VOA News: ព័ត៌មាន: “ប្រទេសតាមដងទន្លេមេគង្គក្រោមពិភាក្សាអំពីបញ្ហាស្ត្រី” plus 2 more |
- ប្រទេសតាមដងទន្លេមេគង្គក្រោមពិភាក្សាអំពីបញ្ហាស្ត្រី
- អាស៊ានមិនអាចសេចក្តីថ្លែងការណ៍រួមក្រោយកិច្ចប្រជុំ
- លោកស្រីគ្លីនតុននៅកម្ពុជាពិភាក្សាអំពីពាណិជ្ជកម្មនិងបំណុល
ប្រទេសតាមដងទន្លេមេគង្គក្រោមពិភាក្សាអំពីបញ្ហាស្ត្រី Posted: 13 Jul 2012 08:58 PM PDT សមាជិកអាងទន្លេមេគង្គក្រោមចំនួនបួនប្រទេសមានកម្ពុជា ថៃ ឡាវ វៀតណាម រួមជាមួយប្រទេសភូមាផង នៅថ្ងៃព្រហស្បតិ៍ទី១២ ខែកក្កដានេះ បានជួបជជែកគ្នាដើម្បីរកវិធីអភិវឌ្ឍន៍ និងលើកកម្ពស់ស្រ្តីនៅក្នុងតំបន់ របស់ខ្លួន។ កិច្ចប្រជុំនេះត្រូវបានគេហៅថា កិច្ចពិភាក្សាគោលនយោបាយស្តីពីសមភាពភេទ និងការលើកកម្ពស់ភាពអង់អាចរបស់ស្ត្រី។ នេះជាកិច្ចប្រជុំលើកដំបូងរបស់ប្រទេសនៅតាមមេគង្គក្រោមដែលជជែកពីបញ្ហាស្រ្តីក្នុងតំបន់នេះ ក្រោមគំនិតផ្តួចផ្តើមរួមគ្នាដោយក្រសួងការបរទេសអាមេរិក និងក្រសួងកិច្ចការនារីនៃព្រះរាជាណាចក្រកម្ពុជា ដោយមានការចូលរួមពីតំណាងទីភ្នាក់ងារអភិវឌ្ឍន៍ទ្វេភាគី និងពហុភាគីនានា អ្នកដឹកនាំក្នុងវិស័យឯកជន អ្នកដឹកនាំក្នុងអង្គការស្ត្រី និងអ្នកតស៊ូមតិនៃអង្គការសង្គមស៊ីវិលសំខាន់ៗមកពីកម្ពុជា ថៃ វៀតណាម ភូមា និងសហរដ្ឋអាមេរិកប្រមាណ២០០នាក់។ កិច្ចពិភាក្សានេះនឹងផ្តោតលើការចែករំលែកការអនុវត្តល្អៗ បង្ហាញអំពីការបង្កើតកម្មវិធីសំខាន់ៗក្នុងតំបន់ កំណត់កង្វះខាតនៃគោលនយោបាយ និងមូលនិធិ ព្រមទាំងធានាឲ្យមានការបន្តសហការគ្នាក្នុងការលើកកម្ពស់ភាពអង់អាចរបស់ស្ត្រី និងកុមារី។ ប្រធានបទចំនួនប្រាំបីត្រូវបានលើកយកមកជជែករួមមានការពង្រីកភារៈទទួលខុសត្រូវរបស់ស្ត្រីក្នុងវិស័យសេដ្ឋកិច្ច កាត់បន្ថយអំពើហឹង្សាលើស្ត្រី ពង្រីកការចូលរួមរបស់ស្ត្រីក្នុងវិស័យនយោបាយ កិច្ចសហការរវាងរដ្ឋ និងវិស័យឯកជនដើម្បីសមភាពភេទ ស្ត្រីក្នុងវិស័យអប់រំ វិស័យសុខាភិបាល វិស័យបរិស្ថាន និងវិស័យហេត្ថារចនាសម្ព័ន្ធ។លោកស្រី ម៉ែន សំអន ឧបនាយករដ្ឋមន្ត្រីប្រចាំការ និងជារដ្ឋមន្ត្រីក្រសួងទំនាក់ទំនងរដ្ឋសភា ព្រឹទ្ធសភា និងអធិការកិច្ចថ្លែងថា កិច្ចប្រជុំនេះពិតជាមានអត្ថន័យសំខាន់ណាស់សម្រាប់ទាំងអស់គ្នា ដោយបន្តពិនិត្យចែករំលែកបទពិសោធន៍ និងចំណេះដឹងថ្មីៗសំដៅធ្វើឲ្យសមភាពភេទនៅក្នុងតំបន់ ស្ថានភាពស្ត្រី និងកុមារីឲ្យកាន់តែប្រសើរឡើងដើម្បីរួមចំណែកធ្វើឲ្យមានការរីកចម្រើនថ្មីៗថែមទៀតទាំងផ្នែកសេដ្ឋកិច្ចសង្គម និងនយោបាយនៅក្នុងតំបន់៖ «បណ្តាប្រទេសនៅតាមដងទន្លេមេគង្គក្រោមតែងតែចាត់ទុកបញ្ហាស្ត្រី និងសមភាពភេទជាបញ្ហាស្នូលមួយ ហើយប្តេជ្ញាធានាឲ្យបានថា ស្ត្រីត្រូវបានទទួលបានភាពស្មើគ្នា យុត្តិធម៌ សន្តិភាព និងឱកាសក្នុងការចូលរួមសម្រេច និងទទួលផលពីការអនុវត្តដូចបុរសដែរ»។ លោកស្រីបានបន្តថា កិច្ចប្រជុំនេះនឹងរួមចំណែកជំរុញបណ្តាប្រទេសនៅតាមដងទន្លេមេគង្គក្រោម និងសហរដ្ឋអាមេរិកឲ្យបន្តកិច្ចខិតខំប្រឹងប្រែង និងពង្រឹងបន្ថែមការទទួលខុសត្រូវរបស់ខ្លួនក្នុងការរួមវិភាគទានច្រើនថែមទៀតដើម្បីរួមចំណែកអភិវឌ្ឍតំបន់ ជាពិសេសការបន្តធ្វើឲ្យកាន់តែប្រសើរឡើងនូវសមភាពភេទ និងស្ថានភាពស្ត្រី និងកុមារី។ ម្យ៉ាងទៀតមិនត្រឹមតែ រួមវិភាគទានដ៏សំខាន់ក្នុងការពង្រឹងប្រព័ន្ធគាំពារសង្គមក្នុងបរិបទយុទ្ធសាស្ត្រសមភាពភេទ និងសុខុមាលភាពរបស់ប្រជាពលរដ្ឋក្នុងតំបន់ប៉ុណ្ណោះទេ ប៉ុន្តែថែមទាំងរួមចំណែក ក្នុងការពង្រឹងសមភាពភេទ និងស្ថានភាពប្រជាពលរដ្ឋក្នុងបរិបទសកលលោកផងដែរ។ លោកស្រី អ៊ឹង កន្ថាផាវី រដ្ឋមន្ត្រីក្រសួងកិច្ចការនារីដែលទទួលធ្វើជាម្ចាស់ផ្ទះនៃកិច្ចប្រជុំនេះថ្លែងថាកិច្ចសន្ទនាពីគោលនយោបាយលើកទី១ស្តីពីសមភាពភេទ និងការផ្តល់ភាពអង់អាចដល់ស្ត្រី គឺជាកាតាលិករជំរុញឲ្យមានការពិភាក្សាអំពីបញ្ហានានាដែលមានសារៈសំខាន់ និងជាយុទ្ធសាស្ត្រសម្រាប់ស្ត្រីនៅក្នុងតំបន់នេះដូចជាការផ្តល់ភាពអង់អាចផ្នែកសេដ្ឋកិច្ចនយោបាយ ការលុបបំបាត់អំពើហិង្សារវាងភេទ ការចូលរួមរបស់វិស័យឯកជនក្នុងការលើកកម្ពស់ជីវភាពរស់នៅរបស់ស្ត្រីឲ្យកាន់តែប្រសើរឡើង បញ្ហាសុខភាព ការអប់រំបញ្ហាហេត្ថារចនាសម្ព័ន្ធ បរិស្ថានព្រមទាំងបញ្ហានានាជាច្រើនទៀត៖ «អញ្ចឹងយើងចង់ជំរុញឲ្យស្ត្រីទៅរៀនសូត្រឲ្យបានច្រើននូវបច្ចេកវិទ្យាដើម្បីឲ្យប្រកួតប្រជែងជាមួយបុរសដែលគេមានចំណេះដឹងច្រើនជាងយើងនេះ ហើយដើម្បីទៅរកការងារធ្វើដែលមានតម្លៃបន្ថែមខ្ពស់ នេះជាឧទាហរណ៍មួយ»។ លោកស្រីឲ្យដឹងថា កម្ពុជាមានលិខិតុបករណ៍សំខាន់ៗជាច្រើនដើម្បីឈានទៅសម្រេចសមភាពភេទ និងការផ្តល់ភាពអង់អាចដល់ស្ត្រីក្នុងរយៈពេលជាងមួយទសវត្សរ៍ចុងក្រោយនេះរួមមានការប្តេជ្ញាចិត្តខ្ពស់ យុទ្ធសាស្ត្រចតុកោណរបស់រាជរដ្ឋាភិបាល និងផែនការយុទ្ធសាស្រ្ត នារីរតនៈរបស់ក្រសួងកិច្ចការនារី ដែលត្រូវបានតាក់តែងឡើងរួមគ្នាជាមួយក្រសួងស្ថាប័នពាក់ព័ន្ធ របស់រាជរដ្ឋាភិបាល និងដៃគូទាំងអស់ដើម្បីបង្កលក្ខណៈជូនរាជរដ្ឋាភិបាលបន្តកិច្ចខិតខំប្រឹងប្រែងរបស់ខ្លួនក្នុងការធ្វើឲ្យការលើកកម្ពស់ស្ថានភាពស្ត្រីប្រព្រិត្តទៅក្នុងក្របខណ្ឌច្បាស់លាស់ និងទូលំទូលាយ។ កិច្ចពិភាក្សាអំពីនយោបាយការផ្តល់អំណាចដល់ស្ត្រី បានបិទបញ្ចប់នៅថ្ងៃសុក្រទី១៣ ខែកក្កដានេះ ដោយមានការថ្លែងសុន្ទរកថាដោយលោកស្រី ហ៊ីឡារី គ្លីនតុន (Hillary Clinton) រដ្ឋមន្ត្រីក្រសួងការបរទេសអាមេរិក៕ This posting includes an audio/video/photo media file: Download Now |
អាស៊ានមិនអាចសេចក្តីថ្លែងការណ៍រួមក្រោយកិច្ចប្រជុំ Posted: 14 Jul 2012 09:53 AM PDT បណ្តាប្រទេសសមាជិកអាស៊ាន នៅថ្ងៃសុក្រនេះមិនអាចចេញសេចក្ដីថ្លែងការណ៍រួមក្រោយពីកិច្ចប្រជុំ ដោយសារតែភាពចម្រូងចម្រាស់ក្នុងការពិភាក្សាលើជម្លោះនៃដែនសមុទ្រចិនខាងត្បូង។ ប្រទេសជាសមាជិកអាស៊ាន ចំនួនបួនក្នុងចំណោមប្រទេសសរុបចំនួនដប់បានស្ថិតក្នុងជម្លោះដ៏រ៉ាំរ៉ៃមួយនេះជាមួយនឹងប្រទេសចិន។ សមាជិកទាំងបួននោះរូមមានប្រទេសហ្វ៊ីលីពីន វៀតណាម ប្រ៊ុយណេ និងប្រទេសម៉ាឡេស៊ី។ លោកហោ ណាំហុង ឧបនាយករដ្ឋមន្ដ្រី និងជារដ្ឋមន្ដ្រីការបរទេសកម្ពុជាបានប្រកាសក្នុងសន្និសីទព័ត៌មានក្រោយពីកិច្ចប្រជុំរដ្ឋមន្ដ្រីការបរទេសអាស៊ានក្នុងទីក្រុងភ្នំពេញអស់រយៈពេលប្រាំបីថ្ងៃរួចមកថា