VOA News: ព័ត៌មាន: “ទីផ្សារភាគហ៊ុនអាស៊ីបានធ្លាក់ចុះបន្ទាប់ពីមានតួលេខការងារដ៏គួរឱ្យព្រួយបារម្ភនៅអាមេរិកនិងអឺរ៉ុប” plus 3 more |
- ទីផ្សារភាគហ៊ុនអាស៊ីបានធ្លាក់ចុះបន្ទាប់ពីមានតួលេខការងារដ៏គួរឱ្យព្រួយបារម្ភនៅអាមេរិកនិងអឺរ៉ុប
- អោង សាន ស៊ូជី ធ្វើសច្ចាប្រណិធានជាសមាជិករដ្ឋសភា
- ខ្មែរក្រហមមានផែនការសម្លាប់អ្នកមានជាប់ពាក់ព័ន្ធនឹងរបបលោកលន់ ណុល
- ជនសង្ស័យពីររូបត្រូវបានចាប់ខ្លួនពីបទបាញ់សម្លាប់សកម្មជនបរិស្ថាន
| Posted: 03 May 2012 10:39 AM PDT ទីផ្សារភាគហ៊ុនក្នុងទ្វីបអាស៊ីភាគច្រើនបានធ្លាក់ចុះទាបជាងមុននៅថ្ងៃព្រហស្បតិ៍នេះ បន្ទាប់ពីមានតួលេខការងារដ៏គួរឱ្យព្រួយបារម្ភនាទ្វីបអឺរ៉ុបនិងសហរដ្ឋអាមេរិកបានធ្វើឱ្យធ្លាក់ចុះការជឿជាក់លើការងើបឡើងវិញនៃសេដ្ឋកិច្ច។ កង្វល់របស់ពួកវិនិយោគិនត្រូវបានកើតមានឡើងក្រោយពីមានសេចក្តីរាយការណ៍មួយដែលបានបង្ហាញថាក្រុមហ៊ុននៅសហរដ្ឋអាមេរិកបានបន្ថែមការងារតិចជាងមុនសម្រាប់ខែមេសា គឺមានត្រឹមតែចំនួន១១៩.០០០ការងារប៉ុណ្ណោះ បើប្រៀបធៀបនឹងខែមិនាដែលមានរហូតដល់២០១.០០០ការងារ។ ព័ត៌មានអន្តរជាតិសំខាន់ៗដទៃទៀត៖ <!--IMAGE-RIGHT--> ចិន៖ មន្ត្រីសហរដ្ឋអាមេរិកនិយាយថាពួកគេទទួលការបញ្ជាក់ថាសកម្មជនពិការភ្នែក លោក ចេន គ្វាងចេង (Chen Guangcheng) ចង់ចាកចេញពីប្រទេសចិនជាមួយនឹងក្រុមគ្រួសាររបស់គាត់។ ការប្រកាសនេះកើតឡើងមួយថ្ងៃបន្ទាប់ពីសកម្មជនរូបនោះ បានចាកចេញពីស្ថានទូតសហរដ្ឋអាមេរិកក្រោយពីបានសុំសិទ្ធិជ្រកកោននៅទីនោះជិតមួយសប្តាហ៍ក្រោយពីបានរត់គេចចេញពីការឃុំខ្លួនក្នុងផ្ទះ។ អាស៊ី៖ ក្រុមរដ្ឋមន្ត្រីហិរញ្ញវត្ថុនិងប្រធានធនាគារមកពីបណ្តាប្រទេសក្នុងសមាគមប្រជាជាតិអាស៊ីអាគ្នេយ៍រួមជាមួយនឹងប្រទេសជប៉ុន ចិន និងកូរ៉េខាងត្បូងបានយល់ព្រមគ្នានៅថ្ងៃព្រហស្បតិ៍នេះក្នុងការបង្កើនខ្ទង់ប្រាក់បម្រុងរបស់ពួកគេឱ្យបានពីរដងរហូតដល់ចំនួន២៤០.០០០លានដុល្លារដើម្បីទប់ស្កាត់វិបត្តិហិរញ្ញវត្ថុក្នុងតំបន់ដែលអាចនឹងកើតមានឡើងឱ្យបានទាន់ពេលវេលា។ រុស្ស៊ី/ស.រ.