VOA News: ព័ត៌មាន: “សហជីពចង់បានចម្លើយអំពីការដួលសន្លប់របស់កម្មករ” plus 2 more |
- សហជីពចង់បានចម្លើយអំពីការដួលសន្លប់របស់កម្មករ
- ជនជាតិភាគតិចនៅក្រចេះចោទក្រុមហ៊ុនរំលោភយកដីចម្ការ
- ព័ត៌មានអន្តរជាតិសង្ខេប៖ ២៥ កក្កដា
| សហជីពចង់បានចម្លើយអំពីការដួលសន្លប់របស់កម្មករ Posted: 25 Jul 2011 03:29 PM PDT មេដឹកនាំសហជីពសេរីកម្មករនៅថ្ងៃច័ន្ទនេះបានទាមទារឱ្យរដ្ឋាភិបាលធ្វើការស៊ើបអង្កេតករណីកម្មករដួលសន្លប់ប្រមាណ២.៣០០នាក់នៅតាមរោងចក្រកាត់ដេរចំនួនប្រាំនៅកម្ពុជាចាប់តាំងពីដើមឆ្នាំ២០១១។ សំណើរបស់សហជីពសេរីកម្មករនៃព្រះរាជាណាចក្រកម្ពុជាបានស្នើសុំទៅលោក ម៉ម ប៊ុនហេង រដ្ឋមន្ត្រីក្រសួងសុខាភិបាល លោកម៉ុក ម៉ារ៉េត រដ្ឋមន្ត្រីក្រសួងបរិស្ថាន និងលោក វង សូត រដ្ឋមន្ត្រីក្រសួងការងារឱ្យចាត់វិធានការ និងត្រួតពិនិត្យជាប្រចាំទៅលើរោងចក្រ សហគ្រាសដែលសាងសង់ និងរៀបចំខ្វះខាតនូវប្រព័ន្ធអនាម័យ និងបរិស្ថាន នាំឱ្យប៉ះពាល់ដល់សុខភាពកម្មករ កម្មការិនី។ នេះបើតាមសេចក្តីថ្លែងការណ៍របស់ក្រុមសហជីព។ សេចក្តីថ្លែងការណ៍នេះ បានបញ្ជាក់ថានៅដើមឆ្នាំ២០១១នេះ មានករណីកម្មករ កម្មការិនីបម្រើការនៅតាមបណ្តារោងចក្រ សហគ្រាសជាច្រើនទាំងនៅរាជធានីភ្នំពេញ ទាំងនៅតាមបណ្តាខេត្ត ទទួលរងនូវការដួលសន្លប់អស់កម្លាំងល្ហិតល្ហៃយ៉ាងចម្លែកក្នុងពេលបំពេញការងារដោយមិនដឹងអំពីមូលហេតុជាក់លាក់។ សេចក្តីថ្លែងការណ៍នេះ បានបន្តថារោងចក្រ សហគ្រាសដែលមានកម្មករ កម្មការិនីដួលសន្លប់ក្នុងពេលបំពេញការងារនេះ រួមមានរោងចក្រ M&V នៅខេត្តកំពង់ឆ្នាំងប្រមាណ៦០០នាក់ រោងចក្រមេនហាតធេននៅខេត្តកំពង់ចាមប្រមាណ២០០នាក់ រោងចក្រឃីងខ្វេសសិន នៅទីក្រុងភ្នំពេញប្រមាណ៥០០នាក់ រោងចក្រហុងវ៉ាហ្គាមិននៅទីក្រុងភ្នំពេញប្រមាណ៤០០នាក់ និងរោងចក្រហ៊ុយធៀននៅទីក្រុងភ្នំពេញប្រមាណ៦០០នាក់។ លោក ជា មុន្នី ប្រធានសហជីពសេរីកម្មករនៃព្រះរាជាណាចក្រកម្ពុជា បានថ្លែងថាលោកមានការព្រួយបារម្ភយ៉ាងខ្លាំងអំពីសុខភាពរបស់កម្មករ កម្មការិនី ដោយសារក្រសួងពាក់ព័ន្ធមិនយកចិត្តទុកដាក់ចំពោះការដួលសន្លប់នោះទេ។ «ការពុលសន្លប់នេះ យើងសង្ស័យជាច្រើនករណី៖ ទីមួយពុលថ្នាំ ទីពីរអាចពុលដោយសារកម្មករធ្វើការថែមម៉ោងច្រើនម៉ោង និងទីបីបរិយាកាសនៅក្នុងរោងចក្រសហគ្រាសថប់មិនមានខ្យល់គ្រប់គ្រាន់ មិនមានទឹក ឬក៏បរិយាកាសទីលានមុខរោងចក្រចង្អ្រៀតថប់ធ្វើឱ្យប៉ះពាល់ដល់សុខភាពរបស់កម្មករ។ សូមឱ្យក្រសួងពាក់ព័ន្ធទាំងបីនេះ ធ្វើអធិការកិច្ចដែលអាចទទួលយកបាន ប្រកបទៅដោយវិជ្ជាជីវៈ ឯករាជ្យ និងគ្មានអំពើពុករលួយ»។ លោក សេង សាវុធ ប្រធានខុទ្ទកាល័យនៃក្រសួងបរិស្ថាន បានបញ្ជាក់ថាក្រសួងបរិស្ថាននឹងបញ្ជូនក្រុមអ្នកជំនាញចុះទៅត្រួតពិនិត្យមើលកន្លែងធ្វើការរបស់កម្មករនៅតាមរោងចក្រទាំងនោះ តាមការស្នើសុំរបស់សហជីពសេរីកម្មករនៃព្រះរាជាណាចក្រកម្ពុជា។ លោក ប៉ុក វ៉ាន់ផាត អនុប្រធាននាយកដ្ឋានពេទ្យការងារនៃក្រសួងការងារ បានថ្លែងថាកម្មករជាង៥០នាក់នៅរោងចក្រហ៊ុយជៀន និងហុងវ៉ាមានអាការៈវិលមុខ និងពិបាកដកដង្ហើម ដោយមូលហេតុទទួលទានដំណេកមិនគ្រប់គ្រាន់ និងទទួលទានអាហារគ្មានថាមពល ប៉ុន្តែមិនមែនមកពីពុលថ្នាំគីមីជាប់នឹងក្រណាត់ និងបរិស្ថាននៃខ្យល់ចេញចូលមិនល្អនៅក្នុងកន្លែងការងារនោះទេ។ «ការប៉ាន់ស្មានទៅ ក្នុងមួយព្រឹក គាត់បរិភោគអាហារ១.០០០រៀល។ អាហារតម្លៃ១.០០០រៀល យើងមើលទៅមិនគ្រប់គ្រាន់ទេ។ ម្នាក់ឯងអញ្ចឹងគាត់បរិភោគបាយមួយកញ្ចប់ជាមួយស៊ុតមួយអត់គ្រប់កាល់ឡូរី។ កម្មករប្រឈមនឹងកង្វះជីវជាតិ»។ លោក ប៊ុន យិង មន្ត្រីព័ត៌មាននៃគម្រោងរោងចក្រកាន់តែប្រសើរនៅកម្ពុជារបស់អង្គការពលកម្មអន្តរជាតិ បានថ្លែងថានៅពេល មានកម្មករដួលសន្លប់បែបនេះ លោកគ្រាន់តែតាមឃ្លាំមើលទៅលើលក្ខន្តិកៈការងារ និងចុះត្រួតពិនិត្យស្ថានភាពសុខភាពរបស់កម្មករនៅតាមរោងចក្រ ហើយធ្វើសេចក្តីរាយការណ៍ជូនអ្នកបញ្ជាទិញ។ «បញ្ហាដែលយើងសង្កេតឃើញនោះ ពាក់ព័ន្ធជាមួយនឹងបរិយាកាសការងារ សារធាតុមានជាតិគីមី ជាពិសេសក្រណាត់នាំចូលថ្មីៗ និងបញ្ហាសុខភាពរបស់កម្មករក៏អាចជាបញ្ហាមួយចំណែក ហើយការភ័យខ្លាចនៅពេលមានការដួលសន្លប់ជាច្រើនរយនាក់ធ្វើឱ្យប៉ះពាល់ដល់សុខភាពរបស់គាត់»។ កាលពីសប្តាហ៍មុន ក៏មានកម្មករជាង៤០០នាក់បានដួលសន្លប់នៅតាមរោងចក្រមួយចំនួននៅទីក្រុងភ្នំពេញដែរ៕ This posting includes an audio/video/photo media file: Download Now |
