VOA News: ព័ត៌មាន: “លោកនួន វាសនា ជាប់ឆ្នោតជាសមាជិកក្រុមប្រឹក្សាក្រុងឡូវែលនៅអាមេរិក” plus 3 more |
- លោកនួន វាសនា ជាប់ឆ្នោតជាសមាជិកក្រុមប្រឹក្សាក្រុងឡូវែលនៅអាមេរិក
- ជំងឺគ្រុនចាញ់ និងជំងឺគ្រុនឈាមអាចកើនឡើងក្រោយពីទឹកជំនន់
- ជនរងគ្រោះដោយទឹកជំនន់បារម្ភនៅឆ្នាំខាងមុខ
- ព័ត៌មានអន្តរជាតិ៖ ១១ វិច្ឆិកា
| លោកនួន វាសនា ជាប់ឆ្នោតជាសមាជិកក្រុមប្រឹក្សាក្រុងឡូវែលនៅអាមេរិក Posted: 11 Nov 2011 12:34 PM PST កំណត់អ្នកកែសម្រួល៖ ទីក្រុងឡូវែល (Lowell) នៃរដ្ឋម៉ាស្សាជូស៊ែតស៍ (Massachusetts) គឺជាទីក្រុងដែលមានប្រជាពលរដ្ឋកម្ពុជារស់នៅច្រើនជាងគេទី២នៅសហរដ្ឋអាមេរិកបន្ទាប់ពីទីក្រុងឡងប៊ីច (Long Beach) រដ្ឋកាលីហ្វ័រញ៉ា (California)។ ប្រជាពលរដ្ឋកម្ពុជាមានប្រហែល១ភាគ៤នៃប្រជាពរដ្ឋសរុបជាង១សែននាក់នៃទីក្រុងឡូវែលនេះ ប៉ុន្តែមិនសូវមានតំណាងរបស់ខ្លួននៅក្នុងក្រុមប្រឹក្សាក្រុងទេ។ កាលពីថ្ងៃទី៨ ខែ វិច្ឆិកា កន្លងទៅនេះ លោកនួន វាសនា ដែលជាខ្មែរអារិកបានជាប់ឆ្នោតជាសមាជិកក្រុមប្រឹក្សាក្រុងឡូវែលនេះ។ លោកនួន វាសនា គឺជាខ្មែរទី២ហើយ ដែលបានជាប់ឆ្នោតជាសមាជិកក្រុមប្រឹក្សាក្រុងឡូវែលបន្ទាប់ពីលោកអ៊ុង ឫទ្ធី ដែលធ្លាប់ជាប់ឆ្នោតជាសមាជិកក្រុមប្រឹក្សាក្រុងឡូវែលពីឆ្នាំ១៩៩៩ ដល់ឆ្នាំ ២០០៥។ តទៅនេះ គឺជាបទសម្ភាសតាមទូរស័ព្ទរវាងលោកអ៊ឹម សុធារិទ្ធ នៃវីអូអេសំឡេងសហរដ្ឋអាមេរិក និងលោកនួន វាសនា។ <!--AV--> This posting includes an audio/video/photo media file: Download Now |
| ជំងឺគ្រុនចាញ់ និងជំងឺគ្រុនឈាមអាចកើនឡើងក្រោយពីទឹកជំនន់ Posted: 11 Nov 2011 09:11 AM PST មន្ត្រីសុខាភិបាល និងមន្ត្រីអង្គការក្រៅរដ្ឋាភិបាលមួយចំនួនព្រួយបារម្ភថា ប្រជាពលរដ្ឋនៅតាមតំបន់មួយចំនួនអាចនឹងប្រឈមមុខនឹងជំងឺគ្រុនចាញ់ និងគ្រុនឈាមក្រោយពីទឹកជំនន់ចាប់ផ្ដើមស្រក។ ទោះជាយ៉ាងណា នៅមិនទាន់ មានសញ្ញាណាមួយពីការផ្ទុះឡើងនៃជំងឺទាំងពីរនៅឡើយក្នុងពេលនេះ។ ទឹកជំនន់នៅកម្ពុជា