VOA News: ព័ត៌មាន: “អាស៊ានត្រូវមានសេចក្តីប្រកាសសិទ្ធិមនុស្សកម្រិតបទដ្ឋានអន្តរជាតិ” plus 3 more |
- អាស៊ានត្រូវមានសេចក្តីប្រកាសសិទ្ធិមនុស្សកម្រិតបទដ្ឋានអន្តរជាតិ
- បញ្ហាសមុទ្រចិនខាងត្បូងបន្តគ្របដណ្តប់កិច្ចប្រជុំរដ្ឋមន្ត្រីអាស៊ាន
- អាស៊ានមិនទាន់ព្រមព្រៀងគ្នាទាំងស្រុងស្តីពីជម្លោះក្នុងសមុទ្រចិនខាងត្បូង
- មេរោគពិឃាតថ្មីត្រូវបានរកឃើញនៅកម្ពុជា
| អាស៊ានត្រូវមានសេចក្តីប្រកាសសិទ្ធិមនុស្សកម្រិតបទដ្ឋានអន្តរជាតិ Posted: 10 Jul 2012 01:19 AM PDT ក្រុមមន្ត្រីសិទ្ធិមនុស្សជាតិនិងអន្តរជាតិនិយាយថា សមាគមអាស៊ានដែលកម្ពុជាជាប្រធាន ចាំបាច់ត្រូវតាក់តែងសេចក្តីព្រាង សេចក្តីប្រកាសសិទ្ធិមនុស្សរបស់ខ្លួនឲ្យមានកម្រិតបទដ្ឋានអន្តរជាតិនិងបើកទូលាយឲ្យសង្គមស៊ីវិលគ្រប់ប្រទេសចូលរួមពិភាក្សាក្នុងការតាក់តែងសេចក្តីព្រាងនេះ មុនពេលអនុម័ត។ សេចក្តីព្រាងសេចក្តីថ្លែងការណ៍សិទ្ធិមនុស្សអាស៊ាន ដែលវីអូអេទទួលបាន មានចំណុចជាច្រើន ដែលមន្ត្រីសង្គមស៊ីវិលមិនទទួលយក។ ក្នុងនោះរួមទាំងត្រង់ចំណុចគោលការណ៍ទូទៅបានបញ្ជាក់ថា៖ «ការអនុវត្តសិទ្ធិមនុស្សនិងសិទ្ធិសេរីភាពជាមូលដ្ឋានត្រូវមានកម្រិតជាក់លាក់គឺតាមតម្រូវការត្រឹមត្រូវនៃសន្តិសុខជាតិ សណ្តាប់ធ្នាប់សាធារណៈ សុខភាពមហាជន សុវត្ថិភាពសាធារណៈ សីលធម៌សាធារណៈ ក៏ដូចជាសុខមាលភាពជាទូទៅនៃពលរដ្ឋក្នុងសង្គមប្រជាធិបតេយ្យ»។ <!--AV--> ក្រុមមន្ត្រីសង្គមស៊ីវិល ដែលអះអាងថា មិនបានទទួលសេចក្តីព្រាងសេចក្តីប្រកាសសិទ្ធិមនុស្សនេះ បានចាត់ទុកថា ចំណុចទាំងនេះមានការចែងមិនច្បាស់លាស់ ដែលងាយស្រួលក្នុងការបកស្រាយ តាមការចង់បានរបស់រដ្ឋាភិបាលទាក់ទងនឹងវិស័យសិទ្ធិមនុស្ស។ មន្ត្រីសិទ្ធិមនុស្សចាត់ទុកថា ជាការខ្វះបទដ្ឋានអន្តរជាតិ។ លោកស្រី ពុង ឈីវកេក នាយិកាអង្គការសិទ្ធិមនុស្សលីកាដូក្នុងប្រទេសកម្ពុជាបានអះអាងថា៖ «វាមានចំណុចអញ្ចឹង។ យើងមិនចង់ឃើញអញ្ចឹងទេ ព្រោះអីសិទ្ធិមនុស្សនៅក្នុងពិភពលោកគេទទួលស្គាល់ទាំងអស់ហើយ»។ លោកស្រី ពុង ឈីវ កេកបានអះអាងបន្ថែមថា