VOA News: ព័ត៌មាន: “ក្រុមសិទ្ធិមនុស្សបញ្ជាក់ថាការគាបសង្កត់ទំនាស់ដីធ្លីកើនឡើង” plus 2 more |
- ក្រុមសិទ្ធិមនុស្សបញ្ជាក់ថាការគាបសង្កត់ទំនាស់ដីធ្លីកើនឡើង
- ជនជាតិចិនបួននាក់ជាប់ឃុំ ប្រាំនាក់ត្រូវបានដោះលែង
- ព័ត៌មានអន្តរជាតិ៖ ០៩ វិច្ឆិកា
| ក្រុមសិទ្ធិមនុស្សបញ្ជាក់ថាការគាបសង្កត់ទំនាស់ដីធ្លីកើនឡើង Posted: 09 Nov 2011 11:07 AM PST មន្ត្រីអង្គការសិទ្ធិមនុស្សបាននិយាយនៅថ្ងៃពុធនេះថា អ្នកតវ៉ារឿងជម្លោះដីធ្លីដែលបានទទួលរងការធ្វើទុក្ខបុកម្នេញខាងតុលាការមានការកើនឡើងនៅក្នុងឆ្នាំ២០១១នេះ។ របាយការណ៍របស់មជ្ឈមណ្ឌលសិទ្ធិមនុស្សកម្ពុជាបានបញ្ជាក់ថា មានអ្នកតវ៉ារឿងដីធ្លីចំនួន២៦នាក់ជាប់ពាក់ព័ន្ធនឹងបណ្តឹងក្នុងតុលាការ។ របាយការណ៍របស់សមាគមសិទ្ធិមនុស្សអាដហុកបានបញ្ជាក់ថា អ្នកតវ៉ារឿងជម្លោះដីធ្លី៤៦នាក់កំពុងជាប់ឃុំ និង១៧៣នាក់កំពុងជាប់បណ្តឹងក្នុងតុលាការ។ របាយការណ៍របស់អង្គការសិទ្ធិមនុស្សលីកាដូ បានសរសេរថា អ្នកតវ៉ារឿងជម្លោះដីធ្លី៣៥នាក់កំពុងជាប់ឃុំ និង១៦៣នាក់កំពុងជាប់បណ្តឹងតុលាការ។ តុលាការបានចោទប្រកាន់អំពីបទបំផ្លិចបំផ្លាញទ្រព្យសម្បត្តិរបស់អ្នកដទៃ និងបទញុះញង់ក្នុងរឿងជម្លោះដីធ្លីនៅឆ្នាំ២០១១នេះ។ លោក អ៊ូ វីរៈ ប្រធានមជ្ឈមណ្ឌលសិទ្ធិមនុស្សកម្ពុជា បានថ្លែងថាជនរងគ្រោះដោយសារជម្លោះដីធ្លីបានទទួលរងការធ្វើទុក្ខបុកម្នេញខាងតុលាការដែលត្រូវបានកោះហៅដោយតុលាការទៅសាកសួរចំពោះការចោទប្រកាន់អំពីបទបំផ្លិចបំផ្លាញទ្រព្យសម្បត្តិរបស់អ្នកដទៃ និងបទញ៉ុះញ៉ង់។ «ការការពារដីធ្លីរបស់គាត់នេះប្រឈមនឹងការប្តឹងនេះ ហើយការប្តឹងទៅតុលាការនេះគឺជាផ្នែកមួយនៃការដាក់សម្ពាធបន្ថែមទៅលើ ប្រជាពលរដ្ឋក្រីក្រ។ ការប្រើប្រាស់ប្រព័ន្ធតុលាការមួយដែលដឹងថា ប្រព័ន្ធតុលាការនេះអត់ឯករាជ្យ។ ការដែលតុលាការមិនបានបំពេញតួនាទីក្នុងការការពារយុត្តិធម៌ វារំលោភទៅលើសិទ្ធិប្រជាពលរដ្ឋក្នុងទទួលបានយុត្តិធម៌ ការកាត់ក្តីត្រឹមត្រូវ និងសវនាការត្រឹមត្រូវ»។ លោកចាន់ សាវ៉េត ប្រធានផ្នែកឃ្លាំមើលស្ថានភាពសិទ្ធិមនុស្សនៃសមាគមសិទ្ធិមនុស្សអាដហុក បានបញ្ជាក់ថា អង្គការសង្គមស៊ីវិលបានសម្តែងនូវការព្រួយបារម្ភអំពីចំនួនករណីចាប់ខ្លួននិងបណ្តឹងតុលាការប្រឆាំងអ្នកតវ៉ារឿងជម្លោះដីធ្លីមានសន្ទុះកើនឡើងច្រើនជាងឆ្នាំមុន។ «ខ្ញុំគិតថាករណីពាក់ព័ន្ធជាមួយនឹងការចោទប្រកាន់ក្នុងរឿងទំនាស់ដីធ្លីនេះមើលទៅស្ថានភាពអាជ្ញាធរសព្វថ្ងៃប្រើប្រាស់យន្តការតុលាការ ដើម្បីធ្វើការបំបាក់ស្មារតីរបស់ប្រជាពលរដ្ឋ ដែលតស៊ូប្រឆាំងជាមួយនឹងការទាមទាររឿងបញ្ហាដីធ្លី។ តុលាការមិនគួប្បីនឹងចាត់វិធានការរឿងព្រហ្មទណ្ឌទេ ប៉ុន្តែភាគីមានអំណាចជាងប្រជាពលរដ្ឋបានដាក់ពាក្យបណ្តឹងទៅតុលាការ ហើយតុលាការអនុវត្តតាមរបៀបនៃការស៊ើបអង្កេតរឿងព្រហ្មទណ្ឌ។ គេមិននិយាយរឿងបញ្ហាដីធ្លីទេ»។ លោកអ៊ំ សំអាត ប្រធានផ្នែកស៊ើបអង្កេតនៃអង្គការសិទ្ធិមនុស្សលីកាដូ បានថ្លែងថាអង្គការសង្គមស៊ីវិលបានទាមទារដល់រដ្ឋាភិបាលឱ្យដោះស្រាយករណីជម្លោះដីធ្លីដោយសន្តិវិធី ដើម្បីជៀសវាងប្រជាពលរដ្ឋបាត់បង់ដីធ្លី ហើយត្រូវជាប់ពន្ធនាគារ និងជាប់ពាក្យបណ្តឹងតុលាការ ឬរត់គេចខ្លួនពីផ្ទះសម្បែង។ «ក្រុមហ៊ុន ឬអ្នកមានអំណាចប្តឹងទៅតុលាការ ដើម្បីចោទប្រកាន់អំពីបទល្មើសផ្សេងៗ ហើយទង្វើនេះជាការគំរាមគំហែងផ្នែកស្មារតី ឬជាការគំរាមគំហែងមួយ ដើម្បីបន្ទុចបង្អាកប្រជាពលរដ្ឋមិនឱ្យមានការតវ៉ា។ យើងមើលទៅវាយកផ្លូវតុលាការនេះធ្វើជាការដាក់សម្ពាធន៍ ឬការគំរាមគំហែងសម្រាប់ប្រជាពលរដ្ឋជាជាងការដោះស្រាយគ្នាដោយសន្តិវិធី»។ លោក ផៃ ស៊ីផាន អ្នកនាំពាក្យទីស្តីការគណៈរដ្ឋមន្ត្រី បានថ្លែងថា អង្គការមិនមែនរដ្ឋាភិបាលគួរតែលើកយកករណីចាប់ខ្លួន និងការដាក់ពាក្យបណ្តឹងទាក់ទងនឹងរឿងជម្លោះដីធ្លីមកជូនរដ្ឋាភិបាល ដើម្បីដោះស្រាយក្នុងការចូលរួមចំណែកពង្រឹងនីតិរដ្ឋ និងយុត្តិធម៌សម្រាប់គ្រប់ភាគី។ «តុលាការត្រូវស្វែងរក និងរក្សាយុត្តិធម៌ដល់គ្រប់ជនទាំងពីរភាគី ហើយមិនមែនបានសេចក្តីថាចៅក្រមរំលោភអាចរួចខ្លួននោះទេ។ គួរតែរកទិសដៅណាមួយដែលមានប្រសិទ្ធិភាពក្នុងកិច្ចការពង្រឹងយុត្តិធម៌ទាំងការស្វែងរក និងការផ្តល់យុត្តិធម៌ដល់ជនគ្រប់រូបនៅកម្ពុជា»។ នៅក្នុងរយៈពេល៩ខែនេះ សមាគមសិទ្ធិមនុស្សអាដហុកទទួលបានពាក្យបណ្តឹងអំពីជម្លោះដីធ្លីជាង១៨០ករណី ហើយអង្គការសិទ្ធិមនុស្សលីកាដូទទួលបានបណ្តឹងរឿងជម្លោះដីធ្លីចំនួន៧៥ករណី។ មានការកើនឡើងបន្តិចបន្តួច បើប្រៀបធៀបនឹងរយៈពេលដូចគ្នាកាលពីឆ្នាំមុន៕ This posting includes an audio/video/photo media file: Download Now |
| ជនជាតិចិនបួននាក់ជាប់ឃុំ ប្រាំនាក់ត្រូវបានដោះលែង Posted: 09 Nov 2011 10:30 AM PST បន្ទាប់ពីបានសាកសួរអស់រយៈពេលបីថ្ងៃជាប់ៗគ្នា តុលាការក្រុងភ្នំពេញបានសម្រេចឃុំខ្លួនជនជាតិចិនចំនួនបួននាក់ពីបទជួញដូរថ្នាំញៀន និងប្រើប្រាស់អាវុធខុសច្បាប់ ក៏ប៉ុន្តែបានសម្រេចលើកលែងការចោទប្រកាន់ជនជាតិចិន៥នាក់ផ្សេងទៀត។ លោកមាស ច័ន្ទពិសិដ្ឋ ព្រះរាជអាជ្ញារងតុលាការក្រុងភ្នំពេញបាននិយាយប្រាប់វីអូអេសំឡេងសហរដ្ឋអាមេរិកថា ដោយសារតែមិនមានធាតុផ្សំបទល្មើសគ្រប់គ្រាន់តុលាការបានសម្រេចដោះលែងជនជាតិចិនទាំង៥នាក់។ «យើងមិនអាចចោទគេបានដោយធាតុផ្សំមិនទាន់គ្រប់។ អញ្ចឹងនៅពេលចៅក្រមរកឃើញអាចចេញដីកាបង្គប់ឲ្យចាប់វិញបាន»។ កាលពីថ្ងៃព្រហស្បតិ៍សប្តាហ៍មុនកងរាជអាវុធហត្ថរាជធានីភ្នំពេញបានចាប់ខ្លួនជនជាតិចិនចំនួនប្រាំបួននាក់ដាច់ដោយឡែកៗពីគ្នានៅក្នុងខ័ណ្ឌដង្កោ និងខ័ណ្ឌ៧មករាជាមួយនឹងថ្នាំញៀនគ្រប់ប្រភេទចំនួនជាងពីរគីឡូក្រាមនិងអាវុធខ្លីចំនួន១ដើម។ តុលាការក្រុងភ្នំពេញបានធ្វើការសាកសួរអស់រយៈពេលចំនួនបីថ្ងៃដោយសម្រេចឃុំខ្លួនមនុស្សចំនួនប្រាំនាក់ជាបន្តបន្ទាប់ពីថ្ងៃច័ន្ទរហូតមកដល់ថ្ងៃពុធនេះ។ នេះបើតាមការបញ្ជាក់របស់លោកឌុច គឹមសន ចៅក្រមស៊ើបអង្កេត។ «គេយកពីព្រះរាជអាជ្ញាទំរាំមកដល់ចៅក្រមវាយូរពីព្រោះវាច្រើន យើងធ្វើអត់ទាន់។ខ្ញុំសម្រេចឃុំខ្លួនហើយពីបទជួញដូរគ្រឿងញៀន»។ មន្ត្រីស្ថានទូតចិនប្រចាំកម្ពុជាមិនអាចទាក់ទងដើម្បីសុំការបំភ្លឺបានទេនៅថ្ងៃពុធនេះ។ ជនជាតិចិនទាំងបួននាក់ដែលត្រូវតុលាការសម្រេចឃុំខ្លួនមានឈ្មោះ ធូ វ៉ៃជុន (Tu Wei Jun) អាយុ២៧ឆ្នាំ លីន ជឺឡុង( Lin Zhi Long) អាយុ២៦ឆ្នាំ លី ហៃកាង(Li Hai Gang) អាយុ២៨ឆ្នាំ ដែលអ្នកទាំងបីជាជនជាតិចិនដីគោគ និងជុង យ៉ុងថាយ (Zhong Yong Tai) អាយុ៣០ឆ្នាំដែលជាជនជាតិចិនតៃវ៉ាន់។ ដីកាឃុំខ្លួនជនជាតិចិនទាំងបួននាក់នេះត្រូវបានចេញមួយថ្ងៃក្រោយពីតុលាការខេត្តបន្ទាយមានជ័យបានកាត់ទោសមន្ត្រីប៉ូលីសចំនួនប្រាំនាក់ដែលរួមមានលោក ហ៊ុន ហ៊ាន អតីតស្នងការប៉ូលីសខេត្ត លោក ឈៀន សុន អតីតស្នងការរងប៉ូលីសខេត្តព្រមទាំងមន្ត្រីប៉ូលីសបីរូបផ្សេងទៀតពីបទទទួលសំណូកពាក់ព័ន្ឋនឹងថ្នាំញៀនដែលប្តឹងដោយអង្គភាពប្រឆាំងអំពើពុករលួយ។ លោកឧត្តមសេនីយទោខៀវ សាម៉ន ប្រធានមន្ទីរប្រឆាំងគ្រឿងញៀនបាននិយាយថា ក្នុងរយៈពេលប្រាំបួនខែដើមឆ្នាំ២០១១នេះអាជ្ញាធរបានបង្ក្រាបករណីជួញដូរថ្នាំញៀនចំនួន៧០៩ករណីនិងរឹបអូសថ្នាំញៀនមេតំហ្វេតាមីនគ្រាប់ចំនួន២សែន៥ពាន់គ្រាប់ ថ្នាំញៀនមេតំហ្វេតាមីនទឹកកកជាង១៣គីឡូក្រាម កញ្ឆាក្រៀមជាង៨គីឡូក្រាម ម៉្សៅហេរ៉ូអ៊ីន ៣គីឡូក្រាម និងថ្នាំញៀនអ៊ិចស្តាស៊ីចំនួន១.៦០០គ្រាប់។ លោកបានបញ្ជាក់ទៀតថា ជនល្មើសដែលត្រូវបានចាប់បញ្ជូនទៅតុលាការយ៉ាងតិចចំនួនជាង១.៧០០នាក់ដែលត្រូវបានតុលាការកាត់ទោសឲ្យជាប់ពន្ឋនាគារពី២០ឆ្នាំរហូតមួយជីវិត៕ This posting includes an audio/video/photo media file: Download Now |
