VOA News: ព័ត៌មាន: “លោកស្រីមូរសុខហួរស្វែងរកការគាំទ្រពីអន្តរជាតិដើម្បីសិទ្ធិស្រ្តីនៅកម្ពុជា” plus 3 more |
- លោកស្រីមូរសុខហួរស្វែងរកការគាំទ្រពីអន្តរជាតិដើម្បីសិទ្ធិស្រ្តីនៅកម្ពុជា
- សេចក្តីព្រាងលក្ខខណ្ឌប្រតិបត្តិការសម្រាប់អ្នកសង្កេតការណ៍នៅតំបន់ជម្លោះព្រំដែនកម្ពុជា-ថៃ
- ព្យាករណ៍ឆ្នាំថ្មីថានឹងមានភោគផលកសិកម្មល្អតែនឹងអាចមានទឹកជំនន់
- ប្រជាពលរដ្ឋកម្ពុជាស្វាគមន៍ឆ្នាំថោះព.ស.២៥៥៥
| លោកស្រីមូរសុខហួរស្វែងរកការគាំទ្រពីអន្តរជាតិដើម្បីសិទ្ធិស្រ្តីនៅកម្ពុជា Posted: 15 Apr 2011 12:25 PM PDT សកម្មជនខាងការពារសិទ្ធិរបស់ស្រ្តីបានមកជួបជុំគ្នាក្នុងរដ្ឋធានីវ៉ាស៊ីនតោនកាលពីថ្ងៃអង្គារដើម្បីប្រារព្ធខួបលើកទី១០នៃការបង្កើតអង្គការ Vital Voices និងដើម្បីជាការទទួលស្គាល់នូវការខិតខំប្រឹងប្រែងក្នុងការធ្វើឱ្យប្រសើរឡើងដល់ជីវភាពរស់នៅរបស់ស្រ្តីនៅជុំវិញពិភពលោក។ ក្នុងចំណោមអ្នកសំខាន់ៗទាំងនោះរួមមានលោកស្រីមូរ សុខហួរ អ្នកតំណាងរាស្ត្រគណបក្សសម រង្ស៊ីផងដែរ។ អង្គការ Vital Voices ដែលបានរៀបចំពិធីជួបជុំគ្នានេះ គឺជាអង្គការមួយលំដាប់កំពូលសម្រាប់ផ្តល់ភាពជាអ្នកដឹកនាំដល់ស្រ្តីនៅក្នុងពិភពលោក។ ក្នុងឆ្នាំនេះមានជ័យលាភីចំនួន៧នាក់ដែលអង្គការនេះបានផ្តល់ពានរង្វាន់សម្រាប់ការងារលើកកម្ពស់ដល់សិទ្ធិស្រី្ត ក្នុងនោះមានស្រ្តីក្នុងជួរនយោយបាយ ស្រ្តីក្នុងការងារសង្គមស៊ីវិល និងស្ត្រីក្នុងអាជីវកម្មជំនួញ មកពីសហរដ្ឋអាមេរិក អាហ្វហ្កានីស្ថាន អ៊ីស្រាអែល ប៉ាឡេស្ទីន ឥណ្ឌា និងកាមេរូន ហើយអ្នកនយោបាយដែលមានឈ្មោះល្បីល្បាញដែលទទួលបានរង្វាន់នៅពេលនេះគឺលោកស្រីអង់សាន ស៊ូជីនៃប្រទេសភូមា។ លោកស្រីរដ្ឋមន្រ្តីការបរទេសហ៊ីលឡារី គ្លីនតុនបានមានប្រសាសន៍ក្នុងពិធីនោះថា៖ «អ្នកទាំងនេះមកពីវប្បធម៌ខុសៗគ្នានិងផ្នែកផ្សេងៗនៃពិភពលោក ប៉ុន្តែពួកគេបានចែករំលែកនូវគុណតម្លៃដ៏សំខាន់។ ពួកគេស្វះស្វែងឱ្យមានការផ្លាស់ប្តូរជាប្រព័ន្ធ ដើម្បីឱ្យមនុស្សរាប់ម៉ឺននាក់និងរហូតដល់រាប់លាននាក់ មានជីវិតរស់នៅប្រសើរឡើង។ អ្នកទាំងនោះបានប្តូរផ្តាច់ចំពោះការងាររបស់ពួកគេ ដោយត្រូវគេចាប់ចង ធ្វើទុក្ខបុកម្នេញ ត្រូវគេសើចចម្អកដាក់ គេប្រមាថមាក់ងាយ និងដាក់ឱ្យនៅឯកោ»។
