Koh Santipheap Daily |
- ញឹម ចាន់ថន នៅតែបន្តក្នុងពិភពសិល្បៈចម្រៀងនិងសម្តែង
- សាលាខណ្ឌដូនពេញចុះបិទផ្ទះលក់បាយ និងរៀបចំសណ្តាប់ធ្នាប់ផ្លូវចូលទៅកាន់ខុទ្ទកាល័យនាយករដ្ឋមន្ត្រី
- ជើងខ្លាំងខាងឆក់កាបូបលុយត្រូវកម្លាំងអធិការដ្ឋានខណ្ឌសែនសុខចាប់ដាក់ទ្រុង
- កសិករត្រូវប្រែក្លាយខ្លួនពីកសិករធម្មតាទៅជាកសិករគំរូ និងគ្រូផ្សព្វផ្សាយក្នុងមូលដ្ឋាន
- ឌុចបានប្រកាសទទួលខុសចំពោះការស្លាប់របស់ជនរងគ្រោះ និងបានទម្លាក់កំហុសលើបងធំទី២ នួន ជា
- ចាប់ខ្លួនមន្ត្រីប៉ូលិសព្រហ្មទណ្ឌម្នាក់និងស្ត្រីពីរនាក់សំងំប្រើគ្រឿងញៀន
- ស្អែកនេះវេលារសៀល សម្តេចតេជោហ៊ុន សែន អញ្ជើញទៅប្រកាសទ្រព្យសម្បត្តិនៅអង្គភាពប្រឆាំងអំពើពុករលួយ
- នាងក្រមុំកម្មការិនីរោងចក្រមានគូដណ្តឹងជិតរៀបការហើយចាញ់ល្បិចប្រុសព្រាន២នាក់ចាប់រំលោភរហូតបានសម្រេច
- កងកម្លាំងប្រធានាធិបតីជាប់ឆ្នោតកូតឌីវ័រដណ្តើមយកបានរដ្ឋធានី និងដាក់ឱសានវាទ
- ឃាត់ខ្លួនជនដាណឺម៉ាកម្នាក់សង្ស័យជួញដូរគ្រឿងញៀន
- សំណើរបស់ក្រុមមន្ត្រីថៃសុំចូលសួរសុខទុក្ខវីរ៉ាស៊ុមខ្វាមឃីត និងអ្នកស្រីរ៉ាទ្រី មិនទាន់រួចរាល់
- យុវជនទំនើងបើករថយន្តបុកម៉ូតូ៦គ្រឿង និងរថយន្ត២គ្រឿងត្រូវប្រជាពលរដ្ឋព្រួតវាយ
- ចិនដីគោកបើករថយន្តចាក់គួរជ្រុលទៅបុកកាមរីខ្ទេចមុខ
- ប្រធានាធិបតីទីម័រខាងកើតវិលត្រឡប់បន្សល់ទុកកិច្ចសហប្រតិបត្តិការល្អ និងគាំទ្រកម្ពុជាពេញទំហឹង
- លោកអូបាម៉ា ៖ អាមេរិកនឹងកាត់បន្ថយការនាំប្រេងឆៅចូល
- រដ្ឋមន្ត្រីការបរទេសលីប៊ីរត់ចោលជួរហើយគេចចេញពីប្រទេស
- ក្រុមអាចារ្យវត្តដើររៃអង្គាសប្រាក់គ្មានសណ្តាប់ធ្នាប់ត្រូវបានហាមឃាត់
- កម្លាំងចម្រុះខណ្ឌឫស្សីកែវជិត២០០នាក់កំពុងអនុវត្តសាលដីកាវាយកម្ទេចលំនៅឋាន៤២គ្រួសារ សង់លើដីទំនាស់
- កូនប្រសាប្រុសនិងកូនស្រីចាប់ឪពុកចងដៃចងជើងវាយសន្លប់
- ស្ត្រីមេផ្ទះ២ក្រុមទាស់គ្នាបែកផ្សែង បើកឆាកប្រយុទ្ធផ្អើលប៉ូលិស ព្រោះតែចាញ់ល្បិចលេងបៀ
| ញឹម ចាន់ថន នៅតែបន្តក្នុងពិភពសិល្បៈចម្រៀងនិងសម្តែង Posted: 31 Mar 2011 01:17 AM PDT    រាជធានីភ្នំពេញ ៖ នាងញឹម ចាន់ថន សព្វថ្ងៃក្រៅពីឡើងច្រៀងជាកិត្តិយសលើឆាកប្រគំតន្ត្រីចុងសប្តាហ៍តាមស្ថានីយទូរទស្សន៍នានា ម្តងម្កាល នាងមានហាងលក់សម្លៀកបំពាក់និងផលិតកម្មផលិតចម្រៀងកាយវិការខារ៉ាអូខេផ្ទាល់ខ្លួនមួយ ។ ក្រៅពីនោះនាងឆ្លៀតពេលវេលាដ៏មមាញឹកចេញសម្តែងរឿងភាគឱ្យស្ថានីយទូរទស្សន៍ CTN ។ នាងញឹម ចាន់ថន បានចូលប្រឡូកក្នុងវិស័យសិល្បៈចម្រៀងនិងសម្តែងតាំងពីឆ្នាំ១៩៩៧មក។កាលពីដំបូងនាងគ្រាន់តែជាអ្នកចម្រៀងនៅតាមពិធីមង្គលការនិងនៅតាមភោជនីយដ្ឋាន ប៉ុណ្ណោះ ។ ដោយសារតែនាងមានរូបសម្ផស្សស្រស់ស្អាតនិងអាចច្រៀងបានទាំងបទឌីស្កូញ័រញាក់កន្ទ្រាក់អារម្មណ៍ និងបទមនោសញ្ចេតនាផងនោះ អ្នករៀបចំកម្មវិធីប្រគំតន្ត្រីតាមស្ថានីយទូរទស្សន៍នានាតែងតែផ្តល់កិត្តិយសឱ្យនាងឡើងច្រៀងនិងសម្តែងជាញឹកញាប់ ។ នាងចាន់ថនត្រូវផលិតកម្មជាច្រើនទាំងក្នុងនិងក្រៅប្រទេសហៅឱ្យថតសម្លេងចូលស៊ីឌីនិងសម្តែងកាយវិការខារ៉ាអូខេរហូតមានកេរ្តិ៍ឈ្មោះល្បី ។ នៅឆ្នាំ២០១០នាងចូលរួមសម្តែងរឿង«ល្មមហើយលោកប្តី» ឱ្យស្ថានីយទូរទស្សន៍ប៉ុស្តិ៍លេខ៥ ដែលចាក់ផ្សាយកន្លងមក ។ នាងនិយាយថា ក្រៅពីនេះនាងថតរឿង«សម្រស់ជីវិត » និងបច្ចុប្បន្នកំពុងតែសម្តែងរឿងថ្មីមួយទៀតតែសុំលាក់ចំណងជើង ។ នាងញឹម ចាន់ថន ដែលមានអាយុ៣១ឆ្នាំហើយនោះអះអាងថា ក្រោយពីបែកគូស្នេហ៍ចាស់នាងមិនទាន់មានថ្មីទៀតទេ ។ ដោយជាប់រវល់រកស៊ីផង រវល់ក្នុងវិស័យសិល្បៈផង ដូច្នេះរឿងស្នេហាភ្លេចបាត់ហើយ ។ |
| Posted: 31 Mar 2011 01:12 AM PDT  រាជធានីភ្នំពេញ ៖ គណៈកម្មការចម្រុះខណ្ឌដូនពេញមាននគរបាល ប៉េអឹម និងកម្លាំង សណ្តាប់ធ្នាប់ ដឹកនាំដោយលោកសុខ សម្បត្តិ អភិបាលខណ្ឌ លោកឈឹម ឌីណា នាយករដ្ឋបាលខណ្ឌដូនពេញ បានចុះរៀបចំសណ្តាប់ធ្នាប់ និងបិទផ្ទះលក់បាយនៅចំណុចផ្លូវលេខ២៦៤ ជាផ្លូវចូលទៅកាន់ខុទ្ទកាល័យសម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រី កែងនឹងផ្លូវលេខ១៩ ជាប់ខាងត្បូងរបងវត្តបទុមវតីកែងវិថីព្រះសុរាម្រឹត និងផ្លូវ១៩ សង្កាត់ចតុមុខ កាលពីវេលាម៉ោង១០និង៣០នាទីព្រឹកថ្ងៃទី៣១ មីនា ២០១១ ។ ការរៀបចំសណ្តាប់ធ្នាប់នៅចំណុចខាងលើយ៉ាងប្រញាប់ប្រញាល់នេះ តាមប្រភពព័ត៌មានឱ្យដឹងថា មានបទបញ្ជាពីថ្នាក់ណាមួយ ព្រោះកន្លងមកសាលាខណ្ឌដូនពេញតែងតែណែនាំដល់ម្ចាស់ផ្ទះលក់ទំនិញ និងលក់បាយជាប់របងវត្តបទុមវតីជាច្រើនលើកមកហើយ ជាពិសេសវាបានប៉ះពាល់ដល់ការចេញ-ចូលទៅខុទ្ទកាល័យសម្តេចតេជោហ៊ុន សែន តែម្តង ។ ជាមួយគ្នានេះដែរ សាលាខណ្ឌដូនពេញក៏ដូចជាសាលារាជធានីភ្នំពេញ បានណែនាំដល់ម្ចាស់ផ្ទះលក់សម្ភារចាប់ពីកែងផ្លូវលេខ១៩ និងវិថីព្រះសុរាម្រឹត ឱ្យបញ្ឈប់ធ្វើអាជីវកម្មផងដែរ ។ លោកអភិបាលខណ្ឌដូនពេញបានបញ្ជាក់ថា ផ្ទះលក់បាយចាប់ពីកែងផ្លូវលេខ១៩ រហូតដល់កែងវិថីព្រះសុរាម្រឹត ត្រូវបិទជាស្ថាពរចាប់ពីថ្ងៃនេះទៅ សូម្បីតែហាងខោអាវនៅមុខផ្ទះ និងជាន់លើក៏ហាមឃាត់ដែរ ។ ដោយឡែកនៅចំណុចខាងត្បូងជាប់របងវត្តបទុមវតីផ្លូវលេខ២៦៤ ចូលទៅកាន់ខុទ្ទកាល័យសម្តេចតេជោហ៊ុន សែន កែងនឹងផ្លូវលេខ១៩ ត្រូវបានណែនាំឱ្យរុះរើសំយាបចេញ និងហាមលក់អីវ៉ាន់លើចិញ្ចើមផ្លូវ ។ ការអនុវត្តផែនការរៀបចំសណ្តាប់ធ្នាប់នៅចំណុចខាងលើនេះត្រូវធ្វើជាប្រចាំ ៕ |
