VOA News: ព័ត៌មាន: “អូបាម៉ាត្រូវបានរិះគន់អំពីតម្លៃប្រេងខ្ពស់” plus 3 more |
- អូបាម៉ាត្រូវបានរិះគន់អំពីតម្លៃប្រេងខ្ពស់
- ជម្លោះរឿងគម្ពីរកូរ៉ាននៅអាហ្វហ្គានីស្ថានសម្លាប់មនុស្ស២នាក់
- សមាជិកសភាអាមេរិកស្នើឱ្យយកចិត្តទុកដាក់ដល់សំឡេងបក្សប្រឆាំង
- សំណុំរឿង០០៣និង០០៤មិនមានភាពច្បាស់លាស់តែមានក្នុងសំណើថវិកា
| អូបាម៉ាត្រូវបានរិះគន់អំពីតម្លៃប្រេងខ្ពស់ Posted: 24 Feb 2012 09:57 AM PST ពេលតម្លៃប្រេងនៅអាមេរិកឡើងថ្លៃខ្លាំងបំផុតក្នុងខែកុម្ភៈនេះ លោកប្រធានាធិបតី ស.រ.អ. បារ៉ាក់អូបាម៉ា នឹងថ្លែងសុន្ទរកថាអំពីថាមពលនៅក្រុងមៃអាមី និងផ្លរីដា។លោកប្រធានាធិបតី អូបាម៉ា ត្រូវបានរិះគន់ដោយបេក្ខជនប្រធានាធិបតីមកពីគណបក្សសាធារណរដ្ឋថា បានធ្វើឲ្យរាំងស្ទះការសាងសង់បំពង់ប្រេងដ៏វែងនៅ ស.រ.អ. ភាគខាងលិច។ មន្ត្រីរដ្ឋបាលលោក អូបាម៉ា បានឆ្លើយតបវិញថា លោកប្រធានាធិបតីបានប្រឹងប្រែងបង្កើនផលិតកម្មប្រេងក្នុងស្រុក ហើយថា តម្លៃប្រេងឡើងខ្លាំងគឺដោយសារស្ថានភាពតានតឹងនៅមជ្ឈឹមបូព៌ា មិនមែនជាកំហុសនៅ ស..រ.អ. ទេ។ លោកប្រធានាធិបតីនឹងទៅទស្សនាមណ្ឌលវាយតម្លៃឧស្សាហកម្មនៅសាកលវិទ្យាល័យ មៃអាមី ដែលមានសិស្សរៀនខាងជំនាញថាមពលកកើតឡើងវិញ។ លោកប្រធានាធិបតីក៏នឹងចូលរួមការប្រមូលមូលនិធិនៅរដ្ឋ មៃអាមី និងអូឡេនដូ មុនពេលលោកវិលមករដ្ឋធានីវ៉ាស៊ីនតោនវិញនៅថ្ងៃសុក្រនេះផងដែរ។ ព័ត៌មានអន្តរជាតិសំខាន់ៗផ្សេងទៀត៖ សូម៉ាលី៖ មន្ត្រីសូម៉ាលីនិយាយថា ការវាយប្រហារតាមអាកាសបានសម្លាប់សកម្មជនអាល់ ស្សាបាប (al-Shabab) ចំនួនបួននាក់ ដែលទាក់ទងនឹងក្រុម អាល់ កៃដា (al-Qaida) ក្នុងប្រទេសសូម៉ាលីភាគខាងត្បូង។ អាហ្វហ្គានីស្ថាន៖ ប្រទេសអាហ្វហ្គានីស្ថានប្រុងប្រៀបខ្លួននៅថ្ងៃសុក្រនេះ ត្រៀមសម្រាប់ការបាតុកម្មហិង្សាប្រឆាំងអាមេរិកចូលដល់ថ្ងៃទី៤ ដែលជាបាតុកម្មប្រឆាំងនឹងការដុតគម្ពីរគូរ៉ាននៅការិយាល័យរបស់អង្គការអូតង់។ មានមនុស្សស្លាប់យ៉ាងតិច១៣នាក់ក្នុងបាតុកម្មនានា តាំងពីចាប់ផ្តើមកាលពីថ្ងៃអង្គារ។ <!--IMAGE-RIGHT--> បារាំង៖ ប៉ូលិសបារាំងបានដោះលែងលោក ដូមីមិច ស្ត្រាស ខាន (Dominique Strauss Kahn) អតីតប្រធានមូលនិធិរូបិយវត្ថុអន្តរជាតិ IMF ក្រោយពីបានសាកសួរលោកពីរថ្ងៃអំពីក្រុមពេស្យាកម្មមួយ។ បាគីស្ថាន៖ មន្ត្រីបាគីស្ថាននៅភាគឥសាននិយាយថា អ្នកដាក់គ្រាប់បែកអត្តឃាត បានវាយប្រហារស្ថានីយ៍ប៉ូលិស សម្លាប់ប៉ូលិសយ៉ាងតិច៣នាក់ និងធ្វើឲ្យរបួស៧នាក់ទៀត។ <!--AV--> This posting includes an audio/video/photo media file: Download Now |
| ជម្លោះរឿងគម្ពីរកូរ៉ាននៅអាហ្វហ្គានីស្ថានសម្លាប់មនុស្ស២នាក់ Posted: 24 Feb 2012 12:14 AM PST មន្រ្តីអង្គការអូតង់និយាយថា បុគ្គលម្នាក់ស្លៀកឯកសណ្ឋានយោធាអាហ្វហ្គានីស្ថានបានបាញ់ស្លាប់ទាហានកងទ័ពចម្រុះពីរនាក់នៅក្នុងភាគខាងកើតនៃប្រទេស នៅក្នុងបាតុកម្មមួយដែលបានផ្ទុះឡើងពាសពេញប្រទេសអំពីរឿងដុតគម្ពីរ កូរ៉ាន (Quran) នៅក្នុងបន្ទាយមួយរបស់ អូតង់។ លោកប្រធានាធិបតីសហរដ្ឋអាមេរិក បារ៉ាក់ អូបាម៉ា បានផ្ញើលិខិតសុំអភ័យទោសតាមផ្លូវការចំពោះឧបទវហេតុនេះដោយរៀបរាប់ថា «គម្ពីសាសនាកូរ៉ានត្រូវបានរក្សាខ្វះការយកចិត្តទុកដាក់ដោយអចេតនា»។ លោកណាហ្ស៊ីហ្វ សាហរ៉ានី អ្នកវិភាគអាស៊ីខាងត្បូង នៅសាកលវិទ្យាល័យ Indiana University បានប្រាប់វីអូអេថា បាតុកម្មនេះគឺមានប្រឆាំងលើសពីឧបទវហេតុមួយនេះទៅទៀត។ លោកបន្តថាប្រជាជនមានកំហឹងនិងការខកចិត្ត ដោយមើលឃើញថាសហរដ្ឋអាមេរិកមិនគោរពពាក្យសន្យា ហើយថាពាក្យសន្យាទាំងអស់ជាការភូតកុហក។ ព័ត៌មានអន្តរជាតិសំខាន់ៗដទៃទៀត៖ <!--IMAGE-LEFT--> សៀហៃ៖ តុលាការមួយនៅក្រុង សៀហៃ បានច្រានចោលពាក្យបណ្តឹងរដ្ឋបវេណីមួយប្រឆាំងនឹងក្រុមហ៊ុនអាបផល អីងស៍ Apple, Inc. កាលពីថ្ងៃព្រហស្បត៍ ដោយនិយាយថាគ្មានភស្តុតាងគ្រប់គ្រាន់ នៅក្នុងជម្លោះរឿងនិក្ខិត្តសញ្ញាហៅ Trademark នោះទេ។ មហាក្រុមហ៊ុនកុំព្យូទ័រ របស់សហរដ្ឋអាមេរិកនេះអាចបន្តលក់ iPad នៅក្នុងទីក្រុងនេះតទៅទៀតបាន។ សូម៉ាលី៖ មេដឹកនាំពិភពលោក បានប្រជុំគ្នានៅក្រុងឡុងដ៍ កាលពីថ្ងៃព្រហស្បត៍ នៅក្នុងសន្និសីទមួយថ្ងៃ ដើម្បីជួយធ្វើឲ្យមានស្ថេរភាពនៅសូម៉ាលី ដោយមានការប្រមានថា ពិភពលោកនឹង«ទទួលការបង់ខាត» បើសិនមិនជួយប្រទេសនេះ ឲ្យចេញផុតពីអំពើហិង្សា ភាពរាំងស្ងួត