VOA News: ព័ត៌មាន: “កម្ពុជានៅតែប្រឈមនឹងការជួញដូរគ្រឿងញៀនទោះជាមានកិច្ចខិតខំប្រឹងប្រែងទប់ស្កាត់” plus 4 more |
- កម្ពុជានៅតែប្រឈមនឹងការជួញដូរគ្រឿងញៀនទោះជាមានកិច្ចខិតខំប្រឹងប្រែងទប់ស្កាត់
- គណបក្សប្រឆាំងសុំឲ្យនាយករដ្ឋមន្ត្រីការពារព្រៃឡង់
- គណៈប្រតិភូបញ្ចប់ការជជែករឿងព្រំដែននៅតុលាការក្រុងឡាអេ
- ប្រជាសហគមន៍តាមដងទន្លេសេសានទទូចឲ្យផ្អាកគម្រោងសង់ទំនប់
- អង្គការអ្នកសល់ពីស្លាប់នៃរបបខ្មែរក្រហមមួយនៅអាមេរិករិះគន់សាលាក្តីខ្មែរក្រហម
| កម្ពុជានៅតែប្រឈមនឹងការជួញដូរគ្រឿងញៀនទោះជាមានកិច្ចខិតខំប្រឹងប្រែងទប់ស្កាត់ Posted: 31 May 2011 02:37 PM PDT មន្ត្រីជាន់ខ្ពស់អាជ្ញាធរជាតិប្រយុទ្ធប្រឆាំងគ្រឿងញៀន បានថ្លែងនៅថ្ងៃអង្គារនេះថា កម្ពុជាកំពុងតែប្រឈមនឹងបញ្ហាជួញដូរ និងការផលិតគ្រឿងញៀនរបស់ពួកឧក្រិដ្ឋជន សម្រាប់ការប្រើប្រាស់ក្នុងស្រុក និងនាំចេញទៅក្រៅប្រទេស។ លោក យូ ស៊ុនឡុង អគ្គលេខាធិការនៃអាជ្ញាធរជាតិប្រយុទ្ធប្រឆាំងគ្រឿងញៀន បានថ្លែងនៅក្នុងកិច្ចប្រជុំប្រចាំឆ្នាំថា ឈ្មួញគ្រឿងញៀននៅតែប៉ុនប៉ងយកកម្ពុជាធ្វើជាកន្លែងផលិតគ្រឿងញៀនខុសច្បាប់។ លោកបន្តថា៖ «ចំណុចប្រឈមរបស់យើង គឺពួកឧក្រិដ្ឋជននៅតែមានមហិច្ឆតាបន្តប្រើប្រាស់ល្បិចកលគ្រប់រូបភាពក្នុងការចរាចរការជួញដូរ ការចែកចាយ និងការផលិត ការកែច្នៃគុណភាពគ្រឿងញៀន ដើម្បីបម្រើឱ្យការប្រើប្រាស់នៅក្នុងស្រុក និងសម្រាប់នាំចេញទៅក្រៅប្រទេស។ ជាពិសេសការប៉ុនប៉ងតាមគ្រប់វិធី ដើម្បីយកកម្ពុជាធ្វើជាកន្លែងផលិតគ្រឿងញៀន»។ លោក យូ ស៊ុនឡុង បានបន្ថែមថា គ្រឿងញៀនបាននាំចូលកម្ពុជា តាមបណ្តាច្រកនៃខេត្តក្នុងភូមិភាគឦសាន ច្រកអាកាសយានដ្ឋានអន្តរជាតិភ្នំពេញ និងកំពង់ផែក្រុងព្រះសីហនុ ហើយនាំចេញទៅតាមច្រកអាកាសយានដ្ឋានអន្តរជាតិភ្នំពេញ តាមផ្លូវគោកទៅថៃ វៀតណាម និងតាមបញ្ញើប្រៃសណីយ៍។ លោកថ្លែងថា៖ «ក្នុងឆ្នាំ២០១០ យើងបង្ក្រាបបទល្មើសគ្រឿងញៀនចំនួន៣៥០ករណី បើប្រៀបធៀបឆ្នាំ២០០៩ ដែលមានបទល្មើសចំនួន៣០៩ករណី បានកើនឡើង១៣,២៦ភាគរយ។ យើងបានចាប់ខ្លួនជនល្មើសចំនួន៦៨៤ នាក់ បើប្រៀបធៀបឆ្នាំ២០០៩ ដែលមានជនល្មើសចំនួន៦១៥នាក់ បានកើនឡើង១១,២១ភាគរយ»។ លោក យូ ស៊ុនឡុង បានបន្តថា អ្នកប្រើប្រាស់គ្រឿងញៀនទូទាំងប្រទេសមានប្រមាណពី៥. ០០០នាក់ ទៅ៦.០០០នាក់ ក្នុងនោះយុវជនមានចំនួនច្រើនជាង៦០ភាគរយ។ របាយការណ៍អាជ្ញាធរជាតិប្រយុទ្ធប្រឆាំងគ្រឿងញៀន បានបញ្ជាក់ថា នៅត្រីមាសទី១ ឆ្នាំ២០១១អាជ្ញាធរកម្ពុជាបានបង្ក្រាបបទល្មើសគ្រឿងញៀនចំនួន១៩២ករណី បើប្រៀបធៀបរយៈពេលដូចគ្នាក្នុងឆ្នាំ២០១០ ដែលមាន៨១ករណី បានកើនឡើងជាង១៣៧ភាគរយ ហើយឃាត់ខ្លួនជនល្មើសបានចំនួន៤៧៥នាក់ បើប្រៀបធៀបត្រីមាសទី១ឆ្នាំ២០១០ដែលបានឃាត់ខ្លួនជនល្មើសចំនួន១៧៨នាក់ បានកើនឡើងប្រមាណ១៦៧ភាគរយ។ របាយការណ៍នេះបានបញ្ជាក់ថា អាជ្ញាធរកម្ពុជាបានរឹបអូសមេតំហ្វេតាមីនចំនួន១៤៧.៤០៧គ្រាប់ មេតំហ្វេ តាមីនទឹកកកចំនួន៦.