន្ត្រីព្រហ្មទណ្ឌកម្រិតស្រាលនៃ ស្នងការដ្ឋានខេត្តបានឱ្យដឹងថា អ្នកដែលរងរបួសត្រូវបញ្ជូនចូលមន្ទីរពេទ្យ មានចំនួន៤នាក់ គឺ១-ឈ្មោះគា សុរស់ អាយុ២៥ឆ្នាំ មានស្រុកកំណើតភូមិសំណាក់ត្បូង ឃុំបារាយណ៍ ស្រុកព្រៃឈរ ខេត្តកំពង់ចាម មុខរបរទិញអេតចាយ រងរបួសធ្ងន់ ដោយរថយន្តដេញបុក ២-ឈ្មោះង៉ួន សុពៅ អាយុ២៣ឆ្នាំ មុខរបរទិញអេតចាយ រស់នៅភូមិ-ឃុំជាមួយគា សុរស់ បច្ចុប្បន្នមកស្នាក់នៅបណ្តោះអាសន្នក្នុងដេប៉ូទិញអេតចាយក្នុងភូមិកណ្តាល សង្កាត់ស្ទឹងត្រែង ៣-ឈ្មោះមាស សុពិសិដ្ឋ អាយុ២១ឆ្នាំ រស់នៅភូមិលើ សង្កាត់ស្រះឫស្សី ក្រុងស្ទឹងត្រែង រងរបួសធ្ងន់បញ្ជូនទៅកាន់រាជធានីភ្នំពេញ ជននេះជាបក្សពួកបង្កហេតុ និងជាអ្នកប្រដេញម៉ូតូវាយគេ ហើយជ្រុលចង្កូតដួលខ្លួនឯង និង៤-ឈ្មោះចាន់ បុរី អាយុ២១ឆ្នាំ ជាសិស្ស នៅភូមិព្រែក សង្កាត់ស្ទឹងត្រែង រងរបួសធ្ងន់ ដោយសារការព្រួតវាយពី ក្រុមផ្សេងទៀតជិះម៉ូតូពីរគ្រឿងមានគ្នា៥នាក់ ខណៈពេលកំពុងមើលអ្នករបួសនៅលើថ្នល់។ ចំណែកបក្សពួកបង្កទាំងប៉ុន្មានក្រុមក្រោយធ្វើសកម្មភាពវាយតប់ទៅលើជនរងគ្រោះរួចមក ត្រូវរត់គេចខ្លួនបាត់ស្រមោល ឥឡូវនេះសមត្ថកិច្ចកំពុងតាមចាប់ខ្លួន និងកសាងសំណុំរឿង ៕  |
| ពិធីបិទអាងស្តុកទឹកគម្រោងវារីអគ្គិសនីកំចាយ Posted: 02 Apr 2011 11:38 PM PDT   ខេត្តកំពត ៖ នាព្រឹកថ្ងៃទី១ មេសា នៅការដ្ឋានទំនប់វារីអគ្គិសនីកំចាយ មានប្រារព្ធពិធីបិទអាងស្តុកទឹកនៅទំបន់ទី៣ ដែលខ្ពស់ជាងគេបំផុត នៅក្នុងការដ្ឋានទំនប់វារីអគ្គិសនីភ្នំកំចាយ។ កម្មវិធីនេះមានការចូលរួមពីលោកសយ ភិរម្យ អនុរដ្ឋលេខាធិការក្រសួងឧស្សាហកម្ម រ៉ែ និងថាមពល លោកខូយ ឃុនហ៊ួរ អភិបាលខេត្ត លោកបណ្ឌិត ប៊ុន ណារិទ្ធ អគ្គនាយករងថាមពល លោកមុជ ឈុនហ៊ន ប្រធាននាយកដ្ឋានវារីអគ្គិសនី ប្រតិភូក្រុមការងារនៅក្នុងខេត្ត និងមន្ត្រីនាយកដ្ឋានវារីអគ្គិសនី តំណាងក្រុមបច្ចេកទេសវារីអគ្គិសនីសរុបជាង១០០នាក់។ លោកយ៉ាន់ ហុងវ៉ៃ ប្រធានវិស្វករបច្ចេកទេសទំនប់វារីអគ្គិសនីបានឱ្យដឹងថា ការដ្ឋានសាងសង់ទំនប់វារីអគ្គិសនីកំចាយនេះ បានសាងសង់រួចរាល់៩០%ហើយ។ ទំនប់ទី៣នេះមានទទឹងបាតក្រោម១២០ម៉ែត្រ កម្ពស់១១២ម៉ែត្រ ខ្នងលើ៦ម៉ែត្រ បណ្តោយ៥៦៨ម៉ែត្រ និងចំណាយបេតុងចាក់អស់១៤៨ម៉ឺនម៉ែត្រគូប។ លោកប្រធានវិស្វករឱ្យដឹងទៀតថា នៅក្នុងឆ្នាំ២០០៩កន្លងមក រោងចក្រអគ្គិសនីទី២ បានបញ្ចេញភ្លើងដែលមានថាមពល១០,១មេហ្កាវ៉ាត់ ឱ្យប្រើប្រាស់សម្រាប់ការដ្ឋានវារីអគ្គិសនីកំចាយទាំងមូល។ ចំណែករោងចក្រអគ្គិសនីទី៣ មានកម្លាំងថាមពល៤មេហ្កាវ៉ាត់ ហើយនឹងបញ្ចេញភ្លើងឱ្យប្រើប្រាស់ចាប់ពីថ្ងៃទី១ ឧសភា ឆ្នាំ២០១១ តទៅ។ គួរបញ្ជាក់ដែរថា នៅការដ្ឋានវារីអគ្គិសនីកំចាយទាំងមូលបានបែងចែកជា៣រោងចក្រអគ្គិសនី កម្លាំងថាមពលសរុបទាំងអស់១៩៤,១មេហ្កាវ៉ាត់។ រោងចក្រទី១ មានកម្លាំងថាមពល១៨០មេហ្កាវ៉ាត់ (ទំនប់ទី៣) នៅថ្ងៃទី១ កក្កដា ឆ្នាំ២០១១ បញ្ចេញភ្លើងឱ្យប្រើប្រាស់៦០មេហ្កាវ៉ាត់ លុះដល់ថ្ងៃទី១១ កញ្ញា ឆ្នាំ២០១១ បញ្ចេញភ្លើងឱ្យប្រើប្រាស់៦០មេហ្កាវ៉ាត់ថែមទៀត និងដល់ថ្ងៃទី១ វិច្ឆិកា ឆ្នាំ២០១១ បញ្ចេញភ្លើងឱ្យប្រើប្រាស់៦០មេហ្កាវ៉ាត់ថែមទៀត។ រោងចក្រទី២ (ទំនប់ទី២) មានកម្លាំងថាមពល១០,១មេហ្កាវ៉ាត់ ដែលបានប្រើប្រាស់ក្នុងឆ្នាំ២០០៩ កន្លងមក។ រោងចក្រអគ្គិសនីទី៣ (ទំនប់ទី១) មានកម្លាំងថាមពល៤មេហ្កាវ៉ាត់នឹងបញ្ចេញភ្លើងឱ្យប្រើប្រាស់នៅថ្ងៃទី១ ឧសភា ឆ្នាំ២០១១។ តាមការអះអាងរបស់លោកខូយ ឃុនហ៊ួរ អភិបាលខេត្ត កាលពីថ្ងៃទី៣១ មីនា ឆ្នាំ២០១១នេះថា ថាមពលភ្លើង១៩៣មេហ្កាវ៉ាត់ នឹងបញ្ចេញឱ្យប្រើប្រាស់សម្រាប់ខេត្តតាកែវ កំពត ព្រះសីហនុ កំពង់ស្ពឺ និងរាជធានីភ្នំពេញ។ លោកប្រធានវិស្វករបានរំលឹកថា ការស្តុកទឹកសម្រាប់វារីអគ្គិសនីនេះមានចំណុះទឹក៧១៧.៣០០.០០០ម៉ែត្រគូប ហើយចំពោះប្រព័ន្ធទឹកស្អាតក្រុមហ៊ុនដាក់ប្រព័ន្ធលូបន្តផ្ទាល់ពីកម្លាំងទឹកស្តុកនោះផ្តល់មកមិនឱ្យមានផលប៉ះពាល់ដល់ប្រព័ន្ធទឹកស្អាតនៅក្នុងខេត្តទេ រីឯកន្លែងទេសចរណ៍ទឹកឈូវិញក៏មានទឹកជ្រោះហូរមកធម្មតាដូចដើមវិញ៕  |
