VOA News: ព័ត៌មាន: “លោកកឹម សុខា និងលោកសម រង្ស៊ីរួមគ្នាថ្កោលទោសរដ្ឋាភិបាលពីបទចាប់ខ្លួនលោកម៉ម សុណង់ដូ” plus 2 more |
- លោកកឹម សុខា និងលោកសម រង្ស៊ីរួមគ្នាថ្កោលទោសរដ្ឋាភិបាលពីបទចាប់ខ្លួនលោកម៉ម សុណង់ដូ
- គំនិតផ្តួចផ្តើមរបស់សរអាអំពីការអភិវឌ្ឍតំបន់ទន្លេមេគង្គក្រោម
- តុលាការក្រុងភ្នំពេញសម្រេចឃុំខ្លួនលោកម៉ម សុណង់ដូ
| លោកកឹម សុខា និងលោកសម រង្ស៊ីរួមគ្នាថ្កោលទោសរដ្ឋាភិបាលពីបទចាប់ខ្លួនលោកម៉ម សុណង់ដូ Posted: 17 Jul 2012 08:07 AM PDT លោកសម រង្ស៊ី មេដឹកនាំគណបក្សប្រឆាំង និងលោកកឹម សុខា ប្រធានគណបក្សសិទ្ធិមនុស្សបានធ្វើការថ្កោលទោសរួមគ្នាចំពោះអាជ្ញាធររដ្ឋាភិបាលដែលបានចាប់ខ្លួនលោកម៉ម សុណង់ដូ នាយកស្ថានីយ៍វិទ្យុសំបុកឃ្មុំ និងជាប្រធានសមាគមអ្នកប្រជាធិបតេយ្យ។ លោកម៉ម សុណង់ដូ ត្រូវបានកម្លាំងសមត្ថកិច្ចកម្ពុជាចាប់ខ្លួនចេញពីគេហដ្ឋានរបស់លោកដែលមានទីតាំងនៅក្នុងស្ថានីយ៍វិទ្យុសំបុកឃ្មុំ រួចហើយបានយកទៅឃុំឃាំងនៅឯអគ្គស្នងការក្រសួងមហាផ្ទៃកាលពីថ្ងៃអាទិត្យ។ លោកម៉ម សុណង់ដូ ត្រូវបានតុលាការក្រុងភ្នំពេញ កាលពីថ្ងៃចន្ទ សម្រេចចេញដីកាឃុំខ្លួនបណ្តោះអាសន្ននៅពន្ធនាគារព្រៃស ក្រោមបទចោទប្រកាន់បួនចំណុចធំៗដែលរួមមានអ្នកផ្តួចផ្តើមគំនិតប្រឆាំងនឹងអ្នករាជការសាធារណៈ ធ្វើកូដកម្មខុសច្បាប់ញុះញង់ប្រជាពលរដ្ឋឲ្យកាន់កាប់អាវុធខុសច្បាប់ និងប្រឆាំងអាជ្ញាធរស្របច្បាប់។ ថ្លែងប្រាប់វីអូអេបន្ទាប់ពីបានបញ្ចប់កិច្ចប្រជុំនៅថ្ងៃទី១ រវាងគណបក្សសិទ្ធិមនុស្ស និងគណបក្សសម រង្ស៊ី ដើម្បីស្វះស្វែងរកលទ្ធភាពនៃការចងសម្ព័ន្ធភាពរវាងគណបក្សទាំងពីរនៅក្នុងទីក្រុងម៉ានីឡា ប្រទេសហ្វ៊ីលីពីន លោកសម រង្ស៊ី បានមានប្រសាសន៍ថា គណបក្សសម រង្ស៊ី បានថ្កោលទោសនឹងទាមទារឲ្យដោះលែងលោកម៉ម សុណង់ដូ ឡើងវិញ។ «គណបក្សសម រង្ស៊ី បានចេញសេចក្តីថ្លែងការណ៍មួយថ្កោលទោសហើយទាមទារ និងថ្កោលទោសការចាប់ខ្លួនលោកម៉ម សុណង់ដូ និងទាមទារឲ្យដោះលែងលោកម៉ម សុណង់ដូ»។ ចំណែកលោក កឹម សុខា ប្រធានគណបក្សសិទ្ធិមនុស្សវិញបាននិយាយថា ការចាប់ខ្លួនលោកម៉ម សុណង់ដូ ជាការបំភិតបំភ័យដល់អ្នកប្រជាធិបតេយ្យ។ «យើងឃើញថា ការធ្វើនេះគឺបំភិតបំភ័យដល់អ្នកប្រជាធិបតេយ្យ អ្នកដែលតស៊ូដើម្បីសេរីភាព