VOA News: ព័ត៌មាន: “លោករ៉មនីឈ្នះឆ្នោតនៅរដ្ឋអូហៃយ៉ូដោយសំឡេងតិចតួច” plus 3 more |
- លោករ៉មនីឈ្នះឆ្នោតនៅរដ្ឋអូហៃយ៉ូដោយសំឡេងតិចតួច
- រដ្ឋាភិបាលលុបចោលឡូតិ៍នេសាទនៅខេត្តបួនទៀត
- ការជ្រើសរើសនាយកធនាគារពិភពលោកនឹងធ្វើឡើងទៅ«តាមសមត្ថភាព»
- តុលាការកោះហៅអភិបាលក្រុងបាវិតពាក់ព័ន្ធនឹងការបាញ់កម្មការិនីរោងចក្រ
| លោករ៉មនីឈ្នះឆ្នោតនៅរដ្ឋអូហៃយ៉ូដោយសំឡេងតិចតួច Posted: 07 Mar 2012 08:57 AM PST បេក្ខជនប្រធានាធិបតី មីត រ៉មនី (Mitt Romney) បានយកជ័យជម្នះតាមសំឡេងតិចតួចក្នុងការបោះឆ្នោតបឋមនៅក្នុងរដ្ឋអូហៃយ៉ូ (Ohio) ដែលជាជ័យជម្នះដ៏ធំក្នុងចំណោមរដ្ឋ១០នៃការបោះឆ្នោតកាលពីថ្ងៃអង្គារ។ <!--IMAGE-RIGHT--> ដោយសន្លឹកឆ្នោតរាប់ជិតអស់នៅព្រឹកថ្ងៃពុធ លោក រ៉មនី ដឹកមុខគេដោយសំឡេង១២.០០០ គឺត្រឹមតែ១%ប៉ុណ្ណោះ លើសអតីតព្រឹទ្ធសមាជិករីក សន់ថូរ៉ុម (Rick Santorum)។ ជ័យជម្នះក្នុងរដ្ឋអូហៃយ៉ូ ជាជ័យជម្នះលើកទី៤ ក្រោយពីបានយកជ័យជម្នះក្នុងរដ្ឋវើម៉នថ៍ (Vermont) រដ្ឋ វីជីនៀ (Virginia) និងរដ្ឋ ម៉ាស្សាឈូស៊ែតថ៍ (Massachussetts) ដែលលោកធ្លាប់បម្រើជាអភិបាលរដ្ឋ។ ថ្លែងនៅក្នុងក្រុងបូស្ដិន (Boston) រដ្ឋម៉ាស្សាឈូស៊ែតថ៍ លោក រ៉មនី ទស្សន៍ទាយថា លោកនឹងបានទទួលការតែងតាំងជាបេក្ខជនរបស់គណបក្សសាធារណរដ្ឋជាមិនខាន។ លោកថ្លែងថា «យប់នេះ យើងកំពុងរាប់សន្លឹកឆ្នោត។ យើងរាប់ចំនួនប្រតិភូដែលទៅបោះឆ្នោត។ យើងមានសង្ឃឹម។ យើងរាប់ថ្ងៃរហូតដល់ខែវិច្ឆិកា ហើយយើងសង្ឃឹមច្រើនដែរ។ យើងនឹងទទួលជ័យជម្នះ យកសេតវិមានជាមិនខាន»។ ព័ត៌មានអន្តរជាតិសំខាន់ៗដទៃទៀត៖ <!--IMAGE-LEFT--> ថៃ-ជប៉ុន៖ នៅក្នុងទស្សនកិច្ចជាផ្លូវការកាលពីថ្ងៃអង្គារនៅក្នុងប្រទេសជប៉ុននាយករដ្ឋមន្ដ្រីថៃ លោកស្រី យីងឡាក់ ស៊ីណាវ៉ាត្រា បានចាប់ផ្ដើមយុទ្ធនាការដើម្បីធ្វើឲ្យមានការទុកចិត្ដគ្នាទៅវិញទៅមកជាមួយក្រុមអ្នកវិនិយោគជប៉ុន នៅក្រោយពីមានការបំផ្លិចបំផ្លាញដោយទឹកជំនន់កាលពីឆ្នាំមុន។ ស៊ីរី៖ ប្រធានអង្គការមនុស្សធម៌របស់អ.