| សេចក្តីថ្លែងការណ៍ចុងក្រោយរបស់ កាំង ហ្កេកអ៊ាវ ហៅឌុច ថ្ងៃទី៣០ ខែមីនា ឆ្នាំ២០១១ Posted: 02 Apr 2011 11:26 PM PDT  រាជធានីភ្នំពេញ ៖ យោងតាមសាលាក្តីខ្មែរក្រហមឲ្យដឹងថា កាំង ហ្កេកអ៊ាវ ហៅឌុច បានធ្វើសេចក្តីថ្លែងការណ៍ចុងក្រោយដែលមានរយៈពេល២៥នាទី នៅចំពោះមុខអង្គជំនុំជម្រះតុលាការកំពូលនៃអង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) នៅចុងបញ្ចប់នៃសវនាការសាធារណៈលើបណ្តឹងសាទុក្ខក្នុងសំណុំរឿង០០១ ថ្ងៃទី៣០ ខែមីនា ឆ្នាំ២០១១។ កាំង ហ្កេកអ៊ាវ បានស្នើសុំឲ្យអង្គជំនុំជម្រះតុលាការកំពូលលើកលែងការចោទប្រកាន់ និងដោះលែងរូបគាត់។ គាត់ប្តឹងសាទុក្ខប្រឆាំងនឹងសាលក្រមរបស់អង្គជំនុំជម្រះសាលាដំបូងថ្ងៃទី២៦ ខែកក្កដា ឆ្នាំ២០១០ ដែលកាត់ទោសដាក់ពន្ធនាគារគាត់រយៈពេល៣៥ឆ្នាំ។ អង្គជំនុំជម្រះសាលាដំបូងរកឃើញថា ឌុច មានពិរុទ្ធពីបទឧក្រិដ្ឋកម្មប្រឆាំងនឹងមនុស្សជាតិ និងការរំលោភបំពានយ៉ាងធ្ងន់ធ្ងរលើអនុសញ្ញាទីក្រុងហ្សឺណែវឆ្នាំ១៩៤៩ នៅក្នុងតួនាទីរបស់គាត់ជាប្រធានមន្ទីរសន្តិសុខ ស-២១។ សហព្រះរាជអាជ្ញាបានសំណូមពរឲ្យអង្គជំនុំជម្រះតុលាការកំពូលផ្តន្ទាទោសឌុចដាក់ពន្ធនាគារអស់មួយជីវិត បន្ទាប់មកកាត់បន្ថយមកនៅ៤៥ឆ្នាំ ដើម្បីជាការទូទាត់ចំពោះការឃុំខ្លួនគាត់ខុសនីតិវិធីច្បាប់ក្នុងអំឡុងពេលចន្លោះពីថ្ងៃទី១០ ខែឧសភា ឆ្នាំ១៩៩៩ ដល់ថ្ងៃទី៣០ ខែកក្កដា ឆ្នាំ២០០៧ មុនពេលដែលគាត់ត្រូវបានបញ្ជូនមកមន្ទីរឃុំឃាំងរបស់ អ.វ.ត.ក។ សេចក្តីថ្លែងការណ៍ចុងក្រោយ ជាការបញ្ចប់សវនាការលើបណ្តឹងសាទុក្ខរយៈពេលបីថ្ងៃដែលក្នុងអំឡុងពេលនោះអង្គជំនុំជម្រះតុលាការកំពូលបានស្តាប់ការសាទុក្ខពីជនត្រូវចោទ ពីសហព្រះរាជអាជ្ញា និងពីដើមបណ្តឹងរដ្ឋប្បវេណី។ ដើមបណ្តឹងរដ្ឋប្បវេណី បានប្តឹងសាទុក្ខអំពីសំណងរដ្ឋប្បវេណីដែលមានចែងនៅក្នុងសាលក្រមរបស់អង្គជំនុំជម្រះសាលាដំបូង និងអំពីការបដិសេធពាក្យសុំតាំងខ្លួនជាដើមបណ្តឹងរដ្ឋប្បវេណីដោយអង្គជំនុំជម្រះសាលាដំបូង។សាធារណជនជាង២.០០០នាក់ បានតាមដានដំណើរការសវនាការលើបណ្តឹងសាទុក្ខនៅឯសាលសវនាការរបស់អ.វ.ត.ក៕  |
| ទិវាទឹកពិភពលោកត្រូវបានប្រារព្ធធ្វើនៅបរិវេណវត្តវិហារសសរ១០០ Posted: 02 Apr 2011 11:21 PM PDT   ខេត្តក្រចេះ ៖ កាលពីព្រឹកថ្ងៃទី៣១ មីនា នៅក្នុងបរិវេណវត្តវិហារសសរ១០០ ស្ថិតក្នុងភូមិសំបូរ ឃុំសំបូរ ស្រុកសំបូរ បានប្រារព្ធពិធីទិវាទឹកពិភពលោក និងមានការដើរដង្ហែជាក្បួនពីសំណាក់សិស្សានុសិស្សក្នុងសំលៀកបំពាក់ឯកសណ្ឋានអាវយឺតពណ៌ស ដោយនៅក្នុងដៃមានកាន់ស្លាកបដាពាក្យស្លោកយ៉ាងព្រោងព្រាតហែចេញពីបរិវេណទីប្រជុំជនស្រុកឆ្ពោះទៅកាន់វត្តវិហារសសរ១០០ ។ ពិធីនេះត្រូវបានប្រារព្ធឡើងពេញមួយព្រឹកក្រោមការអញ្ជើញចូលរួមពីសំណាក់លោកអភិបាលរងស្រុក ព្រះសង្ឃ ព្រមទាំងតំណាងអង្គការ សន្ដិសេនា លោកគ្រូអ្នកគ្រូ និងសិស្សានុសិស្សមកពីអនុវិទ្យាល័យយ៉ាងច្រើនកុះករ។ លោកហ៊ុន សារ៉េតថន ប្រធានកម្មវិធីអង្គការសន្ដិសេនា បានមានប្រសាសន៍ទៅកាន់អង្គពិធីថា អង្គការសន្ដិសេនាក្នុងនាមដៃគូប្រតិបត្ដិរបស់អង្គការដែនដីមនុស្សប្រទេសអាល្លឺម៉ង់ បានរៀបចំទិវានេះឡើងដែលមានឈ្មោះថា ទិវាទឹកពិភពលោក គឺស្របទៅតាមស្ថានភាពបច្ចុប្បន្ននេះ ការបំពុលទឹក ការបំផ្លាញជីវៈចម្រុះបរិស្ថាន និងធនធានធម្មជាតិ ត្រូវបានគេចាត់ទុកថា ជាបញ្ហាក្ដៅគគុកនៅថ្នាក់តំបន់ និងពិភពលោក ទោះបីជាមានយុទ្ឋនាការ និងវិធានការជាច្រើនដើម្បីទប់ស្កាត់អំពើខុសច្បាប់នេះ ក៏ដោយក៏ការបំពុលទឹក ការបំផ្លាញជីវៈចម្រុះ បរិស្ថាន និងធនធានធម្មជាតិនៅតែកើតមានដដែល។ បន្ទាប់ពីការឡើងមានមតិចំណាប់អារម្មណ៍របស់សិស្សានុសិស្ស លោកស៊យ វ៉ា អភិបាលរងស្រុកសំបូរ បានមានប្រសាសន៍វាយតម្លៃខ្ពស់ថា ទិវាទឹកពិភពលោកពិតជាមានសារសំខាន់បំផុតក្នុងការដាស់ស្មារតីយើងទាំងអស់គ្នាឱ្យខិតខំយកចិត្ដទុកដាក់បន្ថែមទៀតលើការថែរក្សាទឹក ជីវៈចម្រុះបរិស្ថាន និងការគ្រប់គ្រងធនធានធម្មជាតិសម្រាប់កូនចៅយើងជំនាន់ក្រោយ និងជាការធានាចំពោះអនាគតដ៏ត្រចះត្រចង់របស់ប្រទេសជាតិ ដែលមានទឹកនិងបរិស្ថានធនធានធម្មជាតិសំបូរបែប និងជាកាតព្វកិច្ចរបស់មនុស្សគ្រប់រូប។ បើយើងថែរក្សាបានល្អនោះប្រទេសជាតិយើងនឹងមានរស្មីរុងរឿង ព្រោះថា ទឹកគឺជាជីវិត យើងរស់នៅគឺអាស្រ័យដោយធម្មជាតិ៕  |
| បិទវគ្គបណ្តុះបណ្តាលស្តីពីការស៊ើបអង្កេតបទឧក្រិដ្ឋរយៈពេល២សប្តាហ៍ Posted: 02 Apr 2011 11:14 PM PDT  ខេត្តកំពង់ធំ ៖ បន្ទាប់ពីបានឆ្លងកាត់វគ្គបណ្ដុះបណ្ដាលស្ដីពីការស៊ើបអង្កេតបទឧក្រិដ្ធអស់រយៈពេល២សប្ដាហ៍កន្លងមក នៅរសៀលថ្ងៃទី១ ខែមេសា ឆ្នាំ២០១១ ក្នុងសាលប្រជុំភោជនីយដ្ឋានម្លប់ស្វាយធំ មានរៀបចំពិធីបិទវគ្គដោយមានការចូលរួមពីលោកឧត្តមសេនីយ៍ត្រី ស៊ី ផន អនុប្រធាននាយកដ្ឋានកណ្ដាល ជាគ្រូបង្គោល លោកអេ រិច តំណាងអង្គការស៊ីសា អ្នកស្រី អាណា អូសិន នាយកគម្រោងអាស៊ី លោកឧត្តមសេនីយ៍ត្រី ផាន់ សុផេង ស្នងការនគរបាលខេត្តកំពង់ធំ ព្រមទាំងលោកស្នងការរង និងសិក្ខាកាមចំនួន៣០នាក់ស្រី៣នាក់ ក្រោមការឧបត្ថម្ភដោយភ្នាក់ងារអភិវឌ្ឍន៍អាមេរិក អង្គការមូលនិធិអាស៊ីតាមរយៈអង្គការស៊ីសា សហការជាមួយអគ្គស្នងការដ្ឋាននគរបាលជាតិ ។ លោកអេ រិច និងអ្នកស្រី អូសិន បានធ្វើការចាប់អារម្មណ៍ និងបានវាយតម្លៃខ្ពស់ទៅលើវគ្គនេះថា មានសារសំខាន់ណាស់សម្រាប់មន្ត្រីនគរបាលយុត្តិធម៌យកទៅអនុវត្តក្នុងការបំពេញការងារតាមអង្គភាពមូលដ្ឋាន សំដៅលើកកម្ពស់ និងបង្កើនចំណេះដឹងថ្មីបន្ថែមទៀតដល់កងកម្លាំងនគរបាល។ តាមរយៈវគ្គនេះសូមកោតសរសើរចំពោះការខិតខំប្រឹងប្រែងក្រេបជញ្ជក់ចំណេះវិជ្ជារបស់សិក្ខាកាមទំាងអស់ បើទោះបីជាវគ្គនេះមិនទាន់បានល្អប្រសើរក្ដី ក៏មានសិក្ខាកាមមួយចំនួនទទួលបាននិទ្ទេសមធ្យម និងល្អបង្គួរផងដែរ។ ពិសេសក៏សូមអរគុណចំពោះអគ្គស្នងការនគរបាលជាតិ ស្នងការនគរបាលខេត្តកំពង់ធំ ដែលបានបង្កលក្ខណៈដល់វគ្គនេះដំណើរការប្រកបដោយភាពរលូន។ បន្ទាប់ពីចែកជូននូវវិញ្ញាបនប័ត្រដល់សិក្ខាកាមរួចមក លោកឧត្តមសេនីយ៍ត្រី ផាន់ សុផេង បានធ្វើការសំណេះសំណាល និងផ្ដាំផ្ញើដល់សិក្ខាកាមទាំងអស់ត្រូវយកចំណេះវិជ្ជានេះ ទៅអនុវត្តឱ្យចំគោលដៅ ធ្វើយ៉ាងណាត្រូវពង្រឹងសមត្ថភាពលើកកម្ពស់គុណភាពការងារ និងបង្កើនចំណេះដឹងរបស់ខ្លួន ព្រោះថានៅចំពោះមុខមិនថាថ្នាក់លើនោះទេ គឺចាប់តាំងពីថ្នាក់ប៉ុស្តិ៍មូលដ្ឋានពិតជាត្រូវការនូវធនធានមនុស្ស ពិសេសអ្នកមានសមត្ថភាព និងជំនាញច្បាស់លាស់ជាក់ស្ដែង ដូចជាមុខវិជ្ជាដែលបានសិក្សាក្នុងពេលនេះមានដូចជា ក្រមសីលធម៌នៃការអនុវត្តច្បាប់, អ្នកស៊ើបអង្កេត, ច្បាប់, អំណាចរបស់នគរបាលជាតិ, ផែនការស៊ើបអង្កេត, ការស៊ើបអង្គេតកន្លែងកើតហេតុ, ការសម្ភាសន៍ជនរងគ្រោះ, ការកំណត់អត្តសញ្ញាណជនល្មើស, ការសម្ភាសន៍ជនសង្ស័យ, ដីកាការពារ និងការយល់ដឹងពីយេនឌ័រ សុទ្ធសឹងតែជាតម្រូវការចាំបាច់។ ជាសំណូមពរតាមរយៈអគ្គស្នងការនគរបាលជាតិ ក៏ដូចជាអ្នកសម្របសម្រួលវគ្គ គឺលោកចង់បានណាស់នូវវគ្គនេះ ព្រោះបានផ្ដល់នូវសារប្រយោជន៍ដល់កងកម្លាំងដែលកំពុងអនុវត្តភារកិច្ចនេះ។ អ្វីដែលត្រូវការបំផុតនោះគឺសំភារ ព្រោះថាជំនាញនៅមានការខ្វះខាតផ្នែកសំភារសម្រាប់ប្រើប្រាស់លើគោលដៅ ហើយលោកក៏សូមថ្លែងអំណរគុណចំពោះអង្គការស៊ីសាដែលបានបង្កើតឱ្យមានវគ្គនេះឡើង៕  |
| ឈ្មួញអណ្តើក កន្ធាយ និងពង្រូលជិះម៉ូតូឌុបបម្រុងឡើងរថយន្តក្រុងជាប់អន្ទាក់ Posted: 02 Apr 2011 11:06 PM PDT  ខេត្តពោធិ៍សាត់ ៖ សត្វកន្ធាយចំនួន៣ក្បាល ទម្ងន់៤គីឡូក្រាមមួយខាំ អណ្តើក១ក្បាល ទម្ងន់៣គីឡូក្រាម២ខាំ និងពង្រូល១ក្បាលទម្ងន់១គីឡូក្រាមត្រូវបានសមត្ថកិច្ចស្ទាក់ចាប់បានកាលពីវេលាម៉ោង៨ព្រឹក ថ្ងៃទី១ មេសា ឆ្នាំ២០១១ ត្រង់ចំណុចភូមិខ្លាក្រពើ ឃុំអន្លង់ត្នោត ស្រុកក្រគរ ខណៈពេលម្ចាស់សត្វទាំងនោះជិះម៉ូតូឌុបកាត់ព្រៃបម្រុងឡើងរថយន្តក្រុងទៅកាន់រាជធានីភ្នំពេញ។ តាមប្រភពពីសមត្ថកិច្ចឱ្យដឹងថា នៅព្រឹកថ្ងៃទី១ នោះប្រជាជនភូមិខ្លាក្រពើបានរាយការណ៍មកថា មានឈ្មួញលួចដឹកសត្វព្រៃតាមម៉ូតូចេញពីក្នុងព្រៃឡើងមកផ្លូវលំសំដៅទៅផ្លូវជាតិលេខ៥។ ភ្លាមនោះសមត្ថកិច្ចបានចាត់វិធានការពង្រាយកម្លាំងតាមផ្លូវដើម្បីឃ្លាំមើល ។ មួយសន្ទុះក្រោយមក ស្រាប់តែឃើញមនុស្សពីរនាក់កំពុងជិះម៉ូតូដែលម្នាក់ជាអ្នកបើកបរ និងម្នាក់ទៀតជិះពីក្រោយអោបការ៉ុង ។ មកដល់ចំណុចភូមិខ្លាក្រពើក្រឡេកឃើញសមត្ថកិច្ច ពួកគេបានឈប់ម៉ូតូឱ្យអ្នកបើកម៉ូតូទៅមុន ឯម្នាក់ទៀតបានយកការ៉ុងដែលអង្គុយអោបពីមុខនោះកាន់រត់ចូលក្នុងព្រៃ ។ ឃើញដូច្នេះដោយមានការសង្ស័យសមត្ថកិច្ចបានរត់ដេញតាម ។ ដោយសារសត្វក្នុងការុងធ្ងន់លំបាកកាន់រត់ ហើយព្រៃលំបាកត្បុលចូលផងនោះ គេក៏ទំលាក់ការុងចោលរត់យកតែរួចខ្លួនបាត់ទៅ ។ នៅពេលសមត្ថកិច្ចឆែកមើលក្នុងការ៉ុង ស្រាប់តែឃើញសត្វអណ្តើក១ក្បាល កន្ធាយ៣ក្បាល និងពង្រួល១ក្បាល ក៏យកមកប្រគល់ឱ្យផ្នែករដ្ឋបាលព្រៃឈើក្រគរតែម្តង ។ លោកគឹម ចេត្ថាវី នាយផ្នែករដ្ឋបាលព្រៃឈើក្រគរដែលធ្វើកំណត់ទទួល បានឱ្យដឹងថា ចំពោះសត្វព្រៃទាំងនេះនឹងធ្វើពិធីប្រគល់បន្តទៅឱ្យខាងអង្គការ Wild Aid នៅថ្ងៃទី២ មេសា នេះសម្រាប់យកទៅធ្វើការអភិរក្សនៅភ្នំតាម៉ៅ។ លោកសុំឱ្យប្រជាជនមេត្តាជួយសហការផ្តល់ព័ត៌មានបើឃើញ ឬដឹងថា រថយន្តណាលួចដឹកឈើ ឬដឹកសត្វព្រៃដើម្បីក្រុមរបស់លោកមានវិធានការបង្ក្រាបបានទាន់ពេលវេលា ៕  |
| ស្ថានភាពទឹកភ្លៀង និងការចាប់ផ្តើមនៃរដូវវស្សាឆ្នាំ២០១១ Posted: 02 Apr 2011 08:45 PM PDT  រាជធានីភ្នំពេញ ៖ យោងតាមសេចក្តីជូនដំណឹងរបស់ក្រសួងធនធានទឹក និងឧតុនិយម សូមជម្រាបជូនដំណឹងដល់សាធារណជនឱ្យបានជ្រាបថា បន្ទាប់ពីបានធ្វើការសង្កេត តាមដានលើស្ថានភាពធាតុអាកាសរួចមក ឃើញថា កាលពីថ្ងៃទី២ មេសា ២០១១ នៅសមុទ្រចិនខាងត្បូង មានបាតុភូតសម្ពាធទាបបានកើតឡើងជាបន្តបន្ទាប់ ។ បាតុភូតសម្ពាធទាបទាំងនេះ នឹងមានឥទ្ធិពលមកលើព្រះរាជាណាចក្រកម្ពុជា បង្កឱ្យមានភ្លៀងបន្តធ្លាក់រាយប៉ាយពីតិចទៅមធ្យម នៅក្នុងក្របខណ្ឌទូទាំងប្រទេស ពិសេសនៅតំបន់មាត់សមុទ្រ និងតំបន់ទំនាបកណ្តាល ចាប់ពីដើមខែមេសា ឆ្នាំ២០១១ នេះតទៅ ។ ឥទ្ធិពលនៃសម្ពាធទាបដែលបង្កឱ្យមានភ្លៀងធ្លាក់នេះ ជាកត្តាមួយជំរុញឱ្យរដូវវស្សាឆ្នាំ២០១១ នេះ ចាប់ផ្តើមលឿនជាងរដូវវស្សានៃបណ្តាឆ្នាំកន្លងទៅ ។ អាស្រ័យដូចបានជម្រាបជូនខាងលើ សូមសាធារណជនជ្រាបជាព័ត៌មាន ពិសេសចំពោះប្រជាកសិករ សូមមានវិធានការត្រៀមលក្ខណៈឱ្យបានសមស្របសម្រាប់ការងារបង្កបង្កើនផលស្រូវរដូវវស្សា ដែលនឹងឈានមកដល់នាពេលដ៏ខ្លីខាងមុខនេះ ។ ក្រសួងធនធានទឹក និងឧតុនិយមនឹងបន្តតាមដានស្ថានភាពអាកាសធាតុ ហើយនឹងធ្វើសេចក្តីជូនដំណឹងបន្ថែមជាបន្តទៀត ក្នុងករណីដែលអាកាសធាតុមានការប្រែប្រួល ឬមានបាតុភូតធម្មជាតិផ្សេងៗកើតឡើងជាយថាហេតុ ៕  |
| Posted: 02 Apr 2011 08:42 PM PDT  រាជធានីភ្នំពេញ ៖ គណបក្សហ៊្វុនស៊ីនប៉ិច បានធ្វើសមាជថ្នាក់ជាតិជ្រើសរើសលោកញឹក ប៊ុនឆៃ ជាប្រធានប្រតិបត្តិ លោកលឺ ឡាយស្រេង ជាប្រធានកិត្តិយស និងលោកកែវ ពុទ្ធរស្មី ជាមគ្គុទ្ទេសក៍បក្ស...សមាជនេះថែមទាំងបើកសម្ពោធស្នាក់ការថ្មីកាលពីថ្ងៃទី២ មេសា ២០១១ ផងដែរ។ សមាជនេះបានធ្វើឡើងក្រោមអធិបតីភាពលោកកែវ ពុទ្ធរស្មី អតីត ប្រធានគណបក្សហ៊្វុនស៊ីនប៉ិច និងមានការចូលរួមពីសមាជិក សមាជិកាប្រមាណជិត៣.០០០នាក់ មកពី២៤ខេត្ត-ក្រុង ទូទាំងប្រទេស នៅឯទីស្នាក់ការថ្មីរបស់គណបក្ស ស្ថិតក្នុងភូមិក្តីចាស់ សង្កាត់បាក់ខែង ខណ្ឌឫស្សីកែវ រាជធានីភ្នំពេញ ។ យោងតាមលទ្ធផលនៃសមាជបានឱ្យដឹងថា ទី១-សមាជបានគាំទ្រជាឯកច្ឆន្ទការធ្វើវិសោធនកម្មលក្ខន្តិកៈ និងបទបញ្ជាផ្ទៃក្នុងឱ្យមានភាពប្រសើរ ស្របតាមទិសដៅនៃការកែទម្រង់ស៊ីជម្រៅនាថ្ងៃទី១៨ តុលា ២០០៦ ដោយលើកកម្ពស់ប្រជាធិបតេយ្យ តម្លាភាព និងគណនេយ្យភាពនៅក្នុងការអនុវត្តដោយប្រសិទ្ធភាពទៅតាមគោលនយោបាយរបស់គណបក្សដែលបែងចែកការទទួលខុសត្រូវដាច់ពីគ្នារវាងអង្គនីតិបញ្ញត្តិ និងអង្គនីតិប្រតិបត្តិ។ ទី២-គាំទ្រសមាជក្រុមប្រឹក្សាជាតិគណបក្សដែលមាន៣.