Koh Santipheap Daily |
- ចាប់ខ្លួនថៅកែបនស្រីតាមពាក្យបណ្តឹងរបស់នារី៣នាក់
- បង្ក្រាបទីតាំងចែកចាយគ្រឿងញៀនក្នុងក្រុងព្រះសីហនុ
- ប្រធានាធិបតីថ្មីភូមាធ្វើសច្ចាប្រណិធានចូលកាន់តំណែង
- គ្រោះទឹកជំនន់នៅខេត្តភាគខាងត្បូងថៃស្លាប់មនុស្ស11នាក់
- សមត្ថកិច្ចបង្ក្រាបឈើគ្រញូងបាន៣៩៦កំណាត់ក្នុងរយៈពេល២ថ្ងៃ
- សិក្ខាសាលាស្តីពីបរិស្ថាន កសិកម្ម និងអភិវឌ្ឍន៍ ៖ តើកម្ពុជាជ្រើសយកជម្រើសណា?
- ផ្លូវជុំវិញផ្សារធំថ្មីត្រូវបានជួសជុលរួច និងកំពុងចាក់អ៊ុតកៅស៊ូ បន្ទាប់ពីតូបក្នុងផ្សារបើកឱ្យដំណើរការ
- បុណ្យខួប១៤ឆ្នាំនៃអ្នកស្លាប់ដោយសារគប់គ្រាប់បែក គណបក្សសម រង្ស៊ី អំពាវនាវរកឃាតក
- ប្រទេសទីម័រខាងកើតគាំទ្របេក្ខភាពកម្ពុជា ជាសមាជិកមិនអចិន្ត្រៃយ៍របស់ក្រុមប្រឹក្សាសន្តិសុខ អ.ស.ប
- តារាចម្រៀងខេមរៈ សិរីមន្ត ទទួលបានមេដាយស្ថាបនាជាតិ
- សមាគមកីឡាប្រដាល់ពិភពលោកដាក់បម្រាម២ឆ្នាំលើមន្រ្តីកីឡាប្រដាល់ ប្រទេសថៃនិងសហព័ន្ធកីឡាប្រដាល់រ៉ូម៉ានីចូលរួមប្រកួតជាអន្តរជាតិ
- សង្វៀនប្រដាល់បាយ័នបន្ថែមថ្ងៃសុក្រទៀតប្រកួតអន្តរជាតិ៤គូបើកឆាក
- តំបន់កូកាស់រុស្ស៊ី ៖ មេដឹកនាំឧទ្ទាមអ៊ិស្លាមអាចត្រូវសម្លាប់
- កីឡាករវ័យក្មេងនីម៉ា គឺជាគ្រាប់ពេជ្ររបស់ប្រេស៊ីល
- ការឆ្លងរាលដាលនៃជម្ងឺកញ្ជ្រិលនៅកុងហ្គោស្លាប់កុមារ106នាក់
- ហាមប្រើរថយន្តនៅទូទាំងអឺរ៉ុបមុនឆ្នាំ2050ដើម្បីកាត់បន្ថយឧស្ម័នកាបូន
- លោកអាឡិចហ្វើគូសុនព្យាករណ៍ថា មានចលាចលក្នុងការប្រកួត FA Cup
- ឈើគ្រញូង១.៦៦៥គីឡូក្រាមត្រូវមេព្រៃនិងប៉ូលិសសេដ្ឋកិច្ចបង្ក្រាប
- សាលាខណ្ឌដូនពេញប្រជុំពង្រឹងកិច្ចការពារប្រជុំកំពូលអាស៊ានឆ្នាំ២០១២
- ឆែកឆេររទះ៣ដែលអូសចេញពីដីសៀមឃើញសាច់ខូចគុណភាពជិតមួយតោន
| ចាប់ខ្លួនថៅកែបនស្រីតាមពាក្យបណ្តឹងរបស់នារី៣នាក់ Posted: 30 Mar 2011 01:03 AM PDT     ក្រុងប៉ោយប៉ែត ៖ ស្ត្រីប្រកបរបរផ្លូវភេទ៣នាក់រត់ទៅប្តឹងការិយាល័យប្រឆាំងការជួញដូរ មនុស្ស និងការពារអនីតិជននៃស្នងការដ្ឋានខេត្តដែលប្រចាំការនៅក្រុងប៉ោយប៉ែតកាលពីវេលាម៉ោង១១ និង៣០នាទីព្រឹកថ្ងៃទី២៩មីនា ថា ពួកនាងត្រូវថៅកែវាយធ្វើបាបនឹងឈើច្រត់ ។ នៅម៉ោង៣ និង៥៧នាទីរសៀលថ្ងៃដដែលប៉ូលិសការិយាល័យប្រឆាំងការជួញដូរមនុស្ស និងការពារអនីតិជននៃស្នងការដ្ឋានខេត្តសហការជាមួយប៉ូលិសអធិការដ្ឋានក្រុងឃាត់ខ្លួនថៅកែបនស្រីនោះ និងឈានទៅបង្ក្រាបទីតាំងបញ្ចាំងវីដេអូអាសអាភាសពេលកំពុងបញ្ចាំងជាក់ស្តែង ដែលទីតាំងនោះមានម្ចាស់តែមួយ ។ ស្ត្រីរកស៊ីផ្លូវភេទទាំង៣នោះ១-ឈ្មោះពៅ នាង អាយុ២៤ឆ្នាំ ២-ឈ្មោះឃុត ស្រី អាយុ២៣ឆ្នាំ និង៣-ឈ្មោះឃុត ខួច អាយុ២១ឆ្នាំ។ នាងពៅ នាង ត្រូវថៅកែបនវាយជាំភ្នែកខាងស្តាំ និងរងរបួសស្មងជើងខាងឆ្វេង ឯនាង២នាក់ទៀតក៏អះអាងថា ត្រូវថៅកែវាយដែរ ។ លោកវរសេនីយ៍ត្រីឮ ចាន់ ដារ៉ា នាយរងការិយាល័យប្រឆាំងការជួញដូរមនុស្ស និងការពារអនីតិជននៃស្នងការដ្ឋាននគរបាលខេត្តបន្ទាយមានជ័យ ដែលដឹកនាំកម្លាំងអនុវត្តផ្ទាល់បានប្រាប់កោះសន្តិភាពថា ទីតាំងបញ្ចាំងវីដេអូក្តៅសាច់គឺថៅកែបនឈ្មោះជុំ រតនា ហៅថូង អាយុ២៩ឆ្នាំ ត្រូវបានឃាត់ខ្លួនតាមពាក្យបណ្តឹងរបស់ស្ត្រីរកស៊ីផ្លូវភេទទាំង៣នាក់ ។ ចំណែកកន្លែងបញ្ចាំងវីដេអូក្តៅសាច់ គឺសមត្ថកិច្ចបង្ក្រាបជាក់ស្តែងក្រោយពីសុំគោលការណ៍ពីព្រះរាជអាជ្ញាធរគឺលោកឡុង ជាប ។ ការបង្ក្រាបទីតាំងបញ្ចាំងវីដេអូក្តៅសាច់នេះដកហូតឌីសអាសអាភាសកំពុងបញ្ចាំងចំនួន១ និងឌីសផ្សេងទៀតជាច្រើន ក្បាលស៊ីឌីចំនួន២ និងទូរទស្សន៍ចំនួន១ ។ លោកនាយរងបន្តថា ការបង្ក្រាបនេះធ្វើឡើងក្រោយពីសុំគោលការណ៍ទៅលោកឧត្តមសេនីយ៍ត្រីស្នងការ និងសុំគោលករណ៍ពីព្រះរាជអាជ្ញារងអមសាលាដំបូង ។ ចំពោះប្រពន្ធថៅកែបនដោយសារមានកូនតូចពុំត្រូវបានឃាត់ខ្លួនទេ ដែលវត្ថុតាង និងថៅកែបន ដែលជាម្ចាស់ទីតាំងបញ្ចាំងវីដេអូអាសអាភាសនោះ មន្ត្រីប៉ូលិសប្រាប់ថា ជាគោលការណ៍ត្រូវបញ្ជូនទៅស្នងការដ្ឋាន ដើម្បីកសាងសំណុំរឿងបញ្ជូនទៅតុលាការ ។ ស្ត្រីប្រកបរបរផ្លូវភេទទាំងនោះជាគោលការណ៍នឹងយកទៅអប់រំ ព្រមទាំងបណ្តុះបណ្តាលវិជ្ជាជីវៈនៅក្នុងមណ្ឌលតាមរយៈមន្ទីរសង្គមកិច្ចខេត្ត ៕ |