ស.ប. នឹងធ្វើដំណើរទៅកាន់ប្រទេសស៊ីរីនៅថ្ងៃពុធនេះ ដើម្បីជួយជំរុញឲ្យមានការអនុញ្ញាតបើកផ្លូវដល់អង្គការជួយសង្រ្គោះយកជំនួយទៅឲ្យជនរងគ្រោះ និងដឹកអ្នករបួសចេញ។ កូរ៉េខាងជើង៖ ប្រេសិតពិសេសពីរនាក់ពីអាមេរិកកំពុងស្ថិតនៅក្នុងទីក្រុងប៉េកាំង ដើម្បីបើកការចរចាជាមួយកូរ៉េខាងជើងមកលើសេចក្ដីពិស្ដារនៃផែនការមួយដែលនឹងផ្ដល់ជំនួយអាហារស.រ.អ.ចំនួន២៤០.០០០តោន ទៅឲ្យប្រទេសកុម្មុយនិស្តនោះ។ ឥណ្ឌា៖ មេដឹកនាំគណបក្សកាន់អំណាចនៅក្នុងប្រទេសឥណ្ឌា និយាយថា អ្នកកាន់សន្លឹកឆ្នោតមិនសប្បាយចិត្ដចំពោះបេក្ខជនរបស់គណបក្ស ដែលជាមូលហេតុមួយនៃការចាញ់សន្លឹកឆ្នោតក្នុងការបោះឆ្នោតនៅក្នុងរដ្ឋឧត្តរប្រទេស (Uttar Pradesh) ដែលមានប្រជាជនច្រើនជាងគេរបស់ឥណ្ឌាកាលពីពេលថ្មីៗនេះ។ ចិន-អាមេរិក៖ នៅថ្ងៃពុធ រដ្ឋាភិបាលចិនបានរិះគន់សភាស.រ.អ. ដែលបានអនុម័តច្បាប់មួយដែលអនុញាតឲ្យស.រ.អ.យកពន្ធដារមកលើទំនិញទិញចូលពីប្រទេសចិន និងពីប្រទេសដែលមានសេដ្ឋកិច្ចរដ្ឋកាន់កាប់។ អាមេរិក៖ ឯកសារកំណត់ហេតុមួយរបស់អតីតប្រធានាធិបតីអាមេរិក រីឆាត នីកសុន (Richard Nixon) ដែលទើបនឹងត្រូវផ្សព្វផ្សាយបង្ហាញឲ្យឃើញថា លោកមានចិត្ដព្រួយបារម្ភថា ការកាប់សម្លាប់នៅលើទីលាន ធានអានមេន (Tiananmen) ប្រទេសចិនកាលពីឆ្នាំ១៩៨៩ អាចបំផ្លាញទំនាក់ទំនងគ្នារវាងចិននិងសហរដ្ឋអាមេរិកជាអចិន្ត្រៃយ៍។ អ៊ីរ៉ង់៖ មេបញ្ជាការយោធាកណ្ដាលរបស់ស.រ.អ.និយាយថា ប្រទេសអ៊ីរ៉ង់ជាការគំរាមដ៏ធំបំផុតមកលើសន្ដិសុខនៃតំបន់មជ្ឈឹមបូព៌ា ហើយរដ្ឋាភិបាលទីក្រុងតេហេរ៉ង់ ខិតខំខ្លាំងដើម្បីរក្សាអំណាចឲ្យប្រធានាធិបតី Bashar Al Assad។ ទីបេតិ៍៖ មន្ដ្រីចិនព្យាយាមបន្តុះបង្អាប់ដល់ជនជាតិទីបេតិ៍ដែលបានធ្វើអត្ដឃាតដោយដុតខ្លួនឯង ក្នុងការតវ៉ាប្រឆាំងនឹងការគ្រប់គ្រងចិននៅតំបន់របស់ពួកគេ។ ភូមា៖ រដ្ឋមន្ដ្រីក្រសួងការបរទេសនៃប្រទេសនូវែលសេឡង់បានអំពាវនាវដល់ប្រទេសភូមាឲ្យបន្ដការកែទម្រង់តាមបែបប្រជាធិបតេយ្យនៅពេលលោកបញ្ចប់ទស្សនកិច្ចពីរថ្ងៃក្នុងប្រទេសភូមា។ កេនយ៉ា៖ អាចារ្យពុទ្ធសាសនាមកពីប្រទេសជប៉ុន បានរៀបចំពិធី សូត្រធម៌ផ្សះផ្សាគ្នាមួយក្នុងកិច្ចប្រឹងប្រែងដើម្បីជួយក្រុមអំបូរផ្សេងៗនៃប្រទេសកេនយ៉ាឲ្យឈប់ច្បាំងគ្នា។ អាហ្វហ្គានីស្ថាន៖ ទាហានជាតិអង់គ្លេស៦នាក់បានស្លាប់ក្រោយពីរថយន្ដពាសដែករបស់ខ្លួនបានបើកលើគ្រាប់មីនកប់តាមផ្លូវ។ <!--AV--> This posting includes an audio/video/photo media file: Download Now |
| រដ្ឋាភិបាលលុបចោលឡូតិ៍នេសាទនៅខេត្តបួនទៀត Posted: 06 Mar 2012 11:50 PM PST លោកនាយករដ្ឋមន្ដ្រី ហ៊ុន សែន បានបង្គាប់ឲ្យរំលាយឡូតិ៍នេសាទនៅក្នុងខេត្តចំនួនបួន គឺខេត្តកណ្ដាល តាកែវ ព្រៃវែង និងខេត្តកំពង់ចាម ដែលស្ថិតនៅតាមបណ្ដោយទន្លេមេគង្គ ហើយសេចក្ដីសម្រេចនេះនឹងចូលជាធរមាននៅថ្ងៃទី១០ ខែមេសា ខាងមុខ។ នៅក្នុងអនុក្រិត្យដែលចុះហត្ថលេខាកាលពីថ្ងៃច័ន្ទ ហើយត្រូវបានគេចែកចាយយ៉ាងទូលំទូលាយដល់បណ្ដាញផ្សព្វផ្សាយនៅថ្ងៃអង្គារនេះ លោក ហ៊ុន សែន បានបញ្ជាក់ថា ការលុបបំបាត់ឡូតិ៍នេសាទជាលក្ខណៈអាជីវកម្មនេះ គឺដើម្បីប្រគល់លទ្ធភាពជូនប្រជាពលរដ្ឋកម្ពុជា ដែលរស់នៅតាមតំបន់ក្នុងខេត្តទាំងនោះក្នុងការប្រកបរបរនេសាទជាលក្ខណៈគ្រួសារ និងសម្រាប់ជាការអភិរក្សធនធានត្រីផងដែរ។ អនុក្រិត្យដែលចែងជាប្រាំបីមាត្រា បានហាមប្រាមមិនឲ្យមានការលក់ដូរ ឬជួលសម្រាប់ការធ្វើអាជីវកម្មផ្ដាច់មុខលើដែននេសាទដែលអនុគ្រោះដល់ប្រជាពលរដ្ឋ និងមិនអនុញ្ញាតឲ្យមានការប្រើអំណាចសម្រាប់វាតទីលើដែនទឹកទាំងនោះទេ។ ក៏ប៉ុន្ដែអនុក្រិត្យនឹងមិនគ្របដណ្ដប់អនុភាពលើដាយត្រី ដាយបង្កង និងដាយត្រីលេញទេ។ លោក ណៅ ធួក ប្រធានរដ្ឋបាលជលផលមិនអាចធ្វើទំនាក់ទំនងសម្រាប់ការបំភ្លឺបន្ថែមបាននោះទេ ដោយសារតែលោកអះអាងថា លោកជាប់រវល់។ ដូចគ្នានេះដែរលោក ចាន់ សារុន រដ្ឋមន្ដ្រីក្រសួងកសិកម្មមិនអាចទាក់ទងបានទេ ដោយសារតែទូរស័ព្ទរបស់លោករោទ៍ដោយគ្មានអ្នកទទួល។ យ៉ាងណាក៏ដោយលោក ចាន់ រដ្ឋា ប្រធានកម្មវិធីរបស់អង្គការសម្ព័ន្ធភាពដើម្បីអភិរក្សធនធានជលផល បានសង្ឃឹមពីផលវិជ្ជមានជាច្រើនសម្រាប់ប្រជាពលរដ្ឋក្រីក្រ។ «មានន័យថា ទីមួយធ្វើឲ្យផលត្រីធម្មជាតិកើនឡើង និងធ្វើឲ្យជីវភាពប្រជាពលរដ្ឋល្អប្រសើរ។ ទីពីរជម្លោះដែននេសាទរវាងអ្នកនេសាទខ្នាតតូចជាមួយនឹងម្ចាស់ឡូតិ៍ដែលយើងធ្លាប់ឮកើតមានក្នុងតំបន់ទន្លេសាបឬទន្លេមេគង្គនឹងត្រូវបានដោះស្រាយ។ ពោលគឺបង្កើនផលត្រីធម្មជាតិនៅក្នុងបឹងទន្លេសាបផងនិងនៅក្នុងទន្លេមេគង្គផង»។ លោក ចាន់ រដ្ឋា បញ្ជាក់ថា អាចមានឡូតិ៍នេសាទចំនួនបួនកំពុងធ្វើអាជីវកម្មនៅក្នុងខេត្តកំពង់ចាម ខេត្តកណ្ដាល តាកែវ និងព្រៃវែងនេះ។ មានការលើកឡើងជាច្រើនក្នុងពេលកន្លងមកពីការហិចហោចពូជត្រីទឹកសាបរបស់ប្រទេសកម្ពុជាដោយសារការនេសាទខុសច្បាប់ និងដោយសារការខ្វះខាតក្នុងការត្រួតពិនិត្យដិតដល់លើការប្រើប្រាស់ឧបករណ៍និងការចម្រាញ់យកផលត្រីរបស់ម្ចាស់ឡូតិ៍នេសាទ។ កាលពីថ្ងៃអង្គារសប្ដាហ៍មុនលោកនាយករដ្ឋមន្ដ្រី ហ៊ុន សែន ចាត់ទុកថា ចំណូលពីការយកពន្ធលើឡូតិ៍នេសាទគឺជាផ្នែកមួយដ៏តិចតួចបំផុតសម្រាប់ចំណូលថវិការដ្ឋ។ លោក សុន ឆ័យ តំណាងរាស្ដ្រគណបក្សសម រង្ស៊ី បានហៅការសម្រេចចិត្តលុបឡូតិ៍នេសាទរបស់រដ្ឋាភិបាលនោះថា គឺជាការស្វែងរកការចាប់អារម្មណ៍របស់ប្រជាពលរដ្ឋសម្រាប់ការបោះឆ្នោតជ្រើសរើសក្រុមប្រឹក្សាឃុំសង្កាត់នៅខែមិថុនា ឆ្នាំនេះ។ ទាំងលោក សុន ឆ័យ ទាំងលោក ចាន់ រដ្ឋា នៅតែសង្ស័យនៅឡើយពីប្រសិទ្ធភាពនៃការសម្រេចលុបបំបាត់ឡូតិ៍នេសាទឯកជននេះ៕ This posting includes an audio/video/photo media file: Download Now |