អា៖ រដ្ឋមន្ត្រីការពារជាតិរុស្ស៊ីនិយាយថា ការចរចាស្តីពីផែនការរបស់សហរដ្ឋអាមេរិកសម្រាប់ប្រព័ន្ធការពារកាំជ្រួចរបស់អង្គការណាតូនៅអឺរ៉ុបបានជាប់គាំងហើយ។ អារ៉ាប់៖ ក្រុមសកម្មជនសិទ្ធិសេរីភាពសារព័ត៌មាននិងអង្គការសហប្រជាជាតិដែលបានរៀបចំទិវាសេរីភាពសារព័ត៌មាននិយាយថា បដិវត្តន៍រដូវផ្ការីកក្នុងពិភពអារ៉ាប់បានបន្ធូរបន្ថយគំនាបរដ្ឋាភិបាលក្នុងប្រទេសខ្លះមកលើប្រព័ន្ធសារព័ត៌មាន ប៉ុន្តែមានប្រទេសជាច្រើននៅតែប្រើប្រាស់ល្បិចធ្វើបាបអ្នកសារព័ត៌មានដដែល។ បារាំង៖ លោកប្រធានាធិបតីបារាំង នីកូឡា ហ្សាក់កូហ្ស៊ី (Nicolas Sarkozy) និងគូប្រជែងមកពីគណបក្សសង្គមនិយម លោក ហ្វ្រង់ស្វ័រ ហូឡង់ (Francois Hollande) បានប៉ះពាក្យសម្តីគ្នាម្តងហើយម្តងទៀតនៅក្នុងការជជែកដេញដោលគ្នាមុនពេលការបោះឆ្នោតស្ថាពរនៅថ្ងៃអាទិត្យ ដែលគេរំពឹងថាលោកហូឡង់នឹងឈ្នះឆ្នោត។ ស៊ីរី៖ សកម្មជនស៊ីរីនិយាយថា កងកម្លាំងរដ្ឋាភិបាលបានវាយឆ្មក់អន្តេវាសិកដ្ឋានរបស់មហាវិទ្យាល័យមួយហើយបានសម្លាប់មនុស្សយ៉ាងតិចណាស់ក៏បួននាក់ដែរ បន្ទាប់ពីមានការតវ៉ាប្រឆាំងនឹងរដ្ឋាភិបាលនៅទីក្រុង អាឡេបប៉ូ (Aleppo) ស្របពេលដែលអ្នកសង្កេតការណ៍អង្គការសហប្រជាជាតិបានខិតខំឡើងវិញដើម្បីវាយតម្លៃបទឈប់បាញ់គ្នាដែលមានភាពរកាំរកូស។ នេប៉ាល់៖ អ្នកនាំពាក្យរដ្ឋាភិបាលនេប៉ាល់ (Nepal) និយាយថា លោកនាយករដ្ឋមន្ត្រីនឹងរំលាយគណៈរដ្ឋមន្ត្រីរបស់លោក ហើយបង្កើតរដ្ឋាភិបាលឯកភាពជាតិមួយក្នុងគោលបំណងដើម្បីបំបែកភាពទាល់ច្រកអស់រយៈពេលជាច្រើនឆ្នាំក្នុងការតាក់តែងរដ្ឋធម្មនុញ្ញរបស់ប្រទេសជាតិ។ This posting includes an audio/video/photo media file: Download Now |
| អោង សាន ស៊ូជី ធ្វើសច្ចាប្រណិធានជាសមាជិករដ្ឋសភា Posted: 03 May 2012 02:25 AM PDT មេដឹកនាំប្រជាធិបតេយ្យដ៏យូរមកហើយរបស់ភូមា លោកស្រី អោង សាន ស៊ូជី Aung San Suu Kyi បានទទួលការសច្ចាប្រណិធានតាមផ្លូវការជាសមាជិករដ្ឋសភាចូលកាន់តំណែងរដ្ឋាភិបាលជាលើកដំបូង ចាប់តាំងពីបានចំណាយពេលភាគច្រើនក្នុងពីរទសវត្សរ៍កន្លងទៅនេះ នៅក្នុងការឃុំឃាំងក្នុងផ្ទះ។ ជ័យលាភីរង្វាន់ណូប៊ែលរូបនេះបានចូលធ្វើសច្ចាប្រណិធាន កាលពីថ្ងៃពុធ ចូលកាន់តំណែងក្នុងសភាជាន់ទាបរបស់ប្រទេសនេះ ដោយបានបញ្ចប់ពហិការមិនចូលរួមក្នុងរដ្ឋសភា ដែលអាចបង្អាក់ដល់ដំណើរនៃកំណែទម្រង់នយោបាយនៅក្នុងប្រទេសនេះ។ លោកស្រីបានថ្លែងជាអាទិ៍ថា «យើងចង់ឲ្យរដ្ឋសភារបស់យើងមានគុណសម្បត្តិតាមលទ្ធិប្រជាធិបតេយ្យពិតៗ។ យើងមិនចង់ដកអ្នកណាចេញទេ។ យើងគ្រាន់តែចង់ឲ្យមានការជឿនលឿន ដែលធ្វើឲ្យរដ្ឋសភារបស់យើងមានលទ្ធិប្រជាធិបតេយ្យពិតប្រាកដ»។ សមាជិកសភានៃគណបក្ស សហភាព សាមគ្គីភាពនិងអភិវឌ្ឍន៍ ដែលកងយោធាគាំទ្រ លោក វិន អ៊ូ Win Oo បានសរសើរសេចក្តីសម្រេចចិត្តរបស់លោកស្រី អោន សាន ស៊ូជ ដែលឈប់ធ្វើពហិការទៅវិញនោះ។ ចិន៖ សកម្មជនពិការភ្នែកចិនម្នាក់ ដែលបានជ្រកកោននៅក្នុងស្ថានទូតអាមេរិកនៅក្រុងប៉េកាំងជិតមួយសប្តាហ៍បានបង្ហាញមុខ ហើយមន្រ្តីអាមេរិកាំងនិយាយថា ចិនបានយល់ព្រមនាំលោកទៅដាក់នៅកន្លែង«សុខសាន្តមួយ»។ តែលោក ចិន គួងឆេង Chen Guangcheng បានប្រាប់ទីភ្នាក់ងារព័ត៌មាន Associated Press បន្ទាប់ពីបានចេញពីស្ថានទូតថា លោកចង់ចេញពីប្រទេសចិនជាមួយគ្រួសារលោក ពីព្រោះលោកខ្លាចបាត់បង់ជីវិត។ លោកក៏បាននិយាយដែរថា មន្រ្តីស្ថានទូតអាមេរិកបានប្រាប់លោកថា អាជ្ញាធរចិននឹងវាយភរិយាលោកទាល់ស្លាប់ បើលោកមិនចេញពីស្ថានទូតនៅក្រុងប៉េកាំង ទៅវិញទេ។ អេហ្ស៊ីប៖ អំពើហិង្សាបានផ្ទុះឡើងនៅមុនការបោះឆ្នោតក្នុងរដ្ឋធានីឡឹគែរ បណ្តាលឲ្យស្លាប់មនុស្ស ១១ នាក់ និងរបួសមនុស្សជាង ១០០ នាក់ទៀត បង្ខំឲ្យបេក្ខជនប្រធានាធិបតីជាច្រើននាក់បញ្ឈប់យុទ្ធនាការរបស់ខ្លួន។ អាហ្វហ្គានីស្ថាន៖ ពួកបះបោរបានសម្លាប់មនុស្សយ៉ាងតិច ៧ នាក់ និងធ្វើឲ្យរបួស ១៧ នាក់ទៀត ភាគច្រើនជាកុមារ នៅក្រុងកាប៊ុលកាលពីថ្ងៃពុធ ក្នុងពេលពីរម៉ោងប៉ុណ្ណោះបន្ទាប់ពីលោកប្រធានាធិបតីស.រ.អ បារ៉ាក់ អូបាម៉ា បានចាកចេញពីប្រទេសនេះ នៅក្រោយទស្សនកិច្ចដ៏ខ្លីមួយដែលគេមិនបានប្រកាសឲ្យដឹងមុន។ ម៉ាលី៖ ស្នូរកាំភ្លើងបានផ្ទុះឡើងជាថ្មី កាលពីថ្ងៃពុធ នៅក្នុងរដ្ឋធានីបាណាកូ នៃប្រទេសម៉ាលី នៅពេលដែលកងទ័ពអ្នកទម្លាក់ប្រធានាធិបតីនៃប្រទេសនេះ កំពុងស្វែងរកមនុស្សអ្នកទទួលខុសត្រូវនៅក្នុងការប៉ុនប៉ងធ្វើរដ្ឋប្រហារប្រឆាំងមកវិញនៅដើមសប្តាហ៍នេះ។ ស៊ីរី៖ អង្គការសិទ្ធិមនុស្សអន្តរជាតិមួយកាលពីថ្ងៃពុធ បានចោទរដ្ឋាភិបាលស៊ីរី អំពីបទឧក្រិដ្ឋកម្មសង្គ្រាម នៅពេលដែលក្រុមប្រឆាំងនិយាយថា ពួកឧទ្ទាមបានសម្លាប់សមាជិកកម្លាំងសន្តិសុខ១៥នាក់ ក្នុងខណៈដែលបទឈប់បាញ់គ្នាដែលអ.