VOA News: ព័ត៌មាន: “ហេឡូវីអូអេ ២៣ កុម្ភៈ ២០១២៖ សិទ្ធិសេរីភាពរបស់កម្មកររោងចក្រក្នុងប្រទេសកម្ពុជា” plus 4 more |
- ហេឡូវីអូអេ ២៣ កុម្ភៈ ២០១២៖ សិទ្ធិសេរីភាពរបស់កម្មកររោងចក្រក្នុងប្រទេសកម្ពុជា
- ការវាយប្រហារនៅអ៊ីរ៉ាក់កាន់តែខ្លាំងឡើង
- ទីបេត៍ប្រារព្ធបុណ្យចូលឆ្នាំដោយស្ងប់ស្ងាត់
- អតីតព្រះរាជអាជ្ញាខេត្តពោធិ៍សាត់បញ្ជាក់ពីភាពស្អាតស្អំនិងសុំឱ្យតុលាការដោះលែង
- មេគុកទួលស្លែងនឹងផ្តល់សក្ខីកម្មប្រឆាំងនឹងអតីតមេរបស់ខ្លួន
| ហេឡូវីអូអេ ២៣ កុម្ភៈ ២០១២៖ សិទ្ធិសេរីភាពរបស់កម្មកររោងចក្រក្នុងប្រទេសកម្ពុជា Posted: 23 Feb 2012 01:43 PM PST ក្រុមមន្ត្រីសហជីព និងអ្នកឃ្លាំមើលសិទ្ធិមនុស្ស បានទទូចឲ្យអាជ្ញាធរចាប់ខ្លួនជនដៃដល់ ដែលបានបាញ់កម្មករកម្មការិនីរោងចក្រមួយកន្លែង ក្នុងក្រុងបាវិត ខេត្តស្វាយរៀង កាលពីថ្ងៃទី២០ ខែកុម្ភៈនោះ មកផ្តន្ទាទោសតាមច្បាប់។ ក្នុងការពិភាក្សាអំពី«សេរីភាពកម្មករក្នុងប្រទេសកម្ពុជា» ក្នុងកម្មវិធីហេឡូវីអូអេនៅថ្ងៃព្រហស្បតិ៍ទី២៣ខែកុម្ភៈ ឆ្នាំ២០១២ លោកជា មុនី ប្រធានសហជីពសេរីកម្មករនៃព្រះរាជាណាចក្រកម្ពុជា និងលោកអំ សំអាត មន្ត្រីសិទ្ធិមនុស្សអង្គការលីកាដូ ដែលជាវាគ្មិនបានទទូចរួមគ្នាថា ជនសង្ស័យត្រូវគេស្គាល់អត្តសញ្ញាណហើយ។ ជននោះគួរត្រូវចាប់ខ្លួន ដើម្បីផ្តន្ទាទោសតាមច្បាប់។ លោក ជា មុនី បានអះអាងថា លោកមានការសោកស្តាយដែលអ្នកមានអំណាច បានប្រើអាវុធ ដើម្បីបញ្ចប់ការទាមទារ ឬក៏បញ្ចប់សិទ្ធិសេរីភាព ឬក៏គម្រាម កំហែងកម្មករកម្មការិនីស្លូតត្រង់។ នៅថ្ងៃទី២០កុម្ភៈ មានកម្មករកម្មការនីនៅ រោងចក្រមួយក្នុងតំបន់សេដ្ឋកិច្ចពិសេសខេត្តស្វាយរៀង មានកម្មការនី៣នាក់បានរងការបាញ់ប្រហារ ពេលពួកគេធ្វើការតវ៉ាទាមទារសិទ្ធិដោយអហិង្សាតាមច្បាប់។ «ជាការអៀនខ្មាស់មួយ។ វាជាការណ៍មួយដែលធ្វើឲ្យប្រទេសកម្ពុជានឹងមានការធ្លាក់ចុះ ដោយសារតែជនម្នាក់ ពីរនាក់ដែលប្រើអំពើហិង្សាទៅលើកម្មករកម្មការិនី»។ <!