អាស៊ានបានរិតត្បឹតក្រុមសង្គមស៊ីវិលមិនឲ្យពិនិត្យខ្លឹមសារសេចក្តីព្រាង និងជួបប្រជុំជាមួយនឹងមន្ត្រីប្រទេសអាស៊ានទាំង១០ទេ ជាពិសេស មន្ត្រីគណកម្មការអន្តររដ្ឋាភិបាលស្តីពី សិទ្ធិមនុស្សអាស៊ានហៅកាត់ថា «អៃឆា-AICHR» ដែលតាក់តែងសេចក្តីព្រាងនេះ។ «ត្រូវតែបើកចំហ មិនត្រូវមានកម្រិតទេ។ អ្នកណាដែលចង់ចូលរួម មានសមត្ថភាពចូលទៅជជែកអី សូមមេត្តាអនុញ្ញាតឲ្យចូលទៅ ដើម្បីផ្តល់យោបល់ ដើម្បីយើងបានសេចក្តីប្រកាសមួយរបស់អាស៊ាន ជាឯកសារមួយល្អសម្រាប់ប្រជាពលរដ្ឋនៅក្នុងតំបន់អាស៊ាន»។ លោកស្រី ពុង ឈីវកេកបានអះអាងថា ប្រទេសអាស៊ានមានកេរ្តិ៍ឈ្មោះល្បីរន្ទឺលើពិភពលោក ដែលគួរធ្វើសេចក្តីថ្លែងការណ៍មួយស្របតាមស្តង់ដារអន្តរជាតិ ដូចក្នុងអ.ស.ប. និងសហភាពអឺរ៉ុប។ លោក Shiwei Ye តំណាងអចិន្ត្រៃយ៍នៃអង្គការសិទ្ធិមនុស្សក្នុងប្រទេសបារាំង ដែលមានឈ្មោះថា សហព័ន្ធអន្តរជាតិដើម្បីសិទ្ធិមនុស្ស (IFHR)។ លោកបាន ថ្លែងថា អាស៊ានមានឱកាសបង្កើតសេចក្តីថ្លែងការណ៍សិទ្ធិមនុស្ស ប្រសើរជាងគេ។ លោកថ្លែងយ៉ាងដូច្នេះដោយយោងថា ត្រូវបើកឱកាសឲ្យមានការចូលរួមពិភាក្សាពីក្រុមអង្គការសង្គមស៊ីវិល ដើម្បីចូលរួមពាក់ព័ន្ធក្នុងដំណើរការតាក់តែងសេចក្តីថ្លែងការណ៍នេះ ហើយមិនជជែកជាសម្ងាត់។ «ដូច្នេះប្រសិនបើអាស៊ានអនុម័តសេចក្តីថ្លែងការណ៍ដែលទាបជាងបទដ្ឋានសិទ្ធិមនុស្សអន្តរជាតិនោះ វាមិនអាចទទួលយកបានទេ ពីព្រោះរដ្ឋជាសមាជិកអាស៊ានដែលជាសមាជិកអ.ស.ប.ត្រូវតែអនុវត្តតាមបទដ្ឋានអប្បបរិមាទាំងនោះ»។ បណ្តាប្រទេសជាច្រើននៃសមាគមអាស៊ានមានកំណត់ត្រាសិទ្ធិមនុស្សមិនល្អដូចជាភូមា វៀតណាម កម្ពុជាជាដើម។ បញ្ហានេះត្រូវក្រុមអ្នកសង្កេតការណ៍បញ្ជាក់ថា អាស៊ានពិបាកក្នុងការពិភាក្សាបញ្ហាសិទ្ធិមនុស្ស ដោយបើកចំហដែលនាំឲ្យប៉ះពាល់ដល់កិច្ចការផ្ទៃក្នុងរបស់ប្រទេសសមាជិកមួយៗ ដែល ច្បាប់អាស៊ានហាមឃាត់។ សេចក្តីថ្លែងការណ៍ដដែលបានបញ្ជាក់ពីការទទួលខុសត្រូវប្រទេសសមាគមអាស៊ានក្នុងការគោរពសិទ្ធិមនុស្ស ធ្វើឲ្យប្រសើរ និងការពារសិទ្ធិមនុស្សជាដើម។ មន្ត្រីផ្លូវការកម្ពុជាបានអះអាងថា មេដឹកនាំសមាគមអាស៊ាន