VOA News: ព័ត៌មាន: “ខ្មែរអាមេរិកម្នាក់ដកខ្លួនពីដើមបណ្តឹងរដ្ឋប្បវេណី” plus 3 more |
- ខ្មែរអាមេរិកម្នាក់ដកខ្លួនពីដើមបណ្តឹងរដ្ឋប្បវេណី
- ការលក់ដូរធ្លាក់ចុះដោយសារគ្មានពិធីបុណ្យអុំទូក
- ព័ត៌មានអន្តរជាតិ៖ ១០ វិច្ឆិកា
- អង្គការក្រៅរដ្ឋាភិបាលម៉ាឡេស៊ីអំពាវនាវឲ្យកម្ពុជានិងម៉ាឡេស៊ីការពារពលករិនីកម្ពុជា
| ខ្មែរអាមេរិកម្នាក់ដកខ្លួនពីដើមបណ្តឹងរដ្ឋប្បវេណី Posted: 10 Nov 2011 10:31 AM PST អ្នកច្បាប់ខ្មែរសញ្ជាតិអាមេរិក និងជាអតីតអ្នកទោសកុមារក្នុងសម័យខ្មែរក្រហម កញ្ញា សេង ធារី បានប្រកាសថា នាងនឹងដកខ្លួនពីដើមបណ្ដឹងរដ្ឋប្បវេណីក្នុងសំណុំរឿង០០២ រួមទាំងឈប់ប្ដឹងឧទ្ធរណ៍ប្រឆាំងនឹងការច្រានចោលពាក្យស្នើសុំតាំងខ្លួនជាដើមបណ្ដឹងរដ្ឋប្បវេណីក្នុងសំណុំរឿង០០៣ និង០០៤ផងដែរ។ នៅក្នុងសេចក្ដីប្រកាសព័ត៌មានកាលពីល្ងាចថ្ងៃពុធ នាយិកាសមាគមជនរងគ្រោះក្នុងរបបខ្មែរក្រហមបានលើកពីមូលហេតុមួយដែលនាងចាត់ទុកថា សាលាក្ដីខ្មែរក្រហម «គឺជាឆាកល្ខោននយោបាយ»។ ការប្រកាសដកខ្លួននេះធ្វើឡើងខណៈដែលអង្គជំនុំជម្រះសាលាដំបូងនឹងចាប់ផ្ដើមបើកសវនាការពេញអង្គសេចក្ដីក្នុងសំណុំរឿង ០០២ នេះនៅថ្ងៃទី ២១ ខែវិច្ឆិកានេះ។ សំណុំរឿងនេះដែលមានអតីតមេដឹកនាំកំពូលខ្មែរក្រហមបួននាក់ គឺនួន ជា អតីតប្រធានសភាខ្មែរក្រហម ខៀវ សំផង អតីតប្រមុខរដ្ឋ អៀង សារី អតីតឧបនាយករដ្ឋមន្ដ្រី និងជារដ្ឋមន្ដ្រីការបរទេស និងប្រពន្ធរបស់គាត់ អៀង ធីរិទ្ធ អតីតរដ្ឋមន្ដ្រីក្រសួងសង្គមកិច្ច។ ពួកគេត្រូវចោទប្រកាន់ពីបទដែលពាក់ពន្ធ័នឹងការបណ្ដាលឲ្យប្រជាពលរដ្ឋកម្ពុជាយ៉ាងតិច១,៧ លាននាក់ស្លាប់បាត់បង់ជីវិតចន្លោះពីឆ្នាំ ១៩៧៥ ដល់ឆ្នាំ១៩៧៩។ កញ្ញាសេង ធារី បានឲ្យដឹងថា នាងនឹងជូនដំណឹងពីការដកខ្លួននេះទៅដល់សាលាក្ដីខ្មែរក្រហមនៅដើមសប្ដាហ៍ក្រោយ។ «ខ្ញុំសម្រេចចិត្តហើយ។ ហើយខ្ញុំនឹងធ្វើដំណើរទៅជូនព័ត៌មានទៅតុលាការនៅថ្ងៃអង្គារសប្ដាហ៍ក្រោយ។ គេចេះតែប្រើនាមរបស់យើង ប៉ុន្ដែសម្រាប់ផលប្រយោជន៍នយោបាយដែលយើងមិនអាចទទួលយកបាន»។ កញ្ញាសេង ធារី បានប្ដឹងសុំតាំងខ្លួនជាដើមបណ្ដឹងរដ្ឋប្បវេណីប្រឆាំងនឹងអតីតមេដឹកនាំកំពូលខ្មែរក្រហមទាំងបួននាក់ក្នុងសំណុំរឿង០០២ សម្រាប់ការស្លាប់បាត់បង់ជីវិតនៃឱពុកម្ដាយរបស់នាង និងរូបនាងផ្ទាល់ត្រូវពួកខ្មែរក្រហមចាប់ដាក់គុករយៈពេលប្រាំខែក្នុងខេត្តស្វាយរៀង។ មានដើមបណ្ដឹងរដ្ឋប្បវេណីសរុបចំនួនជាង៣.៨៦០ នាក់ ក្នុងសំណុំរឿង០០២នេះ។ អតីតនាយិកាមជ្ឈមណ្ឌលអភិវឌ្ឈន៍សង្គមរូបនេះក៏បានដាក់ពាក្យសុំតាំងខ្លួនជាដើមបណ្ដឹងរដ្ឋប្បវេណីក្នុងសំណុំរឿង០០៣ និង០០៤ ប្រឆាំងនឹងអតីតអ្នកទទួលខុសត្រូវជាន់ខ្ពស់ខ្មែរក្រហមចំនួនប្រាំនាក់ផ្សេងទៀត ក៏ប៉ុន្ដែសហចៅក្រមស៊ើបអង្កេតបានទាត់ចោលការស្នើសុំនោះ។ នាងបានប្ដឹងឧទ្ធរណ៍ប្រឆាំងនឹងការសម្រេចនោះក៏ប៉ុន្ដែនៅមិនទាន់មានការសម្រេចពីអង្គបុរេជំនុំជម្រះនៅឡើយ។ លោកនេត្រ ភក្រ្ដា អ្នកនាំពាក្យសាលាក្ដីខ្មែរក្រហមមានប្រសាសន៍ថា ការដកខ្លួនរបស់កញ្ញា សេង ធារី នឹងមិនធ្វើឲ្យប៉ះពាល់ដល់ដំណើរការក្ដីនោះទេ។ «គឺជាសិទ្ធិរបស់គាត់នៅក្នុងការប្រកាសដកខ្លួននោះ ក៏ប៉ុន្ដែវាមិនប៉ះពាល់ទៅដល់ដើមបណ្ដឹងរដ្ឋប្បវេណីដទៃទៀតក្នុងសំណុំរឿង ០០២ ហើយនិងការដាក់ពាក្យសុំតាំងខ្លួនជាដើមបណ្ដឹងរដ្ឋប្បវេណីក្នុងសំណុំរឿងផ្សេងៗទៀតទេ»។ ជាមួយគ្នានេះមន្ដ្រីអ្នកនាំពាក្យដដែលបានច្រានចោលការចោទប្រកាន់ពីការជាប់ពាក់ពន្ធ័ផ្នែកនយោបាយរបស់សាលាក្ដីខ្មែរក្រហមដែលកញ្ញា សេង ធារី បានលើកឡើងនោះ។ ក្រុមមេធាវីការពារក្ដីរបស់នួន ជា បានប្ដឹងទៅកាន់សាលាដំបូងរាជធានីភ្នំពេញកាលពីពេលថ្មីៗនេះដោយលើកឡើងពីការជ្រៀតជ្រែករបស់មន្ដ្រីរដ្ឋាភិបាលចូលក្នុងសាលាក្ដីខ្មែរក្រហម។ កាលពីខែ តុលា អង្គការសហប្រជាជាតិបានព្រមានកម្ពុជាឲ្យឈប់បន្ដធ្វើសេចក្ដីថ្លែងការណ៍ដែលមានលក្ខណៈជាការជ្រៀតជ្រែកលើសំណុំរឿងបន្ថែម ០០៣ និង០០៤៕ This posting includes an audio/video/photo media file: Download Now |