| បង្ក្រាបទីតាំងចែកចាយគ្រឿងញៀនក្នុងក្រុងព្រះសីហនុ Posted: 30 Mar 2011 01:02 AM PDT    ខេត្តព្រះសីហនុ ៖ ទីតាំងចែកចាយគ្រឿងញៀនមួយកន្លែងនៅចំណុចភ្នំខៀវ ស្ថិតក្នុងក្រុមទី៣ ភូមិ១ សង្កាត់លេខ២ ក្រុង-ខេត្តព្រះសីហនុ ត្រូវកម្លាំងអធិការដ្ឋានក្រុងព្រះសីហនុ សហការជាមួយអាជ្ញាធរដែនដីគ្រប់ជាន់ថ្នាក់ដែលដឹកនាំដោយលោកជិន សារិន អភិបាលក្រុងព្រះសីហនុ លោកយូ ទិតវឌ្ឍនៈ ព្រះរាជអាជ្ញារងសាលាដំបូងខេត្តព្រះសីហនុ លោកម៉ាន់ តួ អធិការក្រុងព្រះសីហនុ បានចុះធ្វើការបង្ក្រាបយ៉ាងក្តៅគគុកកាលពីវេលាម៉ោង១៧នាថ្ងៃទី២៩ មីនា កន្លងមក។ ក្នុងយុទ្ធនាការបង្ក្រាបទីតាំងចែកចាយគ្រឿង ញៀននេះ លោកជិន សារិន អភិបាលក្រុងព្រះសីហនុ បានឱ្យដឹងថា យុទ្ធនាការនៅថ្ងៃនេះ យើងឃាត់ខ្លួនបានមនុស្សចំនួនម្នាក់ ឈ្មោះង្ខៀង យ៉ាងធូ ភេទប្រុស ជនជាតិវៀតណាម អាយុ៣០ឆ្នាំ មានស្រុកកំណើតនៅប្រទេសវៀតណាម បច្ចុប្បន្នស្នាក់នៅក្រុមទី៣ ភូមិ១ សង្កាត់លេខ២ ក្រុង-ខេត្តព្រះសីហនុ ។ ចំពោះវត្ថុតាងយើងបានរកឃើញថ្នាំញៀនប្រភេទម៉ាទឹកកកចំនួន៥កញ្ចប់តូច ម្សៅពណ៌លឿងចំនួន២កញ្ចប់តូច ដែកកេះសម្រាប់ជក់ថ្នាំញៀនចំនួន៧ថង់តូចៗមួយចំនួន ដប១ ទូរស័ព្ទ១គ្រឿង ម៉ាក V6-90 ប្រាក់ដុល្លារចំនួន៦ដុល្លារ និង១២.៧០០រៀល ។ លោកជិន សារិន បន្តថា លោកនឹងបន្តបង្ក្រាបឱ្យអស់ទីតាំងចែកចាយគ្រឿងញៀនដែលមាននៅលើទឹកដីនៃតំបន់ទេសចរណ៍នេះដើម្បីឆ្លើយតបទៅនឹងអនុសាសន៍ដ៏ថ្លៃថ្លារបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។ ការចុះបង្ក្រាបនេះលោកនឹងធ្វើដូចភ្លៀងរលឹម ដរាបណាលែងមាននៅលើទឹកដីខេត្តព្រះសីហនុ ដ៏ស្រស់ផូរផង់នេះទៀត។ លោកជិន សារិនបន្តទៀតថា ក្នុងនាមលោកជាអភិបាលក្រុង សុំធ្វើការអំពាវនាវដល់ប្រជាពលរដ្ឋ ជាពិសេសប្អូនៗយុវវ័យទាំងអស់ដែលកំពុងឈ្លក់វង្វេងនឹងគ្រឿងញៀន សុំភ្ញាក់រលឹកឡើង បែរមកដើរតាមផ្លូវមួយដ៏ត្រឹមត្រូវដែលសង្គមជាតិក៏ដូចជាមនុស្សជាច្រើនកំពុងប្រតិបត្តិ។ សម្រាប់បុរសជនជាតិវៀតណាមដែលជាជនសង្ស័យចែកចាយគ្រឿងញៀនត្រូវសមត្ថកិច្ចប៉ូលិសកសាងសំណុំរឿងបញ្ជូនទៅសាលាដំបូងដើម្បីផ្តន្ទាទោសតាមច្បាប់៕ |
| ប្រធានាធិបតីថ្មីភូមាធ្វើសច្ចាប្រណិធានចូលកាន់តំណែង Posted: 30 Mar 2011 12:58 AM PDT ប្រធានាធិបតីថ្មីដែលទើបជាប់ឆ្នោតរបស់ភូមា លោក U Thein Sein និងអនុប្រធានាធិបតី២រូបទៀត លោក U Tin Aung Myint Oo និងលោក Sai Mauk Kham បានធ្វើសច្ចាប្រណិធានចូលកាន់តំណែងកាលពីព្រឹកថ្ងៃទី៣០ មីនា នៅទីក្រុង Noy Pyi Taw ជារដ្ឋធានីថ្មីរបស់ភូមា ។ ក្នុងពិធីធ្វើសច្ចាប្រណិធានចូលកាន់តំណែងនោះ ក៏មានការរំលាយក្រុមប្រឹក្សាសន្តិភាព និងអភិវឌ្ឍន៍រដ្ឋកំពុងកាន់អំណាច (SPDC) និងការផ្ទេរអំណាចទៅឱ្យរដ្ឋាភិបាលស៊ីវិលថ្មី ។ នេះបើតាមការប្រកាសឱ្យដឹងដោយអតីតប្រធាន SPDC ឧត្តមសេនីយ៍ជាន់ខ្ពស់ថាន់ ស្វេ ។ |
| គ្រោះទឹកជំនន់នៅខេត្តភាគខាងត្បូងថៃស្លាប់មនុស្ស11នាក់ Posted: 30 Mar 2011 12:57 AM PDT  ក្នុងរយៈពេលប៉ុន្មានថ្ងៃនេះ បណ្តាខេត្តនៅភាគខាងត្បូងថៃរងគ្រោះដោយសារទឹកជំនន់យ៉ាងធ្ងន់ធ្ងររហូតបណ្តាលឱ្យស្លាប់មនុស្សជាច្រើននាក់។ តាមអគ្គនាយករបស់ទីភ្នាក់ងារទប់ស្កាត់ ព្រមទាំងបង្ការជំងឺ និងគ្រោះមហន្តរាយ លោក Vibul Sanguanpong ឱ្យដឹងថា គិតត្រឹមថ្ងៃទី៣០ មីនា ចំនួនអ្នកស្លាប់ ដែលទាក់ទិននឹងគ្រោះទឹកជំនន់នៅបណ្តាលខេត្តខាងត្បូងទាំងនោះកើនឡើងដល់១១នាក់ ហើយក្នុងនោះ៧នាក់នៅក្នុងខេត្ត Nakhon Si Thammarat ៣នាក់នៅខេត្ត Surat Thani និងម្នាក់ទៀតនៅខេត្ត Phatha lung ។ |
| សមត្ថកិច្ចបង្ក្រាបឈើគ្រញូងបាន៣៩៦កំណាត់ក្នុងរយៈពេល២ថ្ងៃ Posted: 30 Mar 2011 12:49 AM PDT   ខេត្តពោធិ៍សាត់ ៖ ឈើគ្រញូងចំនួន៣៩៦កំណាត់ និងរថយន្តម៉ាកកាមរីមួយគ្រឿងត្រូវសមត្ថកិច្ច មេព្រៃសហការជាមួយកម្លាំងប៉ូលិសប៉េអឹម ស្រុកស្រគរ រុករកឃើញតាមផ្ទះប្រជាជនដែលលាក់ទុក និងពួកឈ្មួញដឹកជញ្ជូនតាមរថយន្ត ។ លទ្ធផលនេះ សមត្ថកិច្ចបានធ្វើយុទ្ធនាការក្នុងរយៈពេល២ថ្ងៃ ដែលមាន៤ករណីនៅកន្លែងផ្សេងៗគ្នា។ តាមប្រភពព័ត៌មានឱ្យដឹងថា កាលពីថ្ងៃទី២៧ មីនា ឆ្នាំ២០១១ វេលាម៉ោង១០ព្រឹក សមត្ថកិច្ចមានមេព្រៃ ប៉ូលិស និងប៉េអឹម ដឹកនាំដោយលោកគឹម ចេត្ថាវី នាយផ្នែករដ្ឋបាលព្រៃឈើក្រគរបានចូលឆែកឆេរក្នុងផ្ទះប្រជាជនម្នាក់នៅភូមិក្រឡាញ់ ឃុំក្បាលត្រាច រកឃើញឈើគ្រញូងស្តុកទុកចំនួន២២០កំណាត់ ។ នៅថ្ងៃដដែលនោះវេលាម៉ោង១និង៣០នាទីរសៀលឆែកផ្ទះប្រជាជនម្នាក់ទៀតនៅភូមិបឹងស្មុក ឃុំស្វាយស រកឃើញឈើគ្រញូងចំនួន២៣ ប្រភពដដែលបន្តថា នៅថ្ងៃទី២៨ មីនា វេលាម៉ោង៦ព្រឹក សមត្ថកិច្ចចាប់ឃាត់រថយន្តមួយគ្រឿងម៉ាកកាមរី ពណ៌ឈាមជ្រូក ស៊េរី៩១ ពាក់ស្លាកលេខ ភ្នំពេញ 2H-9637 លើផ្លូវជាតិលេខ៥ ត្រង់ចំណុចភូមិត្រពាំងស្វាយ ឃុំអន្លង់ត្នោត ដែលផ្ទុកឈើគ្រញូង១៣កំណាត់ អ្នកបើកបររត់គេចខ្លួនបាត់។ នៅថ្ងដដែលនោះ វេលាម៉ោង១២និង៣០នាទីរសៀលសមត្ថកិច្ចរកឃើញឈើគ្រញូងក្នុងផ្ទះប្រជាពលរដ្ឋចំនួន១៤០កំណាត់ទៀតនៅភូមិស្នារអន្សារ ឃុំស្នាអន្សារ ។ សរុបទាំង២ថ្ងៃ ៤ករណី សមត្ថកិច្ចប្រមូលបានឈើគ្រញូងចំនួន៣៩៦កំណាត់ និងរថយន្តកាមរីមួយគ្រឿងយកទៅរក្សាទុកនៅផ្នែករដ្ឋបាលព្រៃឈើក្រគរ ។ លោកគឹម ចេត្ថាវី នាយផ្នែករដ្ឋបាលព្រៃឈើក្រគរបានមានប្រសាសន៍ថា លោកនឹងបន្តដឹកនាំកម្លាំងចុះរុករកឈើដែលប្រជាពលរដ្ឋលាក់ទុកធ្វើសន្និធិតាមផ្ទះ និងឈ្មួញទុច្ចរិតដឹកជញ្ជូនតាមរថយន្តតូច-ធំដូចភ្លៀងរលឹម ដោយសហការជាមួយអាជ្ញាធរ ប៉ូលិស ប៉េអឹម និងស្ថាប័នមន្ទីរពាក់ព័ន្ធទាំងឡាយ ។ ជាមួយគ្នានេះ លោកសុំអំពាវនាវឱ្យប្រជាពលរដ្ឋជួយផ្តល់ព័ត៌មាន ដើម្បីលោកមានវិធានការបង្ក្រាបបានទាន់ពេលវេលា៕ |
| សិក្ខាសាលាស្តីពីបរិស្ថាន កសិកម្ម និងអភិវឌ្ឍន៍ ៖ តើកម្ពុជាជ្រើសយកជម្រើសណា? Posted: 30 Mar 2011 12:42 AM PDT រាជធានីភ្នំពេញ ៖ នៅថ្ងៃទី៣០ ខែមីនា លោក ច័ន្ទ សារុន រដ្ឋមន្ដ្រីក្រសួងកសិកម្ម រុក្ខាប្រមាញ់ និងនេសាទ និងលោក គ្រីស្យង់ កូណង់ ឯកអគ្គរដ្ឋទូតបារាំងប្រចាំកម្ពុជា បានអញ្ជើញបើកសិក្ខាសាលាមួយស្ដីពីកាលានុវត្ដភាពនៃការអភិវឌ្ឍន៍សេដ្ឋកិច្ចប្រទេសកម្ពុជា «បរិស្ថាន កសិកម្ម និងអភិវឌ្ឍន៍ ៖ តើកម្ពុជាជ្រើសយកជម្រើសណា?» ក្នុងក្របខណ្ឌនៃការរៀបចំកិច្ចពិភាក្សាមួយចំនួនលើប្រធានបទផ្សេងៗ ។ សិក្ខាសាលានេះនឹងផ្ដោតលើការជជែកពិភាក្សាអំពីវិស័យផ្សេងៗនៃសេដ្ឋកិច្ចកម្ពុជា ការផលិតស្រូវ ការអភិវឌ្ឍន៍ចីរភាពក្នុងផ្នែកកសិកម្មនិងព្រៃឈើ អគ្គិសនីកម្ម ការផ្គត់ផ្គង់ទឹកនៅតំបន់ជនបទ ការចិញ្ចឹមសត្វ និងការគ្រប់គ្រងហានិភ័យផ្នែកសុខភាព ។ វិស័យទាំងនេះ ដែលជាមុខព្រួញសកម្មភាពអាទិភាពរបស់រាជរដ្ឋាភិបាលកម្ពុជា អាចនាំទៅដល់ភាពជាដៃគូថ្មីៗថែមទៀត ដោយមានការរួមសហការគ្នារវាងអ្នកជំនាញបារាំង និងផ្នែកឯកជនបារាំង និងកម្ពុជា ។ ក្នុងកិច្ចពិភាក្សាខាងលើនេះ ក៏មានបង្ហាញផងដែរពីលទ្ធផលនៃការសិក្សាស្រាវជ្រាវលើដំណាំស្រូវនៅកម្ពុជា ដែលបានធ្វើឡើងដោយឧត្ដមក្រុមប្រឹក្សាសេដ្ឋកិច្ចជាតិកម្ពុជា ក្រោមជំនួយហិរញ្ញប្បទានរបស់ទីភ្នាក់ងារអភិវឌ្ឍន៍បារាំង (AFD) ។ នៅចុងបញ្ចប់នៃសិក្ខាសាលា ឯកអគ្គរដ្ឋទូតបារាំងបានប្រគល់ជាផ្លូវការនូវផែនការអគ្គិសនីកម្មជនបទជូនលោកអ៊ិត ប្រាំង រដ្ឋលេខាធិការក្រសួងឧស្សាហកម្ម រ៉ែ និងថាមពល ។ ការសិក្សាស្រាវជ្រាវនេះ ដែលធ្វើឡើងដោយក្រុមហ៊ុនផ្ដល់ប្រឹក្សា និងវិស្វកម្មIED (នវានុវត្ដន៍ ថាមពល អភិវឌ្ឍន៍) និងឧបត្ថម្ភថវិកាដោយមូលនិធិបារាំង FASEP បង្ហាញយ៉ាងលម្អិតអំពីគម្រោងនៃការធ្វើអគ្គិសនីកម្មនៅក្នុងខេត្ដទាំង២៣នៅក្នុងប្រទេសកម្ពុជា លើកលែងតែរាជ ធានីភ្នំពេញ ។ ជាពិសេស ការសិក្សានេះបានលើកឡើងអំពីលទ្ធភាពក្នុងការផ្ដល់ជំនួយដល់ការបង្កើតថាមពលកកើតឡើងវិញ ដែលអាចបើកផ្លូវដល់ការអនុវត្ដន៍គម្រោងថ្មីៗមួយចំនួនទៀតក្នុងវិស័យនេះ ដោយសហការគ្នារវាងទីភ្នាក់ងារ AFD និងផ្នែកឯកជនកម្ពុជា ៕ |
| Posted: 30 Mar 2011 12:39 AM PDT   រាជធានីភ្នំពេញ ៖ ផ្លូវជុំវិញផ្សារធំថ្មីដែលកន្លងមកមានសភាពខូចខាត និងទឹកដក់ស្ទើរគ្រប់កន្លែងនោះ ពេលនេះ ត្រូវបានសាលារាជធានីភ្នំពេញ ធ្វើការជួសជុលរួចរាល់ និងកំពុងចាក់អ៊ុតកៅស៊ូលើផ្លូវជុំវិញផ្សារទៅតាមលំនាំដើម បន្ទាប់ពីតូបក្នុងផ្សារត្រូវបានសាងសង់ និងជួសជុលរួចរាល់ ហើយបើកឱ្យដំណើរការលក់ដូរធម្មតា ចំណែកឯតូបលក់ដូរបណ្តោះអាសន្នតាមផ្លូវជុំវិញផ្សារនោះក៏តម្រូវឱ្យរើចូលទៅខាងក្នុងវិញរួចរាល់ហើយដែរ ។ ផ្លូវជុំវិញផ្សារធំថ្មីនេះ ពិតជាមានសារសំខាន់ណាស់សម្រាប់ជាសោភ័ណភាពលំអរាជធានី និងប្រជាពលរដ្ឋងាយស្រួលធ្វើដំណើរទៅទិញទំនិញ ឬក៏លក់ដូរទំនិញផ្សេងៗដែលជាមជ្ឈមណ្ឌលពាណិជ្ជកម្មដ៏សំខាន់មួយរបស់រាជធានីភ្នំពេញ ។ បន្ទាប់ពីស្ថាបនាគ្រឹះខាងក្រោមរបស់ផ្លូវរួចក្នុងពេលនេះកំពុងដំណើរការចាក់អ៊ុតកៅស៊ូដែលការអ៊ុតកៅស៊ូអនុវត្តដោយក្រុមហ៊ុន Ly Service ក្នុងទំហំ៩.៤០០ម៉ែត្រការ៉េ ដែលមានទទឹងផ្លូវ១៦ម៉ែត្រ។ តំណាងក្រុមហ៊ុននេះបានឱ្យដឹងថា ការងារអ៊ុតកៅស៊ូផ្លូវខាងលើនេះនឹងធ្វើឱ្យរួចរាល់មុនបុណ្យចូលឆ្នាំខ្មែរឆាប់ៗខាងមុខនេះ ហើយការស្ថាបនាធ្វើឡើងតាមគម្រោងរបស់សាលារាជធានីភ្នំពេញ បន្ទាប់ពីរុះរើតូបបងប្អូនអាជីវករបណ្តោះអាសន្នលើចិញ្ចើមផ្លូវឱ្យចូលទៅខាងក្នុងរួចមក ។ គួររំលឹកថា ការជួសជុលកែលំអផ្សារធំថ្មីនេះក្រោមជំនួយរបស់រដ្ឋាភិបាលបារាំងតាមរយៈទីភ្នាក់ងារអភិវឌ្ឍន៍បារាំង (AFD) ហើយបន្ទាប់ពីស្ថាបនាផ្លូវជុំវិញផ្សារធំថ្មីរួចសាលារាជធានីភ្នំពេញមានគម្រោងរៀបចំបង្កើតផ្សាររាត្រីសម្រាប់លក់ពេលយប់នៅជុំវិញផ្សារធំថ្មីនេះបន្ថែមទៀត ដើម្បីឱ្យភ្ញៀវទេសចរជាតិ-អន្តរជាតិទៅទិញទំនិញនៅពេលយប់បានដោយស្រួល ៕ |
