VOA News: ព័ត៌មាន: “មេធាវីនួន ជារិះគន់សង្ស័យ"ជួបសម្ងាត់"រវាងព្រះរាជអាជ្ញា និងចៅក្រម” plus 4 more |
- មេធាវីនួន ជារិះគន់សង្ស័យ"ជួបសម្ងាត់"រវាងព្រះរាជអាជ្ញា និងចៅក្រម
- សភាអនុម័តច្បាប់គ្រប់គ្រងពន្ធនាគារ
- លោកសម រង្ស៊ីមិនមានឈ្មោះក្នុងបញ្ជីភ្ញៀវនៃកម្មវិធីព្រះជន្មសម្តេចឪនរោត្តមសីហនុទេ
- បុគ្គលិកសហព័ន្ធរបស់រដ្ឋាភិបាលអាមេរិកធ្វើយុទ្ធនាការរៃអង្គាសថវិកាសម្រាប់អង្គការមនុស្សធម៌ក្នុងស្រុកនិងអន្តរជាតិ
- ព័ត៌មានអន្តរជាតិ៖ ០៧ វិច្ឆិកា
| មេធាវីនួន ជារិះគន់សង្ស័យ"ជួបសម្ងាត់"រវាងព្រះរាជអាជ្ញា និងចៅក្រម Posted: 07 Nov 2011 09:32 AM PST ក្រុមមេធាវីអន្ដរជាតិរបស់អតីតបងធំទី២ នួន ជា បានស្នើឲ្យប្រធានអង្គជំនុំជម្រះសាលាដំបូងនៃសាលាក្ដីខ្មែរក្រហមទម្លាយព័ត៌មាននៃការ"ជួបសម្ងាត់" របស់មន្ដ្រីច្បាប់អង្គការសហប្រជាជាតិនៅក្នុងសាលាក្ដីពិសេសនេះ ដោយសង្កត់ធ្ងន់ថា ការជួបសម្ងាត់នោះនាំឲ្យពួកខ្លួនមានកង្វល់។ នៅក្នុងសំណើទៅកាន់សាលាដំបូងកាលពីថ្ងៃសុក្រសប្ដាហ៍មុន ដែលវីអូអេសម្លេងសហរដ្ឋអាមេរិកទទួលបាននៅថ្ងៃនេះ លោកមេធាវី ម៉ាយឃើល ផេសម៉ិន (Michiel Pestman) និងទីប្រឹក្សាច្បាប់នៃ មេធាវីការពារលោកអេនឌ្រូ អ៊ាននូហ្ស៊ី (Andrew Ianuzzi) បានអះអាងថា មានការជួបគ្នាជាសម្ងាត់រវាងលោកស្រី Silvia Cartwright ដែលជាចៅក្រមបរទេសក្នុងអង្គជំនុំជម្រះសាលាដំបូង ជាមួយនឹងលោកសហព្រះរាជអាជ្ញាAndrew Carley ក៏ប៉ុន្ដែក្រុមមេធាវីការពារមិនបានបង្ហាញពីកាលបរិច្ឆេទនៃជំនួបនោះទេ។ ក្រុមមេធាវីរបស់នួន ជា បានទទូចឲ្យមានការបង្ហាញព័ត៌មាននោះជាបន្ទាន់ និងដោយលម្អិត រួមទាំងរបាយការណ៍ និងកំណត់ហេតុនៃកិច្ចប្រជុំនោះផងដែរ។ សំណើនេះធ្វើឡើងបន្ទាប់ពីក្រុមមេធាវីអះអាងថា ខ្លួនបានស្នើឲ្យលោកស្រីចៅក្រមSylvia Cartwright បំភ្លឺចំនួនពីរដងកាលពីសប្ដាហ៍មុន ប៉ុន្ដែមិនមានការឆ្លើយតប។ ក្រុមមេធាវីលើកឡើងថា ការណ៍នេះធ្វើឲ្យពួកខ្លួនមានការព្រួយបារម្ភជាខ្លាំង ខណៈដែលការបើកសវនាការនៃសំណុំរឿង០០២នឹងចាប់ផ្ដើម។ លោកអេនឌ្រូ អ៊ាននូហ្ស៊ីមានប្រសាសន៍ថា ក្រុមលោកនឹងគិតឡើងវិញនៅសប្ដាហ៍ក្រោយនេះ។ "យើងនឹងធ្វើការវាយតម្លៃឡើងវិញនៅសប្ដាហ៍ក្រោយពីជំហររបស់យើង ប្រសិនបើអង្គជំនុំជម្រះសាលាដំបូងមិនធ្វើអ្វីនោះ»។ យ៉ាងណាក៏ដោយ លោកហ៊ុយ វណ្ណៈ មន្ដ្រីផ្នែកទំនាក់ទំនងកិច្ចការសាធារណៈ មានប្រសាសន៍ថា ចៅក្រមនិល