VOA News: ព័ត៌មាន: “ស.រ.អា ផ្អាកការដាក់ទណ្ឌកម្មសេដ្ឋកិច្ចលើប្រទេសភូមា” plus 3 more |
- ស.រ.អា ផ្អាកការដាក់ទណ្ឌកម្មសេដ្ឋកិច្ចលើប្រទេសភូមា
- មានការចាប់ប្រជាពលរដ្ឋថែមទៀតបន្ទាប់ពីការបាញ់សម្លាប់ក្មេងស្រីនៅក្រចេះ
- គណបក្សធំប្រើប្រព័ន្ធផ្សព្វផ្សាយបានច្រើនជាងគណបក្សតូចៗពេលឃោសនាបោះឆ្នោត
- ហេឡូវីអូអេ ១៧ ឧសភា ២០១២៖ អាថ៌កំបាំងនិងសិល្បៈនៃជីវិត
| ស.រ.អា ផ្អាកការដាក់ទណ្ឌកម្មសេដ្ឋកិច្ចលើប្រទេសភូមា Posted: 18 May 2012 08:29 AM PDT សហរដ្ឋអាមេរិកបានប្រកាសថាដំណាក់ការថ្មីនៅក្នុងទំនាក់ទំនងរបស់ខ្លួនជាមួយប្រទេសភូមា ដោយផ្អាកការដាក់ទណ្ឌកម្មសេដ្ឋកិច្ចទាំងអស់ហើយនិងតែងតាំងឯកអគ្គរដ្ឋទូតលើកដំបូងរបស់សហរដ្ឋអាមេរិកប្រចាំនៅប្រទេសក្នុងភូមិភាគអាស៊ីអគ្នេយ៍មួយនេះ នៅក្នុងរយៈពេលជាង២០ឆ្នាំនេះ។ រដ្ឋមន្រ្តីក្រសួងការបរទេសសហរដ្ឋអាមេរិកលោកស្រី ហ៊ីឡារី គ្លីនតុន (Hillary Clinton) បានធ្វើការប្រកាសកាលពីថ្ងៃព្រហស្បត៍ជាមួយរដ្ឋមន្រ្តីការបរទេសភូមាលោក វ៉ូនណា ម៉ោង ល្វីន (Wunna Maung Lwin) ដែលកំពុងបំពេញទស្សនកិច្ចនៅស.រ.អា ដែលលោកជាមន្រ្តីទីមួយរបស់ប្រទេសនោះដែលបានបំពេញទស្សនកិច្ចក្នុងរដ្ឋធានីវ៉ាស៊ីនតោន (Washington) ក្នុងរយៈពេលប៉ុន្មានទសវត្សរ៍នេះ។ លោកស្រីមានប្រសាសន៍ថា នៅថ្ងៃនេះយើងនិយាយទៅកាន់ពាណិជ្ជករអាមេរិកាំងពីការវិនិយោគទុននៅក្នុងប្រទេសភូមាហើយធ្វើការវិនិយោគនោះដោយមានការទទួលខុសត្រូវ។ ធ្វើជាភ្នាក់ងារនាំការផ្លាស់ប្តូរប្រកបដោយវិជ្ជមានហើយនិងពាណិជ្ជករដ៏ល្អ។ ចូរយើងទាំងអស់គ្នាធ្វើការជាមួយគ្នាដើម្បីបង្កើតការងារ កលានុវត្តភាព ហើយនិងគាំទ្រកំណែទម្រង់។ ព័ត៌មានអន្តរជាតិសំខាន់ៗផ្សេងទៀត៖ ស៊ីរី៖ ស៊ីរីបានប្រុងប្រៀបទប់ទល់នឹងការប្រឆាំងតវ៉ារបស់ពួកប្រឆាំងនៅថ្ងៃសុក្រនេះនៅពេលដែលមន្រ្តីអង្គការសហប្រជាជាតិបានសម្តែងនូវសេចក្តីព្រួយបារម្ភថាពួកអាល កៃដា (al-Qaida) អាចដើរតួនាទីដ៏សំខាន់នៅក្នុងការវាយប្រហារកាលពីពេលថ្មីៗនេះដែលបានធ្វើឲ្យកិច្ចព្រមព្រៀងឈប់បាញ់គ្នាដ៏ប្រេះស្រួយនេះកាន់តែយ៉ាប់យឺនទៅ។ <!