VOA News: ព័ត៌មាន: “តុលាការខ្មែរក្រហមនឹងកោះហៅឌុចឲ្យធ្វើជាសាក្សីនៅក្នុងសំណុំរឿង០០២” plus 2 more |
- តុលាការខ្មែរក្រហមនឹងកោះហៅឌុចឲ្យធ្វើជាសាក្សីនៅក្នុងសំណុំរឿង០០២
- សហរដ្ឋអាមេរិករិះគន់សេចក្តីព្រាងច្បាប់គ្រប់គ្រងអង្គការនៅកម្ពុជា
- ទំនប់វារីអគ្គិសនីនៅប្រទេសឡាវនឹងធ្វើឲ្យមានភាពប្រេះឆារវាងប្រទេសតាមដងទន្លេនេះ
| តុលាការខ្មែរក្រហមនឹងកោះហៅឌុចឲ្យធ្វើជាសាក្សីនៅក្នុងសំណុំរឿង០០២ Posted: 11 Apr 2011 01:32 PM PDT អង្គជំនុំជម្រះសាលាដំបូងរបស់សាលាក្តីខ្មែរក្រហមបានប្រកាសឲ្យដឹងនៅថ្ងៃច័ន្ទនេះថា ខ្លួននឹងកោះហៅឌុចឲ្យធ្វើជាសាក្សីនៅក្នុងសំណុំរឿង០០២ដែលជាប់ពាក់ព័ន្ធនឹងអតីតមេដឹកនាំកំពូលរបស់ពួកខ្មែរក្រហមចំនួនបួននាក់។ សេចក្តីប្រកាសនេះធ្វើឡើងបន្ទាប់ពីអៀង សារី អតីតឧបនាយករដ្ឋមន្រ្តី និងជារដ្ឋមន្រ្តីក្រសួងការបរទេសខ្មែរក្រហម បានស្នើនៅក្នុងកិច្ចប្រជុំរៀបចំសវនាការសម្រាប់សំណុំរឿង០០២ កាលពីថ្ងៃអង្គារសប្តាហ៍មុនឲ្យឌុចស្បថ ប្រសិនបើឌុចត្រូវកោះហៅឲ្យធ្វើជាសាក្សីនោះ។ ដូច្នេះប្រសិនបើឌុចនឹងត្រូវទទួលស្គាល់ ឌុចនឹងក្លាយជាសាក្សីយ៉ាងសំខាន់បំផុតសម្រាប់សំណុំរឿង០០២ប្រឆាំងនឹងអតីតមេដឹកនាំជាន់ខ្ពស់ខ្មែរក្រហមគឺអៀង សារី ខៀវ សំផន នួន ជា និងអៀង ធីរិទ្ធ។ នៅក្នុងសេចក្តីឆ្លើយតបជាផ្លូវការនៅថ្ងៃនេះ អង្គជំនុំជម្រះសាលាដំបូងបញ្ជាក់ថា មាត្រាទី២៤.៤នៃវិធានផ្ទៃក្នុង មិនបានហាមឃាត់ពិរុទ្ធជនក្នុងសំណុំរឿង០០១ មិនឲ្យធ្វើជាសាក្សីនោះទេ។ ហើយអង្គជំនុំជម្រះសាលាដំបូងនឹងកោះហៅកាំង ហ្គេចអ៊ាវ ហៅឌុច ឲ្យធ្វើជាសាក្សីនៅក្នុងសំណុំរឿង០០២ ហើយឌុចនឹងត្រូវធ្វើកិច្ចសម្បថ។ ឌុច ដែលនឹងឈានចូលអាយុ៦៩ឆ្នាំនៅខែវិច្ឆិកាខាងមុខ ត្រូវផ្តន្ទាទោសដោយសាលាដំបូងកាលពីខែកក្កដាឆ្នាំមុន ឲ្យជាប់ពន្ធនាគារចំនួន៣៥ឆ្នាំ ក៏ប៉ុន្តែទោសនេះត្រូវកាត់កងនៅសល់ត្រឹមតែ១៩ឆ្នាំប៉ុណ្ណោះ នៅក្នុងសវនាការរបស់អង្គជំនុំជម្រះតុលាការកំពូលកាលពីចុងខែមីនា