| ព័ត៌មានអន្តរជាតិ៖ ០៩ វិច្ឆិកា Posted: 08 Nov 2011 11:28 PM PST ព័ត៌មានចុងក្រោយបំផុត៖ ឡាវ៖ ក្រុមអ្នកការពារបរិដ្ឋានអាមេរិកាំងមួយបានថ្កោលទោសសេចក្ដីរាយការណ៍មួយ ធ្វើឡើងដោយក្រុមហ៊ុនជួលដោយប្រទេសឡាវដែលឲ្យយោបល់អនុញាតបន្ដផែនការសង់ទំនប់វារីអគ្គិសនីនៅលើទន្លេមេគង្គ។ អ៊ីរ៉ង់៖ ប្រធានាធិបតីអ៊ីរ៉ង់ លោក Mahmoud Ahmadinejad ថ្លែងថាប្រទេសរបស់លោក នឹងមិនដកថយមួយចំណិតជំហានពីមាគ៌ានុយក្លេអ៊ែររបស់ខ្លួនទេ ក្រោយពីមានសេចក្ដីរាយការណ៍មួយ អំពីការព្រួយបារម្ភថា រដ្ឋាភិបាលទីក្រុង តេហេរ៉ង កំពុងតាមស្វែងរកការស្ថាបនាអាវុធបរមាណូ។ អ៊ឺរ៉ុប៖ មេដឹកនាំគណបក្សនយោបាយរបស់ប្រទេស ក្រិក បានបញ្ឈប់ការដេញដោលគ្នាដើម្បីបង្កើតរដ្ឋាភិបាលចម្រុះថ្មីមូយ កាលពីព្រឹកថ្ងៃអង្គារនេះ ដោយ មិនបានទទួលការសម្របសម្រួលគ្នាណាមួយ តែបានសម្រេចថា នឹងចាប់ផ្ដើមការចរចានោះឡើងវិញនៅល្ងាចថ្ងៃពុធនេះ។ អ៊ីតាលី៖ នាយករដ្ឋមន្ដ្រីអ៊ីតាលី លោក Silvio Berlusconi ថ្លែងថាលោកនឹងចុះចេញពីដំណែងក្រោយពីរដ្ឋសភា បានអនុម័តមកលើការកែទម្រង់សេដ្ឋកិច្ចដ៏សំខាន់ ដែលមានគោលដៅនឹងធ្វើឲ្យមានស្ថេរភាពដល់សេដ្ឋកិច្ចរបស់ប្រទេសអ៊ីតាលី។ អាហ្វហ្កានិស្ថាន៖ មន្ដ្រីតំបន់ និយាយថា ទាហាន អាហ្វហ្កានិស្ថាន និងទាហាន អូតង់ បានសម្លាប់ជនសកម្មប្រយុទ្ធតាលីបាន យ៉ាងតិច៥០នាក់ ដែលបានបើកការវាយលុកចូលទៅក្នុងមូលដ្ឋានមួយ នៅក្បែរព្រំដែនជាមួយប្រទេសប៉ាគិស្ថាន។ ឥណ្ឌា/ប៉ាគិស្ថាន៖ ឥណ្ឌា និងប៉ាគិស្ថាន កំពុងស្វែងរកមធ្យោបាយដើម្បីធ្វើឲ្យប្រសើរដល់ការទុកចិត្ដគ្នាទៅវិញទៅមក នៅចំពេលដែលប្រទេសជិតខាងនោះ ដែលមានអាវុធបរមាណូខិតខំបង្កើតដំណើរការឆ្ពោះទៅរកសន្ដិភាពចាប់តាំងពីដើមឆ្នាំ។ លីបេរីយ៉ា៖ ជនជាតិលីបេរីយ៉ា កំពុងរង់ចាំលទ្ធផលនៃការបោះឆ្នោតជ្រើសរើសប្រធានាធិបតីក្នុងការបោះឆ្នោតលើកទីពីរ ដោយគេរំពឹងថា ប្រធានាធិបតីបច្ចុប្បន្ន លោកស្រី Ellen Johnson Sirleaf នឹងទទួលបានអាណត្ដិទីពីរ ហើយនៅពេលនេះដែរ រដ្ឋាភិបាលគំាទ្រសេចក្ដីសម្រេចចិត្ដរបស់ខ្លួនដើម្បីបិទស្ថានីយវិទ្យុបីដែលគេយល់ថា ជាអ្នកគាំទ្រគណបក្សជំទាស់។ រុស្សី៖ កាលពីថ្ងៃពុធ ព្រះអង្គារយានហ្វូបូស មានបញ្ហាដោយសារម៉ាស៊ីនកុំព្យូទ័រនៅលើយាន្តមិនដំណើរការហើយបានត្រូវជាប់គាំងនៅលើ វិថីផែនដី។ នាយកទីភ្នាក់ងារអវកាសរុស្ស៊ី លោក Vladimir Popovkin ថ្លែងថា យានអាវកាស ខកខាន មិនបានបញ្ឆេះ ម៉ាស៊ីន រហូតដល់ពីរដង។ វៀតណាម៖ អាជ្ញាធរវៀតណាមនិយាយថា ជនជាតិវៀតណាម ១០០ នាក់ស្លាប់ដោយសារទឹកជំនន់ធ្ងន់ធ្ងរ ដែលបានរាលដាលពេញតែប្រទេស ជាច្រើនសប្ដាហ៍មកហើយ។ ចិន៖ មន្ដ្រីចិន និយាយថា ប្រទេសចិន និង ប្រទេសជិតខាងរបស់ខ្លួនជាច្រើននឹងចាប់ផ្ដើមធ្វើការយាមល្បាតនៅតំបន់ទន្លេមេគង្គ នៅពេលឆាប់ៗនេះ នៅពេលដែលបុគ្គលិកចិនជាង ១៣ នាក់បានត្រូវ ជនសង្ស័យជាអ្នករត់គ្រឿងញៀន សម្លាប់ កាលពីខែមុន។ អេប៉ិច៖ ក្រុមអ្នកស្រាវជ្រាវ សម្រាប់អង្គការ សេដ្ឋកិច្ច អាស៊ីប៉ាស៊ីហ្វិក និយាយថា ការធ្វើឲ្យប្រសើរដល់ប្រសិទ្ធភាព បានសន្សំប្រាក់ដល់ប្រទេសតំបន់ រហូតដល់ ៥៨ ពាន់លានដុល្លារ នៃចំណាយពាណិជ្ជកម្ម ចាប់តាំងពីឆ្នាំ ២០០៧។ <!--AV--> ព័ត៌មាននៅពេលមុននេះ៖ <!--IMAGE-RIGHT--> ឥណ្ឌូនេស៊ី៖ ទីភ្នាក់ងាររដ្ឋាភិបាលសហរដ្ឋអាមេរិក ប្រាប់ឲ្យដឹងថាប្រទេសឥណ្ឌូណេស៊ី ទំនងយល់ព្រមឲ្យប្រទេសភូមាធ្វើជាប្រធានរបស់សមាគមប្រទេសអាស៊ីអាគ្នេយ៍ក្នុងឆ្នាំ២០១៤។ ចិន ៖ ជនជាតិរាប់ម៉ឺននាក់បានបន្ថែមការរួមវិភាគទានរបស់ខ្លួនកាលពីថ្ងៃអង្គារដើម្បីជួយវិចិត្រករ Ai Weiwei ដើម្បីបង់ពន្ធដ៍សំបើមដែលជនជាតិចិនជាច្រើនមើលឃើញថាជាការប៉ុនប៉ងដើម្បីបំបិទមាត់អ្នករិះគន់ខាងសង្គមនេះ។ ជប៉ុន ៖ កសិករនិងអ្នកនេសាទជប៉ុនរាប់ពាន់នាក់បានធ្វើកូដកម្មនៅតូក្យូដើម្បី តវ៉ាដល់ការចូលរួមដែលបានស្នើរបស់ជប៉ុនក្នុងអង្គការពាណិជ្ជកម្មសេរីដែលគេពង្រីកនៅតំបន់អាស៊ីនិងមហាសមុទ្រប៉ាស៊ីហ្វិក។ អ៊ីរ៉ង់ ៖ ទីភ្នាក់ងារនុយក្លេអ៊ែរបស់អង្គការសហប្រជាជាតិបានផ្តល់ព័ត៌មានសម្ងាត់ដែលបង្ហាញថាអ៊ីរ៉ង់បានធ្វើការងារដើម្បីអភិវឌ្ឍន៍បច្ចេកវិទ្យាធ្វើអាវុធនុយក្លេអ៊ែរ។ អ៊ីតាលី ៖ នាយករដ្ឋមន្រ្តីអ៊ីតាលី Silvio Berlusconi បានឈ្នះការបោះឆ្នោតថវិកាដ៍សំខាន់មួយកាលពីថ្ងៃអង្គារនៅក្នុងសភា តែបាត់បង់ការគាំទ្រសម្លេងភាគច្រើន សម្រាប់រដ្ឋាភិបាលដ៍ទន់ខ្សោយរបស់លោក។ ក្រិក ៖ អ្នកសេដ្ឋវិទូ Lucas Papademos នឹងក្លាយជានាយករដ្ឋមន្រ្តីអន្តរកាលរបស់ប្រទេសនោះ ពេលដែលប្រទេសរួមរឹតដោយបំណុល ធ្វើការតស៊ូដើម្បីបំពេញតម្រូវការរបស់ម្ចាស់បំណុលអន្តរជាតិ។ លីបេរីយ៉ា ៖ លោកស្រីប្រធានាធិបតី Johnson Sirleaf នៃប្រទេសលីបេរីយ៉ា នឹងទទួលជ័យជំនះក្នុងការបោះឆ្នោតអាណត្តិទី២ក្នុងអំឡុងពេលនៃការបោះឆ្នោតជុំទី២កាលពីថ្ងៃអង្គារដោយការធ្វើពិហិការពីគូប្រកួតប្រជែងរបស់លោកស្រី ហើយនាំឲ្យមានអំពើហិង្សាដែលបានសម្លាប់មនុស្ស។ អាហ្វហ្គានីស្ថាន ៖ ការវាយប្រហារដោយគ្រាប់បែកបង្កប់នៅតាមជាយផ្លូវបានសម្លាប់មនុស្សយ៉ាងហោចណាស់ក៏១០នាក់ដែរកាលពីថ្ងៃច័ន្ទក្នុងខេត្ត Baghdis ភាគពាយ័ព្យនៃអាហ្គានីស្ថាន។ រុស្ស៊ី៖ ប្រទេសរុស្ស៊ីដែលជាប្រទេសនាំប្រងចេញធំជាងគេបំផុតក្នុងពិភពលោកចាំបាច់កាត់បន្ថយការពឹងផ្អែករបស់ខ្លួនលើប្រាក់ចំណូលប្រេងហើយធ្វើឲ្យមានសេដ្ឋកិច្ចច្រើនមុខដើម្បីធ្វើឲ្យមានសេ្ថរភាព។ ស៊ីរី ៖ យ៉ាងហោចណាស់ក៏៣ពាន់៥រយនាក់បានត្រូវសម្លាប់នៅក្នុងការបង្ក្រាបរយៈពេល៨ខែរបស់រដ្ឋាភិបាលស៊ីរីលើពួកប្រឆាំង ខណៈនោះដែររដ្ឋមន្រ្តីក្រសួងការបរទេសស៊ីរីបានចោទប្រកាន់សហរដ្ឋអាមេរិកពីការលើកទឹកចិត្តឲ្យមានការជ្រួលច្របល់នៅក្នុងប្រទេស៕ This posting includes an audio/video/photo media file: Download Now |
| You are subscribed to email updates from VOA News: ព័ត៌មាន To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