--IMAGE-RIGHT-->ស.រ.អា៖ លោកប្រធានាធិបតី បារ៉ាក់ អូបាម៉ា កំពុងធ្វើជាម្ចាស់ផ្ទះរៀបចំទទួលមេដឹកនាំពិភពលោកនៅសន្និសីទកំពូល ជាទីដែលបញ្ហាប្រទេសអាហ្វហ្គានីស្ថាន អ៊ីរ៉ង់និងសេដ្ឋកិច្ចសកលលោកត្រូវបានរំពឹងថានឹងយកមកពិភាក្សា។ ចិន/ស.រ.អា៖ ចិនបានរិះគន់ការដាក់ពន្ធទប់ទល់នឹងការលក់បង្ខូចថ្លៃរបស់សហរដ្ឋអាមេរិកលើបន្ទះស្រូបកំដៅព្រះអាទិត្យរបស់ចិន ដោយកំពុងបង្កើនភាពតានតឹងខាងពាណិជ្ជកម្មរវាងសេដ្ឋកិច្ចដ៏ធំទាំងពីររបស់ពិភពលោក។ ស.រ.អា/អ៊ីរ៉ង់៖ បេសកជនសហរដ្ឋអាមេរិកប្រចាំប្រទេសអ៊ីស្រាអែលបាននិយាយនៅសប្តាហ៍នេះថារដ្ឋាភិបាលទីក្រុងវ៉ាស៊ីនតោន (Washington) មានបំណងប្រើកម្លាំងយោធាប្រសិនបើចាំបាច់ដើម្បីបញ្ឈប់អ៊ីរ៉ង់កុំឲ្យបានទទួលអាវុធនុយក្លែអ៊ែរហើយមានផែនការរួចទៅហើយក្នុងការវាយប្រហារ។ ចិន៖ អ្នកនិរទេសនាំមុខមួយក្រុមបានឲ្យដឹងថា ការបង្ក្រាបរបស់អាជ្ញាធរចិននៅក្នុងតំបន់ស្វយ័តទីបេ កំពុងប្រែក្លាយវត្តអារ៉ាមនិងអាវាសដូនជីព្រះពុទ្ធសាសនាដែលជាទីកន្លែងគោរពបូជាទៅជាកន្លែងដែលគ្របដណ្តប់ដោយការឃោសនារបស់រដ្ឋចិន។ អាហ្វហ្គានីស្ថាន៖ អង្គការអូតង់បានប្រាប់ឲ្យដឹងថា ការវាយប្រហាររបស់ពួកបះបោរក្នុងភាគខាងកើតនៃប្រទេសអាហ្វហ្គានីស្ថានបានសម្លាប់កងទ័ពចម្រុះអន្តរជាតិ២នាក់។ សេដ្ឋកិច្ច៖ Facebook ដែលជាគេហទំព័របណ្តាញទំនាក់ទំនងសង្គមដ៏ធំបង្អស់របស់ពិភពលោក នឹងបញ្ចប់ការរង់ចាំរបស់ខ្លួននៅថ្ងៃនេះ នៅពេលដែលខ្លួនដាក់លក់ភាគហ៊ុនជាសាធារណៈនៅថ្ងៃសុក្រនេះ។ <!--AV--> This posting includes an audio/video/photo media file: Download Now |
| មានការចាប់ប្រជាពលរដ្ឋថែមទៀតបន្ទាប់ពីការបាញ់សម្លាប់ក្មេងស្រីនៅក្រចេះ Posted: 17 May 2012 08:25 PM PDT អាជ្ញាធរខេត្តក្រចេះ នៅថ្ងៃព្រហស្បតិ៍នេះ បានចាប់ឃាត់ខ្លួនប្រជាពលរដ្ឋចំនួនបួននាក់ ក្រោមបទចោទប្រកាន់ថា បានបង្កើតតំបន់អបគមន៍ខុសច្បាប់។ នេះបើតាមការបញ្ជាក់ពីមន្ត្រីសមត្ថកិច្ច។ ការឃាត់ខ្លួនប្រជាពលរដ្ឋបួននាក់នេះបានកើតមានឡើងក្រោយពេលដែលសមត្ថកិច្ចបានចុះបង្រ្កាបដោយហិង្សាមួយនៅភូមិប្រមា