VOA News: ព័ត៌មាន: “កម្ពុជាប្រារព្ធពិធីបុណ្យសមុទ្រនៅពេលចូលឆ្នាំសកល ទាក់ទាញទេសចរណ៍” plus 3 more |
- កម្ពុជាប្រារព្ធពិធីបុណ្យសមុទ្រនៅពេលចូលឆ្នាំសកល ទាក់ទាញទេសចរណ៍
- អាជីវកម្មរ៉ែនៅកម្ពុជាប៉ះពាល់សង្គមនិងបរិស្ថាន
- ព័ត៌មានអន្តរជាតិវីអូអេ ៣១ ធ្នូ
- សកម្មជនខ្មែរក្រោមរិះគន់វៀតណាមពីការផ្សឹកព្រះសង្ឃខ្មែរដោយបង្ខំ
| កម្ពុជាប្រារព្ធពិធីបុណ្យសមុទ្រនៅពេលចូលឆ្នាំសកល ទាក់ទាញទេសចរណ៍ Posted: 31 Dec 2011 02:15 PM PST កម្មវិធីហែលទឹកប្រណាំងគ្នា លេងបាល់ទះ ហាត់ក្បាច់គុនគឺជាផ្នែកមួយនៃវិធីបុណ្យសមុទ្រនៅឆ្នេរក្រុងព្រះសីហនុ កាលពីថ្ងៃសៅរ៍។ បុណ្យសមុទ្រនេះធ្វើចំពេលចូលឆ្នាំសកល ក្នុង អ្នកទេសចរណ៍ខ្មែរម្នាក់គឺលោកគឹម សេរីរតន៍មកពីភ្នំពេញនិយាយថា៖ «បាទ ខ្ញុំឃើញថា សប្បាយ ព្រោះបងប្អូនយើងមកច្រើន។ គាត់មកពីគ្រប់ទិសទីទាំងអស់ តាំងពីភ្នំពេញ ខេត្តផ្សេងៗ នៅតាមតំបន់ឆ្នេរគ្រប់កន្លែង។ គាត់មកទាំងអស់ មកលេងតំបន់ឆ្នេរហ្នឹង។ អ្វីដែលសប្បាយជាងគេគឺមានអារម្មណ៍ថា កម្ពុជាយើងមានបុណ្យថ្មីមួយទៀតហើយគឺបុណ្យសមុទ្រ»។ <!--AV--> រីឯអ្នកស្រីយូ សុផាន់ណាមកពីខេត្តកំពង់ឆ្នាំបន្ថែមថា៖ «ចា៎ មកដល់ទីនេះ ខ្ញុំដឹងថា ទីនេះសប្បាយ។ ហើយសប្បាយជាងគេតែម្តង ព្រោះមានជនជាតិបរទេស ជនជាតិជាច្រើន គ្រប់បណ្តាប្រទេសទាំងអស់មកលេងនៅទីនេះ មកលេងខេត្ត ក្រុងព្រះសីហនុនេះតែម្តង»។ មានមនុស្សប្រមាណ៥ម៉ឺននាក់ចូលរួមបុណ្យសមុទ្រនេះ ដែលមានការបាញ់កាំជ្រួចជ្វាលាអបអរបុណ្យចូលឆ្នាំសកលផង។ លោកថោង ខុន រដ្ឋមន្ត្រីក្រសួងទេសចរណ៍និយាយថា៖ «អញ្ចឹងការធ្វើបុណ្យនេះ ទីមួយគឺឃោសនាការអំពីសក្តានុពលទេសចរណ៍តំបន់សមុទ។ គ្រប់ប្រទេសទាំងអស់ ក្រោយពីបានធ្វើបុណ្យឆ្នេរហើយតែងតែមានភ្ញៀវទេសចណ៍កើនឡើងយ៉ាងតិច១៥%។ ឆ្លងតាមបុណ្យនេះ យើងបំផុសស្មារតីប្រជាជន ស្ថាប័នពាក់ព័ន្ធទាំងអស់ឲ្យចូលរួមការពារ និងអភិវឌ្ឍតំបន់សមុទ្រ»។ លោករដ្ឋមន្ត្រីឲ្យដឹងថា មានអ្នកទេសចរណ៍ជាតិ៥០ម៉ឺននាក់ និងអ្នកទេសចរណ៍អន្តរជាតិ១០ម៉ឺននាក់ក្នុងមួយឆ្នាំៗបានទៅទេសចណ៍ឆ្នេរក្រុងព្រះសីហនុ។ ឆ្នេរក្រុងព្រះសីហនុត្រូវបានក្លឹបឆ្នេរពិភពលោកចាត់បញ្ចូលក្នុងចំណោមឆ្នេរល្អបំផុត។ ការអភិវឌ្ឍន៍តំបន់ឆ្នេរនៅខេត្តព្រះសីហនុមានការបណ្តេញប្រជាជនពីផ្ទះសម្បែង និងការរុះរើតូបរបស់អាជីវករជាច្រើន ដែលនាំឲ្យមានការតវ៉ារបស់ប្រជាជន និងការរិះគន់ពីអង្គការសង្គមស៊ីវិលអំពីការរំលោពសិទ្ធិមនុស្ស៕ This posting includes an audio/video/photo media file: Download Now |
| អាជីវកម្មរ៉ែនៅកម្ពុជាប៉ះពាល់សង្គមនិងបរិស្ថាន Posted: 31 Dec 2011 09:50 AM PST របាយការណ៍នៃការសិក្សាស្រាវជ្រាវមួយរបស់អង្គការការពារធនធានធម្មជាតិមួយក្រុមដែលចេញផ្សាយនៅថ្ងៃសុក្រនេះបង្ហាញថា ការធ្វើអាជីវកម្មរ៉ែនៅក្នុងប្រទេសកម្ពុជាកំពុងធ្វើឲ្យប៉ះពាល់លើបញ្ហាសង្គមនិងបរិស្ថានជាច្រើន។ របាយការណ៍ស្តីពីទំនោរបច្ចុប្បន្ននៃផលប៉ះពាល់លើសង្គមនិងបរិស្ថានពីអាជីវកម្មរ៉ែនៅកម្ពុជាដែលធ្វើការសិក្សាដោយអង្គការបណ្តាញផលប៉ះពាល់សង្គមនិងបរិស្ថាន ដោយឧស្សាហកម្មនិស្សារណកម្មដែលមានអង្គការចំនួន៥៦ជាសមាជិក បន្ថែមថា ប្រជាពលរដ្ឋកម្ពុជាទទួលរងនូវការប៉ះពាល់ផ្នែកសុខភាព ដូចជាធ្វើឲ្យមានជំងឺសើស្បែក រួមទាំងការប៉ះពាល់ដល់ចំណូលរបស់ពួកគាត់ ថែមទាំងធ្វើឲ្យខូចគុណភាពដីដែលមិនអាចបង្កបង្កើនផលផងដែរ។ ក្រុមអង្គការទាំងនេះបានធ្វើការអង្កេតរយៈពេលជាង២ឆ្នាំ គិតចាប់ពីចុងឆ្នាំ២០០៩ឆ្នាំ នៅក្នុងខេត្តចំនួនបួន គឺខេត្តរតនគីរី មណ្ឌលគីរី ព្រះវិហារ និង ស្ទឹងត្រែង ដែលសកម្មភាពធ្វើអាជីវកម្មរ៉ែកំពុងដំណើរការនៅទីនោះ។ លោកម៉ម សម្បត្តិ ជានាយកប្រតិបត្តិនៃអង្គការអភិវឌ្ឍន៍ និងភាពជាដៃគូក្នុងសកម្មភាព បានមានប្រសាសន៍ថា របាយការណ៍នេះធ្វើឡើងដើម្បីសិក្សាទៅលើគម្រោងមួយដែលជួយឲ្យយល់ដឹងកាន់តែលម្អិតពីបច្ចុប្បន្ន និងសក្តានុពលភាពហេតុប៉ះពាល់សង្គម និងបរិស្ថាន ពីការរីកដុះដាលនៃវិស័យឧស្សាហកម្មនិស្សារណកម្ម មានរ៉ែ ប្រេង និងឧស្ម័ន។ ហើយលោកស្នើឲ្យមានការចាត់វិធានការទប់ទល់នឹងផលប៉ះពាល់ពីអាជីវកម្មធនធានរ៉ែទាំងនេះ។ «បើសិនជាមិនមានវិធានការមេជាក់លាក់ណាមួយដើម្បីគ្រប់គ្រងផលប៉ះពាល់បរិស្ថានទាំងអស់នោះ ឬកាត់បន្ថយផលប៉ះពាល់បរិស្ថានទាំងអស់នោះទេ យើងធ្វើឲ្យទាំងបរិស្ថាន ទាំងសង្គមនោះមានហានិភ័យច្រើនកើតឡើងនៅក្នុងសង្គម ហើយសំខាន់ប្រទេសកម្ពុជាយើងនៅជាប្រទេសក្រីក្រ ជាពិសេសប្រជាជននៅជនបទ។ ប្រសិនបើគាត់ជួបប្រទះ រឿងជម្ងឺដង្កាត់ហើយប៉ះពាល់ទៅលើសេដ្ឋកិច្ចស្រែចម្ការរបស់គាត់ទៀត អានេះគឺជាផ្នែកមួយដែលធ្វើឲ្យស្ថានភាពក្រីក្រ វាអាចទៅជាមានកាន់តែកើនឡើង។ ដូច្នេះ រាជរដ្ឋាភិបាលត្រូវតែពិចារណា ឲ្យបានច្រើននិងខ្ពស់មែនទែនអំពីវិធានការ ជាពិសេសពិនិត្យជាក់លាក់ទៅលើផែនការមេនៃការកាត់បន្ថយហានិភ័យទៅលើបរិស្ថាន»។ របាយការណ៍ក៏បានបញ្ជាក់លម្អិតដែរថា ការសិក្សាវិភាគលើគុណភាពទឹកនៅខេត្តរតនគីរី និងមណ្ឌលគីរីនៅរដូវប្រាំងមានសារធាតុមួយចំនួនលើសពីស្តង់ដា ដូចជា ជាតិដែក Total Suspended Solid។ ចំណែកឯខេត្តស្ទឹងត្រែងនិងព្រះវិហារនៅរដូវវស្សាមានសារធាតុលើសមួយចំនួនដូចជា ដែក ស៊ីដ្យានាយ បារត Total Suspended Solid ហើយនៅរដូវប្រាំងក៏មានសារធាតុ ដែលលើសផងដែរដូចជា ដែក កាត់ម៉ូម នីកែល និងTotal Suspended Solid។ ធាតុទាំងនោះនៅពេលនេះមានការលើសតិចតួចតែប៉ុណ្ណោះ ក៏ប៉ុន្តែបើសិនជានៅពេលដែលសកម្មភាពអាជីវកម្មរុករករ៉ែមានការផុលផុស ដូច្នេះសារធាតុគីមីជាច្រើនត្រូវបានប្រើប្រាស់នៅអំឡុងពេលរុករកដែលអាចបណ្តាលឲ្យសារធាតុទាំងនោះនឹងបង្កើនបរិមាណ ហើយប្រសិនបើនៅពេលនោះមិនមានការគ្រប់គ្រងបានល្អទេ វាអាចបង្កឲ្យមានផលប៉ះពាល់ដល់សុខភាព ដូចជាជំងឺសើស្បែក រលាកក្រពះ និងធ្វើឲ្យខូចគុណភាពដីជាដើម។ ការបញ្ចេញនូវរបាយការណ៍ខាងលើធ្វើឡើងស្របពេលដែលកម្មករអណ្ដូងរ៉ែកម្ពុជាចំនួនប្រាំបីនាក់បានស្លាប់កាលពីសប្ដាហ៍កន្លងទៅនៅក្នុងខេត្តក្រចេះ។ នៅក្នុងពិធីបង្ហាញរបាយការណ៍នេះអង្គការសង្គមស៊ីវិលនិងអង្គការមិនមែនរដ្ឋាភិបាលកម្ពុជាបានសំដែងនូវការព្រួយបារម្ភផងដែរពីផលប៉ះពាល់ដែលបានរកឃើញទាំងនេះស្របពេលដែលការរុករក និងធ្វើអាជីវកម្មលើធនធានរ៉ែនៅកម្ពុជាទើបតែចាប់ផ្តើមហើយកំពុងពង្រីកសកម្មភាពកាន់តែធំឡើងៗ។ លោកស៊ាង សុលក្ខណ៍ មន្រ្តីទំនាក់ទំនងប្រចាំតំបន់អាស៊ីខាងកើត អង្គការអុកស្វាម អាមេរិក បានឲ្យដឹងថា ផលប៉ះពាល់ប្រាកដជាកើតមានឡើងនៅពេលដែលកម្ពុជាអភិវឌ្ឍវិស័យរ៉ែក្នុងកម្រិតឧស្សាហកម្ម។ «ប៉ុន្តែខ្ញុំសូមជម្រាបទៅដល់អស់លោក លោកស្រីថា ពួកយើងឥតបាននៅស្ងៀមទេ។ យើងបានរៀបចំខ្លួន ជាបន្តបន្ទាប់កន្លងមកនេះ។ យើងទាំងអស់គ្នាពិតជាអាចដឹងថា យើងមិនអាចរងចាំទាល់តែពេលបញ្ហាកើតឡើង ទើបយើងស្វែងរកដំណោះស្រាយនោះទេ។ យើងបានត្រៀមខ្លួនទុកជាមុន ហើយជាទូទៅ ប្រសិនបើយើងទទួលបរាជ័យនៅក្នុងការត្រៀមខ្លួនគឺយើងកំពុងតែត្រៀមខ្លួនដើម្បីបរាជ័យហើយ»។ ជាមួយគ្នានេះដែរលោកដាញ់ សេរី អនុប្រធាននាយកដ្ឋានវាយតម្លៃហេតុប៉ះពាល់បរិស្ថាននៃក្រសួងបរិស្ថានបានទទួលស្គាល់ថា ការអភិវឌ្ឍន៍វិស័យរ៉ែនេះអាចនឹងបង្កឲ្យមានផលប៉ះពាល់ជាច្រើនដល់បរិស្ថាន ប៉ុន្ដែរដ្ឋាភិបាលកំពុងព្យាយាមដោះស្រាយបញ្ហាដំណាលគ្នានោះផងដែរ។ «សកម្មភាពសម្រាប់វិនិយោគទាំងអស់ហ្នឹង ទាំងរ៉ែឧស្ម័ន និងប្រេងកាតតែងតែធ្វើឲ្យបាត់បង់ជីវភាពរស់នៅ មុខរបរប្រជាពលរដ្ឋ។ អញ្ចឹងនាយកដ្ឋានក៏ដូចជាក្រសួងបរិស្ថាន កំពុងតែមានផែនការរៀបចំអនុក្រឹត្យស្តីពីមូលនិធិបរិស្ថានដើម្បីយកមកស្តារបរិស្ថានគ្រោះថ្នាក់ដោយសារតែសកម្មភាពគម្រោង ក៏ដូចជាស្តារព្រៃឡើងវិញ ដាំដើមឈើឡើងវិញ ជួយផ្នែកជលផលនិងផ្នែកធនធានធម្មជាតិផ្សេងទៀត ហើយមូលនិធិសង្គម ព្រោះថា យើងជួយទៅដល់ជាជំនាញចិញ្ចឹមសត្វ ឬក៏ប្រពលវប្បកម្ម ដាំដំណាំ ឬក៏ជំនាញផ្សេងៗទៀត ដែលផ្តល់ជាកញ្ចប់ថវិកាទៅដល់សហគមន៍ដែលទទួលរងផលប៉ះពាល់»។ រហូតមកដល់ពេលនេះរដ្ឋាភិបាលកម្ពុជាបានផ្តល់អាជ្ញាបណ្ណរុករករ៉ែ និងធ្វើអាជីវកម្មរ៉ែលោហៈ រ៉ែបុកស៊ីត រ៉ែធ្យូងថ្ម រ៉ែធ្យូងភក់ និងរ៉ែផូស្វាត សរុបចំនួនប្រមានជា១២៨អាជ្ញាបណ្ណទៅឲ្យក្រុមហ៊ុនទាំងក្នុងស្រុកនិងក្រៅស្រុកចំនួនជាង៦០ក្រុមហ៊ុន ក្នុងនោះក្រុមហ៊ុនចំនួន២៤ធ្វើអាជីវកម្មរុករកប្រេងនិងឧស្ម័ន។ នេះបើតាមការអះអាងពីមន្រ្តីរបស់អង្គការការអភិវឌ្ឍន៍ និង ភាពជាដៃគូក្នុងសកម្មភាព៕ This posting includes an audio/video/photo media file: Download Now |