| បុណ្យខួប១៤ឆ្នាំនៃអ្នកស្លាប់ដោយសារគប់គ្រាប់បែក គណបក្សសម រង្ស៊ី អំពាវនាវរកឃាតក Posted: 30 Mar 2011 12:35 AM PDT រាជធានីភ្នំពេញ ៖ ជាថ្មីម្តងទៀត ប្រធានគណបក្សប្រឆាំង លោកសម រង្ស៊ី បានអំពាវនាវនៅថ្ងៃពុធ នេះឱ្យចាប់ឃាតកដែលបានគប់គ្រាប់បែកចូលក្រុមបាតុករបណ្តាលឱ្យមានមនុស្សប្រមាណ២០នាក់ស្លាប់ និងជាង១០០នាក់ផ្សេងទៀតរងរបួសកាលពីថ្ងៃទី៣០ មីនា ១៩៩៧ កន្លងមកនេះ ។ គណបក្សសម រង្ស៊ី កាលពីព្រឹកថ្ងៃទី៣០ មីនា ២០១១ បានរៀបចំពិធីបុណ្យខួប១៤ឆ្នាំ នៃការគប់គ្រាប់បែក៤គ្រាប់ផ្ទួនៗគ្នា ទៅលើក្រុមបាតុកររាប់ពាន់នាក់ ដែលធ្វើបាតុកម្មទាមទារកំណែទម្រង់តុលាការដឹកនាំដោយលោក សម រង្ស៊ី ។ លោកសម រង្ស៊ី បានថ្លែងតាមរយៈវីដេអូកុងហ្វេរ៉ង់ពីប្រទេសបារាំងក្នុងពិធីបុណ្យនេះថា គណបក្សសម រង្ស៊ី នៅតែបន្តជំរុញរដ្ឋាភិបាលស្វែងរកមុខឃាតកផ្តន្ទាទោសតាមច្បាប់ឱ្យទាល់តែបាន ។ ការតស៊ូនៅតែមានមិនបញ្ចប់ទេ ដរាបណារដ្ឋាភិបាលមិនទាន់ចាប់ឃាតកមកកាត់ទោស ។ លោកសម រង្ស៊ី បានអះអាងថា ជនរងគ្រោះបានបាត់បង់ជីវិតដោយសារតែការទាមទារយុត្តិធម៌ និងរបបប្រជាធិបតេយ្យនៅក្នុងប្រទេសកម្ពុជា ។ ក្នុងហេតុការណ៍នោះ កម្មករ កម្មការិនី និងពលរដ្ឋប្រមាណ២០នាក់ បានស្លាប់ និងជាង១០០នាក់រងរបួស តែរហូតមកដល់ពេលនេះ សមត្ថកិច្ចមិនទាន់បានបង្ហាញអ្នកទទួលខុសត្រូវនៃការគប់គ្រាប់បែកនោះនៅឡើយទេ ។ ការសម្លាប់នៅថ្ងៃទី៣០ មីនា នោះ បានក្លាយជាទិវាសោកសៅមួយដែលគណបក្សសម រង្ស៊ី បានប្រារព្ធធ្វើជារៀងរាល់ឆ្នាំ ៕ |
| Posted: 30 Mar 2011 12:32 AM PDT រាជធានីភ្នំពេញ ៖ ប្រធានាធិបតីទីម័រខាងកើត លោកយ៉ូហ្សេ រ៉ាម៉ូស ហ័រតា បានគាំទ្របេក្ខភាពកម្ពុជា ជាសមាជិកមិនអចិន្ត្រៃយ៍របស់ក្រុមប្រឹក្សាសន្តិសុខអង្គការសហប្រជាជាតិសម្រាប់អាណត្តិ២០១៣ និង២០១៤ ។ ប្រសាសន៍គាំទ្ររបស់លោកប្រធានាធិបតីទីម័រខាងកើតនាពេលនេះ បានធ្វើឡើងក្នុងជំនួបពិភាក្សាជាមួយសម្តេចអគ្គមហាពញាចក្រីហេង សំរិន ប្រធានរដ្ឋសភា នៅវិមានរដ្ឋសភាជាតិ ក្នុងរាជធានីភ្នំពេញ កាលពីព្រឹកថ្ងៃពុធ ទី៣០ មីនា ២០១១ នេះ ។ នេះបើយោងតាមលោកគាំ កុសល ជំនួយការផ្ទាល់សម្តេចហេង សំរិន ដែលថ្លែងតាមទូរស័ព្ទប្រាប់កោះសន្តិភាពនៅប៉ុន្មាននាទីមុននេះ ។ លោកគាំ កុសល បន្តថា នៅក្នុងជំនួបនេះដែរ លោកប្រធានាធិបតីទីម័រខាងកើត លោកយ៉ូហ្សេ រ៉ាម៉ូស ហ័រតា ក៏បានថ្លែងអំណរគុណដល់កម្ពុជា ដែលបានគាំទ្របេក្ខភាពទីម័រខាងកើតជាសមាជិកអាស៊ានទី១១ ហើយថា សមាជិកសភាប្រទេសទីម័រខាងកើតមានចំនួន១៣០នាក់ ក្នុងនោះមានស្ត្រីចំនួន៣០ភាគរយ។ លោកប្រធានាធិបតីទីម័រខាងកើតក៏បានជម្រាបសម្តេចហេង សំរិន ដែរថា នៅក្នុងប្រទេសទីម័រមានគណបក្សនយោបាយចូលរួមប្រកួតប្រជែងក្នុងការបោះឆ្នោតចំនួន៩គណបក្ស ហើយថា សេដ្ឋកិច្ចទីម័រ មិនជំពាក់បំណុលបរទេសណាទាំងអស់ ។ លោកយ៉ូហ្សេ រ៉ាមូស ហ័រតា បន្ថែមថា ពេលនេះទីម័រខាងកើតកំពុងទាមទារឱ្យមានអ្នកវិនិយោគពីខាងក្រៅ ជាពិសេសការវិនិយោគលើផ្នែកលំនៅឋាន និងថាមពលអគ្គិសនី៕ |
| តារាចម្រៀងខេមរៈ សិរីមន្ត ទទួលបានមេដាយស្ថាបនាជាតិ Posted: 30 Mar 2011 12:23 AM PDT   ខេត្តកំពង់ចាម ៖ តារាចម្រៀងលោកខេមរៈ សិរីមន្ត កាលពីថ្ងៃទី២៧ ខែមីនា ត្រូវបានសម្តេចអគ្គមហាពញាចក្រីហេង សំរិន បំពាក់មេដាយស្ថាបនាជាតិ ព្រោះលោកមានស្នាដៃក្នុងការចូលរួមចំណែកកសាងសមិទ្ធផលនានានៅក្នុងវត្តជោតតនារាមស្ថិតក្នុងស្រុកព្រៃឈរ ខេត្តកំពង់ចាម។ លោកខេមរៈ សិរីមន្ត និយាយថា ការបំពាក់មេដាយស្ថាបនាជាតិដល់រូបលោក គឺធ្វើឡើងក្នុងពិធីបុណ្យឆ្លងអគារសាលាឆាន់ និងសមិទ្ធផលមួយចំនួនទៀតក្នុងវត្តជោតតនារាម។ កន្លងមករូបលោក និងក្រុមគ្រួសារបានចូលបច្ច័យយ៉ាងច្រើន និងជាបន្តបន្ទាប់ក្នុងការកសាងសមិទ្ធផលនានាក្នុងវត្ត សំខាន់សាលាឆាន់ដែលត្រូវដាក់សម្ពោធនាឱកាសនោះ។ មូលហេតុដែលលោកចូលបច្ច័យកសាងសមិទ្ធផលក្នុងវត្តនោះ ព្រោះលោក និងក្រុមគ្រួសារសុទ្ធសឹងជាអ្នកដែលមានជំនឿលើព្រះពុទ្ធសាសនា ម្យ៉ាងទៀតទីនោះជាកន្លែងកំណើតរបស់លោក។ លោកខេមរៈ សិរីមន្ត ជាតារាចម្រៀងមានប្រជាប្រិយភាពមួយរូប ពិសេសផ្នែកយុវវ័យ។ លោកកំពុងតែរស់នៅដោយមានសេចក្តីសុខ និងកាក់កបក្នុងផលិតកម្មសាន់ដេ បន្ទាប់ពីចាកចេញពីផលិតកម្មយូធូកាលពីប៉ុន្មានឆ្នាំមុន។ បទចម្រៀងរបស់លោកច្រើនតែទទួលបានការគាំទ្រពីស្រទាប់យុវវ័យ។ ថ្វីដ្បិតតែលោកសិរីមន្តនៅកំលោះ តែហាក់មិនមានការធ្លាយចេញបញ្ហាបេះដូង ឬពាក់ព័ន្ធរឿងអាស្រូវស្នេហាឡើយ។ ជាមួយកេរ្តិ៍ឈ្មោះក្នុងវិស័យសិល្បៈ ពេលនេះលោកខេមរៈ សិរីមន្ត ធ្វើឱ្យមហាជនមានការចាប់អារម្មណ៍ដោយសារទទួលបានមេដាយស្ថាបនាជាតិដែលបំពាក់ជាកិត្តិយសដោយសម្តេចអគ្គមហាពញាចក្រីហេង សំរិន។ កិត្តិយសដែលទទួលបាននេះ ព្រោះតែលោកជាសប្បុរសជនមួយរូបរួមកសាងសមិទ្ធផលក្នុងវត្ត ៕ |