បានចាប់ផ្ដើមចាប់តាំងពីខែសីហា ហើយបានលិចរាលដាលក្នុងខេត្តចំនួន១៧។ ប្រជាពលរដ្ឋយ៉ាងតិច២៥០នាក់ បានស្លាប់ក្នុងគ្រោះធម្មជាតិនេះ។ ក៏ប៉ុន្ដែចាប់តាំងពីខែតុលា មកទឹកជំនន់បានស្រកជាបណ្ដើរៗ។ លោកវេជ្ជបណ្ឌិត ច ម៉េងចួ ប្រធានមជ្ឈមណ្ឌលជាតិប្រយុទ្ធនឹងជំងឺគ្រុនចាញ់ បានមានប្រសាសន៍ថា ក្រោយពីទឹកស្រក មានទឹកដក់ជាច្រើននៅតាមភូមិ និងផ្ទះជាហេតុធ្វើឲ្យមូសមានការកើនឡើង ដែលជាកត្តាងាយនឹងបង្កឲ្យមានជំងឺគ្រុនចាញ់ និងគ្រុនឈាម។ «យើងបារម្ភ។ ជាការប្រយ័ត្ន។ ជាដាច់ខាតគឺមិនអាចប្រហែសបានទេ។ កាលណាទឹកស្រកទៅវិញ វាមានទឹកដកនៅជុំវិញផ្ទះ នៅតាមថ្លុកត្រពាំង។ យើងមានតែអប់រំគាត់ឲ្យប្រយ័ត្ន កុំឲ្យកុមារអង្គុយនៅកន្លែងងងឹត ពីព្រោះមូសគ្រុនឈាមអត់ខាំយប់ទេ»។ ជាមួយគ្នានេះដែរ លោកវេជ្ជបណ្ឌិត លី សុវណ្ណ អនុប្រធាននាយកដ្ឋានប្រយុទ្ធប្រឆាំងនឹងជំងឺឆ្លងនៃក្រសួងសុខាភិបាលបានឲ្យដឹងថា ក្រៅពីជំងឺគ្រុនឈាម និងជំងឺគ្រុនចាញ់ លោកព្រួយបារម្ភអំពីជំងឺមួយចំនួនទៀត ដែលអាចមានការកើនឡើង នៅក្រោយពេលទឹកស្រកដូចជា ជំងឺរាករូស ជំងឺសើស្បែក និងជំងឺភ្នែកក្រហមជាដើម។ លោកបានបញ្ជាក់ថា ក្រសួងសុខាភិបាល បានត្រៀមថ្នាំពេទ្យ និងបរិក្ខាពេទ្យមួយចំនួន នៅតាមមន្ទីរពេទ្យ និងមណ្ឌលសុខភាពទាំងអស់រួចជាស្រេច ហើយដើម្បីទប់ទល់នឹងការផ្ទុះជំងឺទាំងនោះឡើងជាយថាហេតុ។ «ទី១គឺខ្លាចរឿងរាគដោយសារកន្លែងផ្គត់ផ្គង់ទឹកដូចជាទឹកអណ្តូង ស្រះ ត្រពាំង នោះបានលិចលង់ ទឹកកខ្វក់ចូល ដួច្នេះគឺសូមឲ្យមានការប្រុងប្រយ័ត្ន។ ប្រជាពលរដ្ឋ ត្រូវតែមានការដាំទឹកពុះហើយនឹងមានការដាក់ថ្នាំក្លូរ៉ាមីន ទី២ព្រួយបារម្ភទាក់ទងទៅនឹងបើកាលណាលិច ទឹកអញ្ចឹងខ្លាចមានគ្រុនឈាម។ ទី៣អាចសើស្បែក។ ទី៤ អាចជំងឺឈឺភ្នែកហើយគ្រុនចាញ់ ហេតុដូច្នេះហើយបានជាក្រសួងសុខាភិបាល បានសម្រេចធ្វើការចែកមុងជូនដល់គ្រប់ខេត្តក្រុង ដែលមានសក្តានុពល ដែលអាចមានជំងឺគ្រុនចាញ់»។ តួលេខរបស់មជ្ឈមណ្ឌលជាតិប្រយុទ្ធ នឹងជំងឺគ្រុនចាញ់ បានឲ្យដឹងថា កាលពីឆ្នាំ២០០០ កម្ពុជាមានអ្នកជំងឺគ្រុនចាញ់ចំនួន១២៩.