ស្តីពីបណ្តឹងឧទ្ធរណ៍របស់ឌុច។ ឌុច និងសហមេធាវីរបស់ឌុចបានចាត់ទុកថា ឌុចមិនមែនជាអ្នកទទួលខុសត្រូវជាន់ខ្ពស់របស់របបខ្មែរក្រហមនោះទេ ដោយអះអាងថា ឌុចមិនមានសិទ្ធិនៅក្នុងការបញ្ជាឲ្យសម្លាប់អ្នកទោសយ៉ាងហោចណាស់ជាង១២០០០នាក់នោះទេ។ ឌុច និងមេធាវីរបស់ឌុចបានលើកពីការជាប់ពាក់ព័ន្ធរបស់នួន ជា អតីតប្រធានសភាខ្មែរក្រហម និងសុន សេន អតីតរដ្ឋមន្រ្តីទទួលបន្ទុកកិច្ចការសន្តិសុខរបស់របបកម្ពុជាប្រជាធិបតេយ្យ និងមេដឹកនំាខ្មែរក្រហមមួយចំនួនទៀត ដែលជាប់ពាក់ព័ន្ធនៅក្នុងការស្លាប់របស់ប្រជាពលរដ្ឋកម្ពុជារហូតទៅដល់២,២លាននាក់នៅចន្លោះឆ្នាំ១៩៧៥ដល់ឆ្នាំ១៩៧៩។ លោករាជ សម្បត្តិ ប្រធានផ្នែកកិច្ចការសាធារណៈរបស់សាលាក្តីខ្មែរក្រហម មានប្រសាសន៍ថា អង្គជំនុំជម្រះសាលាដំបូងនឹងត្រូវសម្រិតសម្រាំងយកសាក្សីមួយចំនួនសម្រាប់សំណុំរឿង០០២ នៅក្នុងចំណោមសាក្សីទាំងអស់ជាង១.០០០នាក់ ដែលស្នើដោយភាគីនានានៅក្នុងសាលាក្តី។ «ខ្ញុំចង់និយាយថា មានជាង១.០០០នាក់ត្រូវបានភាគីផ្សេងៗលើកឡើង។ សាលាដំបូងគាត់នឹងជ្រើសយកសាក្សីណាដែលគាត់យល់ថា សំខាន់ជាងគេ»។ លោកឡាត់ គី អ្នកសម្របសម្រួលកម្មវិធីសាលាក្តីខ្មែរក្រហមរបស់អង្គការការពារសិទ្ធិមនុស្ស អាដហុក ចាត់ទុកថា ឌុចគឺជាសាក្សីដ៏មានសក្តានុពលសម្រាប់សំណុំរឿង០០២។ «មុខងាររបស់គាត់ គឺមានសារៈសំខាន់ណាស់។ អញ្ចឹងយើងអាចចាត់ទុកថា ជាសាក្សីមានសក្តានុពលនៅក្នុងការបង្ហាញនូវឧក្រិដ្ឋកម្មដែលកើតឡើងនៅក្នុងសម័យនោះ ជាពិសេសគឺទាក់ទងហ្នឹងអំពើឧក្រិដ្ឋទាំងឡាយ ដែលមេដឹកនាំបានប្រព្រឹត្ត»។ អង្គជំនុំជម្រះតុលាការកំពូលនឹងត្រូវសម្រេចទៅលើបណ្តឹងឧទ្ធរណ៍របស់ឌុច នៅក្នុងអំឡុងពីរ ឬបីខែខាងមុខទៀត។ នោះជាបណ្តឹងឧទ្ធរណ៍ ដែលសហមេធាវីរបស់ឌុចទាមទារឲ្យមានការដោះលែងទោសឌុច ក៏ប៉ុន្តែក្រុមសហព្រះរាជអាជ្ញាបានទាមទារឲ្យមានការផ្តន្ទាទោសដាក់គុកឌុច យ៉ាងហោចណាស់រហូតទៅដល់៤៥ឆ្នាំ៕ This posting includes an audio/video/photo media file: Download Now |