៩៣២,៥២ក្រាម អ៊ិចស្តាស៊ីចំនួន១១គ្រាប់ ហេរ៉ូអ៊ិនចំនួន៧៨១,៧ក្រាម និងកញ្ឆា ក្រៀមចំនួន ២៧៧,៦២ក្រាម។ លោកយូ ស៊ុនឡុង បានបញ្ជាក់ថា ការបង្ក្រាបបទល្មើសគ្រឿនញៀនមានការកើនឡើងក្នុងឆ្នាំ២០១០ បើប្រៀបធៀបឆ្នាំ២០០៩ ប៉ុន្តែបរិមាណគ្រឿងញៀនដែលរឹបអូសមានការធ្លាក់ចុះ។ លោក យូ ស៊ុនឡុង បានថ្លែងថា សភាពការណ៍គ្រៀងញៀនក្នុងតំបន់ និងពិភពលោកនៅតែបន្តជះឥទ្ធិពលដល់សន្តិសុខ សណ្តាប់ធ្នាប់ សុខភាពសាធារណៈ និងភាពក្រីក្ររបស់ប្រជាពលរដ្ឋកម្ពុជា ដែលចាំបាច់ត្រូវចាត់វិធានការឱ្យបានជាក់លាក់ដើម្បីដោះស្រាយបញ្ហាប្រឈមទាំងនេះ។ លោកឧបនាយករដ្ឋមន្ត្រី កែ គឹមយាន ប្រធានអាជ្ញាធរជាតិប្រយុទ្ធប្រឆាំងគ្រឿងញៀន បានលើកទឹកចិត្តដល់កងកម្លាំងអនុវត្តន៍ច្បាប់ឱ្យចាត់វិធានការទប់ស្កាត់ការផលិត ការជួញដូរ ការប្រើប្រាស់គ្រឿនញៀន ដែលប៉ះពាល់ដល់សុខភាពមនុស្សរាប់ពាន់ និងការបង្ក្រាបពួកឈ្មួញគ្រឿងញៀន៕ This posting includes an audio/video/photo media file: Download Now |
| គណបក្សប្រឆាំងសុំឲ្យនាយករដ្ឋមន្ត្រីការពារព្រៃឡង់ Posted: 31 May 2011 12:02 PM PDT ភ្នំពេញ៖ បន្ទាប់ពីទទួលបានស្នាមផ្តិតមេដៃចំនួនជិត៣ម៉ឺននាក់ពីប្រជាពលរដ្ឋខេត្តកំពង់ធំ ក្រចេះ ស្ទឹងត្រែង និងខេត្តព្រះវិហារ ក្រុមអ្នកតំណាងរាស្រ្តគណបក្សប្រឆាំងកាលពីថ្ងៃចន្ទ័ បានសរសេរលិខិតមួយ ច្បាប់តាមរយៈលោកហេង សំរិន ប្រធានរដ្ឋសភា ទៅកាន់លោកនាយករដ្ឋមន្រ្តីហ៊ុន សែន ដើម្បីសុំលុបចោលកិច្ចសន្យាដីសម្បទានសេដ្ឋកិច្ចដែលត្រូបានផ្តល់ឲ្យក្រុមហ៊ុនវៀតណាមមួយ ដែលមានឈ្មោះថា CRCK សម្រាប់ដាំដើមកៅស៊ូ និងក្រុមហ៊ុនមួយចំនួនទៀតដែលត្រូវបានចោទប្រកាន់ថា បានកាប់បំផ្លាញព្រៃឈើយ៉ាងអាណាធិបតេយ្យនៅតំបន់ព្រៃឡង់។ ព្រៃឡង់គឺជាព្រៃឈើបៃតងទំនាបដ៏ធំជាងគេបំផុតមួយនៅក្នុងតំបន់អាស៊ី ដែលមានផ្ទៃក្រឡាប្រមាណ ៥.២៥០គីឡូម៉ែត្រការ៉េ ហើយព្រៃនេះបានគ្របដណ្តប់ផ្នែកខ្លះនៅក្នុងខេត្តចំនួនបួនគឺ ខេត្តកំពង់ធំ ព្រះវិហារ ក្រចេះ និងខេត្តស្ទឹងត្រែង ។ នៅក្នុងលិខិតមួយច្បាប់ដែលមានស្នាមចុះហត្ថលេខាពីអ្នកតំណាងរាស្រ្តគណបក្សប្រឆាំងចំនួន៩រូប និងដែលត្រូវបានដាក់ជូនលោកនាយករដ្ឋមន្រ្តីហ៊ុន សែន បានឲ្យដឹងថា ធនធានធម្មជាតិនៅតំបន់ព្រៃឡង់នេះកំពុងទទួលរងការបំផ្លិចបំផ្លាញពីក្រុមហ៊ុនCRCK ដោយធ្វើឲ្យមានផលប៉ះពាល់ដល់អនុផលព្រៃឈើ សត្វព្រៃ ជីវសាស្រ្តចម្រុះ វប្បធម៌ជនជាតិដើម និងការប្រែប្រួលអាកាសធាតុទៀតផង។ លោកឈុន ឈន់ អភិបាលខេត្តកំពង់ធំ បានថ្លែងការពាររដ្ឋាភិបាលដែលបានផ្តល់ដីសម្បទានសេដ្ឋ កិច្ចឲ្យក្រុមហ៊ុនវៀតណាម។ លោកបានមានប្រសាសន៍ថា ការផ្តល់ដីសម្បទានសេដ្ឋកិច្ចនេះ បានធ្វើឲ្យប្រជាពលរដ្ឋមានការ ងារធ្វើស្របនឹងយុទ្ឋសាស្រ្តរបស់រដ្ឋាភិបាលក្នុងការកាត់បន្ថយភាពក្រីក្រ។ លោកមានប្រសាសន៍ថា៖ «ព្រៃនោះ ខ្ញុំដឹងថា វាមាន ក៏ប៉ុន្តែបើគិតតម្លៃនៃចំណូលថវិការបស់ជាតិ គឺគ្មានទេ គឺគ្រាន់តែចំណូលសម្រាប់ប្រជាពលរដ្ឋរស់នៅប្រមាណរយឆ្នាំហើយ។ រស់ដោយសារព្រៃ សួរថារីកចម្រើនអ្វីទៅ។ ក្រីក្រនៅតែក្រីក្រដដែល»។ លោកម៉ែន សុថារិន្រ្ទ អ្នកតំណាងរាស្រ្តគណបក្សសម រង្ស៊ី ប្រចាំមណ្ឌលខេត្តកំពង់ធំ បានមាន ប្រសាសន៍ថា ប្រជាពលរដ្ឋរស់នៅក្បែរៗតំបន់ព្រៃឡង់បានទទួលរងគ្រោះដោយសារតែការផ្តល់ដីសម្បទាន សេដ្ឋកិច្ចទៅឲ្យក្រុមហ៊ុនវៀតណាម។ លោកបានបានប្រាប់វីអូអេខ្មែរថា៖ «អាចមានប្រយោជន៍ បើសិនជាធ្វើតាមគម្រោងរបស់រាជរដ្ឋាភិបាលពិតប្រាកដ។ គម្រោង ដែលធ្វើ ជួយប្រជាពលរដ្ឋពិតប្រាកដល្អ ក៏ប៉ុន្តែគម្រោងនេះមិនមែនសម្រាប់ប្រជាពលរដ្ឋ។ គម្រោងបានត្រឹមតែ បុគ្គលមួយចំនួនបានចំណេញ ហើយប្រជាពលរដ្ឋអត់បានទទួលផលប្រយោជន៍។ គម្រោងសេដ្ឋកិច្ចល្អហើយ គម្រោងឃើញល្អដាក់ធ្វើអ្វីៗ ឃើញថាល្អមែន ក៏ប៉ុន្តែវាអត់បានធ្វើអ្វីដូចអញ្ចឹង»។ ក្រុមហ៊ុនCRCKរបស់វៀតណាមនេះបានទទួលអាជ្ញាប័ណ្ណពីក្រសួងកសិកម្មសម្រាប់ដាំដើមកៅស៊ូរយៈ ពេល៧០ឆ្នាំ ដោយគ្របដណ្តប់លើផ្ទៃក្រឡាប្រមាណជាង៥.០០០គីឡូម៉ែត្រការ៉េ។ លោកឈិត វុធី ប្រធានអង្គការការពារធនធានធម្មជាតិបានមានប្រសាសន៍ថា តំបន់ព្រៃឡង់នៅក្នុង ខេត្តព្រះវិហារត្រូវបានកាប់បំផ្លាញប្រមាណ៣០ភាគរយ ។ លោកបានមានប្រសាសន៍ទៀតថា សម្រាប់ដីសម្បទានសេដ្ឋកិច្ច រដ្ឋាភិបាលអនុញ្ញាតឲ្យតែដីក្នុងតំបន់ព្រៃស្រោង និងរិចរិលតែប៉ុណ្ណោះ។ ក៏ប៉ុន្តែក្រុមហ៊ុន មិនបានអនុវត្តតាមគោលការណ៍របស់រដ្ឋាភិបាលទេ។ លោកថ្លែងថា៖ «បើនិយាយពីផលប៉ះពាល់ ខ្ញុំជឿថា ការធ្វើនេះ បានចំណេញទៅដល់ម្ចាស់ដីសម្បទាន គាត់កាប់ឈើ យកទៅលក់ គាត់បានថវិកាទៅប្រើប្រាស់ ហើយបន្ទាប់មកគាត់គិតរឿងដាំកៅស៊ូជាវគ្គក្រោយទេ។ តែគោលដៅរបស់គាត់សំខាន់ជាងគេ គឺគាត់យកព្រៃនេះតែម្តង»។ អង្គការការពារធនធានធម្មជាតិ និងមជ្ឈមណ្ឌលសិទ្ឋិមនុស្សកម្ពុជានៅថ្ងៃអង្គារ៍នេះ បានរៀបចំវេទិកា សម្តែងមតិមួយនៅក្នុងខេត្តព្រះវិហារ ដើម្បីឲ្យប្រជាពលរដ្ឋ និងអ្នកតំណាងរាស្រ្តផ្តល់យោបល់ និងរកដំណោះស្រាយអំពីផលប៉ះពាល់នៅតំបន់ព្រៃឡង់។ អង្គការយូអិនឌីភី (UNDP) និងអង្គការបរិដ្ឋានពិភពលោក គ្រោងនឹងផ្តល់ថវិកាចំនួន៣.៩លានដុល្លារអាមេ រិក សម្រាប់អភិវឌ្ឍព្រៃឈើ និងជីវសាស្រ្តចម្រុះនៅក្នុងខេត្តចំនួនបួន គឺខេត្តកំពង់ស្ពឺ កំពង់ឆ្នាំង ពោធិសាត់ និងខេត្តបាត់ដំបង៕ This posting includes an audio/video/photo media file: Download Now |
| គណៈប្រតិភូបញ្ចប់ការជជែករឿងព្រំដែននៅតុលាការក្រុងឡាអេ Posted: 31 May 2011 10:23 AM PDT ការប្រឈមមុខគ្នារវាងកម្ពុជា និងថៃនៅតុលាការយុត្តិធម៌អន្ដរជាតិក្រុងឡាអេ ឈាន ដល់ថ្ងៃទី២ហើយនៅថ្ងៃអង្គារ៍នេះ ដែលកម្ពុជារំពឹងថា នឹងអាចស្វែងរកការបញ្ចប់ជម្លោះព្រំដែនដែលបានរាលដាលនៅតំបន់ប្រាសាទព្រះវិហារ និងបានអូសបន្លាយអស់រយៈពេលបីឆ្នាំមកហើយនេះ។ កាលពីខែមេសា កម្ពុជា បានស្នើដល់តុលាការក្រុងឡាអេ ដែលជាតុលាការខ្ពស់បំផុតរបស់អង្គការ សហប្រជាជាតិមួយនេះធ្វើការបកស្រាយសាលក្រមខែមិថុនា ឆ្នាំ១៩៦២ របស់ខ្លួនឡើងវិញ ហើយស្នើឲ្យតុលាការចាត់វិធានការជាបន្ទាន់មួយ ដើម្បីថែរក្សាប្រាង្គប្រាសាទចំណាស់ជាង៩០០ឆ្នាំ របស់ខ្មែរ បន្ទាប់ពីមានការប៉ះទង្គិចគ្នាដោយប្រដាប់អាវុធកាលពីពេលថ្មីៗនេះ ហើយបានបណ្ដាលឲ្យមានជនរងគ្រោះទាំងសងខាងស្លាប់បាត់បង់ជីវិតយ៉ាងតិចចំនួន១៨នាក់។ លោក បូរីស ហេម (Boris Heim) មន្រ្តីផ្នែកព័ត៌មានរបស់តុលាការក្រុងឡាអេ បានមានប្រសាសន៍ថា ភាគីកម្ពុជា និងភាគីថៃ ត្រូវធ្វើសេចក្តីសន្និដ្ឋានរៀងៗខ្លួន នៅថ្ងៃនេះទាក់ទងទៅនឹងទឡ្ហីករណ៍របស់ខ្លួនជុំវិញជម្លោះនៅតំបន់ប្រសាទព្រះវិហារ។ លោក បូរីស ហេម បញ្ជាក់ថា សវនាការពីរថ្ងៃនេះ គឺជាសវនាការផ្តោតលើសំណើសុំចាត់វិធានការ ការពារប្រាង្គប្រាសាទព្រះវិហារជាបន្ទាន់ ក៏ប៉ុន្តែពុំមានការសម្រេចណាមួយភ្លាមៗនោះទេ។ លោកបូរីសមានប្រសាសន៍ថា៖ «សវនាការនៅថ្ងៃនេះ និងសវនាការកាលពីម្សិលមិញផ្ដោតលើបញ្ហាតែមួយគត់ គឺការជជែកអំពីសេចក្ដីស្នើសុំជាបន្ទាន់របស់សកម្ពុជាឲ្យតុលាការដាក់កំហិតលើថៃឲ្យបញ្ឈប់សកម្មភាពយោធាដែលកម្ពុជាចោទថា មានលក្ខណៈឧក្រិដ្ឋកម្ម»។
ប្រព័ន្ឋផ្សព្វផ្សាយកាលពីថ្ងៃច័ន្ទបានលើកឡើងថា លោកហោ ណាំហុង ឧបនាយករដ្ឋមន្រ្តី និងជា រដ្ឋមន្រ្តីការបរទេសកម្ពុជា បានថ្លែងនៅចំពោះមុខតុលាការក្រុងឡាអេថា ថៃបានបើកការរំលោភបំពានលើអធិបតេយ្យប្រាសាទព្រះវិហាររបស់ខ្មែរ ហើយបានបង្កឲ្យមានការប៉ះទង្គិចដោយប្រដាប់អាវុធ ដែលបានសម្លាប់មនុស្សជាច្រើន។ ដោយឡែកបណ្តាញផ្សព្វផ្សាយរបស់ថៃបានស្រង់សម្តីមន្រ្តីថៃថា តុលាការក្រុងឡាអេ មិនមានសមត្ថកិច្ចនៅក្នុងការដោះស្រាយជម្លោះព្រំដែននោះទេ។ កម្ពុជា និងថៃមានជម្លោះព្រំដែនជាមួយគ្នាចាប់តំាងពីខែកក្កដា ឆ្នាំ២០០៨ មកម្លេះ បន្ទាប់ពីអង្គការយូណេស្កូបានដាក់ប្រាសាទព្រះវិហាររបស់ខ្មែរជាសម្បត្តិបេតិកភណ្ឌពិភពលោក ហើយ ប្រទេសថៃបានដាក់ពង្រាយកងទ័ពនៅក្បែរតំបន់ប្រសាទនោះ បន្ទាប់ពីខ្លួនបរាជ័យនៅក្នុងការទប់ស្កាត់ ការសម្រេចចិត្តរបស់អង្គការយូណេស្កូ។ ថៃបានទាមទារកាន់កាប់ដីទំហំ៤.៦ គីឡូម៉ែត្រការ៉េ នៅតំបន់ក្បែរប្រាសាទព្រះវិហារ ក៏ប៉ុន្តែកម្ពុជាអះអាងថា ដីនៅទីនោះគឺជារបស់ខ្លួន។ តុលាការក្រុងឡាអេនឹងបើកសវនាការមួយផ្សេងទៀតលើបណ្តឹងរបស់កម្ពុជានៅក្នុងការទាមទារឲ្យមានការបកស្រាយឡើងវិញទៅលើសេចក្តីសម្រេចចិត្តរបស់តុលាការកាលពីឆ្នាំ១៩៦២។ លោក បូរីស ហេម មន្រ្តីផ្នែកទំនាក់ទំនងព័ត៌មាននៃតុលាការក្រុងឡាអេ មានប្រសាសន៍ថា ការ កំណត់ទៅលើបញ្ហានេះនឹងត្រូវធ្វើនៅពេលក្រោយ។ លោកកុយ គួង អ្នកនាំពាក្យក្រសួងការបរទេសកម្ពុជាមានប្រសាសន៍ថា លោកមិនទាន់បានទទួលដំណឹងថ្មីណាមួយពីគណប្រតិភូកម្ពុជានៅតុលាការក្រុងឡាអេទេ។ This posting includes an audio/video/photo media file: Download Now |
