VOA News: ព័ត៌មាន: “សហព្រះរាជអាជ្ញាសាលាក្ដីខ្មែរក្រហមជំរុញឲ្យចៅក្រមបញ្ចេញព័ត៌មានសំណុំរឿង០០៤” plus 3 more |
- សហព្រះរាជអាជ្ញាសាលាក្ដីខ្មែរក្រហមជំរុញឲ្យចៅក្រមបញ្ចេញព័ត៌មានសំណុំរឿង០០៤
- សាលារាជធានីភ្នំពេញមិនឲ្យកម្មករដង្ហែរក្បួនតវ៉ា
- និស្សិតអាមេរិកស្ម័គ្រចិត្តជួយសាងសង់ផ្ទះនៅកម្ពុជា
- ព័ត៌មានអន្តរជាតិសង្ខេប៖ ៥ សីហា
| សហព្រះរាជអាជ្ញាសាលាក្ដីខ្មែរក្រហមជំរុញឲ្យចៅក្រមបញ្ចេញព័ត៌មានសំណុំរឿង០០៤ Posted: 05 Aug 2011 01:32 PM PDT សហព្រះរាជអាជ្ញាអន្ដរជាតិ លោក Andrew Cayley បានជំរុញបន្ថែមទៀតនៅថ្ងៃសុក្រនេះ ឲ្យសហចៅក្រមស៊ើបអង្កេតរបស់សាលាក្ដីខ្មែរក្រហមបញ្ចេញព័ត៌មានស្ដីពីការស៊ើបអង្កេតក្នុងសំណុំរឿង០០៤។ លោក Andrew Cayley ចាត់ទុកថា ការស្នើសុំនេះនឹងផ្ដល់ផលប្រយោជន៍យ៉ាងសំខាន់សម្រាប់ជនរងគ្រោះដោយរបបកម្ពុជាប្រជាធិបតេយ្យដែលចង់ចូលរួមក្នុងដំណើរការក្ដីចុងក្រោយនេះ។ នៅក្នុងសេចក្ដីប្រកាសព័ត៌មាននៅថ្ងៃនេះ លោកសហព្រះរាជអាជ្ញាសញ្ជាតិអង់គ្លេសបញ្ជាក់ថា សាធារណជនត្រូវការព័ត៌មានអំពីសំណុំរឿងនេះដែលជាប្រយោជន៍ដល់ជនរងគ្រោះ និងសាក្សី និងជនសង្ស័យ។ លោក Andrew Cayley មានប្រសាសន៍ក្នុងបទសម្ភាសន៍តាមទូរស័ព្ទជាមួយវីអូអេ សំឡេងសហរដ្ឋអាមេរិកថា ការជូនព័ត៌មានអំពីការស៊ើបអង្កេតដល់ជនរងគ្រោះគឺជាកាតព្វកិច្ចដែលត្រូវបានចែងនៅក្នុងច្បាប់ ហើយអង្គបុរេជំនុំជម្រះក៏បានសម្រេចដូចគ្នានេះដែរថា សហចៅក្រមស៊ើបអង្កេតត្រូវតែផ្តល់ព័ត៌មានត្រឹមត្រូវនិងទាន់ពេលវេលាដល់ជនរងគ្រោះក្នុងដំណាក់កាលមុនសវនាការ។ «អង្គបុរេជំនុំជម្រះបានថ្លែងថា សហចៅក្រមស៊ើបអង្កេតមានកាតព្វកិច្ចជម្រាបដំណឹងដល់ប្រជាពលរដ្ឋ។ ដូច្នេះ ប្រជាពលរដ្ឋដែលមានបំណងដាក់ពាក្យសុំតាំងខ្លួនជាដើមបណ្ដឹងរដ្ឋប្បវេណីមិនអាចដាក់ពាក្យសុំតាំងខ្លួនជាដើមបណ្ដឹងរដ្ឋប្បវេណីបានទេ ក្នុងពេលនេះ ពីព្រោះប្រសិនបើអ្នកមិនដឹងអំពីអ្វីដែលកំពុងស្ថិតក្រោមការស៊ើបអង្កេតនោះទេ អ្នកមិនអាចដាក់ពាក្យស្នើសុំតាំងខ្លួនជាដើមបណ្ដឹងរដ្ឋប្បវេណីបានទេ។ ជាការណ៍ពិត នៅពេលដែលអ្នកដឹងតិចតួចពីឧក្រិដ្ឋកម្មដែលកំពុងស្ថិតក្នុងការស៊ើបអង្កេត អ្នកមិនអាចធ្វើការសម្រេចចិត្តថា អ្នកអាចក្លាយជាដើមបណ្ដឹងរដ្ឋប្បវេណីឬក៏អត់នោះទេ»។ សេចក្ដីថ្លែងការណ៍របស់សហព្រះរាជអាជ្ញាអន្ដរជាតិត្រូវគេមើលឃើញថា គឺជាការប្រឹងប្រែងមួយទៀតដើម្បីទម្លុះភាពស្ងប់ស្ងៀមនៃសំណុំរឿង០០៣ និងសំណុំរឿង០០៤ដែលក្រុមមន្ដ្រីអង្គការសង្គមស៊ីវិលតែងតែលើកជាកង្វល់ថា សំណុំរឿងទាំងពីរនឹងត្រូវបោះបង់ចោល ខណៈដែលមានព័ត៌មានតិចតួចបំផុតបានត្រូវគេដឹង ឮជាសាធារណៈ។ លោក Andrew Cayley ធ្លាប់បានស្នើឲ្យសហចៅក្រមស៊ើបអង្កេត ធ្វើការស៊ើបអង្កេតបន្ថែមលើសំណុំរឿង០០៣ ដែលសហចៅក្រមបិទបញ្ចប់កាលពីខែមេសា ក៏ប៉ុន្តែសហចៅក្រមស៊ើបអង្កេតបានទាត់ចោលសំណើនោះ។ លោក Andrew Cayley កំពុងបន្ដបណ្ដឹងឧទ្ធរណ៍លើសំណុំរឿង០០៣នេះ ដែលលោកអះអាងថា ដើម្បីជាប្រយោជន៍តំណាងឲ្យជនរងគ្រោះ។ លោកឡាស អលសិន មន្ដ្រីផ្នែកទំនាក់ទំនងកិច្ចការច្បាប់របស់សាលាក្ដីខ្មែរក្រហម មានប្រសាសន៍ថា សហព្រះរាជអាជ្ញាអន្ដរជាតិបានដាក់សំណើរបស់ខ្លួនទាក់ទងនឹងសំណុំរឿង០០៤នេះជូនទៅការិយាល័យសហចៅក្រមស៊ើបអង្កេតរួចហើយ ប៉ុន្ដែលោកមិនដឹងថា តើសហចៅក្រមស៊ើបអង្កេតនឹងចាត់វិធានយ៉ាងណានោះទេ ចំពោះសំណើនោះ។ ជាមួយគ្នានេះ លោកស្រី Silke Stuzensky មេធាវីមួយរូបតំណាងឲ្យដើមបណ្ដឹងរដ្ឋប្បវេណី បានលើកឡើងថា កង្វះព័ត៌មានជាក់លាក់អំពីការស៊ើបអង្កេតក្នុងសំណុំរឿង០០៤ រួមទាំងសំណុំរឿង០០៣ផងដែរ ធ្វើឲ្យប៉ះពាល់ដល់ការដាក់ពាក្យស្នើសុំតាំងខ្លួនជាដើមបណ្ដឹងរដ្ឋប្បវេណីរបស់ជនរងគ្រោះ។ លោកស្រីបញ្ជាក់ថា លោកស្រីគាំទ្រការជំរុញរបស់លោក Andrew Cayley។ «ខ្ញុំយល់ស្របយ៉ាងពេញទំហឹងថា វាគឺជាការចាំបាច់ដែលថា សហចៅក្រមស៊ើបអង្កេតត្រូវបង្ហាញនូវវិសាលភាពនៃការស៊ើបអង្កេតឲ្យបានឆាប់បំផុតតាមតែអាចធ្វើទៅបាន»។ សំណុំរឿង០០៤ ត្រូវគេដឹងក្រៅផ្លូវការថា មានជនជាប់សង្ស័យចំនួនបីនាក់ដែលជាអតីតកម្មាភិបាលខ្មែរក្រហមថ្នាក់កណ្ដាលដែលមានឥទ្ធិពលក្នុងឧក្រិដ្ឋកម្ម។របាយការណ៍មួយរបស់មជ្ឈមណ្ឌលឯកសារកម្ពុជានិយាយពីភារកិច្ចក្នុងការផ្ដល់ព័ត៌មានជាសាធារណៈក្នុងដំណាក់កាលស៊ើបអង្កេតនៅថ្ងៃនេះ កញ្ញា Tessa Bialek និស្សិតកម្មសិក្សាមកពីសាកលវិទ្យាល័យយែល សហរដ្ឋអាមេរិក ចាត់ទុកថា ការខកខានក្នុងការផ្ដល់ព័ត៌មានដល់ជនរងគ្រោះក្នុងសំណុំរឿង០០៣ កន្លងទៅនេះគឺជាការរំលោភសិទ្ធិចូលរួមរបស់ពួកគេក្នុងការទាមទារសំណងនិងការគាំទ្រការស៊ើបអង្កេត។ ហើយសហចៅក្រមស៊ើបអង្កេតត្រូវតែផ្ដល់ព័ត៌មានចាំបាច់អំពីសំណុំរឿង០០៤ដល់ជនរងគ្រោះដើម្បីឲ្យពួកគេចូលរួមក្នុងដំណើរការនីតិវិធី៕ This posting includes an audio/video/photo media file: Download Now |
| សាលារាជធានីភ្នំពេញមិនឲ្យកម្មករដង្ហែរក្បួនតវ៉ា Posted: 05 Aug 2011 01:07 PM PDT សាលារាជធានីភ្នំពេញ នៅថ្ងៃសុក្រនេះ បានហាមឃាត់ការដើរដង្ហែរក្បួនរបស់សហជីពកម្មករ ដែលតវ៉ាប្រឆាំងនឹងការឡើងថ្លៃម្ហូបអាហារ និងទំនិញគ្រប់ប្រភេទ ដែលកំពុងធ្វើឱ្យប៉ះពាល់ដល់ការរស់នៅរបស់ប្រជាពលរដ្ឋទូទៅ។ ប៉ុន្តែក្រុមមន្ត្រីសិទ្ធិមនុស្ស និងសហជីពបានហៅការហាមឃាត់នេះថា ជាការបិទសិទ្ធិសេរីភាពនៃការបញ្ចេញមតិ។ សហភាពជាតិកម្ពុជាការពារកម្មករ ដែលជាសហជីពកម្មករមួយទើបបង្កើតថ្មី បានស្នើសុំការអនុញ្ញាតពីលោកកែប ជុតិមា អភិបាលរាជធានីភ្នំពេញ ធ្វើការដង្ហែរក្បួននៅថ្ងៃអាទិត្យខាងមុខនេះ ដើម្បីជំរុញឱ្យរដ្ឋាភិបាលកម្ពុជាធ្វើអន្តរាគមន៍បញ្ចុះតម្លៃម្ហូបអាហារ តម្លៃទំនិញគ្រប់ប្រភេទ ជាពិសេសបញ្ចុះតម្លៃប្រេងសាំងដែលកំពុងតែឡើងថ្លៃ។ លោកកើត ឆែ នាយករងរដ្ឋបាលសាលារាជធានីភ្នំពេញ បានបញ្ជាក់នៅក្នុងកំណត់ហេតុប្រជុំរវាងមន្ត្រីសាលារាជធានីភ្នំពេញ និងមន្ត្រីសហជីពថា សាលារាជធានីភ្នំពេញអនុញ្ញាតឱ្យជួបជុំគ្នានៅទីលានប្រជាធិបតេយ្យត្រឹមចំនួន២០០នាក់តែប៉ុណ្ណោះ ប៉ុន្តែមិនអនុញ្ញាតឱ្យដើរដង្ហែរក្បួនឡើយ។ លោកជ័យ សុវណ្ណ អនុប្រធានសហភាពជាតិកម្ពុជាការពារកម្មករ បានទទូចធ្វើការជួបប្រជុំដោយមានអ្នកចូលរួមចំនួន១.៥០០នាក់ តែមិនធ្វើការដើរដង្ហែរក្បួនទេ។ តាមសេចក្តីថ្លែងការណ៍ ការដង្ហែរក្បួននេះនឹងត្រូវចាប់ផ្តើមចេញពីទីស្នាក់ការកណ្តាលរបស់សហភាពជាតិកម្ពុជាការពារកម្មករនៅក្នុងខណ្ឌសែនសុខ ឆ្លងកាត់ផ្លូវនានាក្នុងទីក្រុងភ្នំពេញ មកកាន់ទីលានប្រជាធិបតេយ្យ ក្នុងគោលបំណងជំរុញឱ្យរដ្ឋាភិបាល ជាពិសេស លោកនាយករដ្ឋមន្ត្រី ហ៊ុន សែន ធ្វើអន្តរាគមន៍បញ្ចុះតម្លៃម្ហូបអាហារ និងទំនិញគ្រប់ប្រភេទ ឱ្យបានលឿនជាទីបំផុត ដើម្បីឱ្យស្របទៅនឹងស្ថានភាពលំបាកនាពេលបច្ចុប្បន្ននេះ។ តាមសេចក្តីថ្លែងការណ៍នេះឲ្យដឹងថា កាលពីថ្ងៃទី១៥ ខែកក្កដា សហភាពជាតិកម្ពុជាការពារកម្មករបានដាក់សំណើមួយច្បាប់ជូនលោកនាយករដ្ឋមន្ត្រីហ៊ុន សែន ដើម្បីសុំឱ្យលោកជួយធ្វើអន្តរាគមន៍ចំពោះបញ្ហាទំនិញឡើងថ្លៃនេះ។ ប៉ុន្តែរហូតមកដល់ពេលនេះមិនមានការឆ្លើយតប ឬអន្តរាគមន៍ណាមួយពីលោកនាយករដ្ឋមន្ត្រីនោះទេ។ ការណ៍នេះបានបង្ខំឱ្យសហជីពសម្រេចរៀបចំការដើរដង្ហែរក្បួន ដោយមានការចូលរួមពីកម្មករ កម្មការិនី សិស្ស និស្សិត គ្រូបង្រៀន អ្នករត់ម៉ូតូឌុប ម៉ូតូកង់បី អ្នករត់តាក់ស៊ី និងប្រជាពលរដ្ឋចំនួន១៥០០នាក់។ លោកកើត ឆែបាននិយាយនៅក្នុងកំណត់ហេតុប្រជុំនេះថា អ្នករៀបចំការតវ៉ាត្រូវទទួលខុសត្រូវចំពោះកិច្ចការពារសន្តិសុខ សុវត្ថិភាព សណ្តាប់ធ្នាប់សាធារណៈនៅក្នុងហ្វូងមនុស្សទាំងមូល ហើយការបព្ចេញមតិមិនត្រូវធ្វើឱ្យប៉ះពាល់ដល់រដ្ឋាភិបាល ឥស្សរជនជាន់ខ្ពស់ និងមិនត្រូវយកវេទិកានេះបម្រើឱ្យផលប្រយោជន៍របស់គណបក្សនយោបាយណាមួយឡើយ។ ក្នុងករណីមិនគោរពតាមការសន្យា អ្នករៀបចំត្រូវទទួលខុសត្រូវចំពោះមុខច្បាប់។ លោកជ័យ សុវណ្ណ អនុប្រធានសហភាពជាតិកម្ពុជាការពារកម្មករ បានថ្លែងថា៖ «ការមិនអនុញ្ញាតឱ្យដង្ហែរក្បួននេះគឺជាការបិទសិទ្ធិសេរីភាពក្នុងការបញ្ចេញមតិរបស់កម្មករ។ ខ្ញុំយល់ឃើញថា ការមិនឱ្យហែរនេះគឺបិទសិទ្ធិសេរីភាពរបស់កម្មករ កម្មការិនី ដែលគាត់ចង់បញ្ចេញមតិ បង្ហាញពីចំណាប់អារម្មណ៍របស់ គាត់ ចង់ឲ្យទំនិញគ្រប់កន្លែង ជាពិសេសថ្លៃប្រេងសាំង ឱ្យចុះថោក។ ខ្ញុំចង់និយាយថា បិទសិទ្ធិសេរីភាពរបស់គាត់ក្នុងការបញ្ចេញមតិរបស់ប្រជាពលរដ្ឋ»។ លោកចាន់ សាវ៉េត ប្រធានផ្នែកត្រួតពិនិត្យស្ថានភាពសិទ្ធិមនុស្សអាដហុក បានថ្លែងថា «ការហាមឃាត់ការដើរដង្ហែរក្បួននេះគឺជាការរំលោភសិទ្ធិមនុស្ស។ ខ្ញុំគិតថា ពួកគាត់ធ្វើនេះគឺគាត់មានសិទ្ធិត្រឹមត្រូវ។ គាត់អនុវត្តតួនាទីសិទ្ធិសេរីភាព ដើម្បីបង្ហាញមតិ យោបល់ជូនដល់រាជរដ្ឋាភិបាល តែបើរាជរដ្ឋាភិបាលទប់ស្កាត់គាត់មិនឱ្យគាត់ដើរជាក្បួន ដើម្បីឆ្លុះបញ្ចាំងអំពីដំណើរការលទ្ធិប្រជាធិបតេយ្យ វាអាចធ្វើឱ្យស្ថានភាពនេះអាចថា ជាការគំរាមកំហែងដល់ពួកគាត់ និងអាចជាការដាក់សម្ពាធមិនឱ្យគាត់អនុវត្តសិទ្ធិសេរីភាព»។ ក្នុងរយៈពេលប៉ុន្មានឆ្នាំចុងក្រោយនេះ រដ្ឋាភិបាលមិនបានអនុញ្ញាតឱ្យមានការដើរដង្ហែរក្បួន ដើម្បីសម្តែងមតិរបស់ខ្លួននៅតាមផ្លូវសាធារណៈទេ លើកលែងតែនៅទីលានប្រជាធិបតេយ្យប៉ុណ្ណោះ៕ This posting includes an audio/video/photo media file: Download Now |
| និស្សិតអាមេរិកស្ម័គ្រចិត្តជួយសាងសង់ផ្ទះនៅកម្ពុជា Posted: 05 Aug 2011 02:49 PM PDT សិស្សវិទ្យាល័យអាមេរិកមួយក្រុមបានចុះទៅជួយសាង់សង់លំនៅដ្ឋានដល់គ្រួសារសិស្សក្រីក្រមួយចំនួននៅក្នុងខេត្តសៀមរាប កាលពីពេលកន្លងទៅថ្មីៗនេះ។ ការសាងសង់ផ្ទះនោះស្ថិតក្នុងគម្រោងមួយរបស់អង្គការក្រៅរដ្ឋាភិបាលមួយដើម្បីជួយកុមារឲ្យបានចូលសាលារៀននិងទទួលបានការអប់រំប្រកបដោយគុណភាព។ តើអ្នកធ្លាប់គិតទេថា តើអ្នកនឹងមានអារម្មណ៍យ៉ាងដូចម្តេច នៅពេលបានជួយសាងសង់ផ្ទះឲ្យអ្នកដទៃនោះ? សិស្សវិទ្យាល័យអាមេរិកាំងចំនួន១១នាក់ដឹងពីអារម្មណ៍នេះច្បាស់ណាស់ នៅពេលដែលពួកគេបានមកជួយសាងសង់ផ្ទះឲ្យគ្រួសារក្រីក្រមួយនៅក្នុងខេត្តសៀមរាបនេះ កាលពីពេលថ្មីៗកន្លងទៅនេះ។ កញ្ញាអ៊ីសាប៊ែល ឃីង (Isabelle King ) វ័យ១៦ឆ្នាំ ដែលកំពុងដំដែកគោលចូលក្នុងបន្ទះឫស្សីសម្រាប់ធ្វើជាជញ្ជាំងផ្ទះនេះគឺជាសិស្សម្នាក់ក្នុងចំណោមសិស្សទាំងនេះដែលមកពីសាលាប៊ូលីស (Bullis School) នៅជាយរដ្ឋធានីវ៉ាស៊ីនតោន ឌីស៊ី សហរដ្ឋអាមេរិក។ កញ្ញា Isabelle និយាយថា «ការធ្វើបែបនេះបានធ្វើឲ្យខ្ញុំដឹងនូវអ្វីដែលខ្ញុំចូលចិត្តធ្វើខ្លាំងជាងគេ។ ខ្ញុំគិតថា ខ្ញុំចង់ធ្វើគម្រោងបែបនេះដែរ នៅពេលអនាគតគឺសាងសង់ផ្ទះនិងជួយអ្នកដទៃ។ ខ្ញុំមានអារម្មណ៍ថា វាជាបទពិសោធន៍ដ៏គួរជាទីពេញចិត្តមួយ»។ <!