ស.បជួយគាំទ្រកំពុងតែរលាយទៅវិញ។ ស៊ូដង់ខាងត្បូង៖ ក្រុមប្រឹក្សាសន្តិសុខអង្គការសហប្រជាជាតិ បានអនុម័តសេចក្តីសម្រេចមួយ អំពាវនាវឲ្យប្រទេសស៊ូដង់ និងស៊ូដង់ខាងត្បូងឈប់វាយប្រយុទ្ធគ្នានិងដោះស្រាយបញ្ហារបស់ខ្លួន បើមិនដូច្នោះទេនឹងប្រឈមមុខការដាក់ទណ្ឌកម្មបន្ថែម។ <!--AV--> This posting includes an audio/video/photo media file: Download Now |
| ខ្មែរក្រហមមានផែនការសម្លាប់អ្នកមានជាប់ពាក់ព័ន្ធនឹងរបបលោកលន់ ណុល Posted: 02 May 2012 08:04 PM PDT សាក្សីនិយាយនៅថ្ងៃពុធនេះថា ពួកខ្មែរក្រហមមាននយោបាយមួយគឺត្រូវបោសសម្អាតប្រជាពលរដ្ឋដែលពួកគេជឿថា ជាប់ទាក់ទងនឹងរបបលោកសេនាប្រមុខលន់ ណុល ដែលគាំទ្រដោយសហរដ្ឋអាមេរិក។ លោក ពាន ឃាន អាយុ៦២ឆ្នាំ ជាអតីតអ្នកនាំសារ និងកងការពាររបស់កុយ ធួន ប្រធានភូមិភាគ៣០៤ និងជាអតីតរដ្ឋមន្ដ្រីក្រសួងពាណិជ្ជកម្មខ្មែរក្រហម។ លោក ឃាន បាននិយាយក្នុងការផ្តល់សក្ខីកម្មក្នុងការកាត់ទោសសំណុំរឿង ០០២ នៅរសៀលនេះថា ខ្មែរក្រហមបានជម្លៀសប្រជាពលរដ្ឋចេញពីក្រុងភ្នំពេញ ដើម្បីងាយស្រួលកម្ចាត់សត្រូវ។ «ជំលៀសប្រជាជនចេញពីក្រុងភ្នំពេញគឺដើម្បីស្រួលបោសសម្អាតពួកខ្មាំង ពួកក្បត់នៅទីក្រុងភ្នំពេញ។ ជាខ្មាំងគឺកាលនោះគេថា ជាទាហានលន់ ណុល ហើយប្រជាជនក៏ជាប្រជាជនដែលស្ថិតនៅក្រោមឥទ្ធិពលរបស់លន់ ណុល។ អញ្ចឹងនៅក្នុងរបបទាំងអស់ហ្នឹងត្រូវបោសសម្អាត។ ហើយក្រោយមកទៀតគឺកុំឲ្យមានពួកស៊ីអេអាបង្កប់នៅទីក្រុងភ្នំពេញ»។ សាឡុត បាន ដែលជាក្មួយប្រុសបង្កើតរបស់ប៉ុល ពត មេស្ថាបនិកនៃរបបកម្ពុជាធិបតេយ្យដែលបញ្ចប់ការផ្តល់សក្ខីកម្មនៅថ្ងៃនេះ ក៏បានបញ្ជាក់ក្នុងសវនាការដែរថា ពួកខ្មែរក្រហមមានគោលដៅមួយគឺតស៊ូប្រឆាំងនឹងអ្វីដែលពួកខ្លួនហៅថា ការឈ្លានពានរបស់ចក្រពត្តិអាមេរិក។ លោក ពាន ឃាន បានចូលតស៊ូក្នុងព្រៃជាមួយពួកខ្មែរក្រហមក្នុងខេត្តរតនគិរីកាលពីឆ្នាំ១៩៦៦ នៅពេលដែលលោកមានអាយុ១៦ ឆ្នាំ។ មានដើមកំណើតជាជនជាតិភាគតិច ខ្វែក និងកំពង់រស់នៅក្នុងខេត្តតាកែវ សាក្សីរូបនេះនិយាយថា