|
- ជនប្រដាប់អាវុធសម្លាប់មនុស្ស១៨នាក់នៅលើរថយន្តដឹកអ្នកដំណើរបាគីស្ថាន
- សិស្សម្នាក់ស្លាប់និងបួននាក់របួស់នៅវិទ្យាល័យនៅអាមេរិក
- សហរដ្ឋអាមេរិកជួយកម្ចាត់ឱសថក្លែងក្លាយនៅកម្ពុជា
- អ្នកប្លុកបុរីកីឡាតវ៉ាសុំសិទ្ធិរស់នៅលើអគារថ្មី
| ជនប្រដាប់អាវុធសម្លាប់មនុស្ស១៨នាក់នៅលើរថយន្តដឹកអ្នកដំណើរបាគីស្ថាន Posted: 28 Feb 2012 07:00 AM PST មន្ដ្រីបាគីស្ថាននិយាយថា ពួកជនប្រដាប់អាវុធបានបាញ់កាំភ្លើងមកលើឡានក្រុងដឹកអ្នកដំណើរមួយនាភាគខាងជើងប្រទេសដែលបានសម្លាប់មនុស្សយ៉ាងតិច១៨នាក់។ ប៉ូលិសនិយាយថា ឡានក្រុងនោះកំពុងតែធ្វើដំណើរតាមខ្នងភ្នំនៃសង្កាត់កូហីស្ថាន (Kohistan) កាលពីព្រឹកថ្ងៃអង្គារ នៅពេលដែលមានការពួនស្ទាក់ដោយក្រុមប្រដាប់អាវុធមួយក្រុម។ មន្ដ្រីទាំងនោះនិយាយថា ការវាយប្រហារនោះ ទំនងដោយសារពួកដែលមាននិកាយផ្សេង។ ជនរងគ្រោះភាគច្រើនជាពួកអ៊ីស្លាមនិកាយស៊ីអ៊ីត (Shi'ite) ហើយឧក្រិដ្ឋជនប្រហែលជាមកពីក្រុមអ៊ីស្លាមនិកាយសុនី្ន (Sunni)។ ព័ត៌មានអន្តរជាតិសំខាន់ៗផ្សេងទៀត៖ អាមេរិក៖ បេក្ខជនប្រធានាធិបតីពីគណបក្សសាធារណរដ្ឋរបស់អាមេរិក លោក មិត រ៉មនី (Mitt Romney) កំពុងតែខិតខំចៀសវាងមិនឲ្យមានបរាជ័យក្នុងការបោះឆ្នោតបឋម នៅក្នុងរដ្ឋកំណើតរបស់លោកគឺរដ្ឋមិឈីគិន (Michigan) ដែលនៅទីនោះ លោកធ្លាប់នាំមុខគេក្នុងការស្ទង់មតិហើយជាកន្លែងដែលឪពុករបស់លោកធ្លាប់ធ្វើជាអភិបាលរដ្ឋដែលមានប្រជាប្រិយភាពម្នាក់។ ចិន/អាមេរិក៖ ក្រសួងការបរទេសចិនបានរិះគន់បេក្ខជនប្រធានាធិបតីនៃគណបក្សសាធារណរដ្ឋ លោក មីត រ៉មនី ដោយសារតែលោកបានថ្លែងអត្ថាធិប្បាយនូវអ្វី ដែលប្រទេសចិនហៅថាការរិះគន់ទៅលើចិនដោយ«ពុំមានការទទួលខុសត្រូវ»។ ថៃ៖ តុលាការនៃប្រទេសថៃបានកាត់ទោសដាក់គុក២០ឆ្នាំដល់អ្នកនយោបាយល្បីឈ្មោះដ៏ចម្រូងចម្រាសម្នាក់ក្នុងប្រទេស គឺមហាសេដ្ឋីខាងគមនាគមន៍ លោក សុងធី លិម ថុងគុល (Sondhi Limthongkul) ពីបទកេងបន្លំពន្ធដារនៃសហគ្រាស។ ភូមា៖ គណបក្សជំទាស់ដ៏ល្បីឈ្មោះនៅក្នុងប្រទេសភូមានិយាយថា ឧបសគ្គចុងក្រោយបង្អស់ នៃការឈរឈ្មោះប្រកួតតំណែងជាសមាជិករដ្ឋសភា ដោយមេដឹកនាំគណបក្ស លោកស្រី អូងសាន ស៊ូជី បានត្រូវដោះស្រាយរួច។ អ.