០០០នាក់ សម្រាប់អាណត្តិ៥ឆ្នាំ ចាប់ពីពេលនេះតទៅ ។ ទី៣-ជ្រើសតាំងលោកកែវ ពុទ្ធរស្មី ជាមគ្គុទ្ទេសក៍គណបក្ស និងលោកញឹក ប៊ុនឆៃ ជាប្រធានប្រតិបត្តិគណបក្សសម្រាប់រយៈពេល៥ឆ្នាំ ចាប់ពីពេលនេះតទៅ និងទី៥-គាំទ្រលោកលឺ ឡាយស្រេង ជាប្រធានកិត្តិយសរបស់គណបក្ស ។ លោកកែវ ពុទ្ធរស្មី បានមានប្រសាសន៍ថា វាជាថ្ងៃដ៏អស្ចារ្យមួយដែលគណបក្សហ៊្វុនស៊ីនប៉ិចបានធ្វើសមាជថ្នាក់ជាតិរបស់ខ្លួនដើម្បីកែទម្រង់នូវលក្ខន្តិកៈផ្ទៃក្នុងរបស់ខ្លួនក៏ដូចជាការពង្រឹងការលើកកម្ពស់ប្រជាធិបតេយ្យ ។ តម្លាភាពនិងគណនេយ្យភាពនៅក្នុងការអនុវត្តដោយប្រសិទ្ធភាពគោលនយោបាយរបស់បក្ស។ លោកបន្តថា យើងមិនភ្លេចនូវដើម កំណើតរបស់យើងនោះទេ ដែលកាលពីអាណត្តិ ទី១គណបក្សហ៊្វុនស៊ិនប៉ិចបានសហការល្អជា មួយគណបក្សប្រជាជនកម្ពុជាដោយនាំមកនូវលទ្ធិប្រជាធិបតេយ្យ របបរាជានិយមអាស្រ័យ ធម្មនុញ្ញ និងបាវចនារបស់ជាតិ «ជាតិ សាសនា ព្រះមហក្សត្រ» និងសហការទប់ស្កាត់ការឈ្លានពានទឹកដីពីបរទេស។ លោកកែវ ពុទ្ធរស្មី បានលើកឡើងថា គណបក្សហ៊្វុនស៊ីនប៉ិចធ្លាប់ទទួលបានការគាំទ្រច្រើនកាលពីអាណត្តិ១ ប៉ុន្តែលោកទទួលស្គាល់ថា ដោយសារតែមានការមិនទុក្ខចិត្តគ្នា និងការបែកបាក់ផ្ទៃក្នុងបានធ្វើឱ្យសំឡេងគាំទ្រមានការថយ ចុះរហូតមកដល់ពេលនេះមានតែពីរអាសនៈ។ មានសមាជិកចំនួន២០០នាក់ មកពីគណបក្សសម រង្ស៊ី និងពីគណបក្សនរោត្តម រណឫទ្ធិ ដែលបានឈប់ពីគណបក្សដើមរបស់ខ្លួនមករួបរួមជាមួយគណបក្សហ៊្វុនស៊ីនប៉ិច៕  |
| គ្រោះថ្នាក់ចរាចរណ៍ក្នុង១ថ្ងៃស្លាប់៥នាក់ និងរងរបួស៥០នាក់ Posted: 02 Apr 2011 08:41 PM PDT  រាជធានីភ្នំពេញ ៖ លោកតូច ចាន់កុសល រដ្ឋលេខាធិការក្រសួងសាធារណការ និងដឹកជញ្ជូន និងជាអនុប្រធានគណៈកម្មាធិការជាតិ សុវត្ថិភាពចរាចរណ៍ផ្លូវគោកបានមានប្រសាសន៍ថា «ការស្លាប់ដោយគ្រោះថ្នាក់ចរាចរណ៍មានការកើនឡើងជាលំដាប់ជារៀងរាល់ថ្ងៃគួរឱ្យព្រួយបារម្ភ ។ ក្នុង១ថ្ងៃគ្រោះថ្នាក់ចរាចរណ៍បណ្តាលឱ្យមនុស្សស្លាប់ជាមធ្យម៥នាក់ និងប្រមាណ៥០នាក់ទៀតរងរបួស ។ លោកតូច ចាន់កុសល ថ្លែងបែបនេះ នៅក្នុងឱកាសនៃកិច្ចប្រជុំគម្រោងសុវត្ថិភាពចរាចរណ៍ទាំង១០ប្រទេស នៅកម្ពុជាកាលពីព្រឹកថ្ងៃទី៣១ មីនា នៅសណ្ឋាគារសាន់វ៉េ ។ លោករដ្ឋលេខាធិការបានបន្តថា តាមរបាយការណ៍បណ្តោះ អាសន្នរបស់គណៈកម្មាធិការជាតិសុវត្ថិភាពចរាចរណ៍ផ្លូវគោក បានបង្ហាញថា កាលពីឆ្នាំ២០១០ ចំនួនគ្រោះថ្នាក់ចរាចរណ៍មានចំនួនប្រហែល៨.០០០ករណី ជនរងគ្រោះសរុបចំនួន១៨.១៩៦នាក់ ដែលក្នុងនោះមានជនរងគ្រោះស្លាប់មានចំនួន១.៨៣៧នាក់ រងរបួសធ្ងន់ចំនួន៦.៨៧៤នាក់ និងរបួសស្រាល៨.៩៤៧នាក់ ។ គ្រោះថ្នាក់ចរាចរណ៍បានទម្លាក់បន្ទុកស្ថានភាពហិរញ្ញវត្ថុដល់សមាជិកគ្រួសារដែលនៅរស់រានមានជីវិត ដែលជាសមាជិកគ្រួសារនៃជនរងគ្រោះ និងចូលរួមចំណែកក្នុងការបង្អាក់នូវដំណើរការអភិវឌ្ឍន៍ប្រទេសជាតិថែមទៀតផង។ លោកតូច ចាន់កុសល បានរំឭកថា ដើម្បីឆ្លើយតបនឹងបញ្ហាខាងលើ តាមរយៈកិច្ចប្រជុំអន្តរជាតិថ្នាក់រដ្ឋមន្ត្រីក្រសួងដឹកជញ្ជូនស្តីពីបញ្ហាសុវត្ថិភាពចរាចរណ៍ផ្លូវគោកនៅទីក្រុងម៉ូស្គូ កាលពីខែវិច្ឆិកា ឆ្នាំ២០០៩ កន្លងទៅ មូលនិធិប្លូមប៊ីក បានជ្រើសរើសកម្ពុជាក្នុងចំណោមប្រទេសទាំង១០នៅលើសាកលលោក ដើម្បីអនុវត្តគម្រោងសុវត្ថិភាពចរាចរណ៍ ។ តាមរយៈគម្រោងនេះ កម្ពុជាបានអនុវត្តរយៈពេលជិត១ឆ្នាំហើយ គឺនៅពាក់កណ្តាលឆ្នាំ២០១០ ហើយសម្រាប់កម្ពុជា គឺផ្តោតសំខាន់ទៅលើការអនុវត្តច្បាប់ទាក់ទងនឹងការពាក់មួកសុវត្ថិភាព និងការបើកបរក្នុងពេលស្រវឹង ទាំងនៅពេលថ្ងៃ និងពេលយប់ ដែលបញ្ហាទាំង២នោះគឺជាបញ្ហាបង្កឱ្យមានអត្រាការស្លាប់ខ្លាំងជាងគេនៅក្នុងករណីគ្រោះថ្នាក់ចរាចរណ៍ ។ ក្នុងរយៈពេលជិត១ឆ្នាំមកនេះ កម្ពុជាបានទទួលថវិកាសរុបប្រមាណ២១៣.