| ជើងខ្លាំងខាងឆក់កាបូបលុយត្រូវកម្លាំងអធិការដ្ឋានខណ្ឌសែនសុខចាប់ដាក់ទ្រុង Posted: 31 Mar 2011 01:10 AM PDT  រាជធានីភ្នំពេញ ៖ ជើងខ្លាំងខាងឆក់កាបូបលុយម្នាក់ត្រូវកម្លាំងអធិការដ្ឋានខណ្ឌសែនសុខចាប់ខ្លួនកាលពីវេលាម៉ោង៧និង៣០នាទីយប់ថ្ងៃទី៣០ មីនា ២០១១ លើកំណាត់ផ្លូវលេខ១០៨៦ សង្កាត់ភ្នំពេញថ្មី ខណ្ឌសែនសុខ យកទៅសាកសួរ និងញាត់ទ្រុង។ បើតាមប្រភពពីមន្ត្រីប៉ូលិសបានឱ្យដឹងថា ជនឆក់កាបូបនេះឈ្មោះជឹក សំណាង អាយុ២៤ឆ្នាំ ជាកម្មករសំណង់ មានទីលំនៅសង្កាត់ព្រែកលៀបជិតហាង៩៩៩៩ ពេលធ្វើសកម្មភាពជិះម៉ូតូម៉ាកឌ្រីម C125 ស៊េរី២០១០ មិនស្គាល់ស្លាកលេខ ជិះតែម្នាក់ឯង។ មុនពេលកើតហេតុជើងខ្លាំងខាងឆក់ខ្សែ.កបានបើកម៉ូតូចេញពីផ្សារដីហុយបត់ចូលតាមផ្លូវបេតុង ហៅផ្លូវលេខ១០៨៦ ឃើញម៉ូតូកង់៣ មួយគ្រឿងជិះគ្នា៣នាក់ អ្នកបើកបរប្រុស១នាក់ និងអ្នកជិះជាស្រី២នាក់ និងឃើញកាបូបលុយដែលពួកនារីទាំង២នោះកាន់ ក៏ជិះដេញតាមរហូតទៅដល់កែងផ្លូវលេខ១០៨៦ និងផ្លូវភ្នំពេញ-ហាណូយ ក៏ចាប់ឆក់កាបូបលុយរបស់នាង តែឆក់មិនបាន ត្រូវនារីម្ចាស់កាបូបទាញត្រឡប់មកវិញ ធ្វើឱ្យជនដៃដល់ដួលម៉ូតូ ។ ឃើញដូចនោះនារីម្ចាស់កាបូបក៏ស្រែកឱ្យគេជួយចាប់ជនល្មើស ហើយអ្នកនៅជិតៗនោះក៏ជួយចាប់ប្រគល់ឱ្យសមត្ថកិច្ចចាត់ការតាមច្បាប់។ នារីម្ចាស់កាបូបឈ្មោះទឹម សូរិយា អាយុ៣០ឆ្នាំ ជាកម្មកររោងចក្រកាត់ដេរ ស្នាក់នៅផ្ទះលេខ៩A ផ្លូវ៦១០ សង្កាត់បឹងកក់១ ខណ្ឌទួលគោក ៕ |
| Posted: 31 Mar 2011 12:53 AM PDT   ខេត្តពោធិ៍សាត់ ៖ អនុវត្ដតាមអនុសាសន៍របស់លោកបណ្ឌិត ច័ន្ទ សារុន រដ្ឋមន្ដ្រីក្រសួងកសិកម្ម រុក្ខាប្រមាញ់ និងនេសាទ ក្នុងការចូលរួមចំណែកកាត់បន្ថយភាពក្រីក្ររបស់ប្រជាពលរដ្ឋនៅតាមូលដ្ឋានតាមរយៈការបង្កើតមុខរបរចិញ្ចឹមជីវិតបន្ថែម កាលពីថ្ងៃទី២៩ ខែមីនា ឆ្នាំ២០១១ លោកសេង ស៊ុនហ៊ួត នាយខណ្ឌរដ្ឋបាលជលផលពោធិ៍សាត់ បានដឹកនាំក្រុមការងារចុះតាមដានសកម្មភាពចិញ្ចឹមត្រីជាលក្ខណៈគ្រួសាររបស់ប្រជាពលរដ្ឋនៅឃុំខ្នារទទឹង ស្រុកបាកាន។ បន្ទាប់ពីស្ដាប់របាយការណ៍របស់លោកមេភូមិនូវសកម្មភាព និងលទ្ធផលចិញ្ចឹមត្រី ព្រមទាំងបញ្ហាមួយចំនួនដែលប្រជាពលរដ្ឋជួបប្រទះក្នុងការងារចិញ្ចឹមត្រីជាលក្ខណៈគ្រួសារតាមភូមិនីមួយៗរួចមក លោកសេង ស៊ុនហ៊ួត និងក្រុមការងារបានធ្វើការបកស្រាយនូវចម្ងល់ និងបញ្ហាដែលបងប្អូនប្រជាកសិករជួបប្រទះ ដើម្បីធ្វើការកែលំអការងារចិញ្ចឹមត្រីរបស់ប្រជាពលរដ្ឋក្នុងមូលដ្ឋានឱ្យមានភាពល្អប្រសើរឡើង។ លោកសេង ស៊ុនហ៊ួត បានមានប្រសាសន៍បញ្ជាក់ថា ការងារចិញ្ចឹមត្រីគឺជាការងារថ្មីបំផុតសម្រាប់បងប្អូនប្រជាពលរដ្ឋនៅឃុំខ្នារទទឹង ស្រុកបាកាន បើប្រៀបធៀបទៅនឹងប្រជាពលរដ្ឋរស់នៅក្នុងតំបន់ និងខេត្ដនានា។ ហេតុនេះទាមទារដល់កសិករយើងនូវការព្យាយាមយកចិត្ដទុកដាក់ស្ដាប់ និងកត់ត្រាខ្លឹមសារសំខាន់ៗដែលអ្នកបច្ចេកទេសវារីវប្បកម្មបានបង្ហាត់បង្រៀន ព្រមទាំងយកទៅអនុវត្ដឱ្យបានសមស្របតាមការណែនាំរបស់អ្នកបច្ចេកទេស ដើម្បីឈានទៅសម្រេចបានជោគជ័យ និងលទ្ធផលល្អប្រសើរនាពេលខាងមុខ។ នៅក្នុងឱកាសជួបជាមួយកសិករចិញ្ចឹមត្រីនាឱកាសនោះ លោកសេង ស៊ុនហ៊ួត ក៏បានធ្វើការផ្សព្វផ្សាយដល់កសិករលើការងារកសិកម្មដំណាំស្រូវដោយត្រូវធ្វើការជ្រើសរើសពូជសុទ្ធ ទើបទទួលបានទិន្នផលស្រូវខ្ពស់ ជាពិសេសពូជស្រូវសំខាន់ៗចំនួន១០ ដែលក្រសួងកសិកម្ម រុក្ខាប្រមាញ់ និងនេសាទបានបញ្ចេញមកឱ្យកសិករប្រើប្រាស់ជាផ្លូវការ មានពូជស្រូវស្រាលមិនប្រកាន់រដូវចំនួន៣ គឺពូជសែនពិដោរ ពូជអ៊ីអ៊ែរ៦៦ និងពូជជលសា ពូជស្រូវកណ្ដាល ប្រកាន់រដូវចំនួន៤ គឺពូជផ្ការំដួល ពូជផ្ការំដេង ពូជផ្ការមៀត និងពូជផ្កាច័ន្ទសែនសរ និងពូជស្រូវធ្ងន់ប្រកាន់រដូវចំនួន៣ គឺពូជរាំជ័យ ពូជខា៤ និងពូជខា៦។ ជាមួយនេះដែរ លោកក៏បានធ្វើការអំពាវនាវដល់កសិករទាំងអស់ឱ្យខិតខំយកចិត្ដទុកដាក់លើការងារបង្កបង្កើនផល និងចិញ្ចឹមត្រី ប្រែក្លាយខ្លួនពីកសិករធម្មតាទៅជាកសិករគំរូ និងគ្រូផ្សព្វផ្សាយក្នុងមូលដ្ឋាន ដើម្បីឈានទៅធ្វើការប្រឡងប្រណាំងជាមួយកសិករដទៃទៀតនៅទូទាំងប្រទេសក្នុងសន្និបាតកសិករដែលរៀបចំដោយក្រសួងកសិកម្ម រុក្ខាប្រមាញ់ និងនេសាទរៀងរាល់ឆ្នាំ។ ក្នុងឱកាសសំណេះសំណាលជាមួយកសិករនោះ លោកសេង ស៊ុនហ៊ួត បាននាំយកនូវអំណោយដ៏ថ្លៃថ្លារបស់លោកបណ្ឌិត ច័ន្ទ សារុន រដ្ឋមន្ដ្រីក្រសួងកសិកម្ម រុក្ខាប្រមាញ់ និងនេសាទ ចែកជូនកសិករចូលរួមក្នុងម្នាក់ៗទទួលបានសារុងមួយ៕ |
| Posted: 31 Mar 2011 12:28 AM PDT  រាជធានីភ្នំពេញ ៖ នៅក្នុងសម្តីចុងក្រោយកាលពីថ្ងៃទី៣០ មីនា ២០១១ ឌុចបាននិយាយថា នួន ជា បានប្រាប់គាត់នៅក្នុងសាលាក្តីពេលជួបគ្នាដំបូងថា «យួនវាទិញក្បាលអស់ហើយ យើងកុំភ្លេចធាតុរបស់យើងជាអ្នកស្នេហាជាតិដោយគាត់បានឆ្លៀតឱកាសអូសទាញខ្ញុំតាមទស្សនៈគោលជំហរ»។ ឌុចបាននិយាយទៀតថា គាត់សូមបញ្ជាក់អំពីគោលជំហររបស់គាត់ចំពោះប្រជាជនកម្ពុជា ទាំងអស់ថា «ខ្ញុំនៅតែទទួលខុសត្រូវចំពោះជនរងគ្រោះនៅមន្ទីរ ស.២១ និងទទួលខុសត្រូវផ្នែកផ្លូវចិត្តចំពោះជនរងគ្រោះនៅទូទាំងប្រទេស។ ខ្ញុំនៅតែរក្សាការសុំខមាទោសចំពោះវិញ្ញាណក្ខន្ធជនរងគ្រោះនៅ ស.២១ ចំនួន១២.២៧៣នាក់ដែលបានស្លាប់បាត់បង់ជីវិត ព្រមទាំងសុំគ្រួសារអ្នកទាំងនោះអនុញ្ញាតឲ្យខ្ញុំចូលសុំទោសនៅថ្ងៃណាមួយ»។ ឌុចបានបន្តថា ៖ «សូមឲ្យអតីតយុទ្ធជន និងកម្មាភិបាលជាន់ខ្ពស់របស់ខ្មែរក្រហមទាំងអស់ ទោះបីយ៉ាងណាក៏ដោយត្រូវប្រកាន់គោលជំហរឲ្យរឹងប៉ឹងត្រូវទទួលស្គាល់ថា យើងទាំងអស់គ្នាបានចូលរួមការតស៊ូបដិវត្តន៍សម្រាប់ប្រជាជនកម្ពុជាក៏ពិតមែន ប៉ុន្តែមាគ៌ារបស់កម្ពុជាប្រជាធិបតេយ្យជាមហាឧក្រិដ្ឋដែលបានចម្លងតាមមាគ៌ាបដិវត្តន៍របស់ចិន៤នាក់។ ខ្ញុំយល់ថា បើសិនជាអតីតយុទ្ធជន និងកម្មាភិបាលជាន់ខ្ពស់របស់ខ្មែរក្រហមទាំងអស់យល់ជ្រាបបញ្ហានេះ វាជាអំណោយផលមួយសម្រាប់ការផ្សះផ្សារជាតិ»។ ឌុចបន្តថា ការលើកបញ្ហានេះជូនដល់តុលាការកំណត់ដល់គ្រប់អតីតខ្មែរក្រហមទាំងអស់ទទួលស្គាល់ក្នុងផ្លូវចិត្តថា យើងត្រូវហ៊ានលះបង់អ្វីៗទាំងអស់ដើម្បីជាតិនិងប្រជាជន និងហ៊ានលះបង់ជីវិតហើយ យល់ ថា «បក្សយើងជាបក្សឧក្រិដ្ឋ ព្រោះបក្សយើងអនុវត្តផ្តាច់ការងងឹតងងុលហួសហេតុពេក និងបានប្រើគ្រប់មធ្យោបាយបង្ខំគាបសង្កត់យើងឲ្យអនុវត្ត តែបើមិនអនុវត្តតាមគេនឹងគ្រោះថ្នាក់ដល់ជីវិត ឬចោទថា ប្រឆាំងបក្សប្រឆាំងមាគ៌ា»។ ឌុចបានបន្តថា គាត់មានជំនឿមុតមាំថាសាលាក្តីមានសុភវិនិច្ឆ័យសម្រាប់ប្រជាជនកម្ពុជាទាំងអស់ ទាំងប្រជាជនរងគ្រោះ និងអតីតខ្មែរក្រហម ក្នុងការរៀបចំបញ្ហានេះដើម្បីសុខសន្តិភាពផ្លូវចិត្ត និងផ្លូវកាយ៕ |