--IMAGE-LEFT--> លោក អំ សំអាតដែលឃ្លាំមើលនិងស៊ើបអង្កេតរឿងនេះ បានអះអាងថា នេះ មិនមែន ជាការបាញ់ដោយអចេតនាទេ តែជាការប៉ុនប៉ងធ្វើមនុស្សឃាតកម្មការិនីយើង។ «នេះជាការរំលោភទៅលើសិទ្ធិកម្មករ កម្មការិនីយើងយ៉ាងធ្ងន់ធ្ងរ»។ សូមស្តាប់សំឡេងទាំងស្រុងនៃកម្មវិធីហេឡូវីអូអេថ្ងៃទី២៣ ខែកុម្ភៈ ឆ្នាំ២០១២៖ <!--AV--> មធ្យោបាយចូលរួមពីប្រិយមិត្ត៖ ទូរស័ព្ទ ០១២ ៥១ ៥១ ៩៤ ហ្វេសប៊ុក facebook.com/voakhmer អ៊ីម៉េល hellovoa@voanews.com This posting includes an audio/video/photo media file: Download Now |
| ការវាយប្រហារនៅអ៊ីរ៉ាក់កាន់តែខ្លាំងឡើង Posted: 23 Feb 2012 07:58 AM PST មន្ត្រីអ៊ីរ៉ាក់និយាយថា ការវាយប្រហារជាបន្តបន្ទាប់ទូទាំងប្រទេសបានសម្លាប់មនុស្សយ៉ាងតិច៥០នាក់ និងធ្វើឲ្យរបួសជាង២០០នាក់ទៀត ក្នុងថ្ងៃដែលមានគ្រោះថ្នាក់ច្រើនបំផុតនៅឆ្នាំនេះ។ មនុស្សស្លាប់ភាគច្រើននៅថ្ងៃព្រហស្បតិ៍នេះ គឺនៅក្រុងបាកដាដ ដែលមានគ្រាប់បែកជាច្រើនផ្ទុះ។ ក្រៅពីនោះ មានគ្រាប់បែកមួយផ្ទុះក្នុងស្រុក ការ៉ាដា (Karradah) ដែលសម្បូរដោយអ្នកកាន់សាសនានិកាយស៊ីអ៊ីតរស់នៅ ហើយបណ្តាលឲ្យមានមនុស្សស្លាប់៩នាក់ និងរបួស២៤នាក់ទៀត។ ក្រុមសកម្មប្រយុទ្ធក៏បានវាយប្រហារទីក្រុងចំនួន៩ផ្សេងទៀត រួមមានការវាយប្រហារលើក្រុមល្បាតផ្នែកសន្តិសុខ ភោជនីយដ្ឋាន និងសាលារៀន។ អំពើឃោរឃៅបានកើតឡើងក្រោយពីមានគ្រាប់បែកផ្ទុះកាលពីថ្ងៃអាទិត្យនៅក្រុងបាកដាដ ដែលសម្លាប់សិស្សប៉ូលិសយ៉ាងតិច១៩នាក់ខាងក្រៅសាលាប៉ូលិស។ ព័ត៌មានអន្តរជាតិសំខាន់ៗដទៃទៀត៖ <!--IMAGE-RIGHT--> ហ្វីលីពីន៖ អតីតប្រធានាធិបតីហ្វីលីពីនលោកស្រី គ្ល័ររៀ អារ៉ូយោ (Gloria Arroyo) បានអះអាងថា លោកស្រីមិនមានកំហុសដូចបទចោទប្រកាន់ទាក់ទងនឹងការលួចបន្លំសន្លឹកឆ្នោតទេ។ ការអះអាងនេះធ្វើឡើង ក្នុងសវនាការរបស់លោកស្រី ដែលគេចាប់អារម្មណ៍ច្រើន ហើយកំពុងដំណើរការនៅក្រុងម៉ានីល ក្នុងថ្ងៃព្រហស្បតិ៍នេះ។ ស៊ីរី៖ ការបាញ់ផ្លោងគ្មានប្រណីដោយកម្លាំងរដ្ឋាភិបាលស៊ីរី