លោកស្រីមូរ សុខហួរក៏ជាស្ត្រីម្នាក់ ដែលលោកស្រីរដ្ឋមន្រ្តីការបរទេសហ៊ីលឡារី គ្លីនតុនបានជ្រើសរើសផ្តល់ពានរង្វាន់កិត្តិយសក្នុងឆ្នាំ២០០៥។ លោកស្រីមូរ សុខហួរបានលើកទឹកចិត្តស្រ្តីកម្ពុជាឱ្យចូលរួមក្នុងនយោបាយ ដោយលោកស្រីបានជួយបង្ហាត់ណែនាំពួកគេដោយផ្ទាល់និងក្នុងនាមជាអ្នកដឹកនាំនយោបាយមួយរូប។ ចាប់តាំងពីបានទទួលរង្វាន់មក សន្ទុះទឹកចិត្តរបស់លោកស្រីក្នុងការការពារស្រ្តីកើនឡើងកាន់តែច្រើន។ «យើងជាស្ត្រីបានប្តេជ្ញាចិត្តថាបម្រើស្រ្តីនៅក្នុងឆាកនយោបាយ យកអ្វីដែលជាតួនាទីរបស់យើងដែលបានមកពីសន្លឹកឆ្នោតរបស់ស្រ្តីនេះ ដើម្បីយកការឈឺចាប់របស់ស្ត្រីយកមកក្នុងឆាកនយោបាយដោះស្រាយបញ្ហានេះដោយពិតប្រាកដគឺឈរនៅជាមួយស្រ្តី ដើម្បីដោះស្រាយបញ្ហាស្រ្តី»។ ខណៈពេលនៅក្នុងរដ្ឋធានីវ៉ាស៊ីនតោន លោកស្រីមូរ សុខហួរបានចំណាយពេលជាច្រើនថ្ងៃជួបជាមួយអង្គការនយោបាយនានា ប្រមូលផ្តុំការគាំទ្រសម្រាប់ស្រ្តីកម្ពុជា ដើម្បីឱ្យពួកគេអាចប្រើប្រាស់នូវសិទ្ធិខាងផ្នែកសេដ្ឋកិច្ចនិងនយោបាយ។ នៅឯវិទ្យាស្ថានជាតិប្រជាធិបតេយ្យ (NDI) លោកស្រីបានជម្រាបដល់ក្រុមអ្នកដឹកនាំអំពីកិច្ចខិតខំប្រឹងប្រែងរបស់លោកស្រី ក្នុងការជួយស្ត្រី ដើម្បីរារាំងពីការចាប់រឹបអូសដីធ្លី និងការបណ្តេញមនុស្សចេញពីលំនៅដ្ឋានដោយបង្ខំ។ លោកស្រីក៏បានលើកឡើងពីការលំបាករបស់ស្រ្តីដែលទទួលរងការជួញដូរផ្លូវភេទនិងពលកម្មផងដែរ។ «ជាការណ៍សំខាន់ណាស់នៅពេលដែលអង្គការមួយដ៏សំខាន់ស្គាល់ហើយនឹងដឹងឮអ្វីដែលជាការតស៊ូរបស់ស្ត្រីយើង ដើម្បីឱ្យមានការផ្លាស់ប្តូរនៅក្នុងជីវិត ដើម្បីកសាងឱ្យមានលទ្ធិប្រជាធិបតេយ្យ។ ហើយវាជាការណ៍សំខាន់ ពីព្រោះ NDI ក៏ជាប្រភពនៃថវិកាដើម្បីជួយ ហើយក៏ជាប្រភពនៃការផ្តល់ព័ត៌មានជូនទៅដល់អ្នកតំណាងរាស្រ្តនៃសហរដ្ឋអាមេរិក»។ នៅក្នុងបទសម្ភាសន៍ជាមួយវីអូអេសំឡេងសហរដ្ឋអាមេរិក លោកស្រីមូរ សុខហួរបានអំពាវនាវឱ្យតំណាងរាស្ត្រស្ត្រីនៅកម្ពុជាចូលរួមក្នុងការតស៊ូដើម្បីសិទ្ធិរបស់ស្ត្រី។ «សូមឱ្យតំណាងរាស្ត្រទាំងអស់គ្នា ជាពិសេសតំណាងរាស្រ្តទាំង៩០រូបមកពីគណបក្សប្រជាជនកម្ពុជា ការពារអ្វីដែលជាអំណាចសភា។ កុំការពារអ្វីដែលជាគោលការណ៍នៃគណបក្សរបស់ខ្លួន។ ឈប់ទៅ ព្រោះយើងមកដល់សភា យើងបម្រើរាស្ត្រ។ យើងមិនបម្រើគណបក្សរបស់ខ្លួនទេ»។ របាយការណ៍សិទ្ធិមនុស្សឆ្នាំ២០១០ ចេញផ្សាយដោយក្រសួងការបរទេសសហរដ្ឋអាមេរិក បានលើកឡើងថា អំពើហិង្សាលើស្រ្តីនិងការជួញដូរស្រ្តី និងកុមារនៅតែកើតមាន។ លោកស្រីមូរ សុខហួរជឿថា ការកសាងបណ្តាញទូលំទូលាយសម្រាប់ក្រុមការពារសិទ្ធិស្រ្តីនៅក្រៅប្រទេសកម្ពុជានឹងផ្តល់នូវជីវភាពប្រសើរឡើងដល់ស្រ្តីនៅក្នុងប្រទេសកម្ពុជា ដោយសារតែសំឡេងរបស់ពួកគេនឹងត្រូវបានគេស្តាប់ឮជាអន្តរជាតិ៕ This posting includes an audio/video/photo media file: Download Now |
| សេចក្តីព្រាងលក្ខខណ្ឌប្រតិបត្តិការសម្រាប់អ្នកសង្កេតការណ៍នៅតំបន់ជម្លោះព្រំដែនកម្ពុជា-ថៃ Posted: 15 Apr 2011 09:37 AM PDT ប្រទេសឥណ្ឌូនេស៊ីបានធ្វើសេចក្តីព្រាងលក្ខខណ្ឌប្រតិបត្តិការថ្មីមួយសម្រាប់អ្នកសង្កេតការណ៍ឥណ្ឌូនេស៊ីនៅក្នុងតំបន់ជម្លោះព្រំដែនកម្ពុជា-ថៃ។ ប្រទេសកម្ពុជាបានទទួលយកសំណើរបស់ប្រទេសឥណ្ឌូនេស៊ីហើយ ប៉ុន្តែប្រទេសថៃមិនទាន់ឆ្លើយតបនៅឡើយទេ។ អ្នកវិភាគបាននិយាយថា ប្រទេសថៃមិនបានមើលឃើញតម្លៃនៃវត្តមានរបស់អ្នកសង្កេតការណ៍ឥណ្ឌូនេស៊ីទេ។ ក្រុមអ្នកវិភាគ បាននិយាយនៅថ្ងៃសុក្រនេះថា ប្រទេសថៃមិនបានមើលឃើញនូវតម្លៃសម្រាប់សេចក្តីព្រាងលក្ខខណ្ឌប្រតិបត្តិការថ្មីសម្រាប់អ្នកអង្កេតការណ៍ឥណ្ឌូនេស៊ីនៅក្នុងតំបន់ប្រយុទ្ធគ្នាក្បែរប្រាសាទព្រះវិហារនោះទេ បើទោះជាប្រទេសកម្ពុជាបានទទួលយកសំណើលក្ខខណ្ឌថ្មីរបស់ប្រទេសឥណ្ឌូនេស៊ីនៅក្នុងសប្តាហ៍នេះក៏ដោយ។ លោកចាន់ សាវ៉េត ប្រធានផ្នែកត្រួតពិនិត្យស្ថានភាពសិទ្ធិមនុស្សនៃសមាគមសិទ្ធិមនុស្ស Adhoc បានថ្លែងថា ប្រទេសកម្ពុជាបានសំឡឹងឃើញមានផលប្រយោជន៍ពីអ្នកសង្កេតការណ៍ឥណ្ឌូនេស៊ីសម្រាប់ដំណោះស្រាយបទឈប់បាញ់ និងការឈានទៅរកដំណោះស្រាយព្រំដែន។ ប៉ុន្តែប្រទេសថៃមិនបានមើលឃើញតម្លៃនិងផលយោជន៍របស់អ្នកសង្កេតការណ៍ឥណ្ឌូនេស៊ីសម្រាប់ខ្លួនឡើយ។ «ផលប្រយោជន៍សម្រាប់អ្នកសង្កេតការណ៍ក៏ជាចំណុចល្អដែរ។ បើតំបន់ព្រំដែនទទួលបាន ទទួលនូវសន្តិភាព វាអាចឈានទៅរកការដោះស្រាយជម្លោះព្រំដែននាពេលខាងមុខ។ យើងឃើញថា ភាគីថៃហាក់បីដូចជានៅមិនទាន់ទទួល ឯកភាពទៅលើការឱ្យតម្លៃអ្នកសង្កេតការណ៍ទេ»។ លោក Marty Natalegawa រដ្ឋមន្ត្រីការបរទេសឥណ្ឌូនេស៊ី