| ការលក់ដូរធ្លាក់ចុះដោយសារគ្មានពិធីបុណ្យអុំទូក Posted: 10 Nov 2011 09:50 AM PST នៅតាមដងទន្លេសាបមុខព្រះបរមរាជវាំងដែលធ្លាប់តែមានមនុស្សរាប់លាននាក់ពីគ្រប់ខេត្តទូទាំងប្រទេសកម្ពុជាពេលបុណ្យអុំទូកតាមទំនៀមទម្លាប់ប្រពៃណីខ្មែរជារៀងរាល់ឆ្នាំនោះ ឆ្នាំនេះបានក្លាយជាភាពស្ងប់ស្ងាត់ដោយសារតែគ្មានពីធីបុណ្យអុំទូក។ ព្រះរាជពិធីបុណ្យអ៊ុំទូកត្រូវបានធ្វើឡើងតាមទំនៀមទម្លាប់ប្រពៃណីខ្មែរជារៀងរាល់ឆ្នាំពីថ្ងៃទី៩ដល់ថ្ងៃទី១១ ខែវិច្ឆិកា។ លោកនាយករដ្ឋមន្ត្រី ហ៊ុន សែនបានប្រកាសលុបចោលព្រះរាជពិធីបុណ្យអុំទូកប្រចាំឆ្នាំនេះដោយសារតែកម្ពុជាបានប្រឈមនឹងគ្រោះមហន្តរាយទឹកជំនន់ដែលបានសម្លាប់មនុស្សជាង២៥០នាក់ និងបំផ្លាញស្រូវកសិកររាប់ម៉ឺនហិកតា។ ថ្ងៃប្រារព្វពិធីប្រណាំងទូក មើលទៅដូចជាថ្ងៃធម្មតា ហើយអ្នកលក់ហាក់ដូចជាមិនសូវសប្បាយចិត្ត។ ក្រុមអ្នកលក់ បានត្អូញត្អែរនៅថ្ងៃព្រហស្បតិ៍នេះថា មុខរបរលក់ដូររបស់ពួកគេបានបាត់បង់ចំណូលប្រមាណ៣០ភាគរយសម្រាប់ការលក់ផលិតផលនានានៅក្នុងរដូវបុណ្យប្រណាំងទូកនេះ។ លោក អឿ រ៉ាយុទ្ធ ម្ចាស់តូបលក់ទឹកអប់ និងសាប៉ូដុសខ្លួននៅកោះពេជ្រ បានរអ៊ូរទាំថា លោកអាចខាតបង់ប្រាក់អស់យ៉ាងតិច១.០០០ដុល្លារអាមេរិកសម្រាប់តូបមួយក្នុងរយៈពេលបីថ្ងៃនៃពិធីបុណ្យប្រណាំងទូកនៅឆ្នាំនេះ ដោយសារគ្មានពិធីប្រណាំងទូក។ លោកបានបន្ថែមថា កាលពីពិធីប្រណាំងទូកឆ្នាំ២០១០ លោកអាចលក់ផលិតផលបានប្រាក់ជាង១.៣០០ដុល្លារអាមេរិកក្នុងមួយថ្ងៃសម្រាប់តូបមួយ។ ប៉ុន្តែក្នុងឆ្នាំ២០១១នេះ លោកអាចលក់បានប្រាក់មិនដល់១.០០០ដុល្លារទេក្នុងមួយថ្ងៃ។ «វាត្រូវតែប៉ះពាល់ដល់ជំនួញ។ វាជៀសមិនរួចទេ។ នៅពេលមានកម្មវិធីអុំទូក មនុស្សច្រើនមកមើលមកដើរលេងកំសាន្ត។ នៅពេលយើងអត់មានកម្មវិធីអុំទូក មនុស្សតិចជាងមកដើរកំសាន្តលេង។ វាប្រហែលជាអាចធ្លាក់ប្រហែល២០ភាគតែប៉ុណ្ណោះ»។ លោកលាង ហាក់ ម្ចាស់តូបលក់ខ្សែក្រវ៉ាត់នៅកោះពេជ្រ បានត្អូញត្អែរថា ការលក់ផលិតផលរបស់លោកអាចធ្លាក់ចុះ៣០ភាគរយ ដោយសារគ្មានពិធីបុណ្យប្រណាំងទូក និងគ្មានអ្នកមកដើរកំសាន្តពីខេត្តនានា ដើម្បីទិញផលិតផលប្រើប្រាស់ផ្សេងៗ។ លោកលាង ហាក់ បានបញ្ជាក់ថា លោកមានកង្វល់អំពីការធ្លាក់ចុះនៃការលក់ផលិតផលនេះ។ លោកធ្លាប់លក់ក្នុងមួយថ្ងៃបានប្រាក់យ៉ាងតិច៣.០០០ដុល្លារកាលពីពិធីប្រណាំងទូកឆ្នាំំ២០១០ ប៉ុន្តែនៅឆ្នាំនេះ ការលក់ផលិតផលរបស់លោកបានប្រាក់តែ២.០០០ ដុល្លារក្នុងមួយថ្ងៃប៉ុណ្ណោះ។ «អ្នកមកដើរកំសាន្តតិច។ អ្នកលក់បានតិចដែរ។ ការលក់ធ្លាក់ពី៣០ទៅ៤០ភាគរយ»។ លោកខេង ហុង ម្ចាស់តូបលក់ផលិតផលពីម៉ាឡេស៊ីនៅកោះពេជ្រ បានថ្លែងថា កាលពីពិធីប្រណាំងទូកឆ្នាំមុន លោកលក់បានប្រាក់២.៣០០ ដុល្លារក្នុងមួយថ្ងៃ ប៉ុន្តែនៅឆ្នាំនេះ លោករកបានប្រាក់ប្រមាណជា២.០០០ដុល្លារអាមេរិកតែប៉ុណ្ណោះ។ លោកខេង ហុង បានបន្ថែមថា បើមានការប្រារព្វពិធីប្រណាំងទូក លោកមិនត្រឹមតែអាចលក់ផលិតផលរបស់លោកប៉ុណ្ណោះទេ ប៉ុន្តែថែមទាំងអាចផ្សព្វផ្សាយផលិតផល ដើម្បីទាក់ទាញការគាំទ្រផលិតផលរបស់លោកពីមនុស្សដើរកំសាន្តទាំងនោះ។ ជារៀងរាល់ឆ្នាំមានទូកប្រណាំងជាង៤០០គ្រឿងដែលចំណាយអស់ជាង១លានដុល្លារ និងអ្នកដើរកំសាន្តជាងបីលាននាក់មកពីទូទាំងប្រទេស និងប្រទេសផ្សេងៗមកចូលរួមក្នុងពិធីប្រណាំងទូកនេះ៕ This posting includes an audio/video/photo media file: Download Now |
| ព័ត៌មានអន្តរជាតិ៖ ១០ វិច្ឆិកា Posted: 09 Nov 2011 10:44 PM PST ព័ត៌មានចុងក្រោយបំផុត៖ ស.រ.អា៖ បេក្ខជនប្រធានាធិបតីខាងគណបក្សសាធារណរដ្ឋបង្ហាញក្តីសង្ឃឹមក្នុងកិច្ចពិភាក្សា ដើម្បីដោះស្រាយវិបត្តិសេដ្ឋកិច្ច និងការងារធ្វើ ពេលគេដេញដោលគ្នានៅរដ្ឋ Michigan។ លោក Rick Perry អភិបាលរដ្ឋTexas ប្រហែលជាមានការលំបាកពេលលោកព្យាយាមឆ្លើយសំណួរ។ ស៊ិរី៖ ក្រុមប្រឹក្សាជាតិដែលជាក្រុមប្រឆាំងកំពុងអំពាវនាវឲ្យមានកូដកម្មទូទៅមួយនៅថ្ងៃព្រហស្បតិ៍នេះ ដើម្បីទាមទារប្រឆាំងនឹងអ្វីដែលគេនិយាយថា ការបង្ក្រាបដោយឃោរឃៅពីរដ្ឋាភិបាលនៅតំបន់Homs ភាគកណ្តាល។ លីបេរីយ៉ា៖ មន្ត្រីនានានិយាយថា លទ្ធផលបឋមនៃការបោះឆ្នោតប្រធានាធិបតីប្រទេសលីបេរីយ៉ានឹងចេញនៅថ្ងៃព្រហស្បតិ៍នេះ។ លោកស្រីប្រធានាធិបតី Ellen Johnson Sirleaf អាចនឹងជាប់ឆ្នោតអាណត្តិទី២នេះ រីឯបេក្ខជនប្រឆាំងWilliam Tubman ធ្វើពហិកាការបោះឆ្នោតកាលពីថ្ងៃអង្គារ ដោយចោទថា មានការលួចបន្លំ។ អ៊ីរ៉ង់៖ ប្រទេសចិននិយាយថា ទណ្ឌកម្មមិនមែនជាមូលដ្ឋាននៃការដោះស្រាយកង្វល់អន្តរជាតិអំពីកម្មវិធីនុយក្លេអ៊ែររបស់ប្រទេសអ៊ីរ៉ង់ទេ។ Hong Lei អ្នកនាំពាក្យក្រសួងការបរទេសចិនបានធ្វើអត្ថាធិប្បាយបែបនេះនៅថ្ងៃព្រហស្បតិ៍ មួយថ្ងៃក្រោយពីមហាអំណាចលោកខាងលិច និយាយថា រដ្ឋាភិបាលក្រុងTehran អាចប្រឈមមុខនឹងទណ្ឌកម្មបន្ថែមទៀត ប្រសិនបើ រដ្ឋាភិបាលនេះមិនសហការជាមួយអធិការកិច្ចរបស់អសប ពិនិត្យអាវុធនុយក្លេអ៊ែរ។ អ៊ឺរ៉ុប៖ ទីផ្សារហិរញ្ញវត្ថុអាស៊ីបិទនៅថ្ងៃព្រហស្បតិ៍នេះ ដោយព្រួយបារម្ភថា វិបត្តិហិរញ្ញវត្ថុដែលចុះដុនដាបនៅប្រទេសអ៊ីតាលីអាចរុញច្រានសេដ្ឋកិច្ចអ៊ឺរ៉ុបធ្លាក់ចុះខ្លាំង។ ទីផ្សារហ៊ុនរបស់ក្រុមហ៊ុន Nikkeiជប៉ុនធ្លាក់ចុះជាមធ្យមជិត៣% ហើយទីផ្សារហ៊ុននៃក្រុមហ៊ុន Hang Seng នៅហុងកុងធ្លាក់ចុះជិត៥% ក្រោយពីមានព័ត៌មានថា អត្រាការប្រាក់នៅប្រទេសអ៊ីតាលីឡើងលើ៧%កាលពីថ្ងៃពុធ។ ឥណ្ឌា/ប៉ាគិស្ថាន៖ នាយករដ្ឋមន្ត្រីឥណ្ឌា និងនាយករដ្ឋមន្ត្រីប៉ាគិស្ថាន និយាយថា គេរំពឹងថា កិច្ចពិភាក្សាក្នុងពេលខាងមុខនឹងបន្តធ្វើឲ្យប្រទេសទាំងពីរកាន់តែជិតស្និទ្ធនឹងគ្នា។ លោក Manmohan Singh នាយករដ្ឋមន្ត្រីឥណ្ឌា និយាយនៅថ្ងៃព្រហស្បតិ៍នេះថា ប្រទេសទាំងពីរបានចំណាយពេលវេលាច្រើនណាស់ទៅលើកិច្ចពិភាក្សាដ៏ជូរចត់។ លោកនិយាយថា ថ្វីបើមានការជឿនលឿនក្នុងឆ្នាំកន្លងមកក៏ដោយ តែនៅមានបញ្ហាច្រើនទៀតត្រូវដោះស្រាយ។ ជប៉ុន៖ លោក Yoshihoko Noda នាយករដ្ឋមន្ត្រីជប៉ុន បានលើកពេលសន្និសីទព័ត៌មាននៅថ្ងៃព្រហស្បតិ៍ ដែលគេរំពឹងថា លោកនឹងប្រកាសថា រដ្ឋាភិបាលរបស់លោកនឹងចូលរួមការចរចាអំពីកតិកាសញ្ញាពាណិជ្ជកម្មសេរីឆ្លងមហាសមុទ្រប៉ាស៊ីហ្វិក។ ស.រ.