VOA News: ព័ត៌មាន: “តុលាការខេត្តកណ្តាលចោទប្រកាន់សមាជិកគណបក្សសម រង្ស៊ី” plus 5 more |
- តុលាការខេត្តកណ្តាលចោទប្រកាន់សមាជិកគណបក្សសម រង្ស៊ី
- តុលាការក្រុងភ្នំពេញកាត់ទោសអតីតប្រធានពិធីការប្រធានព្រឹទ្ធសភាជា ស៊ីម
- ព័ត៌មានអន្តរជាតិវីអូអេ ២៧ ធ្នូ យប់
- ព័ត៌មានអន្តរជាតិវីអូអេ ២៧ ធ្នូ ព្រឹក
- សហគមន៍មូលដ្ឋានរិះគន់ច្បាប់អង្គការបិទសិទ្ធិស្ទះដល់ការស្វែងរកជំនួយសម្រាប់ការអភិវឌ្ឍមូលដ្ឋាន
- ព័ត៌មានអន្តរជាតិវីអូអេ ២៦ ធ្នូ យប់
| តុលាការខេត្តកណ្តាលចោទប្រកាន់សមាជិកគណបក្សសម រង្ស៊ី Posted: 27 Dec 2011 07:31 AM PST សាលាដំបូងខេត្តកណ្ដាលបានចោទប្រកាន់តំណាងរាស្ដ្រគណបក្សសម រង្ស៊ី លោក ចាន់ ចេង និងសកម្មជននយោបាយគណបក្សនេះចំនួនពីររូបផ្សេងទៀត ក្នុងរឿងក្ដីមួយទាក់ទងនឹងសំណុំរឿងដីធ្លីដ៏ចម្រូងចម្រាស់។ ការចោទប្រកាន់នេះត្រូវបានធ្វើឡើងក្រោយបន្ទាប់ពីរដ្ឋសភាបានព្យួរអភ័យឯកសិទ្ធិលោកចាន់ ចេង កាលពីសប្ដាហ៍មុន។ ព្រះរាជអាជ្ញាតុលាការខេត្តកណ្ដាលលោកអ៊ុក គឹមសិទ្ធិ មានប្រសាសន៍នៅថ្ងៃអង្គារនេះថា លោកបានធ្វើការចោទប្រកាន់កាលពីថ្ងៃសុក្រសប្ដាហ៍មុន លើលោកចាន់ ចេង និងមេធាវីប្រចាំគណបក្សសម រង្ស៊ី លោក ជួរ ជូងី ពី «បទផ្ដល់មធ្យោបាយឲ្យលួចរត់» ដល់លោក មាស ប៉េង។ លោក មាស ប៉េង គឺជាជំទប់ឃុំបន្ទាយដែក ខេត្តកណ្ដាល កូតាគណបក្សសម រង្ស៊ី ដែលត្រូវចោទប្រកាន់ផងដែរពីបទលួចរត់។ បទចោទនេះដែលធ្វើឲ្យជំទប់ឃុំរបស់គណបក្សជំទាស់ទទួលរងការចោទប្រកាន់ចំនួនពីរក្នុងសំណុំរឿងដែលជាប់ទាក់ទងគ្នា។ រឿងហេតុបានកើតឡើងចាប់តាំងពីខែវិច្ឆិកាខណៈដែលលោកមាស ប៉េង ត្រូវសាលាដំបូងខេត្តកណ្ដាល កោះហៅនិងបញ្ជូនខ្លួនទៅឃុំឃាំងជាបណ្តោះអាសន្ន ក្រោមការចោទប្រកាន់ថា លោកបានផ្ដួចផ្ដើមគំនិតឲ្យប្រជាពលរដ្ឋជាង១០០គ្រួសារងើបឡើងតវ៉ានៅក្នុងជម្លោះដីធ្លីមួយកន្លែងក្នុងឃុំក្បែរខាងរបស់លោក។ ក៏ប៉ុន្ដែលោកជួរ ជូងី ដែលជាមេធាវីការពារលោកជំទប់ឃុំគណបក្សជំទាស់ បានតវ៉ា រួចបាននាំកូនក្ដីរបស់ខ្លួនចេញពីទីកន្លែងឃុំឃាំបណ្តោះអាសន្ន ដោយសារតែលោករកឃើញថា ការឃុំខ្លួននោះមិនមានដីកាពីតុលាការ ហើយទាំងលោកចាន់ ចេង ទាំងលោកជួរ ជូងី បានរួមដំណើរជាមួយជំទប់ឃុំដែលទទួលរងការចោទប្រកាន់នោះ។ លោកព្រះរាជអាជ្ញា អ៊ុក គឹមសិទ្ធិ ដែលស្នើសុំមិនឲ្យប្រើប្រាស់សំឡេងដើមមានប្រសាសន៍ថា ប្រសិនបើតុលាការរកឃើញកំហុស ជនជាប់សង្ស័យទាំងបីនាក់នឹងត្រូវប្រឈមនឹងការជាប់ពន្ធនាគារពីមួយឆ្នាំរហូតទៅដល់បីឆ្នាំ។ លោក ចាន់ ចេង បច្ចុប្បន្នកំពុងស្ថិតនៅកន្លែងសុវត្ថិភាព ហើយមិនអាចទាក់ទងបាន។លោក