ណុនបានទទួលសំណើនោះរួចហើយ។ «ចៅក្រមសាលាដំបូងបញ្ជាក់ហើយថា លោកបានទទួលសំណើនេះតាមអ៊ីម៉េល នូវការព្រួយបារម្ភរបស់មេធាវីការពារក្ដី។ ប៉ុន្ដែលោកនឹងមិនធ្វើអត្ថាធិប្បាយបន្ថែមលើបញ្ហានេះទេ»។ នៅក្នុងលិខិតផ្ញើជូនលោកចៅក្រមនិល ណុន ក្រុមមេធាវីរបស់នួន ជាបានលើកឡើងថា លោកគ្នុដរ៉ូសស៊ីនហក (Knud Rosandhaug) អនុប្រធានរដ្ឋបាលសាលាក្តីខ្មែរក្រហមខាងភាគីអង្គការសហប្រជាជាតិ បានទទួលស្គាល់ថា មានជំនួបនោះមែន ក៏ប៉ុន្ដែនោះគឺជាជំនួបជាទៀងទាត់រវាងរូបលោក ចៅក្រម Sylvia Cartwright និងលោកសហព្រះរាជអាជ្ញា Andrew Cayley នេះបើផ្អែកលើលិខិតរបស់ក្រុមមេធាវីរបស់នួន ជាផ្ញើរទៅកាន់លោកចៅក្រមកម្ពុជានិល ណុន។ ចាប់ពីថ្ងៃទី ២១ ខែវិច្ឆិកានេះតទៅ សាលាក្ដីខ្មែរក្រហមគ្រោងនឹងចាប់ផ្ដើមបើកសវនាការពេញអង្គសេចក្ដីនៃសំណុំរឿង០០២ ដែលមានជនជាប់ចោទសុទ្ធសឹងជាមេដឹកនាំកំពូលខ្ពស់បំផុតនៃរបបខ្មែរក្រហម។ របបនេះបានបណ្ដាលឲ្យប្រជាពលរដ្ឋកម្ពុជាស្លាប់យ៉ាងតិចចំនួន១,៧លាននាក់ ចន្លោះពីឆ្នាំ១៩៧៥ដល់ឆ្នាំ១៩៧៩។ សំណុំរឿងនេះមានជនជាប់ចោទអៀង សារី ខៀវ សំផន អៀង ធីរិទ្ធ និងនួន ជា។ កុ្រមមេធាវីការពារចុងចោទបានស្វះស្វែងរកយុទ្ធសាស្ដ្រផ្សេងៗដើម្បីព្យាយាមរកផលប្រយោជន៍សម្រាប់កូនក្ដីខ្លួន។ ក្រុមមេធាវីរបស់នួន ជាបានស្នើសុំឲ្យមានការពន្យារពេលបើកសវនាការ ហើយបានប្ដឹងទៅកាន់តុលាការក្រុងភ្នំពេញប្រឆាំងទៅនឹងលោកនាយករដ្ឋមន្ដ្រីហ៊ុន សែន និងមន្ដ្រីជាន់ខ្ពស់ចំនួនដប់រូបផ្សេងទៀតក្នុងគណបក្សប្រជាជនកម្ពុជា។ រីឯអៀង សារីប្រកាសថា គាត់នឹងមិនឆ្លើយរាល់សំណួរទាំងឡាយក្នុងអំឡុងពេលកាត់ទោសទេ។ មួយវិញទៀត មេធាវីរបស់អៀងធីរិទ្ធប្រកាសថា កូនក្ដីរបស់ផងខ្លួនមិនមានសមត្ថភាពគ្រប់គ្រាន់ក្នុងការចូលរួមការកាត់ទោសឲ្យបានត្រឹមត្រូវទេ ដោយសារបញ្ហាសុខភាព៕ This posting includes an audio/video/photo media file: Download Now |
| សភាអនុម័តច្បាប់គ្រប់គ្រងពន្ធនាគារ Posted: 07 Nov 2011 09:09 AM PST រដ្ឋសភាកម្ពុជាបានអនុម័តច្បាប់មួយនៅថ្ងៃច័ន្ទនេះ សំដៅធានាសន្តិសុខ និងសុវត្ថិភាពដល់អ្នកទោសជាង១៥០០០នាក់នៅក្នុងពន្ធនាគារចំនួន២៨ទូទាំងប្រទេសកម្ពុជា។ ក្រុមអ្នករិះគន់ច្បាប់នេះដែលបានអនុម័ត បាននិយាយថា ច្បាប់នេះមានចរិតលក្ខណៈមិនច្បាស់លាស់ ឬ ភាពស្រពិចស្រពិល ការព្រួយបារម្ភអំពីភាពចង្អៀតណែនខ្លាំងក្នុងពន្ធនាគារ កង្វល់អំពីការប្រើកម្លាំងដោះស្រាយភាពចលាចលនៅក្នុងពន្ធនាគារ ការព្រួយបារម្ភអំពីការបន្ធូរបន្ថយទោស និងការលើកលែងទោសដល់អ្នកទោសដោយគ្មានតម្លាភាព និងយុត្តិធម៌ ព្រមទាំងកង្វល់ចំពោះមន្ត្រីពន្ធនាគារ និងមន្ត្រីតុលាការប្រព្រឹត្តអំពើពុករលួយអំពីបទល្មើសអ្វីមួយ។ លោកយឹម សុវណ្ណ តំណាងរាស្ត្រគណបក្សសម រង្ស៊ី បានថ្លែងនៅក្នុងសម័យប្រជុំសភាថាមាត្រាចំនួន៨ក្នុងជំពូកទី៧មិនគួរមាននៅក្នុងសេចក្តីព្រាងច្បាប់នេះទេ ហើយបើមានជំពូកទី៧នេះ ប្រទេសកម្ពុជានឹងមានការខាតបង់ច្រើនជាងចំណេញ។ «ក្នុងជំពូកទី៧ ខ្ញុំយល់ឃើញថា មាត្រាមួយចំនួនគួរឲ្យព្រួយបារម្ភមែនទែនដែលអាចធ្វើឱ្យប៉ះពាល់ទៅដល់សេដ្ឋកិច្ចរបស់ប្រទេសកម្ពុជា។ យើងចែងអំពីការផ្តល់សិទ្ធិអំណាចទៅឱ្យក្រសួងមហាផ្ទៃ និងអគ្គនាយកដ្ឋានពន្ធនាគារមានសិទ្ធិចុះកិច្ចសន្យាជាមួយក្រុមហ៊ុនឯកជនសម្រាប់ការបង្កើតការងារ កម្មវិធីឧស្សាហកម្ម សិប្បកម្ម និងកសិកម្មនៅក្នុងពន្ធនាគារ ហើយនឹងមានសិទ្ធិចុះកិច្ចសន្យាលក់ផលិតផលដែលផលិតដោយអ្នកទោសនៅក្នុងពន្ធនាគារ ដើម្បីយកទៅលក់នៅក្នុងទីផ្សារ និងលក់ឱ្យក្រុមហ៊ុនឯនជន។ មាត្រាទាំងប៉ុន្មាននេះផ្ទុយទៅនឹងអនុសញ្ញាអន្តរជាតិមួយចំនួនដែលហាមឃាត់ការប្រើប្រាស់កម្លាំងពលកម្មនៅក្នុងពន្ធនាគារសម្រាប់ជាប្រយោជន៍ទៅដល់បុគ្គលឯកជន»។ លោកម៉ែន សុថាវរិន តំណាងរាស្ត្រគណបក្សសម រង្ស៊ី បានថ្លែងនៅក្នុងសម័យប្រជុំសភាថា ប្រព័ន្ធគ្រប់គ្រងពន្ធនាគារត្រូវការច្បាប់ និងនីតិវិធីសម្រាប់ការអនុវត្ត។ «ច្បាប់ពន្ធនាគារទាំងមូល ខ្ញុំមើលទាំងអស់ទៅឃើញថា មានភាពស្រពិចស្រពិលច្រើន។ ច្បាប់នេះមិនបញ្ជាក់ច្បាស់ពីគោលការណ៍សំខាន់នៃបទបញ្ជាផ្ទៃក្នុង និងមិនមានតម្រូវការណាមួយឱ្យនាយកពន្ធនាគារ ឬ ក្រសួងមហាផ្ទៃបង្កើតនីតិវិធីលម្អិតអំពីបទបញ្ជាផ្ទៃក្នុងទេ»។ លោកឧបនាយករដ្ឋមន្ត្រីស ខេង រដ្ឋមន្ត្រីក្រសួងមហាផ្ទៃ បានថ្លែងអំណរគុណដល់រដ្ឋសភាទាំងមូលចំពោះការផ្តល់អនុសាសន៍ និងការអនុម័តសេចក្តីព្រាងច្បាប់ស្តីពីការគ្រប់គ្រងពន្ធនាគារ។ លោកឧបនាយករដ្ឋមន្ត្រីស ខេងបានចាត់ទុកថា លទ្ធផលដែលបានមកពីការអនុម័តច្បាប់នេះពិតជាបានរួមចំណែកយ៉ាងសំខាន់ថ្មីមួយទៀតក្នុងការគ្រប់គ្រងសង្គមកម្ពុជា ដើម្បីធានាបាននូវសុខសន្តិភាព ស្ថិរភាព និងការអភិវឌ្ឍប្រទេសកម្ពុជា។ «យើងខ្ញុំសូមទទួលយកនូវច្បាប់នេះ ដើម្បីយកទៅចាត់ចែងអនុវត្តឱ្យមានប្រសិទ្ធិភាព ដើម្បីរួមចំណែកក្នុងការពង្រឹង