| ចាប់ខ្លួនមន្ត្រីប៉ូលិសព្រហ្មទណ្ឌម្នាក់និងស្ត្រីពីរនាក់សំងំប្រើគ្រឿងញៀន Posted: 30 Mar 2011 11:49 PM PDT   ខេត្តសៀមរាប ៖ មន្រីប៉ូលិសបម្រើការនៅការិយាល័យព្រហ្មទណ្ឌកម្រិតធ្ងន់ម្នាក់ និងមនុស្សស្រីពីនាក់ ត្រូវបានសមត្ថកិច្ចនគរបាលការិយាល័យប្រឆាំងការជួញដូរគ្រឿងញៀនធ្វើការឃាត់ខ្លួនកាលពីវេលាម៉ោង១១ និង៣០នាទីយប់ថ្ងៃទី២៩ មីនា ឆ្នាំ២០១១ ខណៈពេលពួកអ្នកទាំងបីរូបនោះកំពុងសំងំប្រើប្រាស់គ្រឿងញៀននៅក្នុងបន្ទប់ផ្ទះសំណាក់យីហោ«សែនសុខ» ស្ថិតក្នុងភូមិត្រញំងសេះ សង្កាត់គោកចក កណ្ដាលក្រុងទេសចរណ៍សៀមរាប។ ស្នងការរងនគរបាលខេត្ដសៀមរាប លោកវរសេនីយឯកអ៊ុំ អមរា ទទួលបន្ទក់បង្គ្រាបបទល្មើស កាលពីរសៀលថ្ងៃទី៣០ មីនានេះបានប្រាប់តាមទូរសព្ទ័ថា មន្ដ្រីប៉ូសិលដែលត្រូវបានចាប់ខ្លួនដោយសាតែប្រើប្រាស់បំពានគ្រឿងញៀននោះ និងត្រូវប្រឈមបណ្ដោញចេញពីក្របខណ្ឌប៉ូលិស ឬចាត់ការទៅតាមផ្លូវច្បាប់ ។ ដោយឡែកនារីវ័យក្មេងទាំងពីនាក់នោះកំពុងតែធ្វើការអបរំបន្ទាប់មកនឹងត្រូវឱ្យអាណាព្យាបាលមកធ្វើយកទៅផ្ទះអបរំបន្ថែម ។ ពាក់ព័ន្ធនឹងការចាប់ខ្លួនអ្នកប្រើប្រាស់គ្រឿងញៀននេះលោកវិរសេនីយនន់ សុផាន្នី នាយការិយាល័យប្រឆាំងការជួញដូរគ្រឿងញៀននៃស្នងការនគរបាលខេត្ដសៀមរាបមិនបានធ្វើការពន្យល់ឱ្យបានស៊ីជំរៅជុំវិញករណីចាប់ខ្លួនមន្ដ្រីប៉ូលិស និងនារីក្មេងទាំងពីរនាក់នោះបានទេកាលពីរសៀលថ្ងៃទី ៣០ នេះ ដោយលោកប្រាបតាមទូរសព្ទ័ថាជាប់រវល់ជាមួយភ្ញៀវ។ តាមការឱ្យដឹងពីសមត្ថកិច្ចជនប្រើប្រាស់គ្រឿងញៀនទាំងបីនាក់នេះមាន១-ឈ្មោះអ.ម.ថ ភេទស្រី អាយុ១៧ឆ្នាំ សង្កាត់ស្វាយដង្គំ ក្រុងសៀមរាប, ២-ឈ្មោះតារាវង្ស ភួងការកេត ភេទស្រី អាយុ១៩ឆ្នាំ រស់នៅភូមិជន្លង់ សង្កាត់សាលាកំរើក ក្រុងសៀមរាប និងទី៣-ឈ្មោះប៉េង គីប៉ូ ភេទប្រុស អាយុ២៨ឆ្នាំ ជាមន្ដ្រីប៉ូលិសការិយាល័យព្រហ្មទណ្ឌកម្រិតធ្ងន់ រស់នៅភូមិគោកថ្មី ឃុំពួក ស្រុកពួក ខេត្ដសៀមរាប។ បើតាមការឱ្យដឹងពីលោកស្នងការរងរូបនេះផ្ទះសំណាក់សុខសាននេះក៏អាចប្រឈមមុខនឹងវិធានការច្បាប់ដែរ ប្រសិនបើសមត្ថកិច្ចរកឃើញថា មានជាប់ពាក់ព័ន្ធនឹងការផ្ដល់ទីតាំងសម្រាប់ប្រើប្រាស់គ្រឿងញៀនក្នុងករណីផ្សេងទៀត។ លោកវិរសេនីយ៍ចៅ សុផល នាយការិយាល័យព្រហ្មទណ្ឌកម្រិតធ្ងន់នៃស្នងការដ្ឋាននគរបាលខេត្ដសៀមរាបបានថ្លែងកាលពីរសៀលថ្ងៃនេះដែរថាៈចំពោះករណីចាប់ខ្លួនមន្ដ្រីថ្នាក់ក្រោមលោកនោះលោកនៅមិនទាន់ដឹងនៅឡើយទេ ព្រោះលោកជាប់ប្រជុំ ។ គួរកត់សំគាល់ផងដែរថា នេះគឺជាករណីលើដំបូងហើយដែលសមត្ថកិច្ចចាប់ខ្លួនមន្ដ្រីនគរបាលពាក់ពន្ធ័ទៅនឹងការប្រើប្រាសគ្រឿងញៀន ខណៈពេលមានសេចក្រីរាយការមកថា មានមន្ដ្រីប៉ូលិសជាច្រើនទៀតបាលកំពង់តែប្រើប្រាស និងចែកចាយគ្រឿងញៀន ក្រោមលេសដាក់នុយ ដើម្បីស្ទូចក្រុមអ្នកប្រើប្រាស និងបណ្ដាយមេខ្លោងចែកចាយ ។ តែក៏មានការសង្ស័យថា ជាការប្រកបរបរខុសច្បាប់នៅក្រោមច្បាប់ |
| Posted: 30 Mar 2011 11:47 PM PDT រាជធានីភ្នំពេញ ៖ សម្តេចនាយករដ្ឋមន្ត្រីហ៊ុន សែន នឹងអញ្ជើញទៅប្រកាសទ្រព្យសម្បត្តិនៅទីស្តីការអង្គភាពប្រឆាំងអំពើពុករលួយនាវេលាម៉ោង៤រសៀលថ្ងៃសុក្រ ទី១ មេសា ២០១១ ស្អែកនេះ ។ នេះបើយោងតាមប្រធានអង្គភាពប្រឆាំងអំពើពុករលួយ លោកឱម យ៉ិនទៀង ដែលថ្លែងប្រាប់កោះសន្តិភាពតាមទូរស័ព្ទនៅព្រឹកថ្ងៃទី៣១ មីនា ។ លោកបង្ហើបឱ្យដឹងថា មកទល់នឹងពេលនេះមានមន្ត្រីជាន់ខ្ពស់រាជរដ្ឋាភិបាល រដ្ឋសភា និងព្រឹទ្ធសភាកម្ពុជាជាច្រើននាក់ហើយបានចូលមកប្រកាសទ្រព្យសម្បត្តិ និងបំណុលរបស់ខ្លួន ។ ក្នុងនោះលោកប្រធានអង្គភាពប្រឆាំងអំពើពុករលួយ ឱម យ៉ិនទៀង បញ្ជាក់ឱ្យដឹងទៀតថា សម្តេចអគ្គមហាពញាចក្រីហេង សំរិន ក៏បានប្រកាសទ្រព្យសម្បត្តិរួចរាល់ហើយដែរ ។ គួរបញ្ជាក់ថា កាលពីពេលថ្មីៗនេះអង្គភាពប្រឆាំងអំពើពុករលួយបានប្រកាសជូនដំណឹងដោយទុកពេលឱ្យមន្ត្រីជាប់កាតព្វកិច្ចប្រកាសទ្រព្យសម្បត្តិ និងបំណុលត្រឹមថ្ងៃទី៧ មេសា ២០១១ ខាងមុខ ក្នុងការមកប្រកាសទ្រព្យសម្បត្តិ និងបំណុលរបស់ខ្លួន ។ សេចក្តីជូនដំណឹងដដែលក៏បានបញ្ជាក់ទៀតថា មន្ត្រីទាំងឡាយណាដែលជាប់កាតព្វកិច្ចត្រូវប្រកាសទ្រព្យសម្បត្តិ និងបំណុល ហើយគេចវេះមិនបានប្រកាស ត្រូវផ្តន្ទាទោសជាប់ពន្ធនាគារពី១ខែទៅ១ឆ្នាំ និងពិន័យជាប្រាក់ពី១សែនរៀលទៅ២លានរៀល ។ សូមបញ្ជាក់ផងដែរថា មកទល់នឹងពេលនេះមានមន្ត្រីរាជការ១ភាគ៤ប៉ុណ្ណោះដែលក្លាហានក្នុងការប្រកាសទ្រព្យសម្បត្តិ និងបំណុល ក្នុងចំណោមមន្ត្រី២ម៉ឺន៥ពាន់នាក់ ដែលជាប់កាតព្វកិច្ចត្រូវប្រកាសទ្រព្យសម្បត្តិ និងបំណុល ។ គួរបញ្ជាក់ដែរថា មន្ត្រីដែលជាប់កាតព្វកិច្ចត្រូវប្រកាសទ្រព្យសម្បត្តិ និងបំណុល គឺមន្ត្រីរាជការស៊ីវិល ដែលមានឋានៈចាប់ពីប្រធាននាយកដ្ឋាន និងមន្ត្រីយោធា នគរបាល ដែលមានឋានន្តរស័ក្តិចាប់ពីវរសេនីយ៍ឯកឡើងទៅ មន្ត្រីដែលមានអាណត្តិជ្រើសតាំងដូចជាក្រុមប្រឹក្សាឃុំ-សង្កាត់ ស្រុក ខណ្ឌ ខេត្ត-រាជធានី សមាជិករដ្ឋសភា សមាជិកព្រឹទ្ធសភា សមាជិករាជរដ្ឋាភិបាល ចៅក្រមអាសនៈ ចៅក្រមអយ្យការ សារការី ក្រឡាបញ្ជី និងអាជ្ញាសាលា ៕ |