ស.ប/ស៊ីរី៖ ទីភ្នាក់ងារសិទ្ធិមនុស្សនៃអ.ស.បនឹងជួបប្រជុំគ្នានៅក្នុងទីក្រុងហ្សឺណែវ (Geneva) ដើម្បីពិចារណាអំពីការដាក់ទណ្ឌកម្មមកលើប្រទេសស៊ីរី។ <!--IMAGE-RIGHT--> ចិន៖ ការមិនពេញចិត្ដទៅនឹងសេចក្ដីស្នើឲ្យមានការកែទម្រង់ប្រព័ន្ធសេដ្ឋកិច្ចនៅក្នុងប្រទេសចិន បានសែ្តងឡើងជាសាធារណៈកាលពីថ្ងៃអង្គារនៅពេលដែលបាតុករប្រកបដោយហិង្សាម្នាក់បានស្រែករំខានដល់សន្និសីទកាសែតរបស់ប្រធានធនាគារពិភពលោក លោក រូបឺត ហ្សូអេលីក (Robert Zoellick)។ ចិន៖ បណ្ដាញព័ត៌មានរដ្ឋរបស់ចិនបានត្អូញត្អែរចំពោះបរាជ័យរបស់ភាពយន្ដចិនដែលមានមហិច្ឆិតាបំផុត ដែលមិនបានជាប់ក្នុងបញ្ជីភាពយន្ដឆ្នើម (Academy Awards) ក្នុងឆ្នាំនេះ។ ជប៉ុន៖ ការសិក្សាថ្មីមូយបានរកឃើញថាមានការភ័យខ្លាចធំធេងនិងការភាន់ច្រឡំក្នុងចំណោមមន្ដ្រីដឹកនាំប្រទេសជប៉ុនរាប់សិបថ្ងៃមកហើយ ក្រោយពីមានមហន្ដរាយរលកយក្សស៊ូណាមីមួយដែលធ្វើឲ្យខូចខាតដល់រោងចក្រនុយក្លេអ៊ែរហ្វូគូសីម៉ា (Fukushima) កាលពីឆ្នាំមុន។ អ៊ីស្រាអែល៖ កងកម្លាំងអ៊ីស្រាអែលបានបាញ់សម្លាប់ជនប្រដាប់អាវុធម្នាក់ដែលត្រូវបានចោទថាបានឆ្លងព្រំដែនជាប់ជាមួយអេហ្ស៊ីបដោយខុសច្បាប់ចូលទៅក្នុងឧបទ្វីបស៊ីណៃ(Sinai) របស់អេហ្ស៊ីប។ ស៊ូដង់៖ ស៊ូដង់បានស្នើដល់ប្រទេសចិនឲ្យជួយដោះស្រាយជម្លោះដ៏យូរអង្វែងមួយអំពីប្រាក់ចំណូលពីប្រេងកាតជាមួយប្រទេសស៊ូដង់ខាងត្បូង ដែលទើបតែទទួលបានឯករាជ្យថ្មីៗនេះ នៅពេលដែលស៊ូដង់ខាងត្បូងនោះនិយាយថាខ្លួនកំពុងតែស្វែងរកប្រភពប្រាក់ចំណូលដទៃផ្សេងទៀត។ This posting includes an audio/video/photo media file: Download Now |
| សិស្សម្នាក់ស្លាប់និងបួននាក់របួស់នៅវិទ្យាល័យនៅអាមេរិក Posted: 27 Feb 2012 08:06 PM PST សហរដ្ឋអាមេរិក៖ សិស្សម្នាក់ត្រូវបានជនប្រដាប់អាវុធម្នាក់ ដែលជាសិស្សដូចគ្នា បាញ់សម្លាប់ ហើយ៤នាក់ទៀតបានរងរបួស។ ប៉ូលីសក្នុងសង្កាត់និយាយថា ការបាញ់ប្រហារបានកើតមានឡើងនៅកន្លែងលក់ម្ហូបអាហារនៅសាលារៀន មុនពេលដែលបើកថ្នាក់រៀននៅវិទ្យាល័យឆាដុន