ជួរ ជូងី មានប្រសាសន៍ថា លោកមិនបានប្រព្រឹត្តិខុសដូចការចោទរបស់តុលាការនោះឡើយ។ «ចោទប្រកាន់ទាំងបំពានតែម្ដង។ ព្រោះអីមកចោទថាខ្ញុំហ្នឹង មកជួយសម្រួល។ ជួយសម្រួលរបៀបម៉េច ខ្ញុំឥតមានជួយសម្រួលទេ គឺខ្ញុំតវ៉ា មិនឲ្យឃុំកូនក្តីខ្ញុំ ដោយសារតែគ្មានដីកា។ ដល់ពេលខ្ញុំតវ៉ាទៅបានជោគជ័យ ឃុំខ្លួនកូនក្តីខ្ញុំបំពានមិនបាន មកចោទប្រកាន់ មករករឿងខ្ញុំទៅទៀត។អាហ្នឹងគឺជាភាពកំសាករបស់មន្ត្រីតុលាការហ្នឹង។ បង្ហាញទាំងភាពបំពានកាន់តែច្បាស់ទៅៗ»។ ដោយឡែកលោក មាស ប៉េង ដែលកំពុងស្ថិតក្នុងកន្លែងសុវត្ថិភាពមួយ បានលើកឡើងថា ការចោទប្រកាន់របស់តុលាការខេត្តកណ្ដាលកើតឡើងដោយសារមូលហេតុនៃការប្រជែងផ្នែកនយោបាយ។ «បោះឆ្នោតពីផ្នែកឃុំសង្កាត់នោះ ខ្ញុំបានប្រាំអសនៈ។ ខ្ញុំគ្រប់គ្រងរយៈពេលខ្លី។ ខ្ញុំឈ្នះជិត១.០០០សំឡេងក្នុងខេត្តកណ្តាលគឺមានតែឃុំខ្ញុំទេ។ អញ្ចឹងគេមើលទៅសន្ទុះទៅមិនរួចជាមួយខ្ញុំ គេរកយុទ្ធវិធី។ សម្រេចឃុំខ្ញុំមានដីកាសម្រេចដែរ ឬអត់? ត្រូវមានដីកាសម្រេចថា ត្រូវអានឲ្យខ្ញុំស្តាប់ សួរខ្ញុំហ្នឹង។ រួចឥតមានដីកាឃុំខ្លួនទេ។ រួចយកខ្ញុំឲ្យប៉ូលីសស្នងការចាប់ យកខ្ញុំទៅឃុំខ្លួននៅឯពន្ធនាគារ ហើយឥតមានដីកាឃុំខ្លួនទៀត»។ លោក មួង សំអាត ប្រធានពន្ធនាគារខេត្តកណ្ដាល និងលោកចៅក្រមលឹម សុគន្ថាមិនធ្វើអត្ថាធិប្បាយលើបញ្ហានេះទេ ដោយលើកឡើងថា ពួកលោកមិនបានដឹងសាច់រឿងនោះឡើយ។យោងតាមលោកព្រះរាជអាជ្ញា អ៊ុក គឹមសិទ្ធិ ការអង្កេតបឋមបង្ហាញថា មានតម្រុយនៃដើមហេតុដែលបង្ហាញថា លោកអាចធ្វើការចោទប្រកាន់អ្នកនយោបាយ និងសកម្មជននយោបាយគណបក្សសម រង្ស៊ី ទាំងបីរូបនេះ។ កាលពីថ្ងៃច័ន្ទ អង្គការ និងសមាគមការពារសិទ្ធិមនុស្ស នៃគណៈកម្មាធិការប្រព្រឹត្តិកម្មបានចេញសេចក្ដីថ្លែងការណ៍មួយដោយលើកឡើងថា កម្ពុជាបានប្រើប្រាស់ប្រពន្ធ័តុលាការ ស្ថាប័ន សភា និងស្ថាប័នរដ្ឋមួយចំនួនដើម្បីធ្វើការគាបសង្កត់លើសកម្មជនសិទ្ធិមនុស្ស និងអ្នកនយោបាយគណបក្សជំទាស់ខណៈពេលដែលការបោះឆ្នោតជ្រើសរើសក្រុមប្រឹក្សាឃុំសង្កាត់ និងការបោះឆ្នោតជ្រើសតាំងតំណាងរាស្ដ្រខិតជិតមកដល់។ ក៏ប៉ុន្ដែលោកផៃ ស៊ីផាន រដ្ឋលេខាធិការ និងជាអ្នកនាំពាក្យទីស្ដីគណៈរដ្ឋមន្ដ្រីបានច្រានចោលការលើកឡើងនោះ៕ This posting includes an audio/video/photo media file: Download Now |