ឃុំកំពង់ដំរី ស្រុកឆ្លូង ខេត្តក្រចេះ។ យ៉ាងតិចមានកុមារីម្នាក់ឈ្មោះហេង ចន្ថា អាយុ១៤ឆ្នាំបានស្លាប់បាត់បង់ជីវិតភ្លាមៗ នៅពេលដែលកម្លាំងសមត្ថកិច្ចចម្រុះដែលរួមមានមន្ត្រីនគរបាល កងរាជអាវុធហត្ថ និងមន្ត្រីយោធាបានបាញ់សម្លាប់ដោយផ្ទាល់ដៃ នៅក្នុងខណៈពេលដែលចុះបណ្តេញប្រជាពលរដ្ឋចេញពីភូមិ ដោយចោទប្រកាន់ថាបានបង្កើតតំបន់អណាធិបតេយ្យ។ លោកឧត្តមសេនីយ៍ត្រី ជួង ស៊ាងហាក់ ស្នងការប៉ូលិសខេត្តក្រចេះបាននិយាយថាក្រុមប្រជាពលរដ្ឋបានទៅបង្កើតតំបន់អបគមន៍ខុសច្បាប់ដែលផ្ទុយនឹងរដ្ឋធម្មនុញ្ញ។ «មួយរយៈពេលមកហ្នឹង ពួកក្រុមសកម្មភាពវាហ្នឹង វាហុំព័ទ្ធប្រជាពលរដ្ឋដាក់បារ៉ាស ត្រួតពិនិត្យមើលទៅវាហ្នឹងជាអំណាចមួយនៅក្នុងហ្នឹងទៅហើយ។ ទៅធ្វើសកម្មភាពគំរាមគំហែង ចាប់បង្ខំគេឲ្យចូលទៅក្នុងសមាគមអ្នកប្រជាធិបតេយ្យ»។ ក្រោយពីសមត្ថកិច្ចបានចុះបង្ក្រាប ប្រជាពលរដ្ឋមួយចំនួនបានចាកចេញពីភូមិប្រមា និងមួយចំនួនទៀតបានស្នាក់នៅក្នុងភូមិនៅឡើយ។ ក៏ប៉ុន្តែបានដាក់ឲ្យនៅក្រោមការត្រួតពិនិត្យរបស់សមត្ថកិច្ច។ មន្ត្រីឃ្លាំមើលការរំលោភសិទ្ធិមនុស្ស និងអ្នកកាសែតមិនត្រូវបានអនុញ្ញាតឲ្យចូលទៅក្នុងតំបន់នោះទេដោយសមត្ថកិច្ចបានលើកហេតុផលថា ដើម្បីរក្សាសន្តិសុខ និងសុវត្ថិភាព។ នេះបើតាមការបញ្ជាក់ពីលោកអំ សំអាត មន្ត្រីឃ្លាំមើលការរំលោភសិទ្ធិមនុស្សរបស់អង្គការលីកាដូ។ លោកបានមានប្រសាសន៍ថាអាជ្ញាធរគួរតែបង្កើតគណៈកម្មាធិការឯករាជ្យមួយចំពោះការស្លាប់បាត់បង់ជីវិតរបស់កុមារីហេង ចន្ថា។ «យើងជាសង្គមស៊ីវិល យើងសុំទទូចហើយ ទទូចទៀត។ ថាសុំឲ្យមានការស៊ើបអង្កេតដោយឯករាជ្យ ហើយចង់ឲ្យមានគណៈកម្មាធិការឯករាជ្យមួយ ដើម្បីធ្វើការស៊ើបអង្កេតលើការស្លាប់របស់ក្មេងស្រីនេះ ដើម្បីរកជនដែលប្រព្រឹត្តបទល្មើសហ្នឹងទៅផ្តន្ទាទោសទៅតាមផ្លូវច្បាប់»។ សពកុមារីហេង ចន្ថា ត្រូវបានក្រុមគ្រួសារកំពុងធ្វើបុណ្យតាមប្រពៃណីនៅភូមិប្រមា ឃុំកំពង់ដំរី។ លោកឧត្តមសេនីយ៍ឯកខៀវ សុភ័គ អ្នកនាំពាក្យក្រសួងមហាផ្ទៃបានមានប្រសាសន៍ថាសមត្ថកិច្ចកំពុងតែស្វែងរកការចាប់ខ្លួនប្រធានសមាគមអ្នកប្រជាធិបតេយ្យចំនួនប្រាំនាក់ផ្សេងទៀត