VOA News: ព័ត៌មាន: “អេហ្វប៊ីអាយបិទសំណុំរឿង តែជនរងគ្រោះបន្តប្តឹងរឿងបោកគ្រាប់បែកឆ្នាំ១៩៩៧” plus 1 more |
| អេហ្វប៊ីអាយបិទសំណុំរឿង តែជនរងគ្រោះបន្តប្តឹងរឿងបោកគ្រាប់បែកឆ្នាំ១៩៩៧ Posted: 31 Mar 2011 03:17 PM PDT ការិយាល័យស៊ើបអង្កេតរបស់រដ្ឋាភិបាលសហរដ្ឋអាមេរិក ឬ អេហ្វប៊ីអាយ (FBI) ទៅលើករណីគប់គ្រាប់បែកលើបាតុកម្មគណបក្សប្រឆាំងដឹកនាំដោយលោក សម រង្ស៊ី កាលពីខែមីនាឆ្នាំ១៩៩៧ បានបិទបញ្ចប់ ហើយមិនមានអ្នកណាម្នាក់ទទួលខុសត្រូវលើការគប់គ្រាប់បែកនោះឡើយរហូតមកដល់ពេលនេះ។ ប៉ុន្តែជនរងគ្រោះនៅបន្តទាមទារស្វែងរកយុត្តិធម៌តាមវិធីផ្សេងៗដែលគេអាចធ្វើបាន។ ការិយាល័យ អេហ្វប៊ីអាយ បានបិទការស៊ើបអង្កេតអស់ជាច្រើនឆ្នាំហើយដោយមិនបញ្ជាក់ឱ្យដឹងថា អ្នកណានៅពីក្រោយខ្នងការបញ្ជាឱ្យមានការគប់គ្រាប់បែកលើក្រុមបាតុករអហិង្សាកាលពីថ្ងៃទី៣០ខែមិនាឆ្នាំ១៩៩៧ ឡើយ ប៉ុន្តែសម្រាប់លោក រ៉ន អាប់នី ការតស៊ូទាមទាររកយុត្តិធម៌នៅបន្តនៅឡើយ។ លោក រ៉ន អាប់នី ជាអតីតប្រធានវិទ្យាស្ថានសាធារណរដ្ឋអន្តរជាតិ គឺជាជនជាតិអាមេរិកាំងតែម្នាក់គត់បានទទួលរងរបួសក្នុងការវាយប្រហារដោយគ្រាប់នោះ ដោយត្រូវរបួសត្រង់ត្រគាក និងភ្លៅខណៈពេលដែលទៅសង្កេតមើលបាតុកម្មដឹកនាំដោយលោកសម រង្ស៊ី ទាមទារឱ្យមានការកែប្រែប្រព័ន្ធយុត្តិធម៌។ មានជនរងគ្រោះ១៦នាក់ផ្សេងទៀតបានស្លាប់បាត់បង់ជីវិតនិងរបួសជាង១៥០នាក់។ អ្នករងគ្រោះមានដូចជាបាតុករ អ្នកលក់ដូរសាមញ្ញ និងអ្នកសារព័ត៌មានជាដើម។ នៅក្នុងកិច្ចខិតខំប្រឹងប្រែងចុងក្រោយ កាលពីថ្ងៃទី២៣ខែកញ្ញាឆ្នាំ២០១០ ក្រុមមេធាវីរបស់លោក រ៉ន អាប់នី បានដាក់ពាក្យប្តឹងតវ៉ាទៅការិយាល័យរដ្ឋអាជ្ញាទីក្រុងញូវយ៉កក្នុងគោលបំណងនាំយករឿងក្តីនេះឱ្យមានការជំនុំជម្រះនៅក្នុងតុលាការឡើងវិញបន្ទាប់ពីស្ងប់ស្ងាត់អស់មួយរយៈ។ លោក រ៉ន អាប់នីបានប្រាប់វីអូអេ សំឡេងសហរដ្ឋអាមេរិកថា លោកធ្វើនេះគឺដើម្បីយុត្តិធម៌សម្រាប់ជនរងគ្រោះទាំងអស់។ លោក អាប់នី បានប្រាប់វីអូអេខ្មែរថា៖ «ការប្តឹងនេះគឺដើម្បីក្រុមគ្រួសារជនរងគ្រោះទាំងនោះ គឺមានដូចជាក្រុមគ្រួសារអ្នកលក់អំពៅ អ្នកថតរូបជប៉ុន