Koh Santipheap Daily |
- ឃ្លាំងគ្រាប់របស់ស្នងការនគរបាលខេត្តស្ទឹងត្រែងបានផ្ទុះកក្រើកផ្អើលមនុស្សភ័យរន្ធត់
- សម្តេចនាយករដ្ឋមន្រ្តីប្រកាសកាត់បន្ថយការប្រើប្រាស់រថយន្តស៊ីរ៉ែនរបស់មន្រ្តីជាន់ខ្ពស់
- អគ្គីភ័យលេបត្របាក់លំនៅឋានអ្នកក្រីក្រឆៀងខាងលិចក្រោយផ្សារពោធិ៍ចិនតុង
- ប៊ិះបាញ់គ្នាភ្ជង់ទៅភ្ជង់មកដោយសារទាហានសៀមសំរុកចូលមកដោះយកឆ្កែជាប់អន្ទាក់នៅក្នុងទឹកដីកម្ពុជា
- វេលាម៉ោង៦ល្ងាចនេះរដ្ឋមន្ត្រីក្រសួងការបរទេសកម្ពុជា ដឹកនាំប្រតិភូ និងភស្តុតាងទៅកាន់ អ.ស.ប បង្ហាញពីការឈ្លានពានរបស់សៀម
- ស្ពានអ្នកលឿងត្រូវបើកការដ្ឋានស្ថាបនាព្រឹកនេះ ក្រោមការចុចប៊ូតុងបញ្ជាពីសម្តេចតេជោហ៊ុន សែន
- លួចអាវរោងចក្របានរាប់ពាន់អាវយកទៅលក់ញ៉ាមលួចទៀតអស់លក្ខណ៍
- នាងខារ៉ាអូខេម្នាក់ស្លាប់ដោយគ្រោះថ្នាក់ចរាចរណ៍អត់ស្គាល់ឈ្មោះ
- ដេញចាប់បុរសម្នាក់បើករថយន្តទួរីសរត់ទៅឈប់នៅម្តុំវិទ្យាល័យបុរី១០០ខ្នង
- ឆែកឆេរលំនៅឋានជនជាតិវៀតណាមដកហូតបានថ្នាំញៀន១៨០គ្រាប់ និងម៉ាទឹកកក៤០កញ្ចប់
- រទេះដឹកត្រីបង្ហូរទឹកឆ្អេះឆ្អាបនៅច្រកទ្វារអន្តរជាតិប៉ោយប៉ែត
- ជនទំនើងស្រវឹងស្រាប្រើអំពើហិង្សាវាយប្រពន្ធគេ
- ក្រុមសិល្បករមួយក្រុមមកពីតៃវ៉ាន់សំដែងនៅភ្នំពេញ
- យុវជនវៀតណាមញៀនថ្នាំចង.កសម្លាប់ខ្លួនក្នុងផ្ទះសំណាក់អូរគីណាវ៉ា
- សាលាបារាំងចុងបូព៌ាមានបំណងជួយអភិរក្ស និងអភិវឌ្ឍប្រាសាទបុរាណកម្ពុជា
- មន្ត្រីជប៉ុននឹងចូលរួមចំណែកជាមួយកម្ពុជាក្នុងការប្រឆាំងភេរវកម្ម
- លេចព័ត៌មានពីលោកគឹម ជុងអ៊ីល រៀបការថ្មីទៀត
- ជនដៃឆៅបាញ់មនុស្សនៅមុខក្លឹបឡឺវេស ត្រូវចាប់ខ្លួនបានម្នាក់ហើយ
- ឆ្នេរសមុទ្រកម្ពុជាជាប់ជាសមាជិកពេញសិទ្ធិរបស់ក្លឹបឆ្នេរសមុទ្រស្អាតបំផុតលើលោក
- រថភ្លើងធ្លាក់ផ្លូវជិតក្រុងសេអ៊ូលពុំមានជនរងគ្រោះ
| ឃ្លាំងគ្រាប់របស់ស្នងការនគរបាលខេត្តស្ទឹងត្រែងបានផ្ទុះកក្រើកផ្អើលមនុស្សភ័យរន្ធត់ Posted: 11 Feb 2011 09:55 PM PST ខេត្តស្ទឹងត្រែង ៖ ឃ្លាំងគ្រាប់របស់ស្នងការដ្ឋាននគរបាលត្រូវបានផ្ទុះកក្រើកផ្អើលអ្នកក្រុងស្ទឹងត្រែង បង្កឱ្យមានការភ័យរន្ធត់កាលពីវេលាម៉ោង១២ ថ្ងៃទី១២ កុម្ភៈ ២០១១ ដោយគេនឹកស្មានថា ទាហានកម្ពុជាបាញ់គ្នាជាមួយនរណាទៀតហើយ? ឬថា សមត្ថកិច្ចប្រយុទ្ធគ្នាដ៏ធំមួយជាមួយក្រុមចោរកម្ម តែតាមពិតផ្ទុះឃ្លាំងគ្រាប់របស់ស្នងការនគរបាលសោះ ៕  |
| សម្តេចនាយករដ្ឋមន្រ្តីប្រកាសកាត់បន្ថយការប្រើប្រាស់រថយន្តស៊ីរ៉ែនរបស់មន្រ្តីជាន់ខ្ពស់ Posted: 11 Feb 2011 08:07 PM PST អ្នកលឿង ៖ សម្តេចនាយករដ្ឋមន្រ្តី ហ៊ុន សែន បានដាក់គោលការណ៍ឱ្យអ្នកប្រើប្រាស់រថយន្តស៊ីរ៉ែនចាប់ពីថ្នាក់ឧបនាយករដ្ឋមន្រ្តីចុះក្រោម ពីព្រោះថា មានរថយន្តស៊ីរ៉ែនខ្លះបន្លឺសំលេងខុសតួនាទី នាំឱ្យបាត់បង់សណ្តាប់ធ្នាប់សង្គម ។ សម្តេចនាយករដ្ឋមន្រ្តីបានប្រកាសថា អនុញ្ញាតឱ្យប្រើប្រាស់រថយន្តស៊ីរ៉ែនតែ៤ស្ថាប័ន៤កំពូលៗប៉ុណ្ណោះ គឺ១-ព្រះមហាក្សត្រ, ២-នាយករដ្ឋមន្រ្តី, ៣-ប្រធានរដ្ឋសភា និង៤គឺ ប្រធានព្រឹទ្ធសភា ។ សម្តេចបានលើកឡើងបែបនេះក្នុងឱកាសសម្តេចអញ្ជើញជាអធិបតីក្នុងពិធីសម្ពោធបើកការដ្ឋានស្ថាបនាស្ពាន អ្នកលឿងឆ្លងកាត់ទន្លេមេគង្គក្រោមដ៏ធំមួយនាព្រឹកនេះទី១២ កុម្ភៈ ២០១១ នេះ ៕  |
| អគ្គីភ័យលេបត្របាក់លំនៅឋានអ្នកក្រីក្រឆៀងខាងលិចក្រោយផ្សារពោធិ៍ចិនតុង Posted: 11 Feb 2011 04:46 PM PST រាជធានីភ្នំពេញ ៖ អគ្គីភ័យមួយបានឆាបឆេះទៅលើលំនៅឋានអ្នកក្រីក្រ គឺលេបត្របាក់អស់ចំនួន៤ខ្នង ខណៈអ្នកផងកំពុងលង់លក់កាលពីវេលាម៉ោងប្រមាណ១១ អធ្រាត្រ ថ្ងៃទី១១ កុម្ភៈ ២០១១ នៅភូមិតាងួនខាងជើង ជាប់ស្ថានីយរថភ្លើងឆៀងខាងលិច ក្រោយផ្សារពោធិ៍ចិនតុង ក្នុងសង្កាត់កាកាប ខណ្ឌដង្កោ បង្កឱ្យមានការភ្ញាក់ផ្អើលភ័យរន្ធត់ជាមួយសម្លេងរញៀវប្រកូកប្រកាសឱ្យជួយផង ។ អគ្គីភ័យនេះបានឆាបឆេះប្រើពេលប្រមាណជិតមួយម៉ោងទើបត្រូវបានរលត់ជាស្ថាពរក្រោមការបាញ់ទឹកយ៉ាងសកម្មពីសមត្ថកិច្ចកងពន្លត់អគ្គីភ័យដែលបញ្ចេញរថយន្តពន្លត់អគ្គីភ័យ១០គ្រឿងទៅកាន់កន្លែងកើតហេតុ ប៉ុន្តែបាញ់ទឹកអស់តែ៣គ្រឿងប៉ុណ្ណោះ ។ អគ្គីភ័យនេះមិនបានបង្កឱ្យមនុស្សស្លាប់ ឬរបួសនោះទេ ព្រោះម្ចាស់ផ្ទះបានដឹងខ្លួន និងរត់ចេញទៅក្រៅផ្ទះទាន់ពេល ព្រមទាំងដង្ហោយអ្នកភូមិជួយស្រោចទឹក ជះផងដែរ...ផ្ទះតូចៗ៤ខ្នងសង់អំពីឈើដំបូលប្រក់សង្កសី ត្រូវឆេះម៉ដ្ឋបណ្តាលឱ្យខូចខាតទ្រព្យសម្បត្តិមួយចំនួន ។ ដើមហេតុនៃអគ្គីភ័យនេះត្រូវបានគេដឹងថា មុនដំបូងទុស្សេខ្សែភ្លើងផ្តើមចេញពីបង្គោលភ្លើងនៅអមផ្លូវ ហើយបែកផ្កាភ្លើង យ៉ាងខ្លាំងគួបផ្សំក្បែរនោះសំបូរផ្ទះឈើផងក៏រាលឆ្លងសន្ធោសន្ធៅតែម្តង ៕  |