| Posted: 30 Mar 2011 11:25 PM PDT  រាជធានីភ្នំពេញ ៖ ជនសង្ស័យ២នាក់ត្រូវបានកម្លាំងប៉ូលិសព្រហ្មទណ្ឌស្រុកអង្គស្នួលចាប់ខ្លួនប្រគល់ឱ្យប៉ូលិសខណ្ឌដង្កោ ដើម្បីសាកសួរ និងចាត់ការបន្តតាមផ្លូវច្បាប់ បន្ទាប់ពីពួកគេធ្វើសកម្មភាពល្បួង នាងក្រមុំកម្មការិនីរោងចក្រកាត់ដេរម្នាក់នាំយកទៅចាប់រំលោភសេពសន្ថវៈរួមគ្នារហូតបានសម្រេចរៀងៗខ្លួន ព្រមទាំងគំរាមសម្លាប់បើហ៊ានប្រាប់គេ ឬប្តឹងប៉ូលិស មិនតែប៉ុណ្ណោះ ក្រោយរំលោភរួចបានប្លន់យកទូរស័ព្ទដៃរបស់នាងម៉ាកណូគា ១គ្រឿងទៀតផង ។ ហេតុការណ៍នោះបានកើតឡើង កាលពីវេលាម៉ោង៧និង៣០នាទីយប់ថ្ងៃទី២៨ មីនា ២០១១ នៅក្នុងខ្ទមចាំចំការមួយភូមិត្បែងមានជ័យ សង្កាត់ឪឡោក ខណ្ឌដង្កោ ។ លុះរយៈពេល២ថ្ងៃក្រោយមក ទើបប៉ូលិសស្រុកអង្គស្នួលធ្វើការចាប់ខ្លួនជនព្រាននារីប្រគល់ទៅឱ្យប៉ូលិសខណ្ឌដង្កោ ព្រោះក្រោយពេលកើតហេតុនាងរងគ្រោះបានទៅប្តឹងឱ្យប៉ូលិសស្រុកអង្គស្នួលជួយអន្តរាគមន៍ចាប់ជនខាងលើ ។ ជនសង្ស័យទាំង២នាក់នោះម្នាក់ឈ្មោះតុង វាសនា អាយុ២៨ឆ្នាំ និងម្នាក់ទៀតឈ្មោះចេក ហេង អាយុ១៧ឆ្នាំ ជាសិស្សថ្នាក់ទី១០ នៅវិទ្យាល័យហ៊ុន សែន អង្គស្នួល ពួកគេមានទីលំនៅភូមិកណ្តាល ឃុំឆក់ឈើនាង ស្រុកអង្គស្នួល ខេត្តកណ្តាល ។ ចំណែកឯកម្មការិនីរោងចក្រកាត់ដេរស្នាក់នៅផ្ទះជួលភូមិពងទឹក ឃុំបែកចាន ស្រុកអង្គស្នួល ខេត្តកណ្តាល ។ តាមប្រភពព័ត៌មានបានឱ្យដឹងថា ជនសង្ស័យទាំង២នាក់នោះត្រូវប៉ូលិសព្រហ្មទណ្ឌស្រុកអង្គស្នួលចុះទៅចាប់កាលពីវេលាម៉ោង១និង១៥នាទីរសៀលថ្ងៃទី៣០ មីនា ២០១១ នៅផ្ទះរបស់ពួកគេក្នុងភូមិកណ្តាល នោះតែម្តង ដោយប៉ូលិសដកហូតម៉ូតូ១គ្រឿង ម៉ាកគុបជ្រុង C50 ពណ៌ទឹកប៊ិច ដែលពួកគេជិះឌុបនាងក្រមុំនាំទៅរំលោភ ។ នាងក្រមុំរងគ្រោះបានរៀបរាប់ប្រាប់ប៉ូលិសថា នៅមុនពេលកើតហេតុខាងលើ ឈ្មោះចេក ហេង បានអង្វរសុំឱ្យនាងទៅជួបបុរសម្នាក់ឈ្មោះឡុង ដែលជាអតីតសង្សាររបស់នាង បានបែកគ្នាបន្ទាប់ពីនាងមានគូដណ្តឹង ហើយពេលនោះនាងអត់ព្រមទៅជាមួយនោះទេ ។ ប៉ុន្តែឈ្មោះចេក ហេង បានអង្វរសុំឱ្យនាងទៅជួបឈ្មោះឡុង ជាលើកចុងក្រោយ ព្រោះឈ្មោះឡុង បន្ទាប់ពីបែកពីរូបនាងបានយំខ្លាំងណាស់ ។ ដោយសាររូបនាង និងឈ្មោះចេក ហេង ជាមនុស្សស្គាល់គ្នារាប់អានគ្នា ទើបនាងយល់ព្រមទៅជាមួយ ដើម្បីជួបសង្សារចាស់ជាលើកចុងក្រោយ ។ បន្ទាប់ពីនាងយល់ព្រមឈ្មោះចេក ហេង បានហៅឈ្មោះតុង វាសនា ឱ្យយកម៉ូតូជិះឌុបខ្លួន និងនាងចេញទៅ...ដល់ផ្លូវស្ងាត់ពួកគេទាំង២ឈប់ម៉ូតូចាប់អូសនាងចូលក្នុងខ្ទមចំការរួចចាប់រំលោភម្តងម្នាក់ៗរហូតបានសម្រេច៕ |
| កងកម្លាំងប្រធានាធិបតីជាប់ឆ្នោតកូតឌីវ័រដណ្តើមយកបានរដ្ឋធានី និងដាក់ឱសានវាទ Posted: 30 Mar 2011 11:17 PM PDT  កងកម្លាំងរបស់ប្រធានាធិបតីជាប់ឆ្នោតកូតឌីវ័រ លោកអាឡាស សានអ៊ូអាតារ៉ា វាយដណ្តើមត្រួតត្រារដ្ឋធានីរដ្ឋបាលរបស់ប្រទេសគឺទីក្រុងយ៉ាមូស៊ូក្រូ កាលពីថ្ងៃទី៣០ មីនា រួចរំកិល ទៅជិតទីក្រុងអាប៊ីដហ្សាន់ជាទីក្រុងសេដ្ឋកិច្ច និងក្រុងកំពង់ផែសាន់ប៉េដ្រូ ក្នុងក្របខណ្ឌនៃការវាយរុញច្រាន គួរឱ្យភ្ញាក់ផ្អើលសំដៅកំចាត់ប្រធានាធិបតីចប់អាណត្តិលោកឡូរ៉ង់ ហ្សេបាបូ ចេញពីអំណាច ។ ប្រមុខរដ្ឋាភិបាលបង្កើតឡើងដោយលោកអ៊ូអាតារ៉ា លោកហ្គីយ៉ូមសូរ៉ូ ថ្លែងថា លោកហ្សេបាបូ នៅសល់ ពេលតែប៉ុន្មានម៉ោងទៀតប៉ុណ្ណោះ ដើម្បីដកខ្លួនថយដោយសន្តិវិធី បន្ទាប់ពីបរាជ័យនៃការចរចា ដែលធ្វើចាប់តាំងពីច្រើនខែមកហើយ ក្រោយការបោះឆ្នោតប្រធានាធិបតីកាលពីថ្ងៃទី២៨ វិច្ឆិកា កន្លងមកនេះ ។ លោកសូរ៉ូ ថ្លែងតាមវិទ្យុបារាំង RFI ថា «ពុំមានពេលម៉ោងសម្រាប់ធ្វើការចរចា ឬឱ្យមានបទឈប់បាញ់គ្នាមួយឡើយ ។ លោកហ្សេបាបូ នៅមានពេលប៉ុន្មានម៉ោងទៀតប៉ុណ្ណោះ ដើម្បីចាកចេញពីអំណាចដោយសន្តិវិធី ។ នៅក្រុងញូវយ៉កក្រុមប្រឹក្សាសន្តិសុខ អ.ស.ប បានអនុម័តជាឯកច្ឆ័ន្ទ កាលពីថ្ងៃទី៣០ មីនា លើដំណោះស្រាយមួយរៀបរៀងដោយប្រទេសបារាំង ដែលដាក់ទណ្ឌកម្មថ្មីៗទៀត ប្រឆាំងលោកហ្សេបាបូ និងអ្នកនៅជុំវិញលោក។ យោងតាមប្រជាជន និងប្រភពយោធានៅក្រុងយ៉ាមូស៊ូក្រូថា ពួកអ្នកគាំទ្រលោកអ៊ូអាតារ៉ា ដណ្តើមកាន់កាប់រដ្ឋធានីនាពេលរសៀល ។ ព័ត៌មាននេះត្រូវបានអះអាងដោយប្រជាជន និងប្រភពយោធាដទៃៗទៀត ។ ពួកអ្នកគាំទ្រលោកអ៊ូអាតារ៉ា មួយក្រុមទៀតវាយដណ្តើមបានទីក្រុង ស៊ូប្រេ ជាមូលដ្ឋានចុងក្រោយធំមួយនៅតាមផ្លូវទៅកាន់ទីក្រុងកំពង់ផែសាន់ប៉េដ្រូ ៕ |
| ឃាត់ខ្លួនជនដាណឺម៉ាកម្នាក់សង្ស័យជួញដូរគ្រឿងញៀន Posted: 30 Mar 2011 09:12 PM PDT  រាជធានីភ្នំពេញ ៖ គណៈកម្មការចម្រុះដឹកនាំដោយលោកឯក ឆេងហួត ព្រះរាជអាជ្ញារងអមសាលាដំបូងរាជធានីភ្នំពេញ បានចុះធ្វើការត្រួតពិនិត្យបន្ទប់លេខ២០៤ ក្នុងសណ្ឋាគារឡាក់គីរ៉ូ ដែលមានទីតាំងលេខ១២២D ផ្លូវលេខ១១០ សង្កាត់ផ្សារចាស់ ខណ្ឌដូនពេញ កាលពីថ្ងៃទី៣១ មីនា ២០១១ វេលាម៉ោង៩និង៣០នាទីព្រឹកក្រោយពីនគរបាលប៉ុស្តិ៍រដ្ឋបាលផ្សារថ្មីទី៣ ចាប់ខ្លួនបុរសជនជាតិដាណឺម៉ាកម្នាក់ និងស្ត្រីខ្មែរម្នាក់ហើយដកហូតបានគ្រឿងញៀន កាលថ្ងៃពុធ កន្លងមកនេះ ។ មន្ត្រីនគរបាលប៉ុស្តិ៍រដ្ឋបាលផ្សារថ្មីទី៣ បានឱ្យដឹងថា កាលពីថ្ងៃទី៣០ មីនា ២០១១ វេលាម៉ោង៦និង៣០នាទីល្ងាចកម្លាំងនគរបាលប៉ុស្តិ៍រដ្ឋបាលផ្សារថ្មីទី៣ បានឃាត់ខ្លួនជនសង្ស័យជួញដូរគ្រឿងញៀនចំនួន២នាក់ ម្នាក់ឈ្មោះ JESPER LESEN ភេទប្រុស អាយុ៤៣ឆ្នាំ ជនជាតិដាណឺម៉ាក មុខរបរជាងជួសជុលម៉ូតូ ស្នាក់នៅសង្កាត់លេខ២ ខណ្ឌមិត្តភាព ខេត្តព្រះសីហនុ និងស្ត្រីជនជាតិខ្មែរឈ្មោះសំ ស្រីស្រស់ អាយុ២៥ឆ្នាំ មានទីលំនៅសង្កាត់ព្រៃស ខណ្ឌដង្កោ ។ ជនសង្ស័យទាំង២នាក់នោះត្រូវបានឃាត់ខ្លួននៅមុខរង្គសាលអ័ររ៉ែង ផ្លូវលេខ៥១ ភូមិទី១០ សង្កាត់ផ្សារថ្មីទី៣ ខណ្ឌដូនពេញ ហើយសមត្ថកិច្ចឆែកឆេររកឃើញគ្រឿងញៀនមួយចំនួន ។ យោងតាមការសារភាពរបស់ជនសង្ស័យខាងលើនៅព្រឹកថ្ងៃទី៣១ មីនា ២០១១ គណៈកម្មការចម្រុះសាលាខណ្ឌដូនពេញ ដឹកនាំដោយលោកឯក ឆេងហួត ព្រះរាជាអាជ្ញារងអមសាលាដំបូងរាជធានីភ្នំពេញ លោកឯក ឃុនឌឿន អភិបាលរងខណ្ឌដូនពេញ នគរបាលខណ្ឌបានធ្វើការត្រួតពិនិត្យបន្ទប់ស្នាក់នៅជនខាងលើលេខ២០៤ ក្នុងសណ្ឋាគារឡាក់គីរ៉ូ ទីតាំងលេខ១២២D ផ្លូវលេខ១១០ សង្កាត់ផ្សារចាស់ ខណ្ឌដូនពេញ ដើម្បីស្វែងរកវត្ថុតាងពាក់ព័ន្ធការជួញដូរគ្រឿងញៀន ។ សមត្ថកិច្ចបញ្ជាក់ថា នៅក្នុងបន្ទប់ស្នាក់នៅរបស់ជនសង្ស័យជនជាតិដាណឺម៉ាក សមត្ថកិច្ចរកឃើញប្រដាប់ប្រើប្រាស់ថ្នាំញៀន ។ បច្ចុប្បន្នជនសង្ស័យទាំងជនជាតិដាណឺម៉ាក ទាំងស្ត្រីជនជាតិខ្មែរត្រូវបានឃាត់ខ្លួនបណ្តោះអាសន្ននៅអធិការដ្ឋាននគរបាលខណ្ឌដូនពេញ ៕ |