ដែលជាប់ពាក់ព័ន្ធនឹងការបង្កើតតំបន់ខុសច្បាប់នេះ។ លោកបានបញ្ជាក់ថា អង្គការសង្គមស៊ីវិលមិនត្រូវលាក់បំពួនជនទាំងនោះទេ ប្រសិនណាបើឃើញពួកគេ ត្រូវរាយការណ៍ជូនសមត្ថកិច្ច។ «ដីកាចាប់ខ្លួនយើងមានហើយ ក៏ខ្ញុំសុំអំពាវនាវតាមរយៈវីអូអេ ចំពោះអង្គការសិទ្ធិមនុស្សផ្សេងៗសុំ។ ប្រសិនជាឃើញឈ្មោះនេះ ដែលជ្រកកោនក្នុងអង្គការសិទ្ធិមនុស្ស ក៏សុំផ្តល់ព័ត៌មានដល់សមត្ថកិច្ច ព្រោះយើងអនុវត្តតាមផ្លូវច្បាប់»។ លោកប៊ុន រដ្ឋា សមាជិកសមាគមអ្នកប្រជាធិបតេយ្យរបស់លោកម៉ម សុណង់ដូ នាយកវិទ្យុសំបុកឃ្មុំ និងប្រជាពលរដ្ឋចំនួនបួននាក់ផ្សេងទៀត គឺជាជនសង្ស័យដែលសមត្ថកិច្ចកំពុងស្វែងរកចាប់ខ្លួន។ វីអូអេព្យាយាមមិនអាចទាក់ទងលោកម៉ម សុណង់ដូ នាយកវិទ្យុសំបុកឃ្មុំដើម្បីសុះការបំភ្លឺបានទេនៅថ្ងៃព្រហស្បតិ៍នេះ។ ក្រុមអង្គការសង្គមស៊ីវិលមួយចំនួនដែលរួមមានសមាគមសិទ្ធិមនុស្សអាដហុក ក្រុមប្រឹក្សាឃ្លាំមើលកម្ពុជា រួមទាំងគណបក្សនយោបាយមួយចំនួនបានថ្កោលទោសចំពោះចំណាត់វិធានការរបស់សមត្ថកិច្ច។ ក្រុមឃ្លាំមើលកម្ពុជាបានយល់ឃើញថា ការប្រើពាក្យតំបន់អបគមន៍គឺជាលេស ដើម្បីធ្វើការបាញ់បង្ក្រាបមកលើប្រជាពលរដ្ឋឲ្យបញ្ឈប់ការតវ៉ារឿងវិវាទដីធ្លី និងជាសារមួយផ្ងើជូនប្រជាពលរដ្ឋនៅតំបន់ផ្សេងៗទៀត ដែលមានវិវាទដីធ្លីឲ្យឈប់តវ៉ា៕ This posting includes an audio/video/photo media file: Download Now |
| គណបក្សធំប្រើប្រព័ន្ធផ្សព្វផ្សាយបានច្រើនជាងគណបក្សតូចៗពេលឃោសនាបោះឆ្នោត Posted: 17 May 2012 08:17 PM PDT ក្រុមន្ត្រីឃ្លាំមើលការបោះឆ្នោតលើកឡើងថាគណបក្សកាន់កាប់អំណាចយ៉ាងរឹងមាំ និងគណបក្សធំៗមួយចំនួនទៀត មានលទ្ធភាពប្រើប្រាស់ប្រព័ន្ធផ្សព្វផ្សាយច្រើនជាងគណបក្សតូចៗ សម្រាប់ធ្វើការប្រកួតប្រជែងដណ្តើមយកសន្លឹកឆ្នោត ហើយភាពមិនស្មើគ្នានេះនឹងជះឥទ្ធិពលទៅដល់លទ្ធផលនៃការបោះឆ្នោត។ កម្ពុជានឹងធ្វើការបោះឆ្នោតជ្រើសរើសក្រុមប្រឹក្សាឃុំសង្កាត់នៅថ្ងៃទី៣ ខែមិថុនាខាងមុខ ហើយការឃោសនាបោះឆ្នោតរយៈពេល១៥ថ្ងៃ នឹងចាប់ផ្តើមនៅថ្ងៃសុក្រ ទី១៨ ស្អែកនេះ។ មានគណបក្សនយោបាយចូលរួមប្រកួតប្រជែងសរុបចំនួន១០ នៅក្នុងនោះភាគច្រើនគឺជាគណបក្សតូចៗដែលមិនមានសកម្មភាពជាចំហនៅពេលមុន។ លោកគល់ បញ្ញា នាយកប្រតិបត្តិនៃគណៈកម្មាធិការដើម្បីការបោះឆ្នោតដោយសេរី និងយុត្តិធម៌នៅកម្ពុជាហៅកាត់ថា ខុមហ្វ្រែលកត់សម្គាល់ថាព័ត៌មាននៃការបោះឆ្នោតមិនបានជ្រាបទៅដល់ប្រជាពលរដ្ឋទូទៅនោះទេ ហើយគណបក្សកាន់កាប់អំណាចមានលទ្ធភាពប្រើប្រាស់ប្រព័ន្ធឃោសនាយ៉ាងទូលំទូលាយ។ «ការប្រើប្រាស់ប្រព័ន្ធផ្សព្វផ្សាយ ឃើញថា គម្លាតគ្នាឆ្ងាយណាស់។ ខ្លះគណបក្សដែលគ្នាមកឈរឈ្មោះប្រកួតប្រជែងហ្នឹង និងគណបក្សកាន់អំណាចគេមានលទ្ធភាពច្រើនណាស់ ក្នុងប្រើប្រាស់ប្រព័ន្ធផ្សព្វផ្សាយជាពិសេសប្រើប្រាស់ទូរទស្សន៍ ហើយនិងវិទ្យុ»។ ខាំប្រែលនឹងពង្រាយអ្នកសង្កេតការណ៍ចំនួន៥.២៥០នាក់សម្រាប់សង្គេតការបោះឆ្នោតនៅទូទាំង២៤ខេត្តក្រុងរបស់កម្ពុជា ចាប់ពីរយៈពេលនៃការឃោសនាបោះឆ្នោត រហូតទៅដល់រយៈពេលនៃការបោះឆ្នោត។ លោកគល់ បញ្ញា លើកឡើងថាលំហផ្សព្វផ្សាយព័ត៌មានមិនស្មើគ្នា ធ្វើឲ្យប្រជាពលរដ្ឋទទួលមិនបានទូលំទូលាយនូវគោលយោបាយរបស់គណបក្សនីមួយៗ។ «ប្រជាជនឥតមានព័ត៌មានគ្រប់គ្រាន់ពីគោលនយោបាយជម្រើសផ្សេងៗ។ អញ្ចឹងទៅឮតែម្ខាង អាហ្នឹងវាអាចប៉ះពាល់ទៅដល់ភាពយុត្តិធម៌នៃការបោះឆ្នោត។ ពីព្រោះប្រជាជនឥតមានព័ត៌មានគ្រប់គ្រាន់ ហើយគណបក្សហ្នឹង ឥតមានឱកាសផ្សព្វផ្សាយពីគោលនយោយបាយផ្ទាល់ខ្លួន»។ លោកហង្ស ពុទ្ធា នាយកប្រតិបត្តិនៃគណៈកម្មាធិការអព្យាក្រឹត្យយុត្តិធម៌ដើម្បីការបោះឆ្នោតដោយសេរីនៅកម្ពុជា ហៅកាត់ថា និចហ្វិច កត់សម្គាល់ដូចគ្នានេះដែរ។ «គណកបក្សកាន់អំណាចគាត់មានមធ្យោបាយច្រើនជាង។ លោកមានបណ្តាញជាមន្ត្រីថ្នាក់ឃុំ លោកមានប្រព័ន្ធផ្សព្វផ្សាយក្តី គឺឃើញថាមានការផ្សព្វផ្សាយច្រើន។ នេះជាឱកាសច្រើនសម្រាប់គណបក្សកាន់អំណាចនាពេលបច្ចុប្បន្ន»។ អង្គការនិចហ្វិចមានអ្នកសង្កេតការណ៍បោះឆ្នោតចំនួន៣.