មកលើមូលដ្ឋានរបស់ក្រុមប្រឆាំងក្នុងក្រុងហូម និងនៅកន្លែងផ្សេងទៀត បានសម្លាប់មនុស្សយ៉ាងតិច៧៤នាក់ រួមមានអ្នកកាសែតលោកខាងលិច២នាក់ផង។ សូម៉ាលី៖ មេដឹកនាំក្នុងពិភពលោកប្រមូលផ្តុំគ្នានៅក្រុងឡុងនៅថ្ងៃព្រហស្បតិ៍នេះ ដើម្បីគ្រោងធ្វើសន្និសីទនាពេលខាងមុខ ដែលមានគោលបំណងសម្របសម្រួលការដោះស្រាយវិបត្តិអស្ថិរភាពច្រើនទសវត្សរ៍នៅប្រទេសសូម៉ាលី។ អាហ្វហ្គានីស្ថាន៖ ពួកតាលីបាន់បានអំពាវនាវឲ្យជនជាតិអាហ្វហ្គានីស្ថានធ្វើការវាយប្រហារលើមូលដ្ឋានយោធាបរទេស ដើម្បីសងសឹកចំពោះការដុតគម្ពីរគូរាន ក្នុងមូលដ្ឋានអង្គការអូងតង់ ខណៈពេលដែលការតវ៉ាបានបន្តចូលដល់ថ្ងៃទី៣នេះ។ ស.រ.អ.៖ ក្រុមបេក្ខជនប្រកួតប្រជែងយកតំណែងបេក្ខជនប្រធានាធិបតីស.រ.អ. ដែលមកពីគណបក្សសាធារណរដ្ឋ នៅសល់បួននាក់ ហើយពួកគេបានប្រឈមមុខគ្នាជាលើកដំបូងតាំងពីខែមករាមក ក្នុងការជជែកដេញដោលគ្នាតាមទូរទស្សន៍ជាតិ។ <!--AV--> This posting includes an audio/video/photo media file: Download Now |
| ទីបេត៍ប្រារព្ធបុណ្យចូលឆ្នាំដោយស្ងប់ស្ងាត់ Posted: 23 Feb 2012 01:24 AM PST ជនជាតិទីបេត៍ក្នុងប្រទេសចិនភាគខាងលិច ចាប់ប្រារព្វធ្វើពិធីបុណ្យចូលឆ្នាំទីបេត៍ កាលពីថ្ងៃពុធដោយស្ងប់ស្ងាត់ បន្ទាប់ពីមានការដុតសម្លាប់ខ្លួនមួយចំនួន ដើម្បីតវ៉ាប្រឆាំងនឹងការគ្រប់គ្រងរបស់ចិន។ ក្នុងពេលច្រើនសប្តាហ៍មុនការចាប់ផ្តើមពិធីបុណ្យ ចិនបានបង្ក្រាបសកម្មភាពរបស់ជនជាតិទីបេត៍ ដោយកាត់ផ្តាច់គមនាគមន៍ជាមួយតំបន់ធំរបស់ជនជាតិទីបេត៍ និងបន្ថែមកងកម្លាំងនគរបាលនៅពាសពេញទីក្រុងរបស់ជនជាតិនេះ។ <!--IMAGE-LEFT--> អ៊ីរ៉ង់៖ នាយកអធិការកិច្ចនុយក្លេអ៊ែររបស់អង្គការសហប្រជាជាតិ និយាយថាទស្សនកិច្ចរយៈពេលពីរថ្ងៃទៅកាន់ប្រទេស អ៊ីរ៉ង់ បានបញ្ចប់ ដោយក្រុមរបស់លោកមិនអាចទៅពិនិត្យមើលបន្ទាយទាហានសំខាន់មួយ ហើយពុំការព្រមព្រៀងគ្នាជាមួយរដ្ឋាភិបាលក្រុងតេហេរ៉ង់អំពីមធ្យបាយទៅមុខទៀតនោះទេ។ ព័ត៌មានអន្តរជាតិសំខាន់ៗដទៃទៀត៖ ភូមា៖ និយាយថាខ្លួននឹងចាប់ផ្តើមធ្វើការរៀបចំដើម្បីទទួលមុខនាទីជាប្រធាននៃសមាគប្រជាជាតិអាស៊ីអាគ្នេយ៍ (អាស៊ាន) ក្នុងឆ្នាំ២០១៤។ អង្គការក្នុងតំបន់និយាយថា លោករដ្ឋមន្រ្តីការបរទេសភូមា មួង លវីន Maung Lwin បានពណ៌នានៅក្នុងកិច្ចប្រជុំមួយជាមួយអគ្គលេខាធិការអាស៊ាន លោកស៊ូរីន ពិតសុវណ្ណ នៅរដ្ឋធានីណាយពីដាវ អំពីការរៀបចំខ្លួននេះថាជា«កិច្ចការដ៏ធំមួយ»សម្រាប់ប្រទេសលោក។ ជប៉ុន៖ ឯកសាររបស់ និយតករត្រួតពិនិត្រនុយក្លេអ៊ែរ សហរដ្ឋអាមេរិក ហៅកាត់ថា NRC បានបង្ហាញថា មន្ត្រីបានធ្វើការក្នុងបរិយាកាស«ច្របូកច្របល់» ក្នុងពេលប៉ុន្មានថ្ងៃដំបូងនៃវិបត្តិនុយក្លេអ៊ែររបស់ជប៉ុនកាលពីឆ្នាំមុន។ សូម៉ាលី៖ កងទ័ពរដ្ឋាភិបាលប្រទេសអេត្យូពីនិងសូម៉ាលី ដណ្តើមយកបានទីតាំងដ៏សំខាន់មួយរបស់ពួក សកម្មប្រយុទ្ធអាល់ ស្ហាបាប់ នៃប្រទេសសូម៉ាលី។ ស៊ីរី៖ ការបាញ់កាំភ្លើងធំឥតឈប់ឈរនៅថ្ងៃពុធទៅលើតំបន់ដ៏រឹងមាំរបស់ក្រុមប្រឆាំងនៅទីក្រុងហូមស៍ បានសម្លាប់មនុស្សយ៉ាងតិច១៩នាក់ រួមទាំងអ្នកសារព័ត៌មានបស្ចឹមប្រទេស២នាក់ នៅពេលកងកម្លាំងរដ្ឋាភិបាលបង្កើនការវាយប្រហាររបស់ខ្លួន។ អាហ្វហ្គានីស្ថាន៖ លោកប្រធានាធិបតី ហាមីដ កាហ្សាយ បានអំពាវនាវឲ្យមានភាពស្ងប់ស្ងៀម ក្រោយការវាយប្រយុទ្ធគ្នាជាច្រើនថ្ងៃរវាងកងកម្លាំងសន្តិសុខ អាហ្វហ្កានីស្ថាន និងក្រុមបាតុករដែលបានបណ្តាលឲ្យមានមនុស្សស្លាប់យ៉ាងតិច ៧នាក់នៅពាសពេញប្រទេស។ <!--AV--> This posting includes an audio/video/photo media file: Download Now |
| អតីតព្រះរាជអាជ្ញាខេត្តពោធិ៍សាត់បញ្ជាក់ពីភាពស្អាតស្អំនិងសុំឱ្យតុលាការដោះលែង Posted: 22 Feb 2012 05:08 PM PST សភាព្រហ្មទណ្ឌស៊ើបសួររបស់សាលាឧទ្ធរណ៍នៅថ្ងៃពុធនេះ បានចាប់ផ្តើមបើកសវនាការជំនុំជម្រះលើបណ្តឹងឧទ្ធរណ៍មួយរបស់លោក តុប ច័ន្ទសេរីវុធ អតីតព្រះរាជអាជ្ញាខេត្តពោធិ៍សាត់ ដែលត្រូវបានកាត់ទោសឲ្យជាប់ពន្ធនាគាររយៈពេល១៩ឆ្នាំ ពីបទចាប់ជំរិត បង្ខាំងមនុស្សខុសច្បាប់ និងស៊ីសំណូក។ សវនាការរបស់សាលាឧទ្ធរណ៍មិនអនុញ្ញាតឲ្យអ្នកសារព័ត៌មានកត់ត្រា នៅក្នុងដំណើរការសាកសួរទេ។ ក៏ប៉ុន្តែបានអនុញ្ញាតឲ្យអ្នកថតរូបមកពីអង្គភាពប្រឆាំងអំពើពុករលួយ បានផ្តិតយករូបភាព និងកត់ត្រាតាំងពីការចាប់ផ្តើមរហូតដល់ចប់។ បន្ទាប់ពីបានបើកសវនាការសួរដេញដោលពេញមួយរសៀលថ្ងៃពុធនេះ ដែលមានវត្តមានជនជាប់ចោទតុប ច័ន្ទសេរីវុធ និងគូកនពីរនាក់ផ្សេងទៀត។ លោក ប៉ុល សំអឿន ប្រធានចៅក្រមជំនុំជម្រះនៃសាលាឧទ្ធរណ៍បានមានប្រសាសន៍ថា សាលក្រមចំពោះសំណុំរឿងនេះ និងប្រកាសនៅថ្ងៃទី១៤ ខែមិនាខាងមុននេះ។ លោក តុប ច័ន្ទសេរីវុធ អតីតព្រះរាជអាជ្ញាខេត្តពោធិ៍សាត់ ត្រូវបានសាលាដំបូងខេត្តពោធិ៍សាត់សម្រេចផ្តន្ទាទោសឲ្យជាប់ពន្ធនាគារយៈពេល១៩ឆ្នាំពីបទស៊ីសំណូក បង្ខាំងមនុស្សខុសច្បាប់ និងចាប់ជំរិត។ សាលាដំបូងខេត្តពោធិ៍សាត់ ក៏បានសម្រេចផ្តន្ទាទោសអ្នកបើកបររថយន្តរបស់លោកចំនួនពីររូបផ្សេងទៀត គឺលោកឈិត វុទ្ធី ឲ្យជាប់ពន្ធនាគារយៈពេល១៦ឆ្នាំ និងលោក រស់ សំណាង ឲ្យជាប់ពន្ធនាគារយៈពេល១៥ឆ្នាំ ក្រោមបទចោទប្រកាន់ដូចគ្នានេះដែរ។ តុលាការក៏ចេញដីកាបង្គ្រាប់ឲ្យចាប់ខ្លួន លោក ពេជ កុងយូ ត្រូវជាប្អូនថ្លៃលោក តុប ច័ន្ទសេរីវុធ ដែលពេលនេះកំពុងរត់គេចខ្លួននៅឡើយ។ នៅក្នុងអង្គសវនាការបានសួរដេញដោល ពាក់ព័ន្ធទៅនឹងរឿងទទួលសំណូក នូវចំនួនទឹកប្រាក់ប្រមាណជាង៣.០០០ដុល្លារសហរដ្ឋអាមេរិក ជាថ្នូរនឹងការដោះលែងជនល្មើសពីររូប ដែលពាក់ព័ន្ធនឹងការដឹកឈើក្រញូងខុសច្បាប់។ កាលពីថ្ងៃទី២៤ ខែមិថុនា ឆ្នាំ២០១១ មន្ត្រីរដ្ឋបាលព្រៃឈើខេត្តពោធិ៍សាត់ បានចាប់រថយន្តសម្តែងសិល្បៈល្ខោនមួយ មកពីខេត្តកំពង់ចាម ដោយដឹកបង្កប់ឈើក្រញូង។ បន្ទាប់ពីការចាប់ខ្លួនជនសង្ស័យចំនួនពីររូបបានបង់ប្រាក់ធានាចំនួន៣.