អ្នកដែលការពារសេរីភាពប្រជាពលរដ្ឋ។ យើងឃើញថា ការចាប់ខ្លួននេះ ជាការគំរាម ប៉ុន្តែយើងមិនបានតក់ស្លុត យើងនៅតែបន្តតស៊ូបន្តទៅទៀត ហើយប្រជាពលរដ្ឋខ្មែរ និងតស៊ូតទៅទៀត»។ ការចាប់ខ្លួនលោកម៉ម សុណង់ដូ បានធ្វើឡើងក្រោយពេលតែប៉ុន្មានថ្ងៃប៉ុណ្ណោះ បន្ទាប់ពីលោកបានធ្វើដំណើរត្រឡប់ពីសហរដ្ឋអាមេរិកមកកម្ពុជាវិញ។ លោក ម៉ម សុណង់ដូ ត្រូវបានលោកនាយករដ្ឋមន្ត្រីហ៊ុន សែន បានព្រមានចាប់ខ្លួនដោយមិនចំឈ្មោះដោយបានចោទប្រកាន់ថាលោកមានបំណងបង្កើតរដ្ឋនៅក្នុងរដ្ឋ ដើម្បីប្រឆាំងនឹងរដ្ឋាភិបាល។ លោកម៉ម សុណង់ដូ បានថ្លែងប្រាប់វីអូអេសំឡេងសហរដ្ឋអាមេរិកក្នុងពេលដែលលោកបានធ្វើដំណើរវិលត្រឡប់មកកាន់មាតុប្រទេសវិញកាលពីសប្តាហ៍មុនថាលោកគ្មានបំណងបង្កើតរដ្ឋនៅក្នុងរដ្ឋ ដើម្បីប្រឆាំងនឹងរដ្ឋាភិបាលរបស់លោកនាយករដ្ឋមន្ត្រីហ៊ុន សែន ទេ។ លោក សម រង្ស៊ី និងលោកឹម សុខា ដែលបានធ្វើការជួបប្រជុំគ្នាជាពិសេសមួយនៅក្នុងទីក្រុងម៉ានីឡា ប្រទេសហ្វ៊ីលីពីន ដើម្បីរកលទ្ធភាពចងសម្ព័ន្ធភាពរវាងគណបក្សទាំងពីរ បានហៅការចាប់ខ្លួននេះថាមិនជះឥទ្ធិពលដល់ការចរចារវាងគណបក្សទាំងពីរទេ៕ This posting includes an audio/video/photo media file: Download Now |
| គំនិតផ្តួចផ្តើមរបស់សរអាអំពីការអភិវឌ្ឍតំបន់ទន្លេមេគង្គក្រោម Posted: 16 Jul 2012 08:46 PM PDT ស្របពេលលោកស្រីហ៊ីលឡារីគ្លីនតុនរដ្ឋមន្ត្រីការបរទេសសរអាជួបប្រជុំជាមួយរដ្ឋមន្ត្រីការបរទេសកម្ពុជា វៀតណាមឡាវ ថៃអំពីទន្លេមេគង្គ ក្រសួងការបរទេសរទេស.រ.អា.ចេញសេចក្តីថ្លែងការណ៍ផ្តល់គំនិតផ្តួចផ្តើមសហប្រតិបត្តិការអភិវឌ្ឍន៍និងអភិរក្សទន្លេនេះ។ ជំនួបនេះធ្វើឡើងដោយឡែកពីកិច្ចប្រជុំអាស៊ានថ្ងៃទី១៣កក្កដា នៅរាជធានីភ្នំពេញ។ លោកស្រីគ្លីនតុនមានប្រសាសន៍ថា៖ «ជាបឋម ក្នុងពេល៣ឆ្នាំខាងមុខ យើងផ្តល់ថវិកា៥០លានដុល្លារសម្រាប់ការផ្តួចផ្តើមអភិវឌ្ឍតំបន់ទន្លេមេគង្គក្រោមឆ្នាំ២០២០។ ជំនួយនេះ បន្ថែមលើការឧបត្ថម្ភទ្វេភាគីដល់ប្រទេសនីមួយៗ ដែលបានផ្តល់រួចហើយ»។ ទស្សនកិច្ចរបស់លោកស្រីនៅតំបន់នេះគឺជាការប្រឹងប្រែងរបស់ស.រ.អា.បង្កើនទំនាក់ទំនងច្រើនឡើងជាមួយតំបន់ដែលរងឥទ្ធិពលកើនឡើងពីប្រទេសចិន។ គំនិតផ្តួចផ្តើមនេះមានទិសដៅបង្កើតចំណងទាក់ទងលើសពីទំនាក់ទំនងយោធា។ <!