ប្រជាពលរដ្ឋដែលពួកខ្មែរក្រហមចាប់ខ្លួនថា ជាខ្មាំងនោះនឹងត្រូវសម្លាប់ចោល។ «ពេលនោះដោយសារតែគេចាត់ទុកថាជាសត្រូវ ដូច្នេះបើសិនជាគេចាប់បានគឺត្រូវតែកម្ទេចហើយ»។ របបកម្ពុជាប្រជាធិបតេយ្យរបស់ពួកខ្មែរក្រហមបានបង្កឲ្យប្រជាពលរដ្ឋកម្ពុជាស្លាប់បាត់បង់ជីវិតយ៉ាងតិចចំនួន ១,៧លាននាក់ក្នុងចន្លោះដែលពួកគេកាន់កាប់អំណាចចន្លោះពីថ្ងៃទី១៧ ខែមេសា ឆ្នាំ ១៩៧៥ ដល់ថ្ងៃទី ៦ មករា ឆ្នាំ ១៩៧៩។ មេដឹកនាំកំពូលខ្មែរក្រហមចំនួនបីនាក់ដែលនៅរស់រានមានជីវិតជាមួយនឹងភាពចាស់ជរាកំពុងស្ថិតក្នុងការកាត់ទោសក្នុងសំណុំរឿង០០២ នេះ។ ក្នុងនោះមានខៀវ សំផន អតីតប្រមុខរដ្ឋ អៀង សារី អតីតរដ្ឋមន្ដ្រីការបរទេស និង នួន ជា អតីតប្រធានសភាខ្មែរក្រហម៕ This posting includes an audio/video/photo media file: Download Now |
| ជនសង្ស័យពីររូបត្រូវបានចាប់ខ្លួនពីបទបាញ់សម្លាប់សកម្មជនបរិស្ថាន Posted: 02 May 2012 06:24 PM PDT ក្រុមមន្ត្រីសិទ្ធិមនុស្សបានអះអាងថាយ៉ាងតិចមានជនសង្ស័យចំនួនពីរនាក់ត្រូវបានកងរាជអាវុធហត្ថខេត្តកោះកុង នាំយកមកសួរចម្លើយដោយសង្ស័យថា ជាប់ពាក់ព័ន្ធនឹងការបាញ់សម្លាប់លោកឈិត វុទ្ធី និងលោកអ៊ិន រតនា។ លោក អ៊ិន គង់ជិត អ្នកសម្របសម្រួលអង្គការសិទ្ធិមនុស្សលីកាដូបានមានប្រសាសន៍ថាជនសង្ស័យទាំងពីររូបមានឈ្មោះរ៉ាន់ បូរ័ត្ន មន្ត្រីសន្តិសុខក្រុមហ៊ុនធីមប៊ឺគ្រីន (Timber Green) និងលោក សូ សុភាព មន្ត្រីកងរាជអាវុធហត្ថខេត្តកោះកុង។ «ខ្ញុំបានទទួលបានព័ត៌មានថា ពិតជាមានការឃាត់ខ្លួនអ្នកទាំងពីរនេះ ដើម្បីទទួលយកយកចម្លើយទាក់ទងនឹងឧប្បត្តិហេតុនៅថ្ងៃទី២៦ ខែមេសា ឆ្នាំ២០១២នេះ»។ លោក ចាន់ សាវ៉េត មន្ត្រីស៊ើបអង្កេតអង្គការសិទ្ធិមនុស្សអាដហុកបាននិយាយថាលោកបានទទួលដំណឹងនៃការឃាត់ខ្លួននេះផងដែរ។ ក៏ប៉ុន្តែលោកបានសង្ស័យថាជនសង្ស័យទាំងពីរនាក់មិនត្រូវបានចោទប្រកាន់ និងបញ្ជូនមកតុលាការនៅឡើយទេ។ «គឺពិតប្រាកដហើយ គឺខាងមេបញ្ជាការប៉េអឹម គឺបានឃាត់ខ្លួនកូនគាត់ហើយ ហើយគាត់បានទៅមើលកូនគាត់កាលពីម្សិលមិញ។ ទៅមើលមួយភ្លែតហ្នឹង។ អញ្ចឹងគេឥតឲ្យទៅមើលទៀតទេ»។ អ្នកស្រី សម ចាន់ធី ភរិយាលោកឈុត វុទ្ធី បានផ្តល់បទសម្ភាសជាមួយនឹងវីអូអេនៅថ្ងៃពុធនេះថា