| Posted: 30 Mar 2011 09:11 PM PDT រាជធានីភ្នំពេញ ៖ សំណើរបស់ក្រុមមន្ត្រីថៃ ក្នុងការសុំចូលជួបសួរសុខទុក្ខអ្នកទោសជនជាតិសៀម២នាក់ ដែលកំពុងជាប់ឃុំក្នុងពន្ធនាគារព្រៃស ប្រទេសកម្ពុជា នៅមិនទាន់បានទៅដល់អគ្គនាយកដ្ឋានពន្ធនាគារក្រសួងមហាផ្ទៃនៅឡើយទេ ។ នេះបើយោងតាមការបញ្ជាក់ប្រាប់តាមទូរស័ព្ទពីសំណាក់លោកគុយ ប៊ុនសេន អគ្គនាយកនៃអគ្គនាយកដ្ឋានពន្ធនាគារក្រសួងមហាផ្ទៃ នៅព្រឹកថ្ងៃព្រហស្បតិ៍ ទី៣១ មីនានេះ ។ គួរបញ្ជាក់ថា កាលពីថ្ងៃចន្ទដើមសប្តាហ៍នេះក្រសួងការបរទេសកម្ពុជាបានទទួលលិខិតស្នើសុំរបស់ក្រុមមន្ត្រីថៃមួយក្រុមតាមរយៈស្ថានទូតថៃ ប្រចាំកម្ពុជា ដើម្បីចូលជួបអ្នកទោសសៀម២នាក់ គឺលោកវីរ៉ា ស៊ុមខ្វាមឃីត និងលោកស្រីរ៉ាទ្រី ក្នុងពន្ធនាគារព្រៃស ។ បើតាមលោកកុយ គួង អ្នកនាំពាក្យក្រសួងការបរទេសបានប្រាប់បណ្តាញផ្សព្វផ្សាយក្នុងស្រុកថា សំណើនេះនឹងបញ្ជូនបន្តទៅក្រសួងមហាផ្ទៃដើម្បីសម្រេច ។ ប្រភពព័ត៌មានបានឱ្យដឹងថា ក្រុមមន្ត្រីថៃដែលគ្រោងមកសួរសុខទុក្ខនេះ គឺដឹកនាំដោយលោកផានិក វីគីស្រេត ដែលជាអតីតអ្នកទោសធ្លាប់ជាប់ពន្ធនាគារព្រៃស ពីបទឆ្លងដែនចូលទឹកដីកម្ពុជាដោយខុសច្បាប់កាលពីថ្ងៃទី២៩ ធ្នូ ២០១០ ជាមួយលោកវីរ៉ា ស៊ុមខ្វាមឃីត និងអ្នកស្រីរ៉ាទ្រី ផងដែរ ។ គួរបញ្ជាក់ថា ទណ្ឌិតឈ្មោះវីរ៉ា ស៊ុមខ្វាមឃីត ត្រូវបានសាលាដំបូងរាជធានីភ្នំពេញ សម្រេចផ្តន្ទាទោសដាក់ពន្ធនាគារចំនួន៨ឆ្នាំ ចំណែកលោកស្រីរ៉ាទ្រី ចំនួន៦ឆ្នាំ ពីបទឆ្លងដែនចូលក្នុងទឹកដីកម្ពុជាដោយខុសច្បាប់ក្បែរជំរំយោធា និងបទចោរកម្ម ៕ |
| យុវជនទំនើងបើករថយន្តបុកម៉ូតូ៦គ្រឿង និងរថយន្ត២គ្រឿងត្រូវប្រជាពលរដ្ឋព្រួតវាយ Posted: 30 Mar 2011 08:51 PM PDT    រាជធានីភ្នំពេញ ៖ យុវជនទំនើង២នាក់ក្នុងចំណោមបក្សពួក៥នាក់ ត្រូវបានប្រជាពលរដ្ឋចោមរោមវាយតប់រហូតបែកមុខ បែកមាត់ និងបែកក្បាលហូរឈាម ប្រឡាក់ពេញអាវ ព្រមទាំងវាយកម្ទេចកញ្ចក់រថយន្តបែកខ្ទេចខ្ទី ក្រោយពីយុវជននោះបើករថយន្តម៉ាកកូរ៉ូឡា ពណ៌ស ពាក់ស្លាកលេខ ភ្នំពេញ 2F-3200 ទៅបុកម៉ូតូម៉ាកឃ្លីកមួយគ្រឿងជាប់ក្រោមរថយន្ត តែមិនព្រមឈប់ ព្យាយាមបើករត់បណ្តាលទៅបុកម៉ូតូជាបន្តបន្ទាប់ចំនួន៥គ្រឿង និងរថយន្តស៊េរីទំនើប២គ្រឿងទៀតដែលគេចតស្ងៀម។ ហេតុការណ៍គ្រោះថ្នាក់ចរាចរណ៍រហូតឈានដល់ប្រើអំពើហិង្សានេះបានកើតឡើងនៅចំណុចមុខអាហារដ្ឋានយីហោស្លឹកឈើ កែងផ្លូវលេខ១៩ និង១៧២ ស្ថិតក្នុងសង្កាត់ជ័យជំនះ ខណ្ឌដូនពេញ កាលពីវេលាម៉ោង៥ល្ងាចថ្ងៃទី៣០ មីនា ២០១១ អ្នកបើកបរត្រូវបានឃាត់ខ្លួនប្រគល់ទៅឱ្យនគរបាលការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញចាត់ការតាមច្បាប់ ។ សាក្សីដែលឃើញហេតុការណ៍បាននិយាយឱ្យដឹងថា មុនពេលកើតហេតុរថយន្តកូរ៉ូឡា ពណ៌ស ខាងលើនេះ បើកតាមបណ្តោយផ្លូវលេខ១៩ ឆ្ពោះទៅទិសខាងត្បូង លុះដល់មុខផ្ទះលេខ១១៨ ស្រាប់តែរថយន្តបុកម៉ូតូម៉ាកឃ្លីកចំពីមុខបណ្តាលឱ្យម៉ូតូជាប់ក្រោមរថយន្ត ហើយរថយន្តនោះបានបើកថយក្រោយ ក៏ប៉ះនឹងរថយន្តឡិចស៊ីស ពាក់ស្លាកលេខរដ្ឋសភា និងប៉ះរថយន្តកាមរីបាឡែន ដែលគេចតស្ងៀមនៅលើចិញ្ចើមថ្នល់ ។ ទោះបីជាដឹងថា បុកម៉ូតូ និងរថយន្តរបស់គេក៏ដោយ ក៏យុវជនស្ទាវជាម្ចាស់រថយន្តមិនឈប់ដោះស្រាយនោះទេ បែរជាបន្ថែមល្បឿនបើកទៅមុខទៀតទាំងម៉ូតូជាប់ក្រោមរថយន្តបង្កឱ្យមានការភ្ញាក់ផ្អើល និងបុកម៉ូតូជាបន្តបន្ទាប់អស់៥គ្រឿងបន្ថែមទៀត បើទោះបីជាប្រជាពលរដ្ឋនាំគ្នាស្រែកឱ្យរថយន្តនោះឈប់ក៏ដោយ ក៏គេនៅតែមិនឈប់ ។ ខណៈពេលរថយន្តមកដល់កែងផ្លូវលេខ១៧២ ទល់មុខអាហារដ្ឋានយីហោស្លឹកឈើ រថយន្តបត់ទៅទិសខាងលិច ក៏ត្រូវប្រជាពលរដ្ឋដែលឃើញហេតុការណ៍បាននាំ គ្នាខ្លះយកដុំថ្ម និងខ្លះទៀតលើកផើងផ្កាគប់ទៅលើរថយន្តបង្ក បណ្តាលឱ្យបែកកញ្ចក់រថយន្តទាំងមុខ ទាំងក្រោយ ទើបរថយន្តនោះឈប់ ។ អ្នកបើករថយន្តបង្កមានឈ្មោះរ៉ុង សូសាតូ ភេទប្រុស អាយុ១៨ឆ្នាំ ជាសិស្សវិទ្យាល័យព្រះស៊ីសុវត្ថិ ស្នាក់នៅផ្ទះលេខ៤៥ ផ្លូវលេខ១៥ សង្កាត់ផ្សារកណ្តាលទី២ ខណ្ឌដូនពេញ៕ |
| ចិនដីគោកបើករថយន្តចាក់គួរជ្រុលទៅបុកកាមរីខ្ទេចមុខ Posted: 30 Mar 2011 08:47 PM PDT  រាជធានីភ្នំពេញ ៖ រថយន្តម៉ាកហុងដាចង្កូតស្តាំបើកក្នុងល្បឿនលឿនលុះដល់ចំណុចកែងមហាវិថីព្រះមុនីវង្ស និងវិថីហ្សាលដឺហ្គោល (ភ្លើងស្តុបសណ្ឋាគារស) ស្ថិតក្នុងសង្កាត់អូរឫស្សីទី៤ ខណ្ឌ៧មករា បានចាក់កួរបង្អួតស្រីស្នេហ៍ហើយជ្រុលទៅបុករថយន្តកាមរីគូទស្វិតចំពាក់កណ្តាលរថយន្តកាលពីវេលាម៉ោង២និង១០នាទីរំលងអធ្រាត្រឈានចូលថ្ងៃទី៣១ មីនា ២០១១ ។ នៅក្នុងហេតុការណ៍នេះមិនមានមនុស្សណាម្នាក់ស្លាប់ ឬរងរបួសនោះទេ គ្រាន់តែខូចខាតរថយន្តទាំង២គ្រឿងធ្ងន់ប៉ុណ្ណោះ។ ប្រភពព័ត៌មាននៅកន្លែងកើតហេតុបានឱ្យសមត្ថកិច្ចដឹងថា មុនពេលកើតហេតុមានរថយន្ត២គ្រឿង បើកប្រដេញគ្នាលើកំណាត់មហាវិថីព្រះមុនីវង្ស ឆ្ពោះទៅទិសខាងត្បូង លុះមកដល់កែងវិថីហ្សាលដឺហ្គោល (ភ្លើងស្តុបអតីតសណ្ឋាគារស) ស្ថិតក្នុងសង្កាត់អូរឫស្សីទី៤ ខណ្ឌ៧មករា ស្រាប់តែរថយន្តម៉ាកហុងដាចង្កូតស្តាំ ពាក់ស្លាកលេខ បាត់ដំបង 2A-3817 ទំនងចង់បង្អួតស្រីស្នេហ៍បានចាក់គួរបត់ទៅទិសខាងកើត ស្របពេលនោះមានរថយន្តមួយគ្រឿងទៀតម៉ាកកាមរីគូទស្វិត ពាក់ស្លាកលេខ ភ្នំពេញ 2B-5866 បើកតាមវិថីហ្សាលដឺហ្គោល ទៅទិសខាងកើត បណ្តាលឱ្យបុកចំពាក់កណ្តាលរថយន្តកាមរីលាន់ដូចរន្ទះបាញ់ខែប្រាំង ។ ក្រោយពីរថយន្តទាំង២ចងកំហឹងគ្នាខូចខាតទៅមុខលែងរួច គេឃើញភាគីខាងរថយន្តហុងដា បានបើកទ្វាររថយន្តចេញមកក្រៅមានស្រី មានប្រុស៤-៥នាក់ ជាជនជាតិចិនដីគោកនាំគ្នាស្រែកហ៊ោកញ្ជ្រៀវ តែមិនមានអ្នកណាម្នាក់របួសនោះទេ ទំនងបានពោងការពារសុវត្ថិភាពជួយ រីឯភាគីខាងរថយន្តកាមរីគូទស្វិតវិញមានគ្នា៣-៤នាក់សុទ្ធតែប្រុសៗ ហើយជួបសំណាងល្អក៏មិនមានអ្នករងរបួស សមត្ថកិច្ចជំនាញមិនបានអះអាងថា ភាគីខាងណាខុស ឬត្រូវនោះទេ ក្រោយពីធ្វើការវាស់វែងរួចគ្រាន់តែបញ្ជាក់ថា រថយន្តម៉ាកហុងដាខូចផ្នែកខាងមុខធ្ងន់ និងផ្ទុះពោងការពារសុវត្ថិភាពទាំង២ រីឯរថយន្តកាមរីខូចទ្វារចំហៀងទាំង២។រថយន្តទាំង២គ្រឿងត្រូវបានស្ទូចយកទៅរក្សាទុកនៅការិយាល័យនគរបាលចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញ ៕ |
