VOA News: ព័ត៌មាន: “ហេឡូវីអូអេ ២៧ កុម្ភៈ ២០១២៖ ការជំរុញការសិក្សាផ្នែកគណិតវិទ្យានៅកម្ពុជា” plus 4 more |
- ហេឡូវីអូអេ ២៧ កុម្ភៈ ២០១២៖ ការជំរុញការសិក្សាផ្នែកគណិតវិទ្យានៅកម្ពុជា
- ក្រុមប្រឹក្សាសិទ្ធិមនុស្សអ.ស.បថ្កោលទោសចំពោះការបង្ក្រាបនៅស៊ីរី
- កូរ៉េខាងជើងយល់ព្រមបញ្ឈប់ការសាកល្បងនុយក្លេអ៊ែរ៖ ហ៊ីឡារី គ្លីនតុន
- ជនជាតិថៃពីរនាក់ថាខ្លួនវង្វេងផ្លូវទើបបានចូលមកដីខ្មែរ
- រថយន្តទេសចរណ៍ក្រឡាប់សម្លាប់មនុស្សពីរនាក់និងរបួស៤៤នាក់
| ហេឡូវីអូអេ ២៧ កុម្ភៈ ២០១២៖ ការជំរុញការសិក្សាផ្នែកគណិតវិទ្យានៅកម្ពុជា Posted: 01 Mar 2012 02:29 PM PST ប្រទេសកម្ពុជា នឹងធ្វើជាម្ចាស់ផ្ទះនៃសន្និសីទអន្ដរជាតិស្តីពីការអប់រំផ្នែកគណិតវិទ្យារយៈពេលបួនថ្ងៃ គឺគិតពីថ្ងៃទី១ ដល់ថ្ងៃទី៤ មិនា ដែលមានអ្នកគណិតសាស្រ្ដមកពីប្រទេសចំនួន២៦។ សហគមអ្នកគណិតសាស្រ្តនៅកម្ពុជាសង្ឃឹមថា សន្និសិទ្ធនឹងជួយជម្រុញការរីកចម្រើនការរៀនសូត្រផ្នែកគណិតវិទ្យានៅក្នុងស្រុក។ លោកបណ្ឌិតចន្ទ័ រត្ន័ ប្រធានសហគមអ្នកគណិតវិទ្យាកម្ពុជា មានប្រសាសន៍នៅក្នុងកម្មវិធីហេឡូវីអូអេ កាលពីថ្ងៃចន្ទ័ថា«គណិតសាស្ដ្រមានសារសំខាន់ខ្លាំងណាស់សម្រាប់ការអភិវឌ្ឍប្រទេស ជាពិសេសក្នុងផ្នែកសេដ្ឋកិច្ចនិងបច្ចេកវិទ្យា»។ សូមស្តាប់សំឡេងទាំងស្រុងនៃកម្មវិធីហេឡូវីអូអេថ្ងៃទី២៧ ខែកុម្ភៈ ឆ្នាំ២០១២៖ <!--AV--> មធ្យោបាយចូលរួមពីប្រិយមិត្ត៖ ទូរស័ព្ទ ០១២ ៥១ ៥១ ៩៤ ហ្វេសប៊ុក facebook.com/voakhmer អ៊ីម៉េល hellovoa@voanews.com This posting includes an audio/video/photo media file: Download Now |
| ក្រុមប្រឹក្សាសិទ្ធិមនុស្សអ.ស.បថ្កោលទោសចំពោះការបង្ក្រាបនៅស៊ីរី Posted: 01 Mar 2012 07:50 AM PST ក្រុមប្រឹក្សាសិទ្ធិមនុស្សអ.ស.ប. បានថ្កោលទោសអ្វីដែលអង្គការនេះហៅថា ការរំលោភបំពានសិទ្ធិមនុស្សដ៏ធំធេងនិងមានលក្ខណៈជាប្រព័ន្ធ ដែលបង្កឡើងដោយរដ្ឋាភិបាលស៊ីរី ហើយអង្គការនេះបានអះអាងជាថ្មីថាត្រូវមានដំណោះស្រាយដ៏បន្ទាន់មួយចំពោះស្ថានភាពមនុស្សធម៌នៅក្នុងប្រទេសនេះ។ នៅក្នុងកិច្ចប្រជុំមួយនៅថ្ងៃព្រហស្បតិ៍នេះនៅក្រុងហ្សឺណែវ (Geneva) ក្រុមប្រឹក្សានេះបានអនុម័តសេចក្តីសម្រេចមួយដោយអំពាវនាវឲ្យរដ្ឋាភិបាលលោកប្រធានាធិបតី បាស្សា អាល់ អាសាដ (Basher al-Assad) ទប់ស្កាត់ជាបន្ទាន់នូវការរំលោភសិទ្ធិមនុស្សទាំងអស់និងការវាយប្រហារលើជនស៊ីវិល។ សេចក្តីសម្រេចនេះឆ្លុះបញ្ចាំងអំពីការស្លាប់ថ្មីៗរបស់អ្នកកាសែតស៊ីរីនិងបរទេសហើយនិងការរារាំងមិនឲ្យប្រជាជនទទួលបានការថែទាំសុខភាព។ ព័ត៌មានអន្តរជាតិសំខាន់ៗដទៃទៀត៖ <!