| ប្រជាសហគមន៍តាមដងទន្លេសេសានទទូចឲ្យផ្អាកគម្រោងសង់ទំនប់ Posted: 31 May 2011 10:04 AM PDT ក្រុមអ្នកការពារទន្លេ និងតំណាងអ្នកភូមិដែលរស់នៅតាមបណ្តោយដងទន្លេសេសានក្នុងខេត្តរតនៈគីរីបានស្នើឲ្យរដ្ឋាភិបាលកម្ពុជាផ្អាកគម្រោងសង់ទំនប់វារីអគ្គិសនីសេសានក្រោម២សិន ដើម្បីបើកផ្លូវឲ្យមានការសិក្សាបន្ថែមទៀតអំពីផលប៉ះពាល់នៃទំនប់ទៅលើជីវភាពរស់នៅរបស់ពួកគេ។ របាយការណ៍របស់បណ្តាញសម្ព័ន្ធទន្លេកម្ពុជា បានបង្ហាញថា យ៉ាងហោចណាស់ ប្រជាពលរដ្ឋចំនួនជាង៣ម៉ឺន៨ពាន់នាក់ដោយរួមទាំងជនជាតិដើមយ៉ាងច្រើននៅក្នុងភូមិយ៉ាងតិចចំនួន៨៦ភូមិនៅតាមដងទន្លេសេសាន និងទន្លេស្រែពក អាចនឹងបាត់បង់លទ្ធភាពទទួលបានធនធានជលផលដ៏ច្រើនពីទន្លេទាំងនេះ ដោយសារទំនប់ដែលស្ថិតក្នុងខេត្តស្ទឹងត្រែងនោះនឹងរាំងស្កាត់ការបម្លាស់ទីរបស់ត្រីពីទន្លេមេគង្គ និងទន្លេសេកុងចូលទៅទន្លេសេសាន និងទន្លេស្រែពក។ ទន្លេសេសាន និងស្រែពកគឺជាដៃដ៏សំខាន់របស់ទន្លេមេគង្គ ហើយប្រភពទឹកដែលហូរចូលទន្លេទាំងនេះគឺចេញមកពីខ្ពង់រាបកណ្តាល នៃប្រទេសវៀតណាម។ បើផ្អែកតាមរបាយការណ៍វាយតម្លៃផលប៉ះពាល់បរិស្ថានសម្រាប់គម្រោងសង់ទំនប់សេសានក្រោម២នេះ ដែលបានធ្វើឡើងដោយក្រុមហ៊ុនពិគ្រោះយោបល់កម្ពុជាឬ Key Consultants Cambodiaនៅកម្ពុជា កាលពីចុងឆ្នាំ២០០៨បានឲ្យដឹងថា ទំនប់នេះនឹងធ្វើឲ្យប្រជាពលរដ្ឋប្រមាណ៥.០០០នាក់នៅក្នុងឃុំចំនួនបួនក្នុងស្រុកសេសានត្រូវផ្លាស់ទីលំនៅដោយសារតែអាងស្តុកទឹកនៃទំនប់នេះនឹងជន់លិចដីស្រែរបស់អ្នកស្រុកទំហំជាង៣ម៉ឺនហិកតា។ រដ្ឋាភិបាលកម្ពុជា កាលពីខែមុនបានអនុម័តឲ្យមានការសង់ទំនប់វារីអគ្គិសនីសេសានក្រោម២នេះ ហើយការសាងសង់ត្រូវបានគ្រោងនឹងចាប់ផ្តើមនៅចុងឆ្នាំនេះ។ ទំនប់សេសានក្រោម២ដែលមានកម្ពស់៧៥ម៉ែត្រ ហើយអាចផលិតថាមពលអគ្គិសនីកម្លាំង៤០០មេហ្គាវ៉ាត់ដោយត្រូវចំណាយថវិកាអស់ជាង៨០០លានដុល្លារអាមេរិកនោះគឺជាគម្រោងវិនិយោគរួមគ្នារវាងក្រុមហ៊ុនអគ្គិសនីវៀតណាម (Electricity of Vietnam) ដែលមានភាគហ៊ុន៥១% និងក្រុមហ៊ុនRoyal Group របស់លោកឧកញ៉ាគិត ម៉េងដែលមានភាគហ៊ុន៤៩%។
លោកមៀច មាន គឺជាអ្នកសម្របសម្រួលបណ្តាញការពារបីគឺទន្លេសេសាន ស្រែពកនិងសេកុងដែលមានមូលដ្ឋាននៅក្នុងខេត្តរតនៈគីរីនេះ។ លោកបានមានប្រសាសន៍នៅក្នុងពិធីបុណ្យខួបបណ្តាញទន្លេទាំងបីក្នុងស្រុកវ៉ើនសៃកាលពីសប្តាហ៍មុនថា ប្រជាសហគមន៍ដែលពឹងអាស្រ័យលើទន្លេសេសាននេះចង់ឲ្យមានការសិក្សាឲ្យបានពេញលេញអំពីផលប៉ះពាល់នៃទំនប់មកលើជីវភាពរស់នៅរបស់ពួកគេជាមុនសិន ហើយទទូចឲ្យរដ្ឋាភិបាលពិចារណាលើជម្រើសផ្សេងវិញក្នុងការទាញយកថាមពលអគ្គិសនីនោះ។ លោក មៀច មានថ្លែងថា៖ «តំណាងសហគមន៍យើងទាំងអស់ ស្នើជូនទៅរាជរដ្ឋាភិបាលថា សូមឲ្យផ្អាកការសាងសង់ទំនប់សេសានក្រោម២ ហើយសូមពិនិត្យមើលទៅលើផែនការអភិវឌ្ឍទំនប់ផ្សេងៗវិញក្នុងដំណាក់កាលណាមួយ»។ លោក មៀច មាន មានប្រសាសន៍បន្ថែមថា ការសាងសង់ទំនប់សេសានក្រោម២នេះ នឹងបង្កផលប៉ះពាល់យ៉ាងធំធេងមកលើជីវភាពរស់នៅរបស់ប្រជាសហគមន៍នៅតាមដងទន្លេនេះ។ លោកបន្តទៀតថា៖ «មូលហេតុ ដោយសារទំនប់នឹងកាត់ផ្តាច់ទន្លេចំនួន២ ហើយនឹងលិចភូមិមិនត្រឹមតែភូមិក្នុងតំបន់អាងស្តុកទឹកប៉ុណ្ណោះទេ គឺប្រជាពលរដ្ឋចំនួនជាង១០០ភូមិនឹងត្រូវទទួលរងផលប៉ះពាល់ដោយសារទំនប់ហ្នឹង»។ អ្នកស្រី ហ្វយ ស៊ុត តំណាងសហគមន៍រស់នៅតាមដងទន្លេទាំងបី មានប្រសាសន៍ថា ប្រជាសហគមន៍របស់អ្នកស្រីកន្លងមកបានរងគ្រោះជាច្រើនមកហើយដោយសារទឹកជំនន់ និងការខូចគុណភាពទឹកទន្លេដែលអ្នកស្រីអះអាងថាបណ្តាលមកពីទំនប់យ៉ាលីរបស់វៀតណាមដែលត្រូវបានសង់លើទន្លេសេសាននេះដែរ ដែលស្ថិតនៅចម្ងាយ៨០គីឡូម៉ែត្រពីព្រំដែនកម្ពុជា។ ដូច្នេះ អ្នកស្រី ហ្វយ ស៊ុត មានប្រសាសន៍ថា ប្រជាសហគមន៍របស់អ្នកស្រីមិនចង់រងគ្រោះដោយសារការសង់ទំនប់វារីអគ្គិសនីសេសានក្រោម២នេះថែមទៀតទេ។ អ្នកស្រីបានប្រាប់វីអូអេខ្មែរថា៖ «វាខាតបង់ទាំងអាយុជីវិតសហគមន៍ ដូចថាអណ្តែតផ្ទះ អណ្តែងគោក្របីដូចជាមាន់ទា សត្វពាហនៈយើងសព្វគ្រប់បែបយ៉ាងគឺវាអណ្តែតទៅទាំងអស់។ ដោយសារអញ្ចឹងហើយបានជាពួកយើងខ្ញុំមិនចង់ឲ្យគាត់អភិវឌ្ឍទេទំនប់សេសានក្រោម២»។ បើតាមគម្រោងអគ្គិសនីដែលផលិតបាននេះនឹងត្រូវយកទៅផ្គត់ផ្គង់តំបន់និងខេត្តជិតខាងដូចជាមណ្ឌលគីរី និងខេត្តរតនៈគីរីនេះជាដើម រួចបញ្ជូនបន្តទៅវៀតណាម។ លោក ឈិត សំអាត នាយកប្រតិបត្តិនៃវេទិការអង្គការមិនមែនរដ្ឋាភិបាលស្តីពីកម្ពុជា មានប្រសាសន៍ថា រដ្ឋាភិបាលគួរតែបញ្ជាក់ឲ្យបានច្បាស់លាស់ជាមុនសិនអំពីវិធានការរបស់ខ្លួនក្នុងការដោះស្រាយផលប៉ះពាល់ជីវភាពរស់នៅរបស់សហគមន៍ និងអត្ថប្រយោជន៍ដែលពួកគេអាចនឹងទទួលបានពីការសង់ទំនប់នេះ។ លោកសំអាតបានប្រាប់វីអូអេថា៖ «គាត់ត្រូវបញ្ជាក់ថា តើភ្លើងដែលយើងទទួលបានហ្នឹង វាចំណេញប៉ុន្មាន អំពីត្រីដែលប្រជាជនទទួលបានប៉ុន្មាន ពេលដែលទំនប់សាងសង់ហើយ តើគាត់ទទួលបានប៉ុន្មាន។ យើងមិនចង់ថា ក្រុមហ៊ុនសាងសង់ហើយ យើងបានទំនប់វារីអគ្គិសនី ហើយភ្លើងបានលក់ទៅក្រៅ សួរថាតើផលប្រយោជន៍ប្រជាជនគាត់បានអីទេ អញ្ចឹងទាមទារឲ្យមានការបញ្ជាក់ឲ្យច្បាស់លាស់»។ អ្នកសង់ទំនប់អះអាងថា គេអាចសង់ជណ្តើរ ឬផ្លូវវៀងដើម្បីឲ្យត្រីអាចធ្វើចរាចរណ៍ចុះឡើងបានដើម្បីបញ្ជៀសផលប៉ះពាល់ដល់ធនធានជលផលនៅក្នុងទន្លេដែលអាចបណ្តាលមកពីទំនប់នោះ។ ប៉ុន្តែលោក ឈិត សំអាត មានប្រសាសន៍ថា វិធីសាស្ត្របែបនោះគ្មានប្រសិទ្ធិភាពទេ ហើយបានហៅវាថាជាវិធីសាស្ត្រហួសសម័យទៅហើយ។ លោកបន្តថា៖ «ត្រីយើងរាប់រយប្រភេទ។ តើមានជណ្តើរប៉ុន្មានឲ្យគាត់ដើរ គឺថាមិនអាចទេ។ នេះគ្រាន់តែជាលេសមួយទេ បើតាមបទពិសោធន៍ពីប្រទេសផ្សេងៗ ត្រីមិនអាចឡើងបានទេដូចជាជណ្តើរយន្តអីហ្នឹងគឺមិនអាចទេ»។ លោក ឧកញ៉ា គិត ម៉េង ប្រធានក្រុមហ៊ុនរ៉ូយ៉ាល់គ្រុប(Royal Group) មិនធ្វើអត្ថាធិប្បាយណាមួយទេជុំវិញការទាមទាររបស់សហគមន៍នេះ ដោយលោកបានបង្វែរសំណួរទៅខាងក្រសួងឧស្សាហកម្ម រ៉ែ និងថាមពលវិញ។ លោក ស៊ុយ សែម រដ្ឋមន្ត្រីក្រសួងឧស្សាហកម្ម រ៉ែ និងថាមពល មន្ត្រីពាក់ព័ន្ធជាច្រើនទៀតនៃក្រសួងឧស្សាហកម្ម ព្រមទាំងលោក ខៀវ កាញារីទ្ធ អ្នកនាំពាក្យរដ្ឋាភិបាលកម្ពុជាផងដែរមិនអាចទាក់ទងបានឬមិនធ្វើអត្ថាធិប្បាយទេជុំវិញគម្រោងសង់ទំនប់វារីអគ្គិសនីសេសានក្រោម២នេះ។ យ៉ាងណាក៏ដោយ អភិបាលរងស្រុកវើនសៃនៃខេត្តរតនៈគីរី គឺអ្នកស្រី ខាំ ណាវ បានថ្លែងថា រដ្ឋាភិបាលក៏បានគិតគូរបញ្ចៀសផលប៉ះពាល់សហគមន៍នៅតាមដងទន្លេនេះដែរ។ ក្រៅពីគម្រោងសង់ទំនប់សេសានក្រោម២ រដ្ឋាភិបាលកម្ពុជាក៏គ្រោងសាងសង់ទំនប់វារីអគ្គិសនីជាច្រើនទៀតដើម្បីឆ្លើយតបទៅនឹងតម្រូវការថាមពលអគ្គិសនីដែលកាន់តែកើនឡើងនៅក្នុងប្រទេស។ ទំនប់វារីអគ្គិសនីធំៗចំនួន២ត្រូវបានគ្រោងនឹងសង់នៅលើទន្លេមេគង្គតែម្តងគឺទំនប់ស្ទឹងត្រែងក្នុងខេត្តស្ទឹងត្រែង ដែលមានកម្លាំងថាមពល៩៨០ មេហ្គាវ៉ាត់ និងទំនប់សម្បូរក្នុងខេត្តក្រចេះ ដែលមានកម្លាំងថាមពលរហូតដល់២.៦០០មេហ្គាវ៉ាត់។ ប៉ុន្តែ កាលពីពេលថ្មីៗគម្រោងទំនប់វារីអគ្គីសលើដងទន្លេមេគង្គក្នុងប្រទេសឡាវ គឺទំនប់សាយ៉ាបូរីត្រូវបានរដ្ឋាភិបាលឡាវ ប្រកាសផ្អាកការសាងសង់សិនបន្ទាប់ពីមានការទាមទារពីសំណាក់សហគមន៍ អង្គការក្រៅរដ្ឋាភិបាល និងរដ្ឋាភិបាលនៃប្រទេសទន្លេមេគង្គក្រោមឲ្យមានការសិក្សាបន្ថែមទៀតអំពីផលប៉ះពាល់ដែលអាចកើតមានឡើងដោយសារការសាងសង់ទំនប់នោះ។ អ្នកអាចមើលបាយការណ៍ជាវិដេអូ អំពីរឿងនេះនៅក្នុងគេហទំព័រwww.voacambodia.com ឬ youtube.com/voakhmerservice។ This posting includes an audio/video/photo media file: Download Now |
| អង្គការអ្នកសល់ពីស្លាប់នៃរបបខ្មែរក្រហមមួយនៅអាមេរិករិះគន់សាលាក្តីខ្មែរក្រហម Posted: 31 May 2011 09:29 AM PDT កាលពីថ្ងៃព្រហស្បតិ៍ អង្គការអ្នកសល់ពីស្លាប់នៃរបបខ្មែរក្រហមឈ្មោះ ASRIC ដែលមានទីតាំងនៅសហរដ្ឋអាមេរិកឲ្យដឹងថា សាលាក្តីខ្មែរក្រហមនៅភ្នំពេញនឹងមិនអាចរកយុត្តិធម៌បានទេ ប្រសិនបើតុលាការនេះទម្លាក់ចោលរឿងក្តី០០៣ និង០០៤ ដែលត្រូវបានប្រឆាំងដោយរដ្ឋាភិបាលកម្ពុជានោះ។ ចៅក្រមបានបញ្ចប់ការស៊ើបអង្កេតរឿងក្តី០០៣កាលពីមួយខែកន្លងទៅនេះ ប៉ុន្តែ ក្រោយមកសហព្រះរាជអាជ្ញាបរទេសលោកអ៊ែនឌ្រូ ឃែលី (Andrew Cayley) មានប្រសាសន៍ថា ការស៊ើបអង្កេតសម្រាប់រឿងក្តី០០៣ មិនគ្រប់គ្រាន់ទេ ហើយថា ត្រូវមានកិច្ចការច្រើនទៀតដែលត្រូវធ្វើ។ ចាប់ពីពេលនោះមកលោកឃែលី ត្រូវតុលាការបញ្ជាឲ្យដកការរិះគន់របស់លោកវិញ ប៉ុន្តែលោកឃែលីថា លោកនឹងប្តឹងឧទ្ធរណ៍។ អង្គការASRICឲ្យដឹងថា តុលាការមិនអាចសម្រេចលើអង្គហេតុនៃរឿងក្តីនេះបានទេបើគ្មានការស៊ើបអង្កេតត្រឹមត្រូវនោះ។ លោកស្រី នូ លក្ខិណា គឺជាស្ថាបនិកអង្គការASRIC ដែលជាអង្គការអ្នកសល់ពីស្លាប់នៃរបបខ្មែរក្រហមតែមួយគត់នៅសហរដ្ឋអាមេរិក។ លោកស្រីបាននិយាយមកកាន់វីអូអេសំឡេងសហរដ្ឋអាមេរិកតាមSkype ថា៖ «អ្នកសល់ពីស្លាប់កម្ពុជា និងសង្គមកម្ពុជាសមនឹងទទួលបានប្រសើរជាងនេះពីព្រោះពួកគេបានទទួលរងការឈឺចាប់អស់រយៈពេល៣៥ឆ្នាំហើយ ហើយគេមិនទាន់បានចូលរួមក្នុងតុលាការនៅឡើយ។ ដូច្នេះ ការកាត់ទោសតែជនជាប់ចោទកំពូលប្រាំនាក់មិនគ្រប់គ្រាន់ទេ។ ប្រសិនបើមានភស្តុតាងដែលថា មានជនដៃដល់ទៀតនោះ មន្រ្តីតុលាការត្រូវធ្វើការឲ្យបានប្រាកដប្រជា»។ លោកស្រីមានប្រសាសន៍ថា