និងភាពក្រីក្រក្នុងរយៈជាច្រើនឆ្នាំមកហើយនេះទេ។ អ៊ីរ៉ាក់៖ ការវាយប្រហារដោយមានការទម្លាក់គ្រាប់បែក រួមផ្សំជាមួយការបាញ់គ្នានៅពាសពេញប្រទេសលើទិសដៅភាគច្រើនរបស់ជនជាតិមូស្លីមស៊ីអ៊ីត (Muslim Shi'ite) បានសម្លាប់មនុស្សយ៉ាងតិច៥៥នាក់ និងធ្វើឲ្យរបួសមនុស្សជាង២២៥នាក់ទៀត នៅក្នុងអំពើហិង្សាដ៏បង្ហូរឈាមខ្លាំងបំផុតមួយ ចាប់តាំងពីកងទ័ពអាមេរិក បានដកថយចេញពីប្រទេសនេះកាលពីខែធ្នូមុន។ ស៊ីរី៖ រថក្រោះស៊ីរីបានលើកចូលទៅក្នុងសង្កាត់ដែលពួកឧទ្ទាមកាន់កាប់នៃទីក្រុងហោមស៍ (Homs) កាលពីថ្ងៃព្រហស្បតិ៍នេះ នៅពេលដែលការស៊ើបអង្កេតមួយរបស់អង្គការសហប្រជាជាតិនិយាយថា មេដឹកនាំស៊ីរី «នៅថ្នាក់ខ្ពស់បំផុត» អាចប្រឈមមុខនឹងការស៊ើបអង្កេតអំពីរឿងឧក្រិដ្ឋកម្មប្រឆាំងមនុស្សជាតិ។ សហរដ្ឋអាមេរិក៖ ទាហាន ម៉ារ៉ីនអាមេរិកាំង៧នាក់បានស្លាប់នៅក្នុងវាលខ្សាច់នៅភាគនិរតី បន្ទាប់ពីឧទ្ធម្ភាកចក្ររបស់ពួកគេបើកបុកគ្នា នៅក្នុងសមយុទ្ធហ្វឹកហ្វឺនមួយនៅពេលយប់ នៅក្នុងសាលសមយុទ្ធឈ្មោះ យូម៉ា (Yuma Training Range Complex) ដែលលាតសន្ធឹងតាមព្រំដែនវាលខ្សាច់រវាងរដ្ឋកាលីហ្វញ៉ានិងអារីហ្សូណា។ សហរដ្ឋអាមេរិក៖ បេក្ខជនប្រធានាធិបតីគណបក្សសាធារណរដ្ឋ រីខ សានតូរ៉ាម់ និង លោក មីទ រ៉ូមនី កំពុង ប្រឈមមុខនិងការប្រកួតកៀកគ្នាបំផុតនៅក្នុងរដ្ឋមីឆីកែន (Michigan) ក្រោមការស្ទង់មតិជាមធ្យមនៅរដ្ឋនេះ ដោយបង្ហាញថាលោកសានតូរ៉ាម់ ទទួលសម្លេងគាំទ្រ ៣៣.៨% និងលោក រ៉ូមនី ទទួលសម្លេងគាំទ្រ ៣៣.២% និងអ្នកដទៃមានសម្លេងគាំទ្រតិចតួចនៅឆ្ងាយពីក្រោយ។ ភូមា៖ មេដឹកនាំប្រជាធិបតេយ្យភូមា លោកស្រី អង់សានសូជី (Aung San Suu Kyi) បានធ្វើយុទ្ធនាការឃោសនា នៅក្រៅរដ្ឋធានី ម៉ៃអ៊ីកយីណា (My-ik-yi-na) នៃរដ្ឋ ខាឆីន (Kachin) នៃភាគខាងជើងប្រទេសកាលពីថ្ងៃព្រហស្បត៍នេះ។ ភូមា៖ អគ្គភ័យដ៏ធំមួយបានឆាបឆេះក្នុងជុំរំជនភៀសខ្លួនភូមាមួយ ឈ្មោះ អឺផៀន ម៉ៃ (Umpien Mai) នៅតាមព្រំដែនក្នុងប្រទេសថៃភាគខាងលិច បំផ្លាញផ្ទះសង់បណ្តោះអាសន្នអស់ជាច្រើនរយខ្នង ដែលជាទីស្នាក់នៅរបស់ជនភៀសខ្លួនដែលគេចចេញពីការវាយប្រយុទ្ធគ្នាក្នុងប្រទេសភូមា រវាងកងទ័ពរដ្ឋាភិបាលនិងពួកឧទ្ទាមបំបែកខ្លួន នៅក្នុងរដ្ឋ ខារែន (Karen)។ <!--AV--> This posting includes an audio/video/photo media file: Download Now |
| សមាជិកសភាអាមេរិកស្នើឱ្យយកចិត្តទុកដាក់ដល់សំឡេងបក្សប្រឆាំង Posted: 23 Feb 2012 06:00 PM PST សមាជិកសភាសហរដ្ឋអាមេរិកមួយរូបបានជំរុញឲ្យប្រទេសកម្ពុជាពង្រឹងបន្ថែមនូវតួនាទីរបស់គណបក្សជំទាស់ក្នុងប្រទេសស្របពេលដែលមន្រ្ដីគណបក្សបក្សជំទាស់អះអាងពីការគាបសង្កត់ពីសំណាក់គណបក្សគ្រប់គ្រងអំណាច។ លោកស្រី នីគី សុងហ្គាស សមាជិកសភាខាងគណបក្សប្រជាធិបតេយ្យប្រចាំរដ្ឋម៉ាសាឈូសេត មានប្រសាសន៍ក្នុងសន្និសីទកាសែតមួយក្នុងរាជធានីភ្នំពេញ នៅរសៀលថ្ងៃព្រហស្បតិ៍នេះដោយប្រៀបធៀបគណបក្សជំទាស់នៅសហរដ្ឋអាមេរិកនិងនៅក្នុងប្រទេសកម្ពុជា។ «វាជាការណ៍សំខាន់ណាស់សម្រាប់គណបក្សជំទាស់ក្នុងការដែលគណបក្សនេះមានជីវភាពនយោបាយរឹងមាំនៅក្នុងប្រទេសណាមួយក៏ដោយ។ ខ្ញុំជាសមាជិកគណបក្សប្រជាធិបតេយ្យដែលមានមតិភាគតិចនៅក្នុងសភាដែលដឹកនាំដោយគណបក្សសាធារណរដ្ឋ។ ជារៀងរាល់ថ្ងៃ យើងពិភាក្សាគ្រប់មធ្យោបាយអំពីអនាគតប្រទេសរបស់យើង។ ដូច្នេះខ្ញុំគិតថា ជាទូទៅ និងនៅក្នុងសង្គមប្រជាធិបតេយ្យទាំងអស់ វាមានសារៈសំខាន់ណាស់ដែលសំឡេងរបស់គណបក្សជំទាស់ត្រូវគេទទួលយកដើម្បីឲ្យប្រជាពលរដ្ឋអាចធ្វើការសម្រេចចិត្តរបស់ពួកគេបាន»។ លោកស្រីសមាជិកសភាអាមេរិកបានថ្លែងយ៉ាងដូច្នេះបន្ទាប់ពីលោកស្រីបានជួបជាមួយមន្ដ្រីរដ្ឋាភិបាលកម្ពុជា ក្រុមអ្នកជំនួញ ក្រុមមន្ដ្រីនៃអង្គការក្រៅរដ្ឋាភិបាល និងក្រុមមន្ដ្រីគណបក្សជំទាស់ក្នុងក្របខណ្ឌនៃដំណើរទស្សនកិច្ចការងាររបស់លោកស្រីចំនួនមួយសប្ដាហ៍នៅក្នុងប្រទេសកម្ពុជា។ ហើយលោកស្រីគ្រោងនឹងចាកចេញពីប្រទេសកម្ពុជានៅយប់ថ្ងៃសៅរ៍នេះ។ លោក សុន ឆ័យ ប្រធានក្រុមតំណាងរាស្ដ្រគណបក្សជំទាស់សម រង្ស៊ី ដែលសម្បូរវោហាបានយល់ស្របទៅនឹងការលើកឡើងរបស់លោកស្រី នីគី សុងហ្គាស។ លោក សុន ឆ័យ ក៏បានត្អូញត្អែរពីការព្រងើយកន្ដើយនិងការគាបសង្កត់របស់គណបក្សកាន់អំណាចលើគណបក្សរបស់លោក។ «សមាជិកសភាគណបក្សប្រឆាំង តែងត្រូវគេដកអភ័យឯកសិទ្ធិយ៉ាងងាយមិនសូវមានមូលហេតុអីត្រឹមត្រូវ។ ហើយលិខិតជាសំណួរដែលតំណាងរាស្ត្រគណបក្សសម រង្ស៊ី ផ្ញើទៅឲ្យរាជរដ្ឋាភិបាលភាគច្រើនមិនឆ្លើយតប។ ការឆ្លើយតបខ្លះនោះ ពេលខ្លះនោះមិនសមស្របទៅតាមគោលការណ៍ រដ្ឋធម្មនុញ្ញទៀត»។ ផ្ទុយទៅវិញ លោកជាម យៀប តំណាងរាស្ដ្រចំណាស់បីទសវត្សរ៍របស់គណបក្សប្រជាជនកម្ពុជាកំពុងកាន់អំណាចបានពន្យល់ផ្សេងពីនេះ។ «រដ្ឋសភា ក៏ដូចជាគណបក្សដែលកំពុងតែកាន់អំណាច គឺគណបក្សប្រជាជនកម្ពុជា យើងឥតមានចង្អៀតចង្អល់ ឬក៏រើសអើងអីទេ។ កន្លងទៅយើងឃើញថា គណបក្សដែលជាប់ឆ្នោតក្នុងរដ្ឋសភា តែងតែយកចិត្តទុកដាក់ដើម្បីអំពាវនាវចូលរួម»។ នៅក្នុងសន្និសីទសារព័ត៌មានរយៈពេលជាង ២០នាទី លោកស្រី នីគី សុងហ្គាស បានថ្លែងគាំទ្រវត្តមានរបស់លោកសម រង្ស៊ី នៅក្នុងប្រទេស។ ក៏ប៉ុន្ដែលោកស្រីបញ្ជាក់ថា លោកស្រី មិនបានលើកបញ្ហានេះទៅពិភាក្សាជាមួយរដ្ឋាភិបាលខ្មែរទេ។ មេដឹកនាំគណបក្សជំទាស់បាននិរទេសខ្លួនដោយស្ម័គ្រចិត្តទៅក្រៅប្រទេសអស់ពេលជាច្រើនឆ្នាំ បន្ទាប់ពីមានការចោទប្រកាន់ និងផ្ដន្ទាទោសដោយតុលាការខ្មែរ។ ជាមួយគ្នានេះលោកស្រី នីគី សុងហ្គាស ក៏បានលើកពីកង្វល់ពីអំពើពុករលួយនិងតម្លាភាពរបស់ក្រុមអ្នកជំនួញ ដែលលោកស្រីបានជួបក្នុងដំណើរទស្សនកិច្ចនេះ។ យ៉ាងណាក៏ដោយ លោកស្រីបានថ្លែងជាសរុបថា ប្រទេសកម្ពុជាជា «ប្រទេសវ័យក្មេង» ប៉ុន្ដែពោរពេញទៅដោយ «សុទិដ្ឋិនិយម»៕ This posting includes an audio/video/photo media file: Download Now |
| សំណុំរឿង០០៣និង០០៤មិនមានភាពច្បាស់លាស់តែមានក្នុងសំណើថវិកា Posted: 23 Feb 2012 03:54 PM PST សាលាក្តីកាត់ទោសខ្មែរក្រហមបញ្ចូលសំណុំរឿងបន្ថែម០០៣និង០០៤ដ៏ចម្រូងចម្រាសក្នុងសំណើសុំថវិការបស់ខ្លួនដែលសុំប្រទេសម្ចាស់ជំនួយក្នុងទីក្រុងញូវយ៉ក។ តែពុំបានបញ្ជាក់អំពីពេលវេលាជាក់លាក់ពីដំណើរការសំណុំរឿងទាំងនេះក្នុងគម្រោងការលម្អិតដែលគេដឹងថាត្រូវបញ្ចប់នៅឆ្នាំ២០១៨ នោះទេ។ នៅក្នុងសំណើថវិកាសម្រាប់ឆ្នាំ២០១២ដល់ឆ្នាំ២០១៣ផ្ញើទៅកាន់ក្រុមប្រទេស អ្នកផ្តល់ជំនួយកាលពីចុងឆ្នាំទៅម្តង ហើយនៅពាក់កណ្តាលខែកុម្ភៈម្តងនោះ បានបញ្ជាក់លម្អិតអំពី គម្រោងការចំណាយក្នុងចំនួនទឹកប្រាក់ពី៨៩,៦លាន