បានបញ្ជូនសេចក្តីព្រាងអំពីលក្ខខណ្ឌប្រតិបត្តិការថ្មីសម្រាប់អ្នកសង្កេតការណ៍របស់ឥណ្ឌូនេស៊ីនៅតាមព្រំដែនកម្ពុជា-ថៃ កាលពីថ្ងៃអង្គារ នេះបើតាមសេចក្តីថ្លែងការណ៍របស់ក្រសួងការបរទេសកម្ពុជា។ ក្នុងលក្ខខណ្ឌថ្មីនេះ លោកMarty Natalegawa បានស្នើឱ្យមានចំណុចឈរជើងសម្រាប់អ្នកសង្កេតការណ៍ឥណ្ឌូនេស៊ីចំនួនបីទីតាំង គឺទីតាំង៥មករា ទីតាំងតាសឹម និងទីតាំងចាក់ក្រែងក្នុងទឹកដីកម្ពុជា។ លោកកុយ គួង អនុរដ្ឋលេខាធិការ និងជាអ្នកនាំពាក្យក្រសួងការបរទេសកម្ពុជា បានថ្លែងថា លោករដ្ឋមន្ត្រីការបរទេសហោ ណាំហុងបានឆ្លើយតបវិញភ្លាមៗ ដោយយល់ព្រមទាំងស្រុងលើសេចកី្តព្រាងលក្ខខណ្ឌប្រតិបត្តិការថ្មីសម្រាប់ដាក់អ្នកសង្កេតការណ៍ឥណ្ឌូនេស៊ី។ «នេះជាសុឆន្ទៈថ្មីមួយរបស់ប្រទេសកម្ពុជា ដោយឈរលើស្មារតីគោរពការឈប់បាញ់អចិន្ត្រៃយ៍ដែលអាចនាំទៅដល់ការដោះស្រាយជម្លោះដោយសន្តិវិធី»។ លោកMarty Natalegawaបានបញ្ជាក់ថា លោកបានទទួលលិខិតឆ្លើយតបពីលោកហោ ណាំហុងហើយដោយការពេញចិត្ត ប៉ុន្តែនៅរង់ចាំចម្លើយពីភាគីថៃប៉ុណ្ណោះ។ លោក Thani Thongphakdi អ្នកនាំពាក្យក្រសួងការបរទេសបាននិយាយថា ប្រទេសថៃកំពុងជាប់រវល់នឹងការប្រារព្ធពិធីបុណ្យចូលឆ្នាំថ្មី ឆ្នាំថោះ។ លោកកុយ គួងបានថ្លែងថា វត្តមានរបស់អ្នកសង្កេតការណ៍ឥណ្ឌូនេស៊ីគឺជាសាក្សីដ៏សំខាន់មួយក្នុងការទប់ស្កាត់ការវាយប្រយុទ្ធគ្នាជាថ្មីរវាងកងទ័ពកម្ពុជា និងថៃដែលអាចកើតមានឡើងនោះ។ «កាលណាមានបទឈប់បាញ់ជាអចិន្ត្រៃយ៍ហើយនោះ ដំណោះស្រាយផ្សេងៗទាក់ទងរឿងព្រំដែនអាចប្រព្រឹត្តទៅដោយសន្តិវិធី»។ កាសែត Bangkok Post បានរាយការណ៍ពីសប្តាហ៍មុនថា រដ្ឋសភាថៃបានពន្យារពេលអនុម័តឯកសារព្រំដែនរបស់គណៈកម្មការព្រំដែនរួមដោយសារតែការខ្វះកូរ៉ុម។ លោកកុយ គួង បានបញ្ជាក់ថា ភាគីកម្ពុជាបានស្នើសុំឱ្យមានការពិនិត្យបង្គោលព្រំដែនពីលេខមួយដល់លេខ២៣ និងការជ្រើសរើសក្រុមហ៊ុនដើម្បីថតពីអាកាសទៅលើតំបន់ជម្លោះ។ ប៉ុន្តែភាគីថៃបានជំទាស់ ដោយបញ្ជាក់ថា ត្រូវរង់ចាំរហូតរដ្ឋសភាថៃអនុម័តលើកំណត់ហេតុព្រំដែនទាំងបីជាមុនសិន។ «ភាគីទាំងពីរបានឈានដល់ចំណុចទាល់ច្រកជាថ្មីម្តងទៀតហើយ ពីព្រោះយើងមិនសង្ឃឹមថា រដ្ឋសភាថៃនឹងអនុម័តកំណត់ហេតុនាពេលឆាប់ៗខាងមុននេះទេ»។ លោកនាយករដ្ឋមន្ត្រីហ៊ុន សែនបានគំរាមថា