| Posted: 30 Mar 2011 08:45 PM PDT រាជធានីភ្នំពេញ ៖ ប្រធានាធិបតីនៃសាធារណរដ្ឋប្រជាធិបតេយ្យទីម័រខាងកើត លោកយ៉ូហ្សេ រ៉ាមូស ហ័រតា នឹងវិវត្តន៍ទៅកាន់ប្រទេសទីម័រខាងកើតវិញនៅថ្ងៃទី៣១ មីនា ២០១១ នេះ បន្ទាប់ពីបានបញ្ចប់ដំណើរបំពេញទស្សនកិច្ចផ្លូវរដ្ឋនៅកម្ពុជារយៈពេល៣ថ្ងៃ ដោយចាប់ផ្តើមពីថ្ងៃទី២៩ មីនា នោះរួចមក ។ ដំណើរទស្សនកិច្ចផ្លូវរដ្ឋរបស់ប្រមុខដឹកនាំ ប្រទេសទីម័រខាងកើតនេះ ធ្វើឡើងក្នុងគោលបំណង ដើម្បីរឹតចំណងសាមគ្គីភាព និងកិច្ចសហប្រតិបត្តិការលើគ្រប់វិស័យ និងផ្លាស់ប្តូរបទពិសោធន៍ក្នុងនាមជាប្រទេសស្ថិតនៅក្នុងតំបន់ជាមួយគ្នា ។ នៅក្នុងដំណើរទស្សនកិច្ចនេះដែរ ភាគីទាំង២ក៏បានរកការគាំទ្របេក្ខភាពគ្នាទៅវិញទៅមក ក្នុងនោះ លោកយ៉ូហ្សេ រ៉ាមូស ហ័រតា បានគាំទ្របេក្ខភាពកម្ពុជា ជាសមាជិកមិនអចិន្ត្រៃយ៍របស់ក្រុមប្រឹក្សាសន្តិសុខអង្គការសហប្រជាជាតិសម្រាប់អាណត្តិឆ្នាំ២០១៣ និង២០១៤។ ចំណែកកម្ពុជាក៏បានគាំទ្រទីម័រខាងកើតជាសមាជិកថ្មីទី១១ របស់សមាគមប្រជាជាតិអាស៊ីអាគ្នេយ៍ ហៅកាត់ថា អាស៊ាន ។ ជាមួយគ្នានេះ ភាគីទាំង២ ក៏បានលើកឡើងពីរចនាសម្ព័ន្ធដឹកនាំស្ថានភាពនយោបាយ និងសេដ្ឋកិច្ចប្រាប់គ្នាទៅវិញទៅមក ក្នុងនោះកម្ពុជាក៏បានលើកឡើងផងដែរពីស្ថានភាពយោធានៅតាមព្រំដែនកម្ពុជា-ថៃក៏ដូចជាការផ្ទុះអាវុធដាក់គ្នារវាងកងទ័ពកម្ពុជា-ថៃ នាពេលកន្លងមក ។ គួរបញ្ជាក់ថា នៅក្នុងដំណើរបំពេញទស្សនកិច្ចផ្លូវរដ្ឋរបស់ប្រធានាធិបតីទីម័រខាងកើត ដែលធ្វើឡើងតាមការអញ្ជើញរបស់សម្តេចអគ្គមហាសេនាបតីតេជោហ៊ុន សែន នេះផងដែរ លោកយ៉ូហ្សេ រ៉ាមូស ហ័រតា បានចូលក្រាបបង្គំគាល់ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រកម្ពុជា ចូលជួបសម្តែងការគួរសមដាច់ដោយឡែកពីគ្នាជាមួយសម្តេចអគ្គមហាធម្មពោធិសាល ជា ស៊ីម ប្រធានព្រឹទ្ធសភា សម្តេចអគ្គមហាពញាចក្រី ហេង សំរិន ប្រធានរដ្ឋសភា និងជួបពិភាក្សាការងារជាមួយសម្តេចនាយករដ្ឋមន្ត្រីហ៊ុន សែន ៕ |
| លោកអូបាម៉ា ៖ អាមេរិកនឹងកាត់បន្ថយការនាំប្រេងឆៅចូល Posted: 30 Mar 2011 08:37 PM PDT  ប្រធានាធិបតីសហរដ្ឋអាមេរិក លោកបារ៉ាក់ អូបាម៉ា កាលពីថ្ងៃទី៣០ មីនា បានអំពាវនាវដល់ប្រទេសរបស់លោកឱ្យកាត់បន្ថយការនាំចូលប្រេងឆៅ១ភាគ៣ នៅត្រឹមឆ្នាំ២០២៥ ដើម្បីធានាដល់ការផ្គត់ផ្គង់ថាមពលរបស់ខ្លួននាពេលអនាគត ។ លោកអូបាម៉ា បានទទូចដូច្នេះក្នុងសុន្ទរកថាមួយនៅសាកលវិទ្យាល័យ Geogetwon ក្នុងទីក្រុងវ៉ាស៊ីនតោន ។ លោកប្រធានាធិបតីអូបាម៉ា ថ្លែងថា «ថ្ងៃនេះខ្ញុំចង់ប្រកាសពីទិសដៅថ្មីមួយ ដែលសមហេតុ សមផល ហើយអាចសម្រេចបាន និងចាំបាច់បំផុត ។ នៅពេលខ្ញុំជាប់ឆ្នោតជាប្រធានាធិបតី អាមេរិកបាននាំចូលប្រេងឆៅចំនួន១១លានធុង ក្នុងមួយថ្ងៃ ដូច្នេះរយៈពេលជិតមួយទសវត្សទៀតយើងនឹងកាត់បន្ថយការនាំចូលប្រេង១ភាគ៣ ។ លោកអូបាម៉ា ថ្លែងថា «មធ្យោបាយតែមួយគត់ ដើម្បីផ្គត់ផ្គង់ថាមពលរបស់អាមេរិកគឺការកាត់បន្ថយការពឹងផ្អែករបស់យើងលើការនាំចូលប្រេង» ។ បើនិយាយពីការផ្គត់ផ្គង់កាលពីឆ្នាំ២០១០ កន្លងមក ការផលិតប្រេងរបស់អាមេរិក ឈានដល់កម្រិតខ្ពស់បំផុតចាប់តាំងពីឆ្នាំ២០០៣មក។ រដ្ឋការរបស់លោកអូបាម៉ា កំពុងជំរុញឱ្យមានការរុករកប្រេងនៅក្នុងសមុទ្រ ។ លោកប្រធានាធិបតីអូបាម៉ា ថ្លែងថា «ដើម្បីកាត់បន្ថយការពឹងផ្អែកលើការនាំប្រេងចូលរដ្ឋការរបស់ខ្ញុំកំពុងជំរុញឱ្យមានប្រតិបត្តិការរុករកប្រេងនៅក្នុងសមុទ្រ» ។ លោកអូបាម៉ា គូសបញ្ជាក់ថា សហរដ្ឋអាមេរិកប្រើប្រាស់ប្រហែល២៥ភាគរយនៃប្រេងលើពិភពលោក ។ ជាមួយគ្នានេះ លោកអូបាម៉ា គូសបញ្ជាក់ថា អាមេរិកនឹងបន្តអភិវឌ្ឍន៍ថាមពលនុយក្លេអ៊ែរ បើទោះបីជាមានគ្រោះមហន្តរាយនុយក្លេអ៊ែរកើតឡើងនៅប្រទេសជប៉ុនកាលពីពេលថ្មីៗកន្លងមកក៏ដោយ ៕ |
| រដ្ឋមន្ត្រីការបរទេសលីប៊ីរត់ចោលជួរហើយគេចចេញពីប្រទេស Posted: 30 Mar 2011 08:09 PM PDT  រដ្ឋមន្ត្រីការបរទេសលីប៊ីលោកមូសា គូសា បានសុំលាលែងកាលពីថ្ងៃទី៣០ មីនា ។ យោងតាមមនុស្សជំនិតម្នាក់របស់លោកថា លោកមូសា គូសា បានចាកចេញពីតំណែងដោយសារតែការវាយប្រហាររបស់របបលោកកាដាហ្វីប្រឆាំង ជនស៊ីវិល ។ ចាកចេញទៅកាន់ប្រទេសទុយនីស៊ីដែលលោកទៅដល់ទីនោះកាលពីថ្ងៃទី២៨ មីនា លោកមូសា គូសា បានទៅកាន់ទីក្រុងឡុងដ៍ ក្នុងក្តីសង្ឃឹមថា ស្វែងរកសិទ្ធិជ្រកកោននៅទីនោះ ។ មិត្តរបស់លោកម្នាក់ គឺលោក NOMAN BENOTMAN និយាយថា រដ្ឋមន្ត្រីរូបនេះបានផ្តាច់ ខ្លួនចេញពីរបបលោកកាដាហ្វីហើយ ។ លោកមិនសប្បាយចិត្តសោះ ព្រោះលោកមិនគាំទ្រការវាយប្រហាររបស់រដ្ឋាភិបាលប្រឆាំងជនស៊ីវិល។ រូបលោកសង្ឃឹមនឹងត្រូវគេទទួលដោយល្អនៅក្រុងឡុងដ៍ ។ ការរត់ចោលជួរ និងការគេចខ្លួនរបស់ប្រមុខការទូតលីប៊ី ត្រូវបានអះអាងក្នុងសេចក្តីប្រកាសមួយរបស់ក្រសួងការបរទេសអង់គ្លេសដែលបញ្ជាក់ថា ទីក្រុងឡុងបានលើកទឹកចិត្តដល់បណ្តាមនុស្សនៅជុំវិញលោកកាដាហ្វីឱ្យចាកចេញពីតំណែង ។ សេចក្តីប្រកាសនោះបន្តថា រដ្ឋមន្ត្រីការបរទេសរូបនេះមកដល់ក្រុងឡុងដ៍ដោយចិត្តឯង ។ លោកថ្លែងប្រាប់យើងថា លោកលាលែងចេញពីតំណែងហើយ ៕ |