អ្នកស្រីចង់ឲ្យរដ្ឋាភិបាលចាប់ខ្លួនអ្នកដែលជាប់ពាក់ព័ន្ធពិតប្រាកដយកទៅផ្តន្ទាទោសតាមច្បាប់ កុំឲ្យចាប់ខ្លួនអ្នកដទៃមកទទួលទោសជំនួស។ «បើថាមិនច្បាស់ថាឲ្យរាជរដ្ឋាភិបាលធ្វើការតទៅទៀត»។ ជនសង្ស័យទាំងពីរនាក់ត្រូវបានកងរាជអាវុធហត្ថខេត្តកោះកុងបានចាប់ខ្លួនដាច់ដោយឡែកពីគ្នា មុនពេលដែលលោកនាយករដ្ឋមន្ត្រីហ៊ុន សែន បានចេញបទបញ្ជាឲ្យបង្កើតគណៈកម្មាធិការថ្នាក់ជាតិ ដើម្បីធ្វើការស៊ើបអង្កេតស្រាវជ្រាវចំពោះករណីឃាតកម្មទៅលើសកម្មជនការពារព្រៃឈើ។ លោក ហុង ណារ៉ុង មេបញ្ជាការកងរាជអាវុធហត្ថខេត្តកោះកុងមិនអាចទាក់ទងសុំបំភ្លឺបាននៅថ្ងៃពុធនេះ។ ចំណែកឯលោកឧត្តមសេនីយ៍ឯក ម៉ក់ ជីតូ ប្រធានគណៈកម្មាធិការថ្នាក់ជាតិដើម្បីស្រាវជ្រាវករណីឃាតកម្មនេះ បានមានប្រសាសន៍ថាមិនទាន់បានទទួលដំណឹងនៃការឃាត់ខ្លួននេះទេ។ លោកបានបញ្ជាក់ទៀតថា ក្នុងករណីនៃការស៊ើបអង្គេតមិនមានជនសង្ស័យណាមួយត្រូវបានឃាត់ខ្លួនទេ។ «មិនទាន់មានទេ។ មិនទាន់ទេ វាគ្រាន់តែជាពាក្យចរចាមរ៉ាម ហើយយើងកំពុងធ្វើការមិនទាន់ដល់ចាប់ចងអីទេ»។ គណៈកម្មាធិការថ្នាក់ជាតិដែលទើបនឹងបង្កើតថ្មីកាលពីថ្ងៃអង្គារ បានធ្វើដំណើរដល់ខេត្តកោះកុងហើយ ដើម្បីរកតម្រុយនៃការបាញ់លោកឈុត វុទ្ធី និងលោកអ៊ិន រតនា។ គណៈកម្មាធិការនេះបានជួបប្រជុំជាមួយនឹងអាជ្ញាធរខេត្តកោះកុង ហើយបានសម្រេចបង្កើតអនុគណៈកម្មការតូចៗចំនួនបី គឺអនុគណៈកម្មាធិការចុះកន្លែងកើតហេតុ អនុគណៈកម្មាធិការយកចម្លើយ និងអនុគណៈកម្មការកោសល្យវិច្ច័យ។ លោកឈុត វុទ្ធី ប្រធានអង្គការការពារធម្មជាតិ និងលោកអ៊ិន រតនា មន្ត្រីកងរាជអាវុធហត្ថត្រូវបានបាញ់សម្លាប់កាលពីថ្ងៃទី២៦ ខែមេសា។ មន្ត្រីអង្គការសង្គមស៊ីវិលបានទទួចឲ្យអាជ្ញាធរស្វែងរកចាប់ខ្លួនឃាតករពិតប្រាកដយកទៅផ្តន្ទាទោសតាមច្បាប់ បន្ទាប់ពីមានរបាយការណ៍ជាបឋមថាលោកអ៊ិន រតនា បានបាញ់សម្លាប់ខ្លួនឯង បន្ទាប់ពីបានបាញ់សម្លាប់លោកឈុត វុទ្ធី រួចមកថាជារឿងគួរឲ្យសង្ស័យ៕ This posting includes an audio/video/photo media file: Download Now |
| You are subscribed to email updates from VOA News: ព័ត៌មាន To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