| Posted: 11 Feb 2011 03:31 AM PST ព្រំដែនប្រាសាទព្រះវិហារ ៖ ទាហានការពារទឹកដីកម្ពុជាបានលើកកាំភ្លើងច្រូងច្រាង ភ្ជង់ទៅលើកងទាហានសៀមប្រមាណ៥ទៅ៦នាក់ ដែលប៉ុនប៉ងចូលមកដោះយកឆ្កែរបស់គេជាប់អន្ទាក់នៅខ្សែត្រៀមជួរមុខក្នុងទឹកដីកម្ពុជាតំបន់ភ្នំទ្រព្យកាលពីវេលាព្រលប់ម៉ោងប្រមាណ៦និង៤០នាទីថ្ងៃទី១០ កុម្ភៈ ២០១១ ញ៉ាំងឱ្យទាហានសៀមលើកកាំភ្លើងភ្ជង់តបវិញ បំរុងនឹងបាញ់គ្នាទៅហើយ ប្រសិនបើទាហានសៀមនៅតែចចេសរឹងរូសដើរចូលដោយគ្មានការអនុញ្ញាត២ ឬ៣ ជំហានទៀត ។ សូមបញ្ជាក់ថា ឆ្កែរបស់ទាហានសៀមមួយក្បាលដែលចូលមកជាប់អន្ទាក់ក្បែរខ្សែត្រៀមជួរមុខ ក្នុងទឹកដីកម្ពុជាតំបន់ភ្នំទ្រព្យនោះគឺជាឆ្កែពូជបៀកហ្សែ៊ មានជំនាញខាងហិតមីន ហើយការដែលចូលមកជាប់អន្ទាក់នេះអាចថា ជាចេតនារបស់ទាហានសៀម លែងឆ្កែរបស់គេឱ្យចូលរាវមីនក្នុងទឹកដីប្រទេសកម្ពុជាងាយស្រួលក្នុងការចេញ-ចូល...ឬចង់ដឹងថា ក្នុងខ្សែត្រៀមរបស់កម្ពុជាមានមនុស្សឬក៏អត់? នេះក៏ជាល្បិចមួយដែររបស់សៀម គេយកឆ្កែមកពិសោធន៍ ដើម្បីងាយស្រួលធ្វើការវាយលុយក្នុងប្រការណាមួយរបស់ពួកគេ។ ពេលឆ្កែចាប់ផ្តើមជាប់អន្ទាក់ និងស្រែកឮៗដល់ទាហានសៀមដែលឈរជើងនៅខ្សែត្រៀមម្ខាងទៀតនោះ ស្រាប់តែពួកទាហានប្រមាណ៥ទៅ៦នាក់ ស្ទុះស្រចូលមកក្នុងបំណងដោះយកឆ្កែរបស់គេត្រឡប់ទៅវិញ តែទាហានកម្ពុជាដែលរវាសរវៃនោះ ក៏លើកកាំភ្លើងញ៉ាច់ ឯខាងសៀមក៏លើកកាំភ្លើងភ្ជង់វិញដូចគ្នា ប៉ុន្តែយ៉ាងណាក៏ដោយ ប្រសិនបើទាហានសៀមនៅតែចចេសរឹងរូសដើរចូល ឬកំរើកខ្លួនច្រងេងច្រងាង ទាហានកម្ពុជាច្បាស់ជាបាញ់កំទេចហើយ ។ ខណៈនោះសំណាងណាស់ ចេះបានមេបញ្ជាការប្រចាំខ្សែត្រៀមរបស់សៀមចេញមុខចូលមកសំរបសំរួលជាមួយមេបញ្ជាការទាហានកម្ពុជាសុំអង្វរយកឆ្កែទៅវិញ ប៉ុន្តែមេបញ្ជាការទាហានកម្ពុជាមិនអនុញ្ញាតឱ្យចូលទេព្រោះខ្លាចគ្រោះថ្នាក់ដោយទីនោះសំបូរមីន ហើយខាងទាហានកម្ពុជាក៏មិនរវល់ចូលទៅយកឆ្កែនោះដែរ ។ មេបញ្ជាការទាហានកម្ពុជាបានប្រាប់កូនចៅថា អត់ធ្មត់...យោគយល់ចុះ...ទុកឱ្យឆ្កែនេះជាប់អន្ទាក់នៅទីនោះចុះ...ទើបការភ្ជង់គ្នាត្រូវបានបញ្ចប់ ៕  |
| Posted: 11 Feb 2011 03:25 AM PST  រាជធានីភ្នំពេញ ៖ លោកកុយ គួង អនុរដ្ឋលេខាធិការក្រសួងការបរទេសកម្ពុជា បានមានប្រសាសន៍កាលពីថ្ងៃទី១១ កុម្ភៈ ២០១១ ថា លោកហោ ណាំហុង ឧបនាយករដ្ឋរដ្ឋមន្ត្រី រដ្ឋមន្ត្រីក្រសួងការបរទេស និងដឹកនាំគណៈប្រតិភូរាជរដ្ឋាភិបាលកម្ពុជាមួយក្រុម និងឯកសារជាច្រើនទៅកាន់ក្រុមប្រឹក្សាសន្តិសុខ អង្គការសហប្រជាជាតិ ដែលមានទីស្នាក់ការនៅទីក្រុងញូវយ៉ក សហរដ្ឋអាមេរិក ហើយគណៈប្រតិភូរាជរដ្ឋាភិបាលគ្រោងចេញដំណើរពីរាជធានីភ្នំពេញ នៅវេលាម៉ោង៦ល្ងាចនេះ ។ លោកកុយ គួង បន្តថា លោកមិនអាចបញ្ជាក់ប្រាប់អ្នកកាសែតថា តើលោកឧបនាយករដ្ឋមន្ត្រីហោ ណាំហុង នឹងយកទៅជាមួយនូវឯកសារអ្វីខ្លះនោះទេ ប៉ុន្តែច្បាស់ណាស់ថា ប្រមុខការទូតកម្ពុជា នឹងដាក់ឯកសារពិសេសៗជូនដល់ អ.ស.ប ពាក់ព័ន្ធនឹងជម្លោះឈ្លានពាននេះ ។ លោកបន្តថា កម្ពុជាបានរៀបចំរួចរាល់អស់ហើយនូវលក្ខណសម្បត្តិដោះស្រាយជម្លោះ ។ លោកឧបនាយករដ្ឋមន្ត្រីនឹងថ្លែងដោយផ្ទាល់ក្នុងកិច្ចប្រជុំក្រុមប្រឹក្សាសន្តិសុខអង្គការសហប្រជាជាតិនៅថ្ងៃទី១៤ កុម្ភៈ ២០១១ ខាងមុខ តាមការគ្រោងទុក ហើយកម្មវិធីប្រជុំមិនមានការប្រែប្រួលនោះទេ ៕  |
| Posted: 11 Feb 2011 03:19 AM PST អ្នកលឿងត្រើយខាងកើត ៖ ព្រឹកនេះទី១២ កុម្ភៈ ២០១១ សម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រី អញ្ជើញជាអធិបតីក្នុងពិធីសម្ពោធបើកការដ្ឋានស្ថាបនាស្ពានអ្នកលឿងឆ្លងកាត់ទន្លេមេគង្គក្រោមដ៏ធំមួយ ដែលប្រជាពលរដ្ឋកម្ពុជាទន្ទឹងរង់ចាំជាយូរមកហើយ ព្រោះនេះជាស្ពានពង្រីកភាពលូតលាស់ជាច្រើនវិស័យនាំមកនូវការរីកចំរើនដល់សេដ្ឋកិច្ចជាតិដ៏ធំផងដែរ ។ គួររំលឹកថា អាជ្ញាធរខេត្តព្រៃវែងបានរៀបចំធ្វើពិធីក្រុងពាលីសុំម្ចាស់ទឹក ម្ចាស់ដីរួចហើយដើម្បីឈានទៅបើកការដ្ឋានស្ថាបនាស្ពានអ្នកលឿងដ៏ធំឆ្លងទន្លេមេគង្គក្រោមនេះកាលពីវេលាម៉ោង៧ព្រឹក ថ្ងៃទី៦ កុម្ភៈ ២០១១ ក្រោមអធិបតីភាពលោកស្លូត សំបូរ អនុរដ្ឋលេខាធិការក្រសួងសាធារណការ និងដឹកជញ្ជូន និងលោកអ៊ូ សំអួន អភិបាលរងខេត្តព្រៃវែង ដោយមានមន្ត្រីរាជការ អ្នកមុខ អ្នកការជាច្រើនរូបទៀតចូលរួមយ៉ាងអធិកអធម ។ សូមបញ្ជាក់ថា ស្ពានអ្នកលឿងជាប្រភេទស្ពានហាយវ៉េ ឆ្លងទន្លេមេគង្គ ភ្ជាប់ពីខេត្តកណ្តាល ទៅខេត្តព្រៃវែង និងឆ្ពោះទៅខេត្តស្វាយរៀង ដែលគេទន្ទឹងរង់ចាំជាយូរមកហើយ នោះ តាមគំរោងនឹងត្រូវចាប់ផ្តើមបើកការដ្ឋានសាងសង់នៅថ្ងៃទី១២ កុម្ភៈ ២០១១ នេះ ដើម្បីភ្ជាប់ទំនាក់ទំនងឱ្យកាន់តែទូលំទូលាយថែមទៀត ដល់ប្រជាពលរដ្ឋ អ្នកដំណើរ ការដឹកជញ្ជូនភ្ញៀវទេសចរ និងការពង្រីកពាណិជ្ជកម្ម-សេដ្ឋកិច្ច ។ ស្ពាននេះធំជាងគេក្នុងចំណោមស្ពានដែលសាងសង់រួច មិនត្រឹមតែប៉ុណ្ណោះវាវែងជាងគេបំផុត និងខ្ពស់ជាងគេទៀតផង សំរាប់អនុគ្រោះឱ្យកប៉ាល់ដឹកទំនិញ-ភ្ញៀវទេសចរចេញ-ចូលដោយងាយស្រួល ដូច្នេះហើយទើបយើងធ្វើការសិក្សាយូរបន្តិច ហើយគ្រោងនឹងកសាងរួចរាល់នៅឆ្នាំ២០១៥ ចំណាយទឹកប្រាក់អស់១៣០លានដុល្លារ ។ ការដេញថ្លៃគឺធ្វើឡើងនៅប្រទេសជប៉ុនទាំងអស់ ដែលវាមិនមែនជាផលប្រយោជន៍សំរាប់ប្រទេសកម្ពុជាមួយមុខទេ គឺជាផលប្រយោជន៍សំរាប់សមាហរណកម្មនៃអនុតំបន់ទន្លេមេគង្គផង និងអាស៊ានផង ព្រោះវាជាស្ពានហាយវ៉េអាស៊ាន ៕  |