| ការជ្រើសរើសនាយកធនាគារពិភពលោកនឹងធ្វើឡើងទៅ«តាមសមត្ថភាព» Posted: 06 Mar 2012 09:41 PM PST ពេលដែលក្រុមមន្ត្រីធនាគារពិភពលោកបន្តការស្វែងរកមន្ត្រីម្នាក់ឱ្យជំនួសលោកនាយក រ៉ីបឺត ហ្សូលីក Robert Zoellick ប្រធានចេញពីតំណែងនាយកប្រតិបត្តិម្នាក់នៃអង្គភាពផ្តល់ប្រាក់កម្ចីជាសាកលមួយនេះសន្យាថាដំណើរការជ្រើសរើសនឹងមានតម្លាភាពនិងផ្អែកលើសមត្ថភាព។ លោកហេគីនុស មាណាវ នាយកប្រតិបត្តិនៃធនាគារពិភពលោកបានទទួលស្គាល់ថាមានមនុស្សច្រើននាក់មិនពេញចិត្តអំពីទម្លាប់របស់ធនាគារនេះ ដែលតែងតែជ្រើសរើសជនជាតិអាមេរិកាំងម្នាក់ជាប្រធានរបស់ខ្លួន។ តែលោកបាននិយាយប្រាប់ផ្នែកផ្សាយជាភាសាឥណ្ឌូណេស៊ីនៃវីអូអេក្នុងបទសម្ភាសន៍មួយថាធនាគារពិភពលោកប្តេជ្ញានឹងជ្រើសរើសបេក្ខជនដែលមានគុណវឌ្ឍបំផុត។ <!--IMAGE-RIGHT--> ភូមា៖ កាលពីថ្ងៃអង្គារ លោកស្រីអោង សានស៊ូជី មេដឹកនាំប្រជាធិបតេយ្យភូមាបានព្យាយាមធានាដល់ក្រុមយោធាដ៏មានឥទ្ធិពលថា គណបក្សប្រឆាំងរបស់លោកស្រីមិនចង់ឱ្យមានការប្រឈមមុខជាមួយពួកគេទេ នៅពេលដែលលោកស្រីធ្វើការឃោសនាបោះឆ្នោតនៅមុនការបោះឆ្នោតក្នុងខែមេសាក្នុងរដ្ឋធានី។ ម្ចាស់ជ័យលាភីរង្វាន់ណូបែលសន្តិភាពរូបនេះបានមានប្រសាសន៍ខាងលើពីរដងទៅកាន់ក្រុមអ្នកគាំទ្រលោកស្រីរាប់ពាន់នាក់ដែលបានអបអរសាទរទទួលលោកស្រីនៅក្នុងជំរុំពួកយោធានៅក្រុងណាយពីតាវ Naypyitaw។ ក្នុងសារមួយទៅកាន់ស្ថាប័នយោធា លោកស្រីអោង សានស៊ូជីបានមានប្រសាសន៍ថាគណក្សសម្ព័ន្ធជាតិដើម្បីលទ្ធិប្រជាធិបតេយ្យ NLD របស់លោកស្រីដែលបានរងការធ្វើទុក្ខបុកម្នេញដោយអតីតក្រុមប្រឹក្សាយោធានៃប្រទេសភូមាយូរមកហើយ ពេលនេះស្វាគមន៍ការគាំទ្រដោយក្រុមយោធា។ លោកស្រីអោង សានស៊ូជី បានមានប្រសាសន៍ថា «មានពួកទាហានជាច្រើននៅក្នុងមណ្ឌលនេះ។ ខ្ញុំសូមស្វាគមន៍ក្រុមយោធា ហើយខ្ញុំចង់និយាយថាគណបក្ស NLD របស់យើងមិនមែនជាអង្គការមួយដែលនឹងប្រឈមមុខនឹងពួកយោធាទេ។ យើងចង់មានមោទនភាពនឹងពួកយោធា គឺក្រុមយោធាដែលប្រជារាស្ត្រទទួលយក។យើងចង់ឱ្យក្រុមយោធារបស់យើងទទូលបានការគោរពនៅក្នុងពិភពលោក ហើយយើងចង់ឱ្យពួកយោធាយើងជាក្រុមយោធាទំនើបផងដែរ។» អ៊ីរ៉ង់៖ ប្រទេសជាមហាអំណាចទាំង៦ក្នុងពិភពលោកបានស្នើធ្វើការចរចាជាថ្មីជាមួយប្រទេសអ៊ីរ៉ង់ ដើម្បីដោះស្រាយការសង្ស័យអំពីទំហំយោធានៃកម្មវិធីបរមាណូរបស់ប្រទេសអ៊ីរ៉ង់។ សហរដ្ឋអាមេរិក៖ ក្រុមអ្នកបោះឆ្នោតនៅក្នុង១០រដ្ឋនៃស.