| Posted: 30 Mar 2011 12:20 AM PDT សមាគមកីឡាប្រដាល់ពិភពលោក AIBAបានដាក់បម្រាមលើសហព័ន្ធកីឡាប្រដាល់ប្រទេសរ៉ូម៉ានីនិងបណ្តាមន្រ្តីកីឡាជាន់ខ្ពស់របស់ថៃមួយចំនួនពីបទល្មើសនឹងច្បាប់ដាក់ពិន័យ។ ទោះជាយ៉ាងណាក្តី គណៈកម្មាធិការនេះមិនបានហាមឃាត់លើបណ្តាកីឡាករប្រដាល់ប្រទេសទាំងពីរក្នុងការចូលរួមប្រកួតជាលក្ខណៈអន្តរជាតិទេ ។ AIBAបាននិយាយថាខ្លួនបានបញ្ឈប់ប្រទេសរ៉ូម៉ានីពីសមាគមកីឡាប្រដាល់អាជីពពិភពលោកចំនួន២ឆ្នាំ ព្រោះតែប្រធានសហព័ន្ធកីឡាប្រដាល់ប្រទេសនេះគឺលោករូដែល អូប្រេយ៉ាល្មើសនឹងច្បាប់ដាក់ពិន័យដោយបន្តធ្វើការក្នុងតួនាទីដដែល ។ ចំណែកទាក់ទងនឹងប្រទេសថៃវិញ AIBAបាននិយាយថាប្រធានសហព័ន្ធកីឡាប្រដាល់ប្រទេសនេះឈ្មោះTaweep Jantararojត្រូវបានគេព្យួរតួនាទីចំនួន២ឆ្នាំ និងបណ្តាមន្រ្តីកីឡាដទៃទៀតត្រូវព្យួររយៈពេល១ឆ្នាំ ។ បើទោះជាយ៉ាងនេះក្តី AIBA បញ្ជាក់យ៉ាងច្បាស់ថាការហាមឃាត់នេះមិនដាក់ទៅលើកីឡាករ គ្រូបង្ហាត់ អាជ្ញាកណ្តាល និងចៅក្រមនោះទេ ។ រ៉ូម៉ានីនិងថៃស្ថិតនៅក្នុងចំណោមសមាជិកចំនួន១៣ប្រទេសដែលធ្លាប់បានប្រជែងយកតំណែងលោកWu Ching-kuoប្រធានAIBAបច្ចុប្បន្ននៅមុនការបោះឆ្នោតជាថ្មីកាលពីឆ្នាំទៅមិញ ៕ |
| សង្វៀនប្រដាល់បាយ័នបន្ថែមថ្ងៃសុក្រទៀតប្រកួតអន្តរជាតិ៤គូបើកឆាក Posted: 30 Mar 2011 12:12 AM PDT  រាជធានីភ្នំពេញ ៖ កម្មវិធីប្រកួតកីឡាប្រដាល់របស់ទូរទស្សន៍បាយ័នដែលធ្លាប់ធ្វើឡើងក្នុង១សប្តាហ៍២លើក គឺថ្ងៃសៅរ៍ និងថ្ងៃអាទិត្យនោះ ឥឡូវនេះបន្ថែមថ្ងៃស្រុក១ថ្ងៃទៀត។ ជាការស្វាគមន៍ចំពោះទស្សនិកជនសំរាប់ថ្ងៃបន្ថែមជាលើកដំបូង គឺថ្ងៃសុក្រ ទី១ មេសា ខាងមុខនេះអ្នករៀបចំកម្មវិធីប្រដាល់ទូរទស្សន័បាយ័នរៀបចំឱ្យមានការប្រកួតចំនួន៦គូក្នុងនោះមានការប្រកួតមិត្តភាពជាតិចំនួន២គូ និងមិត្តភាពអន្តរជាតិចំនួន៤គូ ។ ការប្រកួតនេះនឹងផ្សាយផ្ទាល់ចាប់ពីម៉ោង៣ និង៣០នាទីរសៀលតទៅ។ ចំពោះគូប្រកួតជាលក្ខណៈមិត្តភាពអន្តរជាតិទាំង៤គូនោះ ទី១ កីឡាករកម្ពុជាឯម វិចិត្រ មកពីក្លឹបគ្រុឌមានជ័យត្រូវជួបប្រកួតក្នុងប្រភេទទម្ងន់៦០គីឡូក្រាមជាមួយកីឡាករ Leonard មកពីប្រទេស KENYA ។ ឯម វិចិត្រ មានប្រវត្តិប្រកួតចំនួន៤៨លើក ក្នុងនោះឈ្នះ៣៧លើក ចាញ់៧លើក និងស្មើចំនួន៤លើក ។ ចំណែក Leonard មានប្រវត្តិប្រកួត២០លើក ក្នុងនោះឈ្នះ១៥លើក។ គូអន្តរជាតិទី២ កីឡាករ Valdet មកពីប្រទេសអាល្លឺម៉ង់ត្រូវប្រកួតក្នុងប្រភេទទម្ងន់៦៥គីឡូក្រាមជាមួយកីឡាករកម្ពុជា កែវ រំចង់ មកពីក្លឹបកងពលធំអន្តរាគមន៍លេខ៣ប្រាសាទព្រះវិហារ។ Valdet មានប្រវត្តិប្រកួតបានចំនួន១០៣លើក ក្នុងនោះឈ្នះ៥៩លើក ចាញ់៤០លើក និងស្មើ៤លើក។ ចំណែកកែវ រំចង់ វិញ មានប្រវត្តិប្រកួត៧៣លើក ក្នុងនោះឈ្នះ៦៤លើក ចាញ់៦លើក និងស្មើ៣លើក។ គូនេះមានការចាប់អារម្មណ៍ខ្លាំងពីមជ្ឈដ្ឋានអ្នកទស្សនា ព្រោះថា បើផ្អែកតាមប្រវត្តិរបស់កីឡាករមកពីអាល្លឺម៉ង់មានបទពិសោធន៍រហូតដល់១០៣លើកឯណោះ ប៉ុន្តែទោះបីកែវ រំចង់មានប្រវត្តិប្រកួតតិចជាងក៏ដោយ គឺនៅតែមានជំនឿថា កែវ រំចង់ មិនចាញ់បរទេសនោះទេ។ គូអន្តរជាតិទី៣ កីឡាករកម្ពុជាឯម វុត្ថា មកពីក្លឹបគ្រុឌមានជ័យត្រូវប្រកួតក្នុងប្រភេទទម្ងន់៦០គីឡូក្រាមជាមួយកីឡាករ Christian មកពីប្រទេសអេស្ប៉ាញ។ ឯម វុត្ថា មានប្រវត្តិប្រកួត៧០លើក ក្នុងនោះឈ្នះ៤៧លើក ចាញ់១៨លើក និងស្មើ ៥លើក។ ចំណែកChristian មានប្រវត្តិប្រកួត២៨លើក ក្នុងនោះឈ្នះ១៨លើក ចាញ់៨លើក និងស្មើ២លើក។ គូអន្តរជាតិទី៤ កីឡាករ Jame Rhys មកពីប្រទេសអង់គ្លេសត្រូវប្រកួតក្នុងប្រភេទទម្ងន់៦៩គីឡូក្រាមជាមួយកីឡាករកម្ពុជា ជ័យ កុសល មកពីក្លឹបព្រះខ័នរាជ្យ។ ក្រៅពីគូប្រកួតជាលក្ខណៈអន្តរជាតិទាំង៤គូនេះនៅមានការប្រកួតធម្មតា២គូទៀតរវាងសេង ហៀង មកពីក្លឹបវីអាយភីចំការមនជាមួយឈឿន ឆៃដែន មកពីក្លឹបនិរោធមានជ័យ។ កីឡាករសុខ វិរៈ មកពីក្លឹបកងរាជអាវុធហត្ថខេត្តកំពង់ស្ពឺប្រកួតជាមួយកីឡាករម៉ាត់ ឆ្វេង មកពីក្រសួងកសិកម្ម ៕ |
| តំបន់កូកាស់រុស្ស៊ី ៖ មេដឹកនាំឧទ្ទាមអ៊ិស្លាមអាចត្រូវសម្លាប់ Posted: 30 Mar 2011 12:08 AM PDT ប្រភពប៉ូលិសមូលដ្ឋាននិយាយកាលពីថ្ងៃទី២៩ មីនា ថា ប្រមុខឧទ្ទាមអ៊ិស្លាមនៅតំបន់កូកាស់រុស្ស៊ីជនជាតិឆេឆេនី លោកដូគូ អ៊ូម៉ារ៉ូវ អាចស្ថិតក្នុងចំណោមពួកឧទ្ទាម១៧នាក់ដែលសម្លាប់កាលពីថ្ងៃទី២៨ មីនា ក្នុងឱកាសនៃប្រតិបត្តិការយោធាមួយនៅរដ្ឋអ៊ីនហ្គូជី។ យោងតាមព័ត៌មានទាំងឡាយថា បណ្តាសមាជិកកងអង្គរក្សរបស់លោកដូគូ អ៊ូម៉ារ៉ូវ ត្រូវស្លាប់ក្នុងចំណោមពួកឧទ្ទាម។ ប្រការនេះអាចឱ្យគេសន្មត់ថា លោកដូគូ អ៊ូម៉ារ៉ូវ ខ្លួនឯងក៏ត្រូវស្លាប់ដែរ។ |
| កីឡាករវ័យក្មេងនីម៉ា គឺជាគ្រាប់ពេជ្ររបស់ប្រេស៊ីល Posted: 29 Mar 2011 11:54 PM PDT  ខ្សែប្រយុទ្ធវ័យក្មេង Neymar da Silva Santos Junior ត្រូវបានគេស្គាល់ថា នីម៉ា កើតនៅថ្ងៃទី៥ កុម្ភៈ ឆ្នាំ១៩៩២ ក្នុងទីក្រុង Mogi da Cruzes ប្រទេសប្រេស៊ីល។ បច្ចុប្បន្ននីម៉ា មានវ័យទើបតែ១៩ឆ្នាំប៉ុណ្ណោះ តែគេជាកីឡាករមួយរូបដែលកំពុងបញ្ចេញទេពកោសល្យលេចធ្លោនៅលើឆាកអន្តរជាតិក្នុងសតវត្សទី២១នេះ។ នីម៉ាបានចូលប្រឡូកក្នុងអាជីពបាល់ទាត់ដំបូងតាំងពី២០០៣ នៅក្នុងក្លឹបយុវជន Santos រហូតមកដល់ឆ្នាំ២០០៩។ ចាប់តាំងពីឆ្នាំ២០០៩ មកដល់បច្ចុប្បន្ននេះ គេបានបន្តលេងឱ្យក្លឹបSantos ដដែល។ នៅជាមួយក្លឹប Santos កីឡាករនីម៉ា ធ្លាប់បានបង្ហាញវត្តមានចំនួន៦៤លើក ស៊ុតបាល់បញ្ចូលទីបាន២៧គ្រាប់។ ក្រៅពីការលេងឱ្យក្លឹប Santos គេត្រូវបានជ្រើសរើសជាកីឡាករជម្រើសជាតិអាយុក្រោម១៧ឆ្នាំ កាលពីឆ្នាំ២០០៩ ដោយរកគ្រាប់បាល់បាន១គ្រាប់ ក្នុងការបង្ហាញវត្តមានចំនួន៣ប្រកួត។ នៅថ្ងៃទី១០ សីហា ឆ្នាំ២០១០ រូបគេក៏ត្រូវបានជ្រើសរើសឱ្យចូលលេងក្នុងក្រុមជម្រើសជាតិ ក្រោមការដឹកនាំរបស់លោក Mano Menezes គ្រូបង្វឹកថ្មី។ តាមរយៈការបង្ហាញវត្តមានក្នុងក្រុមជម្រើសជាតិចំនួន៣ប្រកួតនេះ កីឡាករនីម៉ា អាចមានសមត្ថភាពស៊ុតបាល់បញ្ចូលទីបានចំនួន៣គ្រាប់នៅក្នុងការប្រកួតមិត្តភាពជាមួយក្រុមសហរដ្ឋអាមេរិកស៊ុតបាល់បញ្ចូលទីបាន១គ្រាប់ និងស៊ុតបាល់បាន២គ្រាប់ម្នាក់ឯង ជួយឱ្យក្រុមប្រេស៊ីលឈ្នះ Scotland ២-០ កាលពីថ្ងៃអាទិត្យ ទី២៧ មីនា ថ្មីៗនេះ។ ក្រៅពីនេះទៀតកីឡាករនីម៉ា ក៏ជាកីឡាករម្នាក់នៅក្នុងក្រុមជម្រើសជាតិអាយុក្រោម២០ឆ្នាំដែរ ដោយស៊ុតបាល់បញ្ចូលទីបាន៩គ្រាប់ក្នុងការបង្ហាញវត្តមានចំនួន៧លើក។ ជាមួយនឹងភាពល្បីល្បាញក្នុងការរកគ្រាប់បាល់បញ្ចូលទីបែបនេះ ធ្វើឱ្យក្លឹបល្បីៗនៅក្នុងតំបន់អឺរ៉ុប ដូចជាក្លឹប Real M, Inter, Juventus និងជាពិសេសគឺក្លឹប Chelsea តែម្តងមានការចាប់អារម្មណ៍ខ្លាំង ហើយបានសាកល្បងធ្វើការចរចាគ្នា២ទៅ៣លើករួចមកហើយ ជាមួយក្លឹប Santos តែក្លឹប Santos បានកំណត់តម្លៃកីឡាកររូបនេះខ្ពស់រហូតដល់ទៅ៣០លានផោន និងបានបន្តកុងត្រាជាមួយកីឡាករនេះរហូតទៅដល់ឆ្នាំ២០១៤។ ការបន្តកុងត្រា និងកំណត់តម្លៃដ៏ខ្ពស់បែបនេះ គឺជាចេតនារារាំងមិនឱ្យកីឡាកររូបនេះចាកចេញពីក្លឹប។ ទោះជាយ៉ាងណាក្តី កីឡាករនីម៉ា បានបង្ហាញពីអារម្មណ៍ពុះកញ្ច្រោលចង់ទៅលេងឱ្យក្លឹបនៅតំបន់អឺរ៉ុប ជាពិសេសគឺក្លឹប Chelsea តែម្តងសម្រាប់រដូវកាលក្រោយ៕ |
| ការឆ្លងរាលដាលនៃជម្ងឺកញ្ជ្រិលនៅកុងហ្គោស្លាប់កុមារ106នាក់ Posted: 29 Mar 2011 11:52 PM PDT អាជ្ញាធរសុខាភិបាលថ្លែងកាលពីថ្ងៃទី២៩ មីនា ថា ការឆ្លងរាលដាលនៃជម្ងឺកញ្ជ្រិលនៅសាធារណរដ្ឋប្រជាធិបតេយ្យកុងហ្គោបានសម្លាប់កុមារ១០៦នាក់ ក្នុងនោះ៩០នាក់នៅខេត្តកាតាន ហ្គា ភាគខាងត្បូងប្រទេស ។ អង្គការក្រុមគ្រូពេទ្យគ្មានព្រំដែន MSF របស់បារាំងរៀបរាប់ពីមនុស្ស២១.០០០នាក់ឆ្លងជម្ងឺនោះក្នុងខេត្ត៥របស់អតីតប្រទេសហ្សាអៀរនេះ រួចអង្គការនោះបញ្ជាក់ថា បានចែកចាយវ៉ាក់សាំងការពារដល់កុមារ១,៥លាននាក់ កាលពីឆ្នាំទៅមិញក៏ប៉ុន្តែត្រូវការជំនួយថែមទៀតសម្រាប់បន្តការខិតខំប្រឹងប្រែងនេះ ។ |
| ហាមប្រើរថយន្តនៅទូទាំងអឺរ៉ុបមុនឆ្នាំ2050ដើម្បីកាត់បន្ថយឧស្ម័នកាបូន Posted: 29 Mar 2011 11:52 PM PDT តាមទីភ្នាក់ងារព័ត៌មានបរទេសផ្សាយថ្ងៃទី២៩ មីនា ថា គណៈកម្មការអឺរ៉ុបបានបង្ហើបឱ្យដឹងពីគម្រោងការដាក់បម្រាមដល់ទីក្រុងផ្សេងៗនៅទូទាំងអឺរ៉ុបរួមមានទាំងទីក្រុងឡុងផង មិនឱ្យប្រើប្រាស់រថយន្តនៅមុនឆ្នាំ២០៥០ ក្នុងគោលបំណងកាត់បន្ថយការបញ្ចេញឧស្ម័នកាបូនអុកស៊ីដទៅក្នុងស្រទាប់បរិយាកាស និងកាត់បន្ថយកំដៅផែនដី ។ |