និងអនុម័តសេចក្តីថ្លែងការណ៍សិទ្ធិមនុស្សនេះនៅក្នុងកិច្ចប្រជុំកំពូលអាស៊ានក្នុងខែវិច្ឆិកាខាងមុខ បន្ទាប់ពីរដ្ឋមន្ត្រីក្រសួងការបរទេសបានត្រួតពិនិត្យរួចកាលពីម្សិលម៉ិញ។ គណកម្មការសិទ្ធិមនុស្សអាស៊ានគ្រោងនឹងបញ្ចប់សេចក្តីព្រាងចុងក្រោយនៅក្នុងខែតុលា។ រាយការណ៍ពីរដ្ឋធានីវ៉ាស៊ីនតោនខ្ញុំ ខេមរាវីអូអេ៕ This posting includes an audio/video/photo media file: Download Now |
| បញ្ហាសមុទ្រចិនខាងត្បូងបន្តគ្របដណ្តប់កិច្ចប្រជុំរដ្ឋមន្ត្រីអាស៊ាន Posted: 10 Jul 2012 12:29 AM PDT នៅពេលដែលប្រទេសកម្ពុជារៀបចំកិច្ចប្រជុំកំពូលរបស់ក្រុមមេដឹកនាំប្រទេសអាស៊ានកាលពីខែមេសា កម្ពុជាទទួលរងការចោទប្រកាន់ថា ព្យាយាមបំផ្លាញចោលការពិភាក្សាលើបញ្ហាសមុទ្រចិនខាងត្បូង។ ឥឡូវនេះប្រហែលជាមន្ត្រីអាស៊ានមានអារម្មណ៍ថា វាជាសញ្ញាបន្ទាន់មួយហើយលើបញ្ហានេះ នៅពេលដែលលោកនាយករដ្ឋមន្ត្រីហ៊ុនសែនបានថ្លែងកាលពីថ្ងៃច័ន្ទពេលបើកកិច្ចប្រជុំរដ្ឋមន្ត្រីអាស៊ានការបរទេសអាស៊ានក្នុងសប្តាហ៍នេះដោយធ្វើការសង្កត់ធ្ងន់លើសេចក្តីត្រូវការឱ្យមានការឯកភាពគ្នាមួយលើវិធីដោះស្រាយជម្លោះដែនដីនេះ។ «ការប្រតិបត្តិនៃភាគីសមុទ្រចិនខាងត្បូងរួមទាំងការធ្វើឱ្យសម្រេចបាននូវសេចក្តីព្រាងក្រមប្រតិបត្តិនៅសមុទ្រចិនខាងត្បូងផងដែរ»។ <!--AV--> សមាជិកអាស៊ាន ដែលមានប្រទេសវៀតណាម ហ្វីលីពីន ប្រ៊ុយណេ និងម៉ាឡេស៊ីសុទ្ធតែទាមទារដែនដីក្នុងសមុទ្រចិនខាងត្បូង។ ការណ៍នេះនាំឱ្យពួកគេត្រូវប្រឈមមុខគ្នាជាមួយនឹងមហាអំណាចចិនដែលបានទាមទារដែនទឹកទាំងអស់។ ប្រទេសចិននិងអាស៊ានបានចុះហត្ថលេខាលើសេចក្តីប្រកាសប្រតិបត្តិនៃភាគីពាក់ព័ន្ធក្នុងសមុទ្រចិនខាងត្បូងអស់រយៈពេលមួយទសវត្សរ៍កន្លងហើយ ដែលការណ៍សំខាន់នោះគឺពួកគេយល់ស្របគ្នាថា ពួកគេត្រូវតែដោះស្រាយបញ្ហាដោយសន្តិវិធី។ ប៉ុន្តែវាបានចំណាយពេលយ៉ាងយូរដើម្បីរកវិធីត្រូវបន្តដល់ដំណាក់កាលព្រមព្រៀងគ្នាអំពីវិធានការបន្ទាប់ នោះគឺការព្រាងក្រមប្រតិបត្តិមួយដែលនឹងណែនាំគ្រប់ភាគីទាំងអស់ក្នុងពេលដែលបញ្ហានោះបន្តទៅមុខទៀត។ លោក Carlyle Thayer អ្នកឯកទេសក្នុងកិច្ចការអាស៊ាននៃសាកលវិទ្យាល័យNew South Wales និយាយថា សប្តាហ៍នេះគឺជាពេលវេលាត្រូវធ្វើឱ្យបាន ឬក៏ត្រូវដកថយសម្រាប់ប្រទេសអាស៊ាននៅលើបញ្ហានេះ។ «ដូច្នេះមកដល់ពេលនេះគេនៅមិនទាន់ដឹងនៅឡើយថា អាស៊ានកំពុងងាកទៅទិសណាទេលើបញ្ហានេះ។ គេអាចនឹងធ្វើសម្បទានដោយរួមទាំងលើបញ្ហាដែលពិបាកចរចាជាមួយប្រទេសចិន ហើយគេអាចនឹងទម្លាក់ចោល ឬក៏សាបរលាបក្នុងរយៈយូរដូច្នេះនេះជាពេលវេលាត្រូវធ្វើ ឬក៏ដកថយ»។ លោក Pavin Chachavalpongpun អ្នកវិទ្យាសាស្រ្តនយោបាយដែលមានមូលដ្ឋាននៅសាកលវិទ្យាល័យKyotoនិយាយថាកិច្ចប្រជុំជាន់ខ្ពស់ក្នុងសប្តាហ៍នេះផ្តល់នូវវេទិការចាំបាច់សម្រាប់ប្រទេសនានាពិភាក្សាលើបញ្ហានេះ។ ប៉ុន្តែលោកមិនមានសុទិដ្ឋិនិយមថាមានការចម្រើនទៅមុខខ្លាំងណាស់ណាទេ។ «ប៉ុន្តែខ្ញុំគិតថា អាស៊ាននៅតែជាវេទិការសម្រាប់ការជជែកគ្នា ពិភាក្សាគ្នា និងជជែកគ្នាដោយគ្មានធ្វើសកម្មភាពអ្វីទាំងអស់។ បើនិយាយដោយស្មោះជាមួយលោកគឺខ្ញុំមិនមានសង្ឃឹមច្រើនទេលើការប្រជុំអាស៊ានដែលត្រូវមកដល់នេះ»។ បើទោះបីជាបញ្ហាសមុទ្រចិនខាងត្បូងត្រូវបានផ្សព្វផ្សាយច្រើនក្នុងបណ្តាញព័ត៌មាននៅមុនពេលមកដល់កិច្ចប្រជុំនាសប្តាហ៍នេះក្តី ក៏បញ្ហានេះគ្រាន់តែជាបញ្ហាមួយក្នុងចំណោមបញ្ហាផ្សេងៗទៀតនៅក្នុងរបៀបវារៈនៃកិច្ចប្រជុំ។ លោកស្រី រដ្ឋមន្ត្រីការបរទេសហ៊ីលឡារី ក្លីនតុនមានផែនការនឹងចូលរួមក្នុងសម័យប្រជុំនោះដែរ។ ក្រុមអ្នកវិភាគរំពឹងថា លោកស្រី ក្លីនតុននឹងនិយាយបន្ធូរបន្ថយដល់ការបង្វែរទិសដៅយោធារបស់អាមេរិកមកផ្តោតលើតំបន់អាស៊ីដែលទើបបានប្រកាសក្នុងពេលថ្មីៗនេះ ក្នុងគោលបំណងសម្រាលនូវអ្វីដែលគេយល់ថា ជាស្ថានការណ៍តឹងតែងជាមួយនឹងប្រទេសចិន នៅក្បែរប្រទេសចិន។ «ចំណុចសំខាន់របស់លោកស្រីគឺត្រូវងាកចេញពីបញ្ហានេះ ហើយបង្វែរការចាប់អារម្មណ៍លើផលប្រយោជន៍ទូលំទូលាយជាងមុនដែលលោកស្រីនឹងអះអាងថា សហរដ្ឋអាមេរិកមាននៅក្នុងតំបន់នេះ ហើយថា សហរដ្ឋអាមេរិកមិនមែនចេញមកដើម្បីទប់ស្កាត់ចិនទេ តែគឺមកធ្វើកិច្ចសហប្រតិបត្តិការ»។ កិច្ចប្រជុំក្នុងសប្តាហ៍នេះគ្រោងនឹងបញ្ចប់នៅថ្ងៃសុក្រ៕ ប្រែសម្រួលដោយ ម៉ែន គឹមសេង This posting includes an audio/video/photo media file: Download Now |
