VOA News: ព័ត៌មាន: “របាយការណ៍អេហ្វប៊ីអាយ (FBI) បង្ហាញពីការបំភិតបំភ័យរបស់សាក្សី” plus 5 more |
- របាយការណ៍អេហ្វប៊ីអាយ (FBI) បង្ហាញពីការបំភិតបំភ័យរបស់សាក្សី
- រដ្ឋសភាកម្ពុជាកែសម្រួលច្បាប់ប្រឆាំងអំពើពុករលួយឲ្យប្រសើរឡើង
- កម្ពុជាបន្ទោសថៃថាមិនបំពេញកាត្វកិច្ចអន្តរជាតិរឿងព្រំដែន
- អភិបាលក្រុងបដិសេធសំណើរបស់អ្នកបឹងកក់
- មានការផ្លាស់ប្តូរតិចតួចចំពោះច្បាប់ស្តីពីអង្គការក្រៅរដ្ឋាភិបាលក្រោយពីមានការរិះគន់
- គណបក្សប្រឆាំងប្រារព្ធខួបវាយប្រហារគ្រាប់បែក
| របាយការណ៍អេហ្វប៊ីអាយ (FBI) បង្ហាញពីការបំភិតបំភ័យរបស់សាក្សី Posted: 01 Apr 2011 02:48 PM PDT ខណៈដែលស្ថាប័នស៊ើបអង្កេតអេហ្វប៊ីអាយបានចាប់ផ្តើមបញ្ចេញជាបណ្តើរៗនូវរបាយការណ៍ស៊ើបអង្កេតលើករណីគប់គ្រាប់បែកកាលពីថ្ងៃទី ៣០ ខែមិនា ឆ្នាំ ១៩៩៧ ជនរងគ្រោះអាមេរិកម្នាក់ដែលរងរបួសដោយការវាយប្រហារនោះទាមទារឱ្យរដ្ឋាភិបាលកម្ពុជាទទួលខុសត្រូវចំពោះអ្វីដែលបានកើតមានឡើង។ លោក រ៉ន អាប់នី អតីតប្រធានវិទ្យាស្ថានសាធារណរដ្ឋអន្តរជាតិដែលបានរងរបួសក្នុងការវាយប្រហារនោះ បានចោទប្រកាន់ដោយត្រង់ៗទៅលើប្រមុខរដ្ឋាភិបាលកម្ពុជាថា ជាអ្នកទទួលខុសត្រូវចំពោះសុវត្ថិភាពរបស់ប្រជាពលរដ្ឋខ្លួនឯងប៉ុន្តែមិនបានធ្វើការងារគ្រប់គ្រាន់ទេ។ លោកបានប្រាប់វីអូអេខ្មែរថា៖ «តើអ្នកអាចរស់នៅយ៉ាងម៉េចបានក្នុងប្រទេសមួយដែលមានប្រធានាធិបតីឬនាយករដ្ឋមន្រ្តីដែលមិនទទួលទោសអ្វីទាំងអស់ចំពោះការធ្វើឃាតមនុស្ស។ នេះគឺជាអ្វីដែលកម្ពុជាកំពុងតែជួបប្រទះ។ បើទោះបីជាមានការរីកចម្រើនខ្លះ ប៉ុន្តែមានកម្រិតតិចតួចណាស់។ តើអ្នកអស់សង្ឃឹមប៉ុណ្ណានៅពេលដែលអ្នកមិនអាចយកអ្វីជាគោលការណ៍មកអនុវត្តបាននោះ? រឿងទាំងអស់នេះធ្វើឱ្យខ្ញុំអស់សង្ឃឹមខ្លាំងណាស់»។ នៅក្នុងចំណាត់ការចុងក្រោយនេះលោក រ៉ន អាប់នីបានដាក់ពាក្យប្តឹងតវ៉ាទៅ ការិយាល័យរដ្ឋអាជ្ញាក្នុងទីក្រុងញ៉ូវយ៉កក្នុងទម្រង់ជាបទល្មើសព្រហ្មទណ្ឌប្រឆាំងនឹងលោកហ៊ុន សែន និងកូនចៅរបស់លោកពីបទទប់ស្កាត់ការស្វែងរកយុត្តិធម៌ និងកុហកក្រុមស៊ើបអង្កេតអេហ្វប៊ីអាយ។ យោងតាមរបាយការណ៍ស៊ើបអង្កេតរបស់អេហ្វប៊ីអាយដែលបានបញ្ចេញឱ្យវីអូអេសំឡេងសហរដ្ឋអាមេរិកផ្នែកខេមរភាសានាពេលថ្មីៗនេះ បានបង្ហាញពីការប្រព្រឹត្តមិនសមរម្យរបស់មន្ត្រីកម្ពុជាដើម្បីបំភិតបំភ័យសាក្សី និងការស្ទាក់ស្ទើររបស់សាក្សីក្នុងការផ្តល់កិច្ចសហការដល់ការសាកសួរដែលមានវត្តមានរបស់មន្ត្រីប៉ូលីសកម្ពុជា។ នៅក្នុងពេលកំពុងសម្ភាសសាក្សីម្នាក់ដែលអេហ្វប៊ីអាយដាក់ឈ្មោះ សម្ងាត់ហៅថា «ក្រយ៉ៅដៃទីមួយ» ឬ Fingerprint Number One មានមន្រ្តីភ្នាក់ងារសម្ងាត់របស់រដ្ឋាភិបាលម្នាក់ដែលចូលរួមក្នុងការសម្ភាសបានស្ទុះទៅថតរូបសាក្សីដោយគ្មានការអនុញ្ញាតដែលបានបណ្តាលឱ្យភ្នាក់ងារអេហ្វប៊ីអាយខឹងសម្បារ និងគំរាមបញ្ចប់ការស៊ើបអង្កេតទាំងមូលព្រោះពួកគេចាត់ទុកថាជាចេតនាមួយបំភិតបំភ័យដល់សាក្សីដែលចង់លាក់អត្តសញ្ញាណ។ មានសាក្សីខ្លះត្រូវអេហ្វប៊ីអាយសម្ភាសឡើងវិញដោយគ្មានវត្តមានរបស់អាជ្ញាធរប៉ូលីសកម្ពុជាហើយបាននាំទៅដល់ការសម្ភាសសាក្សីសំខាន់ៗមួយចំនួនទៀតដោយមិនឱ្យអាជ្ញាធរប៉ូលីសកម្ពុជាដឹង។ របាយការណ៍នោះបន្ថែមថា សាក្សីមានការជឿជាក់ក្នុងការផ្តល់ចម្លើយនៅពេលដែលគ្មានវត្តមានរបស់អាជ្ញាធរប៉ូលីសខ្មែរ។ យោងតាមឯកសារចំនួន១.២៤៨ ទំព័រ ដែលវីអូអេទទួលបានពីក្នុងរបាយការណ៍សរុបជាង២០០០ទំព័ររបស់ អេហ្វប៊ីអាយបានឱ្យដឹងថា សាក្សីដែលអេហ្វប៊ីអាយបានសម្ភាសចង្អុលបង្ហាញថា ក្រុមអង្គរក្សដែលបានដាក់ការពារនៅគោលដៅក្បែរកន្លែងបាតុកម្ម ដែលពេលនោះគេដឹងថា ជាកងអង្គរក្សលោក អតីតនាយករដ្ឋមន្រ្តីទីពីរ ហ៊ុន សែន និងអាជ្ញាធរប៉ូលីសដែលមានវត្តមាននៅកន្លែងកើតហេតុបានរារាំងមិនឱ្យពួកគេជួយជនរងគ្រោះនិងគំរាមពួកគេបន្ថែមទៀតនៅក្រោយពីមានការវាយប្រហារដោយគ្រាប់បែកភ្លាមៗ។ សាក្សីដែលបានចូលរួមក្នុងបាតុកម្មបានបញ្ជាក់ថា កងកម្លាំងដែលនៅទីនោះបានបាញ់អ្នកដែលព្យាយាមជួយជនរងគ្រោះនិងមានខ្លះបានបាញ់បាតុកររងគ្រោះបន្ថែមនៅពេលដែលពួកគេរត់ចេញពីទីកើតហេតុ។ អាជ្ញាធរប៉ូលីសជាតិកម្ពុជាបដិសេធចំពោះការចោទប្រកាន់នោះ។ លោក ខៀវ សុភ័គ អ្នកនាំពាក្យក្រសួងមហាផ្ទៃបាននិយាយក្នុងបទសម្ភាសកាលពីសប្តាហ៍មុនថា ពុំមានរដ្ឋាភិបាលណាដែលចង់ឱ្យស្លាប់ប្រជាពលរដ្ឋរបស់ខ្លួនទេ។ លោកបានបញ្ជាក់បន្ថែមថា ក្នុងអំឡុងពេលស៊ើបអង្កេតកន្លងមកលោកបានដើរតួនាទីជាអ្នកជួយសម្របសម្រួលដល់ការងាររបស់អេហ្វប៊ីអាយនិងជាអ្នកបកប្រែផងហើយបានសង្កេតឃើញថាអ្វីៗដំណើរការល្អ៖ «ខ្ញុំពិនិត្យឃើញថាដូចជាមិនមានការរារាំងអ្វីទេ។ អេហ្វប៊ីអាយចង់សាកសួរអ្នកណា រដ្ឋាភិបាលគាត់ឱ្យអ្នកនោះមកឆ្លើយបំភ្លឺហើយក្នុងនាមខ្ញុំនៅក្នុងនោះ ខ្ញុំមិនឃើញមានការលាក់កំបាំងអ្វីទាំងអស់…ដូចជាគ្មានការរារាំងមិនឱ្យឆ្លើយទេ»។ ការសើរើប្តឹងលើលោកហ៊ុន សែននិងក្រុមអង្គរក្សការពារកើតឡើងចំពេលដែលមេបក្សប្រឆាំងគឺលោក សម រង្ស៊ី កំពុងរស់នៅនិរទេសខ្លួនក្រៅប្រទេសបន្ទាប់ពីត្រូវតុលាការកាត់ទោសឱ្យជាប់ពន្ធនាគាររយៈពេល១២ឆ្នាំទាក់ទងនឹងរឿងដកតម្រុយបង្គោលព្រំដែនជាមួយប្រទេសវៀតណាមនិងការផ្សព្វផ្សាយព័ត៌មានមិនពិតលើបញ្ហាឯកសារព្រំដែន។ អ្នកតាមដានសភាពការណ៍កម្ពុជាយល់ថា វាអាចជាការដាក់សម្ពាធណាមួយទៀតសម្រាប់ចរចាឱ្យលោកសម រង្ស៊ីបានចូលប្រទេសវិញព្រោះការប្តឹងលើកមុនត្រូវបានដោះស្រាយគ្នាដោយស្ងាត់ៗជាថ្នូរនឹងការឱ្យលោកសម រង្ស៊ី បានវិលត្រឡប់ទៅ ប្រទេសកម្ពុជាវិញម្តងរួចហើយ។ ប៉ុន្តែលោក ម៉នថុន ស្លការ (Morton Slkar) មេធាវីដែលកាន់សំណុំរឿងក្តីនោះបានបញ្ជាក់ថា ការប្តឹងផ្តល់លើកនេះគឺមិនមែនដើម្បីជាថ្នូរដែលនឹងត្រូវដោះដូរសម្រាប់លោកសម រង្ស៊ីចូលស្រុកវិញទេ។ លោកបញ្ជាក់បន្ថែមថា បើទោះបីជាមានឬមិនមានការយករឿងក្តី នេះមកចាត់ការវាអាស្រ័យលើរដ្ឋអាជ្ញារបស់សហរដ្ឋអាមេរិកក្នុងការបន្តរឿងក្តីនេះតែប៉ុណ្ណោះ ហើយនឹងត្រូវធ្វើនៅពេលណាមួយ។ លោក ម៉នថុន បានសន្និដ្ឋានថា វប្បធម៌មិនទទួលទោសដែលកើតមានសព្វថ្ងៃនិងការចូលជ្រៀតជ្រែកក្នុងប្រព័ន្ធយុត្តិធម៌នៅកម្ពុជាជាទម្លាប់ដែលកើតឡើងមួយផ្នែកដោយការណ៍ដែលមិនមានការដាក់ទោសទណ្ឌលើអ្នកដែលប្រព្រឹត្តខុសនៅកម្ពុជាដែលមានដូចជាករណីគប់គ្រាប់បែកនេះជាដើម។ លោកបានបន្ថែមថា មានការខិតខំជាច្រើនទៀតដែលជាការបន្ថែមទៅនឹងការប្តឹងតវ៉ាករណីព្រហ្មទណ្ឌនេះដើម្បីឱ្យរដ្ឋាភិបាលកម្ពុជាទទូលខុសត្រូវចំពោះការរំលោភសិទ្ធិមនុស្សនានា។ ការអះអាងនេះក៏ត្រូវមន្រ្តីជាន់ខ្ពស់រដ្ឋាភិបាលកម្ពុជាឆ្លើយបដិសេធផងដែរ ដោយការពារការអនុវត្តរបស់រដ្ឋាភិបាលកម្ពុជាថា បានយកចិត្តទុកដាក់ពង្រឹងដល់ប្រព័ន្ធយុត្តិធម៌និងមិនមានការជ្រៀតជ្រៀតចូលក្នុងការអនុវត្តការងាររបស់តុលាការទេ។ លោក ផៃ ស៊ីផាន រដ្ឋលេខាធិកានិងជាអ្នកនាំពាក្យមួយរូបនៃក្រុមប្រតិកម្មរហ័សរបស់ទីស្តីការគណរដ្ឋមន្រ្តីបានបញ្ជាក់ថា៖ «អ្វីដែលបានលើកឡើងគ្រាន់តែជាការវាយប្រហារចោទប្រកាន់គឺមិនមែនជាមូលដ្ឋាននៃការគិត ឬជាមូលដ្ឋាននៃការអនុវត្ត ដោយសារយើងឃើញជាបន្តបន្ទាប់ទៀតនូវអ្វីដែលជាកំណែទម្រង់យុត្តិធម៌។ អ្វីដែលជាការស៊ើបអង្កេតនៅតែមានបន្តមិនមែនបានសេចក្តីថា ករណីបោកគ្រាប់បែកដែលធ្វើតាំងពីពេលនោះវាក្លាយទៅជាប្រធានបទនៃការប្រព្រឹត្តនូវឧក្រិដ្ឋកម្មជាបន្តបន្ទាប់»។ យ៉ាងណាក៏ដោយ នៅមិនទាន់មានការចាត់ការយ៉ាងណានៅឡើយទេចំពោះពាក្យបណ្តឹងតវ៉ារបស់លោករ៉ន អាប់នី និងជនរងគ្រោះដទៃទៀតនោះ។ នេះបើតាមការបញ្ជាក់របស់ក្រុមមេធាវី៕ This posting includes an audio/video/photo media file: Download Now |