--AV--> លោកជែគ ហ្វាដឺរី (Jack Fatheree) វ័យ១៧ឆ្នាំ ក៏ជាសិស្សម្នាក់ដែរ។ លោក បាននិយាយបន្ទាប់ពីជួយលើកធ្នឹមផ្ទះដាក់បញ្ចូលក្នុងសសរផ្ទះថា «វាពិតជាអ្វីមួយដ៏មានសារៈសំខាន់ដែលយើងបានជួយគេ ពីព្រោះយើងមានអ្វីៗយ៉ាងច្រើននៅសហរដ្ឋអាមេរិក ដែលប្រជាជនជាច្រើននៅទីនេះគ្មាន។ ដូច្នេះ វាមានសារៈសំខាន់ដែលយើងផ្តល់និងបរិច្ចាគអ្វីៗ ដែលយើងអាចធ្វើបានទៅដល់ប្រជាជនដែលគ្មានអ្វីៗ ដូចដែលយើងមាន»។ ក្រុមសិស្សទាំងនេះបានសម្រេចចិត្តចូលរួមក្នុងគម្រោងសាងសង់ផ្ទះនេះសម្រាប់រយៈពេលបីថ្ងៃ ជាមួយអង្គការក្រៅរដ្ឋាភិបាលមួយឈ្មោះថា Caring for Cambodia ឬ«ថែរក្សាដើម្បីកម្ពុជា» ដោយចំណាយថវិការបស់គ្រួសារពួកគេផ្ទាល់ សរុបចំនួនប្រមាណ២.៥០០ដុល្លារអាមេរិក។ កញ្ញាដូរូហ្ស៊ី យេន (Dorothy Yen) គឺជាគ្រូបង្រៀនម្នាក់នៅសាលាប៊ូលីសនិងជាអ្នកដឹកនាំក្រុមសិស្សស្ម័គ្រចិត្តទាំងនេះ។ កញ្ញាដូរូហ្ស៊ីនិយាយថា ក្រុមសិស្សទាំងនេះរៀនសូត្រនិងទទួលបានបទពិសោធន៍ជាច្រើនពីសកម្មភាពស្ម័គ្រចិត្តរបស់ពួកគេនេះ។ កញ្ញា Dorothy និយាយ «គ្រាន់តែនៅក្នុងប្រទេសកម្ពុជាអស់រយៈពេលបីថ្ងៃកន្លងមកនេះ ពួកគេបានរៀនសូត្រជាច្រើនរួចទៅហើយអំពីភាពខុសគ្នារវាងជីវិតរបស់ពួកគេ និងជីវិតរបស់អ្នកដទៃទៀតនៅជុំវិញពិភពលោក។ ខ្ញុំសង្ឃឹមថា ការជួយសាងសង់ផ្ទះនេះនឹងធ្វើឲ្យពួកគេដឹងកាន់តែច្រើនថែមទៀតថា តើពួកគេនិងពួកយើងមានសំណាងប៉ុណ្ណា ហើយនឹងធ្វើឲ្យពួកគេមានឆន្ទៈកាន់តែខ្លាំងឡើងក្នុងការផ្តល់អ្វីមួយត្រឡប់ទៅឲ្យសហគមន៍និងពិភពលោកវិញ។ ពួកគេនឹងគិតអំពីទង្វើរបស់ខ្លួននិងព្យាយាមធ្វើឲ្យមានការផ្លាស់ប្តូរនៅក្នុងពិភពលោក មិនថា ពួកគេចង់ធ្វើអ្វីនៅពេលអនាគតនោះទេ»។ អង្គការ«ថែរក្សាដើម្បីកម្ពុជា» ដែលធ្វើការងារខាងការអប់រំកុមារនិងជួយគ្រួសារក្រីក្ររបស់ពួកគេ បានអះអាងថា ចាប់តាំងពីឆ្នាំ២០០៣មក ខ្លួនបានអនុវត្តគម្រោងសាងសង់ផ្ទះសម្រាប់គ្រួសារសិស្សក្រីក្រកម្ពុជាបានចំនួន២៥ផ្ទះហើយនៅក្នុងខេត្តសៀមរាបនេះ តាមរយៈសកម្មភាពស្ម័គ្រចិត្តរបស់សប្បុរសជនដូចជាក្រុមសិស្សសាលាប៊ូលីសនេះជាដើម។ កញ្ញាមេហ្គិន ស្មីដ (Megan Smith) គឺជានាយករងនៃអង្គការ«ថែរក្សាដើម្បីកម្ពុជា» ប្រចាំនៅក្នុងប្រទេសកម្ពុជា។ Megan និយាយថា «ប្រជាជននៅក្នុងសហគមន៍ផ្ទាល់ជាអ្នកកំណត់នូវតម្រូវការរបស់ពួកគេ។ ដូចជានៅក្នុងករណីនេះអញ្ចឹង គ្រួសាររបស់នាងត្រូវការផ្ទះមួយ ហើយពួកគេមករកយើង ហើយនិយាយថា នេះជាអ្វីដែលគេចង់បាន។ យើងមានអ្នកស្ម័គ្រចិត្ត ដូច្នេះនៅក្នុងស្ថានភាពនេះ វាហាក់ដូចជាការភ្ជាប់ធនធានដែលយើងមានស្រាប់ហើយអញ្ចឹង។ បន្ថែមពីនេះ វាក៏ផ្តល់ផលប្រយោជន៍ដល់អ្នកស្ម័គ្រចិត្តដែរក្នុងការមកឃើញដោយផ្ទាល់និងរៀនសូត្រនូវជំនាញជាច្រើន»។ អ្នកស្រីចាន់ វណ្ឌីគឺជាបុគ្គលិកផ្នែកបណ្ណាល័យម្នាក់របស់អង្គការ«ថែរក្សាដើម្បីកម្ពុជា» ដែលមានមូលដ្ឋាននៅក្នុងខេត្តសៀមរាប។ អ្នកស្រីគឺជាអ្នកទទួលផលនៃសកម្មភាពប្រកបដោយទឹកចិត្តសប្បុរសធម៌ពីក្រុមសិស្សស្ម័គ្រចិត្តអាមេរិកាំងទាំងនេះ។ អ្នកស្រីចាន់ វណ្ឌីនិយាយថា «វាជាភ័ព្វសំណាងមួយសម្រាប់ខ្ញុំ។ ទី១គឺខាងអង្គការបានផ្តល់ជាលំនៅដ្ឋានដល់ខ្ញុំ ហើយមិនតែប៉ុណ្ណោះ គឺមានក្រុមស្ម័គ្រចិត្ត សិស្សដែលគាត់បានពាំនាំទាំងកម្លាំងកាយ កម្លាំងចិត្តរបស់គាត់ ហើរឆ្លងកាត់ទ្វីបមកដល់ទីនេះ គឺខ្ញុំរំភើបមែនទែន ដោយឃើញគាត់ធ្វើការយ៉ាងសស្រាក់សស្រាំ ជួយយើងពេញដៃពេញជើង ដោយកម្លាំងចិត្តរបស់គាត់ផ្ទាល់តែម្តង»។ អ្នកស្រីចាន់ វណ្ឌីត្រូវបានអង្គការ «ថែរក្សាដើម្បីកម្ពុជា» ចាត់ទុកថា ជាបុគ្គលដែលបានចូលរួមចំណែកយ៉ាងសំខាន់ក្នុងការជួយកុមារឲ្យទទួលបានការអប់រំប្រកបដោយគុណភាព តាមរយៈការងារជាបណ្ណារក្សរបស់អ្នកស្រី។ កូនប្រុសរបស់អ្នកស្រីក៏ជាសិស្សម្នាក់រៀននៅក្នុងសាលាមួយដែលអង្គការ«ថែរក្សាដើម្បីកម្ពុជា»គាំទ្រផងដែរ។ នៅក្នុងប្រទេសកម្ពុជាមានកុមារជាច្រើនដែលត្រូវបង្ខំចិត្តបោះបង់ចោលការសិក្សាឬមិនបានទទួលការអប់រំ ប្រកបដោយគុណភាព ដោយសារតែគ្រួសាររបស់ពួកគេមានជីវភាពក្រីក្រ។ លោកអ៊ុង សាហ្វី ដែលជានាយកប្រចាំប្រទេសរបស់អង្គការថែរក្សាដើម្បីកម្ពុជា មានប្រសាសន៍ថា ការផ្តល់អាហារនិងសម្លៀកបំពាក់ដល់កុមារពិតជាមានសារៈសំខាន់ ប៉ុន្តែអ្វីដែលសំខាន់ជាងនេះទៀតគឺការផ្តល់ទីជម្រកដ៏សមរម្យសម្រាប់ពួកគេ ដើម្បីធានាថា ពួកគេនឹងស្ថិតនៅក្នុងសាលាបានយូរ និងអាចទទួលបានការអប់រំប្រកបដោយប្រសិទ្ធិភាព។ លោកអ៊ុង សាហ្វីនិយាយថា «យើងឃើញមានអង្គការយ៉ាងច្រើន មានសាងសង់ផ្ទះហ្នឹងទៅហើយ។ ប៉ុន្តែនៅពេលដែលយើងជួបនឹងស្ថានភាពជាក់ស្តែងនៅក្នុងសាលារបស់យើង ជាពិសេសគឺកុមារដែលក្រីក្រហ្នឹង ហើយយើងបានតាមដានកុមារហ្នឹងរហូតដល់ផ្ទះរបស់គេ ដល់ភូមិរបស់គេ ទើបយើងឃើញថា ការលំបាកមួយចំនួនគឺជម្រកក្នុងការស្នាក់នៅរបស់កុមារហ្នឹង។ អញ្ចឹងហើយបានជំរុញឲ្យយើ់ងត្រូវតែបង្កើតកម្មវិធីសាងសង់ផ្ទះនេះ ដើម្បីជួយកុមារដែលជួបប្រទះនឹងភាពក្រីក្រ ជាពិសេសគឺអត់មានជម្រកក្នុងការស្នាក់នៅហ្នឹងតែម្តង»។ លោកស្រី Jamie Amelio គឺជាអគ្គនាយកប្រតិបត្តិ និងជាអ្នកបង្កើតអង្គការ«ថែរក្សាដើម្បីកម្ពុជា» ដែលបានចុះបញ្ជីនៅក្នុងសហរដ្ឋអាមេរិកផងដែរ។ លោកស្រីមានប្រសាសន៍ថា ការជួយគ្រួសារក្រីក្រមួយឲ្យមានជីវិតរីករាយគឺប្រៀបដូចជាការធ្វើឲ្យមានការផ្លាស់ប្តូរនៅក្នុងពិភពលោកទាំងមូល ដោយសារគ្រួសារនោះនឹងផ្តល់អ្វីមួយត្រឡប់ទៅឲ្យសហគមន៍ដែលពួកគេរស់នៅវិញ៕ This posting includes an audio/video/photo media file: Download Now |