| អាស៊ានមិនទាន់ព្រមព្រៀងគ្នាទាំងស្រុងស្តីពីជម្លោះក្នុងសមុទ្រចិនខាងត្បូង Posted: 09 Jul 2012 06:16 PM PDT រដ្ឋមន្ត្រីការបទេសអាស៊ានខកខានក្នុងការព្រមព្រៀងគ្នាទាំងស្រុងលើក្រមប្រតិបត្តិនៅក្នុងកិច្ចប្រជុំដ៏យូរមួយនៅល្ងាចថ្ងៃច័ន្ទនេះ។ ក្រមប្រតិបត្តិនេះគឺជាផ្នែកមួយនៃគោលការណ៍សម្រាប់អនុវត្តឆ្ពោះទៅរកដំណោះស្រាយវិបត្តិជម្លោះនៅដែនសមុទ្រចិនខាងត្បូង។ ជម្លោះដណ្តើមដែនដីជាប់ពាក់ព័ន្ធជាសំខាន់ជាមួយនឹងសមាជិកអាស៊ានចំនួនពីរគឺវៀតណាម និងហ្វីលីពីន ហើយប្រឈមជាមួយនឹងប្រទេសចិន មហាអំណាចដ៏នៅតំបន់អាស៊ី។ បើទោះបីជាមានការខកខានយ៉ាងនេះក្តី លោកកៅ គឹមហ៊ួន រដ្ឋលេខាការបរទេស និងជានាំពាក្យកិច្ចប្រជុំអាស៊ានក្នុងទីក្រុងភ្នំពេញថ្លែងនៅក្នុងសន្និសីទកាសែតនៅល្ងាចនេះថា រដ្ឋមន្ត្រីការបរទេសអាស៊ានបានសម្រេចគោលដៅសំខាន់មួយចំនួននៅក្នុងបញ្ហានេះ។ «រដ្ឋមន្ត្រីការបរទេសនៅរសៀលនេះ បានអនុម័តឧបករណ៍គន្លឹះនៃក្រមប្រតិបត្តិក្នុងចំណោមប្រទេសសមាជិកអាស៊ានតែប៉ុណ្ណោះ។ ហើយចាប់ពីពេលនេះពួកគាត់ត្រូវចាប់ផ្តើមជជែកឡើងវិញជាមួយប្រទេសចិន»។ <!--AV--> កាលពីថ្ងៃអាទិត្យកន្លងទៅនេះ ក្រុមមន្ត្រីជាន់ខ្ពស់អាស៊ានបានជជែកជាមួយភាគីចិនលើក្រមប្រតិបត្តិស្តីពីជម្លោះដែនសមុទ្រចិនខាងត្បូងនេះ ហើយក្រមប្រតិបត្តិនេះត្រូវបានលើកយកមកពិភាក្សាដោយរដ្ឋមន្ត្រីការបរទេសនៃសមាគមប្រជាជាតិអាស៊ីអាគ្នេយ៍ទាំង១០ដោយស៊ីពេលយ៉ាងយូរលើសពីការគ្រោងទុក។ លោកកៅ គឹមហ៊ួន បានពន្យល់ថា ក្រុមរដ្ឋមន្ត្រីការបរទេសបានពិភាក្សាបញ្ហាជាច្រើន ជាពិសេសបញ្ហានៃប្រទេសស៊េរី បញ្ហាឧបទ្វីបកូរ៉េ និងជម្លោះដែនសមុទ្រនេះ។ យ៉ាងណាក៏ដោយលោក ដាតូ ស្រ៊ី អានីហ្វាហ៍ អាម៉ាន (Dato' Sri Anifah Hj Aman) រដ្ឋមន្ត្រីការបរទេសម៉ាឡេស៊ីនៅតែរក្សាសុទិដ្ឋនិយម។ «ខ្ញុំគិតថា វាកំពុងតែឈានទៅរកកិច្ចព្រមព្រៀង គឺជាការពិភាក្សាប្រកបទៅដោយផ្លែផ្កា ប្រកបទៅដោយភាពទន់ភ្លន់ និងប្រទេសនីមួយៗមានសិទ្ធិបញ្ចេញទស្សនរៀងៗខ្លួន»។ ដោយឡែកលោក ផាម ប៊ីញ មីញ (Pham Binh Minh) រដ្ឋមន្ត្រីការបរទេសវៀតណាម ដែលជាភាគីជម្លោះមួយដ៏តានតឹងជាមួយភាគីចិនបានអត្ថាធិប្បាយយ៉ាងខ្លីប្រាប់ក្រុមអ្នកយកព័ត៌មានថា៖ «ការប្រឹងប្រែងទាំងអស់ត្រូវតែស្ថិតនៅក្នុងគោលបំណងបង្កាមិនឲ្យមានឧបទ្ទវហេតុកើតឡើងក្នុងតំបន់សមុទ្រចិនខាងត្បូង»។ នៅថ្ងៃនេះដែរឯកអគ្គរដ្ឋទូតចិនក្នុងទីក្រុងភ្នំពេញ លោកផាន ហ្គ័ងស៊ូ (Pan Guangxue) មានប្រសាសន៍ថា ជម្លោះដែនដីនេះនឹងមិនធ្វើឲ្យប៉ះពាល់ទំនាក់ទំនងរវាងចិន និងសមាជិកអាស៊ានទេ។កិច្ចប្រជុំរដ្ឋមន្ត្រីការបរទេសអាស៊ាននៅក្នុងទីក្រុងភ្នំពេញដែលចាប់ផ្តើមបើកជាផ្លូវការនៅថ្ងៃនេះនឹងត្រូវបន្តរហូតទៅដល់ថ្ងៃទី១៣ខែកក្កដា។ This posting includes an audio/video/photo media file: Download Now |
| មេរោគពិឃាតថ្មីត្រូវបានរកឃើញនៅកម្ពុជា Posted: 09 Jul 2012 06:06 PM PDT កម្ពុជា និងអង្គការសុខភាពពិភពលោកទើបតែបានរកឃើញរោគសញ្ញាថ្មីមួយ ដែលបានសម្លាប់កុមារកម្ពុជាយ៉ាងហោចណាស់៥២នាក់ ចាប់តាំងពីជំងឺនេះបានផ្ទុះឡើងកាលពីខែមេសារហូតដល់ថ្ងៃទី៥ ខែកក្កដាកន្លងទៅនេះ។ នេះតាមការបញ្ជាក់ក្នុងសេចក្តីប្រកាសព័ត៌មានរួមគ្នារវាងក្រសួងសុខាភិបាល និងអង្គការសុខភាពពិភពលោក។ មេរោគថ្មីដែលទើបនឹងរកឃើញនេះមានឈ្មោះថា អ៊ីនធើរ៉ូ វ៉ៃរុស៧១ (Enterovirus-71) ឬអក្សរកាត់ថា EV-71 ដែលបង្កឡើងពងបែកនៅដៃជើង និងក្នុងមាត់។ មេរោគនេះត្រូវបានគេដឹងថា អាចបង្កផលវិបាកធ្ងន់ធ្ងរដល់អ្នកជំងឺ។ លោក ម៉ម ប៊ុនហេង រដ្ឋមន្ត្រីក្រសួងសុខាភិបាល និងលោកសុខ ទូច ប្រធាននាយកដ្ឋានទប់ស្កាត់ជំងឺឆ្លងរបស់ក្រសួងសុខាភិបាល មិនបានធ្វើសេចក្តីអត្ថាធិប្បាយអ្វីបន្ថែមទៀតទេ ដោយលោកគ្រាន់តែបានអះអាងថាឲ្យមើលខ្លឹមសារលម្អិតក្នុងសេចក្តីប្រកាសព័ត៌មានរូមគ្នារវាងក្រសួងសុខាភិបាល និងអង្គការសុខភាពពិភពលោក។ លោកវេជ្ជបណ្ឌិតសុខ ទូច បានបញ្ជាក់បន្ថែមទៀតថានៅក្នុងពេលនេះកម្ពុជាមិនទាន់ដឹងថាជំងឺអាថកំបាំងថ្មីនេះមានឈ្មោះអ្វីនោះទេ។ ជំងឺដ៏អាថ៌កំបាំងមួយបានផ្ទុះឡើងនៅកម្ពុជា