| ជនជាតិភាគតិចនៅក្រចេះចោទក្រុមហ៊ុនរំលោភយកដីចម្ការ Posted: 25 Jul 2011 03:07 PM PDT ក្រុមជនជាតិភាគតិចស្ទៀងនៅស្រុកស្នួលខេត្តក្រចេះប្រមាណជាង២០០គ្រួសារបានចោទប្រកាន់ថាក្រុមហ៊ុន CIV ដែលបានទទួលដីសម្បទានសេដ្ឋកិច្ចពីអាជ្ញាធរខេត្តបានរំលោភយកដីស្រែនិងដីចម្ការរបស់ពួកគេជាង៥០០ហិកតាដែលធ្វើឱ្យប៉ះពាល់យ៉ាងធ្ងន់ធ្ងរដល់ជីវភាពរបស់ជនជាតិភាគតិច។ ជម្លោះនេះបានកើតមានឡើងអស់រយៈពេលជាង៥ឆ្នាំមកហើយដែលរហូតមកដល់ពេលនេះក្រុមប្រជាពលរដ្ឋបានចោទប្រកាន់ថា អាជ្ញាធរហាក់បីដូចជាមិនអើពើចំពោះករណីនេះ។ កាលពីថ្ងៃអាទិត្យក្រុមហ៊ុនបានរារាំងមន្ត្រីរបស់សមាគមសិទ្ធិមនុស្សអាដហុកដែលប៉ុនប៉ងចុះទៅពិនិត្យមើលទីតាំងទំនាស់នេះដោយផ្ទាល់។ ក្រុមហ៊ុនCIV បានទទួលដីសម្បទានសេដ្ឋកិច្ចពីខេត្តក្រចេះកាលពីឆ្នាំ២០០៦ចំនួន៧៦៩ហិកតាសម្រាប់ដាំដើមកៅស៊ូនិងដំណាំឧស្សាហកម្មផ្សេងៗ ក៏ប៉ុន្តែក្រុមហ៊ុននេះបានទទួលរងនូវការចោទប្រកាន់ថាបានរំលោភយកដីរបស់ជនជាតិភាគតិចស្ទៀងក្នុងខណៈពេលដែលក្រុមហ៊ុនបានពង្រីកការឈូសឆាយដីរបស់ខ្លួន។ លោក កៀត សាអុន អាយុ៥៣ឆ្នាំជនជាតិភាគតិចស្ទៀងរស់នៅភូមិឃុំមានជ័យស្រុកស្នួលខេត្តក្រចេះបាននិយាយថាលោកបានបាត់បង់ដីចំនួនជាង២ហិកតាក្នុងចំណោមដីស្រែនិងដីចម្ការរបស់លោកចំនួន១២ហិកតា។ លោកបានបញ្ជាក់ថាក្រុមហ៊ុនមិនបានផ្តល់សំណងដល់ការខូចខាតទេក៏ប៉ុន្តែផ្ទុយទៅវិញបានបាញ់គំរាមប្រជាពលរដ្ឋដែលហ៊ានចេញមុខប្រឆាំងតវ៉ា។ «ចៅហ្វាយខេត្ត ចៅហ្វាយស្រុកក៏អត់ឃើញមកដោះគ្រាន់តែបានសន្យាថាថ្ងៃនេះថ្ងៃនោះ ហើយបាត់ឈឹង។ ហើយក្រុមហ៊ុនឈូសបំពានហើយក្រុមហ៊ុនបាញ់គំរាមទៅ»។ ប្រជាពលរដ្ឋមួយរូបផ្សេងទៀតដែលសុំមិនបញ្ចេញឈ្មោះបាននិយាយថារដូវនេះជារដូវធ្វើស្រែហើយការទំនាស់នេះបានធ្វើឱ្យពួកគាត់ខកខានក្នុងការធ្វើស្រែចម្ការ។ «ពិបាកធ្វើស្រែធ្វើចម្ការ។ វាបិទផ្លូវបិទអីរកតែផ្លូវដើរក៏មិនបានដែរឥឡូវហ្នឹងនោះ។ អ្នកណាក៏ចូលមិនបានដូចជាផ្លូវរទេះយើងធ្លាប់បរធ្លាប់ដើរឥឡូវវារុញឈើរុញអីទទឹងទទែងឈូសរោងដាំដំឡូង។ យើងអត់មានផ្លូវដើរអ្នកស្រុកខាងក្នុងស្ទះអស់»។ លោកខាំ ភឿនអភិបាលខេត្តក្រចេះបាននិយាយថាប្រជាពលរដ្ឋដែលនៅសេសសល់មិនដល់២០០គ្រួសារទេគឺនៅសល់តែបន្តិចបន្ទួចតែប៉ុណ្ណោះដែលពុំព្រមចាកចេញ។ក៏ប៉ុន្តែទោះជាយ៉ាងណាក៏ដោយក៏លោកបានបញ្ជាក់ថាលោកនឹងព្យាយាមបញ្ចប់ជម្លោះនេះ។ «យើងស៊ើបជាក់ស្តែងថាដីហ្នឹងវាយ៉ាងម៉េចសិន។ មានចម្ការហ្នឹងប៉ុន្មានតូចឬធំជាប់ចម្ការហ្នឹងមានព្រៃអត់ដល់យើងចុះឱ្យជាក់ស្តែងបានដឹងថាអ្នកណាប៉ះអ្នកណា។ ឮក្រុមហ៊ុនថា ឮពលរដ្ឋថាយើងមិនដឹងទេទាល់តែចុះជាក់ស្តែង»។ អាជ្ញាធរខេត្តក្រចេះនៅថ្ងៃច័ន្ទបានជួបពិភាក្សាគ្នាមួយជាមួយគណៈកម្មាធិការប្រព្រឹត្តិកម្មនៃសមាគមការពារសិទ្ធិមនុស្សដែលមានលោក ធន សារ៉ាយជាតំណាង។ បន្ទាប់ពីជំនួបគ្នាអស់រយៈពេលជាងពីរម៉ោងលោក យី សុខសាន្ត មន្ត្រីផ្នែកស៊ើបអង្កេតនៃសមាគមអាដហុកបានបញ្ជាក់ថាអាជ្ញាធរបានសន្យាថានឹងរកដំណោះស្រាយជូនប្រជាពលរដ្ឋ។ ក៏ប៉ុន្តែលោកបានបញ្ជាក់ថាការធ្វើសម្បទានសេដ្ឋកិច្ចត្រូវគិតពីផលប្រយោជន៍ប្រជាពលរដ្ឋ។ «កុំធ្វើឱ្យប្រជាពលរដ្ឋដែលរស់នៅក្នុងតំបន់នោះគាត់មានការមិនសប្បាយចិត្តឬធ្វើឱ្យគាត់បាត់បង់នូវផលប្រយោជន៍របស់ពួកគាត់»។ លោក ជិន ហុងស្រឺ តំណាងក្រុមហ៊ុន CIV វិនិយោគឧស្សាហកម្មបានបដិសេធពុំធ្វើអត្ថាធិប្បាយដោយលោកបានអះអាងថា វាគ្មានប្រយោជន៍សម្រាប់លោកទៅនិយាយជាមួយអ្នកកាសែតទេ៕ This posting includes an audio/video/photo media file: Download Now |
| ព័ត៌មានអន្តរជាតិសង្ខេប៖ ២៥ កក្កដា Posted: 24 Jul 2011 05:04 PM PDT ព័ត៌មានចុងក្រោយបំផុត៖ ន័រវេស៖ នៅថ្ងៃសុក្រ ចៅក្រមន័រវេសបានបិទទ្វារកាត់ក្ដី Anders Behring Breivik ជនសង្ស័យ ដែលបានបាញ់សម្លាប់រង្គាលមនុស្ស៩៣នាក់។ សាធារណជន និងបណ្ដាញព័ត៌មានបានត្រូវហាមមិនឲ្យចូលស្ដាប់ការកាត់ទោសនេះទេ។ ស.រ.អ.៖ មេដឹកនាំព្រឹទ្ធសភា និងសភាតំណាងរាស្រ្ដស.រ.អ. កំពុងរៀបចំផែនការដំឡើងកម្រិតប្រាក់បំណុល។ មេដឹកនាំសម្លេងភាគច្រើន នៅក្នុងសភាតំណាងរាស្រ្ដ លោក John Boehner បានអំពាវនាវ កាលពីថ្ងៃអាទិត្យ សុំឲ្យក្រុមសាធារណរដ្ឋគាំទ្រអ្វីដែលលោកហៅថា "វិធានការថ្មី" ដែលពាក់ព័ន្ធការបន្ដប្រាក់បំណុលរយៈពេលខ្លី។ ស.រ.អ.៖ លោកស្រីរដ្ឋមន្ដ្រីការបរទេសស.រ.អ. ហ៊ីល្លារីគ្លីនតុនបានប្រាប់ក្រុមវិនិយោគទុនជនជាតិអាស៊ីថា អ្នកតាក់តែងច្បាប់អាមេរិកាំងនឹងទទួលយកកិច្ចព្រមព្រៀងដើម្បី ចៀសវាងមិនឲ្យស.រ.