១៦៧នាក់ ហើយអាត្រានេះ មានការធ្លាក់ជាបន្តបន្ទាប់រហូតដល់ ឆ្នាំ២០១០ មានចំនួន៥៦.២១៧នាក់។ ចំណែកឯនៅឆ្នាំ២០១១ ក្នុងរយៈពេល ៩ខែនេះ មានអ្នកកើតជំងឺគ្រុនចាញ់ប្រមាណជា៤៣.៩៨៧នាក់ មានអ្នកស្លាប់ចំនួន៦០នាក់។ ដោយឡែកគិតមកទល់ដើមខែឧសភា ឆ្នាំ២០១១នេះ មានកុមារកម្ពុជាអាយុក្រោម១៥ឆ្នាំសរុបចំនួន៥៨០នាក់ បានឆ្លងជំងឺគ្រុនឈាម ក្នុងនោះកុមារចំនួន ៦នាក់បានស្លាប់។ ជំងឺគ្រុនឈាម ភាគច្រើនកើតលើកុមារ ដែលមានអាយុតិចជាង១៥ឆ្នាំ។ ជំងឺនេះចម្លងដោយមូស ខ្លា។ មានប្រជាពលរដ្ឋកម្ពុជាចន្លោះពី១០.០០០នាក់ទៅ ១២.០០០នាក់ ក្នុងមួយឆ្នាំៗឆ្លងជំងឺនេះ ក៏ប៉ុន្ដែអត្រាស្លាប់ ដោយសារជំងឺនេះ មានកម្រិតក្រោមមួយភាគរយ។ ម្យ៉ាងវិញទៀតជំងឺគ្រុន ឈាមនៅកម្ពុជាតែងតែផ្ទុះឡើងរាតត្បាតយ៉ាងខ្លាំងក្លា ជាប្រចាំរវាងពី៣ទៅ៥ឆ្នាំម្តង ដោយឆ្នាំ២០១១នេះ គឺវដ្តនៃការផ្ទុះរបស់ជំងឺគ្រុនឈាមផងដែរ។ លោក គឹម រតនា នាយកអង្គការការីតាសកម្ពុជា ដែលជាអង្គការមួយ ដែលបានធ្វើការទៅលើផ្នែកសុខភាពដែរនោះ បានឲ្យដឹងថាទន្លាប់របស់ប្រជាពលរដ្ឋមួយចំនួននៅមិនទាន់មានការកែប្រែនៅឡើយ ចំពោះការប្រើប្រាស់ទឹកស្អាត និងបង្គន់អនាម័យជាហេតុធ្វើឲ្យអ្នកទាំងនោះ មានការប្រឈមមុខខ្ពស់នឹងជំងឺផ្សេងៗ ក្នុងពេលមានទឹកជំនន់នេះ។ លោកបានបញ្ជាក់ថា កក្តាទាំងនេះគួរតែមន្រ្តីសុខាភិបាលពង្រឹងបន្ថែមលើការអប់រំដល់ប្រជាពលរដ្ឋ នៅតាមមូលដ្ឋាន ដើម្បីឲ្យអ្នកទាំងនោះ មានការផ្លាស់ប្តូរទន្លាប់ដែលមិនល្អចេញ។ «ប្រជាជនគាត់គួរតែប្រុងប្រយ័ត្ន ពីព្រោះ អីគាត់អាចប្រឈមនឹងជំងឺឆ្លងតាមរយៈទឹកនេះ។ ការបន្ទោរបង់របស់គាត់នោះ យើងឃើញថា គាត់មិនមានបង្គន់អនាម័យគ្រប់ៗគ្នានោះទេ។ អញ្ចឹងវាអាចនឹងធ្វើឲ្យទឹកនោះកាន់ តែកខ្វក់ហើយអាចប៉ះពាល់ដល់សុខភាពរបស់គាត់។ បើទោះបី ជាទឹកស្រកមែនយើងឃើញថា នឹងអាចកើតមូសច្រើន ហើយបើប្រជាជន គាត់មិនបានប្រុងប្រយ័ត្នដេកមិនបានដាក់មុងឲ្យត្រឹមត្រូវទេនឹងអាចបណ្តាលឲ្យមានជំងឺគ្រុនចាញ់ និងគ្រុនឈាមបាន។ លោកវេជ្ជបណ្ឌិត ច ម៉េងចួ ប្រធានមជ្ឈមណ្ឌលជាតិប្រយុទ្ធនឹងជំងឺគ្រុនចាញ់ បានបញ្ជាក់ថា ក្រសួងសុខាភិបាល បានធ្វើកំពុងផ្ដល់ការអប់រំនៅតាមមូលដ្ឋានពីជំងឺចម្លងដោយសារសត្វមូសទាំងពីរប្រភេទនេះ៕ This posting includes an audio/video/photo media file: Download Now |
| ជនរងគ្រោះដោយទឹកជំនន់បារម្ភនៅឆ្នាំខាងមុខ Posted: 11 Nov 2011 08:35 AM PST កម្ពុជាទទួលរងគ្រោះយ៉ាងធ្ងន់ធ្ងរដោយសារទឹកជំនន់ក្នុងឆ្នាំនេះ។ ជនរងគ្រោះនៃទឹកជំនន់បារម្ភអំពីស្ថានភាពជីវភាពនៅឆ្នាំក្រោយៗទៀត។ អ្នកស្រី សេន ស៊ីមន អាយុ៣៦ឆ្នាំ បានឈរសំឡឹងមើលទៅទឹកល្ហល្ហាចលិចលង់សន្ទូង និងផ្ទះសម្បែងរបស់អ្នកស្រីពីទីសុវត្ថិភាពមួយក្នុងឃុំបារាយណ៍ ស្រុកបារាយណ៍ ខេត្តកំពង់ធំ ដោយទឹកមុខក្រៀមក្រំ និងអស់សង្ឃឹមចំពោះអនាគត។ អ្នកស្រីបានបញ្ជាក់ថា អ្នកស្រីប្រឈមនឹងកង្វះស្បៀងអាហារប្រចាំថ្ងៃ និងត្រូវការជំនួយឧបត្ថម្ភពីរដ្ឋាភិបាល បន្ទាប់ពីទឹកជំនន់បានជន់លិចផ្ទះសម្បែង និងសន្ទូងរបស់អ្នកស្រី។ អ្នកស្រីព្រួយបារម្ភយ៉ាងខ្លាំងចំពោះការប្រឈមនឹងភាពអត់ឃ្លាន និងភាពក្រីក្រកាន់តែខ្លាំងនៅឆ្នាំក្រោយដោយសារសន្ទូងមួយហិកតារបស់អ្នកស្រីបានរលួយខូចអស់ដោយទឹកជំនន់។ «ឆ្នាំក្រោយពិបាកវេទនាជាងនេះទៅទៀត។ ខ្ញុំខ្វះខាតការហូបចុក។ បើយើងអត់ហើយ យើងនឹងក្រីក្រ។ ខ្ញុំពិបាកគិតខាងមុខទៀតមិនដឹងបានអ្វីហូប»។ គ្រោះទឹកជំនន់ដ៏ធ្ងន់ធ្ងរដែលគ្រប់ដណ្តប់លើកម្ពុជាចាប់តាំងពីខែសីហាបានសម្លាប់មនុស្សជាង២៥០នាក់ និងបានបំផ្លាញស្រូវសន្ទូងអស់ជាង៣៩០.០០០ហិកតា និងប្រជាពលរដ្ឋយ៉ាងតិច១,៥លាននាក់បានទទួលរងគ្រោះដោយទឹកជំនន់នៅក្នុងខេត្តចំនួន១៧។ នេះបើតាមរបាយការណ៍របស់គណៈកម្មាធិការជាតិគ្រប់គ្រងគ្រោះមហន្តរាយ និងអង្គការសហប្រជាជាតិ។ ទុក្ខលំបាក និងក្តីកង្វល់របស់អ្នកស្រី សេន ស៊ីមន មិនខុសពីប្រជាពលរដ្ឋយ៉ាងតិច១,៥លាននាក់ផ្សេងទៀតដែលបានទទួលរងនូវផលប៉ះពាល់ដោយទឹកជំនន់ដ៏ធ្ងន់ធ្ងរបំផុតមិនធ្លាប់មាននៅកម្ពុជាក្នុងរយៈពេល១០ឆ្នាំកន្លងមកនេះ។ អ្នកស្រី សោម វ៉ាន់ថុន អាយុ៥៦ឆ្នាំ នៅភូមិចតុលោក ឃុំបារាយណ៍ ស្រុកបារាយណ៍ ខេត្តកំពង់ធំ បាននិយាយដោយចង្អុលទៅផ្ទះលិចទឹក របស់អ្នកស្រីថាទឹកជំនន់នេះបានបំផ្លាញនូវអ្វីៗដែលអ្នកស្រីមាន និងធ្វើឱ្យជីវភាពរស់នៅរបស់អ្នកស្រីប្រឈមនឹងអនាគតមិនច្បាស់លាស់ ដោយសារផ្ទះសម្បែង និងស្រូវសន្ទូងជាង៥.០០០ម៉ែក្រការ៉េត្រូវបានបាត់បង់។ «ផ្ទះរបស់ខ្ញុំទឹកលិចលើរនាបផ្ទះកម្ពស់ពីរតឹក។ មកពីលិចទឹកលំបាកវេទនាជីវភាពដុនដាប បើរឿងជីវិតផង សូម្បីតែផ្ទះសឹងតែគ្មាននៅ។ នៅពេលទឹកស្រកផ្ទះនេះរលំហើយ ខ្ញុំអត់មានអ្វីនៅទេ សរសរពុកអស់ទៅហើយ រនាមឫស្សីបាក់ទាំងអស់ ហើយជញ្ចាំងខ្យល់មកវ៉ៃបាក់អស់មួយចំហៀងៗទៅហើយ»។ អ្នកស្រី នាង យ៉ង់ អាយុ៣៨ឆ្នាំ ក៏ដូចជាអ្នកនៅភូមិចតុលោកនេះដែរ បានទទួលអំណោយអង្ករ១០គីឡូក្រាម មី២០កញ្ចប់ អំបិល ទឹកត្រី ភួយ មុង និងមងមួយដៃពីរដ្ឋាភិបាល។ អ្នកស្រី នាង យ៉ង់ បានបញ្ជាក់ថា អង្ករ១០គីឡូក្រាមអាចបរិភោគបានរយៈពេលតែប្រាំថ្ងៃប៉ុណ្ណោះ។ ប៉ុន្តែអ្នកស្រីបានដាក់មងចាប់ត្រីយកទៅលក់យកប្រាក់មកទិញអង្ករបរិភោគប្រចាំថ្ងៃ។ «អ្នកស្រីបានមួយថ្ងៃប្រាំគីឡូក្រាម ហើយត្រីមួយគីឡូក្រាមតម្លៃ១០០០រៀល ហើយអង្ករមួយគីឡូក្រាម២.៥០០រៀលសម្រាប់មួយពេលៗ។ ជីវភាពយ៉ាប់យឺនណាស់សព្វថ្ងៃនេះ»។ អ្នកស្រុកបារាយណ៍មិនខុសពីអ្នកស្រុកសណ្តាន់ទេ សន្ទូងរបស់ពួកគេបានរលួយខូចអស់។ វាលស្រែសន្ទូងមើលទៅឃើញមានតែទឹកល្ហល្ហាច និងផ្ទះសម្បែងត្រូវបានលិចលង់ដោយទឹកជំនន់។ អ្នកស្រីតាន់ សុខបៀង អាយុ៥៥ឆ្នាំ នៅក្នុងភូមិរនាម ឃុំមានជ័យ ស្រុកសណ្តាន់ ខេត្តកំពង់ធំដែលមានស្រូវសន្ទូងជាង៥.០០០ម៉ែត្រការ៉េរលួយខូចអស់ បានបញ្ជាក់ថា អ្នកស្រីមិនទាន់បានទទួលអំណោយពីរដ្ឋាភិបាលនៅឡើយទេ ប៉ុន្តែអ្នកស្រីបានបរិភោគអង្ករដែលនៅសល់បន្តិចបន្តួចពីឆ្នាំមុន។ «ស្រូវអង្ករលិចអស់រលីងហើយគ្មានសល់។ ឥឡូវនៅមានតែទឹក។ ភូមិនេះមើលទៅអត់ឃើញមានស្រូវទេ មានតែវាលទឹកល្ហល្ហាច។ ស្រូវសន្ទូងរលួយអស់បាត់ហើយ។ ខ្ញុំព្រួយបារម្ភណាស់ឆ្នាំក្រោយ មិនដឹងធ្វើម៉េចបានស្រូវអង្ករចិញ្ចឹមកូនទេ។ ឆ្នាំក្រោយទៀតលំបាកមែនទែនហើយ បើឆ្នាំនេះលំបាកទៅហើយ»។ លោកប៉ាវ សេន អាយុ៣៣ឆ្នាំ នៅភូមិរនាម ឃុំមានជ័យ ស្រុកសណ្តាន់ ខេត្តកំពង់ធំ បានសុំឱ្យរដ្ឋាភិបាល និងសហគមន៍អន្តរជាតិជួយផ្តល់ជំនួយស្រូវពូជ ថវិកា និងអង្ករសមាប់កសាងជីវភាពជាថ្មី បន្ទាប់ពីសន្ទូងរបស់លោកបានរលួយខូចទាំងស្រុងដោយទឹកជំនន់នៅឆ្នាំនេះ។ «សន្ទូងប្រហែល៣០អា និងចេក អំពៅតាមផ្ទះខូចខាតអស់ហើយ ដោយសារទឹកជំនន់។ ខ្ញុំមានតែប្រឈមមុខនឹងរឿងភាពក្រក្រី ដោយសារសន្ទូងរលួយ។ ខ្ញុំព្រួយបារម្ភចំពោះស្រូវដែលរលួយទៅ វាអត់មានអ្វីហូបតទៅឆ្នាំក្រោយ»។ លោកឈុន ឈន អភិបាលខេត្តកំពង់ធំ បានបញ្ជាក់ថាសន្ទូងប្រមាណ៦៥.០០០ហិកតា ស្មើនឹងជាង៣៣ភាគរយបានរលួយខូច ប្រជាពលរដ្ឋខ្វះស្បៀងអាហារជាង៤.០០០គ្រួសារ និងមនុស្សស្លាប់៤៧នាក់ ហើយប្រជាពលរដ្ឋជន្លៀសមកកាន់ទីសុវត្ថិភាពជិត ២.៥០០គ្រួសារបានវិលត្រឡប់ទៅផ្ទះ។ លោកព្រួច សយ មេឃុំមានជ័យបានបញ្ជាក់ថាសន្ទូង៤៧៥ហិកតាក្នុងចំណោមជាង៥០០ហិកតាបានរលួយទាំងស្រុង។ លោកព្រួច សយបានទទួលស្គាល់ថា ការចែកអំណោយនេះមិនទាន់បានដល់ជនរងគ្រោះដោយទឹកជំនន់គ្រប់គ្នាទេ ដោយអំណោយនេះត្រូវចែកដល់អ្នកភូមិក្រីក្រជាងគេមុន និងបន្ទាប់អ្នកមានជីវភាពគ្រាន់បើ។ «ខ្ញុំថាដែលបងប្អូនអាចនឹងប្រឈមនឹងការខ្វះខាតស្បៀងផង និងជួបប្រទះនឹងភាពអត់ឃ្លានទៅមុខទៀត»។ សហរដ្ឋអាមេរិក ប្រទេសចិន អង្គការសហប្រជាជាតិ និងធនាគារអភិវឌ្ឍន៍អាស៊ី បានផ្តល់ជំនួយចំនួន១៦,៥៥លានដុល្លារអាមេរិកសម្រាប់ជួយដល់ជនរងគ្រោះដោយទឹកជំនន់។ លោកច័ន្ទ សារ៉ុន រដ្ឋមន្ត្រីក្រសួងកសិកម្ម បានថ្លែងថ្មីៗនេះថារដ្ឋាភិបាលបានត្រៀមស្រូវពូជជាង៣.០០០តោនសម្រាប់ចែកជូនកសិករដាំដុះក្រោយទឹកស្រក។ លោកឧបនាយករដ្ឋមន្ត្រី ហោ ណាំហុង រដ្ឋមន្ត្រីក្រសួងការបរទេស បានបញ្ជាក់កាលពីថ្ងៃច័ន្ទថា រដ្ឋាភិបាលបានបញ្ចេញអង្គរចំនួន២.