| តុលាការក្រុងភ្នំពេញកាត់ទោសអតីតប្រធានពិធីការប្រធានព្រឹទ្ធសភាជា ស៊ីម Posted: 27 Dec 2011 07:17 AM PST តុលាការក្រុងភ្នំពេញបានកាត់ទោសលោកស្រី ផេង គន្ធាបូរី អតីតប្រធានពិធីការលោកជា ស៊ីម ប្រធានព្រឹទ្ធសភា និងជាប្រធានគណបក្សប្រជាជនកម្ពុជា ឲ្យជាប់ពន្ធនាគាររយៈពេលចំនួនបួនឆ្នាំ និងពិន័យជាប្រាក់ចំនួន៩.០០០រៀល ពីបទឆបោកដែលមានទំហំទឹកប្រាក់ជាង៥០០លានដុល្លារសហរដ្ឋអាមេរិក។ លោក តែ សំអាង ប្រធានចៅក្រមជំនុំជម្រះនៃតុលាការក្រុងភ្នំពេញក៏បានប្រកាសផ្តន្ទាទោសកំបាំងមុខចំពោះជនជាប់ចោទចំនួនបីរូបផ្សេងទៀត ដែលរូមមានលោកខៀវ បូរ៉ា អតីតទីប្រឹក្សាផ្ទាល់លោកស្រីផេង គន្ធាបូរី ឲ្យជាប់ពន្ធនាគាររយៈពេលបីឆ្នាំ លោកឧត្តមសេនីយ៍ត្រីចាន់ កុសល អតីតទីប្រឹក្សាផ្ទាល់លោកជា ស៊ីម ឲ្យជាប់ពន្ធនាគាររយៈពេលបួនឆ្នាំ និងពិន័យជាប្រាក់ចំនួន៩.០០០រៀល ចំណែកឯលោកឧត្តមសេនីយ៍ត្រី ពន្លក ហូរ អតីតទីប្រឹក្សាផ្ទាល់លោកជា ស៊ីម ឲ្យជាប់ពន្ធនាគាររយៈពេលបួនឆ្នាំ និងពិន័យជាប្រាក់ចំនួន២លានរៀល គឺស្មើជាង៥០០ដុល្លារសហរដ្ឋអាមេរិក ពីបទឆបោក។ តុលាការក្រុងភ្នំពេញបានបើកសវនាការកាត់ទោសជនជាប់ចោទចំនួនបួនរូប កាលពីថ្ងៃទី២០ កន្លងទៅនេះពីបទឆបោក ដែលមានទឹកប្រាក់ជាង៥០០លានដុល្លារសហរដ្ឋអាមេរិក តាមរយៈគម្រោងសាងសង់សាលារៀន មន្ទីរពេទ្យ និងផ្លូវថ្នល់របស់ក្រុមហ៊ុនម៉ាឡេស៊ីមួយ ដែលមានគម្រោងអភិវឌ្ឍន៍ជួយប្រជាពលរដ្ឋក្រីក្រនៅកម្ពុជាតាមរយៈលោកជា ស៊ីម ប្រធានព្រឹទ្ធសភា។ បន្ទាប់ពីការប្រកាសសាលក្រម លោកស្រីផេង គន្ធាបូរី បានទន់ជង្គង់ និងទ្រហូរយំនៅក្នុងរង្វង់ក្រចកសេះនៅក្នុងអង្គសវនាការ។ ក្រោយមកលោកស្រីត្រូវបានក្រុមគ្រួសារ សាច់ញាតិ និងមន្ត្រីអនុរក្សពន្ធនាគារបានគ្រាដើរចេញពីបន្ទប់អាគារនៃតុលាការក្រុងភ្នំពេញ។ ជាមួយនឹងស្នាមទឹកភ្នែកនៅជាប់ថ្ពាល់នៅឡើយលាយលំជាមួយនឹងម្សៅនៅលើផ្ទៃមុខ លោកស្រី ផេង គន្ធាបូរី បានថ្លែងប្រាប់អ្នកយកព័ត៌មានថា ការប្រកាសសាលក្រមចំពោះរឿងក្តីនេះ គឺជារឿងអយុត្តិធម៌។ លោកស្រីបានមានប្រសាសន៍ថា លោកស្រីនឹងប្តឹងឧទ្ធរណ៍ដើម្បីប្រឆាំងនឹងសេចក្តីសម្រេចនេះ។ លោកស្រី ផេង គន្ធាបូរី បាននិយាយទៀតថា រឿងក្តីនេះជារឿងបុគ្គលតែប៉ុណ្ណោះ មិនជាប់ពាក់ព័ន្ធនឹងរឿងនយោបាយជម្លោះផ្ទៃក្នុងនៃគណបក្សប្រជាជនកម្ពុជាទេ។ «ខ្ញុំសូមជម្រាបថា ការងារទាំងអស់នេះ កុំសូមឆ្លៀតឱកាសដើម្បីយករឿងខ្ញុំ ដើម្បីលាបពណ៌គណបក្សប្រជាជន។ នាងខ្ញុំនឹងតវ៉ាដើម្បីដឹងថា នាងខ្ញុំមិនមានកំហុស។ នាងខ្ញុំនឹងតវ៉ា។ អយុត្តិធម៌ដោយសារតែនាងខ្ញុំមិនអាចទទួលទោសអ្វីមួយនឹងដើរចូលគុក។ នាងខ្ញុំមិនមានកំហុស»។ ជនជាប់ចោទបីរូបផ្សេងទៀតដែលរួមមានលោកពន្លក ហូរ លោកខៀវ បូរ៉ា និងលោកចាន់ កុសល មិនមានវត្តមាននៅក្នុងពេលប្រកាសសាលក្រមនៅថ្ងៃអង្គារ៍នេះទេ។ លោក មួង សុគន្ធ មេធាវីការពារក្តីលោកស្រី ផេង គន្ធាបូរី