Chardon ដែលស្ថិតនៅចម្ងាយប្រហែល៥០គីឡូម៉ែត្រខាងកើតទីក្រុងក្លេវឹលេន Cleveland។ អនុប្រធានប៉ូលីសនិយាយថា ជនសង្ស័យនោះកំពុងស្ថិតនៅក្រោមការឃុំឃាំង។ បណ្តាសិស្សដែលត្រូវរបួសនោះបានត្រូវគេដឹកទៅកាន់មន្ទីរពេទ្យ២កន្លែង តែសិស្សម្នាក់ក្រោយមកបានស្លាប់។ គេមិនមានព័ត៌មានអំពីស្ថានភាពរបស់សិស្ស៤នាក់ទៀតទេ។ <!--IMAGE-LEFT--> សហរដ្ឋអាមេរិក៖ លោកប្រធានាធិបតីសហរដ្ឋអាមេរិកបារ៉ាក់ អូបាម៉ា កំពុងជំរុញឲ្យរដ្ឋនានាធ្វើការវិនិយោគទុនកាន់តែច្រើនឡើងថែមទៀតនៅក្នុងវិស័យអប់រំ ដោយលោកមានប្រសាសន៍ថាវាជាគន្លឹះដើម្បីធ្វើឲ្យប្រទេសអាមេរិកប្រកួតប្រជែងនៅក្នុងពិភពលោក។ នៅឯសេតវិមានកាលពីថ្ងៃច័ន្ទ លោកអូបាម៉ា និយាយថា ការសិក្សាអប់រំជាកត្តាដែលនាំអោយមានឥទ្ធិពលលើសេដ្ឋកិច្ចជាងគេ។ លោកប្រធានាធិបតី បានថ្លែងដូច្នេះទៅកាន់អភិបាលរដ្ឋដែលបានជួបប្រជុំក្នុងរដ្ឋធានីវ៉ាស៊ីនតោនWashington។ លោកប្រធានាធិបតីបានមានប្រសាសន៍ថា ប្រទេសនានាដែលមានកម្លាំងពលកម្មដែលទទួលបានការសិក្សាបានល្អប្រសើរ នឹងប្រជែងឈ្នះសហរដ្ឋអាមេរិក។ ឥណ្ឌូនេស៊ី៖ តុលាការកំពូលប្រទេសឥណ្ឌូណេស៊ី បានធ្វើឲ្យដូចដើមនូវដីកាកាត់ទោសឲ្យជាប់ពន្ធនាគារ១៥ឆ្នាំដល់បព្វជិតជ្រុលនិយមអ៊ីស្លាមដែលបានជាប់ទាក់ទិននិងការបំផ្ទុះគ្រាប់បែកនៅលើកោះបាលីដ៏ប្រល័យក្នុងឆ្នាំ២០០២ ហើយបានកាត់ឲ្យជាប់ទោសពីការបង្កើតជំរុំហ្វឹកហ្វឺនភេរវកម្មនៅក្នុងប្រទេសភាគខាងលិច។ កូរ៉េខាងត្បូង៖ និងសហរដ្ឋអាមេរិកបានចាប់ផ្តើមសមយុទ្ធយោធារួមប្រចាំឆ្នាំរបស់ខ្លួនកាលពីថ្ងៃច័ន្ទ ទោះបីមានការគម្រាមកំហែងពីប្រទេសកូរ៉េខាងជើងកាលពីសប្តាហ៍មុនថាខ្លួននឹងចាប់ផ្តើមសង្គ្រាម បើទឹកដីរបស់ខ្លួនត្រូវបានគេរំលោភនោះ។ អាហ្វហ្គានីស្ថាន៖ មន្រ្តីក្រសួងការពារប្រទេសសហរដ្ឋអាមេរិក កំពុងផ្តោតលើការបន្តកិច្ចប្រតិបត្តិការរួមគ្នាជាមួយកងកម្លាំងសន្តិសុខអាហ្វហ្គានីស្ថាន ទោះបីមានការប្រឆាំងតវ៉ានិងការវាយប្រហាររយៈពេលប៉ុន្មានថ្ងៃទៅលើកងទ័ពបរទេសដែលបានធ្វើឲ្យមនុស្សជិត៤០នាក់ស្លាប់ក្នុងនោះមានជនជាតិអាមេរិកាំង៤នាក់ផងដែរ។ ស៊ីរី៖ ពួកសកម្មជននិយាយថាកងទ័ពស៊ីរីបានសម្លាប់មនុស្ស១០នាក់កាលពីថ្ងៃច័ន្ទម្សិលម៉ិញ នៅពេលដែលរដ្ឋាភិបាលបានប្រកាសថាពួកអ្នកបោះឆ្នោតស៊ីរីបានបោះឆ្នោតដ៏ច្រើនលើសលុបគាំទ្ររដ្ឋធម្មនុញ្ញថ្មីដែលមេដឹកនាំស៊ីរីចាត់ទុកជាជំហានមួយឆ្ពោះទៅកាន់ប្រជាធិបតេយ្យភាវូបនីយកម្ម។ ភូមា៖ និយាយថាខ្លួនបានចុះហត្ថលេខាលើកិច្ចព្រមព្រៀងបឋមជាមួយជនជាតិភាគតិចបំបែករដ្ឋមន នៅក្នុងតំបន់ភាគអាគ្នេយ៍នៃប្រទេស ដែលជាកិច្ចព្រមព្រៀងថ្មីបំផុតក្នុងគោលបំណងបញ្ចប់ជម្លោះខាងជនជាតិភាគតិចអស់រាប់ទសវត្សរ៍មកហើយនៅក្នុងប្រទេសនោះ។ កាសែតរបស់រដ្ឋាភិបាលឈ្មោះ New Light of Myanmar បានហៅកិច្ចព្រមព្រៀងនៅថ្ងៃច័ន្ទនោះថាជាជោគជ័យដែលមានគោលបំណងបើកការពិភាក្សាខាងនយោបាយលើបញ្ហានានារួមមានការសិក្សាអប់រំ ការថែទាំសុខភាពហើយនឹងការដោះលែងអ្នកទោសនយោបាយ។ <!--AV--> This posting includes an audio/video/photo media file: Download Now |
| សហរដ្ឋអាមេរិកជួយកម្ចាត់ឱសថក្លែងក្លាយនៅកម្ពុជា Posted: 27 Feb 2012 06:29 PM PST «ឱសថក្លែងក្លាយអន្ដរាយដល់ជីវិត ឱសថពិតជីវិតរស់រាន» នេះគឺជាសារដ៏សំខាន់នៅក្នុងប័ណ្ណប្រកាសដែលនឹងត្រូវចែកចាយនៅទូទាំងប្រទេសកម្ពុជានៅក្នុងយុទ្ធនាការលើកកម្ពស់ការយល់ដឹងស្ដីពីគ្រោះថ្នាក់នៃឱសថខូចគុណភាព និងឱសថក្លែងក្លាយ។ យុទ្ធនាការនេះបានចាប់ផ្ដើមនៅថ្ងៃច័ន្ទក្រោមការជួយឧបត្ថម្ភពីរដ្ឋាភិបាលសហរដ្ឋអាមេរិក។ លោក ដេវីដ រីឆែលសូហ្វ (David Richelsoph) អនុប្រធានបេសកម្មស្ដីទីស្ថានទូតអាមេរិកក្នុងក្រុងភ្នំពេញ មានប្រសាសន៍ក្នុងពិធីប្រកាសបើកយុទ្ធនាការនេះថា គឺជាផ្នែកមួយនៃការគាំទ្រភាពជាដៃគូរបស់សហរដ្ឋអាមេរិកក្នុងការរួមចំណែកលើកកម្ពស់កម្មវិធីអប់រំសុខភាពក្នុងប្រទេសនៃតំបន់មេគង្គក្រោមដូចជាប្រទេសកម្ពុជា វៀតណាម ឡាវ និងប្រទេសថៃ។ លោក រីឆែលសូហ្វ មានប្រសាសាន៍តាមរយៈអ្នកបកប្រែផ្លូវការថា ឱសថក្លែងក្លាយ និងឱសថ ដែលខូចគុណភាពបានគំរាមកំហែងដល់សុខភាពអ្នកប្រើប្រាស់។ «ការក្លែងក្លាយឱសថបានធ្វើឲ្យប្រជាពលរដ្ឋបាត់បង់ជំនឿទុកចិត្ត។ ការបន្លំផលិតផលឱសថនិងការលួចផលិតឱសថក្លែងបន្លំ ដើម្បីចែកចាយក្នុងទីផ្សារងងឹតគឺជាការគំរាមកំហែងដោយផ្ទាល់ដល់សុខភាពសាធារណៈ។ ឱសថក្លែងក្លាយ អាចមានសារធាតុសកម្មមិនត្រឹមត្រូវ។ សារធាតុទាំងនោះ អាចមានចំនួនច្រើនជ្រុល តិចជ្រុល និងអាចមានសារធាតុពុលផងដែរ។ ឱសថទាំងនោះក៏អាចបង្កើននូវភាពស៊ាំ។ សហរដ្ឋអាមេរិកមានការប្ដេជ្ញាចិត្តយ៉ាងជ្រាលជ្រៅក្នុងការលើកកម្ពស់សុវត្ថិភាពក្នុងការផ្គត់ផ្គង់ឱសថនៅកម្ពុជា។ យុទ្ធនាការសាធារណៈលើកនេះ នឹងចូលរួមក្នុងការប្រយុទ្ធប្រឆាំងជារួមដើម្បីឈានទៅលុបបំបាត់ឱសថដែលមានគ្រោះថ្នាក់ និងគ្មានសុវត្ថិភាព ព្រមទាំងធ្វើឲ្យប្រសើរឡើងនូវគុណភាព និងភាពស័ក្ដិសិទ្ធិ នៃគ្រប់ផលិតផលទាំងឡាយដែលនឹងប្រើប្រាស់ដោយមិត្តភក្ដិគ្រួសារ និងអ្នកជិតខាងរបស់យើង»។ លោក ជូ យិនស៊ីម រដ្ឋលេខាធិការក្រសួងសុខាភិបាល ដែលធ្វើជាអធិបតីក្នុងពិធីប្រកាសបើកយុទ្ធនាការនេះក្នុងស្ថានទូតអាមេរិកក្រុងភ្នំពេញបានឲ្យដឹងថា ប័ណ្ណប្រកាសចំនួន ២០.០០០ ដំបូង នឹងត្រូវចែកចាយតាមមន្ទីរពេទ្យសាធារណៈ មណ្ឌលសុខភាព និងតាមឱសថស្ថាននានានៅទូទាំងប្រទេស។ ហើយការចែកចាយនឹងធ្វើឡើងក្នុងរយៈពេលពីរសប្តាហ៍។ លោក ជូ យិនស៊ីម មានប្រសាសន៍ថា នេះគឺជាយុទ្ធនាការទ្រង់ទ្រាយធំមួយដែលគាំទ្រដោយរដ្ឋាភិបាលសហរដ្ឋអាមេរិក។ «ប្រជាពលរដ្ឋគ្រាន់តែក្រឡេកឃើញសារនេះ យល់ហើយថា ប្រសិនបើគាត់ប្រើឱសថក្លែងក្លាយ គឺគាត់នឹងមានគ្រោះថ្នាក់ បើគាត់ប្រើឱសថពិត នឹងឲ្យរស់រាន មានជីវិត។ ហើយនេះគឺជាគឺជាយុទ្ធនាការទ្រង់ទ្រាយធំ ដែលយើងសហការជាមួយសហរដ្ឋអាមេរិក»។ ប្រទេសកម្ពុជាត្រូវគេមើលឃើញថា គឺជាប្រទេសក្រីក្រមួយ ដែលការអនុវត្តវិធានការនានារួមទាំងការអនុវត្តច្បាប់នៅមានភាពទន់ខ្សោយ និងធូររលុង។ ការលក់ដូរថ្នាំពេទ្យជាពិសេសនៅតាមតំបន់ជនបទច្រើនតែធ្វើឡើងលាយឡំជាមួយនឹងការលក់គ្រឿងទេស។ ហើយឱសថទាំងនេះ ពុំមានការត្រួតពិនិត្យដិតដល់ពីប្រភពនិងការត្រួតពិនិត្យទៅលើការថែទាំ និងការរក្សាទុកឲ្យបានត្រឹមត្រូវឡើយ។ យ៉ាងណាក៏ដោយលោករដ្ឋលេខាធិការក្រសួងសុខាភិបាល ជូ យិនស៊ីម បានអះអាងថា ប្រទេសកម្ពុជា