អា៖ លោក Joe Paterno គ្រូបង្ហាត់កីឡាបាល់ទាល់អាមេរិកកាំងដ៏ល្បីនៅក្នុងមហាវិទ្យាល័យ ត្រូវសាកលវិទ្យាល័យរដ្ឋ Pennsylvania បណ្តេញចេញពីការងារ នៅពេលមានការរិះគន់ថា លោកនិងមន្ត្រីផ្សេងទៀតនៅក្នុងសាកលវិទ្យាល័យនេះទាក់ទងនឹងការចោទប្រកាន់ពីបទបំពារបំពានផ្នែកភេទជាមួយកុមារ។ តួកគី៖ បុគ្គលិកជួយសង្គ្រោះនៅប្រទេសតួកគីកំពុងតាមរកអ្នករួចជីវិត ក្រោយពីមានការរញ្ជួយដីទំហំ៥,៧ ដែលបានសម្លាប់មនុស្សយ៉ាងតិច៧នាក់។ មន្ត្រីនានានិយាយនៅថ្ងៃព្រហស្បតិ៍នេះថា មានមនុស្ស២៥នាក់ត្រូវបានគេសង្គ្រោះឲ្យរួចជីវិតពីគំនរបាក់បែក ក្រោយពីបុគ្គលិកសង្គ្រោះធ្វើការមួយយប់ថ្ងៃពុធ នៅតំបន់ Van ក្បែរព្រំដែនជាមួយប្រទេសអ៊ីរ៉ង់។ គេជឿថា មានមនុស្សរាប់សិបនាក់ជាប់ក្នុងគំនរបាក់បែកពីការរញ្ជួយដីនោះ។ <!--AV--> ព័ត៌មាននៅពេលមុននេះ៖ <!--IMAGE-RIGHT--> អ៊ីតាលី ៖ ផ្សារហ៊ុនសំខាន់នៅក្នុងអាមេរិកនិងអឺរ៉ុបបានចុះថ្លៃយ៉ាងខ្លាំងនៅថ្ងៃពុធនេះ ហើយតម្លៃប្រាក់កម្ចីរបស់អ៊ីតាលីបានឡើងខ្ពស់ ពេលដែលស្រមោលដ៏វែងនៃវិបត្តិប្រាក់បំណុលរបស់ទ្វីបអឺរ៉ុបកំពុងតែគ្របសង្កត់លើរដ្ឋាភិបាលក្រិកនិងអ៊ីតាលី។ អ៊ីរ៉ង់៖ អង់គ្លេស បារាំង និងអាល្លឺម៉ង់ បាននិយាយកាលពីថ្ងៃពុធថា អ៊ីរ៉ង់អាចប្រឈមមុខនឹងទណ្ឌកម្មបន្ថែម បើប្រទេសនេះប្រកែកមិនព្រមធ្វើសហប្រតិបត្តិការជាមួយក្រុមអ្នកជំនាញនុយក្លេអ៊ែររបស់អង្គការសហប្រជាជាតិទេ ដែលបាននិយាយថា ពួកគេមានភស្តុតាង«ដែលគួរឲ្យជឿបាន» អំពីកិច្ចប្រឹងប្រែងរបស់អ៊ីរ៉ង់ដើម្បីស្ថាបនាអាវុធនុយក្លេអ៊ែរ។ កូរ៉េខាងជើង ៖ អតីតប្រេសិតអាមេរិកម្នាក់ទទួលបន្ទុកខាងគោលនយោបាយកូរ៉េខាងជើងនិយាយថាកិច្ចចរចាពហុជាតិដែលមានគោលដៅបញ្ចប់កម្មវិធីអាវុធនុយក្លេអ៊ែរទុច្ចរិតរបស់ក្រុងព្យុងយ៉ាងអាចចាប់ផ្តើមធ្វើឡើងវិញនៅពេលអនាគតខ្លីខាងមុខនេះ។ ស៊ីរី ៖ ក្រុមបាតុករបានប្រឈមមុខនឹងគណប្រតិភូគណបក្សប្រឆាំង ស៊ីរី នៅខាងក្រៅមន្ទីរចាត់ការរបស់សមាគមអារ៉ាប់នៅទីក្រុង ឡឺគែរ នៅអេហ្ស៊ីបកាលពីថ្ងៃពុធ។ ពួកបាតុករខ្លះបានហៅមន្រ្តីគណបក្សប្រឆាំងថាជា «មនុស្សក្បត់» ហើយបានគប់ពងមាន់ទៅលើមន្រ្តីទាំងនោះ។ អាហ្វហ្គានីស្ថាន៖ មន្រ្តីអាហ្វហ្គានីស្ថាននិយាយថា កងទ័ពអាហ្វហ្គានីស្ថាននិងអង្គការអូតង់ បានសម្លាប់ជនសកម្មប្រយុទ្ធ តាលីបាន់ យ៉ាងតិង៧០នាក់ ដែលបានធ្វើការវាយប្រហារមួយទៅលើ មូលដ្ឋានដែលស្ថិតជិតព្រំដែនប៉ាគីស្ថាន។ សកលលោក ៖ ទីភ្នាក់ងារថាមពលអន្តរជាតិនិយាយថា ពិភពលោកអាចប្រឈមមុខនឹងតម្លៃថាមពលខ្ពស់«ស្កឹមស្កៃ»និងគ្រោះថ្នាក់ខ្លាំងឡើងនៃការផ្លាស់ប្តូរធាតុអាកាស លុះណាតែមានការផ្លាស់ប្តូរសំខាន់ៗនៅក្នុងមធ្យោបាយដែលប្រទេសនីមួយៗ ព្រមទាំងក្រុមហ៊ុនហើយនិងមនុស្សយើងប្រើប្រាស់ថាមពល៕ This posting includes an audio/video/photo media file: Download Now |
| អង្គការក្រៅរដ្ឋាភិបាលម៉ាឡេស៊ីអំពាវនាវឲ្យកម្ពុជានិងម៉ាឡេស៊ីការពារពលករិនីកម្ពុជា Posted: 10 Nov 2011 08:24 AM PST កាលនៅថ្ងៃពុធទី៩ ខែវិច្ឆិកា អង្គការក្រៅរដ្ឋាភិបាលសកម្មមួយរបស់ប្រទេសម៉ាឡេស៊ី បានអំពាវនាវឲ្យរដ្ឋាភិបាលកម្ពុជានិងម៉ាឡេស៊ី ពង្រឹងយន្ដការការពារពលការិនីបម្រើការតាមផ្ទះដែលត្រូវបានបញ្ជូនចេញពីកម្ពុជា។ សេចក្ដីអំពាវនាវនេះត្រូវបានធ្វើឡើងបន្ទាប់ពីមានរបាយការណ៍ស្តីពីពលការិនីកម្ពុជារងគ្រោះជាបន្ដបន្ទាប់នៅម៉ាឡេស៊ី។ នៅក្នុងសេចក្ដីថ្លែងការណ៍នៅថ្ងៃនេះ លោកស្រីបណ្ឌិត អ៊ីរ៉ែន ហ្វែណង់ដេស (Irene Fernandez) នាយិការប្រតិបត្តិអង្គការTenagatina Women's Force បានស្នើឲ្យមានការពង្រឹងយន្ដការបទដ្ឋានគតិយុទ្ធសម្រាប់ការពារសិទ្ធិពលការិនី ដើម្បីធានាដល់ការជ្រើសរើសពួកគេប្រកបដោយបទដ្ឋានរបស់អង្គការពលកម្មអន្ដរជាតិ ILO និងប្រកបដោយតម្លាភាពនិងគណនីយភាព។ លោកស្រី អ៊ីរ៉ែន ហ្វែណង់ដេស បានបញ្ជាក់ថា គួរតែមានការបង្កើតយន្ដការក្នុងតំបន់ជាពិសេសសម្រាប់បណ្ដាប្រទេសនៃសមាគមប្រជាជាតិអាស៊ីអាគ្នេយ៍ ហៅថាអាស៊ាន ដើម្បីបង្កើតបទដ្ឋានសម្រាប់អ្នកបម្រើតាមផ្ទះ រួមទាំងធ្វើឲ្យប្រសើរឡើងក្នុងការកំណត់អត្តសញ្ញាណនៃការរំលោភបំពានលើអ្នកបម្រើតាមផ្ទះនិងអ្នកដែលរួចផុតពីការជួញដូរ។ កាលពីខែតុលា លោកនាយករដ្ឋមន្ដ្រី