| សហរដ្ឋអាមេរិករិះគន់សេចក្តីព្រាងច្បាប់គ្រប់គ្រងអង្គការនៅកម្ពុជា Posted: 11 Apr 2011 12:42 PM PDT សហរដ្ឋអាមេរិកបានបញ្ជាក់ថា សេចក្តីព្រាងច្បាប់គ្រប់គ្រងអង្គការសង្គមស៊ីវិលដែលប្រទេសកម្ពុជាកំពុងរៀបចំនោះនឹងមិនបម្រើផលប្រយោជន៍អ្វីទេ ហើយបានសម្តែងការព្រួយបារម្ភចំពោះការខិតខំជំរុញច្បាប់នេះទៅមុខទៀត។ ថ្លែងក្នុងសន្និសីទសារព័ត៌មានកាលពីល្ងាចថ្ងៃសុក្រនៅទីក្រុងវ៉ាស៊ីនតោនក្នុងឱកាសចេញផ្សាយរបាយការណ៍សិទ្ធិមនុស្សប្រចាំឆ្នាំ២០១០ លោក Michael Postner ឧបការីរដ្ឋមន្រ្តីការបរទេសសហរដ្ឋអាមេរិក បានបញ្ជាក់ថា ច្បាប់អង្គការនេះនឹងធ្វើឱ្យអង្គការសង្គមស៊ីវិលកាន់តែជួបការលំបាកក្នុងការអនុវត្តការងាររបស់ពួកគេ។ លោក Postner ក៏បានបញ្ជាក់ដែរថា ដូចកម្ពុជាដែរគឺមានប្រទេសជាង៩០បានអនុម័តច្បាប់ឬបទប្បញ្ញត្តិដែលកម្រិតសេរីភាពរបស់អង្គការសង្គមស៊ីវិល។ «ខ្ញុំយល់ថា ជាតំណាងឱ្យនិន្នាការនេះដែលខ្ញុំបាននិយាយរួចមកហើយ គឺនៅទីណាដែលរដ្ឋាភិបាលមិនសប្បាយចិត្តនឹងអ្នករិះគន់ហើយ ដូច្នេះពួកគេបានសម្រេចចិត្តធ្វើឱ្យមានការលំបាក និងស្ទើរតែមិនឱ្យអ្នកទាំងនោះធ្វើការកើត»។ ក្នុងរយៈពេលប៉ុន្មានថ្ងៃចុងក្រោយនេះ ក្រុមអង្គការសិទ្ធិមនុស្សអន្តរជាតិជាច្រើន ដែលមានដូចជាអង្គការឃ្លាំមើលសិទ្ធិមនុស្ស Human Rights Watch អង្គការលើកលែងទោសអន្តរជាតិនិងអង្គការ Global Witness ក៏បានស្នើសុំឱ្យរដ្ឋាភិបាលលុបចោលច្បាប់ដ៏ចម្រូងចម្រាសនេះដែរ។ ពួកគេបានលើកឡើងថា ច្បាប់នេះនឹងបង្កជាឧបសគ្គដល់ការចុះបញ្ជីឈ្មោះអង្គការណាដែលរដ្ឋាភិបាលមិនពេញចិត្ត ហើយក្នុងរយៈពេល២០ឆ្នាំចុងក្រោយនេះគឺអង្គការសង្គមស៊ីវិលបានចូលរួមចំណែកដល់ការស្តារប្រទេសកម្ពុជាឡើងវិញ។ ពួកគេក៏សម្តែងការព្រួយបារម្ភថា ច្បាប់នេះអាចនឹងធ្វើឱ្យរាំងស្ទះដល់ការអភិវឌ្ឍដែលមានកន្លងមកនេះ។ ប៉ុន្តែរដ្ឋាភិបាលកម្ពុជាហាក់ដូចជាមិនបង្ហាញជំហរដកថយឡើយ។ លោកកុយ គួង អនុរដ្ឋលេខាធិការនិងជាអ្នកនាំពាក្យក្រសួងការបរទេសបញ្ជាក់ថា ច្បាប់នេះនឹងនៅ តែដំណើរការទៅមុខទៀត ព្រោះវាស្របតាមរដ្ឋធម្មនុញ្ញនៃប្រទេសកម្ពុជា។ «ការបង្កើតច្បាប់នេះគឺមិនបានកម្រិតសេរីភាពអ្វីទេ គឺធានានូវការអនុវត្តប្រតិបត្តិការរបស់អង្គការសមាគម សង្គមស៊ីវិលឱ្យមានភាពរលូន ហើយឱ្យមានកិច្ចសហប្រតិបត្តិការកាន់តែល្អរវាងរដ្ឋាភិបាលកម្ពុជាជាមួយអង្គការទាំងនោះ ដូច្នេះហើយគ្មានហេតុផលណាមួយដែលត្រូវដកច្បាប់នេះចេញវិញទេ។ គឺអត់មានទេ»។ នៅក្នុងរបាយការណ៍៤២ទំព័រដែលសំឡឹងមើលស្ថានភាពសិទ្ធិមនុស្សក្នុងឆ្នាំ២០១០នៅ ប្រទេសកម្ពុជាក៏បានបង្ហាញថា កងកម្លាំងប្រដាប់អាវុធកម្ពុជានៅតែបាញ់សម្លាប់មនុស្សតាមទំនើងចិត្តនិងមិនទទួលទោសពៃរ៍អ្វីឡើយ ជម្លោះដីធ្លី និងការបង្ខំប្រជាពលរដ្ឋចេញពីដីធ្លីដោយហិង្សានៅតែបន្តកើតមាន ហើយសេរីភាពនៃការបញ្ចេញមតិត្រូវបានរដ្ឋាភិបាលរឹតបន្តឹងដោយការប្តឹងផ្តល់ទៅតុលាការដោយចោទពីបទផ្សាយព័ត៌មានមិនពិត និងបង្ខូចកេរ្តិ៍ឈ្មោះ។ របាយការណ៍ក៏បានរៀបរាប់យ៉ាងវែងអំពីករណីរំលោភបំពានលើអ្នកតំណាងរាស្រ្តគណបក្សប្រឆាំងដែលមានដូចជាលោកស្រីមួរ សុខហួរ ដែលមានរឿងក្តីក្តាំជាមួយនឹងលោកនាយករដ្ឋមន្រ្តីហ៊ុន សែននិងករណីរបស់លោកសម រង្ស៊ី ប្រធានគណបក្សប្រឆាំងដ៏ធំជាងគេនៅកម្ពុជាដែលត្រូវតុលាការកាត់ទោសឱ្យជាប់ពន្ធនាគាររយៈពេល១២ឆ្នាំទាក់ទងនឹងរឿងព្រំដែនជាមួយប្រទេសវៀតណាម។ លោក Michael Postner ក៏សម្តែងនូវការព្រួយបារម្ភចំពោះការរឹតត្បិតទៅលើក្រុមគណបក្សប្រឆាំងនៅប្រទេសកម្ពុជាផងដែរ។ «ការណ៍ពិតដែលថា ប្រព័ន្ធយុត្តិធម៌ព្រហ្មទណ្ឌមិនបានឯករាជ្យ ហើយការណ៍ពិតដែលថា រដ្ឋាភិបាលមិនមានអារម្មណ៍ស្រួលជាមួយនឹងក្រុមអ្នកប្រឆាំង បើទោះបីអ្នកនោះជាបក្សប្រឆាំងឬក៏ក្រុមសិទ្ធិមនុស្សក៏ដោយ គឺធ្វើឱ្យយើងមានការព្រួយបារម្ភ»។ ក្រសួងការបរទេសកម្ពុជានៅតែការពារស្ថានភាពសិទ្ធិមនុស្សនៅក្នុងប្រទេសរបស់ខ្លួនដោយបញ្ជាក់ថា