| លួចអាវរោងចក្របានរាប់ពាន់អាវយកទៅលក់ញ៉ាមលួចទៀតអស់លក្ខណ៍ Posted: 11 Feb 2011 03:15 AM PST  ខេត្តកណ្តាល ៖ ជនសង្ស័យ៤នាក់ដែលសកម្មខាងលួចអាវរោងចក្របានជាច្រើនដងរាប់ពាន់អាវទីបំផុត ត្រូវអស់លក្ខណ៍ ហើយត្រូវប៉ូលិសចាប់ខ្លួនបញ្ជូនទៅកាន់សាលាដំបូងខេត្តកណ្តាល កាលពីរសៀលថ្ងៃទី១០ កុម្ភៈ បន្ទាប់ពីជនសង្ស័យទាំងនោះបបួលគ្នាទៅលួចអាវរោងចក្រឈ្មោះរោងចក្រតម្បាញខ្មែរ ស្ថិតនៅភូមិថ្កុល ឃុំសំពៅលូន ស្រុកកោះធំ កាលពីវេលាម៉ោង១រំលងអធ្រាត្រឈានចូលថ្ងៃទី៩ កុម្ភៈ ។ ប្រភពពីមន្ត្រីប៉ូលិសបានឱ្យដឹងថា ជនសង្ស័យទាំង៤នាក់ ដែលត្រូវចាប់ខ្លួននោះ ១-ឈ្មោះសឿន សុខជា ភេទប្រុស អាយុ១៩ឆ្នាំ ជាសន្តិសុខ ២-ឈ្មោះជឿន ជាង ភេទប្រុស អាយុ២៥ឆ្នាំ ជាជាងភ្លើង ជនទាំងពីរនាក់នេះ ធ្វើការនៅក្នុងរោងចក្រខាងលើជាមួយគ្នា ៣-ឈ្មោះទី សារុន ភេទប្រុស អាយុ៣២ឆ្នាំ និង៤-ឈ្មោះសុខ ជឿន ភេទប្រុស អាយុ៣១ឆ្នាំ មុខរបរជាកសិករ ។ អ្នកទាំង៤មានទីលំនៅភូមិខ្ពប ឃុំសំពៅលូន ស្រុកកោះធំ ។ ចំណែកដើមបណ្តឹងឈ្មោះនូ សុផល ភេទប្រុស អាយុ៤១ឆ្នាំ មុខងារជាប្រធានរដ្ឋបាលរោងចក្រតម្បាញខ្មែរនៅភូមិ-ឃុំកើតហេតុ ។ តាមព័ត៌មានពីប៉ូលិសបានឱ្យដឹងថា កន្លងមករោងចក្រតម្បាញខ្មែរធ្លាប់បាត់អាវយឺតអស់៦.២៧០អាវ កាលពីអំឡុងឆ្នាំ២០១០ ហើយនៅឆ្នាំដដែលនោះធ្លាប់បាត់អស់ចំនួន៤៣២អាវម្តងទៀត ។ ពេលនោះខាងរោងចក្របានបន្ថែមកំលាំងយាមកាមយ៉ាងតឹងរឹង ។ រហូតមកដល់យប់ថ្ងៃទី៩ កុម្ភៈ បក្សពួកជនសង្ស័យទាំង៤នាក់ខាងលើ បានធ្វើសកម្មភាពចូលលួចអាវយឺតក្នុងរោងចក្រម្តងទៀត ដោយមានជនសង្ស័យឈ្មោះសឿន សុខជា ជាអ្នកមើលផ្លូវ ។ ខណៈជនសង្ស័យកំពុងយកតម្ពក់ថ្ពក់អាវយឺតចេញពីក្នុងបន្ទប់អគារ «សេ» ទើបតែបានអាវយឺតចំនួនពីរប៉ុណ្ណោះក៏ត្រូវសន្តិសុខទៅទាន់ ហើយដេញចាប់បានយកមកប្រគល់ឱ្យប៉ូលិស ។ នៅចំពោះមុខសមត្ថកិច្ចជនសង្ស័យបានសារភាពថា ក្នុងអំឡុងឆ្នាំ២០១០ ពួកគេបានសហការគ្នាលួចអាវយឺតរោងចក្រតម្បាញខ្មែរចំនួន២លើក បានអាវយឺតជាង៦ពាន់អាវ ដឹកយកទៅលក់នៅភ្នំពេញ បានលុយយកមកចែកបក្សពួក ។ លុះដល់យប់ថ្ងៃទី៩ ក៏បានបបួលគ្នាចូលទៅលួចម្តងទៀត ដោយមានឈ្មោះសឿន សុខជា ជាសន្តិសុខរោងចក្រនេះ ជាអ្នកមើលផ្លូវ ខណៈកំពុងថ្ពក់អាវបានតែពីរក៏ត្រូវសន្តិសុខទៅទាន់តែម្តង ៕  |
| នាងខារ៉ាអូខេម្នាក់ស្លាប់ដោយគ្រោះថ្នាក់ចរាចរណ៍អត់ស្គាល់ឈ្មោះ Posted: 11 Feb 2011 02:59 AM PST  រាជធានីភ្នំពេញ ៖ នារីខារ៉ាអូខេម្នាក់បានស្លាប់បាត់បង់ជីវិតក្នុងឧប្បត្តិហេតុគ្រោះថ្នាក់ចរាចរណ៍មួយដែលបានកើតឡើងនៅលើកំណាត់ផ្លូវលេខ២៧១ សង្កាត់ផ្សារដើមថ្កូវ ខណ្ឌចំការមន កាលពីវេលាម៉ោង១រំលងអធ្រាត្រ ឈានចូលថ្ងៃទី១១ កុម្ភៈ ឆ្នាំ២០១១។ នារីរងគ្រោះខាងលើនេះ ក្រោយពេលកើតហេតុត្រូវបានរថយន្តសាមុយដឹកយកទៅសង្គ្រោះនៅមន្ទីរពេទ្យកាល់ម៉ែត ហើយបានស្លាប់ក្រោយពេលដឹកដល់មន្ទីរពេទ្យបានមួយសន្ទុះ ។ បច្ចុប្បន្នសពត្រូវបានតម្កល់ទុកនៅសាលតម្កល់សពនៃមន្ទីរពេទ្យរង់ចាំក្រុមគ្រួសារមកទទួលយកទៅធ្វើបុណ្យ ។ សូមបញ្ជាក់ថា នារីរងគ្រោះខាងលើស្លៀកខោខ្លីពណ៌ក្រហម ពាក់អាវដៃខ្លីពណ៌ស្វាយ។ ជាមួយគ្នានេះ ប៉ូលិសផ្នែកចរាចរណ៍ខណ្ឌចំការមន បានអំពាវនាវដល់ក្រុមគ្រួសារប្រជាពលរដ្ឋណាដែលមានបាត់សមាជិកដូចភិនភាគខាងលើ សូមមេត្តាមកទំនាក់ទំនងសួរនាំព័ត៌មាននៅអធិការដ្ឋាននគរបាលខណ្ឌចំការមន ។ តាមប្រភពព័ត៌មានទាក់ទិននឹងករណីគ្រោះថ្នាក់ចរាចរណ៍ខាងលើនេះ បានឱ្យដឹងថា មុនពេលកើតហេតុនារីរងគ្រោះជិះម៉ូតូនៅលើផ្លូវលេខ២៧១ ហើយត្រូវរថយន្តកាមរីពណ៌ស្ករ ពាក់ស្លាកលេខភ្នំពេញ 2A-1957 បុកបណ្តាលឱ្យដួលរបួសធ្ងន់រហូតស្លាប់ពេលបញ្ជូនដល់មន្ទីរពេទ្យកាល់ម៉ែត ។ ពុំមានព័ត៌មានបញ្ជាក់ថា រថយន្តនិងម៉ូតូដែលនារីរងគ្រោះជិះធ្វើដំណើរក្នុងទិសដៅពីណាទៅណាឡើយ ។ សូមរំលឹកផងដែរថា កាលពីយប់ថ្ងៃទី១ កុម្ភៈ កន្លងមក ក៏មានបុរសម្នាក់អាយុប្រហែលជាង២០ឆ្នាំ ត្រូវរថយន្តបុកស្លាប់នៅចំណុចផ្លូវលេខ៣៦០ កែងមហាវិថីព្រះមុនីវង្ស ស្ថិតក្នុងសង្កាត់បឹងកេងកងទី៣ ហើយរហូតមកទល់ពេលនេះពុំទាន់មាននរណាស្គាល់អត្តសញ្ញាណជនរងគ្រោះនៅឡើយ ។ សពបុរសដែលស្លាប់កាលពីយប់ថ្ងៃទី១ កុម្ភៈ នោះ ពាក់អាវដៃវែង ពណ៌ខ្មៅឆ្នូតស ស្លៀកខោខូវប៊យ ពណ៌ទឹកប៊ិច។ ជាងនេះទៅទៀតបុរសរងគ្រោះជិះម៉ូតូធុន C70 ពណ៌ទឹកសមុទ្រ ពាក់ស្លាកលេខ ១៨១៤ ភព១។ តាមរយៈភិនភាគនេះប៉ូលិសខណ្ឌចំការមន ក៏សូមធ្វើការអំពាវនាវរកក្រុមគ្រួសារសពដែលមានភិនភាគដូចចុះផ្សាយនេះ សូមមកទំនាក់ទំនងជាមួយសមត្ថកិច្ចដើម្បីបានដឹងព័ត៌មានជុំវិញហេតុការណ៍គ្រោះថ្នាក់ចរាចរណ៍ក៏ដូចជាសពជនរងគ្រោះនេះផងដែរ៕  |
| ដេញចាប់បុរសម្នាក់បើករថយន្តទួរីសរត់ទៅឈប់នៅម្តុំវិទ្យាល័យបុរី១០០ខ្នង Posted: 11 Feb 2011 02:54 AM PST រាជធានីភ្នំពេញ ៖ តាមប្រភពព័ត៌មានពីប្រជាពលរដ្ឋនៅម្តុំវិទ្យាល័យបុរី១០០ខ្នង តាមបណ្តោយមហាវិថីសហព័ន្ធរុស្ស៊ីស្ថិតក្នុងភូមិទឹកថ្លា សង្កាត់ទឹកថ្លា ខណ្ឌសែនសុខ បានឱ្យដឹងថា កាលពីវេលាម៉ោង៤និង៣០នាទីរសៀលថ្ងៃទី១១ កុម្ភៈ ២០១១ មានរថយន្តប្រភេទទួរីសពណ៌សមួយគ្រឿង បានបើកលឿនហាក់ដូចជាមានរឿងប្រថុចញ៉ុចណាស់ទៅឈប់នៅខាងលិចវិទ្យាល័យបុរី១០០ខ្នង រួចហើយបុរសម្នាក់បានបើកទ្វារចុះរត់ចូលទៅក្នុងភូមិមួយតាមផ្លូវលំ ដើម្បីគេចខ្លួន ដោយមានប៉ូលិសចរាចរ និងអ្នកស្លៀកពាក់ស៊ីវិលដេញតាមពីក្រោយ ។ តាមប្រភពព័ត៌មានបានឱ្យដឹងទៀតថា បុរសដែលរត់គេចខ្លួននោះគេមិនដឹងថា ជាចោរឬជាអ្នកបង្ករបួសស្នាម ឬជាអ្នកបើករថយន្តបុកគេនៅកន្លែងណាមួយនោះទេ ប៉ុន្តែបានរត់ចូលទៅក្នុងភូមិមួយរហូតជិតដល់អង្គភាពស្ថាបនាស្ពាន ទើបចាប់បានបុរសនោះយកមកវិញ ។ គ្មាននរណាសួរនាំដឹងរឿងអ្វីទេ...ចំណែកប៉ូលិសចរាចរក៏នាំយកបុរសនោះចេញទៅដោយដាក់ឱ្យជិះម៉ូតូកណ្តាលប៉ូលិសម្នាក់បើក និងប៉ូលិសម្នាក់អង្គុយពីក្រោយ ចំណែករថយន្តត្រូវប៉ូលិសបើកយកចេញទៅបាត់ផងដែរ ដោយមិនបានប្រាប់រឿងអ្វីនោះទេ ។ គេសង្ស័យថា ទំនងបុរសនោះបង្កគ្រោះថ្នាក់ចរាចរណ៍ពីកន្លែងណាមួយ ហើយត្រូវប៉ូលិសចាប់ឃាត់ខ្លួនយកទៅកន្លែងកើតហេតុវិញ ឬការិយាល័យប៉ូលិស ដើម្បីដោះស្រាយហើយ ៕  |
| ឆែកឆេរលំនៅឋានជនជាតិវៀតណាមដកហូតបានថ្នាំញៀន១៨០គ្រាប់ និងម៉ាទឹកកក៤០កញ្ចប់ Posted: 11 Feb 2011 02:38 AM PST   រាជធានីភ្នំពេញ ៖ លំនៅឋានរបស់ជនជាតិវៀតណាមលេខ៣៧៣C ស្ថិតក្នុងភូមិលូ សង្កាត់ស្វាយប៉ាក ត្រូវកំលាំងសមត្ថកិច្ចប៉ូលិសខណ្ឌឫស្សីកែវ សហការជាមួយមន្ត្រីតុលាការឆ្មក់ចូលឆែកឆេរកាលពីវេលាម៉ោង១និង២០នាទីរសៀលថ្ងៃទី១១ កុម្ភៈ ហើយដកហូតថ្នាំញៀន ប្រភេទយ៉ាម៉ាចំនួន១៨០គ្រាប់ និងម៉ាទឹកកកចំនួន៤០កញ្ចប់ ក្នុងនោះមានកញ្ចប់តូចៗចំនួន៣៩កញ្ចប់ ។ ទោះបីជាយ៉ាងណា ម្ចាស់ផ្ទះឈ្មោះង្វៀង យ៉ាំងថូក ហៅធូក ភេទប្រុស អាយុ៣៦ឆ្នាំ ដែលជាមេចែកចាយគ្រឿងញៀនបានគេចខ្លួនបាត់ទៅហើយ ។ ការឈានចុះទៅឆែកឆេរលំនៅឋានជនជាតិវៀតណាមនេះ បន្ទាប់ពីសមត្ថកិច្ចប៉ូលិសស្វាយប៉ាកឃាត់ខ្លួនក្មេងស្រីជំទង់ជនជាតិវៀតណាមម្នាក់ឈ្មោះឡាំង គីមហេង អាយុ១៤ឆ្នាំ មានទីលំនៅផ្ទះលេខ២៥៧ ភូមិលូ សង្កាត់ស្វាយប៉ាក ដកហូតបានថ្នាំញៀនប្រភេទយ៉ាម៉ាចំនួន៣គ្រាប់ ។ លោកម៉ៅ ផល្លា នាយប៉ុស្តិ៍ស្វាយប៉ាក បានឱ្យដឹងថា ដោយមានការសង្ស័យទៅលើលំនៅឋានខាងលើ សមត្ថកិច្ចបានដាក់កំលាំងតាមដានរយៈពេល១អាទិត្យមកហើយ ។ នៅវេលាម៉ោង១០និង៣០នាទីព្រឹក ថ្ងៃទី១១ កុម្ភៈ សមត្ថកិច្ចឃើញក្មេងស្រីជនជាតិវៀតណាមម្នាក់បានធ្វើដំណើរចូលទៅក្នុងផ្ទះជនជាតិវៀតណាមខាងលើ។ ពេលក្មេងស្រីចេញមកវិញ សមត្ថកិច្ចឆែកឆេររកឃើញថ្នាំញៀនចំនួន៣គ្រាប់ ឃាត់ខ្លួននាំយកទៅប៉ុស្តិ៍សាកសួរត្រូវក្មេងនោះឆ្លើយថា ទិញពីផ្ទះខាងលើ ។ យោងតាមចំលើយក្មេងស្រី សមត្ថកិច្ចក៏បានរាយការណ៍ទៅព្រះរាជអាជ្ញាសុំគោលការណ៍ឆែកឆេរលំនៅឋានជនជាតិវៀតណាម ព្រមទាំងដកហូតបានថ្នាំញៀនតែម្តង ៕  |
| រទេះដឹកត្រីបង្ហូរទឹកឆ្អេះឆ្អាបនៅច្រកទ្វារអន្តរជាតិប៉ោយប៉ែត Posted: 11 Feb 2011 02:32 AM PST  ក្រុងប៉ោយប៉ែត ៖ ក្រុមហ៊ុនរកស៊ីនាំត្រីទឹកសាបចូលកាន់ទឹកដីសៀមដែលនាំយកមកពីតាមបណ្តាខេត្តផ្សេងៗមកកាន់តំបន់ប៉ោយប៉ែតនៅតែបង្កការប៉ះពាល់ដល់បរិស្ថានដោយសារតែកើតមានការបង្ហូរទឹកស្អុយឆ្អេះឆ្អាបតាមដងផ្លូវ និងធ្វើឱ្យមានការប៉ះពាល់ដល់បរិស្ថាន ។ មុននេះអាជ្ញាធរ ក៏ដូចជាសមត្ថកិច្ចហាក់បានប្រឹងប្រែងមួយឈុតក្នុងការរៀបចំឱ្យមានការធ្វើអនាម័យជុំវិញការនាំត្រីនេះ ព្រោះតែបង្កឱ្យប៉ះពាល់បរិស្ថានធ្ងន់ធ្ងរដល់ច្រកទ្វារដែលមានភ្ញៀវទេសចរជាតិ-អន្តរជាតិឆ្លងកាត់ ។ អាជ្ញាធរក្រុងប៉ោយប៉ែតបានធ្វើការអប់រំណែនាំឱ្យក្រុមហ៊ុនទាំងអស់ដែលដឹកត្រីតាមរទេះត្រូវមានការវេចខ្ចប់ឱ្យបានត្រឹមត្រូវ ។ ទោះបីជាបែបណាបានតែមួយរយៈពេលខ្លីតែប៉ុណ្ណោះ ជាក់ស្តែងនៅព្រឹកថ្ងៃទី១០ កុម្ភៈ គេសង្កេតឃើញមានរទេះដឹកត្រីជាច្រើនបានអូសចេញទៅប្រទេសសៀមតាមច្រកទ្វារប៉ោយប៉ែត ហើយបានបង្ហូរទឹកស្អុយឆ្អេះឆ្អាបស្រោចពេញតាមផ្លូវបង្កជាបញ្ហាធ្វើឱ្យប៉ះពាល់ដល់បរិស្ថាន និងសុខភាពភ្ញៀវទេសចរជាតិ និងអន្តរជាតិដែលចេញចូលឆ្លងកាត់តាមច្រកទ្វារប៉ោយប៉ែតនេះ ។ តាមការបំភ្លឺពីសមត្ថកិច្ចប៉ូលិសអន្តោប្រវេសន៍ឈរជើងច្រកទ្វារប៉ោយប៉ែតបានឱ្យដឹងថា ចំពោះក្រុមហ៊ុនរកស៊ីដឹកជញ្ជូនត្រីតាមរទេះទៅប្រទេសសៀម គួរតែមានការសំអាតឱ្យល្អផង គឺនៅពេលដែលពួកគេអូសរទេះត្រីហូរទឹកស្អុយនោះគួរតែយករថយន្តបាញ់ទឹកមកបាញ់សំអាតឱ្យបាត់ក្លិនស្អុយឆ្អេះឆ្អាប ទើបត្រឹមត្រូវ មិនគួរឱ្យទឹកស្អុយទាំងអស់នោះបង្កផលប៉ះពាល់ដល់សុខភាពប្រជាពលរដ្ឋទេ ។ លោកទ្រី ណារិន អភិបាលក្រុងប៉ោយប៉ែត ធ្លាប់បានប្រាប់ឱ្យដឹងថា ជុំវិញបញ្ហាខាងលើនេះលោកនឹងចាត់វិធានការឱ្យបានល្អប្រសើរផង ដែរ គឺដើម្បីកុំឱ្យខ្មាសដល់ភ្ញៀវទេសចរដែលឆ្លងកាត់តាមច្រកប៉ោយប៉ែតនេះ ។ ដូច្នេះអាជ្ញាធរក្រុងប៉ោយប៉ែតគួរចាត់វិធានការចំពោះក្រុមហ៊ុន ដឹកត្រីតាមរទេះដែលបង្ហូរទឹកស្អុយទាំងអស់នេះ ឱ្យបានប្រសើឡើងវិញ និងកុំឱ្យមានការរិះគន់ពីសំណាក់ភ្ញៀវទេសចរដែលឆ្លងកាត់តំបន់នេះវាជាមុខមាត់របស់ប្រទេសកម្ពុជាយើង ៕  |
| ជនទំនើងស្រវឹងស្រាប្រើអំពើហិង្សាវាយប្រពន្ធគេ Posted: 11 Feb 2011 02:29 AM PST  ខេត្តបន្ទាយមានជ័យ ៖ អំណាចស្រាដែលបានជ្រាបចូលក្នុងខ្លួនជនទំនើងម្នាក់ ហ៊ានដើរចូលទៅផ្ទះអ្នកជិតខាង និងជេរប្រមាថថែមទាំងវាយប្រពន្ធគេខណៈដែលបុរសជាប្តីមិននៅផ្ទះ ។ ទោះជាបែបណា បុរសអគតិរូបនេះនៅដឹងខ្លួនបន្ទាប់ពីប្រើអំពើហិង្សាទៅលើស្ត្រីរងគ្រោះ ហើយបានរត់គេចខ្លួនបាត់ ។ លុះវេលាម៉ោង៩និង៣០នាទីព្រឹកថ្ងៃទី១០ កុម្ភៈ ត្រូវបានកម្លាំងប៉ូលិសក្រុងសិរីសោភ័ណស្រាវជ្រាវចាប់ខ្លួនបញ្ជូនមកកាន់អធិការដ្ឋាននគរបាលក្រុងដើម្បីរៀបចំសំណុំរឿងតាមនីតិវិធីច្បាប់ ។ លោកវរសេនីយ៍ត្រីរ៉ែម វីរៈ អធិការនគរបាលក្រុងសិរីសោភ័ណ បានឱ្យដឹងថា ក្រោយពីទទួលបណ្តឹងពីស្ត្រីរងគ្រោះឈ្មោះថឺង ធូ អាយុ៣២ឆ្នាំ នៅភូមិកងវ៉ា សង្កាត់កំពង់ស្វាយ ក្រុងសិរីសោភ័ណ បានប្តឹងចោទប្រកាន់ទៅលើឈ្មោះប៉ូច ពេត អាយុ២៦ឆ្នាំ នៅភូមិជាមួយគ្នានោះថា កាលពីវេលាម៉ោង៧យប់ថ្ងៃទី៩ កុម្ភៈ ខណៈនាងកំពុងរៀបចំបាយឱ្យកូនហូប ស្រាប់តែជនទំនើងឈ្មោះប៉ូច ពេត បានដើរចូលទៅផ្ទះរបស់នាងទាំងយប់ ក្នុងសភាពស្រវឹងដាបពេលដឹងថា ប្តីនាងមិននៅផ្ទះ ជនអគតិនេះបានស្ទុះទៅវាយនាងចំនួន៥ដៃត្រូវចំមុខនិងកញ្ចឹង.