០០០តោនទៀត ដើម្បីចែកជូនដល់ជនរងគ្រោះដោយទឹកជំនន់។ លោកកែវ វី នាយកខុទ្ទការល័យនៃគណៈកម្មាធិការជាតិគ្រប់គ្រងគ្រោះមហន្តរាយ បានបញ្ជាក់ថា ការខូចខាតដោយទឹកជំនន់ក្នុងឆ្នាំ២០១១នេះមានតម្លៃជាង៥២០លានដុល្លារអាមេរិក។ ទឹកជំនន់ឆ្នាំ២០០០ បានធ្វើឲ្យខូចខាតគិតជាទឹកប្រាក់១៤៥លានដុល្លារអាមេរិក៕ This posting includes an audio/video/photo media file: Download Now |
| ព័ត៌មានអន្តរជាតិ៖ ១១ វិច្ឆិកា Posted: 11 Nov 2011 01:50 AM PST ព័ត៌មានចុងក្រោយបំផុត៖ អាស៊ីប៉ាស៊ីហ្វិក៖ លោកប្រធានាធិបតីស.រ.អា បារ៉ាក់ អូបាម៉ាធ្វើដំណើរចាកចេញពីរដ្ឋធានី Washingtonនៅថ្ងៃសុក្រនេះ ដើម្បីទៅបំពេញទស្សនកិច្ច៩ថ្ងៃនៅក្នុងភូមិភាគអាស៊ី-ប៉ាស៊ីហ្វិកដែលផ្តោតការយកចិត្តទុកដាក់លើការពង្រឹងចំណងទាក់់ទងរបស់រដ្ឋាភិបាលក្រុងWashington ជាមួយតំបន់នោះដែលជាមហាអំណាចសេដ្ឋកិច្ចកំពុងលូតលាស់។ អាស៊ីប៉ាស៊ីហ្វិក៖ លោកស្រីរដ្ឋមន្ត្រីក្រសួងការបរទេសស.រ.អ. Hillary Clinton បានសុំដល់ប្រទេសចិនឱ្យអនុញ្ញាតឱ្យប្រាក់ Yuan របស់ខ្លួនមានតម្លៃច្រើនជាងមុន ឱ្យដករបាំងពាណិជ្ជកម្មនិងកែលម្អសិទ្ធិមនុស្ស។ អ៊ឺរ៉ុប៖ លោក Lucas Papademos មានកំណត់នឹងស្បថសច្ចាប្រណិធានចូលកាន់តំណែងជានាយករដ្ឋមន្ត្រីថ្មីនៃប្រទេសក្រិកនៅក្រោយកិច្ចចរចាគ្នាយ៉ាងខ្លាំងជិតមួយអាទិត្យ អំពីការបង្កើតរដ្ឋាភិបាលចម្រុះមួយដែលសង្ឃឹមថានឹងជួយសង្គ្រោះប្រទេសពីវិបត្តិហិរញ្ញវត្ថុដ៏ធ្ងន់ធ្ងរ។ ស៊ិរី៖ ពួកសកម្មជនប្រឆាំងនៅក្នុងប្រទេសស៊ីរីនិយាយថាពួកគេនឹងប្រើប្រាស់បាតុកម្មដែលបានត្រូវគ្រោងធ្វើនៅថ្ងៃសុក្រនេះដើម្បីអំពាវនាវឱ្យមានការផ្អាកសមាជិកភាពនៃប្រទេសស៊ីរីក្នុងសម្ព័ន្ធអារ៉ាប់។ យ៉េមេន៖ កងកម្លាំងរដ្ឋាភិបាល Yemen បានសម្លាប់ជនស៊ីវិលយ៉ាងតិចណាស់៩នាក់ក្នុងក្រុងTaiz ដែលជាក្រុងមួយក្នុងបណ្តាក្រុងធំបំផុតរបស់ប្រទេស។ ពួកមន្ត្រីពេទ្យនិងពួកអ្នកឃើញហេតុការណ៍ដោយផ្ទាល់និយាយថា ពួកជនស៊ីវិលបានត្រូវសម្លាប់កាលពីព្រឹកថ្ងៃសុក្រនេះ ក្រោយពីកងកម្លាំងរដ្ឋាភិបាលបានបាញ់ផ្តក់ ជាថ្មីទៅលើក្រុង Taiz ដែលនៅទីនោះក្រុមបាតុករបានអំពាវនាវឱ្យលោកប្រធានាធិបតី Ali Abdullah Saleh ចុះចេញពីតំណែង។ <!