មានការរីកចម្រើនទៅមុខជានិច្ច។ លោកកុយ គួងបានបញ្ជាក់បន្ថែមដូច្នេះថា៖ «ស្ថានភាពសិទ្ធិមនុស្សនៅប្រទេសកម្ពុជាយើងជារួមគឺមានលក្ខណៈល្អ។ បើទោះបីជាមានបញ្ហាបន្តិចបន្តួចអ្វីក៏ដោយ ក៏យើងកំពុងតែធ្វើដំណើរឆ្ពោះទៅធ្វើឱ្យស្ថានការណ៍នេះកាន់តែល្អប្រសើរឡើងជាលំដាប់»។ បើទោះបីជាមិនទាន់បញ្ជាក់ជំហរថា តើវានឹងប៉ះពាល់ដល់ទំនាក់ទំនងជាមួយសហរដ្ឋអាមេរិកឬយ៉ាងណានោះ ក៏ក្រសួងការបរទេសសហរដ្ឋអាមេរិកនឹងបន្តតាមដានស្ថានភាពសិទ្ធិមនុស្សកម្ពុជានិងជាពិសេសគឺច្បាប់ស្តីពីការគ្រប់គ្រងអង្គការសង្គមស៊ីវិលនៅប្រទេសកម្ពុជា នេះបើតាមការបញ្ជាក់របស់លោក Michael Postner៕ This posting includes an audio/video/photo media file: Download Now |
| ទំនប់វារីអគ្គិសនីនៅប្រទេសឡាវនឹងធ្វើឲ្យមានភាពប្រេះឆារវាងប្រទេសតាមដងទន្លេនេះ Posted: 11 Apr 2011 02:00 PM PDT អ្នកស្រាវជ្រាវនិងអ្នកវិភាគកម្ពុជាលើកឡើងថា ការសាងសង់ទំនប់វារីអគ្គិសនីសាយ៉ាបូរី លើដងទន្លេមេគង្គនឹងក្លាយជាប្រធានបទមួយដែលអាចបង្កឲ្យមានភាពផុយស្រួយខាងនយោបាយក្នុងតំបន់អាងទន្លេមេគង្គទាំងមូល។ ការលើកឡើងនេះបានធ្វើឡើងមុនកិច្ចប្រជុំចុងក្រោយរបស់បណ្តាប្រទេសទន្លេមេគង្គអំពីគម្រោងទំនប់ដ៏ចម្រូងចម្រាស់របស់ប្រទេសឡាវនោះ។ ប្រសិនជាទំនប់វារីអគ្គិសនីសាយ៉ាបូរីរបស់ប្រទេសឡាវអាចនឹងត្រូវបានសាងសង់តាមគម្រោងមែននោះ ការសាងសង់ទំនប់នេះនឹងក្លាយជាកំហុសមួយសម្រាប់នយោបាយក្នុងតំបន់អាងទន្លេមេគង្គទាំងមូល នេះគឺជាការទស្សទាយទុករបស់ក្រុមអ្នកស្រាវជ្រាវ និងអ្នកវិភាគឯករាជ្យកម្ពុជា។ ក្នុងបទសម្ភាសន៍ជាមួយវីអូអេខ្មែរ នៅក្នុងវេទិកាពិភាក្សាមួយស្តីអំពីការសាងសង់ទំនប់វារីអគ្គិសនីនៅលើដងទន្លេមេគង្គក្នុងទីក្រុងភ្នំពេញនៅថ្ងៃច័ន្ទនេះ លោកបណ្ឌិតឈាង វណ្ណារិទ្ធ នាយកប្រតិបត្តិវិទ្យាស្ថានខ្មែរសម្រាប់សហប្រតិបត្តិការនិងសន្តិភាពមានប្រសាសន៍ថា ប្រសិនបើប្រទេសឡាវនៅតែជំនះធ្វើការសាងសង់ទំនប់វារីអគ្គិសនីជាមួយប្រទេសថៃនោះ វានឹងធ្វើឲ្យមានភាពប្រេះឆារវាងប្រទេសក្នុងតំបន់ទន្លេមេគង្គទាំងមូល។ «ប្រសិនបើករណីដែលឡាវនៅតែចចេសបន្តសាងសង់ទំបន់សាយ៉ាបូរី ដោយពុំមានការយល់ព្រមពីបណ្តាប្រទេសនៅក្នុងតំបន់នៅក្នុងសមាជិកMRCទេ ខ្ញុំគិតថា នោះជាអ្វីមួយដែលឡាវកំពុងតែធ្វើខុស ទាក់ទង់ទៅនឹងអនុសញ្ញាផ្សេងៗដែលខ្លួនបានចុះហត្ថលេខា ក្នុងក្របខណ្ឌ MRC ក៏ដូចជាក្នុងបរិបទទំនាក់ទំនងមិត្តភាពរបស់ប្រទេសជិតខាងក្នុងតំបន់។ ដូច្នេះ ខ្ញុំគិតថា បើឡាវធ្វើឯកតោភាគីនោះ គឺជាសាច់រឿងមួយដែលមិនល្អចំពោះតំបន់ទេគឺមានការបែកបាក់នឹងប្រេះឆានៅក្នុងតំបន់ហ្នឹងហើយ»។ ការអះអាងនេះបានធ្វើឡើងតែជាងមួយសប្តាហ៍ប៉ុណ្ណោះ មុនកិច្ចប្រជុំជាចុងក្រោយរបស់បណ្តាប្រទេសនៅតាមអាងទន្លេមេគង្គផ្នែកខាងក្រោម រួមមានថៃ ឡាវ កម្ពុជានិងវៀតណាម។ កិច្ចប្រជុំមួយគ្រោងធ្វើនៅថ្ងៃទី១៩ ខែមេសាឆ្នាំ២០១១នេះនៅក្នុងទីក្រុងវៀងច័ន្ទ ប្រទេសឡាវ ដើម្បីសម្រេច ថាតើត្រូវអនុញ្ញាតឲ្យមានការសាងសង់ទំនប់សាយ៉ាបូរីនោះ ឬយ៉ាងណា។ លោកបណ្ឌិតឈាង វណ្ណារិទ្ធមានប្រសាសន៍ថា ប្រទេសឡាវគួរតែគិតគូរអំពីផលប្រយោជន៍ក្នុងតំបន់ទាំងមូល ហើយប្រទេសឡាវត្រូវធ្វើការសិក្សាស្រាវជ្រាវឲ្យបានស៊ីជម្រៅបន្ថែមទៀតអំពីផលប៉ះពាល់ដោយសារការសម្រេចចិត្តសាងសង់ទំនប់នោះ។ បើតាមគម្រោង ទំបន់នោះនឹងត្រូវសាងសង់ដោយក្រុមហ៊ុនថៃមួយ ហើយអាចផលិតថាមពលអគ្គិសនីកម្រិត១២៦០មេហ្គាវ៉ាត់។ ៩៥%នៃថាមពលអគ្គិសនីដែលទំបន់របស់ឡាវផលិតបាននេះនឹងត្រូវលក់ទៅឲ្យប្រទេសថៃ នេះបើយោងតាមរបាយការណ៍របស់អង្គការទន្លេអន្តរជាតិ (International Rivers)។ ប៉ុន្តែរបាយការណ៍នេះក៏បង្ហាញផងដែរថា ប្រសិនបើត្រូវបានសាងសង់មែននោះ ទំនប់សាយ៉ាបូរី នឹងធ្វើឲ្យខូចខាតប្រព័ន្ធអេកូឡូស៊ីនិងជីវចម្រុះនៅក្នុងទន្លេមេគង្គជារៀងរហូត ហើយនឹងធ្វើឲ្យបាត់បង់ពពួកពូជមច្ឆាយ៉ាងតិចចំនួន៤១ប្រភេទដែលជិតផុតពូជ ដូចជាពូជត្រីរាជជាដើម។ ការបាត់បង់នេះនឹងធ្វើឲ្យប៉ះពាល់ធ្ងន់ធ្ងរដល់ជីវភាពរស់នៅរបស់ប្រជាជនរាប់លាននាក់ជាពិសេសប្រជាជនកម្ពុជាដែលពឹងអាស្រ័យទៅលើទន្លេមេគង្គនេះ។ ក្នុងបទសម្ភាសន៍ជាមួយវីអូអេខ្មែរនៅក្នុងវេទិកាពិភាក្សានោះ លោកបណ្ឌិតម៉ី កល្យាណ ទីប្រឹក្សាជាន់ខ្ពស់របស់រាជរដ្ឋាភិបាលកម្ពុជាមានប្រសាសន៍ដោយយល់ស្របជាមួយលោកបណ្ឌិតឈាង វណ្ណារិទ្ធថា ប្រទេសឡាវគួរតែសិក្សាអំពីផលប៉ះពាល់ជាបន្ថែមទៀត។ «យើងសូមសំណូមពរថា ឲ្យគេគិតជាតំបន់ថា ជាអាងទាំងអស់គ្នាទៅ។ អាណិតខ្ញុំផង។ ខ្ញុំនៅក្រោមពិបាកណាស់។ ខ្ញុំនៅក្រនៅឡើយ។ ខ្ញុំនៅពឹងលើត្រីនៅឡើយ។ ដល់បងឯងធ្វើទៅក្រែងលោវាប៉ះអញ្ចេះ ប៉ះអញ្ចោះ។ យើងត្រូវការសិក្សាបន្តទៀត»។ លោកបណ្ឌិតម៉ី កល្យាណមានប្រសាសន៍បន្ថែមថា ប្រសិនបើគម្រោងសាងសង់ទំនប់វារីអគ្គិសនីសាយ៉ាបូរីរបស់ប្រទេសឡាវនឹងត្រូវបានអនុញ្ញាត នោះការសាងសង់ទំនប់ធំៗចំនួន១០ផ្សេងទៀតនៅលើដងទន្លេមេគង្គដែលកំពុងតែស្ថិតនៅក្នុងគម្រោងនៅឡើយនោះទំនងជានឹងលេចចេញជារូបរាង ដោយពុំអាចរារាំងបានដែរ។ ហើយផលប៉ះពាល់បណ្តាលមកពីទំនប់ទាំងនោះអាចនឹងមានទំហំធំធេងដែលមិនអាចប៉ាន់ស្មានទុកជាមុនបាន។ ដូច្នេះលោកបណ្ឌិតម៉ី កល្យាណមានប្រសាសន៍បន្ថែមថា បណ្តាប្រទេសជាសមាជិកគណៈកម្មការទន្លេមេគង្គទាំងបួនគួរតែពិចារណាឲ្យបានហ្មត់ចត់ចំពោះគម្រោងសាងសង់ទំនប់វារីអគ្គិសនីដំបូងគេនៅលើអាងទន្លេមេគង្គផ្នែកខាងក្រោមនេះ។ យ៉ាងណាក៏ដោយ នៅក្នុងពេលនេះ គេត្រូវរង់ចាំមើលលទ្ធផលចុងក្រោយនៃកិច្ចប្រជុំរបស់ប្រទេសទាំងបួននៅក្នុងទីក្រុងវៀងច័ន្ទ ប្រទេសឡាវនោះសិន ដើម្បីឲ្យដឹងថា តើគម្រោងសាងសង់ទំនប់វារីអគ្គិសនីសាយ៉ាបូរីដ៏ចម្រូងចម្រាស់នោះនឹងត្រូវអនុញ្ញាតឬមិនអនុញ្ញាតឲ្យសាងសង់ ឬក៏ត្រូវពន្យារពេលសាងសង់យ៉ាងណាមួយនោះ៕ This posting includes an audio/video/photo media file: Download Now |
| You are subscribed to email updates from VOA News: ព័ត៌មាន To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