| រដ្ឋសភាកម្ពុជាកែសម្រួលច្បាប់ប្រឆាំងអំពើពុករលួយឲ្យប្រសើរឡើង Posted: 01 Apr 2011 02:34 PM PDT រដ្ឋសភាបានអនុម័តការធ្វើវិសោធនកម្មមាត្រាមួយចំនួនក្នុងច្បាប់ប្រឆាំងអំពើពុករលួយនៅថ្ងៃសុក្រនេះ ដែលក្រុមមន្ត្រីអង្គការសង្គមស៊ីវិលបាននិយាយថា នេះជាការកាត់ផ្តាច់អំណាចរបស់ទីស្តីការគណៈរដ្ឋមន្ត្រីចេញពីអង្គភាពប្រឆាំងអំពើពុករលួយ និងផ្តល់អំណាចកាន់តែច្រើនដល់ប្រធានអង្គភាពប្រឆាំងអំពើពុករលួយ។ សមាជិកសភាចំនួន៨៥រូបក្នុងចំណោម៩៥រូបបានយល់ព្រមលើកដៃអនុម័តការធ្វើវិសោធនកម្មលើមាត្រាចំនួនបីនៅក្នុងច្បាប់ប្រឆាំងអំពើពុករលួយ។ ការធ្វើវិសោធនកម្មនេះរួមមានការផ្តល់សិទ្ធិអំណាចដល់ប្រធានអង្គភាពប្រឆាំងអំពើពុករលួយក្នុងការតែងតាំងនិងផ្លាស់ប្តូរមន្ត្រីនៅក្រោមនាយកដ្ឋាន កាត់ផ្តាច់ថវិការបស់ស្ថាប័នប្រឆាំងអំពើពុករលួយដែលបច្ចុប្បន្ននៅក្រោមទីស្តីការគណៈរដ្ឋមន្ត្រីមកនៅក្នុងថវិកាជាតិវិញ និងលុបចោលមាត្រា៥៧ដែលរាំងស្ទះដល់ការអនុវត្តច្បាប់ប្រឆាំងអំពើពុករលួយ ដើម្បីឱ្យច្បាប់ប្រឆាំងអំពើពុករលួយចូលជាធរមានភ្លាមៗ។ លោក ប៉ែន បញ្ញា ប្រធានគណៈកម្មការនីតិកម្មនិងយុត្តិធម៌នៃរដ្ឋសភា បានថ្លែងប្រាប់រដ្ឋសភាថា ការធ្វើវិសោធនកម្មនេះសំដៅលើកកម្ពស់ប្រសិទ្ធិភាពនៃការងារប្រឆាំងអំពើពុករលួយ ពង្រឹងអភិបាលកិច្ចល្អ និងនីតិរដ្ឋ និងធានារក្សាភាពស្អាតស្អំ និងយុត្តិធម៌នៅក្នុងការអភិវឌ្ឍប្រទេសជាតិ។ លោកឱម យិនទៀង ប្រធានអង្គភាពប្រឆាំងអំពើពុករលួយ បានថ្លែងអំណរគុណដល់រដ្ឋសភាក្នុងការជួយគាំទ្រការធ្វើវិសោធនកម្មនេះ ដោយឥតលក្ខខណ្ឌ និងដ៏ខ្លាំងក្លាចំពោះការប្រឆាំងអំពើពុករលួយនេះ។ លោក ធន សារាយ ប្រធានសមគមសិទ្ធិមនុស្សអាដហុក បានថ្លែងថា ការអនុម័តវិសោធនកម្មនេះជាគំនិតល្អក្នុងការផ្តាច់ថវិការបស់ស្ថាប័នប្រឆាំងអំពើពុករលួយចេញពីទីស្តីការគណៈរដ្ឋមន្ត្រី ដែលបង្ហាញឱ្យឃើញពីឯករាជ្យភាពរបស់ស្ថាប័ននេះច្រើនជាងមុន។ លោកធន សារាយ បានបញ្ជាក់ថាថវិកាឯករាជ្យរបស់ស្ថាប័នប្រឆាំងអំពើពុករលួយ គឺជាជំហ៊ានដំបូង និងចាំបាច់ ប៉ុន្តែស្ថាប័នប្រឆាំងអំពើពុករលួយត្រូវធ្វើសកម្មភាព និងការសម្រេចចិត្តជាក់ស្តែងក្នុងការស៊ើបអង្កេតអំពើពុករលួយ ដោយមិនខ្លាចប៉ះពាល់ដល់មន្ត្រីរដ្ឋាភិបាលជាន់ខ្ពស់។ លោកបន្តថា៖ «អំណាចផ្តល់ទៅឱ្យនាយកប្រតិបត្តិ ដើម្បីធ្វើការងារឱ្យមានប្រសិទ្ធិភាព។ ប៉ុន្តែប្រធានក្រុមប្រឹក្សាភិបាលជួយប្រឹក្សា។ ការផ្តល់អំណាចទៅអង្គភាពប្រឆាំងអំពើពុករលួយដើម្បីដក ឬ តែងតាំងមន្ត្រីគឺជាការល្អ ដើម្បីពង្រឹងការងារប្រតិបត្តិឱ្យមានប្រសិទ្ធិភាព»។ លោកអ៊ំ សំអាត ប្រធានផ្នែកស៊ើបអង្កេតនៃអង្គការសិទ្ធិមនុស្សលីកាដូ បានបញ្ជាក់ថា ទីស្តីការគណៈរដ្ឋមន្ត្រីលែងមានឥទ្ធិពលឬអំណាចទៅលើអង្គភាពប្រឆាំងអំពើពុករលួយហើយ។ តាមរយៈថវិកាឯករាជ្យរបស់ស្ថាប័នប្រឆាំងអំពើពុករលួយ និងឯករាជ្យភាពក្នុងការស៊ើបអង្កេតលើមន្ត្រីជាន់ខ្ពស់ ក្នុងរដ្ឋាភិបាលដែលបានប្រព្រឹត្តអំពើពុករលួយ។ លោកសំអាតមានប្រសាសន៍ថា៖ «កាលណាគាត់ (ស្ថាប័នប្រឆាំងអំពើពុករលួយ) ផ្តាច់ថវិកានេះបង្ហាញអំពីឯករាជ្យភាពនៃថវិកាពីគណៈរដ្ឋមន្ត្រីក្នុងការចំណាយថវិកា និងមិនប៉ះពាល់ដល់ឥទ្ធិពលផ្សេងៗដែរ»។ លោកអ៊ំ សំអាត បានបន្ថែមថា វាជាប្រសិទ្ធិការងាររបស់ស្ថាប័នប្រឆាំងអំពើពុករលួយមែន ប៉ុន្តែវាអាស្រ័យទៅលើឆន្ទៈនៃការអនុវត្តច្បាប់ប្រឆាំងអំពើពុករលួយរបស់មន្ត្រីអនុវត្តន៏ច្បាប់។ «វាជាការល្អក្នុងការផ្តល់អំណាចដល់ប្រធានអង្គភាពប្រឆាំងអំពើពុករលួយ ប៉ុន្តែយើងសុំធ្វើយ៉ាងណាប្រព្រឹត្តទៅដោយតម្លាភាព និងយុត្តិធម៌។ បើយើងបានអំណាចប៉ុន្តែដំណើរការមិនតម្លាភាព និងយុត្តិធម៌ អាចប៉ះពាល់ដល់សិទ្ធិសេរីភាពបុគ្គល»។ លោកឱម យិនទៀង ប្រធានអង្គភាពប្រឆាំងអំពើពុករលួយបានថ្លែងនៅក្នុងសម័យប្រជុំរដ្ឋសភាថា អង្គភាពប្រឆាំងអំពើពុករលួយខិតខំបង្ការមិនឱ្យមន្ត្រីរបស់ខ្លួនទៅប្រព្រឹត្តពុករលួយ ដែលអាចគ្រោះ ថ្នាក់ធ្ងន់ធ្ងរ ហើយគិតពីគណេយ្យភាព សមត្ថភាព ប្រាក់ខែសមរម្យ វិជ្ជាជីវៈ និងមនសិការបស់មន្ត្រី ប្រឆាំងអំពើពុករលួយ ក្នុងការប្រយុទ្ធប្រឆាំងអំពើពុករលួយឱ្យមានប្រសិទ្ធិភាព៕ This posting includes an audio/video/photo media file: Download Now |