និងរូបខ្ញុំជាដើម។ យើងទទួលរងគ្រោះពីការប៉ុនប៉ងធ្វើឃាត។ យើងទទួលរងរបួស អ្នកដទៃទៀតស្លាប់បាត់បង់ជីវិត។ ទាំងនេះហើយបានជាខ្ញុំត្រូវធ្វើកិច្ចការនេះគឺមិនមែនដើម្បីខ្លួនខ្ញុំទេ»។ ការបោកគ្រាប់បែកដែលបណ្តាលឱ្យមានជនជាតិអាមេរិកទទួលរងរបួសនោះបាននាំឱ្យមានការចូលស៊ើបអង្កេតពីការិយាល័យស៊ើបអង្កេតរបស់រដ្ឋាភិបាលសហព័ន្ធ អេហ្វប៊ីអាយ។ យោងតាមឯកសារស៊ើបអង្កេតដែលអេហ្វប៊ីអាយ បានបញ្ចេញឱ្យវីអូអេសំឡេងសហរដ្ឋអាមេរិកនូវផ្នែកខ្លះៗក្នុងពេលថ្មីៗនេះបង្ហាញថា មានសាក្សី និងជនរងគ្រោះជាច្រើនត្រូវបានសម្ភាសដោយមានការចូលរួម និងគ្មានការចូលរួមពីភាគីកម្ពុជា។ ការសម្ភាសត្រូវបានធ្វើនៅកម្ពុជា ថៃ និងសហរដ្ឋអាមេរិកជាដើម។ ក្នុងចំណោមអ្នកដែលអេហ្វប៊ីអាយ សម្ភាសមានក្រុមអង្គរក្សរបស់លោកនាយករដ្ឋមន្រ្តីហ៊ុន សែន ដោយសារពួកគេមានវត្តមានខុសប្រក្រតីឈរយាមនៅក្បែរកន្លែងកើតហេតុ ហើយមានការចោទប្រកាន់ថា ពួកគេអាចនឹងមានជាប់ពាក់ព័ន្ធក្នុងការជួយសម្រួលជនល្មើសគេចខ្លួន។ ការស៊ើបអង្កេតនោះបានបិទជាស្ថាពរដោយមិនបង្ហាញជាក់លាក់ថា អ្នកណានៅពីក្រោយពិតប្រាកដ។ អេហ្វប៊ីអាយសន្និដ្ឋានថា លោក រ៉ន អាប់នីមិនមែនជាគោលដៅនៃការវាយប្រហារនោះទេនៅពេលដែលលោកទៅសង្កេតមើលការធ្វើបាតុកម្មនោះ។ លោក ម៉ថុន ស្ក្លារ (Morton Sklar) មេធាវីកាន់សំណុំរឿងនេះបានបញ្ជាក់ប្រាប់វីអូអេសំឡេងសហរដ្ឋអាមេរិកផ្នែកខេមរភាសាថា ការប្តឹងនេះគឺក្នុងទម្រង់ជាបទល្មើសព្រហ្មទណ្ឌប្រឆាំងនឹងលោកហ៊ុន សែន និងកូនចៅរបស់លោកពីបទទប់ស្កាត់ការស្វែងរកយុត្តិធម៌ និងកុហកក្រុមស៊ើបអង្កេត អេហ្វប៊ីអាយ៖ លោកបានបន្ថែមទៀតថា៖ «ការដាក់ពាក្យប្តឹងតវ៉ាលើករណីព្រហ្មទណ្ឌកាលពីខែកញ្ញាគឺជាផ្នែកមួយនៃកិច្ចខិតខំប្រឹងប្រែងដ៏ធំមួយដែលយើងធ្វើឡើងដើម្បីដាក់សម្ពាធលើលោកហ៊ុន សែន ទាក់ទងនឹងការរំលោភសិទ្ធិមនុស្សយ៉ាងរាលដាលទាំងក្នុងពេលអតីតកាល និងបច្ចុប្បន្ន»។ ប៉ុន្តែលោក ម៉ថុន បានប្រាប់ឱ្យដឹងថា លោកនាយករដ្ឋមន្រ្តី ហ៊ុន សែនអាចនឹងយកអភ័យឯកសិទ្ធិរបស់លោកក្នុងនាមជាមេដឹកនាំប្រទេសមួយដើម្បីគេចផុតពីការនាំយកមកកាត់ទោសក្នុងរយៈពេលដែលលោកនៅកាន់អំណាច។ យោងតាមឯកសារស៊ើបអង្កេតរបស់ អេហ្វប៊ីអាយ មានគ្រាប់បែកចំនួនបួនគ្រាប់ត្រូវបានជនមិនស្គាល់មុខគប់លើហ្វូងបាតុករអហិង្សា។ លោក សំរិទ្ធ ដួងហាក់ អតីតអ្នកសារព័ត៌មានដែលបានរងរបួសពីការវាយប្រហារដោយគ្រាប់បែកក្នុងពេលដែលចុះទៅយកព័ត៌មានបាតុកម្មនោះបានបញ្ជាក់ថា៖ «ក្នុងនាមជាជនរងគ្រោះយើងឃើញហើយមនុស្សម្នាក់ដែលពិការជិតពីរខែដើរមិនរួច តើខ្ញុំឈឺចាប់ប៉ុន្មាន ហើយទន្ទឹមហ្នឹងនោះវាមិនត្រឹមតែខ្ញុំដើរមិនរួចពីរខែប៉ុណ្ណឹង មានអ្នកខ្លះបានស្លាប់បាត់បង់ជីវិត បងប្អូនប្តីសី សាច់ញាតិ របស់គេទៀតដូច្នេះយើងគួរថាបណ្តោយឱ្យមាននិទណ្ឌភាពជាបន្តបន្ទាប់ទៅតើជាគំរូល្អសម្រាប់នីតិរដ្ឋមួយទេ?» លោក រ៉ន អាប់នីតែងតែធ្វើដំណើរជាប្រចាំត្រឡប់ទៅប្រទេសកម្ពុជាវិញដោយសារលោកមានមជ្ឈមណ្ឌលជួយដល់ក្រុមកុមារកំព្រានៅទីនោះ។ លោកនៅចងចាំពីអនុស្សាវរីយ៍ឈឺចាប់នោះក៏ប៉ុន្តែមិនបង្ហាញពីការភ័យខ្លាចអ្វីទេដោយលោកបញ្ជាក់ថា៖ «គេតែងតែប្រាប់ខ្ញុំថាបើលោកគេចផុតពីគ្រាប់បែកលើកទីមួយ លោកក៏អាចគេចផុតពីគ្រាប់បែកទីពីរដែរ»។ នៅកម្ពុជាវិញ លោក រ៉ន អាប់នី សង្កេតឃើញថា ការចងចាំពីការវាយប្រហារដោយគ្រាប់បែកនេះហាក់ដូចជាត្រូវបានគេបំភ្លេចទៅហើយ លើកលែងតែគណបក្សប្រឆាំងប៉ុណ្ណោះដែលនៅ មានការចាប់អារម្មណ៍ក្នុងការតស៊ូស្វែងរកយុត្តិធម៌សម្រាប់ជនរងគ្រោះដោយដាក់ពាក្យប្តឹងជាបន្តបន្ទាប់។ ពាក្យបណ្តឹងតវ៉ាចុងក្រោយនោះត្រូវបានដាក់ប្តឹងខណៈពេលដែលលោក ហ៊ុន សែន កំពុងមានវត្តមាននៅ បូរីញ៉ូវយ៉ក សហរដ្ឋអាមេរិក។ វីអូអេនៅមិនទាន់ទទួលបានការបកស្រាយជាផ្លូវការណាមួយពីខាងលោកនាយករដ្ឋមន្រ្តី ហ៊ុន សែនទេ ដើម្បីឆ្លើយតបនឹងពាក្យបណ្តឹងចុងក្រោយនេះ។ ទីប្រឹក្សារបស់លោកប៉ុន្មាននាក់ដែលវីអូអេព្យាយាមទាក់ទងក្នុងរយៈពេលប៉ុន្មានថ្ងៃនេះមិនហ៊ានធ្វើអត្ថាធិប្បាយអ្វីទេ។ លោកប្រាក់ សុខុនទីប្រឹក្សាម្នាក់បានបញ្ជាក់ថារឿងនេះយូរពេកណាស់ហើយ។ ប៉ុន្តែទីប្រឹក្សារបស់លោក ហ៊ុន សែនមួយរូបគឺលោក ស្រ៊ី ថាមរង្គ ធ្លាប់បានប្រាប់វីអូអេក្នុងពេលដែលលោកហ៊ុន សែនមកទីក្រុងញ៉ូវយ៉កកាលពីខែកញ្ញាថាលោក មិនយកចិត្តទុកដាក់លើការដាក់ពាក្យបណ្តឹងនោះទេ។ យ៉ាងណាក៏ដោយលោក រ៉ន អាប់នី ទទួលស្គាល់ថាការចាប់អារម្មណ៍លើករណីនេះនៅក្នុងប្រព័ន្ធយុត្តិធម៌អាមេរិកនៅមានកម្រិតទាបនៅឡើយដែរ។ លោកបានប្រាប់វីអូអេក្រោយពីទើបត្រឡប់មកពីកម្ពុជានាពេលថ្មីៗនេះថា៖ «ខ្ញុំត្រូវធ្វើការងារច្រើនដោយសារឥឡូវនេះខ្ញុំបានត្រឡប់មកពីកម្ពុជាវិញ ហើយគឺត្រូវព្យាយាមទាក់ទាញរកខាងស្ថាប័ននីតិប្បញ្ញតិចូលរួម។ ដូច្នេះខ្ញុំត្រូវធ្វើការងារនេះជារៀងរាល់ថ្ងៃ»។ សម្រាប់លោក រ៉ូនី ការបន្តប្តឹងនៅតុលាការសហរដ្ឋអាមេរិកគឺជាជំហានថ្មីមួយទៀតប៉ុណ្ណោះ នៅមានប្រទេសមួយចំនួនទៀតដែលលោកនិងមេដឹកនាំបក្សប្រឆាំងដែលជាតួអង្គសំខាន់ក្នុងការរៀបចំឱ្យមានបាតុកម្មតាំងពីដំបូងទីគ្រោងនឹងបន្តយករឿងក្តីរបស់លោកទៅបន្តប្តឹងដើម្បីរកយុត្តិធម៌៕ This posting includes an audio/video/photo media file: Download Now |
| ក្រុមអ្នកវិភាគស្នើឱ្យសុំព្រះរាជតម្រិះអតីតព្រះមហាក្សត្រលើករណីព្រះវិហារ Posted: 31 Mar 2011 01:40 PM PDT ព្រះមហាវីរក្សត្រសម្តេចឪព្រះនរោត្តម សីហនុបានដឹកនាំការតស៊ូផ្លូវច្បាប់ នៅឯតុលាការយុត្តិធម៌អន្តរជាតិ រហូតទាល់តែឈ្នះក្តីក្តាំជាមួយប្រទេសសៀមឬប្តូរមកប្រទេសថៃបច្ចុប្បន្ន ជិតកន្លះសតវត្សរ៍ហើយ។ តុលាការបានផ្ទេរ ប្រាសាទព្រះវិហារ ឲ្យស្ថិត នៅក្រោម ការគ្រប់គ្រងរបស់កម្ពុជាវិញ។ ព្រះអង្គត្រូវ គេចាត់ទុកថា ជាសាក្សីរស់ដ៏សំខាន់ ដែលមានបទពិសោធន៍ច្រើន ដែលរដ្ឋាភិបាលកម្ពុជាគួរស្វែងរកឱវាទ និងអនុសាសន៍ពីព្រះអង្គ ជាពិសេសបញ្ហាពាក់ព័ន្ធនឹងផ្លូវច្បាប់នានាទាក់ទងនឹងការតវ៉ាលើឆាកអន្តរជាតិ ឬ ការទាមទារឲ្យតុលាការយុត្តិធម៌អន្តរជាតិ ត្រួតពិនិត្យការអនុវត្តន៍សាលដីកាឡើងវិញ។ លោក បណ្ឌិត ម៉ីសែល ត្រាណេសាស្ត្រាចារ្យផ្នែកវប្បធម៌ និងបុរេប្រវត្តិបានថ្លែងថាព្រះមហាវីវរក្សត្រជាសាក្សីរស់ដែលគេគួរសុំការណែនាំពីព្រះអង្គ។ «ក៏ប៉ុន្តែមុននឹងព្រះអង្គលោកសុគត គប្បីយើងត្រូវតែគឺថាស្នើទៅព្រះអង្គ មើល ទៅសួរយោបល់មើល សម្តេចនាយកលោកស្នើមើល។ គេដាក់ថ្វាយទាំងអស់កុំគិតរឿងក្នុងពេលហ្នឹង ស្នើមើល ស្នើសម្តេចនាយកផង ស្នើព្រះករុណា សុំព្រះឱវាទ លោកមានព្រះអនុសាសន៍ អាហ្នឹងបង្ហាញពីរូបភាព (ឯកភាពជាតិ)»។ ខណៈពេលដែលកំពុងត្រៀមខ្លួនទៅចរចាជាមួយថៃនៅប្រទេសឥណ្ឌូនេស៊ីថ្ងៃទី៧នឹងថ្ងៃទី៨ ខែមេសា អំពីបញ្ហា ការដាក់ក្រុមអ្នកសង្កេតការណ៍អាស៊ានមកកាន់តំបន់ជម្លោះដើម្បីត្រួតពិនិត្យមើលបទឈប់បាញ់គ្នាជាស្ថាពរ និងការចរចាអំពីការរកដំណោះស្រាយព្រំដែន។ ប្រទេសកម្ពុជាបានរៀបចំក្រុមអ្នកច្បាប់ជួលមេធាវីអន្តរជាតិដើម្បីទាមទារឲ្យតុលាការយុត្តិធម៌អន្តរជាតិបកស្រាយសាលដីកា ថ្ងៃទី១៥ មិថុនាឆ្នាំ១៩៦២ ឡើងវិញ ហើយនឹងត្រួតពិនិត្យការអនុវត្តសាលដីកាឡើងវិញថាតើថៃ កម្ពុជាបានគោរពតាមឬទេ ហើយបញ្ជាក់ឡើងវិញថាតើដីត្រង់ណា ជារបស់ខ្មែរនិងដីត្រង់ណាជារបស់ថៃ។ លោក មីសែល ត្រាណេ បានអះអាងថាសម្តេចឪ ជាតំណាងឯកភាពជាតិ ការបង្រួបបង្រួមជាតិ សាមគ្គីជាតិ ហើយបង្ហាញការខកចិត្ត បើគេពុំគិតអំពីតួនាទីរបស់ព្រះអង្គ។ «សោកស្តាយបំផុតដែលគេមិនបាននឹកដល់គុណបំណាច់ដ៏មហាធំធេង។ បងនៅចាំថាលោកមានបន្ទូលល្អណាស់គឺថាដីមួយចំអាមក៏មិនឲ្យបាត់បង់ដែរ។ហើយលោកបានសម្រេចបំណងពិសិដ្ឋហើយ»។ ឧត្តមទីប្រឹក្សាព្រះមហាក្សត្រ លោក សឺន ស៊ូប៊ែរ្តិ៍ ដែលឪពុករបស់លោកគឺលោក សឺន សាន ជាអ្នកធ្លាប់ជួយសម្តេចឪក្នុងការតវ៉ារឿងប្រាសាទព្រះវិហារ ជាមួយឥស្សរជននយោបាយផ្សេងទៀតនោះ បានអះអាងថា ជាការណ៍ចាំបាច់ដែលគេ ត្រូវស្វែងរកឱវាទពីសម្តេចឪ ពីព្រោះក្រោយពីព្រះអង្គទាមទារឯករាជ្យពីបារាំងសម្រាប់កម្ពុជា ជាជោគជ័យមួយលើកទៀតសម្រាប់កម្ពុជាដែលព្រះអង្គ បានទាមទារ ប្រាសាទព្រះវិហារពីការគ្រប់គ្រងរបស់ថៃមកឲ្យស្ថិតនៅក្រោម ការគ្រប់គ្រងកម្ពុជាវិញ។ «ម៉្លោះហើយគួរណាស់ពិគ្រោះជាមួយលោក យកព្រះរាជយោបល់របស់លោក ព្រោះលោក មានការពិសោធច្រើនក្នុងរឿងទូតរឿងច្បាប់ រឿងអីអស់ហ្នឹង ព្រោះមែនទែនទៅជារឿងជាតិ មិនមែនជារឿងគណបក្សណាមួយ ឬបុគ្គលណាមួយទេ ត្រូវតែមានជាតិរួមគ្នាទាំងអស់ ហើយដោះស្រាយបញ្ហា ទឹកដីរបស់យើងហ្នឹង»។ លោក ផៃ ស៊ីផាន អ្នកនាំពាក្យនៃទីស្តីការគណៈរដ្ឋមន្ត្រីបានអះអាងថា ព្រះមហា វីរក្សត្រ ទោះជាព្រះអង្គមិនស្ថិតនៅក្នុងអំណាចដែលចែងក្នុងរដ្ឋធម្មនុញ្ញក្តី