បានទទួលជោគជ័យក្នុងការបោសសម្អាតការចរាចរណ៍និងការលក់ដូរឱសថក្លែងក្លាយ។ ជាក់ស្ដែងអត្រានៃឱសថក្លែងក្លាយនៅលើទីផ្សារបានធ្លាក់ចុះពីកម្រិត ០,៥ភាគរយនៅឆ្នាំ ២០១០ មកត្រឹមកម្រិត ០,១៨ភាគរយនៅឆ្នាំ ២០១១។ ប៉ុន្ដែលោកទទួលស្គាល់ថា ឱសថក្លែងក្លាយ ដែលបានរកឃើញមានក្នុងចំណោមឱសថសម្រាប់ព្យាបាលជំងឺរបេង និងជំងឺគ្រុនចាញ់។ ហើយការប្រើប្រាស់ឱសថក្លែងក្លាយនេះ មិនត្រឹមតែមិនមានប្រសិទ្ធភាពក្នុងការព្យាបាលប៉ុណ្ណោះទេ ក៏ប៉ុន្ដែវានឹងអាចបណ្ដាលឲ្យមានគ្រោះថ្នាក់ដល់អាយុជីវិតទៀតផង៕ This posting includes an audio/video/photo media file: Download Now |
| អ្នកប្លុកបុរីកីឡាតវ៉ាសុំសិទ្ធិរស់នៅលើអគារថ្មី Posted: 27 Feb 2012 05:22 PM PST នៅក្បែរអគារដែលកំពុងសាងសង់ចំនួនពីររបស់ក្រុមហ៊ុនផានអ៊ីម៉ិច ក្រុមអ្នកភូមិបុរីកីឡាប្រមាណ៥០នាក់ ដែលនៅសេសសល់ពីការបណ្តេញចេញដោយបង្ខំ បានប្រមូលផ្តុំគ្នាតវ៉ាសារជាថ្មីម្តងទៀត ដើម្បីឲ្យក្រុមហ៊ុនផ្តល់ទីជម្រកដល់ពួកគេឲ្យបានរស់នៅក្នុងអគារ ដែលទើបនឹងបានសាងសង់ថ្មីនេះ។ ក្រុមអ្នកតវ៉ាដែលក្នុងនោះមានកុមារតូចៗផងដែរ បានឈរកាន់បដា ដែលបានទាមទារឲ្យក្រុមហ៊ុនផ្តល់ដំណោះស្រាយទីជម្រកដល់ពួកគេ និងកាន់រូបព្រះឆាយាលក្ខសម្តេចឪ សម្តេចម៉ែ និងព្រះមហាក្សត្រ ព្រមទាំងរូបថតលោកនាយករដ្ឋមន្ត្រី ហ៊ុន សែន និងភរិយារបស់លោក។ ក្រុមបាតុករបានស្រែកថា៖ «សុំឲ្យក្រុមហ៊ុនមកជួបប្រជាពលរដ្ឋដើម្បីដោះស្រាយ»។ បន្ទាប់ពីឈរស្រែកតវ៉ាពុំមានដំណោះស្រាយ ក្រុមប្រជាពលរដ្ឋបានសម្រេចបិទកំណត់ផ្លូវ២១១ ដែលមានទីតាំងនៅក្នុងសង្កាត់វាលវង់ ខណ្ឌ៧មករា។ ការបិទផ្លូវនេះ ពុំមានសមត្ថកិច្ចមករារាំង និងហាមឃាត់ទេ។ រយៈពេលមួយម៉ោងក្រោយមក ក្រុមប្រជាពលរដ្ឋបានសម្រេចបើកផ្លូវឲ្យចរាចរណ៍ឡើងវិញ។ អ្នកស្រី អាត់ សំណាង អាយុ២៧ឆ្នាំ បានឈរយំបង្ហូរទឹកភ្នែកនៅកណ្តាលហ្វូងក្រុមបាតុករ ដែលកំពុងឈរស្រែកទាមទារនៅក្បែរអគារក្រុមហ៊ុនផានអ៊ីម៉ិច។ អ្នកស្រីបាននិយាយទៀតថា យើងមានឯកសារគ្រប់គ្រាន់ហើយក៏ប៉ុន្តក្រុមហ៊ុនមិនអនុញ្ញាតឲ្យសា្នក់នៅអគារដែលទើបនឹងសាងសង់ថ្មីនោះទេ គឺឲ្យពួកគេទៅរស់នៅតំបន់ភ្នំបាត។ «ខ្ញុំចង់បានផ្ទះដូចគេ នៅបុរីកីឡាហ្នឹងដែរ។ ចំណែកពីរអគារហ្នឹង ខ្ញុំត្រូវមានឈ្មោះឡើង។ ហេតុអ្វីបានជាឲ្យខ្ញុំទៅរស់នៅភ្នំបាត ហើយគាត់ថាក្រុមហ៊ុនហ្នឹងក្ស័យទុន។ បើក្ស័យទុន អញ្ចឹងសុំឲ្យដីខ្ញុំមកវិញ។ ខ្ញុំសុខចិត្តសាងសង់ខ្លួនឯង»។ អ្នកស្រី ស៊ុយ ស៊ីផាន ប្រធានក្រុមហ៊ុនផានអ៊ីម៉ិច បានថ្លែងប្រាប់វីអូអេសំឡេងសហរដ្ឋអាមេរិក នៅថ្ងៃច័ន្ទនេះតាមរយៈទូរស័ព្ទថា ក្រុមប្រជាពលរដ្ឋដែលឈរស្រែកតវ៉ានៅថ្ងៃច័ន្ទនេះ មិនមានឯកសារត្រឹមត្រូវទេ ទើបក្រុមហ៊ុនមិនផ្តល់ផ្ទះសម្បែងដល់ពួកគេ។ អ្នកស្រីបាននិយាយទៀតថា អ្នកដែលនៅសេសសល់ មានចំនួនតែ១០គ្រួសារតែប៉ុណ្ណោះ។ ក៏ប៉ុន្តែបើពួកគេយល់ព្រម ពួកគេនឹងទទួលបានដីមួយឡូ នៅតំបន់ភ្នំបាត ឬនៅតំបន់ទួលសម្បូរណ៍សម្រាប់អ្នកដែលនៅសេសសល់ចុងក្រោយ។ «ឯកសារនិងលក្ខណៈសម្បត្តិគ្រប់គ្រាន់ក្រុមហ៊ុននិងអាជ្ញាធរបានផ្តល់ជូនហើយ។ អ្នកដែលតវ៉ាព្រឹកម៉ិញហ្នឹង គឺសុទ្ធតែជាអ្នកដែលឥតមានឯកសារគ្រប់គ្រាន់ទី១។ ទី២ គាត់បានផ្ទះហើយ គាត់លក់ផ្ទះហើយមកនៅតវ៉ាទៀត។ ចំពោះប្រជាជនដែលមានលក្ខណៈសម្បត្តិគ្រប់គ្រាន់ហ្នឹងឥតខ្វះទេ»។ កាលពីថ្ងៃទី៣ ខែមករា ក្រុមហ៊ុនផានអ៊ីម៉ិចរបស់អ្នកស្រីស៊ុយ ស៊ីផាន បានដឹកនាំកម្លាំងសមត្ថកិច្ចចម្រុះច្រើនរាប់រយនាក់ប្រដាប់ដោយអាវុធ ខែល និងដំបងឆក់ ឧស័្មនបង្ហូរទឹកភ្នែក និងរថយន្តបាញ់ទឹក បានមកបណ្តេញប្រជាពលរដ្ឋដោយបង្ខំចេញពីសហគមន៍បុរីកីឡា លាយឡំជាមួយនឹងការបង្ហូរឈាម។ ការបណ្តេញប្រជាពលរដ្ឋដោយបង្ខំនោះ បានធ្វើឲ្យប្រជាពលរដ្ឋមួយចំនួនធំគ្មានទីជម្រក ហើយធ្វើការតវ៉ារហូតមកដល់សព្វថ្ងៃនេះ និងមួយចំនួនទៀត ត្រូវក្រុមហ៊ុនដឹកជញ្ជូនទៅរស់នៅតំបន់ភ្នំបាត ដែលមានទីតាំងឋិតនៅក្នុងស្រុកឧត្តុង ខេត្តកំពង់ស្ពឺ និងមួយចំនួនទៀតទៅរស់នៅតំបន់ទួលសម្បូរណ៍ជាយទីក្រុងភ្នំពេញ៕ This posting includes an audio/video/photo media file: Download Now |
| You are subscribed to email updates from VOA News: ព័ត៌មាន To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