ការគ្រប់គ្រងសង្គមកម្ពុជារបស់យើងឱ្យកាន់តែល្អប្រសើរថែមទៀត»។ លោកអំ សំអាត ប្រធានផ្នែកស៊ើបអង្កេតនៃអង្គការសិទ្ធិមនុស្សលីកាដូ បានបញ្ជាក់យ៉ាងដូច្នេះថា«យើងស្វាគមន៍ការអនុម័តច្បាប់ស្តីពីពន្ធនាគារនេះ ពីព្រោះប្រទេសកម្ពុជាយើងជាលើកទីមួយហើយមានច្បាប់ពន្ធនាគារ។ កន្លងមក ដោយសារមិនមានច្បាប់ពន្ធនាគារនេះការគ្រប់គ្រងពន្ធនាគារមានរឿង មានបញ្ហាភាពមិនប្រក្រតីមួយចំនួនកើតឡើង»។ លោកអំ សំអាតបានបញ្ជាក់ថា រដ្ឋាភិបាលត្រូវតែអនុវត្តច្បាប់ពន្ធនាគារដែលមាន៨៥មាត្រានេះ ឱ្យមានប្រសិទ្ធិភាព៕ This posting includes an audio/video/photo media file: Download Now |
| លោកសម រង្ស៊ីមិនមានឈ្មោះក្នុងបញ្ជីភ្ញៀវនៃកម្មវិធីព្រះជន្មសម្តេចឪនរោត្តមសីហនុទេ Posted: 07 Nov 2011 08:10 AM PST បន្ទាប់ពីសារព័ត៌មានក្នុងស្រុកបានផ្សព្វផ្សាយថា លោកសម រង្ស៊ី មេដឹកនាំគណបក្សប្រឆាំងដែលកំពុងស្នាក់នៅឯក្រៅប្រទេស មានឈ្មោះនៅក្នុងលិខិតអញ្ជើញឲ្យចូលរួមកម្មវិធីចម្រើនព្រះជន្មសម្តេចឪនរោត្តមសីហនុ និងខួបលើកទី២០ឆ្នាំនៃការយាងនិវត្តន៍មកកាន់មាតុប្រទេសវិញនោះ ខុទ្ទកាល័យសម្តេចឪនរោត្តមសីហនុបានចេញលិខិតបដិសេធភ្លាមៗ កាលពីថ្ងៃទី៣កន្លងទៅនេះថា មិនមានការអញ្ជើញលោកសម រង្ស៊ីឲ្យមកចូលរួមទេ។ ព្រះអង្គម្ចាស់ស៊ីសុវត្ថិធម្មិកោ ព្រះរាជលេខាផ្ទាល់របស់សម្តេចឪនរោត្តមសីហនុ បានមានបន្ទូលកាលពីថ្ងៃសៅរ៍នេះថា កម្មវិធីកាលពីថ្ងៃទី៣០ ខែតុលាកន្លងទៅនេះ គឺរៀបចំដោយរដ្ឋាភិបាល ហើយខាងព្រះបរមរាជវាំងឥតជាប់ពាក់ព័ន្ធនឹងកម្មវិធីនេះទេ។ ព្រះអង្គម្ចាស់បានមានព្រះបន្ទូលថា ព្រះករុណាព្រះមហាក្សត្រ និងសម្តេចឪសម្តេចម៉ែ ព្រះអង្គបានយាងទៅចូលរួមតាមការអញ្ជើញរបស់រាជរដ្ឋាភិបាលនៅក្នុងឋានៈជាភ្ញៀវ មិនមែនចេញលិខិតអញ្ជើញឥស្សរៈជនណាមួយម្នាក់ឲ្យទៅចូលរួមនោះទេ។ «ក្នុងបទសម្ភាសន៍របស់ឯកឧត្តមសម រង្ស៊ី លោកបានមានប្រសាសន៍ច្បាស់ណាស់ថា ព្រះរាជករុណា។ ហើយខ្ញុំសុំបដិសេធថា ខុទ្ទកាល័យឥតមានបញ្ចេញលិខិតអញ្ជើញបញ្ជូនឥស្សរជនជាន់ណាមួយឲ្យចូលរួមនៅក្នុងកម្មវិធីបុណ្យណាមួយទេ»។ យោងតាមលិខិតអញ្ជើញមួយច្បាប់របស់គណៈកម្មាធិការបុណ្យជាតិ ដែលVOA សម្លេងសហរដ្ឋអាមេរិកទទួលបាន បានឲ្យដឹងថា តាមរយៈព្រះរាជានុញ្ញាតដ៏ខ្ពង់ខ្ពស់របស់ព្រះមហាក្សត្រ សម្តេចជវាវាំង រដ្ឋមន្ត្រីព្រះបរមរាជវាំងបានអញ្ជើញលោកសម រង្ស៊ីឲ្យចូលរួមមីទ្ទីញមហាជនខួបលើកទី៩០នៃព្រះរាជពិធីបុណ្យចម្រើនព្រះជន្ម