| លោកអាឡិចហ្វើគូសុនព្យាករណ៍ថា មានចលាចលក្នុងការប្រកួត FA Cup Posted: 29 Mar 2011 11:48 PM PDT  តាមប្រភពព័ត៌មាន BBC បានឱ្យដឹងថា លោកអាឡិចហ្វើគូសុន បានធ្វើការព្យាករណ៍ថា នឹងមានភាពចលាចលនៅក្នុងការប្រកួតបាល់ទាត់ក្របខណ្ឌអង់គ្លេស FA Cup ក្នុងវគ្គពាក់កណ្តាលផ្តាច់ព្រ័ត្រនៅថ្ងៃទី១៦ និង១៧ ខែមេសា ខាងមុខនេះ។ ភាពចលាចលនោះត្រូវបានលោកអាឡិចហ្វើគូសុន ប្រាប់ពីមូលហេតុថា ដោយសារតែក្រុមទាំង៤ គឺក្រុម Man Utd, Man City, Bolton និង Stoke និងអ្នកគាំទ្ររបស់ក្រុមនីមួយៗត្រូវធ្វើដំណើរទៅកាន់ពហុកីឡដ្ឋាន Wembley ចំពេលដែលអ្នកគាំទ្រ Liverpool ធ្វើដំណើរទៅកាន់ពហុកីឡដ្ឋាន Emirates ក្នុងថ្ងៃតែមួយ។ បន្ថែមពីនេះទៀត លោកអាឡិចហ្វើគូសុន បានលើកឡើងពីផលប៉ះពាល់មួយទៀតដូចជា ការចំណាយច្រើនទៅលើថ្លៃសាំងរបស់ពួកគេក្នុងការធ្វើដំណើរផ្លូវឆ្ងាយទៅកាន់ទីក្រុងឡុង។ ជាមួយនឹងក្តីកង្វល់នេះ លោកអាឡិចហ្វើគូសុន បានផ្តល់យោបល់ថា ការប្រកួតបាល់ទាត់អង់គ្លេស FA Cup វគ្គពាក់កណ្តាលផ្តាច់ព្រ័ត្រដែលតែងតែប្រារព្ធធ្វើឡើងនៅក្នុងពហុកីឡដ្ឋាន Wembley តាំងពីឆ្នាំ២០០៨នោះ គួរតែគិតគូរឡើងវិញ ហើយងាកមកមើលពហុកីឡដ្ឋាន Villa Park ឬ Anfield វិញ ដែលមានទីតាំងជិតជាង ដែលអាចសម្រួលដល់ការធ្វើដំណើររបស់អ្នកគាំទ្រ។ អ្នកនាំពាក្យរបស់សហព័ន្ធបាល់ទាត់អង់គ្លេសបាននិយាយប្រាប់ BBC ថា ៖ យើងសង្ឃឹមថា ចំនួនអ្នកទស្សនា១សែន៨ម៉ឺននាក់របស់ក្រុមទាំង៤ នឹងសម្រុកចូលមកពហុកីឡដ្ឋាន Wembley នៅខែក្រោយនេះ ហើយយើងនឹងត្រៀមរៀបចំសន្តិសុខឱ្យបានល្អដល់ពួកគេ ដោយធ្វើយ៉ាងណាកុំឱ្យមានបាតុភាពអាក្រក់ណាមួយកើតឡើង។ គួររំលឹកដែរថា ការប្រកួតបាល់ទាត់អង់គ្លេស FA Cup វគ្គពាក់កណ្តាលផ្តាច់ព្រ័ត្រនេះនឹងរៀបចំឡើងនៅថ្ងៃទី១៦ និង១៧ ខែមេសា ចំពេលដែលបាល់ទាត់ក្នុងក្របខណ្ឌអង់គ្លេសប្រឺមីញេលីកប្រកួតចុងសប្តាហ៍ដែរ ជាពិសេសគឺការប្រកួតរវាងក្រុម Arsenal និងក្រុម Liverpool ដែលជាហេតុធ្វើឱ្យអ្នកគាំទ្រវិស័យបាល់ទាត់នឿយហត់ក្នុងការធ្វើដំណើរចុះឡើងពីពហុកីឡដ្ឋានមួយទៅពហុកីឡដ្ឋានមួយទៀតដែលនៅឆ្ងាយពីគ្នា៕ |
| ឈើគ្រញូង១.៦៦៥គីឡូក្រាមត្រូវមេព្រៃនិងប៉ូលិសសេដ្ឋកិច្ចបង្ក្រាប Posted: 29 Mar 2011 11:24 PM PDT  ខេត្តកំពត ៖ ក្រោយពីមានសេចក្តីរាយការណ៍ពីប្រជាពលរដ្ឋនៅក្បែរច្រកទ្វារព្រំដែនព្រែកចាកមកថា គេបានឃើញឈ្មួញដឹកឈើគ្រញូងជាច្រើនដុំមកស្តុកទុកនៅផ្ទះលក់គ្រឿងទេសមួយក្បែរច្រកទ្វារព្រំដែនព្រែកចាកស្ថិតក្នុងភូមិថ្កូវ ឃុំឫស្សីស្រុកខាងលិច ស្រុកកំពង់ត្រាច លោកជួន សារ៉ា នាយផ្នែករដ្ឋបាលព្រៃឈើកំពត ក៏បានរាយការណ៍សុំយោបល់ដល់ខណ្ឌរដ្ឋបាលព្រៃឈើដើម្បីបង្ក្រាប ។ ក្រោយពេលបានដីកាពីព្រះរាជអាជ្ញាសាលាដំបូងហើយ ក៏សហការជាមួយកម្លាំងសមត្ថកិច្ចចុះឆែកឆេរដោយមានមន្ត្រីជំនាញរដ្ឋបាលព្រៃឈើ៤រូប និងកម្លាំងនគរបាលប្រឆាំងបទល្មើសសេដ្ឋកិច្ច១០រូប ចុះដល់ទីតាំងសង្ស័យហើយចូលឆែកឆេរនៅផ្ទះលក់គ្រឿងទេសនោះរកឃើញឈើប្រណីតប្រភេទគ្រញូងជាច្រើនកំណាត់ដែលជនល្មើសស្តុកទុកក្នុងផ្ទះបម្រុងដឹកឆ្លងដែនទៅលក់នៅប្រទេសវៀតណាម ។ លោកជួន សារ៉ា បានឱ្យដឹងកាលពីរសៀលថ្ងៃទី២៩ មីនា ថា ក្រោយពីកម្លាំងសមត្ថកិច្ចសហការជាមួយកម្លាំងរដ្ឋបាលព្រៃឈើចុះពិនិត្យផ្ទះដែលមានម្ចាស់ឈ្មោះកាំង ឡេង ភេទប្រុស អាយុ៦៥ឆ្នាំ ជាផ្ទះលក់គ្រឿងទេស និងទិញឈើខុសច្បាប់ស្តុកទុកដើម្បីនាំចេញទៅលក់នៅប្រទេសវៀតណាមនោះ ម្ចាស់ផ្ទះទាំងពីរនាក់ប្តីប្រពន្ធ បានរត់គេចខ្លួនបាត់ ទុកតែនារីដែលជាអ្នកបម្រើម្នាក់នៅចាំផ្ទះ។ លោកជួន សារ៉ា បន្តថា ឈើដែលសមត្ថកិច្ចរកឃើញនេះមាន៨៤២ដុំ ស្មើនឹង១.៦៦៥គីឡូក្រាម ហើយវត្ថុតាងត្រូវបានរឹបអូសនិងនាំខ្លួននារីម្នាក់មកខណ្ឌរដ្ឋបាលពព្រៃឈើកំពតដើម្បីសួរនាំ ។ នារីដែលសមត្ថកិច្ចនាំមកសួរនាំនោះឈ្មោះអួង សុធា អាយុ៣៩ឆ្នាំ ជាអ្នកស៊ីឈ្នួលជួយលក់ដូរក្នុងផ្ទះនេះ ។ ការសួរនាំអស់រយៈពេលប្រមាណពីរម៉ោងឃើញថា នារីរូបនេះជាអ្នកបម្រើគេគ្មានដឹងអ្វីទាំងអស់ ហើយមានជំងឺប្រចាំកាយទៀត សមត្ថកិច្ចក៏អនុញ្ញាតឱ្យទៅផ្ទះវិញ ។ លោកជួន សារ៉ា បន្តទៀតថា ម្ចាស់ឈើត្រូវតែចូលខ្លួនមកដោះស្រាយដើម្បីធ្វើការផាកពិន័យតាមច្បាប់ ។ ផ្ទុយទៅវិញបើពុំចូលខ្លួនដោះស្រាយទេ ម្ចាស់ឈើអាចប្រឈមមុខចំពោះផ្លួវច្បាប់ ហើយត្រូវបញ្ជូនសំណុំរឿងទៅព្រះរាជអាជ្ញាចោទប្រកាន់តាមនីតិវិធីច្បាប់៕ |