មូលហេតុដោយសារតែប្រទេសភាគីជម្លោះមួយចំនួនបានទាមទារឲ្យដាក់បញ្ហាជម្លោះដែនសមុទ្ររវាងប្រទេសចិនជាមួយវៀតណាម និងហ្វ៊ីលីពីនក្នុងសេចក្ដីថ្លែងការណ៍រួម។ «ប្រទេសខ្លះនៅតែទទូចហើយទទូចទៀតScarborough Shoal ដែលជាជម្លោះទ្វេភាគីរវាងហ្វ៊ីលីពីនជាមួយប្រទេសចិន គេនៅតែទទូចដាក់ជម្លោះរវាងវៀតណាម និងចិនអំពីបញ្ហាតំបន់សេដ្ឋកិច្ចតំបន់ផ្តាច់មុខនិងតំបន់ផ្ទៃរាបសមុទ្រនៅក្នុងសេចក្ដីថ្លែងការណ៍រួមនេះ»។ នេះជាលើកទី១ហើយដែលប្រទេសអាស៊ានមិនអាចឈានដល់ចំណុចព្រមព្រៀងគ្នា នៅក្នុងការធ្វើសេចក្ដីថ្លែងការណ៍រួមក្រោយពីកិច្ចប្រជុំ។ តាមធម្មតាក្រោយពីកិច្ចប្រជុំនីមួយៗប្រទេសអាស៊ានត្រូវធ្វើសេចក្តីថ្លែងការណ៍រួមដោយមានការព្រមព្រៀងគ្នាជាឯកច្ឆន្ទ។ លោកហោ ណាំហុង បង្ហាញការសោកស្តាយសម្រាប់កម្ពុជាដែលកំពុងធ្វើជាប្រធានប្តូរវេណរបស់អាស៊ាននេះ។ លោកបញ្ជាក់ថា កម្ពុជាមិនបានដាក់ទំនោរទៅរកភាគីជម្លោះណាមួយនោះទេ ហើយបរាជ័យក្នុងការចេញសេចក្ដីប្រកាសរួមនេះគឺជា «ការទទួលខុសត្រូវ» រួមរបស់អាស៊ានទាំងមូល។ «មានចំណុចជាច្រើនដែលយើងបានឯកភាពគ្នាហើយ។ មានចំណុចជាង១០០ នៅក្នុងសេចក្ដីថ្លែងការណ៍រួមនេះ នៅសល់បញ្ហាតែមួយ គឺជម្លោះរវាងប្រទេសខ្លះ ក្នុងអាស៊ានជាមួយចិន នៅក្នុងសមុទ្រចិនខាងត្បូងតែប៉ុណ្ណោះ។ ដូច្នេះខ្ញុំយល់ថា យើងមិនគួរយកសេចក្ដីថ្លែងការណ៍រួមនេះជាចំណាប់ខ្មាំងរបស់ជម្លោះទ្វេភាគី របស់ប្រទេសខ្លះក្នុងអាស៊ានជាមួយប្រទេសខ្លះក្នុងតំបន់(ទេ)»។ លោកហោ ណាំហុង បានហៅជម្លោះនៅដែនសមុទ្រចិនខាងត្បូងថា ជម្លោះទ្វេភាគីមិនមែនជាជម្លោះរបស់អាស៊ានទាំងមូលទេ។ ក៏ប៉ុន្តែនៅក្នុងសេចក្ដីថ្លែងការរបស់ខ្លួន ប្រទេសហ្វីលីពីនបានចាត់ទុកថា ជម្លោះដែនសមុទ្រជាមួយចិនបានក្លាយជាជម្លោះពហុភាគីហើយត្រូវតែដោះស្រាយដោយលក្ខណពហុភាគី។ ហ្វីលីពីនបានបញ្ជាក់ថា រដ្ឋមន្ដ្រីរបស់ខ្លួនបានទទូចឲ្យមានការចែងពីជម្លោះនៅដែនកោះScarborough ជាមួយចិនក្នុងសេចក្ដីថ្លែងការណ៍រួម ក៏ប៉ុន្តែលោកហោ ណាំហុង បានបដិសេធ។ លោក ម៉ាទី ណាតាឡេហ្គាវ៉ា រដ្ឋមន្រ្តីការបរទេសឥណ្ឌូណេស៊ីបានហៅការខ្វែងគំនិតគ្នានៃបណ្តាប្រទេសអាស៊ានលើកនេះថា