និងខួបលើកទី២០នៃការយាងនិវត្តមកកាន់មាតុប្រទេសវិញរបស់សម្តេចឪនរោត្តមសីហនុ។ លោកឈិន ចេតនា អគ្គលេខាធិការនៃគណៈកម្មាធិការជាតិរៀបចំបុណ្យជាតិ បានបញ្ជាក់ថា គណៈកម្មាធិការជាតិបានអញ្ជើញសមាជិកសភារបស់គណបក្សសម រង្ស៊ីតែ២៥រូបតែប៉ុណ្ណោះ។ លោកបានបញ្ជាក់ថា សម្រាប់លោកសម រង្ស៊ី គណៈកម្មាធិការបុណ្យជាតិមិនបានអញ្ជើញទេ។ «ឥតមានផង! ពីបុណ្យជាតិ ឥតមានផង! ឥតមានចេញលិខិតអញ្ជើញលោកសម រង្ស៊ីផង! គាត់បានលិខិតមកពីណា?» លោកយឹម សុវណ្ណ អ្នកតំណាងរាស្ត្រ និងជាអ្នកនាំពាក្យគណបក្សប្រឆាំង បាននិយាយថា គណបក្សរបស់លោកបានទទួលលិខិតអញ្ជើញលោកសម រង្ស៊ី ឲ្យចូលរួមតាមរយៈរដ្ឋសភា។ លោកបានបញ្ជាក់ថា ការបដិសេធថា មិនបានចេញលិខិតអញ្ជើញលោកសម រង្ស៊ី ទំនងជាទទួលរងសម្ពាធពីនរណាម្នាក់។ «តំណាងរាស្ត្ររបស់គណបក្សសម រង្ស៊ីទាំង២៦រូប រួមទាំងលោកប្រធានសម រង្ស៊ីផង ត្រូវបានការអញ្ជើញ។ មានលិខិតអញ្ជើញអីត្រឹមត្រូវ។ មិនមែនតែចេះតែនិយាយគ្មានភស្តុតាងទេ»។ ព្រះអង្គម្ចាស់ស៊ីសុវត្តធម្មិកោបានមានព្រះបន្ទូលថា ព្រះអង្គមិនដែលទទូលរងសម្ពាធពីបុគ្គលណាម្នាក់ទេ។ ព្រះអង្គបានបញ្ជាក់ថា គឺព្រះអង្គអង្គឯងតែប៉ុណ្ណោះជាអ្នកសម្រេចក្នុងការធ្វើសេចក្តីសម្រេចព័ត៌មាន រួចហើយបានសុំសេចក្តីសម្រេចពីព្រះមហាវីរៈក្សត្រ នរោត្តមសីហនុ។ លោកសម រង្ស៊ី មេដឹកនាំគណបក្សប្រឆាំងកំពុងតែស្នាក់នៅបរទេស បន្ទាប់ពីតុលាការក្រុងភ្នំពេញកាត់ទោសឲ្យជាប់ពន្ធនាគាររយៈពេលជាង១០ឆ្នាំពីបទដកបង្គោលព្រំដែនលេខ១៨៥ រវាងប្រទេសកម្ពុជា និងប្រទេសវៀតណាម និងពីបទប្រើប្រាស់ឯកសារក្លែងក្លាយ។ ក្នុងពេលស្នាក់នៅឯក្រៅប្រទេស លោកសម រង្ស៊ីបានបន្តវាយប្រហារយ៉ាងខ្លាំងៗមកលើរដ្ឋាភិបាលលោកហ៊ុន សែន ឬបញ្ហាព្រំដែន និងចុងក្រោយគេគឺការដួលរលំនៃរបបផ្តាច់ការនៃប្រទេសអារ៉ាប់ ដោយលោកបានប្រដូចមេដឹកនាំកម្ពុជាទៅនឹងមេដឹកនាំបណ្តាប្រទេសនៃពិភពអារ៉ាប់ ដែលបានដួលរលំកន្លងមក៕ This posting includes an audio/video/photo media file: Download Now |
| Posted: 07 Nov 2011 12:23 PM PST បុគ្គលិកសហព័ន្ធរបស់រដ្ឋាភិបាលអាមេរិកបានបើកយុទ្ធនាការរៃអង្គាសថវិកាសម្រាប់អង្គការមនុស្សធម៌ក្នុងស្រុក និងអន្តរជាតិនានា សម្រាប់ឆ្នាំ២០១១នេះ កាលពីថ្ងៃអង្គារ ទី១៨ ខែតុលា ក្នុងរដ្ឋធានីវ៉ាស៊ីនតោន សហរដ្ឋអាមេរិក។ ការរៃអង្គាសមូលនិធិដោយស្ម័គ្រចិត្តពីបុគ្គលិកសហព័ន្ធ ដែលគេហៅថា យុទ្ធនាការសហព័ន្ធរួបរួមគ្នាឬCombined Federal Campaignនេះ ត្រូវបានបង្កើតឡើងដោយសពប្រធានាធិបតី John F. Kenndey នៅឆ្នាំ១៩៦១ ហើយត្រូវបានធ្វើឡើងជារៀងរាល់ឆ្នាំ ដើម្បីប្រមូលថវិកាជួយដល់ជនក្រីក្រ ជនអត់ឃ្លាន និងអ្នកគ្មានផ្ទះសម្បែងនៅក្នុងសហរដ្ឋអាមេរិក និងនៅជុំវិញពិភពលោក។ <!