ប្រទេសកម្ពុជានឹងមិនចរចាជាមួយប្រទេសថៃអំពីព្រំដែនតទៅទៀតទេ បើរដ្ឋសភាថៃមិនអនុម័តឯកសារចំនួនបីរបស់គណៈកម្មការព្រំដែនរួមនោះ។ លោកនាយករដ្ឋមន្ត្រីថៃ Abhisitបាននិយាយថា មន្ត្រីយោធានៃប្រទេសទាំងពីរមិនអាចចូលរួមក្នុងកិច្ចប្រជុំគណៈកម្មការព្រំដែនរួមទេ៕ This posting includes an audio/video/photo media file: Download Now |
| ព្យាករណ៍ឆ្នាំថ្មីថានឹងមានភោគផលកសិកម្មល្អតែនឹងអាចមានទឹកជំនន់ Posted: 14 Apr 2011 04:00 PM PDT ឆ្នាំថ្មីឆ្នាំថោះដែលតំណាងដោយសត្វទន្សាយត្រូវបានព្យាករណ៍ថាជាឆ្នាំនឹងនាំមកនូវភោគផលកសិកម្មយ៉ាងល្អសម្រាប់ប្រជាកសិករខ្មែរ ក៏ប៉ុន្ដែគឺជាឆ្នាំដែលអាចនឹងមានទឹកជំនន់ដោយសារទឹកភ្លៀងច្រើនផងដែរនេះគឺជាទំនាយក្នុងមហាសង្រ្កានសម្រាប់ឆ្នាំនេះ។ សៀវភៅមហាសង្រ្កានដែលរៀបរៀងដោយ លោក អ៊ឹម បុរិន្ទ នាយកគណៈកម្មការស្រាវជ្រាវវិជ្ជាហោរាសាស្ដ្រ ប្រពៃណីទំនៀមទម្លាប់ខ្មែរនៃក្រសួងធម្មការ និងសាសនា បានបង្ហាញថា នៅឆ្នាំថោះ ឆ្នាំ២០១១នេះ កម្ពុជានឹងទទួលបានទឹកភ្លៀងយ៉ាងសម្បូរ ហើយក៏នឹងកើតមានជំនន់ទឹកភ្លៀងច្រើនជាមួយគ្នានោះដែរ។ លោក អ៊ឹម បុរិន្ទ បញ្ជាក់ដោយផ្អែកលើទំនាយហោរាសាស្ដ្រថា ភាពសម្បូរដោយទឹកភ្លៀងនេះនឹងនាំឲ្យមានកំណើនផលស្រូវខ្ពស់សម្រាប់ប្រជាកសិករដែរ។ លោកបានប្រាប់វីអូអេខ្មែរថា៖ «ផលដំណាំកសិកម្ម ផលដំណាំផ្សេងៗ គឺយើងបានផលប្រាំបួនភាគ ខូចតែមួយភាគទេ។ គឺផលល្អហើយម្យ៉ាងទៀត គឺការធ្វើស្រែគឺយើងបានផលទាំងពីរ ទាំងដីទំនាប ទាំងដីទួល។ បានសេចក្ដីថា ភ្លៀងអំណោយផលល្អ អញ្ចឹងធ្វើឲ្យដំណាំស្រូវល្អគ្រប់កន្លែង»។ ថ្វីបើកសិករនឹងទទួលបានផលស្រូវច្រើន ក៏ប៉ុន្ដែពួកគាត់ត្រូវប្រយត្ន័ប្រយែងចំពោះគ្រោះអគ្គីភ័យដែរសម្រាប់ឆ្នាំថ្មី។ ទំនាយឆ្នាំនេះមិនល្អសោះឡើយ។ មហាសង្រ្កានទាយថា ភ្លើងនឹងកាចសាហាវងាយនឹងបង្កអគ្គីភ័យ។ ទំនាយមហាសង្រ្កានដដែលបង្ហាញថា ប្រជារាស្ដ្រតូចតាច នឹងចាញ់អ្នកធំ នាយចៅហ្វាយ។ ប៉ុន្ដែកងទាហាននឹងមានជ័យជម្នះគ្រប់ពេលវេលាចំពោះបច្ចាមិត្ត។ លោក អ៊ឹម បុរិន្ទ វិភាគទៅលើជំនិះរបស់ទេវតាឆ្នាំថ្មី ព្រះនាមកិរិណីទេវី ដែលមានព្រះហស្ថស្ដាំទ្រង់កង្វេរ ព្រះហស្ថឆ្វេងទ្រង់កាំភ្លើង នឹងប្រើដំរីជាជំនិះសម្រាប់យាងចុះមកគ្រប់គ្រងភពផែនដី។ លោកមានប្រសាសន៍ថា៖ «ទេវតាកាន់កង្វេរ អញ្ចឹងប្រទេសខ្មែរយើងនឹងមានការអនុវត្តច្បាប់ល្អប្រសើរជាងឆ្នាំទៅ ដោយយើងចង់និយាយថា កង្វេរនេះជាអាវុធមួយបញ្ជាទៅលើសត្វដំរី។ ដំរីយើងវិភាគថា ជាកំលាំងធំ ឬជាសេដ្ឋកិច្ច ឬជាកំលាំងប្រជាពលរដ្ឋ។ អញ្ចឹងប្រជាពលរដ្ឋនឹងត្រូវទទួលការកៀបសង្កត់ផ្នែកច្បាប់ ដោយសារប្រទេសជាតិប្រើច្បាប់ត្រឹមត្រូវ។ បញ្ហានយោបាយមានការល្អប្រសើរទេ។ ចំពោះបញ្ហាសន្ដិសុខសង្គម ដូចជាភ្លើងសាហាវយើងចាត់ទុកជាបញ្ហាសង្គមមួយ ការវិនាសអន្ដរាយទ្រព្យសម្បត្តិដោយសារភ្លើង ហើយយើងគួរតែប្រយត័្ន។ ទេវតាកាន់កាំភ្លើងដៃឆ្វេង មានន័យថា មានខ្លះដែរការចល័តកាំភ្លើងទៅមក។ ប៉ុន្ដែវាជាការបន្ទាប់បន្សំទេ។ ទោះជាយ៉ាងណាក៏ទាហានរបស់យើងបានទទួលជ័យជម្នះគ្រប់ទិសទីដែរ។ បើយើងនិយាយនៅថ្ងៃឡើងសក្ដិ៍គឺថា ទាហានទាំងឡាយបានសេចក្ដីសុខក្សេមក្សាន្ដ ហើយទោះជាប្រឆាំងជាមួយបច្ចាមិត្តយ៉ាងណាក៏មានជ័យជម្នះគ្រប់ទិសទីដែរ»។ ពិធីចូលឆ្នាំខ្មែររយៈពេលបីថ្ងៃតែងតែប្រព្រឹត្តទៅក្នុងរវាងពាក់កណ្ដាលខែមេសា ឬត្រូវជាខែចែត្រ ហើយជារៀងរាល់ឆ្នាំតែងតែមានការទស្សទាយទុកពីដំណើរការស្រុកទេសដែលអាចនឹងជួបប្រទះ។ ក៏ប៉ុន្ដែអ្នកវិទ្យាសាស្ដ្រនិយមមួយចំនួន រួមទាំងហោរាសាស្ដ្រតាមក្បួនចិនមួយចំនួនផងដែរ ចាត់ទុកថា ទំនាយនោះមានលក្ខណៈអរូបិយនឹងគឺជាការប្រព្រឹត្តតាមទំនៀមទម្លាប់ច្រើន៕ This posting includes an audio/video/photo media file: Download Now |
| ប្រជាពលរដ្ឋកម្ពុជាស្វាគមន៍ឆ្នាំថោះព.ស.២៥៥៥ Posted: 14 Apr 2011 03:36 PM PDT ប្រជាពលរដ្ឋខ្មែរកំពុងតែប្រារឰពិធីបុណ្យចូលឆ្នាំថ្មីប្រពៃណីខ្មែរយ៉ាងសប្បាយរីករាយនៅគ្រប់ទីកន្លែងក្នុងប្រទេសកម្ពុជា។ ប្រជាពលរដ្ឋខ្មែរបាននាំគ្នាយកចំណីអាហារទៅប្រគេនព្រះសង្ឃនៅតាមវត្តអារាមព្រះពុទ្ធសាសនានានា ដើម្បីឧទ្ធិសកុសលផលបុណ្យជូនដល់ជីដូនជីតា មាតាបិតា និងញាតិកាទាំង៧សន្តានដែលបានទទួលមរណភាព។ ផ្លូវនានាក្នុងទីក្រុងភ្នំពេញបានស្ងប់ស្ងាត់នៅថ្ងៃព្រហស្បតិ៍នេះ ដោយហាងលក់ទំនិញត្រូវបានបិទទ្វារ និងមនុស្សជាច្រើនបានធ្វើដំណើរទៅកាន់ស្រុកកំណើត ដើម្បីជួបជុំសមាជិកគ្រួសារ និងទទួលស្វាគមន៍ទេវតាឆ្នាំថ្មី។ នៅថ្ងៃព្រហស្បតិ៍នេះ ប្រជាពលរដ្ឋខ្មែរជាង១៤លាននាក់ បានចាប់ផ្តើមប្រារព្វពិធីបុណ្យចូលឆ្នាំថ្មីប្រពៃណីខ្មែរយ៉ាងសែនសប្បាយរីករាយ ដោយមានការជួបជុំសមាជិកគ្រួសារ ការយកចង្ហាន់ទៅប្រគេនព្រះសង្ឃនៅតាមទីវត្តអារាម និងការលេងកម្សាន្តល្បែងប្រជាប្រិយផ្សេងៗនៅក្នុងបរិវេណវត្តអារាមនៅទូទាំងប្រទេស។ ឆ្នាំថោះបានចាប់ផ្តើមជាផ្លូវការនៅវេលាម៉ោង១៣ និង១២នាទីរសៀលថ្ងៃព្រហស្បតិ៍នេះ តាមមហាសង្ក្រាន ហោរាសាស្ត្រខ្មែរដែលពណ៌នារយៈពេល១២ឆ្នាំ។ ឆ្នាំនិមួយៗមានតំណាងដោយសត្វ១២ រួមមានសត្វទន្សាយ សត្វពស់នាគរាជ សត្វពស់ សត្វសេះ សត្វពពែ សត្វស្វា សត្វមាន់ សត្វឆ្កែ សត្វជ្រូក សត្វកណ្តុរ សត្វគោ និងសត្វខ្លា ។ ប្រជាពលរដ្ឋខ្មែរបានកំណត់យកចន្ទគតិជាផ្លូវការសម្រាប់ប្រារព្វពិធីបុណ្យចូលឆ្នាំខ្មែរនៅក្នុងខែចែត្រដែលជាពេលវេលាទំនេរពីការងារកសិកម្មរបស់ពួកគេ។ ជាធម្មតា យោងតាមចន្ទគតិ បុណ្យចូលឆ្នាំខ្មែរចាប់ផ្តើមនៅថ្ងៃទី១៣ខែមេសា និងពេលខ្លះចាប់ផ្តើមនៅថ្ងៃទី១៤ខែមេសា។ ឱកាសប្រកបដោយនក្ខឫក្សដ៏ប្រសើរនៃពិធីបុណ្យចូលឆ្នាំខ្មែរមានរយៈពេល៣ថ្ងៃ គឺថ្ងៃទី១គឺជាថ្ងៃមហាសង្ក្រាន្ត ថ្ងៃទី២គឺជាថ្ងៃវរៈវ័នបតៈ និងថ្ងៃទី៣គឺជាថ្ងៃឡើងស័ក។ បុណ្យចូលឆ្នាំខ្មែរនៅក្នុងឆ្នាំ២០១១នេះ គឺជាឆ្នាំថោះ ឬ ឆ្នាំទន្សាយ បានចាប់ផ្តើមនៅថ្ងៃទី១៤ ខែមេសា។ ផ្លូវនានាក្នុងទីក្រុងភ្នំពេញដែលតែងតែមានភាពអ៊ូអរនោះ បានប្រែក្លាយទៅជាស្ងប់ស្ងាត់នៅថ្ងៃព្រហស្បតិ៍នេះ ដោយហាងលក់ទំនិញ និងរបស់របរផ្សេងៗជាច្រើនត្រូវបានបិទទ្វារ និងមនុស្សជាច្រើនបានធ្វើដំណើរទៅកាន់ស្រុកកំណើត ជួបជុំសមាជិកគ្រួសារ មាតាបិតា បងប្អូន និងញ្ញាតិសន្តាន ដើម្បីទទួលស្វាគមន៍ទេវតាឆ្នាំថ្មីព្រះនាងកិរណីទេវី ជាបុត្រីទីប្រាំនៃកបិលមហាព្រហ្ម។ «ពីពេលនេះ ឆ្នាំនេះតទៅ ទេវតាឆ្នាំថ្មីពិតជាប្រកាន់យកសច្ចធម៌ យុត្តិធម៌ និងសន្តិភាពជូនប្រជារាស្ត្រជាដរាបរៀងទៅបានពិតប្រាកដជាមិនខាន។ សូមឆ្នាំថ្មី ចិត្តថ្មី គំនិតថ្មីកើតមានក្នុងសណ្តានចិត្តកុលបុត្រកុលធិតាខ្មែរគ្រប់រូប ដើម្បីចាប់ដៃរួមកម្លាំងសាមគ្គី ព្រួតដៃគ្នារុញច្រាននាវាកម្ពុជាឆ្លងកាត់រលកធំៗធ្វើដំណើរឆ្ពោះទៅត្រើយសន្តិភាព និងសុភមង្គល វិបុលសុខមហាប្រសើរថ្លៃថ្លា។» ប្រជាពលរដ្ឋខ្មែរបានស្លៀកសម្លៀកបំពាក់ប្រពៃណី