គឺជាការខ្វែងគំនិតលើបញ្ហានៃអតីតកាលតែប៉ុណ្ណោះ។ «យើងមិនអាចឈានដល់ការទទួលបានទស្សនរួមថា តើយើងសម្តែងមតិរបស់យើងចំពោះឧបទ្ទេវហេតុដែលបានកើតឡើងកាលពីអតីតកាលយ៉ាងដូចម្តេច»។ លោកស៊ូរីន ពិតស៊ូវ៉ាន់ អគ្គលេខាធិការអាស៊ាននៅតែចាត់ទុកថា នេះគឺជាបញ្ហាច្រឡោះប្រហោងរបស់អាស៊ាន ឬគឺជាបញ្ហាបច្ចេកទេសដែលសមាគមអាស៊ានអាចស្តារឡើងវិញបាន។ រដ្ឋមន្ដ្រីការបរទេសអាស៊ានមិនអាចព្រមព្រៀងលើក្រមប្រតិបត្តិនៅក្នុងកិច្ចប្រជុំកំពូលរបស់ខ្លួនកាលពីថ្ងៃចន្ទ បន្ទាប់ពីមានជំហរខ្វែងគ្នាមួយចំនួនជាពិសេសក្នុងការប្រើពាក្យពេចន៍។ ក្រមប្រតិបត្តិនេះ គឺជាយន្តការជំនួយដល់ការដោះស្រាយជម្លោះនៅដែនសមុទ្រដ៏ប្រទាញប្រទង់នោះ៕ This posting includes an audio/video/photo media file: Download Now |
លោកស្រីគ្លីនតុននៅកម្ពុជាពិភាក្សាអំពីពាណិជ្ជកម្មនិងបំណុល Posted: 13 Jul 2012 08:37 PM PDT លោកស្រីគ្លីនតុននៅកម្ពុជាពិភាក្សាជាមួយលោកហ៊ុន សែន នាយករដ្ឋមន្ត្រីកម្ពុជា អំពីការវិនិយោគទុនស.រ.អា.នៅកម្ពុជានិងបំណុលកម្ពុជាជំពាក់ស.រ.អា.។ កម្ពុជាចង់ឲ្យស.រ.អា.លុបចោលបំណុលជាង៤០០លានដុល្លារសល់ពីរបបលោកលន់ នល់ ដែលគាំទ្រដោយអាមេរិក។ លោកលន់ នល់បានធ្វើរដ្ឋប្រហារទម្លាក់សម្តេចនរោត្តមសីហនុនៅឆ្នាំ១៩៧០ ហើយបានខ្ចីលុយពីអាមេរិក ដែលមានការប្រាក់៣% ដើម្បីចិញ្ចឹមអ្នកគាំទ្រនៅភ្នំពេញ មុនពេលខ្មែរក្រហមចូលកាន់អំណាច។ លោកហ៊ុន សែននិយាយថា នេះជាបំណុលក្រខ្វក់ដែលកម្ពុជាមិនគួរសងវិញទេ។ លោកស្រីហ៊ីលឡារីគ្លីនតុនត្រូវបានសួរអំពីបំណុលនេះ ក្រោយពីបានពិភាក្សាជាមួយលោកហ៊ុនសែន ហើយថា តាមច្បាប់អន្តរជាតិ រដ្ឋាភិបាលកូនបំណុលត្រូវទទួលខុសត្រូវបន្តពីរដ្ឋាភិបាលចាស់ ទោះជាហាក់ដូចជាអយុត្តិធម៌ក្តី។លោកស្រីបង្ហាញសុឆ្ទៈធ្វើការជាមួយកម្ពុជាដោះស្រាយបំណុលនេះ។ «យើងចង់ធ្វើការងារនេះជាមួយរដ្ឋាភិបាលកម្ពុជាដោះស្រាយដោយយុត្តិធម៌អំពីបញ្ហាដ៏យូរនេះ ដើម្បីជួយឲ្យរដ្ឋាភិបាលកម្ពុជាមានកិត្តិយស បង្កើនពាណិជ្ជកម្មក្នុងទីផ្សារអន្តរជាតិ។ យើងគិតថា ការឈានចូលទីផ្សារហិរញ្ញវត្ថុអន្តរជាតិគឺជាប្រយោជន៍កម្ពុជា ដោយមិនពឹងផ្អែកលើប្រភពហិរញ្ញវត្ថុណាមួយ តែមានលទ្ធភាពដោយខ្លួនឯង»។ វិធីមួយគឺការសងបំណុលក្នុងរូបភាពជាជំនួយអភិវឌ្ឍន៍បន្ថែមរបស់ស.