ហ៊ុន សែន បានសម្រេចព្យួរការជ្រើសរើស និងបញ្ជូនពលការិនីកម្ពុជាទៅកាន់ម៉ាឡេស៊ីបន្ទាប់ពីមានរបាយការណ៍ថាពលការិនីកម្ពុជារងគ្រោះដោយការរំលោភផ្លូវភេទ ការធ្វើការដោយគ្មានពេលសម្រាក និងការជ្រើសរើសដោយមានការបន្លំអាយុជាដើម។ ប្រទេសឥណ្ឌូណេស៊ី បានផ្អាកការផ្គត់ផ្គង់ស្ដ្រីអ្នកបម្រើតាមផ្ទះទៅកាន់ម៉ាឡេស៊ី បន្ទាប់ពីមានពលការិនីរបស់ខ្លួនទទួលរងការរំលោភបំពានដូចគ្នានេះ។ លោក ហូ វុទ្ធី អនុប្រធាននាយកដ្ឋានការងារនៃក្រសួងការងារនិងបណ្ដុះបណ្ដាលវិជ្ជាជីវៈ មានប្រសាសន៍ថា កម្ពុជានិងម៉ាឡេស៊ី មិនមានយន្ដការរឹងមាំដោយសារតែមានការផ្លាស់ប្ដូរមន្រ្តីផ្លូវការរបស់ម៉ាឡេស៊ីជាច្រើន។ «យើងគិតគូជាមួយប្រទេសម៉ាឡេស៊ីយូរហើយ។ មន្ដ្រីថ្នាក់ដឹកនាំដូចជារដ្ឋមន្ដ្រី រដ្ឋលេខាធិការទៅទីនោះពីរបីដង។ ហើយយើងបានពិនិត្យលើឯកសារដែលគាត់បញ្ជូនមក ហើយយើងបានបញ្ជូនទៅវិញ។ ប៉ុន្ដែកន្លងមកគាត់មានការផ្លាស់ប្ដូរច្រើនគាត់អត់បានធ្វើមកយើង។ យើងនឹងទាក់ទងគាត់ឡើងវិញ»។ លោកស្រី មួរ សុខហួរ តំណាងរាស្ដ្រគណបក្សជំទាស់សម រង្ស៊ីដែលកំពុងបំពេញបេសកម្មនៅម៉ាឡេស៊ីសម្រាប់សំណុំរឿងស្តីពីស្ដ្រីបម្រើតាមផ្ទះជនជាតិកម្ពុជា បានទទូចឲ្យក្រសួងការងារកម្ពុជាជំរុញការកាត់ទោសអ្នកទទួលខុសត្រូវរបស់ក្រុមហ៊ុនជ្រើសរើសពលការនីកម្ពុជាដែលបង្កឲ្យមានបញ្ហា។ «ក្រសួងការងារត្រូវតែជាក្រសួងដឹកមុខនៅក្នុងការមើលសាឡើងវិញនូវកំហុសនៃក្រុមហ៊ុនដែលបានពាក់ព័ន្ធមកហើយដើម្បីបញ្ជូនប្រធានក្រុមហ៊ុននោះទៅកាន់តុលាការ»។ មានក្រុមហ៊ុននាំពលការនីកម្ពុជាទៅកាន់ម៉ាឡេស៊ីចំនួនជាង៣០ក្រុមហ៊ុន។ យោងតាមសេចក្ដីថ្លែងការណ៍របស់លោកស្រីអ៊ីរ៉ែន ហ្វែណង់ដេស បានបង្ហាញថា មានគ្រួសារម៉ាឡេស៊ីជាង៤០.០០០គ្រួសារកំពុងត្រូវការអ្នកបម្រើតាមផ្ទះ៕ This posting includes an audio/video/photo media file: Download Now |
| You are subscribed to email updates from VOA News: ព័ត៌មាន To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