--AV--> នេះជាគំនិតផ្តួចផ្តើមអភិវឌ្ឍតំបន់ទន្លេមេគង្គបន្តពីកិច្ចប្រជុំរវាងលោកស្រីគ្លីនតុននិងរដ្ឋមន្ត្រីការបរទេសតំបន់ទន្លេមេគង្គក្រោម ឆ្នាំ២០០៩។ រដ្ឋមន្ត្រីទាំងអស់ព្រមព្រៀងគ្នាពង្រឹងសហប្រតិបត្តិការក្នុងវិស័យបរិស្ថាន សុខភាព អប់រំ អភិវឌ្ឍន៍ហេដ្ឋារចនាសម្ព័ន្ធ។ ជំនួបនេះធ្វើឡើងក្រោយកិច្ចប្រជុំតំបន់អាស៊ាននៅភ្នំពេញ។ ក្រៅពីជំនួបរដ្ឋមន្ត្រីការបរទេសអាស៊ានទាំង១០ ក៏មានកិច្ចប្រជុំរវាងអាស៊ាននិងសមភាគីនៃតំបន់អាស៊ីប៉ាស៊ីហ្វិកដែរ រួមមានអូស្ត្រាលី កូរ៉េខាងជើង និងកូរ៉េខាងត្បូង ព្រមទាំងអ្នកតំណាងប្រទេសដៃគូជាយុទ្ធសាស្ត្រផ្សេងទៀតដែរ ក្នុងកិច្ចប្រជុំរយៈពេល១សប្តាហ៍កន្លងទៅនេះ៕ This posting includes an audio/video/photo media file: Download Now |
| តុលាការក្រុងភ្នំពេញសម្រេចឃុំខ្លួនលោកម៉ម សុណង់ដូ Posted: 16 Jul 2012 08:02 PM PDT សាលាដំបូងរាជធានីភ្នំពេញបានសម្រេចឃុំខ្លួនលោក ម៉ម សុណង់ដូ នាយកវិទ្យុសំបុក្រឃ្មុំ និងជាប្រធានសមាគមអ្នកប្រជាធិបតេយ្យនៅថ្ងៃចន្ទនេះ ក្រោមការចោទប្រកាន់ដែលទាក់ទងទៅនឹងអ្វីដែលរដ្ឋាភិបាលខ្មែរហៅថា ជាប់ពាក់ព័ន្ធនឹងការប៉ុនប៉ងបង្កើតតំបន់អបគមន៍។ លោកម៉ម សុណង់ដូ ដែលបានស្ថិតជាគោលដៅរបស់រដ្ឋាភិបាលត្រូវបានចាប់ខ្លួននៅផ្ទះរបស់លោកក្នុងក្រុងភ្នំពេញកាលពីព្រឹកថ្ងៃអាទិត្យម្សិលមិញនេះ បន្ទាប់ពីមានការប្រកាសស្វែងរកចាប់ខ្លួនលោកជាសាធារណៈដោយលោកនាយករដ្ឋមន្ដ្រីហ៊ុន សែន កាលពីខែមិថុនា។ <!--AV--> <!--AV--> <!--AV--> លោកត្រូវចោទប្រកាន់ដោយសាលាដំបូងខេត្តក្រចេះ ពីបទធ្វើកុប្បកម្មប្រឆាំងនឹងមន្រ្តីអាជ្ញាធរពីបទញុះញង់ប្រជាពលរដ្ឋឲ្យប្រើប្រាស់អាវុធខុសច្បាប់ ការចោទទាក់ទងនឹងការប្រឆាំងនឹងអាជ្ញាធរស្របច្បាប់និងការផ្តួចផ្តើមគំនិតប្រឆាំងនឹងរាជការសាធារណៈ បន្ទាប់ពីរដ្ឋាភិបាលបានបង្រ្កាបយ៉ាងហិង្សាលើជម្លោះដីធ្លីមួយក្នុងខេត្តក្រចេះកាលពីខែឧសភា។ ការបង្រ្កាបដែលក្រុមសមត្ថកិច្ចរដ្ឋាភិបាលបានបាញ់សម្លាប់ក្មេងស្រីអាយុ ១៤ឆ្នាំម្នាក់។ ហើយរដ្ឋាភិបាលបានតាមស្វែងរកចាប់ខ្លួនបុរសម្នាក់ឈ្មោះ ប៊ុន រដ្ឋា ដែលជាសមាជិកសមាគមអ្នកប្រជាធិបតេយ្យរបស់លោកម៉ម សុណង់ដូ។ បុរសរូបនេះត្រូវចោទប្រកាន់ថា ជាមេខ្លោងនៃការធ្វើអបគមន៍។ លោកម៉ម សុណង់ដូ ត្រូវបានផ្ទេរនិងនាំខ្លួនទៅសាកសួរនៅសាលាដំបូងរាជាធានីភ្នំពេញមុននឹងត្រូវនាំខ្លួនទៅកាន់ពន្ធនាគារព្រៃសដែលជាមន្ទីរឃុំឃាំងសម្រាប់បទឧក្រិដ្ឋធ្ងន់ធ្ងរក្រោយពីលោកស្រីចៅក្រមសែម សក្តិកូឡា បានចោទសួររូបលោកអស់រយៈពេលជាងពីរម៉ោងកាលពីព្រឹកមិញនេះ។ លោកសុខ សំអឿន ជាមេធាវីរបស់លោកម៉ម សុណង់ដូ។ «(តុលាការ) សួររឿងហេតុការណ៍និងសួរថា តើមានទំនាក់ទំនងជាមួយប៊ុន រដ្ឋា ឬអត់។ ប៉ុន្តែក្នុងបទល្មើសមួយមានបទចោទពីកុប្បកម្មដែលជាបទឧក្រិដ្ឋ។ បើសិនជាកុប្បកម្ម (ត្រូវបានរកឃើញ) អាចជាប់គុក១៥ឆ្នាំ»។ លោកម៉ម សុណង់ដូ គឺជាសកម្មជនប្រជាធិបតេយ្យដែលហ៊ាននិយាយត្រង់ៗ នូវអ្វីដែលលោកបានឃើញនិងជួបប្រទះក្នុងសង្គមខ្មែរបច្ចុប្បន្ននេះ។ ទស្សនៈរបស់លោកជាច្រើនត្រូវបានយកមកលាតត្រដាងតាមរយៈការផ្សាយនៃវិទ្យុសំបុកឃ្មុំ អេហ្វអឹម ១០៥ របស់លោក។ លោកបានបង្កើតសមាគមអ្នកប្រជាធិបតេយ្យមួយបន្ទាប់ពីរូបលោកបានផ្តួចផ្តើមគំនិតជំរុញឲ្យមានការរួបរួមអ្នកប្រជាធិបតេយ្យក្នុងគណបក្សជំទាស់ពីរគឺគណបក្សសម រង្ស៊ី និងគណបក្សសិទ្ធិមនុស្ស របស់លោកកឹម សុខា។ លោកស្រីឌឹម ផាណារ៉ា ភរិយាលោកម៉ម សុណង់ដូ មានប្រសាសន៍នៅតុលាការក្រុងភ្នំពេញក្រោយពីប្តីរបស់លោកស្រីត្រូវដឹកចេញទៅកាន់មន្ទីរឃុំឃាំង។ «គាត់មិនបានប្រព្រឹត្តិអ្វីខុសទាំងអស់ហេតុដូច្នេះទើបបានជាគាត់ហ៊ានមកប្រឈមមុខនឹងច្បាប់។ នៅបរទេសអ្នកណាក៏មិនឲ្យគាត់មកដែរ។ ទោះតុលាការឯករាជ្យ ឬមិនឯករាជ្យគាត់មកប្រឈមនឹងច្បាប់ដើម្បីឲ្យដឹងខុសត្រូវ។ គាត់មិនចូលចិត្តមនុស្សខូចទេ។ គាត់តែងតែពន្យល់ប្រជាពលរដ្ឋឲ្យគោរពច្បាប់ កុំឲ្យប្រើអំពើហិង្សា ឲ្យស្រឡាញ់គ្នាជួយគ្នា គាត់មិនដែលញុះញង់ឲ្យប្រជាពលរដ្ឋឲ្យទៅយកដីគេឲ្យធ្វើខុសច្បាប់គឺមិនដែល។ ដូច្នេះហើយទើបគាត់ហ៊ានមកប្រឈមមុខច្បាប់»។ លោកស្រីឌឹម ផាណារ៉ា បាននិយាយរយៈពេលខ្លីជាមួយប្តីរបស់គាត់នៅមុននិងក្រោយពេលជួបជាមួយចៅក្រមស៊ើបអង្កេត។ «គាត់និយាយថា អត់មានរឿងអីទេ។ កុំភ័យអ្វីទាំងអស់»។ អង្គការក្រៅរដ្ឋាភិបាលចំនួន១៤ ក្នុងនោះមានអង្គការការពារសិទ្ធិមនុស្សលីកាដូ អង្គការអាដហុក មជ្ឈមណ្ឌលអប់រំច្បាប់សម្រាប់សហគមន៍ជាដើម