០០០ដុល្លារសហរដ្ឋអាមេរិក ជាថ្នូរនឹងការដោះលែងឲ្យមានសេរីភាពឡើងវិញ។ លោក តុប ច័ន្ទសេរីវុធ បានថ្លែងប្រាប់នៅក្នុងអង្គសវនាការថានៅថ្ងៃកើតហេតុនោះ លោក និងភរិយារបស់លោកនៅក្នុងទីក្រុងភ្នំពេញ មិនជាប់ពាក់ព័ន្ធនឹងការទទួលសំណូកទេ។ ថ្លែងប្រាប់ក្រុមអ្នកកាសែត បន្ទាប់ពីបញ្ចប់សវនាការលោក តុប ច័ន្ទសេរីវុធបានស្នើសុំឲ្យសាលាឧទ្ធរណ៍លើកលែងការចោទប្រកាន់។ «សុំសំណូមពរផ្លូវច្បាប់រកយុត្តិធម៌ឲ្យខ្ញុំតែប៉ុណ្ណឹងទេ។ សុំឲ្យពិចារណាលើខ្លឹមសារ ពាក្យពេចន៍ទាំងសាក្សីក្តី ទាំងជនរងគ្រោះឆ្លើយបំភ្លឺក្តីតុលាការក្តី។ សុំឲ្យពិចារណា ថាតើខ្ញុំបានប្រព្រឹត្តខុស ឬក៏អត់ តែប៉ុណ្ណឹងទេ»។ លោក គា ឆាយ មេធាវីកាពារក្តីលោក តុប ច័ន្ទសេរីវុធ បាននិយាយថាលោកសង្ឃឹមថាសាលាឧទ្ធរណ៍ និងរកយុត្តិធម៌ចំពោះកូនក្តីរបស់លោក។ «ប្រសិនបើគាត់បានបញ្ជាមែនហ្នឹងណា៎ ក៏វាមិនមែនជាការប្រព្រឹត្តិបទល្មើសដែរ ដោយសារតែការដែលគាត់បញ្ជាក្នុងនាមគាត់ជាព្រះរាជអាជ្ញា»។ លោក ឃៀង សេង អនុប្រធានប្រឆាំងអំពើពុករលួយមិនបានធ្វើអត្ថាធិប្បាយលម្អិតចំពោះអ្នកកាសែតទេ ដោយលោកគ្រាន់តែបាននិយាយថា។ «យើងស្តាប់នៅក្នុងសវនាការទាំងអស់គ្នា យើងយល់យ៉ាងម៉េច គឺជារឿងមួយ ដែលទាក់ទងនឹងសមត្ថកិច្ចរបស់តុលាការ។ យើងឃើញថាតុលាការគាត់ធ្វើត្រឹមត្រូវតាមនីតិវិធីរបស់គាត់។ អញ្ចឹងអង្គភាពឥតមានអ្វីដែលត្រូវបកស្រាយទៀតទេ»។ បើទោះបីជាមានការស្នើសុំឲ្យលើកលែងទោសលោក តុប ច័ន្ទសេរីវុធ យ៉ាងណាក៏ដោយ ក៏តំណាងឲ្យអយ្យការនៃសាលាឧទ្ធរណ៍ បានទទូចឲ្យតុលាការដម្កល់សាលក្រមរបស់សាលាដំបូង ខេត្តពោធិ៍សាត់ឲ្យនៅដដែល៕ This posting includes an audio/video/photo media file: Download Now |
| មេគុកទួលស្លែងនឹងផ្តល់សក្ខីកម្មប្រឆាំងនឹងអតីតមេរបស់ខ្លួន Posted: 22 Feb 2012 04:45 PM PST ឌុចអតីតមេគុកទួលស្លែងឬមន្ទីរ ស២១ ដែលទើបនឹងត្រូវផ្តន្ទាទោសឲ្យជាប់ពន្ធនាគារអស់មួយជីវិតក្នុងសំណុំរឿង០០១ នឹងត្រូវកោះហៅឲ្យធ្វើជាសាក្សីប្រឆាំង នឹងអតីតមេដឹកនាំជាន់ខ្ពស់បំផុតនៃរបបខ្មែរក្រហមក្នុងសំណុំរឿង០០២។ នេះបើតាមឯកសារ និងប្រភពពីមន្ដ្រីផ្លូវការរបស់សាលាក្ដីខ្មែរក្រហមបញ្ជាក់ឱ្យដឹងនៅថ្ងៃពុធនេះ។ យោងតាមសេចក្ដីជូនដំណឹងរបស់លោកចៅក្រម និល