បានថ្លែប្រាប់ក្រុមអ្នកយកព័ត៌មានថា លោកមិនអាចទទួលយកសាលក្រមនេះបានទេ។ «ក្នុងរឿងនេះ ខ្ញុំចាត់ទុកថា វាមិនមានយុត្តិធម៌ចំពោះកូនក្តីខ្ញុំទេ។ សវនាការក្នុងពេលនេះគឺថាខាងមេធាវីគឺបានព្យាយាមពុះពារការពារកូនក្តីដោយបញ្ជាក់សំខាន់បំផុតទៅលើភ័ស្តុតាងសម្រាប់ ដាក់បន្ទុកទៅលើកូនក្តី ក៏ប៉ុន្តែពេលនេះចៅក្រមលោកសម្រេច អីញ្ចឹងហើយ។ ដូច្នេះ សិទ្ធិរបស់ខាងកូនក្តីខ្ញុំក៏ដូចជាខាងមេធាវី មានសិទ្ធិសម្រាប់តវ៉ាទៅសាលាឧទ្ធរណ៍បន្តទៀត»។ ចំណែកខាងលោក ថោង ចាន់រិទ្ធី មេធាវីការពារក្តីលោកពន្លក ហូរ បាននិយាយថា នៅក្នុងសំណុំរឿងទាំងមូលមិនមានភ័ស្តុតាងណាមួយដើម្បីដាក់បន្ទុកកូនក្តីរបស់លោកទេ។ លោកបានមានប្រសាសន៍ថា លោកនឹងប្តឹងទៅសាលាឧទ្ធរណ៍ដើម្បីប្រឆាំងជំទាស់ទៅនឹងសេចក្តីសម្រេចនេះ។ «ខ្ញុំគិតថា វាហាក់បីដូចជាមិនមានភាពយុត្តិធម៌ចំពោះកូនក្តីខ្ញុំ ដោយថានៅក្នុងសំណុំរឿងទាំងមូលគឺវាមិនមានអីគួរតែដាក់បន្ទុកកូនក្តីខ្ញុំធ្ងន់ធ្ងរទេ»។ ចំណែកលោក ណាច ទ្រី មេធាវីការពារក្តីរបស់រដ្ឋាភិបាល នៅមិនធ្វើអត្ថាធិប្បាយលើសេចក្តីសម្រេចនេះទេ ដោយលោកបានមានប្រសាសន៍យ៉ាងខ្លីថា លោកមិនទាន់បានឃើញការប្រកាសសាលក្រមរបស់តុលការក្រុងភ្នំពេញនៅឡើយ៕ This posting includes an audio/video/photo media file: Download Now |
| ព័ត៌មានអន្តរជាតិវីអូអេ ២៧ ធ្នូ យប់ Posted: 27 Dec 2011 07:48 AM PST ស៊ីរី៖ ពួកអ្នកសង្កេតការណ៍របស់សម្ព័ន្ធអារ៉ាប់បានធ្វើដំណើរទៅកាន់ទីក្រុង Homs នៃប្រទេសស៊ីរីដែលជាមជ្ឈមណ្ឌលមួយនៃបាតុកម្មរបស់ក្រុមប្រឆាំង ដែលនៅទីនោះពួកសកម្មជនសិទ្ធិមនុស្សបាននិយាយថា កងកម្លាំងសន្តិសុខរបស់រដ្ឋាភិបាលបានបង្កើនការវាយប្រហាររបស់ពួកគេកាលពីប៉ុន្មានថ្ងៃថ្មីៗនេះ។ អ៊ីរ៉ាក់៖ ក្រុមនយោបាយអ៊ីរ៉ាក់ដឹកនាំដោយបព្វជិតអ៊ីស្លាម Shi'ite ប្រឆាំងអាមេរិកាំងឈ្មោះ Muqtada al-Sadr បានចេញផ្សាយការអំពាវនាវមួយឱ្យរំលាយសភានៃប្រទេសអ៊ីរ៉ាក់ ហើយរៀបចំការបោះឆ្នោតជាថ្មីនៅក្នុងចំណាត់ការមួយដែលអាចនាំឱ្យវិបត្តិនិកាយសាសនារបស់ប្រទេសនេះមានភាពតានតឹងទ្បើងៗ។ យេម៉ែន៖ សហរដ្ឋអាមេរិកកំពុងពិចារណាថា តើនឹងអនុញ្ញាតឱ្យលោក Ali Abdullah Saleh ប្រធានាធិបតីចេញពីតំណែងនៃប្រទេសយេម៉ែន ធ្វើដំណើរមកកាន់សហរដ្ឋអាមេរិកដើម្បីទទួលការព្យាបាលមុខរបួសនៅក្នុងការវាយប្រហារមួយលើវិមានប្រធានាធិបតីរបស់លោកកាលពី ខែមិថុនា ឬទេ? ឥណ្ឌា ប៉ាគីស្ថាន៖ ពួកមន្ត្រីឥណ្ឌានិងប៉ាគីស្ថានកំពុងពិចារណាអំពីសំណើមួយដើម្បីធ្វើមិនឱ្យមានក្រុមយោធានៅតាមព្រំដែននៃតំបន់កាស្មៀរ (Kashmir) នៃភ្នំហេមពាន្ត (Himalayas) ដែលមានជម្លោះនៅពេលដែលប្រទេសទាំងពីរធ្វើការចរចាអំពីអាវុធក្នុងថ្ងៃទីពីរក្នុងក្រុងអ៊ីស្លាម៉ាបាដ (Islamabad) នៅថ្ងៃអង្គារនេះ។ <!--AV--> This posting includes an audio/video/photo media file: Download Now |