ក ហើយបានជេរប្រមាថទៅលើនាង ដោយពាក្យអសុរោះយ៉ាងចាស់ដៃទៀតផង ។ ដោយការភិតភ័យផងនោះនាងនាំកូនរត់ទៅផ្ទះលោកមេភូមិឱ្យជួយអន្តរាគមន៍ព្រមទាំងប្រជាពលរដ្ឋនៅក្នុងភូមិក៏បានជួយរកកន្លែងឱ្យនាងនិងកូនសំរាកនៅផ្ទះរបស់គាត់មួយយប់ ព្រោះតែគេឃើញជនប្រមឹកធ្វើសកម្មភាពមិនគប្បីមកលើរូបគាត់ ។ លោកអធិការនគរបាលក្រុងបានបន្តឱ្យដឹងថា ក្រោយពីឃាត់ខ្លួននិងសាកសួរចម្លើយរួចជនអគតិនេះ បានអះអាងថា ខ្លួនមិនបានប្រព្រឹត្តអ្វីដូចការចោទប្រកាន់របស់ស្ត្រីរងគ្រោះនោះទេ ប៉ុន្តែនៅយប់នោះខ្លួនពិតជាស្រវឹងស្រាមែន ។ លោកវរសេនីយ៍ត្រីរ៉ែម វីរៈ បានបញ្ជាក់ថា ទោះជាជនល្មើសរូបនេះមិនសារភាពពីទង្វើរបស់ខ្លួនក៏ដោយ ប៉ុន្តែយោងតាមពាក្យបណ្តឹងរបស់ស្ត្រីរងគ្រោះនិងសាក្សីដែលជួយបំភ្លឺក្នុងករណីខាងលើ ពិសេសគឺលោកមេភូមិ ដូច្នេះជនដៃដល់ឈ្មោះប៉ូច ពេត កម្លាំងជំនាញកំពុងរៀបចំសំណុំរឿងបញ្ជូនទៅសាលាដំបូងខេត្តបន្ទាយមានជ័យ ដើម្បីចាត់ការតាមផ្លូវច្បាប់ ៕  |
| ក្រុមសិល្បករមួយក្រុមមកពីតៃវ៉ាន់សំដែងនៅភ្នំពេញ Posted: 11 Feb 2011 02:15 AM PST  រាជធានីភ្នំពេញ ៖ នៅសណ្ឋាគារ Almond កាលពីយប់ថ្ងៃទី១០ កុម្ភៈ មានការប្រគំតន្ត្រីមួយដែលធ្វើឡើងដោយក្រុមសិល្បករមានគ្នា៩នាក់មកពីតៃវ៉ាន់ដែលការប្រគំតន្ត្រីនោះធ្វើឡើងក្រោមការជួយឧបត្ថម្ភពីសណ្ឋាគារ Almond ភោជនីយដ្ឋាន TOPAZ និងក្រុមហ៊ុន Artistic Resouce Pte Ltd ហើយសាលាតន្ត្រីស៊ីមហ្វូនី ជាអ្នកអញ្ជើញក្រុមសិល្បករទាំងនោះឱ្យមកសំដែងនៅរាជធានីភ្នំពេញ ចាប់ពីថ្ងៃទី៧ កុម្ភៈ ដល់១៤ កុម្ភៈ ។ នៅថ្ងៃនេះ ពួកគាត់នឹងសំដែង ច្រៀងបទចំរៀងចង្វាក់ភ្លេងចិន និងបែបបស្ចិមប្រទេស នៅសណ្ឋាគារAlmond និងថ្ងៃស្អែកនៅភោជនីយដ្ឋាន Topaz ហើយថ្ងៃទី១២ នៅសាលាតូរ្យតន្ត្រីស៊ីមហ្វូនី ។ លោកលូ ម៉េង មានប្រសាសន៍ថា ប៉ុន្មានខែកន្លងទៅ សណ្ឋាគារ Almond បានរៀបចំព្រឹត្តិការណ៍សំដែងលក្ខណៈក្នុងស្រុក និងអន្តរជាតិ ដូចជាការសំដែងជាលក្ខណៈប្រពៃណីជាមួយនឹងឧបករណ៍ភ្លេងខ្មែរ បុស្បាប៉ាន់ខនសឺត ការសំដែងតន្ត្រីឥណ្ឌូណេស៊ី ការសំដែងតន្ត្រីអន្តរជាតិ អាល្លឺម៉ង់ និងរបាំលៀនរបស់ជនជាតិចិន ។ បច្ចុប្បន្ន សាលាតូរ្យតន្ត្រីស៊ីមហ្វូនី នឹងរៀបចំការសំដែងផ្ទាល់ដោយក្រុមយុវជន Rueifang Youth Symphony Orchestra មកពីតៃវ៉ាន់ ដែលចាប់ពីថ្ងៃនេះរហូតដល់ថ្ងៃទី១២ ខែកុម្ភៈ ។ យើងមិនមែនគ្រាន់តែមានបំណងផ្សព្វផ្សាយតែសណ្ឋាគារ និងភោជនីយដ្ឋានប៉ុណ្ណោះទេ គឺដើម្បីចូលរួមក្នុងការផ្សព្វផ្សាយនូវសិល្បៈខ្មែរ ឧបករណ៍តន្ត្រីខ្មែរ និងសេវាផ្សេងៗ ទៅដល់ភ្ញៀវទេសចរក្នុងស្រុក និងអន្តរជាតិ។ លោកហ៊ុន ឡាក់ ក៏បានថ្លែងដែរថា នេះគឺជាឱកាសដ៏ប្រសើរសំរាប់សាលាតូរ្យតន្ត្រីស៊ីមហ្វូនី ដើម្បីផ្លាស់ប្តូរបទពិសោធន៍ជាមួយនឹងសាលាតូរ្យតន្ត្រី Rueifang Youths ymphony Orchestra ។ យើងខ្ញុំព្យាយាមបង្កើតនូវកម្មវិធី និងសកម្មភាពសប្បាយរីករាយដល់សិស្សានុសិស្សទាំងអស់ ដើម្បីរៀនសូត្រ និងចែករំលែកនូវចំណេះដឹងផ្នែកតូរ្យតន្ត្រីជាមួយយុវជនដែលមានអាជីព និងពោរពេញទៅដោយបទពិសោធន៍ខាងតូរ្យតន្ត្រី ៕  |
| យុវជនវៀតណាមញៀនថ្នាំចង.កសម្លាប់ខ្លួនក្នុងផ្ទះសំណាក់អូរគីណាវ៉ា Posted: 11 Feb 2011 02:09 AM PST ខេត្តព្រះសីហនុ ៖ យុវជនវៀតណាមម្នាក់បានចង.កធ្វើអត្តឃាតដែលសង្ស័យថា បណ្តាលមកពីប្រើប្រាស់គ្រឿងញៀនជ្រុល ត្រូវបានឪពុកម្តាយប្រទះឃើញកាលពីវេលាម៉ោង៥ល្ងាចថ្ងៃទី៩ កុម្ភៈ នៅក្នុងបន្ទប់ផ្ទះជួលមួយកន្លែង ដែលស្ថិតក្នុងប្លុកក្រោយផ្ទះសំណាក់អូរគីណាវ៉ា ស្ថិតក្នុងក្រុមទី៣ ភូមិ១ សង្កាត់លេខ៤ ក្រុងព្រះសីហនុ ។ តាមប្រភពឱ្យដឹងថា យុវជនដែលចង.កធ្វើអត្តឃាតនោះឈ្មោះឡេកុងផាក ភេទប្រុស អាយុ២០ឆ្នាំ ជាអ្នកដើរលក់វ៉ែនតាតាមមាត់សមុទ្រ ឪពុកឈ្មោះឡេ កុងឌឺក អាយុ៤៩ឆ្នាំ ម្តាយឈ្មោះងៀង ធីង៉ា អាយុ៤៦ឆ្នាំ បច្ចុប្បន្នរស់នៅកន្លែងកើតហេតុខាងលើ ។ យោងតាមប្រភពពីមិត្តភក្តិជនរងគ្រោះបានឱ្យដឹងថា ឡេ កុងផាក មិនមានមុខរបរអ្វីក្រៅអំពីដើរលក់វ៉ែនតាតាមមាត់សមុទ្រនោះទេ ។ តែនៅពេលលក់បានលុយបន្តិចបន្តួចឈ្មោះឡេ កុងផាក នេះបានយកទៅទិញថ្នាំញៀនមកសេពអស់គ្មានសល់ ពេលខ្លះចូលលុយដើមទៀតផង ។ ប្រភពដដែលបន្តថា មុនកើតហេតុរយៈពេលបីថ្ងៃគេពុំបានឃើញកុងផាក ទៅលក់វ៉ែនតាទេនៅតែផ្ទះ ។ រហូតដល់ថ្ងៃកើតហេតុ ឈ្មោះកុងផាក ចូលក្នុងបន្ទប់ដោយដាក់គន្លឹះជាប់តាំងពីព្រឹករហូតដល់ម៉ោង៥ល្ងាច ដោយមានការសង្ស័យម្តាយព្រមទាំងបងប្អូនចាក់សោទ្វារចូលទៅក្នុងបន្ទប់ក៏បានឃើញឈ្មោះឡេ កុងផាក បានចង.កស្លាប់បាត់ទៅហើយ ។ តាមព័ត៌មានពីអ្នកជិតខាងម្នាក់បានឱ្យដឹងថា ឡេ កុងផាក ចង.កសម្លាប់ខ្លួននេះក៏ព្រោះបានយកលុយដើមទុនទិញវ៉ែនតាលក់នោះ ទៅសេពគ្រឿងញៀនអស់ ទើបសំរេចចិត្តចង.កសម្លាប់ខ្លួនទាំងវ័យក្មេងបែបនេះ ។ ក្រោយហេតុការណ៍សមត្ថកិច្ចប៉ូលិសបច្ចេកទេសបានទៅធ្វើកោសល្យវិច័យ ឃើញថា ពិតជាស្លាប់ដោយការចង.កប្រាកដមែន មិនមានឃាតកម្មណាមួយកើតឡើងទេ ហើយស្លាប់នៅចន្លោះម៉ោង៣រសៀល ៕  |