បានអំពាវនាវនៅថ្ងៃនេះដល់រដ្ឋាភិបាលឲ្យដោះលែងលោកម៉ម សុណង់ដូ ជាបន្ទាន់។ លោកយ៉េង វីរៈ នាយកមជ្ឈមណ្ឌលអប់រំច្បាប់សម្រាប់សហគមន៍ដែលធ្លាប់ជាប់គុកជាមួយលោកម៉ម សុណង់ដូ ដោយសារតែរដ្ឋាភិបាលចោទប្រកាន់ចំពោះអ្វីដែលពួកលោកបានរិះគន់ពីបញ្ហាព្រំដែន មានប្រសាសន៍ក្នុងសេចក្ដីថ្លែងការណ៍របស់ក្រុមអង្គការនោះថា នៅក្នុងសង្គមប្រជាធិបតេយ្យការនិយាយរិះគន់មិនត្រូវធ្វើការចោទប្រកាន់ពីបទឧក្រិដ្ឋនោះទេ។ ដោយឡែកលោកអ៊ូ វីរៈ នាយកមជ្ឈមណ្ឌលសិទ្ធិមនុស្សកម្ពុជាមានប្រសាសន៍ថា លោក ម៉ម សុណង់ដូ គួរត្រូវបានដាក់ឲ្យនៅក្រៅឃុំត្បិតលោកមានសេចក្ដីក្លាហានក្នុងការត្រឡប់ពីក្រៅប្រទេសចូលប្រឈមនឹងការចោទប្រកាន់របស់រដ្ឋាភិបាល។ ហើយនេះ គឺជាការចាប់ខ្លួនដែលនាំទៅដល់ការគំរាមកំហែង។ «ប្រជាពលរដ្ឋជាច្រើន និងអ្នកសារព័ត៌មានជាច្រើននឹងមានការភ័យខ្លាច។ ការចាប់ខ្លួននេះគឺជាការជះឥទ្ធិពលអាក្រក់ដល់ដំណើរការប្រជាធិបតេយ្យនៅប្រទេសកម្ពុជា។ ហើយយើងដើរថយក្រោយមួយជំហានដ៏ធំនៅពេលដែលមានការចាប់ខ្លួនលោកម៉ម សុណង់ដូ ហើយគឺជាការផ្ញើសារអាក្រក់មួយដល់អ្នកប្រជាធិបតេយ្យនៅប្រទេសកម្ពុជា»។ ក្រុមប្រជាពលរដ្ឋមកពីសហគមន៍ក្រីក្រក្នុងទីក្រុងភ្នំពេញ និងជាសមាជិកសមាគមអ្នកប្រជាធិបតេយ្យប្រមាណជា៣០នាក់ បានប្រមូលផ្តុំគ្នានៅមុខតុលាការដោយលើករូបថតលោកម៉ម សុណង់ដូ ដែលមានសរសេរអក្សរពីលើនោះទាមទារឲ្យដោះលែងរូបលោក។ អ្នកស្រី ស ស៊ន មកពីសហគមន៍បុរីកីឡាគឺជាសមាជិកនៃសមាគមអ្នកប្រជាធិបតេយ្យរបស់លោកម៉ម សុណង់ដូ។ «ខ្ញុំមកនេះដើម្បីគាំទ្រនិងលើកទឹកចិត្តគាត់ពីព្រោះគាត់គ្មានកំហុស ហើយក៏មិនបានធ្វើអបគមន៍អ្វីដែរ។ គាត់បង្កើតសមាគមគ្រាន់តែជួយប្រជាជនដាច់បាយ ការពារសិទ្ធិឲ្យប្រជាពលរដ្ឋក្រីក្រ ដើម្បីឲ្យខ្មែរយើងយល់ដឹងពីសិទ្ធិរស់នៅ និងមិនប្រឆាំងនឹងរដ្ឋាភិបាលអីទេ»។ លោកម៉ម សុណង់ដូ ធ្លាប់បានបញ្ជាក់ក្នុងបទសម្ភាសន៍ជាមួយវីអូអេសំឡេងសហរដ្ឋអាមេរិកជាខេមរភាសាថា លោកមិនមានកំហុសដូចការចោទប្រកាន់ទៅលើរូបលោកនោះទេ៕ This posting includes an audio/video/photo media file: Download Now |
| You are subscribed to email updates from VOA News: ព័ត៌មាន To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