៥០០ដុល្លារសហរដ្ឋអាមេរិក សម្រាប់អនុវត្តគម្រោងខាងលើនៅក្នុងឆ្នាំទី១ ទៅលើតំបន់គោលដៅចំនួន៣ គឺរាជធានីភ្នំពេញ ខេត្តកណ្តាល និងខេត្តកំពង់ស្ពឺ ។ បន្តិចទៀត ក្រុមការងារស្នួលដែលអនុវត្តគម្រោងនឹងឡើងធ្វើបទបង្ហាញលម្អិតពីសកម្មភាពការងារដែលបានអនុវត្តកន្លងទៅ ពីភាពជោគជ័យ និងបញ្ហាប្រឈម ។ លោកតូច ចាន់កុសល បានឱ្យដឹងទៀតថា កិច្ចប្រជុំនៅថ្ងៃនេះ រៀបចំឡើងក្នុងគោលបំណងដើម្បីប្រជុំតាមដាននូវការអនុវត្តការងារសុវត្ថិភាពចរាចរណ៍ ក្នុងគម្រោងសុវត្ថិភាពចរាចរណ៍សម្រាប់១០ប្រទេសនៅកម្ពុជា និងម្ចាស់ជំនួយគឺមូលនិធិប្លូមប៊ីក និងដើម្បីសម្រេចនូវការលើកផែនការឆ្នាំ២០១១ ព្រមទាំងការលើកទិសដៅសម្រាប់ឆ្នាំ២០១២-២០១៥ ។ ការអនុវត្តគម្រោងនេះស្របទៅនឹងផែនការសកម្មភាពសុវត្ថិភាពចរាចរណ៍ផ្លូវគោករយៈពេល១០ឆ្នាំ (ឆ្នាំ២០១១-២០២០) ដែលបច្ចុប្បន្ន គណៈកម្មាធិការជាតិសុវត្ថិភាពចរាចរណ៍ផ្លូវគោក កំពុងតែរៀបចំដាក់ឆ្លងទីស្តីការគណៈរដ្ឋមន្ត្រី ដើម្បីសុំការប្រកាសទទួលស្គាល់ជាផ្លូវការនូវផែនការនេះ ដោយសម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា៕  |
| ការប្រយុទ្ធគ្នាបន្តនៅកូតឌីវ័រស្លាប់៨០០នាក់នៅភាគខាងលិចប្រទេស Posted: 02 Apr 2011 08:36 PM PDT  កងយោធាដែលគាំទ្រលោកអាឡាសសានអ៊ូអាតារ៉ា បានជួបប្រទះនឹងការតស៊ូទប់ទល់យ៉ាងស្វិតស្វាញបំផុតពីសំណាក់ពួកយុទ្ធជនរបស់ប្រធានាធិបតីចប់អាណត្តិកូតឌីវ័រ លោកឡូរ៉ង់ហ្សេបាបូ កាលពីថ្ងៃទី២ មេសា នៅទីក្រុងអាប៊ីដហ្សាន់ ដែលនៅទីនោះកងកម្លាំងទាំង២ក្រុមបានច្បាំងគ្នាដើម្បីដណ្តើមត្រួតត្រាប្រទេសកូតឌីវ័រ ។ ជាសញ្ញាភាពធ្ងន់ធ្ងរនៃជម្លោះកាកបាទក្រហមអន្តរជាតិ CICR ប្រកាសថា អំពើហិង្សាអន្តរសហគមន៍បណ្តាលឱ្យមនុស្សស្លាប់យ៉ាងតិច៨០០នាក់កាលពីថ្ងៃទី២៩ មីនា កន្លងមកនេះ នៅទីក្រុង DUEKOUE ភាគខាងលិចប្រទេស ដែលធ្លាក់ក្នុងកណ្តាប់ដៃរបស់កងកម្លាំងប្រធានាធិបតីជាប់ឆ្នោតលោកអាឡាសសាន អ៊ូអាតារ៉ា។ នៅក្រុងអាប៊ីដហ្សាន់ យោងតាមវិទ្យុ និងទូរទស្សន៍កូតឌីវ័រ និងក្រុមយោធាថា ការប្រយុទ្ធគ្នារវាងកងកម្លាំងប្រឆាំងគ្នានៅជុំវិញវិមានប្រធានាធិបតីមានសភាពយ៉ាងស្វិតស្វាញបំផុត ។ វិទ្យុ និងទូរទស្សន៍នេះរៀបរាប់ថា កងកម្លាំងលោកហ្សេបាបូ នៅតែត្រួតត្រាតំបន់នេះជានិច្ច ក៏ប៉ុន្តែដោយសារការប្រយុទ្ធគ្នាខ្លាំងពេកវិទ្យុ និងទូរទស្សន៍នេះដាច់ការផ្សាយមួយរយៈ រួចបន្ទាប់មកផ្សាយឡើងវិញដោយបង្ហាញរូបភាព របស់លោកហ្សេបាបូ កំពុងអង្គុយពិសាតែក្នុងទឹកមុខតានតឹង ។ រូបភាពទាំងនេះទើបថតថ្ងៃទី២ មេសា ។ ការបាញ់តគ្នា ដោយអាវុធធុនស្រាល និងធុនធ្ងន់បានលាន់ឮពេញមួយពេលព្រឹកនៅតាមច្រកចូលទាំងឡាយនៃវិមានប្រធានាធិបតីនៅ PLATEAU ។ ការប៉ះទង្គិចគ្នាក៏កើតមានដែរនៅក្នុងទីតាំងវិទ្យុ និងទូរទស្សន៍ ព្រមទាំងក្នុងជំរំកងកម្រួត ។ យុទ្ធជនម្នាក់របស់លោកហ្សេបាបូ និយាយថា យើងនឹងប្រយុទ្ធរហូតដល់ជីវិតចុងក្រោយ ដើម្បីការពារដែនដីយើង ។ មានមនុស្សស្លាប់ច្រើននាក់ទាំងសងខាង ។ ដោយឆ្លើយតបតាមការអំពាវនាវមួយតាមទូរទស្សន៍ យុវជនស្នេហាជាតិជាច្រើននាក់បានលើកគ្នាមកកាន់វិមានប្រធានាធិបតី ឬទៅកាន់កន្លែងយុទ្ធសាស្ត្រជាច្រើនទៀតនៃក្រុងអាប៊ីដហ្សាន់ ។ នៅទីក្រុង DUEKOUE អង្គការការពារសិទ្ធិមនុស្ស CARTIAS រាយការណ៍ពីមនុស្សជាច្រើនសិបនាក់ត្រូវបាត់ខ្លួនបន្ថែមលើការស្លាប់មនុស្សជាង៨០០នាក់ រាយការណ៍ដោយ CICR៕  |
| អនិច្ចាស្ពានឈើស្រុតស្ទើរដល់ទឹករកម្ចាស់មិនឃើញ Posted: 02 Apr 2011 08:09 PM PDT  ខេត្តកំពត ៖ ស្របពេលរាជរដ្ឋាភិបាលកំពុងជំរុញឱ្យមានការអភិវឌ្ឍន៍តាំងពីក្រុងរហូតដល់ទីជនបទ ក៏ពិតមែន ប៉ុន្តែពិតជានៅមានការងារច្រើនណាស់ ដែលត្រូវបន្តពុះពារ ។ ជាក់ស្តែងស្ពានឈើបាក់ស្រុតមួយកន្លែងប្រវែង២៥ម៉ែត្រ ឆ្លងព្រែកមួយ ស្ថិតនៅភូមិប្ញស្សីជួរ ឃុំស្តេចគង់ខាងត្បូង ស្រុកបន្ទាយមាស ដែលតាមការឱ្យដឹងពីប្រជាពលរដ្ឋនៅភូមិប្ញស្សីជួរបាននិយាយថា មានកូនសិស្សតូចៗបានដើរឆ្លងកាត់ស្ពាន ឈើនេះទៅសាលារៀន ហើយពេលដើរឆ្លងម្តងៗស្ទើរបាត់ព្រលឹងដោយសារតែស្ពានញ័ររញ្ជួយខ្លាំង ។ ប្រជាពលរដ្ឋបាននិយាយបន្តឱ្យដឹងថា មាន អង្គការមិនមែនរដ្ឋាភិបាលមួយ បានស្ថាបនាផ្លូវលំមួយខ្សែនេះ និងបានក្រាលក្រួសក្រហមរួចជាស្រេចហើយ ប៉ុន្តែអង្គការនេះបានធ្វើផ្លូវត្រឹមតែមាត់ព្រែកមិនបានធ្វើស្ពានឱ្យដើរឆ្លងទេ ។ អ្នកភូមិក៏បាននាំគ្នាធ្វើស្ពានឆ្លងនេះដោយខ្លួនឯង តែជាអកុសលជនមិនស្គាល់មុខបានលួចគាស់យកឈើកំណល់ស្ពាននេះបាត់អស់ទៅទៀតហើយ ប្រជាពលរដ្ឋក្នុងភូមិក៏បាននាំគ្នាធ្វើស្ពានឈើនេះម្តងទៀត ។ ប្រភពបន្តថា ខែប្រាំងប្រជាពលរដ្ឋមិនពិបាកឆ្លងកាត់ដូចនៅរដូវវស្សាទេ ព្រោះមិនមានការរអិល ។ ប្រជាពលរដ្ឋសំណូមពរដល់អាជ្ញាធរ និងថ្នាក់ខេត្តជួយធ្វើយ៉ាងណា ឱ្យពលរដ្ឋនៅក្នុងភូមិមានស្ពានដើរឆ្លង ជាពិសេសកូនសិស្សអាចឆ្លងទៅសាលារៀនបានស្រួលផង ។ លោកអ៊ូ គឹន មេឃុំស្តេចគង់ខាងជើងបានឱ្យដឹងថា ស្ពានឆ្លងកាត់ដៃព្រែកនេះគ្មានម្ចាស់ទេ ព្រោះស្ថិតនៅក្នុងព្រំប្រទល់ឃុំស្តេចគង់ទាំង២ ដូច្នេះឃុំមិនទាន់មានការឯកភាពគ្នាច្បាស់លាស់ ម្យ៉ាងពុំមានកញ្ចប់ថវិកាសម្រាប់កសាងផង ។ ហេតុនេះហើយធ្វើឱ្យមានការពិបាកដល់ពលរដ្ឋ វាសនាស្ពានព្រែកប្ញស្សីជួរបើគ្មានមន្ត្រីចាប់អារម្មណ៍ទេ ពិតជាទុកចោលបន្តឱ្យក្មួយៗដើរឆ្លងទាំងលំបាកបែបនេះតទៅទៀត ។ គេមានសង្ឃឹមតែម្យ៉ាងទេ គឺក្រុមការងារពិតជាមិនយកភ្នែកមើលការលំបាកនេះតទៅទៀតឡើយ ម្យ៉ាងជិតដល់ថ្ងៃបោះឆ្នោតក្រុមប្រឹក្សាឃុំ-សង្កាត់ ហើយគួរតែធ្វើស្ពានដ៏ទ្រុឌទ្រោមនេះ ៕  |
| បើកលឿនវ៉ារថយន្តពីមុខធ្លាក់ផ្លូវក្រឡាប់ឃើញសុទ្ធតែឈើគ្រញូង Posted: 02 Apr 2011 08:03 PM PDT  ខេត្តពោធិ៍សាត់ ៖ រថយន្តមួយគ្រឿងដែលបានបើកវ៉ារថយន្តមួយគ្រឿងទៀតបណ្តាលឱ្យជ្រុលចង្កូតធ្លាក់ផ្លូវក្រឡាប់២-៣ត្រឡប់ ធ្លាយចេញសុទ្ធតែឈើគ្រញូង ឯអ្នកបើកបរនិងអ្នករួមដំណើរបានរត់គេចខ្លួនទាំងរងរបួស ។ មន្ត្រីប៉ូលិសចរាចរឱ្យដឹងថា គ្រោះថ្នាក់ចរាចរណ៍នេះកើតឡើងនៅលើផ្លូវជាតិលេខ៥ ទល់មុខខ្លោងទ្វារចូលទៅកាន់វត្តសេរីយស្សា ហៅសម្តេច ស្ថិតនៅភូមិវាលវង់ ឃុំស្នាអន្សាស្រុកក្រគរ ខេត្តពោធិ៍សាត់ កាលពីថ្ងៃទី១ មេសា ឆ្នាំ២០១១ វេលាម៉ោង៨ព្រឹក ។ រថយន្តបង្កគ្រោះថ្នាក់ម៉ាកកាមរីគូទស្វិត ស៊េរី៨៩ ពណ៌ទឹកប៊ិច ពាក់ស្លាកលេខ ឃ-៦៥៧៦ ភព២ ផ្ទុកឈើគ្រញូងចំនួន៨០កំណាត់ ។ ប្រជាពលរដ្ឋដែលរស់នៅក្បែរកន្លែងកើតហេតុនិយាយថា នៅព្រឹកថ្ងៃនោះគេឃើញរថយន្តខាងលើបើកលឿនដូចហោះក្នុងទិសដៅពីលិចទៅកើត លុះមកដល់ចំណុចកើតហេតុបានវាក់នឹងរថយន្តទួរីសមួយគ្រឿងដែលកំពុងធ្វើដំណើរស្របទិសគ្នា ។ ដោយសារល្បឿនរថយន្តកាមរីលឿនហួសកំណត់ហើយកៀកពីក្រោយរថយន្តទួរីសពេកមិនអាចបង្អង់បានក៏គេចវ៉ាទៅខាងឆ្វេងដៃបណ្តាលឱ្យជ្រុលចង្កូតធ្លាក់ផ្លូវបុកផ្ញុចនឹងភ្លឺស្រែក្រឡាប់២-៣ត្រឡប់ធ្លាយចេញសុទ្ធតែឈើគ្រញូង ។ ប្រជាពលរដ្ឋនិយាយទៀតថា រថយន្តបានខូចខាតខ្ទេចខ្ទីហើយភ្លាមនោះគេឃើញមនុស្សពីរនាក់លូនចេញពីក្នុងរថយន្តទាំងឈាមហូរជោកខ្លួនរួចដើរទៅណាបាត់ ទុករថយន្តចោលនៅទីនោះ ហើយអ្នកស្រុកភូមិបាននាំគ្នាទៅចោមរោមមើលយ៉ាងច្រើនទាំងអារម្មណ៍ភ័យតក់ស្លុតជំនួស ។ អ្នកទៅចោមរោមមើលលាន់មាត់ថា សំណាងល្អខូចតែរថយន្តមិនស្លាប់មនុស្ស ម្យ៉ាងវិញទៀតកន្លែងគ្រោះថ្នាក់គ្មានផ្ទះប្រជាពលរដ្ឋនិងគ្មានអ្នកដើរកំសាន្ត ។ ក្រោយពេលកើតហេតុ រថយន្តនិងឈើគ្រញូងទាំង៨០កំណាត់ត្រូវបានសមត្ថកិច្ចយកទៅរក្សាទុកនៅផ្នែករដ្ឋបាលព្រៃឈើក្រគរ ។ បើតាមប្រភពព័ត៌មានបានប្រាប់កោះសន្តិភាពថា សព្វថ្ងៃនេះការដឹកជញ្ជូនឈើគ្រញូងបានចាប់់ផ្តើមកម្រើកវិញទៀតហើយ ហើយកន្លែងស្តុកឈើលើកដាក់ឈើនោះត្រូវបានគេដឹងថា នៅភូមិចំការចេក ដែលសមត្ថកិច្ចធ្លាប់បង្ក្រាបកន្លងមក និងមួយកន្លែងទៀតនៅខាងជើងផ្សារចាស់ភូមិពាលញែក២ ផ្លូវចូលទៅតារាងបាល់ គឺចេញស្ទើររាល់យប់ ៕  |
| អូតង់វាយប្រហារច្រឡំសម្លាប់ជនស៊ីវិល និងពួកបះបោរលីប៊ី Posted: 02 Apr 2011 07:59 PM PDT  ពួកបះបោរលីប៊ីអះអាងថា ពួកឧទ្ទាម និងជនស៊ីវិលជាង១០នាក់ បានត្រូវស្លាប់ក្នុងការវាយប្រហារតាមអាកាសមួយរបស់អូតង់កាលពីថ្ងៃទី១ មេសា កន្លងមកនេះ នៅជិតទីក្រុង BREGA ។ ពួកឧទ្ទាមលីប៊ីនិយាយកាលពីថ្ងៃទី២ មេសា ថា កងទ័ពចម្រុះវាយប្រហារច្រឡំដោយទម្លាក់គ្រាប់បែកសម្លាប់ពួកបះបោរ៩នាក់ និងជនស៊ីវិល៤នាក់ កាលពីយប់ថ្ងៃទី១ មេសា ក្នុងតំបន់ BREGA ។ អូតង់ដែលឡើងធ្វើមេបញ្ជាការប្រតិបត្តិការយោធានៅលីប៊ីបានប្រកាសភ្លាមៗថា ខ្លួនបានពិនិត្យព័ត៌មានទាំងឡាយអំពីការវាយប្រហារច្រឡំនេះ ។ យោងតាមអ្នកទទួលខុសត្រូវខាងនយោបាយម្នាក់របស់ទីក្រុង AJDABIYA ទទួលបន្ទុកខាងទំនាក់ទំនងជាមួយពួកបះបោរថា យន្តហោះមួយគ្រឿងរបស់កងទ័ពចម្រុះបានវាយប្រហារនៅកន្លែងមួយចម្ងាយ១៥គីឡូម៉ែត្រខាងកើតទីក្រុងប្រេងកាត BREGA លើក្បួនរថយន្តមួយខ្សែមានរថយន្តពី៥ទៅ៦គ្រឿង ក្នុងនោះមានរថយន្តសង្គ្រោះមួយគ្រឿងផង។ យុទ្ធជនបះបោរ៩នាក់បានត្រូវស្លាប់ក្នុងការវាយប្រហារនេះ រួមទាំងជនស៊ីវិល៤នាក់ស្ថិតក្នុងរថយន្តសង្គ្រោះដែលក្នុងចំណោមពួកគេមានអ្នកបើកបរ និងនិស្សិតពេទ្យ៣នាក់នៅក្រុងបេនហ្គាហ្ស៊ី ៕  |
