VOA News: ព័ត៌មាន: “មេខ្មែរក្រហមនិងសាក្សីខ្មែរក្រហមក្នុងសំណុំរឿង០០២និយាយថា អតីតព្រះមហាក្សត្រនរោត្តម សីហនុបានចូលរួមចលនារបស់គេ” plus 3 more |
- មេខ្មែរក្រហមនិងសាក្សីខ្មែរក្រហមក្នុងសំណុំរឿង០០២និយាយថា អតីតព្រះមហាក្សត្រនរោត្តម សីហនុបានចូលរួមចលនារបស់គេ
- រដ្ឋមន្ត្រីក្រសួងដឹកជញ្ជូនអាស៊ានជំរុញការអភិវឌ្ឍហេដ្ឋារចនាសម្ព័ន្ធដឹកជញ្ជូនអាស៊ាន
- ខ្សែភាពយន្តចាស់ថ្មីបង្ហាញស្នាដៃក្នុងមហោស្រពភាពយន្តនៅភ្នំពេញ
- ព័ត៌មានអន្តរជាតិវីអូអេ ១៦ ធ្នូ ព្រឹក
| Posted: 16 Dec 2011 08:43 AM PST ជនជាប់ចោទនួន ជា និងខៀវ សំផន រួមទាំងសាក្សីសក្ដានុពល លោក ឡុង នរិន្ទ ដែលជាអតីតកម្មាភិបាលជាន់ខ្ពស់ខ្មែរក្រហម សុទ្ធតែបានភ្ជាប់ការរួមចំណែករបស់អតីតព្រះមហាក្សត្រនរោត្តម សីហនុ ក្នុងចលនាតស៊ូកុម្មុយនីស្ដម៉ៅនិយមរបស់ពួកខ្លួន។ បើទោះជាមិនបានបង្ហាញពីភាពស៊ីជម្រៅខ្លាំងក្តី ការទាញចំណងភ្ជាប់គ្នានេះបានកើតឡើងជាបន្ដបន្ទាប់ក្នុងការកាត់ទោសសំណុំរឿង០០២ អស់រយៈពេលពីរសប្ដាហ៍កន្លងមកនេះ។ ក៏ប៉ុន្ដែលេខាផ្ទាល់របស់ព្រះអង្គបានអះអាងថា ព្រះអង្គបន្ដរក្សាភាពស្ងប់ស្ងៀមចំពោះការលើកឡើងទាំងនោះ។ សាលាក្ដីខ្មែរក្រហមបានបើកសវនាការសំណុំរឿង០០២ ចាប់តាំងពីថ្ងៃទី៥ ខែធ្នូមកម្ល៉េះ។ អតីតមេដឹកនាំកំពូលដែលមានវ័យចាស់ជរានៃរបបខ្មែរក្រហមចំនួនបីនាក់ ដែលត្រូវនាំខ្លួនចូលរង្វង់ក្រចកសេះ រួមមាននួន ជា អតីតប្រធានសភា និងជាអគ្គលេខារងនៃបក្សកុម្មុយនីស្ដកម្ពុជា ដែលជាអតីតមេដឹកនាំកំពូលខ្មែរក្រហមលំដាប់ទី២ បន្ទាប់ពីប៉ុល ពត ខៀវ សំផន អតីតប្រមុខរដ្ឋនៃរបបខ្មែរក្រហម និងអៀង សារី អតីតឧបនាយករដ្ឋមន្ដ្រី និងជារដ្ឋមន្ដ្រីការបរទេស។ ដោយឡែកអៀង ធីរិទ្ធ ដែលស្ថិតក្នុងសំណុំរឿងនេះដែរ ត្រូវតុលាការរកឃើញថា មិនមានសម្បទាគ្រប់គ្រាន់សម្រាប់ចូលរួមការកាត់ទោសនោះទេ។ នៅពេលចាប់ផ្ដើមបើកសវនាការកាលពីសប្ដាហ៍មុន ខៀវ សំផនបានចោទសួរតុលាការថា ហេតុអ្វីបានជា«មិននាំព្រះកាយ»របស់អតីតព្រះមហាក្រត្សចូលក្នុងតុលាការផង។ ហើយក្នុងពេលបន្តបន្ទាប់ នួន ជា ដែលជាអតីតប្រធានសភាខ្មែរក្រហម បានថ្លែងថា អតីតព្រះមហាក្សត្របានស្ថិតនៅកៀកនឹងចលនាតស៊ូរបស់ពួកខ្មែរក្រហមដែរ។ «ឆ្នាំ១៩៧៣ ព្រះករុណាកាលនោះ នៅប៉េកាំង លោកមានព្រះរាជបំណង ចង់មកធ្វើទស្សនកិច្ច សួរសុខទុក្ខកូនចៅព្រះអង្គ នៅក្នុងប្រទេស។ ដូច្នោះ តាមរយៈចិនឲ្យទាក់ទងមកបក្សកុម្មុយនីស្តកម្ពុជា។ ពេលនោះយន្តហោះអាមេរិកកំពុងទម្លាក់គ្រាប់បែកយ៉ាងខ្លាំង។ ប៉ុន្តែទោះបីជាយ៉ាងនេះក៏ដោយ ក៏បក្សកុម្មុយនីស្តកម្ពុជាត្រៀមរៀបចំសព្វគ្រប់ដើម្បីរក្សាសន្តិសុខថ្វាយព្រះអង្គពេញទី រួចហើយក៏ធ្វើដំណើរជូនព្រះអង្គត្រឡប់ទៅវិញ ទៅហាណូយ ហើយក៏ត្រឡប់ទៅប៉េកាំងវិញ ដើម្បីដំណើរការដឹកនាំតស៊ូតទៅទៀត»។ ដោយឡែកលោកឡុង នរិន្ទ សាក្សីសំខាន់មួយរូបដែលបានធ្វើការក្រោមអំណាចរបស់អៀង សារី បានបង្ហាញថា លោកបានចូលរួមក្នុងចលនានយោបាយកុម្មុយនីស្ដខ្មែរក្រហមតាមការអំពាវនាវរបស់សម្ដេចឪ នរោត្តម សីហនុ ក្នុងពេលដែលព្រះអង្គកំពុងគង់នៅទីក្រុងប៉េកាំង។ ព្រះអង្គម្ចាស់ ស៊ីសុវត្ថិ ធម្មិកោ ជាលេខារបស់អតីតព្រះមហាក្សត្រ និងជាសមាជិកព្រះរាជខុទ្ទកាល័យព្រះមហាក្សត្រ មានព្រះបន្ទូលប្រាប់វីអូអេ សម្លេងសហរដ្ឋអាមេរិក កាលពីថ្ងៃច័ន្ទសប្តាហ៍នេះថា អតីតព្រះមហាក្សត្រមិនប្រតិកម្មតបទៅនឹងអតីតមេដឹកនាំខ្មែរក្រហមទាំងនេះទេ។ «អ្វីដែលថ្នាក់ដឹកនាំខ្មែរក្រហម សម្តែងសព្វថ្ងៃហ្នឹងនៅក្នុងតុលាការហ្នឹង គឺមិនមែនទាំងអស់ទេ លោកមិនបានប្រតិកម្មអីជាពិសេសនោះទេ។ ចង់មិនចង់ លោកក៏ជាអ្នករងគ្រោះមួយដែរពីខ្មែរក្រហម»។ ព្រះអង្គម្ចាស់ធម្មិកោបានបន្ថែមថា នោះគឺជាសេចក្ដីអះអាងនៅក្នុងការដេញដោលតាមផ្លូវតុលាការតែប៉ុណ្ណោះ។ «អ្វីដែលលោកខៀវ សំផន លោកអៀង សារី ជាមួយមេធាវីខៀវ សំផន មេធាវីអៀង សារី នួន ជាទាំងអស់ហ្នឹង គឺលើកយកមកនិយាយនៅក្នុងក្របខណ្ឌតុលាការ។ ពេលណាដែលក្តីហ្នឹងមិនទាន់ចប់ យើងមិនអាចយកពាក្យទាំងអស់ហ្នឹងមកបកស្រាយ អត្ថាធិប្បាយជាផ្លូវការទេ»។ សម្តេចឪ នរោត្តម សីហនុធ្លាប់បានជំទាស់នឹងការកាត់ទោសពួកអតីតមេដឹកនាំខ្មែរក្រហម កាលពីឆ្នាំ២០០៥ ដោយព្រះអង្គទ្រង់ព្រះតំរិះឃើញថា ថវិកាចំណាយសម្រាប់ដំណើរការកាត់ទោសរាប់លានដុល្លារនោះ នឹងមានប្រយោជន៍ជាង ប្រសិនបើត្រូវបង្វែរទៅធ្វើការអភិវឌ្ឍប្រទេសកម្ពុជានោះ។ ព្រះតំរិះនេះ កើតឡើងមុនបន្តិចនៃការចាប់ផ្ដើមដំណើរការជាផ្លូវការរបស់សាលាក្ដីខ្មែរក្រហម។ នួន ជា នៅក្នុងសវនាការបានរំឭកថា អតីតមេដឹកនាំកំពូលខ្មែរក្រហមបានធ្វើពិធីជប់លៀងសម្រាប់អតីតព្រះមហាក្សត្រ ក្នុងពេលដែលព្រះអង្គយាងទតចលនាតស៊ូពួកខ្មែរក្រហម។ «ពេលនោះ មានការធ្វើការជប់លៀងថ្វាយព្រះអង្គ។ មានប៉ុល ពត មានសុន សេន មានអៀង សារី។ អៀង សារី ជូនដំណើរព្រះអង្គមកដែរ ហើយមានកម្មាភិបាលថ្នាក់ភូមិភាគមួយសចំនួន»។ ក្រុមមេធាវីការពារក្ដីរបស់នួន ជា និងសហចៅក្រមស៊ើបអង្កេតធ្លាប់បានស្នើយាងសម្តេចនរោត្តម សីហនុចូលផ្ដល់សក្ខីកម្មក្នុងសាលាក្ដីខ្មែរក្រហមផងដែរ ក៏ប៉ុន្ដែការប៉ុនប៉ងនេះបានទទួលបរាជ័យដែលរុំព័ទ្ធដោយភាពស្មុគ្រស្មាញ។ របបកម្ពុជាប្រជាធិបតេយ្យរបស់ពួកខ្មែរក្រហមបានកាន់កាប់អំណាចចន្លោះពីថ្ងៃទី១៧ ខែមេសា ឆ្នាំ១៩៧៥ ដល់ថ្ងៃទី៦ ខែមករា ឆ្នាំ១៩៧៩។ មានប្រជាពលរដ្ឋកម្ពុជាស្លាប់យ៉ាងតិច១,៧លាននាក់គឺស្លាប់ដោយសារការធ្វើការដោយបង្ខំ ការបង្អត់អាហារ និងការសម្លាប់ជាដើម។ ជនជាប់សង្ស័យសរុបចំនួនប្រាំនាក់ត្រូវបានចាប់ខ្លួន និងចោទប្រកាន់។ ក្នុងនោះ ឌុច អតីតមេគុកទួលស្លែងដែលជាប់ចោទក្នុងសំណុំរឿង០០១ នឹងត្រូវអង្គជំនុំជម្រះតុលាការកំពូលប្រកាសសាលដីកា កំណត់ទោស ឬយ៉ាងណានៅខែកុម្ភៈ ឆ្នាំ២០១២។ ឌុចត្រូវសាលាដំបូងផ្ដន្ទាទោសឲ្យជាប់គុកចំនួន៣៥ឆ្នាំ ប៉ុន្ដែត្រូវកាត់កងនៅត្រឹម១៩ឆ្នាំ។ ហើយសាលាក្ដីខ្មែរក្រហមនឹងត្រូវការពេលវេលាច្រើនឆ្នាំតទៅទៀតសម្រាប់ធ្វើការកាត់ទោសអតីតមេដឹកនាំកំពូលខ្មែរក្រហមចាស់ជរាក្នុងសំណុំរឿង០០២។ រីឯសំណុំរឿងបន្ថែម០០៣ និង០០៤ ដែលមានជនជាប់សង្ស័យចំនួនប្រាំនាក់ទៀត ដែលសុទ្ធសឹងមានវ័យចាស់ជរាដែរនោះស្ថិតក្នុងភាពឃ្លីងឃ្លោង ប្រទាញប្រទង់យ៉ាងខ្លាំងរវាងភាគី ជាតិនិងភាគីអន្ដរជាតិក្នុងតុលាការកូនកាត់សព្វថ្ងៃនេះ។ ព្រះអង្គម្ចាស់ស៊ីសុវត្ថិ ធម្មិកោមានបន្ទូលថា អតីតព្រះមហាក្សត្រមិនមានជំនឿលើយុត្តិធម៌បានពីតុលាការនេះទេ។ «លោកមិនគិតត្រឹមតែព្រះរាជ្យវង្សទេ ព្រោះលោកជាព្រះបិតាជាតិ។ ដូច្នេះលោកគិតរហូតដល់ប្រជារាស្ត្រខ្មែរទូទាំងប្រទេស ព្រមទាំងប្រជារាស្ត្រខ្មែរ ដែលរស់នៅបរទេសផងដែរ។ លោកបានបញ្ចេញនូវមតិរបស់លោកតាំងពីឆ្នាំ២០០៥ មកម្ល៉េះ។ លោកមិនជឿថា តុលាការហ្នឹងអាចផ្តល់យុត្តិធម៌ទៅឲ្យប្រទេសខ្មែរ ឬឲ្យប្រជារាស្ត្រខ្មែរទាំងអស់នោះទេ។ មិនអាចទេ»។ មន្ដ្រីអ្នកនាំពាក្យសាលាក្ដីខ្មែរក្រហម និងក្រុមមន្ដ្រីអង្គការសង្គមស៊ីវិល ដែលតាមឃ្លាំមើលដំណើរការកាត់ទោស ធ្លាប់បានពន្យល់ថា យុត្តិធម៌បានពីការកាត់ទោសនេះនឹងមិនអាចឆ្លើយតបតាមការចង់បានរបស់ជនរងគ្រោះ១០០ភាគរយនោះទេ។ ក៏ប៉ុន្ដែវានឹងក្លាយជាយុត្តិធម៌ ដែលតម្រូវតាមស្តង់ដាអន្ដរជាតិ។ អតីតព្រះមហាក្សត្រ នរោត្តមសីហនុធ្លាប់គង់ជាប្រមុខរដ្ឋនៃរបបកម្ពុជាប្រជាធិបតេយ្យនៅឆ្នាំ១៩៧៦ ប៉ុន្ដែលោក ឡុង នរិន្ទ ដែលជាសាក្សី បានបញ្ជាក់ថា ព្រះអង្គមិនមានអំណាចអ្វីនោះទេ៕ This posting includes an audio/video/photo media file: Download Now |