| សាលាខណ្ឌដូនពេញប្រជុំពង្រឹងកិច្ចការពារប្រជុំកំពូលអាស៊ានឆ្នាំ២០១២ Posted: 29 Mar 2011 11:20 PM PDT  រាជធានីភ្នំពេញ ៖ លោកសុខ សម្បត្តិ គណៈអភិបាល និងជាអភិបាលខណ្ឌដូនពេញ បានបើកកិច្ចប្រជុំគណៈបញ្ជាការឯកភាពខណ្ឌកាលពីព្រឹកថ្ងៃទី៣០ មីនា ២០១១ ដើម្បីបង្កើតអនុគណៈកម្មការថ្នាក់ខណ្ឌក្នុងការជួយរៀបចំកិច្ចប្រជុំកំពូលអាស៊ាន និងកិច្ចប្រជុំពាក់ព័ន្ធនៅឆ្នាំ២០១២ ធ្វើយ៉ាងណាឱ្យមានដំណើរការល្អ។ លោកអភិបាលខណ្ឌបានមានប្រសាសន៍ថា កន្លងមកបានអនុវត្តភូមិ សង្កាត់ មានសុវត្ថិភាពបានល្អប្រសើរ ហើយនៅពេលខាងមុខនេះ សាលាខណ្ឌបានលើកទិសដៅពង្រឹងការការពារសន្តិសុខ សណ្តាប់ធ្នាប់ និងបង្កើតអនុគណៈកម្មការថ្នាក់ខណ្ឌ ក្នុងការជួយរៀបចំកិច្ចប្រជុំកំពូលអាស៊ាន និងកិច្ចប្រជុំពាក់ព័ន្ធនៅឆ្នាំ២០១២ ដោយមានរូបលោកជាប្រធាន លោកឯក ឃុនឌឿន អនុប្រធានអចិន្ត្រៃយ៍ លោកសុខ ពេញវុធ អនុប្រធាន លោកយស យុទ្ធី អនុប្រធាន លោកស្រីមុត យ៉ងសូនី អនុប្រធាន ព្រមទាំងសមាជិក សមាជិកាចំនួន១៨រូបទៀត ។ អនុគណៈកម្មការនេះមានភារកិច្ចចូលរួមប្រជុំទទួលផែនការ រៀបចំផែនការសកម្មភាពលម្អិតសម្រាប់អនុវត្តការងារផ្សេងៗ ដើម្បីការពារសន្តិសុខ ដល់អនុគណៈកម្មការថ្នាក់រាជធានី ដើម្បីលើកផែនការកំណត់គោលដៅការពារ ចាត់តាំង ប្រើប្រាស់ និងពង្រាយកម្លាំងសន្តិសុខ រៀបចំសណ្តាប់ធ្នាប់សង្គ្រោះ ធានាសន្តិសុខ សុវត្ថិភាព សណ្តាប់ធ្នាប់ និងការសង្គ្រោះសម្រាប់គណៈប្រតិភូថ្នាក់ដឹកនាំជាតិ អន្តរជាតិ និងកិច្ចប្រជុំជាបន្តបន្ទាប់ ។ រៀបចំគំរោងផែនការត្រៀមបំរុងដើម្បីដោះស្រាយជាបន្ទាន់នូវហេតុការណ៍អសន្តិសុខជាយថាហេតុ។ រៀបចំ យន្តការ និងប្រើប្រាស់មធ្យោបាយបច្ចេកទេសនានា ដើម្បីគ្រប់គ្រងធានាសន្តិសុខ សុវត្ថិភាព ជូនថ្នាក់ដឹកនាំជាតិ និងគណៈប្រតិភូអញ្ជើញចូលរួមកម្មវិធីទាំងឡាយនៃកិច្ចប្រជុំនៅក្នុងមូលដ្ឋានខណ្ឌដូនពេញ រាជធានីភ្នំពេញ។ ត្រួតពិនិត្យ និងរក្សាសន្តិសុខសណ្ដាប់ធ្នាប់ អនាម័យ ព្រមទាំងតុបតែងលំអភ្លើងពណ៌និងដោតទង់ជាតិ ទង់ជ្វាលាតាមដងផ្លូវនានាក្នុងមូលដ្ឋានដែលប្រតិភូបាន ធ្វើដំណើរឆ្លងកាត់។ ជាមួយនេះដែរ ត្រូវត្រួតពិនិត្យ និងរក្សាសន្តិសុខ២៤ម៉ោងលើ២៤ម៉ោងនៅតាមសណ្ឋាគារដែលប្រតិភូស្នាក់នៅទីកន្លែងប្រជុំ និងទីតាំងទស្សនកិច្ចផ្សេងៗក្នុងមូលដ្ឋានខណ្ឌ ៕ |
| ឆែកឆេររទះ៣ដែលអូសចេញពីដីសៀមឃើញសាច់ខូចគុណភាពជិតមួយតោន Posted: 29 Mar 2011 11:10 PM PDT     ក្រុងប៉ោយប៉ែត ៖ ទំនិញ និងសាច់ខូចគុណភាព ព្រមទាំងត្រីដែលឈ្មួញលួចដាក់បង្កប់តាមរទេះចំនួន៣គ្រឿង ហើយជួលកម្មករអូសចេញពីដីសៀមបានត្រូវសមត្ថកិច្ចកាំកុងត្រូលសហការជាមួយមន្ត្រីគយនិងរដ្ឋាករ មន្ត្រីគណៈកម្មការច្រកទ្វារ និងប៉ូលិសអន្តោប្រវេសន៍ឆែកឆេរចាប់បានចំនួនជិត១តោន កាលពីវេលាម៉ោង៩ព្រឹក ថ្ងៃទី២៩ មីនា ហើយយកទៅដុតកម្ទេចចោលនាវេលាម៉ោង២រសៀលថ្ងៃដដែល ។ ទំនិញនិងសាច់ខូចគុណភាពទាំងនេះរួមមានសាច់មាន់ចម្រុះ៣៥០គីឡូក្រាម ប្រហិតសាច់មាន់៣៦គីឡូក្រាម ត្រី៤៦០គីឡូក្រាម សាច់ជ្រូក៣០គីឡូក្រាម ស៊ុតមាន់-ទា៦០០គ្រាប់ ទំពាំងជ្រក់១ធុងស្មើនឹង២០គីឡូក្រាម កម្រេចនំ២៦០គីឡូក្រាម និងកម្រេចមី១៣០គីឡូក្រាម។ សាច់ខូចគុណភាពទាំងនោះត្រូវឈ្មួញដឹកបង្កប់ក្នុងរទេះ ដោយរទេះខ្លះរៀបសាច់ពីក្រោមដាក់បន្លែពីលើ និងរទេះខ្លះដាក់ត្រីពីលើដាក់សាច់ពីក្រោម ក្នុងនោះតាមថង់ត្រីខ្លះបង្កប់ទាំងសាច់មាន់ខូចគុណភាពពីខាងក្នុងទៀតផង ។ ម្ចាស់រទេះទាំង៣នាក់ មានស្ត្រី២នាក់ និងបុរសម្នាក់ រួមមាន ១-ឈ្មោះសុខ ញឹប ភេទ ស្រី អាយុ៣២ឆ្នាំ ២-ឈ្មោះផន ដា ភេទស្រី អាយុ៣៩ឆ្នាំ និង៣-ឈ្មោះឯម នឿម ភេទប្រុស អាយុ៣២ឆ្នាំ។ ក្នុងចំណោមរទេះទាំង៣គ្រឿងខាងលើគឺរទេះឈ្មោះសុខ ញឹប ដឹកច្រើនជាងគេ។ បើតាមមន្ត្រីជំនាញនិយាយថា ស្ត្រីឈ្មោះសុខ ញឹប ជាមុខសញ្ញាធ្លាប់ចាប់បានសាច់ខូចគុណភាពជាច្រើនដងមកហើយ ។ លោកអ៊ុត សុភាព ប្រធានសាខាកាំកុងត្រូលខេត្តបន្ទាយមានជ័យ បានឱ្យដឹងថា ការឆែកឆេររទេះរកឃើញសាច់ខូចគុណភាពហើយដុតកម្ទេចចោលទាំងត្រីជិតកន្លះតោនផងដែរនោះ គឺព្រោះតែត្រីទាំងនោះវាមានការបន្តភាពសាយភាយពីសាច់ខូចគុណភាពដែលដាក់បង្កប់ពីខាងក្នុង។ លោកបន្តថា ដោយអនុវត្តតាមបទបញ្ជាដ៏ម៉ឺងម៉ាត់របស់លោកម៉ក់ ពេជ្ជរិទ្ធ អគ្គនាយកកាំកុងត្រូលឱ្យមន្ត្រីក្រោមឱវាទយកចិត្តទុកដាក់បង្ក្រាបរាល់ទំនិញ និងសាច់ខូចគុណភាពដើម្បីការពារសុខុមាលភាពប្រជាពលរដ្ឋ ទើបមន្ត្រីរបស់លោកក៏ដូចជារូបលោកផ្ទាល់តែងតែធ្វើការត្រួតពិនិត្យ និងឆែកឆេររទេះតាមច្រកទ្វារដើម្បីទប់ស្កាត់ការនាំចូលទំនិញ និងសាច់ខូចគុណភាពយកទៅដុតកំទេចចោលបានជាបន្តបន្ទាប់។ |
| You are subscribed to email updates from Koh Santepheap Daily To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