| ព័ត៌មានអន្តរជាតិសង្ខេប៖ ៥ សីហា Posted: 04 Aug 2011 08:30 PM PDT ព័តមានចុងក្រោយបំផុត៖ សេដ្ឋកិច្ចពិភពលោក៖ ផ្សារភាគហ៊ុនបានធ្លាក់ចុះយ៉ាងខ្លាំងនៅជុំវិញពិភពលោកនាថ្ងៃព្រហស្បតិ៍និងថ្ងៃសុក្រ ដោយមានការព្រួយបារម្ភថាពិភពលោកនឹងឈានទៅជួបនឹងវិបត្តិសេដ្ឋកិច្ចដ៏ខ្លាំងមួយទៀត។ ថៃ៖ នៅថ្ងៃសុក្រនេះសភាប្រទេសថៃបានជ្រើសតាំងលោកស្រី Yingluck Shinawatra ជានាយករដ្ឋមន្រ្តីស្រ្តីទីមួយរបស់ប្រទេសនេះ គឺមានរយៈពេលមួយខែក្រោយពីគណបក្សរបស់លោកស្រីបានឈ្នះឆ្នោតដោយជ័យជម្នះយ៉ាងធំសន្ធឹកសន្ធាប់ក្នុងការបោះឆ្នោតកាលពីថ្ងៃទី៣ខែកក្កដា។ លីប៊ី៖ កងកម្លាំងបះបោរនៅប្រទេសលីប៊ីបាននិយាយថា ការវាយប្រហារតាមយន្តហោះរបស់កងកម្លាំងអង្គការណាតូ (NATO) បានសម្លាប់កូនប្រុសម្នាក់របស់មេដឹកនាំ Moammar Gadhafi ឈ្មោះខាមីសនិងបានសម្លាប់មនុស្សជាង៣០នាក់ផ្សេងទៀត។ ស៊ីរី៖ លោកស្រីរដ្ឋមន្រ្តីការបរទេសសហរដ្ឋអាមេរិក ហ៊ីលឡារី ក្លីនតុន មានប្រសាសន៍ថា មន្រ្តីសហរដ្ឋអាមេរិកជឿថាមានមនុស្សជាង២.០០០នាក់ហើយត្រូវបានសម្លាប់ដោយរដ្ឋាភិបាលស៊ីរីនៅក្នុងយុទ្ធនាការបង្ក្រាបលើក្រុមអ្នកប្រឆាំង។ ហ្វីលីពីន៖ មន្រ្តីរបស់ប្រទេសហ្វីលីពីននិយាយថា លោកប្រធានាធិបតី Benigno Aquino បានជួបគ្នាជាសម្ងាត់ជាមួយមេដឹកនាំក្រុមឧទ្ទាមមូស្លីមដ៏ធំជាងគេបំផុតកាលពីល្ងាចថ្ងៃព្រហស្បតិ៍ហើយបានព្រមព្រៀងនឹងគ្នាថានឹងពន្លឿនការចរចាស្វែងរកសន្តិភាព។ ចិន៖ កាសែតបក្សកុម្មុយនីស្តរបស់ប្រទេសចិនបានបដិសេធការលើកឡើងថាប្រទេសចិនអាចជាអ្នកទទួលខុសត្រូវការវាយប្រហារតាមអ៊ីនធឺណិតនៅជុំវិញពិភពលោកក្នុងរយៈពេលប្រាំឆ្នាំចុងក្រោយនេះប្រឆាំងនឹងអង្គភាពរដ្ឋ អង្គការមិនមែនរដ្ឋាភិបាលនិងក្រុមហ៊ុននានា។ អេត្យូពី៖ ប្រធានកម្មវិធីស្បៀងពិភពលោកប្រចាំប្រទេសអេត្យូពីបានមានប្រសាសន៍ថា ស្បៀងទុកបម្រុងគ្រាមានអាសន្នរបស់ប្រទេសនេះជិតអស់ពីឃ្លាំងហើយ។ នេះជាបញ្ហាចុងក្រោយបំផុតដែលបានបង្កឡើងដោយគ្រោះរាំងស្ងូតនៅក្នុងតំបន់អាហ្រ្វិកភាគខាងកើត។ ម៉ាឡេស៊ី៖ ទីភ្នាក់ងារកុមាររបស់អង្គការសហប្រជាជាតិបានទទូចកាលពីថ្ងៃសុក្រសុំកុំឱ្យប្រទេសអូស្ត្រាលីបញ្ជូនកុមារគ្មានក្រុមគ្រួសារចំនួន១៤នាក់ត្រឡប់ទៅប្រទេសម៉ាឡេស៊ីវិញតាមកិច្ចព្រមព្រៀងដោះដូរជនភៀសខ្លួនដែលបានចុះហត្ថលេខាកាលពីខែមុន។ សហរដ្ឋអាមេរិក៖ ក្រុមមេដឹកនាំសភាជាតិសហរដ្ឋអាមេរិកសម្រេចបាននូវការធ្វើសម្បទានមួយដើម្បីបញ្ចប់ការបិទភាគខ្លះនៃអាជ្ញាធរអាកាសចរណ៍សហព័ន្ធអាមេរិក។ សហរដ្ឋអាមេរិក៖ នៅថ្ងៃសុក្រនេះទីភ្នាក់ងារអវកាសរបស់សហរដ្ឋអាមេរិកដែលមានឈ្មោះថាណាសាគ្រោងនឹងបាញ់បង្ហោះយានអវកាសមួយដែលដើរដោយឋាមពលព្រះអាទិត្យទៅផ្កាយព្រហស្បតិ៍ ដែលជាភពមួយធំជាងគេបំផុតនៅក្នុងប្រព័ន្ធព្រះអាទិត្យ។ ឈីលី៖ មន្រ្តីឈីលីនិយាយថា មាននិស្សិតជាង៥០០នាក់ត្រូវបានចាប់ខ្លួននិង១៤នាក់ផ្សេងទៀតទទួលរងរបួសក្នុងអំឡុងពេលតវ៉ាឱ្យមានការកែទម្រង់ប្រព័ន្ធអប់រំនៅប្រទេសឈីលី។ ក្រិក៖ នៅថ្ងៃសុក្រនេះ លោកនាយករដ្ឋមន្រ្តីប្រទេសក្រិកបានទទូចដល់សមភាគីអឺរ៉ុបឱ្យចាត់វិធានការណ៍ជាបន្ទាន់តាមកិច្ចព្រមព្រៀងដែលបានមកពីកិច្ចប្រជុំកំពូលស្តីពីប្រាក់ជំនួយសង្គ្រោះជំហានទីពីរសម្រាប់ប្រទេសក្រិក។ <!--AV--> ព័ត៌មាននៅពេលមុននេះ៖ <!--IMAGE--> ចិន៖ អនុប្រធានាធិបតីសហរដ្ឋអាមេរិក Joe Biden គ្រោងអញ្ជើញទៅធ្វើទស្សនកិច្ចនៅប្រទេសចិន ម៉ុងហ្គោលី និងជប៉ុននៅខែនេះ។ នៅប្រទេសចិន លោកនឹងជួបជាមួយលោកប្រធានាធិបតី Hu Jintao លោកនាយករដ្ឋមន្ដ្រី Wen Jiabao និងមេដឹកនាំថ្នាក់ខ្ពស់ដទៃទៀត។ លោក Biden គ្រោងនឹងអញ្ជើញទៅមើលទីក្រុង Chengdu ដែរ។ ភូមា៖ សភាជាតិនៃសរអ បាបញ្ជាក់អំពីការតែងតាំងប្រេសិទពិសេសទីមួយទៅកាន់ប្រទេសភូមា នៅក្នុងការសម្រេចមួយរបស់រដ្ឋបាលលោកប្រធានាធិបតីបារ៉ាក់អូបាម៉ា ដើម្បីសម្របសម្រួលជាមួយសម្ព័ន្ធមិត្ដរបស់សរអ ដើម្បីជំរុញឲ្យមានការកែទម្រង់លទ្ធិប្រជាធិបតេយ្យក្នុងប្រទេសនេះ។ ស៊ីរី៖ លោកប្រធានាធិបតី Bashar al-Assad នៃប្រទេសស៊ីរី បានចេញក្រិតមួយដែលអនុញ្ញាតឲ្យពលរដ្ឋបង្កើតគណបក្សនោយបាយ។ ក្រិតនេះចេញនៅពេលដែលចំនួនមនុស្សស្លាប់កើនឡើងនៅក្នុងការបង្ក្រាបរបស់រដ្ឋាភិបាលទៅលើក្រុមអ្នកជំទាស់នយោបាយ។ លីប៊ី៖ រដ្ឋាភិបាលនៃប្រទេសលីប៊ី បានចោទអង្គការអូតង់ថាបានទម្លាក់គ្រាប់បែកលើកំណត់ទីដៅជនស៊ីវីលនៅទីក្រុងZlitan ស្ថិតនៅភាគខាងលិចដែលជាកន្លែងនៃការពើបប្រយុទ្ធគ្នារវាងកងកម្លាំងទាំទ្ររដ្ឋាភិបាលនិងក្រុមបះបោរ។ អ៊ីរ៉ង់៖ ឯកអគ្គរដ្ឋទូតអ៊ីរ៉ង់ម្នាក់និយាយថា អ្នកដើរតាមព្រៃកំសាន្ដជនជាតិអាមេរិកដែលត្រូវអាជ្ញាធរអ៊ីរ៉ង់ចាប់ពីរឆ្នាំមកហើយក្នុងបទចារកម្ម អាចត្រូវបានដោះលែងវិញឆាប់ៗនេះ។ ឥណ្ឌា៖ រដ្ឋមន្ដ្រីក្រសួងមហាផ្ទ័យនៃប្រទេសឥណ្ឌានិយាយថាគ្រាប់បែកផ្ទុះបីគ្រាប់នៅទីក្រុងមុមបៃ កាលពីខែមុន អាចជាការប្រព្រឹត្ដរបស់ពួកភេរវជនឥណ្ឌា។ This posting includes an audio/video/photo media file: Download Now |
| You are subscribed to email updates from VOA News: ព័ត៌មាន To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