| ព័ត៌មានអន្តរជាតិវីអូអេ ២៧ ធ្នូ ព្រឹក Posted: 27 Dec 2011 06:46 AM PST ជប៉ុន៖ គណៈកម្មការធិការឯករាជ្យរបស់ជប៉ុនមួយដែលស៊ើបអង្កេតគ្រោះមហន្តរាយនៅរោងចក្រថាមពលនុយក្លេអ៊ែរ ហ្វូគូយ៉ាម៉ា ដាអ៊ីជិ កំពុងរិះគន់យ៉ាងខ្លាំង ទាំងអ្នកប្រតិបត្តិការក្រុមហ៊ុននិងរដ្ឋាភិបាលចំពោះចំណាត់ការវិបត្តិនុយក្លេអ៊ែរដ៏អាក្រក់បំផុតក្នុងរយៈពេល២៥ឆ្នាំមកនេះ។ អង់គ្លេស៖ វិមានប៊េកឃីងហេម បានប្រាប់ឲ្យដឹងថាព្រះអង្គម្ចាស់ហ្វីលីព របស់អង់គ្លេសនឹងស្ថិតនៅក្រោមឃ្លាំមើល បន្ទាប់ពីស្ថិតនៅអស់៣យប់ក្នុងមន្ទីពេទ្យបន្ទាប់ពីការព្យាបាលការស្ទះសសៃឈាមក្នុងបេះដូង។ អ៊ីរ៉ាក់៖ អាជ្ញាធរអ៊ីរ៉ាក់បាននិយាយថាអ្នកដាក់គ្រាប់បែកអត្តឃាតម្នាក់បានបំផ្ទុះរថយន្តនៅខាងក្រៅក្រសួងមហាផ្ទៃក្នុងទីក្រុងបាកដាតដោយសម្លាប់មនុស្ស៧នាក់និងមនុស្សជាង៣០នាក់ទៀតរងរបួស។ ស៊ីរី៖ សកម្មជនសិទ្ធិមនុស្សនិងសាក្សីឃើញហេតុការណ៍ផ្ទាល់នៅស៊ីរីនិយាយថាកងទ័ពរដ្ឋាភិបាលបានពង្រីកការវាយប្រហារលើពួកបាតុករប្រឆាំងក្នុងទីក្រុង ហូម ដោយបានសម្លាប់មនុស្សយ៉ាងហោចណាស់ក៏២០នាក់ដែរ។ ឥណ្ឌា៖ លោកអាណា ហាហ្សា អតីតសកម្មជនឥណ្ឌាមានផែនការធ្វើកូដកម្មបង្អត់អាហាររយៈពេល៣ថ្ងៃដើម្បីប្រឆាំងតវ៉ាសេចក្តីព្រាងច្បាប់ពុករលួយដែលត្រូវបានជជែកដេញដោលក្នុងសភា។ កូរ៉េខាងជើង៖ លោកគីម យុងអ៊ុន មេដឹកនាំកូរ៉េខាងជើងដែលទើបជ្រើសតាំងថ្មីបានជួបកាលពីថ្ងៃច័ន្ទជាមួយគណៈប្រតិភូឯកជនដ៏ល្បីល្បាញរបស់កូរ៉េខាងត្បូងក្នុងរដ្ឋធានីព្យុងយ៉ាង នៅក្នុងការបង្ហាញខ្លួនជាសាធារណៈជាមួយភ្ញៀវបរទេសចាប់តាំងពីការស្លាប់របស់ឪពុកលោកដែលគេបានប្រកាសកាលពីសប្តាហ៍មុន។ អ៊ុយក្រែន ៖ អ៊ុយក្រែននិងរុស្ស៊ី បានប្រកាសផែនការធ្វើការចរចាលើកក្រោយរបស់ខ្លួនពីតម្លៃនិងទំហំនៃការផ្គត់ផ្គង់ឧស្ម័នធម្មជាតិនៅថ្ងៃទី១៥ ខែមករា។ នីហ្សេរីយ៉ា៖ សម្តេចប៉ាប បេណេឌិកក្នុងគ្រឹស្តសាសនារូម៉ាំងកាតូលិកបានប្រកាសប្រឆាំងនឹងការបំផ្ទុះគ្រាប់បែកមិនសមហេតុផលជាបន្តបន្ទាប់នៅថ្ងៃបុណ្យគ្រីស្តម៉ាស្ត នៅក្នុងនីហ្សេរីយ៉ា រួមមានការវផ្ទុះគ្រាប់បែកមួយដែលបានសម្លាប់មនុស្ស៣៥នាក់នៅព្រះវិហារគ្រឹះសាសនារូម៉ាំងកាតូលិកផងដែរ។ <!--AV--> This posting includes an audio/video/photo media file: Download Now |