| សាលាបារាំងចុងបូព៌ាមានបំណងជួយអភិរក្ស និងអភិវឌ្ឍប្រាសាទបុរាណកម្ពុជា Posted: 11 Feb 2011 02:02 AM PST  រាជធានីភ្នំពេញ ៖ នៅក្នុងជំនួបពិភាក្សាការងារកាលពីពេលថ្មីៗនេះនៅទីស្តីការគណៈរដ្ឋមន្រ្តីជាមួយលោកគ្រីស្ទាន កូណាន់ (Christian Connan) ឯកអគ្គរដ្ឋទូតនៃសាធារណរដ្ឋបារាំងប្រចាំនៅកម្ពុជា និងលោកហ្រ្វង់ស៊ីស្គុស វ៉ារីឡែន (Franciscus Varellen ) នាយកសាលាបារាំងចុងបូព៌ា លោកបណ្ឌិតសុខ អាន ឧបនាយករដ្ឋមន្រ្តី រដ្ឋមន្រ្តីទទួលបន្ទុកទីស្តីការគណៈរដ្ឋមន្រ្តីបានមានប្រសាសន៍ថ្លែងអំណរគុណចំពោះសាលាបារាំងចុងបូព៌ា និងរដ្ឋាភិបាលសាធារណរដ្ឋបារាំង ដែលបានជួយជួសជុលប្រាសាទបាពួន និងមានបំណងប្រគល់ឯកសារ និងផ្ទេរចំណេះដឹងស្តីពីការអភិរក្ស និងអភិវឌ្ឍប្រាសាទបុរាណ ព្រមទាំងបំណងចង់ជួយជួសជុលប្រាសាទមេបុណ្យខាងលិចឲ្យកម្ពុជា។ ករណីនេះ លោកបណ្ឌិត សុខ អាន បានឲ្យអាជ្ញាធរអប្សរានិងអាជ្ញាធរព្រះវិហារបន្តធ្វើការ ងារជាក់ស្តែងជាមួយស្ថានទូតបារាំង និងសាលាបារាំងចុងបូព៌ា។ លោកហ្រ្វង់ស៊ីស្គុស វ៉ារីឡែន (Franciscus Varellen) មានប្រសាសន៍ថា សាលាបារាំងចុងបូព៌ាបានបញ្ចប់ការងារជួសជុលប្រាសាទបាពួន ហើយមានបំណងបើកធ្វើសិក្ខាសាលាមួយដើម្បី ផ្សព្វផ្សាយការងារដែលសាលាបារាំងចុងបូព៌ាបានធ្វើ រួមមានការសម្តែងសិល្បៈផង និងប្រកាសឲ្យដឹងពីការចូលរួមបន្តជួយជួសជុល ប្រាសាទមេបុណ្យខាងលិច ដោយមានការ អញ្ជើញចូលរួមពីលោកនាយករដ្ឋមន្រ្តីបារាំងផង នៅពេលឆាប់ៗខាងមុខនេះ។ លោកហ្រ្វង់ស៊ីស្គុស វ៉ារីឡែន (Franciscus Varellen) ក៏បានឲ្យដឹងផងដែរថា សាលាបារាំងចុងបូព៌ាប្រគល់នូវឯកសារស្តីពីការអភិរក្ស និងអភិវឌ្ឍប្រាសាទបុរាណតាំងពីឆ្នាំ១៩០៧ ពេលដែលសាលាបារាំងចុងបូព៌ាចូលមកជួយជួសជុលប្រាសាទ និងបង្កើតអភិរក្សដ្ឋានអង្គរឲ្យមកកម្ពុជាក៏ដូចជាត្រៀមផ្ទេរចំណេះដឹងដល់ស្ថាបត្យករកម្ពុជាស្តីពី ការអភិរក្សនិងអភិវឌ្ឍប្រាសាទបុរាណតាមរយៈទទួលធ្វើការបណ្តុះបណ្តាលផងដែរ។ មានប្រសាសន៍ក្នុងឱកាសនោះដែរ លោក គ្រីស្ទាន កូណាន់ (Christian Connan) បាន ឲ្យដឹងថា ស្ថានទូតសាធារណរដ្ឋបារាំងប្រចាំនៅកម្ពុជា បានគាំទ្រគម្រោងការនានារបស់សាលា បារាំងចុងបូព៌ានៅកម្ពុជា និងត្រៀមជួយសម្រួលការងារជូនចំពោះអាជ្ញាធរព្រះវិហារដែលមានបំណងចង់សុំអ្នកឯកទេសបារាំងដែលបានជួយជួសជុលប្រាសាទបាពួនធ្វើជាទីប្រឹក្សាពិគ្រោះយោបល់។ លោកបណ្ឌិត សុខ អាន មានប្រសាសន៍ថា លោកនឹងស្នើសុំរាជរដ្ឋាភិបាលកម្ពុជាដើម្បីធ្វើការប្រគល់ជូននូវគ្រឿងឥស្សរិយយសដល់អ្នកជំនាញការបារាំងដែលបានមកជួយជួសជុល ប្រាសាទបុរាណកម្ពុជាផងដែរដើម្បីជាការថ្លែង អំណរគុណ៕  |
| មន្ត្រីជប៉ុននឹងចូលរួមចំណែកជាមួយកម្ពុជាក្នុងការប្រឆាំងភេរវកម្ម Posted: 11 Feb 2011 01:55 AM PST  រាជធានីភ្នំពេញ ៖ លោកអ៊ាង សុផល្លែត ជំនួយការសម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាបានឱ្យដឹងថា ក្នុងជំនួបពិភាក្សាការងារជាមួយសម្តេចតេជោនារសៀលថ្ងៃទី១០ ខែកុម្ភៈ ឆ្នាំ២០១១ នៅវិមានសន្តិភាពនៃទីស្តីការនាយករដ្ឋមន្ត្រី លោក TAKAAKI MOJIMA ឯកអគ្គរាជទូតទទួលបន្ទុកកិច្ចសហប្រតិបត្តិការប្រឆាំងភេរវកម្មប្រទេសជប៉ុនបានជំរាបសម្តេចតេជោនាយករដ្ឋមន្ត្រីថា វត្តមានរបស់លោកនៅកម្ពុជានាពេលនេះ គឺដើម្បីចូលរួមប្រជុំអាស៊ាន-ជប៉ុនពាក់ព័ន្ធទៅនឹងការប្រយុទ្ធប្រឆាំងអំពើភេរវកម្ម។ លោកឯកអគ្គរាជទូតបានថ្លែងអំណរគុណចំពោះសម្តេចតេជោនាយករដ្ឋមន្ត្រីដែលបានយកចិត្តទុកដាក់យ៉ាងខ្លាំងទៅលើការប្រយុទ្ធប្រឆាំងអំពើភេរវកម្មនេះ រួមទាំងកិច្ចសហប្រតិបត្តិការល្អជាមួយជប៉ុនផង និងក្នុងក្របខណ្ឌអាស៊ានផង។ លោក TAKAAKI មានប្រសាសន៍ថា កិច្ចប្រជុំពិគ្រោះសន្ទនាអាស៊ាន-ជប៉ុនស្តីពីការប្រយុទ្ធប្រឆាំងអំពើភេរវកម្មនេះ គឺបានប្រព្រឹត្តឡើងតាំងពីឆ្នាំ២០០៥មក ហើយជប៉ុនបានដើរតួយ៉ាងសំខាន់នៅក្នុងកិច្ចសន្ទនានេះ ជាពិសេសរវាងអាស៊ាន-ជប៉ុន។ ជប៉ុនគិតថា កិច្ចសន្ទនានេះក៏ចូលរួមចំណែកក្នុងការធ្វើសមាហរណកម្មអាស៊ានផងដែរ។ ជប៉ុនយកចិត្តទុកដាក់យ៉ាងខ្លាំងលើបញ្ហានេះ ហើយរូបលោកផ្ទាល់ និងជប៉ុនក្នុងការប្រឹងប្រែងអស់ពីកំលាំងកាយចិត្តក្នុងការធ្វើសហប្រតិបត្តិការជាមួយកម្ពុជាធ្វើយ៉ាងណាឱ្យកិច្ចប្រជុំនេះបានទទួលផ្លែផ្កា។ សម្តេចតេជោនាយករដ្ឋមន្ត្រី ហ៊ុន សែន មានប្រសាសន៍ថា វត្តមានរបស់ជប៉ុននៅក្នុងកិច្ចប្រជុំនេះពិតជានាំទៅរកជោគជ័យដ៏ត្រចះត្រចង់មិនខាន។ ទន្ទឹមនេះសម្តេចបានស្នើយោបល់ឱ្យធ្វើការពិចារណាផ្លាស់ប្តូរកិច្ចប្រជុំនេះចាប់ពីឆ្នាំខាងមុខពីកិច្ចប្រជុំដៃគូសន្ទនាអាស៊ាន-ជប៉ុនឱ្យទៅជាកិច្ចប្រជុំដៃគូកិច្ចសហប្រតិបត្តិការអាស៊ាន-ជប៉ុនវិញ។ សម្តេចតេជោនាយករដ្ឋមន្ត្រីបានជំរាបលោក TAKAAKI ថា កម្ពុជាត្រៀមខ្លួនជានិច្ចដើម្បីធ្វើសហប្រតិបត្តិការក្នុងក្របខណ្ឌកម្ពុជា-ជប៉ុន, កម្ពុជា-អាស៊ាន និងកម្ពុជាជាមួយដៃគូដទៃទៀតដើម្បីប្រយុទ្ធប្រឆាំងអំពើភេរវកម្ម។ សម្តេចសង្ឃឹមថា ជប៉ុននឹងជួយចូលរួមចំណែកដល់កម្ពុជាលើវិស័យនេះ។ កិច្ចប្រជុំនេះធ្វើនៅរាជធានីភ្នំពេញពីថ្ងៃទី១០ ដល់ថ្ងៃទី១១ ខែកុម្ភៈ ២០១១៕  |