| ព័ត៌មានអន្តរជាតិវីអូអេ ៣១ ធ្នូ Posted: 31 Dec 2011 06:46 AM PST កូរ៉េខាងជើង៖ បានប្រកាសជាយ៉ាងឧឡារឹកនិងព្រមានកូរ៉េខាងត្បូងដែលជាគូសត្រូវរបស់ខ្លួននិងប្រទេសផ្សេងៗទៀតក្នុងពិភពលោកកាលពីថ្ងៃសុក្រថានឹងមិនមានការផ្លាស់ប្តូរនយោបាយនៅក្រោមមេដឹកនាំថ្មី គីម ជុងអ៊ុនទេ។ ភូមា៖ មានគម្រោងបោះឆ្នោតដើម្បីបំពេញអាសនៈទាំង៤៨ដែលនៅទំនេរនៅថ្ងៃទី១ ខែមេសា ដែលនឹងសាកល្បងលោកស្រីអង សានស៊ូជី មេដឹកនាំគណបក្សសម្ព័ន្ធជាតិដើម្បីលទ្ធិប្រជាធិបតេយ្យ ដែលបានចុះឈ្មោះគណបក្សសម្ព័ន្ធជាតិដើម្បីលទ្ធិប្រជាធិបតេយ្យជាគណបក្សនយោបាយជាផ្លូវការកាលពីសប្តាហ៍មុនដែលជាការត្រួសត្រាយផ្លូវសម្រាប់លោកស្រីចូលរួមក្នុងការបោះឆ្នោត។ ស៊ីរី៖ សកម្មជននិយាយថាកងទ័ពស៊ីរីបានសម្លាប់មនុស្សយ៉ាងហោចណាស់ក៏៣២នាក់ដែរកាលពីថ្ងៃសុក្រ នៅពេលដែលអ្នកឃ្លាំមើលសម្ព័ន្ធអារ៉ាប់បំពេញទស្សនៈកិច្ចទីកន្លែងកាន់តែច្រើនឡើងថែមទៀតដើម្បីពិនិត្យមើលការអនុវត្តន៍ដែលបានសន្យាដោយរដ្ឋាភិបាលដើម្បីបញ្ចប់ការបង្ក្រាបរបស់ខ្លួនលើពួកប្រឆាំង។ អ៊ីរ៉ុង៖ និយាយថាគេនឹងធ្វើការបាញ់កាំជ្រួចផ្លោងមីស៊ីលនៅថ្ងៃសៅរ៍នេះ ធ្វើជាផ្នែកមួយនៃសមយុទ្ធយោធាក្នុងឈូងសមុទ្រពែក្ស។ ការធ្វើតេស្តសាកល្បងនេះត្រូវបានលោកឧត្តមនាវីអ៊ីរ៉ង់ ម៉ាមូត មូសាវី តាមរយៈការដកស្រង់សម្តីរបស់ទីភ្នាកងារហ្វាពាក់កណ្តាលផ្លូវការនិយាយថា ជាតំណាក់ការចុងក្រោយនៃសមយុទ្ធ «ដើម្បីប្រុងប្រៀបកងទ័ពជើងទឹកក្នុងការប្រឈមមុខសត្រូវ» នៅគ្រប់ស្ថានភាពនៃសង្គ្រាម។ ប៉ាគីស្ថាន៖ មានមនុស្សយ៉ាងហោចណាស់ក៏៨នាក់ដែរបានត្រូវសម្លាប់ ហើយ១៨នាក់ទៀតបានរងរបួសដោយការផ្ទុះគ្រាប់បែកក្នុងរថយន្តក្នុងខេត្តប៉ាឡូជីស្ថាននៅប៉ាគីស្ថាន។ រុស្ស៊ី៖ ពួកមន្រ្តីនិយាយថាជាទីបញ្ចប់ពួកអ្នកពន្លត់អគ្គីភ័យបានពន្លត់អណ្តាតភ្លើងនៅលើនាវាមុជទឹកនុយក្លេអ៊ែរ ដែលបានចតដើម្បីជួសជុលនៅក្នុងតំបន់ មូម៉េន ភាគខាងជើងរុស្ស៊ី ហើយថាមិនមានធ្លាយវិទ្យុសកម្មទេ។ តែមានមនុស្សយ៉ាងហោចណាស់ក៏៧នាក់ដែរ រួមមានអ្នកពន្លត់អគ្គីភ័យផង បានត្រូវគេដឹកទៅកាន់មន្ទីរពេទ្យដោយសាការថប់ផ្សែងបន្ទាប់ពីអគ្គីភ័យបានឆេះឡើងកាលពីថ្ងៃអង្គារ។ អេស្ប៉ាញ៖ និងប្រើវិធានការណ៍ដ៏តឹងតែងថ្មីនៅឆ្នាំថ្មីនេះដោយសង្ឃឹមនឹងរាំងខ្ទប់កើនឡើងឧនភាព។ រដ្ឋាភិបាលថ្មីរបស់អេស្ប៉ាញបានប្រកាសថានឹងកាត់បន្ថយការចំណាយថ្មីចំនួន ១១,៥ពាន់លានដុល្លារកាលពីថ្ងៃសុក្រ ដោយនិយាយថាថវិកាបានស្ថិតក្នុងស្ថានភាពអាក្រក់ជាងកាលដែលរដ្ឋាភិបាលបានទទួលស្គាល់កាលពីពេលមុន។ រដ្ឋាភិបាលក៏បានប្រកាសដែរថានឹងគ្មានការតំឡើងប្រាក់ខែឲ្យអ្នករដ្ឋការនិងតំឡើងពន្ធដារក្នុងរយៈពេល២ឆ្នាំ។ ចិន៖ ឡាយ ឆាង ស៊ីង ដែលជាជនជាប់ទោសដែលចិនចង់ចាប់ខ្លួនជាយូរណាស់មកហើយ បានត្រូវគេប្រគល់ជូនរដ្ឋអាជ្ញាកាលពីថ្ងៃសុក្របន្ទាប់ពីបានសារភាពពីការរត់ពន្ធនិងសូកប៉ាន់។ លោកឡាយ បានរត់គេចខ្លួនទៅប្រទេសកាណាដានៅឆ្នាំ១៩៩៩ រហូតដល់ដើមឆ្នាំនេះបានទទួលជោគជ័យលើការធ្វើបត្យាប័ណទៅប្រទេសចិនវិញ ដោយជជែកថាលោកនឹងត្រូវគេធ្វើទារុណកម្មហើយនឹងប្រឈមមុខប្រហារជីវិត។ កាណាដាប្រាប់ឲ្យដឹងថា ខ្លួនបានទទួលការធានាពីចិនថាលោកឡាយនឹងមិនត្រូវគេកាត់ទោសទេ។ <!--AV--> This posting includes an audio/video/photo media file: Download Now |
| សកម្មជនខ្មែរក្រោមរិះគន់វៀតណាមពីការផ្សឹកព្រះសង្ឃខ្មែរដោយបង្ខំ Posted: 30 Dec 2011 04:24 PM PST មេដឹកនាំសហព័ន្ធខ្មែរក្រោមនៅសហរដ្ឋអាមេរិកនិងសកម្មជនខ្មែរក្រោមនិយាយថា ការផ្សឹកដោយបង្ខំចំពោះព្រះសង្ឃខ្មែរក្រោមមួយអង្គ ថ្មីៗនេះក្នុងប្រទេសវៀតណាម ជាការរំលោភលើសេរីភាពសាសនា។ សហព័ន្ធខ្មែរកម្ពុជាក្រោមនិងសកម្មជនខ្មែរក្រោមក្នុងប្រទេសវៀតណាមជំរុញ ឲ្យអាជ្ញាធរវៀតណាមគោរពសិទ្ធិមនុស្សនិងសិទ្ធិសាសនា ដោយនិយាយថា ការ ចាប់ផ្សឹកដោយបង្ខំចំពោះព្រះតេជគុណ លី សន ក្នុងវត្តមួយលើទឹកដីកម្ពុជាក្រោមដែលត្រួតត្រាដោយវៀតណាមភាគខាងត្បូងកាលពីខែធ្នូនោះ ជារឿងផ្ទុយនឹងច្បាប់ស្តីពីសិទ្ធិមនុស្សនិងសិទ្ធិសាសនា។ លោក ថាច់ ង៉ុកថាច់ ប្រធានសហព័ន្ធខ្មែរកម្ពុជាក្រោមមានមូលដ្ឋាននៅសហរដ្ឋអាមេរិក បានថ្លែងថា អាជ្ញាធរវៀតណាមចង់បង្រ្កាបបំបិទសិទ្ធិសេរីភាពសាសនា បំភិតបំភ័យមិនឲ្យព្រះសង្ឃខ្មែរក្រោមហ៊ានតវ៉ាពីរឿងអយុត្តិធម៌ដែលកើតឡើងហើយនិងបញ្ឃប់ពលរដ្ឋខ្មែរក្រោមមិនឲ្យជឿលើព្រះសង្ឃនិងព្រះពុទ្ធសាសនា។ លោក ថាច់ ង៉ុក ថាច់ ចាត់ទុកថា រឿងទាំងនេះជាការធ្វើផ្ទុយពីច្បាប់ដែលវៀតណាមបានចុះហត្ថលេខាទទួលស្គាល់ចំពោះមុខក្រុមប្រឹក្សាសិទ្ធិមនុស្សអ.ស.ប. កាលពីឆ្នាំ១៩៨២។ លោកថ្លែងថា៖ «តែផ្ទុយទៅវិញគឺថារដ្ឋាភិបាលយួនហ្នឹងមិនដែលបានប្រគល់សិទ្ធិឬក៏គោរព សិទ្ធិដែលខ្លួនបានទទួលស្គាល់ដើម្បីយកទៅអនុវត្តក្នុងប្រទេសវៀតណាមទេ»។ ព្រះតេជគុណ លី សន ព្រះជន្ម១៩ឆ្នាំបួសបាន៤ព្រះវស្សាក្នុងវត្តសេរីតាសេក ឃុំ វិញហាយ ស្រុកវិញចូវ ខេត្តសុកត្រាំង (ឃ្លាំង) ត្រូវអនុគណស្រុកព្រះនាម ថាច់ ហ៊ន ចាប់ផ្សឹកកាលពីពាក់កណ្តាលខែធ្នូ ក្រោយពីមានពាក្យបណ្តឹងពីស្ត្រីចំណាស់អាយុជាង៦០ឆ្នាំ គឺអ្នកស្រី ដាញ់ ធីធូ ប្តឹងពីបទប៉ុនប៉ងរំលោភសេពសន្ធវៈ។ អ្នកស្រីដាញ់ ធីធូ ស្នាក់នៅក្នុងកុដលោកដើម្បីជួយកិច្ចការវត្តខាងផ្នែកសម្អាត។ ថ្លែងប្រាប់វីអូអេសំឡេងសហរដ្ឋអាមេរិកតាមទូរស័ព្ទពីប្រទេសវៀតណាម អន្ទិតលី សន បានអះអាងថា ការចោទប្រកាន់ទាំងឡាយជាការមួលបង្កាច់។ លី សន បានពន្យល់ថាខ្លួន ពុំបានប្រព្រឹត្តដូចការចោទប្រកាន់នោះទេ ហើយព្រះចៅអធិការវត្តក៏បានដឹងឮរឿងរ៉ាវនោះដែរ ដែលថាអ្នកស្រីដាញ់ ធីធូភ័យខ្លាចហើយស្រែកពេលព្រះតេជគុណ លី សន បាននិមន្តទៅរកទឹកឆាន់រពេលយប់ក្នុងកុដលោកនោះ។ «ព្រោះអីគេធ្វើអញ្ចឹងមិនត្រូវ។ គេចោទលើមិនត្រូវដូច្នេះចង់បួសឡើងវិញដើម្បីជួយកសាងវត្ត»។ អន្ទិត លី សន ក៏ដូចជាសកម្មជនខ្មែរក្រោមម្នាក់ទៀត គឺលោក ថាច់ វីណា និង សេចក្តីប្រកាសព័ត៌មានសហព័ន្ធខ្មែរកម្ពុជាក្រោម បានដកស្រង់សំដីអ្នកស្រី ដាញ់ ធីធូមកអះអាងថា អាជ្ញាធរមូលដ្នានវៀតណាមបានបង្ខំអ្នកស្រី ដាញ់ ធីធូ ឲ្យផ្តិតមេដៃដាក់ពាក្យប្តឹងពីបទចាប់រំលោភដើម្បីឲ្យអាជ្ញាធរមានហេតុផលផ្សឹកព្រះតេជគុណ លី សន។ លោក ថាច់ វីណា បានអះអាងថា អាជ្ញាធរវៀតណាមមានការតាមដានខ្លាំងមក លើវត្តតាសេក ហើយវត្តនេះក្លាយជាគោលដៅនៃការបង្រ្កាបពីអាជ្ញាធរវៀតណាមប្រសិនបើមានបញ្ហាអ្វីមួយកើតឡើង។ «ប៉ុន្តែធ្វើនេះដើម្បីបំណងចង់កសាងបញ្ហាឲ្យបានធំ ហើយនិងបំផ្លិចបំផ្លាញកេរ្តិ៍ ឈ្មោះវត្តតាសេកក៏ដូចជាព្រះសង្ឃដែលបួសមួយចំនួនដែលមានការមិនពេញ ចិត្តពីសំណាក់រដ្ឋអំណាចវៀតណាមថ្នាក់ឃុំដែលគេធ្វើក្នុងឃុំ វិញហាយ សព្វថ្ងៃនេះ»។ ព្រះតេជគុណ ថាច់ ហន អនុគណស្រុកវិញហាយ និងជាតំណាងប្រជាពលរដ្ឋខ្មែរក្រោម ក្នុងស្រុកដដែលពុំបានឆ្លើយតបចំពោះសំណួរវីអូអេសំឡេងសហរដ្ឋអាមេរិកទេ។ ព្រះតេជគុណ ថាន់ ហន ដែលជាអ្នកផ្សឹកអន្ទិត លី សន បានសួរថាមកពីខាងណា? ហើយបានកាត់ផ្តាច់ទូរស័ព្ទភ្លាមនៅពេលឮខ្ញុំបាទទូលលោកថាមកពីវីអូអេនៅសហរដ្ឋអាមេរិក។ ការព្យាយាមទូរស័ព្ទជាច្រើនលើកភ្លាមៗបន្តទៀតត្រូវកាត់ផ្តាច់ដោយគ្មានការទទួល។ អាជ្ញាធរវៀតណាមក៏ពុំទាន់មានប្រតិកម្មតបទៅនឹងការអះអាងរបស់សហព័ន្ធខ្មែរកម្ពុជាក្រោមនិងសកម្មជនខ្មែរក្រោមនៅឡើយដែរ។ លោកថាច់ ង៉ុកថាច់នៃសហព័ន្ធខ្មែរកម្ពុជាក្រោមនៅសហរដ្ឋអាមេរិកអះអាងដែរថា ព្រះសង្ឃខ្មែរក្រោមមួយចំនួនដែលហ៊ានតវ៉ាប្រឆាំងនឹងបម្រាមវៀតណាមធ្វើកឋិនទានរយៈពេលតែមួយថ្ងៃ ជាជាងមួយខែនៅឆ្នាំ២០០៧នោះ ត្រូវបង្រ្កាប ចាប់ដាក់គុគ និងរត់ចោលស្រុក។ ព្រះតេជគុណ គីម មឿន មកពីវត្តតាសេកបាននិមន្តភៀសព្រះកាយដោយសារ ការធ្វើទុក្ខបុកម្នេញផ្នែកសាសនាទាក់ទងនឹងបាតុកម្មកឋិនទាននោះ។ បច្ចុប្បន្ន ព្រះតេជគុណកំពុងគង់ក្នុងប្រទេសស៊ុយអែត។ ប្រទេសវៀតណាមទទួលរងការរិះគន់ផ្នែកការរិតត្បិតសេរីភាពសាសនានិងការ រំលោភសិទ្ធិមនុស្សពីសហរដ្ឋអាមេរិក។ តែវៀតណាមច្រានចោលការរិះគន់និងការចោទប្រកាន់ទាំងនោះដោយចាត់ទុកថាជាការវាយតម្លៃមិនត្រឹមត្រូវ៕ This posting includes an audio/video/photo media file: Download Now |
| You are subscribed to email updates from VOA News: ព័ត៌មាន To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