| កម្ពុជាបន្ទោសថៃថាមិនបំពេញកាត្វកិច្ចអន្តរជាតិរឿងព្រំដែន Posted: 01 Apr 2011 02:16 PM PDT ក្រោយពីការពន្យាពេលដ៏យូររបស់ថៃក្នុងការអនុម័តកំណត់ហេតុកិច្ចប្រជុំទាំងបីស្តីពីបញ្ហាព្រំដែនដែលគណៈកម្មការទាំងពីរប្រទេសបានព្រមព្រៀងគ្នា ក្រុមមន្ត្រីកម្ពុជាបានរិះគន់រដ្ឋាភិបាលថៃបច្ចុប្បន្នថា មិនបានបំពេញកាត្វកិច្ចអន្តរជាតិ ដែលនេះជាការបន្ថែមលើការទម្លាក់ការទទួលខុសត្រូវរឿងបន្តជម្លោះព្រំដែននេះទៅលើរដ្ឋាភិបាលថៃបច្ចុប្បន្នថាខ្វះឆន្ទៈរឿងបញ្ចប់ជម្លោះ។ អ្នកនយោបាយនិងចលនាជាតិនិយមក្នុងប្រទេសថៃមួយចំនួនត្រូវគេរាយការណ៍មកថា កំពុងទាមទារឲ្យសភា និងអង្គការនីតិប្បញ្ញត្តិដទៃទៀតមានការត្រួតពិនិត្យមើលថាតើកិច្ចព្រមព្រៀងនិងអនុស្សារណៈនៃការយោគយល់គ្នាឬ MOU ថៃនិងកម្ពុជាកាលពីឆ្នាំ២០០០គួរលុបចោលឬយ៉ាងណា។ ក្រុមចលនាជាតិនិយមថៃ បានបដិសេធមិនទទួលស្គាល់ផែនទី ឆ្នាំ១៩០៤និងឆ្នាំ១៩០៧ បារាំងសៀមទេ ដែលពួកគេបានចាត់ទុកថាផែនទីនោះធ្វើឡើងពេលប្រទេសសៀមដែលប្តូរឈ្មោះមកថៃបច្ចុប្បន្ន ស្ថិតក្រោមអាណានិគមនិងសម្ពាធបរទេស ហើយនឹងនាំឲ្យបាត់បង់ទឹកដីថៃបើប្រើផែនទីនោះ។ ការទាមទារដូច្នេះបានកើតឡើងបន្ទាប់ពីរដ្ឋាភិបាលថៃបានព្រមានម្តងដើម្បីលុបចោលកិច្ចព្រមព្រៀង ឬ MOU នានាពេលថៃមានវិបត្តិការទូតធ្ងន់ធ្ងរជាមួយកម្ពុជា ហើយនឹងកើតឡើងក្រោយពីកម្ពុជាបានដាក់ប្រាសាទព្រះវិហាររបស់ខ្លួនចូលក្នុងបញ្ជីសម្បត្តិបេតិកភណ្ឌពិភពលោកកាលពីឆ្នាំ២០០៨ ដែលថៃជំទាស់ជាពិសេសដីក្បែរបរិវេណប្រាសាទ។ លោក ផៃ ស៊ីផានអ្នកនាំពាក្យទីស្តីការគណៈរដ្ឋមន្ត្រីបានថ្លែងថាការពន្យាពេលដ៏យូរក្នុងការអនុម័តនូវឯកសាព្រំដែនទាំងបី ដោយរុញចុះរុញឡើងនេះ ធ្វើឲ្យកើតជាជម្លោះប្រដាប់អាវុធ ភាពតានតឹងតាមព្រំដែនរវាងប្រទេសទាំងពីរហើយ នឹងបង្កឲ្យមានការខាតបង់ពេលវេលាផងដែរ ដោយសារអ្វីមួយដែលលោក ផៃ ស៊ីផានចាត់ទុកថារដ្ឋទំនើបដូចជាប្រទេសថៃមិនបានសម្រេចកិច្ចការ។ «ប៉ុន្តែយើងឃើញថារដ្ឋទំនើបរបស់ថៃពេលនេះពិបាកនឹងមើល វាស្មុគស្មាញគេអាចថាថៃស្ថិតនៅក្នុងរដ្ឋអាណាធិបតេយ្យមួយក៏អាចថាបានឬមួយក៏ជាថៃបាត់បង់នូវអត្តសញ្ញាណអំណាចនៃការទទួលខុសត្រូវរវាងស្ថាប័នជាតិរបស់ផងគេនេះឯង។ ហើយយើងឃើញថាការខាតពេលឬការពន្យាពេលឬក៏ជាបច្ចេកទេស ក្នុងការចង់បានផលប្រយោជន៍អ្វីមួយនោះគឺមិនមែនឆ្លើយតបនឹងអ្វីដែលជាប្រក្រតីភាពនៃការងាររដ្ឋទំនើប»។ ឯកសារព្រំដែនចំនួនបីដែលគណៈកម្មការចម្រុះព្រំដែនទាំងពីរប្រទេសបានព្រមព្រៀងគ្នាក្នុងការរៀបចំនីតិវិធីនោះត្រូវគេរាយការណ៍មកថាដើម្បីបោះបង្គោលនៅសេសសល់ជាមួយថៃតាមព្រំដែនដែលមានចំងាយជាង ៨០០គ.ម ដើម្បីបញ្ចប់ជម្លោះព្រំដែនរវាងប្រទេសទាំងពីរ ក៏ប៉ុន្តែចាប់តាំងពីឆ្នាំ២០០៨ដែលមានកំណត់ហេតុព្រំដែនទាំងបីប្រទេសថៃត្រូវគេមើលឃើញថាបានខកខានអនុម័តជាច្រើនលើកនៅសភាដោយសារ តែប្រទេសថៃត្រូវគេដឹងថាមិនចង់ទទួលស្គាល់នូវឯកសារផែនទីនិងកិច្ចព្រមព្រៀងមួយចំនួនដែលរដ្ឋាភិបាលថៃមុនៗបានចុះហត្ថលេខា និងព្រមព្រៀងគ្នាជាមួយកម្ពុជា។ លោក ផៃ ស៊ីផានបានអះអាងថាការចង់បង្ហាញពីការអនុវត្តគោលការណ៍ជារដ្ឋទំនើបមួយតាមរយៈការពិភាក្សាគ្នាក្នុងសភា និងស្ថាប័នឯទៀតដោយមិនព្រមអនុម័តនោះ ជាការសោកស្តាយ។ «ក៏ប៉ុន្តែអ្វីដែលយើងឃើញគឺជាការសោកស្តាយ ហើយដែលជាឧទាហរណ៍ អាក្រក់ សម្រាប់ថៃជាកូនជាចៅជំនាន់ក្រោយ តើទំនុកចិត្តរបស់អន្តរជាតិចំពោះប្រជាជាតិថៃយ៉ាងណា។ អាហ្នឹងជាសញ្ញាសួររបស់យើងទាំងអស់គ្នាតែទោះជាយ៉ាងណាយើងនៅតែប្រកាន់ជំហរមួយគឺជំហរដែលហៅថាស៊ីវិល័យ មិនរំលោភលូកលាន់ទៅក្នុងកិច្ចការផ្ទៃក្នុងរបស់ថៃ»។ លោក កុយ គួងអ្នកនាំពាក្យក្រសួងការបរទេសកម្ពុជាបានចោទប្រកាន់សភាថៃ ថាគ្មានឆន្ទៈ អនុម័តកំណត់ហេតុទាំងបី តែលោកថ្លែងថានេះជាកិច្ចការផ្ទៃក្នុង របស់ថៃដែលលោកមិនអាចធ្វើអត្ថាធិប្បាយលម្អិតទេ។ «កម្ពុជាបានលើកឡើងកន្លងមកហើយថាថៃមិនមានឆន្ទៈពិតប្រាកដ្ឋក្នុងការដោះស្រាយបញ្ហានេះទេ។ ដូច្នេះហើយបានជាកំណត់ហេតុនេះមិនមានឱកាសណាមួយឈានទៅរកការអនុម័តបាននោះ។ ហើយគេគ្រាន់តែជន្លលេងម្តងហើយម្តងទៀត ជន្លលេងថាអនុម័តថ្ងៃនេះថ្ងៃហ្នុះ។ ហើយទីបំផុតគឺមូលហេតុ គឺខ្វះកូរ៉ុមនេះឯង។ ហើយការអនុម័តរហូតមកដល់ពេលនេះ ហើយចេះតែជន្លលេង ហើយចេះតែថាអាចអនុម័តបាននេះ ក៏មិនបានធ្វើឲ្យកម្ពុជាភ្ញាក់ផ្អើលទេ ព្រោះរឿងនេះកម្ពុជាបានស្គាល់ច្បាស់ហើយ»។ ដោយចាត់ទុកថារឿងព្រំដែនពេលនេះជាកិច្ចការសភាហើយលោកមិនផ្តល់អត្ថាធិប្បាយទៅលើការរិះគន់របស់មន្ត្រីកម្ពុជានោះ លោក ផានីតាន់ វឌ្ឍនាយ៉ាកន អ្នកនាំពាក្យរដ្ឋាភិបាលថៃបានបញ្ជាក់ថាតាមច្បាប់រដ្ឋធម្មនុញរបស់ថៃកិច្ចព្រម ព្រៀង និងរាល់ឯកសារដែលរដ្ឋាភិបាលបានធ្វើត្រូវឆ្លងកាត់សភា។ លោកបញ្ជាក់អះអាងថាចំពោះ កំណត់ហេតុទាំងបីវិញក៏ត្រូវតែរង់ចាំការសម្រេចរបស់ សភាដែរ។ «សភា នឹងដំណើរការពិចារណាយ៉ាងដិតដល់នៅសប្តាហ៍ខាងមុខអំពីបញ្ហានេះ ដូច្នេះយើងមិនទស្សន៍ទាយបានទេ»។ តែលោក វឌ្ឍនាយ៉ាកន បានបង្ហាញពីសុទិដ្ឋិនិយមរបស់លោកនៅពេលសភា ត្រូវ បើកកិច្ចពិភាក្សាដេញដោលអំពីកំណត់ហេតុព្រំដែននៅថ្ងៃទី៥មេសាខាងមុខ ដោយអះអាងថា៖ «ក៏ប៉ុន្តែយើងសង្ឃឹមថាសភា សមាជិកសភានឹងមានឱកាសដើម្បីពិភាក្សាដេញដោលរឿងនេះ ហើយនឹងបោះឆ្នោតផ្តល់ការយល់ព្រមអំពីរឿងនេះ»។ លោក បណ្ឌិត ឡៅ ម៉ុងហៃអតីតអ្នកស្រាវជា្រវជាន់ខ្ពស់នៃអង្គការសិទ្ធិមនុស្ស អាស៊ីដែលចូលនិវត្តន៍ មិនចាត់ទុកថាការនៅបន្តជជែកដេញដោលគ្នាក្នុងសភា ថៃជាល្បិចកលនយោបាយទេ។ «ជួនកាលគឺគណបក្សសំឡេងភាគច្រើនហ្នឹងគឺមិនមូលមាត់គ្នាក្នុងជួរគណបក្ស ហ្នឹងណាស់បាទ ហើយអាហ្នឹងគឺតែងតែមានអញ្ចឹងក្នុងប្រទេសប្រកាន់លទ្ធិប្រជាធិបតេយ្យរបបសភា គឺអញ្ចឹងមានខ្លះធ្វើដូចជាអ្នកប្រឆាំង អ្នកបះបោរប្រឆាំងនឹងរដ្ឋាភិបាលគេទៅ»។ លោកម៉ុងហៃ បានអះអាងថា នៅប្រទេសប្រកាន់លទ្ធិប្រជាធិបតេយ្យសភានិយមដូចប្រទេសថៃ សភាមានអំណាចគេមិនចេះតែយល់ស្របតាមរដ្ឋាភិបាលនោះទេ ហើយការយល់ព្រមឬយ៉ាងណាគឺក៏អាស្រ័យលើផ្ទៃក្នុងគណបក្សដែលមានសំឡេងច្រើន និងអំណាចរបស់នាយករដ្ឋមន្ត្រី ត្រូវមានឥទ្ធិពលខ្លាំងផងដែរ។ លោក ឡៅ ម៉ុងហៃបានអះអាងថាតាមនីតិវិធី និងរដ្ឋធម្មនុញ្ញនៃប្រទេសកម្ពុជានិងថៃមានលក្ខណៈស្រដៀងគ្នា តែកម្ពុជាពុំសូវផ្តល់សារៈសំខាន់ទៅដល់ការអនុម័តនៅសភាដូចជាកិច្ចព្រមព្រៀងព្រំដែនជាដើម គឺរដ្ឋាភិបាលអត្តនោម័តិខ្លួនឯង។ ប្រទេសថៃនិងកម្ពុជាមានវិវាទជម្លោះព្រំដែនជាមួយគ្នាជាច្រើនទសវត្សរ៍ ដោយសារការចោទប្រកាន់គ្នាទៅវិញទៅមកអំពីការរំលោភបំពានបូរណភាពទឹកដី ដោយពេលខ្លះមានការផ្តាច់ទំនាក់ទំនងការទូត ពេលខ្លះមានការវាយប្រយុទ្ធ គ្នារវាងកងទ័ពទាំងពីរប្រទេស។ ការវាយប្រហារចុងក្រោយជាប់ៗគ្នា រយៈពេល ៤ថ្ងៃកាលពីដើមខែកុម្ភៈបានធ្វើឲ្យមានអន្តរាគមន៍ពីក្រុមប្រឹក្សាសន្តិសុខអ.ស.ប ដើម្បីឲ្យឈប់បាញ់គ្នាជាបន្ទាន់ហើយដោះស្រាយដោយសន្តិវិធីតាមយន្តការ អាស៊ាន។ ប្រទេសថៃធ្លាប់ប្រកាន់យកកិច្ចចរចាទ្វេភាគីនោះ បានយល់ព្រមជាមួយកម្ពុជាថានឹងជួបពិភាក្សានៅឯទីក្រុងបូហ្គ័រប្រទេសឥណ្ឌូនេស៊ី នៅថ្ងៃទី៧ថ្ងៃទី៨ ខែមេសាអំពីបញ្ហាស្វែងរកដំណោះស្រាយព្រំដែននិងពិភាក្សាអំពីការទទួលយកក្រុមអ្នកសង្កេតការណ៍ឥណ្ឌូនេស៊ីមកត្រួតពិនិត្យកិច្ចឈប់បាញ់គ្នា។ កិច្ចប្រជុំនេះត្រូវគេគិតថាជាការបើកផ្លូវឲ្យជំហានថ្មីដើម្បីឲ្យភាគីទាំងពីរ អាចពិភាក្សាអំពីការស្វែងរកដំណោះស្រាយព្រំដែនក្រោមកិច្ចសម្របសម្រួលរបស់ឥណ្ឌូនេស៊ីដែលជាប្រធានអាស៊ានប្តូរវេនឆ្នាំនេះ៕ This posting includes an audio/video/photo media file: Download Now |
| អភិបាលក្រុងបដិសេធសំណើរបស់អ្នកបឹងកក់ Posted: 31 Mar 2011 06:07 PM PDT លោក កែប ជុតិមា អភិបាលរាជធានីភ្នំពេញ បានថ្លែងនៅថ្ងៃពុធនេះថា អាជ្ញាធររាជធានីភ្នំពេញបានបដិសេធដាច់ខាតចំពោះការទាមទារដីទំហំ១៥ហិចតារបស់អ្នកភូមិបឹងកក់សម្រាប់ធ្វើការអភិវឌ្ឍនៅនឹងកន្លែង ប៉ុន្តែលោកបានធានាថា នឹងមិនបណ្តេញអ្នកភូមិបឹងកក់ចេញពីផ្ទះ សម្បែងដោយបង្ខំនោះទេ។ លោកកែប ជុតិមា បានជួបពិភាក្សាដោយផ្ទាល់ជាមួយតំណាងអ្នកភូមិបឹងកក់ចំនួនប្រាំពីរនាក់អស់រយៈពេលប្រមាណពីរម៉ោងអំពីដំណើរការគម្រោងអភិវឌ្ឍតំបន់បឹងកក់នេះ បន្ទាប់ពីមានការតវ៉ាជាបន្តបន្ទាប់។ លោក កែប ជុតិមា បានបញ្ជាក់ប្រាប់តំណាងអ្នកភូមិបឹងកក់ថា លោកមិនអាចផ្តល់ដីទំហំ១៥ហិចតាដល់អ្នកភូមិបឹងកក់តាមការស្នើសុំបានទេ។ នេះបើតាមការអះអាងរបស់តំណាងអ្នកភូមិ។ អ្នកស្រី លី ស្រីមុំ តំណាងអ្នកភូមិបឹងកកម្នាក់់ បានថ្លែងប្រាប់អ្នកភូមិ ក្រោយពីជំនួបជាមួយលោក កែប ជុតិមា ថា បើអ្នកភូមិបឹងកក់ ចង់អភិវឌ្ឍនៅនឹងកន្លែង លោក កែប ជុតិមា នឹងបើកការចរចាជាលើកទី២ជាមួយតំណាងអ្នកភូមិទៀត។ អ្នកស្រី លី ស្រីមុំ បញ្ជាក់ថា៖ «គាត់ (លោកកែប ជុតិមា) បាននិយាយថា សំណើសុំដី១៥ហិចតាមិនឱ្យជាដាច់ខាត។ បើអ្នកភូមិបឹងកក់ចង់បានដី១៥ហិចតាសម្រាប់អភិវឌ្ឍនៅនឹងកន្លែង អ្នកបឹងកក់មិនចាំបាច់ជួបគាត់ទេ។ បើអ្នកភូមិបឹងកក់យកការអភិវឌ្ឍនៅនឹងកន្លែង យើងអាចជួបចរចាគ្នាបន្តទៀត និងរកដំណោះស្រាយអំពីផ្ទះធំផ្ទះតូចត្រូវធ្វើយ៉ាងម៉េច»។ អ្នកស្រី លី ស្រីមុំ បានបន្តថា លោកកែប ជុតិមា នឹងផ្តល់អ្នកបច្ចេកទេសឱ្យមកគូសប្លង់ផ្ទះសម្រាប់អ្នកភូមិបឹងកក់ ហើយចំពោះផ្ទះតូច លោកចង់យកតាមគំរូអភិវឌ្ឍនៅបុរីកីឡា និងចំពោះផ្ទះធំ លោកចង់កសាងជារបៀបផ្ទះល្វែងដោយសល់ដីបន្តិចបន្តួច។ អ្នកស្រីបន្តថា៖ «គាត់ (លោកកែប ជុតិមា) អត់មានដេញ និងបង្ខំឱ្យបងប្អូនចាកចេញទេ។ ផ្ទះនៅលើគោក គាត់មិនទាន់មានគោលការណ៍បណ្តេញបងប្អូនចេញពីលំនៅដ្ឋានទេ»។ អ្នកភូមិបឹងកក់ច្រើនរយនាក់បានមកប្រមូលផ្តុំគ្នាស្តាប់លទ្ធផលនៃការពិភាក្សា បាននិយាយថាពួកគាត់ចង់បានផ្ទះផ្ទាល់នឹងដីសម្រាប់ប្រកបមុខរបរចិញ្ចឹមជីវិត និងមិនអាចទទួលយកផ្ទះនៅជាន់លើបានទេ។ អ្នកស្រី ម៉ីយ ស៊ីណា អាយុ៥២ឆ្នាំ នៅភូមិ២៤ បាននិយាយថា អ្នកស្រីមិនអាចទទួលយកគំរូអភិវឌ្ឍន៏នៅតំបន់បុរីកីឡាទេ និងត្រូវការតែផ្ទះជាន់ផ្ទាល់នឹងដី។ អ្នកថ្លែងបា្រប់វីអូអេខ្មែរថា៖ «ខ្ញុំយល់ឃើញថា គាត់មិនព្រមដោះស្រាយឲ្យប្រជាជន ព្រោះដី១៥ហិតាមិនមែនជាដីរបស់គាត់ទេ ដីរបស់ប្រជាជនធ្លាប់រស់នៅ២០ទៅ៣០ឆ្នាំមកហើយ។ ហើយគ្រាន់តែប្រជាជនសុំដីកាត់យកតែដី១៥ហិតានេះ គាត់មិនបានសម្រេចឲ្យប្រជាជនតាមសំណូមពររបស់ប្រជាជាន។ ខ្ញុំយល់ឃើញថា គាត់មិនគាំទ្រប្រជាជន គាត់មិនបម្រើឲ្យប្រជាជនទេ»។ ឯអ្នកស្រីតាំង វូចលីម អាយុ៤៥ឆ្នាំ នៅភូមិ១ បានថ្លែងថា អ្នកស្រីត្រូវធ្វើការតស៊ូទាមទារដីទំហំ១៥ហិចតាសម្រាប់អភិវឌ្ឍនៅនឹងកន្លែងជាបន្តទៅទៀត។ អ្នកស្រី ក៏បានប្រាប់វីអូអេខ្មែរដែរថា៖ «អត់គិតពីប្រជាជន គាត់គិតតែប្រយោជន៍ខ្លួនគាត់។ គាត់អត់មានគិតដល់ប្រជាជនផង គិតយ៉ាងម៉េចបើយើងចង់រស់នៅតែខ្លួនគាត់ យើងនាំគ្នាតស៊ូតទៅទៀតទៅទាមទារ១៥ហិតា តទៅទៀតនៅអភិវឌ្ឍកន្លែងខ្លួនឯងអត់ទៅនៅអាបុរីកីឡាដូចគាត់ថាទេ។ អត់យកបានទេ អាចទទួលបានទេពាក្យហ្នឹង»។ នៅក្នុងឆ្នាំ២០០៧ រដ្ឋាភិបាលបានផ្តល់កិច្ចសន្យាជួលរយៈពេល៩៩ឆ្នាំដែលមានតម្លៃទឹកប្រាក់៧៩លានដុល្លាអាមេរិក ទៅឱ្យក្រុមហ៊ុនអភិវឌ្ឍន៍ Shukaku Inc.ធ្វើការអភិវឌ្ឍទីក្រុងទំនើប៕ This posting includes an audio/video/photo media file: Download Now |
| មានការផ្លាស់ប្តូរតិចតួចចំពោះច្បាប់ស្តីពីអង្គការក្រៅរដ្ឋាភិបាលក្រោយពីមានការរិះគន់ Posted: 31 Mar 2011 05:50 PM PDT បណ្តាអង្គការក្រៅរដ្ឋាភិបាលធំៗមួយចំនួន បានបង្ហាញការខកចិត្តយ៉ាងខ្លាំងចំពោះសេចក្តីព្រាងច្បាប់លើកទី២នៃច្បាប់ស្តីពីអង្គការ និងសមាគមក្រៅរដ្ឋាភិបាល ដោយលើកឡើងថា ពួកគេពុំឃើញមានការកែប្រែសំខាន់ណាមួយនៅក្នុងពង្រាងចុងក្រោយដែលរដ្ឋាភិបាលបានបញ្ចេញកាលពីសប្តាហ៍មុននោះទេ។ ការលើកឡើងនេះ បានធ្វើឡើងនៅក្នុងសេចក្តីថ្លែងការណ៍រួមគ្នាមួយរបស់អង្គការក្រៅរដ្ឋាភិបាលចំនួន៣ បន្ទាប់ពីមានកិច្ចប្រជុំរវាងពួកគេជាមួយនឹងរដ្ឋាភិបាលស្តីពីពង្រាងច្បាប់ចុងក្រោយនេះ កាលពីថ្ងៃពុធទី២៩ខែមីនានេះ។ អង្គការក្រៅរដ្ឋាភិបាលទាំងនោះ រួមមានគណៈកម្មាធិការសហប្រតិបត្តិការដើម្បីកម្ពុជា វេទិកានៃអង្គការមិនមែនរដ្ឋាភិបាលស្តីពីកម្ពុជា និង គណៈកម្មាធិការប្រព្រឹត្តិកម្មនៃអង្គការ-សមាគមការពារសិទ្ធិមនុស្សកម្ពុជាឬហៅកាត់ថា CHRAC។ លោក សុខ សំអឿន នាយកប្រតិបត្តិនៃក្រុមអ្នកច្បាប់ការពារសិទ្ធិកម្ពុជា និងជាសមាជិកនៃគណៈកម្មាធិការគ្រប់គ្រង់របស់ CHRAC មានប្រសាសន៍នៅក្នុងសេចក្តីថ្លែងការណ៍រមនោះថា «ភាគច្រើននៃការកែប្រែមានលក្ខណៈតូចតាច និងខកខានមិនបានឆ្លើយតបទៅនឹងកង្វល់ដ៏សំខាន់ដែលអង្គការសង្គមស៊ីវិលបានលើកឡើង។» លោក សុខ សំអឿន បន្ថែមថា «ពង្រាងច្បាប់ថ្មីនេះ មិនបានលើកកម្ពស់សិទ្ធិនិងសេរីភាពនៅក្នុងការបង្កើតសមាគមនិងអង្គការក្រៅរដ្ឋាភិបាលនោះទេ ប៉ុន្តែវាជាការដាក់កំហិតឲ្យអង្គការនិងសមាគមចុះបញ្ជីទៅវិញ។» លោក សុខ សំអឿន មានប្រសាសន៍ថា ការចុះបញ្ជីជាកំហិតដែលអង្គការសង្គមស៊ីវិលបានស្នើឲ្យធ្វើការកែប្រែនោះ បែរជាត្រូវរក្សាទុកដដែលនៅក្នុងពង្រាងលើកទី២នេះ។ លោកសំអឿនបន្តថា៖ «ការចុះបញ្ជីហ្នឹងមិនមែនជាកាតព្វកិច្ចទេ។ នៅក្នុងសេចក្តីព្រាងហ្នឹងនៅក្នុងមាត្រា២ គោលបំណងហ្នឹងក៏គេនិយាយដែរថា ការចុះបញ្ជីហ្នឹងជាសេរីភាព ក៏ប៉ុន្តែ មាត្រាបន្ទាប់មកទៀត គឺបើសិនជាយើងអត់ចុះបញ្ជីទេ អង្គការសមាគមយើងមិនអាចធ្វើសកម្មភាពបានទេ។ ដូច្នេះ វាមិនមែនជាសេរីភាពទេ វាជាកាតព្វកិច្ច។» ពង្រាងទី១នៃច្បាប់ដ៏ចម្រូងចម្រាស់ដែលធ្វើឡើងដោយក្រសួងមហាផ្ទៃនេះ ត្រូវបានចែកចាយដល់អង្គការនិងសមាគមក្រៅរដ្ឋាភិបាលនៅថ្ងៃទី១៥ខែធ្នូឆ្នាំ២០១០ ដើម្បីបើកឱកាសឲ្យមានការពិភាក្សានិងផ្តល់យោបល់បន្ថែមទៅលើពង្រាងច្បាប់នេះ។ ប៉ុន្តែ ពង្រាងច្បាប់នេះ ទទួលរងការរិះគន់យ៉ាងខ្លាំងពីសំណាក់អង្គការនិងសមាគមក្រៅរដ្ឋាភិបាលទាំងជាតិនិងអន្តរជាតិ ដោយពួកគេចាត់ទុកថា ពង្រាងច្បាប់នេះគឺជាការប៉ុនប៉ងរបស់រដ្ឋាភិបាលក្នុងការគ្រប់គ្រងទៅលើអង្គការសង្គមស៊ីវិលនៅក្នុងប្រទេសនេះ។ សេចក្តីថ្លែងការណ៍រួមរបស់អង្គការសង្គមស៊ីវិល បានលើកឡើងដែរថា សេចក្តីព្រាងច្បាប់ថ្មីនេះ ក៏បង្កលក្ខណៈកាន់តែងាយស្រួលសម្រាប់រដ្ឋាភិបាលក្នុងការបិទអង្គការសង្គមស៊ីវិលឬក៏បដិសេធការចុះបញ្ជីរបស់ពួកគេ។ លោក សុខ សំអឿន ពន្យល់ពីការលើកឡើងបែបនេះ៖ «វាអត់មានកំណត់ថាតើចំណុចអីខ្លះដែលអ្នកឯងត្រូវបដិសេធហ្នឹង ក៏អត់មានដែរ ដល់អញ្ចឹងទៅ អំណាចវាស្ថិតនៅលើក្រសួង។ ឧទាហរណ៍ថា អង្គការគាត់ចង់ដាក់លក្ខន្តិកៈមួយនៅក្នុងសកម្មភាពរបស់គាត់ ហើយស្រាប់តែក្រសួងគេថា អត់ព្រមឲ្យដាក់អញ្ចឹង ដល់អញ្ចឹង វាងាយបដិសេធ ងាយឈ្លោះគ្នា»។ របាយការណ៍វិភាគបច្ចុប្បន្នភាពរបស់អង្គការការពារសិទ្ធិមនុស្សលីកាដូ ទៅលើសេចក្តីព្រាងច្បាប់ទី២នៃច្បាប់ស្តីពីសមាគមនិងអង្គការក្រៅរដ្ឋាភិបាល ក៏បានលើកឡើងផងដែរថា «សេចក្តីព្រាងច្បាប់ទី២នេះ នៅតែរក្សាស្មារតីដូចតែពង្រាងទី១ដដែល ហើយនៅក្នុងករណីជាច្រើន ការកែប្រែដែលបានធ្វើនៅក្នុងសេចក្តីព្រាងច្បាប់ទី២នេះ បានធ្វើឲ្យច្បាប់នេះមានលក្ខណៈរិតត្បិតនិងត្រួតត្រាកាន់តែខ្លាំងឡើង»។ សេចក្តីព្រាងច្បាប់នេះតម្រូវឲ្យសមាគមនិងអង្គការក្រៅរដ្ឋាភិបាលធ្វើរបាយការណ៍អំពីផែនការសកម្មភាពនិងហិរញ្ញវត្ថុប្រចាំឆ្នាំរបស់ខ្លួនជូនរដ្ឋាភិបាល។ ការតម្រូវបែបនេះ ត្រូវបានអង្គការសង្គមស៊ីវិល ចាត់ទុកថា ជាការរំលោភឯករាជ្យភាពរបស់ពួកគេ។ លោក ខៀវ សុភ័គ អ្នកនាំពាក្យក្រសួងមហាផ្ទៃ មានប្រសាសន៍ថា ក្រសួងបានធ្វើការកែសម្រួលចំណុចខ្លះនៅក្នុងពង្រាងទី២នៃច្បាប់នេះហើយ ប៉ុន្តែ ចំណុចខ្លះទៀតដូចជាការតម្រូវឲ្យអង្គការនិងសមាគមចុះបញ្ជីជាផ្លូវការនេះ គឺជាការចាំបាច់។ លោកសុភ័ក មានប្រសាសន៍ថា៖ «កុំភ្លេចថា មានសិទ្ធិសេរីភាព ក៏ប៉ុន្តែក៏កុំភ្លេចថា មានកាតព្វកិច្ច។ បើកាតព្វកិច្ចគឺត្រូវតែស្ថិតនៅក្រោមច្បាប់។ បើសិនបើគ្មានច្បាប់គ្រប់គ្រង NGOs គាត់នៅតែជិះសេះលែងដៃបានដូចបច្ចុប្បន្ន។» លោក ខៀវ សុភ័គ មានប្រសាសន៍បន្ថែមថា ដូចគ្នានឹងការទាមទារតម្លាភាពពីរដ្ឋាភិបាលដោយអង្គការនិងសមាគមក្រៅរដ្ឋាភិបាលដែរ អង្គការសង្គមស៊ីវិលខ្លួនឯងក៏គួរតែបង្ហាញតម្លាភាពក្នុងការទទួលថវិកាជំនួយពីបរទេស តាមរយៈការតម្រូវនៅក្នុងច្បាប់នេះ។ យ៉ាងណាក៏ដោយរបាយការណ៍វិភាគរបស់អង្គការលីកាដូ បានផ្តល់អនុសាសន៍ថា «រដ្ឋាភិបាលគួរតែរៀបចំការពិគ្រោះយោបល់ជាសាធារណៈប្រកបដោយអត្ថន័យក្នុងកម្រិតថ្នាក់ជាតិនិងថ្នាក់ខេត្តស្តីពីពង្រាងច្បាប់នេះ ដោយរួមបញ្ចូលផងដែរថាតើច្បាប់បែបនេះគួរមានដែរឬអត់ ហើយប្រសិនបើគួរមាន តើច្បាប់នេះគួរមានការការពារនិងអត្ថប្រយោជន៍អ្វីខ្លះសម្រាប់អង្គការសង្គមស៊ីវិលដែលធ្វើការងារដើម្បីប្រយោជន៍សាធារណៈនោះ»៕ This posting includes an audio/video/photo media file: Download Now |