| Posted: 26 Dec 2011 07:28 PM PST នៅថ្ងៃច័ន្ទនេះ ក្រុមមន្ត្រីអង្គការសហគមន៍តាមមូលដ្ឋានបានរិះគន់មាត្រា៤នៃសេចក្តីព្រាងច្បាប់អង្គការមិនមែនរដ្ឋាភិបាលចំពោះការធ្វើឲ្យរាំងស្ទះដល់ការស្វែងរកជំនួយសម្រាប់ការអភិវឌ្ឍមូលដ្ឋាន និងដាក់កំហិតសេរីភាពនៃសកម្មភាពការងាររបស់ខ្លួន។ មាត្រា៤នៃច្បាប់នេះបានចែងថា អង្គការសហគមន៍មូលដ្ឋានគឺប្រជាពលរដ្ឋដែលស្ម័គ្រចិត្តរួមគ្មាបង្កើត គ្រប់គ្រង និងធ្វើសកម្មភាពដោយខ្លួនឯង ដើម្បីបម្រើ និងការពារផលប្រយោជន៍ក្នុងសហគមន៍មូលដ្ឋានរបស់ខ្លួន។ លោកហេង សំអ៊ូន អគ្គលេខាធិការសមាគមប្រជាធិបតេយ្យ ឯករាជ្យនៃសេដ្ឋកិច្ចក្រៅប្រព័ន្ធ បានថ្លែងថាមាត្រា៤នៃច្បាប់អង្គការមិនមែនរដ្ឋាភិបាលបានហាមឃាត់ការចងសម្ព័ន្ធភាពរបស់អង្គការ សមាគមមិនមែនរដ្ឋាភិបាល។ «នៅក្នុងច្បាប់នេះ អត់មាននិយាយពីការចងសម្ព័ន្ធភាពនឹងគ្នាទេ។ ឧទាហរណ៍ ខ្ញុំ សមាគមទុគទុគឬ ម៉ូតូកង់បីអាចចងសម្ព័ន្ធភាពជាមួយសហគមន៍កសិករ និងកម្មកររោងចក្រ។ ប៉ុន្តែនៅក្នុងច្បាប់នេះ គេមិនឲ្យយើងចងសម្ព័ន្ធភាពជាមួយគ្នាទេ។ នេះហើយធ្វើឲ្យកម្លាំងរបស់យើងអាចចុះខ្សោយ។ យើងស្នើសុំដាច់ខាតមិនចង់ឲ្យមានច្បាប់នេះតែម្តង»។ លោក ញ៉ិល ភាព ប្រធានសហគមន៍យុត្តិធម៌សង្គម និងការបណ្តុះបណ្តាលវិស័យកសិកម្ម នៅភូមិកុកទ្រា ឃុំរវៀង ស្រុកសំរោង ខេត្តតាកែវ បានបញ្ជាក់ថា សហគមន៍របស់លោកត្រូវការជំនួយពីអង្គការសមាគមមិនមែនរដ្ឋាភិបាល ដើម្បីយកមកអភិវឌ្ឍសហគមន៍។ លោកញ៉ិល ភាពបានបន្ថែមថា មាត្រា៤នេះបានបំផ្លាញផលប្រយោជន៍របស់សហគមន៍ និងរាំងស្ទះដល់ការអភិវឌ្ឍសហគមន៍ ខណៈដែលរដ្ឋាភិបាលមិនទាន់មានលទ្ធភាពគ្រប់គ្រាន់ជួយអភិវឌ្ឍសហគមន៍។ «សហគមន៍មិនអាចធ្វើការភ្ជាប់បណ្តាញពីមួយទៅមួយបានទេ ហើយមិនឲ្យសហគមន៍អាចទៅរកជំនួយផ្សេងដើម្បីយកមកអភិវឌ្ឍនៅក្នុងមូលដ្ឋាន ជាពិសេស (សហគមន៍) មិនអាចស្វែងរកអង្គការដៃគូ ដើម្បីយកមកអភិវឌ្ឍសហគមន៍បានទេ។ ដូច្នេះច្បាប់នេះ យើងមិនអាចទទួលយកបានទេ»។ អ្នកស្រីយី វង្ស សមាជិកបណ្តាញសន្តិភាពសហគមន៍តស៊ូមតិខាងដីធ្លីនៅស្រុកជីក្រែង ខេត្តសៀមរាប បានថ្លែងថា មាត្រា៤ នៃសេចក្តីព្រាងច្បាប់អង្គការមិនមែនរដ្ឋាភិបាលនេះបានរឹតត្បិតសេរីភាព និងសកម្មភាពនានារបស់សហគមន៍មូលដ្ឋានក្នុងការស្វែងរកជំនួយពីអង្គការអន្តរជាតិសម្រាប់យកមកអភិវឌ្ឍសហគមន៍ ហើយរារាំងដល់ការតស៊ូមតិរបស់ប្រជាពលរដ្ឋនៅតាមសហគមន៍នីមួយៗ ក្នុងការការពារដីស្រែចម្ការរបស់ខ្លួនដែលតូវបានគេរំលោភយក។ «ក្នុងមាត្រា៤ រាជរដ្ឋាភិបាលបញ្ឈប់កុំឲ្យសហគមន៍យើង ខ្ញុំទាក់ទងជាមួយអង្គការនានា ហើយបានបញ្ឈប់មិនឲ្យសហគមន៍យើងខ្ញុំមានការចូលរួមទេ។ អញ្ចឹង ប្រជាពលរដ្ឋមិនពេញចិត្តក្នុងការចេញច្បាប់មាត្រា៤នេះទេ។ ខ្ញុំសូមឲ្យបញ្ឈប់។ ប្រជាពលរដ្ឋនៅក្នុងសហគមន៍មិនពេញចិត្ត និងមិនអាចទទួលយកមាត្រា៤នេះបានទេ។ មាត្រា៤នេះធ្វើឲ្យខាតប្រយោជន៍ដល់ពួកខ្ញុំជាប្រជាសហគមន៍ និងមិនអាចឲ្យពួកខ្ញុំអភិវឌ្ឍក្នុងសហគមន៍បានទេ។ សេចក្តីថ្លែងការណ៍រួមរបស់សហគមន៍មូលដ្ឋានបានបញ្ជាក់ថា ច្បាប់អង្គការមិនមែនរដ្ឋាភិបាលនេះ បង្កើតឡើងដើម្បីត្រួតត្រា ជាជាងលើកស្ទួយ និងពង្រឹងសង្គមស៊ីវិល ហើយធ្វើឲ្យបាត់បង់សិទ្ធិប្រជាពលរដ្ឋ និងលទ្ធិប្រជាធិបតេយ្យនៅកម្ពុជា ហើយបានស្នើសុំយ៉ាងទទូចឲ្យរដ្ឋាភិបាលបញ្ឈប់ការប៉ុនប៉ងចេញច្បាប់នេះ។ កាលពីថ្ងៃសុក្រនេះ ក្រុមអង្គការសិទ្ធិមនុស្សអន្តរជាតិបានអំពាវនាវឲ្យប្រទេសផ្តល់ជំនួយដាក់ការគាបសង្កត់ទៅលើរដ្ឋាភិបាលកម្ពុជា ឲ្យកែសម្រួល ឬបោះបង់ចោលសេចក្តីព្រាងច្បាប់អង្គការមិនមែនរដ្ឋាភិបាលដែលរឹតត្បិតសេរីភាពរបស់អង្គការសង្គមស៊ីវិលនៅកម្ពុជា។ លោកផៃ ស៊ីផាន រដ្ឋលេខាធិការ និងជាអ្នកនាំពាក្យទីស្តីការគណៈរដ្ឋមន្ត្រី បានថ្លែងថា ច្បាប់អង្គការមិនមែនរដ្ឋាភិបាលនេះត្រូវបានធ្វើឡើងស្របតាមរដ្ឋធម្មនុញ្ញ។ ការប្រឹងប្រែងរបស់រាជរដ្ឋាភិបាលមានគោលដៅបង្កើតច្បាប់អង្គការមិនមែនរដ្ឋាភិបាល សំដៅពង្រឹងនីតិរដ្ឋ។ អង្គការមិនមែនរដ្ឋាភិបាលគួរតែជួយពង្រឹងសណ្តាប់ធ្នាប់។ លោកនុត សាអាន រដ្ឋលេខាធិការក្រសួងមហាផ្ទៃ បានបញ្ជាក់ថា រដ្ឋាភិបាលនឹងទទួលយកអនុសាសន៍ និងកង្វល់ទាំងឡាយរបស់អង្គការសង្គមស៊ីវិលមកពិចារណា៕ This posting includes an audio/video/photo media file: Download Now |
| ព័ត៌មានអន្តរជាតិវីអូអេ ២៦ ធ្នូ យប់ Posted: 27 Dec 2011 06:38 AM PST កូរ៉េ៖ គណៈប្រតិភូឯកជនកូរ៉េខាងត្បូងពីររូបបានឆ្លងកាត់ព្រំដែនដែលមានកិច្ចការពារយ៉ាងមាំទាំ ចូលទៅក្នុងប្រទេសកូរ៉េខាងជើងដើម្បីសម្តែងការគោរពដល់សពអតីតមេដឹកនាំរបស់ប្រទេសនេះ គឺលោក គីម ជុង អ៊ីល (Kim Jong Il) ដែលបានទទួលអនិច្ចកម្មកាលពីថ្ងៃទី១៧ខែធ្នូកន្លងទៅនេះ។ ស៊ីរី៖ ពួកសកម្មជនបាននិយាយថា អំពើហិង្សាថ្មីៗបំផុតដែលបង្កឡើងដោយកងកម្លាំងសន្តិសុខស៊ីរីបានបណ្តាលឱ្យមនុស្សយ៉ាងតិចណាស់១៣នាក់ស្លាប់ក្នុងទីក្រុង ហូម៉ាស (Homs)។ អង្គការ សង្កេតការណ៍ស៊ីរីដើម្បីសិទ្ធិមនុស្ស (Syrian Observatory for Human Rights) ដែលមានមូលដ្ឋានក្នុងប្រទេសអង់គ្លេសបាននិយាយថា ការស្លាប់នៃពួកមនុស្សទាំងនេះបានកើតមានទ្បើងនៅថ្ងៃច័ន្ទនេះនៅពេលដែលកងកម្លាំងរដ្ឋាភិបាលស៊ីរីបានបាញ់ផ្លោងទៅលើសង្កាត់ បាបា អាម (Baba