| លេចព័ត៌មានពីលោកគឹម ជុងអ៊ីល រៀបការថ្មីទៀត Posted: 11 Feb 2011 01:45 AM PST  ព័ត៌មានអំពីការរៀបការកាលពី២ឆ្នាំមុន របស់មេដឹកនាំកូរ៉េខាងជើង លោកគីម ជុងអ៊ីល ជាមួយសហជីវនីមួយរូបរបស់លោកគឺលោកស្រីគីម អុក ត្រូវបានលើកឡើងទៀតកាលពីថ្ងៃទី១១ កុម្ភៈ ។ ម្យ៉ាងវិញទៀត វត្តមាននៃកូនប្រុសម្នាក់អាយុ៧ឆ្នាំ គេថា ដោយសារសម្ព័ន្ធភាពស្នេហារបស់អ្នកទាំង២ ក៏ត្រូវបានគេលាតត្រដាងដែរ ។ លោកស្រីប៉ាក ស៊ុនយ៉ុង សមាជិកាសភាកូរ៉េខាងត្បូង ស្ថិតក្នុងគណៈកម្មការកិច្ចការបរទេស និងបង្រួបបង្រួមរបស់សភាជាតិអះអាងក្នុងកិច្ចសន្ទនាតាមទូរស័ព្ទមួយ ជាមួយទីភ្នាក់ងារព័ត៌មានកូរ៉េខាងត្បូង YONHAP ថា លោកស្រីបានទទួលព័ត៌មានទាំងនេះពីបណ្តាមន្ត្រីជាន់ខ្ពស់ ចិនដែលធ្វើការខាងផ្នែកស៊ើបការណ៍របស់ចិន ។ យោងតាមលោកស្រីប៉ាក ថា លោកស្រីគីម អុក ជាមនុស្សនិយមកណ្តាលម្នាក់ ដែលប្រឆាំងនឹងការបាញ់គ្រាប់បែកបុកលើនាវាចម្បាំងកូរ៉េខាងត្បូង CHEONAN រហូតដល់ពេលចុងក្រោយ ។ លោកស្រីក៏ជាអ្នកលើកឡើងដែរ ពីមរណភាពរបស់នាយករងនាយកដ្ឋានគ្រប់គ្រងនៃបក្សពលករកូរ៉េខាងជើងលោក RI JE-GANG កាលពីខែមិថុនា កន្លងមកនេះ ។ កូរ៉េខាងជើងធ្លាប់ប្រកាសថា ការស្លាប់របស់ជននេះដោយសារគ្រោះថ្នាក់រថយន្ត ក៏ប៉ុន្តែតាមពិតលោកត្រូវសម្លាប់ដោយសារតែលោកហ៊ានប្រឆាំងនឹងការបាញ់នាវា CHEONAN ។ ក៏ប៉ុន្តែអ្នកទទួលខុសត្រូវម្នាក់របស់រដ្ឋាភិបាលកូរ៉េខាងត្បូងបានសំដែងការសង្ស័យលើព័ត៌មានថ្មីៗទាំងនេះ ។ ពាក្យលេចឮពីការរៀបការរវាងមនុស្សទាំង២នេះត្រូវលើកឡើងជាច្រើនលើក ក៏ប៉ុន្តែគេពិបាកក្នុងការអះអាងណាស់ ។ អ្នកទទួលខុសត្រូវរូបនេះបន្តថា តាមការយល់ឃើញផ្ទាល់ខ្លួន ខ្ញុំគិតថា ព័ត៌មានទាំងនោះពុំគួរឱ្យជឿជាក់ឡើយ ៕  |
| ជនដៃឆៅបាញ់មនុស្សនៅមុខក្លឹបឡឺវេស ត្រូវចាប់ខ្លួនបានម្នាក់ហើយ Posted: 11 Feb 2011 01:25 AM PST រាជធានីភ្នំពេញ ៖ ជនដៃដល់បាញ់មនុស្សមិនញញើតដៃបណ្តាលឱ្យនិស្សិត២នាក់រងរបួសធ្ងន់ នៅមុខក្លឹបខារ៉ាអូខេឡឺវេសនោះ ត្រូវបានសមត្ថកិច្ចស្រាវជ្រាវចាប់ខ្លួនបានម្នាក់ហើយកាលពីព្រឹកថ្ងៃទី១១ កុម្ភៈ ២០១១ គឺសហការជាមួយអង្គភាពភូមិភាគពិសេសចាប់ខ្លួនយកចេញពីបន្ទាយតែម្តង ព្រោះជនដៃដល់ជាមន្ត្រីយោធាស័ក្តិ៣ បំរើការក្នុងអង្គភាពភូមភាគពិសេស ។ ជនដៃដល់ម្នាក់នេះឈ្មោះសុខ សុវណ្ណ ជិះរថយន្តម៉ាកឡិចស៊ីស ស៊េរី៤៧០ ពណ៌ស ពាក់ស្លាកលេខ ភ្នំពេញ 2Q-2220 ឥឡូវកំពុងត្រូវបានសាកសួរនៅអធិការដ្ឋាននគរបាលខណ្ឌទួលគោក ពាក់ព័ន្ធនឹងជម្លោះបាញ់ប្រហារនេះ ។ ការស្រាវជ្រាវចាប់ខ្លួនបាននេះ គឺធ្វើឡើងតាមរយៈស្លាកលេខរថយន្ត ភ្នំពេញ 2Q-2220 នេះឯង និងដកហូតបានកាំភ្លើងខ្លី ស៊េរីទំនើប១ដើម...ឥឡូវនេះប៉ូលិសកំពុងស្វែងរកចាប់ខ្លួនបក្សពួករបស់គេច្រើននាក់ជាបន្តទៀត ។ គួររំលឹកថា និស្សិត២នាក់បានរងរបួសដោយការបាញ់ពីជនមិនស្គាល់មុខមួយក្រុមជិះរថយន្តឡិចស៊ីស ពណ៌ស២គ្រឿង បន្ទាប់ពីចេញពីផឹកស៊ីទាស់ពាក្យសំដីគ្នានៅក្លឹបខារ៉ាអូខេឡឺវេស ។ សមត្ថកិច្ចឱ្យដឹងថា ហេតុការណ៍នោះកើតឡើងកាលពីវេលាម៉ោង២រំលងអធ្រាត្រថ្ងៃទី១០ ខែកុម្ភៈ នៅមុខហាងខារ៉ាអូខេឡឺវេស ស្ថិតនៅផ្លូវលេខ២៣០ សង្កាត់ផ្សារដើមគ ខណ្ឌទួលគោក រាជធានីភ្នំពេញ។ ជនរងគ្រោះ ១-ឈ្មោះឈួន វិឆ្ឆ័យ ភេទ ប្រុស អាយុ២១ឆ្នាំ ជានិស្សិត រស់នៅផ្ទះលេខ១៤៨A មហាវិថីម៉ៅសេទុង សង្កាត់ទួលទំពូងទី២ ខណ្ឌចំការមន រងរបួស១គ្រាប់ចំត្រចៀកខាងស្តាំគ្រាប់បៀមកំពុងសំរាកព្យាបាលនៅគ្លីនិកទួលគោក និង២-ឈ្មោះហែម សុធារាន់ ភេទប្រុស អាយុ១៩ឆ្នាំ ជានិស្សិត មានទីលំនៅក្នុងខេត្តកំពង់ចាម រងរបួស១គ្រាប់ចំភ្លៅស្តាំធ្លាយត្រូវេគបញ្ជូនទៅកាន់មន្ទីរពេទ្យព្រះកុសុមៈ។ សមត្ថកិច្ចឱ្យដឹងថា ជនដៃដល់មានគ្នាប្រមាណ៥ទៅ៦នាក់ជិះរថយន្តម៉ាកឡិចស៊ីស៤៧០ពណ៌ស ២គ្រឿង ប្រដាប់ដោយកាំភ្លើងម៉ាកឡុក។ ក្រុមនេះបើករថយន្តដេញបាញ់រថយន្តចំនួន២គ្រឿង និងម៉ូតូរបស់ក្រុមជនរងគ្រោះជាច្រើនគ្រាប់។ ការផ្ទុះអាវុធនេះ បន្ទាប់ពីពួកគេទាំង២ក្រុមទាស់ពាក្យសំដីគ្នានៅមុខហាងខារ៉ាអូខេឡឺវេស។ ទោះបីជាយ៉ាងណាក្តី គេពុំដឹងថា ពួកគេមានទំនាស់គ្នារឿងអ្វីឡើយ តែបើតាមសាក្សីខ្លះថា មកពីផឹកស្រវឹងឌឺដងដាក់គ្នា ខ្លះទៀតថា ទំនាស់រឿងស្រី ៕  |
| ឆ្នេរសមុទ្រកម្ពុជាជាប់ជាសមាជិកពេញសិទ្ធិរបស់ក្លឹបឆ្នេរសមុទ្រស្អាតបំផុតលើលោក Posted: 11 Feb 2011 01:11 AM PST    រាជធានីភ្នំពេញ ៖ គណៈកម្មការអន្តរក្រសួងដើម្បីដាក់បញ្ចូលឆ្នេរសមុទ្រកម្ពុជា ជាសមាជិកក្លឹបឆ្នេរសមុទ្រដែលស្អាតបំផុតលើសាកលលោក បានប្រកាសកាលពីថ្ងៃទី១០ កុម្ភៈ ថា ឆ្នេរសមុទ្រកម្ពុជាត្រូវបានទទួលស្គាល់ជាសមាជិកពេញសិទ្ធិនៃក្លឹបឆ្នេរសមុទ្រដែលស្អាតបំផុតលើសាកលលោក ក្នុងកិច្ចប្រជុំក្រុមប្រឹក្សាភិបាលក្លឹបកាលពីថ្ងៃទី២២ មករា ឆ្នាំ២០១១នៅទីក្រុងកាហ្សែស (Cargese) ប្រទេសបារាំង ដោយបានបោះឆ្នោតសំរេចគាំទ្រដោយសំឡេងជាឯកច្ឆន្ទ ។ លោកអ៊ឹម ឈុនលឹម ទេសរដ្ឋមន្ត្រី រដ្ឋមន្ត្រីក្រសួងរៀបចំដែនដីនគរូបនីយកម្ម និងសំណង់ និងជាប្រធានគណៈកម្មការអន្តរក្រសួងបានឱ្យដឹងថា ការសំរេចខាងលើនេះ អាស្រ័យដោយលក្ខណសម្បត្តិរបស់ឆ្នេរសមុទ្រកម្ពុជាបានឆ្លើយតបគ្រប់គ្រាន់រាល់លក្ខខណ្ឌតំរូវដោយក្លឹប និងសំណុំឯកសារប្រកបដោយគុណភាពពិសេសគឺភាពវៃឆ្លាតរបស់កម្ពុជាក្រោមការដឹកនាំដ៏ត្រឹមត្រូវរបស់រាជរដ្ឋាភិបាលដែលមានសម្តេចអគ្គមហាសេនាបតីតេជោ ហ៊ុន សែន ជាប្រមុខដោយបានស្នើដាក់បញ្ចូលឆ្នេរសមុទ្រទាំងមូលដែលមានប្រវែង៤៤០គីឡូម៉ែត្រ កាត់ខេត្ត៤ គឺកោះកុង ព្រះសីហនុ កំពត និងកែប ក្រោមឈ្មោះរួមថា «ឆ្នេរសមុទ្រកម្ពុជា» ។ លោកទេសរដ្ឋមន្ត្រីបានឱ្យដឹងទៀតថា ការជាប់ជាសមាជិកពេញសិទ្ធិនេះ ផ្តើមចេញពីការទទួលយកបេក្ខភាពរបស់ឆ្នេរសមុទ្រកម្ពុជា នាឱកាសមហាសន្និបាតលើកទី៦ របស់ក្លឹបដែលបានប្រព្រឹត្តទៅកាលពីថ្ងៃទី២៨ មេសាដល់ថ្ងៃទី២ ឧសភា ឆ្នាំ២០១០ នៅទីក្រុងហាឡុង ប្រទេសវៀតណាម ដោយមហាសន្និបាតបានសំរេចទទួលយកបេក្ខភាពឆ្នេរចំនួន២ក្នុងចំណោមឆ្នេរចំនួន៣ ដែលបានដាក់សុំគឺមានឆ្នេរសមុទ្រកកម្ពុជា ឆ្នេរសមុទ្រ Patmos របស់ប្រទេសក្រិច និងឆ្នេរសមុទ្រ Mackenzie របស់ប្រទេសកាណាដា ។ លោកទេសរដ្ឋមន្ត្រីបានបញ្ជាក់ថា រដ្ឋាភិបាលបានសំរេចបង្កើតគណៈកម្មការអន្តរក្រសួងដើម្បីដាក់បញ្ចូលឆ្នេរសមុទ្រកម្ពុជា ជាសមាជិកក្លឹបឆ្នេរសមុទ្រដែលស្អាតបំផុតលើសាកលលោក ដោយមានរូបលោកផ្ទាល់ជាប្រធាន លោកទេសរដ្ឋមន្ត្រី ម៉ុក ម៉ារ៉េត រដ្ឋមន្ត្រី ក្រសួងបរិស្ថាន ជាអនុប្រធាន និងលោកថោង ខុន រដ្ឋមន្ត្រីក្រសួងទេសចរណ៍ជាអនុប្រធានអចិន្ត្រៃយ៍ ។ គណៈកម្មការអន្តរក្រសួងនេះ មានតួនាទីសហការជាមួយក្រុមប្រឹក្សាភិបាលក្លឹបដើម្បីជំរុញការដាក់បញ្ចូលឆ្នេរសមុទ្រកម្ពុជា ជាសមាជិកក្លឹប ត្រៀមរៀបចំទទួលដំណើរទស្សនកិច្ចរបស់ប្រតិភូក្លឹប និងរៀបចំសំណុំឯកសារផ្លូវការសំរាប់ដាក់ជូនក្រុមប្រឹក្សាភិបាលក្លឹបសំរេច ។ លោកថោង ខុន រដ្ឋមន្ត្រីក្រសួងទេសចរណ៍ និងជាអនុប្រធានអចិន្ត្រៃយ៍គណៈកម្មការអន្តរក្រសួងបានមានប្រសាសន៍ថា ក្លឹបនេះត្រូវបានបង្កើតឡើងជាផ្លូវការក្នុងឆ្នាំ១៩៩៧ នៅទីក្រុងប៊ែរឡាំង ប្រទេសអាល្លឺម៉ង់ (ជា ONG auprès des Nations Unies ដែលស្ថិតក្រោមការគាំទ្ររបស់អង្គការយូណេស្កូ (UNESCO)) ក្នុងគោលបំណងសំខាន់ៗចំនួន៣ រួមមានទី១-សំរួលការដោះដូរបទពិសោធន៍រវាងសមាជិក លើបញ្ហាបរិស្ថាន សង្គម សេដ្ឋកិច្ច និងទេសចរណ៍ និងធ្វើការចែករំលែកអំពីលទ្ធផលស្រាវជ្រាវ និងសិក្សាបែបវិទ្យាសាស្ត្រនានាទាក់ទងនឹងការអភិវឌ្ឍ និងការអភិរក្សដោយឈរលើគោលការណ៍និរន្តរភាពដល់សមាជិក ទី២-ជំរុញការដោះដូរបទពិសោធន៍ និងជំនាញរវាងសមាជិកលើការងារផ្សព្វផ្សាយទេសចរណ៍ និងទី៣-ជំរុញឱ្យមានការភ្ជាប់ទំនាក់ទំនង និងផ្លាស់ប្តូររវាងប្រជាជន និងប្រជាជនដែលរស់នៅតាមឆ្នេរជាសមាជិក (លើការងារសង្គម វប្បធម៌ កីឡា។ល។) ។ លោករដ្ឋមន្ត្រី ថោង ខុន បានបន្តថា ជាការពិត ការជាប់ជាសមាជិកក្លឹបឆ្នេរសមុទ្រដែលស្អាតបំផុតលើសាកលលោកនេះ នឹងផ្តល់ផលប្រយោជន៍ជាច្រើនដល់កម្ពុជា មានជាអាទិ៍ ទី១-ចូលរួមគាំទ្រដល់ការអភិវឌ្ឍទេសចរណ៍ប្រកបដោយនិរន្តរភាព និងការទទួលខុសត្រូវនៅតំបន់ឆ្នេរ ដោយកម្ពុជានឹងអាចដកស្រង់បទពិសោធន៍ល្អៗក្នុងការអនុវត្ត (Best Practices) ក៏ដូចជាទទួលជំនាញបច្ចេកទេស (Expertise) ក្នុងការគ្រប់គ្រងតំបន់ឆ្នេរពីឆ្នេរជាសមាជិកដទៃទៀត ពិសេសលើការអភិវឌ្ឍ និងការអភិរក្សតំបន់ឆ្នេរ ព្រមទាំងការបង្កើនប្រសិទ្ធភាពសេដ្ឋកិច្ចនៅតំបន់ឆ្នេរសមុទ្រ តាមរយៈការអភិវឌ្ឍវិស័យទេសចរណ៍ជាដើម ។ល។ ទី២-បង្កើនកំលាំងផ្សព្វផ្សាយសក្តានុពលទេសចរណ៍តំបន់ឆ្នេរសមុទ្រកម្ពុជា ដោយយើងនឹងមានសិទ្ធិក្នុងការប្រើប្រាស់និមិត្តសញ្ញាផ្លូវការរបស់ក្លឹប «ឆ្នេរសមុទ្រដែលស្អាតបំផុតលើសាកលលោក» ដែលនឹងចូលរួមគាំទ្រដល់យុទ្ធនាការផ្សព្វផ្សាយទេសចរណ៍ «កម្ពុជាៈ ព្រះរាជាណាចក្រអច្ឆរិយៈ» និងជួយលើកស្ទួយកិត្យានុភាពឆ្នេរសមុទ្រកម្ពុជា នៅលើឆាកអន្តរជាតិ (ដោយអាចភ្ជាប់ទៅនឹងវ៉េបសាយរបស់ក្លឹប www.world-bays.com) ពិសេសចូលរួមគាំទ្រគោលនយោបាយពង្រីកគោលដៅទេសចរណ៍ឱ្យមានភាពសំបូរបែប ពីតំបន់ទេសចរណ៍វប្បធម៌ (សៀមរាប-អង្គរ) ទៅកាន់តំបន់ឆ្នេរសមុទ្រផងដែរ ។ ទី៣-ក្លឹបបានទទួលស្គាល់ឈ្មោះ «ឆ្នេរសមុទ្រកម្ពុជា» (Cambodia Bay-La Baie du Cambodge) ជាផ្លូវការ ដែលនេះនឹងផ្តល់អំណោយផលល្អសំរាប់តំបន់ឆ្នេរសមុទ្រកម្ពុជាលើឆាកអន្តរជាតិ ដែលជាទូទៅត្រូវបានស្គាល់ថា ស្ថិតនៅតំបន់ឈូងសមុទ្រថៃ (Gulf of Thailand) ។ លើសពីនេះទៅទៀត ដើម្បីជំរុញដំណើរការគ្រប់គ្រង និងអភិវឌ្ឍន៍ឆ្នេរសមុទ្រកម្ពុជាឱ្យបានល្អស្អាតស័ក្តិសមជាសមាជិកនៃក្លឹបឆ្នេរសមុទ្រដែលស្អាតបំផុតលើសាកលលោក គណៈកម្មការអន្តរក្រសួង នឹងបន្តអនុវត្តផែនការសកម្មភាពរបស់ខ្លួន ដោយក្នុងនោះផ្តោតជាសំខាន់លើចំណុចចំនួន៤ ដូចខាងក្រោម ៖ គួរបញ្ជាក់ថា យោងតាមលិខិតរបស់លោកប្រធានក្លឹប ការចូលជាសមាជិកពេញសិទ្ធិរបស់ឆ្នេរសមុទ្រកម្ពុជា នឹងត្រូវប្រកាសជាផ្លូវការនាឱកាសមហាសន្និបាតលើកទី៧ របស់ក្លឹបដែលនឹងប្រារព្ធធ្វើឡើងពីថ្ងៃទី២២ ដល់ថ្ងៃទី២៦ ខែឧសភា ឆ្នាំ២០១១ ខាងមុខនៅប្រទេសសេណេហ្គាល់ ហើយពេលនោះក៏មានការប្រគល់វិញ្ញាបនបត្រទទួលស្គាល់កម្ពុជាជាសមាជិកផងដែរ៕  |
| រថភ្លើងធ្លាក់ផ្លូវជិតក្រុងសេអ៊ូលពុំមានជនរងគ្រោះ Posted: 11 Feb 2011 01:10 AM PST  រថភ្លើងលឿនមួយខ្សែរបស់កូរ៉េខាងត្បូង (KTX) ដែលរត់ទៅកាន់ក្រុងសេអ៊ូល បានធ្លាក់ពីផ្លូវដែកកាលពីថ្ងៃទី១១ កុម្ភៈ នៅជិតស្ថានីយមួយនាភាគនិរតីរដ្ឋធានី ក៏ប៉ុន្តែពុំមានសេចក្តីរាយការណ៍ពីជនរងគ្រោះឡើយ ។  |
| You are subscribed to email updates from Koh Santepheap Daily To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