| ក្រុមអាចារ្យវត្តដើររៃអង្គាសប្រាក់គ្មានសណ្តាប់ធ្នាប់ត្រូវបានហាមឃាត់ Posted: 30 Mar 2011 07:48 PM PDT  ខេត្តព្រះសីហនុ ៖ បុរស២នាក់ក្នុងចំណោម៤នាក់ដែលអះអាងថា ជាគណៈកម្មការអាចារ្យវត្តសូភី នៅភូមិស្រម៉ ឃុំត្រពាំងស្រែ ស្រុកមេសាង ខេត្តព្រៃវែង បានត្រូវមន្ត្រីមន្ទីរធម្មការ ខេត្ត សហការជាមួយកម្លាំងកងរាជអាវុធហត្ថក្រុងព្រះសីហនុឃាត់ខ្លួននាំមកសាកសួរ ទាក់ទិននឹងការដើររៃអង្គាសបច្ច័យនៅខាងមុខរោងចក្រញូវស្តារដែលមានទីតាំងស្ថិតនៅសង្កាត់លេខ១ ក្រុងព្រះសីហនុ ។ មន្ត្រីនៃមន្ទីរធម្មការខេត្តបានឱ្យដឹងថា បុរសទាំង២នាក់ត្រូវបានឃាត់ខ្លួនវេលាម៉ោង១ និង១៤នាទីរសៀលថ្ងៃទី២៨ មីនា ដែលម្នាក់ឈ្មោះចាន់ រ៉ាម៉ន អាយុ៥៤ឆ្នាំ និងម្នាក់ទៀតឈ្មោះកែវ យ៉ឺន អាយុ៤៧ឆ្នាំ ។ ទាំង២នាក់មានទីលំនៅក្នុងភូមិស្រម៉ ឃុំត្រពាំងស្រែជាមួយគ្នា និងអះអាងថា ជាគណៈកម្មការអាចារ្យវត្តសូភីដូចគ្នា ។ មន្ត្រីដដែលបន្តថា មុននឹងឈានដល់ការឃាត់ខ្លួនបុរសទាំង២នាក់មកធ្វើការសាកសួរនេះ គឺពួកគេមានគ្នាចំនួន៤នាក់ដោយមានកង់១គ្រឿង និងមានមីក្រូចងលើកង់ផង បានដើរប្រកូកប្រកាសរៃអង្គាសបច្ច័យ ខណៈពេលកម្មករ កម្មការិនីរោងចក្រញូវស្តារចេញពីធ្វើការ ។ ពេលនោះប្រជាពលរដ្ឋបានរាយការណ៍មកមន្ទីរធម្មការ ទើបលោកកង ឌីណាត ប្រធានមន្ទីរ បានឱ្យមន្ត្រីរបស់មន្ទីរចុះទៅពិនិត្យជាក់ស្តែងសកម្មភាពរបស់បុគ្គលខាងលើនេះថា តើមានច្បាប់អនុញ្ញាតពីមន្ទីរធម្មការដែរឬទេ? ចៀសវាងការដើររៃអង្គាសគ្មានច្បាប់ទម្លាប់។ មន្ត្រីមន្ទីរធម្មការខេត្តដែលចុះទៅឃាត់ខ្លួនបុរសទាំង២នាក់មកសួរនាំបានឱ្យដឹងថា ពួកគេបានបង្ហាញលិខិតមួយច្បាប់ចុះថ្ងៃទី១២ មីនា របស់ចៅអធិការវត្ត សូភី ចាត់តាំងឱ្យពួកគេចំនួន៤នាក់ដែលមាន១-ឈ្មោះកែវ យ៉ឺន ២-ឈ្មោះសន ទូច ៣-ឈ្មោះចាន់ រ៉ាម៉ន និង៤-ឈ្មោះយ៉ាង ណាង ឱ្យចេញទៅដើររៃអង្គាសថវិកាមកកសាងវត្ត ។ ប៉ុន្តែពេលធ្វើដំណើរមកដល់ខេត្តព្រះសីហនុ អ្នកទាំង៤នាក់ខាងលើ មិនបានធ្វើការទំនាក់ទំនង ដើម្បីសុំការអនុញ្ញាតពីព្រះមេគណខេត្ត ឬមន្ទីរធម្មការនិងសាសនាខេត្តឡើយ ដែលអាចចាត់ទុកថា ជាការមិនគោរពច្បាប់ ។ បើទោះជាសកម្មភាពនោះ បម្រើឱ្យវិស័យព្រះពុទ្ធសាសនាក៏ដោយ ក៏ការឆ្លងកាត់ពីស្រុកមួយទៅស្រុកមួយ ពីខេត្តមួយទៅខេត្តមួយទៀតគឺមានថ្នាក់ដឹកនាំមន្ទីរជំនាញពាក់ព័ន្ធរួមទាំងអាជ្ញាធរដែនដីផងដែរ ដែលចាំបាច់ត្រូវធ្វើទំនាក់ទំនងមុននឹងចាប់ផ្តើមសកម្មភាពអ្វីមួយ។ បន្ទាប់ពីធ្វើការសាកសួរអស់រយៈពេលជាង១ម៉ោងរួចមក មន្ត្រីមន្ទីរធម្មការ បានឱ្យធ្វើកិច្ចសន្យាបញ្ឈប់សកម្មភាពរបស់ខ្លួនដើម្បីចៀសវាងការជះឥទ្ធិពលមិនល្អទៅលើវិស័យព្រះពុទ្ធសាសនា ដែលប្រជាពលរដ្ឋគោរពបូជា ៕ |
| Posted: 30 Mar 2011 07:30 PM PDT    រាជធានីភ្នំពេញ ៖ កម្លាំងចម្រុះខណ្ឌឫស្សីកែវប្រមាណជិត២០០នាក់ មានប៉ូលិស ប៉េអឹម ដឹកនាំ ដោយលោកហ៊ឹង ប៊ុនជា ព្រះរាជអាជ្ញារងអមសាលាដំបូងរាជធានីភ្នំពេញ និងមានការចូលរួមពីលោកឃ្លាំង ហួត អភិបាលខណ្ឌឫស្សីកែវ ចុះវាយកម្ទេចរុះរើលំនៅឋានប្រជាពលរដ្ឋ៤២គ្រួសារ កាលពីវេលាម៉ោង៦និង៣០នាទីព្រឹកថ្ងៃទី៣១ មីនា ២០១១ ស្ថិតក្នុងភូមិទួលគោក សង្កាត់ទួលសង្កែ ខណ្ឌឫស្សីកែវ បង្កឱ្យមានការប្រកែកតវ៉ាពាក្យសម្តី និងដុតកង់ឡានបញ្ឈឺចិត្តសមត្ថកិច្ចផងដែរ...ប៉ុន្តែយ៉ាងណាក៏ដោយ ការអនុវត្តសាលដីការុះរើលំនៅឋានរបស់សមត្ថកិច្ចនេះបានប្រព្រឹត្តទៅយ៉ាងម៉ឺងម៉ាត់ និងរលូនផងដែរ ។ ការរុះរើវាយកម្ទេចលំនៅឋាននេះអនុវត្តតាមអំណាចសាលដីកាតុលាការកំពូលចុះថ្ងៃទី២០ វិច្ឆិកា ២០០៧ ដោយមានលោកឃុន ហាំង ទេសរដ្ឋមន្ត្រីទទួលបន្ទុកបេសកកម្មជាចុងបណ្តឹងសាទុក្ខ និងគូទំនាស់លោកមាស សាវឿន អតីតអភិបាលរងខេត្តព្រះវិហារ ឥឡូវកំពុងជាប់ពន្ធនាគារ ។ លំនៅឋានប្រជាពលរដ្ឋទាំង៤២គ្រួសារនេះ សង់លើដីទំនាស់ អូសបន្លាយជិត៥ឆ្នាំមកហើយ ដែលមានផ្ទៃដីទំហំប្រមាណ៧.០០០ម៉ែត្រការ៉េ មានផ្ទះឈើ ផ្ទះថ្ម ផ្ទះវីឡា...។ ព័ត៌មានលម្អិតនឹងផ្សាយជូននៅពេលក្រោយ និងនៅលើទំព័រកាសែតកោះសន្តិភាព. |
| កូនប្រសាប្រុសនិងកូនស្រីចាប់ឪពុកចងដៃចងជើងវាយសន្លប់ Posted: 30 Mar 2011 07:17 PM PDT  ខេត្តស្វាយរៀង ៖ បុរសចំណាស់ជាឪពុកបានរួចផុតពីសេចក្តីស្លាប់ បន្ទាប់ពីត្រូវបុរសជាកូនប្រសានិងកូនស្រីបង្កើតព្រួតគ្នាវាយសម្លាប់តែដោយឃើញសន្លប់ស្តូកស្តឹងលើធរណីលែងកម្រើកស្មានថាស្លាប់ក៏ចាប់អូសពីកន្លែងវាយសម្លាប់ចេញពីភូមិ ហើយត្រូវបានអ្នកស្រុករាយការណ៍ដល់សមត្ថកិច្ចមកធ្វើអន្តរាគមន៍ភ្លាមៗ និងចាប់ខ្លួនបុរសជាកូនប្រសា និងកូនស្រីដៃដល់ ។ នេះជារឿងរ៉ាវគួរឱ្យតក់ស្លុតនិងមិននឹកស្មានដល់ដែលកូនស្រីបង្កើតនិងប្តីជាកូនប្រសាព្រួតគ្នាចាប់ឪពុកចងដៃចងជើងរួចវាយសម្លាប់យ៉ាងសាហាវព្រៃផ្សៃ ធ្វើឱ្យបុរសជាឪពុកបែកគ្រាប់ភ្នែកខាងស្តាំ បែកមាត់ ជាំភ្នែកខាងឆ្វេង ជាំក្បាលហើមពោរ និងដងខ្លួនជាំស្ទើរគ្រប់កន្លែងសន្លប់ស្តូកស្តឹងទាំងដៃជើងជាប់ចំណង ។ លោកអនុសេនីយ៍ត្រី មុំ បូរាណ នាយរងប៉ុស្តិ៍រដ្ឋបាលពោធិរាជ្យ បានឱ្យដឹងថា ជនរងគ្រោះឈ្មោះចាន់ សាលី អាយុ៥៧ឆ្នាំ មានទីលំនៅភូមិព្រៃខ្លា ឃុំពោធិរាជ្យ ស្រុកស្វាយជ្រំំ ត្រូវបានកូនប្រសាប្រុសចិត្តអប្រិយឈ្មោះអ៊ិន ផល្លា អាយុ៤៥ឆ្នាំ និងប្រពន្ធដែលជាកូនបង្កើតឈ្មោះណុប សម្បត្តិ ហៅខ្មៅ អាយុ៣១ឆ្នាំ ចាប់ចងជើងចងដៃ រួចវាយតាមទំនើងចិត្តរហូតសន្លប់និងស្មានថាស្លាប់ក៏អូសចេញទៅដល់ខាងមុខផ្ទះ ចម្ងាយប្រមាណជា១៥ម៉ែត្រ បម្រុងយកទៅសម្លាប់ក្នុងទឹកស្រះ តែសំណាងល្អដែលសមត្ថកិច្ចមកទាន់ពេល កុំអីប្រហែលជាស្លាប់បាត់ទៅហើយ ។ ការវាយសម្លាប់ឪពុកឯងនេះ បានកើតឡើងកាលពីថ្ងៃទី២៩ មីនា វេលាម៉ោង៩យប់ ។ បើតាមអ្នកស្រីឥន ហុន អាយុ៤៧ឆ្នាំ ត្រូវជាប្រពន្ធជនរងគ្រោះឱ្យដឹងថា នៅយប់កើតហេតុ ប្តីរបស់គាត់ដែលជាគ្រូបង្រៀនបានទៅយាមនៅសាលាបឋមសិក្សាពោធិរាជ្យ ពីម៉ោង៥ល្ងាចដល់ម៉ោង៩យប់ លុះពេលចេញពីសាលាត្រឡប់មកផ្ទះវិញ បានដើរកាត់តាមមុខផ្ទះកូនស្រី។ ពេលដើរហួសប្រមាណជា១០ម៉ែត្រ ស្រាប់តែកូនប្រសាឈ្មោះអុិន ផល្លា ស្រែកថា ចោរៗ ពេលនោះគាត់ជាឪពុកក្មេកឆ្លើយថា ចោរ ចោរ ឯណា ប៉ាទេ! ឯកូនស្រីបង្កើតត្រូវជាប្រពន្ធស្រែកថា «ប៉ាឯងឈប់សិន បើមិនមែនចោរ» ។ ពេលនោះ គាត់ក៏ឈប់ រីឯស្ត្រីជាកូនរត់ទៅពាំងពីមុខឪពុក រួចនិយាយថា បើប៉ាឯងមិនមែនចោរឈប់និយាយគ្នាសិន ហើយស្រាប់តែកូនប្រសាវាយមួយព្រនង់ចំភ្នែកខាងស្តាំ បែកឈាមពេញផ្ទៃមុខ បណ្តាលឱ្យដួលសន្លប់នៅនឹងកន្លែង។ អ្នកស្រីបន្តថា ពេលឃើញហេតុការណ៍នោះ គាត់មានការតក់ស្លុតយ៉ាងខ្លាំងក៏រត់ទៅប្តឹងប៉ូលិសប៉ុស្តិ៍រដ្ឋបាលឃុំពោធិរាជ្យ ដើម្បីឱ្យមកជួយធ្វើអន្តរាគមន៍ ឯពីរនាក់ប្តីប្រពន្ធដែលជាកូនបង្កើតនិងកូនប្រសាបានចាប់ចងជើងចងដៃឪពុក ហើយវាយទាត់ធាក់ជាំភ្នែកខាងឆ្វេង ពកក្បាលហើមពោរបែកមាត់ ឈាមហូរតាមមាត់តាមច្រមុះ ដងខ្លួនជាំសុសសាច់ ។ បន្ទាប់មកជនកំណាចពីរនាក់ប្តីប្រពន្ធបានអូសជនរងគ្រោះជាឪពុកចេញពីកន្លែងកើតហេតុមកដល់មុខផ្ទះក៏ប៉ូលិសរត់មកដល់ និងភ្ជង់ចាប់ឃាត់ខ្លួនទាំងពីរនាក់ប្តីប្រពន្ធ រួចជួយកាត់ខ្សែចំណងជនរងគ្រោះនិងហៅរថយន្តសង្គ្រោះមកដឹកយកទៅកាន់មន្ទីរពេទ្យខេត្តដើម្បីសង្គ្រោះ ។ អ្នកស្រីឥន ហុន បន្តទៀតថា រឿងរ៉ាវដែលនាំឱ្យកូនប្រសានិងកូនស្រីព្រួតគ្នាវាយសម្លាប់ឪពុកនេះ គឺដោយសារគំនុំកាលពីខែតុលា ឆ្នាំ២០១០ កូនស្រីនិងកូនប្រសានេះបានប្រកាសលក់ដីភូមិនិងផ្ទះ ពេលនោះឪពុកបានជំទាស់ថា បើលក់ដីភូមិលក់ផ្ទះទៅនៅឯណា ? ម្យ៉ាងទៀតដីនេះគាត់មិនចែកឱ្យទាំងអស់ទេ គឺទុកមួយចំណែក ចែកប្អូនៗ សម្រាប់សង់ផ្ទះនៅពេលរៀបការរួច ហើយបើខ្វះខាតចង់លក់គឺលក់ពាក់កណ្តាលចុះ តែកូនស្រីនិងកូនប្រសាមិនព្រមគឺចង់លក់ទាំងអស់តែម្តង ហើយទៅរស់នៅខាងប្តីឯខេត្តបាត់ដំបង ។ ក្រោយមកទៀត ម្តាយរបស់កូនប្រសាប្រុសបានទិញម៉ាស៊ីនបូមទឹកមានទាំងឌីណាម៉ូ ប្រើភ្លើងអគ្គិសនីផង ដោយផ្តាំផ្ញើឱ្យគាត់ជាដន្លងជួយមើលថែទាំ តែកូនប្រសានេះ បានយកម៉ាស៊ីនបូមទឹកទៅលក់លេងល្បែងអស់រលីង នៅសល់ឌីណាម៉ូនិងខ្សែភ្លើង អំពូលម៉ែត្រ ឪពុកក្មេកដែលជាជនរងគ្រោះបានទៅប្រមូលយកមកលាក់ទុក ព្រោះដន្លងស្រីទូរស័ព្ទពីខេត្តបាត់ដំបងឱ្យយកទុកកុំឱ្យគេយកទៅលក់ទៀត ក៏មានជម្លោះផ្ទុះឡើង ជេរប្រមាថឪពុកកប់ៗមាត់ ។ ពេលនោះឪពុកនិយាយថា បើចង់បានឱ្យទូរស័ព្ទទៅសុំម្តាយឯងទៅ អញខ្លាចម្តាយឯងថ្កោលទោសអញ ហើយតាំងពីពេលនោះមកក៏តមមាត់ឈប់និយាយស្តីរកគ្នា រវាងឪពុកនិងកូនហូតមក លុះនៅយប់កើតហេតុ កូនប្រសាចិត្តអប្រិយ និងប្រពន្ធជាកូនបង្កើត ក៏ព្រួតវាយសម្លាប់ឪពុកដើម្បីយកដីលក់ ។ សូមបញ្ជាក់ថា ជនរងគ្រោះជាគ្រូបង្រៀននេះ មានប្រពន្ធដើមមានកូនស្រី៣នាក់ រៀបការបាន២នាក់នៅសល់ម្នាក់ តែប្រពន្ធដើមបានស្លាប់ជាង២០ឆ្នាំហើយ ។ លុះបាន១០ឆ្នាំក្រោយមក ទើបគាត់មានប្រពន្ធក្រោយមានកូនប្រុស២នាក់ នៅតូចៗ ឯដីស្រែនិងដីភូមិចែកឱ្យកូនដើមអស់ហើយនៅសល់ដីភូមិមួយកន្លែងក្បែរសាលាបឋមសិក្សាពោធិរាជ្យ ទុកសម្រាប់ចែកកូនស្រីម្នាក់ទៀតនៅលីវ បែរជាកូនអប្រិយចង់បានម្នាក់ឯង ក៏ព្រួតគ្នាវាយសម្លាប់ឪពុក ព្រោះយល់ថា ម្តាយក្រោយពិតជាមិនហ៊ានទាមទារកេរម្តាយរបស់ខ្លួនទៀតទេ ៕ |
| ស្ត្រីមេផ្ទះ២ក្រុមទាស់គ្នាបែកផ្សែង បើកឆាកប្រយុទ្ធផ្អើលប៉ូលិស ព្រោះតែចាញ់ល្បិចលេងបៀ Posted: 30 Mar 2011 07:14 PM PDT   រាជធានីភ្នំពេញ ៖ ស្ត្រីមេផ្ទះ២ក្រុមបានវាយតប់គ្នាបណ្តាលឱ្យខ្លះរងរបួសបែកក្បាល និងខ្លះទៀតពកមុខ ពកមាត់ ខៀវភ្នែក ធ្វើឱ្យមានការភ្ញាក់ផ្អើលពេញភូមិ ដែលការវាយតប់គ្នានេះ ត្រូវបានគេដឹងថា ផ្តើមចេញពីរឿងទំនាស់លេងបៀ ។ ពេលនោះ ប៉ូលិសប៉ុសិ៍្តកាកាប ប្រដាប់ដោយកាំភ្លើងស្ទើរគ្រប់ដៃបានចេញទៅអន្តរាគមន៍ចាប់ឃាត់ រួចនាំយកទៅឃុំខ្លួនទាំងសងខាងនៅផ្នែកព្រហ្មទណ្ឌខណ្ឌដង្កោ ។ ហេតុការណ៍នេះបានកើតឡើងកាលពីវេលាម៉ោង៩ និង៣០នាទីព្រឹកថ្ងៃទី៣០ មីនា ឆ្នាំ២០១១ នៅក្នុងភូមិចំការឪឡឹក សង្កាត់កាកាប ខណ្ឌដង្កោ ។ គូទំនាស់ខាងលើ ត្រូវគេដឹងថា ម្ខាងមានគ្នាពីរនាក់ គឺឈ្មោះអៀ ឱ អាយុ៥៥ឆ្នាំ និងឈ្មោះអៀ សារឿន ហៅបារាំង អាយុជាង៣០ឆ្នាំ រងរបួសបែកក្បាល ពួកគេទាំងពីរនាក់ត្រូវជាម្តាយ និងកូន មានទីលំនៅក្នុងភូមិកើតហេតុខាងលើ ។ ចំណែកភាគីម្ខាងទៀតមានតែម្នាក់ឯងឈ្មោះសេម ច្រឹប អាយុ៣១ឆ្នាំ រងរបួសពកមុខ ខៀវជាំភ្នែក និងប៉ោងមាត់មានទីលំនៅក្នុងភូមិជាមួយគ្នា ។ តាមប្រភពព័ត៌មានបានឱ្យដឹងថា កាលពីថ្ងៃទី២៨ មីនា មុនពេលកើតមានការវាយតប់ គ្នានេះ គូភាគីទាំងពីរបានលេងបៀជុំគ្នាដាក់លុយ ខណៈនោះស្ត្រីឈ្មោះអៀ សារឿន ហៅបារាំង បានលេងចាញ់ស្ត្រីឈ្មោះសេម ច្រឹបហើយកើតជាការមួម៉ៅក្តៅក្រហាយ ក៏ផ្ទុះជម្លោះឡើងដោយមានការចោទប្រកាន់គ្នាទៅវិញទៅមកថា លេង ប្រើល្បិច ។ ពេលនោះ ពួកគេបានជេរបញ្ចោរគ្នាមួយប្រាវរួចក៏ស្ងប់ស្ងាត់ទៅវិញ ដោយអ្នកជិតខាងនាំគ្នាទៅឃាត់ ។ប្រភពដដែលបន្តទៀតថា លុះ នៅព្រឹកថ្ងៃទី៣០ មីនា ពួកគេបានជួបមុខគ្នាម្តងទៀត ហើយនិយាយដៀមដាមដាក់គ្នារហូតមាន ទំនាស់វាយតប់គ្នាបណ្តាលឱ្យមានរបួសស្នាម រៀងៗខ្លួនបង្កឱ្យមានការភ្ញាក់ផ្អើលពេញភូមិ ។ ពេលនោះប៉ូលិសប៉ុស្តិ៍កាកាប ៥ទៅ៦នាក់ ប្រដាប់ដោយអាវុធស្ទើរគ្រប់ដៃ បានចុះទៅអន្តរាគមន៍ឃាត់ខ្លួនទាំងអស់គ្នា នាំគ្នាទៅធ្វើការសាកសួរ រួចហើយបញ្ជូនទៅឃុំខ្លួនបណ្តោះអាសន្ន នៅផ្នែកព្រហ្មទណ្ឌខណ្ឌដង្កោ ហើយពួកគេសុទ្ធតែមានរបួសស្នាមរៀងៗខ្លួន៕ |
| You are subscribed to email updates from Koh Santepheap Daily To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