Amr)។ អំពើឃោរឃៅនេះបានកើតទ្បើងមួយថ្ងៃមុនពេលពួកអ្នកសង្កេតការណ៍របស់សម្ព័ន្ធអារ៉ាប់បានត្រូវកំណត់ទៅទស្សនកិច្ចទីក្រុងនេះ។ អ៊ីរ៉ាក់៖ ពួកមន្ត្រីអ៊ីរ៉ាក់បាននិយាយថា អ្នកបំផ្ទុះគ្រាប់បែកអត្តឃាតម្នាក់បានធ្វើការវាយប្រហារនៅថ្ងៃច័ន្ទនេះនៅជិតក្រសួងមហាផ្ទៃកណ្តាលរដ្ឋធានី បាកដាដ (Baghdad) បណ្តាលឱ្យមនុស្សយ៉ាងតិចណាស់៦នាក់ស្លាប់។ ពួកមន្ត្រីបាននិយាយថា មានមនុស្សរាប់សិបនាក់ផ្សេងទៀតបានត្រូវរបួស។ អាមេរិក៖ សេតវិមានបាននិយាយថា លោកអនុប្រធានាធិបតីស.រ.អ. ចូ បៃដិន (Joe Biden) បានមានប្រសាសន៍តាមទូរស័ព្ទជាមួយពួកមេដឹកនាំអ៊ីរ៉ាក់ដើម្បីជំរុញឱ្យពួកគេធ្វើការ«សន្ទនាគ្នា»ដើម្បីដោះស្រាយវិបត្តិនយោបាយមួយនៅក្នុងរដ្ឋាភិបាលបែងចែកអំណាចគ្នាដែលមិនមាំទាំរបស់ពួកគេ។ អង្គការសហប្រជាជាតិ/អ៊ីរ៉ាក់៖ អ.ស.ប. និងរដ្ឋាភិបាលអ៊ីរ៉ាក់បានចុះហត្ថលេខាលើកិច្ចព្រមព្រៀងមួយដើម្បីរកកន្លែងរស់នៅថ្មីឱ្យពួកអ្នកប្រឆាំងរដ្ឋាភិបាលអ៊ីរ៉ង់ចំនួន៣.ពាន់៤រយនាក់ដែលកំពុងតែរស់នៅក្នុងជំរុំមួយក្នុងតំបន់ឦសាននៃប្រទេសអ៊ីរ៉ាក់ស្របពេលដែលឋានៈជាជនភៀសខ្លួនរបស់ពួកគេត្រូវកំណត់រួចហើយនោះ។ កូរ៉េខាងជើង៖ នៅថ្ងៃច័ន្ទនេះកាសែតរបស់រដ្ឋនាំមុខគេរបស់ប្រទេសកូរ៉េខាងជើងបានបញ្ជាក់ថាអ្នកបន្តតំណែងពីលោក គីម ជុង អ៊ីល (Kim Jong Il) បានកាន់តំណែងជាន់ខ្ពស់មួយទៀតហើយ។ កាសែត រ៉ូដុង ស៊ីនម៉ុន (Rodong Sinmun) របស់គណបក្សកុម្មុយនិស្តបាននិយាយសំដៅទៅលើលោក គីម ជុង អ៊ុន (Kim Jong Un) ថាជាមេដឹកនាំនៃគណៈកម្មាធិការកណ្តាលរបស់គណបក្សកម្មករ ដែលជាអ្នកដឹកនាំប្រទេស។ តំណែងមួយនេះបានផ្តល់ឱ្យលោក គីម ជុង អ៊ុន នូវអំណាចលើស្ថាប័នមួយក្នុងបណ្តាស្ថាប័នជាន់ខ្ពស់សម្រាប់ធ្វើសេចក្តីសម្រេចនានារបស់ប្រទេស។ ចិន៖ តុលាការមួយក្នុងប្រទេសចិនបានកាត់ទោសលោក ជិន ស៊ី (Chen Xi) អ្នកប្រឆាំងរដ្ឋាភិបាលដ៏លិចធ្លោម្នាក់ឱ្យជាប់ពន្ធនាគារ១០ឆ្នាំពីបទញុះញង់ឱ្យមានវិទ្ធង្សនា។ នៅក្រោយការកាត់ក្តីខ្លីមួយនៅថ្ងៃច័ន្ទនេះក្នុងក្រុង Guiyan ដែលជាទីរួមខែត្រ ខ្វាងចូវ លោក ជិន បាននិយាយថា លោកគ្មានកំហុសអ្វីទេ ក៏ប៉ុន្តែលោកបានថ្លែងថាលោកនឹងមិនតវ៉ាទ្បើងឧទ្ធរណ៍ឡើយ។ លោក ជិន គឺជាបាតុករជើងចាស់មួយរូបនៃចលនាតវ៉ាឱ្យមានលទ្ធិប្រជាធិបតេយ្យក្នុងទីលាន ធៀនណាមិន (Tiananmen) កាលពីឆ្នាំ១៩៨៩។ This posting includes an audio/video/photo media file: Download Now |
| You are subscribed to email updates from VOA News: ព័ត៌មាន To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