ក៏ព្រះអង្គតែងផ្តល់ឱវាទជាគំនិតដល់រាជរដ្ឋាភិបាលដែរ។ «ហើយយើងឃើញជួនកាលម្តងម្កាលដែលព្រះមហាវីរក្សត្រផ្ញើចុតហ្មាយជាចំហមក ហ្នឹងជាការឯកភាពជាតិមួយ ហើយជាការជួយគាំទ្រសកម្មភាពរបស់ រាជរដ្ឋាភិបាលក្នុងកិច្ចការពារប្រាង្គប្រាសាទព្រះវិហារក៏ដូចជាអធិបតេយ្យរបស់ កម្ពុជានៅតំបន់នោះឯង។ អាស្រ័យដូច្នេះយើងឃើញថាតួនាទីរបស់ព្រះអង្គមាន ជាប្រវត្តិសាស្ត្ររួចស្រេចទៅហើយ។ ក៏ប៉ុន្តែឥឡូវនេះចំពោះករណីតុលាការគឺជាករណីផ្សេងដទៃទៀត មិនមែនជាករណីដូចកាលពីមុន»។ លោក ផៃ ស៊ីផាន បានបញ្ជាក់ពីការទទួលស្គាល់បន្ថែមពីស្នាព្រះហស្ថរបស់ព្រះមហាវីរក្សត្រថាព្រះអង្គបានទាមទារប្រាសាទព្រះវិហារនិងអធិបតេយ្យភាពជាតិកម្ពុជាជាមួយនឹងការប្រើប្រាស់ផែនទីអន្តរជាតិក្នុងតុលាការយុត្តិធម៌អន្តរជាតិ ដែល ជាចំណុចសំខាន់បំផុត។ សម្តេចឪព្រះជន្ម៨៨ព្រះវស្សាដែលគេទទួលស្គាល់ថាជាអ្នកនយោបាយជើងចាស់កាន់អំណាច និង សោយរាជ្យជាមហាក្សត្រជាច្រើនទសវត្សរ៍នោះ ត្រូវគេចាត់ទុកថាគឺជាក្សត្រដ៏មានឥទ្ធិពលនយោបាយទាំងក្នុងនិងក្រៅប្រទេស។ ព្រះអង្គបានដាក់រាជ្យកាលពីឆ្នាំ២០០៤ ហើយកំពុងគង់ព្យាបាលព្រះរោគនៅទីក្រុងប៉េកាំងប្រទេសចិន។ ប្រទេសកម្ពុជានិងថៃមានបញ្ហាវិវាទព្រំដែនជាមួយគ្នាឈានដល់ការវាយប្រយុទ្ធគ្នាជាច្រើនលើក រហូតដល់មានការស្លាប់និងរបួសទាំងសងខាង និងធ្វើឲ្យបែក បាក់ដល់ប្រាសាទព្រះវិហារផងដែរដោយសារតែការចោទប្រកាន់រឿង រំលោភ បំពានបូរណភាពដែនដីទៅវិញទៅមក ជាពិសេសដីនៅក្បែរ បរិវេណប្រាសាទ ព្រះវិហាររបស់ខ្មែរ។ ថៃបានចាត់ទុកថាតុលាការអន្តរជាតិបានកាត់តែប្រាសាទ ឲ្យភាគីកម្ពុជាទេ មិនមែនដីនៅក្បែរនោះទេ។ ក៏ប៉ុន្តែកម្ពុជាវិញបានអះអាង ដោយឈរលើផែនទីអន្តរជាតិទទួលស្គាល់ថាដីដែលមានជម្លោះជាដីរបស់ខ្មែរដូចជាមានចែងក្នុងឧបសម្ព័ន្ធផែនទី ហើយនឹងឯកសារដែលតុលាការអន្តរជាតិក្រុងឡាអេ បានប្រើប្រាស់ក្នុងការកាត់ក្តីឲ្យមកកម្ពុជា៕ This posting includes an audio/video/photo media file: Download Now |
| You are subscribed to email updates from VOA News: ព័ត៌មាន To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