កាលពីសប្តាហ៍មុនមានមនុស្ស៧៥០នាក់បានចុះហត្ថលេខាលើញ្ញតិ្តមួយអំពាវនាវដល់តុលាការដែលគាំទ្រដោយអង្គការសហប្រជាជាតិនេះ ស៊ើបអង្កេតរឿងក្តី០០៣ឲ្យបានប្រាកដប្រជា។ លោកស្រីថ្លែងថា តុលាការដែលភាគច្រើនមិនបញ្ចេញឲ្យដឹងនូវអ្វីដែលកំពុងកើតឡើងនោះ ត្រូវធ្វើកិច្ចការឲ្យបានប្រសើរជាងនេះ។ «យើងត្រូវការតម្លាភាពថែមទៀតពីតុលាការ។ យើងត្រូវការព័ត៌មានប្រកបដោយបច្ចុប្បន្នភាពជាងនេះ។ ហើយយើងត្រូវការឲ្យតុលាការដោះស្រាយភាពខ្វែងគំនិតគ្នាក្នុងចំណោមភាគីកម្ពុជា និងភាគីអង្គការសហប្រជាជាតិ។ ដូច្នេះពួកគេត្រូវទុកមោទនភាពរបស់ខ្លួនដោយឡែក ហើយផ្តោតលើអ្វីដែលជារឿងល្អបំផុតសម្រាប់អ្នកសល់ពីស្លាប់ ជាជាងប្រយោជន៍បុគ្គល»។ សាលាក្តីដែលគាំទ្រដោយអង្គការសហប្រជាជាតិមួយនេះ ត្រូវបានបង្កើតឡើងដើម្បីបើកសវនាការរឿងក្តីទាំងឡាយដែលទាក់ទិននឹងឧក្រិដ្ឋកម្មដែលត្រូវបានប្រព្រឹត្តដោយខ្មែរក្រហមក្នុងអំឡុងខ្លួនកាន់អំណាចរវាងឆ្នាំ១៩៧៥ និង១៩៧៩ ដែលក្នុងរយៈពេលនេះ មានមនុស្សប្រហែល២លាននាក់បានបាត់បង់ជីវិត។ ក្នុងរឿងក្តីសរុបទាំង៤ មានមនុស្សសរុប១០នាក់ដែលត្រូវបានរំពឹងថា នឹងត្រូវបានស៊ើបអង្កេត។ តុលាការបានបញ្ចប់រឿងក្តី០០១ កាលពីឆ្នាំកន្លងទៅ ហើយកាត់ទោសអតីតប្រធានសន្តិសុខនៃរបបខ្មែរក្រហមពីបទឧក្រិដ្ឋកម្មប្រឆាំងមនុស្សជាតិ។ ជនជាប់ចោទបួននាក់ដែលមានវ័យចំណាស់ទៅហើយនោះ នឹងត្រូវបានកាត់ទោសនៅខែក្រោយក្នុងរឿងក្តី០០២។ ប៉ុន្តែរដ្ឋាភិបាលកម្ពុជាបានបញ្ជាក់អំពីការប្រឆាំងដ៏ខ្លាំងក្លាចំពោះរឿងក្តី០០៣ និង០០៤។ លោកនាយករដ្ឋមន្ត្រីហ៊ុន សែន បាននិយាយថា ការកាត់ទោសបន្ថែមទៀតអាចធ្វើឲ្យមានអស្ថិរភាពដល់សន្តិសុខប្រទេស។ អ្នករិះគន់និយាយថា ដោយសារតែភាពចម្រុះនៃសាលាក្តីដោយមានមន្ត្រីរដ្ឋាភិបាល និងអន្តរជាតិមានតួនាទីស្មើគ្នានៅគ្រប់ឋានានុក្រមនោះ ការប្រឆាំងរបស់រដ្ឋាភិបាលបង្កឧបសគ្គដ៏ធំដល់ការស៊ើបអង្កេតដ៏ត្រឹមត្រូវមួយ។ ក្នុងដំណើរការស៊ើបអង្កេតរឿងក្តី០០៣ ចៅក្រមស៊ើបអង្កេតសម្រេចមិនបញ្ចេញព័ត៌មានជាសាធារណៈទេ។ ការរក្សាភាពសម្ងាត់នេះធ្វើឲ្យជនរងគ្រោះនៃរបបខ្មែរក្រហមនៅកម្ពុជា គ្មានវិធីណានឹងបានដឹងអំពីថាតើឧក្រិដ្ឋកម្មដែលត្រូវបានស៊ើបអង្កេតទាំងនោះមានផលប៉ះពាល់ដល់ពួកគេឡើយ។ សហព្រះរាជ្ញាអន្តរជាតិលោកអ៊ែនឌ្រូ ឃែលី បានអំពាវនាវដល់តុលាការឲ្យបន្ថែមប្រាំមួយសប្តាហ៍ទៀតដល់កាលបរិច្ឆេទកំណត់សម្រាប់ការដាក់ពាក្យសុំធ្វើជាដើមបណ្តឹងរដ្ឋប្បវេណីដែលត្រូវបានកំណត់នៅថ្ងៃទី១៨ ខែ ឧសភានោះ។ អង្គការASRIC ដែលបានចុះឈ្មោះដើមបណ្តឹងរដ្ឋប្បវេណីជាច្រើនសម្រាប់រឿងក្តី០០២ គាំទ្រជំហរនេះ។ ចៅក្រមស៊ើបអង្កេតដែលមានអំណាចលើការសម្រេចចិត្តមិនទាន់បានធ្វើការឆ្លើយតបទៅនឹងសំណើពន្យាពេលនេះទេ៕ ប្រែសម្រួលដោយអ៊ឹម សុធារិទ្ធ This posting includes an audio/video/photo media file: Download Now |
| You are subscribed to email updates from VOA News: ព័ត៌មាន To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