អា. ខកខានមិនអាចសងបំណុលរបស់ខ្លួន។ ស៊ីរី៖ រដ្ឋាភិបាលស៊ីរីបានយល់ព្រមនឹងច្បាប់ថ្មីមួយដែលអនុញាតឲ្យមានការបង្កើត គណបក្សនយោបាយថ្មី ដោយបានលុបចោលការហាមប្រាមពីមុនមិនឲ្យមានក្រុមជំទាស់ ចាប់តាំងពីឆ្នាំ១៩៦៣។ អាហ្វហ្កានីស្ថាន៖ លោក Ryan Crockerបានស្បថចូលតំណែងជាឯកអគ្គរដ្ឋទូតស.រ.អា.ថ្មីប្រចាំទីក្រុងកាប៊ូល អាហ្វហ្កានិស្ថាន កាលពីថ្ងៃច័ន្ទ។ លោកបានប្រាប់អ្នកការទូត នៅក្នុងពិធីកាន់តំណែងថ្មីថា ស.រ.អា. មិនប្រញាប់ប្រញាល់ចាកចេញពីអាហ្វហ្កានិស្ថានទេ។ សូម៉ាលី៖ អ.ស.ប. បាន បើកិច្ចប្រជុំគ្រាអាសន្ន នៅថ្ងៃច័ន្ទ ដើម្បីដោះស្រាយវិបត្ដិរាំងស្ងួតនៅក្នុងតំបន់អាហ្វ្រិកខាងកើត ដែលកំពុងរងគ្រោះទុរ្ភិក្ស ក្រោយពីប្រទេសអូស្ត្រាលីបានចូលរួមក្នុងការអំពាវនាវឲ្យមានការ ផ្តល់ជំនួយអន្ដរជាតិដល់តំបន់នោះ។ អ.ស.ប. និយាយថា មនុស្សប្រមាណ១១លាននាក់ត្រូវការជំនួយអាហារជាចាំបាច់។ ស៊ែរប៊ី៖ Goran Hadzic អតីត មេដឹកនាំក្រុមអំបូរស៊ែរប៊ី ក្នុងប្រទេសក្រូអាស៊ី ត្រូវឡើងតុលាការឧក្រិដ្ឋកម្មសង្គ្រាមអន្ដរជាតិ នៅថ្ងៃច័ន្ទនេះ តាមការចោទប្រកាន់ពីបទសម្លាប់រង្គាលមនុស្សច្រើនរយនាក់ក្នុងអំឡុង ពេលមានសង្រ្គាមនៅបាល់កង់ កាលពីសម័យឆ្នាំ១៩៩០។ លោកជាជនចុងក្រោយបង្អស់ក្នុងចំណោមជន១៦១នាក់ដែល ត្រូវ កាត់ទោសដោយ តុលាការឧក្រិដ្ឋកម្មអ.ស.ប.នៅក្នុងសង្រ្គាមយូហ្គោស្លាវី ។ ភូមា៖ សកម្មជនលទ្ធិប្រជាធិបតេយ្យភូមា លោកស្រី អ៊ុងសានស៊ូជីបានទស្សនាអគារទទួលភ្ញៀវរបស់រដ្ឋាភិបាល នៅក្នុងទីក្រុងរង់ហ្គូន កាលពីថ្ងៃច័ន្ទនេះ ដើម្បីបើកការចរចាលើកដំបូងជាមួយមន្ដ្រីជាន់ខ្ពស់របស់រដ្ឋាភិបាល ចាប់តាំងពីលោកស្រីបានត្រូវដោះលែងពីការជាប់ឃុំ នៅក្នុងគេហដ្ឋានកាលពីខែវិច្ឆិកា។ <!--AV--> ព័ត៌មាននៅពេលមុននេះ៖ <!--IMAGE-->ន័រវេស៖ លោកនាយករដ្ឋមន្ត្រីនៃប្រទេសន័រវេស បានដឹកនាំពិធីរំលឹកវិញ្ញាណក្ខន្ធនៅក្នុងក្រុង អូស្លូ សម្រាប់មនុស្ស៩៣នាក់ដែលមកដល់ពេលនេះបានត្រូវបញ្ជាក់ថាបានស្លាប់នៅក្នុងការបាញ់កាំភ្លើងនិងការវាយប្រហារដោយការបំផ្ទុះគ្រាប់បែកក្នុងទ្បានកាលពីថ្ងៃសុក្រដែលធ្វើឱ្យប្រទេសជាតិនេះដែលជាធម្មតាមានសន្តិភាពស្រទ្បាំងកាំង។ ភូមា៖ មន្ត្រីភូមាម្នាក់និយាយថាលោកស្រីអោងសានស៊ូជី មេដឹកនាំប្រជាធិបតេយ្យនឹងជួបនៅថ្ងៃច័ន្ទនេះជាមួយរដ្ឋមន្ត្រីម្នាក់របស់រដ្ឋាភិបាលស៊ីវិលថ្មីដែលគាំទ្រដោយកងទ័ពរបស់ប្រទេសនេះ។ យែមែន៖ ពួកមន្ត្រីយែមែន បាននិយាយថាអ្នកដាក់គ្រាប់បែកអត្តឃាតម្នាក់បានសម្លាប់ទាហាន៩នាក់និងធ្វើឱ្យរបួសជាង២០នាក់ទៀតនៅខាងក្រៅជំរុំយោធាមួយនៅក្នុងផ្នែកខាងត្បូងប្រទេសដែលមានចលាចល។ អាល្លឺម៉ង់៖ ប្រទេសអាល្លឺម៉ង់បានផ្តល់ប្រាក់កម្ចីរហូតដល់១៤៤លានដុល្លារឱ្យដល់ក្រុមប្រឹក្សាដឹកនាំក្រុមឧទ្ទាមលីប៊ីដើម្បីជួយដល់សេចក្តីត្រូវការខាងមនុស្សធ៌មនិងការកសាងជាថ្មី។ សហរដ្ឋអាមេរិក៖ នៅពេលដែលការកំណត់ពេលវេលាចុងក្រោយបង្អស់ជិតមកដល់ពួកមេដឹកនាំសភាស.រ.អ.កំពុងបន្តកិច្ចខិតខំប្រឹងប្រែងរបស់ពួកគេដើម្បីធ្វើឱ្យមានកិច្ចព្រមព្រៀងមួយដែលនឹងបញ្ចៀសកុំឱ្យប្រទេសជាតិដែលមានធនធានច្រើនជាងគេក្នុងពិភពលោកមិនអាចរកប្រាក់សងបំណុលបាន។ អាហ្វហ្គានីស្ថាន៖ ក្រុមទាហានអូតង់បានប្រគល់ការត្រួតត្រាទៅឱ្យកងកម្លាំងរដ្ឋាភិបាលអាហ្វហ្គានីស្ថាននៅក្នុងខេត្ត Panjshir នាភាគឦសានប្រទេស ដែលជាការផ្ទេរខាងសន្តិសុខមួយចំនួនពីពេលថ្មីៗនេះនៅក្នុងប្រទេសនេះ។ ស៊ីរី៖ ពួកសកម្មជនខាងសិទ្ធិមនុស្សស៊ីរីនិយាយថាកងឯកភាពកងទ័ពបានចូលទៅក្នុងរដ្ឋធានីដាម៉ាស់ហើយបានចាប់ឃុំឃាំងមនុស្សជាច្រើននាក់។ អេហ្ស៊ីប៖ ភាពតានតឹងរវាងក្រុមនយោបាយជាច្រើននៃប្រទេសអេហ្ស៊ីបបានកើនខ្លាំងទ្បើងកាលពីថ្ងៃអាទិត្យនៅក្រោយការប៉ះទង្គិចគ្នាកាលពីថ្ងៃសៅរ៍រវាងក្រុមបាតុករ និងក្រុមបុរសប្រដាប់អាវុធដែលនាំឱ្យកងកម្លាំងសន្តិសុខអេហ្ស៊ីបបាញ់កាំភ្លើងទៅលើអាកាសនៅក្នុងកិច្ចខិតខំប្រឹងប្រែងដើម្បីបំបែកអំពើហិង្សា។ រុស្ស៊ី៖ ពួកមន្ត្រីរុស្ស៊ីនិយាយថាកងកម្លាំងសន្តិសុខបានបាញ់កាំភ្លើងតគ្នាជាមួយពួកជនជាប់សង្ស័យថាជាពួកជនសកម្មប្រយុទ្ធនៅក្នុងសាធារណរដ្ឋ Dagestan នាផ្នែកខាងជើងនៃតំបន់ Caucasus ដោយបានសម្លាប់ជនសកម្មប្រយុទ្ធបីនាក់។ This posting includes an audio/video/photo media file: Download Now |
| You are subscribed to email updates from VOA News: ព័ត៌មាន To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