| រដ្ឋមន្ត្រីក្រសួងដឹកជញ្ជូនអាស៊ានជំរុញការអភិវឌ្ឍហេដ្ឋារចនាសម្ព័ន្ធដឹកជញ្ជូនអាស៊ាន Posted: 16 Dec 2011 07:34 AM PST នៅថ្ងៃសុក្រនេះ ក្រុមរដ្ឋមន្ត្រីក្រសួងដឹកជញ្ជូនអាស៊ានបានជំរុញឲ្យមានការអភិវឌ្ឍប្រព័ន្ធហេដ្ឋារចនាសម្ព័ន្ធដឹកជញ្ជូន ដើម្បីធ្វើឲ្យបានសម្រេចនូវសហគមន៍សេដ្ឋកិច្ចអាស៊ាននៅឆ្នាំ២០១៥។ ក្រុមរដ្ឋមន្ត្រីក្រសួងដឹកជញ្ជូនអាស៊ានបានជួបប្រជុំគ្នាក្នុងកិច្ចប្រជុំប្រចាំឆ្នាំលើកទី១៧ នៅទីក្រុងភ្នំពេញចាប់ពីថ្ងៃទី១២ដល់ថ្ងៃទី១៦ ដើម្បីពិភាក្សាអំពីការអភិវឌ្ឍហេដ្ឋារចនាសម្ព័ន្ធផ្លូវទាក់ទងនឹងគម្រោងដឹកជញ្ជូនជាអាទិភាព សំដៅធ្វើឱ្យបានសម្រេចនូវការប្តេជ្ញាចិត្តរបស់ក្រុមមេដឹកនាំអាស៊ាន។ លោកត្រាំ អ៊ីវតឹក រដ្ឋមន្ត្រីក្រសួងដឹកជញ្ជូននៃប្រទេសកម្ពុជា បានថ្លែងថា ក្រុមរដ្ឋមន្ត្រីក្រសួងដឹកជញ្ជូនអាស៊ានបានព្រមព្រៀងគ្នាធ្វើឲ្យប្រសើរដល់ការតភ្ជាប់ហេដ្ឋារចនាសម្ព័ន្ធផ្លូវគោក ផ្លូវអាកាស និងផ្លូវទឹកដើម្បីជំរុញសកម្មភាពដឹកជញ្ជូន ពាណិជ្ជកម្ម និងសេដ្ឋកិច្ចនៅក្នុងសហគមន៍អាស៊ាន។ «ឥឡូវនេះដល់ពេលដែលយើងរកទុនដើម្បីអភិវឌ្ឍន៍ហេដ្ឋារចនាសម្ព័ន្ធផ្លូវ ហើយការរកទុននេះ យើងពឹងផ្អែកទៅលើដៃគូរអភិវឌ្ឍន៍ ដូចជាប្រទេសចិន ប្រទេសជប៉ុន និងប្រទេសកូរ៉េខាងត្បូង ដែលមានប្រាក់កាសជួយស្តារផ្លូវ»។ ប្រទេសអាស៊ានរួមមានប្រទេសកម្ពុជា ប្រទេសឡាវ ប្រទេសវៀតណាម ប្រទេសថៃ ប្រទេសភូមា ប្រទេសម៉ាឡេស៊ី ប្រទេសប្រូយនេ ប្រទេសឥណ្ឌូនេស៊ី ប្រទេសហ្វីលីពីន និងប្រទេសសឹង្ហបូរី។ សមាគមអាស៊ានបានកំណត់ពេលវេលាសម្រាប់បង្កើតសហគមន៍សេដ្ឋកិច្ចអាស៊ាន ដែលសេរីភាវូបនីយកម្មនៃសេវាពាណិជ្ជកម្មតាមរយៈសេរីភាវូបនីយកម្ម ជាបន្តបន្ទាប់ ត្រូវបានបញ្ចប់នៅឆ្នាំ២០១៥។ លោកត្រាំ អ៊ីវតឹក បានបញ្ជាក់ក្នុងសន្និសីទកាសែតថា ក្រុមរដ្ឋមន្ត្រីក្រសួងដឹកជញ្ជូនអាស៊ានបានលើកទឹកចិត្តឲ្យមានការចូលរួមរបស់ផ្នែកឯកជននៅក្នុងគម្រោងការដ៏សំខាន់នេះ ហើយបានពេញចិត្តចំពោះការរីកចម្រើននៃការអនុវត្តកម្មវិធីយុទ្ធសាស្ត្រជាច្រើនក្រោមភាពជាដៃគូរផ្នែកដឹកជញ្ជូនអាស៊ានជាមួយប្រទេសចិន