--AV--> លោកប្រែនដិន ហ្គានរ (Brandon Garner)គឺជាជំនួយការផ្នែករដ្ឋបាលនៃក្រុមប្រឹក្សាភិបាលផ្នែកផ្សព្វផ្សាយរបស់សហព័ន្ធ(Broadcasting Board of Governors)។ លោកគឺជាអ្នកផ្តល់ថវិកាជាប្រចាំដល់អង្គការមនុស្សធម៌មួយចំនួននៅក្នុងសហរដ្ឋអាមេរិកនេះ ចាប់តាំងពីឆ្នាំ២០០៦មក។ លោកបរិច្ចាគ ដោយកាត់ប្រាក់ខែរបស់លោកមួយចំណែក ហើយក្នុងឆ្នាំ២០១១នេះ លោកគឺជាអ្នកផ្តល់អំណោយទានដំបូងគេ។ «ខ្ញុំបរិច្ចាគថវិកាដល់អង្គការជាច្រើន រួមមានអង្គការកាត់បន្ថយឧក្រិដ្ឋកម្ម និងកាកបាទក្រហម ជាដើម។ គ្រាន់តែដកពីរបីដុល្លារពីប្រាក់ខែរបស់ខ្ញុំ ខ្ញុំពិតជាធ្វើឲ្យមានការផ្លាស់ប្តូរយ៉ាងធំធេងនៅក្នុងបណ្តាអង្គការទាំងនោះ»។ មានអង្គការសប្បុរសធម៌សរុបចំនួនជាង៤១០០អង្គការបានចូលរួមនៅក្នុងយុទ្ធនាការសហព័ន្ធរួបរួមគ្នានេះ។ នៅឆ្នាំ២០១០ បុគ្គលិកសហព័ន្ធទាំងមូលប្រមូលថវិកាបានចំនួនជាង២៨១លានដុល្លារអាមេរិក សម្រាប់បុព្វហេតុមនុស្សធម៌នៅជុំវិញពិភពលោក។ ដោយឡែក បុគ្គលិកនៃក្រុមប្រឹក្សាភិបាលផ្នែកផ្សព្វផ្សាយឬBroadcasting Board of Governorsតែមួយ រៃអង្គាសថវិកាបានជាង១៦ម៉ឺនដុល្លារអាមេរិកកាលពីឆ្នាំមុន។ លោកស្រី វីកតូរៀ ប្រីម័រ (Victoria Brimmer)គឺជាអ្នកគ្រប់គ្រងយុទ្ធនាការសហព័ន្ធរួបរួមគ្នារបស់ក្រុមប្រឹក្សានេះ។ «វាមិនសំខាន់ទេថា តើគេបរិច្ចាគថវិកាប៉ុន្មាននោះ។ គោលបំណងសំខាន់គឺឲ្យតែគេបរិច្ចាគ។ ហើយបុគ្គលិកម្នាក់ៗមានឱកាសជ្រើសរើសអង្គការសប្បុរសធម៌ណាមួយដែលពួកគេចង់បរិច្ចាគថវិកាទៅឲ្យ។ ការបរិច្ចាគនេះ មានអត្ថន័យធំធេងណាស់ ពីព្រោះ វាជួយមនុស្សគ្រប់គ្នា ក្នុងសហគមន៍មូលដ្ឋាននៅទូទាំងសហរដ្ឋអាមេរិកនិងទូទាំងពិភពលោក។» អង្គការសប្បុរសធម៌ខ្លះ ផ្តល់ស្បៀងអាហារ និងតម្រូវការមូលដ្ឋានចាំបាច់ផ្សេងទៀតដល់ជនក្រីក្រ និងខ្លះទៀតជួយក្មេងជំទង់ៗ ដែលញឿនថ្នាំ និងអ្នកដែលចេញមកពីស្ថានភាពប្រកបដោយការរំលោភបំពានឬស្ថានភាពដែលធ្វើឲ្យប៉ះទង្គិចផ្លូវចិត្តធ្ងន់ធ្ងរផ្សេងៗទៀតជាដើម។ «ខ្ញុំជឿជាក់ថា