--IMAGE-RIGHT--> កូរ៉េខាងជើង៖ ការសម្រេចចិត្តរបស់កូរ៉េខាងជើងក្នុងការផ្អាកការសាកល្បងអាវុធនុយក្លេអ៊ែររបស់ខ្លួន និងកាំជ្រួចប្រតិបត្តិការឆ្ងាយត្រូវបានស្វាគមន៍ដោយប្រុងប្រយ័ត្ននៅតំបន់អាស៊ី ជាកន្លែងដែលប្រជាជនជាច្រើននៅចាំប្រវត្តិសាស្ត្រនៃការបំភ្លេចពាក្យសន្យា។ វៀតណាម/ចិន៖ ប្រទេសវៀតណាមបានតវ៉ាប្រឆាំងនឹងប្រទេសចិន ចំពោះការរំលោភបំពានជាញឹកញាប់លើអ្នកនេសាទរបស់ខ្លួនក្នុងដែនទឹកមានជម្លោះនៅសមុទ្រចិនខាងត្បូង។ សេណេហ្គាល់៖ ប្រទេសសេណេហ្គាល់កំពុងរៀបចំការបោះឆ្នោតផ្តាច់ព្រ័ត្រជ្រើសរើសប្រធានាធិបតីរវាងគណបក្សកាន់អំណាចរបស់លោក អាប់ឌូឡាយេ វ៉ាឌី (Abdoulaye Wade) និងអតីតសម្ព័ន្ធមិត្ត លោក ម៉ាកឃី សល (Macky Sall) ក្រោយពីដឹងលទ្ធផលបឋមនៃការបោះឆ្នោតជុំទីមួយកាលពីថ្ងៃអាទិត្យ ដែលបង្ហាញថាគ្មានបេក្ខជនណាទទួលបានសំឡេងភាគច្រើននោះឡើយ។ ភូមា៖ លោក ថេន សេន (Thei Sein) ប្រធានាធិបតីប្រទេសភូមាកំពុងជំរុញឲ្យមានការអត់ធ្មត់ពេលរដ្ឋាភិបាលរបស់លោកកំពុងអនុវត្តកំណែទម្រង់ជាបន្តបន្ទាប់ ដែលបានចាប់ផ្តើមកាលពីជិតមួយឆ្នាំមុននេះ។ អ.ស.ប/អាហ្វ្រិក៖ ក្រុមប្រឹក្សាសន្តិសុខអ.ស.ប.កំពុងជំរុញឲ្យបណ្តាប្រទេសអាហ្វ្រិកខាងលិចរៀបចំសន្និសីទកំពូល ដើម្បីប្រឈមមុខនឹងសកម្មភាពចោរប្លន់តាមសមុទ្រដែលកំពុងកើតឡើងនៅតំបន់ឈូងសមុទ្រហ្គីណេ (Guinea)។ គណៈកម្មាធិការដែលមានសមាជិក១៥នាក់ នៅថ្ងៃពុធនេះបានអនុម័តជាឯកច្ឆ័ន្ទ នូវការសម្រេចមួយដែលអំពាវនាវឲ្យប្រទេសនានា និងអង្គការក្នុងតំបន់ឱ្យធ្វើយុទ្ធសាស្ត្រប្រឆាំងនឹងចោរសមុទ្រឲ្យបានទូលំទូលាយ។ តួកគី៖ មន្រ្តីតួកគីនិងបណ្តាញព័ត៌មាននិយាយថា គ្រាប់បែកមួយបានផ្ទុះនៅជិតការិយាល័យរបស់គណបក្សកាន់អំណាចក្នុងប្រទេសនេះ នៅក្រុងអ៊ីស្តានបុល (Istanbul)។ ប្រធានប៉ូលិសអ៊ីស្តានបុល ត្រូវគេស្រង់សម្តីថា មានមន្ត្រីប៉ូលិសជាច្រើនបានរងរបួសក្នុងការផ្ទុះគ្រាប់បែកនៅថ្ងៃព្រហស្បតិ៍នេះ។ អូតង់/អាហ្វហ្គានីស្ថាន៖ អង្គការអូតង់និយាយថា បុគ្គលិករបស់ខ្លួនពីរនាក់ត្រូវគេបាញ់ស្លាប់ក្នុងការវាយប្រហារមួយដែលបង្កដោយជនជាតិអាហ្វហ្គានីស្ថាន២នាក់ ដែលម្នាក់គេជឿថាជាទាហាន។ ឥណ្ឌា៖ ប៉ូលិសឥណ្ឌាបាននាំខ្លួនជនជាតិទីបេតិ៍និរទេសខ្លួនមួយក្រុម នៅពេលគេធ្វើបាតុកម្មនៅថ្ងៃព្រហស្បតិ៍នេះនៅក្រុងញូវដេលី នៅក្រៅកិច្ចប្រជុំរវាងលោក យ៉ាង ចេឈី (Yang Jiechi) រដ្ឋមន្ត្រីការបរទេសចិននិងសមភាគីរបស់លោកគឺរដ្ឋមន្ត្រីការបរទេសឥណ្ឌា។ អាហ្វ្រិកខាងត្បូង៖ គណបក្សកាន់អំណាចរបស់ប្រទេសអាហ្វ្រិកខាងត្បូងបានបណ្តេញលោក ជូលៀស ម៉ាលេម៉ា (Julius Malema) មេដឹកនាំយុវជនក្រោយពីមេដឹកនាំជាន់ខ្ពស់បានសម្រេចថា លោកមិនបានបង្ហាញការសោកស្តាយចំពោះការបែកបាក់ក្នុងសម្ព័ន្ធនេះ។ ចិន៖ អ្នកនិពន្ធជនជាតិទីបេតិ៍ដ៏ល្បីនិងរិះគន់ឥតសំចៃម្នាក់និយាយថា អាជ្ញាធរចិនបានទប់ស្កាត់មិនឲ្យអ្នកស្រីទទួលបានរង្វាន់មួយនៅផ្ទះរបស់ឯកអគ្គរដ្ឋទូតប្រទេសហូឡង់នៅក្រុងប៉េកាំងទេ។ ហ្វីលីពីន៖ ក្រុមម៉ូស្លីមបះបោរដ៏ធំបំផុតនៅប្រទេសហ្វីលីពីននិយាយថា ខ្លួនបានព្យួរការងាររបស់មេបញ្ជាការសំខាន់ៗចំនួន៣នាក់ ដែលទាក់ទងនឹងអំពើហិង្សាក្នុងខែតុលា ដែលបានសម្លាប់ទាហាន១៩នាក់ និងធ្វើឲ្យខូចកិច្ចព្រមព្រៀងបទឈប់បាញ់គ្នារយៈពេលមួយឆ្នាំ។ ទីម័រខាងកើត៖ លោកប្រធានាធិបតី ចេសេ រ៉ាមូស ហរតា (Jose Ramos-Horta) នៃប្រទេសទីម័រខាងកើត បានព្យាយាមឈរឈ្មោះធ្វើជាប្រធានាធិបតីមួយអាណត្តិទៀត។ ការព្យាយាមរបស់លោកបានរងការរិះគន់នៅថ្ងៃព្រហស្បតិ៍នេះ នៅពេលគណបក្សនយោបាយដ៏សំខាន់មួយនិយាយថា គេនឹងគាំទ្របេក្ខជនប្រឆាំងលោក។ កូរ៉េខាងត្បូង៖ សេចក្តីរាយការណ៍របស់រដ្ឋាភិបាលនិយាយថា ការនាំចេញធ្លាក់ចុះយ៉ាងខ្លាំងបានជំរុញឲ្យតុល្យភាពពាណិជ្ជកម្មរបស់ប្រទេសកូរ៉េខាងត្បូងចុះទាបដូចកាលពីខែកុម្ភៈ ក្រោយពីមានឱនភាពក្នុងខែមុននេះ។ ថៃ៖ ប៉ូលិសនៅប្រទេសថៃនិយាយថា គេបានចាប់ខ្លួនពាណិជ្ជករន័រវែស ដែលសារភាពថា បានសម្លាប់មិត្តស្រីជនជាតិថៃរបស់ខ្លួន ហើយលាក់ខ្មោចនាងរលួយក្នុងវិឡាដ៏ទំនើបរបស់ខ្លួនរយៈពេល២ឆ្នាំកន្លះ។ <!--AV--> This posting includes an audio/video/photo media file: Download Now |