និងប្រទេសជប៉ុន។ «គម្រោងនានាក្រោមផែនទីបង្ហាញផ្លូវនេះបានបំពេញបំណងនូវសេចក្តីត្រូវការជាក់លាក់របស់រដ្ឋ ជាសមាជិកអាស៊ាន និងបានផ្តល់ការគាំទ្រយ៉ាងរឹងមាំដល់ការកសាងសមត្ថភាព និងការសិក្សាពីភាពអាចធ្វើបានលើហេដ្ឋារចនាសម្ព័ន្ធដឹកជញ្ជូន»។ សេចក្តីថ្លែងការណ៍រួមបានបញ្ជាក់ថា ក្រុមរដ្ឋមន្ត្រីក្រសួងដឹកជញ្ជូនអាស៊ាន បានសម្តែងនូវការដឹងគុណចំពោះជំនួយបច្ចេកទេស និងការគាំទ្រឆ្ពោះទៅរកកិច្ចសហប្រតិបត្តិផ្នែកដឹកជញ្ជូនអាស៊ាន។ ក្រុមរដ្ឋមន្ត្រីក្រសួងដឹកជញ្ជូនអាស៊ានក៏បានសម្តែងនូវការកោតសរសើរដល់ប្រទេសអាល្លឺម៉ង់ និងសហភាពអឺរ៉ុបចំពោះការគាំទ្រផ្នែកបច្ចេកទេសរបស់ខ្លួន។ ប្រទេសចិនធ្លាប់បានសន្យាផ្តល់ប្រាក់ជាង១០០០០លានដុល្លារអាមេរិកសម្រាប់ការតភ្ជាប់បណ្តាញហេដ្ឋារចនាសម្ព័ន្ធ ប្រជាពលរដ្ឋ និងស្ថាប័ន៕ This posting includes an audio/video/photo media file: Download Now |
| ខ្សែភាពយន្តចាស់ថ្មីបង្ហាញស្នាដៃក្នុងមហោស្រពភាពយន្តនៅភ្នំពេញ Posted: 16 Dec 2011 11:47 AM PST ខ្សែភាពយន្ដសរុបចំនួន៩១រឿង ដែលជាស្នាដៃរបស់ផលិតករមកពីប្រទេសចំនួន១៧ នឹងត្រូវដាក់បញ្ចាំងនៅក្នុងមហោស្រពភាពយន្ដអន្ដរជាតិក្នុងទីក្រុងភ្នំពេញ ដើម្បីជាការចែករំលែកបច្ចេកទេស និងបទពិសោធន៍គ្នា។ ទស្សនិកជនអាចចូលទស្សនាដោយឥតគិតថ្លៃ ចាប់ពីថ្ងៃព្រហស្បតិ៍ទី១៥ រហូតដល់ថ្ងៃទី១៨ ខែធ្នូ នៅតាមទីតាំងសំខាន់ៗមួយចំនួន ដូចជារោងភាពយន្ត Legend Cinema នៅផ្សារទំនើប City Mall រោងភាពយន្ដ The Cineplex នៅផ្សារទំនើបសុរិយា នៅមជ្ឈមណ្ឌលកំសាន្ដកោះពេជ្រ មជ្ឈមណ្ឌលបុប្ផានណា និង វិទ្យាស្ថានភាសាបារាំង។ លោកជៀប សុវិជ្ជា នាយកមជ្ឈមណ្ឌលបណ្តុះបណ្តាលជំនាញ និងការផលិតភាពយន្តនៅកម្ពុជាបានឲ្យដឹងថា ការប្រារព្ធពិធីមហោស្រពភាពយន្តអន្តរជាតិនេះ គឺដើម្បីជួយលើកកម្ពស់វិស័យភាពយន្តនៅកម្ពុជាឲ្យមានភាពប្រសើរឡើងតាមរយៈការផ្លាស់ប្តូរបទពិសោធន៍គ្នាទៅវិញទៅមករវាងផលិតករខ្មែរ និងបរទេស។ «គោលបំណងដែលយើងរៀបចំមហោស្រពភាពយន្តនេះឡើងគឺយើងចង់លើកកម្ពស់ខ្សែភាពយន្តនៅកម្ពុជាយើងឲ្យរីកចម្រើនឡើង ព្រោះថា ពេលណាដែលយើងមានទិវាមហោស្រពភាពយន្តអន្តរជាតិនេះម្តងៗ វាតែងតែមានអ្នកដឹកនាំបរទេសមកចូលរួម។ អញ្ចឹងវាជាឱកាសមួយ ដែលគាត់អាចជួបជុំគ្នាផ្លាស់ប្តូរបទពិសោធន៍គ្នា។មួយវិញទៀត យើងចង់បញ្ចាំងខ្សែភាពយន្តបរទេសហ្នឹងឲ្យទស្សនិកជនខ្មែរយើងបានមើលដើម្បីទាក់ទាញគាត់ឲ្យចាប់អារម្មណ៍លើវិស័យភាពយន្តខ្មែរឡើងវិញ ហើយដើម្បីរំឭកផលិតករខ្មែរយើងឡើងវិញ ដើម្បីឲ្យគាត់ផលិតខ្សែភាពយន្តវិញ ឲ្យបានល្អជាលក្ខណៈស្តង់ដាអន្តរជាតិ ដែលគេអាចទទួលយកបាន»។ នៅក្នុងចំណោមខ្សែភាពយន្តទាំង៩១រឿងនោះ មានខ្សែភាពយន្តខ្មែរចំនួន១៧រឿងដែលផលិតដោយផលិតករខ្មែរ និងជំនួយការពីបរទេស។ ក្នុងនោះ២រឿងជាខ្សែភាពយន្តជំនាន់សង្គមរាស្រ្តនិយម។ ក្រៅពីនេះជាខ្សែភាពយន្តរបស់ផលិតករមកពីប្រទេសស្រីលង្កា សហរដ្ឋអាមេរិច ជប៉ុន កូរ៉េ ប្រទេសហ្វីលីពីន ម៉ាឡេស៊ី បារាំង និងប្រទេសចិនជាដើម។ ខ្សែភាពយន្តទាំងនោះមានភាពយន្ដប្រភេទជាប្រវត្តិសាស្រ្ត ភាពយន្តស៊ើបអង្កេត ភាពយន្តបែបកំប្លែង និងគំនូរជីវចលផងដែរ។ លោកគង់ កន្តារ៉ា អនុរដ្ឋលេខាធិការក្រសួងវប្បធម៌ និង វិចិត្រសិល្បៈ បានចាត់ទុកមហោស្រពភាពយន្តនេះ គឺជាការរៀនសូត្រពីគ្នាទៅវិញទៅមក ក្នុងការផលិតខ្សែភាពយន្តរវាងអ្នកផលិតក្នុងប្រទេស និងក្រៅប្រទេសដើម្បីបង្កើននូវគុណភាពក្នុងការផលិត។ ក៏ប៉ុន្តែលោកបានបញ្ជាក់ថា ទោះបីជាយ៉ាងណា ការប្រារព្ធមហោស្រពភាពយន្តនេះ នៅមិនទាន់អាចជួយអ្វីឲ្យបានច្រើនគ្រាប់គ្រាន់ក្នុងការលើកស្ទួយវិស័យភាពយន្តនៅកម្ពុជាដែលកំពុងមានការចុះទន់ខ្សោយនោះទេ។ «ផ្តល់នូវអត្ថប្រយោជន៍ដល់ផលិតករកម្ពុជាយើងក៏ដូចជាផលិតករនានា ព្រោះថា ភ្ញៀវជាច្រើនគឺចម្រុះជាតិសាសន៍មកបញ្ចាំងហ្នឹង។ ហើយអាចដកស្រង់បទពិសោធន៍ បច្ចេកទេសគ្នាទៅវិញ ទៅមក។ អានេះក៏ជាផ្នែកមួយដើម្បីជួយជំរុញឲ្យផលិតកររបស់យើង ឲ្យគាត់ខំផលិតឲ្យបានស្នាដៃល្អទៅ ដើម្បីបម្រើទស្សនិកជនក្នុងស្រុករបស់យើង ឲ្យបានរីកចម្រើនឡើង»។ លោកអ៊ីវ៉ុង ហែម ជាផលិតករខ្មែរជើងចាស់មួយរូប បានឲ្យដឹងថា លោកមានខ្សែភាពយន្តចំនួន២រឿង បានដាក់បញ្ចាំងនៅក្នុងមហោស្រពភាពយន្តនេះដែរ។ «យើងអបអរសាទរ។ ធ្វើបានប៉ុណ្នឹង គឺអស្ចារ្យណាស់ចំពោះអ្នករៀបចំហ្នឹងណា៎។ ប៉ុន្តែគ្រាន់តែថា តើវាមានលទ្ធផលកម្រិតណា ខ្ញុំអត់ហ៊ាននិយាយរឿងនេះទេ ហើយ ខ្ញុំរងចាំមើលដែរ។ តើវាមានទំនាក់ទំនងរបៀបម៉េច»? ដីមីន ដីមាសគឺជាខ្សែភាពយន្តខ្មែរខ្នាតខ្លីមួយ។ ភាពយន្ដនេះត្រូវយកមកបញ្ចាំង នៅមជ្ឈមណ្ឌលបុប្ផាណា។ ភាពយន្ដនេះបានពិពណ៌នាអំពីស្ថានភាពគ្រាប់មីននៅខេត្តប៉ៃលិន ដែលជាខេត្តមួយសម្បូរដោយគ្រាប់មីននៅកម្ពុជា។ ប្រជាពលរដ្ឋនៅក្នុងរឿងនេះជួបប្រទះការលំបាកក្នុងការប្រកបរបរចិញ្ចឹមជីវិតដោយសារផ្ទៃដីនៅទីនោះភាគច្រើនពោរពេញទៅដោយគ្រាប់មីន។ ហើយពួកគេប្រឈមនឹងគ្រោះថ្នាក់ជាខ្លាំង។ ប៉ុន្ដែទីបំផុត បន្ទាប់ពីការដោះគ្រាប់មីន ដីទាំងនេះបានក្លាយជាដីកសិកម្មយ៉ាងល្អបំផុត។ គឺជាកំណប់មាសរបស់ប្រជាពលរដ្ឋនៅទីនោះ។ «គ្មានស្អីរកទេ ខែហ្នឹង។ ធ្វើចម្ការស្រែ ធ្វើចម្ការស្រែផុតទៅ ផុតមក។ ជីកទំពាំង កាប់អុស កាប់ឫស្សី អីយកទៅលក់។ មួយបាច់៣៥០០ទៅ ឬ៣០០០រៀល។ រកបានហើយឲ្យថ្លៃគោយន្តគេ៥០០ទៅ ហើយព្រៃឫស្សីអីហ្នឹងគឺសុទ្ធតែព្រៃមីនទាំងអស់។ ធ្វើម៉េច បើសិនជាយើងមិនរក វាដាច់ពោះ ប្រពន្ធកូនយើងស្លាប់។ អញ្ចឹងយើងត្រូវតែតស៊ូ។ នរណាមិនខ្លាចស្លាប់។ អ្នកណាមិនខ្លាចមីន។ ស្លាប់ ក៏ស្លាប់ទៅ! បើមិនរក ក៏ស្លាប់ដែរ។ វាដូចតែគ្នាហ្នឹង»។ អ្នកស្រីឃីម ស្រីរាលជាជំនួយការគ្រូនៅសាលាលីសេដេកាត ដែលបាននាំកូន និងប្តីមកចូលរួមទស្សនារឿងនេះ។ គាត់បានឲ្យដឹងថា ក្រោយពីទស្សនារឿងនេះហើយ ទើបបានដឹងច្បាស់ថាប្រទេសកម្ពុជាពិតជាមានគ្រាប់មីនជាច្រើនដែលបានគំរាមកំហែងដល់អាយុជីវិតប្រជាពលរដ្ឋរាល់ថ្ងៃ។ អ្នកស្រីបានបញ្ជាក់ថា អ្នកស្រីចូលចិត្តខ្សែភាពយន្តប្រភេទនេះ ពីព្រោះវាឆ្លុះបញ្ចាំងពីស្ថានភាពពិតប្រាកដ នៅក្នុងប្រទេសកម្ពុជា។ «ខ្ញុំឃើញអ្នករងគ្រោះដោយសារគ្រាប់មីនច្រើនហើយ។ ខ្ញុំដូចថា ពិបាកចិត្ត សោកស្តាយ ដែលមានគ្រាប់មីននៅស្រុកខ្មែរច្រើនអញ្ចឹង។ ភាពយន្តខ្មែរយើងជាច្រើននិយាយពីស្នេហា។ ប្រសិនបើនិយាយពីរឿងបច្ចុប្បន្នហ្នឹង មានអ្វី ល្អដែរ ដូចជាអំពីគ្រាប់មីន អំពីមនុស្សយើង អត់ឃ្លាន អត់មានអីហូប អញ្ចឹងគឺល្អណាស់»។ កម្មវិធីមហោស្រពភាពយន្តអន្តរជាតិឆ្នាំនេះរៀបចំឡើងដោយមជ្ឈមណ្ឌលបណ្តុះបណ្តាលជំនាញ និងទទួលការផលិតភាពយន្តនៅកម្ពុជា មជ្ឈមណ្ឌល បុប្ផាណា និងវិទ្យាស្ថានភាសាបារាំង ដែលមានការគាំទ្រពីក្រសួងវប្បធម៌ និងវិចិត្រសិល្បៈ ហើយមានការឧបត្ថម្ភពីក្រុមហ៊ុនមួយចំនួនក្នុងប្រទេសកម្ពុជា៕ This posting includes an audio/video/photo media file: Download Now |