ចាប់តាំងពីខែមេសា រហូតដល់ថ្ងៃទី៥ ខែកក្កដាដែលបានធ្វើឲ្យកុមាររងគ្រោះដោយសារតែជំងឺឡើងដល់៥៩នាក់ ក្នុងនោះមាន៥២នាក់បានស្លាប់បាត់បង់ជីវីត។ កុមារទាំងនោះមានអាយុចាប់ពី៣ខែ រហូតដល់១១ឆ្នាំ ដែលភាគច្រើនអ្នកជំងឺមានអាយុតិចជាង៣ឆ្នាំ។ លោកវេជ្ជបណ្ឌិតមួយរូបនៅក្នុងមន្ទីរពេទ្យគន្ធបុប្ផា ដែលថ្លែងនៅក្នុងលក្ខខណ្ឌសុំមិនបញ្ចេញឈ្មោះបានឲ្យដឹងថា មន្ទីរពេទ្យរបស់លោកមិនទាន់មានអ្នកឆ្លងជំងឺថ្មីមកសម្រាកព្យាបាលនៅឡើយទេ។ វត្តមានជំងឺដ៏អាថកំបាំងមួយនេះត្រូវបានរកឃើញដោយមន្ទីរពេទ្យគន្ធបុប្ផា ដែលជាមន្ទីរពេទ្យសម្បុរសធម៌មួយទទួលព្យាបាលជំងឺកុមារដែលមិនយកកំរ៉ៃ។ នេះបើតាមការបញ្ជាក់ពីក្រុមគ្រូពេទ្យនៃមន្ទីរពេទ្យនេះ។ អាការៈនៃជំងឺដ៏អាថកំបាំងនេះជាទូទៅ អ្នកជំងឺក្តៅខ្លួន ការបរិភោគអាហារថយចុះ អស់កម្លាំង ហើយភាគច្រើនឈឺបំពង់ក។ ពងបែកក្នុងមាត់ ចាប់ផ្តើមចេញមួយថ្ងៃ ឬពីរថ្ងៃក្រោយរោគសញ្ញានេះចេញ។ ដំបូងមានស្នាមក្រហម ហើយក្រោយមកស្នាមនេះក្លាយជាពងបែក និងដំបៅនៅក្នុងមាត់។ ភាគច្រើនគេឃើញមាននៅអណ្តាត អញ្ចាញ និងផ្នែកខាងក្នុងនៃថ្ពាល់។ អ្នកជំងឺអាចមានស្នាមកន្ទួលរមាស់ភាគច្រើនៅលើបាតដៃ បាតជើង គូថ និងអវៈយវៈភេទ។ អ្នកជំងឺអាចមិនមានរោគសញ្ញាអ្វីទាំងអស់ ឬមានតែស្នាមកន្ទួល ឬពងបែកនៅក្នុងមាត់។ សេចក្តីប្រកាសព័ត៌មាន របស់ក្រសួងសុខាភិបាល និងអង្គការសុខភាពពិភពលោកបានឲ្យដឹងថា ជំងឺពងបែក ដៃជើង និងក្នុងមាត់ជាជំងឺឆ្លងដែលអាចឆ្លងពីមនុស្សម្នាក់ទៅមនុស្សម្នាក់ទៀតដោយសារតែការប៉ះសំបោរ កំហាក ទឹកមាត់ ទឹករងៃ ដែលចេញពីពងបែក ឬក៏លាមកអ្នកជំងឺ។ អ្នកជំងឺអាចចម្លងដល់អ្នកដទៃបានយ៉ាងខ្លាំងបំផុតនៅក្នុងសប្តាហ៍ទី១ តែអ្នកជំងឺអាចចម្លងជំងឺនេះរហូតដល់សប្តាហ៍ក្រោយៗទៀត។ ជំងឺពងបែក ដៃជើង និងក្នុងមាត់មិនអាចចម្លងពីសត្វចិញ្ចឹម ឬសត្វដទៃទៀតឡើយ៕ This posting includes an audio/video/photo media file: Download Now |
| You are subscribed to email updates from VOA News: ព័ត៌មាន To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