រ.អ.បានទៅស្ថានីយ៍បោះឆ្នោតដើម្បីបោះឆ្នោតនៅ«ថ្ងៃអង្គារដ៏ពិសេស»ដែលជាថ្ងៃបោះឆ្នោតសំខាន់បំផុតដើម្បីជ្រើសតាំងបេក្ខជនប្រធានាធិបតីខាងគណបក្សសាធារណរដ្ឋ។ ស៊ីរី៖ ឧត្តមស្នងការទទួលបន្ទុកកិច្ចការជនភៀសខ្លួននៃអង្គការសហប្រជាជាតិបាននិយាយថាមានប្រជារាស្ត្រស៊ីរីយ៉ាងហោចណាស់៩ពាន់នាក់បានរត់គេចខ្លួនចូលទៅលីបង់ ចាប់តាំងពីពេលដែលរដ្ឋាភិបាលស៊ីរីបានចាប់ផ្តើមធ្វើការបង្ក្រាបប្រកបដោយការបង្ហូរឈាមលើក្រុមបាតុករដែលប្រឆាំងនឹងរដ្ឋាភិបាលកាលពីឆ្នាំទៅ។ <!--AV--> This posting includes an audio/video/photo media file: Download Now |
| តុលាការកោះហៅអភិបាលក្រុងបាវិតពាក់ព័ន្ធនឹងការបាញ់កម្មការិនីរោងចក្រ Posted: 06 Mar 2012 04:55 PM PST អស់រយៈពេលចំនួន១៥ថ្ងៃ បន្ទាប់ពីបានប្រព្រឹត្តអំពើបាញ់ប្រហារដោយមិនញញើតដៃទៅលើក្រុមកម្មកររោងចក្រស្បែកជើងនៅតំបន់សេដ្ឋកិច្ចពិសេសនៃខេត្តស្វាយរៀង តុលាការទើបតែចេញដីកាកោះហៅជនសង្ស័យយកមកសាកសួរ។ លោក ហ៊ីង ប៊ុនជា ព្រះរាជអាជ្ញារងនៃតុលាការខេត្តស្វាយរៀង បានមានប្រសាសន៍ប្រាប់វីអូអេតាមរយៈទូរស័ព្ទនៅថ្ងៃអង្គារនេះថា លោក ឈូក បណ្ឌិត អភិបាលក្រុងបាវិត ដែលជាប់ពាក់ព័ន្ធ នឹងការបាញ់ប្រហារទៅលើក្រុមកម្មករ ត្រូវតុលាការចេញដីកាកោះហៅឲ្យចូលខ្លួនមកបំភ្លឺហើយនៅថ្ងៃទី១៦ ខែមីនាខាងមុខនេះ។ លោក ហ៊ីង ប៊ុនជា មិនបានធ្វើអត្ថាធិប្បាយអំពើការចោទប្រកាន់ទៅលើជនសង្ស័យ ឈូក បណ្ឌិត នេះទេ ដោយគ្រាន់តែបានបញ្ជាក់ថានេះ គឺជានីតិវិធីរបស់តុលាការ។ «ខ្ញុំមិនអាចជម្រាបជូនបានទេនៅលើបញ្ហានេះ។ វាជានីតិវិធីរបស់ខ្ញុំ។ ដល់ប៉ូលិសអញ្ជើញមក គឺនៅក្រៅឃុំទេ។ ទាល់តែយើងធ្វើការចោទប្រកាន់ជាផ្លូវការ អាហ្នឹងនីតិវិធីខាងចៅក្រមជាអ្នកចេញ។ ជាជម្រើសរបស់គេ បើចាប់ឬមិនហ៊ានចាប់ នេះគឺជារឿងរបស់ចៅក្រមទៀត»។ លោក ឈូក បណ្ឌិត អភិបាលក្រុងបាវិត គឺជាជនសង្ស័យតែម្នាក់គត់ដែលជាប់ពាក់ព័ន្ធនឹងការប្រើប្រាស់កាំភ្លើងខ្លីផ្ទាល់ខ្លួនរបស់លោកបាញ់ប្រហារកម្មករឲ្យទទួលរងរបួស។ នេះបើតាមការបញ្ជាក់របស់លោកឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃដែលថ្លែងប្រាប់ក្រុមអ្នកកាសែតកាលពីសប្តាហ៍មុន។ កាលពីថ្ងៃទី២០ ខែកុម្ភៈ កន្លងទៅនេះ ក្រុមកម្មករនៃរោងចក្រស្បែកជើងចំនួនជាង១.០០០នាក់ បានធ្វើបាតុកម្មតវ៉ា ដើម្បីទាមទារលក្ខខណ្ឌការងារប្រសើរជាងមុននិងប្រាក់ឈ្នួលបន្ថែម។ ក៏ប៉ុន្តែនៅក្នុងពេលតវ៉ានោះ យ៉ាងតិចមានក្រុមកម្មការិនីចំនួនបីនាក់បានទទួលរងរបួសភ្លាមៗ នៅកន្លែងកើតហេតុ។ ជនសង្ស័យដែលជាប់ពាក់ព័ន្ធនឹងការបាញ់ប្រហារនេះ មិនត្រូវបានសមត្ថកិច្ចចាប់ខ្លួនភ្លាមៗទេ។ ប៉ុន្តែផ្ទុយទៅវិញ បើតាមសាក្សីឃើញផ្ទាល់ភ្នែក បាននិយាយថាសមត្ថកិច្ចបានបើផ្លូវឲ្យជនសង្ស័យគេចចេញពីកន្លែងកើតហេតុ ដោយគ្មានការរំខាន។ តាមរូបភាពដែលកាសែតក្នុងស្រុកបានចុះផ្សាយគេឃើញខ្មាន់កាំភ្លើងម្នាក់ដែលគេយល់ថាជាលោកឈូក បណ្ឌិតត្រូវបានកងកម្លាំងប៉ូលិសនិងកងរាជអាវុធហត្ថហែរហមការពារនៅពេលភៀសខ្លួនចេញពីកន្លែងកើតហេតុ។ នៅពេលដែលសាកសួរថាតើហេតុអ្វី បានជាសមត្ថកិច្ចមិនបានចាប់ខ្លួនជនសង្ស័យ ដែលបានប្រព្រឹត្តបទល្មើសជាក់ស្តែងយកមកកាត់ទោស។ លោកឧត្តមសេនីយ៍ត្រី ប្រាជ្ញ រឹម ស្នងការប៉ូលិសខេត្តស្វាយរៀងបាននិយាយថាលោកសុំមិនធ្វើអត្ថាធិប្បាយហើយពាក់ព័ន្ធនឹងការចេញដីកាកោះហៅលោក ឈូក បណ្ឌិត លោកប្រាជ្ញ រឹម បាននិយាយថាលោកមិនទាន់បានទទួលដីកាកោះហៅនេះនៅឡើយទេ។ «ខ្ញុំក៏ឥតបានទទួលដែរ ប្រហែលជាដីកាហ្នឹង គេបង្គាប់ទៅឲ្យអ្នកណាផ្សេង»។ លោក ជៀង អំ អភិបាលខេត្តស្វាយរៀងបាននិយាយថាជនសង្ស័យមិនអនុញ្ញាតឲ្យចាកចេញពីខេត្តស្វាយរៀងទេ ហើយលោកជឿជាក់ថាលោក ឈូក បណ្ឌិត កំពុងតែស្នាក់នៅខេត្តស្វាយរៀងនៅឡើយ។ លោកបានមានប្រសាសន៍ថា ហេតុអ្វីបានជាអ្នកសារព័ត៌មានចាប់អារម្មណ៍រឿង ឈូក បណ្ឌិតចំណែកឯក្រុមកម្មករដែលបានប្រព្រឹត្តអំពើហិង្សាគប់ដំថ្មទៅលើសមត្ថកិច្ចចំនួនប្រាំពីរនាក់ឲ្យរងរបួសនោះ ហេតុអ្វីបានជាមិនចុះផ្សាយ។ លោកបានមានប្រសាសន៍ទៀតថា អាជ្ញាធរកំពុងតែចាត់វិធានការចាប់ខ្លួនមេដឹកនាំក្រុមកម្មករមួយចំនួន ដែលបានប្រព្រឹត្តអំពើហិង្សាទៅលើក្រុមសមត្ថកិច្ច។ «ព្រោះអ្នកឯងទៅគប់សមត្ថកិច្ច ហើយទៅដុតរោងចក្របំផ្លាញទ្រព្យសម្បត្តិគេអីញ្ចឹង។ ឥឡូវគេទាមទារ អ្នកណាដឹកនាំកម្មករធ្វើបាតុកម្ម ហើយសុំចេញមុខមកដើម្បីជជែកគ្នាតវ៉ាចំពោះផ្លូវច្បាប់។ រឿងខូចខាតទ្រព្យសម្បត្តិគេអស់ជាងពីរសែនដុល្លារ»។ លោក អ៊ូ វីរៈ ប្រធានមជ្ឈមណ្ឌលសិទ្ធិមនុស្សកម្ពុជា បានមានប្រសសន៍ថា តុលាការមិនត្រូវចេញដីកាកោះហៅលោក ឈូក បណ្ឌិត តែម្នាក់ទេ គួរតែចេញដីកាកោះហៅអ្នកដែលនៅពីក្រោយខ្នង និងអ្នកដែលការពារលោកឈូក បណ្ឌិត មិនត្រូវឲ្យគេចចេញពីសំណាញ់ច្បាប់ វាទើបយុត្តិធម៌។ «រឿងដែលបទល្មើសជាក់ស្តែងប៉ូលិសនៅហ្នឹង ត្រូវតែចាប់ហើយ។ បើសិនជាឥតចាប់ទាំងអស់ មិនមែនក្រសួងមហាផ្ទៃត្រូវតែស៊ើបអង្កេតត្រូវតែស៊ើបអង្កេតមួយទេ ត្រូវតែស៊ើបអង្កេតទាំងអស់ចូលរួមក្នុងការលាក់ខ្លួនជួយគាត់ឲ្យរួចផុតពីការចោទប្រកាន់ពីតុលាការ។ បទល្មើសនេះ បទល្មើសជាក់ស្តែងមនុស្សរាប់រយរាប់ពាន់នាក់ ដែលជាសាក្សី ដែលបានដឹង បានឮ បាននៅទីនោះ»។ លោក ឈូក បណ្ឌិត អភិបាលក្រុងបាវិតខាងកូតាគណបក្សប្រជាជនកម្ពុជា កន្លងមកត្រូវបានអង្គការសង្គមស៊ីវិលរិះគន់ថា អាជ្ញាធរមិនហ៊ានចាប់ខ្លួនជនសង្ស័យទៅផ្តន្ទាទោសភ្លាមៗទេ ដោយសារតែខ្លាចបក្សពួកនិយម និងមានមន្រ្តីមួយចំនួននៅពីក្រោយខ្នងជួយការពារលោក ឈូក បណ្ឌិត៕ This posting includes an audio/video/photo media file: Download Now |
| You are subscribed to email updates from VOA News: ព័ត៌មាន To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