| ចូលរួមផ្តល់ព័ត៌មានដើម្បីការអភិវឌ្ឍនិងការអប់រំដោយចីរភាព Posted: 02 Apr 2011 07:54 PM PDT   ខេត្តពោធិ៍សាត់ ៖ កាលពីរសៀលថ្ងៃទី៣១ មីនា លោកខៀវ កាញារីទ្ធ រដ្ឋមន្ត្រីក្រសួងព័ត៌មាន បានអញ្ជើញបិទសិក្ខាសាលាស្តីពី «ចូលរួមផ្តល់ព័ត៌មានដើម្បីការអភិវឌ្ឍ និងការអប់រំដោយចីរភាព» នៅមជ្ឈមណ្ឌលអភិវឌ្ឍន៍ប៊ុន រ៉ានី ហ៊ុន សែន ដោយមានការចូលរួមពីលោកខូយ សុខា អភិបាលខេត្តពោធិ៍សាត់់ និងលោកមួង សុវត្ថិ តំណាងគណៈកម្មការជាតិយូណេស្កូកម្ពុជាផងដែរ ។ លោកផាន់ វណ្ណសិទ្ធិ ប្រធានមន្ទីរព័ត៌មានខេត្តពោធិ៍សាត់បានជម្រាបជូនថា រយៈពេលពេញមួយថ្ងៃនេះ សិក្ខាកាមជាមេឃុំ-សង្កាត់ទាំង៤៩ អភិបាលនិងក្រុមប្រឹក្សាស្រុក-ក្រុងទាំង៦ បានយល់ដឹងអំពីអ្វីទៅជាព័ត៌មាន ? ព័ត៌មានជាអ្វី ? ការប្រមូលព័ត៌មាន របៀបសរសេរព័ត៌មាន និងរបៀបយកព័ត៌មាន ហើយសិក្ខាសាលានេះគឺជាលើកទី១ ហើយសម្រាប់មន្ទីរព័ត៌មានខេត្ត។ ព័ត៌មានមានសារសំខាន់ណាស់ដែលមនុស្សគ្រប់រូបមិនអាចខ្វះបានក្នុងការទំនាក់ទំនងគ្នារាល់ថ្ងៃ លើកលែងតែព្រះក្នុងវិហារប៉ុណ្ណោះ ។ លោកបានថ្លែងអំណរគុណចំពោះរាជរដ្ឋាភិបាលតាមរយៈក្រសួងព័ត៌មានដែលបានផ្តល់កាដូសម្រាប់ប្រជាជនខេត្តពោធិ៍សាត់ នូវវិទ្យុជាតិ FM98.5 MHz កម្លាំងផ្សាយ២គីឡូវ៉ាត់ និងទូរទស្សន៍ជាតិសម្រាប់បន្តពីភ្នំពេញដែលមានវិសាលភាពគ្របដណ្តប់ទូទាំងខេត្ត និងបណ្តាស្រុកជិតខាងមួយចំនួន ។ ទន្ទឹមនឹងនេះ លោកប្រធានមន្ទីរមិនភ្លេចថ្លែងអំណរគុណចំពោះអង្គការយូណេស្កូ ដែលបានផ្តល់គម្រោងPP 5652006008 CAM 2010-2011 ដែលបានបែងចែកជាពីរផ្នែក ។ ផ្នែកទី១-ការផ្គត់ផ្គង់សំភារ ផ្នែកទី២-ការបណ្តុះបណ្តាលបច្ចេកទេស និងបើកសិក្ខាសាលាជូនសហគមន៍ឱ្យយល់ដឹងពីសារសំខាន់នៃវិស័យព័ត៌មានចូលរួមផ្តល់ព័ត៌មានដើម្បីផលប្រយោជន៍ទាំងអស់គ្នានៅថ្ងៃនេះ ។ លោកខូយ សុខា អភិបាលខេត្ត បានកោតសរសើរចំពោះមន្ទីរព័ត៌មានតាមរយៈស្ថានីយវិទ្យុនិងទូរទស្សន៍ធ្វើការផ្សព្វផ្សាយឱ្យប្រជាជននៅគ្រប់មូលដ្ឋានបានដឹងនូវសកម្មភាពការងាររបស់ថ្នាក់ដឹកនាំខេត្ត ក៏ដូចជារាជរដ្ឋាភិបាល ព័ត៌មានជាតិ-អន្តរជាតិ និងព្រឹត្តិការណ៍ហេតុការណ៍ផ្សេងៗដែលកើតមានក្នុងប្រទេសនិងលើពិភពលោក ។ លោកខៀវ កាញារីទ្ធ រដ្ឋមន្ត្រីក្រសួងព័ត៌មានមានប្រសាសន៍ថា ការចូលរួមផ្តល់និងទទួលព័ត៌មានបានមកវិញនូវសេវាទាន់ហេតុការណ៍ ដំណឹងពិតជឿទុកចិត្តបាន គឺពិតជានាំឱ្យយើងម្នាក់ៗ សម្រេចចិត្តបានត្រឹមត្រូវ មានតម្លាភាពនិងបង្កើតបានជាកិច្ចសហការយ៉ាងល្អប្រសើរ ។ ក្នុងជីវភាពប្រចាំថ្ងៃរបស់យើងម្នាក់ៗប្រសិនបើយើងមិនបានទទួលដំណឹងព័ត៌មានអ្វីសោះនោះ យើងហាក់បីដូចជាមានអារម្មណ៍ស្ថិតនៅទីកន្លែងមួយឯកោ មិនបានដឹង មិនបានឮអ្វីសោះអំពីព្រឹត្តិការណ៍ជាតិ-អន្តរជាតិដែលកំពុងតែកើតមាន ។ ក្នុងជីវភាពរស់នៅនិងការទំនាក់ទំនងរបស់មនុស្សរវាងបុគ្គល រវាងក្រុមគ្រួសារក្នុងសង្គម រវាងប្រទេសជាតិនីមួយៗ លើពិភពលោកគឺអាស្រ័យលើប្រភពព័ត៌មាន។ ដូច្នេះការចូលរួមដោយស្មារតីខ្ពស់និងសកម្មពីសមាជិក-សមាជិកាសហគមន៍គ្រប់រូប គឺជាកត្តាចាំបាច់ដែលនាំឱ្យយើងទាំងអស់គ្នា កសាងបាននូវការអភិវឌ្ឍ និងការអប់រំដោយចីរភាពបាន ។ ក្នុងឱកាសនោះ លោកខៀវ កាញារីទ្ធ បានឧបត្ថម្ភថវិកាដល់មន្ទីរព័ត៌មានខេត្តពោធិ៍សាត់ចំនួន១.០០០.០០០រៀលផងដែរ ៕  |
| You are subscribed to email updates from Koh Santepheap Daily To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