--AV--> ព័ត៌មាននៅពេលមុននេះ៖ <!--IMAGE-RIGHT--> ក្រិក ៖ នាយករដ្ឋមន្រ្តីថ្មីរបស់ក្រិក Lucas Papademos និយាយថាប្រទេសលោកកំពុងស្ថិតនៅក្នុង«ស្ថានការណ៍គួរមានគ្រោះថ្នាក់មួយ» ហើយថាការដោះស្រាយបញ្ហាដ៏ធំមហិមាដែលសេដ្ឋកិច្ចប្រទេស ក្រិក កំពុងប្រឈមមុខមិនជាការងាយស្រូលធ្វើទេ។ ក្រិក ៖ នាយករដ្ឋមន្រ្តីស្តីទីថ្មីរបស់ក្រិកជាសេដ្ឋវិទូដែលមានគេគោរពច្រើន ហើយបានចំណាយពេលភាគច្រើនក្នុងជីវិតរបស់លោកប្តូរតំណែងជាគ្រូបង្រៀនជាន់ខ្ពស់ក្នុងសាកលវិទ្យាល័យនៅអាមេរិកនិងកាន់តំណែងជាន់ខ្ពស់ក្នុងវិស័យហិរញ្ញវត្ថុនៅក្នុងអឺរ៉ុប។ សហរដ្ឋអាមេរិក ៖ រដ្ឋាភិបាលក្នុងតំបន់មួយនៅក្នុងសរអាបានដាក់ពាក្យប្រកាសក្ស័យធនសម្រាប់ទីក្រុងដ៏ធំបំផុតមួយអាមេរិក ដោយសារខកខានមិនអាចសងប្រាក់បំណុលចំនួន៣ពាន់លានដុល្លារ សម្រាប់សង់ប្រព័ន្ធទឹកលូទឹកមួយបាន។ ស៊ីរី ៖ សកម្មជនសិទ្ធិមនុស្សស៊ីរីនិយាយថាមានមនុស្សយ៉ាងតិច១៩ នាក់បានស្លាប់កាលពីថ្ងៃព្រហស្បត៍ ពេលដែលកងកម្លាំងរដ្ឋាភិបាលបានវាយបង្ក្រាបក្រុមបាតុករអ្នកប្រឆាំង និងបានធ្វើការវាយប្រយុទ្ធជាមួយទាហានចោលជួរក្នុងតំបន់ជាច្រើននៅក្នុងប្រទេស។ ស៊ូដង់ ៖ យន្តហោះចម្បាំងបានទម្លាក់គ្រាប់បែកទៅលើជំរុំជនភៀសខ្លួនមួយនៅស៊ូដង់ខាងត្បូង កាលពីថ្ងៃព្រហស្បត៍។ មន្រ្តីក្នុងតំបន់ បានដាក់ទោសទៅលើការវាយប្រហារនេះ ទៅលើប្រទេសជិតខាង ស៊ូដង់។ លីបេរីយ៉ា ៖ ប្រធានាធិបតីលីបេរីយ៉ា Ellen Sirleaf Johnson ដែលជាមេដឹកនាំស្រីជាប់ឆ្នោតតាមលទ្ធិប្រជាធិតេយ្យទីមួយនៅក្នុងទ្វីបអាហ្វ្រិក បានទទួលជ័យជំនះយ៉ាងស្រួលសម្រាប់អាណត្តីទីពីរក្នុងការបោះឆ្នោតឡើងវិញ ដែលគូប្រជែងរបស់លោកបានធ្វើពហិការ៕ This posting includes an audio/video/photo media file: Download Now |
| You are subscribed to email updates from VOA News: ព័ត៌មាន To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