| ព័ត៌មានអន្តរជាតិវីអូអេ ១៦ ធ្នូ ព្រឹក Posted: 15 Dec 2011 11:40 PM PST កុងហ្គោ៖ តុលាការកំពូលរបស់សាធារណរដ្ឋប្រជាធិបតេយ្យ កុងហ្គោ បានចាប់ផ្តើមស្តាប់ពាក្យបណ្តឹងមួយដែលសុំឲ្យទុកជាមោឃៈនូវការបោះឆ្នោតជ្រើសរើសប្រធានាធិបតី ដែលនាំឲ្យលោកប្រធានាធិបតីកាន់អំណាចចូសេហ្វ កាប៊ីឡា វិលត្រឡប់មកកាន់តំណែងជាថ្មីវិញ។ អ៊ីរ៉ាក់៖ រដ្ឋមន្រ្តីក្រសួងការពារប្រទេសអាមេរិក ឡេអុង ប៉េណាតា និយាយថា លោកសុបិន្តចង់ឲ្យមានអ៊ីរ៉ាក់ ឯករាជ្យនិងអធិបតេយ្យមួយនោះ ឥឡូវបានក្លាយទៅជារឿងពិតហើយ នៅពេលដែលអាមេរិកកត់សំគាល់ពីបញ្ចប់នៃបេសកកម្មយោធារបស់ខ្លួននៅក្នុងប្រទេសនេះ។ រុស្ស៊ី៖ នាយករដ្ឋមន្រ្តីរុស្ស៊ី វ្ល៉ាដឹមៀរ ពូទីន បាននិយាយការពារលទ្ធផលនៃការបោះឆ្នោត ជ្រើសរើសសមាជិករដ្ឋសភា កាលពីដើមខែនេះ ព្រមទាំងបានច្រានចោលពាក្យចោទប្រកាន់ថាមានការលួចបន្លំនៅក្នុងការបោះឆ្នោត។ ស៊ីរី៖ សកម្មជនសិទ្ធិមនុស្សនិយាយថាទាហានរត់ចោលជួរស៊ីរីបានសម្លាប់ទាហាននិងសមាជិកកងកម្លាំងសន្តិសុខយ៉ាងតិច២៧នាក់ ពេលដែលសេចក្តីរាយការណ៍ថ្មីមួយបានចោទថាមន្រ្តីយោធាបានបញ្ជាឲ្យមានការបញ្ចប់បាតុកម្ម «តាមមធ្យោបាយចាំបាច់គ្រប់យ៉ាង»។ អេហ្ស៊ីប៖ ការបោះឆ្នោតជុំទីពីរដើម្បីជ្រើសរើសសមាជិករដ្ឋសភា អេហ្ស៊ីប បានបន្តធ្វើនៅថ្ងៃព្រហស្បតិ៍នេះ ដោយគណបក្ស អ៊ីស្លាមនិយម សង្ឃឹមថានឹងអាចដំឡើងសម្លេងឆ្នោតថែមទៀតលើសន្លឹកឆ្នោតដែលខ្លួនបានទទួលយ៉ាងច្រើនរួចស្រេចទៅហើយនោះ ។ សហរដ្ឋអាមេរិក៖ បេក្ខជនប្រធានាធិបតីនៃគណបក្សសាធារណរដ្ឋ កំពុងរៀបចំខ្លួនដើម្បីធ្វើកិច្ចពិភាក្សាដេញដោលគ្នាជាលើកចុងក្រោយបង្អស់ មុននឹងចាប់ផ្តើមដំណាក់កាលតែងតាំងបេក្ខជនតាមផ្លូវការ នៅក្នុងរដ្ឋអាយអូវ៉ា ភាគកណ្តាលនិងខាងលិចសហរដ្ឋនៅខែក្រោយ។ ស៊ូដង់៖ កម្មវិធីស្បៀងអាហារពិភពលោកនៃអង្គការសហប្រជាជាតិ និយាយថាមនុស្សចំនួន ២លាន៧ សែននាក់ នៅស៊ូដង់ខាងត្បូង នឹងត្រូវការជំនួយម្ហូបអាហារនៅឆ្នាំក្រោយនេះ ដោយសារមានការខូចខាតដំណាំនិងជម្លោះក្នុងតំបន់។ អាហ្វហ្គានីស្ថាន៖ មេដឹកនាំ អាហ្វហ្គានីស្ថាន បានយល់ព្រមតាមលក្ខខណ្ឌថ្មីមួយចំនួន ដើម្បីចាប់ផ្តើមធ្វើកិច្ចចរចាសន្តិភាពឡើងវិញជាមួយពួកតាលីបាន ដោយនិយាយថាពួកសកម្មប្រយុទ្ធត្រូវតែបោះទីតាំងស្ថាបនា អស័យដ្ឋានមួយនៅក្នុងតំបន់បី ហើយបញ្ឈប់អំពើហិង្សាទាំងអស់។ <!--AV--> This posting includes an audio/video/photo media file: Download Now |
| You are subscribed to email updates from VOA News: ព័ត៌មាន To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