ទៅ៩២លានដុល្លារតាមការប្រែប្រួលរបស់បុគ្គលិក កិច្ចការនានាហើយនឹង គម្រោងការនានារបស់សាលាក្តីទាក់ទងនឹងសំណុំរឿង០០២និងសំណុំរឿង បន្ថែម០០៣និង០០៤ដែលមានជនជាប់ចោទ៥នាក់ជាអតីតកម្មាភិបាលខ្មែរក្រហម។ «ពេលវេលាប្រាកដប្រជាសម្រាប់សំណុំរឿង០០៣និង០០៤ អាចប៉ាន់ប្រមាណ បានបន្ទាប់ពីការសម្រេចរបស់អង្គបុរេជំនុំជម្រះលើការខ្វែងគំនិតគ្នានៃសហចៅក្រមស៊ើបអង្កេតដែលត្រូវរំពឹងថាធ្វើការសម្រេចនៅក្នុងត្រីមាសទីមួយឆ្នាំ២០១២»។ ប្រទេសកម្ពុជាពុំបានតែងតាំងសហចៅក្រមស៊ើបអង្កេតបម្រុងជនជាតិស្វីស Laurent Kasper-Ansermet ដែលជ្រើសរើសដោយអ.ស.បនោះទេ។ ការមិនតែងតាំងនោះត្រូវគេមើលឃើញថា ទី១មិនអាចឲ្យសហចៅក្រមខ្មែរសហការបានក្នុងការបន្តស៊ើបអង្កេតតាមច្បាប់គតិយុត្តិ។ ទី២ ប៉ះពាល់ដល់ការចេញដីកាសន្និដ្ឋានចុងក្រោយទៅកាន់ចៅក្រមជម្រះលើសំណុំរឿងបន្ថែម០០៣ និង០០៤។ ទី៣ មិនអាចឲ្យចៅក្រមក្នុងអង្គបុរេយកសំណើស៊ើបអង្កេតណាមួយរបស់ចៅក្រមបម្រុងទៅពិចារណាតែច្រានចោលដូចដែលបានធ្វើថ្មីៗនេះ ទាក់ទងនឹងដំណើរការទៅមុខនៃសំណុំរឿង០០៣និង០០៤។ «នៅក្នុងសំណុំរឿង០០៣មានជនសង្ស័យពីរនាក់ជាជនសង្ស័យដែលទទួលខុស ត្រូវក្នុងការចូលរួមប្រព្រឹត្តបទឧក្រិដ្ឋនានានៅទីតាំង១៣កន្លែង។ ក្នុងសំណុំរឿង ០០៤ មានជនសង្ស័យ៣នាក់ដែលទទួលខុសត្រូវក្នុងការចូលរួមប្រព្រឹត្តបទ ឧក្រិដ្ឋនានាចំនួន៣២ទីតាំងផ្សេងៗគ្នា។ វាមានប្រយោជន៍ក្នុងការនិយាយចេញ ថាការស៊ើបអង្កេតសំណុំរឿង០០៣និង០០៤ត្រូវធ្វើឡើងផ្អែកទៅលើការិយា ល័យ៣ជាចម្បងគឺការិយាល័យសហចៅក្រមស៊ើបអង្កេត ការិយាល័យសហ ព្រះរាជអាជ្ញា និងអង្គបុរេជំនុំជម្រះនិងបទអន្តរាគមន៍របស់ដើមបណ្តឹងរដ្ឋប្បវេណី»។ ក្រុមប្រទេសម្ចាស់ជំនួយកំពុងពិចារណាលើសំណើថវិការបស់សាលាក្តីខ្មែរ ក្រហមចំនួន៨៩,៦លានដុល្លារដល់ចំនួន៩២លានសម្រាប់ទ្រទ្រង់សាលាក្តីដែល កាត់ទោសមេដឹកនាំជាន់ខ្ពស់ខ្មែរក្រហមដែលជាប់ទាក់ទិននឹងការសម្លាប់រង្គាលពលរដ្ឋខ្មែរស្លូតត្រង់ជាង១,៧លាននាក់ក្នុងទសវត្សរ៍១៩៧០។ មេដឹកនាំទាំងនោះមាន នួន ជា បងធំទី២ ខៀវ សំផនប្រមុខរដ្ឋ និងអៀងសារី រដ្ឋមន្ត្រីការបរទេស។ ថ្លែងប្រាប់វីអូអេតាមទូរស័ព្ទពីទីក្រុងញូវយ៉កកាលពីថ្ងៃអង្គារក្នុងលក្ខខណ្ឌពុំឲ្យ បញ្ចេញឈ្មោះដោយគ្មានតួនាទីនិយាយជាមួយអ្នកសារព័ត៌មាន អ្នកការទូតម្នាក់ដែលប្រទេសលោកជាសមាជិកសំខាន់ក្នុងការផ្តល់ជំនួយដល់ សាលាក្តីខ្មែរក្រហមបានអះអាងថាក្រុមប្រទេសអ្នកផ្តល់ជំនួយឬហៅថាប្រទេស ចាប់អារម្មណ៍សាលាក្តី (GIS) នោះគ្រោងនឹងពិភាក្សានៅថ្ងៃទី២៤ ខែកុម្ភៈដើម្បីផ្តល់ការសម្រេចលើចំណាយសម្រាប់សាលាក្តីខ្មែរក្រហមដែលបានស្នើ។ «ក្រុមប្រទេស GIS មិនទាន់សន្យាផ្តល់ថវិកាទេ តែពួកគេនឹងផ្តោតទៅលើការ យល់ព្រមលើសំណើថវិកាជាមុនសិន។ លោក David Scheffer ទីប្រឹក្សាពិសេសអ.ស.បនឹងជួបជាមួយតំណាងប្រទេសនានាបន្ទាប់ពីកិច្ចប្រជុំទាក់ទងនឹងការសន្យាថវិកា»។ អ្នកការទូតដដែលបានអះអាងថា មានបញ្ហាច្រើនដែលជាកង្វល់ក្នុងចំណោម ប្រទេសអ្នកផ្តល់ជំនួយ។ បញ្ហាទាំងនោះមានដូចជារយៈពេលយូរសម្រាប់ការ បញ្ចប់តុលាការដំណើរការ តែងតាំងសហចៅក្រមស៊ើបអង្កេត Laurent Kasper Ansermet និងដំណើរការសំណុំរឿង០០៣និង០០៤ជាដើម។ សាលាក្តីខ្មែរក្រហមបានខ្វះខាតថវិកាបើកឲ្យបុគ្គលិកកម្ពុជាតាំងពីខែតុលាម្ល៉េះ ដែលក្រុមអ្នកវិភាគខ្លះអះអាងថាប្រទេសផ្តល់ជំនួយរារែកក្នុងការផ្តល់ដោយ សារ តែសាលាក្តីនេះមិនបានជម្រះឲ្យអស់ចំពោះការចោទប្រកាន់រឿងជ្រៀត ជ្រែកផ្នែកនយោបាយពង្រឹងឯករាជ្យភាពនិងកិច្ចសហការធ្វើឲ្យរីកចម្រើនក្នុងសំណុំរឿងបន្ថែមរួមនឹងការតែងតាំងចៅក្រមស្វីសរបស់អ.ស.បផង។ លោកបណ្ឌិតចន សូសៀរី (John Ciorciari) សាស្ត្រាចារ្យផ្នែកគោលនយោបាយ សាធារណៈ នៃសាកលវិទ្យាល័យ Gerald Ford School of Public Policy នៃរដ្ឋ Michigan បានហៅវិបត្តិថវិកាជាល្បែងលេងចាប់កូនមាន់និងការណ៍ដែលសាលាក្តីពុំបានធ្វើឲ្យប្រទេសម្ចាស់ជំនួយពេញចិត្តទាក់ទងនឹងរឿងរ៉ាវជាច្រើន។ «ក្រុមប្រទេសអ្នកផ្តល់ជំនួយអាចទាមទារឲ្យរដ្ឋាភិបាលកម្ពុជាទទួលស្គាល់ចៅ ក្រមជនជាតិស្វីសមុនពេលផ្តល់ថវិកាបន្ថែម។ សំណុំរឿងទី២ផ្តល់ហេតុផល ដ៏រឹងមាំនៅឡើយសម្រាប់ក្រុមប្រទេសផ្តល់ជំនួយដើម្បីធានាឲ្យតុលាការនេះ ដំណើរការបាន។ តែវាជាការភ្ញាក់ផ្អើលប្រសិនបើប្រទេសផ្តល់ជំនួយច្រានចោល សំណើរបស់កម្ពុជាទាំងស្រុងក្នុងទីក្រុងញូវយ៉កនៅសប្តាហ៍នេះ»។ លោកនិយាយយ៉ាងដូច្នេះយោងទៅលើការមិនចុះសម្រុងគ្នាលើសំណុំរឿង ០០៣ផងដែរ ដែលគេដឹងថារដ្ឋាភិបាលកម្ពុជាបានជំទាស់យ៉ាងខ្លាំងក្នុងការ នាំខ្លួន ជនសង្ស័យបន្ថែមក្នុងសំណុំរឿង០០៣ និង០០៤មកកាត់ទោស។ ឯកសារពាក់ព័ន្ធនឹងជនជាប់សង្ស័យក្នុងសំណុំរឿងបន្ថែម០០៣និង០០៤ ដែលវីអូអេទទួលបានពី ប្រភពស្និទ្ធនឹងតុលាការបន្ទាប់ពីត្រូវផ្សព្វផ្សាយដោយ ព័ត៌មានបរទេសបានចោទប្រកាន់ជាបឋម ដោយសហព្រះរាជអាជ្ញាបរទេសមានលោក ស៊ូ ម៉េត មាស មុត យឹម ទិត អោម អាន និងអ្នកស្រី អ៊ឹម ចែម។ ជនសង្ស័យ៣នាក់ក្នុង ចំណោម៥នាក់គឺលោក មាស មុត អោម អាន និងអ្នកស្រី អ៊ឹម ចែមបានសម្ភាស ជាមួយវីអូអេហើយបានបដិសេធពីការជាប់ទាក់ទិននឹងបទឧក្រិដ្ឋដែលសហព្រះរាជអាជ្ញាបរទេសបានចោទប្រកាន់ជាបឋមនោះ។សហចៅក្រមស៊ើបអង្កេតបានបញ្ចប់ការស៊ើបអង្កេតសំណុំរឿង០០៣ កាលពីថ្ងៃទី២៩ ខែមេសាឆ្នាំ២០១១ ក្រោយពីបានពិនិត្យមើលភស្តុតាងជាង២ពាន់ភស្តុតាងដែលមានជាឯកសារ ៤៨.០០០ទំព័រ។នេះបើយោងតាមឯកសារជាសំណើថវិកា។ ក៏ប៉ុន្តែសហព្រះរាជអាជ្ញាបរទេសដែលបានបញ្ជូនដីកាបញ្ជូនរឿងឲ្យស៊ើបសួរតាំងពីឆ្នាំ២០០៨ចំពោះសំណុំរឿង០០៣ និង០០៤នោះ បានតវ៉ាថាសហចៅក្រមស៊ើបអង្កេតធ្វើការស៊ើបអង្កេតមិនគ្រប់គ្រាន់ជាពិសេសលើទីតាំង សាក្សីជាដើម។ ជនសង្ស័យត្រូវគេរាយការណ៍មកថាក៏មិនត្រូវបានសួរនាំអ្វីដែរ។ នៅក្នុងឯកសារផ្ញើជូនម្ចាស់ជំនួយបានបញ្ជាក់ដែរថាការស៊ើបអង្កេតសំណុំរឿង០០៤កំពុងធ្វើបន្ត។ហើយសំណុំរឿង០០៣អាចនឹងមានការស៊ើបអង្កេតបន្ថែម ទៅលើទីតាំងនិងសាក្សី។ ដំណើរការសំណុំរឿងបន្ថែមអាចធ្វើទៅបានអាស្រ័យ លើថវិកានិងធនធានដែលគេរំពឹងថាអាចនឹងចាប់ផ្តើមពេញលេញនៅឆ្នាំ ២០១៣។ សាលាក្តីខ្មែរក្រហមដែលស្ថិតក្នុងដំណើរការកាត់ទោសជនសង្ស័យ៣នាក់ក្នុង សំណុំរឿង០០២ គ្រោងនឹងចេញដីកាសម្រាប់ជនជាប់ចោទនៃសំណុំនេះ សម្រាប់ជនជាប់ចោទម្នាក់ដំបូងនៅក្នុងឆ្នាំ២០១៣ហើយបញ្ចប់សំណុំរឿង ០០២នៅឆ្នាំ២០១៦៕ This posting includes an audio/video/photo media file: Download Now |
| You are subscribed to email updates from VOA News: ព័ត៌មាន To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