និងបាននាំយកនំចំណីអាហារទៅប្រគេនព្រះសង្ឃនៅតាមវត្តអារាមព្រះពុទ្ធសាសនានានា ដើម្បីឧទ្ធិសកុសលផលបុណ្យជូនដល់ជីដូនជីតា មាតាបិតា និងញាតិការទាំង ៧សន្តាន ដែលបានទទួលមរណភាព។ នៅក្នុងពេលជាមួយគ្នានេះ ការលេងកម្សាន្តល្បែងប្រជាប្រិយផ្សេងៗជាច្រើន ត្រូវបានរៀបចំសម្តែងនៅតាមទីវត្តអារាមទូទាំងប្រទេស ដូចជាការសម្តែងតន្ត្រី កំប្លែង ការរាំរែក សិល្បៈប្រពៃណី និងល្បែងប្រជាប្រិយ៍ផ្សេងៗ ជាពិសេសល្បែងបោះអង្គុញ ល្បែងចោលឈូង ល្បែងទាញព្រាត់ ល្បែងលាក់កន្សែង និងល្បែងដណ្តើមស្លឹកឈើជាដើម។ លោកឧត្តមសេនីយ៍ឯក ខៀវ សុភ័ក្រ បានថ្លែងថា ក្រសួងមហាផ្ទៃបានបញ្ជាកងកម្លាំងប៉ូលីសទូទាំងប្រទេសឱ្យបង្កើនការប្រុងប្រយ័ត្ន ការពារសន្តិសុខ និងសណ្តាប់ធ្នាប់សាធារណៈដើម្បីទប់ស្កាត់រាល់អំពើល្មើសគ្រប់ប្រភេទនៅក្នុងឱកាសបុណ្យចូលឆ្នាំប្រពៃណីខ្មែរ។ យើងមិនទុកឱ្យមានការយាយី ឬ ការរំខានណាមួយពីសំណាក់ក្រុមជនពាលណាមួយកើតឡើងជាបងតូចបងធំ ឬក៏ក្មេងទំនើង ឬក៏ចោរលួចចោរប្លន់ដែលប៉ុស្តិ៍ប៉ូលីសនីមួយៗត្រូវមានវេនប្រចាំការដោយប្រយ័ត្នប្រយ៉ែងទាំងអស់គ្នា។ លោកព្រឹទ្ធាចារ្យ មៀច ប៉ុណ្ណ ទីប្រឹក្សាអមវិទ្យាស្ថានពុទ្ធសាសនបណ្ឌិត ទទួលបន្ទុកកិច្ចការក្រុមជំនុំទំនៀមទម្លាប់ខ្មែរថា ល្បែងប្រជាប្រិយ៍ទាំងនេះបានធ្វើកម្លោះក្រមុំសម្តែងនូវសមត្ថភាព ភាពជិតស្និទ្ធ និងភាពឈ្លាសវ៉ៃ។ «អត្ថន័យនៃល្បែងប្រជាប្រិយ៍នេះគឺជាបុណ្យសប្បាយ។ ដូច្នេះ ការដែលបុព្វបុរសរបស់យើងបង្កើតល្បែងផ្សេងៗនេះ គឺសុទ្ធតែជាល្បែងដែលបម្រើឱ្យការសប្បាយ។» ពិធីបុណ្យចូលឆ្នាំខ្មែរនេះបានលើកទឹកចិត្តដល់ប្រជាពលរដ្ឋខ្មែរគ្រប់រូបឱ្យសប្បាយរីករាយសម្រាប់ឆ្នាំខាងមុខទៀត និងបំភ្លេចចោលនូវអំពើអពមង្គលទាំងឡាយដែលបានកើតឡើងកាលពីឆ្នាំកន្លងទៅ។ ការប្រារព្វពិធីបុណ្យចូលឆ្នាំខ្មែរនេះមិនមែនត្រឹមតែធ្វើឡើងនៅក្នុងប្រទេសកម្ពុជាប៉ុណ្ណោះទេ ប៉ុន្តែថែមទាំងបានប្រារព្វដោយប្រជាពលរដ្ឋខ្មែរនៅក្នុងសហរដ្ឋអាមេរិក បារាំង អូស្ត្រាលី កាណាដា និងប្រទេសមួយចំនួននៅទ្វីបអឺរ៉ុបផងដែរ៕ This posting includes an audio/video/photo media file: Download Now |
| You are subscribed to email updates from VOA News: ព័ត៌មាន To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