| កូរ៉េខាងជើងយល់ព្រមបញ្ឈប់ការសាកល្បងនុយក្លេអ៊ែរ៖ ហ៊ីឡារី គ្លីនតុន Posted: 01 Mar 2012 01:06 AM PST សហរដ្ឋអាមេរិកនិយាយថា ប្រទេសកូរ៉េខាងជើងបានយល់ព្រមបញ្ឈប់ការបាញ់កាំជ្រួចវង់ប្រតិបត្តិការឆ្ងាយ ការសាកល្បងនុយគ្លេអ៊ែរ និងសកម្មភាពចម្រាញ់ធាតុអ៊ុយរ៉ានីញ៉ូម។ លោកស្រីរដ្ឋមន្រ្តីការបរទេស ហ៊ីឡារី គ្លីនតុន បានជម្រាបគណកម្មាធិការមួយរបស់សភាកាលពីថ្ងៃពុធថា ក្រុងព្យុងយ៉ាង បានយល់ព្រម អនុញ្ញាតឲ្យអធិការកិច្ចអន្តរជាតិ ចូលទៅបញ្ជាក់និងតាមអង្កេតមើលការបញ្ឈប់ការចម្រាញ់សារធាតុអ៊ុយរ៉ាញ៉ូម និងបញ្ជាក់ថាម៉ាស៊ីនរ៉េអាក់ទ័រនុយក្លេអ៊ែរមួយនៅក្រុងយ៉ុងព្យុងពិតជាលែងដំណើរការមែន។ លោកស្រីថ្លែងជាអាទិ៍ថា អាមេរិកនៅមានការព្រួយបារម្ភយ៉ាងខ្លាំង តែក្រោយមរណភាពរបស់លោកគីម ជុងអ៊ីល អាមេរិកសង្ឃឹមថា មេដឹកនាំថ្មីនឹងណែនាំប្រទេសទៅរកមាគ៌ាសន្តិភាព ហើយសេចក្តីប្រកាសថ្ងៃនេះជាជំហានមួយឆ្ពោះទៅរកទិសដៅត្រឹមត្រូវ។ លោកស្រី គ្លីនតុនធ្វើសេចក្តីប្រកាសនេះ ខណៈពេលដែលក្រុងវ៉ាស៊ីនតោនបន្តគាបសង្កត់ឲ្យកូរ៉េខាងជើងចាប់ផ្តើមកិច្ចចរចាពហុភាគីស្តីពីការកាត់បន្ថយគ្រឿងសព្វាវុធឡើងវិញ ដើម្បីប្តូរយកម្ហូបអាហារដែលត្រូវការជាចាំបាច់សម្រាប់ប្រទេសកុម្មុយនិស្តក្រីក្រមួយនេះ។ <!--IMAGE-LEFT--> កម្ពុជា៖ កាលពីថ្ងៃពុធម្សិលមិញនេះទីស្តីការរដ្ឋមន្រ្តីនៃប្រទេសកម្ពុជា បានធ្វើសេចក្តីស្នើរួមគ្នាដើម្បីដាក់បម្រាមនេសាទនៅក្នុងផ្នែកមួយនៃទន្លេមេគង្គ ក្នុងគោលបំណងការពារសត្វផ្សោតទឹកសាបអំបួរអ៊ីរ៉ាវ៉ាឌី។ នាយកនៃគណកម្មការពាក់កណ្តាលផ្លូវការសម្រាប់ការអភិរក្សសត្វផ្សោតទន្លេមេគង្គ លោកទូច សៀងថាណា ពោលថា ក្រសួងទេសចរណ៍ កសិកម្ម នឹងដឹកនាំក្រឹត្យមួយជូនគណរដ្ឋមន្រ្តីកម្ពុជា ដើម្បីកំណត់សកម្មភាពនេសាទនៅតាមដងទន្លេមេគង្គប្រវែង១៨០គីឡូម៉ែត្រ។ អាហ្វហ្គានីស្ថាន៖ មានមនុស្សយ៉ាងតិច៦នាក់ត្រូវរបួសក្នុងការផ្ទុះគ្រាប់បែកមួយក្នុងរថយន្ត ដែលតម្រង់ទៅរកក្បួនរថយន្តមួយរបស់កងទ័ពបរទេសនៅក្នុងអាហ្វហ្គានីស្ថានភាគខាងត្បូង។ សហរដ្ឋអាមេរិក៖ សេដ្ឋកិច្ចបានលូតលាស់លឿនជាងការគិតស្មានទុកជាងមុនបន្តិច ក្នុងពេលប៉ុន្មានខែចុងក្រោយនៃឆ្នាំ២០១១ នៅពេលដែលប្រាក់ចំណូលបានកើនឡើង ហើយសហគ្រាសបានចាប់ផ្តើមជួលកម្លាំងពលកម្មបន្ថែមទៀត។ អឺរ៉ុប៖ ធនាគារកណ្តាលនៃទ្វីបអឺរ៉ុបបានផ្តល់ប្រាក់កម្ចីចំនួន៧១២ពាន់លានដុល្លារបន្ថែមទៅឲ្យធនាគារចំនួន៨០០នៅពាសពេញអឺរ៉ុប ក្នុងកិច្ចប្រឹងប្រែងថ្មីមួយដើម្បីពង្រឹងសេដ្ឋកិច្ចទ្វីបអឺរ៉ុប ហើយជួយទ្វីបអឺរ៉ុបឲ្យងើបឡើងវិញពីវិបត្តិប្រាក់បំណុលរបស់រដ្ឋាភិបាល។ ស៊ីរី៖ កងកម្លាំងសន្តិសុខស៊ីរីបានធ្វើការវាយប្រហារមួយទៅលើទីក្រុង សហរដ្ឋអាមេរិក៖ លោកមីត រ៉មនី បេក្ខជនប្រធានាធិបតីអាមេរិកនៃគណបក្សសាធារណរដ្ឋ បានប្តូរការយកចិត្តទុកដាក់របស់លោកទៅរកការបោះឆ្នោតបឋមលើកក្រោយមួយចំនួន នៅក្រោយជ័យជំនះក្នុងរដ្ឋ មីស៊ីហ្កេន និងអារីហ្សូណា។ ចិន៖ ក្រសួងការបរទេសចិនបានចោទពួកអ្នកបំបែកខ្លួនចេញ នៅក្នុងតំបន់ជនជាតិអ៊ុយហ្គ័រ ដែលកំពុងមានចលាចលក្នុងប្រទេសចិនភាគខាងពាយ័ព្យ អំពីការវាយប្រហារលើជនស៊ីវិលក្នុងអំពើហិង្សាមួយ ដែលចិននិយាយថា បានសម្លាប់មនុស្សយ៉ាងតិច២០នាក់ រួមមានភ្នាក់ងារនគរបាលចិន៧នាក់ផងដែរ។ អាហ្វហ្គានីស្ថាន៖ មានមនុស្សយ៉ាងតិច៦នាក់ត្រូវរបួសក្នុងការផ្ទុះគ្រាប់បែកមួយក្នុងរថយន្ត ដែលតម្រង់ទៅរកក្បួនរថយន្តមួយរបស់កងទ័ពបរទេសនៅក្នុងអាហ្វហ្គានីស្ថានភាគខាងត្បូង។ <!--AV--> This posting includes an audio/video/photo media file: Download Now |
| ជនជាតិថៃពីរនាក់ថាខ្លួនវង្វេងផ្លូវទើបបានចូលមកដីខ្មែរ Posted: 29 Feb 2012 06:09 PM PST សាលាឧទ្ធរណ៍បានបើកសវនាការកាលពីថ្ងៃពុធជំនុំជម្រះទោសលើជនជាតិថៃចំនួនពីររូបដែលបានចូលមកក្នុងប្រទេសកម្ពុជាដោយខុសច្បាប់និងមានអាវុធមកជាប់នឹងខ្លួន។ បុរសទាំងពីរមានឈ្មោះលោក ភិត អនណា អាយុ៤៨ឆ្នាំ និងលោក ថង ដែងយ៉ាក់ឡា អាយុ៥២ឆ្នាំ ត្រូវបានតុលាការខេត្តព្រះវិហារកាត់ទោសកាលពីខែសីហាឆ្នាំ២០១០ក្នុងម្នាក់ៗ ឲ្យជាប់ពន្ធនាគាររយៈពេល៥ឆ្នាំ ពីបទឆ្លងដែនដោយខុសច្បាប់មកក្នុងទឹកដីប្រទេសកម្ពុជានិងប្រើប្រាស់អាវុធខុសច្បាប់ប៉ុន្តែពួកគេបានប្តឹងឧទ្ធរណ៍។ លោក ទិត សុទ្ធី តំណាងមហាអយ្យការនៃសាលាឧទ្ធរណ៍មិនបានរកភស្ថុតាងណាដើម្បីដាក់បន្ទុកជនជាប់ចោទទាំងពីរទេហើយនៅពេលធ្វើសេចក្តីសន្និដ្ឋានជាស្ថាពរបាននិយាយថា ជនជាតិថៃទាំងពីររូបដែលបានឆ្លងដែនចូលមកក្នុងប្រទេសកម្ពុជាគឺមិនមែនធ្វើឡើងដោយចេតនាទេ។ ចំណែកឯកាំភ្លើងសម្រាប់តែការបរបាញ់សត្វតែប៉ុណ្ណោះ មិនមែនសម្រាប់យកមកធ្វើសង្គ្រាមទេ។ លោកបានបញ្ជាក់ថា ប្រជាពលរដ្ឋនៅក្នុងប្រទេសជិតខាង តែងតែឆ្លងដែនទៅវិញទៅមកជារឿងធម្មតា។ បន្ទាប់ពីបានបើកសវនាការអស់រយៈពេលប្រមាណជាងពីរម៉ោង លោក ឃុន លាងម៉េង ប្រធានចៅក្រមជំនុំជម្រះនៃសាលាឧទ្ធរណ៍ បាននិយាយថាសាលដីកានៃសំណុំរឿងនេះនឹងប្រកាសនៅថ្ងៃទី៧ ខែមិនា ខាងមុខនេះ។ ការកាត់ទោសជនជាតិថៃទាំងពីររូប បានប្រព្រឹត្តធ្វើឡើងទៅតាមនីតិវិធីត្រឹមត្រូវ ហើយជនជាប់ចោទទាំងពីរ មានមេធាវីការពារក្តី