០០០នាក់សម្រាប់ខេត្តក្រុងទាំង២៤។ គណបក្សប្រជាជនកម្ពុជាកំពុងកាន់អំណាចត្រូវគេមើលឃើញថាមានការគាំទ្រផ្នែកប្រព័ន្ធផ្សព្វផ្សាយយ៉ាងលើសលប់ រាប់បញ្ចូលទាំងវិទ្យុ ទូរទស្សន៍ និងសារព័ត៌មានសរសេរផងដែរ។ រីឯគណបក្សដទៃទៀតដូចជាគណបក្សហ៊្វុនស៊ិនប៉ិច គណបក្សសិទ្ធិមនុស្ស គណបក្សនរោត្តមរណឫរិទ្ធិ និងគណបក្សសម រង្ស៊ី សុទ្ធតែជួលប្រព័ន្ធផ្សាយឯកជនម្រាប់ធ្វើការផ្សព្វផ្សាយដល់អ្នកគាំទ្ររបស់ខ្លួន។ រីឯគណបក្សផ្សេងទៀត ទើបតែមានសកម្មភាពចុងក្រោយនេះ។ លោកចាន់ យ៉េត អនុប្រធានគណបក្សសាធារណៈរដ្ឋប្រជាធិបតេយ្យ ដែលជាគណបក្សតូចមួយនៅក្នុងចំណោមគណបក្សទាំង១០ លោកបានត្អូនត្អែរពីកង្វះធនធានសម្រាប់ប្រព័ន្ធផ្សព្វផ្សាយដោយក្តីអស់សង្ឃឹម។ «គណបក្សតូចៗ គឺឥតទាន់មានទេ។ ខ្ញុំបាទអស់សង្ឃឹមជាខ្លាំង ដូចថាខ្ញុំចង់ផ្សាយពីគោលនយោបាយគណបក្សខ្ញុំ ហើយខ្ញុំចង់ផ្សាយសកម្មភាពខ្លះៗ ដែលខ្ញុំចុះទៅតាមបណ្តាខេត្ត និងឃុំដែលយើងមាន»។ គណបក្សសាធារណៈរដ្ឋប្រជាធិបតេយ្យមានបេក្ខជនឈរឈ្មោះដោយចោះៗ ក្នុងខេត្តចំនួន៦ គឺខេត្តតាកែវ កំពង់ឆ្នាំង បន្ទាយមានជ័យ ខេត្តព្រៃវែង និងខេត្តកំពង់ធំ។ យ៉ាងណាក៏ដោយលោកទេព នីថា អគ្គលេខាធិការនៃគណៈកម្មាធិការជាតិរៀបចំការបោះឆ្នោត គជប បានពន្យល់ថារដ្ឋាភិបាលមានលទ្ធភាពត្រឹមតែជួយគាំទ្រទៅដល់ការផ្តល់សេវាផ្សព្វផ្សាយស្មើភាពគ្នានៅក្នុងអំឡុងពេលឃោសនា នាពេលបោះឆ្នោត។ លោក ទេព នីថា មានប្រសាសន៍ថា គជប បានស្នើទៅដល់ទូរទស្សន៍ និងវិទ្យុជាតិនូវគ្រប់ខេត្តក្រុងទាំងអស់ដើម្បីជួយរំលែកការឃោសនារបស់គណបក្សទាំងនេះ។ «យើងមានវិទ្យុជាតិ និងបណ្តាញផ្សេងៗទៀតដែលជារបស់រដ្ឋ។ មាននៅតាមបណ្តាខេត្តដែរ ព្រោះយើងបានធ្វើស៊ីដីដើម្បីសុំឲ្យប្រព័ន្ធផ្សព្វផ្សាយនៅខេត្តហ្នឹងជួយផ្សព្វផ្សាយ»។ មានប្រជាពលរដ្ឋមានសិទ្ធិបោះឆ្នោតជាង៩លាន២សែននាក់ និងមានឃុំសង្កាត់ទូទាំងប្រទេសសរុបចំនួន១.៦៣៣។ គជប បានចែកបណ្ណព័ត៌មានទៅដល់អ្នកបោះឆ្នោតរហូតមកទល់ពេលនេះចំនួនជាង៧លាននាក់ ឬស្មើជាង ៨០%នៃអ្នកមានសិទ្ធិបោះឆ្នោតសរុប។ លោកគល់ បញ្ញា យល់ឃើញថា ការដែលចែកបណ្ណព័ត៌មានេះមិនបានទៅដល់អ្នកបោះឆ្នោតគ្រប់រូប អាចជាការំខានដល់ការស្វែងរកមណ្ឌលបោះឆ្នោតរបស់ប្រជាពលរដ្ឋ។ ក៏ប៉ុន្តែលោកទេព នីថា ឆ្លើយថាបណ្ណព័ត៌មានសម្រាប់អ្នកបោះឆ្នោតនេះមិនមែនជាសុពលភាពសម្រាប់ការបោះឆ្នោតនោះទេ។ «សូមបញ្ជាក់ថានេះគ្រាន់តែជាបណ្ណព័ត៌មានប៉ុណ្ណោះទេ មិនអាចយកទៅធ្វើជាឯកសារដើម្បីបញ្ជាក់អត្តសញ្ញាណសម្រាប់បោះឆ្នោតបានទេ។ ហើយអត់បណ្ណព័ត៌មាននេះ ក៏គាត់អាចទៅបោះឆ្នោតបានដែរ»។ ក្រៅពីនេះលោកគល់ បញ្ញា បង្ហាញថាកងកម្លាំងប្រដាប់អាវុធដូចជានគរបាល ទាហាន និងកងរាជអាវុធហត្ថបានចូលរួមពង្រឹងយ៉ាងសកម្មនៅក្នុងការជួយឃោសនាទៅដល់គណបក្សប្រជាជនកម្ពុជា ដែលជាកត្តាខុសច្បាប់ពីព្រោះថា កងកម្លាំងប្រដាប់អាវុធត្រូវតែឋិតនៅក្នុងភាពឯករាជ្យ។ លោកទេព នីថា បញ្ជាក់ថា ជាទូទៅនៅមិនទាន់មានភាពមិនប្រក្រតីណាមួយគួរឲ្យកត់សម្គាល់ នៅមួយថ្ងៃមុនការឃោសនាបោះឆ្នោតមកដល់នោះទេ៕ This posting includes an audio/video/photo media file: Download Now |
| ហេឡូវីអូអេ ១៧ ឧសភា ២០១២៖ អាថ៌កំបាំងនិងសិល្បៈនៃជីវិត Posted: 17 May 2012 02:40 PM PDT លោក ម៉ៅ ចន្ទសំណុំ ពាណិជ្ជករនៅទីក្រុង Philadelphia រដ្ឋ Pennsylvania បានចូលរួមជាវាគ្មិនដើម្បីជម្រាបជូនអំពីអាថ៌កំបាំងនិងសិល្បៈនៃជីវិត។ លោកបានបញ្ជាក់ថា ក្នុងពិភពលោកយើងនេះ មនុស្សគ្រប់រូបធ្វើសកម្មភាពសព្វបែបយ៉ាងដើម្បីសម្រេចបាននូវសេចក្តីសុខ សុភមង្គល និងសេចក្តីសប្បាយរីករាយក្នុងគ្រួសារ។ ជីវិតមនុស្សគ្រប់រូបឆ្លងកាត់ភាពសុខសាន្តបានតែមួយភ្លែតៗដូចជាផ្លេកបន្ទោរ រីឯក្តីទុក្ខវិញតែងតាមជាប់ដូចជាស្រមោលអន្ទោលតាមប្រាណ។ ដើម្បីដោះស្រាយបញ្ហាទុក្ខរបស់មនុស្ស លោកបានដកស្រង់ទស្សនៈ និងគំនិតមូលដ្ឋាន ពីព្រហ្មញ្ញសាសនា ព្រះពុទ្ធសាសនា និងពីចិត្តសាស្ត្រសម័យទំនើប មកប្រើជាវិធីបន្ធូរនិងលំហែកាយនិងចិត្ត។ សូមស្តាប់សំឡេងទាំងស្រុងនៃកម្មវិធីហេឡូវីអូអេ ថ្ងៃទី១៧ ខែឧសភា ឆ្នាំ២០១២៖ <!--AV--> មធ្យោបាយចូលរួមពីប្រិយមិត្ត៖ ទូរស័ព្ទ ០១២ ៥១ ៥១ ៩៤ ហ្វេសប៊ុក facebook.com/voakhmer អ៊ីម៉េល hellovoa@voanews.com This posting includes an audio/video/photo media file: Download Now |
| You are subscribed to email updates from VOA News: ព័ត៌មាន To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