មានអង្គការសប្បុរសធម៌អន្តរជាតិជាច្រើនទៀតដែលបម្រើប្រជាជនកម្ពុជាផងដែរ»។ លោកស្រីវីកតូរៀ ប្រីម័រ (Victoria Brimmer) បន្តថា ស្ថានភាពលំបាកខាងហិរញ្ញវត្ថុបច្ចុប្បន្នមិនគួរក្លាយជាឧបសគ្គដល់បុគ្គលិកសហព័ន្ធក្នុងការចែករំលែកទ្រព្យធនបន្តិចបន្តួចរបស់ពួកគេទេ ប្រសិនបើពួកគេចង់។ «ដោយសារ យើងកំពុងស្ថិតក្នុងស្ថានភាពលំបាកខាងហិរញ្ញវត្ថុហ្នឹងហើយ ទើបតម្រូវការកាន់តែច្រើនឡើងនោះ។ យើងទាំងអស់គ្នាដែលជាបុគ្គលិកសហព័ន្ធនេះ មានសំណាងណាស់ដែលយើងមានការងារធ្វើ និងពិតជាមានប្រាក់នៅសល់ខ្លះ។ ទោះបីជាអ្វីៗមានភាពយ៉ាប់យឺនក៏ដោយ ក៏យើងនៅតែអាចរកវិធីផ្តល់ថវិកាបន្តិចបន្តួចបានទៀតដែរ ទៅដល់បុព្វហេតុដែលយើងគាំទ្រ»។ ដូច្នេះ លោកស្រីវីកតូរៀ ប្រីម័រ (Victoria Brimmer) បន្ថែមថា ថវិការបស់សប្បុរសជននៅក្នុងសហព័ន្ធនេះពិតជាជួយកែប្រែជីវិតរបស់ជនក្រីក្រ និងអ្នកដែលមិនសូវមានសំណាងដូចជាពួកគេ នៅជុំវិញពិភពលោក៕ This posting includes an audio/video/photo media file: Download Now |
| ព័ត៌មានអន្តរជាតិ៖ ០៧ វិច្ឆិកា Posted: 06 Nov 2011 08:15 PM PST ព័ត៌មានចុងក្រោយបំផុត៖ ហ្រ្គិក៖ លោកនាយករដ្ឋមន្ត្រីសង្គមនិយមនៃប្រទេសហ្រ្គិក George Papandreou និងលោកAntonis Samaras មេដឹកនាំអភិរក្សនិយមដែលជាពួកប្រឆាំងជួបជំនុំគ្នាទៀតនៅថ្ងៃច័ន្ទនេះដើម្បីជ្រើសរើសនាយករដ្ឋមន្ត្រីចាំផ្ទះថ្មីម្នាក់និងគណៈរដ្ឋមន្ត្រីនៅមុនការប្រជុំនៃពួករដ្ឋមន្ត្រីក្រសួងហិរញ្ញវត្ថុនៃតំបន់ប្រើប្រាស់ប្រាក់អ៊ឺរ៉ូនៅថ្ងៃច័ន្ទនេះ។ ហ្រ្គិក៖ លោកនាយករដ្ឋមន្ត្រីហ្រ្គិក George Papandreou បានទ្បើងមកកាន់អំណាចកាលពីឆ្នាំ២០០៩ ដោយបានសន្យាថានឹងបង្កើតការងារ ជួយក្រុមជនក្រីក្រនិងជួយស្តារសេដ្ឋកិច្ចដែលទន់ខ្សោយ។ ក៏ប៉ុន្តែ លោកបានតស៊ូប្រយុទ្ធដើម្បីកុំឱ្យប្រទេសលោកធ្លាក់ក្នុងការធនក្ស័យនិងទាញសេដ្ឋកិច្ចសាកលទាំងមូលឱ្យធ្លាក់ចុះដុនដាបដែរនោះ។ ជីតារបស់លោក Papandreou ឈ្មោះ George និងឳពុកលោកឈ្មោះ Andreas ក៏ជានាយករដ្ឋមន្ត្រីនៃប្រទេសហ្រ្គិកដែរដែលបានជួយប្រវត្តិសាស្ត្រទំនើបនៃប្រទេសហ្រ្គិកឱ្យមានរូបរាង។ អ៊ីរ៉ង់៖ បណ្តាញផ្សាយព័ត៌មានស.រ.អ.និយាយថាទីភ្នាក់ងារបរមាណូអ.ស.ប.