និងមានអ្នកបកប្រែភាសាមកជាមួយផង។ ឆ្លើយប្រាប់អង្គសវនាការ តាមរយៈអ្នកបកប្រែជនជាតិថៃទាំងពីររូប បាននិយាយដូចៗគ្នាថា ពួកគេមិនមានបំណងចូលមកក្នុងទឹកដីប្រទេសកម្ពុជាទេ គឺដោយសារតែវង្វេងផ្លូវ។ បន្ទាប់ពីបញ្ចប់សវនាការ លោក ថង ដែងយ៉ាក់ឡា បានផ្តល់បទសម្ភាសន៍ជាមួយនឹងវីអូអេតាមរយៈអ្នកបកប្រែថា៖ «ខ្ញុំរកបាញ់សត្វនៅក្នុងព្រៃ ហើយវង្វេងផ្លូវ។ វង្វេងទៅមិនដឹងថាមកខាងណា ទៅខាងណា»។ លោក កៅ ស៊ូផា មេធាវីការពារក្តីជនជាតិថៃទាំងពីររូបបាននិយាយថា លោកសង្ឃឹមថា កូនក្តីរបស់លោក និងរួចផុតពីការចោទប្រកាន់ដោយសារតែពួកគេគ្មានបំណងចូលទឹកដីប្រទេសកម្ពុជាទេ។ «គាត់មកនេះ គាត់មករកបាញ់សត្វទេ។ ខ្ញុំយល់ឃើញថា បើសិនជាតុលាការសាលាឧទ្ធរណ៍នេះ លោកមានឆន្ទៈការរាប់អានអ្នករួមភូមិផងរបងជាមួយហ្នឹង គួរតែសម្រេចដោះលែងគាត់ទៅនៅថ្ងៃ៧ខាងមុខនេះ។ កន្លងមកការដាក់ទោសប្រាំឆ្នាំហ្នឹង វាច្រើនពេក»។ មន្ត្រីស្ថានទូតថៃមួយរូប ដែលបានចូលរួមនៅក្នុងអង្គសវនាការនេះ មិនបានធ្វើអត្ថាធិប្បាយលម្អិតដល់អ្នកសារព័ត៌មានទេ។ «នេះគឺសម្រេចទៅតាមសាលាឧទ្ធរណ៍ ខ្ញុំមិនដឹងយ៉ាងម៉េចទេ។ ខ្ញុំសុំមិនឆ្លើយតប»។ អាជ្ញាធរខ្មែរបានចាប់ខ្លួនជនជាតិថៃទាំងពីររូប កាលពីថ្ងៃទី៤ ខែឧសភា ឆ្នាំ២០១០ នៅក្នុងខេត្តព្រះវិហារ បន្ទាប់ពីបានចូលជ្រៅនៅក្នុងទឹកដីប្រទេសកម្ពុជាប្រមាណជាង៥គីឡូម៉ែត្រ ដើម្បីធ្វើការបរបាញ់សត្វ។ អាជ្ញាធរបានរឹបអូសកាំភ្លើងសម្រាប់បាញ់សត្វមួយដើម គ្រាប់សំណ អង្រឹងមួយ និងតង់ស្នាក់នៅមួយ។ លោក ចាន់ សាវ៉េត មន្ត្រីផ្នែកស៊ើបអង្កេតរបស់សមាគមសិទ្ធិមនុស្សអាដហុក បានរិះគន់ថាពលរដ្ឋកម្ពុជា ដែលបានឆ្លងដែនទៅក្នុងប្រទេសថៃ តែងតែទទួលរងការបាញ់សម្លាប់និងមួយចំនួនផ្សេងទៀតតែងតែត្រូវបានចាប់ខ្លួន ហើយខ្លះក៏មានវាសនាត្រូវបញ្ជូនមកកាន់ប្រទេសកម្ពុជាវិញ៕ This posting includes an audio/video/photo media file: Download Now |
| រថយន្តទេសចរណ៍ក្រឡាប់សម្លាប់មនុស្សពីរនាក់និងរបួស៤៤នាក់ Posted: 29 Feb 2012 04:07 PM PST យ៉ាងហោចណាស់មានទេសចរបរទេសចំនួនពីរនាក់ បានស្លាប់បាត់បង់ជីវិតរហូតមកទល់នឹងថ្ងៃពុធនេះ និងអ្នកដំណើរចំនួន៤៤ នាក់ផ្សេងទៀត ដែលភាគច្រើនជាទេសចរបរទេសបានទទួលរងរបួស នៅក្នុងគ្រោះថ្នាក់ចរាចរណ៍ដ៏អាក្រក់មួយនៅក្នុងខេត្តកោះកុង។ នេះបើយោងតាមប្រភពនានាពីមន្ដ្រីផ្លូវការរបស់កម្ពុជា។ គ្រោះថ្នាក់ដែលបានកើតឡើងកាលពីរសៀលថ្ងៃអង្គារខណៈដែលរថយន្ដក្រុងរបស់ក្រុមហ៊ុន ប៉ារ៉ាម៉ោនអង្គរ អ៊ិចប្រេស ផ្ទុកអ្នកដំណើរចំនួន ៤៦នាក់ បានក្រឡាប់បោកនឹងផ្លូវលេខ ៤៨ ត្រង់ចំណុចស្ពានតាតៃ ស្ថិតនៅចង្ងាយប្រមាណជា២០ គីឡូម៉ែត្រ ពីទីរួមខេត្តកោះកុង។ រថយន្ដបានចេញដំណើរពីខេត្តព្រះសីហនុ ឆ្ពោះទៅកាន់ខេត្តកោះកុង។ <!--AV--> លោក អ៊ុក សុផា ប្រធានការិយាល័យប៉ូលិសចរាចរណ៍ខេត្តកោះកុង បានបញ្ជាក់នៅរសៀលថ្ងៃពុធនេះថា ឧបទ្ទវហេតុកើតឡើងដោយសារការបើកបរមានល្បឿនលឿនហួសកម្រិត។ «មូលហេតុ ខ្ញុំកំពុងតែសួរចម្លើយអ្នកបើកបរ។ បើតាមពិនិត្យនៅកន្លែងកើតហេតុ គឺឡាននេះមានល្បឿនលឿន ហើយជាន់ហ្វ្រាំងទៅធ្វើឲ្យក្ដោបកង់ និងផ្ទុះកង់ពេលចុះចំណោត»។ មានជនជាតិខ្មែរចំនួនប្រាំមួយនាក់ក្នុងចំណោមជនរងគ្រោះ។ ក្រៅពីនោះគឺជាជនបរទេស ដែលមានប្រាំបួនជាតិសាសន៍ផ្សេងគ្នា គឺជនជាតិស៊ុយអែដ ហ្វាំងឡង់ ថៃ អង់គ្លេស អូទ្រីស អេស្ប៉ាញ រុស្ស៊ី ជប៉ុន និងជនជាតិអាមេរិកាំងចំនួនបីនាក់។ ស្រ្ដីជនជាតិរុស្ស៊ី អាយុ២២ឆ្នាំម្នាក់ បានស្លាប់ភ្លាមៗ នៅក្នុងគ្រោះថ្នាក់ក្រឡាប់រថយន្ដក្រុងនេះ។ រីឯក្មេងស្រីកម្ពុជាម្នាក់បានដាច់ដៃឆ្វេងត្រឹមគល់ដៃ។ ក្រុមអាជ្ញាធរបានជួយបញ្ជូនជនរងគ្រោះទៅកាន់មន្ទីរពេទ្យខេត្តកោះកុងហើយរហូតមកទល់នឹងល្ងាចនេះ នៅសល់តែជនរងគ្រោះចំនួនបីនាក់កំពុងស្ថិតក្នុងមន្ទីរពេទ្យ។ ជនរងគ្រោះមួយចំនួនបានចាកចេញទៅព្យាបាលនៅមន្ទីរពេទ្យខេត្តត្រាតប្រទេសថៃ ដែលជាខេត្តជាប់ព្រំដែនជាមួយខេត្តកោះកុង។ នេះបើផ្អែកទៅតាមសេចក្តីរាយការណ៍ពីក្រុមប៉ូលិសនិងមន្រ្ដីសុខាភិបាលខេត្ត។ លោក អ៊ុក សុផា បានឲ្យដឹងបន្ថែមថា ជនបរទេសទាំងប្រាំបួនជនជាតិនេះ បានបញ្ចប់ដំណើរទស្សនកិច្ចរបស់ខ្លួននៅក្នុងខេត្តព្រះសីហនុ ហើយត្រូវធ្វើដំណើរត្រឡប់ទៅកាន់ប្រទេសរបស់ខ្លួនវិញដោយឆ្លងកាត់ប្រទេសថៃ។ សូមបញ្ជាក់ថា អ្នកដំណើរនៅក្នុងរថយន្ដក្រុងនេះ បានទិញសំបុត្រពីក្រុមហ៊ុនដឹកអ្នកដំណើររិទ្ធិមុន្នី ហើយក្រុមហ៊ុនប៉ារ៉ាម៉ោនអង្គរ អ៊ិចប្រេស ជាអ្នកសហការផ្ដល់សេវារថយន្ដសម្រាប់ដឹកជញ្ជូន។ គេនៅមិនទាន់ដឹងនៅឡើយថា ជនរងគ្រោះនឹងទទួលបានសំណងជួសជុលបែបណានោះទេ។ លោក សំ វិចិត្រ ជំនួយការនាយកអ្នកគ្រប់គ្រងកិច្ចសហការក្រុមហ៊ុនបងប្អូនគ្នាទាំងពីរនេះ មានសាសន៍ថា ក្រុមហ៊ុនរបស់លោកបានជួលក្រុមហ៊ុនធានារ៉ាប់រងកាមីនកូ ដែលជាក្រុមហ៊ុនធានារ៉ាប់រងរបស់រដ្ឋឲ្យធ្វើការវាយតម្លៃទៅលើគ្រោះថ្នាក់នេះ។ លោកបញ្ជាក់ថា៖ «កាំមិនកូគេចុះទៅហើយ។ គេនឹងវាយតម្លៃនៅពេលក្រោយ»។ មន្ដ្រីនៃក្រុមហ៊ុនកាំមិនកូចំនួនពីររូប ដែលស្នើសុំមិនបញ្ចេញឈ្មោះបានបញ្ជាក់ថា ភ្នាក់ងាររបស់ខ្លួន កំពុងតែត្រួតពិនិត្យបញ្ហានេះនៅឡើយ ហើយមិនអាចទាន់ផ្ដល់ព័ត៌មានណាមួយនៅពេលដែលការត្រួតពិនិត្យមិនទាន់បិទបញ្ចប់នោះទេ។ លោក សន ម៉ាកគិនតូស អ្នកនាំពាក្យស្ថានទូតអាមេរិកប្រចាំក្រុងភ្នំពេញបញ្ជាក់ថា ស្ថានទូតកំពុងតាមត្រួតពិនិត្យគ្រោះថ្នាក់នេះ ហើយផ្នែកកុងស៊ុលកំពុងតែផ្ដល់ជំនួយដល់ជនជាតិរបស់ខ្លួន។ ដោយឡែកស្ថានទូតរុស្ស៊ី មិនអាចធ្វើទំនាក់ទំនងបានទេដោយសារតែទូរស័ព្ទមិនអាចសន្ទនាគ្នាបានស្រួល។ ប្រទេសកម្ពុជាទទួលបានកំណើនទេសចរបរទេសចំនួន ២,៨ លាននាក់ កាលពីឆ្នាំ ២០១១។ ហើយរថយន្ដដឹកអ្នកដំណើរក្រៅក្រុងច្រើនត្រូវគេសង្កេតឃើញថា បានបើកបរក្នុងល្បឿនជ្រុលហួសកំណត់ សម្រាប់ស្ថានភាពផ្លូវតូចចង្អៀត និងគុណភាពផ្លូវមិនល្អភាគច្រើន នៅក្នុងប្រទេសកម្ពុជាបែបនេះ។ មួយវិញទៀតក្រុមហ៊ុនដឹកជញ្ជូនមិនបានត្រួតពិនិត្យការបើកបរនៃអ្នកបើកបររបស់ខ្លួន ធ្វើត្រួតពិនិត្យប្រព័ន្ធសុវត្ថិភាព និងប្រព័ន្ធបច្ចេកទេសគ្រប់គ្រាន់ឡើយ។ លោក ប៊ុន បៀវ ប្រធានការិយាល័យទេសចរណ៍ខេត្តកោះកុង ដែលបានចុះត្រួតពិនិត្យគ្រោះថ្នាក់ក្រឡាប់រថយន្ដក្រុងដោយផ្ទាល់ហាក់ដូចជាទទួលស្គាល់លើកង្វះខាតទាំងនេះ។ «ខ្ញុំមើលហេតុដែលកើតឡើងប្រសិនបើភ្ញៀវមានបំពាក់ខ្សែក្រវ៉ាត់ក៏មិនអាចគ្រោះថ្នាក់ធ្ងន់ធ្ងរដល់កម្រិតនេះដែរ។ ឡានយើងភាគច្រើនចាស់ៗ។ ភ្ញៀវអាចធុញទ្រាន់ពេលនេះ។ មួយវិញទៀតការបើកបររបស់យើងអត់មានការប្រុងប្រយ័ត្ន។ ខ្ញុំឧស្សាហ៍ឃើញក្រុមហ៊ុនផ្សេងៗ បើកលឿនណាស់។ យើងបើកឡានតូចៗកុងទ័រ ១០០ (គីឡូម៉ែត្រក្នុងមួយម៉ោង) នៅវាវ៉ាយើងទៀត»។ ក៏ប៉ុន្ដែលោក ថោង ខុន រដ្ឋមន្ដ្រីក្រសួងទេសចរណ៍ មានប្រសាសន៍ថា គ្រោះថ្នាក់របៀបនេះមិនមែនជាឧបទ្ទវហេតុចម្លែក និងគួរឲ្យរាងចាលនោះទេ។ វាកើតមាននៅលើពិភពលោកដូចគ្នា។ ទោះជាយ៉ាងណា លោកបញ្ជាក់ថា គួរតែពង្រឹងការអនុវត្តច្បាប់ចរាចរណ៍ជាតិបន្ថែមទៀត៕ This posting includes an audio/video/photo media file: Download Now |
| You are subscribed to email updates from VOA News: ព័ត៌មាន To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