រ.អា.ក្នុងវិស័យអប់រំ និងបរិស្ថាន ។ ជំនួយនោះកន្លងមកត្រូវផ្អាកដោយតម្រូវឲ្យមានការទទួលខុសត្រូវ ដើម្បីធានាថា ជំនួយនេះបានទៅពលរដ្ឋខ្មែរ។ លោកស្រីគ្លីនតុនប្រាប់អ្នកយកព័ត៌មានថា ជំនួយស.រ.អា.សម្រាប់កម្ពុជាឡើងទ្វេដងក្នុងពេលមួយទសវត្សរ៍កន្លងនេះគឺដល់ទៅ៧៥លានដុល្លារ។ លុយនេះជួយប្រយុទ្ធជំងឺអេដស៍ មេរោគអេដស៍ ជួយខ្មែរក្រីក្រជិត១ភាគ៤ក្នុងប្រទេសនេះ ដែលខ្វះខាតអាហារ ជួយកាត់បន្ថយមរណភាពមាតា និងទារក។ «ខ្ញុំទទួលស្គាល់ថា ជួនកាលស.រ.អា.មានការសៅហ្មងបន្តិច។ យើងផ្តល់ជំនួយឲ្យប្រជាជនផ្ទាល់។ យើងចង់ឲ្យមានចំណីអារហារ ឲ្យប្រជាជនមានសុខភាពប្រសើរឡើង។ ដូច្នេះ យើងមិនអាចអួតអាងអំពីអាគារធំៗទេ ប៉ុន្តែយើងអាចនិយាយពីការសង្គ្រោះជីវិតកុមារបានច្រើន»។ តាំងពីមានទំនាក់ទំនងសេដ្ឋកិច្ចធម្មតាឡើងវិញជាមួយកម្ពុជានៅឆ្នាំ១៩៩២ វិនិយោគទុនស.រ.អា.នៅកម្ពុជាកើនជាប្រចាំដល់ជាង១៤៤លានដុល្លារកាលពីឆ្នាំទៅ។ ក្រុមប្រឹក្សាអភិវឌ្ឍន៍កម្ពុជានិយាយថា តួលេខនេះឡើងទ្វេលើឆ្នាំ២០១០។ កម្ពុជានាំចេញច្រើនមកស.រ.អា.គឺជាង១ពាន់លានដុល្លារក្នុងមួយឆ្នាំ ភាគច្រើនខាងវិស័យកាត់ដេរ។ លោកស្រីគ្លីនតុនកំពុងដឹកនាំគណៈប្រតិភូពាណិជ្ជករអាមេរិកាំងច្រើនបំផុតទៅកម្ពុជា ជាផ្នែកមួយនៃវេទិការវិនិយោគទុនសម្រាប់តំបន់អាស៊ាន។ ក្រុមហ៊ុនចូលរួម រួមមាន Boeing, Chevron, Coca-Cola, FedEx, Ford, General Electric និងProctor and Gamble។ ប្រែសម្រួលដោយ៖ ពិន ស៊ីសុវណ្ណ This posting includes an audio/video/photo media file: Download Now |
You are subscribed to email updates from VOA News: ព័ត៌មាន To stop receiving these emails, you may unsubscribe now. | Email delivery powered by Google |
Google Inc., 20 West Kinzie, Chicago IL USA 60610 |