បានទទួលព័ត៌មាននៃការស៊ើបការសម្ងាត់ដែលបង្ហាញថា ប្រទេសអ៊ីរ៉ង់បានធ្វើការងារដើម្បីអភិវឌ្ឍបច្ចេកវិជ្ជាអាវុធបរមាណូ។ នីការ៉ាហ្គា៖ លោកប្រធានាធិបតីDaniel Ortega នៃប្រទេស Nicaragua ហាក់ដូចជានឹងមានជ័យជំនះយ៉ាងខ្លាំងនៅក្នុងកិច្ចខិតខំប្រឹងប្រែងរបស់លោកដើម្បីឱ្យបានជាប់ឆ្នោតសម្រាប់អណត្តិប្រធានាធិបតីទីបី។ ក្វាតេម៉ាឡា៖ អតីតឧត្តមសេនីយម្នាក់ដែលបានសន្យាថានឹងបង្ក្រាបឧក្រិដ្ឋកម្មបានឈ្នះឆ្នោតនៅក្នុងការបោះឆ្នោតប្រធានាធិបតីជាថ្មីនៃប្រទេស Guatemala។ លោក Otto Perez Molina បានឈ្នះនៅក្នុងការបោះឆ្នោតកាលពីថ្ងៃអាទិត្យដោយបានទទួលសន្លឹកឆ្នោតគាំទ្រ៥៥ភាគរយជាមួយសន្លឹកឆ្នោតសឹងតែទាំងអស់បានត្រូវរាប់រួចហើយ ដោយលោកបានឈ្នះអ្នកជំនួញ Manuel Baldizon។ ព័ត៌មាននៅពេលមុននេះ៖ <!--IMAGE-RIGHT--> អារ៉ាប៊ីសាអូឌីត ៖ នៅឆ្នាំនេះក្រុមអ្នកកាន់សាសនាអ៊ីស្លាមជាង២លាន៥សែននាក់បានធ្វើដំណើរធម្មយាត្រាប្រចាំឆ្នាំទៅកាន់ក្រុង Mecca ដើម្បីចូលរួមក្នុងពិធី Hajj។ នីការ៉ាហ្គា ៖ ក្រុមអ្នកបោះឆ្នោតក្នុងប្រទេសនីការ៉ាហ្គាបានទៅបោះឆ្នោតកាលពីថ្ងៃអាទិត្យដើម្បីជ្រើសរើសប្រធានាធិបតីដែលគេរំពឹងថាលោកប្រធានាធិបតី Daniel Ortega ដែលកំពុងកាន់តំណែងនឹងឈ្នះ។ ក្វាតេម៉ាឡា ៖ ពលរដ្ឋក្វាតេម៉ាឡាទៅបោះឆ្នោតដើម្បីជ្រើសរើសប្រធានាធិបតីថ្មី កាលពីថ្ងៃអាទិត្យ។ ក្រិក ៖ នាយករដ្ឋមន្ត្រីក្រិក George Papandreou ចង់ជួបជាមួយប្រធានាធិបតីរបស់ប្រទេសនិងមេដឹកនាំក្រុមប្រឆាំងនៅក្នុងរយៈពេលប៉ុន្មានម៉ោងខាងមុខនេះដើម្បីឱ្យមានការយល់ព្រមអំពីរដ្ឋាភិបាលចម្រុះថ្មីមួយដែលនឹងធ្វើឱ្យមានមូលនិធិជួយសង្គ្រោះខាងហិរញ្ញវត្ថុតទៅទៀតដើម្បីបញ្ចៀសកុំឱ្យមានធនក្ស័យជាតិ។ ស៊ីរី ៖ មានមនុស្សស្លាប់ថែមទៀតនៅក្នុងប្រទេសស៊ីរីនៅពេលដែលការវាយលុកដ៏ឃោរឃៅរបស់រដ្ឋាភិបាលប្រឆាំងនឹងក្រុមបាតុករប្រឆាំងនឹងរដ្ឋាភិបាលមានធ្វើតទៅទៀត។ អាហ្វហ្គានីស្ថាន ៖ អ្នកបំផ្ទុះគ្រាប់បែកអត្តឃាតម្នាក់បានសម្លាប់មនុស្ស៧នាក់ដោយមានរួមបញ្ចូលទាំងប៉ូលីសម្នាក់ផងនៅក្នុងផ្នែកខាងជើងនៃប្រទេសអាហ្វហ្គានីស្ថាន។ មានមនុស្សយ៉ាងហោចណាស់១៨នាក់បានត្រូវរបួសនៅក្នុងផ្ទុះនេះ។ នីហ្សេរីយ៉ា ៖ ចំនួនពលរដ្ឋនីហ្សេរីយ៉ាដែលបានត្រូវសម្លាប់នៅក្នុងការវាយប្រហារមួយចំនួនដែលបានត្រូវបន្ទោសលើនិកាយសាសនាអ៊ីស្លាមនិយមជ្រុលមួយបានទ្បើងដល់លើស១០០នាក់ហើយ៕ This posting includes an audio/video/photo media file: Download Now |
| You are subscribed to email updates from VOA News: ព័ត៌មាន To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