ណុន ប្រធានអង្គជំនុំជម្រះសាលាដំបូង ដែលត្រូវបានចែកចាយជាសាធារណៈកាលពីល្ងាចថ្ងៃអង្គារបានបង្ហាញថា ឌុច ដែលមានឈ្មោះដើម កាំង ហ្កេកអ៊ាវ នឹងត្រូវផ្ដល់សក្ខីកម្មទាក់ទងនឹងរចនាសម្ព័ន្ធរដ្ឋបាលនិងប្រព័ន្ធទំនាក់ទំនងការងាររួមទាំងតួនាទីរបស់ជនជាប់ចោទអៀង សារី ខៀវ សំផន និង នួន ជា។ លោក នេត្រ ភក្ដ្រា អ្នកនាំពាក្យសាលាក្ដីខ្មែរក្រហមមានប្រសាសន៍ថា ឌុច គឺជាសាក្សីសក្ដានុពលម្នាក់សម្រាប់សំណុំរឿង០០២។ «ឯកសារមួយចំនួនដែលសហព្រះរាជអាជ្ញាបានធ្វើការចោទប្រកាន់លើជនជាប់ចោទក្នុងសំណុំរឿង០០២ គឺយកចេញពីចម្លើយរបស់ ឌុច។ ហើយគុកទួលស្លែង គឺជាគុកមួយដែលមានទំនាក់ទំនងយ៉ាងជិតស្និទ្ធជាមួយនឹងបក្សកុម្មុយនិស្ដកម្ពុជា។ ដូច្នេះការផ្ដល់សក្ខីកម្មរបស់ ឌុច ក្នុងសំណុំរឿង ០០២ នេះគឺពិតជាមានសារៈសំខាន់»។
ឌុច ត្រូវចោទប្រកាន់ពីបទឧក្រិដ្ឋកម្មសង្គ្រាមឧក្រិដ្ឋកម្មប្រឆាំងមនុស្សជាតិ ការធ្វើទារុណកម្ម និងមនុស្សឃាត។ កាលពីថ្ងៃទី៣ ខែកុម្ភៈ កន្លងទៅអង្គជំនុំជម្រះតុលាការកំពូល នៃសាលាក្ដីខ្មែរក្រហមបានប្រកាសសាលដីកាផ្ដន្ទាទោស ឌុច ឲ្យជាប់ពន្ធនាគារអស់មួយជីវិតដោយបានរកឃើញថា ឌុច មានទោសកំហុសក្នុងការទទួលខុសត្រូវចំពោះការស្លាប់របស់អ្នកទោសយ៉ាងតិច ១២.៣៨០ នាក់។ នៅក្នុងប្រតិចរិករបស់អង្គជំនុំជម្រះសាលាដំបូងកាលពីខែមិនា ឆ្នាំ២០០៩ ឌុច បាននិយាយក្នុងសវនាការថា មេធំរបស់គាត់គឺជា បងធំទី២ ដែលគេស្គាល់ថា គឺនួន ជា។ ហើយបងធំទី២ បានដាក់បញ្ជាឲ្យគាត់យកអ្នកទោសទាំងអស់ទៅកាន់បឹងជើងឯក ដែលជាទីលានសម្រាប់សម្លាប់អ្នកទោសពីគុកទួលស្លែង។ យ៉ាងណាក៏ដោយ ទាំងនួន ជា អតីតប្រធានសភាខ្មែរក្រហម ទាំងខៀវ សំផន អតីតប្រមុខរដ្ឋ និងអៀង សារី អតីតឧបនាយករដ្ឋមន្ដ្រី និងជារដ្ឋមន្ត្រីការបរទេស នៃរបបខ្មែរក្រហមសុទ្ធតែមិនបានទទួលយកការទទួលខុសត្រូវចំពោះការស្លាប់ ឬការសម្លាប់ណាមួយលើប្រជាពលរដ្ឋកម្ពុជាជាង១,៧លាននាក់ ក្នុងពេលដែលពួកគេកាន់កាប់អំណាចនោះទេ។ លោក ឆាំង យុ នាយកមជ្ឈមណ្ឌលឯកសារកម្ពុជា