| គណបក្សប្រឆាំងប្រារព្ធខួបវាយប្រហារគ្រាប់បែក Posted: 31 Mar 2011 05:14 PM PDT យុត្តិធម៌សម្រាប់ជនរងគ្រោះដែលស្លាប់បាត់បង់ជីវិតនៅមិនទាន់ត្រូវបានរកឃើញនៅឡើយ ក្នុងរយៈពេល១៤ឆ្នាំ បន្ទាប់ពីមានការវាយប្រហារដោយគ្រាប់បែកដៃចំនួនបួនគ្រាប់នៅមុខអតីតអគាររដ្ឋសភាជាតិទៅលើហ្វូងបាតុករដែលដឹកនាំដោយលោកសម រង្ស៊ី មេដឹកនាំគណបក្សប្រឆាំង។ លោកសម រង្ស៊ី មេដឹកនាំគណបក្សប្រឆាំងនៅថ្ងៃពុធនេះ បានថ្លែងប្រាប់ក្រុមអ្នកចូលរួមតាមរយៈ សន្និសីទវីដេអូតាមអ៊ីនថឺណិតថា គណបក្សសម រង្ស៊ី ប្តេជ្ញានឹងស្វែងរកយុត្តិធម៌ដល់ជនរងគ្រោះ។ លោកសម រង្ស៊ី បានប្រៀបធៀបការទាមទារយកយុត្តធម៌ចំពោះអ្នកដែលបានស្លាប់បាត់បង់ជីវិត ដោយសារតែការវាយប្រហារដោយគ្រាប់បែកដៃ កាលពីថ្ងៃ៣០ខែមីនាឆ្នាំ១៩៩៧ ទៅនិងការស្លាប់បាត់ បង់ជីវិតរបស់ប្រជាពលរដ្ឋនៅក្នុងរបបខ្មែរក្រហម។ លោកបានមានប្រសាសន៍ទៀតថា សម្រាប់ពួកខ្មែរក្រហមយើងត្រូវការពេលវេលាចំនួនជាង៣០ឆ្នាំដើម្បីនាំយកមេដឹកនាំខ្មែរក្រហមជាន់ខ្ពស់យកមកកាត់ទោស ចំណែកឯការវាយប្រហារដោយគ្រាប់បែកដៃមានអាយុកាលប្រមាណ១៤ឆ្នាំហើយ។ យើងត្រូវការពេលវេលាបន្តទៀតដើម្បីនាំយកជនដៃដល់ទៅផ្តន្ទាទោសតាមច្បាប់។ លោកថ្លែងថា៖ «យើងប្តេជ្ញាចិត្តផ្តល់យុត្តិធម៌ជូនជនរងគ្រោះគឺវែកមុខជនឧក្រិដ្ឋ ជនដៃដល់ ហើយជនដែលបញ្ជានៅពីក្រោយជនដៃដល់។ ដប់បូនឆ្នាំ ការប្តេជ្ញាចិត្តរបស់យើងនៅដដែល»។ គណបក្ស សម រង្ស៊ី ជារៀងរាល់ឆ្នាំបានប្រារព្វវិញ្ញណក្ខន្ឋដល់អ្នកដែលបានស្លាប់បាត់បង់ជីវិត ដោយសារតែការវាយប្រហារដោយគ្រាប់បែកដៃនៅពីមុខអតីតអគាររដ្ឋសភាជាតិ។ នៅក្នុងឆ្នាំនេះ គឺជាខួយលើកទី១៤។ កាលពីថ្ងៃទី៣០ ខែមីនា ឆ្នាំ១៩៩៧ជនមិនស្គាល់មុខ បានធ្វើការវាយប្រហារដោយគ្រាប់បែកដៃ ចំនួនបួនគ្រាប់ទៅលើហ្វូងបាតុករ ដែលដឹកនាំដោយលោកសម រង្ស៊ី នៅពីមុខអតីតអគាររដ្ឋសភាដែល បានបណ្តាលឲ្យមនុស្សចំនួន១៦នាក់បានស្លាប់បាត់បង់ជីវិត និងជាង១០០នាក់ផ្សេងទៀត បានរងរបួស ដោយរាប់បញ្ជូលទាំងពលរដ្ឋអាមេរិកាំងមួយរូប គឺលោករ៉ន អាប់នី អតីតប្រធានវិទ្យាស្ថានសាធារណៈ រដ្ឋអន្តរជាតិ ដែលហៅកាត់ថា IRI។ លោកឧត្តមសេនីយ៍ឯក ខៀវ សុភ័ក្រ អ្នកនាំពាក្យក្រសួងមហាផ្ទៃ បានមានប្រសាសន៍ថា សំណុំ រឿងនេះ មិនទាន់ត្រូវបានបិទនៅឡើយទេ។ លោកបានប្រាប់វីអូអេខ្មែរថា៖ «មិនទាន់ត្រូវបានបញ្ចប់បិទសំណុំរឿងទេ នៅបើកចំហរនៅឡើយ។ ដូចកាលឆ្នាំមុនៗ ដែលយើងបានដឹងទាំងអស់គ្នា ហើយមានលទ្ឋផលយ៉ាងណា គឺយើងស្វែងរកជនល្មើសតាមរូបភាពឃើញហើយសំដៅទៅលើជនសង្ស័យឈ្មោះប្រេស៊ីល»។ លោកចាន់ទី សុភី ដែលប្អូនស្រីរបស់លោកបង្កើតឈ្មោះចាន់ទី ភក្តី អាយុ១៣ឆ្នាំកាលពេលនោះ បានស្លាប់បាត់បង់ជីវិតនៅមុខអតីតអគាររដ្ឋសភាជាតិ បានទាមទារឲ្យអាជ្ញាធររកយុត្តធម៌ដល់ជនរង គ្រោះដែលបានស្លាប់បាត់បង់ជីវិត។ លោកបានប្រាប់វីអូអេខ្មែរថា៖ «ចំពោះទឹកចិត្តខ្ញុំ ចង់ឲ្យរាជរដ្ឋាភិបាលរកមុខឃាតករឲ្យឃើញតែម្តង។ អត់ចង់បានអ្វីទេ ចង់ រកមុខឃាតករដើម្បីជួយសំណងប៉ះប៉ូវដល់រូមខ្ញុំ និងសំណងប្អូនស្រីខ្ញុំដែលស្លាប់ទៅ និងអ្នកដទៃទៀត»។ លោក គង់ គាំ ប្រធានស្តីទីគណបក្សសម រង្ស៊ី បានមានប្រសាសន៍ថា យោងតាមរបាយការណ៍ ស៊ើបអង្គេតរបស់ការិយាល័យស៊ើបអង្គេតសហព័ន្ឋរបស់សហរដ្ឋអាមេរិក ដែលមានឈ្មោះថា FBIបាន ឲ្យដឹងថា កម្លាំងប្រដាប់អាវុធដែលមានវត្តមាននៅជិតកន្លែងកើតហេតុ គឺជាក្រុមអង្គរក្សរបស់លោកនាយករដ្ឋមន្រ្តីហ៊ុន សែន ហើយដែលឃាតករបានគេចខ្លួនទៅទិសដ៏អាថ៌កំបាំង បើទោះបីជា FBI ក៏ មិនអាចរកការពិតនេះបានដែរ៕ This posting includes an audio/video/photo media file: Download Now |
| You are subscribed to email updates from VOA News: ព័ត៌មាន To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