ដែលជាមជ្ឈមណ្ឌលប្រមូលផ្ដុំនូវឯកសារពីរបបខ្មែរក្រហមជាច្រើនបានបញ្ជាក់ថា ឌុចគឺជាអតីតកម្មាភិបាលខ្មែរក្រហមមួយរូបដែលចម្លងការទាក់ទងពីថ្នាក់ក្រោមដល់ថ្នាក់ដឹកនាំកំពូល។ «គាត់នៅជាចំណុចផ្សាភ្ជាប់រវាងរឿងដែលបានកើតឡើងនៅថ្នាក់ក្រោម និងអ្វីដែលបានបញ្ជូនឡើងទៅថ្នាក់លើ។ ឧទាហរណ៍ដូចជាចម្លើយសារភាពមួយចំនួន គឺគាត់ គឺជាអ្នកចារទៅកាន់គណៈមជ្ឈិមបក្ស នៃបក្សកុម្មុយនិស្ដកម្ពុជានិងមេដឹកនាំជាន់ខ្ពស់មួយចំនួន។ ដូច្នេះ គាត់ជាសន្លាក់ផ្សារភ្ជាប់ពីរឿង ដែលបានកើតឡើងនៅខាងក្រោម និងការដឹងឮរបស់ថ្នាក់លើ»។ អង្គជំនុំជម្រះសាលាដំបូងបានផ្អាកដំណើរការកាត់ទោសសំណុំរឿង០០២ កាលពីសប្ដាហ៍មុន ហើយត្រៀមនឹងបន្ដការកាត់ទោសឡើងវិញនៅថ្ងៃទី១២ ខែមិនា ខាងមុខនេះ។ បើយោងតាមសេចក្តីជូនដំណឹងដល់ភាគីនានារបស់លោកចៅក្រម និល ណុន អង្គជំនុំជម្រះសាលាដំបូងគ្រោងនឹងសា្ដប់ការផ្ដល់សក្ខីកម្មពីរចនាសម្ព័ន្ធរដ្ឋបាលមជ្ឈិមបក្សកុម្មុយនិស្ដកម្ពុជា និងរចនាសម្ព័ន្ធនៃក្រសួងនានារបស់ពួកខ្មែរក្រហមដូចជាក្រសួងការបរទេសរបស់ អៀង សារី ដែលគ្របដណ្ដប់លើមន្ទីរ ប ១ ឬគុកបឹងត្របែកផងដែរ រចនាសម្ព័ន្ធក្រសួងពាណិជ្ជកម្ម ក្រសួងឃោសនាការអប់រំនយោបាយ និងរចនាសម្ព័ន្ធដឹកនាំរបស់ពួកខ្មែរក្រហមដល់ថ្នាក់មូលដ្ឋានទៀតផង។ លោកចៅក្រម និល ណុន បានបង្ហាញទៀតថា សាក្សី និងអ្នកជំនាញសរុបចំនួន៥៩រូប នឹងត្រូវកោះអញ្ជើញឲ្យផ្ដល់សក្ខីកម្ម លើកលែងតែសាក្សីនិងអ្នកជំនាញចំនួនប្រាំមួយរូបដែលនឹងត្រូវផ្ដល់សក្ខីកម្មទាក់ទងនឹងជនជាប់ចោទអៀង ធីរិទ្ធ នឹងត្រូវផ្អាកមួយរយៈសិន ដោយសារតែអៀង ធីរិទ្ធ ដែលជាជនជាប់ចោទម្នាក់ដែរក្នុងសំណុំរឿង០០២ មិនត្រូវបាននាំខ្លួនយកមកកាត់ទោសទេ។ មូលហេតុ គឺដោយសារបញ្ហាសុខភាពធ្ងន់ធ្ងររបស់គាត់៕ This posting includes an audio/video/photo media file: Download Now |
| You are subscribed to email updates from VOA News: ព័ត៌មាន To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
